မူခိၣ်စူၤအဆၢတတဲၥ်ထံဒိၣ်ထီၣ်အဃိ,တၢ်ကြဲၢ်ကီၢ်ဆၣ်သဝီတနီၤအပူၤလီၢ်ကဝီၤကမျၢၢ်ဘၣ်သုးလီၢ်ကျဲ
လါယူၤလံ ၂၄သီ, ၂၀၂၄နံၣ်, ခ့ၣ်အဲၣ်စံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢသုးက့(၇)ဖၣ်အၣ်ကီၢ်ရ့ၣ်တၢ်ြကဲၢ်ကီၢ်ဆၣ်သဝီတနီၤအပူၤ,စးထီၣ်ဖဲတလါအံၤလါယူၤလံသၢနွံတနွံအတီၢ်ပူၤ,မူခိၣ်စူၤအဆၢတတဲၥ်ကစၢၢ်ထံလီၤ,ထံကျိပူၤထံဒိၣ်ထီၣ်ဝဲအဃိကမျၢၢ်လီၢ်ကဝီၤဖိလၢအိၣ်ဘူးဒီးထံကျိနံၤတၢ်လီၢ်လီၤဖုၣ်တဖၣ်,ထံပၢၢ်ထီၣ်တုၤလၢဟံၣ်ဃီအပူၤဒီးဘၣ်သုးလီၢ်သုးကျဲအိၣ်ဝဲအဂ့ၢ်,တၢ်ြကဲၢ်လီၢ်ကဝီၤဖိတဖၣ်စံးဝဲန့ၣ်လီၤ တၢ်ြကဲၢ်ကီၢ်ဆၣ်,ပံးတခးသဝီဟီၣ်ကဝီၤတၢ်လီၢ်လၢအလီၤဖုၣ်ဟံၣ်တဖၣ်အပူၤ,တကီၢ်ခါခဲအံၤထံဒိၣ်ထီၣ်ဝဲကွ့ၢ်ကွ့ၢ်အဃိလီၢ်ကဝီၤဖိလၢအိၣ်ဘူးဒီးထံကျိနံၤတဖၣ်အံၤဘၣ်သုးလီၢ်ကျဲစိၥ်ကွံၥ်တၢ်ဖိတၢ်လံၤအိၣ်ဝဲဒီးမူခိၣ်စူၤအဆၢတတဲၥ်ထံဒိၣ်ထီၣ်တုၤလၢယီၢ်ဒ့ဟးက့ၤတသ့လၢၤဘၣ်အိၣ်ဝဲအဂ့ၢ်,တၢ်ြကဲၢ်ကီၢ်ဆၣ်လီၢ်ကဝီၤဖိတဂၤစံးဝဲဒ်အံၤန့ၣ်လီၤ အဝဲစံးဝဲလၢ“ဖဲပံးတခးသဝီပူၤကျိနံၤတၢ်လီၢ်လီၤဖုၣ်တကပၤအံၤန့ၣ်,တၢ်စူၤအဆၢတတဲၥ်န့ၢ်တဘျူးသီလံ,ဒီးတၢ်စူၤဒ်အံၤန့ၣ်ကစၢၢ်ထံယွၤလီၤအဃိထံဒိၣ်ထီၣ်ဝဲဒၣ်န့ၣ်လီၤ,အခဲအံၤထံထီၣ်တုၤလၢပယီၢ်ဒ့လံပဘၣ်စိၥ်တၢ်ဖိတၢ်လံၤအဖၢမုၢ်လီၤပှၤလၢအိၣ်လၢသဝီခံလီၤဘူးဒီးထံကျိတဖၣ်နါက့န့ၣ်အဟံၣ်ဘၣ်သုးဝဲအတၢ်ဖိတၢ်လံၤန့ၣ်အိၣ်တဘျူးဖျၢၣ်ညါ,မ့မ့ၢ်ပှၤလၢအိၣ်တၢ်လီၢ်အဂၤဒီးပံးတခးသဝီခိၣ်ဃၢၤတဖၣ်ခီန့ၣ်တဘၣ်သုးအသးဒံးဘၣ်,ဘၣ်ဆၣ်ထံဒိၣ်ထီၣ်ရုၢ်ရုၢ်လီၤ”အဂ့ၢ်စံးဝဲန့ၣ်လီၤ လၢန့ၣ်အမဲၥ်ညါ,ခီဖျိတနံၣ်အံၤမူခိၣ်စူၤထံအါန့ၢ်ဒံးနံၣ်လၢအပူၤကွံၥ်အဃိ,မူခိၣ်မ့ၢ်ဆဲးစူၤဒ်အံၤတသီခံသီတပယူၥ်ဃီန့ၣ်တၢ်ဘၣ်ယိၣ်အိၣ်ဝဲလၢလီၢ်ကဝီၤကမျၢၢ်အိၣ်ဆိးဖံးအီၣ်အီအဂီၢ်ဒီး,စံၥ်လီၢ်တၢ်သူၣ်အီၣ်ဖျးအီၣ်ဘုဟုတဖၣ်အဂီၢ်အဂ့ၢ်စံးအါထီၣ်ဝဲဒၣ်န့ၣ်လီၤ တကးဒံးဘၣ်,တၢ်ြကဲၢ်ကီၢ်ဆၣ်အပူၤဒူသဝီတနီၤလၢထံဒိၣ်ထီၣ်ညီဝဲတဖၣ်အံၤခီဖျိအိၣ်ဘူးဝဲဒီးပံးတခးကျိ,တၢ်ြကဲၢ်ကျိဒီးဟီၣ်ကဝီၤအပူၤကစၢၢ်ဖိတဖၣ်အဃိတၢ်စူၤအဆၢတတဲၥ်ဒ်အံၤအဖီခိၣ်ထံဒိၣ်ထီၣ်ချ့ဝဲအဃိကမျၢၢ်လီၢ်ကဝီၤဖိတဖၣ်သူၣ်ကိၢ်သးဂီၤဝဲလၢကသဂၢၢ်ဘၣ်ထံဒိၣ်ခိၣ်ယွၤတၢ်ဂ့ၢ်ကီဒိၣ်ဒိၣ်မုၢ်မုၢ်အဂ့ၢ်,ကမျၢၢ်လီၢ်ကဝီၤဖိတဖၣ်စံးဝဲန့ၣ်လီၤ ဒီးတလါအံၤလါယူၤလံသၢနွံတနွံအပူၤခီဖျိမူခိၣ်စူၤအဆၢတတဲၥ်ဘၣ်အဃိထံလုၢ်ဘၢတၢ်ဒီးတၢ်သံတၢ်ပှၢ်တဖၣ်ကဲထီၣ်သးတအိၣ်ဝဲဘၣ်,ဘၣ်ဆၣ်ထံဒိၣ်ကတီၢ်ကလဲၤဖံးမၤအီၣ်အီအဂီၢ်ကျဲတၢ်ဟးထီၣ်က့ၤလီၤကီခဲအိၣ်ထီၣ်ဝဲအဂ့ၢ်လီၢ်ကဝီၤဖိတဖၣ်စံးဝဲန့ၣ်လီၤ တကတီၢ်ဃီ,လါယူၤလံသၢနွံတနွံအပူၤတၢ်စူၤအဆၢတတဲၥ်အဃိလၢကညီကီၢ်စဲၣ်ဝီၢ်ရ့ၣ်ကီၢ်ဆၣ်ဃိၣ်သၢဖျၢၣ်ထွံၣ်မီၤထိးကျဲတၢ်လီၢ်တဖၣ်အပူၤစ့ၢ်ကီးထံဒိၣ်ဘၢကျဲကဲထီၣ်ဝဲဒီးသိလ့ၣ်တဖၣ်ဘၣ်ဟးထီၣ်က့ၤလီၤကီကီခဲခဲအိၣ်ဝဲအဂ့ၢ်,သ့ၣ်ညါဘၣ်ဒ်ဝီၢ်ရ့ၣ်ကီၢ်ဆၣ်လီၢ်ကဝီၤဖိတဖၣ်စံးဝဲအသိးန့ၣ်လီၤ ဒ်န့ၣ်အသိး,တနံၣ်အံၤ(၂၀၂၄)နံၣ်လါယူၤအပူၤစ့ၢ်ကီးကညီကီၢ်စဲၣ်ရၤမတံဝ့ၢ်ထံကျိနံၤဒီးကျဲသ့ၣ်အပူၤထံဒိၣ်ထီၣ်တ့ၢ်အသးကဲထီၣ်ဝဲအဃိလီၢ်ကဝီၤဖိဟံၣ်ခိၣ်လၢအကထိသဂၢၢ်ဘၣ်တ့ၢ်ဝဲထံလုၢ်ဘၢတၢ်ကီတၢ်ခဲအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ
သုးကီၣ်ကးအခိၣ်သုးခိၣ်ကျၢၢ်ဒိၣ်စိ(မ့အီၤလဲၣ်)ဟံးထီၣ်က့ၤပတြီၤကီၢ်ခိၣ်မူဒါလၢ(အူမၠ့ၣ်ဆွ့ၣ်)အလီၢ်
လါယူၤလံ ၂၃သီ, ၂ဝ၂၄နံၣ်, ခ့ၣ်အဲးစံၣ် သုးကီၣ်ကးပတြီၤကီၢ်ခိၣ်(အူမၠ့ၣ်ဆွ့ၣ်)အတၢ်အိၣ်ဆူၣ်အိၣ်ချ့တဘၣ်လီၢ်ဘၣ်စးဘၣ်အဆၢကတီၢ်,ဒ်သိးအမူဒါတၢ်ဖံးတၢ်မၤသ့ၣ်တဖၣ်တလီၤဖျဲၣ်လီၤဟိဘၣ်အဂီၢ်,သုးခိၣ်ကျၢၢ်ဒိၣ်စိ(မ့အီၣ်လဲၣ်)ဟံးထီၣ်က့ၤဝဲပတြီၤကီၢ်ခိၣ်မူဒါလၢ(အူမၠ့ၣ်ဆွ့ၣ်)အလီၢ်အဂ့ၢ်,သုးကီၣ်ကးတၢ်ကစီၣ်သန့တဖၣ်ရၤလီၤဝဲလၢစိၤရှၢၣ်မံးဒံးယၢၣ်အပူၤဖဲမဟါလါယူၤလံ(၂၂)သီအနံၤန့ၣ်လီၤ တကီၢ်ခါခဲအံၤ,ပတြီၤကီၢ်ခိၣ်(အူမၠ့ၣ်ဆွ့ၣ်)တဂၤအံၤအတၢ်အိၣ်ဆူၣ်အိၣ်ချ့တဂ့ၤဘၣ်အဃိဟံခွဲးလၢကကူစါယါဘျါအသးဒီးလၢတၢ်ကဟံးထီၣ်ဖီၣ်ထီၣ်ထံဖိကီၢ်ဖိတၢ်ြတီဆၢဒီသဒၢဒီးတၢ်ဘံၣ်တၢ်ဘၢကီၣ်ကးကရၢအတၢ်ဖံးတၢ်မၤတဖၣ်အဂီၢ်,ဆှၢဃီၤဝဲလံၥ်တၢ်ဒုးသ့ၣ်ညါဒီးဆဲးလီၤဝဲအမံၤလၢလံၥ်တၢ်ဆီတလဲဟ့ၣ်လီၤမူဒါလၢမ့အီၣ်လဲၣ်အစုအပူၤဖဲ၂၀၂၄နံၣ်လါယူၤလံ(၂၂)သီအနံၤ(၁၁း၃၀)နၣ်ရံၣ်အဆၢကတီၢ်အဂ့ၢ်,သုးကီၣ်ကးအစုတီၤဖီလၥ်(MRTV)တၢ်ကစီၣ်ပၥ်ဖျါဝဲဖဲမဟါလါယူၤလံ(၂၂)သီအနံၤန့ၣ်လီၤ ဘၣ်ဃးဒီးသုးကီၣ်ကးအခိၣ်သုးခိၣ်ကျၢၢ်ဒိၣ်စိ(မ့အီၣ်လဲၣ်)အတၢ်ဟံထီၣ်က့ၤဝဲမူဒါလၢပတြီၤကီၢ်ခိၣ်အလီၢ်အံၤအဖီခိၣ်ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢပှၤကတိၤတၢ်ပၢပဒိၣ်စီၤကျၢၤစ့ပဲၥ်ထံနီၤဖးစံးဝဲဒ်အံၤန့ၣ်လီၤ အဝဲစံးဝဲလၢ“ဘၣ်ထွဲဒီးသုးကီၣ်ကးအခိၣ်မ့အီၣ်လဲၣ်အတၢ်ဟံးန့ၢ်က့ၤဝဲကီၢ်ခိၣ်မူဒါလီၢ်လၤလၢကီၢ်ခိၣ်ခံအိၣ်တၢ်ရဲၣ်တၢ်ကျဲၤအံၤန့ၣ်အဆိကတၢၢ်တထံၣ်န့ၣ်ပအဲၣ်ဒိးတဲလၢတၢ်မၤဒ်အံၤန့ၣ်မ့ၢ်ဒၣ်သုးကီၣ်ကးညီနုၢ်မၤဝဲအတၢ်ဖံးတၢ်မၤတဖၣ်လီၤ,ပမ့ကွၢ်ကဒါက့ၤလၢအပူၤကွံၥ်အဝဲသ့ၣ်ဟံအါထီၣ်ဝဲဒၣ်တၢ်စိကမီၤဃုလါသ့ၣ်တဖၣ်န့ၣ်အခဲအံၤနၢ်ပၢၢ်ဝဲလၢမၤဝဲတပၢလၢၤဘၣ်အဃိန့ၣ်တၢ်ရဲၣ်တၢ်ကျဲၤအံၤမ့ၢ်တၢ်ဃုဝဲဒၣ်ကျဲအသီတဘိလၢကဒိးန့ၢ်ဘၣ်တၢ်စိကမီၤယံၥ်ယံၥ်ထၢထၢန့ၣ်လီၤ”အဂ့ၢ်စံးဝဲဒၣ်န့ၣ်လီၤ ဒီးသုးကီၣ်ကးအခိၣ်မ့အီၣ်လဲၣ်မၤဝဲတၢ်ဟံးထီၣ်ဖီၣ်ထီၣ်တၢ်မၤသ့ၣ်တဖၣ်အံၤန့ၣ်မ့ၢ်ဒ်သိးကမၤကဲထီၣ်ကဒီးဝဲတၢ်ဃုထၢအသီတဘျီလၢအဖိးသဲစးဒ်ထံဂုၤကီၢ်ဂၤပဒိၣ်တဖုအသိးတုၤလၢအန့ၢ်တုၤလၢအနၢၤတၢ်ဖးဒ်သိးအပူၤကွံၥ်ဘိးဘၣ်ရၤလီၤတ့ၢ်ဝဲအသိးလီၤအဂ့ၢ်,ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢပှၤကတိၤတၢ်ပၢပဲၥ်ထံနီၤဖးစံးအါထီၣ်ဝဲန့ၣ်လီၤ တကတီၢ်ဃီ,တလါအံၤလါယူၤလံ(၃၁)လါလၢၥ်အပူၤသုးကီၣ်ကး(၅)ဝီတဝီဂ့ၢ်ဂီၢ်အူတၢ်ဘိးဘၣ်ရၤလီၤကတီၢ်ကလၢၥ်ကွံၥ်ဝဲဒီးလၢတၢ်ကမၤအါထီၣ်ဂ့ၢ်ဂီၢ်အူနံၣ်လါအဂီၢ်,တၢ်ကဘၣ်ဆဲးမၤဝဲတၢ်ဆၢတဲၥ်သ့ၣ်တဖၣ်အိၣ်ဝဲအဖီခိၣ်တကီၢ်ခါခဲအံၤသုးကီၣ်ကးကရူၢ်ကရၢအကျါသုးခိၣ်ကျၢၢ်ဒိၣ်စိ(မ့အီၣ်လဲၣ်)ကဲထီၣ်ဝဲပှၤလၢအစိကမီၤအဒိၣ်ကတၢၢ်န့ၣ်လီၤ လၢတၢ်န့ၣ်အဃိသုးကီၣ်ကးအတၢ်ဂဲၤလိၥ်ဝဲအံၤအဖီခိၣ်,ပဝဲတၢ်ပၢၢ်ဆၢကရူၢ်ကရၢတဖၣ်ပကဘၣ်အိၣ်ဒီးတၢ်ပၥ်သးလၢပကတြီဆၢအီၤတုၤလၢတုၤလၢတၢ်ကဲထီၣ်လိၣ်ထီၣ်တအိၣ်တဂ့ၤအဂီၢ်အဂ့ၢ်,ပဒိၣ်စီၤကျၢၤစ့ဆီၣ်တခူစံးစ့ၢ်ကီးဝဲန့ၣ်လီၤ ဒ်န့ၣ်အသိး,(၂၀၂၁)နံၣ်သုးကီၣ်ကးဟံးန့ၢ်တၢ်စိကမီၤအလီၢ်ခံ,သုးကီၣ်ကးအံၤပၥ်လီၤဝဲပတြီၤကီၢ်ခိၣ်(၂)ဂၤအိၣ်ဝဲဘၣ်ဆၣ်ခီဖျိအကီၢ်ခိၣ်သ့ၣ်တဖၣ်အံၤအတၢ်အိၣ်ဆူၣ်အိၣ်ချ့တဘၣ်လီၢ်ဘၣ်စးဘၣ်အဃိအပူၤကွံၥ်ဟံးက့ၤဝဲတၢ်အိၣ်ဘှံးလၢတၢ်မၤအပူၤတဂၤလံအိၣ်ဝဲအသိး,အခဲအံၤပတြီၤကီၢ်ခိၣ်(အူမၠ့ၣ်ဆွ့ၣ်)အံၤတၢ်အိၣ်ဆူၣ်အိၣ်ချ့တဂ့ၤဘၣ်ဒီးဘၣ်အိၣ်က့ၤလၢဟံၣ်တၢ်ကွၢ်ထွဲအပူၤအဂ့ၢ်,သ့ၣ်ညါဘၣ်န့ၣ်လီၤ
ဖိသၣ်ပိၥ်မုၣ်တဂၤခီၣ်တပျၤဒီးလီၤတဲၥ်သံလၢဆ့ၣ်ယွၤထံလီၤဆူ
လါယူၤလံ ၂၃ သီ, ၂၀၂၄ နံၣ်, ခ့ၣ်အဲးစံၣ် တလၢၤကီၢ်စဲၣ်-ပီၤကီၢ်ဆၣ်(ဆ့ၣ်ယွၤ)သ၀ီထံလီၤဆူကရၢၢ်အပူၤဖဲလါယူၤလံ(၂၁)သီမုၢ်ဃ့ၢ်လီၤ(၂)နၣ်ရံၣ်ဃၣ်ဃၣ်အ ဆၢကတီၢ်ဖိသၣ်ပိၥ်မုၣ်ဖိတဂၤအခီၣ်တပျၤဒီးလီၤတဲၥ်သံဝဲဒီးဖဲမဟါဂီၤခီအဆၢကတီၢ်တၢ်ထုးထီၣ်န့ၢ်က့ၤ၀ဲအမိၢ်ပှၢ်လံအဂ့ၢ်(ယၤမညၣ်)ဂ့ၢ်ဂီၢ်အူပှၤဂ့ၢ်၀ီတၢ်တိစၢၤမၤစၢၤကရူၢ်စံး၀ဲဒၣ်န့ၣ်လီၤ. ဖိသၣ်ပိၥ်မုၣ်ဖိလၢအိၣ်တလၢၤကီၢ်စဲၣ်-မူၣ်ဒိၤကီၢ်ဆၣ်တဂၤအံၤန့ၣ်, ဖဲအဝဲအဟဲဟးလိၥ်ကွဲ၀ဲ(ဆ့ၣ်ယွၤ)ထံလီၤဆူအဆၢ ကတီၢ်ဒီးဖဲထံယွၤလီၤ၀ဲဆူၣ်အကတီၢ်လၢတၢ်တပၥ်သူၣ်ပၥ်သးအပူၤအခီၣ်တပျၤဒီးလီၤတဲၥ်၀ဲလၢလၢၢ်ကဆူးပူၤအဃိသံ၀ဲဒၣ်လီၤအဂ့ၢ်(ယၤမညၣ်)ဂ့ၢ်ဂီၢ်အူပှၤဂ့ၢ်၀ီတၢ်တိစၢၤမၤစၢၤကရူၢ်စံး၀ဲဒၣ်ဒ်အံၤန့ၣ်လီၤ. "လီၤတဲၥ်အိၣ်ကတးထီၣ်အသးဖဲလၢၢ်ကဆူၣ်န့ၣ်ဖဲ(၂၁)သီမီၤနီၤ. ပှၤဟဲဟးဖဲထံလီၤဆူ၀ဲအံၤန့ၣ်အိၣ်၀ဲအါမးလီၤ. မ့ၢ်လၢ တၢ်စူၤကတီၢ်အဃိန့ၣ်ထံယွၤဆူၣ်၀ဲလီၤ. ပှၤအါအဃိန့ၣ်ဟးဘၣ်တိဘၣ်တဲၥ်လိၥ်သးအဃိခီၣ်ဘျ့ဒီးလီၤတဲၥ်၀ဲမီၤနီၤ. ဖဲ(၂၂)သီဂီၤခီအဆၢကတီၢ်န့ၣ်တၢ်ထုးထီၣ်အစိၣ်၀ံၤတဘျီဃီန့ၣ်အမိၢ်အပၢ်ဟဲဟံးန့ၢ်က့ၤ၀ဲအစိၣ်မီၤနီၤ."အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဖဲပှၤဂ့ၢ်၀ီတၢ်တိစၢၤမၤစၢၤကရူၢ်လဲၤမၤစၢၤဒီးထုးထီၣ်၀ဲအတီၢ်ပူၤန့ၣ်မ့ၢ်လၢထံယွၤလီၤအဂံၢ်ဆူၣ်၀ဲအဃိတၢ်ထုးထီၣ်အီၤတန့ၢ်ဘၣ်အဖီခိၣ်ဖဲ(၂၂)သီအနံၤဂီၤခီအဆၢကတီၢ်န့ၣ်ဃုၥ်ဒီးပှၤဒူသ၀ီဖိလၢအိၣ်ဘူးဖဲန့ၣ်သ့ၣ်တဖၣ်အတၢ်မၤစၢၤဒီးဘၣ်တၢ်ထုးထီၣ်ကွံၥ်၀ဲန့ၣ်လံအဂ့ၢ်အ၀ဲစံးအါထီၣ်၀ဲဒၣ်န့ၣ်လီၤ. ဒ်န့ၣ်အသိးဖဲပူၤကွံၥ်၂၀၁၉နံၣ်လါယူၤ(၈)သီအနံၤဂီၤခီအဆၢကတီၢ်ပှၤပိၥ်ခွါလၢအဟဲဟးလိၥ်ကွဲထံ(၃)ဂၤစ့ၢ်ကီးလီၤထွံဃုၥ်၀ဲလၢထံကျါဒီးတဂၤန့ၣ်တၢ်ထံၣ်န့ၣ်က့ၤ၀ဲအစိၣ်ဘၣ်ဆၣ်မ့မ့ၢ်လၢအ၀ဲခံဂၤခီန့ၣ်လီၤမၢ်ကွံၥ်၀ဲကဲထီၣ်တ့ၢ်သးစ့ၢ်ကီးအဂ့ၢ်သ့ၣ်ညါဘၣ်န့ၣ်လီၤ. (ဆ့ၤယွၤ)ထံလီၤဆူ၀ဲအံၤန့ၣ်အိၣ်၀ဲဒၣ်လၢ(ပီၤကီၢ်ဆၣ်)နဲၣ်ကၠံခၠီအဃၢၤဒီးအိၣ်စီၤစုၥ်ယံၥ်ဝဲဒၣ်ဒီးမီၤလမၠဲၣ်ဝ့ၢ်(၃၀)ကံလိမံထၢၣ်အဂ့ၢ်သ့ၣ်ညါဘၣ်အသိးတနံၣ်အံၤတၢ်စူၤခါအဆၢကတီၢ်လီၢ်က၀ီၤဖိဖဲန့ၣ်သ့ၣ်တဖၣ်ဒီးလီၢ်က၀ီၤအဂၤသ့ၣ်တဖၣ်ပှၤဟဲဟးလိၥ်ကွဲ၀ဲထံလီၤဆူအံၤဟဲအါထီၣ်၀ဲဒၣ်အဂ့ၢ်သ့ၣ်ညါဘၣ်စ့ၢ်ကီးန့ၣ်လီၤ.
တၢ်လဲၤခးသ့ၣ်စယးပၢၤကီၢ်၀ဲၤလီၢ် ပယီၤသုးခးလီၤကျိဖးဒိၣ်အဃိကမျၢၢ်သံဘၣ်ဒိဘၣ်ထံး ၃ ဂၤ
လါယူၤလံ ၂၃ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ဖဲမဟါလါယူၤလံ ၂၂ သီ မုၢ်ထူၣ်အဆၢကတီၢ်န့ၣ် တၢ်ပၢၢ်ဆၢသုးပာ်ဖှိၣ်ကရူၢ်လဲၤခး၀ဲ(သ့ၣ်စယၣ်)ပၢၤကီၢ်၀ဲၤလီၢ်အံၤလၢ(၄၀ မမ)မီထးဖိ ဒီး တကတီၢ်ဃီဖဲန့ၣ်ခီဖျိပယီၤသုးက့ၤခးလီၤကဒါကျိဖးဒိၣ်အဃိ လီၢ်က၀ီၤကမျၢၢ်သံဘၣ်ဒိဘၣ်ထံး ၃ ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ သုးကီၣ်ကး(သ့ၤစယၣ်)ပၢၤကီၢ်၀ဲၤလီၢ်လၢအိၣ်ကၠဲးထိၣ်ကီၢ်ဆၣ်ပူၤအံၤ ဖဲမဟါမုၢ်ထူၣ် ၁၂း၃၀ အဆၢကတီၢ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်လဲၤခး၀ဲဒီး တကတီၢ်ဃီဖဲ ၁၂း၄၃ မံးနံးန့ၣ်အမျိာ်သုး (၃၁၀)ခးလီၤ ကဒါကျိဖးဒိၣ်(၁၀)ဖျၢၣ်ဃၣ်ဃၣ် လီၤတဲာ်ပိၢ်ဖးထီၣ်၀ဲလၢ(ယွၤလ့)သ၀ီပူၤအဃိ ကမျၢၢ်သံ၀ဲဒၣ် (၁)ဂၤႇဘၣ်ဒိ၀ဲဒၣ်(၂)ဂၤ အဂ့ၢ်န့ၣ် ဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤ စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ အ၀ဲစံး၀ဲလၢ“ၦၤလဲၤခးအ၀ဲသ့ၣ်ဒီးမီထးဖိဘျီသုးကီၣ်ကးအမျိာ်သုးက့ၤခးလီၤကဒါကျိဖးဒိၣ်အဃိဘၣ်သံၦၤ(သ့ၣ်စယး) ဖိအပိာ်မုၣ်တဂၤဒီးအပိာ်ခွါတဂၤႉၦၤခံဂၤန့ၣ်အဒီမါ၀ၤလီၤႉအမါတဂၤန့ၣ်ဘၣ်ဒိမ့မ့ၢ်လၢအ၀ၤတဂၤခီန့ၣ်ဘၣ်၀ဲဒၣ်အခိၣ်သၣ်ဃံဘျီသံ၀ဲတဘျီဃီန့ၣ်လီၤ”အဂ့ၢ်န့ၣ် စံး၀ဲန့ၣ်လီၤႉ ကျိဖးဒိၣ်အဃိၦၤလၢသံတဂၤန့ၣ်မ့ၢ်၀ဲ ကိၤလ့စ့ၣ်သူ(၄၇)နံၣ်ဒီး မ့မ့ၢ်ၦၤလၢအဘၣ်ဒိသ့ၣ်တဖၣ်န့ၣ်မ့ၢ်၀ဲ ကိၤလ့စ့ၣ်သူၤ အမါ မၣ်ကၠံၤကၠံၤလ့(၄၅)နံၣ် ဒၢန့ၢ်(၄)လါတၢ်ဘၣ်ယိၣ်အိၣ်ဒီး မၣ်ယံၤ၀့ၤလွ့ၤ(၄၂)နံၣ်သ့ၣ်တဖၣ်အံၤအဂ့ၢ်န့ၣ် သ့ၣ်ညါဘၣ် န့ၣ်လီၤႉ တၢ်လဲၤခး(သ့ၣ်စယး)ပၢၤကီၢ်၀ဲၤလီၢ်ဘျီ၀ဲအံၤအခါ ပယီၤသုးတကပၤတၢ်သံတၢ်ဘၣ်ဒိဘၣ်ထံးအိၣ်၀ဲအသိး ၦၤဘၣ်ဒိ ဘၣ်ထံးတဖၣ်အကျါပၣ်ဃုာ်ပၢၤကီၢ်သုးအမါအိၣ်၀ဲဒီးဘၣ်ဆၣ်ဘၣ်ဃးတၢ်သံတၢ်ဘၣ်ဒိဘၣ်ထံးအနီၣ်ဂံၢ်န့ၣ်တၢ်ဃုသ့ၣ်ညါမၤလီၤတံၢ်အီၤအဖၢမုၢ်လီၤအဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါစံး၀ဲန့ၣ်လီၤႉ ကၠဲးထိၣ်ကီၢ်ဆၣ်ပူၤ သုးဟံန့ၢ်တၢ်စိတၢ်ကမီၤ၀ံၤလီၢ်ခံ သုးကီၣ်ကး(သ့ၣ်စယး)ပၢၤကီၢ်၀ဲၤလီၢ်အံၤ ဘၣ်တၢ်လဲၤခး စဲးပြဲးအီၤ...
ဘျံးဒဝဲၢ်ကီၢ်ရ့ၣ်ကီၢ်ပူၤပှၤလီၢ်အိၣ်ကမှံဖိသ့ၣ်တဖၣ်လၢကက့ၤအိၣ်က့ၤဆိးဒူသဝီၤပူၤအဂီၢ်ဘၣ်ပျံၤ၀ဲဟီၣ်လၥ်မ့ၣ်ပိၢ်
လါယူၤလံ ၂၂ သီ ၂၀၂၄ နံၣ် ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သလ့ၤတၢ်ပၢဘျံးဒ၀ဲၢ်ကီၢ်ရ့ၣ်(သုးက့-၄)ဟီၣ်က၀ီၤအပူၤကမျၢၢ်ပှၤလီၢ်အိၣ်ကမှံဖိလၢဘၣ်ဃ့ၢ်တၢ်ဒုးတၢ် ယၤသ့ၣ်တဖၣ်တကီၢ်ခါအခဲအံၤန့ၣ်လၢကက့ၤအိၣ်က့ၤဆိး၀ဲလၢအဒူသဝီၤပူၤအဂီၢ်ဘၣ်ပျံၤဘၣ်ဖုး၀ဲဒၣ်ဟီၣ်လၥ်မ့ၣ်ပိၢ်အဂ့ၢ်ဘျံးဒဝဲၢ်ကီၢ်ရ့ၣ်ကီၢ်ပူၤပှၤမၤစၢၤပှၤလီၢ်အိၣ်ကမှံအပှၤဘၣ်မူဘၣ်ဒါစံး၀ဲဒၣ်န့ၣ်လီၤ. ခီဖျိလၢဟီၣ်က၀ီၤပူၤတၢ်ဒုးတၢ်ယၤဒီးသုးကီၣ်ကးအတၢ်ဟူးတၢ်ဂဲၤအဃိပှၤလီၢ်အိၣ်ကမှံဖိလၢဘၣ်လဲၤဃ့ၢ်အိၣ်ကဒုအသးဆူခိခိၣ်ပှၢ်လၢ်ကျါ, ထံနါထံခံ, ဒူသ၀ီၤဃၢၤဒီးဒူသ၀ီအဂၤသ့ၣ်တဖၣ်လၢကက့ၤအိၣ်က့ၤဆိးအနီၢ်ကစၢ်ဒူသဝီပူၤအဂီၢ် ဘၣ်ပျံၤဘၣ်ဖုး၀ဲသုးကီၣ်ကးကဘီယူၤ,ကျိဖးဒိၣ်ဒီးအဒိၣ်အအါဘၣ်ပျံၤ၀ဲဟီၣ်လၥ်မ့ၣ်ပိၢ်အဂ့ၢ်ဘျံးဒဝဲၢ်ကီၢ်ရ့ၣ်ကီၢ်ပူၤပှၤမၤစၢၤပှၤလီၢ်အိၣ်ကမှံဖိမူဒါခိၣ်သရၣ်စီၤဘိဘိစံး၀ဲဒၣ်န့ၣ်လီၤ. "အဒိၣ်အအါန့ၣ်ကဘီယူၤ, ကျိဖးဒိၣ်ဒီးပယီၤသုးဟီၣ်လၥ်မ့ၣ်ပိၢ်အိၣ်စ့ၢ်ကီး၀ဲမီၤနီၤ. မ့မ့ၢ်ဟီၣ်လၥ်မ့ၣ်ပိၢ်ခီန့ၣ်ဒုအိၣ်လၢ ဝ့ၢ်တၢ်အဲၣ်,ဝ့ၢ်ပတါတကပၤန့ၣ်မီၤနီၤ. ခီဖျိလၢပယီၤသုးခီသ့ၣ်တဖၣ်န့ၣ်အိၣ်ဒံး၀ဲဖဲန့ၣ်အဃိသးန့ၣ်မီၤနီၤ. အခဲအံၤန့ၣ်အ ၀ဲသ့ၣ်ဟူးဂဲၤအါထီၣ်၀ဲမီၤနီၤ. ဒိးလီၤ၀ဲမ့ၣ်ပိၢ်စ့ၢ်ကီးလီၤ." အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါလၢပှၤလီၢ်အိၣ်ကမှံဖိလၢအိၣ်ဘူးဒီးထံဆၢကီၢ်ဆၢသ့ၣ်တဖၣ်အဂီၢ်တၢ်ရဲၣ်ကျဲၤန့ၢ်၀ဲတၢ်အီၣ်တၢ်အီတလါတဘျီဒီးကတီၢ်ခဲအံၤန့ၣ်မ့ၢ်လၢတၢ်စူၤခါအဃိတၢ်ရဲၣ်ကျဲၤန့ၢ်ကဒါ၀ဲ(၃)လါတဘျီအိၣ်၀ဲအသိးပှၤလီၢ်အိၣ်ကမှံဖိလၢအိၣ်ယံၥ်,တၢ်၀ံစိၥ်တီဆှၢန့ၢ်၀ဲတၢ်အီၣ်တၢ်အီတညီသ့ၣ်တဖၣ်တၢ်လဲၤဆီၣ်ထွဲမၤစၢၤအ၀ဲသ့ၣ်လၢကျိၣ်စ့အဂ့ၢ်သရၣ်စီၤဘိဘိစံးအါထီၣ်၀ဲဒၣ်န့ၣ်လီၤ. ဒ်န့ၣ်အသိးကီၢ်ဆၣ်လၢအအိၣ်ယံၥ်၀ဲဒၣ်ဒီးထံဆၢကီၢ်ဆၢဒ်အမ့ၢ်လၢၢ်မုၢ်လါကီၢ်ဆၣ်ဒီးကစၢၢ်ဒိၣ်ကီၢ်ဆၣ်ခံဘ့ၣ်အပူၤအံၤန့ၣ်ပှၤလီၢ်အိၣ်ကမှံဖိမျးကယၤခဲလၢၥ်ထီၣ်ဘးအိၣ်၀ဲလၢ(၆၁)မျးကယၤလံအဂ့ၢ်သ့ၣ်ညါဘၣ်လၢပှၤဘၣ်မူဘၣ်တၢ်မၤနီၣ်စရီအပူၤအသိးန့ၣ်လီၤ. ဘျံးဒ၀ဲၢ်ကီၢ်ရ့ၣ်အပူၤစးထီၣ်လၢသုးဟံးန့ၢ်ဆူၣ်တၢ်စိတၢ်ကမီၤ၀ံၤအလီၢ်ခံတုၤတကီၢ်ခါခဲအံၤန့ၣ်ကမျၢၢ်ပှၤဃ့ၢ်မှံဟးဖျိးခဲလၢၥ်ပှၤနီၣ်ဂံၢ်အိၣ်၀ဲ(၁၁၂,၂၄၉)ဂၤအဂ့ၢ်န့ၣ်သ့ၣ်ညါဘၣ်န့ၣ်လီၤ.
စ့ယိၤအပှ့ၤထီၣ်အဆၢကတီၢ်,ရၤမတံဝ့ၢ်ကမျၢၢ်လီၢ်ကဝီၤဖိတဖၣ်ဘၣ်ဟ့ၣ်ဝဲထံလဲလၢစ့ယိၤအဃိသဂၢၢ်ဘၣ်တၢ်ကီတၢ်ခဲ
လါယူၤလံ ၂၂သီ, ၂၀၂၄နံၣ်, ခ့ၣ်အဲးစံၣ် ကီၢ်ကၠီၣ်တဲၣ်ကညီကီၢ်စဲၣ်,ကီၢ်ဆၢရၤမတံဝ့ၢ်ပူၤ,ရၤမတံဝ့ၢ်ကမျၢၢ်လီၢ်ကဝီၤဖိတဖၣ်အံၤ,ကၠီၣ်တဲၣ်စ့ယိၤအပှ့ၤထီၣ်အဆၢကတီၢ်ဘၣ်ဟ့ၣ်ဝဲထံလဲလၢစ့ယိၤအဃိသဂၢၢ်ဘၣ်ဝဲကျိၣ်စ့တၢ်ကီတၢ်ခဲတၢ်ဃံးတၢ်စ့ၤအဂ့ၢ်,ရၤမတံဝ့ၢ်လီၢ်ကဝီၤကမျၢၢ်တဖၣ်စံးဝဲန့ၣ်လီၤ ပယီၤစ့ဒိးလဲအပှ့ၤလီၤဒီးစ့ယိၤအပှ့ၤထီၣ်ဝဲအဖီခိၣ်ရၤမတံဝ့ၢ်ကမျၢၢ်လီၢ်ကဝီၤဖိတဖၣ်ဘၣ်ဟ့ၣ်ဝဲထံလဲလၢစ့ယိၤအဃိဃ့ထီၣ်ဝဲပှၤဘၣ်မူဘၣ်ဒါတဖၣ်လၢထၢက့ၤဝဲထံလဲလၢစ့ပယီၤအဂ့ၢ်ရၤမတံလီၢ်ကဝီၤဖိလၢတအဲၣ်ဒိးပၥ်ဖျါအမံၤဘၣ်တဂၤစံးဝဲဒ်အံၤန့ၣ်လီၤ အဝဲစံးဝဲလၢ“တၢ်ဘၣ်ဟ့ၣ်ထံလဲလၢကၠီၣ်တဲၣ်စ့အဃိတၢ်ကီတၢ်ခဲန့ၣ်အိၣ်ဝဲ,ပဘၣ်ဟ့ၣ်လၢစ့ယိၤပမ့ဒွးလၢစ့ပယီၤန့ၣ်လီၤလၢဒီဒူၣ်လံ,တလါမ့လၢၥ်ယဲၢ်ပီၢ်န့ၣ်နဘၣ်ဟ့ၣ်လၢဃုပီၢ်နွံပီၢ်လံ,မ့ပၥ်ပနီၣ်မၢဟ့ၣ်ဝဲလၢစ့ပယီၤဒုပဘၣ်ဟ့ၣ်ကိညၢ်ဝဲတစဲးယၤ,တခီလၢစးထီၣ်ဟ့ၣ်လီၤဝဲထံန့ၣ်ဖီၣ်န့ၣ်ဝဲထဲစ့ယိၤတုၤလၢခဲအံၤလီၤ,အဃိန့ၣ်ပဝဲပအဲၣ်ဒိးလၢဒ်သိးကမျၢၢ်တဖၣ်ကိးဂၤကဒိးန့ၢ်သူဘၣ်ထံလၢလၢလီၣ်လီၣ်တၢ်ဃံးတၢ်စ့ၤတအိၣ်ဘၣ်အဂီၢ်န့ၣ်ပှၤဘၣ်မူဘၣ်ဒါတဖၣ်ကပၥ်ပနီၣ်န့ၣ်ပှၤလၢစ့ပယီၤမီၤ”အဂ့ၢ်စံးဝဲန့ၣ်လီၤ လၢန့ၣ်အမဲၥ်ညါ,ဘၣ်ဟ့ၣ်ဝဲထံလဲဒီးဒိးန့ၢ်ဘၣ်ဝဲထံတကြၢးကၢကီၣ်လိၥ်သးဘၣ်အိၣ်ဝဲဒီးတၢ်စူၤခါဆၢကတီၢ်ဘၣ်ဆၢသၢဝဲမူခိၣ်စူၤထံအိၣ်ဝဲအသိး,တၢ်ကိၢ်ခါအဆၢကတီၢ်အါတက့ၢ်ပှၤဘၣ်ပှ့ၤသူဝဲထံလၢတၢ်ချၢအိၣ်ဝဲအဃိသဂၢၢ်ဘၣ်ထံတၢ်ဂ့ၢ်ကီအဂ့ၢ်စံးအါထီၣ်ဝဲဒၣ်န့ၣ်လီၤ တကးဒံးဘၣ်,တၢ်ကိၢ်ခါအဆၢကတီၢ်,ဘၣ်ပှ့ၤသူဝဲထံလၢတၢ်ချၢဒီးသိလ့ၣ်တခိၣ်န့ၣ်ဘၣ်ဟ့ၣ်ဝဲလၢစ့ပယီၤ(၂၀၀၀၀)ကၠးအိၣ်စ့ၢ်ကီးဝဲအဃိသဂၢၢ်ဘၣ်ဝဲထံတၢ်ဃံးတၢ်စ့ၤတၢ်ကီတၢ်ခဲအါမးအဂ့ၢ်,ကမျၢၢ်လီၢ်ကဝီၤဖိတဖၣ်စံးဝဲန့ၣ်လီၤ တကတီၢ်ဃီ,တကီၢ်ခါခဲအံၤတၢ်ထၢဝဲထံလဲ(၁)ယူၣ်နံၣ်န့ၣ်စ့ယိၤ(၁၉)ဘးတုၤလၢ(၂၅)ဘးအိၣ်ဝဲအဃိတလါအတီၢ်ပူၤ,ထံအပှၤ့ထီၣ်ဝဲလၢစ့ယိၤ(၅၀၀)ဘးတုၤလၢအကထိအိၣ်ဝဲဒီးမ့မ့ၢ်လၢဝဲလၢစ့ပယီၤတခီအိၣ်ဝဲလၢ(၇၀၀၀၀)ကလးကၠးတုၤလၢတကလီၢ်ဘၢၣ်စၢၤအဂ့ၢ်,လီၢ်ကဝီၤကမျၢၢ်တဖၣ်စံးဝဲန့ၣ်လီၤ ဒ်န့ၣ်အသိး,လၢတၢ်ကဆီတလဲထၢက့ၤထံလဲလၢစ့ပယီၤအဂီၢ်ဝ့ၢ်လီၢ်ကဝီၤဖိတဖၣ်အံၤဆဲးကျိးဝဲရၤမတံဝ့ၢ်ထံဝဲၤကျိၤဘၣ်ထွဲပှၤဘၣ်မူဘၣ်ဒါတဖၣ်ဘၣ်ဆၣ်ထံပှၤဘၣ်မူဘၣ်ဒါတဖၣ်တဘှါဆှဲဝဲဘၣ်အိၣ်ဝဲအဂ့ၢ်လီၢ်ကဝီၤဖိတဖၣ်စံးဝဲန့ၣ်လီၤ
စယဲၣ်ကၠံလီၢ်ကဝီၤအပူၤတၢ်နုၥ်လီၤအီၣ်ဟုၣ်သိလ့ၣ်ယီၣ်(စဲးကဲၤ)တုၤလၢဟံၣ်ကရၢၢ်အပူၤဟဲအါထီၣ်
လါယူၤလံ ၁၉ သီ ၂၀၂၄ နံၣ် ခ့ၣ်အဲးစံၣ် ကညီကီၢ်စဲၣ်တီအူကီၢ်ရ့ၣ်သုးက့(၂)ထီတထူၣ်ကီၢ်ဆၣ်, စယဲၣ်ကၠံလီၢ်က၀ီၤဒူသ၀ီတနီၤအပူၤစးထီၣ်လၢတလါအံၤလါ ယူၤလံထီၣ်သီအခါလံၤလံၤတၢ်နုၥ်လီၤအီၣ်ဟုၣ်ကမျၢၢ်သိလ့ၣ်ယီၣ်(စဲးကဲၤ)တုၤလၢဟံၣ်ကရၢၢ်ပူၤဟဲအါထီၣ်၀ဲအဂ့ၢ်လီၢ်က၀ီၤဂံၢ်ခီၣ်ထံးတၢ်ကစီၣ်စံး၀ဲဒၣ်န့ၣ်လီၤ. စးထီၣ်လၢလါယူၤလံထီၣ်တၢတနွံတုၤတကီၢ်ခါခဲအံၤန့ၣ်ဒူသ၀ီတၢ်လီၢ်တၢ်ကျဲဒ်အမ့ၢ်(နဲၣ်ယွၤ,နတၢၤကူ,မိကီ,ခၠီခၠါ,သပၠ့ၤကွ့)ဒူသ၀ီသ့ၣ်တဖၣ်အပူၤတၢ်နုၥ်လီၤအီၣ်ဟုၣ်ကမျၢၢ်သိၣ်လ့ၣ်ယီၣ်(စဲးကဲၤ)တုၤလၢဟံၣ်ကရၢၢ်အသိးကမျၢၢ်တၢ်ဖိတၢ်လံၤလၢအလုၢ်အပှ့ၤဒိၣ်ဒ်အမ့ၢ်ထူဒီးကျိၣ်စ့သ့ၣ်တဖၣ်ဘၣ်တၢ်အီၣ်ဟုၣ်၀ဲအဂ့ၢ်လီၢ်က၀ီၤဖိသ့ၣ်တဖၣ်စံး၀ဲဒၣ်န့ၣ်လီၤ. စယဲၣ်ကၠံပှၤလီၢ်က၀ီၤဖိတဂၤစံး၀ဲလၢ "တနံၤ၀ံၤတနံၤတၢ်နုၥ်လီၤအီၣ်ဟုၣ်၀ဲတၢ်ဖဲဂီၤခီသၢနၣ်ရံၣ်,လွံၢ်နၣ်ရံၣ်အဆၢက တီၢ်မီၤနီၤ. ဒီၣ်တဲၥ်ကွံၥ်၀ဲဟံၣ်သီၤဒီးဂၥ်မ့ၣ်အူ၀ံၤနုၥ်လီၤအီၣ်ဟုၣ်၀ဲတၢ်မီၤနီၤ. ဟံၣ်ကစၢ်လၢအနီၣ်သးတဂၤအဟံၣ်န့ၣ် တပၥ်ဘၣ်. တၢ်မၤတဲၥ်ကွံၥ်၀ဲသီၤ၀ံၤခဲလၢၥ်လံအိၣ်တ့ၢ်က့ၤလၢကတွံၢ်ထုးထီၣ်(စဲးကဲၤ)လီၤမီၤနီၤ. တၢ်နုၥ်လီၤအီၣ်ဟုၣ်၀ဲ (နဲၣ်ယွၤ, နတၢၤကူ)သ၀ီ၀ံၤတသီန့ၣ်တၢ်နုၥ်လီၤအီၣ်ဟုၣ်ကဒီး၀ဲလၢ(မိကီ)သ၀ီအပူၤလီၤ. မ့ၢ်၀ံၤဒီးတၢ်နုၥ်လီၤအီၣ်ဟုၣ် ကဒီးက့ၤလၢ(နတၢၤကူ)သ၀ီမီၤနီၤ." အဂ့ၢ်န့ၣ်စံး၀ဲဒၣ်န့ၣ်လီၤ. စယဲၣ်ကၠံလီၢ်က၀ီၤ(နဲၣ်ယွၤ)ကရူၢ်နဲၣ်ယွၤသ၀ီအပူၤတၢ်ဘျၣ်နုၥ်လီၤအီၣ်ဟုၣ်၀ဲတၢ်တစှၤန့ၣ်(၅)ဘျီဘၣ်ဒီးတၢ်နုၥ်လီၤအီၣ်ဟုၣ်တၢ်ကဲထီၣ်အသးအိၣ်ဝဲအါကတၢၢ်ဒီးတုၤတကီၢ်ခါခဲအံၤန့ၣ်တၢ်အီၣ်ဟုၣ်န့ၢ်၀ဲသိလ့ၣ်ယီၣ်(စဲးကဲၤ)အနီၣ်ဂံၢ်အိၣ်လၢ(၁၀)ခိၣ်ဘျဲၣ်လံအဂ့ၢ်သ့ၣ်ညါဘၣ်လၢ(နဲၣ်ယွၤ)ပှၤသဝီဖိသ့ၣ်တဖၣ်အအိၣ်န့ၣ်လီၤ. တၢ်ဒုးတၢ်ယၤကဲထီၣ်အသးလၢ(စယဲၣ်ကၠံ)လီၢ်က၀ီၤအပူၤ၀ံၤအလီၢ်ခံထီတထူၣ်ကီၢ်ဆၣ်ဟီၣ်ကဝီၤတၢ်နုၥ်လီၤဟးထီၣ်အလီၢ်တနီၤသုးကီၣ်ကးတကပၤပၥ်လီၤ၀ဲတၢ်သမံသမိးတြဲၤဒီးမၤဃံၥ်ထီၣ်၀ဲတၢ်သမံသမိးဘၣ်ဆၣ်တၢ်နုၥ်လီၤအီၣ်ဟုၣ်တၢ်လၢကမျၢၢ်ဟံၣ်ပူၤဟဲအါထီၣ်ဝဲဒၣ်အသိးဘၣ်ဃးဒီးတၢ်အီၣ်ဟုၣ်သိၣ်လ့ၣ်ယီၣ်(စဲးကဲၤ)ဒ်သိးအံၤန့ၣ်ပှၤဘၣ်မူဘၣ်ဒါသ့ၣ်တဖၣ်ဖီၣ်ချုးန့ၢ်၀ဲဒၣ်တအိၣ်ဒံးဘၣ်အဂ့ၢ်သ့ၣ်ညါဘၣ်န့ၣ်လီၤ. စယဲၣ်ကၠံပှၤလီၢ်က၀ီၤဖိတဂၤစံး၀ဲလၢ "(နတၢၤကူ)သ၀ီအခိၣ်(စဲးကဲၤ)မးန့ၣ်ဘၣ်တၢ်အီၣ်ဟုၣ်၀ဲမီၤနီၤ. ပှၤလၢအ(စဲးကဲၤ) ဘၣ်တၢ်အီၣ်ဟုၣ်သ့ၣ်တဖၣ်န့ၣ်မ့ၢ်အ၀ဲသ့ၣ်လဲၤတၢၣ်,တလဲၤတၢၣ်န့ၣ်တသ့ၣ်ညါဘၣ်. ဖဲ(၁၅)သီအနံၤန့ၣ်ယနၣ်ဟူလၢ တၢ်ချုးန့ၢ်၀ဲတၢ်ဘျၣ်မီၤနီၤ. တၢ်မ့ၢ်ဟ့ၣ်လီၤလၢပၢၤကီၢ်အစုပူၤန့ၣ်အခါမ့ၢ်ဘၣ်န့ၣ်ဟဲက့ၤဟးထီၣ်လီၤအဃိတၢ်တဟ့ၣ် လီၤလၢပၢၤကီၢ်အစုပူၤဘၣ်." အဂ့ၢ်န့ၣ်စံးဝဲန့ၣ်လီၤ. ဖဲပူၤကွံၥ်လါဖ့ၤဘြူၤအါရံၤအဆၢကတီၢ်မ့ၢ်လၢ(စယဲၣ်ကၠံ)လီၢ်ကဝီၤအပူၤခံခီခံကပၤတၢ်ခးလိၥ်သးကဲထီၣ်၀ဲလၢတၢ်ပၢၢ်ဆၢသုးပၥ်ဖှိၣ်ဒီးသုးကီၣ်ကးအဘၢၣ်စၢၤအဖီခိၣ်သုးကီၣ်ကးတကပၤဟဲခးလီၤတၢ်ဒီးကဘီယူၤအဃိပှၤကမျၢၢ်လၢအကလးဘျဲၣ်ဘၣ်ဃ့ၢ်ထီၣ်၀ဲဆူတီအူ၀့ၢ်ပူၤဒီးဖဲတၢ်ခးလိၥ်သးဂၢၢ်ထီၣ်က့ၤအဆၢကတီၢ်ဟံၣ်ဃီလၢအကစၢ်တအိၣ်သ့ၣ်တဖၣ်ဘၣ်တၢ်နုၥ်လီၤအီၣ်ဟုၣ်အိၣ်၀ဲအါအါဂီၢ်ဂီၢ်အဂ့ၢ်သ့ၣ်ညါဘၣ်န့ၣ်လီၤ. ဒ်န့ၣ်အသိးဆၢကတီၢ်အခါဖဲန့ၣ်န့ၣ်မ့ၢ်လၢသဲးစးတၢ်ဒိၣ်စိတအိၣ်ဘၣ်ဒီးပှၤလၢဟဲနုၥ်လီၤအီၣ်ဟုၣ်တၢ်သ့ၣ်တဖၣ်စိၥ်ဃုၥ်ဝဲဒၣ်ဒီးစုက၀ဲၤအဃိတၢ်ထံၣ်ချုးန့ၢ်ဝဲဒၣ်ဘၣ်ဆၣ်လၢနီၢ်ကစၢ်တၢ်ဘံၣ်တၢ်ဘၢအဂီၢ်ဘၣ်ပျဲပူၤကွံၥ်၀ဲဒၣ်အိၣ်၀ဲအဂ့ၢ်လီၢ်က၀ီၤဖိသ့ၣ်တဖၣ်စံး၀ဲန့ၣ်လီၤ.
ကၠဲးထိၣ်ကီၢ်ဆၣ် ပယီၤသုးလၢအဟဲထီၣ်တဖၣ်ဒီး(KNLA)ဘၢၣ်စၢၤတၢ်ဒုးကဲထီၣ် ပယီၤသုးသံ(၃)ဂၤ
လါယူၤလံ ၁၉ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ဖဲမဟါလါယူၤလံ ၁၈ သီ အနံၤ လၢဖွ့ဖူကၢ်ကရူၢ် ပနွဲၢ်လူၢ်သ၀ီဃၢၤ ပယီၤသုးကျိၤလၢအဟဲထီၣ်သ့ၣ်တဖၣ်အံၤဒီး(KNLA)အဘၢၣ်စၢၤ တၢ်ဒုးကဲထီၣ် အဃိ ပယီၤသုးတကပၤသံ၀ဲဒၣ်(၃)ဂၤဒီးဘၣ်ဒိဘၣ်ထံးအိၣ်၀ဲအဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံးတၢ်ကစီၣ် အအိၣ် န့ၣ်လီၤႉ ကၠဲးထိၣ်ကီၢ်ဆၣ်ပူၤ ဖဲမဟါဂီၤခီ ၈း၀၀ နၣ်ရံၣ်ဃၣ်ဃၣ်အဆၢကတီၢ် ပယီၤသုးလၢအနီၣ်ဂံၢ်ကအိၣ်(၁၀၀)ဃၣ်ဃၣ် အံၤဖဲအကနုာ်လီၤဆူပနွဲၢ်လူၢ်သ၀ီပူၤအဆၢကတီၢ်ဟဲတုၤလၢသ၀ီချၢရီဘၢၣ်ကျီးအခါန့ၣ် တၢ်ဒုးကဲထီၣ်၀ဲဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ် ၃ သုးပာ်ဖှိၣ်အဃိ ဒုၣ်ဒါတကပၤသံဘၣ်ဒိဘၣ်ထံးကဲထီၣ်၀ဲဒၣ် ဒ်အံၤလီၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ ဒ်လီၢ်က၀ီၤကမျၢၢ်စံး၀ဲအသိးန့ၣ်ဒုၣ်ဒါသံ(၃)ဂၤအကျါပၣ်ဃုာ်သုးခိၣ်လၢအပတီၢ်အိၣ်တဂၤဒီး တၢ်ဃးခံခီခံကပၤ တၢ်ဒုးစဲးပြဲးကဲထီၣ်အဂ့ၢ်ႇဒုၣ်ဒါတၢ်သံတၢ်ဘၣ်ဒိဘၣ်ထံးတၢ်အိၣ်သးအဂ့ၢ်အကျိၤန့ၣ် ကၠဲးထိၣ်ကီၢ်ဆၣ် ၦၤဘၣ်မူဘၣ်ဒါ တဂၤ စံးဘၣ် ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ “တၢ်ဒုးကဲထီၣ်န့ၣ်ဖဲပနွဲၢ်လူၢ်ဃၢၤထံးရီဘၢၣ်ကျီးကပၤန့ၣ်လီၤႉတၢ်ဒုးန့ၣ်ကဲထီၣ်တစဲးဖိလီၤႉကရူၢ်ပာ်ဖျါထီၣ်ၦၤလၢ ဒုၣ်ဒါ သံ၀ဲဒၣ်(၃)ဂၤႉၦၤတဲလၢအ၀ဲခံဂၤန့ၣ်ခူၣ်လီၤ၀ဲဖဲန့ၣ်လီၤႉအ၀ဲတဂၤခီန့ၣ်ကဘၣ်ဖဲဟါခီ ၄း၀၀ နၣ်ရံၣ်န့ၣ် ဟဲနုာ်၀ဲဒၣ် လၢသ၀ီခိၣ်ထိးသီခါဖၠၣ်ဟဲက့ၤယိာ်၀ဲဒီးၦၤသံစိၣ်တစိၣ်မီၤနီၤႉၦၤသံစိၣ်တစိၣ်န့ၣ်ကဘၣ်မ့ၢ်သုးခိၣ်သုးနၢ် ဒ်န့ၣ်ဧါသၢၣ်ႉ ဖဲမဟါန့ၣ်အ၀ဲသ့ၣ်မံ၀ဲဖဲပနွဲၢ်လူၢ်သ၀ီပူၤန့ၣ်လီၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါဖဲတနံၤအံၤဂီၤခီ ၆ နၣ်ရံၣ်ဃၣ်ဃၣ်အဆၢကတီၢ်န့ၣ် ပယီၤသုးလၢအနုာ်လီၤမံလၢသ၀ီပူၤသ့ၣ် တဖၣ်အံၤ အ၀ဲသ့ၣ်ဟးထီၣ်က့ၤလၢသ၀ီပူၤက့ၤလီၤယိာ်ဃုာ်၀ဲၦၤသံစိၣ်၀ဲန့ၣ်အဂ့ၢ်န့ၣ် ၦၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲ...
ဂ့ၢ်ဂီၢ်အူတၢ်ဟးထီၣ်က့ၤလီၤကညီအဂီၢ်ကဘှီဂ့ၤထီၣ်ကျဲအဃိ,ကကးတံၥ်ဝဲထိၣ်ကီကိကျဲသၢသီ
လါယူၤလံ ၁၉သီ, ၂၀၂၄နံၣ်, ခ့ၣ်အဲးစံၣ်, မူခိၣ်စူၤအါ,ထံကစၢၢ်လီၤဆဲးဟးဂီၤဝဲထိၣ်ကီးကိကျဲအဘၢၣ်စၢၤတၢ်လီၢ်အါတီၤအဃိ,ဒ်သိးဂ့ၢ်ဂီၢ်အူတၢ်ဟးထီၣ်က့ၤလီၤကညီကဘှါအဂီၢ်,ကဘှီဂ့ၤထီၣ်ကျဲအဆၢကတီၢ်ကကးတံၥ်ဝဲထိၣ်ကီးကိကျဲသၢသီအဂ့ၢ်,(ကညီတၢ်မုၥ်တၢ်ခုၣ်ကီၣ်ကးကရၢ,KNU-KNLA/PC)ပှၤဘၣ်မူဘၣ်ဒါတဖၣ်စံးဝဲန့ၣ်လီၤ. စးထီၣ်ဖဲတလါအံၤလါယူၤလံအပူၤ,တၢ်စူၤဒိၣ်ထံကစၢၢ်သ့ၣ်တဖၣ်လီၤဆဲးဟးဂီၤဝဲထိၣ်ကီးကိကျဲတၢ်လီၢ်အါတီၤအဃိလၢတၢ်ကမၤဂ့ၤထီၣ်ကျဲဂ့ၢ်ဂီၢ်အူအဂီၢ်,ကကးတံၥ်ကျဲစးထီၣ်ဖဲလါယူၤလံ(၁၈)သီတုၤလၢ(၂၀)လၢသၢသီအတီၢ်ပူၤအဂ့ၢ်,ကညီတၢ်မုၥ်တၢ်ခုၣ်ကီၣ်ကးကရၢ(KNLA/PC)ပှၤကတိၤတၢ်ပၢသုးခိၣ်ဒိၣ်စိစီၤကၠီၣ်ညိၣ်စံးဝဲဒ်အံၤန့ၣ်လီၤ. အဝဲစံးဝဲလၢ“ကျဲန့ၣ်ထံကစၢၢ်တဖၣ်လီၤဆှုလီၤဆဲးအဃိကျဲဟးဂီၤအိၣ်ဝဲအါတီၤလီၤ,တကးဒံးဘၣ်ကျဲအံၤတမ့ၢ်လၢခီကရ့ၣ်ဘၣ်မ့ၢ်ဝဲဟီၣ်ခိၣ်ကျဲအဃိန့ၣ်မူခိၣ်စူၤတဘျီကဲထီၣ်ကပံၥ်လၢအဘျိၣ်ဘျ့အဃိကျဲတီၤလၢဟးဂီၤတဖၣ်န့ၣ်ပှၤလဲၤထီၣ်တညီဘၣ်အဃိန့ၣ်တၢ်ကမၤဝဲဒၣ်ဂ့ၢ်ဂီၢ်အူမီၤနီၤ,ခီပညီန့ၣ်ကတ့ထီၣ်မၤဂ့ၤထီၣ်ဝဲဒၣ်တၢ်လီၤလၢအဟးဂီၤ,တၢ်ဘျ့တၢ်လီၢ်လၢဘၣ်ယိၣ်အိၣ်တဖၣ်န့ၣ်ကလူပှဲၤမၤပှဲၤထီၣ်ဝဲလၢၢ်သ့ၣ်တဖၣ်ဖဲပှၤဟးထီၣ်က့ၤလီၤဂ့ၢ်ဂီၢ်အူကသ့အဂီၢ်”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,ထိၣ်ကီးကိကျဲဒီတတီၤအပူၤအံၤတၢ်ဃ့၀ဲကျဲတၢ်ခိတၢ်သွဲအံၤမ့ၢ်ဒ်သိးတၢ်ကပၥ်ကီၤ၀ဲစ့လၢတၢ်ကဘှီဂ့ၤထီၣ်ကျဲအဃိကျဲတီၤလၢတၢ်ကဘှီဂ့ၤထီၣ်သ့ၣ်ခဲအံၤသ့ၣ်တဖၣ်အတၢ်လၢၥ်ဘူၣ်လၢၥ်စ့ၤန့ၣ်တၢ်သူဝဲလၢလီၢ်ခၢၣ်သးစ့ပၥ်ဖှိၣ်အကျါအဂ့ၢ်,စံးဝဲန့ၣ်လီၤ. တကးဒံးဘၣ်,တကီၢ်ခါခဲအံၤတၢ်စူၤခါအဆၢကတီၢ်ထိၣ်ကီးကိကျဲအံၤကမျၢၢ်ဟးထီၣ်က့ၤလီၤဝဲဒၣ်အိၣ်ဝဲကိးနံၤဒဲးဒီးကျဲအံၤသိလ့ၣ်တီၣ်ပနံၥ်တၢ်ကၤဖးဒိၣ်တဖၣ်ကလ့ၢ်လိၤဝဲတသ့တညီဘၣ်အိၣ်ဝဲဒီးတၢ်ဘၣ်ယိၣ်အသိး,ကမျၢၢ်ပှၤဟးထီၣ်က့ၤလီၤမုၢ်ဆ့ၣ်မုၢ်ဂီၤလၢအဒိးဝဲ(4weels)သိလ့ၣ်တဖၣ်စ့ၢ်ကီးကျဲတီၤတၢ်လီၢ်တနီၤနီၤအပူၤဘၣ်သူဝဲ(လိၣ်ထဲး)လၢကယူထီၣ်စၢၤတၢ်အိၣ်ဝဲအဂ့ၢ်စံးဝဲန့ၣ်လီၤ. တကတီၢ်ဃီ,ထိၣ်ကီကိကျဲအံၤတၢ်စးထီၣ်သူအီၤဖဲ(၂၀၂၂)နံၣ်လါဒံၤစဲဘၢၣ်အခါလံၤလံၤဒီးဒ်သိးတၢ်ကဘှါဆှဲ၀ဲတၢ်ဂ့ၢ်လၢကျဲတီၤအဂီၢ်ကျဲဒီတဘိအပူၤကညီတၢ်မုၥ်တၢ်ခုၣ်ကီၣ်ကးကရၢ(KNLA/PC)ပၥ်လီၤဝဲတၢ်အိၣ်ခိးတြဲၤခဲလၢၥ်အိၣ်ဝဲ(၅)တီၤဘၣ်ဆၣ်တၢ်ထၢဝဲကျဲတၢ်ခိၣ်တၢ်သွဲဖဲတၢ်ထီၣ်ကစၢၢ်တတီၤဒီးလီၤကစၢၢ်တတီၤလီၤအဂ့ၢ်(KNLA/PC)ပှၤဘၣ်မူဘၣ်ဒါတဖၣ်စံးဝဲန့ၣ်လီၤ. ဒီးဘၣ်ဃးတၢ်ထၢဝဲသိလ့ၣ်အလဲအံၤန့ၣ်နီၤဖးဝဲခံကလုၥ်အိၣ်ဝဲဒီးပှၤလၢအနီသိလ့ၣ်ဆံးတဖၣ်န့ၣ်ညီနုၢ်တၢ်ဃ့ဝဲအီၤကျဲခိသွဲလၢစ့ပယီၤ(၁၀၀၀၀)ကၠးတုၤလၢ်(၂၀၀၀၀)ကၠးအဘၢၣ်စၢၤအိၣ်ဝဲအသိး,မ့မ့ၢ်သိလ့ၣ်ဖးဒိၣ်တီၣ်ပနံၥ်တၢ်ကၤလၢအမၤမုၢ်ကျိၤဝဲၤကွၥ်တဖၣ်စ့ၢ်ကီးတၢ်ဃ့ဝဲတခိၣ်န့ၣ်လၢစ့ပယီၤ(၁၀၀၀၀၀)တုၤလၢ(၁၅၀၀၀၀)ကၠးအဘၢၣ်စၢၤအိၣ်စ့ၢ်ကီးဝဲအဂ့ၢ်,ပှၤဘၣ်မူဘၣ်ဒါတဖၣ်စံးဝဲန့ၣ်လီၤ. ဒ်န့ၣ်အသိး,ထိၣ်ကီကိကျဲအံၤအ့ရှၢၣ်ကျဲမုၢ်ပံးကွံၥ်သးဝံၤအလီၢ်ခံတၢ်သူက့ၤဝဲလၢကမျၢၢ်တၢ်ဟးထီၣ်က့ၤလီၤဒီးတီၣ်ဆှၢပနံၣ်တၢ်ကၤအိၣ်ဝဲအဖီခိၣ်တၢ်စူၤခါအဆၢကတီၢ်တကးဘၣ်,တၢ်ကိၢ်ခါအဆၢကတီၢ်သနၥ်က့ကျဲဟးဂီၤအိၣ်ဝဲတပယူၥ်ဃီထီဘိအဃိပှၤနီသိလ့ၣ်ဖိတဖၣ်သစၢၣ်ဘၣ်လိၥ်သးကဲထီၣ်တ့ၢ်သးအိၣ်ဝဲအဖီခိၣ်တၢ်သံတၢ်ဘၣ်ဒိဘၣ်ထံးသ့ၣ်တဖၣ်ကဲထီၣ်တ့ၢ်သးအိၣ်ဝဲအဂ့ၢ်,သ့ၣ်ညါဘၣ်ဒ်ပှၤဘၣ်မူဘၣ်ဒါတဖၣ်စံးဝဲအသိးန့ၣ်လီၤ.
ဘျံးဒဝဲၢ်ကီၢ်ရ့ၣ်သုးကီၣ်ကးဟံးန့ၢ်ဆူၣ်တၢ်စိၤတၢ်ကမီၤဝံၤအလီၢ်ခံကမျၢၢ်ဃ့ၢ်မှံဟးဖျိးပှၤနီၣ်ဂံၢ်ထီၣ်ဘး(၁)ကလီၢ်ဘျဲၣ်
လါယူၤလံ ၁၈ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဘျံးဒ၀ဲၢ်ကီၢ်ရ့ၣ်သုးက့နီၣ်ဂံၢ်(၄)ဟီၣ်က၀ီၤအပူၤစးထီၣ်လၢသုးဟံးန့ၢ်ဆူၣ်တၢ်စိတၢ်ကမီၤ ၀ံၤအလီၢ်ခံတုၤတကီၢ်ခါခဲအံၤန့ၣ်ခီဖျိလၢထံလီၢ်ကီၢ်ပူၤတၢ်ဒုးတၢ်ယၤ, သုးကီၣ်ကးခးလီၤကျိဖးဒီးသူကဘီယူၤဟဲတ့ၢ်လီၤ မ့ၣ်ပိၢ်အဃိကမျၢၢ်ပှၤဃ့ၢ်မှံဟးဖျိးပှၤနီၣ်ဂံၢ်ထီၣ်ဘးလၢ(၁၁၂,၂၄၉)ဂၤအဂ့ၢ်န့ၣ်ဘျံးဒ၀ဲၢ်ကီၢ်ရ့ၣ်အပှၤဘၣ်မူဘၣ်ဒါသ့ၣ်တဖၣ်စံး၀ဲဒၣ်န့ၣ်လီၤ. စးထီၣ်လၢသုးကီၣ်ကးဟံးန့ၢ်ဆူၣ်ကွံၥ်ထံကီၢ်တၢ်စိတၢ်ကမီၤ၀ံၤအလီၢ်ခံဘျံးဒ၀ဲၢ်ကီၢ်ရ့ၣ်ကမျၢၢ်ပှၤဃ့ၢ်မှံဟးဖျိးနီၣ်ဂံၢ်(၁၁၂,၂၄၉)ဂၤသ့ၣ်တဖၣ်အကျါလၢၢ်ကဆီကီၢ်ဆၣ်န့ၣ်ပှၤဃ့ၢ်မှံဟးဖျိးအမျးကယၤအိၣ်(၄)မျးကယၤ, တနီသရံၣ်ကီၢ်ဆၣ်န့ၣ် (၁၉)မျးကယၤ, လၢၢ်မုၢ်လါကီၢ်ဆၣ်(၅၁)မျးကယၤ, ကစၢၢ်ဒိၣ်ကီၢ်ဆၣ်(၁၁)မျးကယၤ, လၢၢ်ဒိၣ်စိကီၢ်ဆၣ်(၁၁)မျးကယၤဒီးထံမိၢ်ပှၢ်န့ၣ်အိၣ်၀ဲ(၄) မျးကယၤအဂ့ၢ်တၢ်ပၥ်ဖျါအပူၤသ့ၣ်ညါဘၣ်န့ၣ်လီၤ. ခီဖျိလၢဘၣ်ဃ့ၢ်အိၣ်ကဒုသးဒ်အံၤအဖီခိၣ်ပှၤလီၢ်အိၣ်ကမှံဖိသ့ၣ်တဖၣ်လၢအ၀ဲသ့ၣ်တၢ်အိၣ်တၢ်ဆိးအဂီၢ်ဒီးတၢ်အီၣ်တၢ်အီၣ်အဂီၢ်တၢ်မၤစၢၤဆီၣ်ထွဲတတုၤထီၣ်ဘးဘၣ်အဃိဘၣ်အိၣ်ဆၢထၢၣ်လၢအနီၢ်ကစၢ်ဒၣ်၀ဲဒီးကတီၢ်ခဲအံၤန့ၣ်လိၣ်ဘၣ်၀ဲတၢ်အီၣ်တၢ်အီၣ်, တၢ်အိၣ်ဆူၣ်အိၣ်ချ့ဒီးတၢ်ကူၣ်ဘၣ်ကူၣ်သ့တၢ်ဆီၣ်ထွဲၤမၤစၢၤသ့ၣ်တဖၣ်အဂ့ၢ်ဘျံးဒ၀ဲၢ်ကီၢ်ရ့ၣ်နဲၣ် ရွဲၣ်ပဒိၣ်စီၤအဲၣ်နၤစံး၀ဲဒ်အံၤန့ၣ်လီၤ. "ကမျၢၢ်သ့ၣ်တဖၣ်ဒုတၢ်လိၣ်ဘၣ်အဂံၢ်ခီၣ်ထံးအါတက့ၢ်န့ၣ်တၢ်အီၣ်မီၤနီၤ. မ့ၢ်၀ံၤန့ၣ်တၢ်အိၣ်တၢ်ဆိး(တၢ်အခိၣ်ဒုး), တၢ်အိၣ်ဆူၣ်အိၣ်ချ့အဂီၢ်(ကသံၣ်ကသီ)ဒီးတၢ်ကူၣ်ဘၣ်ကူၣ်သ့မီၤနီၤ. မ့ၢ်လၢဒူသ၀ီတနီၤန့ၣ်က့ၤအိၣ်ဆိးလၢအဒူသ၀ီတ သ့ဘၣ်ဒီးဘၣ်အိၣ်လၢထံခံကွၥ်ခံအဃိသတးန့ၣ်ဖိသၣ်သ့ၣ်တဖၣ်တမၤလိဘၣ်တၢ်ဘၣ်မီၤနီၤ.အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါတၢ်ဒုးတၢ်ယၤမ့ၢ်လီၤကယၥ်လီၤဘၣ်ဆၣ်ပှၤလီၢ်အိၣ်ကမှံဖိအါဒၣ်တၢ်တက့ၢ်ဘၣ်ပျံၤဘၣ်ဖုးဒံးတၢ်လၢကက့ၤအိၣ်က့ၤဆိးလၢဒူသ၀ီပူၤအသိးပှၤဖိဒံးဖိသၣ်သ့ၣ်တဖၣ်တထီၣ်ဘၣ်ကၠိထီၣ်ဘၣ်ကီၢ်ဘၣ်အမဲၥ်ညါဘၣ်အိၣ်ဒံးဒၣ်လၢတၢ်အိၣ်ခူသူၣ်အလီၢ်အဃိဒိးန့ၢ်ဘၣ်တၢ်ညၣ်ဂိၢ်တၢ်ဆါဒီးတၢ်ဆူၣ်တၢ်ဆါအဂၤသ့ၣ်တဖၣ်အိၣ်၀ဲအဂ့ၢ်ကီၢ်ဆၣ်အပှၤဘၣ်မူဘၣ်ဒါစံး၀ဲန့ၣ်လီၤ. ဒ်န့ၣ်အသိးပှၤဃ့ၢ်မှံဟးဖျိးဖိ(၁၁၂,၂၄၉)ဂၤသ့ၣ်တဖၣ်အံၤန့ၣ်ပှၤပိၥ်ခွါန့ၣ်အိၣ်၀ဲ(၄၈)မျးကယၤဒီးမ့မ့ၢ်လၢပှၤပိၥ်မုၣ်လၢဘၣ်ဃ့ၢ်မှံဟးဖျိးသ့ၣ်တဖၣ်ခီန့ၣ်အိၣ်၀ဲ(၅၂)မျးကယၤအဂ့ၢ်သ့ၣ်ညါဘၣ်စ့ၢ်ကီးန့ၣ်လီၤ စးထီၣ်လၢသုးကီၣ်ကးဟံန့ၢ်ဆူၣ်ကွံၥ်တၢ်စိတၢ်ကမီၤ၀ံၤအလီၢ်ခံခ့ၣ်အဲၣ်ယူၣ်ကီၢ်သူလ့ၤတၢ်ပၢသုးက့ဟီၣ်က၀ီၤ(၇)ဘ့ၣ်လၢၤအပူၤခီဖျိသုးကီၣ်ကးပၥ်၀ဲပှၤကမျၢၢ်ထံဖိကီၢ်ဖိဒ်တၢ်ခးပနီၣ်အဃိကမျၢၢ်ဘၣ်သံ၀ဲခဲလၢ်ၥ်(၂၀၀)ဂၤအကျါဖိသၣ်ပၥ်ဃုၥ်(၃၃)ဂၤဒီးဘၣ်ဒိ၀ဲ(၆၉၆)ဂၤအကျါဖိသၣ်ပၥ်ဃုၥ်စ့ၢ်ကီး(၁၇၆)ဂၤအဂ့ၢ်ကညီပှၤဂ့ၢ်၀ီခွဲးယၥ်ကရူၢ်(KHRG)ထုးထီၣ်ပၥ်ဖျါ၀ဲဖဲမဟါလါယူၤလံ(၁၇)သီအနံၤန့ၣ်လီၤ.