လၢဟီၣ်ခိၣ်ဒီဖျၢၣ်ကၠိသရၣ်/မုၣ်မုၢ်နံၤအဂီၢ်(KSNG)တီခိၣ်ရိၣ်မဲဒုးအိၣ်ထီၣ် တၢ်ပြၢလၢကၠိဖိသးစၢ်တဖၣ်အဂီၢ်
လါစဲးပထ့ဘၢၣ် ၁၆ သီ, ၂၀၂၄ နံၣ်, ခ့ၣ်အဲးစံၣ် လါလၢကဟဲလါအီးကထိဘၢၣ် ၅ သီလၢလီၤဘၣ်ဟီၣ်ခိၣ်ဒီဘ့ၣ်ကၠိသရၣ်/မုၣ်မုၢ်နံၤအဖီခိၣ်အံၤန့ၣ် ဒ်သိးကၠိဖိတဖၣ်ကသ့ ပၥ်လုၢ်ပၥ်ပှ့ၤ,စံးဘျုးစံးဖှိၣ်မၤလၤကပီၤ၀ဲကၠိသရၣ်/မုၣ်တဖၣ်အဂီၢ်န့ၣ်ကညီကၠိဖိပှၥ်ဘျးစဲကရူၢ်(KSNG)တီခိၣ်ရိၣ်မဲဒုးအိၣ်ထီၣ်တၢ်ပြၢတခါလၢပှၤကၠိဖိအဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ. တၢ်ပြၢလၢဟီၣ်ခိၣ်ဒီဘ့ၣ်ကၠိသရၣ်/မုၣ်မုၢ်နံၤဆၢက့ၤအဖီခိၣ်အံၤန့ၣ် တၢ်ကွဲမုၥ်၀ဲကညီကၠိဖိဒီးသူၣ်ဘီၣ်သးစၢ်တဖၣ်လၢ ကဟ့ၣ်ထီၣ်အတၢ်လဲၤခီဖျိ,တၢ်ထံၣ်,တၢ်ဆိကမိၣ်လၢတၢ်ပြၢဘျီ၀ဲအံၤဒီးတၢ်ပြၢတဘျီအံၤတၢ်နီၤဖးလီၤ၀ဲခံကလုၥ် အဂ့ၢ်န့ၣ် (KSNG)စံး၀ဲန့ၣ်လီၤ. တၢ်ပြၢဘျီ၀ဲအံၤတၢ်နီၤဖးလီၤအီၤအကလုၥ်ခံကလုၥ်ဒ်အမ့ၢ်တၢတကလုၥ်န့ၣ်လၢတၢ်ဂီၤမူအံၤတဆီ တၢ်ကသံဒိးသံကွၢ် ဘၣ်ဃး ကၠိသရၣ်/မုၣ်အဂ့ၢ်လၢ တၢ်သံကွၢ် ၄ ဖျၢၣ် ဒီး ခံကလုၥ်တကလုၥ်န့ၣ် တၢ်ကွဲးပြၢထါ ထါအခိၣ်တီလၢအမ့ၢ် “ထံကီၢ်ခိၣ်နၢ်ဟဲခီဖျိ,ကၠိသရၣ်အတၢ်သိၣ်လိ” ဒီးဒ်န့ၣ်အသိးပှၤလၢအနုၥ်လီၤပြၢတၢ်တဖၣ်ကဘၣ်မ့ၢ်(၂၈)နံၣ်ဆူဖီလၥ် အဂ့ၢ်န့ၣ် သ့ၣ်ညါဘၣ်န့ၣ်လီၤ. ဘၣ်ဃးတၢ်ဒုးအိၣ်ထီၣ်တၢ်ပြၢလၢပှၤကၠိဖိဒီးသးစၢ်အဂီၢ်အံၤအတၢ်ပညိၣ်န့ၣ် (KSNG)ကရၢခိၣ် စီၤန့ၢ်ကီၢ်စ့ စံး၀ဲလၢ “လီၤဆီဒၣ်တၢ်လၢပပှၤကညီကၠိဖိတဖၣ်ကစံးဘျုးစံးဖှိၣ်ဟ့ၣ်လၤကပီၤ၀ဲဒၣ်ကၠိသရၣ်/မုၣ်ဒီးကပၥ်ဖျါထီၣ်၀ဲလၢတဘၣ်သးပ့ၤနီၣ်ကၠိသရၣ်/မုၣ်တဖၣ်အတၢ်တူၢ်ဆါသးအလုၢ်အပှ့ၤသ့ၣ်တဖၣ်ဘၣ်.အဂၤတထံၣ်န့ၣ်ကၠိသရၣ်/မုၣ်တဖၣ်ကဆဲးမၤတၢ်ဒီးကသ့ပၥ်ကဖၢလၢသးလၢအတၢ်မၤဂ့ၤသ့ၣ်တဖၣ်လၢအ၀ဲသ့ၣ်မၤဂ့ၤဘၣ်၀ဲမီၤနီၤ.လၢန့ၣ်အမဲၥ်ညါန့ၣ်ပအဲၣ်ဒိးလၢပှၤကၠိဖိတဖၣ်ကအဲၣ်ကွဲးလံၥ်ကွဲးလဲၢ်ကတိၤဒိၣ်စံးဘျုး၀ဲဒၣ်ပပှၤကလုၥ်တၢ်ပၢၢ်ဆၢကၠိသရၣ်/မုၣ်တဖၣ်အတၢ်တူၢ်ဆါသးဒီးဒုးအိၣ်ဖျဲၣ်ထီၣ်ပပှၤကလုၥ်ထံကီၢ်ခိၣ်နၢ်သ့ၣ်တဖၣ်ဒီးပအဲၣ်ဒိးလၢကၠိဖိတဖၣ်ကသ့ပၥ်ဖှိၣ်မၤသကိးတၢ်”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. တကးဒံးဘၣ်ဒ်သိးကၠိသရၣ်/မုၣ်သ့ၣ်တဖၣ်ကသ့ၣ်ညါဘၣ်၀ဲလၢ(KSNG)အတၢ်ဒုးအိၣ်ထီၣ်တၢ်ပြၢလၢပှၤကၠိဖိအဂီၢ်အဖီခိၣ်အံၤဒီးလၢန့ၣ်အမဲၥ်ညါကီၢ်ပူၤ,ထံဆၢကီၢ်ဆၢဒဲက၀ီၤကၠိသရၣ်/မုၣ်သ့ၣ်တဖၣ်စံးဘျုးစံးဖှိၣ်စီၤပၥ်လုၢ်ပၥ်ပှ့ၤအတၢ်မၤဂ့ၤဟ့ၣ်လီၤသးအလုၢ်အပှ့ၤသ့ၣ်တဖၣ်ကိးဂၤအဂ့ၢ်န့ၣ် (KSNG)ကရၢခိၣ် စီၤန့ၢ်ကီၢ်စ့ စံး၀ဲန့ၣ်လီၤ. ဒ်န့ၣ်အသိးတၢ်ပြၢဘျီ၀ဲအံၤမ့မ့ၢ်လၢတၢ်ကွဲးထါတကပၤန့ၣ်တၢ်ကဘၣ်ကွဲးအီၤထဲလၢကညီစှီၤကျိၥ်ဒီး ဒ်န့ၣ်အသိး ခိၣ်ဖးတၢတကလုၥ်လၢတၢ်သံဒိးသံကွၢ်အဂီၢ်န့ၣ်တၢ်ပၥ်ပနီၣ်၀ဲခိၣ်ဖးတၢ(၂၀၀၀)ဘး,ခိၣ်ဖးခံ(၁၅၀၀)ဘး,ခိၣ်ဖးသၢ (၁၀၀၀)ဘးဒီးမ့မ့ၢ်တၢ်ပြၢခံကလုၥ်တကလုၥ်လၢတၢ်ကွဲးပြၢထါအံၤခီန့ၣ် ခိၣ်ဖးတၢ(၁၀၀၀)ဘး,ခိၣ်ဖးခံ(၇၀၀)ဘး ဒီး ခိၣ်ဖးသၢ(၅၀၀)ဘးအဂ့ၢ်န့ၣ် သ့ၣ်ညါဘၣ်န့ၣ်လီၤ. လၢန့ၣ်အမဲၥ်ညါတၢ်ပြၢဘျီ၀ဲအံၤတၢ်ကဘၣ်ဆှၢထီၣ်အီၤစဲၤခံကတၢၢ်ဖဲလါအီးကထိဘၢၣ် ၁ သီဒီး ပှၤလၢအနုၥ်လီၤ ပြၢတၢ်တဖၣ်ကဘၣ်ကွဲးလီၤအမံၤ,တၢ်ဆဲးကျိးနီၣ်ဂံၢ်,တၢ်အိၣ်တၢ်ဆိးအလီၢ်ဒီး ဆှၢထီၣ်အီၤဆူ (ksng.sfm1995@gmail.com naykawksnghq96@gmail.com )သ့၀ဲဒၣ်န့ၣ်လီၤ.
ဃိၣ်လိၥ်ကျိထံဒိၣ်ထီၣ်,အံတူၢ်ထၣ်ဒဲကဝီၤကမျၢၢ်ဟံၣ်အဖျၢၣ်(၃၀၀)ဘျဲၣ်ဟးဂီၤ
လါစဲးပထ့ဘၢၣ် ၁၅သီ, ၂၀၂၄နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်,ကညီဒီကလုၥ်စၢဖှိၣ်ကရၢ,သုးက့(၅)မုၢ်ြတီၢ်ကီၢ်ရ့ၣ်အံတူၢ်ထၣ်ကီၢ်ပူၤကညီဘၣ်ကီဘၣ်ခဲဒဲကဝီၤအံၤ,အပူၤကွံၥ်လါစဲးပထ့ဘၢၣ်(၁၃)သီအနံၤအပူၤ,တၢ်စူၤအါဝဲဒီးဃိၣ်လိၥ်ကျိထံဒိၣ်ထီၣ်ဝဲအဃိဒဲကဝီၤအပူၤ,ကမျၢၢ်ဟံၣ်အဖျၢၣ်(၃၀၀)ဘျဲၣ်ဘၣ်ဟးဂီၤကွံၥ်ဝဲအဂ့ၢ်,ကညီတၢ်ဆီၣ်ထွဲမၤစၢၤတၢ်မုၥ်တၢ်ခုၣ်ပှၥ်ဘျးစဲ(KPSN)ပှၤဘၣ်မူဘၣ်ဒါတဖၣ်စံးဝဲန့ၣ်လီၤ. ဃိၣ်လိၥ်ကျိထံဒိၣ်ထီၣ်နုၥ်လီၤလုၢ်ဘၢဝဲဒဲကဝီၤအပူၤဟံၣ်လၢအိၣ်ဘူးဒီးထံကျိနံၤတဖၣ်အဃိဟံၣ်တဖၣ်လီၢ်ပှီၢ်ဝဲတစှၤန့ၣ်အဖျၢၣ်(၃၀၀)ဘၣ်အိၣ်ဝဲဒီး,တကီၢ်ခါခဲအံၤဒ်သိးကဒိးန့ၢ်ဟံၣ်လီၢ်ပှီၢ်အနီၢ်ဂံၢ်နီၢ်ဒွးဒီးကမျၢၢ်တၢ်ဘၣ်ဒိဘၣ်ထံးစရီလီၤတံၢ်လီၤဆဲးအဂီၢ်,ဒဲကဝီၤပှၤဘၣ်မူဘၣ်ဒါသမံသမိးမၤလီၤတံၢ်ဝဲအဖၢမုၢ်လီၤအဂ့ၢ်,ကညီတၢ်ဆီၣ်ထွဲမၤစၢၤတၢ်မုၥ်တၢ်ခုၣ်ပှၥ်ဘျးစဲ(KPSN)မံးဒံးယၢၣ်မူဒါခိၣ်စီၤအဲၣ်ဒိၣ်ဝါစံးဝဲဒ်အံၤန့ၣ်လီၤ. အဝဲစံးဝဲလၢ“ဃိၣ်လိၥ်ကျိအံၤလီၤဆီဒၣ်တၢ်ထံမ့ထီၣ်တုၤလၢဟံၣ်ပူၤဘျီလံန့ၣ်ဟံၣ်သ့ၣ်တဖၣ်ဟးဂီၤလီၤပှီၢ်တကးဘၣ်ဟံၣ်လၢအမ့တလီၤပှီၢ်ဘၣ်ပူၤဖျၢၣ်ပူၤဖျၢၣ်တခီန့ၣ်အပူၤအိၣ်ထဲကပံးလဲလဲလီၤ.ကပံးန့ၣ်တီၣ်ရးမး,အဃိန့ၣ်ပှၤဘၣ်မၤပျီက့ၤအီၤဖးနးညါန့ၣ်လီၤ.ခဲခဲအံၤန့ၣ်ထံဒိၣ်ထီၣ်တဘျီဟံၣ်လၢအိၣ်ဘူးဒီးထံနံၤသ့ၣ်တဖၣ်န့ၣ်ဒုထံနုၥ်ဘၢတဘျီပကွၢ်လၢဟီၣ်ကဝီၤတၢ်အိၣ်သးန့ၣ်လီၤပှီၢ်ဝဲကအိၣ်ဝဲလၢ(၃၀၀)ဘျဲၣ်(၄၀၀)ညါ,ခဲအံၤဒဲကဝီၤခိၣ်ဟးမၤလီၤတံၢ်လီၤဆဲးဝဲဟံၣ်ဟးဂီၤဝဲအနီၢ်ဂံၢ်အဖၢမုၢ်လီၤ.ဒီးဒ်န့ၣ်အသိး,လၢကမျၢၢ်တၢ်သံတၢ်ပှၢ်တၢ်ဘၣ်ဒိဘၣ်ထံးတကပၤသနါက့တၢ်သမံသမိးဝဲအဖၢမုၢ်လီၤ”အဂ့ၢ်စံးဝဲန့ၣ်လီၤ. လၢန့ၣ်အမဲၥ်ညါ,တကီၢ်ခါခဲအံၤထံလီၤကဒါက့ၤလံအိၣ်ဝဲဘၣ်ဆၣ်ခီဖျိဟံၣ်တဖၣ်လီၤပှီၢ်ဝဲအဃိကမျၢၢ်လီၢ်ကဝီၤဖိတဖၣ်က့ၤအိၣ်ဆိးဝဲလၢအနီၢ်ကစၢ်ဟံၣ်ဃီတသ့ဒံးဘၣ်အဖီခိၣ်အိၣ်ဆိးဝဲဒီးပှၤလၢအဟံၣ်အိၣ်လၢတၢ်လူၢ်ခိၣ်တဖၣ်အသိးအကျါလီၤအဂ့ၢ်,အဝဲစံးအါထီၣ်ဝဲဒၣ်န့ၣ်လီၤ. တကဒီးဒံးဘၣ်ဒ်သိးကမျၢၢ်လီၢ်ကဝီၤဖိတဖၣ်ကက့ၤသူၣ်ထီၣ်ဘှီထီၣ်ဒီးက့ၤအိၣ်ဆိးဝဲလၢအနီၢ်ကစၢ်ဟံၣ်ဃီကသ့အဂီၢ်,တကီၢ်ခါခဲအံၤတၢ်မၤပျီမၤကဆှဲကဆှီထီၣ်က့ၤဝဲအတၢ်လီၢ်တၢ်ကျဲအဖၢမုၢ်အသိး,လီၢ်ကဝီၤဖိတဖၣ်အံၤလိၣ်ဘၣ်ဝဲဟံၣ်ဃီတၢ်ပီးတၢ်လီ,တၢ်အီၣ်တၢ်အီဒီးတၢ်ကူတၢ်သိးတဖၣ်လၢဂ့ၢ်ဂီၢ်အူအိၣ်ဝဲအဂ့ၢ်,ပှၤဘၣ်မူဘၣ်ဒါတဖၣ်စံးဝဲန့ၣ်လီၤ. တကတီၢ်ဃီ,အံတူၢ်ထၣ်လီၢ်အိၣ်ကမှံတၢ်လီၢ်အံၤမ့ၢ်ဝဲတၢ်လီၢ်ထဲတတီၤဧိၤလၢအိၣ်ဝဲလၢကီၢ်ရ့ၣ်ထးခီတကပၤဒီးအိၣ်ဝဲလၢဃိၣ်လိၥ်တၢ်မုၥ်တၢ်ခုၣ်ကရၢၢ်ဟီၣ်ကဝီၤအပူၤအဃိ,ကမျၢၢ်လီၢ်ကဝီၤဖိတဖၣ်အံၤကဃုဖံးဃုမၤအီၣ်အီတညီတဘှါဘၣ်ဒီးတကီၢ်ခါခဲအံၤသဂၢၢ်ဘၣ်ဝဲန့ဆၢၣ်တၢ်တတၢၤတနါအဖီခိၣ်ကဲထီၣ်ဝဲတၢ်ကီတၢ်ခဲလၢအဝဲသ့ၣ်တဖၣ်အဂီၢ်ဒိၣ်မးအဂ့ၢ်,ပှၤဘၣ်မူဘၣ်ဒါတဖၣ်စံးဝဲဒၣ်စ့ၢ်ကီးန့ၣ်လီၤ. ဒ်န့ၣ်အသိး,အံတူၢ်ထၣ်ကညီဘၣ်ကီဘၣ်ခဲဒဲကဝီၤအံၤ,အပူၤကွံၥ်(၂၀၀၆)နံၣ်ကီၢ်ပယီၤအပူၤပယီၤသုးပဒိၣ်တဖၣ်မၤဝဲတၢ်ထီၣ်ဒုးသုးကျိၤတၢ်ဟူးတၢ်ဂဲၤလၢခ့ၣ်အဲၣ်ယူၣ်သုးက့(၂)တီအူကီၢ်ရ့ၣ်တၢ်ပၢဟီၣ်ကဝီၤအပူၤအဆၢကတီၢ်,ကမျၢၢ်လီၢ်ကဝီၤဖိတဖၣ်ဘၣ်ပၥ်တ့ၢ်လီၢ်ကျဲဃ့ၢ်ထီၣ်ကွံၥ်ဝဲအဃိ,လၢကအိၣ်ဆိးဝဲတစိၢ်တလီၢ်အဂီၢ်ပှၤဘၣ်မူဘၣ်ဒါတဖၣ်ရဲၣ်ကျဲၤန့ၣ်အဝဲသ့ၣ်တဖၣ်ဖဲကီၢ်ကၠီၣ်တဲၣ်ကီၢ်ပယီၤကီၢ်ဆၢမုၢ်ြတီၢ်ကီၢ်ရ့ၣ်,ဃိၣ်လိၥ်ကျိနံၤတၢ်လီၢ်အပူၤအံၤန့ၣ်လီၤ.ဒီးအဝဲသ့ၣ်တဖၣ်အံၤအနီၢ်ဂံၢ်နီၢ်ဒွးအိၣ်ဝဲအ၈ၤ(၂၀၀၀)ဃၣ်ဃၣ်အဂ့ၢ်,သ့ၣ်ညါဘၣ်ဒ်ပှၤဘၣ်မူဘၣ်ဒါတဖၣ်စံးဝဲအသိးန့ၣ်လီၤ.
ပယီၤသုးဖိ(၂)ဂၤလဲၤဒိးအးလီၤအသးလၢ(KNDO)သုးရ့ၣ်(၇)အစုပူၤ
လါစဲးပထ့ဘၢၣ် ၁၄သီ, ၂၀၂၄နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်,ကညီဒီကလုၥ်စၢဖှိၣ်ကရၢ,သုးက့(၄)ဘျံးဒဝဲၢ်ကီၢ်ရ့ၣ်,လၢၢ်မုၢ်လါကီၢ်ဆၣ်ပလီဟီၣ်ကဝီၤအပူၤ,အပူၤကွံၥ်လါစဲးပထ့ဘၢၣ်(၁၂)သီအနံၤအပူၤပယီၤသုးဖိ(၂)ဂၤလဲၤဒိးအးလီၤက့ၤဝဲအသးလၢ(KNDO)သုးရ့ၣ်(၇)သုးဒ့(၅)အစုပူၤအဂ့ၢ်,ကွဲၤကလုၢ်ပၥ်ဖျါထီၣ်ဝဲဖဲမဟါလါစဲးပထ့ဘၢၣ်(၁၃)သီအနံၤလီၤ. ပယီၤသုးဖိ(၂)ဂၤအံၤ,အသုးကျိၤမၤဝဲတၢ်ထီၣ်ဒုးဖဲဟီၣ်ကဝီၤအပူၤအဆၢကတီၢ်ခီဖျိတအဲၣ်ဒိးပၣ်ဃုၥ်မၤသကိးဝဲတၢ်လၢၤဘၣ်အဃိ,ဃ့ၢ်ပူၤဖျဲးထီၣ်ကွံၥ်ဝဲအသးလၢအသုးကျိၤအပူၤဒီးလဲၤဒိးအးလီၤက့ၤဝဲအသး(KNDO)အစုပူၤအဂ့ၢ်,ဘျံးဒဝဲၢ်ကီၢ်ရ့ၣ်နဲၣ်ရွဲၣ်ပဒိၣ်(စီၤအဲၣ်နၤ)စံးဝဲဒ်အံၤန့ၣ်လီၤ. အဝဲစံးဝဲလၢ“ပယီၤအသုးဖိ(၂)ဂၤန့ၣ်,အဝဲသ့ၣ်န့ၣ်ဟဲလၢဘၣ်ထွဲဒီးသုးကီၣ်ကးသုးရ့ၣ်(၂၈၅)မီၤ.ခဲခဲအံၤဖဲသုးရ့ၣ်(၇)သုးက့(၅)ဟီၣ်ကဝီၤအပူၤခီန့ၣ်ပယီၤသုးကျိၤန့ၣ်မၤတၢ်ထီၣ်ဒုးတၢ်ဟူးတၢ်ဂဲၤအဃိသုးဖိခံဂၤအံၤခီဖျိတအဲၣ်ဒိးပၣ်ဃုၥ်မၤသကိးတၢ်ဒိးအပှၤလၢၤဘၣ်အဃိန့ၣ်,ဟဲဃ့ၢ်ဖျိးထီၣ်ဖဲန့ၣ်ဝံၤဒိးအးလီၤအသးလၢကညီသုးမုၢ်ဒိၣ်အစုပူၤလီၤ.”အဂ့ၢ်စံးဝဲန့ၣ်လီၤ. လၢန့ၣ်အမဲၥ်ညါ,သုးကီၣ်ကးအသုးဖိ(၂)ဂၤအံၤ,တဟဲစိၥ်ဃုၥ်ဝဲစုကဝဲၤနီတဂၤဘၣ်ဒီးအဝဲသ့ၣ်တဖၣ်အံၤဟဲဃ့ၢ်ထီၣ်ဝဲလၢခီၣ်သုးရ့ၣ်,ခလရ(၂၈၅)သုးကျိၤအပူၤအဂ့ၢ်,အဂ့ၢ်,ကီၢ်ရ့ၣ်နဲၣ်ရွဲၣ်စံးအါထီၣ်ဝဲဒၣ်န့ၣ်လီၤ. တကးဒံးဘၣ်,ပယီၤသုးဖိလၢလဲၤဒိးအးလီၤအသးဆူ(KNDO)သုးရ့ၣ်(၇)သုးဒ့(၅)အစုပူၤ(၂)ဂၤအံၤ,မ့ၢ်ဝဲသုးဖိ(ကိၤယဲမ့)သးနံၣ်(၃၂)နံၣ်ဒီး(ယဲမ့ကၠီၤ)သးနံၣ်(၂၈)သ့ၣ်တဖၣ်အဂ့ၢ်,သ့ၣ်ညါဘၣ်န့ၣ်လီၤ. ဒီးဒ်ခ့ၣ်အဲၣ်ယူၣ်ပၥ်လီၤကျဲသနူအိၣ်ဝဲအသိးန့ၣ်,သုးကီၣ်ကးအသုးဖိခံဂၤအံၤမ့ၢ်အဲၣ်ဒိးထီဒါက့ၤဝဲသုးကီၣ်ကးန့ၣ်ပၥ်ဖှိၣ်မၤသကိးဝဲတၢ်ဒီးကညီသုးမုၢ်ဒိၣ်တဖၣ်သ့ဝဲအသိး,မ့အဲၣ်ဒိးအိၣ်က့ၤဒ်ကမျၢၢ်ဒီးလဲၤဆူတၢ်လီၢ်အဂၤသနါက့ဟီၣ်ကဝီၤခိၣ်နၢ်တဖၣ်ကရဲၣ်ကျဲၤန့ၣ်အဝဲသ့လၢအဂ့ၤကတၢၢ်အဂ့ၢ်,ပှၤဘၣ်မူဘၣ်ဒါတဖၣ်စံးဝဲန့ၣ်လီၤ. တကတီၢ်ဃီ,တကီၢ်ခါခဲအံၤ,သုးကီၣ်ကးခီၣ်သုးရ့ၣ်(၂၈၅)လၢအိၣ်ဝဲဖဲပလီၣ်ဟီၣ်ကဝီၤအပူၤတဖၣ်အံၤအဂံၢ်ဘါကအိၣ်ဝဲ(၆၀)ဃၣ်ဃၣ်ဒီးဟူးဂဲၤဝဲအဃိ,တၢ်ဒုးကဲထီၣ်ဝဲလၢသုးကီၣ်ကးဒီးသုးရ့ၣ်(၇)သုးဒ့(၅)အဘၢၣ်စၢၤကိးနံၤဒဲးအိၣ်ဝဲအဂ့ၢ်,သ့ၣ်ညါဘၣ်ဒ်ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲအသိးန့ၣ်လီၤ. ဒ်န့ၣ်အသိး,ခ့ၣ်အဲၣ်ယူၣ်သုးက့(၄)လၢၢ်မုၢ်လါကီၢ်ဆၣ်အပူၤအံၤ,အပူၤကွံၥ်လါစဲးပထ့ဘၢၣ်အဆိကတၢၢ်တနွံအပူၤ,သးစၢ်(၂၇)ဂၤလၢကၠီၣ်တဲၣ်ဖီၣ်ဆှၢဝဲဆူသုးကီၣ်ကးအစုပူၤလၢကဘၣ်လဲၤကဲသုးတဖၣ်မၤပူၤဖျဲးထီၣ်ကွံၥ်တ့ၢ်ဝဲအသးဒီးလဲၤဃ့ၢ်ထီၣ်ဝဲဆူသုးရ့ၣ်(၇)သုးဒ့(၅)အစုပူၤလၢတၢ်ပၥ်ဖှိၣ်မၤသကိးတၢ်အိၣ်ဝဲဂ့ၢ်,သ့ၣ်ညါဘၣ်န့ၣ်လီၤ.
လိးရှါသုးကလၢၤအပူၤပယီၤသုးတဖၣ်ပၥ်တ့ၢ်ကွံၥ်အသုးကလၢၤဒီးစံၣ်ဖျိးထီၣ်ကွံၥ်ဝဲ
လါစဲးပထ့ဘၢၣ် ၁၃သီ, ၂၀၂၄နံၣ်, ခ့ၣ်အဲးစံၣ် ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်,ဝီၢ်ရ့ၣ်ကီၢ်ဆၣ်ဝီၢ်ရီဟီၣ်ကဝီၤလိးရှါသုးကလၢၤအပူၤပယီၤသုးတဖၣ်,ပၥ်တ့ၢ်ကွံၥ်အသုးကလၢၤဒီးစံၣ်ဖျိထီၣ်ကွံၥ်ဝဲဖဲမဟါလါစဲးပထ့ဘၢၣ်(၁၁)သီမုၢ်နၤခီအဆၢကတီၢ်အဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲန့ၣ်လီၤ. လိးရှါသုးကီၣ်ကးအသုးကလၢၤအပူၤပယီၤသုးတဖၣ်အံၤ,စးထီၣ်ဖဲလါအီကူးအပူၤ(KNLA)ကညီတၢ်ထူၣ်ဖျဲးသုးမုၢ်ဒိၣ်ဒီးတၢ်ပၢၢ်ဆၢသုးပၥ်ဖှိၣ်တဖၣ်ပၥ်ဖှိၣ်သးကးတံၥ်ကဝီၤထီၣ်ခးအဝဲသ့ၣ်တဖၣ်ဒီးဒြိအိၣ်ဝဲအဃိ,တူၢ်ဝဲတန့ၢ်လၢၤဘၣ်ဒီးဃ့ၢ်ထီၣ်ကွံၥ်ဝဲလၢအသုးကလၢၤအပူၤအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤစံးဝဲဒ်အံၤန့ၣ်လီၤ. အ၀ဲစံးဝဲလၢ“ပယီၤန့ၣ်စံၣ်ထီၣ်ဝဲလၢအသုးကလၢၤအပူၤဖဲမုၢ်နၤတၢ်ခံးအဆၢကတီၢ်လီၤဘၣ်မနုၤအဃိလဲၣ်မုၢ်ဝါထီၣ်အဆၢကတီၢ်တၢ်ပၢၢ်ဆၢသုးပၥ်ဖှိၣ်တဖၣ်လဲၤထီၣ်န့ၣ်အဝဲသ့ၣ်တအိၣ်နီတဂၤလၢၤဘၣ်.တၢ်ပၢၢ်ဆၢသုးပၥ်ဖှိၣ်တကပၤလဲၤမၤဖှိၣ်အဝဲသ့ၣ်ဒီးဒြိအဃိတူၢ်ဝဲတကဲလၢၤဘၣ်ဒီးစံၣ်ထီၣ်ကွံၥ်ဝဲလီၤ.အဝဲသ့ၣ်တဖၣ်အံၤက့ၤစံၣ်လီၤလၢသရိၥ်ဝါတကပၤတခီလီၤ.မ့မ့ၢ်လၢအသုးကလၢၤအပူၤတခီပၥ်တ့ၢ်ဝဲဟီၣ်လၥ်မ့ၢ်ပိၢ်ဒီးမ့ၣ်ပိၢ်တၢ်မဲၥ်ညါတဖၣ်လီၤ”အဂ့ၢ်စံးဝဲန့ၣ်လီၤ. လၢန့ၣ်အမဲၥ်ညါ,လိးရှါပယီၤသုးလၢအစံၣ်ဖျိးထီၣ်တဖၣ်အံၤက့ၤလီၤက့ၤဝဲဆူသရိၥ်ဝါလၢကပၥ်ဖှိၣ်အသးဒီးမိၢ်ကီၢ်စဲၣ်(စခါကၠံ)သုးကလၢၤအဃိ,ဖဲအက့ၤလၢကျဲဒီတကတီၢ်အပူၤ,တၢ်ပၢၢ်ဆၢသုးပၥ်ဖှိၣ်လူၤကးတံၥ်အခိၣ်လၢကျဲတီၤဒီးလူၤခးအဝဲသ့ၣ်တပယူၥ်ဃီအိၣ်ဝဲအဂ့ၢ်,အဝဲစံးအါထီၣ်ဝဲဒၣ်န့ၣ်လီၤ. တကးဒံးဘၣ်,လိးရှါသုးကလၢၤပယီၤသုးတဖၣ်အံၤတချူးဟးထီၣ်ကွံၥ်လၢအသုးကလၢၤပူၤအဆၢကတီၢ်မၤဟးဂီၤကွံၥ်ဝဲတၢ်အီၣ်တၢ်အီလၢစိၥ်ဝဲတန့ၢ်လၢၤဘၣ်တဖၣ်ဒီးခူၣ်လီၤဘၢဝဲအပှၤလၢဘၣ်ဒိဘၣ်ထံးသံတနီၤအိၣ်ဝဲအဂ့ၢ်,ဒီးပယီၤသုးသံတၢ်ဘၣ်ဒိဘၣ်ထံးမ့ၢ်ဂ့ၤ,တၢ်မၤန့ၢ်တၢ်စုကဝဲၤသ့ၣ်တဖၣ်မ့ၢ်အဂ့ၤတၢ်မၤလီၤတံၢ်အီၤအဖၢမုၢ်လီၤအဂ့ၢ်သ့ၣ်ညါဘၣ်ဒ်ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲအသိးန့ၣ်လီၤ. တကတီၢ်ဃီ,လိးရှါသုးကီၣ်ကးပယီၤသုးကလၢၤအံၤအပူၤကွံၥ်မ့ၢ်ဝဲ(KNLA)သုးက့(၆)သုးရ့ၣ်(၁၆)အိၣ်ဆိးတၢ်ဘံၣ်တၢ်ဘၢအတၢ်လီၢ်တတီၤဒီးစးထီၣ်ဖဲ(၂၀၂၁)နံၣ်အပူၤသုးကီၣ်ကးအပှၤတဖၣ်ဟဲထီၣ်ဆီလီၤသးအိၣ်ဆိးက့ၤဝဲဒီးအသုးဂံၢ်ဘါအိၣ်ဝဲလၢ(၇၀)ဃၣ်ဃၣ်ဘၣ်ဆၣ်အိၣ်ဆိးဝဲယံၥ်(၃)နံၣ်ဘျဲၣ်အလီၢ်ခံ,တၢ်ပၢၢ်ဆၢသုးပၥ်ဖှိၣ်က့ၤထီၣ်မၤန့ၢ်က့ၤဝဲအနီၢ်ကစၢ်တၢ်လီၢ်အဂ့ၢ်,သ့ၣ်ညါဘၣ်န့ၣ်လီၤ. ဒီးဖဲသုးကီၣ်ကးအိၣ်ဆိးလၢ(၃)နံၣ်ဘျဲၣ်အတီၢ်ပူၤအံၤန့ၣ်,ခံခီခံကပၤတၢ်ခးလိၥ်သးကဲထီၣ်တဘျီလၢ်လၢ်အခါသုးကီၣ်ကးတကပၤခးလီၤစၢၤဝဲကျိဖးဒိၣ်,မၤပျံၤမၤဖုးဝဲကမျၢၢ်လီၢ်ကဝီၤဖိအမဲၥ်ညါ,ကဘီယူၤဟဲခးလီၤစ့ၢ်ကီးတၢ်အဃိ,ဒူသဝီအပူၤကမျၢၢ်ဟံၣ်ဃီဒီးတၢ်ဘူၣ်တၢ်ဘါတၢ်သူၣ်ထီၣ်တဖၣ်ဘၣ်ဟးဂီၤကွံၥ်ဝဲအသိး,လိးရှါကမျၢၢ်ဒူသဝီဖိတဖၣ်ဘၣ်ဃ့ၢ်ထီၣ်ကွံၥ်ဝဲလၢသဝီပူၤအိၣ်ဝဲအဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲန့ၣ်လီၤ. ဒ်န့ၣ်အသိး,လိးရှါသုးကလၢၤပယီၤသုးတဖၣ်အံၤအပူၤကွံၥ်လါအီကူးအပူၤလၢကမၤအါထီၣ်ဂံၢ်ဘါအဂီၢ်,ဟဲထီၣ်ဝဲလၢကျဲအခါဖီၣ်ဝဲဖါပြးလီၢ်ကဝီၤသးစၢ်ခံဂၤဃုၥ်ဒီးမဲၥ်ကျုၢ်လီၢ်ကဝီၤသးစၢ်တဂၤဒ်တၢ်ဒီသဒၢဒီးမၢဝဲတၢ်လဲၤဒုးနဲၣ်ကျဲ,ဝံတၢ်ယိးတၢ်ဝံၤအလီၢ်ခံတုၤလၢအခဲအံၤတၢ်ဆဲးကျိးက့ၤသးစၢ်(၃)ဂၤအံၤတန့ၢ်လၢၤဘၣ်အဂ့ၢ်,ဖါပြးသဝီပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
သထူၣ်ကီၢ်ဆၣ်ပူၤ CIDKP ဟ့ၣ်လီၤဂ့ၢ်ဂီၢ်အူစ့ဆီၣ်ထွဲမၤစၢၤလၢသ၀ီ(၃)ဖျၢၣ်လၢဘၣ်ကွၢ်ဆၢၣ်မဲာ်တၢ်ဒုးတၢ်ယၤ
လါစဲးပထ့ဘၢၣ် ၁၃ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် သထူၣ်ကီၢ်ဆၣ်အပူၤ ဒူသ၀ီ(၃)ဖျၢၣ်လၢအဘၣ်ကွၢ်ဆၢၣ်မဲာ် တၢ်ဒုးတၢ်ယၤသ့ၣ်တဖၣ်အံၤ ကီၢ်ပူၤကညီၦၤလီၢ်အိၣ်ကမှံကမံးတံာ်(CIDKP)ဟ့ၣ်လီၤမၤစၢၤ၀ဲဂ့ၢ်ဂီၢ်အူစ့ဆီၣ်ထွဲမၤစၢၤ အဂ့ၢ်န့ၣ် သ့ၣ်ညါဘၣ်န့ၣ်လီၤႉ သထူၣ်ကီၢ်ဆၣ်ပူၤ ထံညၣ်ပီၢ်ကရူၢ် သ၀ီ(၃)လၢအဘၣ်ကွၢ်ဆၢၣ်မဲာ်ပယီၤသုးအတၢ်ခးလီၤကျိဖးဒိၣ်ဒီးတၢ်ဒုးတၢ် ယၤ အဃိအံၤတဖၣ် ဖဲလါစဲးပထ့ဘၢၣ် ၁၁ သီအနံၤန့ၣ် (CIDKP)မၤစၢၤ၀ဲဂ့ၢ်ဂီၢ်အူစ့ဆီၣ်ထွဲမၤစၢၤဟံၣ်ဒူၣ်(၂၃၉)ဖျၢၣ် အဂ့ၢ်န့ၣ် ဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤ စံး၀ဲန့ၣ်လီၤႉ “ပကီၢ်ရ့ၣ်ဟီၣ်က၀ီၤပူၤကမျၢၢ်ထံဖိကီၢ်ဖိတဖၣ်အိၣ်ဆိးလဲၤက့ၤဖံးမၤတသဘျ့ဘၣ်ႉလၢအ၀ဲသ့ၣ်ဂီၢ်စ့ၢ်ကီးတၢ်ဘံၣ် တၢ်ဘၢ တအိၣ်အဃိဘၣ်အိၣ်လၢတၢ်ပျံၤတၢ်ဖုးပူၤတၢ်ဘၣ်ယိၣ်ထီဘိဖံးအီၣ်မၤအီၣ်စ့ၢ်ကီးတဘူၣ်ဘၣ်ႉအဃိဒ်သိးအ၀ဲသ့ၣ်ကဒိးန့ၢ်ဘၣ်ဂ့ၢ်ဂီၢ်အူတၢ်တိစၢၤမၤစၢၤအဂီၢ်ကီၢ်ပူၤကညီၦၤလီၢ်အိၣ်ကမှံကမံးတံာ်(CIDKP)ဟဲလီၤမၤစၢၤ၀ဲထံညၣ်ပီၢ်ကရူၢ် သ၀ီ(၃)ဖျၢၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ တၢ်ဟ့ၣ်လီၤစ့တၢ်ဆီၣ်ထွဲမၤစၢၤဘျီ၀ဲအံၤန့ၣ် ဟံၣ်ဒူၣ်ပာ်ဖှိၣ်ခဲလၢာ်(၂၃၉)ဒူၣ် ၦၤနီၣ်ဂံၢ်(၁၅၆၀)ဂၤဒီး တဂၤန့ၣ် ဒိးန့ၢ်ဘၣ်၀ဲ(၆၉၀၀၀)ကၠးစုာ်စုာ်အဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါ စံး၀ဲန့ၣ်လီၤႉ လၢန့ၣ်အမဲာ်ညါတၢ်လဲၤဟ့ၣ်လီၤစ့ဆီၣ်ထွဲမၤစၢၤဘျီ၀ဲအံၤတၢ်ရဲၣ်တၢ်ကျဲၤအပူၤ ကီၢ်ရ့ၣ်ႇကီၢ်ဆၣ်ပှၤဘၣ်မူဘၣ်ဒါ, သုးၦၤဘၣ်မူဘၣ်ဒါတဖၣ်ကတိၤဆှဲပၠးလီၤ၀ဲၦၤကမျၢၢ်ဘၣ်ဃးတၢ်ဒိးန့ၢ်ဘၣ်တၢ်ဆီၣ်ထွဲမၤစၢၤအဂ့ၢ်အကျိၤႇကီၢ်ပယီၤထံရူၢ်ကီၢ်သဲးတၢ်အိၣ်သးအဂ့ၢ်အကျိၤသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဘၣ်ဃးတၢ်လဲၤဟ့ၣ်လီၤတၢ်ဆီၣ်ထွဲမၤစၢၤဘျီ၀ဲအံၤအဖီခိၣ်န့ၣ် CIDKP မူဒါခိၣ်-၂ စီၤခဲလ့ၣ် စံး၀ဲလၢ “ပဟ့ၣ် တၢ်ဆီၣ်ထွဲ မၤစၢၤန့ၣ်တမ့ၢ်ထဲလၢဒူသထူၣ်တခါဘၣ်ႉပလဲၤလၢသုးက့(၇)ဘ့ၣ်လၢၤလီၤႉ စးထီၣ်လၢတနီသရံၣ် တုၤလီၤ၀ဲဒၣ်လၢ တလၢၤကီၢ်စဲၣ်,ပကိသ့ၣ်တဖၣ်န့ၣ်ပၣ်ဃုာ်ခဲလၢာ်လီၤႉအခီပညီန့ၣ်တၢ်ဒုးတၢ်ယၤမ့ထီၣ်သးတဘျီ လၢ်လၢ်န့ၣ်ၦၤကမျၢၢ်မ့ ဘၣ်စံၣ်မှံဟးဖျိးမ့လိၣ်ဘၣ်တၢ်ဘၣ်စၢၤအနီၢ်ကီၢ်န့ၣ်ပဆဲးကျိးမၤသကိးတၢ်ဒီးၦၤဘၣ်မူဘၣ်ဒါလၢအိၣ်ကီၢ်ပူၤဒီးအ၀ဲသ့ၣ် ကဟ့ၣ်ထီၣ်ၦၤတၢ်ကစီၣ်လၢချုးလီၤခံမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ ဒ်လီၢ်က၀ီၤၦၤဘၣ်မူဘၣ်ဒါစံး၀ဲအသိးန့ၣ် ဒူသ၀ီလၢတၢ်လဲၤဟ့ၣ်လီၤစ့ဆီၣ်ထွဲမၤစၢၤတဖၣ်အံၤတဖၣ် တၢ်ဒုးကဲထီၣ် အိၣ်ဂ့ၤတအိၣ်ဂ့ၤပယီၤသုးခးလီၤကျိဖးဒိၣ်အိၣ်ထီဘိအဃိၦၤကမျၢၢ်တဖၣ်လၢကဖံးအီၣ်မၤအီၣ် တၢ်အဂီၢ်တၢ်ဘံၣ် တၢ်ဘၢတအိၣ်လၢၤဘၣ်ဒီးဘၣ်အိၣ်ဘၣ်ဆိးလၢတၢ်ပျံၤတၢ်ဖုးပူၤအဂ့ၢ်န့ၣ်...
ပရဲလိၥ်ကျိထံဟဲထီၣ်အဃိတီအူဝ့ၢ်ဒူသဝီလၢအိၣ်တၢ်လီၢ်လီၤဖုၣ်တဖၣ်ဘၣ်သုးလီၢ်သုးကျဲလၢဂ့ၢ်ဝီအူအပူၤ
လါစဲးပထ့ဘၢၣ် ၁၂ သီ, ၂၀၂၄ နံၣ်, ခ့ၣ်အဲးစံၣ် ခီဖျိလၢမူခိၣ်စူၤအါဒီးထံဒိၣ်နိယွၤအဃိပရဲလိၥ်ကျိထံဟဲထီၣ်ဝဲတပယူၥ်ဃီအဖီခိၣ်ခ့ၣ်အဲၣ်ယူၣ်-တီအူကီၢ်ရ့ၣ်သုးက့နီၣ်(၂)တီအူဝ့ၢ် ဟီၣ်ကဝီၤအပူၤဒူသဝီလၢအိၣ်တၢ်လီၢ်လီၤဖုၣ်အလီၢ်သ့ၣ်တဖၣ်ဒူသဝီတစှၤန့ၢ်အဖျၢၣ်(၂၀)ဃ့ၢ်သုးလီၢ်သုးကျဲလၢဂ့ၢ်ဝီအူပူၤအဂ့ၢ်သ့ၣ်ညါဘၣ်လၢလီၢ်ကဝီၤပှၤဂ့ၢ်ဝီတၢ်မၤစၢၤကရူၢ်သ့ၣ်တဖၣ်အအိၣ်န့ၣ်လီၤ. စးထီၣ်ဖဲပူၤကွံၥ်မဟါအနံၤဂီၤခီအဆၢကတီၢ်ခီဖျိလၢတၢ်ပျၢ်ဟးထီၣ်ဝဲ(န့ၤပၠံၣ်ဒီၣ်)ဟီၣ်ကဝီၤအပူၤ(ဆ့ၣ်သ့ၤ)တမၢၢ်ထံအမဲၥ်ညါမူခိၣ်စူၤလီၤတပယူၥ်ဃီဒီးကစၢၢ်ထံသ့ၣ်တဖၣ်ယွၤလီၤဝဲဒၣ်အဃိတုၤတကီၢ်ခါခဲအံၤန့ၣ်ပရဲလိၥ်ကျိထံဟဲထီၣ်ဒံးဝဲအဖၢမုၢ်အသိးဒူသဝီတစှၤန့ၢ်အဖျၢၣ်(၂၀)သ့ၣ်တဖၣ်ထံကဒိၣ်ဘၢသ့ဝဲအဃိဘၣ်သုးလီၢ်သုးကျဲလၢဂ့ၢ်ဝီအူပူၤအဂ့ၢ်တၢ်ဆီၣ်ထွဲမၤစၢၤကရူၢ်သ့ၣ်တဖၣ်စံး ဝဲန့ၣ်လီၤ. ပှၤဂ့ၢ်ဝီတၢ်ဆီၣ်ထွဲမၤစၢၤ(T Rescue)အပှၤဘၣ်မူဘၣ်ဒါတဂၤစံးဝဲလၢ "ပဝဲတၢ်ဆီၣ်ထွဲမၤစၢၤတၢ်ကရူၢ်အခဲအံၤန့ၣ်ပမၤတၢ်အိၣ် ဖှိၣ်လၢကီၢ်ရ့ၣ်ဝဲၤဒၢးမီၤနီၤ. ဖဲမုၢ်ဃ့ၢ်လီၤ(၂)နၣ်ရံၣ်န့ၣ်ဒ်တၢ်ဖှိၣ်တၢ်ဆၢတဲၥ်အသိးန့ၣ်ပစးထီၣ်မၤဝဲပှၤဂ့ၢ်ဝီတၢ်ဆီၣ်ထွဲမၤစၢၤလီၤ. အ ခဲအံၤန့ၣ်ပလီၤလၢပျီပူၤမီၤနီၤ. တၢ်လိၣ်ဘၣ်အိၣ်မနုၤလဲၣ်န့ၣ်ပလီၤလၢပျီပူၤဝံၤမးကသ့ၣ်ညါဘၣ်လီၤ. ဖဲပရဲလိၥ်ကျိဃၢၤန့ၣ်ကအိၣ် ဝဲဒူသဝီအဖျၢၣ်(၂၀)ဘျဲၣ်မီၤနီၤ. ထံမ့ၢ်ဟဲထီၣ်လံန့ၣ်လီၤတံၢ်ကဒိၣ်ဘၢကွံၥ်တၢ်လီၤ." အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ် လီၤ. တၢ်ပျၢ်ဟးထီၣ်ဝဲ(န့ၤပၠံၣ်ဒီၣ်)ဟီၣ်ကဝီၤ(ဆ့ၣ်သ့ၤ)တမၢၢ်ထံတကးဒံးဘၣ်တၢ်ပျၢ်ဟးထီၣ်စ့ၢ်ကီးဝဲဒၣ်ဒီး(ယ့ၣ်တၤၡ့ၤ)ဟီၣ်ကဝီၤအပူၤ(ဆွါ)တမၢၢ်ထံအဃိပရဲလိၥ်ကျိထံဘၣ်ဟဲဒိၣ်ထီၣ်ဝဲဒၣ်ဒ်အံၤလီၤအဂ့ၢ်လီၢ်ကဝီၤဂံၢ်ခီၣ်ထံးတၢ်ကစီၣ်တနီၤစံးဝဲအသိးသ့ၣ်ညါဘၣ်ဘၣ်ဆၣ်လၢခ့ၣ်အဲးစံၣ်-ကညီတၢ်ကစီၣ်တကပၤမၤလီၤတံၢ်အီၤန့ၢ်ဒံးဘၣ်အဂ့ၢ်ဒုးသ့ၣ်ညါပှၤဒိကနၣ်တၢ်ဖိသ့ၣ်တဖၣ်န့ၣ်လီၤ. ဘၣ်ဃးဒီးကမျၢၢ်အတၢ်ဘၣ်ကွၢ်ဆၢၣ်မဲၥ်အံၤန့ၣ်တီအူဝ့ၢ်ပှၤလီၢ်ကဝီၤဖိလၢတအဲၣ်ဒိးပၥ်ဖျါအမံၤတဂၤစံးဝဲလၢ "အခဲအံၤထံဒိၣ်လီၤ. ခဲမဆ့ၣ်ခဲတဆ့ၣ်ခဲကၢၤန့ၣ်ထံကဒိၣ်န့ၢ်ဒံးတၢ်ဝဲအံၤမီၤနီၤ. ပှၤကမျၢၢ်တနီၤ နီၤန့ၣ်က့ၤထီၣ်အိၣ်ဝဲလၢတၢ်လီၢ်အဂၤဒီးတနီၤနီၤက့ၤ ထီၣ်အိၣ်ဝဲလၢကစၢၢ်ခိၣ်တကပၤအိၣ်ဝဲလၢကယၤညါန့ၣ်လီၤ. လၢအကျါပှၤလီၢ်အိၣ်က မှံဖိလၢဟဲဃ့ၢ်အိၣ်ကဒုအသးဖဲတီအူသ့ၣ် တဖၣ်အါတက့ၢ်န့ၣ်ထံထီၣ်ဝဲမီၤနီၤ. ဘၣ်ဃးဒီးကမျၢၢ်ဘၣ်ကွၢ်ဆၢၣ်မဲၥ်ဘၣ်ဝဲတၢ်ဃ့ၢ်မှံဟးဖျိးလၢတၢ်ဒုးတၢ်ယၤဒီးထံဒိၣ်ထီၣ်ဒီးဘၣ် ဃ့ၢ်ကဒီးအသီတဘျီဒ်န့ၣ်ပှၤအိၣ်ဝဲအါမးလီၤ. အဃိန့ၣ်လိၣ်ဘၣ်ဝဲတၢ်ဆီၣ်ထွဲမၤစၢၤမီၤနီၤ." အဂ့ၢ်စံးဘၣ်ခ့ၣ်အဲးစံၣ်-ကညီတၢ်က စီၣ်န့ၣ်လီၤ. ဖဲပူၤကွံၥ်လါအီကူးအလီၢ်ခံကတၢၢ်တနွံအခါနါက့န့ၣ်တၢ်စူၤလီၤဒိၣ်ဒိၣ်မုၢ်မုၢ်တအိၣ်ဘၣ်ဘၣ်ဆၣ်ခီဖျိလၢတၢ်ပျၢ်ဟးထီၣ်ဝဲ(န့ၤပၠံၣ်ဒီၣ်)ဟီၣ်ကဝီၤအပူၤ(ငလဲ)တမၢၢ်ထံဒီး(ယ့ၣ်တၤၡ့ၤ)ကီၢ်ဆၣ်အပူၤ(ဆွါ)တမၢၢ်ထံသ့ၣ်တဖၣ်အဃိတီအူဝ့ၢ်ပူၤကဝီၤဒ့(၃)ဘ့ၣ်ဃုၥ်ဒီးပရဲလိၥ်ကျိအဃၢၤဒူသဝီသ့ၣ်တဖၣ်,ပှၤနီၣ်ဂံၢ်လၢအကထိဘျဲၣ်ဘၣ်ကွၢ်ဆၢၣ်မဲၥ်ဘၣ်ဝဲထံဒိၣ်နိယွၤဒံးအဂ့ၢ်သ့ၣ်ညါဘၣ်န့ၣ်လီၤ. ဒ်န့ၣ်အသိးတကဒံးဘၣ်ဖဲစှၤသီအတီၢ်ပူၤအံၤန့ၣ်လၢကီၢ်ပယီၤဒီတဘ့ၣ်အပူၤတၢ်စူၤထံအကတီၢ်အါဝဲအဃိထံကျိပူၤထံသ့ၣ်တဖၣ်ပှဲၤလုၢ်ကွံၥ်ဝဲဒီးဟံၣ်ဃီသ့ၣ်တဖၣ်ဘၣ်လီၤဘျၢကွံၥ်ဝဲ,ကၢၢ်လၥ်သ့ၣ်တဖၣ်ကဲထီၣ်သးအိၣ်ဝဲအသိးတၢ်လီၢ်လၢထံဒိၣ်နိယွၤနးနးကလဲၥ်အလီၢ်သ့ၣ်တဖၣ်ပှၤလီၢ်ကဝီၤဖိဘၣ်သုးလီၢ်သုးကျဲလၢဂ့ၢ်ဝီအူအပူၤအိၣ်ဝဲအဂ့ၢ်ဒ်လီၢ်ကဝီၤတၢ်ကစီၣ်သန့ဒီးကီၢ်ဆၣ်အပှၤဂ့ၢ်ဝီတၢ်မၤစၢၤကရူၢ်အတၢ်ပၥ်ဖျါအသိးသ့ၣ်ညါဘၣ်န့ၣ်လီၤ.
တၢ်တမျၥ်တၢ်ကဲထီၣ်ဝံၤအလီၢ်ခံတန့ခၠါဟီၣ်ကဝီၤကမျၢၢ်အိၣ်ဒီးတၢ်ဘၣ်ယိၣ်ဘၣ်ဘှီ
လါစဲးပထ့ဘၢၣ် ၁၂သီ, ၂၀၂၄နံၣ် ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၇)ဖၣ်အၣ်ကီၢ်ရ့ၣ်,တန့ခၠါကီၢ်ဆၣ်အပူၤ,တၢ်တမျၥ်တၢ်ကဲထီၣ်အသးဝံၤအလီၢ်ခံကမျၢၢ်လီၢ်ကဝီၤဖိတဖၣ်အိၣ်ဝဲဒီးတၢ်ဘၣ်ယိၣ်ဘၣ်ဘှီအဂ့ၢ်,တန့ခၠါလီၢ်ကဝီၤဖိတဖၣ်စံးဝဲန့ၣ်လီၤ. အပူၤကွံၥ်လါစဲးပထ့ဘၢၣ်(၈)သီအနံၤ,အီၣ်စ့ၣ်ယၣ်စကခ(၁၂)အစုတီၤဖီလၥ်သုးကျိၤပယီၤသုးလၢအစံၣ်ဖျိးတဖၣ်ဖီၣ်တမျၥ်ဝဲလူၢ်ပျဲၢ်လီၢ်ကဝီၤပိၥ်မုၣ်တဂၤဖဲမၠးပတဲၣ်ဒီးယ့ၤကွဲတီၤကျဲအဘၢၣ်စၢၤဒီးဟံကွံၥ်ဝဲကမျၢၢ်လီၢ်ကဝီၤပိၥ်မုၣ်အံၤစ့အကလီၢ်(၁၀)ဆံ,လီတဲစိတဖျၢၣ်,ဃုၥ်ဒီးထူ(၂)ဘး,အိၣ်ဝဲအဃိ,တန့ခၠါကမျၢၢ်လီၢ်ကဝီၤဖိတဖၣ်ဟးထီၣ်က့ၤလီၤဝဲတဘူၣ်လၢၤဘၣ်ဒီး,ကလဲၤက့ၤဖံးမၤတၢ်လၢခုးပူၤဒဲပူၤအဂီၢ်အိၣ်ဝဲဒီးတၢ်ပျံၤတၢ်ဖုးတၢ်ဘၣ်ယိၣ်ဘၣ်ဘှီအဂ့ၢ်,တန့ခၠါလီၢ်ကဝီၤပိၥ်မုၣ်တဂၤစံးဝဲဒ်အံၤန့ၣ်လီၤ. အဝဲစံးဝဲလၢ“အခဲအံၤအပူၤကွံၥ်ပှၤလၢဖံးမၤတၢ်အိၣ်လၢဒဲမံလၢဒဲတဖၣ်န့ၣ်မံက့ၤလၢဒဲတဘူၣ်လၢၤဘၣ်.အါတက့ၢ်မုၢ်ဟါလီၤန့ၣ်ဟဲက့ၤမံဝဲလၢအဟံၣ်အဃီန့ၣ်လီၤ.ပှၤလၢအမံတ့ၢ်အိၣ်က့ၤထဲပူၤဂၤပူၤဂၤသ့ၣ်တဖၣ်န့ၣ်အဝဲသ့ၣ်အိၣ်ဒီးအကျီၢ်အပနၢ်အဃိ,တသ့တဘၣ်ဘၣ်မံခိးကွၢ်ဝဲအတၢ်ဖိတၢ်လံၤဒီးအိၣ်ဝဲလၢတၢ်ပလီၢ်ပဒီတၢ်သူၣ်ပျံၤသးဖုးအပူၤလီၤ.မ့မ့ၢ်ယၤယအိၣ်တၢ်န့ၣ်န့ၢ်ဝဲလၢသဝီကပၤတစဲးဖိ,ယမံဖဲယဟံၣ်လီၤ.ခဲအံၤဟးထီၣ်ဟးလီၤတဘူၣ်ဘၣ်အဃိ,ယတဟးကြီဘၣ်ယအိၣ်ဖဲယဟံၣ်ပူၤထီဘိလီၤ.”အဂ့ၢ်စံးဝဲန့ၣ်လီၤ. လၢန့ၣ်အမဲၥ်ညါ,အပူၤကွံၥ်လါစဲးပထ့ဘၢၣ်(၅)သီအနံၤအပူၤပယီၤသုးလၢအစံၣ်ဖျိးတဖၣ်အံၤ,ဖီၣ်ဝဲလီၢ်ကဝီၤဖိသၣ်ပိၥ်မုၣ်(၁၃)နံၣ်တဂၤဖဲအလဲၤကွၢ်ကျီၢ်အခါအိၣ်စ့ၢ်ကီးဝဲအဃိ,တကီၢ်ခါခဲအံၤမိၢ်ပၢ်တဖၣ်ကိးနံၤဒဲးအိၣ်ဝဲဒီးတၢ်သူၣ်ကိၢ်သးဂီၤလၢအဖိတဖၣ်အဂီၢ်အသိး,ဟီၣ်ကဝီၤအပူၤပိၥ်မုၣ်တဖၣ်လဲၤက့ၤဖံးမၤက့ၤတၢ်တဘူၣ်လၢၤဝဲဘၣ်အမဲၥ်ညါ,ပိၥ်ခွါလၢအလဲၤက့ၤဖံးမၤတၢ်တဖၣ်ဒၣ်လဲၥ်ဘၣ်ပျံၤဘၣ်ဖုးဝဲတၢ်အဂ့ၢ်,တန့ခၠါလီၢ်ကဝီၤပိၥ်မုၣ်အံၤစံးအါထီၣ်ဝဲဒၣ်န့ၣ်လီၤ. တကတီၢ်ဃီ,အီၣ်စ့ၣ်ယၣ်ပယီၤသုးလၢအစံၣ်ဖျိးထီၣ်တဖၣ်အံၤ,အပူၤကွံၥ်လါစဲးပထ့ဘၢၣ်(၅)သီအနံၤအပူၤ,ဖီၣ်ပိၥ်မုၣ်ဖိသၣ်(၁၃)နံၣ်ဝံၤဟးအိၣ်ဝဲလၢပှၢ်ပူၤ,လဲၤဝဲလၢကမျၢၢ်ဖံးအီၣ်မၤအီၣ်တၢ်လီၢ်ဒဲတဖၣ်အပူၤဒီးဃ့အီၣ်တၢ်အိၣ်ဝဲအသိး,မၤပျံၤမၤဖုးဝဲကမျၢၢ်လီၢ်ကဝီၤဖိတဖၣ်အိၣ်ဝဲဒၣ်အဂ့ၢ်,သ့ၣ်ညါဘၣ်လၢလီၢ်ကဝီၤဖိတဖၣ်အအိၣ်န့ၣ်လီၤ. တကးဒံးဘၣ်,ခီဖျိပယီၤသုးစံၣ်ဖျိးတဖၣ်အံၤနုၥ်လီၤဝဲလၢကမျၢၢ်အိၣ်ဆိးဟီၣ်ကဝီၤအပူၤဒီးမၤကမၣ်ဝဲပှၤဟီၣ်ခိၣ်ဖိခွဲးယၥ်လၢကမျၢၢ်လီၢ်ကဝီၤဖိတဖၣ်အဖီခိၣ်အိၣ်ဝဲအဃိ,လၢတၢ်ကဟံထီၣ်ဖီၣ်အဝဲသ့ၣ်အရ့အဂီၢ်,တကီၢ်ခါခဲအံၤဟီၣ်ကဝီၤပှၤဘၣ်မူဘၣ်ဒါဒီးသုးမုၢ်ဒိၣ်တဖၣ်ပၥ်ဖှိၣ်သးလူၤဖီၣ်ဝဲအဝဲသ့ၣ်အိၣ်ဝဲဘၣ်ဆၣ်တုၤလၢခဲအံၤတၢ်ဖီၣ်အဝဲသ့ၣ်တဖၣ်တချူးဒံးဘၣ်အဂ့ၢ်,တန့ခၠါကီၢ်ဆၣ်ပှၤဘၣ်မူဘၣ်ဒါတဖၣ်စံးဝဲန့ၣ်လီၤ. ဒ်န့ၣ်အသိး,ခီဖျိတၢ်ဖီၣ်ဝဲသုးကီၣ်ကးတဖၣ်အံၤတန့ၢ်ဒံးဘၣ်အဃိ,ဒ်သိးတၢ်ဘၣ်ဒိဘၣ်ထံးတၢ်ဂ့ၢ်ကီတဖၣ်သုတအိၣ်ထီၣ်တဂ့ၤအဂီၢ်,တကီၢ်ခါခဲအံၤလၢနီၢ်တဂၤတၢ်ဘံၣ်တၢ်ဘၢအဖီခိၣ်လီၢ်ကဝီၤဖိတဖၣ်ကအိၣ်လၢတၢ်ပလီၢ်ပဒီသးအပူၤဒီးလူၤပိၥ်မၤထွဲပှၤဘၣ်မူဘၣ်ဒါတဖၣ်အတၢ်ကလုၢ်အဂ့ၢ်,ကီၢ်ဆၣ်ပှၤဘၣ်မူဘၣ်ဒါတဖၣ်ဟ့ၣ်ပလီၢ်ဝဲကမျၢၢ်လီၢ်ကဝီၤဖိတဖၣ်စ့ၢ်ကီးန့ၣ်လီၤ.
ကၠဲးထိၣ်ကီၢ်ဆၣ် သဲဖၠူၤခၠီတၢ်ဒုးအပူၤ ပယီၤသုးသံ(၇)ဂၤႇ (PDF)သုးကျိၤခိၣ်ဘၣ်ဟ့ၣ်လီၤကွံာ်အသးသမူ
လါစဲးပထ့ဘၢၣ် ၁၂ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ကၠဲးထိၣ်ကီၢ်ဆၣ်အပူၤ ဖဲလါစဲးပထ့ဘၢၣ် ၉ သီအနံၤ သုးကီၣ်ကးအၦၤလၢအိၣ်ခိး တၢ်ဖဲသဲဖၠူၤခၠီတိၤအံၤတဖၣ် တၢ်ပၢၢ်ဆၢသုးပာ်ဖှိၣ်ကရူၢ်နုာ်လီၤခး၀ဲဒီး တၢ်ဒုးကဲထီၣ်ခံခီခံကပၤအဘၢၣ်စၢၤဒုၣ်ဒါ တကပၤသံ(၇)ဂၤဒီး(PDF)သုးကျိၤခိၣ် ဘၣ်ဟ့ၣ်လီၤကွံာ်အသးသမူအဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိ စံး၀ဲအသိး သ့ၣ်ညါဘၣ်န့ၣ်လီၤႉ ဖဲလါစဲးပထ့ဘၢၣ် ၉ သီ ဂီၤခီ ၁၀ နၣ်ရံၣ်ဘျဲၣ်အဆၢကတီၢ် ပယီၤသုးဒီးပၢၤကီၢ်လၢအိၣ်ခိးတၢ်ဖဲ(သဲဖၠူၤခၠီ)အံၤ (KNLA)ဒီး(PDF)သုးပာ်ဖှိၣ်နုာ်လီၤခး၀ဲဒီးတၢ်ခးလိာ်သးကဲထီၣ်လၢခံခီခံကပၤအဘၢၣ်စၢၤအဃိ ပယီၤသုးတကပၤ သံ၀ဲဒၣ်(၇)ဂၤအမဲာ်ညါဘၣ်ဒိ(၅)ဂၤဒီး(PDF)သုးကျိၤခိၣ်လီၤကွံာ်၀ဲဒၣ်လၢတၢ်ဒုးပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ “ဖဲဂီၤခီ ၁၀း၁၀ မံးနံးအခါန့ၣ် တၢ်လဲၤနုာ်လီၤခးအ၀ဲသ့ၣ်ႉဒုၣ်ဒါတကပၤန့ၣ်သံ(၇)ဂၤႇဘၣ်ဒိ(၅)ဂၤႉ မ့မ့ၢ်လၢအံၤ တကပၤခီန့ၣ်(၇၈၀၅)သုးရ့ၣ် (PDF)သုးကျိၤခိၣ် ကိၤကၠ့ၣ်တူ ဘၣ်ဟ့ၣ်လီၤကွံာ်အသးသမူမီၤနီၤႉ မ့၀ံၤဘၣ်ဒိစ့ၢ်ကီး (၅)ဂၤ” အဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိစံး၀ဲန့ၣ်လီၤႉ တၢ်နုာ်လီၤခးပယီၤသုးတၢ်အိၣ်ခိးလီၢ်(သဲဖၠူၤခၠီ)တိၤဘျီ၀ဲအံၤန့ၣ်မ့ၢ်၀ဲကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇ (TPDF)ဒြိကရူၢ်,ကၠဲးထိၣ်(PDF)သုးပာ်ဖှိၣ်တဖၣ်ဒီးခံခီခံကပၤတၢ်ခးလိာ်သးတၢ်ဆၢကတီၢ်ယံၤ၀ဲ ၁း၃၀ ဃၣ်ဃၣ် အဂ့ၢ်န့ၣ် ကမျၢၢ်တၢ်ဒီသဒၢသုးမုၢ်ဒိၣ် သုးရ့ၣ်(၇၈၀၅) သုးဒ့(၄)ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ သဲဖၠူၤခၠီတၢ်သမံသမိးတြဲၤလၢပယီၤသုးဒီးပၢၤကီၢ်သုးအိၣ်ဆီလီၤသးအံၤအိၣ်၀ဲဖဲ၀့ၢ်တကူၣ်–မီၣ်လမၠဲၣ်ကျဲမုၢ် ကၠဲးထိၣ်ကီၢ်ဆၣ်ဟီၣ်က၀ီၤအပူၤဒီး ဒ်န့ၣ်အသိးပယီၤသုးအတြဲၤ၀ဲအံၤသုးဟံန့ၢ်တၢ်စိတၢ်ကမီၤ၀ံၤလီၢ်ခံဘၣ် တၢ်လဲၤခး စဲးပြဲးအီၤလၢဟီၣ်က၀ီၤတၢ်ပၢၢ်ဆၢသုးပာ်ဖှိၣ်ကရူၢ်တလီၢ်လီၢ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ဒူသထူၣ်ကီၢ်ရ့ၣ်ပူၤ တၢ်စူၤထံဒိၣ်ထီၣ်ကဒါခံ၀ီတ၀ီအဃိဘုဖိလၢတၢ်သူၣ်လီၤကဒါတဖၣ်ထံလုၢ်ဘၢကွံာ်ခဲလၢာ်
လါစဲးပထ့ဘၢၣ် ၁၂ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤအပူၤ စှၤသီအတီၢ်ပူၤ ခီဖျိတၢ်စူၤ ထံက့ၤဒိၣ်ထီၣ်ကဒါခံ၀ီတ၀ီအဃိတကီၢ်ခါခဲအံၤဘုဖိလၢတၢ်က့ၤသူၣ်လီၤကဒါလၢအသီတဖၣ်ထံလုၢ်ဘၢလီၤဘျၢ ကွံာ်၀ဲခဲလၢာ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ ဒူသထူၣ်ကီၢ်ရ့ၣ် ကီၢ်ဆၣ်ကိးဘ့ၣ်ဒဲးဃၣ်ဃၣ်အပူၤ ဖဲအပူၤကွံာ်လါယူၤလံအခါအဆိကတၢၢ်တဘျီ ခီဖျိတၢ်စူၤထံဒိၣ် ဘုသံဘုဟးဂီၤအဃိ ၦၤထူစံာ်ဖိတဖၣ်ဘုဖိလၢအအိၣ်တ့ၢ်တဖၣ်သူၣ်လီၤကဒါ၀ဲဒီး ဘၣ်ဆၣ်ခဲအံၤ ခီဖျိတၢ်က့ၤစူၤကဒါ ခံ၀ီတ၀ီစူၤတပယူာ်ဃီအဃိဘုဖိလၢတၢ်သူၣ်လီၤ၀ဲလၢအသီတဖၣ်ထံလုၢ်ဘၢလီၤဘျၢကွံာ်၀ဲခဲလၢာ်အဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါ စံး၀ဲန့ၣ်လီၤႉ ဘၣ်ဃးတၢ်ဂ့ၢ်အံၤဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤ စံး၀ဲလၢ“တနံၣ်အံၤၦၤထူစံာ်ဖိသ့ၣ်တဖၣ်မ့ၢ်လၢ မူခိၣ်ကလံၤတဘၣ်လီၢ်ဘၣ်စးဘၣ်ဒီးဖဲလါယူၤလံအတီၢ်ပူၤထံဒိၣ်ထံလုၢ်ဘၢအစံာ်ပျီအဃိဘုသ့ၣ်တဖၣ်သံမီၤနီၤႉ ၦၤလၢအဘုသံတဖၣ်န့ၣ်အ၀ဲသ့ၣ်က့ၤသူၣ်လီၤထးကဒါ၀ဲလၢအသီမီၤနီၤႉသူၣ်လီၤ၀ံၤဘျီစးထီၣ်ဖဲလါစဲးပထ့ဘၢၣ် ၅ သီတုၤ လၢခဲအံၤန့ၣ်မူခိၣ်စူၤအါဒီးထံဒိၣ်ကဒါထံက့ၤလုၢ်ဘၢကွံာ်ဘုခဲလၢာ်န့ၣ်လီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ တနံၣ်အံၤတၢ်စူၤအါန့ၢ်အပူၤကွံာ်နံၣ်ဒီးခီဖျိတၢ်စူၤတပယူာ်ဃီထံလုၢ်ဘၢကဒီးဘုခံ၀ီတ၀ီအဃိ ၦၤထူစံာ်ဖိတဖၣ် သူၣ်ဟးဂီၤသးဂီၤ၀ဲဒီးဒ်န့ၣ်အသိး နံၣ်လၢကဟဲလၢကအီၣ်ကအီအဂီၢ်ထံၣ်တၢ်ကီတၢ်ခဲလၢ တၢ်အီၣ်တၢ်အီတကပၤသ့ ၀ဲအဂ့ၢ်န့ၣ် ပဒိၣ်စီၤအ့နဲၤ စံး၀ဲန့ၣ်လီၤႉ ဒူသထူၣ်ကီၢ်ရ့ၣ်ပူၤ အပူၤကွံာ်လါယူၤလံတၢ်စူၤထံဒိၣ်တၢတဘျီအခါန့ၣ် မ့ၢ်ထံလုၢ်ဘၢဘုတၢ်ဆၢကတီၢ်ယံၤလၢ အနွံညါ အဃိမီၤစကိၤကီၢ်ဆၣ်ဒီးဖၣ်အၣ်ကီၢ်ဆၣ်ပူၤ ဘုသံဘုဟးဂီၤ၀ဲဒၣ်အအ့ကၢၣ်(၄၀၀၀)ဃၣ်ဃၣ်ညါဒီး မ့မ့ၢ်ကီၢ်ဆၣ်လၢ အဂၤသ့ၣ်တဖၣ်န့ၣ်တၢ်ဃုသ့ၣ်ညါမၤလီၤတံၢ်ဘုသံဘုဟးဂီၤအနီၣ်ဂံၢ်စရီအဖၢမုၢ်လီၤ အဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါ စံး၀ဲန့ၣ်လီၤႉ တနံၣ်အံၤ ဒူသထူၣ်ကီၢ်ရ့ၣ်အမဲာ်ညါကီၢ်ရ့ၣ်လၢအဂၤသ့ၣ်တဖၣ်စ့ၢ်ကီး ခီဖျိတၢ်စူၤအါထံဒိၣ်ထီၣ်အဃိ လီၢ်က၀ီၤ ကမျၢၢ်တဖၣ်ဘၣ်ကွၢ်ဆၢၣ်မဲာ်၀ဲထံလုၢ်ဘၢဘုဘုဟးဂီၤဘုသံတၢ်ဂ့ၢ်ကီသ့ၣ်တဖၣ်အံၤဒီးဒ်န့ၣ်အသိး အပူၤကွံာ်ထံဒိၣ်ထီၣ် ထံက့ၤလီၤ၀ံၤလီၢ်ခံဘုလၢအတသံအိၣ်တ့ၢ်တဖၣ်အဃၢ်လီၤအလၣ်ဘီ၀ဲဒၣ်ဒီတထူၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးကီၢ်ပယီၤပူၤတၢ်စူၤထံဒိၣ်ထီၣ်ခံဘျီလၢာ်အဖီခိၣ်အံၤ၀့ၢ်ပူၤႇဒူသ၀ီတၢ်လီၢ်လၢအိၣ်တၢ်လီၢ်လီၤဖုၣ်တဖၣ်အါဒၣ်တက့ၢ်...
သးစၢ်ဃ့ၢ်ဖျိးလၢကဘၣ်လဲၤထီၣ်သုးတၢ်မၤလိ(၂၇)ဂၤ,ဃ့ၢ်အိၣ်ကဒုလၢ KNU သုးက့(၄)အအိၣ်
လါစဲးပထ့ဘၢၣ် ၁၁သီ, ၂၀၂၄ နံၣ်, ခ့ၣ်အဲးစံၣ်. သးစၢ်(၂၇)ဂၤလၢကီၢ်ကၠီၣ်တဲၣ်ပှၤဘၣ်မူဘၣ်ဒါဖီၣ်ဆှၢက့ၤအဝဲသ့ၣ်ဆူကီၢ်ပယီၤလၢပယီၤသုးကီၣ်ကးအစုပူၤဒီးပယီၤသုးကမၢလဲၤထီၣ်သုးတၢ်မၤလိသ့ၣ်တဖၣ် ဖဲတၢ်လဲၤဆှၢအဝဲသ့ၣ်ဒီးချံစဲးအဆၢကတီၢ် အဝဲသ့ၣ်မၤသံကွံၥ်ဝဲဒၣ်ပယီၤသုးကီၣ်ကးအပှၤ(၂)ခံဂၤလၢအိၣ်ခိးအဝဲသ့ၣ်ဒီး ဃ့ၢ်အိၣ်ကဒုလၢ KNU-သုးက့(၄) ကညီဒီကလုၥ်ဂၢၤသးကရၢအအိၣ်အဂ့ၢ် ကွဲၤကလုၢ်တၢ်ကစီၣ်ပၥ်ဖျါဝဲဒၣ်လၢ အ Facebook page အပူၤန့ၣ်လီၤ. ပှၤသးစၢ်သ့ၣ်တဖၣ်အံၤ လဲၤမၤတၢ်လၢကီၢ်ကၠီၣ်တဲၣ်ဒီး ကီၢ်ကၠီၣ်တဲၣ်ပှၤဘၣ်မူဘၣ်ဒါဖီၣ်အဝဲသ့ၣ်ဝံၤဆှၢကဒါက့ၤဝဲလၢသုးကီၣ်ကးအစုပူၤဝံၤအလီၢ်ခံ သးစၢ်သ့ၣ်တဖၣ်အံၤတၢ်မၢန့ၢ်ဆူၣ်အဝဲသ့ၣ်ကဲသုးဒီး ကဘၣ်လဲၤထီၣ်သုးတၢ်သိၣ်လိလၢ ကီၢ်ခီဒိၣ်လီၢ်ခၢၣ်သး(၁၂)ဒီးချံစဲး(၇)ဘ့ၣ်အဂ့ၢ် ကွဲၤကလုၢ်တၢ်ကစီၣ်ပၥ်ဖျါဝဲဒၣ်န့ၣ်လီၤ. ချံစဲး(၇)ဘ့ၣ်အကျါ တဘ့ၣ်လၢအပၣ်ဃုၥ်ဒီးသးစၢ် (၂၇),ပယီၤသုးခိးတၢ်(၂)ဂၤတဘ့ၣ်န့ၣ် သးစၢ်သ့ၣ်တဖၣ်န့ၣ်မၤသံကွံၥ်ဝဲ ပယီၤသုးလၢအခိးတၢ်(၂)ဂၤန့ၣ် ဝံၤ ဃ့ၢ်အိၣ်ကဒုဝဲဒၣ်လၢ ကညီဒီကလုၥ်ဂၢၤသးကရၢ-KNDO သုးရ့ၣ်(၇), သုးဒ့(၅)အအိၣ်ဒီး ပှၤသးစၢ်(၂၇)ဂၤအကျါ (၂၂)ဂၤန့ၣ် ကမၤသကိးက့ၤတၢ်ဒီးဂၢၤသးကရၢဒီး အဂၤ(၅)ဂၤန့ၣ်ကက့ၤကဒါက့ၤဆူအနီၢ်ကစၢ်လီၢ်ကျဲအဂ့ၢ် KNU သုးက့(၄), ဘျံးဒဝဲၢ်ကီၢ်ရ့ၣ် အကီၢ်ရ့ၣ်ခိၣ် ပဒိၣ်ဖျိးစိဝ့စံးဘၣ်ဝဲ ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲဒၣ်လၢ“ပှၤ(၂၇)ဂၤန့ၣ် ဒ်သိးန့ၢ်ဘၣ်စိတၢ်ကစီၣ်အသိးန့ၣ် (၅)ဂၤန့ၣ်ကက့ၤကဒါက့ၤဆူအနီၢ်ကစၢ်လီကျဲဒီးအိၣ်တ့ၢ်သ့ၣ်တဖၣ်န့ၣ် ကမၤသကိးက့ၤတၢ်ဒီးဂၢၤသးသုးရ့ၣ်(၇)န့ၣ်လီၤ.”စံးဝဲဒၣ်န့ၣ်လီၤ. လၢန့ၣ်အမဲၥ်ညါ ဒ်သိးကန့ၢ်ဘၣ်ပှၤသ့ၣ်တဖၣ်န့ၣ်နီၢ်တဂၤတၢ်ဂ့ၢ်တၢ်ကျိၤလီၤတ့ၢ်လီၤဆဲးအဂီၢ်တၢ်ပျဲလီၤဝဲခၢၣ်စးလၢကသမံသမိးတၢ်အဂီၢ်ဒီး ပှၤလၢကက့ၤကဒါ(၅)ဂၤန့ၣ်ကဘၣ်ဆိမိၣ်န့ၢ်တၢ်လၢအဝဲသ့ၣ်အဂီၢ်ဒီးမ့မ့ၢ်ပှၤလၢ ကမၤသကိးတၢ်ဒီးဂၢၤသးသုးရ့ၣ်(၇)သ့ၣ်တဖၣ်န့ၣ်တၢ်ပၥ်လီၤဆီအဝဲသ့ၣ်အဂ့ၢ် ပဒိၣ်ဖျိးစိဝ့တဲအါထီၣ်ဝဲဒၣ်စ့ၢ်ကီးန့ၣ်လီၤ. ဖဲသးစၢ်(၂၇)ဂၤဟဲဃ့ၢ်ဆူ KNDO သုးရ့ၣ်(၇)အအိၣ်အခါဟဲစိၥ်ဃုၥ်ပယီၤသုးကီၣ်ကးအပှၤကျိလၢအမ့ၢ် MA ကလုၥ်(၂)ခိၣ်အဂ့ၢ်သ့ၣ်ညါဘၣ်စ့ၢ်ကီးန့ၣ်လီၤ. ကီၢ်ကၠီၣ်တဲၣ် ပဒိၣ်မၤဝဲ တၢ်သမံသမိး ပှၤကီၢ်ချၢလၢတဖိးသဲစးလၢ ၁၂၀သီအတီၢ်ပူၤ တၢ်တိၤကျဲၤအိၣ်ဝဲအသိးန့ၣ်ဖီၣ်န့ၢ်ဝဲဒၣ် ပှၤကီၢ်ပယီၤဖိဒီးဆှၢက့ၤဝဲဆူကီၢ်ပယီၤဘူးကအိၣ်(၁၆၀၀၀၀) ဃၣ်ဃၣ်အဂ့ၢ် လီၢ်ကဝီၤတၢ်ကစီၣ်သန့သ့ၣ်တဖၣ်ပၥ်ဖျါဝဲဒၣ်န့ၣ်လီၤ. ပှၤလၢဘၣ်တၢ်ဖီၣ်ဆှၢက့ၤအီၤလၢ...