မ့အီၣ်လဲၣ်တၢ်မၤအိၣ်န့ၣ်ကမၤဝဲဒီးပတၢ်မၤအိၣ်န့ၣ်ပကမၤအီၤအဂ့ၢ်(KNLA)သုးရိၣ်မဲခိၣ်ကျၢၢ်စံးဝဲ
လါအီကူး ၆သီ, ၂၀၂၄နံၣ်, ခ့ၣ်အဲးစံၣ် ဒိးန့ၢ်ဘၣ်ဝဲတၢ်ကစီၣ်လၢဒ်သိးခ့ၣ်အဲၣ်ယူၣ်သုးက့(၁),(၃) ဒီး(၅)သ့ၣ်တဖၣ်ဒုးအိၣ်ထီၣ်ဝဲဒုးယၥ်ရဲၣ်ကျဲၤဖဲပှဲၤလိၥ်ကျိဟီၣ်ကဝီၤကန့ၢ်အဂီၢ် ခ့ၣ်အဲၣ်ယူၣ် ကရၢခိၣ်ခဲအံၤဒီး(KNLA)အသုးရိၣ်မဲခိၣ်ကျၢၢ်သ့ၣ်တဖၣ်ရဲၣ်ကျဲၤဝဲဒၣ်အဂ့ၢ်သုးကီၣ်ကးအခိၣ်မ့အီၣ်လဲၣ်တဲလီၤဝဲဖဲလါအူကူး(၅)သီအနံၤန့ၣ်လီၤ. ဘၣ်ဃးဒီးတၢ်ဂ့ၢ်ဝဲအံၤန့ၣ် မ့အီၣ်လဲၣ်တၢ်မၤအိၣ်န့ၣ်ကမၤဝဲဒီးပတၢ်မၤအိၣ်န့ၣ်ကမၤအီၤအဂ့ၢ် (KNLA)အသုးရိၣ်မဲခိၣ်ကျၢၢ်သုးခိၣ်ကျၢၢ်စိ စီၤကၠီၣ်နံၣ် စံးဝဲဒ်အံၤန့ၣ်လီၤ. အဝဲစံးဝဲလၢ“တဲဆၢက့ၤအလီၢ်တအိၣ်နီတမံၤဘၣ်.တဲဆၢသနၥ်က့အဘျုးတအိၣ်ဘၣ်. မ့အီၣ်လဲန့ၣ် အတၢ်မၤအိၣ်န့ၣ်ကမၤဝဲဒီး ပဝဲပတၢ်မၤအိၣ်န့ၣ်ပမၤန့ၣ်လီၤ.မတဂၤမၤဟးဂီၤ (NCA)လဲၣ်? မ့ၢ်ကလုၥ်ဒူၣ်မၤဟးဂီၤဧါ? မ့အီၣ်လဲၣ်မၤဟးဂီၤဧါ န့ၣ်ယဆိမိၣ်လၢဟီၣ်ခိၣ်ဒီဘ့ၣ်သ့ၣ်ညါထွဲလီၤ. မ့အီၣ်လဲၣ်န့ၣ်ပှၤတဲလၢပျုၢ်တၢ်စိတၢ်ကမီၤဒီးအဝဲဟံးထီၣ်မူဒါခဲအံၤန့ၣ်အနီၢ်ကစၢ်ဒၣ်ဝဲတီၣ်ထီၣ်အသးန့ၣ်ဟီၣ်ခိၣ်ဒီဘ့ၣ်သ့ၣ်ညါဒီးပှၤလၢနၢ်ပၢၢ်တၢ်သ့ၣ်တဖၣ်န့ၣ် ကနၢ်ပၢၢ်ဝဲလီၤ.”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ ခ့ၣ်အဲၣ်ယူၣ် အံၤဆဲးလီၤဝဲထံကီၢ်ဒီဘ့ၣ်တၢ်ပတုၤတၢ်ခးအလံၥ်ဃံးဃၥ်(NCA)ဘၣ်ဆၣ် အခိၣ်အနၢ်တနီၤန့ၣ်မၤထီဒါဝဲ(NCA)ဒီး ဟ့ၣ်ဝဲ(PDF)သ့ၣ်တဖၣ်သုးတၢ်သိၣ်လိ, ဟ့ၣ်လီၤဝဲဒၣ်တၢ်စုကဝဲၤဝံၤဒုးအိၣ်ထီၣ်ဝဲတၢ်ဒုးတၢ်ယၤလၢကညီကီၢ်စဲၣ်ပူၤအဂ့ၢ် သုးကီၣ်ကးအခိၣ် မ့အီၣ်လဲၣ် ပၥ်ဒ့ၣ်ပၥ်ကမၣ်တၢ်အိၣ်ဝဲဒၣ်စ့ၢ်ကီးန့ၣ်လီၤ. လၢတၢ်ဂ့ၢ်ဝဲအံၤအဖီခိၣ်န့ၣ် တၢ်ဟံးန့ၢ်ဆူၣ်ထံကီၢ်တၢ်စိတၢ်ကမီၤန့ၣ်တမ့ၢ်တၢ်လၢအကြၢးအဘၣ် ဘၣ်န့ၣ် ပပၥ်ဖျါထီၣ်ပတၢ်ပၥ်သးဘၣ်ဆၣ်အဝဲဟံးဆူၣ်တၢ်စိတၢ်ကမီၤအဃိ တၢ်ဂ့ၢ်ပိၥ်ထွဲထီၣ်အခံခဲလၢၥ်န့ၣ် ခီဖျိ မ့အီၣ်လဲၣ် အဃိလီၤအဂ့ၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ အပှၤကတိၤတၢ်ပၢ ပဒိၣ်စီၤကျၢၤစ့ စံးဝဲဒၣ်ဒ်အံၤစ့ၢ်ကီးန့ၣ်လီၤ. အဝဲစံးဝဲလၢ“ဘၣ်ဃးဒီးတၢ်ဂ့ၢ်ဝဲအံၤန့ၣ်ပထံၣ်လၢ တၢ်လၢအပူၤကွံၥ်ကဲထီၣ်သးတဆီဘၣ်တဆီန့ၣ် ခီဖျိလၢ မ့အီၣ်လဲၣ်အနီၢ်ကစၢ်န့ၣ်လီၤ.တၢ်မၤလၢတၢ်ဟံးန့ၢ်ဆူၣ်တၢ်စိတၢ်ကမီၤန့ၣ်တၢ်တကြၢးမၤဘၣ်န့ၣ် တၢ်ဟ့ၣ်ပလီၢ်အီၤ,ပတဲဒုးသ့ၣ်ညါပတၢ်ပၥ်သးသ့ၣ်တဖၣ်လီၤတံၢ်လီၤဆဲးလီၤ. ဘၣ်ဆၣ်ဒီးအဝဲမၤဝဲအဃိန့ၣ် တၢ်ကဲထီၣ်သးသ့ၣ်တဖၣ်ခဲလၢၥ်န့ၣ်ပထံၣ်လၢခီဖျိလၢအဝဲအဃိန့ၣ်လီၤ.”အဂ့ၢ်စံးဝဲဒၣ်န့ၣ်လီၤ. တကတီၢ်ဃီ ခီဖျိလၢ ထံဂုၤကီၢ်ဂၤဒီးထံကီၢ်လၢအအိၣ်ဘူးဒီးကီၢ်ပယီၤသ့ၣ်တဖၣ် မၤစၢၤတၢ်ပၢၢ်ဆၢရူၢ်ကရၢသ့ၣ်တဖၣ်လၢ ဒရိတၢ်သ့တၢ်ဘၣ်,တၢ်စုကဝဲၤ, သုးတၢ်သိၣ်လိဒီးတၢ်အီၣ်တၢ်အီသ့ၣ်တဖၣ်အဃိအဝဲသ့ၣ်ဘၣ်ဃၣ်ဝဲဒၣ်လၢတကီၢ်ခါခဲအံၤအဂ့ၢ်သုးကီၣ်ကးအခိၣ်မ့အီၣ်လဲၣ်စံးဝဲဒၣ်အိၣ်ဘၣ်ဆၣ် ထံကီၢ်လီၤတံၢ်လီၤဆဲးအမံၤတခီတယၢၤထီၣ်ဝဲဒၣ်ဘၣ်အဂ့ၢ်ပထံၣ်ဘၣ်ဝဲဒၣ်န့ၣ်လီၤ. တကီၢ်ခါခဲအံၤန့ၣ်ခီဖျိပတြီၤကီၢ်ခိၣ်ကျၢၢ်အူမၠ့ၣ်စွ့ၤဟံးန့ၢ်ဝဲဒၣ်တၢ်အိၣ်ဆူအိၣ်ချ့ခွဲးအဃိ လၢတၢ်ပၢတၢ်ပြးအဂီၢ်သုးကီၣ်ကးကရူၢ်လၢဘၣ်တၢ်တီခိၣ်ရိၣ်မဲအီၤလၢ မ့အီၣ်လဲၣ်အံၤန့ၣ်ကိးဝဲဒၣ်ဒီကလုၥ်တၢ်ဒီသဒၢဒီးတၢ်ဘံၣ်တၢ်ဘၢကီၣ်ကးတၢ်အိၣ်ဖှိၣ် ဖဲအပူၤကွံၥ်လါယူၤလံ ၃၁သီဒီး လၢပတြီၤကီၢ်ခိၣ်ကျၢၢ် အူမၠ့ၣ်စွ့ၣ်အလီၢ်န့ၣ် ဘၣ်တၢ်ပၥ်ထီၣ်က့ၤဝဲလၢ သုးကီၣ်ကးအခိၣ်မ့အီၣ်လဲၣ်အမဲၥ်ညါ...
ကစၢၢ်ဒိၣ်ကီၢ်ဆၣ်တၢ်ခိးခးပယီၤသုးလၢဟဲထီၣ်လူၤက့ၤဝဲခီပနံၥ်တၢ်မၤလီၢ်တဖၣ်သံဘၣ်ဒိဘၣ်ထံးတစှၤန့ၢ်(၁၀)ဂၤ
လါအီကူး ၆ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢဘျံးဒဝဲၢ်ကီၢ်ရ့ၣ်သုးက့(၄)ဟီၣ်ကဝီၤအပူၤစးထီၣ်လၢလါအီကူးထီၣ်(၁)သီအ နံၤန့ၣ်ပယီၤသုးကျိၤလၢဟဲထီၣ်လူၤက့ၤဝဲခီပနံၥ်တၢ်မၤလီၢ်လၢအိၣ်ကစၢၢ်ဒိၣ်ကီၢ်ဆၣ်(နိၣ်ဖးဒိၣ်)ဟီၣ်ကဝီၤအပူၤသ့ၣ်တဖၣ်တၢ်ခိးခးအဝဲသ့ၣ်လၢတၢ်ဘၢၣ်စၢၤအဃိသံဘၣ်ဒိဘၣ်ထံးတစှၤန့ၢ်(၁၀)ဂၤဘၣ်အဂ့ၢ်ကစၢၢ်ဒိၣ်ကီၢ်ဆၣ်အပှၤဘၣ်မူဘၣ်ဒါစံးဝဲန့ၣ်လီၤ. ပယီၤသုးအသုးကျိၤလၢအဟဲထီၣ်သ့ၣ်တဖၣ်အံၤန့ၣ်မ့ၢ်ဒ်သိးကဟဲထီၣ်လူၤက့ၤဝဲ(သ့ၣ်ခိၣ်)အခီပနံၥ်လၢကပၢဆှၢဒီသဒၢစၢၤဝဲအဂီၢ်, ဖဲအဝဲသ့ၣ်ဟဲထီၣ်လၢကျဲအဆၢကတီၢ်ကညီဒီကလုၥ်ထူၣ်ဖျဲးသုးမုၢ်ဒိၣ်သုးရ့ၣ်(၁၂)အပှၤသ့ၣ်တဖၣ်ခိးခးဝဲ လၢတၢ်ဘၢၣ်စၢၤတစှၤန့ၢ်(၆)ဘျီဘၣ်အသိးသံဘၣ်ဒိဘၣ်ထံးဝဲ(၁၂)ဂၤအဂ့ၢ်ကစၢၢ်ဒိၣ်ကီၢ်ဆၣ်အပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ. "တၢ်ဒုးခီန့ၣ်ဟဲကဲထီၣ်အသးဒ်အံၤပယီၤသုးသ့ၣ်တဖၣ်ခီန့ၣ်ကဘၣ်ဟဲထီၣ်လူၤက့ၤဝဲဒၣ်(သ့ၣ်ခိၣ်)အခီပနံၥ်လၢအမ့ၢ်ဝဲ(မၤလၣ်သါ)မီၤနီၤ. မ့ၢ်ဒ်သိး(သ့ၣ်ခိၣ်)ဖံးအီၣ်မၤအီၣ်က့ၤတၢ်ကသ့အဂီၢ်ဒီးအဝဲသ့ၣ်ဘၣ်ဟဲပၢၤဃၥ်ဂၢၤဃၥ်ဝဲဒ်န့ၣ်မီၤနီၤ. မ့ မ့ၢ်လၢပခိးခးအဝဲသ့ၣ်လၢတၢ်ဘၢၣ်စၢၤခီန့ၣ်အဝဲသ့ၣ်တကပၤသံဘၣ်ဒိဘၣ်ထံးဝဲကအိၣ်လၢ(၁၂)ဂၤလီၤ. အဝဲသ့ၣ်ဟဲ တုၤလၢခီပနံၥ်န့ၣ်ဖဲလါအီကူး(၅)သီအနံၤမီၤနီၤ. ပခိးခးအီၤလၢတၢ်ဘၢၣ်စၢၤန့ၣ်အိၣ်ဝဲဒၣ်(ဆီၣ်ထိ)သဝီန့ၣ်တဘျီ, မ့ၢ်ဝံၤ န့ၣ်ဟဲက့ၤလီၤခးဖဲ(နိၣ်ဖးဒိၣ်)သဝီတၢ်ဘၢၣ်စၢၤန့ၣ်တဘျီဒီးခဲလၢၥ်န့ၣ်အိၣ်ဝဲလၢ(၆)ဘျီလံမီၤ"အဂ့ၢ်စံးဘၣ်ခ့ၣ်အဲးစံၣ်-က ညီတၢ်ကစီၣ်န့ၣ်လီၤ. လၢန့ၣ်အမဲၥ်ညါပယီၤသုးကီၣ်ကးအံၤလၢတၢ်ကဟဲထီၣ်လူၤန့ၢ်က့ၤဝဲခီပနံၥ်တၢ်မၤအလီၢ်အံၤအဂီၢ်စးထီၣ်ဟဲထီၣ်ဝဲဒၣ်လၢလါအီကူးထီၣ်(၁)သီအနံၤလံဒီးဖဲအဝဲသ့ၣ်ဟဲထီၣ်လၢကျဲကတီၢ်တၢ်ခိးခးအဝဲသ့ၣ်လၢတၢ်ဘၢၣ်စၢၤအဃိခးလီၤကဒါက့ၤဝဲကျိဖးဒိၣ်ဘၣ်သံဝဲပှၤသဝီဖိတဂၤအသိးပယီၤသုးအံၤဟဲနုၥ်လီၤလၢ(ဆီၣ်ထိ)သဝီအပူၤဒီးခးသံဝဲပှၤသဝီဖိ(၂)ဂၤအဂ့ၢ်ကစၢၢ်ဒိၣ်အပှၤဘၣ်မူဘၣ်ဒါတဂၤဃီဝဲန့ၣ်စံးအါထီၣ်ဝဲဒၣ်န့ၣ်လီၤ. ပယီၤသုးအသုးကျိၤလၢအဟဲထီၣ်အံၤန့ၣ်မ့ၢ်ဝဲခီၣ်သုးရ့ၣ်(ခလရ-၂၈၅)ပလီသုးအပှၤဒီးဘျံးဝ့ၢ်သုးကီၣ်ကးသုးအပှၤသ့ၣ် တဖၣ်ပၥ်ဖှိၣ်ထီၣ်အသးဒီးအပှၤနီၣ်ဂံၢ်ခဲလၢၥ်အိၣ်ဝဲ(၆၀)ဒီး(၇၀)အဘၢၣ်စၢၤန့ၣ်လီၤ. ဖဲအဝဲသ့ၣ်လဲၤတုၤခီပနံၥ်ဝံၤတသီ ဒီးဟဲက့ၤဂုၥ်က့ၤဝဲအခံအဆၢကတီၢ်ပယီၤအသုးကျိၤခိၣ်ယီၣ်ဘၣ်စ့ၢ်ကီးဝဲသုးရ့ၣ်(၁၂)ဒိးလီၤပၥ်ဝဲမ့ၣ်ပိၢ်အဂ့ၢ်သ့ၣ်ညါဘၣ်စ့ၢ်ကီးန့ၣ်လီၤ. တကီၢ်ခါခဲအံၤန့ၣ်ဒူသဝီလၢအိၣ်ဖဲတၢ်ဒုးကဲထီၣ်သးအလီၢ်သ့ၣ်တဖၣ်ဒ်အမ့ၢ်ဆီၣ်ထိသဝီ,ဃူဖိးလူၢ်သဝီဒီးနိၣ်ဖးဒိၣ်သဝီသ့ၣ်တဖၣ်ဒူသဝီဖိဘၣ်ဃ့ၢ်အိၣ်ကဒုအသးဒီးကတီၢ်ခဲအံၤန့ၣ်ခီပနံၥ်လၢပယီၤသုးကျိၤဟဲက့ၤဂုၥ်က့ၤအခံတဖျၢၣ်အံၤန့ၣ်မ့ၣ်သုးကီၣ်ကးအိၣ်တ့ၢ်တအိၣ်တ့ၢ်ခီန့ၣ်တၢ်တသ့ၣ်ညါဒံးဘၣ်အဂ့ၢ်ကီၢ်ဆၣ်အပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ. ခီပနံၥ်လၢသုးကီၣ်ကးဟဲထီၣ်လူၤက့ၤဝဲဒၣ်အံၤန့ၣ်ဘၣ်တၢ်ကိးအမံၤလၢ(ပၠ့ၣ်ဖၠိထိ)ခီပနံၥ်ဒီးအိၣ်ဝဲဒၣ်ဖဲကစၢၢ်ဒိၣ်ကီၢ်ဆၣ်(နိၣ်ဖးဒိၣ်)ဟီၣ်ကဝီၤအပူၤန့ၣ်လီၤ. မ့ၢ်ခီပနံၥ်တဖျၢၣ်လၢဟံးန့ၢ်ဆူၣ်ကွံၥ်ဝဲကမျၢၢ်ဟီၣ်ခိၣ်ကပံၥ်ဒီးမၤဝဲဒၣ်(ရီဘၢၣ်)ကျီး ဒီးသူၣ်လီၤဝဲ(တိၣ်ရ့ၣ်ကဲဆဲး)ခီပနံၥ်တဖျၢၣ်အသိးမ့ၢ်ခီပနံၥ်တဖျၢၣ်လၢမၤသကိးတၢ်ဒီးသုးကီၣ်ကးအဂ့ၢ်သ့ၣ်ညါဘၣ်လၢလီၢ်ကဝီၤအပှၤဘၣ်မူဘၣ်ဒါအအိၣ်န့ၣ်လီၤ.
ဒူသထူၣ်ကီၢ်ရ့ၣ် ကျိဖးဒိၣ်အဃိတလါအတီၢ်ပူၤ ကမျၢၢ်သံ(၈)ဂၤႇဘၣ်ဒိ(၁၆)ဂၤ
လါအီကူာ် ၆ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်ဒီးသထူၣ်ကီၢ်ဆၣ်အပူၤ ကျိဖးဒိၣ်အဃိ တလါအတီၢ်ပူၤ ကမျၢၢ်သံ၀ဲဒၣ်(၈)ဂၤဒီးဘၣ်ဒိဘၣ်ထံး၀ဲဒၣ်(၁၆)ဂၤအဂ့ၢ်န့ၣ် ကီၢ်ရ့ၣ်တၢ်မၤနီၣ်စရီပူၤ အသိး သ့ၣ်ညါဘၣ်န့ၣ်လီၤႉ လီၤဆီဒၣ်တၢ်ဒူသထူၣ်ကီၢ်ရ့ၣ် ကီၢ်ဆၣ်(၂)ဘ့ၣ်အံၤ စးထီၣ်လါယူၤလံ ၁ သီတုၤ ၃၁ သီ လၢတလါအတီၢ်ပူၤ ခီဖျိပယီၤသုးခးလီၤကျိဖးဒိၣ်ဆူဒူသ၀ီတၢ်ဖံးအီၣ်မၤလီၢ်ကျဲတလီၢ်လီၢ်အဃိ လီၢ်က၀ီၤကမျၢၢ်သံဘၣ်ဒိဘၣ်ထံး ဘၣ်ဟဲကဲထီၣ်အသးဒ်အံၤလီၤအဂ့ၢ်န့ၣ် လံာ်တၢ်မၤနီၣ်စရိပူၤအသိးသ့ၣ်ညါဘၣ်န့ၣ်လီၤႉ ဒ်ကီၢ်ရ့ၣ်တၢ်မၤနီၣ်စရီပူၤပာ်ဖျါ၀ဲအသိးန့ၣ် တလါအတီၢ်ပူၤ ပယီၤသုးခးလီၤကျိဖးဒိၣ်(၇)ဘျီ ခးလီၤ၀ဲဒၣ်ကျိဖးဒိၣ် ခဲလၢာ်အဖျၢၣ်(၄၀)ဃၣ်ဃၣ်အဃိ ၦၤကမျၢၢ်သံၦၤဘၣ်ဒိ ဘၣ်ထံးတဖၣ်အကျါပၣ်ဃုာ်၀ဲဖိဒံဖိသၣ်ႇၦၤမိၢ်ဒၢတကးဒံး ဘၣ်လၢကျိဖးဒိၣ်အံၤအဃိ ကမျၢၢ်အဟံၣ်အဃီ,အဆၣ်ဖိကီၢ်ဖိႇတၢ်ထူၣ်တၢ်ဘိတဖၣ်စ့ၢ်ကီးဘၣ်ဒိဘၣ်ထံးဟးဂီၤ ၀ဲဒၣ်အိၣ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးတလါအတီၢ်ပူၤ ပယီၤသုးဒီးကညီဒီကလုာ်ဂၢၤသးကရၢ(KNDO) သုးရ့ၣ်(၂), ကညီဒီကလုာ်တၢ်ထူၣ် ဖျဲးသုးမုၢ်ဒိၣ်(KNLA) သုးရ့ၣ်(၂),သုးရ့ၣ်(၃)သုးပာ်ဖှိၣ်အဘၢၣ်စၢၤ တၢ်ဒုးစဲးပြဲးထီၣ်(၅)ဘျီ,တၢ်လဲၤတ့ၢ်လီၤဒြိမ့ၣ်ပိၢ် လၢပယီၤသုးတၢ်လီၢ်(၇)ဘျီအဃိ ပယီၤသုးတကပၤသံ(၉)ဂၤႇဘၣ်ဒိ(၁၁)ဂၤဒီးမ့မ့ၢ်လၢတၢ်ပၢၢ်ဆၢသုးကရူၢ် တကပၤ ဘၣ်ဒိ(၁)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒူသထူၣ်ကီၢ်ရ့ၣ် အပူၤကွံာ်လါယူၤတလါအတီၢ်ပူၤစ့ၢ်ကီး ခီဖျိကျိဖးဒိၣ်အံၤအဃိ ၦၤကမျၢၢ်သံ၀ဲဒၣ်(၆)ဂၤႇ ဘၣ်ဒိ(၃၅)ဂၤ ဒီး မ့ဘၣ်ကွၢ်လၢတၢ်ကဲထီၣ်သးကိးလါဒဲးန့ၣ်ခီဖျိကျိဖးဒိၣ်အံၤအဃိၦၤကမျၢၢ်သံဘၣ်ဒိဘၣ်ထံး ကဲထီၣ်သးအိၣ်၀ဲ ကိးလါဒဲးန့ၣ်လီၤႉ
တဒိကနၣ်လူၤပိၥ်ထွဲကီၢ်ရ့ၣ်လံၥ်ထုးထီၣ်ပၥ်ဖျါဘၣ်အဃိ,(KNLA)ကိးထံၣ်ဝဲ(ဝဲခမံၣ်)သုးကီၣ်ကး(Non-CDM)(၅)ဂၤ
လါအီကူၥ် ၅သီ, ၂၀၂၄နံၣ်, ခ့ၣ်အဲၣ်စံၣ် ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၆)ဒူပျၢ်ယၥ်ကီၢ်ရ့ၣ်,ဝီၢ်ရ့ၣ်ကီၢ်ဆၣ်,သရိၥ်ဝါဝ့ၢ်ဝဲခမံၣ်သုးကီၣ်ကးပဒိၣ်တီၤထီကၠိတၢ်လီၢ်အပူၤ,ခီဖျိတဒိကနၣ်လူၤပိၥ်မၤထွဲဝဲကီၢ်ရ့ၣ်အလံၥ်ထုးထီၣ်ပၥ်ဖျါဘၣ်အဃိ,(KNLA)ဖီၣ်ကိးထံၣ်ဝဲသုးကီၣ်ကးအ(NonCDM)ကၠိသရၣ်သရၣ်မုၣ်(၅)ဂၤအဂ့ၢ်,လီၢ်ကဝီၤပှၤဘၣ်မူဘၣ်ဒါတဖၣ်စံးဝဲန့ၣ်လီၤ. တၢ်ကိးထံၣ်သမံသမိးဝဲသုးကီၣ်ကး(NonCDM)ကၠိသရၣ်သရၣ်မုၣ်တဖၣ်အံၤန့ၣ်,ခီဖျိအဝဲသ့ၣ်တဖၣ်,တလူၤပိၥ်ထွဲဝဲကီၢ်ရ့ၣ်လံၥ်ထုးထီၣ်ဘိးဘၣ်ရၤလီၤဒီးဆဲးမၤဝဲသုးကီၣ်ကးအတၢ်ဖံးတၢ်မၤလၢခ့ၣ်အဲၣ်ယူၣ်တၢ်ပၢဟီၣ်ကဝီၤအပူၤအဃိလီၤအဂ့ၢ်,ဝီၢ်ရ့ၣ်ကီၢ်ဆၣ်ပှၤဘၣ်မူဘၣ်ဒါလၢတအဲၣ်ဒိးပၥ်ဖျါအမံၤတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“တၢ်ကိးထံၣ်ဝဲအဝဲသ့ၣ်တဖၣ်အံၤန့ၣ်မ့ၢ်တၢ်ဂ့ၢ်လၢအဒိးသန့ၤထီၣ်အသးလၢအဝဲသ့ၣ်တဖၣ်တဒိကနၣ်လူၤပိၥ်ထွဲလံၥ်ဘိးဘၣ်ရၤလီၤတၢ်သိၣ်တၢ်သီတဘ့ၣ်န့ၣ်ဘၣ်အဃိန့ၣ်လီၤ.ဘၣ်မနုၤအဃိလဲၣ်န့ၣ်ပဝဲတကပၤပထုးထီၣ်ဘိးဘၣ်ရၤလီၤလံၥ်န့ၣ်ချူးဆၢချူးကတီၢ်,တကးဘၣ်ပဒုးသ့ၣ်ညါအဝဲသ့ၣ်လၢကဘၣ်ပတုၥ်တၢ်မၤသုးကီၣ်းကးအတၢ်မၤလၢပခ့ၣ်အဲၣ်ယူၣ်လီၢ်ကဝီၤအပူၤန့ၣ်လီၤဘၣ်ဆၣ်ခီဖျိတလူၤပိၥ်မၤထွဲဝဲဘၣ်အဃိန့ၣ်ခဲအံၤအိၣ်က့ၤဒၣ်လၢတၢ်ကဘၣ်ဟံထီၣ်အရ့အသနၢၣ်တကပၤလီၤ”အဂ့ၢ်,စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါ,လံၥ်ထုးထီၣ်ပၥ်ဖျါလၢတၢ်ကဘၣ်ဟးထီၣ်ကွံၥ်လၢသုးကီၣ်ကးအတၢ်ဖံးတၢ်မၤအပူၤအံၤန့ၣ်တၢ်ဘိးဘၣ်ရၤလီၤဝဲလၢလါယူၤ(၂၈)သီအခါလံၤလံၤလံဒီးဟီၣ်ကဝီၤအပူၤပှၤလၢတလူၤပိၥ်မၤထွဲဝဲလံၥ်ထုးထီၣ်ပၥ်ဖျါဘၣ်တဖၣ်အံၤတၢ်ကဟံးထီၣ်ဖီၣ်ထီၣ်အရ့အဂီၢ်တၢ်ပၥ်လီၤတၢ်သိၣ်တၢ်သီအိၣ်ဝဲအဃိတၢ်ဟံးထီၣ်ဖီၣ်ထီၣ်အရ့အံၤကလဲၤအသးတဆီဘၣ်တဆီအိၣ်ဝဲအဂ့ၢ်,လီၢ်ကဝီၤပှၤဘၣ်မူဘၣ်ဒါလၢအဂၤတဂၤ,စံးစ့ၢ်ကီးဝဲန့ၣ်လီၤ. တကးဒံးဘၣ်,သုးကီၣ်ကး(NonCDM)ကၠိသရၣ်သရၣ်မုၣ်(၅)ဂၤလၢဘၣ်တၢ်ကိးထံၣ်သမံသမိးဝဲတဖၣ်အံၤမ့ၢ်ဝဲ,ဝဲခမံၣ်သဝီတီၤထီကၠိအသရၣ်ကၠိခိၣ်(အူမၠ့ၣ်စီၤအူ)တီၤထီကၠိပှၤနဲၣ်တၢ်(ဒီၤခ့ၣ်မၠးမၠးထိ,ဒီၤခဲၤခဲၤမိ)ဒီးတီၤဖုၣ်ကၠိပတီၢ်ကၠိသရၣ်(အူကၠီၤစိလွ့ၤဒီးအူကၠီၤဘိဝ့ၤ)သ့ၣ်တဖၣ်အဂ့ၢ်,သ့ၣ်ညါဘၣ်န့ၣ်လီၤ. ဒီးသုးကီၣ်ကးအပှၤတဖၣ်အံၤ(KNLA)ကိးထံၣ်အဝဲသ့ၣ်တဖၣ်ဖဲလါအီကူၥ်(၂)သီအနံၤအိၣ်ဝဲဒီး,တကီၢ်ခါခဲအံၤအဝဲသ့ၣ်တဖၣ်အိၣ်ဒံးဒၣ်တၢ်လၢတၢ်သမံသမိးအပူၤအဖၢမုၢ်ဒံးလီၤအဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲန့ၣ်လီၤ. တကတီၢ်ဃီ,သုးကီၣ်ကးအပှၤမၤတၢ်ဖိ(၅)ဂၤလၢတၢ်ကိးထံၣ်ဃၥ်ဝဲအံၤ,အဒူသဝီခိၣ်နၢ်သးပှၢ်တဖၣ်ထံၣ်လိၥ်ရဲၣ်ကျဲၤကတိၤန့ၣ်ခဲးတၢ်လၢအဝဲသ့ၣ်တဖၣ်အဂီၢ်,အိၣ်ဝဲအဂ့ၢ်လီၢ်ကဝီၤဖိတဖၣ်စံးဝဲန့ၣ်လီၤ. ဒ်န့ၣ်အသိး,(KNLA)ဒီးကမျၢၢ်တၢ်ဒီသဒၢသုးဟူးဂဲၤဝဲခမံၣ်လီၢ်ကဝီၤအပူၤအံၤ,အိၣ်ဝဲလၢရ့ၣ်ဒီးသရိၥ်ဝါကျဲမုၢ်ကပၤအသိး,ကျဲဒီတဘိအပူၤခံခီခံကပၤတၢ်ခးလိၥ်သးဒီးတၢ်ထုးဟးဂီၤဝဲသုးကီၣ်ကးသိလ့ၣ်ကဲထီၣ်ဝဲအသးခဲအံၤခဲအံၤအိၣ်ဝဲအမဲၥ်ညါ,မ့ၢ်ဝဲသုးကီၣ်ကးအိၣ်ဆိးဆီလီၤသးခးစၢၤဝဲကျိဖးဒိၣ်အလီၢ်တတီၤစ့ၢ်ကီးန့ၣ်လီၤ.
မုၢ်တြီၢ်ကီၢ်ရ့ၣ်လၢတလါအတီၢ်ပူၤတၢ်ဒုးကဲထီၣ်(၁၀၁)ဘျီ သုးကီၣ်ကးအပှၤသံ(၅၂)ဂၤ
လါအီကူၥ် ၅ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢမုၢ်တြီၢ်ကီၢ်ရ့ၣ်သုးက့နီၣ်ဂံၢ်(၅)ဟီၣ်ကဝီၤအပူၤစးထီၣ်လၢလါယူၤလံ(၁)သီတုၤ(၃၁)သီလၢ လါယူၤလံဒီတလါအတီၢ်ပူၤအံၤတၢ်ဒုးတၢ်ယၤကဲထီၣ်ဝဲလၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးသုးကီၣ်ကဘးအဘၢၣ်စၢၤခဲလၢၥ်(၁၀၁)ဘျီဒ်အံၤအဖီခိၣ်ပယီၤသုးကီၣ်ကးအပှၤသံ(၅၂)ဂၤဘၣ်ဒိ(၁၂)ဂၤအဂ့ၢ်ခ့ၣ်အဲၣ်ယူၣ်ထုးထီၣ်ပၥ်ဖျါတ့ၢ်ဃၥ်ဖဲလါယူၤလံ(၃)သီအနံၤန့ၣ်လီၤ. ခီဖျိလၢခံခီခံကပၤတၢ်ဒုးတၢ်ယၤကဲထီၣ်ဝဲဒ်အံၤအဃိန့ၣ်ပယီၤသုးကီၣ်ကးတကပၤဘၣ်သံဘၣ်ပှၢ်ဘၣ်ဒိဘၣ်ထံးအိၣ်ဝဲတကးဒံးဘၣ်တၢ်မၤဟးဂီၤကွံၥ်စ့ၢ်ကီးဝဲဒီးသုးကီၣ်ကးတၢ်သူၣ်ထီၣ်(၂)ဖျၢၣ်အဂ့ၢ်သ့ၣ်ညါဘၣ်အသိးမ့မ့ၢ်လၢကညီဒီကလုၥ်ထူၣ်ဖျဲးသုးမုၢ်ဒိၣ်ဃုၥ်ဒီးတၢ်ပၢၢ်ဆၢသုးပၥ်ဖှိၣ်သ့ၣ်တဖၣ်တကပၤခီန့ၣ်တၢ်ဘၣ်ဒိဘၣ်ထံးတအိၣ်နီတမံၤဘၣ်အဂ့ၢ်ခ့ၣ်အဲၣ်ယူၣ်မုၢ်တြီၢ်ကီၢ်ရ့ၣ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ. လၢန့ၣ်အမဲၥ်ညါမ့ၢ်လၢတၢ်ဒုးတၢ်ယၤကဲထီၣ်ဝဲဒၣ်ဒ်အံၤအဖီခိၣ်အဃိလၢကဟူးဂဲၤစိၥ်ဆှၢန့ၢ်ဝဲဒၣ်အပှၤသ့ၣ်တဖၣ်တၢ်အီၣ်တၢ်အီအံၤအဂီၢ်အိၣ်တ့ၢ်က့ၤဒၣ်ထဲကျဲတဘိလၢအမ့ၢ်တၢ်ဘၣ်ဟဲတ့ၢ်လီၤန့ၢ်အဝဲသ့ၣ်တၢ်အီၣ်တၢ်အီဒီးကဘီယူၤတဆီလီၤအဂ့ၢ်ပၥ်ဖျါဝဲန့ၣ်လီၤ. ဒ်န့ၣ်အသိးပယီၤသုးကီၣ်ကးတကပၤသူကလံၤကျါတၢ်ဒုးတကးဒံးဘၣ်ခးလီၤစ့ၢ်ကီးကျိဖးဒိၣ်ဆူကမျၢၢ်ဒူသဝီ,ကမျၢၢ်တၢ်ဖံးအီၣ်မၤအီၣ်လီၢ်ကျဲပူၤအိၣ်ဝဲအဘျီတဖၣ်အဘျီအဖၢမုၢ်လီၤအဂ့ၢ်ခ့ၣ်အဲၣ်ယူၣ်တၢ်ပၥ်ဖျါအပူၤအသိးသ့ၣ်ညါဘၣ်န့ၣ်လီၤ. မုၢ်တြီၢ်ကီၢ်ရ့ၣ်သုးက့နီၣ်ဂံၢ်(၅)ဟီၣ်ကဝီၤအပူၤဖဲပူၤကွံၥ်လါယူၤဒီတလါအတီၢ်ပူၤန့ၣ်စ့ၢ်ကီးတၢ်ဒုးကဲထီၣ်ဝဲ(၁၂၂)ဘျီလၢခံခီခံကပၤအဘၢၣ်စၢၤဒ်အံၤအဖီခိၣ်ပယီၤသုးကီၣ်ကးအပှၤသံ(၆၀)ဂၤ, ဘၣ်ဒိစ့ၢ်ကီးဝဲ(၁၉)ဂၤအဂ့ၢ်သ့ၣ်ညါဘၣ်အသိး လၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးက့နီၣ်ဂံၢ်(၅)ဒီးတၢ်ပၢၢ်ဆၢသုးပၥ်ဖှိၣ်တကပၤဘၣ်သံ(၂)ဂၤဒီးဘၣ်ဒိဝဲ(၃)ဂၤအဂ့ၢ်ပူၤကွံၥ်မုၢ်တြီၢ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ.
ကွၢ်ကပၥ်ပတၢ်လီၤဆီဒီးပၥ်ဖျါထီၣ်တၢ်ဃူတၢ်ဖိးဖဲလါခူးကံၢ်စုအဆၢကတီၢ်အဂ့ၢ်(KWO)ဆီၣ်တခူထီၣ်
လါအီကူး ၅ သီ ၂၀၂၄ နံၣ် ခ့ၣ်အဲးစံၣ် ဖဲလါခူးကံၢ်စုအဆၢကတီၢ်ပဝဲကညီဖိကိးဒံနီၢ်ဂၤဒဲးကကွၢ်ကပၥ်ပတၢ်လီၤဆီလၢအမ့ၢ်တၢ်ဘူၣ်တၢ်ဘါ, ထံရူၢ်ကီၢ်သဲး, တၢ် လီၢ်တၢ်ကျဲ, တၢ်စူၢ်တၢ်နၥ်ဒီးဟဲပၥ်ဖှိၣ်ထီၣ်လိၥ်ပသး, ပၥ်ဖျါထီၣ်ပတၢ်ဃူတၢ်ဖိးဒ်ပမ့ၢ်ကညီတကလုၥ်အသိးအိၣ်ဒီးပ တၢ်ဆဲးတၢ်လၤလၢအဂ့ၤအဂ့ၢ်ကညီပိၥ်မုၣ်ကရၢ(KWO)ဆီၣ်တခူထီၣ်ဝဲဖဲတနံၤအံၤလါခူး(၅)သီအနံၤန့ၣ်လီၤ. လါခူးကံၢ်စုအမူးအံၤမ့ၢ်ကညီဖိလုၢ်လၢ်ထူသနူဆဲးလၤတခါလၢပမိၢ်ပၢ်ဖံဖုလၢပျၢၤသ့ၣ်တဖၣ်မၤယုၤပှၤအိၣ်ဒီးအတၢ်ပညိၣ် လၢတၢ်ကိးဖှိၣ်ထုးဖှိၣ်က့ၤဖိလံၤလၢလီၤမုၢ်ြပံပြါတဖၣ်ဒီးထိၣ်ဃူထိၣ်ဖိးလိၥ်သးဒ်ဒူၣ်ဖိထၢဖိတဒူၣ်အသိး,မ့ၢ်ဝဲတၢ်ဆဲးတၢ်လၤလၢအဂ့ၤအိၣ်ဒီးအခီပညီမုၥ်ဒိၣ်မး,အါန့ၣ်အန့ၣ်ပတၢ်မ့ၢ်တၢ်ဒ်ကညီတကလုၥ်အသိးန့ၣ်ပှၤအါဂၤကထံၣ်ဒီးသ့ၣ်ညါပကညီဖိလၢဟီၣ်ခိၣ်ဒီဘ့ၣ်အဂ့ၢ်ကညီပိၥ်မုၣ်ကရၢအကရၢခိၣ်သရၣ်မုၣ်ကညီဖီဆီၣ်တခူထီၣ်ဝဲဒ်အံၤန့ၣ်လီၤ. "ကညီလါခူးကံၢ်အစုအမူးန့ၣ်မ့ၢ်ဝဲကညီလုၢ်လၢ်ထူသနူတၢ်ဆဲးတၢ်လၤတခါလၢပမိၢ်ပၢ်ဖံဖုမၤယုၤပှၤ, အိၣ်ဒီးတၢ်ပညိၣ် လၢကကိးဖှိၣ်ထုးဖှိၣ်ဝဲဒၣ်ဖိလံၤလၢလီၤမုၢ်ြပံပြါသ့ၣ်တဖၣ်ဒီးပကဘၣ်စၢဖှိၣ်လိၥ်ပသးထိၣ်ဃူလိၥ်ပသးဒ်ဒူၣ်ဖိထၢၣ်ဖိတဒူၣ်အသိးမီၤနီၤ. အဃိန့ၣ်ပထံၣ်လၢအကဲဝဲတၢ်ဆဲးတၢ်လၤလၢအဂ့ၤ, အိၣ်ဒီးအခီပညီမုၥ်မးလီၤ. အဃိန့ၣ်အကဲဝဲတၢ်ခွဲး တၢ်ယၥ်အဂ့ၤဝဲဒၣ်လၢပဝဲကညီဖိကိးဒံနီၢ်ဂၤဒဲးလီၤ. ပမ့ၢ်ဟဲလၢတၢ်ဘူၣ်တၢ်ဘါမ့ၢ်လီၤဆီ, ပထံရူၢ်ကီၢ်သဲး, တၢ်စူၢ်တၢ်နၥ် မ့ၢ်တဒ်လိၥ်အသးဒီး ပတၢ်လီၢ်တၢ်ကျဲမ့ၢ်ဂ့ၤ, ပတၢ်အိၣ်မူတီၤပတီၢ်မ့ၢ်ဂ့ၤ, မ့ၢ်တဒ်သိးလိၥ်အသးဘၣ်ဘၣ်ဆၣ်သနါက့န့ၣ် ပကြၢးဟံးတၢ်ခွဲးတၢ်ယၥ်ထိၣ်ဃူပၥ်ဖှိၣ်လိၥ်ပသးဒ်ပကဲပှၤတကလုၥ်အသိးမီၤနီၤ. မ့ၢ်ဝံၤန့ၣ်ပၥ်ဖျါထီၣ်ဝဲဒၣ်ပတၢ်ဆဲးတၢ် လၤလၢအဂ့ၤဝဲအံၤဒ်သိးပှၤကထံၣ်သ့ၣ်ညါဝဲဒၣ်ပပှၤကညီဖိသ့ၣ်တဖၣ်ဒီးအစှၤကတၢၢ်တၢ်ဃူတၢ်ဖိးဝဲန့ၣ်ကအိၣ်ဖျါထီၣ်ဝဲဒၣ်ဖဲလၢမုၢ်နံၤဝဲအံၤအဂီၢ်မီၤနီၤ" အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါလၢတၢ်မၤဖျါထီၣ်ပကညီလုၢ်လၢ်ထူသနူဒီးတၢ်ဆဲးတၢ်လၤအံၤအိၣ်ဝဲဖဲတၢ်မၤကညီနံၣ်ထီၣ်သီဒီးလါခူးကံၢ်စုအံၤအဃိ, မ်ပကဟ့ၣ်လီၤပတၢ်ဆၢကတီၢ်ဒီးဟဲသကိးဘၣ်ဃူဃူဒီးသိၣ်လိမၤယုၤပဖိပလံၤတဖၣ်ဒ်သိးကစိၥ်မူ စၢၤပကညီလုၢ်လၢ်ထူသနူတၢ်ဆဲးတၢ်လၤအံၤဆူညါတစိၤဘၣ်တစိၤအဂ့ၢ်ကညီပိၥ်မုၣ်ကရၢဟ့ၣ်ဂံၢ်ဟ့ၣ်ဘါဝဲကညီဖိကိးဂၤဒဲးန့ၣ်လီၤ. လၢတၢ်မၤလၤကပီၤလါခူးကံၢ်စုအပူၤန့ၣ်အိၣ်ဃုၥ်ဒီးတၢ်ဖိတၢ်လံၤ(၇)မံၤလၢအမ့ၢ်ဝဲ(ထံခုၣ်တခွး, လုၣ်ဝါသၢဘိ, မ့ၤကိၣ် လိၣ်နွံကိၣ်လိၣ်, မ့ၤတီၤနွံခါ, တကွံသၣ်နွံဖျၢၣ်, ဖီဂီၤနွံဒ့ဒီးကထံနွံကုၥ်သ့ၣ်တဖၣ်န့ၣ်လီၤ. တၢ်သ့ၣ်တဖၣ်အံၤအိၣ်ဒီးအခီ ပညီတခါစုၥ်စုၥ်လၢထုးဖှိၣ်ဝၥ်ဖှိၣ်က့ၤပဝဲကညီဖိသ့ၣ်တဖၣ်ဒ်သိးပကအိၣ်ဃူအိၣ်ဖိးဒီးပၥ်ဖှိၣ်သကိးဂံၢ်ဘါ, မၤနၢၤကွံၥ် ဒုၣ်ဒါဒီးလဲၤထီၣ်လဲၤထီဒ်ပှၤတလုၥ်အဂ့ၢ်ဒ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ. ကညီဖိလၢဟီၣ်ခိၣ်ဒီဘ့ၣ်အပူၤသ့ၣ်တဖၣ်ကပူၤဖျဲးဒီးတၢ်ဆူးက့ဆါဘီ, တၢ်အၢတၢ်သီတကးဘၣ်ကပှဲၤဒီးတၢ်အီၣ်ကုၥ် အီပှဲၤ,တၢ်သူၣ်ဖှံသးညီလၢကညီလါခူးကံၢ်စုအလါဝဲအံၤအပူၤကိးဂၤဒဲးဒီးမ်ကညီဖိလုၢ်လၢ်ထူသနူဒီးတၢ်ဆဲးတၢ်လၤအံၤကအိၣ်ကၢအိၣ်ခိးတုၤလၢဖိစိၤလံၤစိၤ,စိၤအဃၣ်ဃၣ်အဂ့ၢ်ကညီပိၥ်မုၣ်ကရၢ(KWO)ဆၢဂ့ၤဆၢဝါစ့ၢ်ကီးဝဲန့ၣ်လီၤ. ဒ်န့ၣ်အသိးကညီလါခူးကံၢ်စုအံၤန့ၣ်တၢ်ပၥ်ပနီၣ်အီၤဒီးတၢ်မၤဝဲလါခူးကံၢ်စုအမူးသ့ဝဲလၢဒီတလါညါအတီၢ်ပူၤဒီးမ့ၢ်တုၤဃီၤလၢလါခူးအလါကညီလါခူးကံၢ်စုအလါအတီၢ်ပူၤန့ၣ်ကညီဖိလၢအိၣ်ကီၢ်ပူၤကီၢ်ချၢကီၢ်ဆၢတၢ်လီၢ်သကုၤစးဒးသ့ၣ်တဖၣ်မၤလၤကပၤဝဲဒၣ်ကညီလါခူးကံၢ်စုအမူးတၢ်ရဲၣ်တၢ်ကျဲၤအဂ့ၢ်သ့ၣ်ညါဘၣ်န့ၣ်လီၤ.
တၢ်ဒုးလီၤၦီၢ်သုးမီၤစိရိၤတၢ်ဟူးတၢ်ဂဲၤ(Campaign)အံၤအလီၢ်အိၣ်လၢတၢ်ကဘၣ်ဆဲးမၤ၀ဲအဂ့ၢ် ခ့ၣ်အဲၣ်ယူၣ် စံး၀ဲ
လါအီကူာ် ၄ သီႇ ၂၀၂၄ နံၣ်ႇ ခ့ၣ်အဲးစံၣ် သုးမီၤစိရိၤအံၤမ့ၢ်ၦၤတဒူၣ်လၢအအၢကတၢၢ်လၢဟီၣ်ခိၣ်ချၢအဃိဒ်သိးသုးမီၤစိရိၤကလီၤမၢ်ကွံာ်လၢထံကီၢ်ပူၤအဂီၢ်် အလီၢ်အိၣ်လၢတၢ်ကဆဲးမၤ၀ဲ(Campaign)တၢ်ဟူးတၢ်ဂဲၤဒ်အံၤသၦၢ်ကတၢၢ်အဂ့ၢ်န့ၣ် ခ့ၣ်အဲၣ်ယူၣ် စံးလီၤ၀ဲဖဲ မဟါ လါအီကူာ် ၃ သီ ဟါခီတၢ်ကျၢၢ်တံၢ်က့ၤ(ခဲၤဖ့တီနီၢ်)တၢ်ရဲၣ်တၢ်ကျဲၤအပူၤန့ၣ်လီၤႉ သုးမီၤစိရိၤကလီၤမၢ်ကွံာ်အဂီၢ်(Campaign)တၢ်ဟူးတၢ်ဂဲၤဒ်အံၤတမ့ၢ်ထဲလၢမၤ၀ံၤတဘျီလီၤမၢ်ဒ်န့ၣ်ဘၣ်ဒီးမ့မ့ၢ်တခီအလီၢ်အိၣ်သၦၢ်ကတၢၢ်လၢတၢ်ကဘၣ်ဆဲးမၤ၀ဲတၢ်ဟူးတၢ်ဂဲၤအံၤအဃိၦၤကိးကလုာ်ဒဲးလၢအဘၣ်တၢ်ဆီၣ်တံၢ်မၤ နၢၤအီၤလၢသုးမီၤစိရိၤသ့ၣ်တဖၣ်ကပာ်ဖှိၣ်မၤသကိးပၢၢ်ဆၢမၤလီၤမၢ်ကွံာ်သုးမီၤစိရိၤသနူအဂ့ၢ်န့ၣ် ခ့ၣ်အဲၣ်ယူၣ် ၦၤကတိၤတၢ်ပၢ လၢအမ့ၢ်စ့ၢ်ကီး ခဲၤဖ့တီနီၢ်ၦၤကတိၤတၢ်ပၢ ပဒိၣ်စီၤကျၢၤစ့ စံး၀ဲန့ၣ်လီၤႉ “မုၢ်မဆါတနံၤအံၤပဘၣ်ကွၢ်ဆၢၣ်မဲာ်သုးမီၤစိရိၤသနူမီၤနီၤႉကယဲၢ်မ့ၢ်သုးမီၤစိရိၤဆီၣ်တံၢ်မၤနၢၤ၀ဲတဖၣ်န့ၣ် ထီဒါပၢၢ် ဆၢက့ၤသုးမီၤစိရိၤလီၤႉခဲၤဖ့တၢ်ရဲၣ်တၢ်ကျဲၤ၀ဲအံၤမ့ၢ်၀ဲဒၣ်ၦၤလၢသုးမီၤစိရိၤဆီၣ်တံၢ်မၤနၢၤအီၤသ့ၣ်တဖၣ်ပာ်ဖှိၣ်မၤ သကိးတၢ်လီၤႉသုးမီၤစိရိၤ၀ဲအံၤတဒ်သိးထံကီၢ်အဂၤသုးမီၤစိရိၤဘၣ်ႉလၢဟီၣ်ခိၣ်ချၢအံၤမ့ၢ်သုးမီၤစိရိၤလၢအအၢက တၢၢ်တဖုလီၤႉအဃိပမၤ(ခဲၤဖ့)တၢ်ရဲၣ်တၢ်ကျဲၤဒ်အံၤတဘျီဂီၢ်န့ၣ်တသ့ဘၣ်ႉအ၀ဲသ့ၣ်န့ၣ်တတူၢ်ဃၣ်အသးညီညီဘၣ်ႉအဃိသုးမီၤစိ&ိၤကလီၤမၢ်ကွံာ်လၢပထံပကီၢ်ပူၤအဂီၢ်န့ၣ်ပကဘၣ်ဆဲးမၤတၢ်ရဲၣ်တၢ်ကျဲၤ၀ဲအံၤအလီၢ်အိၣ်၀ဲသၦၢ်က တၢၢ်န့ၣ် ယအဲၣ်ဒိးတဲဒ်အံၤလီၤ”အဂ့ၢ်န့ၣ် စံး၀ဲန့ၣ်လီၤႉ ဖဲအပူၤကွံာ်လါအ့ဖြ့ၣ်လၢာ်အခါ သုးကီၣ်ကးအံၤလၢကထီၣ်မၤန့ၢ်က့ၤမၠၣ်၀တံၣ်ႇကီးတရံး၀့ၢ်လၢတၢ်ပၢၢ်ဆၢသုး ပာ်ဖှိၣ်ဒိၣ်စိ၀ဲအံၤအဂီၢ်ဒုၣ်ဒါအံၤသူ၀ဲဒၣ်ကလံၤဒုးသုးႇသိလ့ၣ်ထးႇတကးဒံးဘၣ်လၢပျီပူၤစ့ၢ်ကီး(အီၣ်စ့ၣ်ယး)သုးကျိၤဟဲထီၣ်၀ဲဒၣ်အါအါဂီၢ်ဂီၢ်အဃိတၢ်ဒုးကဲထီၣ်၀ဲဒၣ်ဒိၣ်ဒိၣ်မုၢ်မုၢ်လၢခံခီခံကပၤအဘၢၣ်စၢၤဒီးဒုၣ်ဒါတကပၤသံဘၣ်ဒိဘၣ်ထံးစ့ၢ်ကီးအိၣ်၀ဲအါမးအဂ့ၢ်န့ၣ် သ့ၣ်ညါဘၣ်န့ၣ်လီၤႉ အဃိလၢတၢ်ကဆီၣ်ဖျိးထီၣ်ကွံာ်(အီၣ်စ့ၣ်ယး)သုးကျိၤအံၤအဂီၢ် ဖဲအပူၤကွံာ် လါယူၤ ၁ သီအနံၤန့ၣ် ကီၢ်ပူၤကီၢ်ချၢ ကညီတ၀ၢခၢၣ်စးတဖၣ်တီခိၣ်ရိၣ်မဲဒုးအိၣ်ထီၣ်၀ဲ(Campaign)စ့ဆီၣ်ထွဲတၢ်ဟူးတၢ်ဂဲၤတၢ်ရဲၣ်တၢ်ကျဲၤအံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးပတအဲၣ်ဒိးတၢ်ဒုးတၢ်ယၤဘၣ်ဘၣ်ဆၣ်ခီဖျိတၢ်ဆီၣ်တံၢ်မၤနၢၤၦၤလၢတၢ်စုက၀ဲၤကျဲအဃိ ပဘၣ်ထီဒါခီၣ်ဆၢက့ၤအ၀ဲသ့ၣ်လၢဖီၣ်စုက၀ဲၤအကျဲဒ်အံၤလီၤ အဂ့ၢ်န့ၣ် ဒူပျာ်ယာ်ကီၢ်ရ့ၣ်ခိၣ် ပဒိၣ်စီၤလ့စတၣ် စံးလီၤ၀ဲလၢတၢ်ရဲၣ်တၢ်ကျဲၤအပူၤဒ်အံၤ န့ၣ်လီၤႉ “ဆၢကတီၢ်ခဲအံၤန့ၣ်ဒုးယၤဂ့ၢ်၀ီန့ၣ်မ့ၢ််တၢ်အကါဒိၣ်တခါလီၤႉတၢ်လၢဒုးယၤဂ့ၢ်၀ီန့ၣ်ဘၢၣ်ဖျိက့ၤထံရူၢ်ကီၢ်သဲးအကျဲ ဒ်သိးကဟိထီၣ်ဖျါထီၣ်အဂီၢ်န့ၣ်မ့ၢ်တၢ်မၤအကျဲတခါလီၤႉဒုးယၤဂ့ၢ်၀ီန့ၣ်ပတအဲၣ်ဒိးမၤဘၣ်ဘၣ်ဆၣ်သနါက့ၦၤဆီၣ်သနံးၦၤခီန့ၣ်ဟဲခီဖျိလၢတၢ်စုက၀ဲၤအဃိ၀ဲဒၣ်နါက့ပဘၣ်ထီဒါက့ၤလၢတၢ်စုဆူၣ်ခီၣ်တကးအကျဲလၢတၢ်ဖီၣ်စုက၀ဲၤလီၤႉတမ့ၢ်လၢပအဲၣ်ဒိးဖီၣ်စုက၀ဲၤဒီးမၤသံမၤ၀ီလိာ်သးဘၣ်ႉတၢ်ဟူးတၢ်ဂဲၤတခါအံၤတမ့ၢ်တၢ်လၢတၢ်ၦဲၤဘၣ်ဘၣ်ဆၣ်ကဲထီၣ်တၢ်ဂံၢ်တၢ်ဘါတၢ်ဆီၣ်မၤစၢၤတကပၤမီၤနီၤ”အဂ့ၢ်န့ၣ် စံးလီၤ၀ဲလၢတၢ်ရဲၣ်တၢ်ကျဲၤအပူၤန့ၣ်လီၤႉ ဒ်ၦၤဘၣ်မူဘၣ်ဒါစံးလီၤ၀ဲလၢတၢ်ရဲၣ်တၢ်ကျဲၤပူၤအသိးန့ၣ်(ခဲၤဖ့တီနီၢ်)တၢ်ဃုစ့ပာ်ကီၤလၢတၢ်မၤ၀ဲဘျီ၀ဲအံၤ တၢ်တိာ်လီၤ၀ဲ လၢစ့ယိၤကလီၢ်(၂၀၀)ဘးႇဘၣ်ဆၣ်တုၤလၢတၢ်ပာ်ပနီၣ်မုၢ်နံၤမုၢ်သီန့ၣ်တၢ်ဒိးန့ၢ်ဘၣ်၀ဲစ့ခဲလၢာ် (၅ႇ၂၇၂ႇ၅၀၆)ဘးဒီး စ့မျးကယၤလၢတၢ်ပာ်ပနီၣ်၀ဲအံၤကၦဲၤဂီၢ်လိၣ်ဒံး၀ဲဒၣ်(၇၃ႉ၆၄)မျးကယၤဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါခါလၢကဟဲစ့ၢ်ကီးတၢ်ရဲၣ်တၢ်ကျဲၤအိၣ်လၢတၢ်ကဆဲးမၤဒံး၀ဲဒၣ်(ခဲၤဖ့)တၢ်ဟူးတၢ်ဂဲၤအဃိ ကမျၢၢ်ထံဖိကီၢ်ဖိတဖၣ်ကနုာ်လီၤဆီၣ်ထွဲမၤစၢၤပၣ်ဃုာ်ပၣ်ဂီၢ်သကိးလၢတၢ်ဟူးတၢ်ဂဲၤအပူၤအဂ့ၢ်န့ၣ် (ခဲၤဖ့)ၦၤဘၣ်မူ ဘၣ်ဒါ ဆီၣ်တခူထီၣ်၀ဲန့ၣ်လီၤႉ တၢ်ကျၢၢ်တံၢ်က့ၤ(ခဲၤဖ့)တၢ်ရဲၣ်တၢ်ကျဲၤအပူၤအံၤ ခ့ၣ်အဲၣ်ယူၣ် ပဒိၣ်စီၤကျၢၤစ့ႇ...
ကျိဖးဒိၣ်အဃိထီၣ်ဘး(၂)နံၣ်ဘျဲၣ်လံဘၣ်ဆၣ်တုၤခဲအံၤကျူမဲသ၀ီဖိက့ၤအိၣ်လၢဟံၣ်တဘူၣ်ဒံးဘၣ်
လါအီကူာ် ၃ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁) သထူၣ်ကီၢ်ဆၣ် ကျူမဲသ၀ီအံၤ သုးဟံန့ၢ်တၢ်စိတၢ်ကမီၤလီၢ်ခံ ခီဖျိပယီၤသုး ခးလီၤကျိဖးဒိၣ်အဃိ သ၀ီဖိတဖၣ်ဘၣ်ဃ့ၢ်ထီၣ်ဟးပလဲာ်သးဒီးအ၀ဲသ့ၣ်ဃ့ၢ်န့ၢ်ထီၣ်ဘးလၢ(၂)နံၣ်ဘျဲၣ်လံ ဘၣ်ဆၣ် တုၤလၢခဲအံၤက့ၤအိၣ်လၢအဟံၣ်အဃီတဘူၣ်ဒံး၀ဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ သထူၣ်ကီၢ်ဆၣ် ကီးလၢၢ်ကရူၢ် ကျူမဲသ၀ီအံၤ သုးဟံန့ၢ်တၢ်စိတၢ်ကမီၤ၀ံၤစးထီၣ်ဖဲ(၂၀၂၂)နံၣ်အခါန့ၣ် သုးကလၢၤ လၢအိၣ်ဘူးဖဲလီၢ်က၀ီၤ၀ဲန့ၣ်သ့ၣ်တဖၣ်ခးလီၤကျိဖးဒိၣ်တလီၢ်လီၢ်အဃိ သ၀ီဖိဘၣ်ဃ့ၢ်ထီၣ်ဟးပလဲာ်အသးခဲလၢာ် ဒီးတကီၢ်ခါခဲအံၤအ၀ဲသ့ၣ်ဟးဃ့ၢ်အိၣ်န့ၢ်(၂)နံၣ်ဘျဲၣ်လံဘၣ်ဆၣ်တုၤလၢခဲအံၤက့ၤအိၣ်လၢအဟံၣ်အဃီအဒူသ၀ီပူၤ တဘူၣ်ဒံးဘၣ်အဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါစံး၀ဲန့ၣ်လီၤႉ ဘၣ်ဃးဒီးတၢ်ဂ့ၢ်အံၤဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤ စံး၀ဲလၢ“စးထီၣ်လၢ(၂၀၂၂)န့ၣ် အ၀ဲသ့ၣ် အိၣ်လၢ သ၀ီပူၤတဘူၣ်ဘၣ်ႉအ၀ဲသ့ၣ်ဒူသ၀ီန့ၣ်ကျိဖးဒိၣ်လီၤတဲာ်မၢ်မၢ်လၢတၢ်ဖံးအီၣ်မၤအီၣ်လီၢ်သ၀ီခိၣ်ဃၢၤႇသ၀ီပူၤအဃိအ၀ဲသ့ၣ်အိၣ်ဆိးတဘူၣ်လၢၤဘၣ်မီၤနီၤႉအဃိစးထီၣ်ဖဲန့ၣ်အ၀ဲသ့ၣ်ဃ့ၢ်ပလဲာ်တၢ်ဒုးတၢ်ယၤဘျီလဲၤအိၣ်ခူသူၣ်၀ဲဖဲ၀ၣ်ပူၣ်လ့ပူၤန့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ စးထီၣ်ဖဲနံၣ်၀ဲန့ၣ်ခီဖျိကျိဖးဒိၣ်အံၤအဃိကျူမဲသ၀ီဖိတဖၣ်အိၣ်လၢသ၀ီပူၤတဘူၣ်လၢၤဘၣ်တနီၤန့ၣ်လဲၤစံၣ်အိၣ်၀ဲ လၢ၀ၢ်ပူၣ်လ့ပူၤႇကီးလၢၢ်သ၀ီအိၣ်၀ဲဒၣ်ဒီးဒ်န့ၣ်အသိးၦၤဖိဒံဖိသၣ်လၢအဃ့ၢ်ထီၣ်သ့ၣ်တဖၣ်စ့ၢ်ကီးထီၣ်ကၠိတသ့ ဘၣ်လဲၤ အိၣ်က့ၤကၠိလၢဒူသ၀ီလၢအိၣ်ဘူးဖဲန့ၣ်တဖၣ်တုၤလၢခဲအံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါသ၀ီဖိသ့ၣ်တဖၣ်အံၤခီဖျိအ၀ဲသ့ၣ်ဘၣ်ဟးဃ့ၢ်ပလဲာ်သးလၢၦၤဒူၦၤသ၀ီအဃိတဖံးအီၣ်မၤအီၣ်ဘၣ် တၢ်မူၤမူၤနီၢ်နီၢ်ဘၣ်ဒီးတၢ်ဆီၣ်ထွဲမၤစၢၤစ့ၢ်ကီးတအိၣ်လၢလၢၦဲၤၦဲၤဘၣ်အဃိဘၣ်ကွၢ်ဆၢၣ်မဲာ်၀ဲအီၣ်အီအိၣ်ဆိးလီၢ်ကျဲတၢ်ဂ့ၢ်ကီသ့ၣ်တဖၣ်အဂ့ၢ်န့ၣ် ပဒိၣ် စီၤအ့နဲၤ စံးအါထီၣ်၀ဲန့ၣ်လီၤႉ “ၦၤဂ့ၢ်၀ီကရူၢ်ကရၢတဖၣ်ဒုဆီၣ်ထွဲမၤစၢၤအ၀ဲသ့ၣ်စှၤနံၤစှၤသီဂီၢ်လီၤႉကဆီၣ်ထွဲမၤစၢၤ၀ဲလၢလၢၦဲၤၦဲၤခီန့ၣ်မၤစၢၤ၀ဲတန့ၢ်စ့ၢ်ဘၣ်ႉမ့၀ံၤအ၀ဲသ့ၣ်န့ၣ်ဖံးအီၣ်မၤအီၣ်တၢ်တသဘျ့ဘၣ်ႉကဖံးအီၣ်မၤအီၣ်တၢ်န့ၣ်လၢအ၀ဲသ့ၣ်ဂီၢ်တၢ်ဘံၣ်တၢ်ဘၢတအိၣ်ဘၣ်ႉကျိဖးဒိၣ်မ့လီၤန့ၣ်ဘၣ်ဃ့ၢ်ပလဲာ်သးႇတၢ်ဖံးလီၢ်မၤလီၢ်တဖၣ်န့ၣ်အါဒၣ်တက့ၢ်အိၣ်တ့ၢ်ခီလီဒ်န့ၣ်လီၤႉအဃိအ၀ဲသ့ၣ်ကွၢ်ဆၢၣ်မဲာ်၀ဲအီၣ်အီတလၢတၦဲၤဘၣ်မီၤနီၤႉအဃိတနံၣ်ဂီၢ်တနံၣ်ဂီၢ်န့ၣ်ဟးဃုလုၢ်အီၣ်အသးသမူလၢတၢ် လီၢ်အဂၤ န့ၣ်လီၤ” အဂ့ၢ်န့ၣ် စံး၀ဲန့ၣ်လီၤႉ တကီၢ်ခါခဲအံၤကျိဖးဒိၣ်လီၤတဲာ်အစၢၤယံၤထီၣ်ဒီးအပူၤကွံာ်နွံအခါတၢ်စူၤထံဒိၣ်ထီၣ်အဃိသ၀ီဖိလၢအလဲၤအိၣ်ဖဲ ၀ၢ်ပူၣ်လ့ပူၤတဖၣ်ဆဲးအိၣ်၀ဲဖဲန့ၣ်တသ့လၢၤဘၣ်အဃိတနီၤန့ၣ်က့ၤအိၣ်ကဒါလၢသ၀ီပူၤအိၣ်၀ဲဘၣ်ဆၣ် ဘၣ်အိၣ်၀ဲလၢ တၢ်ဘၣ်ယိၣ်ဘၣ်ဘှီပူၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ ကျူမဲသ၀ီအံၤ ဟံၣ်ခိၣ်နီၣ်ဂံၢ်အိၣ်၀ဲ(၂၀၀)ဘျဲၣ်ဒီး လီၤဆီဒၣ်တၢ်ပယီၤသုးကလၢၤလၢအိၣ်တၢ်ခိၣ်တၢ်ဃၢၤ ဖဲန့ၣ်တဖၣ် တၢ်ပၢၢ်ဆၢကရူၢ်မ့လဲၤခးစဲးပြဲးအီၤမ့ၢ်ဂ့ၤႇတၢ်ဒုးကဲထီၣ်အိၣ်ဂ့ၤတအိၣ်ဂ့ၤအ၀ဲသ့ၣ်မ့ခးလီၤကျိဖးဒိၣ်တဘျီလၢ်လၢ်န့ၣ်အါဒၣ်တက့ၢ်လီၤတဲာ်ပိၢ်ဖးထီၣ်၀ဲလၢသ၀ီ၀ဲအံၤအခိၣ်အဃၢၤအဃိသ၀ီဖိတဖၣ်က့ၤအိၣ်လၢအဟံၣ်အဃီတဘူၣ်၀ဲဘၣ်ဒ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဃိၣ်သၢဖျၢၣ်ဝ့ၢ်ပူၤတၢ်မၤအါထီၣ်သိလ့ၣ်တၢ်ဟးထီၣ်က့ၤလီၤတၢ်သိၣ်တၢ်သီ
လါအီကူၥ် ၂သီ, ၂၀၂၄နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,တၢ်ပၢဟီၣ်ကဝီၤကီၢ်ကၠီၣ်တဲၣ်ကီၢ်ပယီၤကီၢ်ဆၢဃိၣ်သၢဖျၢၣ်ဝ့ၢ်အပူၤ,ပှၤတခီထံတခီကီၢ်ဖိတဖၣ်နုၥ်လီၤအိၣ်ဆိးအါထီၣ်ဝဲဒီးတဒိကနၣ်လူၤပိၥ်ထွဲဝဲသိလ့ၣ်တၢ်ဟးထီၣ်က့ၤလီၤတၢ်သိၣ်တၢ်သီဘၣ်အဃိ,တၢ်မၤအါထီၣ်ဝဲတၢ်ဘၣ်လူၤပိၥ်ထွဲသိလ့ၣ်တၢ်သိၣ်တၢ်သီတၢ်ဘျၢတဖၣ်အဂ့ၢ်,လီၢ်ကဝီၤပှၤဘၣ်မူဘၣ်ဒါတဖၣ်စံးဝဲန့ၣ်လီၤ. တကီၢ်ခါခဲအံၤ,ဃိၣ်သၢဖျၢၣ်ဝ့ၢ်အပူၤဖီၣ်ကစုကဝဲၤကရူၢ်ကရၢအသိလ့ၣ်,တၢ်ဝံစိၥ်တီဆှၢသိလ့ၣ်,သုးခိးကီၢ်ဆၢ(ဘံၣ်ကၠံၣ်အဲၣ်)ဒီးလီၢ်ကဝီၤဖိတဖၣ်အသိလ့ၣ်သ့ၣ်တဖၣ်အမဲၥ်ညါ,တရူးထံဖိကီၢ်ဖိတဖၣ်နုၥ်လီၤအိၣ်ဆိးဝဲတဖၣ်စ့ၢ်ကီးဆိးကါဝဲသိလ့ၣ်အါအါဂီၢ်ဂီၢ်ဘၣ်ဆၣ်တၢ်လူၤပိၥ်ထွဲဒိကနၣ်သိလ့ၣ်တၢ်ဟးထီၣ်က့ၤလီၤစှၤဝဲအဃိ,တၢ်ဘၣ်ထုးထီၣ်ဘိးဘၣ်ရၤလီၤမၤအါထီၣ်ဝဲသိလ့ၣ်တၢ်သိၣ်တၢ်ဘျၢဒ်အံၤလီၤအဂ့ၢ်,ပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“ပထုးထီၣ်လံၥ်အံၤန့ၣ်မ့ၢ်ဒ်သိးပှၤကိးဂၤဒဲးကလူၤပိၥ်ထွဲမၤထွဲအီၤအဂီၢ်လီၤ.လီၤဆီဒၣ်တၢ်လၢတရူးလၢနုၥ်လီၤအိၣ်ဆိးတဖၣ်အံၤ,ပၥ်လီၤအသးလၢအဟဲလၢထံကီၢ်ဒိၣ်ထီအဃိတဒိကနၣ်ဝဲသိလ့ၣ်တၢ်ဟးထီၣ်က့ၤလီၤတၢ်သိၣ်တၢ်သီတၢ်ဘျၢဘၣ်အသိး,တပၥ်ကဲပှၤလီၢ်ကဝီၤဖိတဖၣ်စ့ၢ်ကီးဘၣ်န့ၣ်လီၤ.အဝဲသ့ၣ်တဖၣ်န့ၣ်ဟးပၥ်ပတုၥ်သိလ့ၣ်လၢအဲၣ်ဒိးပၥ်ဝဲအလီၢ်ဒီးဟးနီနါစိၤသိလ့ၣ်လီၤ.အပူၤကွံၥ်တလါတအိၣ်ဒံးဘၣ်အဆၢကတီၢ်သိလ့ၣ်ဒီးဆဲးကဲးဘၣ်တဲးလိၥ်သးအိၣ်ဝဲခဲအံၤခဲအံၤအဃိပအိၣ်ဖှိၣ်က့ၤဒီးထုးထီၣ်ဒုးသ့ၣ်ညါလီၤက့ၤဒ်အံၤလီၤ”စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါ,တကီၢ်ခါခဲအံၤလၢတၢ်ဟ့ၣ်တၢ်သ့ၣ်ညါနၢ်ပၢၢ်အဂီၢ်,ပှၤလၢအဟးနီဝဲသိလ့ၣ်ယီၢ်(ဆဲးကဲးအပီၤ)လၢအသီၣ်ဒိၣ်တဖၣ်အံၤ,တၢ်ဖီၣ်ဃၥ်အဝဲသ့ၣ်တဖၣ်လၢရူဒီးတၢ်မၢဝဲအဘ့ၣ်လီၤကွံၥ်(ဆဲးကဲးအပီး)လၢအသီၣ်ဒိၣ်တဖၣ်အိၣ်ဝဲအသိး,ဒ်သိးတၢ်ဖီၣ်ထီၣ်ဂ့ၢ်ဝီကန့ၢ်ကသ့ကညီအဂီၢ်ပှၤလၢတအိၣ်ဒီးသိလ့ၢ်ယီၢ်အနီၢ်ဂံၢ်ဘၣ်သ့ၣ်တဖၣ်အံၤစ့ၢ်ကီးတၢ်စးထီၣ်မၢထီထီၣ်က့ၤဝဲ(ဆဲးကဲး)နီၢ်ဂံၢ်တဖၣ်အိၣ်ဝဲအဂ့ၢ်,ပှၤဘၣ်မူဘၣ်ဒါတဖၣ်စံးဝဲန့ၣ်လီၤ. တကးဒံးဘၣ်,ဃိၣ်သၢဖျၢၣ်ဝ့ၢ်အံၤ,ခီဖျိမ့ၢ်ဝဲထံဆၢကီၢ်ဆၢဝ့ၢ်တဝ့ၢ်အဃိကမျၢၢ်တၢ်ဟးထီၣ်က့ၤလီၤအိၣ်အါဝဲအသိး,ရၤမတံ,ရွံၣ်ကိၣ်ကိၤအပူၤတၢ်နီဟးထီၣ်ကွံၥ်ဝဲတရူးထံဖိကီၢ်ဖိတဖၣ်ဝံၤအလီၢ်ခံတလါခံလါအတီၢ်ပူၤတရူးထံဖိကီၢ်ဖိတဖၣ်နုၥ်လီၤအိၣ်ဆိးအါထီၣ်ဝဲဒီးပှ့ၤဝဲဟီၣ်ခိၣ်ကပံၥ်တၢ်လီၢ်တၢ်ကျဲတဖၣ်အိၣ်အါထီၣ်ဝဲကွ့ၢ်ကွ့ၢ်အိၣ်ဝဲအဂ့ၢ်,သ့ၣ်ညါဘၣ်ဒ်ဝ့ၢ်လီၢ်ကဝီၤကမျၢၢ်တဖၣ်စံးဝဲအသိးန့ၣ်လီၤ. တကတီၢ်ဃီ,တကီၢ်ခါခဲအံၤဃိၣ်သၢဖျၢၣ်ဝ့ၢ်အံၤတၢ်ပၢတၢ်ပြးတကပၤတၢ်တီခိၣ်ရိၢ်မဲပၢြပးအီၤလၢခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢဒီး,မ့မ့ၢ်ဝ့ၢ်ပူၤဟီၣ်ကဝီၤတၢ်ဘံၣ်တၢ်ဘၢတခီဘၣ်တၢ်တီခိၣ်ရိၢ်မဲဝဲလၢဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ် DKBA အဂ့ၢ်,သ့ၣ်ညါဘၣ်န့ၣ်လီၤ. ဒီးဒ်န့ၣ်အသိး,ဃိၣ်သၢဖျၢၣ်ဝ့ၢ်ပူၤအံၤ,ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢကရူၢ်ကရၢအမဲၥ်ညါ,ဖီၣ်စုကဝဲၤကရူၢ်ကရၢဒ်အမ့ၢ်, DKBA ၊ KNU/KNLA-PC BGF ဒီးမိၣ်ကီၢ်သီပၣ်တံၣ်ကရူၢ်ကရၢတဖၣ်နုၥ်လီၤအိၣ်ဆိးဟးထီၣ်က့ၤလီၤအိၣ်ဝဲဘၣ်ဆၣ်,မ့မ့ၢ်သုးကီၣ်ကးတဖၣ်တခီအတၢ်ဟးထီၣ်က့ၤလီၤလၢဝ့ၢ်ပူၤတအိၣ်ဝဲဘၣ်,ဘၣ်ဆၣ်ဆီလီၤအိၣ်ဆိးဝဲဒၣ်အသးလၢဝ့ၢ်ဃၢၤသုးကလၢၤတၢ်လီၢ်ကရၢၢ်ပူၤလီၤအဂ့ၢ်,သ့ၣ်ညါဘၣ်လၢဝ့ၢ်လီၢ်ကဝီၤကမျၢၢ်တဖၣ်အအိၣ်န့ၣ်လီၤ.
(KNLA)သုးဖိ(၂)ဂၤလၢအခးသံ(KNU)သ့ၣ်ပှၢ်ခိၣ်လီၢ်လံၤန့ၣ်သုးက့ကဟံးထီၣ်ဖီၣ်ထီၣ်မူဒါအဂ့ၢ်ဘျံးဒဝဲၢ်ကီၢ်ရ့ၣ်စံးဝဲ
လါအီကူး ၂သီ, ၂၀၂၄နံၣ်, ခ့ၣ်အဲးစံၣ်. ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ သုးက့(၄)ဘျံးဒဝဲၢ်ကီၢ်ရ့ၣ် ထံမိၢ်ပှၢ်ဟီၣ်ကဝီၤ သ့ၣ်ပှၢ်ခိၣ်လီၢ်လံၤလၢအမ့ၢ်ဖါတံၢ်ကီၤဘီတဂၤဘၣ်,တၢ်ခးသံအီၤလၢ(KNLA)သုးဖိ(၂)ဂၤဒီးသုးဖိဝဲန့ၣ်(၂)ဂၤန့ၣ်သုးက့ကဟံးထီၣ်ဖီၣ်ထီၣ်မူဒါအဂ့ၢ်သ့ၣ်ညါဘၣ်လၢကီၢ်ရ့ၣ်အပှၤဘၣ်မူဘၣ်ဒါအအိၣ်န့ၣ်လီၤ. ဖါတံၢ်ကီၤဘီလၢအသးနံၣ်အိၣ်(၅၀)ဘျဲၣ်အံၤန့ၣ် ဖဲအပူၤကွံၥ်လါယူၤလံ၁၃ဒီး၁၄သီအခါန့ၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးကီၢ်သူလ့ၤသုးမုၢ်ဒိၣ်(KTLA)အဘၢၣ်စၢၤတၢ်ခးလိၥ်သးကဲထီၣ်ဒီးတၢ်ကဲထီၣ်သးလီၢ်ဘူးဒီးအဒဲအဃိလၢတၢ်ကမံသမိးအဂီၢ်တၢ်က့ၤကိးအီၤဒီးခီဖျိ(KNLA)သုးဖိ(၂)ဂၤမူၤထီၣ်သံးဒီးခးသံကွံၥ်အီၤဒီးအခဲအံၤပှၤသုးဖိခံဂၤန့ၣ် တၢ်ဖီၣ်ဒုးဃၥ်အီၤဒီးအိၣ်လၢသုးက့အစုပူၤအဂ့ၢ် ဘျံးဒဝဲၢ်ကီၢ်ရ့ၣ်ခိၣ် ပဒိၣ်ဖျိးစိဝ့ စံးဘၣ်ဝဲ ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲလၢ“အဝဲကဲတ့ၢ် ထံမိၢ်ပှၢ်ဟီၣ်ကဝီၤသ့ၣ်ပှၢ်ခိၣ်ဝံၤဟးထီၣ်ဒီးက့ၤအိၣ်ဝဲဒၣ်လၢအနီၢ်ကစၢ်လီၢ်ကျဲန့ၣ်လီၤ.ဒီးဖဲလၢတၢ်ခးလိၥ်သးတဘျီန့ၣ်ဘူးဒီအဒဲအဃိတၢ်ဂ့ၢ်ပိၥ်ထွဲန့ၣ်လၢတၢ်ကသမံမိးအီၤအဂီၢ်တၢ်က့ၤကိးအီၤန့ၣ်လီၤ.တၢ်တဘၣ်ထွဲဘၣ်ဃးဒီးအဝဲသ့ၣ်နီတမံၤဘၣ်.အဝဲသ့ၣ်ထုးထီသမံသမိးဝဲဒီးခးသံကွံၥ်ဝဲလီၤ. တၢ်ဂ့ၢ်ဝဲန့ၣ်န့ၣ်အိၣ်ဒၣ်လၢသုးက့အစုပူၤဒီးအခဲအံၤအိၣ်လၢသုးက့တၢ်ဒုးဃၥ်အပူၤလီၤ.တၢ်တပျဲအဝဲသ့ၣ်ဟးနီတပူၤဘၣ်.”အဂ့ၢ်စံးဝဲဒၣ်န့ၣ်လီၤ. (KNLA)သုးဖိလၢခးသံတၢ်ခံဂၤန့ၣ်မ့ၢ်ဝဲသုးရ့ၣ်(၁၀)အပှၤလၢအမ့ၢ် သုးခိၣ်ဖိစီၤဒါအဲၣ်ဒီးသုးဖိပူလူးအဂ့ၢ်သ့ၣ်ညါဘၣ်အသိးဖါတံၢ်ကီၤဘီလၢတၢ်ဘၣ်ခးသံအီၤတဂၤန့ၣ်အဝဲဟးထီၣ်ကွံၥ်လၢထံမိၢ်ပှၢ်ဟီၣ်ကဝီၤသ့ၣ်ပှၢ်ခိၣ်ဖဲမဟိတနံၣ်ဒီးက့ၤအိၣ်က့ၤဝဲဒ်အမျၢၢ်တဂၤအသိးအဂ့ၢ်သ့ၣ်ညါန့ၣ်လီၤ. တကတီၢ်ဃီ ဘၣ်ဃးဒီးတၢ်ဂ့ၢ်ဝဲအံၤန့ၣ်တကီၢ်ခါခဲအံၤအဝဲသ့ၣ်ပျီပူၤပှၤထၢတၢ်ကစီၣ်ဖိတဆှၢထီၣ်န့ၣ်အဝဲသ့ၣ်တၢ်ဂ့ၢ်တၢ်ကျိၤနီတမံၤဒံးဘၣ်ဘၣ်ဆၣ် သုးက့(၄)ဟီၣ်ကဝီၤန့ၣ် တၢ်ဂ့ၢ်လၢကမျၢၢ်လီၤမၢ်ခီဖျိ (KNLA) မ့ၢ်ဂ့ၤ, (KTLA)မ့ၢ်ဂ့ၤဖီၣ်က့ၤကိးသမံသမိးန့ၣ်ဟဲအါထီၣ်ဝဲဒၣ်ဘၣ်ဆၣ်တၢ်ဘံၣ်တၢ်ဘၢတအိၣ်လၢအဝဲသ့ၣ်ပျီပူၤပှၤထၢတၢ်ကစီၣ်ဖိကဃုသ့ၣ်ညါတၢ်ဒူဒူအဂီၢ်ဘၣ်အဂ့ၢ် ကညီဂ့ၢ်ဝီခွဲးယၥ်ကရူၢ်(KHRG) အပှၤကတိၤန့ၢ်ခဲးတၢ် သရၣ်မုၣ်ဖီလါစံးစ့ၢ်ကီးဝဲဒ်အံၤန့ၣ်လီၤ. အဝဲစံးဝဲလၢ“ဘၣ်ဃးတၢ်ဂ့ၢ်တခါအံၤန့ၣ်ပျီပူၤပှၤမၤတၢ်ဖိတပၥ်ဖျါထီၣ်န့ၣ်ပှၤနီတမံၤဒံးဘၣ်.ပပျီပူၤပှၤမၤတၢ်ဖိတီၣ်ဖျါထီၣ်ဝဲလၢ (KNLA) မ့ၢ်ဂ့ၤ, (KTLA)မ့ၢ်ဂ့ၤ ဖီၣ်က့ၤကိးသဝီဖိ,ပှၤသဝီဖိဟါမၢ်န့ၣ်အိၣ်အါထီၣ်န့ၣ်လီၤ.အကဲထီၣ်သးတဘျီတခီၣ်န့ၣ်ပှၤတသ့ၣ်ညါလီၤတံၢ်ဘၣ် မ့ၢ်(KNLA)ဧါ, (KTLA)ဧါန့ၣ်.တၢ်ကဲထီၣ်သးဒ်န့ၣ် န့ၣ်လၢသုးက့(၄)ပူၤဟဲအါထီၣ်န့ၣ်လီၤ.ပပျီပူၤပှၤမၤတၢ်ဖိသနၥ်က့ အဝဲသ့ၣ်ပျံၤတၢ်, ကဃုသ့ၣ်ညါတၢ်ဒူဒူန့ၣ် ဃုသ့ၣ်ညါဝဲတဘူၣ်ဘၣ်.”အဂ့ၢ်စံးဝဲဒၣ်န့ၣ်လီၤ. တကီၢ်ခါခဲအံၤခ့ၣ်အဲၣ်ယူၣ်သုးက့(၄)ဟီၣ်ကဝီၤပူၤ (KNLA) ဒီး (KTLA) အဘၢၣ်စၢၤ ဖီၣ်ဒုးဃၥ်လိၥ်သးပှၤယၢ်ခီယၢ်ခီအိၣ်ဝဲအဖၢမုၢ်အသိးလၢပှၤသ့ၣ်တဖၣ်န့ၣ်ပၣ်ဃုၥ်ဒူသဝီကမျၢၢ်ဖိအိၣ်ဝဲဒၣ်အဂ့ၢ်သ့ၣ်ညါဘၣ်လၢဂံၢ်ခီၣ်ထံးတၢ်ကရၢကရိအပှၤဘၣ်မူဘၣ်ဒါအအိၣ်န့ၣ်လီၤ.