လၢကဟဲမၤအါထီၣ်ဖၣ်ပူၣ်သုးဂံၢ်ဘါအဂီၢ် ပယီၤသုးဒီး(BGF)ဟဲထီၣ်တုၤလၢ(ကတၢၢ်တံၥ်သဝီ(၁၀၀)ဘျဲၣ်
လါစဲးပထ့ဘၢၣ် ၈ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-မုၢ်တြီၢ်ကီၢ်ရ့ၣ်သုးက့(၅)ဟီၣ်ကဝီၤအပူၤလၢကမၤအါထီၣ်သုးဂံၢ်ဘါအဂီၢ်န့ၣ်သုးခိးကီၢ်ဆၢ(BGF)တနီၤဒီးပယီၤသုး ပၥ်ဖှိၣ်(၁၀၀)ဘျဲၣ်ဟဲထီၣ်တုၤဝဲဒၣ်ဖဲ(ကတၢၢ်တံၥ်)အဂ့ၢ်မုၢ်တြီၢ်ကီၢ်ရ့ၣ်သုးခိၣ်ဒိၣ်ဂီၢ်ဂ့ၢ်စီၤကျၢၤဒိၣ်စံးဝဲဒၣ်န့ၣ်လီၤ. သုးပၥ်ဖှိၣ်သ့ၣ်တဖၣ်အံၤတၢ်ရဲၣ်တၢ်ကျဲၤအိၣ်လၢကလဲၤထီၣ်ဝဲဒၣ်လၢဖၣ်ပူၣ်ဝ့ၢ်ဒီးတကီၢ်ခါခဲအံၤခီဖျိဆဲးလဲၤဝဲတန့ၢ်ဘၣ်အဃိဆီလီၤဝဲအလီၢ်အကျဲဖဲ(ကတၢၢ်တံၥ်)ပယီၤသုးကလၢၤအဂ့ၢ်န့ၣ်မုၢ်တြီၢ်ကီၢ်ရ့ၣ်ပှၤကတိၤတၢ်ပၢသုးခိၣ်ဒိၣ်ဂီၢ်ဂ့ၢ်စီၤကျၢၤဒိၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. "အပူၤကွံၥ်န့ၣ်အဝဲသ့ၣ်တဲဃၥ်ဝဲအိၣ်မီၤနီၤလၢ(BGF)ဒီးသုးကီၣ်ကးန့ၣ်တပၥ်ဖှိၣ်မၤသကိးတၢ်လၢၤဘၣ်,အိၣ်က့ၤလီၤလီၤဆီဆီလီၤတဲဝဲဒ်န့ၣ်. ဘၣ်ဆၣ်မ့မ့ၢ်ဟီၣ်ကဝီၤဖဲအံၤန့ၣ်တထုးဖးအသးဘၣ်. ဖဲအံၤန့ၣ်အဝဲသ့ၣ်အိၣ်သကိး,လဲၤဃုၥ်က့ၤဃုၥ်မၤသကိးအီၣ် သကိးဝဲမီၤနီၤ. အဝဲသ့ၣ်ပၥ်ဖှိၣ်အသးဟဲထီၣ်ဝဲဖဲ(ကတၢၢ်တံၥ်)န့ၣ်ပှၤနီၣ်ဂံၢ်(၁၀၀)ဘျဲၣ်ခိၣ်ဃၢၤဖဲန့ၣ်မီၤနီၤ. နါက့န့ၣ်ဟဲဝဲတုၤဖဲ(က တၢၢ်တံၥ်)လီၤ. ဆူအဖီခိၣ်ခီန့ၣ်ဒုတထီၣ်ဝဲဘၣ်,မ့ၢ်ထီၣ်လၢအဖီခိၣ်ဒုကဲထီၣ်ဒၣ်ခီမီၤ. အခဲအံၤဒုတကဲထီၣ်ဒံးဘၣ်." အဂ့ၢ်စံးဘၣ်ခ့ၣ် အဲးစံၣ်-ကညီတၢ်ကစီၣ်န့ၣ် လီၤ. ဖဲပူၤကွံၥ်လါအ့ဖြ့ၣ်အခါဖၣ်ပူၣ်ဝ့ၢ်ပူၤပယီၤသုးခီၣ်သုးရ့ၣ်(ခလရ-၁၉)ဒီးခီၣ်ချ့သုးရ့ၣ်(ခမရ-၄၃၄)သုးကလၢၤ သ့ၣ်တဖၣ်အံၤကညီဒီ ကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်ထီၣ်မၤန့ၢ်ကွံၥ်ဝဲဝံၤလီၢ်ခံတုၤလၢခဲအံၤဒိၣ်စိဒံးဝဲအဂ့ၢ်န့ၣ်(သုးက့-၅)ပှၤဘၣ်မူဘၣ်ဒါ စံးဝဲန့ၣ်လီၤ. လၢတၢ်န့ၣ်အဃိပယီၤသုးလၢအိၣ်ဖၣ်ပူၣ်ဝ့ၢ်သ့ၣ်တဖၣ်အံၤက့ၤပၥ်ဖှိၣ်အသးလၢ ခီၣ်ချ့သုးရ့ၣ်(ခမရ-၃၄၀),(ခမရ-၃၄၁)သုးကလၢၤ တၢ်လီၢ်သ့ၣ်တဖၣ်အဂ့ၢ်န့ၣ်သုးခိၣ်ဒိၣ်ဂီၢ်ဂ့ၢ်စီၤကျၢၤဒိၣ်စံးအါထီၣ်ဝဲဒၣ်ဒ်အံၤန့ၣ်လီၤ. "ဖၣ်ပူၣ်သုးကလၢၤလၢအအိၣ်တ့ၢ်ဒ်သိးဒီးဒုးယၤသုးကလၢၤခီန့ၣ်သုးပၥ်ဖှိၣ်သ့ၣ်တဖၣ်ဂၢၢ်တံၥ်ဃၥ်အဝဲသ့ၣ်ဒီးတြီတံၥ်ဃၥ်အဝဲ သ့ၣ်တၢ်ဟးထီၣ်ဟးလီၤခဲလၢၥ်လီၤ. ဒ်န့ၣ်အသိးလၢ(ခီပူၣ်)သုးကလၢၤနါက့ဒ်န့ၣ်လီၤ. သုးကလၢၤ သ့ၣ်တဖၣ်န့ၣ်ကဟူးဂဲၤဝဲလၢ အံၤလၢဘးန့ၣ်ဟူးဂဲၤဝဲတန့ၢ်ဘၣ်. ဘၣ်အိၣ်သံဃၥ်ဝဲလၢအသုးကလၢၤအပူၤလီၤ. ဘၣ်ဒိးသန့ၤအသး လၢအခိၣ်အနၢ်ကဟဲတ့ၢ်လီၤ န့ၢ်အီၤတၢ်အီၣ်တၢ်အီဒီးကဘီယူၤဒံးန့ၣ်မီၤနီၤ. " အဂ့ၢ်န့ၣ်စံးဝဲန့ၣ်လီၤ. ခ့ၣ်အဲၣ်ယူၣ်-ဖၣ်ပူၣ်မုၢ်ထီၣ်ဟီၣ်ကဝီၤအပူၤန့ၣ်ပယီၤသုးကလၢၤအိၣ်တ့ၢ်က့ၤထဲ(ခီပိၣ်)သုးကလၢၤတဖျၢၣ်လီၤဒီးဘၣ်ဆၣ်လၢ(က မၤမိၢ်)ကျဲ(ကမၤမိၢ်)သုးကလၢၤဒီး(ကတၢၢ်တံၥ်,ကူစ့ၣ်,တီၤသိလိ,မၤထီ)ပယီၤသုးကလၢၤသ့ၣ်တဖၣ်အံၤအိၣ်တ့ၢ်ဒံးဝဲဒၣ်အဂ့ၢ်န့ၣ်သ့ၣ်ညါဘၣ်န့ၣ်လီၤ. လၢခ့ၣ်အဲၣ်ယူၣ်-မုၢ်တြီၢ်ကီၢ်ရ့ၣ်(သုးက့-၅)ဟီၣ်ကဝီၤအပူၤပယီၤသုးကလၢၤအဒိၣ်အဆံးအိၣ်ဆီလီၤသးခဲလၢၥ်အိၣ်ဝဲ(၈၀)ဖျၢၣ်ဒီး သၢနံၣ်အတီၢ်ပူၤတၢ်ပၢၢ်ဆၢသုးပၥ်ဖှိၣ်ကရူၢ်ထီၣ်မၤန့ၢ်ဝဲသုးကလၢၤအဖျၢၣ်(၂၀)ဘျဲၣ်ဒီးဒ်န့ၣ်အသိးသုးကလၢၤလၢအဆံးတဖၣ်တနီၤန့ၣ်ကၢတီၢ်ဟးထီၣ်ကွံၥ်ဝဲဒ်န့ၣ်လီၤအဂ့ၢ်န့ၣ်သ့ၣ်ညါဘၣ်လၢခ့ၣ်အဲၣ်ယူၣ်တၢ်မၤနီၣ်စရီပူၤအသိးန့ၣ်လီၤ.
ပိၥ်မုၣ်တဖၣ်ကနုၥ်လီၤမၤသကိးတၢ်အါထီၣ်လၢကညီတၢ်ပၢၢ်ဆၢတၢ်ဖံးတၢ်မၤပူၤအဂ့ၢ်န့ၣ် KWO ဆီၣ်တခူ
လါစဲးပထ့ဘၢၣ် ၇ သီ, ၂၀၂၄ နံၣ်, ခ့ၣ်အဲးစံၣ် လၢကဟဲတလါအံၤလါစဲးပထ့ဘၢၣ်(၉)သီအနံၤအံၤမ့ၢ်ဝဲကညီဒီကလုၥ်ပၢၤကီၢ်သုးနံၣ်ဆၢက့ၤပှဲၤထီၣ်ဝဲ(၃၃)ဝီတဝီဒီးလၢမုၢ်နံၤဆၢက့ၤအဖီခိၣ်အံၤပိၥ်မုၣ်သ့ၣ်တဖၣ်ကနုၥ်လီၤမၤသကိးတၢ်အါထီၣ်လၢကညီဒီကလုၥ်ပၢၤကီၢ်သုးဒီးကညီတၢ်ပၢၢ်ဆၢတၢ်ဖံးတၢ်မၤအပူၤလၢကကဲထီၣ်တၢ်ဂံၢ်တၢ်ဘါ,တၢ်ဘျုးတၢ်ဖှိၣ်ဒီးတၢ်လဲၤထီၣ်လဲၤထီလၢကညီဒီကလုၥ်ဂီၢ်အဂ့ၢ်ကညီပိၥ်မုၣ်ကရၢ(KWO)ပၥ်ဖျါထီၣ်လံၥ်ဟ့ၣ်ယုၢ်ဆီၣ်တခူထီၣ်ဝဲဖဲမဟါအနံၤန့ၣ်လီၤ. ဒ်န့ၣ်အသိးကညီပိၥ်မုၣ်ကရၢအကရၢခိၣ်သရၣ်မုၣ်နီၢ်ကညီဖီစံးဝဲလၢ "ဘၣ်ဃးလၢပၢၤကီၢ်သုးတကပၤန့ၣ်ပိၥ်မုၣ်အတၢ်ပၣ်ဃုၥ် ပၥ်ဂီၢ်အိၣ်ဝဲဒီးလၢလီၢ်ခၢၣ်သးအပတီၢ်န့ၣ်ဝဲၤဒၢးခိၣ်န့ၣ်မ့ၢ်ဝဲပိၥ်မုၣ်လီၤ. လၢကီၢ်ရ့ၣ်တဘ့ၣ်စုၥ်စုၥ်န့ၣ်ပၢၤကီၢ်ပိၥ်မုၣ်အိၣ်စ့ၢ်ကီးဝဲလီၤ. ပထံၣ်လၢအရ့ဒိၣ်ဝဲဘၣ်မနုၤအဃိလဲၣ်န့ၣ်ပၢၤကီၢ်န့ၣ်အမူဒါမ့ၢ်တၢ်ကဒီသဒၢဝဲဒၣ်ထံလီၢ်ကီၢ်ပူၤ,ဒူသဝီဖိတၢ်ဘံၣ်တၢ်ဘၢဒီးလီၤဆီဒၣ်လၢပိၥ်မုၣ်ဒီးဖိသၣ်တၢ်ဘံၣ်တၢ်ဘၢတကပၤမီၤနီၤ. တၢ်မူးတၢ်ရၣ်နါက့န့ၣ်ကဲထီၣ်သးဒီးပိၥ်မုၣ်လၢအတူၢ်ဘၣ်တၢ်အိၣ်အသိးပိၥ်မုၣ် လၢအမၤကမၣ်တၢ်အိၣ်စ့ၢ်ကီးလီၤ. ပိၥ်မုၣ်လၢအတူၢ်ဘၣ်တၢ်မ့ၢ်ဂ့ၤ,မၤကမၣ်တၢ်မ့ၢ်ဂ့ၤလၢတၢ်သံကွၢ်သံဒိးတၢ်မူးတၢ်ရၣ်အပူၤန့ၣ် ပိၥ်မုၥ်ကဘၣ်ပၣ်ဃုၥ်ဝဲမီၤနီၤ. အဃိန့ၣ်ပအဲၣ်ဒိးဟ့ၣ်ဂံၢ်ဟ့ၣ်ဘါလၢပိၥ်မုၣ်သ့ၣ်တဖၣ်ကပၣ်ဃုၥ်အါထီၣ်ဝဲ"အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါဖဲတၢ်ဒုးအိၣ်ထီၣ်ကညီဒီကလုၥ်ပၢၤကီၢ်သုးအဆၢကတီၢ်ကညီပိၥ်မုၣ်တဖၣ်နုၥ်လီၤဟံးထီၣ်ဖီၣ်ထီၣ်မူဒါပှဲၤဒီး တၢ်သူၣ်ဆူၣ်သးဆူၣ်လၢကညီဒီကလုၥ်ပၢၤကီၢ်သုးပူၤအိၣ်ဝဲဒၣ်အသိးအဝဲသ့ၣ်ဒိးန့ၢ်ဘၣ်စ့ၢ်ကီးဝဲတၢ်တီခိၣ်ရိၣ်မဲအပတီၢ်အိၣ်ဝဲ အဃိမ့ၢ်တၢ်လဲၤထီၣ်လဲၤထီအပနီၣ်လၢပိၥ်မုၣ်တဖၣ်အဂီၢ်ဘၣ်ဆၣ်မျးကယၤအိၣ်စှၤဒံးဝဲဒၣ်အဂ့ၢ်ပၥ်ဖျါဝဲဒၣ်န့ၣ်လီၤ. လၢထံရူၢ်ကီၢ်သဲးတၢ်အိၣ်သးလဲၤတရံးအသးချ့,တၢ်ဆီတလဲဒီးတၢ်လဲၤထီၣ်လဲၤထီဝဲအဖီခိၣ်ဒ်သိးဒီးသဲစးတၢ်ဒိၣ်စိကအိၣ်အဂီၢ်ကညီဒီကလုၥ်ပၢၤကီၢ်သုးကမၤဂ့ၤထီၣ်အတၢ်သ့တၢ်ဘၣ်အကံၢ်အစီ,မၤဃံးဃီၣ်ဒီၣ်ကီၢ်သူလ့ၤသဲးစးတၢ်ဘျၢဒီးဒ်န့ၣ်အသိးတၢ်သုတဆီၣ်တံၢ်မၤနၢၤဒီးဟံးန့ၢ်တၢ်ဘျုးတၢ်ဖှိၣ်လၢထံဖိကီၢ်ဖိလီၤဆီဒၣ်တၢ်ပိၥ်မုၣ်ဒီးဖိသၣ်သ့ၣ်တဖၣ်အဖီခိၣ်တဂ့ၤအဂီၢ်ကညီဒီကလုၥ်ပၢၤကီၢ်သုးအံၤအိၣ်စ့ၢ်ကီးဒီးမူဒါလၢကဘၣ်ကဟုကယၥ်,ဒီသဒၢဝဲဒၣ်အဂ့ၢ်ကညီပိၥ်မုၣ်ကရၢဆီၣ်တခူထီၣ်ဝဲန့ၣ်လီၤ. လၢတၢ်ကမၤလီၤပှီၢ်ကွံၥ်ဝဲထံလီၢ်ကီၢ်ပူၤတၢ်ဆါကသံၣ်ပူၤဘှီး,တၢ်သူၣ်ကသံၣ်မူၤဘှီး,တၢ်လိၥ်ကွဲတၤကျိၣ်တၤစ့ဒီးတၢ်မၤမုၢ်ကျိၤဝဲၤကွၥ်လၢအတဖိးမံလိၥ်အသးဒီးခ့ၣ်အဲၣ်ယူၣ်တၢ်ပၥ်လီၤကျဲသနူသ့ၣ်တဖၣ်အလီၢ်အိၣ်ဝဲလၢကမျၢၢ်ထံဖိကီၢ်ဖိဒီးကညီဒီကလုၥ်ပၢၤကီၢ်သုးကဖီၣ်လိၥ်သးစုမၤသကိးတၢ်ဘူးဘူးတံၢ်တံၢ်အဂ့ၢ်လံၥ်တၢ်ပၥ်ဖျါအပူၤပၥ်ဖျါဝဲဒၣ်န့ၣ်လီၤ. လၢကညီဒီကလုၥ်ပၢၤကီၢ်သုးမုၢ်နံၤပှဲၤထီၣ်(၃၃)ဝီတဝီအံၤအဖီခိၣ်မ်ကညီဒီကလုၥ်ပၢၤကီၢ်သုး,ခိၣ်နၢ်သိၣ်ဒူမုၣ်ခွါဃုၥ်ဒီးပပှၤကလုၥ် ထံဖိကီၢ်ဖိခဲလၢၥ်ကပှဲၤဒီးတၢ်သူၣ်ဖှံသးညီ,နၢၤဒုၣ်နၢၤဒါဒီးမၤန့ၢ်အီၣ်ကဲထီဘိတက့ၢ်အဂ့ၢ်ကညီပိၥ်မုၣ်ကရၢဟ့ၣ်ထီၣ်အတၢ်ဆၢဂ့ၤဆၢဝါန့ၣ်လီၤ. ကညီဒီကလုၥ်ပၢၤကီၢ်သုးအံၤဘၣ်တၢ်ကရၢကရိဒီးဒုးအိၣ်ထီၣ်အီၤဖဲ(၁၉၉၁)နံၣ်,လါစဲးပထ့ဘၢၣ်(၉)သီဖဲခ့ၣ်အဲၣ်ယူၣ်လီၢ်ခၢၣ်သးထီဘိကမံးတံၥ်ဒီးလီၢ်ခၢၣ်သးကတီၤဆိကမံးတံၥ်တၢ်အိၣ်ဖှိၣ်အပူၤလၢအဘၣ်တၢ်မၤအီၤဖဲမၤနၢၤပျီအဆၢကတီၢ်န့ၣ်လီၤ. အတၢ်ပညိၣ် မ့ၢ်ဒ်သိးသဲးစးတၢ်ဒိၣ်စိကအိၣ်ဒီးလီၢ်ကဝီၤကအိၣ်မုၥ်အိၣ်ခုၣ်ဘၣ်ဝဲအမဲၥ်ညါတၢ်ကမၤလီၤမၢ်ကွံၥ်ဝဲကသံၣ်မူၤဘှီးလၢထံလီၢ်ကီၢ်ပူၤအဂီၢ်န့ၣ်လီၤ.
ဖိသၣ်မုၣ်(၁၃)နံၣ်လၢဘၣ်တၢ်ဖီၣ်က့ၤကိးအီၤတဂၤအံၤတၢ်က့ၤထံၣ်ကဒါလံ
လါစဲးပထ့ဘၢၣ် ၉ သီ, ၂၀၂၄ နံၣ်, ခ့ၣ်အဲးစံၣ် ကညီကီၢ်စဲၣ်-ကီးတရံးကလံၤစိး(ထံးဖူကၠီၤ)ဟီၣ်ကဝီၤ(ကိးဖီယါ)သဝီအပူၤဖိသၣ်မုၣ်(၁၃)နံၣ်တဂၤလၢအလီၤမၢ်ဖဲအကွၢ်ကျီၢ်အ ဆၢကတီၢ်အံၤန့ၣ်ဖဲတနံၤအံၤလါစဲးပထ့ဘၢၣ်(၇)သီ,မုၢ်ဆါခီ(၁၂)ဃၣ်ဃၣ်အဆၢကတီၢ်ကမျၢၢ်ပှၤသဝီဖိက့ၤထံၣ်ကဒါဝဲလံအဂ့ၢ် သ့ၣ်ညါဘၣ်လၢအဘူးအတံၢ်အိၣ်န့ၣ်လီၤ. ဖိသၣ်ပိၥ်မုၣ်ဖိလၢအဟါမၢ်တဂၤအံၤန့ၣ်(ကိးသလီၣ်)သဝီဖိက့ၤထံၣ်န့ၢ်အီၤဂ့ၤဂ့ၤလၢသးသမူတၢ်လီၤဘၣ်ယိၣ်တအိၣ်နီတမံၤဘၣ်ဒီးဒ်န့ၣ်အသိးပှၤလၢအက့ၤကိးဖိသၣ်ပိၥ်မုၣ်ဖိတဂၤန့ၣ်တၢ်တဖီၣ်ချုးန့ၢ်အီၤဒံးဘၣ်အဂ့ၢ်ဖိသၣ်မုၣ်ဖိအမုၢ်ဂါစံးဝဲဒၣ်န့ၣ်လီၤ. အဝဲစံးဝဲလၢ "တၢ်က့ၤထံၣ်အီၤလၢ(ကိးသလီၣ်)သဝီတကပၤန့ၣ်မီၤနီၤ. ပှၤလၢက့ၤဖီၣ်ဖိသၣ်မုၣ်ဖိတဂၤန့ၣ်ဒုတၢ်ဖီၣ်အီၤ တချုးဒံးဘၣ်, ပှၤသဝီဖိလူၤဖီၣ်ဝဲအဖၢမုၢ်လီၤ. တၢ်က့ၤထံၣ်အီၤဂ့ၤဂ့ၤဘၣ်ဘၣ်လီၤ, ပှၤဟဲက့ၤဆှၢအီၤလၢသဝီပူၤအဖၢမုၢ်လီၤ ဖဲမဟါဧါတသ့ၣ်ညါဘၣ်မုၢ်ဂါအိၣ်လၢဒဲပူၤတဂၤန့ၣ်တဲဝဲလၢထံၣ်အဝဲသ့ၣ်ဒံး. အဝဲဟးပိၥ်ဝဲဒၣ်ပှၤက့ၤဖီၣ်တၢ်တဂၤအခံဘူးဘူးလီၤ မီၤနီၤ. တဲဝဲလၢပှၤတဂၤန့ၣ်မ့ၢ်လဲၤဃ့ၢ်နုၥ်လီၤလၢတပှီၥ်ကျါန့ၣ်အဝဲနါက့ဃ့ၢ်နုၥ်လီၤဝဲလီၤ. " အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါပှၤလၢဖီၣ်က့ၤကိးဝဲဖိသၣ်မုၣ်ဖိတဂၤအစုပူၤန့ၣ်ပၣ်ဃုၥ်စ့ၢ်ကီးဒီးမ့ၣ်ပိၢ်တဖျၢၣ်အဂ့ၢ်ပှၤသဝီဖိသ့တဖၣ်စံးဝဲအသိးတၢ်ကဲထီၣ်အသးဒီးဖိသၣ်မုၣ်ဖိတဂၤအံၤဒ်လဲၣ်န့ၣ်ကတီၢ်ခဲအံၤတၢ်သံကွၢ်သံဒိးအီၤတန့ၢ်ဒံးဘၣ်အဂ့ၢ်သ့ၣ်ညါဘၣ်လၢအဟံၣ်ဖိဃီဖိဒီးအဘူးအတ့ၢ်သ့ၣ်တဖၣ်အအိၣ်န့ၣ်လီၤ. ပှၤလၢဖီၣ်က့ၤကိးဖိသၣ်မုၣ်ဖိတဂၤအံၤမ့ၢ်ဝဲမတဂၤလဲၣ်န့ၣ်တၢ်မၤလီၤတံၢ်အီၤတန့ၢ်ဒံးဘၣ်အသိးလီၢ်ကဝီၤပှၤသဝီဖိသ့ၣ်တဖၣ်ဒီးလီၢ်ကဝီၤခ့ၣ်အဲၣ်ယူၣ်အပှၤဘၣ်မူဘၣ်ဒါသ့ၣ်တဖၣ်လူၤဃုသ့ၣ်ညါဝဲဒၣ်အဖၢမုၢ်လီၤအဂ့ၢ်သ့ၣ်ညါဘၣ်လၢလီၢ်ကဝီၤဖိအအိၣ်န့ၣ်လီၤ. ဖိသၣ်မုၣ်ဖိ(နါပ့ပ့ၣ်)ကိး(နါသစ့ၤခဲၣ်)လၢအဘၣ်တၢ်က့ၤထံၣ်ကဒါက့ၤအီၤတဂၤအံၤဖဲပူၤကွံၥ်လါစဲးပထ့ဘၢၣ်(၅)သီ,မုၢ်ဃ့ၢ်လီၤ(၂)နၣ်ရံၣ်ဃၣ်ဃၣ်အဆၢကတီၢ်န့ၣ်အဝဲဒီးအနီခံဂၤလဲၤကွၢ်ကျီၢ်လၢသဝီချၢအဆၢကတီၢ်ပှၤလၢတၢ်တသ့ၣ်ညါတဂၤနဲၣ်ဝဲအီၤဒီးဒီဖီၣ် က့ၤကိးဝဲဒၣ်အီၤဒီးတၢ်ဆၢကတီၢ်ယံၤ(၂)သီဝံၤလီၢ်ခံမးတၢ်က့ၤထံၣ်ကဒါက့ၤအီၤဒ်အံၤလီၤအဂ့ၢ်သ့ၣ်ညါဘၣ်န့ၣ်လီၤ.
TNLA ဒိၣ်စိၤပၢဝဲ(နခါ)ဝ့ၢ်အပူၤသုးကီၣ်ကးဟဲတ့ၢ်လီၤမ့ၣ်ပိၢ်အဆိကတၢၢ်တဘျီအဃိကမျၢၢ်ဘၣ်သံ(၁၁)ဂၤ
လါစဲးပထ့ဘၢၣ် ၆ သီ, ၂၀၂၄ နံၣ်, ခ့ၣ်အဲးစံၣ် (တအီ)ဒီကလုၥ်တၢ်ထူၣ်ဖျဲးသုးမုၢ်ဒိၣ်(TNLA)ဒိၣ်စိၤပၢဝဲ(နခါ)ဝ့ၢ်အပူၤဖဲတနံၤအံၤလါစဲးပထ့ဘၢၣ်(၆)သီဖးဖီမုၢ်(၁)ဃၣ်ဃၣ်ဆၢကတီၢ်န့ၣ်ပယီၤသုးကီၣ်ကးအဘီယူၤဒုးသုးဟဲတ့ၢ်လီၤဝဲဒၣ်(ပီၣ်-၅၀၀) မ့ၣ်ပိၢ်အဃိဘၣ်သံဝဲကမျၢၢ်(၁၁)ဂၤအကျါပၣ်ဃုၥ်ဝဲမိၢ်ဒၢတဂၤ အဂ့ၢ်(TNLA)ထုးထီၣ်ပၥ်ဖျါဝဲဒၣ်န့ၣ်လီၤ. ခီဖျိလၢသုးကီၣ်ကးဟဲတ့ၢ်လီၤမ့ၣ်ပိၢ်ဒ်အံၤအဖီခိၣ်လီၤတဲၥ်ပိၢ်ဖးထီၣ်ဝဲဒၣ်ဖဲ(နခါ)ဝ့ၢ်ကျးဆါတၢ်အလီၢ်အဃၢၤဖဲကမျၢၢ်ဟံၣ်ဃီသ့ၣ်တဖၣ်အဖီခိၣ်ဒီးဒ်န့ၣ်အသိးလီၤတဲၥ်ပိၢ်ဖးဘၣ်စ့ၢ်ကီးဝဲ(ကၠါဖၠူၣ်)ဘျီတၢ်သူၣ်ထီၣ်အပူၤတဖျၢၣ်အဂ့ၢ်(TNLA)စံးဝဲန့ၣ်လီၤ. မ့ၢ်လၢမ့ၣ်ပိၢ်လီၤတဲၥ်ပိၢ်ဖးထီၣ်အသဟီၣ်ဆူၣ်ဝဲအဃိဘၣ်သံဝဲဖိသၣ်ဖိ(၂)ဂၤ,ပှၤပိၥ်ခွါ(၅)ဂၤဒီးပှၤပိၥ်မုၣ်(၄)ဂၤ,ခဲလၢၥ်(၁၁)ဂၤဒီးအကျါပၣ်ဃုၥ်ပှၤမိၢ်ဒၢတဂၤအဂ့ၢ်သ့ၣ်ညါဘၣ်အသိးဘၣ်ဟးဂီၤကွံၥ်ဝဲဟံၣ်ဃီ(၆)ဖျၢၣ်အဂ့ၢ်(TNLA)တၢ်ပၥ်ဖျါပူၤအသိးပၥ်ဖျါဝဲန့ၣ်လီၤ. ဘၣ်ဃးဒီးတၢ်ကဲထီၣ်အသးအံၤန့ၣ်မ့ၢ်ဝဲသုးကီၣ်ကးပၥ်ပနီၣ်လိၤလိၤကမျၢၢ်ပှၤလီၢ်ကဝီၤဖိသ့ၣ်တဖၣ်အသိးပယီၤသုးကီၣ်ကးအံၤလၢဟီၣ်ခိၣ်မဲၥ်ဖံးခိၣ်တၢ်မဲၥ်ညါနါက့န့ၣ်နုၥ်လီၤဟံးဆူၣ်န့ၢ်ဝဲတၢ်လၢကမျၢၢ်ဟံၣ်ဃီအပူၤဒီးဟူးဂဲၤမၤထီဒါဝဲပှၤဟီၣ်ခိၣ်ဖိခွဲးယၥ်အိၣ်ဝဲအကလုၥ်ကလုၥ်အဂ့ၢ်ယိၤဒိၣ်ပှၤဂ့ၢ်ဝီခွဲးယၤဂံၢ်ခီၣ်ထံးကရူၢ်အပှၤကတိၤတၢ်ပၢ(ယ့လယဲဟၢၤ)စံးဝဲဒၣ်ဒ်အံၤန့ၣ်လီၤ. အဝဲစံးဝဲလၢ "နၢ်ဟူလၢ(နၢၣ်ခၢ)န့ၣ်တၢ်ဟဲတ့ၢ်လီၤမ့ၣ်ပိၢ်လီၤ. တၢ်ဘျၢသဲးစးတၢ်ဒိၣ်စိတအိၣ်ဒံးဘၣ်အဃိန့ၣ်ဟံၣ်ဃီသ့ၣ်တဖၣ်န့ၣ် ဘၣ်တၢ်မၤဟးဂီၤကွံၥ်ဝဲမီၤနီၤ. တၢ်နုၥ်လီၤဝဲဒီးဘၣ်တၢ်အီၣ်ဟုၣ်ဝဲတၢ်မီၤနီၤ. ဘၣ်သဂၢၢ်စ့ၢ်ကီးဒီးအီၣ်အီအိၣ်ဆိးတၢ်ကီတၢ်ခဲအက လုၥ်ဒ်န့ၣ်အိၣ်ဝဲဒၣ်မီၤနီၤ." အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. (နခါ)ဝ့ၢ်အံၤမ့ၢ်ဝဲဝ့ၢ်လၢအအိၣ်စဲးဘူးလိၥ်အသးဒီးတရူးကီၢ်ဆၢတဖျၢၣ်အသိးဝ့ၢ်အံၤစးထီၣ်လၢ(TNLA)ဒိၣ်စိပၢဝဲဝံၤအလီၢ်ခံသုးကီၣ်ကးဟဲတ့ၢ်လီၤဝဲဒၣ်မ့ၣ်ပိၢ်အဆိကတၢၢ်တဘျီလီၤအဂ့ၢ်သ့ၣ်ညါဘၣ်န့ၣ်လီၤ.
တကဲးဟီၣ်ကဝီၤပယီၤသုးလၢဟဲတီဆှၢအပှၤတၢ်အီၣ်တၢ်အီတဖၣ်တၢ်ပၢၢ်ဆၢကရူၢ်ခိးခးဝဲအဃိဘၣ်ဟးဂီၤသိလ့ၣ်(၃)ခိၣ်
လါစဲးပထ့ဘၢၣ် ၆ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဘျံးဒဝဲၢ်ကီၢ်ရ့ၣ်တနီသရံၣ်ကီၢ်ဆၣ်,တကဲးဟီၣ်ကဝီၤအပူၤပယီၤသုးကီၣ်ကးလၢဟဲတီဆှၢန့ၢ်ဝဲအပှၤ တၢ်အီၣ်တၢ်အီသ့ၣ်တဖၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးတၢ်ပၢၢ်ဆၢသုးပၥ်ဖှိၣ်ကရူၢ်သ့ၣ်တဖၣ်ခိးခးဝဲအဃိသိလ့ၣ်(၅)ခိၣ်အကျါဘၣ်ဟးဂီၤဝဲ(၃)ခိၣ်အဂ့ၢ်ကီၢ်ဆၣ်အပှၤဘၣ်မူဘၣ်ဒါစံးဝဲန့ၣ်လီၤ. ဖဲမဟါလါစဲးပထ့ဘၢၣ်(၅)သီအနံၤန့ၣ်တကဲးဟီၣ်ကဝီၤအပူၤခံခီခံကပၤတၢ်ဒုးတၢ်ယၤကဲထီၣ်ဖဲ(ဃုတၢၣ်)သဝီအပူၤဝံၤအလီၢ်ခံဖဲတၢ်တနံၤဃီဝဲန့ၣ်အတီၢ်ပူၤပယီၤသုးသိလ့ၣ်(၅)ခိၣ်လၢဟဲတီဆှၢတၢ်အီၣ်တၢ်အီၣ်သ့ၣ်တဖၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးရ့ၣ်(၁၁)အသုးဒ့(၂)ခိးခးဝဲဖဲ(ယဲၢ်တၢၣ်)သဝီတၢ်လီၢ်တကပၤန့ၣ်အဃိဘၣ်ဟးဂီၤကွံၥ်ဝဲသိလ့ၣ်(၃)ခိၣ်အဂ့ၢ်တနီသရံၣ်ကီၢ်ဆၣ်ပဒိၣ်စီၤထံဝါစံးဝဲဒၣ်န့ၣ်လီၤ. "ပယီၤသုးအသိလ့ၣ်အံၤဘၣ်ယိၣ်တၢ်ကခးအဝဲသ့ၣ်အဃိဟဲတီဆှၢဝဲတဘူၣ်ဘၣ်. အဝဲသ့ၣ်ဟံန့ၢ်ဝဲဒၣ်လၢပှၤသဝီဖိသိလ့ၣ်ဒီးမၢဝဲ ပှၤသဝီဖိဟဲဆှၢန့ၢ်ဝဲမီၤနီၤ. သိလ့ၣ်တနီၤန့ၣ်အကစၢ်တပၥ်ဃုၥ်ဘၣ်. ပယီၤသုးန့ၣ်ဟံးန့ၢ်ဝဲသိလ့ၣ်ဒီးဟဲနီၣ်ဝဲလၢအကစၢ်ဒၣ်ဝဲလီၤ. သိလ့ၣ်အံၤတမ့ၢ်ပယီၤသုးအတၢ်ဘၣ်မ့ၢ်ဝဲကမျၢၢ်အသိလ့ၣ်မီၤနီၤ. ပယီၤသုးကီၣ်ကးအံၤဒ်သိးပှၤသုတမၤအီၤတဂ့ၤအဂီၢ်ဟဲနီဝဲပှၤက မျၢၢ်သိလ့ၣ်မီၤနီၤ. ပပှၤသ့ၣ်တဖၣ်န့ၣ်သ့ၣ်ညါဝဲလၢတၢ်အံၤမ့ၢ်ဝဲဒုၣ်ဒါတၢ်အီၣ်အဃိန့ၣ်ပခိးခးဝဲမီၤနီၤ. မ့မ့ၢ်လၢတၢ်အီၣ်ခီဒုန့ၣ်ပပှၤမၤ တန့ၢ်ဘၣ်. အိၣ်ဒၣ်ပခးဟးဂီၤကွံၥ်ဝဲတဆံးတက့ၢ်လီၤ. သိလ့ၣ်(၃)ခိၣ်ဒုလဲၤတသ့လၢၤဘၣ်ဒီးမ့မ့ၢ်လၢ(၂)ခိၣ်န့ၣ်လဲၤသ့ဝဲမီၤနီၤ" အ ဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါပယီၤသုးကီၣ်ကးအံၤဖဲတနံၤဂီၤခီ(၅)နၣ်ရံၣ်အဆၢကတီၢ်လၢတနီသရံၣ်ဝ့ၢ်ပူၤတဆီဟဲဆှၢအါထီၣ်ကဒီးသိလ့ၣ်(၃)ခိၣ်ဒ်သိးကတီဆှၢအါထီၣ်န့ၢ်ဝဲအပှၤသ့ၣ်တဖၣ်တၢ်အီၣ်တၢ်အီလၢ(ထိတီၤ,ဃုတၢၣ်,၅၆၁-သုးကလၢၤအပူၤဒီးဘါလီသဝီတကပၤ အဂ့ၢ်ပဒိၣ်စီၤထံဝါစံးအါထီၣ်ဝဲဒၣ်န့ၣ်လီၤ. တကီၢ်ခါခဲအံၤန့ၣ်တကဲးဟီၣ်ကဝီၤအပူၤခံခီခံကပၤတၢ်ဒုးတၢ်ယၤကဲထီၣ်အသးအိၣ်ဝဲခဲအံၤခဲအံၤအသိးပယီၤသုးကီၣ်ကးသ့ၣ်တဖၣ်ဆှၢအါထီၣ်အသုးဒီးတၢ်အီၣ်တၢ်အီၣ်ကွ့ၢ်ကွ့ၢ်အမဲၥ်ညါပယီၤသုးအံၤလၢတၢ်ဝံစိၥ်တီဆှၢန့ၢ်ဝဲအပှၤသ့ၣ်တဖၣ်တၢ်အီၣ်တၢ်အီ,တၢ်ဖိတၢ်လံၤအဂီၢ်သူဝဲကမျၢၢ်အသိလ့ၣ်သ့ၣ်တဖၣ်အဂ့ၢ်သ့ၣ်ညါဘၣ်န့ၣ်လီၤ. ဒ်န့ၣ်အသိးဖဲမဟါလါစဲးပထ့ဘၢၣ်(၅)သီအနံၤန့ၣ်စ့ၢ်ကီးပယီၤသုးကျိၤလၢအဟဲထီၣ်နုၥ်လီၤအိၣ်ဆီလီၤအသးဖဲ(ထိတီၤ,ဃုတၢၣ်)သဝီအပူၤသ့ၣ်တဖၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တၢ်ပၢၢ်ဆၢသုးပၥ်ဖှိၣ်လဲၤဟူးဂဲၤတ့ၢ်လီၤဝဲပယီၤသုးကီၣ်ကးအံၤဒီးဒြိမ့ၣ်ပိၢ်အဃိပယီၤသုးကီၣ်ကးတကပၤသံ(၅)ဂၤဒီးဘၣ်ဒိအဂၤ(၁၀)ဆူအဖီခိၣ်အဂ့ၢ်လီၢ်ကဝီၤအပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
တနီသရံၣ်ကီၣ်ဆၣ်ပူၤ ပယီၤသုးကျိၤဟဲထီၣ်အဃိတၢ်ဒုးကဲထီၣ်လၢခံခီခံကပၤအဘၢၣ်စၢၤ
လါစဲးပထ့ဘၢၣ် ၅ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဘျံးဒဝဲၢ်ကီၢ်ရ့ၣ် သုးက့(၄)တနီသရံၣ်ကီၢ်ဆၣ်ဟီၣ်ကဝီၤအပူၤစးထီၣ်ဖဲတလါအံၤလါစဲးပထ့ဘၢၣ်(၂) သီအနံၤ ပယီၤသုးရ့ၣ်ခံရ့ၣ်ဟဲထီၣ်ဟူးဂဲၤဝဲဖဲ(တကဲး)ဟီၣ်ကဝီၤပူၤအဃိ တၢ်ဒုးကဲထီၣ်ဝဲဒီးလီၢ်ကဝီၤတၢ်ပၢၢ်သုးပၥ်ဖှိၣ်ကရူၢ်အဂ့ၢ် န့ၣ်သ့ၣ်ညါဘၣ်လၢကီၢ်ဆၣ်ပှၤဘၣ်မူဘၣ်ဒါအအိၣ်န့ၣ်လီၤ. ပယီၤသုးအံၤစးထီၣ်လၢလါစဲးပထ့ဘၢၣ်(၂)သီအနံၤန့ၣ်ဟဲနုၥ်လီၤအိၣ်ဝဲဒၣ်လၢတၢ်ဘူၣ်တၢ်ဘါတၢ်သူၣ်ထီၣ်အပူၤဒီးဟံၣ်လၢအကစၢ်တအိၣ်သ့ၣ်တဖၣ်ပူၤအမဲၥ်ညါနုၥ်လီၤမၤဟးဂီၤကွံၥ်ဝဲပှၤဟံၣ်ပှၤဃီဒီးဟံကမျၢၢ်တၢ်ဖိတၢ်လံၤတကးဒံးဘၣ်တဲပျံၤတဲဖုးပှၤသဝီဖိ သ့ၣ်တဖၣ်အဂ့ၢ်န့ၣ်f သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ. လီၢ်ကဝီၤပှၤဘၣ်မူဘၣ်ဒါလၢအိၣ်ဖဲန့ၣ်တဂၤစံးဝဲလၢ "ကတီၢ်အံၤန့ၣ်ခီဖျိလၢတၢ်ဒုးတၢ်ယၤတဖၣ်အိၣ်ဝဲလၢသဝီဝဲန့ၣ်အပူၤ,တဂီၤ ညါအံၤစ့ၢ်ကီးန့ၣ်တၢ်ဒုးကဲထီၣ်ဝဲခံဘျီသၢဘျီလံ. အဃိ န့ၣ်ကမျၢၢ်သ့ၣ်တဖၣ်န့ၣ်ဃ့ၢ်ဖျိးလၢၥ်လံ. တအိၣ်နီတဂၤလၢၤဘၣ်န့ၣ်ပတဲ သ့လီၤ. မ့မ့ၢ်လၢ(ဃုတၢၣ်)သတီန့ၣ်တအိၣ်လၢၤနီတဂၤလၢၤဘၣ်.ဒီးပိၥ်ထွဲထီၣ်အခံန့ၣ်လၢ(ထိတီၤ)သဝီစ့ၢ်ကီးန့ၣ်အိၣ်တ့ၢ်ပူၤဂၤပူၤ ဂၤလီၤမီၤနီၤ. မ့မ့ၢ်ဟံၣ်လၢအကစၢ်ဃ့ၢ်ကွံၥ်သ့ၣ်တဖၣ်န့ၣ်ပယီၤသုးလဲၤမၤဟးဂီၤကွံၥ်ဝဲဒၣ်အဟံၣ်ပဲတြီဒီးဟံန့ၢ်ဝဲဒၣ်ကမျၢၢ်အတၢ် အီၣ်တၢ်အီ,အတၢ်ဖိတၢ်လံၤအကလုၥ်ကလုၥ်လၢသဝီတဖျၢၣ်ဒီတဖျၢၣ်အပူၤလီၤ." အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ. ပယီၤသုးကျိၤလၢဟဲထီၣ်ဟူးဂဲၤဝဲဖဲတကဲးဟီၣ်ကဝီၤပူၤသ့ၣ်တဖၣ်အံၤမ့ၢ်ဝဲခီၣ်သုးရ့ၣ်(ခလရ-၄၃၈)ဒီး(ခလရ-၂၈၀)အပှၤနီၣ်ဂံၢ်ပၥ် ဖှိၣ်ကအိၣ်အဂၤ(၁၀၀)ဘျဲၣ်ဒီးပယီၤသုးအံၤတၢ်ဘၣ်သဂၢၢ်ခးလိၥ်သးဒီးဂုၢ်သီသူသုးကျိၤတၢ်ပၢၢ်ဆၢသုးပၥ်ဖှိၣ်သ့ၣ်တဖၣ်အဘၢၣ်စၢၤအိၣ်အဖီခိၣ်သုးကီၣ်ကးတကပၤသံဘၣ်ဒိဘၣ်ထံးအိၣ်ဝဲဘၣ်ဆၣ်တၢ်မၤလီၤတံၢ်အီၤတန့ၢ်ဒံးဘၣ်အဂ့ၢ်န့ၣ်သ့ၣ်ညါဘၣ်န့ၣ်လီၤ. ခံခီခံကပၤတၢ်ဒုးကဲထီၣ်ဝံၤလီၢ်ခံပယီၤသုးအံၤစးထီၣ်တ့ၢ်လီၤဝဲ(ဒြိ)မ့ၣ်ပိၢ်ဒီးခးလီၤနါစိၤကျိဖးဒိၣ်ဆူ(ထိတီၤသဝီ,ဃုတၢၣ်သဝီ)ပူၤဒီးသဝီခိၣ်ဃၢၤအိၣ်ဝဲအမဲၥ်ညါပယီၤသုးကျိၤနုၥ်လီၤအိၣ်ဆိးလၢဒူသဝီပူၤအဃိပှၤဒူသဝီဖိသ့ၣ်တဖၣ်ဘၣ်ပျံၤဘၣ်ဖုးတၢ်ဒီးဘၣ်ဃ့ၢ်ပ ဒ့ၣ်သးဆူ(တဘိးလံး,သံခိ,မိတီၣ်သဝီဒီးဒူသဝီအဂၤသ့ၣ်တဖၣ်အိၣ်ဝဲအဂ့ၢ်သ့ၣ်ညါဘၣ်န့ၣ်လီၤ. တကီၢ်ခါခဲအံၤပယီၤသုးကျိၤခံကျိၤလၢဟဲထီၣ်ဟူးဂဲၤတဖၣ်အံၤမ့ၢ်ဒ်သိးကဆီတလဲက့ၤအသုးဒီးတၢ်ပညိၣ်အိၣ်စ့ၢ်ကီးဝလၢကဟဲ ထီၣ်မၤဟးဂီၤကွံၥ်ကီၢ်ဆၣ်ဝဲၤဒၢးတၢ်လီၢ်အဂ့ၢ်န့ၣ် တနီသရံၣ်ကီၢ်ဆၣ် ပှၤဘၣ်မူဘၣ်ဒါပဒိၣ်စီၤထံဝါစံးဝဲဒၣ်ဒ်အံၤန့ၣ်လီၤ. "မ့မ့ၢ်လၢအဝဲသ့ၣ်အတၢ်ပညိၣ်ခီန့ၣ်အိၣ်ဒၣ်အဝဲသ့ၣ်ကဘၣ်လဲၤထီၣ်ဆီတလဲအပှၤလၢအိၣ်(သ့ဒီ)တကပၤန့ၣ်မီၤနီၤ. ဒီးကဘၣ်ဟူး ဂဲၤဝဲဒၣ်ဖဲဟီၣ်ကဝီၤဖဲအံၤအပူၤလီၤ. ဒီးအဂၤတမံၤန့ၣ်အဝဲသ့ၣ်အတၢ်ပညိၣ်န့ၣ်ကမၤလီၤသဘှံးဝဲဒၣ်ပကီၢ်ဆၣ်ဝဲၤဒၢးအိၣ်သူၣ်လီၤ အသးဖဲဟီၣ်ကဝီၤအပူၤအံၤမီၤနီၤ." အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဒ်န့ၣ်အသိးတနီသရံၣ်ဟီၣ်ကဝီၤအပူၤဒူသဝီလၢအမ့ၢ်(စခါကၠံသဝီ,ဖွါဘိၣ်ပၠ့ၣ်သဝီ,ခမီၣ်တီသဝီ,ထ့ၣ်တွ့သဝီ)ဃုၥ်ဒီးဒူသဝီအဂၤသ့ၣ် တဖၣ်စးထီၣ်ဖဲလါအီကူးလီၢ်ခံကတၢၢ်တနွံန့ၣ်ပယီၤသုးကျိၤအပှၤနီၢ်ဂံၢ်အဂၤ(၁၀၀)ဘျဲၣ်နုၥ်လီၤဟံးန့ၢ်ကွံၥ်ဝဲကမျၢၢ်လၢဘၣ်ဃ့ၢ်အိၣ်ကဒုသးတဖၣ်အဟံၣ်ပူၤတၢ်ဖိတၢ်လံၤလုၢ်ဒိၣ်ပှ့ၤဒိၣ်သ့ၣ်တဖၣ်ဝံၤဒွဲၣ်အူကမျၢၢ်ဟံၣ်ဃီအဂ့ၢ်န့ၣ်လီၢ်ကဝီၤကမျၢၢ်စံးဝဲန့ၣ်လီၤ.
ကီၢ်ဆၣ် ၂ ဘ့ၣ် တလါအတီၢ်ပူၤ ဒုးယၤတၢ်ဖ့ၣ်စၢကဲထီၣ်(၁၄)ဘျီ ပယီၤသုးသံဘၣ်ဒိဘၣ်ထံး ၂၇ ဂၤ
လါစဲးပထ့ဘၢၣ် ၅ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ကီၢ်ဆၣ်ခံဘ့ၣ် လါအီကူာ်တလါအတီၢ်ပူၤ ခံခီခံကပၤအဘၢၣ်စၢၤ ဒုးယၤတၢ်ဖ့ၣ်စၢကဲထီၣ် ၀ဲ(၁၄)ဘျီဒီး ပယီၤသုးတကပၤသံဘၣ်ဒိဘၣ်ထံးခဲလၢာ်(၂၇)ဂၤအဂ့ၢ်န့ၣ် ကီၢ်ရ့ၣ်ၦၤဘၣ်မူ ဘၣ်ဒါစံး၀ဲန့ၣ်လီၤႉ သထူၣ်ကီၢ်ဆၣ်ဒီးကၠဲးထိၣ်ကီၢ်ဆၣ်(၂)ဘ့ၣ်ဟီၣ်က၀ီၤအပူၤ စးထီၣ်လါအီကူာ်ထီၣ် ၁ သီတုၤ ၃၁ သီ လၢတလါအတီၢ်ပူၤ ပယီၤသုးဒီး(KNLA)တၢ်ပၢၢ်ဆၢသုးပာ်ဖှိၣ်ကရူၢ်အဘၢၣ်စၢၤတၢ်ဒုးစဲးပြဲးကဲထီၣ်၀ဲ(၄)ဘျီႇ တၢ်လဲၤခးပယီၤသုးလၢဒြိ (၄)ဘျီႇ တၢ်ခိးထုးဒုၣ်ဒါလၢမ့ၣ်ပိၢ်(၆)ဘျီပာ်ဖှိၣ်ခဲလၢာ်(၁၄)ဘျီအဃိဒုၣ်ဒါတကပၤ သံ ၂၀ ဂၤႇ ဘၣ်ဒိ ၇ ဂၤအဂ့ၢ်န့ၣ် ကီၢ်ရ့ၣ်တၢ်မၤနီၣ်စရီပူၤအသိးသ့ၣ်ညါဘၣ်န့ၣ်လီၤႉ တၢ်ဒုးကဲထီၣ်လၢခံခီခံကပၤအဘၢၣ်စၢၤအံၤဒုၣ်ဒါတကပၤသံဘၣ်ဒိဘၣ်ထံးအိၣ်ဘၣ်ဆၣ်မ့မ့ၢ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တကပၤတၢ်သံတၢ်ဘၣ်ဒိဘၣ်ထံးတအိၣ်နီတဂၤဘၣ်ဒီးဒ်န့ၣ်အသိးဒုးယၤတၢ်ဖ့ၣ်စၢကဲထီၣ်အပူၤပယီၤသုးအသိလ့ၣ်ဟးဂီၤ(၃)ခိၣ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ တကးဒံးဘၣ်လါအီကူာ်တလါအတီၢ်ပူၤအံၤပယီၤသုးခးလီၤ၀ဲကျိဖးဒိၣ်(၁၂)ဘျီအဃိ ကမျၢၢ်သံ(၃)ဂၤႇ ဘၣ်ဒိ(၈)ဂၤ , ဟံၣ်ဃီတၢ်သူၣ်ထီၣ်စ့ၢ်ကီးဟးဂီၤ၀ဲဒၣ်(၁၂)ဖျၢၣ်အမဲာ်ညါကျီးတၢ်ဖံးအီၣ်မၤအီၣ်တၢ်ထူၣ်တၢ်ဘိ စ့ၢ်ကီးဟးဂီၤ၀ဲဒၣ် အဂ့ၢ်န့ၣ် ဒူသထူၣ်ကီၢ်ရ့ၣ်တၢ်မၤနီၣ်အပူၤ ပာ်ဖျါ၀ဲန့ၣ်လီၤႉ ဒ်တၢ်မၤနီၣ်စရီပူၤပာ်ဖျါ၀ဲအသိးန့ၣ်ပယီၤသုးလၢအခးလီၤကျိဖးဒိၣ်သ့ၣ်တဖၣ်န့ၣ်မ့ၢ်၀ဲ(၄၄)သုးတြိၤ၀ဲၤလီၢ်ခိၣ်သ့ၣ်ႇ ခီၣ်ချ့သုးရ့ၣ်(ခမရ-၂၀၆),(၃၁၄)အမျိာ်သုး ခီၣ်ချ့သုးရ့ၣ်(ခမရ-၉)(ခလရ-၈),ပနွဲၢ်ကျါသုးကလၢၤႇ ဒီး(၄၀၂)အမျိာ်သုး သ့ၣ်တဖၣ်အံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးအပူၤကွံာ်လါယူၤလံတလါအတီၢ်ပူၤ ကီၢ်ရ့ၣ်ဒီတဘ့ၣ်အပူၤန့ၣ် ခံခီခံကပၤဒုးယၤတၢ်ဖ့ၣ်စၢကဲထီၣ်၀ဲ ၁၄ ဘျီ ပယီၤသုးတကပၤသံဘၣ်ဒိဘၣ်ထံး(၂၀)ဂၤဒီး တကးဒံးဘၣ်ခီဖျိကျိဖးဒိၣ်အံၤအဃိ ကမျၢၢ်သံဘၣ်ဒိဘၣ်ထံးႇ ဟံၣ်ဃီတၢ်သူၣ်ထီၣ်ႇကျီးတၢ်ဖံးအီၣ်မၤအီၣ်လီၢ်စ့ၢ်ကီးဟးဂီၤအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ တကတီၢ်ဃီဖဲတလါအံၤလါစဲးပထ့ဘၢၣ် ၁ သီဂီၤခီအဆၢကတီၢ်စ့ၢ်ကီး လၢဘံလ့ကီၢ်ဆၣ်အပူၤ...
ရွံၣ်ကိၣ်ကိၤ(ယၤထဲၣ်)တၢ်မၤကရူၢ်လၢတၢ်ကဆိကတီၢ်ကွံၥ်ဝဲအံၤ,အပှၤမၤတၢ်ဖိတဖၣ်ကဟးထီၣ်ဘၣ်အဂီၢ်,ကဘၣ်ဟ့ၣ်ဝဲစ့ယိၤလၢအကလးအဂ့ၢ်,အလံၥ်ရၤလီၤအသး
လါစဲးပထ့ဘၢၣ် ၄သီ, ၂၀၂၄နံၣ်, ခ့ၣ်အဲးစံၣ်, ရွ့ၣ်ကိၣ်ကိၤ(ယၤထဲၣ်)ဝဲၤဒၢးတၢ်မၤကရူၢ်ပၥ်ဖှိၣ်တၢ်ဖံးတၢ်မၤအလီၢ်လၢတၢ်ကဆိကတီၢ်ကွံၥ်ဝဲအံၤ,အပှၤမၤတၢ်ဖိတဖၣ်ကဟးထီၣ်ဘၣ်အဂီၢ်,ကဘၣ်ဟ့ၣ်လီၤဝဲစ့ယိၤလၢအကလးအဂ့ၢ်,အလံၥ်ဘိးဘၣ်သ့ၣ်ညါရၤလီၤအသးလၢစိၤရှၢၣ်မံးဒံးယၢၣ်အပူၤတဘ့ၣ်န့ၣ်လီၤ. လံၥ်ဘိးဘၣ်သ့ၣ်ညါလၢရၤလီၤသးတဘ့ၣ်အံၤအပူၤ,ပၥ်ဖျါဝဲလၢ(ယထဲၣ်)ပှၤမၤတၢ်ဖိလၢအကဟးထီၣ်တဖၣ်အံၤ,ကဘၣ်အိၣ်ဝဲဒီးစရီတၢ်မၤနီၣ်မၤဃါလၢအဟ့ၣ်လီၤဝဲစ့ယိၤ(၃,၉၉၉၉)ဘးဒီး,တဘၣ်ဟးထီၣ်ဝဲဒ်အနီၢ်ကစၢ်တၢ်ဘၣ်သးအသိးဘၣ်အမဲၥ်ညါ,လၢကဟးထီၣ်ကွံၥ်ဆူရၤမတံဝ့ၢ်တကပၤအဂီၢ်ကဘၣ်ဒိးဝဲထဲသိလ့ၣ်လၢ(ယၤထဲၣ်)ရဲၣ်ကျဲၤပၥ်သ့ၣ်တဖၣ်လီၤအဂ့ၢ်,ပၥ်ဖျါဝဲန့ၣ်လီၤ. ဘၣ်ဃးဒီးလံၥ်ဘိးဘၣ်သ့ၣ်ညါတဘ့ၣ်အံၤရၤလီၤဝဲအသးလၢစိၤရှၢၣ်မံးဒံးယၢၣ်အဖီခိၣ်ဒ်လဲၣ်ဒီးမ့မတၤထုးထီၣ်ဝဲလဲၣ်အဂ့ၢ်,တသ့ၣ်ညါဝဲဘၣ်အဂ့ၢ်,ပှၤလၢအဘၣ်ထွဲဒီး(ယၤထဲၣ်)တၢ်ဖံးတၢ်မၤပှၤဘၣ်မူဘၣ်ဒါလၢတအဲၣ်ဒိးပၥ်ဖျါအမံၤတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“တၢ်ဂ့ၢ်တခါအံၤန့ၣ်မ့ၢ်အဝဲဟဲဖျိးထီၣ်ကၠါလဲၣ်ခီလဲၣ်န့ၣ်ယတသ့ၣ်ညါဘၣ်.တၢ်ဂ့ၢ်တၢ်ကျိၤန့ၣ်တမံၤဂ့ၤတမၠိဂ့ၤန့ၣ်အါတက့ၢ်ပှၤဒုးသ့ၣ်ညါပှၤဝံၤမးပှၤရၤလီၤမီၤ.လၢတၢ်တဘျီအံၤတခီပှၤတဒုးသ့ၣ်ညါပှၤဘၣ်.မကၠီးမကၠါပၢၢ်ထီၣ်လၢ(လဲ)ပူၤတဘျီယဟးသံကွၢ်သံဒိးပှၤတသ့ၣ်ညါနီတဂၤအဃိန့ၣ်လံၥ်အံၤမ့ၢ်မတၤထုးထီၣ်လဲၣ်တသ့ၣ်ညါဝဲဘၣ်အဂ့ၢ်”စံးဝဲန့ၣ်လီၤ. လၢန့ၣ်အမဲၥ်ညါ,ပှၤမၤတၢ်ဖိလၢဟးထီၣ်တဖၣ်အံၤ,ကဘၣ်အိၣ်ဝဲဒီးစရီတၢ်မၤနီၣ်မၤဃါလၢအဟးထီၣ်လၢ(ယထဲၣ်)အလံၥ်စရီအပူၤဒီးမ့တဒၢနုၥ်အမံၤလၢစရီဒီးဟးထီၣ်ဝဲဒ်အနီၢ်ကစၢ်တၢ်ဘၣ်သးအသိးန့ၣ်,တၢ်ကဆှၢထီၣ်ဝဲအဝဲသ့ၣ်တဖၣ်အမံၤအသၣ်အနီၢ်ကစၢ်ဂ့ၢ်ကျိၤတဖၣ်ဆူထံဂုၤကီၢ်ဂၤပှၤဘၣ်မူဘၣ်ဒါတဖၣ်အအိၣ်အိၣ်ဝဲအသိး,ကဆှၢထီၣ်စ့ၢ်ကီးဝဲဆူကီၢ်ပယီၤပဒိၣ်ပၢြပးပၢၤကီၢ်တဖၣ်အအိၣ်စ့ၢ်ကီးအဂ့ၢ်,ပၥ်ဖျါဝဲလၢလံၥ်ထုးထီၣ်ပၥ်ဖျါအပူၤန့ၣ်လီၤ. တကးဒံးဘၣ်,ပှၤမၤတၢ်ဖိတဖၣ်အံၤကဘၣ်ဟးထီၣ်ကွံၥ်ဝဲလၢရွံၣ်ကိၣ်ကိၤဟီၣ်ကဝီၤအပူၤ,အစဲၤခံကတၢၢ်ဖဲတလါအံၤလါစဲးပထ့ဘၢၣ်(၈)သီအနံၤအပူၤအသိး,ဘၣ်ဃးဒီးလံၥ်တၢ်ဘိးဘၣ်ရၤလီၤတဘ့ၣ်အံၤန့ၣ်တၢ်ကလူၤပိၥ်မၤထွဲအီၤစးထီၣ်ဖဲလါစဲးပထ့ဘၢၣ်(၁၅)သီအဃိ,လါစဲးပထ့ဘၢၣ်(၂၀)နံၤအပူၤပှၤမၤတၢ်ဖိတဖၣ်ကဘၣ်သုးလီၢ်ကျဲတုၤလၢအလၢၥ်အဂ့ၢ်,ပၥ်ဖျါဝဲန့ၣ်လီၤ. တကတီၢ်ဃီ,ရွ့ၣ်ကိၣ်ကိၤ(ယထဲၣ်)ဝဲၤဒၢးတၢ်မၤကရူၢ်ပၥ်ဖှိၣ်တၢ်ဖံးတၢ်မၤအလီၢ်အံၤ,ခီဖျိထံဂုၢ်ကီၢ်ဂၤဟ့ၣ်တၢ်ဆီၣ်သနံးဒီးကီၢ်ပယီၤထံကီၢ်အတၢ်ဃ့ထီၣ်သ့ၣ်တဖၣ်အဖီခိၣ်,တကီၢ်ခါခဲအံၤကဆိကတီၢ်ကွံၥ်ဝဲတၢ်မၤဂုၤထီၣ်ပသီထီၣ်ဟီၣ်ကဝီၤတၢ်ဖံးတၢ်မၤတဖၣ်အဃိ,တၢ်မၤခိၣ်နၢ်ဒီးပှၤမၤတၢ်ဖိလၢအိၣ်ရွ့ၣ်ကိၣ်ကိၤဒီး(ယၤထဲၣ်)တၢ်ဖံးတၢ်မၤလီၢ်အပူၤတဖၣ်ကသုးကွံၥ်လီၢ်ကျဲခဲလၢၥ်အဂ့ၢ်,ဘိးဘၣ်ရၤလီၤအပူၤပၥ်ဖျါဝဲန့ၣ်လီၤ. ဒ်န့ၣ်အသိး,ရွံၣ်ကိၣ်ကိၤ(ယၤထဲၣ်)တၢ်ဖံးတၢ်မၤလီၢ်အံၤ,အမံၤဟူသၣ်ဖျါဝဲလၢတၢ်မၤဝဲတဖိးမံသဲစးတၢ်မၤ,တၢ်ကူၣ်လဲၤမၤကၤပှၤကူပှၤကညီ,(အိၤလဲ)တၢ်အီၣ်လံၣ်အီၣ်လီအီကျိၣ်စ့,တၢ်တၤကျိၣ်တၢ်စ့တၢ်မၤတဖၣ်အိၣ်ဝဲအသိး,တၢ်မၤဝဲတၢ်တ့ထီၣ်ဘှီထီၣ်တၢ်ဖံးတၢ်မၤဃုၥ်ဒီးတၢ်တူၢ်လိၥ်မုၥ်တမှံၤဒၢးတၢ်ဖံးတၢ်မၤတဖၣ်အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ. ဒီးလၢတၢ်မၤဝဲတဖိးမံသဲစးတၢ်ဖံးတၢ်မၤတဖၣ်အံၤန့ၣ်,တရူးထံဖိကီၢ်ဖိ,သုးခိးကီၢ်ဆၢ(BGF)သုးခိၣ်ခၠံၣ်သူၣ်အဒူၣ်ဖိထၢဖိဒီး(BGF)ခိၣ်နၢ်လၢအတဂၤတဖၣ်အတၢ်ပၣ်ဃုၥ်ပၣ်ဂီၢ်အိၣ်ဝဲဒၣ်အဂ့ၢ်,သ့ၣ်ညါဘၣ်စ့ၢ်ကီးန့ၣ်လီၤ.
(လီလိ)ဟီၣ်ကဝီၤအပူၤသုးကီၣ်ကးဟံးန့ၢ်ကမျၢၢ်တၢ်ဖိတၢ်လံၤဝံၤအလီၢ်ခံဒွဲၣ်အူအီၣ်ဃုၥ်ဒီးကမျၢၢ်ဟံၣ်
လါစဲးပထ့ဘၢၣ် ၄ သီ, ၂၀၂၄ နံၣ်, ခ့ၣ်အဲးစံၣ် တနီသရံၣ်ကီၢ်ခီဒိၣ်,လီလိကီၢ်ဆၣ်ဟီၣ်ကဝီၤအပူၤပယီၤသုးကျိၤလၢအဟဲနုၥ်လီၤဆူဒူသဝီအပူၤသ့ၣ်တဖၣ်နုၥ်လီၤဟံးန့ၢ်ကွံၥ်ဝဲကမျၢၢ်လၢဘၣ်ဃ့ၢ်အိၣ်ကဒုအသးတဖၣ်အဟံၣ်ပူၤတၢ်ဖိတၢ်လံၤလုၢ်ဒိၣ်ပှ့ၤဒိၣ်သ့ၣ်တဖၣ်ဝံၤလီၢ်ခံဒွဲၣ်အူထီၣ်ဃုၥ်ဒီးဟံၣ်ဃီအဂ့ၢ်လီၢ်ကဝီၤဖိသ့ၣ်တဖၣ်စံးဝဲန့ၣ်လီၤ. လီလိကီၢ်ဆၣ်အပူၤဒူသဝီလၢအမ့ၢ်(စခါကၠံသဝီ,ဖွါဘိၣ်ပၠ့ၣ်သဝီ,ခမီၣ်တီသဝီ,ထ့ၣ်တွ့သဝီ)ဃုၥ်ဒီးဒူသဝီအဂၤသ့ၣ်တဖၣ်စးထီၣ်ဖဲလါအီကူးအလီၢ်ခံကတၢၢ်တနွံအခါလံၤလံၤပယီၤသုးကျိၤအပှၤနီၢ်ဂံၢ်အဂၤ(၁၀၀)ဘျဲၣ်ဟဲနုၥ်လီၤဝဲဒၣ်ဝံၤအလီၢ်ခံတၢ်ကဲထီၣ်ဝဲသးဒ်အံၤလီၤအဂ့ၢ်ပှၤလီၢ်ကဝီၤဖိလၢတအဲၣ်ဒိးပၥ်ဖျါအမံၤတဂၤစံးဝဲဒၣ်ဒ်အံၤန့ၣ်လီၤ. အဝဲစံးဝဲလၢ "သုးကျိၤဟဲထီၣ်န့ၣ်န့ၢ်ဝဲလၢလါတဝၥ်လံမီၤနီၤ. အခဲအံၤန့ၣ်စးထီၣ်လၢ(မီပကၢၤ)တုၤလၢ(သဘီဆ့ၣ်ပၠ့ၣ်ကၠံသဝီ)တၢ် ဘၢၣ်စၢၤန့ၣ်တၢ်ဒွဲၣ်အူအီၣ်ဝဲဟံၣ်လီၤ. တၢ်ဖိတၢ်လံၤလၢအလုၢ်အပှ့ၤအိၣ်သ့ၣ်တဖၣ်ဟံးန့ၢ်ကွံၥ်ဝဲဝံၤဒီးဒွဲၣ်အူအီၣ်ကွံၥ်ဝဲလီၤ. တၢ်ဖိ တၢ်လံၤသ့ၣ်တဖၣ်န့ၣ်တီဆှၢဝဲဒီးသိလ့ၣ်အဘျီတဖၣ်အဘျီလၢ(ခလရ-၁၀၄)အအိၣ်မီၤနီၤ." အဂ့ၢ်စံးဘၣ်ခ့ၣ်အဲးစံၣ်-ကညီတၢ်က စီၣ်န့ၣ်လီၤ. ခီဖျိလၢပယီၤသုးကီၣ်ကးအသုးကျိၤဟဲထီၣ်အဃိဒူသဝီလၢအိၣ်(လီလိ)ကီၢ်ဆၣ်ဟီၣ်ကဝီၤအပူၤဒ်အမ့ၢ်(စခါကၠံသဝီ,ဖွါဘိၣ်ပၠ့ၣ်သဝီ,ခမီၣ်တီသဝီ,ထ့ၣ်တွ့သဝီ)ဃုၥ်ဒီးဒူသဝီအဂၤသ့ၣ်တဖၣ်ခဲလၢၥ်ဒူသဝီ(၈)ဖျၢၣ်ပှၤနီၣ်ဂံၢ်အဂၤ(၅၀၀၀)ဘျဲၣ်ဘၣ်ဃ့ၢ်အိၣ်ကဒုအသးအဂ့ၢ်သ့ၣ်ညါဘၣ်န့ၣ်လီၤ. ဒ်န့ၣ်အသိးပယီၤသုးကျိၤလၢအဟဲထီၣ်အံၤပၣ်ဃုၥ်ဝဲဒၣ်ဒီးတကီၢ်ခါပှၤလၢအကၠံၣ်လီၤဘၣ်ဝဲသုးတၢ်မၤလိဝံၤသ့ၣ်တဖၣ်ဒီးတကးဒံးဘၣ်ဒွဲၣ်အူအီၣ်မၤဟးဂီၤကွံၥ်ဝဲဟံၣ်ဃီသ့ၣ်တဖၣ်ဒီးဖဲပူၤကွံၥ်စှၤသီအတီၢ်ပူၤပယီၤသုးကျိၤခးသံကွံၥ်ဝဲပှၤလီၢ်ကဝီၤဖိ(၃)ဂၤလၢတၢ်ကမၣ်တအိၣ်နီတမံၤဘၣ်အဂ့ၢ်(လီလိ)ကမျၢၢ်တၢ်ဒီသဒၢတၢ်ဘိးဘၣ်ရၤလီၤအပှၤဘၣ်မူဘၣ်ဒါ(ကိၡဲဒိ)စံးဝဲန့ၣ်လီၤ. အဝဲစံးစ့ၢ်ကီးဝဲလၢ "ပှၤလၢအပၣ်ဃုၥ်န့ၣ်သုးကီၣ်ကးအပှၤဟ့ၣ်တၢ်ကစီၣ်ဖိသ့ၣ်တဖၣ်ပၥ်မီၤနီၤ. ပှၤလၢထီၣ်သုးတၢ်မၤလိကၠံၣ်လီၤ ပၣ်ဝဲ. ဒဝဲၢ်ပှၤကမျၢၢ်စ့ၢ်ကီးပၣ်ဃုၥ်ဝဲလီၤ. ပထံၣ်ဘၣ်လၢပှၤသ့ၣ်တဖၣ်န့ၣ်တၢ်သိၣ်လိတ့ၢ်အဝဲသ့ၣ်မၤတၢထီၣ်တၢလီၤတၢ်ဒီးသူတၢ် စုဆူၣ်ခီၣ်တကးလီၤ. ဟံၣ်လၢဘၣ်တၢ်ဒွဲၣ်အူကွံၥ်အီၤန့ၣ်အိၣ်အါမးလံ. မ့ၢ်ဝံၤ(ဖွါဘိၣ်ပၠ့ၣ်သဝီ,မၠိၣ်ဟီသဝီ)တကပၤန့ၣ်သုးကျိၤဟဲ တုၤတကျိၤကဒီးလံ. ဟးလူၤဃုခွဲးခွၥ်သဝီပူၤမီၤနီၤ. ဖဲတဟါတနံၤန့ၣ်ပှၤလီၢ်ကဝီဖိ(၃)ဂၤဘၣ်တၢ်ခးသံဝဲလီၤ." အဂ့ၢ်အဝဲစံးဝဲဒၣ်န့ၣ် လီၤ. ဒ်လီၢ်ကဝီၤတၢ်ဃိထံၣ်သ့ၣ်ညါတၢ်ကရၢကရိတဖုလၢအမ့ၢ်(FE5 Thanintharyi)တလါဘၣ်တလါတၢ်ပၥ်ဖျါပူၤအသိးန့ၣ်မ့ၢ်လၢ သုးကီၣ်ကးအသုးကျိၤဟဲထီၣ်,ပၥ်ပနီၣ်ကမျၢၢ်သ့ၣ်တဖၣ်ဒီးဟဲခးလီၤတၢ်ဒီးကဘီယူၤအဃိလီၢ်ကဝီၤဖိအဂၤ(၆၀၀၀၀)ဘျဲၣ်ဘၣ်ပၥ်တ့ၢ်ကွံၥ်အဟံၣ်အဃီဒီးဘၣ်ဃ့ၢ်အိၣ်ကဒုအသးအဂ့ၢ်သ့ၣ်ညါဘၣ်န့ၣ်လီၤ.
သုးကီၣ်ကးအမျိာ်သုးအခိၣ်လၢအတီခိၣ်ရိၣ်မဲနဲၣ်လီၤတၢ်ခးလီၤကျိဖးဒိၣ်အံၤ သိလ့ၣ်တၢ်ဘၣ်ထံးအဃိသံ
လါစဲးပထ့ဘၢၣ် ၄ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)သထူၣ်ကီၢ်ဆၣ်အပူၤ သုးကီၣ်ကး(၃၁၀)အမျိာ်သုး အသုးခိၣ်တဂၤ လၢတီခိၣ်ရိၣ်မဲနဲၣ်လီၤတၢ်ခးလီၤကျိးဖးဒိၣ်ဆူကမျၢၢ်အိၣ်ဆိးလီၢ်အံၤ ဖဲအပူၤကွံာ်စှၤသီအခါခီဖျိသိလ့ၣ်တၢ်ဘၣ်ထံး သတူၢ်ကလာ်ကဲထီၣ်အဃိသံ၀ဲဒၣ်အဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိစံး၀ဲန့ၣ်လီၤႉ ဖဲလါစဲးပထ့ဘၢၣ် ၂ သီ မုၢ်နၤခီ ၁၂ နၣ်ရံၣ်ဃၣ်ဃၣ်အဆၢကတီၢ် သုးကီၣ်ကး(၃၁၄)သုးခိၣ်ဒိၣ်ဖိ နဲၣ်အီၣ်ထိအံၤ ဖဲအ၀ဲလဲၤအီသံးလၢ(KTV)၀ံၤကက့ၤကဒါလၢစွ့ၣ်စ့ၣ်အူ(တည်းခိုခန်း)ဟံၣ်အိၣ်ကဒုလီၢ်က့ၤလၢကျဲအခါ ခီဖျိနုာ်လီၤ ဘျၢၣ်၀ဲ(၆)ပၣ်သိလ့ၣ်လၢ စွ့ၣ်ပခၠံၣ်(ရွှေပန်းချီ)ထံချီဆၢကျးမဲာ်ညါအဃိသံ၀ဲတဘျီဃီဖဲတၢ်ကဲထီၣ် သးအလီၢ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဘၣ်ဃးတၢ်ဂ့ၢ်ကဲထီၣ်သးအခီၣ်ထံးခီၣ်ဘိန့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဂၤစံး၀ဲလၢ“ဖဲလါထီၣ်ခံသီမုၢ်နၤခီ (၁၂) နၣ်ရံၣ်န့ၣ် (စကစ) ၃၁၄ အမျိာ်သုး သုးခိၣ်ဒိၣ်ဖိ နဲၣ်အီၣ်ထိအံၤ တဲ၀ဲလၢၦၤကတီၣ်ထီၣ်အမူဒါလီၢ်လးအဃိ လဲၤမၤ၀ဲဒၣ် မူး(နှုတ်ဆက်ပွဲ)လၢ(Oasis KTV)န့ၣ်မီၤနီၤႉဖဲအမၤပွဲအခါန့ၣ်အီသံးမူၤကဒဲကဒဲတဲအါလိာ်သးဘျီ အနီထီၣ်သိလ့ၣ် ဟးထီၣ်ကက့ၤလၢ(စွ့ၣ်စ့ၣ်အူ)ဟံၣ်အိၣ်ကဒုလီၢ်မီၤနီၤႉဖဲအက့ၤလၢကျဲတုၤ(စွ့ၣ်ပခၠံၣ်)ထံချီဆၢကျးမဲာ်ညါန့ၣ်နုာ်လီၤဘျၢၣ်၀ဲဒၣ်(၆ ပၣ်သိလ့ၣ်)အဃိသံ၀ဲတဘျီဃီဖဲန့ၣ်လီၤ”အဂ့ၢ်န့ၣ် စံး၀ဲန့ၣ်လီၤႉ သုးကီၣ်ကးအသုးခိၣ်ဒိၣ်ဖိ နဲၣ်အီၣ်ထိ လၢအသံတဂၤအံၤန့ၣ် ဖဲသထူၣ်ကီၢ်ဆၣ်(၃၁၄)အမျိာ်သုး သုးရ့ၣ်ခိၣ် တအိၣ်လၢၤဘၣ်လီၢ်ခံန့ၣ် ဘၣ်တၢ်ဟ့ၣ်လီၤအီၤမူဒါတစိၢ်တလီၢ်ဒ်သုးဟီၣ်က၀ီၤအခိၣ်အသိး အဂ့ၢ်န့ၣ် လီၢ်က၀ီၤကမျၢၢ် လၢအိၣ်ဖဲန့ၣ်တဖၣ်စံး၀ဲ န့ၣ်လီၤႉ တကးဒံးဘၣ်ဒ်လီၢ်က၀ီၤကမျၢၢ်စံး၀ဲအသိးန့ၣ်အ၀ဲန့ၣ်မ့ၢ်ၦၤဘၣ်မူဘၣ်ဒါဖးဒိၣ်တဂၤလၢအဟံစုနဲၣ်ကျဲဘၣ်ဃးတၢ် ပညိၣ်ခးလီၤကျိဖးဒိၣ်တကပၤဒီးခီဖျိကျိဖးဒိၣ်အံၤအဃိ(စွ့ၣ်ယီၣ်ပၠး)ကရူၢ်ဒူသ၀ီကမျၢၢ်ဃုာ်ဒီးဖိဒံဖိသၣ်ပိာ်မုၣ်ပိာ်မၢၤသံဘၣ်ဒိဘၣ်ထံးကဲထီၣ်သးတလီၢ်လီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးဖဲတလါအံၤလါစဲးပထ့ဘၢၣ် ၁ သီ ဟါခီအဆၢကတီၢ်စ့ၢ်ကီး...