ပလီဟီၣ်ကဝီၤပယီၤသုးနုၥ်လီၤလၢကမျၢၢ်ပှၤဃ့ၢ်မှံဟးဖျိးဟံၣ်ပူၤဒီးဟံးန့ၢ်ကွံၥ်ကမျၢၢ်တၢ်ဖိတၢ်လံၤ
လါအီးကထိဘၢၣ် ၃၀ သီ, ၂၀၂၄ နံၣ်, ခ့ၣ်အဲးစံၣ် တနီသရံၣ်ကီၢ်ခီဒိၣ်-ပလီကီၢ်ဆၣ်ဟီၣ်ကဝီၤအပူၤတၢ်ဒုးကဲထီၣ်ဝဲလၢပယီၤသုးကီၣ်ကးဒီးတၢ်ပၢၢ်ဆၢသုးပၥ်ဖှိၣ်သ့ၣ်တဖၣ်အဘၢၣ် စၢၤဒီးပယီၤသုးသ့ၣ်တဖၣ်အံၤနုၥ်လီၤဘၢၣ်ဖျိးကွံၥ်ဝဲဒူသဝီအပူၤကမျၢၢ်ပှၤဃ့ၢ်မှံဟးဖျိးအဟံၣ်သ့ၣ်တဖၣ်ဝံၤဟံးန့ၢ်ကွံၥ်ဝဲကမျၢၢ်တၢ်ဖိတၢ်လံၤအဂ့ၢ်န့ၣ်လီၢ်ကဝီၤကမျၢၢ်သ့ၣ်တဖၣ်စံးဝဲဒၣ်န့ၣ်လီၤ. ပယီၤသုးကီၣ်ကးသုးကျိၤလၢဟဲနုၥ်လီၤဆူပလီကီၢ်ဆၣ်ဒူသဝီအပူၤသ့ၣ်တဖၣ်အံၤနုၥ်လီၤဘၢၣ်ဖျိးကွံၥ်ဝဲကမျၢၢ်ပှၤဃ့ၢ်မှံဟးဖျိးသ့ၣ်တဖၣ်အဟံၣ်ပူၤဒီးဟံးန့ၢ်ကွံၥ်ဝဲကမျၢၢ်တၢ်ဖိတၢ်လံၤလၢအလုၢ်ဒိၣ်ပှ့ၤဒိၣ်သ့ၣ်တဖၣ်အဂ့ၢ်ပလီဝ့ၢ်ပှၤလီၢ်ကဝီၤဖိတဂၤစံးဝဲဒၣ်ဒ်အံၤန့ၣ်လီၤ. "အါဒၣ်တၢ်တက့ၢ်န့ၣ်တၢ်ဒုးကဲထီၣ်ဝဲလၢဒူသဝီတကပၤန့ၣ်အါမီၤနီၤ. ပှၤလၢဟဲထီၣ်ဃ့ၢ်အိၣ်ကဒုသးလၢဝ့ၢ်ပူၤအိၣ်ဝဲလီၤ. သုးကီၣ် ကးသ့ၣ်တဖၣ်န့ၣ်ညီနုၢ်ကမျၢၢ်ပှၤလီၢ်ကဝီၤဖိမ့ၢ်ဃ့ၢ်အိၣ်ကဒုအသးလံန့ၣ်နုၥ်လီၤဝဲလၢဟံၣ်ပူၤဟံးန့ၢ်ကွံၥ်ဝဲကမျၢၢ်တၢ်ဖိတၢ်လံၤလီၤ." အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဖဲပူၤကွံၥ်လါအီးကထိဘၢၣ်(၂၃)သီအနံၤန့ၣ်ပယီၤသုးကီၣ်ကးက့ၤအိးထီၣ်က့ၤဝဲ(ဘျံး-ဒဝဲၢ်)ကျဲမုၢ်အံၤဝံၤအလီၢ်ခံတကီၢ်ခါခဲအံၤတၢ် ဒုးကဲထီၣ်ကဒါက့ၤဝဲဒၣ်ဒီးလီၢ်ကဝီၤတၢ်ပၢၢ်ဆၢသုးပၥ်ဖှိၣ်ကရူၢ်ဒီးပယီၤသုးကီၣ်ကးအဘၢၣ်စၢၤဖဲ(ပလီကီၢ်ဆၣ်,သ့ၤကါ)သဝီခိၣ် ဃၢၤတၢ်လီၢ်ပူၤအဂ့ၢ်န့ၣ်ဘျံးကမျၢၢ်တၢ်ဒီသဒၢသုးကရူၢ်အပှၤသုးဖိတဂၤစံးဝဲဒၣ်န့ၣ်လီၤ. အဝဲစံးဝဲလၢ "(ပကဖ)တကပၤထုးထီၣ်ပၥ်ဖျါလၢတဘၣ်လ့ၢ်ထီၣ်လ့ၢ်လိၤဖဲမုၢ်ကျဲန့ၣ်ဘၣ်အိၣ်ဝဲလီၤ. သုးကီၣ်ကးတကပၤန့ၣ်ပျဲ ဝဲကမျၢၢ်မီၤနီၤ. ဖဲန့ၣ်ဝံၤအလီၢ်ခံစးထီၣ်ဖဲ(၂၆)သီအလီၢ်ခံန့ၣ်တၢ်ဒုးကဲထီၣ်ဝဲတပယူၥ်ဃီလီၤ. တၢ်ဒုးန့ၣ်ဆူၣ်ဒံးအဖၢမုၢ်လီၤ." အဂ့ၢ် န့ၣ်စံး ဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. မ့ၢ်လၢတၢ်ဒုးကဲထီၣ်ဝဲလၢဖးယံၥ်ဖးထီဒ်အံၤအဖီခိၣ်အဃိကမျၢၢ်ပှၤလီၢ်ကဝီၤဖိလၢအိၣ်ပလီကီၢ်ဆၣ်ဒူသဝီလၢအမ့ၢ်(ကၠဲယွၤ,တပိယွၤ,စယဲၣ်ဆ့ၣ်,မ့မၣ်မၠိၣ်,မ့ၤပၠ့ၤ,ဘါပၠ့ၤ)ဒူသဝီသ့ၣ်တဖၣ်အပူၤပှၤကမျၢၢ်ခဲလၢၥ်အဂၤ(၄၀၀၀)ဘျဲၣ်ဘၣ်ပၥ်တ့ၢ်ကွံၥ်တၢ်အိၣ်တၢ်ဆိးလီၢ်ကျဲဒီးဘၣ်ဃ့ၢ်အိၣ်ကဒုသးအဂ့ၢ်န့ၣ်သ့ၣ်ညါဘၣ်န့ၣ်လီၤ. လၢန့ၣ်အမဲၥ်ညါ(ပလီ)ကီၢ်ဆၣ်ဟီၣ်ကဝီၤအပူၤပယီၤသုးကီၣ်ကး(ဘျံး)ကီၢ်ခီသုးဝဲၤလီၢ်ခိၣ်သ့ၣ်အစုတီဖီလၥ်ပယီၤသုးရ့ၣ်ဒ်အမ့ၢ်ခီၣ်သုးရ့ၣ်(ခလရ-၁၀၁,ခလရ-၁၀၃,ခလရ-၁၀၇)သ့ၣ်တဖၣ်အမဲၥ်ညါပယီၤသုးရ့ၣ်လၢအိၣ်ဆီလီၤအသးဖဲ(ပလီၣ်)ဝ့ၢ်ပူၤဒ်အမ့ၢ် ခီၣ်သုးရ့ၣ်(ခလရ-၂၈၀,ခလရ-၂၈၅,ခလရ-၁၇)သုးရ့ၣ်သ့ၣ်တဖၣ်အံၤပၥ်ဖှိၣ်ထီၣ်အသးဒီးဟူးဂဲၤဟဲထီၣ်ဒီးဒွဲၣ်အူကမျၢၢ်အဟံၣ် အဃီအသိးဟဲခးလီၤတၢ်ဒီးကဘီယူၤအိၣ်ဝဲတပယူၥ်ဃီအဂ့ၢ်န့ၣ်လီၢ်ကဝီၤတၢ်ပၢၢ်ဆၢသုးပၥ်ဖှိၣ်စံးဝဲအသိးသ့ၣ်ညါဘၣ်န့ၣ်လီၤ.
ဘံလ့ကီၢ်ဆၣ် မူခိၣ်ထံလီၤစှၤအကတီၢ် ယိၤကျါမုၢ်နုၥ်သ၀ီ ထွံၣ်မံၤအ့ၣ်သံသ၀ီဖိအကျီၢ်တစှၤန့ၢ်(၁၂)ဒု
လါအီးကထိဘၢၣ် ၃၀ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ် ယိၤကျါကရူၢ် ယိၤကျါသ၀ီမုၢ်နုၥ်န့ၣ် တနံၣ်အံၤတၢ်စူၤထံလၢၤခီဃီၤလၢတၢ်ယီၤထီၣ်အကတီၢ်အံၤ ထွံၣ်မံၤအ့ၣ်သံကမျၢၢ်အကျီၢ်ကဲထီၣ်အိၣ်တစှၤန့ၢ်(၁၂)ဒုလံအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ. ဘံလ့ကီၢ်ဆၣ်အပူၤ လီၤဆီဒၣ်ဒူသ၀ီလၢအိၣ်ယိၤကျါကရူၢ်ဒီးနိၣ်ဘၢၣ်ဘီကရူၢ်ခံဘ့ၣ်အံၤအပူၤတဖၣ် ထွံၣ်မံၤအ့ၣ်သံ၀ဲ ပှၤကမျၢၢ်အကျီၢ်,မဲးတဲးလဲး,ထိးသ့ၣ်တဖၣ်ကဲထီၣ်သးအိၣ်၀ဲတလီၢ်လီၢ်ဒီး တနံၣ်အံၤဖဲတၢ်မူခိၣ်စူၤထံလၢၤတၢ်ယီၤထီၣ်အံၤန့ၣ် ထဲယိၤကျါမုၢ်နုၥ်သ၀ီပူၤန့ၣ်ထွံၣ်မံၤအ့ၣ်သံကျီၢ်အိၣ်လၢ(၁၂)ဒုလံအဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပှၤကတိၤတၢ်ပၢ ပဒိၣ်စီၤအ့နဲၤ စံး၀ဲဒ်အံၤန့ၣ်လီၤ. အ၀ဲစံး၀ဲလၢ“ကျီၢ်တဖၣ်န့ၢ်ပှၤကပျၢ်လီၤလၢပျီပူၤအဂီၢ်န့ၣ်ခီဖျိပှၤသူၣ်ဘုသူၣ်ဟုအ၀ဲသ့ၣ်အီၣ်ဆၣ်လီၢ်တအိၣ်ဘၣ်အဃိပှၤလဲၤပျၢ်လီၤအီၤ ဘူးလၢပှၢ်ပူၤ.ပှၤလဲၤပျၢ်လီၤကျီၢ်လၢပှၢ်ပူၤဘျီထွံၣ်မံၤန့ၣ်ဟဲလီၤဖီၣ်အီၣ်၀ဲ.တနံၣ်ညါအံၤစးထီၣ်ဖဲမူခိၣ်ထံလီၤစှၤအံၤ ယိၤကျါသ၀ီမုၢ်နုၥ်န့ၣ်ထွံၣ်မံၤအ့ၣ်သံကဒီးပှၤကျီၢ်အိၣ်(၁၂)လံ.အန့ၣ်မးသ့ၣ်ညါပှၤကျီၢ်ကစၢ်သၢဂၤဒံးလီၤ.ပှၤအဂၤတဖၣ်အကျီၢ်သံကအိၣ်ဒံးဧါဒုတသ့ၣ်ညါဘၣ်.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. တကးဒံးဘၣ်ဖဲမူခိၣ်စူၤထံလီၤစှၤအကတီၢ်အံၤ ယိၤကျါမုၢ်နုၥ်သ၀ီဖိအမဲၥ်ညါပှၤညၣ်ဖိခံ,ထိးကျီးထၣ်သ၀ီဖိ ကမျၢၢ်တဖၣ် စ့ၢ်ကီးထွံၣ်မံၤအ့ၣ်သံအ၀ဲသ့ၣ်ကျီၢ်ပနၢ်ကဲထီၣ်သးအိၣ်၀ဲဒီး ဘၣ်ဆၣ်မ့တုၤဃီၤတၢ်ဆၢကတီၢ်လၢပှၤကူးဘုကူးဟု၀ံၤ ပှၤပျၢ်လီၤဒုးအီၣ်က့ၤကျီၢ်ဆၣ်လၢပျီပူၤန့ၣ်ထွံၣ်မံၤအံၤတဟဲအ့ၣ်ကျီၢ်လၢၤဘၣ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ. မ့ဘၣ်ကွၢ်ထွံၣ်မံၤလၢအအ့ၣ်သံကျီၢ်သ့ၣ်တဖၣ်အံၤအတၢ်လီၤဆီအိၣ်လၢမ့ထံၣ်ပှၤကညီန့ၣ်ပျံၤ၀ဲဒီးမၤကီမၤခဲပှၤသ၀ီဖိတအိၣ်ဒံးဘၣ် ဘၣ်ဆၣ်ထွံၣ်မံၤသ့ၣ်တဖၣ်အံၤမ့ၢ်လၢအဒုဒိၣ်အဃိ မ့အ့ၣ်ဘၣ်ဖုးပှၤကညီန့ၣ်တမ့ၢ်လၢပှၤကညီမၤ၀ဲနၢၤဘၣ်အဂ့ၢ်န့ၣ် ပဒိၣ်စီၤအ့နဲၤ စံးအါထီၣ်၀ဲဒ်အံၤန့ၣ်လီၤ. “ထွံၣ်မံၤတဖၣ်အံၤမ့မ့ၢ်ပှၤကညီန့ၣ်အပျံၤ၀ဲစ့ၢ်မၤဘူး၀ဲတဘူၣ်ဘၣ်,မ့ထံၣ်ပှၤကညီန့ၣ်အစံၣ်လီၤ.တၢ်မၢၤမ့အ့ၣ်ဘၣ်ဖုးပှၤကညီဒု ပှၤကညီမၤတနၢၤစ့ၢ်ဘၣ်.ယဆိမိၣ်အ၀ဲသ့ၣ်န့ၣ်အစုၣ်အပျၢ်ကအါမီၤနီၤ.အပူၤကွံၥ်အ့ၣ်ပှၤကျီၢ်မိၢ်တဒု.ပှၤကွၢ်လၢအဘ့ၣ်ခိၣ်န့ၣ် အိၣ်ဒၣ်တၢ်အ့ၣ်အီၤတိၤကွ့တိၤကွီၤဒ်န့ၣ်လီၤ.ဘၣ်ဆၣ်ဖဲပှၤကွဲးလီၤဘျီကျီၢ်တဒုန့ၣ်အကိပူၤန့ၣ်လီၤကရဲ,ကျီၣ်ညၣ်အကျါန့ၣ် ထွံၣ်မံၤအစုၣ်အပျၢ်တဖၣ်မံသူမံလါခဲလၢၥ်လီၤ”အဂ့ၢ်န့ၣ် စံး၀ဲန့ၣ်လီၤ. လၢန့ၣ်အမဲၥ်ညါဒ်လီၢ်က၀ီၤပှၤဘၣ်မူဘၣ်ဒါစံး၀ဲအသိးန့ၣ်အပူၤကွံၥ်မဟိတနံၣ်န့ၣ်စ့ၢ်ကီး ယိၤကျါကရူၢ်ဒီးနိၣ်ဘၢၣ်ဘီကရူၢ် ခံဘ့ၣ်အံၤအပူၤန့ၣ် ထွံၣ်မံၤအ့ၣ်သံ၀ဲပှၤသ၀ီဖိအကျီၢ်,ပနၢ်,မဲးတဲးလဲးသ့ၣ်တဖၣ်ပၥ်ဖှိၣ်ခဲလၢၥ်ကအိၣ်လၢအဒု(၇၀)ဃၣ်ဃၣ်ညါ အဂ့ၢ်န့ၣ် သ့ၣ်ညါဘၣ်န့ၣ်လီၤ. ဒူသထူၣ်ကီၢ်ရ့ၣ် ကၠဲးထိၣ်ကီၢ်ဆၣ်ဒီးဘံလ့ကီၢ်ဆၣ်ဟီၣ်က၀ီၤအဆၢန့ၣ် ဖဲအပူၤကွံၥ်(၂၀၂၃)လါယူၤလံအခါ လီၢ်က၀ီၤကမျၢၢ်ဒီး ခ့ၣ်အဲၣ်ယူၣ် သ့ၣ်ပှၢ်၀ဲၤကျိၤ ပၥ်ပနီၣ်လီၤ၀ဲထံသိခံပျဲပူၤတၢ်မံၤလၥ်ဆၣ်ဖိကီၢ်ဖိသ့ၣ်ပှၢ်လၢအလဲၢ်အိၣ်(၃၀၀၀)အ့ကၢၣ်အံၤဒီး သ့ၣ်ပှၢ်ပျံၤကွီၤအံၤအပူၤန့ၣ် ထွံၣ်မံၤဃုၥ်ဒီးတၢ်မံၤလၥ်ဆၣ်ဖိကီၢ်ဖိအကလုၥ်(၂၀)ဘျဲၣ်အိၣ်၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ကီးတရံး-မၠၣ်၀တံၣ်ကျဲလီၢ်လံၤ တၢ်ခိးထၢစ့အါအဃိသိလ့ၣ်လ့ၢ်ထီၣ်လ့ၢ်လိၤက့ၤလၢထိၣ်ကီၥ်ကိဒီးကၠီၤထၣ်တကပၤအါထီၣ်
လါအီးကထိဘၢၣ် ၃၀ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ်အပူၤ သိလ့ၣ်လၢအလ့ၢ်ထီၣ်လ့ၢ်လိၤဖဲ ကီးတရံး-မၠၣ်၀တံၣ်ကျဲလီၢ်လံၤတဖၣ် ခီဖျိတြဲၤလၢအခိးထၢစ့အံၤအိၣ်အါအဃိ တကီၢ်ခါခဲအံၤသိလ့ၣ်သ့ၣ်တဖၣ်လ့ၢ်ထီၣ်လ့ၢ်လိၤ အါက့ၤ၀ဲလၢထိၣ်ကီၥ်ကိဒီးကၠီၤထၣ်သ၀ီကျဲအဂ့ၢ်န့ၣ် ပှၤနီသိလ့ၣ်ဖိတဖၣ်စံး၀ဲန့ၣ်လီၤ. မၠၣ်၀တံၣ်-ကီးတရံးအ့ရှါကျဲအံၤ စးထီၣ်လၢတၢ်ဒုးကဲထီၣ်တၢ်ပံးဃၥ်က့ၤကျဲန့ၣ် သိလ့ၣ်သ့ၣ်တဖၣ်ဘၣ်လ့ၢ်ထီၣ်လ့ၢ်လိၤ က့ၤ၀ဲလၢကျဲလီၢ်လံၤဒီးပှၢ်ကျဲတကပၤအသိးဖဲတၢ်စူၤခါအကတီၢ်ခီဖျိပှၢ်ကျဲတဖၣ်စ့ၢ်ကီးဟးဂီၤအဃိ သိလ့ၣ်သ့ၣ်တဖၣ်အါဒၣ် တက့ၢ်န့ၣ်ဘၣ်လ့ၢ်ထီၣ်လ့ၢ်လိၤ၀ဲလၢကျဲလီၢ်လံၤတကပၤဒ်အံၤလီၤ အဂ့ၢ်န့ၣ် သ့ၣ်ညါဘၣ်လီၤ. ပှၤနီသိလ့ၣ်ဖိတဂၤစံး၀ဲလၢ“ကျဲလီၢ်လံၤဒုအိးထီၣ်ဘၣ်ဆၣ်တြဲၤလၢအိၣ်ခိးထၢစ့န့ၣ်အါအဃိစှၤသီအတီၢ်ပူၤအံၤသိလ့ၣ်သ့ၣ်တဖၣ် အါဒၣ်တက့ၢ်သူက့ၤကျဲလၢပှၢ်ကျဲတကပၤလီၤ.တနီၤန့ၣ်ဒွး၀ဲတကၢကီၣ်လၢၤဘၣ်ဘျီအိၣ်ဘှံးတနီအီၣ်သိလ့ၣ်လၢၤဘၣ်.လၢကျဲလီၢ်လံၤကစၢၢ်ခိၣ်တကပၤန့ၣ်ထဲ ညံၣ်နီၣ်တြဲၤ,အီၣ်ဘိၤတဲတြဲၤ တြဲၤခံဘ့ၣ်န့ၣ်မးလၢၤ(သၢကလီၢ်)လံ.ခဲအံၤလၢထိၣ်ကီၥ်ကိဒီး ကၠီၤထၣ်ကျဲတကပၤန့ၣ်ပှၤမၤစှၤလီၤတြဲၤအခိလံအဃိအါဒၣ်တက့ၢ်ပှၤလ့ၢ်ထီၣ်လ့ၢ်လိၤက့ၤလၢန့ၣ်တကပၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဒ်န့ၣ်အသိးလၢတီနီၢ်ကစၢၢ်ခီၣ်ထံးစ့ၢ်ကီးတြဲၤလၢအအိၣ်ခိးထၢစ့အံၤအိၣ်၀ဲဒၣ်ကျဲဒီတဘိဒီးလၢန့ၣ်အမဲၥ်ညါ တြဲၤလၢအိၣ်သ၀ီသ့ၣ် တဖၣ်စ့ၢ်ကီးဟ့ၣ်ထီၣ်တၢ်ဂ့ၢ်လၢကတ့သ၀ီကျဲဃ့၀ဲစ့တြဲၤတဘ့ၣ်န့ၣ်ကအိၣ်လၢ(၅၀၀၀)ကၠးဃၣ်ဃၣ်ညါအဂ့ၢ်န့ၣ် ပှၤနီသိလ့ၣ်ဖိ လၢအတီၣ်ပနံၥ်တၢ်ဖိတၢ်လံၤတဂၤ စံး၀ဲန့ၣ်လီၤ. အ၀ဲစံး၀လၢ“လၢကစၢၢ်ခီၣ်ထံးစ့ၢ်ကီးတြဲၤတဘ့ၣ်န့ၣ်ဃ့၀ဲ(၅၀၀၀)ကၠးညါ.အ၀ဲသ့ၣ်ခိးဃ့စ့န့ၣ်တနီၤန့ၣ်ကူကၤသုးကူသုးကၤအိၣ်. မ့၀ံၤတလၢထီၣ်(အီၣ်ဘိၤတဲ)တြဲၤခံဘ့ၣ်စ့ၢ်ကီးပှၤခိးထၢစ့န့ၣ်မ့ၢ်ဒၣ်ပှၤသ၀ီဖိလီၤ,တဲ၀ဲလၢကတ့ကျဲဘှီကျဲဒ်န့ၣ်.ဃ့၀ဲနါက့တထံၣ်အဘှီကျဲ နီတဘျီဘၣ်”အဂ့ၢ်န့ၣ် စံး၀ဲန့ၣ်လီၤ. လၢတၢ်န့ၣ်အဃိ ပှၤကူၣ်လဲၤမၤကၤတၢ်ဖိတဖၣ်အဲၣ်ဒိး၀ဲလၢတၢ်ကက့ၤအိးထီၣ်မၠၣ်တ၀ံၣ်-ကီးတရံးအ့ရှါကျဲအံၤဒီး ဘၣ်ဃးကျဲ တၢ်ဂ့ၢ်အံၤဖဲအပူၤကွံၥ်လါစဲးပထ့ဘၢၣ်အခါန့ၣ် ကညီဖီၣ်စုက၀ဲၤကရူၢ်ကရၢတဖၣ်မၤ၀ဲတၢ်ထံၣ်လိၥ်အိၣ်သကိးတခါ ဘၣ်ဆၣ် တုၤလၢခဲအံၤတထံၣ်လၢတၢ်တအိးထီၣ်အ့ရှါကျဲအံၤဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ကီးတရံးကီၢ်ဆၣ် ပှၤဘၣ်တၢ်ကမၣ်ဖိခးသံကွံၥ်(KNPF)တၢ်ဒုးဃၥ်လီၢ်မူဒါခိၣ်, ဃ့ၢ်ဖျိးထီၣ် ၃ ဂၤ
လါအီးကထိဘၢၣ် ၂၉ သီၢ် ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ်အပူၤ ဖဲအပူၤကွံၥ်လါအီးကထိဘၢၣ် ၂၆ သီ အနံၤန့ၣ်ပှၤဘၣ်တၢ်ကမၣ်ဖိ(၃)ဂၤလၢတၢ်ဒုးဃၥ်၀ဲဖဲကညီဒီကလုၥ်ပၢၤကီၢ်သုး(KNPF)တၢ်ဒုးဃၥ်အလီၢ်အံၤသ့ၣ်တဖၣ် မၤသံကွံၥ်၀ဲတၢ်ဒုးဃၥ်လီၢ်အခိၣ်(အချုပ်မှူး)၀ံၤဃ့ၢ်ဖျဲးထီၣ်ကွံၥ်၀ဲအဂ့ၢ်န့ၣ် ကီၢ်ဆၣ်(KNPF)ကရူၢ် စံး၀ဲန့ၣ်လီၤ. တၢ်ကဲထီၣ်သးအဂ့ၢ်အကျိၤန့ၣ် ပှၤဘၣ်တၢ်ကမၣ်ဖိ စီၤသမီၣ်အဲ(၂၁)နံၣ်အံၤ လၢကလုၢ်ထံအဂီၢ်ဖဲတၢ်ကိးထီၣ်အီၤလၢတၢ်ချၢ အခါန့ၣ် အ၀ဲခးသံကွံၥ်၀ဲဒၣ်တၢ်ဒုးဃၥ်လီၢ်အခိၣ်(အချုပ်မှူး)မါခၠိၤအ့အံၤ၀ံၤ အ၀ဲဃုၥ်ဒီးအသကိးပှၤဘၣ်တၢ်ကမၣ်ဖိလၢအဂၤ ခံဂၤဃ့ၢ်ဖျိးထီၣ်၀ဲတဘျီဃီအဂ့ၢ်န့ၣ် ကီးတရံးကီၢ်ဆၣ် ကညီဒီကလုၥ်ပၢၤကီၢ်သုး(KNPF)အခိၣ် မါအဲၣ်ဒါချ့ စံး၀ဲဒ်အံၤန့ၣ်လီၤ. အ၀ဲစံး၀ဲလၢ“ဖဲ ၂၆ သီ ကဘၣ်ဖဲမုၢ်ဟါလီၤ ၃ နၣ်ရံၣ်ဘျဲၣ်န့ၣ် ပှၤကထုးထီၣ်ဒုးအီလုၢ်၀ဲထံမီၤနီၤ. ဖဲန့ၣ်အ၀ဲမၤဒၢၣ်လီၤသးဒီး တၢ်ဒုးဃၥ်လီၢ်အခိၣ်၀ံၤဂုၥ်န့ၢ်၀ဲကျိချုးဘျီထူ၀ဲမၤဒၢၣ်၀ဲမီၤနီၤ.လၢတၢ်ဒုးဃၥ်လီၢ်အခိၣ်တဂၤခီအညါပှၢ်,မ့မ့ၢ်လၢအီၤခီန့ၣ်အညါဘီၣ်အဃိအ၀ဲတဂၤလီၤဘျီဒုခး၀ဲအခိၣ်သၣ်ဃံတထံၣ်ဘျီသံ၀ဲန့ၣ်.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. တကးဒံးဘၣ်လၢန့ၣ်အမဲၥ်ညါအ၀ဲခးသံတၢ်ဒုးဃၥ်လီၢ်အခိၣ်၀ံၤ ကိးထီၣ်ဃုၥ်အသကိးပှၤဘၣ်တၢ်ကမၣ်ဖိ(၂)ဂၤလၢတၢ်ဒုးဃၥ်ပူၤ ၀ံၤဃ့ၢ်ထီၣ်ကွံၥ်၀ဲအဂ့ၢ်န့ၣ် မါအဲၣ်ဒါချ့ စံးအါထီၣ်၀ဲန့ၣ်လီၤ. “အမၤသံတၢ်ဒုးဃၥ်လီၢ်အခိၣ်၀ံၤဘျီန့ၣ် အတဲပှၤဖိသၣ်လၢအိၣ်ဖဲန့ၣ်တဖၣ်တဘၣ်ဟူးနီဂၤတဂ့ၤ,သုမ့ဟူးဒုကခးသံသုလီၤ. မ့၀ံၤအဃ့သီးလၢပှၤဖိသၣ်လၢအိၣ်တၢ်ချၢဖဲန့ၣ်တဖၣ်အအိၣ်မီၤနီၤ.ပှၤဖိသၣ်တဖၣ်န့ၣ်ခီအကျိတအိၣ်ဘၣ်. ဃ့၀ဲသီးဘျီ အသကိးအိၣ်တ့ၢ်လၢတၢ်ဒုးဃၥ်ပူၤန့ၣ်ခံဂၤန့ၣ်အလဲၤထုးထီၣ်ကွံၥ်၀ဲ၀ံၤဃ့ၢ်ဖျိးထီၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဒ်န့ၣ်အသိးပှၤသၢဂၤအံၤဖဲအ၀ဲသ့ၣ်ဃ့ၢ်ဖျိးအခါန့ၣ် ဟံဃုၥ်(KNPF) အကျိခါဘဲတခိၣ်, ကျိဖုၣ်တခိၣ်, စုကွံၥ်မ့ၣ်ပိၢ်တဖျၢၣ်, ဆဲးကၢး(သိလ့ၣ်ယီၢ်)တခိၣ်,စ့(၂၅)ကလီၢ်ကၠးအဂ့ၢ်န့ၣ် KNPF ပှၤဘၣ်မူဘၣ်ဒါစံး၀ဲန့ၣ်လီၤ. တကီၢ်ခါခဲအံၤပှၤဘၣ်တၢ်ကမၣ်ဖိ ၃ ဂၤလၢအဃ့ၢ်ဖျိးထီၣ်သ့ၣ်တဖၣ် ကညီဒီကလုၥ်ပၢၤကီၢ်သုး(KNPF)ဟးဃု၀ဲဘၣ်ဆၣ် တုၤလၢခဲအံၤ တၢ်တထံၣ်၀ဲဒံးဘၣ်အဂ့ၢ်န့ၣ် KNPF ပှၤဘၣ်မူဘၣ်ဒါ...
သုးကီၣ်ကးကိးအိၣ်ဖှိၣ်ကမျၢၢ်သးစၢ်လၢကမျၢၢ်တၢ်ဘၣ်ကဲသုးအဂီၢ်ဖဲဖၣ်အၣ်ဝ့ၢ်နီၢ်ဂံၢ်(၃)ကဝီၤဒ့အပူၤ
လါအီးကထိဘၢၣ် ၂၉သီ, ၂၀၂၄နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်,ကညီဒီကလုၥ်စၢဖှိၣ်ကရၢ,သုးက့(၇)ဖၣ်အၣ်ကီၢ်ရ့ၣ်,ဖၣ်အၣ်ဝ့ၢ်ကဝီၤဒ့(၃)အပူၤသုးကီၣ်ကးကိးအိၣ်ဖှိၣ်ဝဲကမျၢၢ်သးစၢ်လၢကမျၢၢ်တၢ်ဘၣ်ကဲသုးအဂီၢ်အဂ့ၢ်,ဖၣ်အၣ်ဝ့ၢ်လီၢ်ကဝီၤဖိတဖၣ်စံးဝဲဒၣ်န့ၣ်လီၤ. သုးကီၣ်ကးအံၤလၢကမျၢၢ်တၢ်ဘၣ်ကဲသုးအဂီၢ်,အပူၤကွံၥ်လါအီးကထိဘၢၣ်(၂၃)သီအနံၤအပူၤအစုတီၤဖီလၥ်ပှၤဘၣ်မူဘၣ်ဒါ,သဝီသးပှၢ်ဃုၥ်ဒီးကဝီၤဒ့သးပှၢ်သ့ၣ်တဖၣ်ဟးဆှၢဝဲလံၥ်ဆူကဝီၤဒ့အပူၤပှၤလၢအသးနံၣ်(၁၈)နံၣ်ဒီး(၃၅)နံၣ်ဘၢၣ်စၢၤဟံၣ်တဖၣ်အပူၤအမိၢ်အပၢ်အအိၣ်လၢကလဲၤထီၣ်ဝဲတၢ်အိၣ်ဖှိၣ်အိၣ်ဝဲအဂ့ၢ်,ဖၣ်အၣ်လီၢ်ကဝီၤဖိတဖၣ်စံးဝဲန့ၣ်လီၤ. ဒီးသုးကီၣ်ကးအပှၤဘၣ်မူဘၣ်ဒါတဖၣ်အံၤဖဲလါအီးကထိဘၢၣ်(၂၇)သီအနံအပူၤ,မၤဝဲတၢ်အိၣ်ဖှိၣ်ဒီးစံးဝဲလၢကမျၢၢ်တၢ်ဘၣ်ကဲသုးအဂီၢ်ကထၢဝဲကမျၢၢ်(၂)ဂၤဖဲနီၢ်ဂံၢ်(၃)ဟီၣ်ကဝီၤအံၤအပူၤဒီးခီဖျိလီၢ်ကဝီၤဖိတဖၣ်တအဲၣ်ဒိးလဲၤကဲဝဲသုးဘၣ်အဃိ,စံးဝဲလၢကဘၣ်ဟ့ၣ်ဝဲစ့အဂ့ၢ်,ဖၣ်အၣ်လီၢ်ကဝီၤဖိလၢအဘူးဒီးနီၢ်ဂံၢ်(၃)ကဝီၤဒ့တဂၤစံးဝဲဒၣ်ဒ်အံၤန့ၣ်လီၤ. အဝဲစံးဝဲလၢ“ဖဲမုၢ်ခီၣ်ထံးနံၤအခါန့ၣ်,အဝဲသ့ၣ်ဟဲမၤဝဲတၢ်အိၣ်ဖှိၣ်ဖဲနီၢ်ဂံၢ်(၃)ကဝီၤဒ့တဖၣ်အပူၤန့ၣ်ဝံၤလံ,တဲဝဲလၢကထၢဝဲနီၢ်ဂံၢ်(၃)အပူၤန့ၣ်(၂)ဂၤမီၤ.ပှၤတဲလၢပှၤတအဲၣ်ဒိးလဲၤဘၣ်အဃိန့ၣ်တဲဝဲမ့မ့ၢ်ကၠါန့ၣ်,သုကဘၣ်ဖီၣ်တၢ်ဖး(မဲ)မီၤ.နါက့န့ၣ်ပှၤကဝီၤဒ့ဖိတဖၣ်တဲထီၣ်ကဒီးဝဲလၢတအဲၣ်ဒိးဖီၣ်မဲစ့ၢ်ကီးဘၣ်အဃိန့ၣ်,တဲဝဲလၢမ့မ့ၢ်ကၠါန့ၣ်သုကဘၣ်ဟ့ၣ်စ့လီၤ.ဘၣ်ဆၣ်သနါက့ကဘၣ်ဟ့ၣ်စ့ထဲလဲၣ်န့ၣ်ဒုပှၤတသ့ၣ်ညါဒံးဘၣ်.”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,နီၢ်ဂံၢ်(၃)ကဝီၤဒ့ဖိတဖၣ်အံၤခီဖျိတအဲၣ်ဒိးလဲၤကဲဝဲသုးကီၣ်ကးအကမျၢၢ်သုးဘၣ်အဃိ,အဝဲသ့ၣ်တဖၣ်ထိၣ်ဃူသးမၤဝဲတၢ်သးလီၤပလိၥ်လၢကဝီၤဒ့တဖၣ်အပူၤဟံၣ်ကိးဖျၢၣ်ဒဲးစုၥ်စုၥ်ကဟ့ၣ်စၢၤသကိးဝဲပှၤလၢကဘၣ်လဲၤကဲသုးတဖၣ်အံၤအစ့အီၣ်လိးတဖၣ်အဂ့ၢ်,လီၢ်ကဝီၤဖိအံၤစံးအါထီၣ်ဝဲဒၣ်န့ၣ်လီၤ. တကးဒံးဘၣ်,လၢကမျၢၢ်တၢ်ဘၣ်ကဲသုးအဂီၢ်,သုးကီၣ်ကးအံၤထၢနုၥ်ဝဲပိၥ်ခွါဖိသၣ်လၢအသးနံၣ်ပှဲၤထီၣ်(၁၈)နံၣ်လၢအမ့ၢ်ဒံးဝဲကၠိတဖၣ်အိၣ်ဝဲဒီးနီၢ်ဂံၢ်(၃)ကဝီၤဒ့အပူၤသုးကီၣ်ကးစးထီၣ်မၤဝဲကမျၢၢ်တၢ်ဘၣ်ကဲသုးအံၤမ့ၢ်တၢ်ဂ့ၢ်လီၤတံၢ်လီၤအဂ့ၢ်, ဖၣ်အၣ်နီၢ်ဂံၢ်(၃)ကဝီၤဒ့လီၢ်ကဝီၤပိၥ်မုၣ်တဂၤစံးဝဲဒ်အံၤန့ၣ်လီၤ. အဝဲစံးဝဲလၢ“ဖၣ်အၣ်ဝ့ၢ်တၢ်လီၢ်အဂၤ,ကဝီၤဒ့အဂၤတဖၣ်အပူၤဒုယတနၢ်ဟူဒံးဘၣ်,ဘၣ်ဆၣ်ခဲအံၤလီၤဆီဒၣ်လၢပအိၣ်နီၢ်ဂံၢ်(၃)အပူၤဒုမၤဝဲတၢ်ထၢသုးလံန့ၣ်မ့ၢ်တၢ်ဂ့ၢ်လၢအလီၤတံၢ်လီၤဆဲးလီၤ.အဝဲသ့ၣ်အစရီအပူၤန့ၣ်,ထၢနုၥ်ဃုၥ်ဝဲဖိသၣ်လၢအထီၣ်ကၠိသးနံၣ်ပှဲၤတဖၣ်ခဲလၢၥ်လီၤ.ပှၤလၢအမံၤပၣ်တဖၣ်န့ၣ်ဟးဆှၢဝဲလံၥ်,ကိးဝဲတၢ်အိၣ်ဖှိၣ်ဝံၤလံမီၤ.”အဂ့ၢ်စံးဝဲဒၣ်န့ၣ်လီၤ. တကတီၢ်ဃီ,ဖၣ်အၣ်ဝ့ၢ်နီၢ်ဂံၢ်(၃)ကဝီၤဒ့အပူၤခီဖျိသုးကီၣ်ကးမၤတၢ်ထၢကမျၢၢ်သုးအတၢ်ဟူးတၢ်ဂဲၤအိၣ်ဝဲဒ်အံၤအဃိ,တကီၢ်ခါခဲအံၤကဝီၤဒ့လၢအဂၤတဖၣ်အပူၤသးစၢ်ဒီးမိၢ်ပၢ်တဖၣ်,သူၣ်ကိၢ်သးဂီၤဝဲလၢတၢ်ကမၤဆူၣ်မၤစိး,မၤဃံးထီၣ်ဝဲကမျၢၢ်တၢ်ဘၣ်ကဲသုးတၢ်ရဲၣ်တၢ်ကျဲၤအံၤအိၣ်ဝဲအဂ့ၢ်,လီၢ်ကဝီၤဖိတဖၣ်စံးဝဲန့ၣ်လီၤ. ဒ်န့ၣ်အသိး,အပူၤကွံၥ်လါစဲးပထ့ဘၢၣ်အပူၤသုးကီၣ်ကးအစုတီၤဖီလၥ်ပှၤဘၣ်မူဘၣ်ဒါတဖၣ်အံၤဟးထၢဝဲကမျၢၢ်တၢ်ဘၣ်ကဲသုးစရီလၢနီၢ်ဂံၢ်(၄)ကဝီၤဒ့တဖၣ်အပူၤအိၣ်ဝဲအသိး,သုးကီၣ်ကးအံၤဘိးဘၣ်ရၤလီၤဝဲကမျၢၢ်တၢ်ဘၣ်ကဲသုးသဲစးဝံၤအလီၢ်ခံ,စးထီၣ်လၢလါဖ့ၤဘြူၤအါရံၤအပူၤအခါလံၤလံၤ,ဟးရၤလီၤဝဲလံၥ်တၢ်သ့ၣ်ညါနၢ်ပၢၢ်ဘၣ်ဃးကမျၢၢ်တၢ်ဘၣ်ကဲသုးလၢကညီကီၢ်စဲၣ်ဝ့ၢ်ပူၤမျၢၢ်အိၣ်ဆိးဝဲအါတၢ်လီၢ်တဖၣ်အပူၤအိၣ်ဝဲဒၣ်န့ၣ်လီၤ.
သုးက့(၃),ပယီၤသုးကထီၣ်မၤန့ၢ်က့ၤ(တိၤသ့ၣ်ဖူ)သုးကလၢၤအဂီၢ်တၢ်ဒုးကဲထီၣ်ဒီး(KNLA)ခဲအံၤခဲအံၤ
လါအီးကထိဘၢၣ် ၂၉ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,ချၢၣ်လွံၢ်ထူၣ်ကီၢ်ရ့ၣ်သုးက့(၃),လၢၢ်ဒိၣ်ကီၢ်ဆၣ်ဟီၣ်ကဝီၤအပူၤ ပယီၤသုးကီၣ်ကးသုးက လၢၤတဖျၢၣ်လၢအမ့ၢ်(တိၤသ့ၣ်ဖူ)သုးကလၢၤအံၤဖဲတလါအံၤလါအီးကထိဘၢၣ်အတီၢ်ပူၤန့ၣ်ပယီၤသုးဂုၥ်ကျဲးစၢၤဝဲလၢကဟဲက့ၤထီၣ်ဆ့ၣ်နီၤမၤန့ၢ်က့ၤအသုးကလၢၤအံၤအဂီၢ်တၢ်ဒုးကဲထီၣ်ဝဲဒၣ်ဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်အိၣ်ခဲအံၤခဲအံၤအဂ့ၢ်သ့ၣ်ညါဘၣ်လၢလီၢ်ကဝီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤ. ပယီၤသုးကီၣ်ကး(တိၤသ့ၣ်ဖူ)သုးကလၢၤအံၤအိၣ်ဝဲဖဲသုးက့(၃)သုးရ့ၣ်(၉)တၢ်ပၢဟီၣ်ကဝီၤအပူၤဒီးဖဲအပူၤကွံၥ်လါစဲးပထ့ဘၢၣ်ခံနွံတနွံအတီၢ်ပူၤန့ၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တၢ်ပၢၢ်ဆၢသုးပၥ်ဖှိၣ်သ့ၣ်တဖၣ်ထီၣ်မၤန့ၢ်ကွံၥ်ဝဲဒၣ်ဝံၤအလီၢ်ခံပယီၤသုးအံၤလၢတၢ်ကထီၣ်မၤန့ၢ်က့ၤဝဲသုးကလၢၤအံၤအဂီၢ်လၢဆီထံးကီၢ်ဆၣ်တဆီဟဲထီၣ်မၤအါထီၣ်အသုးဂံၢ်ဘါအဂ့ၢ်န့ၣ်လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ. ပယီၤသုးလၢဟဲထီၣ်သ့ၣ်တဖၣ်အံၤန့ၣ်အပှၤနီၣ်ဂံၢ်ကအိၣ်ဝဲဖဲအဂၤ(၃၀၀)အခိၣ်အဃၢၤဒီးပယီၤသုးအံၤဒ်သိးဒီးအဝဲသ့ၣ်ဟဲထီၣ်ဆ့ၣ်နီၢ်အသုတန့ၢ်တဂ့ၤအဂီၢ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တၢ်ပၢၢ်ဆၢသုးပၥ်ဖှိၣ်တကပၤတြီဆၢဟူးဂဲၤခးဝဲဒၣ်အဂ့ၢ်ဆီထံးကီၢ်ဆၣ်ပှၤဘၣ်မူဘၣ်ဒါတဂၤစံးဝဲဒၣ်ဒ်အံၤန့ၣ်လီၤ. "ဖဲတၢ်ထီၣ်မၤန့ၢ်အသုးကလၢၤအံၤဒီးမၤဟးဂီၤကွံၥ်ဝဲဝံၤအလီၢ်ခံန့ၣ်ဖဲတၢ်ဘၢၣ်စၢၤန့ၣ်ဟဲက့ၤထီၣ်ဝဲအိၣ်ဝဲမီၤနီၤ. အဝဲသ့ၣ်ဟဲက့ၤ ထီၣ်နါက့န့ၣ်ဒ်သိးဒီးဆ့ၣ်နီၤဝဲတန့ၢ်တဂ့ၤအဂီၢ်ဒုပအိၣ်တကပၤပမၤဖျိးကွံၥ်ဝဲဒၣ်ပယီၤသုးအံၤကွ့ၢ်ကွ့ၢ်လီၤ. မ့မ့ၢ်လၢၤပယီၤသုးအနီၣ် ဂံၢ်နီၣ်ဒွးခီန့ၣ်မ့ၢ်ပၥ်ဖှိၣ်ခဲလၢၥ်န့ၣ်ကအိၣ်ဝဲအဂၤ(၃၀၀)လီၤ." အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ပယီသုးကီၣ်ကးအပှၤသ့ၣ်တဖၣ်အံၤအိၣ်ဆီလီၤအသးဖဲဆီထံးကီၢ်ဆၣ်(သါဆ့ၣ်မ့လဲ)သဝီသုးကလၢၤပူၤအသိးစးထီၣ်ဖဲန့ၣ်ဒီးတုၤလီၤလၢ(တိၤသ့ၣ်ဖူ)ဒီတကျိၤန့ၣ်ပယီၤသုးဟဲထီၣ်မၤအါထီၣ်အသုးဂံၢ်ဘါဒ်အံၤအဖီခိၣ်အဃိခံခီခံကပၤတၢ်ဒုးကဲထီၣ်ဝဲအိၣ်ခဲအံၤခဲအံၤအမဲၥ်ညါပယီၤသုးတကပၤတၢ်ဘၣ်ဒိဘၣ်ထံးအိၣ်ဝဲအါအဂ့ၢ်န့ၣ်လီၢ်ကဝီၤပှၤဘၣ်မူဘၣ်ဒါစံးစ့ၢ်ကီးဝဲန့ၣ်လီၤ. ဒ်န့ၣ်အသိးဖဲပူၤကွံၥ်တၢ်ထီၣ်မၤန့ၢ်ဝဲ(တိၤသ့ၣ်ဖူ)သုးကလၢၤအံၤအဆၢကတီၢ်ကညီဒီကလုၥ်သုးမုၢ်ဒိၣ်,တၢ်ပၢၢ်ဆၢသုးကရူၢ်မၤန့ၢ်ဃုၥ်ဝဲဒၣ်ပယီၤသုးတၢ်စုကဝဲၤ,ကျိချံပှၥ်သၣ်တနီၤအသိးပယီၤသုးတကပၤတၢ်ဘၣ်ဒိဘၣ်ထံးအိၣ်အါစ့ၢ်ကီးဝဲဒၣ်အဂ့ၢ်န့ၣ်သ့ၣ်ညါဘၣ်လၢတၢ်ပၢၢ်ဆၢသုးကရူၢ်တနီၤပၥ်ဖျါထီၣ်ဝဲလၢတၢ်ကစီၣ်သန့ပူၤန့ၣ်လီၤ. သုးက့(၃)လၢၢ်ဒိၣ်ကီၢ်ဆၣ်ဟီၣ်ကဝီၤအပူၤ ဖဲအပူၤကွံၥ်လါမ့ၤ(၇)သီအနံၤန့ၣ်ကညီဒီကလုၥ်သုးမုၢ်ဒိၣ်လဲၤထီၣ်မၤန့ၢ်ဝဲ(ဘီကထၣ်) ပယီၤသုးကလၢၤလၢအထုးလီၤက့ၤအသးတဖျၢၣ်အံၤဒီးဖဲလါအီကူး(၃၁)သီအနံၤန့ၣ်တၢ်လဲၤထီၣ်မၤန့ၢ်ကဒီးဝဲပယီၤသုးလၢအိၣ်ဆီလီၤပၥ်လီၤအလီၢ်အကျဲဖဲ(ကိမၠ့ၣ်သါယၤ)ဒူသဝီအပူၤသ့ၣ်တဖၣ်စ့ၢ်ကီးအဂ့ၢ်သ့ၣ်ညါဘၣ်န့ၣ်လီၤ. ဒ်န့ၣ်အသိးစးထီၣ်လၢလါမ့ၤတုၤလီၤလၢလါအီးကထိဘၢၣ်အတီၢ်ပူၤန့ၣ်ကညီဒီကလုၥ်သုးမုၢ်ဒိၣ်,တၢ်ပၢၢ်ဆၢသုးပၥ်ဖှိၣ်သ့ၣ်တဖၣ်ထီၣ်မၤန့ၢ်ဝဲပယီၤသုးကီၣ်ကးသုးကလၢၤဃုၥ်ဒီး(တိၤသ့ၣ်ဖူ)သုးကလၢၤအံၤန့ၣ်ခဲလၢၥ်အိၣ်ဝဲ(၃)ဖျၢၣ်အဂ့ၢ်န့ၣ်လီၢ်ကဝီၤဂံၢ်ခီၣ်ထံးတၢ်ကစီၣ်စံးဝဲဒၣ်န့ၣ်လီၤ.
ကၠီၣ်တဲၣ်ပနံၥ်တၢ်ဖိတၢ်လံၤလၢအလဲၤနုၥ်ဆူဃိၣ်သၢဖျၢၣ်ဝ့ၢ်ပူၤတဖၣ်,သုးကီၣ်ကးသမံသမိးဖီၣ်ဝဲ
လါစဲးပထ့ဘၢၣ် ၂၈သီ, ၂၀၂၄နံၣ်, ခ့ၣ်အဲးစံၣ်, ကီၢ်ကၠီၣ်တဲၣ်ကီၢ်ပယီၤကီၢ်ဆၢဃိၣ်သၢဖျၢၣ်ဝ့ၢ်ပူၤကၠီၣ်တဲၣ်ပနံၥ်ဖီကၤတၢ်ဖိတၢ်လံၤလၢအလဲၤနုၥ်လီၤတဖၣ်အံၤသုးကီၣ်ကးတကပၤမၤဝဲတၢ်သမံသမိးဃံၥ်ဃံၥ်အိၣ်ဝဲဒီးဖီၣ်ဝဲတၢ်ဖိတၢ်လံၤတဖၣ်အိၣ်ဝဲအဂ့ၢ်,ပှၤဆါမၤကၤတၢ်ဖိတဖၣ်စံးဝဲန့ၣ်လီၤ. ကီၢ်ကၠီၣ်တဲၣ်ကီၢ်ပယီၤကီၢ်ဆၢပနံၥ်တၢ်တီဆှၢအကျဲအံၤ,သုးကီၣ်ကးပၥ်ပနီၣ်ဝဲလၢတဖိးသဲးစးကျဲအဃိ,ကၠီၣ်တဲၣ်တၢ်ဖိတၢ်လံၤတဖၣ်အံၤဖဲတၢ်စိၥ်ဆှၢတီဝဲတုၤလၢနိၣ်တကီဝ့ၢ်ဒီးမီၣ်လမၠဲၣ်ဝ့ၢ်အဆၢကတီၢ်တၢ်သမံသမိးဖီၣ်ဝဲအိၣ်ဝဲအဂ့ၢ်,ပှၤမၤကၤတၢ်တဂၤစံးဝဲန့ၣ်လီၤ. ဃိၣ်သၢဖျၢၣ်ဝ့ၢ်ပူၤပနံၥ်တၢ်ဖိတၢ်လံၤလၢအလဲၤနုၥ်လီၤတဖၣ်အံၤဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)ပှၤဘၣ်မူဘၣ်ဒါတဖၣ်ဟံမူဒါထၢဝဲတၢ်ခိတၢ်သွဲအိၣ်ဝဲဒီးဖဲအနုၥ်လီၤဝဲကီၢ်ပူၤအဆၢကတီၢ်,သုးကီၣ်ကးတဖၣ်ဖီၣ်သမံသမိးဝဲပနံၥ်တၢ်ဖိတၢ်လံၤတဖၣ်အိၣ်ဝဲအဂ့ၢ်,တီနီၢ်မုၢ်နုၥ်(DKBA)သုးဟီၣ်ကဝီၤနီၢ်ဂံၢ်ခံအဒုးယၤခိၣ်,သုးခိၣ်ဒိၣ်စိ(အ့ၣ်ဝါ)စံးဝဲဒ်အံၤန့ၣ်လီၤ. အဝဲစံးဝဲလၢ“ဃိၣ်သၢဖျၢၣ်ကီၢ်ဆၢခီ,သုးကီၣ်ကးတကပၤပၥ်ပနီၣ်ဝဲလၢအတဖိးမံသဲစးအဃိပနံၣ်တၢ်ဖိတၢ်လံၤလၢအပၥ်ပနီၣ်ဝဲတဖၣ်န့ၣ်မ့ၢ်လဲၤနုၥ်တဘျီန့ၣ်တဲဝဲလၢအမ့ၢ်တၢ်လၢအကဲဘျူးလၢပှၤမၤတၢ်ပၢၢ်ဆၢဖိတဖၣ်အဂီၢ်အဃိန့ၣ်ပနံၥ်တၢ်ဖိတၢ်လံၤတဖၣ်မ့ဟဲနုၥ်လၢအံၤတကပၤန့ၣ်,သုးကီၣ်ကးဟးပံးကွံၥ်ဝဲအိၣ်န့ၣ်လီၤ.ဒီးဃိၣ်သၢဖျၢၣ်ဝ့ၢ်ပူၤအံၤပံးဝဲတန့ၣ်ဘၣ်လိၤလိၤအဃိန့ၣ်,လဲၤခိးသမံသမိးဖီၣ်က့ၤဝဲလၢနိၣ်တကီဝ့ၢ်အိၣ်ဝဲအသိး,တဘျီတခီၣ်လဲၤခိးဖီၣ်က့ၤဝဲလၢမီၣ်လမၠဲၣ်တကပၤအိၣ်ဝဲအဂ့ၢ်”စံးဘၣ်ခ့ၣ်အဲးစံၣ်ကညီတၢ်ကစီၣ်ဖဲအပူၤကွံၥ်လါအီးကထိဘၢၣ်(၂၄)သီအနံၤန့ၣ်လီၤ. လၢန့ၣ်အမဲၥ်ညါ,ကိးနံၤဒဲးကမျၢၢ်လီၢ်ကဝီၤအတၢ်လိၣ်ဘၣ်,အတၢ်သူတၢ်စွဲ,တၢ်တၢ်အီၣ်တၢ်အီဃ့တဖၣ်အံၤ,ဒ်သိးတၢ်ပှ့ၤအီၣ်ပှ့ၤအီကန့ၢ်ညီညီဒီးကဘၣ်ဘျီးဘၣ်ဒါအဂီၢ်,(DKBA)တကပၤဟ့ၣ်ဝဲတၢ်ပျဲလၢကနုၥ်လီၤဘၣ်ဆၣ်,မ့တုၤလၢနိၣ်တကီဒီးမီၣ်လမၠဲၣ်တကပၤန့ၣ်,တၢ်ဖီၣ်က့ၤဝဲအိၣ်ဝဲအဂ့ၢ်,အဝဲစံးအါထီၣ်ဝဲဒၣ်န့ၣ်လီၤ. ခီဖျိကၠီၣ်တဲၣ်ပနံၥ်တၢ်ဖိတၢ်လံၤတဖၣ်အံၤ,ဖဲအတုၤဆူကီၢ်ပူၤအဆၢကတီၢ်,သုးကီၣ်ကးမၤတၢ်သမံသမိးဖီၣ်ဝဲအိၣ်ဒ်အံၤအဖီခိၣ်,ပှၤမၤကၤတၢ်ဖိတဖၣ်အိၣ်ဒီးတၢ်သူၣ်ကိၢ်သးဂီၤတၢ်ဘၣ်ယိၣ်ဖဲအစိၥ်ဆှၢတၢ်ကတီၢ်အိၣ်ဝဲအဂ့ၢ်,သ့ၣ်ညါဘၣ်ဒ်ပှၤမၤကၤတၢ်ဖိတဖၣ်အအိၣ်န့ၣ်လီၤ. ပှၤမၤကၤတၢ်ဖိတဂၤစံးဝဲလၢ“ရၤမတံကျဲတပၤတၢ်အိၣ်သးတဂ့ၤဘၣ်အဃိ,ပှၤသူကဒါက့ၤကျဲလၢအံၤအါထီၣ်ဝဲန့ၣ်လီၤ.ဘၣ်ဆၣ်ခီဖျိတၢ်အိၣ်ခိးတြဲၤအါဝဲအဃိ,ဘၣ်ဟ့ၣ်ခိသွဲအါမးလီၤ.ဖဲနိၣ်တကီကျဲန့ၣ်သိလ့ၣ်တခိၣ်န့ၣ်ဘၣ်ဟ့ၣ်ဝဲသုးကီၣ်ကး(အဒုးယၤခိၣ်)ခိသွဲတုၤလၢတဆံသၢကလီၢ်ကၠးညါ,တဘျီတခီၣ်သမံသမိးတၢ်အိၣ်ဝဲန့ၣ်လီၤ.မ့မ့ၢ်လၢမီၣ်လမၠဲၣ်တကပၤဒုတသီခံသီအတီၢ်ပူၤအံၤ,တၢ်သမံသမိးဖီၣ်ဝဲကၠီၣ်တဲၣ်အပနံၥ်တၢ်ဖိတၢ်လံၤအါထီၣ်ဝဲန့ၣ်လီၤ.”အဂ့ၢ်,ပှၤမၤကၤတၢ်လၢအစိၥ်ဆှၢတၢ်ဖိတၢ်လံၤတဂၤစံးဝဲန့ၣ်လီၤ. စးထီၣ်လၢဃိၣ်သၢဖျၢၣ်ဝ့ၢ်တုၤလၢမီၣ်လမၠဲၣ်ဝ့ၢ်အပူၤန့ၣ်,(KNU)(DKBA)ကမျၢၢ်တၢ်ဒီသဒၢသုး(PDF),ကညီတၢ်မုၥ်တၢ်ခုၣ်ကီၣ်ကးကရၢ,(PC)ဃုၥ်ဒီးသုးခိးကီၢ်ဆၢ(BGF)တၢ်အိၣ်ခိးတြဲၤတဖၣ်အိၣ်ဝဲကိးဖုဒဲးဒီး,သိလ့ၣ်ဖးဒိၣ်အပၣ်(၁၀)လၢအတီတၢ်ဖိတၢ်လံၤသ့ၣ်တဖၣ်အံၤကျဲဒီတဘိအပူၤဘၣ်လဲၤခီတဲၥ်ဝဲတၢ်အိၣ်ခိးတြဲၤအါဝဲအဖီခိၣ်(၁)ခိၣ်န့ၣ်အတၢ်လၢၥ်ဘူၣ်လၢၥ်စ့ၤအိၣ်ဝဲတုၤလၢအကလီၢ်(၁၀၀)ကၠးဃၣ်ဃၣ်ညါအဂ့ၢ်,ပှၤမၤကၤတၢ်ဖိတဖၣ်စံးဝဲန့ၣ်လီၤ. ဒီးကျဲအံၤခီဖျိတၢ်အိးထီၣ်ဝဲတမ့ၢ်ဟဲခီဖျိအသးလၢထံကီၢ်ခံဘ့ၣ်အဘၢၣ်စၢၤတၢ်သးလီၤပလိၥ်အဖီခိၣ်ဘၣ်အဃိ,သုးကီၣ်ကးပှၤဘၣ်မူဘၣ်ဒါတကပၤတဘျီတခီၣ်ကးတံၥ်ကွံၥ်ဝဲတၢ်ဝံစိၥ်တီဆှၢပနံၥ်တၢ်ဖိတၢ်လံၤအကျဲအိၣ်ဝဲအဂ့ၢ်,သ့ၣ်ညါဘၣ်ဒ်လီၢ်ကဝီၤဖိတဖၣ်စံးဝဲအသိးန့ၣ်လီၤ. ကီၢ်ဆၢဃိၣ်သၢဖျၢၣ်ဝ့ၢ်ကျဲအံၤ,တကီၢ်ခါခဲအံၤသုးကီၣ်ကးအသုးကလၢၤအိၣ်ဝဲ(၂)ဖျၢၣ်ဒီးဝ့ၢ်ပူၤခီဖျိသုးကီၣ်ကးအတၢ်ပၢတၢ်ြပးဟးဂီၤကွံၥ်ဝဲလံအဃိ,လီၢ်ကဝီၤခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢပှၤဘၣ်မူဘၣ်ဒါဒီးဒံၣ်မိၣ်ကရံၣ်စံၣ်တၢ်ဘၣ်ဘျူးကညီသုးမုၢ်ဒိၣ်တဖၣ်ပၥ်ဖှိၣ်သးမၤဝဲကတီၢ်ဘၢၣ်စၢၤတၢ်တီခိၣ်ရိၢ်မဲတၢ်ပၢတၢ်ြပးအိၣ်ဝဲအဂ့ၢ်သ့ၣ်ညါဘၣ်န့ၣ်လီၤ.
နိၣ်ခၠိနဲၣ်ဒုးယၤသုးကလၢၤသုတလီၤတဂ့ၤအဂီၢ် ပယီၤသုးကဘီၤယူၤဟဲခးလီၤတၢ်တပယူၥ်ဃီ
လါအီးကထိဘၢၣ် ၂၈ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆)၀ီၢ်ရ့ၣ်ကီၢ်ဆၣ်အပူၤ သုးကီၣ်ကးအဒုးယၤသုးကလၢၤလၢအိၣ် ဆီလီၤသးဖဲဃိၣ်သၢဖျၢၣ်-သရိၥ်၀ါကျဲ နိၣ်ခၠိနဲၣ်သ၀ီပူၤအံၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်ထီၣ်က၀ီၤခး၀ဲဒီး ဒ်သိးသုးကလီၤအံၤသုတလီၤတဂ့ၤအဂီၢ် ပယီၤသုးသူကဘီယူၤဟဲခးလီၤတၢ်အိၣ်၀ဲကိးမုၢ်နံၤဒဲးဃၣ်ဃၣ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ. စးထီၣ်ဖဲတလါအံၤလါအီးကထိဘၢၣ် ၁၃ သီအနံၤန့ၣ် (KNLA)သုးပၥ်ဖှိၣ်စးထီၣ်က၀ီၤခး၀ဲနိၣ်ခၠိနဲၣ်သုးကလၢၤအံၤဒီး ခီဖျိပယီၤသုးကဘီယူၤဟဲခးလီၤကဒါတၢ်လၢဒူသ၀ီလၢအိၣ်ဘူးဖဲတၢ်ခိၣ်တၢ်ဃၢၤဖဲန့ၣ်အဃိ ကမျၢၢ်အဟံၣ်အဃီတၢ်သူၣ်ထီၣ် ဃုၥ်ဒီးတၢ်ဖံးအီၣ်မၤအီၣ်လီၢ်ကျဲဟးဂီၤအါမးအဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤ စံး၀ဲန့ၣ်လီၤ. “ဖဲလါအံၤအသီ(၂၀)လီၢ်ခံအံၤန့ၣ် ပယီၤသုးလၢအိၣ်နိၣ်ခၠိနဲၣ်ဒုးယၤသုးကလၢၤပူၤတဖၣ်စ့ၢ်ကီးဃ့ၢ်ဖျိးထီၣ်အိၣ်လီၤ. ပှၤကညီသုး ဖီၣ်န့ၢ်၀ဲကအိၣ်လၢအဂၤ(၁၀)ဘျဲၣ်ညါ.ပယီၤသုးန့ၣ်အ၀ဲသ့ၣ်တၢ်အီၣ်တၢ်အီတဲၥ်လၢၥ်လံ.မ့၀ံၤတၢ်ဒုးတကပၤနါက့ ခံခီခံကပၤ တၢ်သံတၢ်ဘၣ်ဒိဘၣ်ထံးအိၣ်ဘၣ်ဆၣ်လီၤတံၢ်လီၤဆဲးခီန့ၣ်တသ့ၣ်ညါလီၤတံၢ်ဒံးဘၣ်.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဒ်န့ၣ်အသိးဖဲလါအီးကထိဘၢၣ် ၂၅ သီအနံၤစ့ၢ်ကီး ခီဖျိပယီၤသုးကဘီယူၤဟဲတ့ၢ်လီၤ၀ဲ(၅၀၀)ပီၣ်မ့ၣ်ပိၢ် ၂ ဖျၢၣ်လၢ နိၣ်ခၠိနဲၣ်သ၀ီဃၢၤ ပနီကျဲခံသ၀ီပူၤအဃိ လီၢ်က၀ီၤကမျၢၢ်သံ(၁)ဂၤ,ဘၣ်ဒိ(၁)ဂၤ လၢန့ၣ်အမဲၥ်ညါတၢ်ဘါယွၤသရိၥ် တၢ်သူၣ်ထီၣ်စ့ၢ်ကီးဟးဂီၤ၀ဲဒၣ်တဖျၢၣ်အဂ့ၢ်ခ့ၣ်အဲၣ်ယူၣ်ထုးထီၣ်ပၥ်ဖျါ၀ဲဒီးဖဲမဟါစ့ၢ်ကီးကဘီယူၤဟဲခးလီၤတၢ်ဒံးအဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲန့ၣ်လီၤ. “ကဘီယူၤဟဲတၢၤလီၤတၢ်ဖဲပနီကျဲခံသ၀ီန့ၣ် ဘၣ်သံပှၤတဂၤ ဖဲမုၢ်ယဲၢ်နံၤအခါန့ၣ်.အဘၣ်န့ၣ်ဖဲတၢ်ဘါယွၤသရိၥ်ဃၢၤန့ၣ်လီၤ. ဖဲမဟါန့ၣ်ကဘီယူၤဟဲတၢၤလီၤတၢ်ဒံးလၢနိၣ်ခၠိနဲၣ်သ၀ီပူၤန့ၣ်. မ့တဂီၤညါအံၤဒုတနၢ်ဟူဒံးဘၣ်.”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ်ဖဲတနံၤအံၤန့ၣ်လီၤ. နိၣ်ခၠိနဲၣ်ဒုးယၤသုးကလၢၤအံၤစးထီၣ်ဖဲတနံၣ်အံၤလါမးရှးအခါန့ၣ်တၢ်ဒုးစးထီၣ်ကဲထီၣ်၀ဲဒီး ခီဖျိလၢပယီၤသုးအံၤသူ၀ဲကဘီယူၤ ဟဲခးလီၤတၢ်အဃိ ဒူသ၀ီ(၅)ဖျၢၣ်လၢအိၣ်ဘူးဖဲန့ၣ်တဖၣ် ပှၤကမျၢၢ်လၢအကထိဘၣ်ဃ့ၢ်ထီၣ်၀ဲဒီး ဒ်န့ၣ်အသိး ဃိၣ်သၢဖျၢၣ်, သရိၥ်၀ါ, မီၣ်လမၠဲၣ်ဒီးနိၣ်ခၠိနဲၣ်,ဖါပြး,ချၢၣ်တကူၣ်တၢၣ်,၀ီၢ်ရီကျဲသ့ၣ်တဖၣ် တၢ်ဆဲးကျိးစ့ၢ်ကီးကီခဲထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ် လီၤ.
ကီးတရံး-မၠၣ်၀တံၣ်ကျဲ တၢ်ပၢၢ်ဆၢသုးကရူၢ်ဒီးအီၣ်စ့ၣ်ယးသုးကျိၤသုးပၥ်ဖှိၣ်တၢ်ဒုးအပူၤတၢ်မၤန့ၢ်ကျိချံပှၥ်သၣ်တနီၤ
လါအီးကထိဘၢၣ် ၂၈ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ် ကီးတရံးကီၢ်ဆၣ် ကီးတရံး-မၠၣ်၀တံၣ်အ့ရှါကျဲမုၢ် ပယီၤသုးလၢ အဟဲထီၣ်(စစ်ကူ)တဖၣ်အံၤဒီးတၢ်ပၢၢ်ဆၢသုးပၥ်ဖှိၣ်ကရူၢ်အဘၢၣ်စၢၤတၢ်ဒုးကဲထီၣ်၀ဲဒီး တၢ်ဒုးဘျီ၀ဲအံၤအပူၤ တၢ်မၤ၀ဲဒုၣ်ဒါအ ကျိချံပှၥ်သၣ်တနီၤအဂ့ၢ်န့ၣ် ကလံၤထံးသုးဟီၣ်က၀ီၤ (PDF)တၢ်ကစီၣ်ဒီးတၢ်ဘိးဘၣ်ရၤလီၤ ထုးထီၣ်ပၥ်ဖျါ၀ဲဖဲတဟါ လါအီးကထိဘၢၣ် ၁၇ သီအနံၤန့ၣ်လီၤ. ဖဲလါအီးကထိဘၢၣ် ၂၆ သီအနံၤ သုးကီၣ်ကးအသုးတြိၤ(၅၅),စကခ(၁၂),သုးတြိၤ(၄၄),အီၣ်စ့ၣ်ယးသုးကျိၤသုးပၥ်ဖှိၣ်သ့ၣ်တဖၣ် အံၤ လၢအဟဲထီၣ်(စစ်ကူ)ဆူမၠၣ်၀တံၣ်အဂီၢ် ဖဲဟဲထီၣ်လၢကျဲတၢ်ဒ့ၣ်စၢၤအခါတၢ်ဒုးကဲထီၣ်၀ဲဒီး(KNLA)တၢ်ပၢၢ်ဆၢသုးပၥ်ဖှိၣ် ကရူၢ်လၢအဃိ တၢ်မၤန့ၢ်ဒုၣ်ဒါအကျိချံပှၥ်သၣ်တနီၤအမဲၥ်ညါဒုၣ်ဒါတကပၤသံဘၣ်ဒိဘၣ်ထံးအိၣ်၀ဲအဂ့ၢ်န့ၣ် ကလံၤထံးသုးဟီၣ်က၀ီၤ တၢ်ကစီၣ်ဒီးတၢ်ဘိးဘၣ်ရၤလီၤလံၥ်တၢ်ပၥ်ဖျါအပူၤ ပၥ်ဖျါ၀ဲန့ၣ်လီၤ. ခံခီခံကပၤတၢ်ဒုးကဲထီၣ်ဘျီ၀ဲအံၤအပူၤန့ၣ် တၢ်ပၢၢ်ဆၢသုးပၥ်ဖှိၣ်မၤန့ၢ်၀ဲ(RPG)အချံ,(၆၀ မမ)အချံ,(၄၀ မမ)အချံ ဃုၥ်ဒီးမ့ၣ်ပိၢ်လၢ အဂၤ ပၥ်ဖှိၣ်ကအိၣ်၀ဲ(၄၀)ခိၣ်ဃၢၤဒီး ဒုၣ်ဒါသံဘၣ်ဒိဘၣ်ထံးအမဲၥ်ညါ မ့မ့ၢ်လၢတၢ်ပၢၢ်ဆၢသုးပၥ်ဖှိၣ်ကရူၢ်တကပၤန့ၣ်ဘၣ်ဒိ(၃)ဂၤ တၢ်ဘၣ်ယိၣ်တအိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ. ဒ်န့ၣ်အသိးတၢ်ဒုးဘျီ၀ဲအံၤန့ၣ်မ့ၢ်၀ဲကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA),ကလံၤထံးသုးဟီၣ်က၀ီၤ သုးဟီၣ်က၀ီၤဒ့ နီၣ်ဂံၢ်(၃), ခီၤဘြၤသုးကျိၤ(၁), ခီၤဘြၤသုးကျိၤ(၂), ခ့ဖါသူသုးကျိၤ,ဘီသိၣ်၀ါသုးကျိၤ,ယီၤနံၤ(Golden Eagle)ဒြိသုးကရူၢ်, Federal Wings/Justice Wings/Fixed Wings သုးပၥ်ဖှိၣ်သ့ၣ်တဖၣ်အံၤ မၤ၀ဲဒုးယၤတၢ်ဟူးတၢ်ဂဲၤအဂ့ၢ်န့ၣ် သ့ၣ်ညါဘၣ်န့ၣ်လီၤ. သုးကီၣ်ကးအံၤလၢကဒိၣ်စိက့ၤ၀ဲကညီကီၣ်စဲၣ် ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မၠၣ်၀တံၣ်၀့ၢ်အံၤလၢလၢပှဲၤပှဲၤအဂီၢ်န့ၣ် စးထီၣ်ဖဲအပူၤကွံၥ်လါအ့ဖြ့ၣ်အခါန့ၣ် လၢကီးတရံး-မၠၣ်၀တံၣ်အ့ရှါကျဲမုၢ်အသီဒီးကျဲမုၢ်လီၢ်လံၤအံၤတဆီ...
ပယီၤသုးခးလီၤကျိဖးဒိၣ်(၂)သီအတီၢ်ပူၤကမျၢၢ်ဘၣ်ဒိ(၆)ဂၤအကျါပၣ်ဃုၥ်ပိၥ်မုၣ်(၄)ဂၤ
လါအီးကထိဘၢၣ် ၂၈ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,ချၢၣ်လွံၢ်ထူၣ်ကီၢ်ရ့ၣ်,လၢၢ်ဒိၣ်ကီၢ်ဆၣ်ဟီၣ်ကဝီၤအပူၤ,ဖဲပူၤကွံၥ်လါအီးကထိဘၢၣ်(၂၅)သီ ဒီး(၂၆)သီအနံၤန့ၣ်ခီဖျိလၢပယီၤသုးကီၣ်ကးခးလီၤကျိဖးဒိၣ်ဆူကမျၢၢ်ဒူသဝီတၢ်လီၢ်တၢ်ကျဲပူၤအဃိ(၂)သီအတီၢ်ပူၤကမျၢၢ်ဘၣ်ဒိ(၆) ဂၤအကျါပၣ်ဃုၥ်ပိၥ်မုၣ်(၄)ဂၤအဂ့ၢ်န့ၣ်ခ့ၣ်အဲၣ်ယူၣ်ထုးထီၣ်ပၥ်ဖျါဝဲဖဲမဟါအနံၤလါအီးကထိဘၢၣ်(၂၇)သီအနံၤန့ၣ်လီၤ. ဘၣ်ထွဲဒီးပယီၤသုးကီၣ်ကးခးလီၤကျိဖးဒိၣ်ဘၣ်ဒိဝဲကမျၢၢ်(၆)ဂၤတၢ်ဂ့ၢ်အံၤန့ၣ်တမ့ၢ်တၢ်ဒုးတၢ်ယၤကဲထီၣ်အဃိဘၣ်ဒီးပယီၤသုးအံၤအိၣ်ဒၣ်ခးလီၤနါစိၤကျိဖးဒိၣ်ဒ်အံၤလီၤအဂ့ၢ်န့ၣ်လၢၢ်ဒိၣ်ကီၢ်ဆၣ်အပှၤကတိၤတၢ်ပၢပဒိၣ်စီၤဝါမုၢ်စံးဘၣ်ဝဲခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ. "မ့ၢ်ကွၢ်လၢပယီၤသုးခးလီၤကျိဖးဒိၣ်တၢ်ကဲထီၣ်အသးအံၤန့ၣ်တၢ်ဒုးတၢ်ယၤကဲထီၣ်သးတအိဘၣ်.အိၣ်ဒၣ်ပယီၤသုးကီၣ်ကးခးလီၤကျိဖးဒိၣ်ဒ်အံၤလီၤမီၤနီၤ. တၢ်ကဲထီၣ်သးဒ်သိးဒီးဒုးယၤတၢ်ဟူးတၢ်ဂဲၤဒ်န့ၣ်တအိဘၣ်." အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်က စီၣ်န့ၣ်လီၤ. ခံသီအတီၢ်ပူၤပယီၤသုးကီၣ်ကးအပှၤလၢအမ့ၢ်ခီၣ်သုးရ့ၣ်(ခလရ-၂၆၄)ဒီးပယီၤသုးအပှၤလၢအိၣ်(ကွ့ ခၠီဝၣ်)ဒီး(နၣ်သၤကွ့)သ့ၣ်တ ဖၣ်အံၤခးလီၤကျိဖးဒိၣ်အဃိဘၣ်ဒိဝဲ လဲၢ်ခၣ်သဝီ-ပှၤသဝီဖိ(၁)ဂၤ,ကၠီၣ်စယ့ၣ်-သဝီဖိ(၁)ဂၤ,တီကၠီၤပီၢ်-ပှၤသဝီ(၄)ဂၤခဲလၢၥ်(၆)ဂၤ အသိးပှၤလၢအဘၣ်ဒိသ့ၣ်တဖၣ်အံၤအကျါပၣ်ဃုၥ်ပိၥ်မုၣ်(၄)ဂၤဒီးအကျါတဂၤန့ၣ်မ့ၢ်ဝဲဖိသၣ်ပိၥ်မုၣ်(၁၅)နံၣ်တဂၤအဂ့ၢ်တၢ်ပၥ်ဖျါပူၤပၥ်ဖျါဝဲန့ၣ်လီၤ. ပှၤဒူဖိသဝီဖိလၢအဘၣ်ဒိသ့ၣ်တဖၣ်အံၤန့ၣ်တကီၢ်ခါခဲအံၤကညီဆူၣ်ချ့မၤစၢၤဝဲၤကျိၤတကပၤအံးထွဲကွၢ်ထွဲဝဲဒီးကူဆါယါဘျါန့ၢ်အဝဲသ့ၣ်အဂ့ၢ်သ့ၣ်ညါဘၣ်အသိးပှၤသဝီဖိသ့ၣ်တဖၣ်အံၤလၢအဝဲသ့ၣ်တၢ်ဘံၣ်တၢ်ဘၢကအိၣ်အဂီၢ်ခူၣ်ပၥ်ဝဲတၢ်ပူၤအိၣ်ဝဲအဂ့ၢ်န့ၣ်သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအိၣ်န့ၣ်လီၤ. လၢန့ၣ်အမဲၥ်ညါခီဖျိလၢပယီၤသုးကျိဖးဒိၣ်ဒီးကမျၢၢ်တၢ်ဘၣ်ဒိဘၣ်ထံးအိၣ်ထီၣ်ဝဲအဖီခိၣ်တကီၢ်ခါခဲအံၤဒူသဝီဖဲန့ၣ်သ့ၣ်တဖၣ်ပှၤဒူဖိသဝီဖိဘၣ်အိၣ်ဘၣ်ဆိးလၢတၢ်ပျံၤတၢ်ဖုး,တၢ်ဘၣ်ယိၣ်ဘၣ်ဘှီအပူၤဒီးဘၣ်ကွၢ်ဆၢၣ်မဲၥ်ဝဲတၢ်ကီတၢ်ခဲဒ်အမ့ၢ်တၢ်လဲၤတၢ်က့ၤ,တၢ်ဖံးအီၣ်မၤအီၣ်ဒီးတၢ်မံတၢ်ဂဲၤစှၤဝဲဒီးဘၣ်အိၣ်ဒီနၢ်လၢ၂၄နၣ်ရံၣ်တီၢ်ပူၤပှဲၤပှဲၤအဂ့ၢ်န့ၣ်ပဒိၣ်စီၤဝါမုၢ်စံးအါထီၣ်စ့ၢ်ကီးဝဲန့ၣ်လီၤ. ခ့ၣ်အဲၣ်ယူၣ်-ချၢၣ်လွံၢ်ထူၣ်ကီၢ်ရ့ၣ်,လၢၢ်ဒိၣ်ကီၢ်ဆၣ်ဃုၥ်ဒီးဆီထံး,မူကီၢ်ဆၣ်ဟီၣ်ကဝီၤအပူၤပယီၤသုးကီၣ်ကးအတၢ်ခးလီၤကျိဖး ဒိၣ်,ဟဲတ့ၢ်လီၤဒြိမ့ၣ်ပိၢ်လၢကမျၢၢ်ဒူသဝီပူၤအံၤကဲထီၣ်အသးအိၣ်ဝဲကိးနံၤဒဲးဃၣ်ဃၣ်အသိးကမျၢၢ်တၢ်ဘၣ်ဒိဘၣ်ထံးစ့ၢ်ကီးအိၣ်ဝဲကိးနံၤဒဲးအမဲၥ်ညါပယီၤသုးအံၤတၢ်လီၢ်လၢအဝဲသ့ၣ်ပညိၣ်ပၥ်နီၣ်ခးလီၤဝဲအါဒၣ်တက့ၢ်န့ၣ်မ့ၢ်ဝဲကမျၢၢ်တၢ်သူၣ်ထီၣ်ကၠိ,တၢ်ဆါဟံၣ်ဒီးတၢ်ဘူၣ်တၢ်ဘါလီၢ်သ့ၣ်တဖၣ်အဂ့ၢ်န့ၣ်လီၢ်ကဝီၤဂံၢ်ခီၣ်ထံးတၢ်ကစီၣ်စံးဝဲအသိးသ့ၣ်ညါဘၣ်န့ၣ်လီၤ.