သုးကီၣ်ကးကိးက့ၤၦၤလီၢ်အိၣ်ကဒုကမျၢၢ်လၢကက့ၤအိၣ်ဆိးက့ၤလၢကီးတရံး၀့ၢ်ပူၤ
လါမ့ၤ ၂သီႇ၂၀၂၄နံၣ်ႇ ခ့ၣ်အဲးစံၣ်ႇ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢႇသုးက့(၆)ဒူပျၢ်ယာ်ကီၢ်ရ့ၣ်ႇကီးတရံးကီၢ်ဆၣ်အပူၤႇသုးကီၣ်ကးကိးက့ၤ၀ဲလီၢ်အိၣ်ကဒုကမျၢၢ်ဃ့ၢ်တၢ်ဒုးတဖၣ်လၢႇကက့ၤအိၣ်ဆိးက့ၤလၢကီးတရံး၀့ၢ်ပူၤအဂ့ၢ်ႇကီးတရံးကမျၢၢ်ၦၤဃ့ၢ်တၢ်ဒုးတဖၣ်စံး၀ဲန့ၣ်လီၤႉ သုးကီၣ်ကးအံၤႇမၢ၀ဲကမျၢၢ်လၢအဃ့ၢ်တၢ်ဒုးတဖၣ်က့ၤအိၣ်ဆိးလၢအနီၢ်ကစၢ်တၢ်လီၢ်တၢ်ကျဲအပူၤလံဘၣ်ဆၣ်တကီၢ်ခါခဲအံၤခီဖျိတၢ်အိၣ်သးတဂ့ၤဒံးဘၣ်အဃိႇတမ့ၢ်လၢလီၢ်က၀ီၤဖိတဖၣ်က့ၤအိၣ်၀ဲဘူၣ်ဒံးဘၣ်အဂ့ၢ်ႇကီးတရံးလီၢ်က၀ီၤၦၤဘၣ်မူဘၣ်ဒါလၢတဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ယနၢ်ဟူကၠါအံၤကၠါနူၤအဃိန့ၣ်ႇဒ်သိးကလီၤတံၢ်အဂီၢ်ယဆဲးကျိးသံကွၢ်ကဒီးယသကိးလၢအိၣ်တန့ခၠါတဂၤတဘျီအ၀ဲတဲယၤအတၢ်မ့ၢ်၀ဲလီၤတံၢ်လီၤႉအ၀ဲတဲယၤလၢႇသုးကီၣ်ကးတကပၤန့ၣ်မၢ၀ဲကီးတရံးကမျၢၢ်ဃ့ၢ်တၢ်ဒုးတဖၣ်က့ၤအိၣ်ဆိးက့ၤလံမီၤႉယတၢ်ဆိမိၣ်ဒုကမျၢၢ်တဖၣ်ဒုတမ့ၢ်က့ၤအိၣ်၀ဲတဘူၣ်ဘၣ်ႇဒီးတမ့ၢ်လၢကက့ၤအိၣ်၀ဲစ့ၢ်ကီးဘၣ်ႇဘၣ်မနုၤအဃိလဲၣ်န့ၣ်ႇဖဲတဂီၤအံၤဒၣ်လဲၣ်မးန့ၣ်လၢသ၀ီသီ(ယွၤသ့ၣ်ကိ)န့ၣ်ဒွဲၣ်အူအီၣ်ကဒီးကမျၢ်ဟံၣ်ဒီးလံႉအဃိန့ၣ်ၦၤစံၣ်ထီၣ်အိၣ်ကဒုအသးလၢထးႇလၢကစၢၢ်ခိၣ်သ့ၣ်တဖၣ်န့ၣ်ဒုလ့ၤတက့ၤတမ့ၢ်လၢကဟဲက့ၤ၀ဲဘၣ်လီၤတံၢ်လီၤႇသနာ်က့မ့မ့ၢ်ၦၤလဲၤစံၣ်လၢလာ်ႇလၢ၀့ၢ်ပူၤႇလၢၦၤဟံၣ်ၦၤဃီတဖၣ်န့ၣ်ခီဒုန့ၣ်ယတဲလီၤတံၢ်တသ့ဘၣ်”အဂ့ၢ်စံးဘၣ်ခ့ၣ်အဲးစံၣ်တၢ်ကစီၣ်န့ၣ်လီၤႉ လၢန့ၣ်အမဲာ်ညါႇအပူၤကွံာ်စှၤသီအတီၢ်ပူၤသုးကီၣ်ကးအစုတီၤဖီလာ်ပၢၤကီၢ်ၦၤဘၣ်မူဘၣ်ဒါဒီးၦၤသုးတဖၣ်စံး၀ဲလၢက့ၤနုာ်အိၣ်ဆိးလၢ၀့ၢ်ပူၤန့ၢ်လံအဃိၦၤတနီၤက့ၤကွၢ်ဟုၣ်တၢ်ဒီးတၢ်ထၢ၀ဲစရီမၤနီၣ်မၤဃါ၀ဲၦၤနီၢ်ဂံၢ်အိၣ်၀ဲအသိးကိးအိၣ်ဖှိၣ်ထၢ၀ဲၦၤလၢအဟံၣ်အူအီၣ်တဖၣ်စရီအိၣ်၀ဲဘၣ်ဆၣ်ႇအါတက့ၢ်ၦၤက့ၤဟံအတၢ်ဖိတၢ်လံၤ၀ံၤၦၤဟးထီၣ်ကွံာ်၀ဲလီၤအဂ့ၢ်ကီးတရံးလီၢ်က၀ီၤကမျၢၢ်လၢအဃ့ၢ်အိၣ်ကဒုအသးလၢလာ်တဂၤစံးစ့ၢ်ကီး၀ဲဒ်အံၤန့ၣ်လီၤႉ အ၀ဲစံး၀ဲလၢ“အပူၤကွံာ်စှၤသီအတီၢ်ပူၤၦၤတဲလၢက့ၤအိၣ်န့ၢ်လံတဘျီပက့ၤကွၢ်စုၣ်ပတၢ်လီၢ်တၢ်ကျဲမီၤနီၤႉဖဲတၢ်အိၣ်ခိးတြဲၤအလီၢ်န့ၣ်သုးကီၣ်ကးအပၢၤကီၢ်ဒီးၦၤသုးဖိတနီၤခိးကွဲးနီၣ်ပာ်၀ဲစရီ၀ံၤဘျီပျဲနုာ်လီၤ၀ဲၦၤလီၤႉဒီးကိးစ့ၢ်ကီး၀ဲတၢ်အိၣ်ဖှိၣ်လၢကီၢ်ဆၣ်ရူအပူၤ၀ံၤထၢ၀ဲၦၤလၢအဟံၣ်အူအီၣ်တဖၣ်အစရီအိၣ်၀ဲစ့ၢ်ကီးလီၤႉမ့မ့ၢ်ယၤဒုယဟံၣ်တအူအီၣ်ဘၣ်အဃိယတလဲၤအိၣ်ဖှိၣ်လၢအ၀ဲသ့ၣ်အကျါဘၣ်ဒီးအ၀ဲသ့ၣ်တဲသကိးတၢ်ဂ့ၢ်မနုၤလဲၣ်န့ၣ်ယတသ့ၣ်ညါခဲလၢာ်ဘၣ်ႉပဟံၣ်ဖိဃီဖိဒုပတက့ၤအိၣ်ဘၣ်ႉပက့ၤအိၣ်တဘူၣ်ဘၣ်ႉပက့ၤဟံပတၢ်ဖိတၢ်လံၤဟုသးႇတၢ်အီၣ်တၢ်အီတၢ်လၢပလိၣ်ဘၣ်တဖၣ်၀ံၤပဟးထီၣ်ကွံာ်လီၤႉၦၤလၢက့ၤအိၣ်ဒုအိၣ်တနီၤႉနါက့အါတက့ၢ်လၢၦၤက့ၤဟံတၢ်ဖိတၢ်လံၤ၀ံၤၦၤဟးထီၣ်ကွံာ်၀ဲလီၤ”အဂ့ၢ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤႉ တကးဒံးဘၣ်ႇသုးကီၣ်ကးအံၤလၢအကက့ၤဆီလီၤက့ၤအတၢ်ဖံးတၢ်မၤ၀ဲၤကျိၤအဂီၢ်မၢ၀ဲ၀ဲၤကျိၤဘၣ်ထွဲအၦၤမၤတၢ်ဖိတဖၣ်ဆှၢထီၣ်စရီလၢ(၅)သီအတီၢ်ပူၤအိၣ်၀ဲဒီးမ့မ့ၢ်လၢကမျၢၢ်လီၢ်က၀ီၤဖိလၢကက့ၤအိၣ်ဆိးတဖၣ်ဒီးကမျၢၢ်လၢအဟံၣ်အူအီၣ်ကွံာ်တဖၣ်တခီကဘၣ်ဆှၢထီၣ်၀ဲစရီလၢအသီ(၁၀)အတီၢ်ပူၤအိၣ်၀ဲအဂ့ၢ်ၦၤလီၢ်အိၣ်ကဒုဖိတဖၣ်စံးစ့ၢ်ကီး၀ဲဒၣ်န့ၣ်လီၤႉ တကတီၢ်ဃီႇဘၣ်ဃးဒီးသုးကီၣ်ကးအတၢ်ကိးက့ၤ၀ဲကမျၢၢ်လၢကက့ၤအိၣ်ဆိးလၢကီးတရံး၀့ၢ်ပူၤအံၤန့ၣ်ႇစိၤရှၢၣ်မံၣ်ဒံၣ်ယၢၣ်တၢ်ကစီၣ်တနီၤပာ်ဖျါ၀ဲလၢႇတၢ်လီၢ်လၢကမျၢၢ်လီၢ်က၀ီၤဖိအနီၢ်အကစၢ်တက့ၤအိၣ်ဆိး၀ဲဘၣ်တဖၣ်န့ၣ်ႇသုးကီၣ်ကးကဟံကွံာ်၀ဲဒီးဒုးကဲထီၣ်က့ၤလၢသုးကီၣ်ကးပၢပြးအတၢ်လီၢ်တၢ်ကျဲတဖၣ်အိၣ်၀ဲအဃိကမျၢၢ်လီၢ်က၀ီၤဖိလၢဃ့ၢ်အိၣ်ကဒုတဖၣ်အံၤအိၣ်၀ဲဒီးတၢ်ဘၣ်ယိာ်ဘၣ်ဘှီအဂ့ၢ်ႇသ့ၣ်ညါဘၣ်ဒ်ကမျၢၢ်လီၢ်က၀ီၤဖိတဖၣ်စံး၀ဲအသိးန့ၣ်လီၤႉ ဒ်န့ၣ်အသိးႇသုးကီၣ်ကးအံၤလၢတၢ်ကိးက့ၤကမျၢၢ်ကက့ၤအိၣ်ဆိးအဂီၢ်ႇအပူၤကွံာ်လါအ့ဖြ့ၣ်အသီ(၃၀)အနံၤန့ၣ်ႇကညီကီၢ်စဲၣ်ကိာ်တိာ်ခိၣ်အူစီမၠ့ၣ်အူႇကီၢ်ဆၣ်တၢ်ရ့လိာ်မုာ်လိာ်ကိာ်တိၤခိၣ်အူစီထိအီၤႇကီးတရံးပၢဆှၢရဲၣ်ကျဲၤကရူၢ်ၦၤပၢၤလီၢ်ဆ့ၣ်နီၤအူထိ၀့ၤဃုာ်ဒီးၦၤဘၣ်မူဘၣ်ဒါလၢအဂၤတဖၣ်လဲၤသမံသမိး၀ဲကီးတရံး၀့ၢ်ပူၤလီၢ်က၀ီၤဖိတၢ်အိၣ်သးအိၣ်၀ဲအသိးႇကိးထံၣ်အိၣ်ဖှိၣ်၀ဲကမျၢၢ်လီၢ်က၀ီၤဖိတဖၣ်အမဲာ်ညါစံး၀ဲလၢၦၤလၢဟဲက့ၤအိၣ်တဖၣ်န့ၣ်ကမၤစၢၤဆီၣ်ထွဲ၀ဲအိၣ်၀ဲတၢ်အီၣ်တၢ်အီဟုသးဒီးသိအၦ့ၤလၢကျိၣ်စ့တဖၣ်အိၣ်၀ဲအဂ့ၢ်ႇတၢ်ကစီၣ်သန့လၢအအိၣ်ၦိၤပယီၤသုးကီၣ်ကးလၢအမ့ၢ်(မြန်မာ့အလင်း)ပာ်စ့ၢ်ကီး၀ဲဒၣ်န့ၣ်လီၤႉ
Medic တၢ်မၤလိလၢ(KNLA)သုးကသံၣ်၀ဲၤဒ့ဒီး(BPHWT)ပာ်ဖှိၣ်အိးထီၣ်၀ဲအံၤ ၦၤဖျိထီၣ်အိၣ်တုၤလၢ ၁၂၀ ဂၤ
လါမ့ၤ ၂ သီႇ ၂၀၂၄ နံၣ်ႇ ခ့ၣ်အဲးစံၣ် (Medic)ကသံၣ်တၢ်မၤလိလၢခ့ၣ်အဲၣ်ယူၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)လီၢ်ခၢၣ်သးကသံၣ်၀ဲၤဒ့ ဒီး ထၢၣ်၀ံချၢဆူၣ်ချ့ကရၢ(BPHWT)ပာ်ဖှိၣ်အိးထီၣ်၀ဲအံၤန့ၣ် ကတီၢ်ခဲအံၤၦၤဖျိထီၣ်အိၣ်တုၤ၀ဲဒၣ်လၢ(၁၂၀)ဂၤလံဒီး ဖဲမဟါလါမ့ၤ ၁ သီအနံၤန့ၣ် တၢ်မၤ၀ဲတၢ်ပျၢ်တၢ်မၤလိမူးတၢ်ရဲၣ်တၢ်ကျဲၤအံၤဖဲ(သုးက့ ၇)ဟီၣ်က၀ီၤပူၤအဂ့ၢ်န့ၣ် သ့ၣ်ညါဘၣ် န့ၣ်လီၤႉ ဖဲအပူၤကွံာ်(၂၀၂၂-၂၀၂၃)အတီၢ်ပူၤအခါန့ၣ်တၢ်မၤ၀ဲတၢ်ပျၢ်(Medic)ကသံၣ်တၢ်မၤလိ(၁)တ၀ီႇ(၂)၀ီတ၀ီအံၤဒီး ဖဲမဟါလါမ့ၤ ၁ သီအနံၤန့ၣ် တၢ်မၤကဒီး၀ဲတၢ်ပျၢ်(၃)၀ီတ၀ီ (Medic)ကသံၣ်တၢ်မၤလိအံၤဒီးခဲအံၤခီဖျိၦၤဖျိထီၣ် ကဒီး၀ဲဒၣ်(၄၀)ဂၤအဃိ တၢ်သၢဒူၣ်အံၤမ့ပာ်ဖှိၣ်ခဲလၢာ်န့ၣ်ၦၤဖျိထီၣ်၀ဲအိၣ်(၁၂၀)ဂၤလံအဂ့ၢ်န့ၣ် ထၢၣ်၀ံချၢဆူၣ်ချ့ကရၢ (BPHWT) ၦၤနဲၣ်တၢ် သရၣ်စီၤ၀့ကၠီၤ စံး၀ဲန့ၣ်လီၤႉ “(Medic)တၢ်မၤလိအံၤပအိးထီၣ်၀ဲ(၂၀၂၂-၂၃-၂၄)ပူၤအံၤကဲထီ၀ဲဒၣ် ၃ ၀ီလံမီၤနီၤႉ လၢတၢတ၀ီအခါန့ၣ် ၦၤဖျိထီၣ် အဂၤ(၄၀)ႉမ့ပာ်ဖှိၣ်ဒီးမဟါတၢ်ပျၢ်ကၠိတကရူၢ်အံၤခဲလၢာ်ခဲအိၣ်၀ဲဒၣ်(၁၂၀)လံမီၤႉတၢ်မၤလိန့ၣ်တံာ်တာ်၀ဲ ဒၣ်(၁၂)လါႉ ၦၤသိၣ်န့ၢ်အ၀ဲသ့ၣ်(သံၤအိၤရံၤ)ခီန့ၣ်(၈)လါဒီးဘၣ်လီၤ(ဖရဲၣ်ထံၣ်ခၢၣ်)လၢကျိၣ်ယီၢ်လ့ဒီးမဲၢ်တီတၢ်ဆါဟံၣ်န့ၣ်(၄)လါမီၤနီၤႉၦၤလၢအဖျိထီၣ်တဖၣ်န့ၣ်ဘၣ်က့ၤမၤစၢၤတၢ်လၢအ၀ဲသ့ၣ်ဟီၣ်က၀ီၤပူၤလီၤႉၦၤကထီၣ်(Medic)တၢ်မၤလိအဂီၢ်န့ၣ်ပဃုထၢထီၣ်ၦၤကညီလၢအစှၤကတၢၢ်ကဘၣ်ဖျိဃာ်၀ဲဂံၢ်ခီၣ်ထံးကသံၣ်တၢ်မၤလိ(၆)လါမီၤနီၤႉမ့၀ံၤလၢပျီပူၤန့ၣ်တၢ်လဲၤခီဖျိကဘၣ်အိၣ်တနံၣ်မ့တမ့ၢ်ခံနံၣ်၀ံၤမးအထီၣ်၀ဲသ့ မီၤနီၤႉ”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါသုးဟံးန့ၢ်တၢ်စိတၢ်ကမီၤ၀ံၤလီၢ်ခံခီဖျိထံလီၢ်ကီၢ်ပူၤတၢ်ဒုးတၢ်ယၤကဲထီၣ်ဒီးၦၤဘၣ်ဃ့ၢ်မှံဟးဖျိး အနီၣ်ဂံၢ်ဟဲအါထီၣ်အဃိလၢတၢ်ကူစါယါတကပၤစ့ၢ်ကီးလီၤစှၤဖးဒိၣ်ညါအဂ့ၢ်န့ၣ် သရၣ် စီၤ၀့ကၠီၤ စံးအါထီၣ်၀ဲန့ၣ် လီၤႉ “ပထံပကီၢ်ပူၤန့ၣ်တၢ်ဒုးတၢ်ယၤအါမ့၀ံၤၦၤဘၣ်ဃ့ၢ်မှံဟးဖျိးစ့ၢ်ကီးအါႉ၀ံၤဒီးခဲအံၤခီဖျိ(CDM)တၢ်ဂ့ၢ်ကဲထီၣ်ဘျီ တၢ်ကူစါ ယါဘျါကသံၣ်သရၣ်သ့ၣ်တဖၣ်န့ၣ်လီၤတိၢ်လီၤစှၤဖးဒိၣ်ညါမီၤနီၤႉအါန့ၢ်အန့ၣ်န့ၣ်လီၤဆီဒၣ်တၢ်လၢပကီၢ်သူလ့ၤဟီၣ်က၀ီၤန့ၣ်ၦၤဃ့ၢ်မှံဟးဖျိးအိၣ်(၈၀၀၀၀၀)ဘျဲၣ်လံန့ၣ်ခ့ၣ်အဲၣ်ယူၣ်တဲ၀ဲဒ်န့ၣ်မီၤနီၤႉအဃိန့ၣ်တၢ်ကူစါယါဘျါ တၢ်ကွၢ်ၦၤဆါ အပတီၢ်ထီတဖၣ်န့ၣ်လိၣ်အါမးလီၤႉခဲအံၤကသံၣ်တၢ်မၤလိပျၢ်လံအဃိခါဆူညါနါက့ပတၢ်တိာ်ပာ်အိၣ်လၢပကကဆဲးအိးထီၣ်တၢ်မၤလိအစှၤကတၢၢ်တနံၣ်တဘျီမီၤနီၤႉ”အဂ့ၢ်န့ၣ် စံး၀ဲန့ၣ်လီၤႉ (Medic)ကသံၣ်တၢ်မၤလိဘျီ၀ဲအံၤအပူၤန့ၣ် ကညီကလုာ်ဃုာ်ဒီးပလီၣ်ႇခၠီႇကလုာ်ဒူၣ်လၢအဂၤတဖၣ်စ့ၢ်ကီး ဟဲထီၣ်၀ဲဒၣ်အိၣ်အဂ့ၢ်န့ၣ် (BPHWT)ၦၤဘၣ်မူဘၣ်ဒါတဖၣ်စံး၀ဲအသိးသ့ၣ်ညါဘၣ် န့ၣ်လီၤႉ နီၢ်ဖီကပီၤစိ လၢအဖျိထီၣ်၀ဲဒၣ်(Medic)ကသံၣ်တၢ်မၤလိ ၃ ၀ီတ၀ီအံၤ စံး၀ဲလၢ“ပဖျိထီၣ်၀ံၤန့ၣ်ပကက့ၤမၤစၢၤ က့ၤ တၢ်လၢပၦၤကလုာ်အဂီၢ်မီၤနီၤႉယဖျိထီၣ်တဘျီအံၤယသးခုဖးဒိၣ်ညါဘၣ်မနုၤအဃိလဲၣ်န့ၣ်ယတဆိကမိၣ်လၢ...
ခီကီၢ်ၦၤမၤတၢ်ဖိဂ့ၢ်၀ီကရူၢ်ကရၢပာ်ဖှိၣ်မၤသကိး၀ဲ(၁၃၄)၀ီတ၀ီဟီၣ်ခိၣ်ဒီဖျၢၣ်ၦၤမၤတၢ်ဖိအမုၢ်နံၤ
လါမ့ၤ ၁သီ ၂၀၂၄နံၣ် ခ့ၣ်အဲးစံၣ် တနံၤအံၤလါမ့ၤ(၁)သီႇလၢအလီၤဘၣ်၀ဲဟီၣ်ခိၣ်ဒီဖျၢၣ်ၦၤမၤတၢ်ဖိမုၢ်နံၤအပူၤႇ၀့ၢ်မဲဆီးခီကီၢ်ၦၤမၤတၢ်ဖိဂ့ၢ်၀ီကရူၢ်ကရၢတဖၣ်ပာ်ဖှိၣ်သးမၤလၤကပီၤသကိး၀ဲ(၁၃၄)၀ီတ၀ီဟီၣ်ခိၣ်ဒီဖျၢၣ်ၦၤမၤတၢ်ဖိမုၢ်နံၤလၢကီၢ်ကၠီၣ်တဲၣ်-ကီၢ်ပယီၤဆၢမဲဆီး၀့ၢ်တၢ်လီၢ်တတီၤအပူၤဖဲတဟါအံၤ(၄)နၣ်ရံၣ်အဆၢကတီၢ်န့ၣ်လီၤႉ ဘၣ်ဃးဒီးတၢ်ပာ်ဖှိၣ်မၤသကိး၀ဲဟီၣ်ခိၣ်ဒီဖျၢၣ်ၦၤမၤတၢ်ဖိအမုၢ်နံၤတၢ်ရဲၣ်တၢ်ကျဲၤအံၤန့ၣ်ႇအတၢ်ပညိၣ်မ့ၢ်၀ဲဒ်သိးတၢ်ကပာ်ဖျါထီၣ်ခီကီၢ်ၦၤမၤတၢ်ဖိတဖၣ်အကလုၢ်ဒီးကဒုးအိၣ်ထီၣ်တၢ်ပာ်ဖှိၣ်မၤသကိးတၢ်လၢအဂံၢ်ဆူၣ်အဂ့ၢ်ႇၦၤဒုးအိၣ်ထီၣ်(တၢ်မၤဂုၢ်ထီၣ်ပသီထီၣ်ၦၤမၤတၢ်ဖိၦၤတ၀ၢ) Progressive Labor Community’s founder ကိၤသါကၠံစံးလီၤ၀ဲလၢတၢ်ရဲၣ်တၢ်ကျဲၤအပူၤဒ်အံၤန့ၣ်လီၤႉ အ၀ဲစံး၀ဲလၢ“ဟီၣ်ခိၣ်ဒီဖျၢၣ်ၦၤမၤတၢ်ဖိအမုၢ်နံၤအပူၤႇပမၤတၢ်ရဲၣ််တၢ်ကျဲၤန့ၣ်ပတၢ်ပညိၣ်န့ၣ်မ့ၢ်၀ဲဒ်သိးပကပာ်ဖျါထီၣ်၀ဲၦၤမၤတၢ်ဖိအတၢ်ကီတၢ်ခဲႇၦၤမၤတၢ်ဖိအကလုၢ်လီၤႉဒီးပတၢ်ပညိၣ်အိၣ်စ့ၢ်ကီး၀ဲလၢပကမၤအါထီၣ်တၢ်ပာ်ဖှိၣ်မၤကိးတၢ်လၢအဂံၢ်ဆူၣ်လၢကီၢ်ပယီၤၦၤမၤတၢ်ဖိတဖၣ်အဂီၢ်န့ၣ်လီၤႉဘၣ်မနုၤအဃိလဲၣ်န့ၣ်ဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢမဲဆီး၀့ၢ်ပူၤအံၤန့ၣ်ႇပထံၣ်ဘၣ်လၢကီၢ်ပယီၤၦၤမၤတၢ်ဖိသ့ၣ်တဖၣ်န့ၣ်အ၀ဲသ့ၣ်သဂၢၢ်ဘၣ်၀ဲတၢ်ကီတၢ်ခဲအိၣ်အါမံၤဘၣ်ဆၣ်လၢတၢ်ပာ်ဖျါထီၣ်န့ၣ်အ၀ဲသ့ၣ်အကလုၢ်န့ၣ်တအိၣ်၀ဲဘၣ်အမဲာ်ညါၦၤမၤတၢ်ဖိအကလုၢ်န့ၣ်လီၤပံာ်မၢ်ကွံာ်၀ဲအဃိကရူၢ်ကရၢလၢအဘၣ်ထွဲဘၣ်ဃးၦၤမၤတၢ်ဖိတဖၣ်ကတိၤသကိးဒီးပမၤ၀ဲတၢ်ရဲၣ်တၢ်ကျဲၤဒ်အံၤလီၤႉ”အဂ့ၢ်စံးလီၤ၀ဲလၢတၢ်ရဲၣ်တၢ်ကျဲၤအပူၤန့ၣ်လီၤႉ လၢန့ၣ်အမဲာ်ညါႇတၢ်ပာ်ဖှိၣ်မၤသကိး၀ဲ(၁၃၄)၀ီတ၀ီဟီၣ်ခိၣ်ဒီဖျၢၣ်ၦၤမၤတၢ်ဖိမုၢ်နံၤအပူၤႇဆီၣ်တခူထီၣ်၀ဲခီကီၢ်ၦၤမၤတၢ်ဖိတဖၣ်လၢကဂဲၤလိာ်အါထီၣ်လၢတၢ်မၤလီၤၦီၢ်ကွံာ်သုးကီၣ်ကးသနူႇလၢတၢ်ကဒိးန့ၢ်ဘၣ်က့ၤတၢ်မၤအဘူးအလဲလၢအကြၢးကၢကီၣ်ဒီးကဒိးန့ၢ်ဘၣ်တၢ်ဘံၣ်တၢ်ဘၢတၢ်ထဲသိးတုၤသိးလၢတၢ်ဖံးတၢ်မၤပူၤအဂ့ၢ်မဲဆီးခီကီၢ်ၦၤမၤတၢ်ဖိဂ့ၢ်၀ီကရူၢ်ကရၢဆီၣ်တခူပာ်ဖျါ၀ဲလၢအလံာ်ဆီၣ်တခူထီၣ်တၢ်အပူၤစ့ၢ်ကီးန့ၣ်လီၤႉ ၂၀၂၁နံၣ်သုးဟံန့ၢ်တၢ်စိကမီၤ၀ံၤအလီၢ်ခံႇကီၢ်ပယီၤၦၤမၤတၢ်ဖိသ့ၣ်တဖၣ်အံၤတၢ်ခွဲးတၢ်ယာ်တၢ်လီၤစှၤကွံာ်၀ဲလၢတၢ်ဃုဖံးဃုမၤတကပၤအိၣ်၀ဲဒီးတနီၤတၢ်မၢဆူၣ်မၢစိးႇမၤပျံၤမၤဖုးအ၀ဲသ့ၣ်လၢတၢ်ဖံးတၢ်မၤအပူၤအိၣ်စ့ၢ်ကီး၀ဲအမဲာ်ညါတၢ်မၤပယွဲမၤထီဒါ၀ဲအခွဲးအယာ်လၢတၢ်ဖံးတၢ်မၤပူၤအိၣ်၀ဲဒၣ်အဂ့ၢ်ၦၤမၤတၢ်ဖိဂ့ၢ်၀ီတဖၣ်စံး၀ဲဒၣ်န့ၣ်လီၤႉ တကးဒံးဘၣ်ႇသုးဟံန့ၢ်တၢ်စိကမီၤ၀ံၤအလီၢ်ခံခီဖျိကျိၣ်စ့အလုၢ်အၦ့ၤလီၤဒီးပနံာ်တၢ်ဖိတၢ်လံၤတဖၣ်အၦ့ၤဒိၣ်ထီၣ်၀ဲအါတလၢအခၢးအဃိကျိၣ်စ့တၢ်ဟဲနုာ်-ဟးထီၣ်တဘၣ်လိာ်ဖိးမံသးဘၣ်အဃိၦၤမၤတၢ်ဖိတဖၣ်ကွၢ်ဆၢၣ်မဲာ်သဂၢၢ်ဘၣ်၀ဲတၢ်ဃံာ်တၢ်စ့ၤအိၣ်၀ဲအါမးအဂ့ၢ်ပာ်ဖျါစ့ၢ်ကီး၀ဲလၢလံာ်ဆီၣ်တခူထီၣ်အပူၤစ့ၢ်ကီးန့ၣ်လီၤႉ တကတီၢ်ဃီႇ၂၀၂၄နံၣ်လါဖ့ၤဘြူၤအါရံၤအပူၤသုးကီၣ်ကးထုးထီၣ်၀ဲကမျၢၢ်တၢ်ဘၣ်ကဲသုးတၢ်သိၣ်တၢ်သီအဃိကမျၢၢ်ထံဖိကီၢ်ဖိဃုာ်ဒီးၦၤမၤတၢ်ဖိတဖၣ်ကိးနံၤဒဲးဘၣ်အိၣ်၀ဲလၢတၢ်ပျံၤတၢ်ဖုးတၢ်လီၤဘၣ်ယိာ်အပူၤအဂ့ၢ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ တနံၤအံၤႇၦၤမၤတၢ်ဖိဂ့ၢ်၀ီကရူၢ်ကရၢတဖၣ်ပာ်ဖှိၣ်မၤသကိး၀ဲ(၁၃၄)၀ီတ၀ီဟီၣ်ခိၣ်ဒီဖျၢၣ်ၦၤမၤတၢ်ဖိမုၢ်နံၤတၢ်ရဲၣ်တၢ်ကျဲၤအပူၤႇတၢ်ဟ့ၣ်တၢ်ယူးယီၢ်ဆူၦၤဒူၦၤဃိၤၦၤမၤတၢ်ဖိလၢအဟ့ၣ်လီၤတ့ၢ်သးအသးတစိၤဘၣ်တစိၤတဖၣ်ႇတၢ်ဖးဖျါထီၣ်၀ဲၦၤမၤတၢ်ဖိကရူၢ်ကရၢအလံာ်ဆီၣ်တခူထီၣ်တဖၣ်ႇတၢ်တဲပာ်ဖျါထီၣ်၀ဲဟီၣ်ခိၣ်ဒီဖျၢၣ်ၦၤမၤတၢ်ဖိမုၢ်နံၤကဲထီၣ်သးအဂ့ၢ်ဒီးတၢ်ဒုးနဲၣ်၀ဲကီၢ်ပယီၤၦၤမၤတၢ်ဖိတဖၣ်အတၢ်ကိးသတြီအတၢ်ဂီၤမူသ့ၣ်တဖၣ်န့ၣ်လီၤႉ ဒ်န့ၣ်အသိးႇလၢတၢ်မၤ၀ဲတၢ်ရဲၣ်တၢ်ကျဲၤအပူၤန့ၣ်ႇမဲဆီးကီၢ်ခီၦၤမၤတၢ်ဖိတဖၣ်ႇကီၢ်ပယီၤၦၤမၤတၢ်ဖိကရူၢ်ကရၢခိၣ်နၢ်တဖၣ်ဃုာ်ဒီးၦၤမၤကစီၣ်သန့ၦၤမၤတၢ်ဖိတနီၤပာ်ဖှိၣ်သးဟဲထီၣ်၀ဲအဂၤ(၄၀)ဘျဲၣ်န့ၣ်လီၤႉ
ခီဖျိတၢ်ကိၢ်ဒိၣ်အဃိထါမဟ့ၣ်ဒဲက၀ီၤဖိသ့ၣ်တဖၣ်သဂၢၢ်ဘၣ်ဒီးထံကၤနိကၤ
လါမ့ၤ ၁ သီႇ ၂၀၂၄ နံၣ်ႇ ခ့ၣ်အဲးစံၣ် ကီၢ်ပယီၤ-ကီၢ်ကၠီၣ်တဲၣ်ကီၢ်ဆၢ(စူ၀ါဖါ)ကီၢ်ရ့ၣ်(ရၣ်ခၠၣ်ဘူရံး)ကီၢ်ဆၣ်ဟီၣ်က၀ီၤကညီဘၣ်ကီဘၣ်ခဲဒဲက၀ီၤ တဖျၢၣ်လၢအမ့ၢ်ထါမဟ့ၣ်ဒဲက၀ီၤ စးထီၣ်ဖဲတနံၣ်အံၤ(၂၀၂၄)နံၣ်လါအ့ဖြ့ၣ်အတီၢ်ပူၤအံၤခီဖျိတၢ် ကိၢ်ဒိၣ်အဃိထါမဟ့ၣ်ဒဲက၀ီၤဖိသ့ၣ်တဖၣ်သဂၢၢ်ဘၣ်ဒီးထံကၤနိကၤအဂ့ၢ်ထါမဟ့ၣ်ဒဲက၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ အပူၤကွံာ်နံၣ်သ့ၣ်တဖၣ်အခါန့ၣ်တၢ်ကိၢ်ဒိၣ်သနါက့တနံၤဂီၢ်တနံၤအဂီၢ်န့ၣ်တၢ်ဟ့ၣ်နီၤလီၤ၀ဲၦၤဒဲက၀ီဖိသ့ၣ်တဖၣ်ထံန့ၣ်န့ၢ်ဒံး၀ဲတနံၤတဘျီခံဘျီဘၣ်ဆၣ်တလါအံၤလါဖြ့ၣ်အတီၢ်ပူၤန့ၣ်ဘၣ်ဃးဒီးထံလၢတၢ်ဟံးသူန့ၢ်၀ဲလၢထံကျိႇ ထံပူၤသ့ၣ်တဖၣ်လီၤသံးကွံာ်၀ဲခဲလၢာ်အဃိဘၣ်တနံၤနံၤန့ၣ်ဒဲက၀ီၤဖိသ့ၣ်တဖၣ်တဒိးန့ၢ်ဘၣ် လၢၤထံအိၣ်ထီၣ်၀ဲအဂ့ၢ်ထါမဟ့ၣ်ဒဲက၀ီၤခိၣ်သရၣ်မုၣ်နီၢ်သလ့ၤဖီစံးဘၣ်၀ဲခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤႉ “မ့မ့ၢ်လၢပဒဲက၀ီၤအပူၤအံၤဘၣ်ဃးဒီးလၢထံန့ၣ်ဒုနးဒိၣ်ထီၣ်ဖဲလါအ့ဖြ့ၣ်အတီၢ်ပူၤအံၤမီၤႉ ထံန့ၣ်လၢထံကျိပူၤထံလီၤသံး၀ဲခဲလၢာ်ခဲဆ့လီၤႉ လၢအပူၤကွံာ်န့ၣ်ပတၢ်န့ၣ်အိၣ်ဃာ်ဒီးထံပူၤသၢပူၤ သနါက့ပသူသ့ဒၣ်လီၤခံပူၤလီၤန့ၢ်ဒၣ်လၢၦၤစှၤဂၤအဂီၢ်လီၤမီၤနီၤႉ ခါလၢအပူၤကွံာ်န့ၣ်တၢ်ကိၢ်ဒိၣ်သနါက့ ၦၤဟ့ၣ်လီၤထံန့ၣ်န့ၢ်ဒံးတနံၤန့ၣ်တဘျီခံဘျီမီၤနီၤႉ မ့မ့ၢ်အခဲအံၤတနံၣ်ခီဒုထံကျိန့ၣ်လီၤသံးအဃိန့ၣ်ၦၤတနီၤ န့ၣ်ခူၣ်၀ဲဒၣ်ထံပူၤနါက့ခီဖျိလၢတၢ်ကိၢ်ဒိၣ်အဃိထံပူၤန့ၣ်လီၤသံး၀ဲဒၣ်စ့ၢ်ကီးမီၤႉ ဘၣ်တနံၤနံၤန့ၣ်တန့ၢ်ဘၣ် ၀ဲထံနီတဘျီဘၣ်အဃိန့ၣ်ကဲထီၣ်၀ဲတၢ်ဂ့ၢ်ကီလီၤႉ ထံတၢ်အိၣ်သးလၢပဒဲက၀ီၤအပူၤဒုဃံး၀ဲဒိၣ်မးလီၤႉ တၢ်တၤတၢ်လၢပဘၣ်ကွၢ်ဆၢမဲာ်ခဲခဲအံၤန့ၣ်အိၣ်ဒၣ်လၢထံတခါအံၤပဘၣ်ကွၢ်ဆၢမဲာ်အီၤဒိၣ်လီၤ”အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါထါမဟ့ၣ်ဒဲက၀ီၤအပူၤအံၤက၀ီၤဒိၣ်အိၣ်၀ဲသၢဘ့ၣ်ႇ က၀ီၤဒိၣ်တဘ့ၣ်စုာ်စုာ်အပူၤက၀ီၤဒ့အိၣ် ၀ဲဒၣ်(၅)ဘ့ၣ်ဒီးခီဖျိတၢ်ကိၢ်ဒိၣ်အဃိထါမဟ့ၣ်ဒဲက၀ီၤဒီတဘ့ၣ်လၢၤဃၣ်ဃၣ်သဂၢၢ်ဘၣ်၀ဲဒီးထံကၤနိကၤတၢ်ဂ့ၢ်ကီဒ်အံၤအဖီခိၣ်တကီၢ်ခါခဲအံၤဒဲက၀ီၤအၦၤဘၣ်မူဘၣ်ဒါသ့ၣ်တဖၣ်ရဲၣ်ကျဲၤဘှါဆှဲစိာ်ခီတီဆှၢန့ၢ်၀ဲဒၣ်ဒီးသိလ့ၣ်တဆီလၢဒဲက၀ီၤအချၢအဂ့ၢ်သရၣ်မုၣ်သလ့ၤဖီစံးအါထီၣ်၀ဲဒၣ်န့ၣ်လီၤႉ တကးဒံးဘၣ်မ့ၢ်လၢမူခိၣ်ကလံၤသီၣ်ဂီၤတၢ်အိၣ်သးတၢ်ကိၢ်ဒိၣ်ထီၣ်၀ဲအဃိထါမဟ့ၣ်ကညီဘၣ်ကီဘၣ်ခဲဒဲက၀ီၤအပူၤဒဲက၀ီၤၦၤဘၣ်ဘၣ်ဒါသ့ၣ်တဖၣ်ဟ့ၣ်ပလီၢ်၀ဲၦၤဒဲက၀ီၤဖိသ့ၣ်တဖၣ်လၢကပလီၢ်သးလၢမ့ၣ်အူဖါဆါတၢ်လီၤဘၣ်ယိၣ်သ့ၣ်တဖၣ်အိၣ်၀ဲအသိး(NGO)တၢ်ရၢကရိဟ့ၣ်၀ဲတၢ်မၤလိမၤဒိးႇ တၢ်ဟူးတၢ်ဂဲၤသ့ၣ် တဖၣ်ဒီးဒ်န့ၣ်အသိးလၢတၢ်ကဒီသဒၢသးလၢမ့ၣ်အူဖါဆါအဂီၢ်တၢ်တ့ပလီၤဃာ်၀ဲမဲးဘိၣ်ထံဘိၣ်အိၣ်၀ဲအဂ့ၢ်သ့ၣ်ညါဘၣ်န့ၣ်လီၤႉ ဒ်န့ၣ်အသိးခီဖျိတၢ်ကိၢ်ဒိၣ်ထီၣ်၀ဲအဃိစးထီၣ်ဖဲပူၤကွံာ်လါမးရှး ဘူးကလၢၤအတီၢ်ပူၤန့ၣ်မဲၢ်လးကညီဘၣ်ကီ ဘၣ်ခဲဒဲက၀ီၤအပူၤက၀ီၤဒိၣ်(Zone-A)ဒီး(Zone=B)အပူၤက၀ီၤဒ့သ့ၣ်တဖၣ်သဂၢၢ်ဘၣ်ဒီးထံလီၤတူာ်လီၤကၤအဂ့ၢ်မဲၢ်လးကညီဘၣ်ကီဘၣ်ခဲဒဲက၀ီၤအၦၤဘၣ်မူဘၣ်ဒါစံးဘၣ်၀ဲခ့ၣ်အဲးစံၣ်ကညီတၢ်ကစီၣ်အိၣ်စ့ၢ်ကီး၀ဲဒၣ်န့ၣ်လီၤႉ
ကဆၢထၢၣ်တြီဆၢသကိးၦၤဒိၣ်ကျိၣ်ဒိၣ်စ့လၢအဆီၣ်ထွဲသုးမီၤစိရိၤတဖၣ်အဂ့ၢ်(FTUK)ဆီၣ်တခူစံး၀ဲ
လါမ့ၤ ၁သီႇ၂၀၂၄နံၣ်ႇ ခ့ၣ်အဲးစံၣ်ႇ ကီၢ်သူလ့ၤကူၣ်သ့ႇဆူၣ်ချ့ႇစံာ်ၦဲၤသူၣ်ဖျးဒီးၦၤမၤတၢ်ဖိကရၢအကလုာ်ကလုာ်ကထိၣ်ဃူထိၣ်ဖိးသးဒီးဆၢထၢၣ်ဒီတဒၢတြီဆၢသကိးသုးမီၤစိရိၤႇဒီးမီၤစိရိၤၦၤဒိၣ်ကျိၣ်ဒိၣ်စ့လၢအဆီၣ်ထွဲမၤစၢၤ၀ဲသုးမီၤစိရိၤလၢကန့ၢ်စိန့ၢ်ကမီၤတဖၣ်အဂ့ၢ်ကီၢ်သူလ့ၤၦၤမၤတၢ်ဖိကရၢစၢဖှိၣ်(Felicitation Of Trade Unions KawthooLei-FTUK)ဆီၣ်တခူစံး၀ဲလၢအလံာ်ဟ့ၣ်ယုၢ်အပူၤႇဖဲတနံၤအံၤလါမ့ၤ(၁)သီႇလၢအလီၤဘၣ်၀ဲဟီၣ်ခိၣ်ဒီဖျၢၣ်ၦၤမၤတၢ်ဖိအမုၢ်နံၤအံၤန့ၣ်လီၤႉ ကီၢ်သူလ့ၤၦၤမၤတၢ်ဖိကရၢစၢဖှိၣ်အလံာ်ဟ့ၣ်ယုၢ်အပူၤစံး၀ဲလၢ“မီၤစိရိၤၦၤဒိၣ်ကျိၣ်ဒိၣ်စ့လၢအဖီၣ်ပျံၤႇဆီၣ်ထွဲမၤစၢၤ၀ဲသုးမီၤစိရိၤလၢတၢ်လီၢ်ခံတဖၣ်အံၤမ့ၢ်၀ဲတၢ်နိးတၢ်ဘျးလၢႇထံကီၢ်အတၢ်လဲၤထီၣ်လဲၤထီအဂီၢ်ဒီးႇမ့ၢ်၀ဲသူၣ်ဘီၣ်သးစၢ်တဖၣ်အဒုၣ်အဒါအသိးႇမ့ၢ်စ့ၢ်ကီး၀ဲၦၤမၤတၢ်ဖိႇထံဖိကီၢ်ဖိဃုာ်ဒီးထံကီၢ်ဒီတဘ့ၣ်ကမျၢၢ်တဖၣ်အဒုၣ်အဒါအဃိႇလၢ ပတၢ်ခွဲးတၢ်ယာ်အဂီၢ်ပကဘၣ်ဂဲၤလိာ်ႇဂဲၤဆၢထၢၣ်ဒီတဒၢတြီဆၢသကိးလၢကျဲအကလုာ်ကလုာ်အဂ့ၢ်’’ပာ်ဖျါ၀ဲလၢအလံာ်ဟ့ၣ်ယုၢ်အပူၤန့ၣ်လီၤႉ လၢန့ၣ်အမဲာ်ညါႇကီၢ်သူလ့ၤကူၣ်သ့ႇဆူၣ်ချ့ႇစံာ်ၦဲၤသူၣ်ဖျးၦၤမၤတၢ်ဖိကရၢဒီးၦၤမၤတၢ်ဖိကရၢကရိလၢကအိၣ်ဖျဲၣ်ထီၣ်ကဒီး၀ဲလၢကီၢ်သူလ့ၤအပူၤတဖၣ်ႇကဘၣ်သ့ၣ်နီၣ်မၤလၤကပီၤ၀ဲဟီၣ်ခိၣ်ဒီဖျၢၣ်ၦၤမၤတၢ်ဖိအမုၢ်နံၤအံၤအသိးန့ၣ်ႇကဘၣ်ပၣ်ဃုာ်ဂဲၤလိာ်သကိး၀ဲလၢၦၤမၤတၢ်ဖိဒီးထံဖိကီၢ်ဖိတဖၣ်ကထူၣ်ဖျဲးထီၣ်ကွံာ်လၢသုးမီၤစိရိၤသနူလၢအမၢဆူၣ်မၢစိးအီၣ်တူာ်အီၣ်ကလီၤ၀ဲကမျၢၢ်ထံဖိကီၢ်ဖိတဖၣ်လၢကျဲကလုာ်ကလုာ်အဂီၢ်အဂ့ၢ်ပာ်ဖျါ၀ဲလၢလံာ်ဟ့ၣ်ယုၢ်အပူၤစ့ၢ်ကီးန့ၣ်လီၤႉ တကးဒံးဘၣ်ႇသဲစးလၢသုးမီၤစိရိၤဒီးမီၤစိရိၤတဖၣ်အနီၢ်ကစၢ်ဒၣ်၀ဲကွဲးထုးထီၣ်၀ဲဒီးကိး၀ဲလၢသဲးစးတၢ်သိၣ်တၢ်သီတဖၣ်အံၤန့ၣ်မ့ၢ်၀ဲသဲးစးအယီၤအဘျၣ်ႇလၢအမၤလီၤမၢ်ကွံာ်၀ဲၦၤထူလံၤဖိတဖၣ်အတၢ်န့ၢ်ပၢဘၣ်ဟီၣ်ခိၣ်ကပံာ်အဃိကူၣ်သ့ဆူၣ်ချ့ဒီးၦၤမၤတၢ်ဖိလၢတူၢ်ဘၣ်၀ဲမီၤစိရိၤသနူတဖၣ်ဘၣ်အိၣ်မူ၀ဲလၢတၢ်ကီတၢ်ခဲအါမံၤအပူၤအဂ့ၢ်လံာ်ဟ့ၣ်ယုၢ်အပူၤပာ်ဖျါ၀ဲန့ၣ်လီၤႉ တကတီၢ်ဃီႇသုးကီၣ်ကးကိး၀ဲလၢသဲးစးဒီးႇစံး၀ဲလၢထံဖိကီၢ်ဖိကမျၢၢ်သူၣ်စၢ်သးဘီၣ်တဖၣ်ကဘၣ်ကဲ၀ဲသုးအသဲးစးအံၤန့ၣ်ႇမ့ၢ်၀ဲတၢ်မၢဆူၣ်မၢစိးတမံၤလၢအယီၢ်တံၢ်မၤသဘှံးကွံာ်၀ဲၦၤသူၣ်ဘီၣ်သးစၢ်တဖၣ်အတၢ်အိၣ်မူဒီးခါဆူညါထံကီၢ်ၦၤလုၢ်ဒိၣ်ၦ့ၤဒိၣ်တဖၣ်အတၢ်အိၣ်မူကီၢ်သူလ့ၤၦၤမၤတၢ်ဖိကရၢစၢဖှိၣ်စံးစ့ၢ်ကီး၀ဲဒၣ်န့ၣ်လီၤႉ ဟီၣ်ခိၣ်ဒီဖျၢၣ်ၦၤမၤတၢ်ဖိအမုၢ်နံၤအံၤႇမ့ၢ်၀ဲမုၢ်နံၤတနံၤလၢၦၤမၤတၢ်ဖိခဲလၢာ်သ့ၣ်နီၣ်ထီၣ်မၤလၤကပီၤ၀ဲၦၤမၤတၢ်ဖိတဖၣ်အတၢ်ဂဲၤလိာ်ႇအတၢ်တူၢ်ဆါခီၣ်ဆါသးႇတၢ်ဟ့ၣ်လီၤနီၢ်ခိနီၢ်သးဂံၢ်ဘါသွံၣ်ထံႇလၢတၢ်ကထူၣ်ဖျဲးထီၣ်၀ဲလၢၦၤဒိၣ်ကျိၣ်ဒိၣ်စ့တဖၣ်အတၢ်မၢဆူၣ်မၢစိးႇတၢ်အီၣ်တူာ်အီၣ်ကလီၤအကလုာ်ကလုာ်အစုပူၤန့ၣ်လီၤႉ ဒ်န့ၣ်အသိးႇဟီၣ်ခိၣ်ဒီၣ်ဖျၢၣ်ၦၤမၤတၢ်ဖိအမုၢ်နံၤအံၤမ့ၢ်စ့ၢ်ကီး၀ဲတၢ်သ့ၣ်နီၣ်မၤလၤကပီၤက့ၤၦၤမၤတၢ်ဖိတဖၣ်အတၢ်ဂဲၤလိာ်ႇတၢ်ဃူတၢ်ဖိးလၢအဟဲစိာ်၀ဲတၢ်မၤနၢၤလၢၦၤမၤတၢ်ဖိတဖၣ်ကိးဂၤအဂီၢ်အဂ့ၢ်လံာ်ဟ့ၣ်ယုၢ်အပူၤပာ်ဖျါ၀ဲန့ၣ်လီၤႉ
ကၠဲးထိၣ်ကီၢ်ဆၣ် တနံၤဃီတကတီၢ်ဃီအတီၢ်ပူၤပယီၤသုးခးလီၤကျိဖးဒိၣ်အဃိ ဟံၣ်ဟးဂီၤ ၆ ဖျၢၣ်
လါမ့ၤ ၁ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ဖဲအပူၤကွံာ်လါအ့ဖြ့ၣ် ၂၈ သီ လၢတနံၤဃီတၢ်ဆၢ်ကတီၢ်တကတီၢ်ဃီအတီၢ်ပူၤ ခီဖျိပယီၤသုးခးလီၤကျိဖးဒိၣ်အဃိ ၦၤကမျၢၢ်အဟံၣ်အဃီ ဟးဂီၤ ၀ဲဒၣ် ၆ ဖျၢၣ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ ဖဲလါအ့ဖြ့ၣ် ၂၈ သီ ဟါခီ ၉း၄၅ တၢ်ဆၢကတီၢ်တကတီၢ်ဃီအပူၤန့ၣ် သုးကီၣ်ကးအမျိာ်သုး(၃၁၀)လၢအိၣ် ကၠဲးထိၣ်ကီၢ်ဆၣ် သ့ၤစ့ၤယၣ်အံၤတဖၣ် ခးလီၤ၀ဲကျိဖးဒိၣ်(၂)ဖျၢၣ်ဒီး ပယီၤသုးလၢပကိကီၢ်ခီ ၀ီကီၢ်ဆၣ်မုၢ်ထီၣ် ကွ့ၣ်ကၠံသီခါဖၠၣ်လီၢ်ခံပျီပူၤအံၤတဖၣ်ခးလီၤစိ၀ဲကျိဖးဒိၣ်(၅)ဖျၢၣ်ဆူကၠဲးထိၣ်ကီၢ်ဆၣ်ပူၤ လီၤတဲာ်ပိၢ်ဖးထီၣ်၀ဲဒၣ်လၢ (ခယွဲသ၀ီ) ထ့တဲက၀ီၤဒ့ပူၤက၀ီၤဒ့ချၢအဃိ ဟံၣ်ဘၣ်ဟးဂီၤ၀ဲဒၣ်ဒ်အံၤလီၤအဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤအ့နဲၤ စံး၀ဲန့ၣ်လီၤႉ အ၀ဲစံး၀ဲလၢ“ဒုၣ်ဒါအမျိာ်သုး(၃၁၀)န့ၣ်အိၣ်၀ဲဒၣ်ဖဲကၠဲးထိၣ်ကီၢ်ဆၣ် သ့ၤစ့ၤယၣ်မီၤနီၤ ခးလီၤ၀ဲဒၣ်ကျိဖးဒိၣ်(၂)ဖျၢၣ်ႉ မ့၀ံၤပယီၤသုးလၢအိၣ်ပကိကီၢ်ခီန့ၣ်ခးလီၤ၀ဲဒၣ်(၅)ဖျၢၣ်ႉခဲလၢာ်ခး၀ဲဒၣ်(၇)ဖျၢၣ်ႉတၢ်နွံဖျၢၣ်အံၤန့ၣ်လီၤတဲာ်၀ဲဒၣ်ဖဲ (ခယွဲသ၀ီ)ထ့တဲက၀ီၤဒ့အခိၣ်အဃၢၤဒီးသ၀ီပူၤန့ၣ်လီၤမီၤနီၤႉလီၤတဲာ်လၢသ၀ီပူၤဘျီဘၣ်၀ဲဒၣ်ၦၤကမျၢၢ်ဟံၣ်ၦၤဟံၣ်ဟးဂီၤႉခးလီၤ၀ဲဒၣ်န့ၣ်တနံၤဃီတၢ်ဆၢကတီၢ်တဘျီဃီလီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါဒူသ၀ီတၢ်လီၢ်လၢပယီၤသုးခးလီၤကျိဖးဒိၣ်အံၤန့ၣ်တၢ်ဒုးတၢ်ယၤကဲထီၣ်တအိၣ်၀ဲဒၣ်ဘၣ်ဒီး ဒ်န့ၣ်အသိးအပူၤကွံာ်ပယီၤသုးခးလီၤကျိဖးဒိၣ်အိၣ်ထီဘိလီၤဒီးခီဖျိၦၤကမျၢၢ်တဖၣ်ဟးစံၣ်ပလဲာ်ဆိဃာ်သးအဃိ ကျိဖးဒိၣ်လီၤတဲာ်ဘျီ၀ဲအံၤတၢ်သံတၢ်ဘၣ်ဒိဘၣ်ထံးတအိၣ်၀ဲဒၣ်ဘၣ်အဂ့ၢ်န့ၣ် ပဒိၣ်စီၤအ့နဲၤ စံး၀ဲအသိးသ့ၣ်ညါ ဘၣ်န့ၣ်လီၤႉ တၢ်လၢပကိကီၢ်ခီ ၀ီကီၢ်ဆၣ်ဒီး ကၠဲးထိၣ်ကီၢ်ဆၣ်အံၤန့ၣ်အဘၢၣ်စၢၤအိၣ်၀ဲဒၣ် ကိာ်လိာ်ကျိ ထံကျိတခီတ၀ၢ်၀ၢ် လီၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ ဒ်န့ၣ်အသိးဒူသထူၣ်ကီၢ်ရ့ၣ် သထူၣ်ကီၢ်ဆၣ်ဒီးဘံလ့ကီၢ်ဆၣ်အပူၤ စးထီၣ်ဖဲလါမးရှးတုၤဃီၤလၢလါအ့ဖြ့ၣ် ဘူးကလၢာ်န့ၣ်...
ကညီသးစၢ်ကရၢလီၢ်ခၢၣ်သးတီခိၣ်ရိၣ်မဲ မၤစၢၤ၀ဲရၤမတံၦၤလီၢ်အိၣ်ကမှံဖိ (၃၀၀၀)ဘျဲၣ် ဂံၢ်ခီၣ်ထံးတၢ်အီၣ်
လါအ့ဖြ့ၣ် ၃၀ သီႇ ၂၀၂၄နံၣ်ႇ ခ့ၣ်အဲးစံၣ် ၦၤမတံတၢ်ဒုးအဃိ ၦၤလီၢ်အိၣ်ကဒုဖိလၢအက့ၤဆူနီၢ်ကစၢ်လီၢ်ကျဲတဘူၣ်ဒံးဘၣ်အဂၤ(၃၀၀၀)ဘျဲၣ်အဂီၢ် ကညီသးစၢ်ကရၢလီၢ်ခၢၣ်သးတီခိၣ်ရိၣ်မဲလဲၤမၤစၢၤအ၀ဲသ့ၣ်ဂံၢ်ခီၣ်ထံးတၢ်အီၣ်မိၢ်ၦၢ်သ့ၣ်တဖၣ် အဂ့ၢ် သ့ၣ်ညါဘၣ်လၢ ကညီသးစၢ်ကရၢလီၢ်ခၢၣ်သးအၦၤဘၣ်မူဘၣ်ဒါအအိၣ်န့ၣ်လီၤႉ ဖဲအပူၤကွံာ်လါအ့ဖြ့ၣ်(၂၇)သီအနံၤန့ၣ်ၦၤလီၢ်အိၣ်ကဒုဖိလၢအဟဲအိၣ်ဒုဖဲသုသုးက့(၇)တန့ဆါကီၢ်ဆၣ်ႇ ထံကိၢ်ႇခၠီစိၤဟီၣ်က၀ီၤဒီးသုးက့(၆)ကီးတရံးကီၢ်ဆၣ်ႇလူၤခိၣ်ဟီၣ်က၀ီၤသ့ၣ်တဖၣ် အ၀ဲသ့ၣ်လဲၤဟ့ၣ်လီၤမၤစၢၤဂံၢ်ခီၣ်ထံးတၢ်အီၣ်မိၢ်ၦၢ်သ့ၣ်တဖၣ်သ့ၣ်တဖၣ်ဒီးခီဖျိတကီၢ်ခါခဲအံၤတၢ်ကိၢ်ဒိၣ်အဃိၦၤကမျၢၢ်သ့ၣ်တဖၣ်ဘၣ်အိၣ်၀ဲလၢတၢ်ကီတၢ်ခဲပူၤအဂ့ၢ် ကညီသးစၢ်ကရၢလီၢ်ခၢၣ်သးနဲၣ်ရွဲၣ်ခိၣ်ကျၢၢ်(၂)စီၤအဲၣ်ထံကီၢ်စံးဘၣ်၀ဲ ခ့ၣ်အဲးစံၣ် ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“ခၠီစိၤဒီး ထံကိၢ်န့ၣ် အါတက့ၢ်ကမျၢၢ်ၦၤဟဲန့ၣ်လၢ ရၤမတံဒီးမ့မ့ၢ်လူၤခိၣ်ထၣ်ခီန့ၣ်ၦၤဟဲလၢတၢ်လီၢ်အါတီၤန့ၣ်လီၤႉပလဲၤဟ့ၣ်လီၤမၤစၢၤအ၀ဲသ့ၣ်တၢ်အီၣ်မိၢ်ၦၢ်ဒ်အမ့ၢ် ဟုသးႇသိႇပသၢဂီၤပသၢ၀ါႇညၣ်အုၣ်ႇမိၢ်ဂံာ်ဒီးညၣ်ဃ့သ့ၣ်တဖၣ်န့ၣ်လီၤႉၦၤလီၢ်အိၣ်ကမှံဖိသ့ၣ်တဖၣ်အံၤတနီၤန့ၣ်အိၣ်လၢသီခါဖၠၣ်ႇတနီၤန့ၣ်တ့ထီၣ်န့ၣ် ၀ဲအကစၢ်တၢ်အိၣ်တၢ်ဆိးလီၢ်ဒီးအခဲအံၤတၢ်ကိၢ်ဒိၣ်အဃိဘၣ်အိၣ်၀ဲဒၣ်လၢတၢ်ကီတၢ်ခဲပူၤလီၤႉ”အဂ့ၢ်စံး၀ဲဒၣ်န့ၣ်လီၤႉ လၢန့ၣ်အမဲာ်ညါ ခီဖျိပယီၤသုးအတၢ်ဟူးတၢ်ဂဲၤအိၣ်ဒံး၀ဲတပယူာ်ဃီအဃိ ကမျၢၢ်သ့ၣ်တဖၣ်အံၤလၢကက့ၤဆူနီၢ်ကစၢ်လီၢ်ကျဲအဂီၢ်တၢ်ဘံၣ်တၢ်ဘၢတအိၣ်ဒံးလၢအ၀ဲသ့ၣ်အဂီၢ်ဘၣ်အဖီခိၣ် ဒ်သိးကမျၢၢ်သ့ၣ်တဖၣ်အံၤကန့ၢ်ဘၣ်တၢ်မၤစၢၤလၢကတီၢ်ယံၤအဂီၢ်အ၀ဲသ့ၣ်အိၣ်ဒီးတၢ်ရဲၣ်တၢ်ကျဲၤလၢကတဲသကိးတၢ်လၢတၢ်ဆီၣ်ထွဲမၤစၢၤၦၤလီၢ်အိၣ်ကမှံဖိသ့ၣ်တဖၣ်အံၤအဂ့ၢ်စီၤအဲၣ်ထံကီၢ်တဲအါထီၣ်၀ဲဒၣ်စ့ၢ်ကီးန့ၣ်လီၤႉ လၢကမၤစၢၤ၀ဲခ့ၣ်အဲၣ်ယူၣ်ကီၢ်သူလ့ၤတၢ်ပၢ ကီၢ်ရ့ၣ်ကိးဘ့ၣ်ဒဲး ၦၤလီၢ်အိၣ်ကမှံဖိသ့ၣ်တဖၣ်အဂီၢ် ကညီသးစၢ်ကရၢ(KYO)ႇကညီဒွဲလၤပီညါကရၢ(KAA)ဒီးကလုာ်ဒူၣ်ခဲလၢာ်တၢ်ပာ်ဖျါတၢ်ဘၣ်သးကမံးတံာ်(GSCN)သ့ၣ်တဖၣ်ပာ်ဖှိၣ်ထီၣ်သးအိၣ်ဒီး ဒုးအိၣ်ထီၣ်၀ဲတၢ်ဃုစ့ပာ်ကီၤခဲၣ်ဖ့(Campaign)တခါလၢအမ့ၢ် “ကျိၣ်ကလုၢ်ဒီး ကွဲၤအတၢ်ကိး”န့ၣ်လီၤႉ ကျိၣ်စ့တၢ်မၤစၢၤလၢအဟဲနုာ်လီၤလၢ ကျိၣ်ကလုၢ်ဒီး ကွဲၤအတၢ်ကိး ခဲၣ်ဖ့အပူၤသ့ၣ်တဖၣ်န့ၣ် တၢ်မၤစၢၤ၀ဲခ့ၣ်အဲၣ်ယူၣ်ကီၢ်ရ့ၣ်တဘ့ၣ်စုာ်စုာ်အပူၤၦၤလီၢ်အိၣ်ကမှံဖိအိၣ်၀ဲအသိး လၢတၢ်အိၣ်သးတခါအဖီခိၣ်တၢ်ထုးထီၣ်သူ၀ဲစ့ပာ်ကီၤသ့ၣ်တဖၣ်န့ၣ်လၢဂ့ၢ်ဂီၢ်အူတၢ်မၤစၢၤၦၤလီၢ်အိၣ်ကမှံဖိသ့ၣ်တဖၣ်အဂီၢ်အိၣ်၀ဲဒၣ်အဂ့ၢ်သ့ၣ်ညါဘၣ်လၢ ကညီသးစၢ်ကရၢအၦၤဘၣ်မူဘၣ်ဒါအအိၣ်န့ၣ်လီၤႉ
(KTLA)ဒုးအိၣ်ဘှံး သုးခိၣ်စၣ်လိ လၢအမူဒါတၢ်မၤပူၤ(၁)နံၣ်
လါအ့ဖြ့ၣ် ၃၀သီႇ ၂၀၂၄နံၣ်ႇ ခ့ၣ်အဲးစံၣ် ကီၢ်သူလ့ၤသုးမုၣ်ဒိၣ်(KTLA)ဒုးအိၣ်ဘှံးက့ၤ သုးခိၣ်စၣ်လိလၢအမူဒါတၢ်မၤ လၢတနံၣ်အတီၢ်ပူၤအဂ့ၢ် ကီၢ်သူလ့ၤသုးမုၢ်ဒိၣ်(KTLA)သုးမုၢ်ဒိၣ်၀ဲၤလီၢ်ခိၣ်သ့ၣ် ၀ဲၤဒၢးခိၣ် ခိၣ်ကျၢၢ် သုးခိၣ်ကျၢၢ်စိစီၤဒ့ဘ့းလီဒူ ဆဲးလီၤ၀ဲအမံၤဖဲအပူၤကွံာ်လါအ့ဖြ့ၣ်(၂၉)အနံၤဒီးဘိးဘၣ်ရၤလီၤ၀ဲအဂ့ၢ်သ့ၣ်ညါဘၣ်န့ၣ်လီၤႉ လၢလံာ်ဘိးဘၣ်ရၤလီၤအပူၤန့ၣ်စံး၀ဲလၢဖဲအပူၤကွံာ် လါအ့ဖြ့ၣ်အသီ(၂၀)အနံၤန့ၣ် ကီၢ်သူလ့ၤသုးမုၢ်ဒိၣ်(KTLA)ကမံးတံာ်တၢ်အိၣ်ဖှိၣ်အဆၢကတီၢ်တၢ်တဲသကိးတၢ်ဂ့ၢ်အါမံၤအကျါ ပၣ်ဃုာ်၀ဲဒၣ်ဒီးသုးခိၣ်ဒိၣ်ဂီၢ်ဂ့ၢ်စီၤစၣ်လိ လၢအမ့ၢ် ခီၣ်မဲဒိၣ် သုးရ့ၣ်လီၤဆီအခိၣ် အတၢ်ဂ့ၢ်ဘၣ်ဃး အတၢ်မၤလၢအမၤတၢ်ထီဒါကမျၢၢ်အတၢ်ထံၣ်ႇမၤဘၣ်ဒိကီၢ်သူလ့ၤသုးမုၢ်ဒိၣ်ဒီးခိၣ်နၢ်တၢ်ကရၢကရိအသူးအသ့ၣ်အလၤကပီၤအဃိ ကီၢ်သူလ့ၤသုးမုၢ်ဒိၣ်ကမံးတံာ်တၢၣ်ပီၣ်သကိးဒီးဆၢတဲာ်၀ဲလၢတၢ်ကဟ့ၣ်သုးခိၣ်စၣ်လိတၢ်အိၣ်ဘှံးလၢမူဒါတၢ်မၤစးထီၣ်ဖဲ လါအ့ဖြ့ၣ်အသီ၂၀ႇ၂၀၂၄နံၣ်တုၤ လါအ့ဖြ့ၣ်အသီ ၂၀ႇ ၂၀၂၅နံၣ်အဂ့ၢ် ပာ်ဖျါ၀ဲဒၣ်လၢ ကီၢ်သူလ့ၤသုးမုၢ်ဒိၣ်အလံာ်ပာ်ဖျါအပူၤန့ၣ်လီၤႉ ဘၣ်ဃးဒီးတၢ်ဒုးအိၣ်ဘှံးကွံာ် သုးခိၣ်စၣ်လိလၢမူဒါတၢ်မၤဒ်အံၤအဖီခိၣ် ဒ်သိးကသ့ၣ်ညါအါထီၣ်ဘၣ်(KTLA)တၢ်ပာ်သးအဂီၢ်ခ့ၣ်အဲးစံၣ်ကညီတၢ်ကစီၣ်ဆဲးကျိးသံကွၢ်ဒီး သုးခိၣ်ကျၢၢ်နၢၤဒါအဖၢမုၢ်န့ၣ်လီၤႉ ဒ်န့ၣ်အသိးလံာ်ဘိးဘၣ်ရၤလီၤလၢတၢ်ဒုးအိၣ်ဘှံးအီၤလၢမူဒါတၢ်မၤ(၁)နံၣ်တၢ်ဂ့ၢ်န့ၣ်အ၀ဲတဒိးန့ၢ်ဘၣ်၀ဲဒံးဘၣ် ဘၣ်ဆၣ်အပူၤကွံာ်န့ၣ်တၢ်တဲသကိးအိၣ်လၢတၢ်ကဆီတလဲအလီၢ်လၢသုးက့(၄)တကပၤအဂ့ၢ် သုးခိၣ်စၣ်လိစံးဘၣ်၀ဲခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“လံာ်၀ဲန့ၣ်ၦၤတဆှၢန့ၢ်ဘၣ်ယၤဒံးဘၣ်ႉ ပတဲလိာ်သးအပူၤကွံာ်ခီန့ၣ် မ့ၢ်လၢ သုးက့(၆)အပူၤအံၤတၢ်သဘံၣ်သဘုၣ်အိၣ်အါႇတၢ်ဆီၣ်တံၢ်မၤနၢၤအါအဃိန့ၣ်ကဆီတလဲယလီၢ်ဆူသုးက့(၄)တကပၤန့ၣ်လီၤႉ အခဲအံၤ၀ဲသ့ၣ်ထုးထီၣ်လံာ်၀ဲန့ၣ်မၤအီၤဖျါဖျါရှဲရှဲႉမ့ၢ်ဖျါရှဲရှဲမး ပ၀ဲန့ၣ်ပဆၢတဲာ်တၢ်ကဘၣ်ႉကမျၢၢ်ဒီးၦၤသုးဖိအိၣ်ခိးကွၢ်လၢ်၀ဲဒီးခီဖျိ ၦၤတဲလၢၦၤကထုးကွံာ်ယလီၢ်ယလၤအဃိကမျၢၢ်ဒီးသိၣ်ဒူသးတမုာ်စ့ၢ်ကီးဘၣ်ႉလၢတၢ်ဘၢၣ်စၢၤန့ၣ်ယဘၣ်လူၤဂၢၤက့ၤလဲးလိးစ့ၢ်ကီးန့ၣ်လီၤႉမ့ၢ်ကဲထီၣ်သးဒ်န့ၣ် န့ၣ်ယၤန့ၣ်ယအိၣ်ဘှံးသ့လီၤႉနာ်က့တၢ်ပိာ်ထွဲထီၣ်အခံန့ၣ် မတၤကပိာ်ယခံလဲၣ်ႇကသ့ၣ်ဖးကဒီးဒ်လဲၣ်န့ၣ်ႇအ၀ဲသ့ၣ်ပာ်ဒ့ၣ်ပာ်ကမၢ်ယၤတသ့ဘၣ်ႉယအဲၣ်ဒိးလၢအ၀ဲသ့ၣ်ကမၤလီၤတံၢ်လီၤဆဲးန့ၣ်လီၤႉမ့ၢ်လီၤတံၢ်န့ၣ်ဒ်ယကျဲအိၣ်အသိးယကဘၣ်လဲၤလီၤႉဘၣ်ဆၣ်ယၦၤကလုာ်ကညီန့ၣ်ယတထီဒါနီတဘျီဘၣ်ႉ”အဂ့ၢ်စံး၀ဲဒၣ်န့ၣ်လီၤႉ ဖဲအပူၤကွံာ်လါအ့ဖြ့ၣ်(၈)သီအနံၤန့ၣ် တၢ်ကဲထီၣ်တ့ၢ်သးအိၣ်၀ဲတခါလၢ(KTLA)သုးဖိတကပၤစံး၀ဲလၢ(DKBA)သုးဖိတဂၤန့ၣ်မၤစၢၤပယီၤသုးအဃိမၤသံကွံာ်၀ဲဒၣ်၀ံၤအလီၢ်ခံ(DKBA)ၦၤဘၣ်မူဘၣ်ဒါတကပၤဃ့ထီၣ်၀ဲ(KTLA)ခိၣ်နၢ်ဒိၣ်ထီဒ်သိးကဟံးန့ၢ်ၦၤလၢအပၣ်ဃုာ်ပၣ်ဂီၢ်လၢတၢ်မၤသံဘျီ၀ဲန့ၣ်အဂ့ၢ်၀ီအိၣ်၀ဲဒၣ်အဂ့ၢ်သ့ၣ်ညါဘၣ်လၢ(DKBA)အၦၤဘၣ်မူဘၣ်ဒါအအိၣ်န့ၣ်လီၤႉ
ခီဖျိတၢ်ကိၢ်ဒိၣ်အဃိကမျၢၢ်ၦၤလီၢ်အိၣ်ကမှံဖိသ့ၣ်တဖၣ်သဂၢၢ်ဘၣ်ဒီးထံကၤနိကၤႇ တၢ်ဆူးတၢ်ဆါ
လါအ့ဖြ့ၣ် ၃၀ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဘျံးဒ၀ဲၢ်ကီၢ်ရ့ၣ်လၢၢ်ကဆီၤကီၢ်ဆၣ်မနိၣ်ရိၢ်ဟီၣ်က၀ီၤအပူၤအခဲအံၤန့ၣ်မ့ၢ် လၢတၢ်ကိၢ်ဒိၣ်ထီၣ်အဃိကမျၢၢ်ၦၤလီၢ်အိၣ်ကမှံဖိလၢအဃ့ၢ်အိၣ်ကဒုအသးသ့ၣ်တဖၣ်အလီၢ်န့ၣ်အါတက့ၢ်ဘၣ်ကွၢ်ဆၢမဲာ်ဘၣ်၀ဲဒီးထံကၤနိကၤဃုာ်ဒီးတၢ်ဆူးတၢ်ဆါအဂ့ၢ်လီၢ်က၀ီၤၦၤဘၣ်မူဘၣ်ဒါစံး၀ဲဒ်အံၤန့ၣ်လီၤႉ ကမျၢၢ်ၦၤလီၢ်အိၣ်ကမှံဖိလၢဟးဃ့ၢ်အိၣ်ကဒုသးသ့ၣ်တဖၣ်န့ၣ်အခဲအံၤမ့ၢ်လၢတၢ်ကိၢ်ဒိၣ်ထီၣ်အဃိၦၤလီၢ်အိၣ်ကမှံဖိအိၣ်တၢ်အလီၢ်သ့ၣ်တဖၣ်သဂၢၢ်ဘၣ်၀ဲထံကၤနိကၤအမဲာ်ညါထံတဆှီဒီးဘၣ်သူ၀ဲထံဒ်အံၤအဖီခိၣ်ကဲထီၣ်၀ဲတၢ်ဆူးတၢ်ဆါအဂ့ၢ်လၢၢ်ကဆီကီၢ်ဆၣ်မနိၣ်ရိၢ်ဟီၣ်က၀ီၤမူဒါခိၣ်ပဒိၣ်စီၤဘီးကစဲၣ်စံး၀ဲန့ၣ်လီၤႉ “ဘၣ်ဃးဒီးလၢတၢ်ကိၢ်ဒိၣ်အလါအံၤန့ၣ်ထံအီၣ်လီၤသံး၀ဲမီၤနီၤႉ ထံခီန့ၣ်တယိာ်အါလၢၤဘၣ်ဒီးထံစ့ၢ်ကီးတ ကဆှီ၀ဲဘၣ်ႉ ထံသ့ၣ်တဖၣ်န့ၣ်အိၣ်၀ဲဂီၤအူဒ်န့ၣ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ မနိၣ်ရိၢ်ဟီၣ်က၀ီၤအပူၤကမျၢၢ်ၦၤလီၢ်အိၣ်ကမှံဖိလၢဘၣ်ကွၢ်ဆၢမဲာ်၀ဲတၢ်ကိၢ်ဒိၣ်ထီၣ်ဒီးထံကၤနိကၤတၢ်ဂ့ၢ်ကီအံၤန့ၣ်မ့ၢ်၀ဲ လၣ်ဖိငၣ်ဒီးချီၣ်သူဂီၤ သ၀ီဖိလၢအဃ့ၢ်ထီၣ်ကွံာ်လၢသ၀ီပူၤသ့ၣ်တဖၣ်ၦၤနီၣ်ဂံၢ်အိၣ်၀ဲ(၅၀၀) ဘျဲၣ်ဆူအဖီခိၣ်ဒီးတကီၢ်ခါခဲအံၤလိၣ်ဘၣ်၀ဲကသံၣ်ကသီဒီးပ့ၢ်ပီၤအဂ့ၢ်မနိၣ်ရိၢ်ဟီၣ်က၀ီၤမူဒါခိၣ်စံးအါထီၣ်၀ဲန့ၣ်လီၤႉ လၢန့ၣ်အမဲာ်ညါတနီၣ်သရံၣ်ဟီၣ်က၀ီၤအပူၤစ့ၢ်ကီးမ့ၢ်လၢတၢ်ကိၢ်ဒိၣ်ထီၣ်၀ဲအဃိကမျၢၢ်ၦၤလီၢ်အိၣ်ကမှံဖိတနီၤဒီးလီၤဆီဒၣ်တၢ်ၦၤသူၣ်က့သးၦၢ်သ့ၣ်တဖၣ်ဘၣ်ကွၢ်ဆၢမဲာ်၀ဲဒီးတၢ်ဆူးတၢ်ဆါအိၣ်၀ဲအဂ့ၢ်တနီသရံၣ်ကီၢ်ဆၣ်အၦၤဘၣ်မူဘၣ်ဒါစံး၀ဲဒ်အံၤန့ၣ်လီၤႉ “ခီဖျိလၢကတီၢ်ခဲအံၤန့ၣ်တၢ်ကိၢ်ဒိၣ်ထီၣ်အဃိန့ၣ်တနီၤန့ၣ်ဘၣ်ကွၢ်ဆၢမဲာ်ဒီးတၢ်ဆူးတၢ်ဆါလၢအမ့ၢ်၀ဲတၢ်ညၣ်ဂိၢ်မ့ၢ်ဂ့ၤႇ တၢ်ဟၢဖၢလူမ့ၢ်ဂ့ၤမီၤနီၤႉ မ့မ့ၢ်လၢၦၤသးၦၢ်ခီန့ၣ်သဂၢၢ်ဘၣ်ဒီးသွံၣ်ထီၣ်ႇ ခိၣ်ထီၣ်သ့ၣ်တဖၣ် န့ၣ်အါမးန့ၣ်လီၤႉ အခဲအံၤန့ၣ်လိၣ်ဘၣ်၀ဲကသံၣ်ကသီသ့ၣ်တဖၣ်ဒီးၦၤလၢအဘၣ်ဃ့ၢ်သ့ၣ်တဖၣ်တၢ်အီၣ်တၢ် အီတပၣ်ဃုာ်ဘၣ်အဃိန့ၣ်ကဲထီၣ်၀ဲတၢ်ဂ့ၢ်ကီဒ်န့ၣ်တကလုာ်စ့ၢ်ကီးမီၤနီၤ”အဂ့ၢ်စံးဘၣ်ခ့ၣ်အဲးစံၣ်-ကညီတၢ် ကစီၣ်န့ၣ်လီၤႉ ဒ်န့ၣ်အသိးကီၢ်ပယီၤအပူၤတၢ်လီၢ်လၢမူခိၣ်ကလံၤသီၣ်ဂီၤတၢ်ကိၢ်ဒိၣ်အလီၢ်သ့ၣ်တဖၣ်ကတီၢ်ခဲအံၤကမျၢၢ်သံအနီၣ်ဂံၢ်ဟဲအါထီၣ်အိၣ်၀ဲဒၣ်အဂ့ၢ်သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးတၢ်ကစီၣ်အအိၣ်သ့ၣ်တဖၣ်န့ၣ်လီၤႉ
ကဘီယူၤဟဲခးလီၤတၢ်လၢဘံလ့ကီၢ်ဆၣ်(ထံခၠံၣ်ဘီ)သ၀ီပူၤ၀ံၤလီၢ်ခံသ၀ီဖိဟးစံၣ်မံကိးမုၢ်နၤဒဲး
လါအ့ဖြ့ၣ် ၃၀ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁) ဘံလ့ကီၢ်ဆၣ်အပူၤ ဖဲလါအ့ဖြ့ၣ် ၂၈ သီအနံၤ ကဘီယူၤဟဲခးလီၤတၢ်လၢထံခၠံၣ်ဘီသ၀ီပူၤ၀ံၤလီၢ်ခံ ၦၤသ၀ီဖိသ့ၣ်တဖၣ်မုၢ်နၤခီန့ၣ်အ၀ဲသ့ၣ်ဟးစံၣ်မံ ၀ဲဒၣ်ခဲလၢာ် ဃၣ်ဃၣ် အဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲအသိးသ့ၣ်ညါဘၣ်န့ၣ်လီၤႉ လီၢ်က၀ီၤကမျၢၢ်တဂၤစံး၀ဲလၢ“မုၢ်ဟါခါန့ၣ်ၦၤစံၣ်မံကိးမုၢ်နၤဒဲးလီၤႉမုၢ်ဟါခါန့ၣ်ၦၤစံၣ်ခဲလၢာ်ၦၤတအိၣ်နီတဂၤ လၢၤဘၣ်ႉ တၢ်အိၣ်ဘှ့ၣ်ဘှီၣ်နဟးကိးၦၤကညီမးမ့ၣ်အူတကပီၤနီဂၤလၢၤဘၣ်ႉၦၤမုၢ်ၦၢ်ဒီးၦၤဖိဒံဖိသၣ်လဲၤမံလၢ စံာ်ပျီလၢၦၢ်ပူၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤလါအ့ဖြ့ၣ် ၃၀ သီအနံၤန့ၣ်လီၤႉ ဖဲလါအ့ဖြ့ၣ် ၂၈ သီ ဟါခီ ၁၁ နၣ်ရံၣ်ဘျဲၣ်အဆၢကတီၢ်န့ၣ် ခီဖျိပယီၤသုးကဘီယူၤဟဲတ့ၢ်လီၤ၀ဲဒၣ်မ့ၣ်ပိၢ်(၂)ဖျၢၣ် လီၤတဲာ်ပိၢ်ဖးထီၣ်၀ဲဒၣ်လၢထံခၠံၣ်ဘီသ၀ီ ကၠိကရၢၢ်ပူၤတဖျၢၣ်အဃိ ကီၢ်သူလ့ၤတီၤခၢၣ်သးကၠိတၢ်သူၣ်ထီၣ်ဟးဂီၤ ၀ဲဒၣ်(၂)ဖျၢၣ်ႇၦၤကမျၢၢ်တၢ်သူၣ်ထီၣ်ဟးဂီၤဃုာ်စ့ၢ်ကီး၀ဲဒၣ်(၄)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ကဘီယူၤဟဲခးလီၤတၢ်၀ံၤလီၢ်ခံခီဖျိကမျၢၢ်တဖၣ်ဘၣ်ယိၣ်လၢကဘီယူၤကဟဲခးလီၤကဒီးတၢ်အဃိ ထံခၠံၣ်ဘီသ၀ီ ဖိဃုာ်ဒီးသ၀ီလၢအိၣ်ဘူးဖဲသ့ၣ်တဖၣ်မုၢ်နၤခီန့ၣ်အ၀ဲသ့ၣ်ဟးစံၣ်မံ၀ဲဒၣ်အဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤအ့နဲၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ “ဖဲ ၂၈ သီန့ၣ် ဟဲကွံာ်လီၤ၀ဲဒၣ်ခံ၀ီမီၤႉဖဲ ၁၁း၃၁ မံးနံးတဘျီႇ ဖဲ ၁၁း၃၆ မံးနံးတဘျီႉ ကွံာ်လီၤ၀ဲဒၣ် န့ၣ်လီၤ ၀ဲဒၣ်ဖဲကၠိကရၢၢ် ဘၣ်ဟးဂီၤ၀ဲဒၣ်ကၠိ(၂)ဖျၢၣ်ႉမ့မ့ၢ်လၢကမျၢၢ်အဟံၣ်ခီန့ၣ် ကျိဖးဒိၣ်အက့အခီဖျိးဘၣ်၀ဲဒၣ် အိၣ်(၂၁)ဖျၢၣ်...