ပယီၤသုးကီၣ်ကးခးလီၤကျိဖးဒိၣ်အဃိပှၤလီၢ်အိၣ်ကမှံဖိလၢဟဲက့ၤလီၤကမၤဘူၣ်တၢ်တဖၣ်ဘၣ်သံဖိသၣ်ဆံး(၁)ဂၤ,ဘၣ်ဒိ(၅)ဂၤ
လါအီကူး ၁၁ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဒူပျၥ်ယၥ်ကီၢ်ရ့ၣ်သုးက့(၆)ကီးတရံးကီၢ်ဆၣ်ဟီၣ်ကဝီၤအပူၤဖဲတဟါလါအီကူး(၉)သီ ဟါခီ(၄)နၣ်ရံၣ်ဒီး(၅)နၣ်ရံၣ်အဘၢၣ်စၢၤအဆၢကတီၢ်န့ၣ်မ့ၢ်လၢသုးကီၣ်ကးခးလီၤကျိဖးဒိၣ်ဆူထံမူထၣ်သဝီပူၤအဃိပှၤသဝီဖိလၢအဃ့ၢ်အိၣ်ကဒုအသးသ့ၣ်တဖၣ်လၢကဟဲက့ၤလီၤမၤဘူၣ်တၢ်တဖၣ်ဘၣ်သံဝဲဖိသၣ်ဆံးဖိ(၁)ဂၤဒီးဘၣ်ဒိ(၅)ဂၤအဂ့ၢ်သ့ၣ်ညါဘၣ်န့ၣ်လီၤ. ထံမူထၣ်ပှၤသဝီဖိသ့ၣ်တဖၣ်အံၤန့ၣ်ပူၤကွံၥ်သုးကီၣ်ကးတကပၤခးလီၤကျိဖးဒိၣ်အဃိဘၣ်ဃ့ၢ်အိၣ်ကဒုအသးဒီးတလါအံၤမ့ၢ်လၢတၢ်မၤဘူၣ်မၤတီၢ်အဃိဖဲပူၤကွံၥ်စှၤသီအတီၢ်ပူၤအဝဲသ့ၣ်ဟဲက့ၤဝဲလၢအဟံၣ်အဃီလၢကမၤဘူၣ်တၢ်အဂီၢ်ဒီးတၢ်ကဲထီၣ်အသးဒ်အံၤလီၤအဂ့ၢ်ထံမူထၣ်ပှၤသဝီဖိတဂၤစံးဝဲဒၣ်ဒ်အံၤန့ၣ်လီၤ. အဝဲစံးဝဲလၢ "ပှၤလၢအဘၣ်ဒိသ့ၣ်တဖၣ်အံၤန့ၣ်မ့ၢ်ပှၤလၢအလဲၤအိၣ်ကဒုလၢပှၤဘၣ်ကီဘၣ်ခဲအလီၢ်လီၤ. မ့ၢ်လၢပှၤက မၤဘူၣ်အဃိန့ၣ်အဝဲသ့ၣ်က့ၤလီၤဝဲမီၤနီၤ. ဖဲမုၢ်ခီၣ်ထံး,မုၢ်တနံၤခဲကၢးန့ၣ်ပှၤကထီၣ်ဖၠၣ်မီၤနီၤ. အဝဲသ့ၣ်က့ၤလီၤန့ၣ်ပျံၤ တၢ်ဖုးတၢ်လီၤ. အဝဲသ့ၣ်က့ၤလီၤန့ၢ်ဒံးဝဲစှၤသီအတီၢ်ပူၤလီၤ. အဝဲသ့ၣ်မ့ၢ်ဝဲပှၤ(ထံမူထၣ်)သဝီဖိလီၤ. အနီၢ်နီၢ်န့ၣ်အဝဲသ့ၣ် တအိၣ်လၢအဟံၣ်ဒီးအဝဲသ့ၣ်က့ၤလီၤန့ၢ်တစိၢ်ဖိဒီးတၢ်ကဲထီၣ်အသးဒ်န့ၣ်လီၤ. တၢ်တတီၤညါအံၤန့ၣ်တၢ်ဂၢၢ်ထီၣ်တစဲးဖိ ဒီးက့ၤလီၤမၤတၢ်ဒီးအိၣ်လၢပှၢ်ပူၤနါက့ၤန့ၣ်ဟဲက့ၤဝဲမီၤနီၤ. အဝဲသ့ၣ်တဖၣ်ဟဲက့ၤလီၤဖှိၣ်ဒီးတၢ်ကဲထီၣ်အသးဒ်အံၤ န့ၣ်ဘၣ်ဃ့ၢ်ကဒီးဝဲလီၤ. " အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ထံမူထၣ်ပှၤသဝီဖိလၢအဘၣ်ဒိဘၣ်ထံး(၅)ဂၤအကျါပၣ်ဃုၥ်ဖိသၣ်အနံၣ်(၁၀)ဆူဖီလၥ်(၂)ဂၤဒီးဖိသၣ်ဖိဆံလၢအဆူၣ်ကွံၥ်သးတဂၤခီန့ၣ်ကအိၣ်ဖဲတနံၣ်အခိၣ်ဃၢၤအဂ့ၢ်သ့ၣ်ညါဘၣ်အသိးမ့မ့ၢ်လၢပှၤဘၣ်ဒိဘၣ်ထံး(၅)ဂၤအကျါ(၃)ဂၤန့ၣ်ဘၣ်တၢ်ဆှၢအီၤဆူကီၢ်ကၠီၣ်တဲၣ်တကပၤတၢ်ဆါဟံၣ်အဂ့ၢ်သ့ၣ်ညါဘၣ်လၢပှၤလၢအဘူးဒီးအီၤတဂၤအအိၣ်န့ၣ်လီၤ. လၢအန့ၣ်အမဲၥ်ညါထံမူထၣ်သဝီအံၤန့ၣ်သုးကီၣ်ကးတကပၤခးလီၤကျိဖးဒိၣ်ဒ်သိးအံၤန့ၣ်ထီၣ်ဘးလၢအဘျီတဖၣ်အဘျီလံဒီးကတီၢ်ခဲအံၤန့ၣ်ပှၤဒူသဝီဖိသ့ၣ်တဖၣ်အိၣ်တ့ၢ်ဒၣ်ထဲလွံၢ်ပူၤတပူၤလီၤအသိးပှၤဒူသဝီဖိသ့ၣ်တဖၣ်အါဒၣ်တက့ၢ်န့ၣ်ဘၣ်လဲၤဃ့ၢ်အိၣ်ကဒုအသးလၢကီၢ်ပယီၤ-ကီၢ်ကၠီၣ်တဲၣ်ကီၢ်ဆၢပှၤလီၢ်အိၣ်ကမှံဖိအလီၢ်ဒီးဒူသဝီအဂၤသ့ၣ်တဖၣ်အဂ့ၢ် သ့ၣ်ညါဘၣ်စ့ၢ်ကီးန့ၣ်လီၤ. ဘၣ်ဃးဒီးပယီၤသုးကီၣ်ကးလၢအခးလီၤကျိဖးဒိၣ်လၢထံမူထၣ်ဒူသဝီအပူၤအံၤန့ၣ်တၢ်ပၢၢ်ဆၢဖိလၢအိၣ်တၢ်မဲၥ်ညါတဂၤစံးဝဲလၢ "ဖဲမဟါတဟါန့ၣ်အဝဲသ့ၣ်ခးထီၣ်ကျိဖးဒိၣ်ဒီးမဟါနါက့န့ၣ်ခးဝဲမီၤနီၤ. ပယီၤသုးလၢအိၣ်ကီးတရံးအပူၤလၢအမ့ၢ် ဝဲ(၉၇)သုးရ့ၣ်န့ၣ်ခးထီၣ်ဝဲတၢ်လီၤ " အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ. ဒ်န့ၣ်အသိးထံမူထၣ်သဝီအပူၤအံၤဖဲပူၤကွံၥ်လါယူၤလံ(၁၉)သီအနံၤစ့ၢ်ကီးန့ၣ်သုးကီၣ်ကးအအီၣ်စ့ၣ်ယၣ်သုးကျိၤလၢအိၣ်(ရၤမတံ-ကီးတရံး)အ့ၡါကျဲကစၢၢ်ခီၣ်ထံးအံၤခးလီၤကျိဖးဒိၣ်အဃိထံမူထၣ်သဝီဖိဘၣ်ဒိ(၃)ဂၤအကျါပၣ်ဃုၥ်ဖိသၣ် (၂)ဂၤအဂ့ၢ်ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါတ့ၢ်ဝဲအသိးသ့ၣ်ညါန့ၣ်လီၤ.
(၄)သီအတီၢ်ပူၤသုးကီၣ်ကးကျိဖးဒိၣ်ဒီး(ဒြိ)မ့ၣ်ပိၢ်အဃိကမျၢၢ်ဘၣ်သံ(၁)ဘၣ်ဒိ(၃)ဂၤ
လါအီကူး ၁၀ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢချၢၣ်လွံၢ်ထူၣ်ကီၢ်ရ့ၣ်သုးက့(၃), မူကီၢ်ဆၣ်ဟီၣ်ကဝီၤအပူၤစးထီၣ်လၢလါအီကူး(၅)သီတုၤ (၈)သီလၢလွံၢ်သီအတီၢ်ပူၤအံၤခီဖျိပယီၤသုးကီၣ်ကးခးလီၤကျိဖးဒိၣ်ဒီးဟဲတ့ၢ်လီၤမ့ၣ်ပိၢ်ဒီးဒြိသ့ၣ်တဖၣ်အဃိကမျၢၢ်ဘၣ်သံ(၁)တဂၤဒီးဘၣ်ဒိ(၃)ဂၤအဂ့ၢ်ခ့ၣ်အဲၣ်ယူၣ်ထုးထီၣ်ပၥ်ဖျါဝဲဖဲတနံၤအံၤ(၁၀)သီအနံၤန့ၣ်လီၤ. မူကီၢ်ဆၣ်ဟီၣ်ကဝီၤအပူၤပယီၤသုးကီၣ်ကးခီၣ်သုးရ့ၣ်လၢအမ့ၢ်(ခလရ-၇၃)ဒီးပယီၤသုးခီၣ်ချ့သုးရ့ၣ်(ခမရ)လၢအအိၣ်ဖဲ (စွ့ၤဝါ)သုးကလၢၤအပူၤသ့ၣ်တဖၣ်အံၤခးလီၤဝဲ(၁၂၀)မမကျိဖးဒိၣ်အဃိလီၤတဲၥ်ပိၢ်ဖးထီၣ်ဝဲဖဲ(ကၠီၣ်ကၠံပီၣ်)သဝီအပူၤဒီး (ငတိခ့ၤ)သဝီအပူၤအဃိဘၣ်ဒိဝဲပှၤပိၥ်မုၣ်ခံဂၤလၢအသးနံၣ်အိၣ်(၃၄)နံၣ်တဂၤဒီး(၉၅)နံၣ်(၂)ဂၤသ့ၣ်တဖၣ်အံၤနးနးကျံးကျံးအဂ့ၢ်တၢ်ပၥ်ဖျါအပူၤအသိးသ့ၣ်ညါဘၣ်န့ၣ်လီၤ. လၢန့ၣ်အမဲၥ်ညါသုးကီၣ်ကးတကပၤဟဲတ့ၢ်လီၤစ့ၢ်ကီးမ့ၣ်ပိၢ်ဒီးဒြိဖဲ(သ့ၣ်ဖၠူစ့ၣ်)သဝီအပူၤဒီး(သ့ၤနၣ်ကွံ)သဝီပူၤအဃိလီၤတဲၥ်ပိၢ်ဖးဘၣ်သံဝဲ(အူကၠံၤအ့)သးနံၣ်(၆၆)နံၣ်တဂၤဒီးဘၣ်ဒိစ့ၢ်ကီးဝဲ(အူတ့ၤထူ)တဂၤအဂ့ၢ်သ့ၣ်ညါဘၣ်န့ၣ်လီၤ. ဘၣ်ဃးဒီးကမျၢၢ်ပှၤလၢဘၣ်ဒိဘၣ်ထံးသ့ၣ်တဖၣ်ခီန့ၣ်လီၢ်ကဝီၤပှၤဘၣ်မူဘၣ်ဒါသ့ၣ်တဖၣ်ကွၢ်ထွဲကဟုကယၥ်ဒီးဆှၢဝဲလၢတၢ်ဆါဟံၣ်အဂ့ၢ်မူကီၢ်ဆၣ်အပှၤကတိၤတၢ်ပၢသရၣ်စီၤစံးပတြၢၤစံးဝဲလၢ "တကီၢ်ခါခဲအံၤန့ၣ်ပှၤလၢဘၣ်ဒိဘၣ် ထံးသ့ၣ်တဖၣ်န့ၣ်တၢ်လဲၤဆှၢအဝဲသ့ၣ်လၢပှဲၤလိၥ်ကျိမုၢ်ထီၣ်ဆူၣ်ချ့မၤစၢၤဝဲၤကျိၤတၢ်ဆါဟံၣ်မီၤနီၤ. သုးကီၣ်ကးသ့ၣ် တဖၣ်တကီၢ်ခါတၢ်အိၣ်သးခဲအံၤန့ၣ်ခး လီၤကျိဖးဒိၣ်ကိးနံၤဒဲးလီၤ."အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. တကးဒံးဘၣ်မူကီၢ်ဆၣ်ဟီၣ်ကဝီၤအပူၤလၢတၢ်ကစိၥ်ဆှၢန့ၢ်ဝဲပှၤလီၢ်အိၣ်ကမှံဖိသ့ၣ်တဖၣ်ကသံၣ်ကသီဒီးတၢ်အီၣ်တၢ်အီအဂီၢ်ကျဲတၢ်ခီတၢ်ခဲအိၣ်ဒံးဝဲဒၣ်အဂ့ၢ်သရၣ်စီၤစံးပတြၢၤစံးအါထီၣ်ဝဲဒၣ်န့ၣ်လီၤ. "တၢ်ဆီၣ်ထွဲမၤစၢၤဘၣ်ဃးဒီးလၢတၢ်အိၣ်ဆူၣ်အိၣ်ချ့ခီန့ၣ်ဒုတၢ်ကီတၢ်ခဲအိၣ်ဝဲလၢကသံၣ်ကသီဒီးတၢ်လိၣ်အဖီခိၣ်သ့ၣ်တဖၣ်မီၤနီၤ. တၢ်လဲၤပှ့ၤအီၤဒီးတၢ်ဆှၢအီၤကီခဲဝဲဒၣ်လၢကျဲလၢသုးကီၣ်ကးအသုးကလၢၤအိၣ်ဝဲသ့ၣ်တဖၣ်မီၤနီၤ. ပပှ့ၤ ကသံၣ်ကသီလၢဝ့ၢ်ပူဒီးကဆှၢအီၤလၢအိၣ်အလီၢ်(တၢ်လီၢ်အဂၤ)န့ၣ်တၢ်ကီတၢ်ခဲအိၣ်လီၤ. အဃိန့ၣ်လၢတၢ်ကွၢ်ဝဲပှၤဘၣ် ဒိဘၣ်ထံးသ့ၣ်တဖၣ်အဂီၢ်န့ၣ်တၢ်ကီတၢ်ခဲဒ်န့ၣ်အိၣ်ဝဲလီၤ." အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဒ်န့ၣ်အသိးချၢၣ်လွံၢ်ထူၣ်ကီၢ်ရ့ၣ်အံၤလၢခ့ၣ်အဲၣ်ယူၣ်တၢ်ပၢဟီၣ်ကဝီၤအကျါမ့ၢ်ဝဲကီၢ်ရ့ၣ်တဘ့ၣ်လၢပှၤလီၢ်အိၣ်ကမှံဖိအနီၣ်ဂံၢ်နီၣ်ဒွးအါကတၢၢ်အသိးခီဖျိလၢဘၣ်ကွၢ်ဆၢၣ်မဲၥ်ဘၣ်ဝဲထံဒိၣ်နိယွၤတၢ်ဂ့ၢ်ကီသ့ၣ်တဖၣ်အဃိမူကီၢ်ဆၣ်ဃုၥ်ဒီးလၢၢ်ဒိၣ်ကီၢ်ဆၣ်,ဆီထံးကီၢ်ဆၣ်တဖၣ်လိၣ်ဘၣ်ဝဲတၢ်ဆီၣ်ထွဲမၤစၢၤအဂ့ၢ်ခ့ၣ်အဲၣ်ယူၣ်ထုးထီၣ်ပၥ်ဖျါတ့ၢ်ဃၥ်ဝဲဖဲအပူၤန့ၣ်လီၤ.
ကစၢၢ်ဒိၣ်ကီၢ်ဆၣ်(ပၠံၣ်ဖၠိထိ)ခီပနံၥ်လၢအမၤသကိးတၢ်ဒီးသုးကီၣ်ကးအံၤတၢ်ဒွဲၣ်အူအီၣ်ကွံၥ်ဝဲ
လါအီကူး ၉ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဘျံးဒဝဲၢ်ကီၢ်ရ့ၣ်ကစၢၢ်ဒိၣ်ကီၢ်ဆၣ်ကျဲမုၢ်ထံးဟီၣ်ကဝီၤဒိၣ်အပူၤဖဲအပူၤကွံၥ်လါအီကူး(၆) သီအနံၤမုၢ်ဃ့ၢ်လီၤအဆၢကတီၢ်ပၠံၣ်ဖၠိထိခီပနံၥ်တဖျၢၣ်လၢအမၤသကိးတၢ်ဒီးသုးကီၣ်ကးအံၤန့ၣ်ကညီတၢ်ထူၣ်ဖျဲးသုးမုၢ်ဒိၣ်ဒီးတၢ်ပၢၢ်ဆၢသုးပၥ်ဖှိၣ်သ့ၣ်တဖၣ်နုၥ်လီၤဒွဲၣ်အူအီၣ်ကွံၥ်ဝဲဒၣ်အဂ့ၢ်သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ. (ပၠံၣ်ဖၠိထိ)ခီပနံၥ်လၢအမ့ၢ်(အူလၣ်သၢ)အခီပနံၥ်ဝဲအံၤန့ၣ်လၢကဟူးဂဲၤလဲၤတရံးသးအဂီၢ်သုးကီၣ်ကးတကပၤဟဲထီၣ်ဟံးန့ၢ်စၢၤဝဲတၢ်ဒီသဒၢလၢခီပနံၥ်ဝဲအံၤအဂီၢ်ဒီးခီဖျိလၢအသုးရ့ၣ်ခိၣ်ဘၣ်ဒီးမ့ၣ်ပိၢ်အဃိဂုၥ်လီၤက့ၤဝဲအခံဝံၤလီၢ်ခံကညီဒီကလုၥ်တၢ်ထူၣ်ဖျဲးသုးမုၢ်ဒိၣ်ဒီးတၢ်ပၢၢ်ဆၢသုးပၥ်ဖှိၣ်သ့ၣ်တဖၣ်နုၥ်လီၤဒွဲၣ်အူကွံၥ်ဝဲအဂ့ၢ်ကစၢၢ်ဒိၣ်ကီၢ်ဆၣ်ပှၤဘၣ်မူဘၣ်ဒါစံးဝဲန့ၣ်လီၤ. "တၢ်ဂ့ၢ်အခီၣ်ထံးန့ၣ်မ့ၢ်ဝဲဒ်အံၤလီၤ. ဒုၣ်ဒါလၢဟဲနုၥ်လီၤဟံးန့ၢ်က့ၤတၢ်ဖဲန့ၣ်ဒီးဟဲခိးတၢ်ဖဲန့ၣ်သ့ၣ်တဖၣ်န့ၣ်ဖဲလါအီကူး(၆) သီအနံၤဂီၤခီ(၆)နၣ်ရံၣ်ဘျဲၣ်အဆၢကတီၢ်န့ၣ်အသုးရ့ၣ်ခိၣ်န့ၣ်ဘၣ်ဒီးမ့ၣ်ပိၢ်အဃိသးန့ၣ်အဝဲသ့ၣ်ဂုၥ်က့ၤဝဲအခံဝံၤအလီၢ်ခံန့ၣ်တၢ်လီၢ်ဝဲန့ၣ်ပှၤသ့ၣ်ညါအီၤလၢဒုၣ်ဒါတၢ်လီၢ်အဃိပှၤဒွဲၣ်အူအီၣ်ကွံၥ်ဝဲဒ်န့ၣ်မီၤနီၤ. အဂ့ၢ်စံးဘၣ်ခ့ၣ်အဲးစံၣ်-ကညီတၢ် ကစီၣ်န့ၣ်လီၤ. တချုးဒံးလၢတၢ်ဒွဲၣ်အူအီၣ်ကွံၥ်ဝဲ(ပၠံၣ်ဖၠိထိ)ခီပနံၥ်တၢ်မၤလီၢ်အံၤဘၣ်န့ၣ်ပှၤမၤတၢ်ဖိသ့ၣ်တဖၣ်လၢအိၣ်ခီပနံၥ်တၢ်မၤလီၢ်အပူၤသ့ၣ်တဖၣ်တၢ်မၤကီမၤခဲအီၤတအိဘၣ်ဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်ဒီးတၢ်ပၢၢ်ဆၢဖိတဖၣ်ပျဲက့ၤဝဲခဲလၢၥ်အဂ့ၢ်သ့ၣ်ညါဘၣ်န့ၣ်လီၤ. လၢန့ၣ်အမဲၥ်ညါဟီၣ်ခိၣ်ကပံၥ်တၢ်လီၢ်တၢ်ကျဲလၢ(ပၠံၣ်ဖၠိထိ)ခီပနံၥ်ဟံန့ၢ်ပၢဝဲသ့ၣ်တဖၣ်အံၤတုၤမ့ၢ်တၢ်အိၣ်သးမ့ၢ်ဟဲဘၣ်ဂ့ၢ်ဘၣ်ဝီထီၣ်က့ၤဝဲန့ၣ်တၢ်တိၥ်ပၥ်အိၣ်ဝဲလၢတၢ်ကဘၣ်ဟ့ၣ်လီၤက့ၤဝဲဆူကမျၢၢ်ထံဖိကီၢ်ဖိအအိၣ်ခဲလၢၥ်လီၤအဂ့ၢ်ကီၢ်ဆၣ်အပှၤဘၣ်မူဘၣ်ဒါစံးဝဲန့ၣ်လီၤ. (ပၠံၣ်ဖၠိထိ)ခီပနံၥ်ဝဲအံၤန့ၣ်အိၣ်သူၣ်လီၤအသးဖဲဘျံးဒီးဒဝဲၢ်ဝ့ၢ်အဘၢၣ်စၢၤဖဲ(နိၣ်ဖးဒိၣ်)သဝီဟီၣ်ကဝီၤအပူၤန့ၣ်လီၤ. ဒီးမ့ၢ် ဝဲခီပနံၥ်တဖျၢၣ်လၢအိၣ်ဒီး(ရီဘၢၣ်)ကျီးဒီး(တိၣ်ရ့ၣ်ကဲဆဲး)ဟီၣ်ခိၣ်လီၢ်(အ့ကၣ်)လၢအကထိဘျဲၣ်ဒီးအကျါဟံန့ၢ်ဆူၣ်ဝဲကမျၢၢ်ဟီၣ်ခိၣ်လီၢ်ပၥ်ဃုၥ်အဂ့ၢ်လီၢ်ကဝီၤအပှၤဘၣ်မူဘၣ်ဒါစံးဝဲအသိးသ့ၣ်ညါဘၢ်န့ၣ်လီၤ. ဒ်န့ၣ်အသိးပယီၤသုးကီၣ်ကးအံၤစးထီၣ်လၢလါအီကူး(၁)သီတုၤ(၅)သီအတီၢ်ပူၤပယီၤသုးလၢဟဲထီၣ်လူၤက့ၤဝဲ(ပၠံၣ်ဖၠိထိ)ခီပနံၥ်တၢ်မၤလီၢ်လၢအအိၣ်ဖဲ(နိၣ်ဖးဒိၣ်)သဝီအပူၤအံၤန့ၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးတၢ်ပၢၢ်ဆၢသုးပၥ်ဖှိၣ်သ့ၣ်တဖၣ်ခိးခးဝဲလၢတၢ်ဘၢၣ်စၢၤအဃိလၢခံခီခံကပၤတၢ်ဒုးကဲထီၣ်တ့ၢ်သးအသိးသုးကီၣ်ကးတကပၤသံဘၣ်ဒိဘၣ်ထံးတစှၤန့ၢ်(၁၀)ဂၤဘၣ်အဂ့ၢ်သ့ၣ်ညါဘၣ်န့ၣ်လီၤ.
သုးကီၣ်ကးကဘီယူၤဆှၢထီၣ်တၢ်အီၣ်ဘိၣ်ဒီးတၢ်ပီးတၢ်လီတဖၣ်ဆူဝီၢ်ရ့ၣ်ဟီၣ်ကဝီၤအသုးကလၢၤတဖၣ်အပူၤအါထီၣ်
လါအီကူး ၉ သီ, ၂၀၂၄နံၣ်, ခ့ၣ်အဲးစံၣ် ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်,ဝီၢ်ရ့ၣ်ကီၢ်ဆၣ်အပူၤ,သုးကီၣ်ကးအကဘီယူၤဆှၢထီၣ်ဝဲတၢ်အီၣ်တၢ်အီဘိၣ်ဒီးတၢ်ပီးတၢ်လီတဖၣ်လၢအသုးကလၢၤတဖၣ်အပူၤအါထီၣ်ဝဲအဂ့ၢ်,ကီၢ်ဆၣ်ပှၤဘၣ်မူဘၣ်ဒါတဖၣ်စံးဝဲန့ၣ်လီၤ. စးထီၣ်ဖဲအပူၤကွံၥ်လါယူၤလံ(၂၅)သီတုၤလၢတလါအံၤလါအီကၢးအပူၤ,သုးကီၣ်ကးအကဘီယူၤဆှၢထီၣ်ဝဲတၢ်အီၣ်ဘိၣ်ဒီးတၢ်ပီးတၢ်လီတဖၣ်ဆူအသုးကလၢၤအပူၤအိၣ်ဝဲတယူၥ်ဃီဒီးတၢ်ဒုးဆဲးပြဲးကဲထီၣ်ဝဲလၢနိၣ်ခၠိနဲၣ်ပယီၤသုးကလၢၤတကပၤအိၣ်ဝဲအဂ့ၢ်,ဝီၢ်ရ့ၣ်ကီၢ်ဆၣ်ပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“(၂၀၂၄)လါမးရှးအတီၢ်ပူၤ,သုးကီၣ်ကးကဘီယူၤဟဲဝဲအဖၢမုၢ်ဒီးနိၣ်ခၠိၣ်နဲၣ်အသုးကလၢၤခိၣ်ဃၢၤတဖၣ်န့ၣ်ပကတဲလၢတၢ်ဒုးတၢ်ယၤအိၣ်မီၤနီၤ.ဒီးတုၤဃီၤကဒီးလၢလါအ့ဖြ့ၣ်လါမ့ၤလါယူၤတခီသုးကီၣ်ကးကဘီယူၤန့ၣ်လီၤဘူကဒါက့ၤဝဲလီၤ.ဘၣ်ဆၣ်ဟဲဝဲတဘျီတခီၣ်လၢတၢ်ဆှၢတၢ်အီၣ်ဘိၣ်ဒီးတၢ်ပီးတၢ်လီတဖၣ်ဒုအိၣ်ဝဲန့ၣ်လီၤ.မ့မ့ၢ်လၢနုၥ်လီၤက့ၤလၢလါယူၤလံ(၂၅)သီအလီၢ်ခံတုၤလၢခဲအံၤဒုဟဲအါထီၣ်ကဒါက့ၤဝဲတပယူၥ်ဃီန့ၣ်လီၤ.အဃိန့ၣ်နိၣ်ခၠိနဲၣ်တကပၤန့ၣ်ဖဲလါအီကူး(၁)သီဒီး(၂)သီန့ၣ်တၢ်ဒုးဆဲးပြဲးကဲထီၣ်ကဒါက့ၤတဘျီခံဘျီဒံးအဂ့ၢ်”စံးဝဲဒၣ်န့ၣ်လီၤ. လၢန့ၣ်အမဲၥ်ညါ,သုးကီၣ်ကးကဘီယူၤအံၤဆှၢဃီၤဝဲတၢ်အီၣ်ဆူနိၣ်ခၠိၣ်နဲၣ်,တကူၣ်တၢၣ်ဒီးဇံဖၠူၤကိအသုးကလၢၤတဖၣ်အပူၤအိၣ်ဝဲဘၣ်ဆၣ်မ့မ့ၢ်လၢလိးရှါအသုးကလၢၤတကပၤတခီတဆှၢခီဝဲတၢ်အီၣ်ဘိၣ်ဒီးတၢ်ပီးတၢ်လီဘၣ်အဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲန့ၣ်လီၤ. တကးဒံးဘၣ်,သုးကီၣ်ကးအံၤမၤအါထီၣ်ဝဲအသုးဂံၢ်ဘါလၢဟီၣ်ခိၣ်မဲၥ်ဖံးခိၣ်တကပၤအိၣ်စ့ၢ်ကီးဝဲဒီး(KNLA )တၢ်ပၢၢ်ဆၢသုးပၥ်ဖှိၣ်ခိးတြီတံၥ်ဃၥ်အဝဲသ့ၣ်တဖၣ်အိၣ်ဝဲအဃိ,ဒ်သိးဆှၢထီၣ်ဝဲတၢ်အီၣ်ဒီးတၢ်ပီးတၢ်လီကန့ၢ်လၢအသုးကလၢၤအပူၤကန့ၢ်အဂီၢ်,ဘၣ်သူဝဲလၢကဘီယူၤလီၤအဂ့ၢ်(KNLA )ပှၤဘၣ်မူဘၣ်ဒါတဖၣ်စံးဝဲန့ၣ်လီၤ. တကတီၢ်ဃီ,သုးကီၣ်ကးတဖၣ်အံၤ,လၢကဒီသဒၢအသုးကလၢၤအဂီၢ်,ခးလီၤလီၤကျိဖးဒိၣ်ဆူခိၣ်ဃၢၤကမျၢၢ်ဒူသဝီတဖၣ်အပူၤအိၣ်ဝဲအသိး,(KNLA)တကပၤက့ၤခးဆၢကဒါအဝဲသ့ၣ်တဖၣ်အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ. ဒ်န့ၣ်အသိး,တကီၢ်ခါခဲအံၤ,နိၣ်ခၠိၣ်နဲၣ်ဒီးလိးရှါပယီၤသုးကလၢၤတဖၣ်အပူၤ,သုးကီၣ်ကးအိၣ်ဆိးဝဲအဃိကမျၢၢ်လီၢ်ကဝီၤဖိတဖၣ်ဘၣ်ဃ့ၢ်အိၣ်ဝဲကဒုဝဲအသးအိၣ်ဝဲဒီးတက့ၤအိၣ်ဆိးဘၣ်လၢအနီၢ်ကစၢ်တၢ်လီၢ်တၢ်ကျဲဒံးဘၣ်အိၣ်ဝဲအမဲၥ်ညါ,တနီၤအဟံၣ်ဃီအူအီၣ်ကွံၥ်ဝဲအီၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
၂၀၂၃ ပဒိၣ်မါရှၤလါဖါသးစၢ်ခိၣ်နၢ်ဖိခိၣ်ဖးအဂီၢ် ၦၤဟူးဂဲၤထံရူၢ်ကီၢ်သဲးစီၤအဲလ်ဘၢၣ်ခၠိၤဒိးန့ၢ်ဘၣ်၀ဲ
လါအီကူာ် ၉ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ နဲၣ်ရွဲၣ်ခိၣ်ကျၢၢ်လီၢ်လံၤ ပဒိၣ်မါရှၤလါဖါသးစၢ်ခိၣ်နၢ်ဖိခိၣ်ဖးအံၤ ၂၀၂၃ နံၣ် အဂီၢ် ၦၤဟူးဂဲၤထံရူၢ်ကီၢ်သဲးဖိစီၤအဲလ်ဘၢၣ်ခၠိၤဒိးန့ၢ်ဘၣ်၀ဲအဂ့ၢ်န့ၣ် (Phan Foundation)ထုးထီၣ်ဘိးဘၣ်ရၤလီၤ၀ဲလၢအ (facebook page)ပူၤဖဲတနံၤအံၤလါအီကူာ် ၉ သီအနံၤန့ၣ်လီၤႉ စီၤအဲလ်ဘၢၣ်ခၠိၤလၢအဒိးန့ၢ်ဘၣ်ခိၣ်ဖးအံၤတကီၢ်ခါမ့ၢ်သးစၢ်တဂၤလၢအဟူးဂဲၤလၢကညီထံရူၢ်ကီၢ်သဲးတၢ်ဖံးတၢ်မၤပူၤတဂၤအသိးလၢကညီသးစၢ်ကရၢ(KYO)ကရူၢ်တကပၤစ့ၢ်ကီးမ့ၢ်၀ဲဒၣ်ခိၣ်နၢ်တဂၤဒီးဒ်န့ၣ်အသိးစးထီၣ်(၂၀၂၁) သုးဟံန့ၢ် တၢ်စိတၢ်ကမီၤလီၢ်ခံန့ၣ်အ၀ဲနုာ်ပၣ်ဃုာ်၀ဲဒၣ်လၢတၢ်ထီဒါသုးမီၤစိရိၤတၢ်ဟူးတၢ်ဂဲၤပူၤဒီတကတီၢ်တုၤလၢ ခဲအံၤတစု အဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢတၢ်တပာ်သူၣ်ပာ်သးအပူၤဒိးန့ၢ်ဘၣ်ခိၣ်ဖးအဖီခိၣ်ကဲထီၣ်တၢ်သူၣ်ဒူသးဒူလၢခါဆူညါတၢ်ဖံးတၢ်မၤတၢ်ဟူးတၢ်ဂဲၤ အပူၤဒိၣ်မးဒီးတကးဒံးဘၣ်ၦၤကလုာ်ကတုၤလၢဖီတၢၣ်အဂီၢ်တသ့ဖဲအသ့ကပာ်ဖှိၣ်မၤသကိးတၢ်အဂ့ၤကတၢၢ်အဂ့ၢ်န့ၣ် စီၤအဲလ်ဘၢၣ်ခၠိၤ လၢအဒိးန့ၢ်ဘၣ်(Phan Foundation)ခိၣ်ဖးအံၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤ န့ၣ်လီၤႉ အ၀ဲစံး၀ဲလၢ“လၢတၢ်တမုၢ်လၢ်အပူၤယဒိးန့ၢ်ဘၣ်ခိၣ်ဖးတခါအံၤအဖီခိၣ်လၢတၢ်မၤတၢ်လၢတၢ်ဖံးတၢ်မၤဘၣ်ဃးတၢ်ဟူးဂဲၤကညီသးစၢ်တၢ်ဖံးတၢ်မၤမ့ၢ်ဂ့ၤဒီးတၢ်ပၣ်ဃုာ်မၤသကိးတၢ်လၢတၢ်ပၢၢ်ဆၢတၢ်ဖံးတၢ်မၤပူၤမ့ၢ်ဂ့ၤန့ၣ်ကဲထီၣ်တၢ်သူၣ်ခုသးခုတၢ်သူၣ်ဒူသးဒူလၢယဂီၢ်ဒိၣ်မးလီၤႉတၢ်လၢယအဲၣ်ဒိးတဲန့ၣ်ယမၤန့ၢ်ဘၣ်ခိၣ်ဖးတခါအံၤန့ၣ်ယပာ်ကဖၢ လၢယသးလီၤ ဘၣ်ဆၣ်ယပာ်အီၤလၢတမ့ၢ်ယတၢ်ဘၣ်ႉခီဖျိယမၤယၦၤကလုာ်အတၢ်ဖံးတၢ်မၤဒီးယၦၤကလုာ်ပာ် ပနီၣ်ယၤလီၤ မီၤနီၤႉ တၢ်တခါအံၤမ့ၢ်မူဒါဒီးခါဆူညါယကဘၣ်အိၣ်မူဂ့ၤထီၣ်ႇဂုာ်ကျဲးစၢးအါထီၣ်ဒီးဒ်သိးၦၤကလုာ် ကတုၤလၢဖီတၢၣ်အဂီၢ်န့ၣ် တၢ်လၢယမၤသ့န့ၣ်ယကမၤအဂ့ၤကတၢၢ်လီၤ”အဂ့ၢ်န့ၣ် စံး၀ဲန့ၣ်လီၤႉ စီၤအဲလ်ဘၢၣ်ခၠိၤအံၤ အပူၤကွံာ်(၂၀၁၉) လါအီကူာ် ၁၂ သီအနံၤ ခီဖျိအ၀ဲဒီးအသကိးခံဂၤမၤ၀ဲဒၣ်ကညီမၤထူရၤ မုၢ်နံၤတၢ်ရဲၣ်တၢ်ကျဲၤဖဲ၀့ၢ်တကူၣ်(မဟၤဘၤဒူၣ်လၣ်)ဖီကရၢၢ်မဲာ်ညါအဃိ ဘၣ်တၢ်ဖီၣ်အ၀ဲသ့ၣ်လၢပယီၤပၢၤကီၢ်သုး ဒီးဖဲန့ၣ်တၢ်ဒုးဃာ်အ၀ဲသ့ၣ်လၢ(အ့ၣ်စ့ၣ်)ဃိာ်ပူၤ ၁၇ သီဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ ပဒိၣ်မါရှၤလါဖါသးစၢ်ခိၣ်နၢ်ဖိခိၣ်ဖးအံၤတၢ်လီၢ်တပူၤဂ့ၤတပူၤကဘၣ်မ့ၢ်ကညီသးစၢ်လၢသးနံၣ်အိၣ်(၃၅)နံၣ်ဆူဖီလာ် အသိးကဘၣ်မ့ၢ်လၢအဂဲၤလိာ်တၢ်လၢၦၤကလုာ်တၢ်လဲၤထီၣ်လဲၤထီအဂီၢ်ဒီးခိၣ်ဖးအံၤတနံၣ်တဘျီဘၣ်တၢ်ဃုထၢ ဟ့ၣ်လၤ ကပီၤ၀ဲကိးမုၢ်နံၣ်ဒဲးအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဘၣ်ဃး(၂၀၂၃)သးစၢ်ခိၣ်နၢ်ဖိခိၣ်ဖးလၢတၢ်ဃုထၢ၀ဲဘျီ၀ဲအံၤန့ၣ် ပဒိၣ်မါရှၤလါဖါအဖိမုၣ်ဒိၣ် နၣ်ဘွါဘွါဖါ စံး၀ဲလၢ “ပပာ်ပနီၣ်၀ဲဒၣ်စီၤအဲလ်ဘၢၣ်ခၠိၤအတၢ်ဖံးတၢ်မၤတၢ်ဟူးတၢ်ဂဲၤသ့ၣ်တဖၣ်ဒီးပသးခုဒိၣ်မးလၢပဟ့ၣ်ဘၣ်အီၤပဒိၣ်မါရှၤ...
ကမၤပူၤဖျဲးကီၢ်ပယီၤအဂီၢ်,ကျဲထဲတဘိန့ၣ်ကဘၣ်ဒုးလီၤပှီၢ်ကွံၥ်သုးမီၤစိရိၤခဲလၢၥ်အသနူအဂ့ၢ်,(KNU)ဆီၣ်တခူထီၣ်ဝဲဖဲ(၈)လွံၢ်ဖျၢၣ်တၢ်ဟူးတၢ်ဂဲၤမုၢ်နံၤ
လါအီကူး ၈သီ, ၂၀၂၄နံၣ်, ခ့ၣ်အဲးစံၣ်, ကမၤပူၤဖျဲးထီၣ်ကွံၥ်ကီၢ်ပယီၤထံကီၢ်လၢတၢ်တတၢၥ်တနါအပူၤအဂီၢ်,ကျဲထဲတဘိန့ၣ်ကဘၣ်မၤလီၤပှီၢ်ကွံၥ်သုးမီၤစိရိၤခဲလၢၥ်သနူအဂ့ၢ်,(KNU)ဆီၣ်တခူစံးဝဲလၢအလံၥ်ဟ့ၣ်ယုၢ်အပူၤဖဲတနံၤအံၤလါအီးကူး(၈)သီအနံၤ,လၢအလီၤဘၣ်ဝဲ(၈)လွံၢ်ဖျၢၣ်ဒံၣ်မိၣ်ကရ့ၣ်စံၣ်အတၢ်ဟူးတၢ်ဂဲၤမုၢ်နံၤပှဲၤထီၣ်(၃၆)ဝီတဝီအနံၤန့ၣ်လီၤ. ပကအုၣ်က့ၤထံကီၢ်တဘ့ၣ်အံၤအဂီၢ်,ပကဘၣ်ဒုးလီၤမၢ်ကွံၥ်သုးမီၤစိရိၤသနူလၢကီၢ်တဘ့ၣ်အံၤအပူၤအဃိ,ပကဖီၣ်လိၥ်စုမၤသကိးတၢ်တဂၤလၢလီၢ်သနၢၣ်အဂီၢ်ဟ့ၣ်ဂံၢ်ဟ့ၣ်ဘါဆီၣ်တခူဝဲတၢ်ပၢၢ်ဆၢပှၤမၤသကိးတၢ်တဖၣ်ကိးဂၤအဂ့ၢ်,ခ့ၣ်အဲၣ်ယူၣ်ပှၤကတိၤတၢ်ပၢပဒိၣ်စီၤကျၢၤစ့စံးဝဲဒ်အံၤန့ၣ်လီၤ. အဝဲစံးဝဲလၢ“ပကအုၣ်က့ၤခီၣ်က့ၤထံကီၢ်အဝဲအံၤန့ၣ်ကျဲအိၣ်ဝဲထဲတဘိလၢပကဘၣ်မၤလီၤမၢ်ကွံၥ်သုးမီၤစိရိၤသနူလၢထံကီၢ်တဘ့ၣ်အံၤအပူၤန့ၣ်လီၤ.အဃိန့ၣ်လၢပကမၤလီၤမၢ်သုးမီၤစိရိၤလၢထံကီၢ်အံၤအပူၤအဂီၢ်,ပကဘၣ်မၤသကိးတၢ်,တဂၤလၢလီၢ်သနၢၣ်ဒၣ်ပဝဲအသိး,လီၤဆီဒၣ်တၢ်ဒ်(ABSDF)ကရၢသ့ၣ်တဖၣ်နါက့ကပၥ်ဖှိၣ်မၤသကိးတၢ်ကသ့အါထီၣ်အဂီၢ်ပဟ့ၣ်ဂံၢ်ဟ့ၣ်ဘါဝဲပဒီပုၢ်ဝဲၢ်ပှၤပၢၢ်ဆၢတၢ်တဖၣ်ခဲလၢၥ်လီၤ.ဒီးခါဆူညါပကဟ့ၣ်လီၤပသးဆူၣ်ထီၣ်ဒ်သိးပတၢ်မိၣ်န့ၢ်သးလီကတုၤထီၣ်လၢပတၢ်ပညိၣ်ဖီတၢၣ်အဂီၢ်အဂ့ၢ်”စံးဝဲဒၣ်န့ၣ်လီၤ. ဒ်ခ့ၣ်အဲၣ်ယူၣ်လံၥ်ဟ့ၣ်ယုၢ်အိၣ်ဝဲအသိးန့ၣ်“မီၤစိရိၤလၢမုၢ်မဆါတနံၤသ့ၣ်တဖၣ်အံၤ,အပူၤကွံၥ်မၤဝဲတပၣ်တံၣ်မီၤစိရိၤသနူတၢ်ဟ့ၣ်ခီဝဲပှၤလၢကဆဲးဟံထီၣ်ဖီၣ်ထီၣ်က့ၤအလီၢ်တစိၤဘၣ်တစိၤဒီးဒုးမၤပိၥ်ထွဲဝဲကျဲလၢအကမၣ်အံၤတပယူၥ်ဃီအိၣ်ဝဲအဃိ,ကီၢ်ပယီၤထံကီၢ်အံၤလီၤဘၣ်ဝဲတၢ်တတၢၥ်တနါအပူၤန့ၣ်လီၤ.ခီဖျိသုးမီၤစိရိၤတဖၣ်အံၤတစိၤဘၣ်တစိၤပိၥ်ထွဲဝဲကျဲလၢကမၣ်ဒီးမၤဝဲတၢ်ကမၣ်သ့ၣ်တဖၣ်အိၣ်ဝဲအဃိ,တၢ်တဘၣ်ဆဲးဟ့ၣ်ခွဲးယၥ်လၢကဆဲးမၤဝဲလၢခါဆူညါလၢၤဘၣ်အဖီခိၣ်,ပဝဲကဘၣ်မၤကတၢၢ်ကွံၥ်မီၤစိရိၤသနူအံၤသပှၢ်ကတၢၢ်လီၤ”အဂ့ၢ်,ပၥ်ဖျါဝဲဒၣ်န့ၣ်လီၤ. လၢန့ၣ်အမဲၥ်ညါ,လၢတၢ်ကမၤလီၢ်ပှီၢ်ကွံၥ်သုးမီၤစိရိၤသနူဒီးကသူၣ်ထီၣ်ဝဲဖဲၣ်ဒရဲၣ်ဒံၣ်မိၣ်ကရ့ၣ်စံၣ်ကီၢ်စၢဖှိၣ်အဂီၢ်န့ၣ်,ပကဘၣ်ပၥ်ဖှိၣ်မၤသကိးတၢ်ဒီးကမျၢၢ်ထံဖိကီၢ်ဖိသ့ၣ်တဖၣ်အမဲၥ်ညါ,ပကဘၣ်နုၥ်လီၤဂဲၤလိၥ်ပၢၢ်ဆၢသကိးတၢ်လၢလီၢ်ကျဲသနၢၣ်ဒၣ်ဝဲကိးကပၤဒဲးအဂ့ၢ်,(KNU)ဆီၣ်တခူစံးစ့ၢ်ကီးဝဲဒၣ်န့ၣ်လီၤ. တကးဒံးဘၣ်,ဖဲမီၤစိရိၤအခိၣ်အူန့ၤဝ့တီခိၣ်ရိၢ်မဲဝဲတပၣ်တံၣ်(မီၤစိရိၤ)အဆၢကတီၢ်,မၤကမၣ်ဝဲတၢ်ပၢတၢ်ြပး,မုၢ်ကျိၤဝဲၤကွၥ်ဒီးတၢ်ရ့လိၥ်မုၥ်လိၥ်တၢ်ဖံးတၢ်မၤအကျဲသနူတဖၣ်အဃိ,ကီၢ်ပယီၤထံကီၢ်အံၤလီၤဝဲတုၤလၢကဲထီၣ်က့ၤဟီၣ်ခိၣ်ဒီဖျၢၣ်ထံကီၢ်လၢအဖှီၣ်အယၥ်ဒိၣ်ကတၢၢ်ပတီၢ်အိၣ်ဝဲဒၣ်န့ၣ်လီၤ. လၢတၢ်န့ၣ်အဃိ,လၢတၢ်ကဘျါရှဲဝဲထံကီၢ်တၢ်ကီတၢ်ခဲတဖၣ်အဂီၢ်,ကီၢ်ပယီၤကၠိဖိတဖၣ်တီခိၣ်ရိၢ်မဲဃ့ထီၣ်ဝဲ(ဒံၣ်မိၣ်ကရံၣ်စံၣ်)ဒီးစးထီၣ်မၤဝဲတၢ်ဟူးတၢ်ဂဲၤကဲထီၣ်အသးအံၤမ့ၢ်ဝဲစံၣ်စိၤနုၥ်တၢ်ပနီၣ်တခါလၢထံဖိကီၢ်ဖိကမျၢၢ်တဖၣ်သးပ့ၤနီၣ်အီၤတသ့ဘၣ်အသိး,ကၠိဖိတဖၣ်အံၤမ့ၢ်ဝဲပှၤလၢအနုၥ်လီၤဝဲဒၣ်လၢတၢ်ပၢၢ်ဆၢဟီၣ်ကဝီၤအပူၤဒီးပှၤလၢအတူၢ်လိၥ်ဝဲဖဲၣ်ဒရဲၣ်ကျဲသနူအံၤမ့ၢ်ဝဲပှၤ(၈)လွံၢ်ဖျၢၣ်အစၢၤအသွဲၣ်တဖၣ်ဖိတဖၣ်လီၤအဂ့ၢ်,ပၥ်ဖျါဝဲန့ၣ်လီၤ. တကတီၢ်ဃီ,(၈)လွံၢ်ဖျၢၣ်တၢ်ပူထီၣ်လီထီၣ်ထီဒါဝဲမီၤစိရိၤတၢ်ဟူးတၢ်ဂဲၤဒီတကတီၢ်အပူၤ,တၢ်ဂဲၤလိၥ်မၤထီဒါဝဲသုးမီၤစိၤရိၤသနူအၢသီကတီၢ်,ကီၢ်ပယီၤကၠိဖိတဖၣ်ဘၣ်ဟ့ၣ်လီၤတ့ၢ်ကွံၥ်ဝဲသွံၣ်ထံကပၢၤကဝါဒီးသးသမူအါဖျၢၣ်အိၣ်ဝဲအဃိ,ဖဲ(၃၆)နံၣ်ပှဲၤထီၣ်(၈)လွံၢ်ဖျၢၣ်မုၢ်နံၤအံၤန့ၣ်ခ့ၣ်အဲၣ်ယူၣ်ဟ့ၣ်ဝဲတၢ်ယူးယီၣ်ဆူကၠိဖိလၢအဟ့ၣ်လီၤတ့ၢ်သးတဖၣ်ခဲလၢၥ်အအိၣ်အဂ့ၢ်,လံၥ်ဟ့ၣ်ယုၢ်အပူၤပၥ်ဖျါဝဲန့ၣ်လီၤ.
သုးကီၣ်ကးကဘီယူၤဒုးသုး(၂)ဘ့ၣ်ဟဲခးလီၤတၢ်ဖဲတၢ်မၤဝဲတၢ်လိၥ်ခိၣ်လိၥ်ကွဲလၢထူရၤမုၢ်နံၤအဂီၢ်
လါအီကူး ၇ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဘျံးဒဝဲၢ်ကီၢ်ရ့ၣ်သုးက့(၄)တနီသရံၣ်ကီၢ်ဆၣ်ဟီၣ်ကဝီၤ, ဖဲမဟါလါအီကူး(၇)သီ မုၢ်ဃ့ၢ်လီၤအခါန့ၣ်လၢကညီမၤထူရၤမုၢ်နံၤအဂီၢ်တၢ်မၤဝဲတၢ်လိၥ်ခိၣ်လိၥ်ကွဲတၢ်ရဲၣ်တၢ်ကျဲၤဒီးဖဲန့ၣ်အဆၢကတီၢ်ပယီၤသုးကီၣ်ကးအကဘီယူၤဒုးသုး(၂)ဘ့ၣ်ဟဲခးလီၤဝဲကျိဖးဒိၣ်ဖဲတၢ်မၤတၢ်ရဲၣ်တၢ်ကျဲၤအလီၢ်အဂ့ၢ်တနီသရံၣ်ကီၢ်ဆၣ်အပှၤဘၣ်မူဘၣ်ဒါစံးဝဲန့ၣ်လီၤ. ဘၣ်ဃးဒီးတၢ်ဂ့ၢ်ကဲထီၣ်အသးအံၤန့ၣ်တနီသရံၣ်ကီၢ်ဆၣ်အပှၤဘၣ်မူဘၣ်ဒါပဒိၣ်စီၤထံဝါစံးဝဲလၢ "ပကီၢ်ဆၣ်အိၣ်ဒီး တၢ်ရဲၣ်တၢ်ကျဲၤလၢမၤထူရၤမုၢ်နံၤအဂီၢ်န့ၣ်ပကမၤတၢ်ရဲၣ်တၢ်ကျဲၤတဆဲးတမွဲးဖိဒီးပအိၣ်ဒီးပှၤသးစၢ်သ့ၣ်တဖၣ်ဖျၢၣ်ထူတၢ်ြပၢမီၤနီၤ. မ့ၢ်လၢပှၤသးစၢ်သ့ၣ်တဖၣ်လိၥ်ကွဲတၢ်ြပၢအဃိသးန့ၣ်သုးကီၣ်ကးန့ၣ်သ့ၣ်ညါဝဲဒၣ်ဒီးဒိးန့ၢ်ဘၣ်ဝဲတၢ်က စီၣ်အဃိန့ၣ်ဟဲတ့ၢ်လီၤမ့ၣ်ပိၢ်လၢဖျၢၣ်ထူပျီပူၤမီၤနီၤ. သနါက့တၢ်ဘၣ်ဒိဘၣ်ထံးတအိၣ်ဘၣ်. "အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ပယီၤသုးကီၣ်ကးအံၤဖဲမဟါမုၢ်ဃ့ၢ်လီၤ(၁)နၣ်ရံၣ်ဘျဲၣ်အဆၢကတီၢ်ဟဲတ့ၢ်လီၤဝဲမ့ၣ်ပိၢ်(၇)ဖျၢၣ်ဖဲတကဲးသဝီဃၢၤန့ၣ်တဘျီဒီးဖဲ(၂)နၣ်ရံၣ်ဘျဲၣ်အဆၢကတီၢ်ကဒီးန့ၣ်ဟဲတ့ၢ်လီၤဝဲမ့ၣ်ပိၢ်(၈)ဖျၢၣ်လၢတကဲးပျီသီသဝီဖျၢၣ်ထူၣ်ပျီပူၤဒ်အံၤအဖီခိၣ်ဘၣ်ဟးဂီၤဝဲကီၢ်ဆၣ်တၢ်သူၣ်ထီၣ်တဆံးတက့ၢ်အိၣ်ဝဲဘၣ်ဆၣ်မ့မ့ၢ်လၢတၢ်သံတၢ်ပှၥ်တၢ်ဘၣ်ဒိဘၣ်ထံးခီန့ၣ်တအိၣ်ဘၣ်အဂ့ၢ်တနီသရံၣ်ကီၢ်ဆၣ်အပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ. လၢန့ၣ်အမဲၥ်ညါဘၣ်ဃးဒီးသုးကီၣ်ကးအတၢ်ဟူးတၢ်ဂဲၤသ့ၣ်တဖၣ်အံၤအဖီခိၣ်သုးကီၣ်ကးအံၤပၥ်ပနီၣ်ပှၤဒ်တၢ်ခးပနီၣ်အသိးမၤတံၥ်တၥ်ဝဲပတၢ်ရဲၣ်တၢ်ကျဲၤသ့ၣ်တဖၣ်ဒ်သိးအံၤန့ၣ်မ့ၢ်ဝဲတၢ်မၤထီဒါပှၤဟီၣ်ခိၣ်ဖိခွဲးယၤအဂ့ၢ်ပဒိၣ်စီၤထံဝါစံးအါထီၣ်စ့ၢ်ကီးဝဲန့ၣ်လီၤ. "ပပှၤသးစၢ်တၢ်ဟူးတၢ်ဂဲၤလၢတၢ်လိၥ်ခိၣ်လိၥ်ကွဲတကပၤန့ၣ်အဝဲသ့ၣ်အဲၣ်ဒိးမၤတံၥ်တၥ်ဝဲပတၢ်ရဲၣ်တၢ်ကျဲၤမီၤနီၤ. မ့ၢ်ဝဲ ပဒုၣ်ပဒါအဃိသးန့ၣ်ကွၢ်ပပှၤကလုၥ်တလိၤဘၣ်ဒီးလၢန့ၣ်အမဲၥ်ညါပတၢ်ကရၢကရိအံၤကဲထီၣ်အဝဲသ့ၣ်တၢ်ခးပနီၣ်လီၤ. သနါက့ပမ့ၢ်ကွၢ်လၢတၢ်အိၣ်သးတံၢ်နီၢ်ခီန့ၣ်အဝဲသ့ၣ်မၤဝဲမၤထူရၤမုၢ်နံၤန့ၣ်ပတလဲၤမၤတံၥ်တၥ်ဘၣ်,မၤဘၣ်ဒိဘၣ်ထံးနီတမံၤဘၣ်မီၤနီၤ. ဒီးတုၤလၢပကမၤဝဲဒၣ်ပပှၤဒူပှၤဃိၤအမုၢ်နံၤလၢအပှဲၤထီၣ်ဝဲဒၣ်(၇၄)ဝီတဝီအံၤန့ၣ်ပအိၣ်ဒီးတၢ်ရဲၣ်တၢ် ကျဲၤလၢသးစၢ်သ့ၣ်တဖၣ်တၢ်လိၥ်ခိၣ်လိၥ်ကွဲပြၢဒီးအဝဲသ့ၣ်ဟဲမၤတံၥ်တၥ်ဝဲဒ်အံၤန့ၣ်မ့ၢ်ဝဲတၢ်လၢမၤဘၣ်ဒိဝဲဒၣ်ပပှၤကလုၥ်ခွဲးယၥ်လၢတၢ်လဲၤထီၣ်လဲၤထီအဂီၢ်လီၤ" အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဒ်န့ၣ်အသိးမ့ၢ်လၢသုးကီၣ်ကးအကဘီယူၤတ့ၢ်လီၤမ့ၣ်ပိၢ်ဖဲတကဲးပျီသီသဝီဖျၢၣ်ထူၣ်ပျီပူၤဒ်အံၤအဃိကမျၢၢ်ပှၤသူၣ်ဘီၣ်သးစၢ်သ့ၣ်တဖၣ်လၢအိၣ်ဒီးတၢ်မၤဝဲတၢ်လိၥ်ခိၣ်လိၥ်ကွဲအမူးလၢကညီမၤထူရၤမုၢ်နံၤအံၤအဂီၢ်ဘၣ်ဃ့ၢ်မုၢ်ြပံပြါကွံၥ်ဝဲခဲလၢၥ်ဒီးဘၣ်ဃ့ၢ်အိၣ်ကဒုအသးလၢတၢ်ဘံၣ်တၢ်ဘၢလီၢ်ဒီးဘၣ်စိၥ်ကတီၢ်ဃၥ်ကွံၥ်တၢ်ရဲၣ်တၢ်ကျဲၤအဂ့ၢ်လီၢ်ကဝီၤပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ
(Media)တၢ်ကစီၣ်တၢ်ဂ့ၢ်လိၥ်ဘှီလိၥ်မ့ၢ်အိၣ်ထီၣ်န့ၣ်(KNU)ဒီး(IPCM)ကပၥ်ဖှိၣ်တၢၣ်ပီၣ်တဲသကိးဝဲ
လါအီကူး ၇ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်တၢ်ပၢဟီၣ်ကဝီၤအပူၤဘၣ်ဃးဒီးလၢတၢ်လီၤဟံးန့ၢ်တၢ်ကစီၣ်အကျိၤအကျဲသ့ၣ်တဖၣ်အံၤဖီခိၣ်ကပၥ်ဖှိၣ်မၤသကိးဘၣ်တၢ်ဒီး(Media)တၢ်ကစီၣ်တၢ်ဂ့ၢ်လိၥ်ဘှီလိၥ်မ့ၢ်အိၣ်ထီၣ်ဘၣ်ဖုးန့ၣ်(KNU)ဒီး(IPCM)ကပၥ်ဖှိၣ်တၢၣ်ပီၣ်တဲသကိးဝဲအဂ့ၢ်(KNU)ဒီး(IPCM)ဆၢတဲၥ်လီၤဝဲဒၣ်ဒီးထုးထီၣ်ပၥ်ဖျါထီၣ်ဝဲလံၥ်တၢ်ပၥ်ဖျါအံၤဖဲတနံၤအံၤလါအီကူး(၇)သီအနံၤန့ၣ်လီၤ. ဘၣ်ထွဲဒီးတၢ်ဂ့ၢ်တခါအံၤအဖီခိၣ်ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢဒီးကီၢ်ပယီၤတၢ်ကစီၣ်သဘျ့ကီၣ်ကး(IPCM) မၤဝဲတၢ်တၢၣ်ပီၣ်တဲသကိးဘၣ်ဃးတၢ်ကဖံးသကိးမၤသကိးတၢ်လၢ(Media)တၢ်တၢ်ကစီၣ်အကျဲသနူတၢ်အိၣ်ဖှိၣ်အံၤဖဲလါအီကူး(၆)သီလၢခ့ၣ်အဲၣ်ယူၣ်တၢ်ပၢဟီၣ်ကဝီၤတၢ်လီၢ်တတီၤအပူၤဒီးပၥ်ဖှိၣ်ထုးထီၣ်ပၥ်ဖျါသကိးဝဲလံၥ်တၢ်ပၥ်ဖျါဒ်အံၤလီၤအဂ့ၢ်သ့ၣ်ညါဘၣ်န့ၣ်လီၤ. လၢတၢ်ထံၣ်လိၥ်သးဘျီဝဲအံၤအပူၤန့ၣ်မ့ၢ်ဒ်သိးတၢ်တၢၣ်ပီၣ်တဲသကိးရှဲလဲက့ၤဝဲဒၣ်လံၥ်တၢ်ပၥ်ဖျါလၢအပူၤကွံၥ်တၢ်ထုးထီၣ်တ့ၢ်ဃၥ်အီၤဖဲလါအ့ၣ်ဖြ့ၣ်အတီၢ်ပူၤဘၣ်ဃး(Media)တၢ်ကစီၣ်တၢ်သိၣ်တၢ်သီသကဲၥ်ပဝးဒီးတၢ်မၤအကျိၤအကွၥ်သ့ၣ်တဖၣ်အဂ့ၢ်န့ၣ်လီၤ. လၢခ့ၣ်အဲၣ်ယူၣ်တကပၤန့ၣ်တၢ်အံၤတမ့ၢ်တၢ်ဟံးန့ၢ်ဝဲတၢ်ဒိၣ်စိလၢ(Media)တၢ်ကစီၣ်သ့ၣ်တဖၣ်အဖီခိၣ်ဘၣ်ဒီးမ့ၢ်ဒ်သိး(Media)တၢ်ကစီၣ်သ့တဖၣ်ကမၤန့ၢ်ဝဲတၢ်ဂ့ၢ်တၢ်ကျိၤ(တၢ်ကစီၣ်)လၢအဘၣ်ဘျိးဘၣ်ဒါအဂီၢ်(ခ့ၣ်အဲၣ်ယူၣ်)ရှဲလဲစံးဝဲဒၣ်ဒီးပၥ်ဖှိၣ်ပၥ်ဖျါထီၣ်သကိးဝဲတၢ်ပၥ်ဖျါဒ်အံၤလီၤအဂ့ၢ်ခ့ၣ်အဲၣ်ယူၣ်အပှၤကတိၤတၢ်ပၢပဒိၣ်စီၤကျၤစ့စံးဘၣ်ဝဲခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ. တၢ်ထံၣ်လိၥ်သးဘျီအံၤဒုပတၢ်ပညိၣ်တၢတထံၣ်န့ၣ်ဘၣ်ထွဲဒီးတၢ်ဘိးဘၣ်ဘၣ်ရၤလီၤတၢ်ကစီၣ်သ့ၣ်တဖၣ်အတၢ်ဂ့ၢ်ကီ. တၢ်ကစီၣ်သန့သ့ၣ်တဖၣ်ဒီးပဝဲဒၣ်ပတၢ်အိၣ်သးသ့ၣ်တဖၣ်အဖီခိၣ်ပဝဲဒၣ်တၢ်တီခိၣ်ရိၣ်မဲဒီးတၢ်ထုးစုနဲၣ်ကျဲအီၤလၢတၢ်ကစီၣ်သန့သ့ၣ်တဖၣ်န့ၣ်ပကဘၣ်ဆဲးမၤအီၤဒ်လဲၣ်န့ၣ်မ့ၢ်တၢ်အရ့ဒိၣ်ဝဲမီၤနီၤ. အဃိန့ၣ်တၢ်ကစီၣ်သန့သ့ၣ်တဖၣ်ဒီးပတၢ် တီခိၣ်ရိၣ်မဲဒီးပတၢ်ထုးစုနဲၣ်ကျဲအကျိၤအကျဲသ့ၣ်တဖၣ်န့ၣ်ကလဲၤအသးဘၣ်ဂ့ၤဘၣ်ဝီဘၣ်ဘျိးဘၣ်ဒါဒိၣ်ထီၣ်န့ၢ်သုးမီၤစိရိၤဟံးန့ၢ်တၢ်စိတၢ်ကမီၤဝံၤအလီၢ်ခံန့ၣ်ပတၢ်ပညိၣ်အိၣ်စ့ၢ်ကီးလီၤ.ဒီးခါဆူညါတၢ်ဟ့ၣ်ဂံၢ်ဟ့ၣ်ဘါတၢ်ကစီၣ်မ့ၢ်ဂ့ၤ,တၢ်ဖံးသသကိးမၤသကိးလၢထံကီၢ်တဘ့ၣ်အံၤတၢ်ဆီတလဲၤကအိၣ်ထီၣ်အဂီၢ်န့ၣ်တၢ်ကစီၣ်တၢ်ဖံးတၢ်မၤန့ၣ်မ့ၢ်တၢ်အကါဒိၣ်လီၤ. ခါဆူညါပကဆဲးမၤသကိးဒ်လဲၣ်န့ၣ်မ့ၢ်ပတၢ်တဲသကိးဝဲတၢ်ပညိၣ်အိၣ်ဒ်န့ၣ်လီၤ." အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢတၢ်ပၥ်ဖှိၣ်တၢၣ်ပီၣ်တဲသကိးတၢ်ဘျီဝဲအံၤအပူၤန့ၣ်ခ့ၣ်အဲၣ်ယူၣ်အကရၢခိၣ်ခံ(ပဒိၣ်စီၤဆၢဂ့ၤ),နဲၣ်ရွဲၣ်သဃဲၤခံ(ပဒိၣ်စီၤလၣ်ထိ), ပှၤကတိၤတၢ်ပၢပဒိၣ်(စီၤကျၢၤစ့)ဃုၥ်ဒီးခ့ၣ်အဲၣ်ယူၣ်ပှၤဂ့ၢ်ဝီဒီးတၢ်ကစီၣ်တၢ်ဘိးဘၣ်ရၤလီၤကမံးတံၥ်သ့ၣ် တဖၣ်ဟဲထီၣ်ဝဲဒီးဒ်န့ၣ်အသိးလၢကီၢ်ပယီၤတၢ်ကစီၣ်သဘျ့ကီၣ်ကး(IPCM)တကပၤခီန့ၣ်အပှၤနဲၣ်တၢ်(နါဖီဂ့ၤ), နဲၣ်ရွဲၣ်(အူတိဆီၤလဲၣ်)ဒီးနဲၣ်ရွဲၣ်သဃဲၤသ့ၣ်တဖၣ်ဟဲထီၣ်ပၥ်ဃုၥ်ဝဲဒၣ်အဂ့ၢ်သ့ၣ်ညါဘၣ်န့ၣ်လီၤ. ဘၣ်ဃးဒီးတၢ်အဆၢလၢတၢ်တၢၣ်ပီၣ်တဲသကိးန့ၢ်ဝဲသ့ၣ်တဖၣ်န့ၣ်(IPCM)နဲၣ်ရွဲၣ်(အူတိဆီၤလၣ်)စံးဝဲလၢ "တၢ်ဂ့ၢ်လိၥ်ဘှီလိၥ်သးအိၣ်သၢခါလွံၢ်ခါမီၤနီၤ. အဒိ-ခ့ၣ်အဲၣ်ယူၣ်အသူးသ့ၣ်လၤကပီၤန့ၣ်အဲၣ်ဒိးတဲဖဲလဲၣ်တခါလဲၣ်. တၢ်ဒ်လဲၣ်ကလုၥ်သ့ၣ်တဖၣ်လၢကဟဲမၤဘၣ်ဒိဝဲတၢ်သူးသ့ၣ်လၤကပီၤသ့ၣ်တဖၣ်ဒီးပတၢ်လၢပဒိပၥ်မၤနီၣ်မၤဃါတၢ်သ့ၣ်တဖၣ်န့ၣ်ဃ့ကွၢ်ဝဲခီန့ၣ်ဒုကကဲထီၣ်ဝဲတၢ်လီၤဘၣ်ယိၣ်လၢပှၤမဲၥ်သၣ်ကပၥ်ဃုၥ်ဝဲလီၤ.လၢတၢ်ကစီၣ်ဝဲန့ၣ်အဖီခိၣ်န့ၣ်တၢ်ဟံန့ၢ်ဒိၣ်စိပၢဝဲတဘၣ်အိၣ်ဘၣ်ဒ်န့ၣ်သ့ၣ်တဖၣ်န့ၣ်ပၡဲလဲအီၤလၢအဖိးသဲးစးလီၤ.မ့ၢ်ဘၣ်တဲလၢအဖုၣ်ကိၥ်ဖိန့ၣ်တၢ်တၢၣ်ပီၣ်တဲကျဲၤဝဲန့ၢ်မီၤနီၤ." အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဒ်န့ၣ်အသိးကီၢ်ပယီၤတၢ်ကစီၣ်သဘျ့ကီၣ်ကး(IPCM)အံၤဘၣ်တၢ်ဒုးအိၣ်ထီၣ်အီၤဖဲ(၂၀၂၃)နံၣ်လါဒံၣ်စဲဘၢၣ်(၂၂)သီအနံၤလၢကီၢ်ကၠီၣ်တဲၣ်တၢ်လီၢ်တတီၤအပူၤဒီးကီၢ်ပူၤကီၢ်ချၢတၢ်ကစီၣ်သန့,နီၢ်တဂၤစုၥ်စုၥ်တၢ်ကစီၣ်သန့,ကလုၥ်ဒူၣ်တၢ်ကစီၣ်သ့ဒီးလီၢ်ကဝီၤဂံၢ်ခီၣ်ထံးတၢ်ကစီၣ်သန့သ့ၣ်တဖၣ်ဟဲထီၣ်ပၥ်ဃုၥ်ပၥ်ဂီၢ်ဝဲဖဲတၢ်အိၣ်ဖှိၣ်ဖးဒိၣ်ခံဘျီတဘျီအဆၢကတီၢ်န့ၣ်လီၤ.
လံမိကျီးသဝီပိၥ်မုၣ်လၢသုးကီၣ်ကးဖီၣ်ဃၥ်တဂၤ,တၢ်ဆဲးကျိးတဲၥ်ဒီးအဟံၣ်ဖိဃီဖိတုၤလၢခဲအံၤ
လါအီကူး ၇သီ, ၂၀၂၄နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်,ဝီၢ်ရ့ၣ်ကီၢ်ဆၣ်အပူၤ,လံမိကျီးသဝီလီၢ်ကဝီၤပိၥ်မုၣ်လၢသုးကီၣ်ကးဖီၣ်ဃၥ်ဝဲဖဲအပူၤကွံၥ်လါယူၤလံ(၁၂)သီတဂၤအံၤ,အတၢ်ဆဲးကျိးဆဲးကျၢအဆၢတဲၥ်ဝဲဒီးအဟံၣ်ဖိဃီဖိတဖၣ်တုၤလၢခဲအံၤအဂ့ၢ်,လီၢ်ကဝီၤပှၤဘၣ်မူဘၣ်ဒါတဖၣ်စံးဝဲန့ၣ်လီၤ. လီၢ်ကဝီၤပိၥ်မုၣ်သးစၢ်အံၤ,ပှၤဘၣ်မူဘၣ်ဒါတဖၣ်သ့ၣ်ညါထွဲဝဲလၢသုးကီၣ်ကးတဖၣ်ဖီၣ်ဃၥ်ဝဲအီၤဝံၤအလီၢ်ခံ,တသီခံသီအတီၢ်ပူၤတၢ်ဆဲးကျိးဆဲးကျၢဒီးဟံၣ်ဖိဃီဖိတအိၣ်ဝဲလၢၤဘၣ်ဘူးထီၣ်လၢတလါလံအဂ့ၢ်,ဝီၢ်ရ့ၣ်ကီၢ်ဆၣ်ပှၤဘၣ်မူဘၣ်ဒါလၢတအဲၣ်ဒိးပၥ်ဖျါအမံၤတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“တၢ်ကဲထီၣ်သးန့ၣ်ကဲထီၣ်ဝဲဖဲ(၇)လါ(၁၂)သီဖဲမီၤကနဲန့ၣ်လီၤ.တၢ်လီၢ်ဖဲန့ၣ်န့ၣ်ဒုၣ်ဒါခီန့ၣ်မ့ထံၣ်ဝဲကမျၢၢ်ပှၤလ့ၢ်ထီၣ်လ့ၢ်လိၤလၢမ့တသ့ၣ်ညါဝဲဘၣ်န့ၣ်သမံသမိးဝဲအတၢ်ဂီၤဒီးလီတဲစိသ့ၣ်တဖၣ်အိၣ်ဝဲထီဘိလီၤ.လံၣ်မီၣ်ကျီးပိၥ်မုၣ်လၢပယီၤဖီၣ်အီၤတဂၤခီန့ၣ်စးထီၣ်လၢတၢ်ကဲထီၣ်သးတနံၤဃီန့ၣ်ပဝဲပှၤဘၣ်မူဘၣ်ဒါသ့ၣ်ညါထွဲလီၤ.ပှၤဖီၣ်အီၤဝံၤတသီခံသီအတီၢ်ပူၤပနၢ်ဟူလၢတၢ်ဆှၢကဒီးအီၤဆူ(စကခ)(၁၉)လၢဝ့ၢ်ရ့ၣ်တကပၤလၢတၢ်ကမၤဝဲ(စ့ၣ်ကၠီယ့)ဝံၤအလီၢ်ခံတုၤခဲအံၤပှၤတဒိးန့ၢ်ဘၣ်တၢ်ဆဲးကျိးဆဲးကျၢဒီးအီၤနီတဂၤလၢၤဘၣ်,ဘူးထီၣ်ဝဲလၢတလါလံ”အဂ့ၢ်စံးဝဲန့ၣ်လီၤ. လၢန့ၣ်အမဲၥ်ညါ,လံမိကျီးလီၢ်ကဝီၤပိၥ်မုၣ်လၢသုးကီၣ်ကးဖီၣ်ဃၥ်ဝဲအံၤအမံၤမ့ၢ်ဝဲ(မၣ်ခၠံၣ်စပဲၤ)သးနံၣ်(၁၈)နံၣ်ဒီးဖဲအပူၤကွံၥ်လါယူၤလံ(၁၂)သီအနံၤဂီၤခီ(၉)နၣ်ရံၣ်ဘျဲၣ်အဆၢကတီၢ်,အဝဲဒီးအဒီပုၢ်ဝဲၢ်ခွါတဂၤလဲၤပှ့ၤတၢ်လၢ(နံၣ်ကယ့ၣ်)ဝံၤလီၢ်အခံမုၢ်ဃ့ၢ်လီၤ(၂)နၣ်ရံၣ်တခီအဆၢကတီၢ်ဆဲးလဲၤကဒီးဝဲလၢမီၤကနဲတကပၤလၢကမၤဘျၢဝဲအခိၣ်ဆူၣ်အဂီၢ်,လၢတၢ်ဒုးသ့ၣ်ညါထွဲဝဲအမိၢ်အပၢ်ဟံၣ်ဖိဃီဖိသ့ၣ်တဖၣ်တအိၣ်ဝဲဘၣ်အဂ့ၢ်,ပှၤဘၣ်မူဘၣ်ဒါတဖၣ်စံးဝဲန့ၣ်လီၤ. တကးဒံးဘၣ်,ပိၥ်မုၣ်သးစၢ်အံၤဖဲတၢ်သမံသမိးအီၤအဆၢကတီၢ်ခီဖျိသုးကီၣ်ကးတဖၣ်ထံၣ်ဝဲတၢ်ဂီၤတၢ်ဖီၣ်လၢအဘၣ်ထွဲဒီးတၢ်ပၢၢ်ဆၢတၢ်ဟူးတၢ်ဂဲၤအိၣ်လၢအလီတဲစိပူၤအဃိတၢ်ဖီၣ်ဝဲအီၤဒီး,သုးကီၣ်ကးလၢအဖီၣ်အီၤတဖၣ်အံၤမ့ၢ်ဝဲမီၤကနဲခီၣ်ချ့သုးရ့ၣ်(ခလရ၁၀၆)လၢအိၣ်ခိးတၢ်ဖဲ(ကျဲကောကျွေး)ကျဲနုၥ်လီၤတဖၣ်လီၤတဖၣ်အဂ့ၢ်,ပှၤဘၣ်မူဘၣ်ဒါတဖၣ်စံးဝဲန့ၣ်လီၤ ဒီးပိၥ်မုၣ်သးစၢ်လၢသုးကီၣ်ကးဖီၣ်ဃၥ်ဝဲတဂၤအံၤန့ၣ်,တၢ်တဒိးန့ၢ်ဘၣ်အဂ့ၢ်အကျိၤအပရၢနီတမံၤလၢၤဘၣ်,ဘၣ်ဆၣ်ခီဖျိအတၢ်ဘၣ်ထွဲအိၣ်ဒီးတၢ်ပၢၢ်ဆၢကရူၢ်ကရၢအဃိ,သုးကီၣ်ကးတဖၣ်ကမၤဝဲအီၤသမံသမိးတုၤလၢခဲလီၤအဂ့ၢ်,ပှၤဘၣ်မူဘၣ်ဒါတဖၣ်ပဲၥ်ထံနီၤဖးဝဲဒၣ်န့ၣ်လီၤ. တကတီၢ်ဃီ,အဒီပုၢ်ဝဲၢ်ခွါလၢအလဲၤပိၥ်အခံတဂၤအံၤစ့ၢ်ကီးပယီၤသုးဖီၣ်ဃုၥ်ဝဲဒီးအီၤတဘျီဃီအိၣ်ဝဲဘၣ်ဆၣ်,ဘၣ်တၢ်ပျၢ်လီၤကွံၥ်ဝဲလံသနၥ်က့ပှၤဘၣ်မူဘၣ်ဒါတဖၣ်တထံၣ်ကတိၤဘၣ်တၢ်ဒီးအီၤဒံးဘၣ်အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ. ဒ်န့ၣ်အသိး,မီၤကနဲသုးကီၣ်ကးခီၣ်ချ့သုးရ့ၣ်(ခလရ၁၀၆)ဟီၣ်ကဝီၤအံၤ,သုးကီၣ်ကးတဖၣ်မၤဝဲတၢ်သမံသမိးကမျၢၢ်လ့ၢ်ထီၣ်လ့ၢ်တဖၣ်ဆူၣ်ဆူၣ်ကိၤကိၤအိၣ်ဝဲထီဘိတပယူၥ်ဃီဒီးဖီၣ်သမံသမိးဝဲကမျၢၢ်လီၢ်ကဝီၤဖိမုၣ်ခွါသ့ၣ်တဖၣ်ခဲအံၤခဲအံၤတကးဘၣ်,တနီၤတပျၢ်လီၤက့ၤဝဲလၢၤဘၣ်အိၣ်ဝဲအဂ့ၢ်,လီၢ်ကဝီၤပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
ဒူသထူၣ်ကီၢ်ရ့ၣ် တၢ်စူၤထံဒိၣ်ထီၣ်အကတီၢ်ဘုသံဘုဟးဂီၤအိၣ်တနီၤအဂ့ၢ် ၦၤဘၣ်မူဘၣ်ဒါစံး၀ဲ
လါအီကူာ် ၇ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤအပူၤ ဖဲအပူၤကွံာ်လါယူၤလံသၢနွံတနွံအခါန့ၣ် ခီဖျိတၢ်စူၤအါထံထီၣ် ဒီးထံနုာ်လီၤ၀ဲလၢဒူသ၀ီစံာ်ပျီပူၤအဃိ ဘုသံဘုဟးဂီၤအိၣ်၀ဲဒၣ်တနီၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါ စံး၀ဲန့ၣ်လီၤႉ ဒူသထူၣ်ကီၢ်ရ့ၣ် ကီၢ်ဆၣ်ကိးဘ့ၣ်ဒဲးဃၣ်ဃၣ်အပူၤ စးထီၣ်ဖဲလါယူၤလံ ၂၄ သီန့ၣ် ခီဖျိတၢ်စူၤတပယူာ်ဃီ ထံထီၣ် ထံနုာ်လီၤလၢဒူသ၀ီပူၤတကးဒံးဘၣ်ဘုသ့ၣ်တဖၣ်ထံလုၢ်ဘၢ၀ဲဒၣ်အါအါဂီၢ်ဂီၢ်အဃိ ဘုလၢတၢ်သူၣ်ဃာ်၀ဲ သ့ၣ်တဖၣ်အံၤ သံ၀ဲဒၣ်အိၣ်တနီၤအဂ့ၢ်န့ၣ် ဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤ စံးဘၣ်ခ့ၣ်အဲးစံၣ်-ကညီ တၢ်ကစီၣ်ဖဲတနံၤ အံၤန့ၣ်လီၤႉ “တနံၣ်ညါအံၤမ့ၢ်လၢမူခိၣ်ကလံၤတဘၣ်လီၢ်ဘၣ်ဆးဘၣ်ႉထံဒိၣ်ထံလုၢ်ဘၢဘုအနံၤအသီအါအဃိဘုသံဘုဟးဂီၤ အိၣ်တနီၤမီၤနီၤႉထံလုၢ်ဘၢခီန့ၣ်စးထီၣ်လၢ(၂၄)သီန့ၣ်မူခိၣ်စူၤအါထံဒိၣ်တဘိယူၢ်ဃီထံလုၢ်ဘၢတၢ်နံၤအါသီအါဘျီဘုတဖၣ်န့ၣ်လီၤကျး၀ံၢ်ထီၣ်က့ၤသးတန့ၢ်ဘၣ်အဃိအဟးဂီၤအိၣ်တနီၤမီၤနီၤႉပမ့ဘၣ်ကွၢ်လၢပကီၢ်ရ့ၣ်ပူၤအံၤကီၢ်ဆၣ်ကိးဘ့ၣ်ဒဲးလီၤႉၦၤလၢအထူစံာ်တဖၣ်န့ၣ်ဘၣ်ကွၢ်ဆၢၣ်မဲာ်မူခိၣ်ကလံၤတဘၣ်လီၢ်ဘၣ်ဆးထံလုၢ်ဘၢဘုသ့ၣ်တဖၣ် သံ၀ဲအိၣ်ဒိၣ်ဒိၣ် မုၢ်မုၢ်လီၤမီၤပမ့ဘၣ်တဲန့ၣ်”အဂ့ၢ်န့ၣ် စံး၀ဲန့ၣ်လီၤႉ ဒူသထူၣ်ကီၢ်ရ့ၣ် ကီၢ်ဆၣ်သ့ၣ်တဖၣ်အပူၤ ဒူသ၀ီလၢအဘၣ်သဂၢၢ်ဒီးထံဒိၣ်ထီၣ်ဘုသံဘုဟးဂီၤသ့ၣ်တဖၣ်န့ၣ်မ့ၢ်၀ဲ ထံဖးဒိၣ်ထၣ်ႇယိၤကျါႇကၠိ၀ဲႇထံခၠံၣ်ဘီႇနိၣ်လီၤပျီႇနိၣ်အီလၢ်ႇဖှၣ်ဂီၤႇကြူကၠံသ၀ီႇနီၣ်ကတိးသ၀ီႇတမီးဒီးႇ ကီးကၠးသၢႇ ကီးလၢၢ်ႇ၀ၢ်ပူၣ်သ၀ီဃုာ်ဒီးဒူသ၀ီလၢအဂၤသ့ၣ်တဖၣ်အိၣ်၀ဲအဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါ စံး၀ဲအသိး သ့ၣ်ညါဘၣ် န့ၣ်လီၤႉ လီၢ်က၀ီၤဒူသ၀ီကမျၢၢ်တဖၣ်တနီၤန့ၣ်ခီဖျိအ၀ဲသ့ၣ်ဘုသံဘုဟးဂီၤအဃိသူၣ်ဟးဂီၤသးဘၣ်ဒိ၀ဲဒၣ်အိၣ်အဂ့ၢ်န့ၣ် လီၢ်က၀ီၤကမျၢၢ်လၢအထံၣ်တၢ်ကဲထီၣ်သးလၢအမဲာ်တဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ “ၦၤဘုသံအိၣ်ဒီဒူၣ်ႇၦၤမၤအီၣ်စံာ်ဖိဟီၣ်ကလာ်လီၤႉတဲ၀ဲမၤတဘၣ်လၢၤဘၣ်လၢထံကီၢ်တၢ်အိၣ်သးဒီးတမၠိႇလၢမူခိၣ်ကလံၤသီၣ်ဂီၤခီဒၢးတဘၣ်လီၢ်ဘၣ်ဆးမၤအီၣ်ဘုဒီးထံဒိၣ်တဲ၀ဲလၢဟ့ၣ်လီၤၦၤတူၢ်ငါဖိအဘူးအလဲမးတတူာ်ဒံးဘၣ်ႉ ခဲအံၤဘုသံ လံဘၣ်မၤဒ်လဲၣ်လီၤဒိသံလၢာ်ဧါသၢၣ်တဲ၀ဲဒ်န့ၣ်ႉဖဲပအိၣ်အဂီၤထံးဒ်သိးတမီၤဒီးသ၀ီၦၤမၤအီၣ်စံာ်ဖိတဖၣ် န့ၣ်တဲ၀ဲဆိမိၣ် လဲၤမၤအီၣ်စံာ်လၢစံာ်ပျီပူၤတမုာ်ဘၣ်ဟဲက့ၤမၤအီၣ်ဖဲသ၀ီခိၣ်ဃၢၤႉခဲအံၤသ၀ီခိၣ်ဃၢၤထံဒိၣ်ထီၣ်ခဲအံၤ နသူၣ်ပီ၀ံၤဘုမီၤ ထီၣ်ခိၣ်တချုးႇနထံၣ်ဘုတဖၣ်န့ၣ်လီၤတီၢ်နသါအီၣ်က့ၤလၢမတၤလီၣ်တဲ၀ဲဒ်န့ၣ်အိၣ်”အဂ့ၢ်န့ၣ် စံး၀ဲန့ၣ်လီၤႉ စးထီၣ်ဖဲလါယူၤလံကတၢၢ်တနွံန့ၣ်တၢ်စးထီၣ်စူၤ၀ဲဒၣ်လၢကီၢ်ပယီၤတၢ်လီၢ်အါတီၤဒီးဖဲန့ၣ်ထံဒိၣ်ထီၣ်၀ဲလၢခူပူၤ ၀့ၢ်ပူၤ ဒူသ၀ီတၢ်လီၢ်သကုၤဆးန့ၣ်လီၤႉတကီၢ်ခါခဲအံၤဒူသထူၣ်ကီၢ်ရ့ၣ်ပူၤထံက့ၤလီၤ၀ဲလံဘၣ်ဆၣ်လီၤတလၢာ်ခဲလၢာ်ႇဘုစ့ၢ်ကီးဖျါထီၣ်တလၢာ်ခဲလၢာ်ဒံးဘၣ်အဃိဘုသံဘုဟးဂီၤအအ့ကၢၣ်နီၣ်ဂံၢ်နီၣ်ဒွးန့ၣ်တဲလီၤတံၢ်တသ့ဒံးဘၣ်အဂ့ၢ်န့ၣ် ကီၢ်ရ့ၣ်ၦၤကတိၤတၢ်ပၢ စံး၀ဲန့ၣ်လီၤႉ ဒူသထူၣ်ကီၢ်ရ့ၣ်အပူၤ...