မနိၣ်ရိၢ်ဟီၣ်က၀ီၤကမျၢၢ်ဘၣ်ဃ့ၢ်တၢ်ဒုးသ့ၣ်တဖၣ်လိၣ်ဘၣ်၀ဲတၢ်ဆီၣ်ထွဲမၤစၢၤအဂ့ၢ်မနိၣ်ရိၢ်ဟီၣ်က၀ီၤမူဒါခိၣ်စံး၀ဲ
လါအ့ဖြ့ၣ် ၂၉ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဘျံးဒ၀ဲၢ်ကီၢ်ရ့ၣ်လၢၢ်ကဆီကီၢ်ဆၣ်မနိၣ်ရိၣ်ဟီၣ်က၀ီၤအပူၤဖဲပူၤကွံာ်လါ အ့ဖြ့ၣ်(၂၃)သီအနံၤန့ၣ်မ့ၢ်လၢတၢ်ဒုးကဲထီၣ်ဒီးပယီၤအသုးကျိၤခီၣ်ချ့သုးရ့ၣ်(ခမရ-၅၅၉ႇ ၅၆၀)သုးရ့ၣ်လၢ ဟဲထီၣ်သ့ၣ်တဖၣ်အဃိၦၤလီၢ်အိၣ်မှံဖိလၢဘၣ်ဃ့ၢ်ထီၣ်ဟံၣ်ခိၣ်(၂၄)ဖျၢၣ်ၦၤနီၣ်ဂံၢ်(၁၀၀)ဃၣ်ဃၣ်လိၣ်ဘၣ်၀ဲတၢ်ဆီၣ်ထွဲမၤစၢၤအဂ့ၢ်မနိၣ်ရိၣ်ဟီၣ်က၀ီၤအၦၤဘၣ်မူဘၣ်ဒါစံး၀ဲန့ၣ်လီၤႉ ခီဖျိလၢတၢ်ဒုးကဲထီၣ်အဃိကမျၢၢ်ၦၤလီၢ်အိၣ်ကမှံဖိလၢအိၣ် ချီၣ်သူဂီၤဖိခံ သ့ၣ်တဖၣ်သုးထီၣ်က့ၤအသး ဆူ(ဘၣ်ခွါ)သ၀ီတကပၤဒီးတကီၢ်ခါခဲအံၤလီၢ်က၀ီၤၦၤဘၣ်မူဘၣ်ဒါသ့ၣ်တဖၣ်ရဲၣ်ကျဲၤကွၢ်ထွဲ၀ဲဘၣ်ဆၣ်မ့မ့ၢ်လၢကတီၢ်ယံၤအဂီၢ်ခီန့ၣ်ကဲထီၣ်တၢ်ကီတၢ်ခဲအသိးၦၤနီၣ်ဂံၢ်စ့ၢ်ကီးကဟဲအါထီၣ်၀ဲသ့အဂ့ၢ်မနိၣ်ရိၢ်ဟီၣ်က၀ီၤမူဒါခိၣ်စီၤဘီးကစဲၣ်စံး၀ဲဒ်အံၤန့ၣ်လီၤႉ “သုးကျိၤဟူးဂဲၤလၢအဟံးန့ၢ်၀ဲတၢ်ဘံၣ်တၢ်ဘၢလၢဒူသ၀ီအဂီၢ်သ့ၣ်တဖၣ်န့ၣ်ဘၣ်သဂၢၢ်ခးလိာ်သးဒီးပယီၤသုးဖဲန့ၣ်မီၤနီၤႉ ၦၤသ၀ီဖိသ့ၣ်တဖၣ်န့ၣ်ဖဲအ၀ဲသ့ၣ်တၢ်လီၢ်န့ၣ်အိၣ်၀ဲတပၢလၢၤဘၣ်ဒီးသုးထီၣ်က့ၤအသးဆူ (ဘၣ်ခွါ)သ၀ီမီၤနီၤႉ ဖဲအ၀ဲသ့ၣ်ဟဲတုၤဃီန့ၣ်ပ၀ဲဟီၣ်က၀ီၤၦၤဘၣ်မူဘၣ်ဒါသ့ၣ်တဖၣ်ပကွၢ်ရဲၣ်ကျဲၤန့ၣ်၀ဲတၢ် အိၣ်တၢ်ဆိးလီၢ်မ့ၢ်ဂ့ၤႇ တၢ်အီၣ်တၢ်အီၣ်မ့ၢ်ဂ့ၤႇ ဒ်ပမၤအီၤန့ၣ်အသိးမီၤနီၤႉ သနါက့အသီမ့ၢ်ယံၤထီၣ်တခီဒု တၢ်ဂ့ၢ်ကီကအိၣ်အါမံၤလီၤႉ မ့ၢ်ယံာ်ထီၣ်န့ၣ်ၦၤကဟဲအါထီၣ်သ့၀ဲအဃိန့ၣ်မီၤနီၤအဃိလိၣ်ဘၣ်စ့ၢ်ကီးက တီၢ်ယံၤအဂီၢ်တၢ်အီၣ်တၢ်အီႇ တၢ်အိၣ်တၢ်ဆိးဒီးကသံၣ်ကသီလီၤ”အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ ပယီၤသုးအံၤဖဲလါအ့ဖြ့ၣ်(၂၃)သီအနံၤန့ၣ်ဖီၣ်၀ဲၦၤလီၢ်အိၣ်ကမှံဖိတဂၤလၢအဟဲက့ၤလီၤဆူဒူသ၀ီအပူၤဒီးသမံသမိး၀ဲ၀ံၤအလီၢ်ခံပျၢ်လီၤကွံာ်၀ဲဘၣ်ဆၣ်ပယီၤသုးအံၤလူၤပိာ်၀ဲၦၤသ၀ီဖိတဂၤအံၤအခံလၢတၢ်ခူသူၣ်အပူၤဒ်အံၤအဖီခိၣ်တၢ်ဘၣ်သဂၢၢ်ခးလိာ်သးကဲထီၣ်ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်အဃိၦၤ(ချီၣ်သူဂီၤဖိခံ)ဘၣ်သုးကွံာ်အသးဆူ(ဘၣ်ခွါ)သ၀ီဒ်အံၤလီၤအဂ့ၢ်သ့ၣ်ညါဘၣ်န့ၣ်လီၤႉ ၦၤလီၢ်အိၣ်ကမှဖိလၢအဟဲဃ့ၢ်အိၣ်ကဒုသးဖဲ(ဘၣ်ခွါ)သ၀ီအပူၤအံၤန့ၣ်မ့ၢ်၀ဲၦၤချီၣ်သူဂီၤသ၀ီဖိလၢလဲၤဃ့ၢ်အိၣ်ကဒုအသးဖဲချီၣ်သူဂီၤဖိခံအလီၢ်ဒီးတကးဒံးဘၣ်ၦၤလီၢ်အိၣ်ကမှံဖိအိၣ်ဒံး၀ဲဒၣ်လၢ(လၣ်ဖိငၣ်)ထံခံတကပၤန့ၣ်တတီၤဒီးချီၣ်သူဂီၤဖးဒိၣ်ခံတတီၤခဲလၢာ်ခံတီၢ်ဒီးၦၤနီၣ်ဂံၢ်တခီကအိၣ်လၢ(၅၀၀)ဘျဲၣ်ဆူဖီခိၣ်လီၤအဂ့ၢ်သ့ၣ်ညါဘၣ်န့ၣ်လီၤႉ ဒ်န့ၣ်အသိးပယီၤသုးကီၣ်ကးခီၣ်ချ့သုးရ့ၣ်(ခမရ-၅၉၉ႇ ၅၆၀)သ့ၣ်တဖၣ်အံၤဖဲလါအ့ဖြ့ၣ်(၁)သီအနံၤန့ၣ်နုာ် လီၤဒွဲၣ်အူကွံာ်၀ဲ(လၣ်ဖိငၣ်)သ၀ီသးၦၢ်အဟံၣ်တဖျၢၣ်ဒီးသ၀ီဖိအဟံၣ်တဖျၢၣ်အသိးဖဲလါအ့ဖြ့ၣ်(၂)သီအနံၤန့ၣ်ဟဲနုာ်လီၤ၀ဲဒၣ်ဆူ(ချီၣ်သူဂီၤ)သ၀ီအပူၤဒီးက့ၤစိာ်ဃုာ်၀ဲဒၣ်ကမျၢၢ်တၢ်ဖိတၢ်လံၤသ့ၣ်တဖၣ်အဂ့ၢ်သ့ၣ်ညါဘၣ်လၢလီၢ်က၀ီၤၦၤဘၣ်မူဘၣ်ဒါအအိၣ်န့ၣ်လီၤ
ခီဖျိတၢ်ပာ်ပနီၣ်ဃာ်၀ဲတၢ်ဟံတၢ်ကစီၣ်အခွဲးအဃိ ၦၤမၤတၢ်ကစီၣ်ဖိတဖၣ်အိၣ်ဒီးတၢ်ဘၣ်ယိၣ်ဘၣ်ဘှီအဂ့ၢ် IPCM ထုးထီၣ်ပာ်ဖျါ
လါအ့ဖြ့ၣ် ၂၉ သီႇ ၂၀၂၄ နံၣ်ႇ ခ့ၣ်အဲးစံၣ် ဖဲအပူၤကွံာ်တလါအံၤလါအ့ဖြ့ၣ် ၁၆ သီ ဒီး ၂၁ သီအနံၤန့ၣ် ကရ့ၣ်နံၣ်ကီၢ်ကတီၢ်ဘၢၣ်စၢၤပၢပြးကီၣ်ကး(IEC)ဒီး ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ထုးထီၣ်ပာ်ဖျါ၀ဲတၢ်ဟံတၢ်ကစီၣ်လၢအအိၣ်ဒီးတၢ်ပာ်ပနီၣ်အံၤအဃိ ၦၤဟံတၢ်ကစီၣ်ဖိသ့ၣ်တဖၣ်ဘၣ်ယိၣ်ဘၣ်ဘှီတၢ်အဂ့ၢ်န့ၣ် ကီၢ်ပယီၤတၢ်ကစီၣ်သဘျ့ကီၣ်ကး(IPCM)ထုးထီၣ် ပာ်ဖျါ စံး၀ဲဖဲလါအ့ဖြ့ၣ် ၂၆ သီအနံၤန့ၣ် လီၤႉ တၢ်ကစီၣ်ဒီးတၢ်ဘိးဘၣ်ရၤလီၤဘၣ်ဃးတၢ်သိၣ်တၢ်သီတၢ်ဘျၢလၢကရူၢ်ကရၢ(၂)ဒူၣ်အံၤထုးထီၣ်ပာ်ဖျါ၀ဲဒၣ်အံၤန့ၣ် တၢ်ဂ့ၢ်တၢ်ကျိၤတနီၤန့ၣ်ခီဖျိမၤပျံၤမၤဖုး၀ဲၦၤဟံတၢ်ကစီၣ်ဖိအတၢ်ဘံၣ်တၢ်ဘၢဒီးတၢ်ဟံတၢ်ကစီၣ်လၢသဘျ့အဃိ ကဲထီၣ်၀ဲဒၣ်တၢ်ကိၢ်တၢ်ဂီၤတၢ်ဘၣ်ယိၣ်ဘၣ်ဘှီလၢကီၢ်ပယီၤတၢ်ကစီၣ်ဒီးၦၤဟံတၢ်ကစီၣ်ဖိတဖၣ်အဂီၢ်အဂ့ၢ်န့ၣ် (IPCM)စံး၀ဲန့ၣ်လီၤႉ ဒ်သိးကရူၢ်ကရၢဘၣ်ထွဲလၢအိိၣ်ဟီၣ်က၀ီၤပူၤတဖၣ်ဒီးၦၤဟံတၢ်ကစီၣ်ဖိတဖၣ်အံၤအဘၢၣ်စၢၤတၢ်ဖုၣ်ထံၣ်ဖုၣ်ထီ သုတအိၣ်ထီၣ်တဂ့ၤအဂီၢ်ဒီးတကးဒံးဘၣ်ဒ်သိးတၢ်ဘၣ်ယိၣ်ဘၣ်ဘှီသုတကဲထီၣ်လၢၦၤဟံတၢ်ကစီၣ်ဖိတဖၣ်တဂ့ၤ အဂီၢ် ဘၣ်တၢ်ထုးထီၣ်ပာ်ဖျါ၀ဲဒ်အံၤလီၤအဂ့ၢ်န့ၣ် IPCM ပှၤပၢၤလီၢ်ဆ့ၣ်နီၤ နါဖီဂ့ၤ စံး၀ဲန့ၣ်လီၤႉ အ၀ဲစံး၀ဲလၢ“ကီၢ်ပယီၤပူၤကယဲၢ်မ့ၢ်ၦၤမၤတၢ်ကစီၣ်ဖိလၢအလဲၤဟံတၢ်ကစီၣ်လၢတၢ်ဒုးတၢ်ယၤကဲထီၣ်အလီၢ်သ့ၣ် တဖၣ်အံၤန့ၣ်လၢအ၀ဲသ့ၣ်အဂီၢ်(IPCM)ဘၣ်ယိၣ်လၢတၢ်ဘံၣ်တၢ်ဘၢႇတၢ်ဒီတဒၢတအိၣ်လၢအ၀ဲသ့ၣ်အဂီၢ်ဘၣ်လီၤႉတမ့ၢ်ထဲလၢကရ့ၣ်နံၣ်ဒီးကညီအဟီၣ်က၀ီၤပူၤဧိၤဘၣ်ႉကလုာ်ဒူၣ်ဟီၣ်က၀ီၤလၢအဂၤဒီးကီၢ်ခီတဖၣ်အပူၤစ့ၢ်ကီး ကရူၢ်ကရၢ ဘၣ်ထွဲဒီးၦၤဟံတၢ်ကစီၣ်ဖိတဖၣ်အဘၢၣ်စၢၤပတအဲၣ်ဒိးလၢတၢ်ဘၣ်ဂံာ်ဂူာ်ကကဲထီၣ်ဘၣ်အဃိ ဒ်သိးတၢ်အုၣ်ကီၤသး ကအိၣ်တခါခါအဂီၢ်ဘၣ်တၢ်ဆီၣ်တခူထုးထီၣ်၀ဲလံာ်ဒ်အံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ်န့ၣ်လီၤႉ လၢ(IPCM)လံာ်တၢ်ပာ်ဖျါအပူၤန့ၣ်စ့ၢ်ကီးဆီၣ်တခူထီၣ်၀ဲ ကရူၢ်ကရၢဘၣ်ထွဲလၢအမုၢ်လၢ်ကွၢ်စိဖဲၣ်ဒရၢၣ်ဒံၣ်မိၣ်ခြ့ၣ်စံၣ် ကီၢ်စၢဖှိၣ်အံၤတဖၣ်လၢကသ့ၣ်ညါပာ်ကဲလူၤပိာ်မၤထွဲ၀ဲဒၣ်တၢ်ဟံကစီၣ်လၢသဘျ့ဒီးအလုၢ်အၦ့ၤ သ့ၣ်တဖၣ်အဂ့ၢ်န့ၣ် လံာ်တၢ်ပာ်ဖျါအပူၤဆီၣ်တခူထီၣ်၀ဲဒၣ်န့ၣ်လီၤႉ ၦၤဟံတၢ်ကစီၣ်ဖိတဖၣ်မ့နုာ်လီၤဟံတၢ်ကစီၣ်လၢပျီပူၤန့ၣ်ကဘၣ်ဟံစိ၀ဲဒၣ်တၢ်ပျဲႇကဘၣ်ပာ်ဖျါထီၣ်တၢ်ကစီၣ်သန့ အမံၤႇၦၤဟံတၢ်ကစီၣ်ဖိအမံၤ(အကး)ႇတၢ်လီၢ်တၢ်ကျဲလၢကလဲၤဟံတၢ်ကစီၣ်ဒီးကလဲၤဟံတၢ်ကစီၣ်တၢ်ဂ့ၢ်တၢ်ကျိၤသ့ၣ်တဖၣ်ဒီး ၦၤလၢအမ့တလူၤပိာ်မၤထွဲတၢ်သိၣ်တၢ်သီအံၤဘၣ်န့ၣ်ကဟံ၀ဲဒၣ်အရ့အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သး ထုးထီၣ်ပာ်ဖျါ၀ဲဖဲအပူၤကွံာ်လါအ့ဖြ့ၣ် ၂၁ သီ အနံၤန့ၣ်လီၤႉ ဒ်န့ၣ်အသိးဖဲလါအ့ဖြ့ၣ် ၁၆ သီအနံၤန့ၣ်စ့ၢ်ကီး လၢကရ့ၣ်နံၣ်ကီၢ်စဲၣ်အပူၤ (IEC)ထုးထီၣ်ပာ်ဖျါနဲၣ်လီၤစ့ၢ်ကီး၀ဲ တၢ်ဂ့ၢ်(၈) ထံၣ်လၢၦၤဟံတၢ်ကစီၣ်သဘျ့လၢအဟံတၢ်ကစီၣ်ဃုာ်ဒီးကီၢ်ပူၤကီၢ်ချၢတၢ်ကစီၣ်တဖၣ်ကဘၣ်လူၤပိာ် မၤထွဲတၢ်နဲၣ်လီၤ အံၤသ့ၣ်တဖၣ်န့ၣ်လီၤႉ...
ကပၣ်ဃုာ်ပၣ်ဂီၢ်လၢကညီစၢၤသွဲၣ်အါစိၤတၢ်ကဲခိၣ်ကဲနၢ်တၢ်ထံၣ်လိာ်တၢၣ်ပီၣ်တၢ်ရဲၣ်တၢ်ကျဲၤအပူၤအဂ့ၢ်(KNU)ဆီၣ်တခူစံး၀ဲ
လါအ့ဖြ့ၣ်၂၉သီႇ၂၀၂၄နံၣ်ႇခ့ၣ်အဲးစံၣ်ႇ ကညီသူၣ်ဘီၣ်သးစၢ်တဖၣ်ကပၣ်ဃုာ်ပၣ်ဂီၢ်လၢ“ကညီစၢၤသွဲၣ်အါစိၤတၢ်ကဲခိၣ်ကဲနၢ်တၢ်ထံၣ်လိာ်တၢၣ်ပီၣ်”တၢ်ရဲၣ်တၢ်ကျဲၤအပူၤအဂ့ၢ်ု္ဒ္ကဆီၣ်တခူစံးလီၤ၀ဲလၢ(Karen Intergenerational leadership conference-KILC) စိၤရှၢၣ်မံၤဒံၣ်ယၢၣ်အပူၤဖဲလါအ့ဖြ့ၣ်(၂၇)သီအနံၤန့ၣ်လီၤႉ ဒ်သိးကဒိးန့ၢ်က့ၤတၢ်စံၣ်ညီၣ်ပၢလီၤနီၢ်ကစၢ်သးလၢႇကီၢ်သူလ့ၤကညီကီၢ်အပူၤဒီးပၢပြးပဒိၣ်ကအိၣ်ထီၣ်၀ဲအမဲာ်ညါႇကကဲထီၣ်တၢ်ဂံၢ်တၢ်ဘါနီၢ်နီၢ်လၢကညီကလုာ်ဒူၣ်အဂီၢ်ႇကွဲမုာ်၀ဲကညီသးစၢ်ကိးဂၤလၢကပၣ်ဃုာ်ပၣ်ဂီၢ်လၢတၢ်ကူၣ်လိာ်တၢၣ်ပီၣ်သကိးကညီဒီကလုာ်ဂ့ၢ်၀ီအဂီၢ်အဂ့ၢ်ႇခ့ၣ်အဲၣ်ယူၣ်နဲၣ်ရွဲၣ်သဃဲၤ(၂)ပဒိၣ်စီၤလၣ်ထိစံးလီၤ၀ဲလၢ(Karen Intergenerational leadership conference-KILC)ဃစိၤရှၢၣ်မံၤဒံၣ်ယၢၣ်အ(Facebook-page)အပူၤဒ်အံၤန့ၣ်လီၤႉ အ၀ဲစံး၀ဲလၢ “ဒ်သိးပကဒိးန့ၢ်က့ၤပတၢ်စံၣ်ညီၣ်ပၢလီၤလၢကီၢ်စၢဖှိၣ်ကညီကီၢ်ကီၢ်သူလ့ၤအပူၤအဂီၢ်ႇဒီးပကသူၣ်ထီၣ်သကိးကီၢ်သူလ့ၤအဂီၢ်မ့ၢ်တၢ်ဒုးသ့ၣ်ညါ၀ဲကညီသူၣ်ဘီၣ်သးစၢ်တဖၣ်လၢပကမၤ၀ဲတၢ်ထံၣ်လိာ်တၢၣ်ပီၣ်တၢ်ရဲၣ်တၢ်ကျဲၤအိၣ်၀ဲတခါန့ၣ်လီၤႉပကသူၣ်ထီၣ်က့ၤကညီကီၢ်ဒီးပကဂဲၤလိာ်လၢကညီဒီကလုာ်ဂ့ၢ်၀ီအဂီၢ်တၢ်လိၣ်ဘၣ်နီၢ်နီၢ်အိၣ်၀ဲအဖီခိၣ်ပရဲၣ်ကျဲၤ၀ဲ(Intergenerational leadership)တၢ်တၢၣ်ပီၣ်တၢ်ရဲၣ်တၢ်ကျဲၤအံၤန့ၣ်လီၤႉအဃိသတးဒီးပကွဲမုာ်ဘၣ်၀ဲကညီသူၣ်ဘီၣ်သးစၢ်တဖၣ်အတၢ်ပၣ်ဃုာ်ပၣ်ဂီၢ်န့ၣ်လီၤႉဒီးပကွဲမုာ်ဘၣ်၀ဲကညီသးစၢ်ကိးဂၤလၢအအိၣ်ဘူးမ့ၢ်ဂ့ၤအိၣ်ယံၤမ့ၢ်ဂ့ၤဟဲက့ၤမ့ၢ်သ့ပၣ်ဃုာ်မ့ၢ်သ့န့ၣ်ဟဲက့ၤပၣ်ဃုာ်ပၣ်ဂီၢ်သကိးလၢတၢ်ကမၤနၢ်ပၢၢ်ဖီၣ်လိာ်သးစုနီၢ်နီၢ်လၢပၦၤကလုာ်အဂီၢ်န့ၣ်လီၤႉဒ်သိးပကညီကီၢ်ကီၢ်သူလ့ၤအတၢ်ပၢတၢ်ပြးဒီးကီၢ်သူလ့ၤပဒိၣ်တဖုကအိၣ်ထီၣ်၀ဲနီၢ်နီၢ်ဒီးကကဲထီၣ်ဂံၢ်ဘါဖးဒိၣ်တခါအဂီၢ်န့ၣ်ပကရဲၣ်ကျဲၤမၤအီၤအက့ၢ်အဂီၤဒ်လဲၣ်န့ၣ်ပကဘၣ်တဲသကိးအီၤဒီးပကစးထီၣ်မၤ၀ဲတၢ်အံၤမ့ၢ်တၢ်အခီၣ်ထံးခီၣ်ဘိန့ၣ်လီၤ” အဂ့ၢ်စံး၀ဲဒၣ်န့ၣ်လီၤႉ လၢန့ၣ်အမဲာ်အညါႇတၢ်ကူၣ်လိာ်တၢၣ်ပီၣ်အတၢ်ရဲၣ်တၢ်ကျဲၤဘျီ၀ဲအံၤအပူၤႇလိၣ်ဘၣ်၀ဲကညီသူၣ်ဘီၣ်သးစၢ်လၢအတၢ်သ့တၢ်ဘၣ်အိၣ်လၢအလီၢ်အသနၢၣ်ဒၣ်၀ဲစုာ်စုာ်သ့ၣ်တဖၣ်အတၢ်ပၣ်ဃုာ်ပၣ်ဂီၢ်နီၢ်နီၢ်အဂ့ၢ်အ၀ဲစံးအါထီၣ်ကဒီး၀ဲဒၣ်န့ၣ်လီၤႉ တကးဒံးဘၣ်ႇဖဲတၢ်ထံၣ်လိာ်တၢၣ်ပီၣ်ဘျီ၀ဲအံၤန့ၣ်မုၢ်လၢ်၀ဲလၢကဒိးန့ၢ်ဘၣ်၀ဲတၢ်သူၣ်ထီၣ်တၢ်နၢ်ပၢၢ်ႇတၢ်ဘျးစဲလၢအဂ့ၤဒိၣ်ထီၣ်လၢကညီသးစၢ်ဒီးခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢအဘၢၣ်စၢၤအသိးခီဖျိတၢ်သူၣ်ထီၣ်တၢ်ဘျးစဲအံၤအဃိတၢ်ဘှါရှဲ၀ဲတၢ်ဂ့ၢ်ကီလၢအိၣ်ထီၣ်လၢကညီဖိလၢအဘူးအယံၤတဖၣ်အဘၢၣ်စၢၤကသ့ဒိၣ်ထီၣ်၀ဲဒီးကဒိးန့ၢ်ဘၣ်၀ဲတၢ်ဖီၣ်လိာ်စုမၤသကိးတၢ်စ့ၢ်ကီးအဂ့ၢ်အ၀ဲစံးစ့ၢ်ကီး၀ဲန့ၣ်လီၤႉ တၢ်မၤ၀ဲ“ကညီစၢၤသွဲၣ်အါစိၤတၢ်ကဲခိၣ်ကဲနၢ်တၢ်ထံၣ်လိာ်တၢၣ်ပီၣ်” Karen Intergenerational leadership Conference)အံၤတၢ်တီခိၣ်ရိၢ်မဲရဲၣ်ကျဲၤအီၤလၢ(KILC)ကမံးတံာ်ခိၣ်နၢ်တဖၣ်ဒီးတၢ်ရဲၣ်တၢ်ကျဲၤအံၤတၢ်ကစးထီၣ်မၤ၀ဲဖဲလါလၢကဟဲလါမ့ၤ(၁၈-၁၉)သီလၢခံသီအတီၢ်ပူၤအိၣ်၀ဲအဂ့ၢ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ဒ်န့ၣ်အသိးႇလၢတၢ်မၤ၀ဲတၢ်တၢၣ်ပီၣ်အတၢ်ရဲၣ်တၢ်ကျဲၤဘျီ၀ဲအံၤအပူၤန့ၣ်ႇကတူၢ်လိာ်၀ဲကညီသူၣ်ဘီၣ်သးစၢ်လၢ အစှၤကတၢၢ်ဖျိထီၣ်ခီလ့ၣ်ကၠိပတီၢ်လၢအသးနံၣ်(၂၃)နံၣ်ဆူအဖီခိၣ်သ့ၣ်တဖၣ်ဒီးတၢ်ရဲၣ်တၢ်ကျဲၤအပူၤပာ်ပနီၣ်၀ဲသးစၢ်အနီၢ်ဂံၢ်အဂၤ(၇၀)တုၤလၢ(၁၀၀)အဘၢၣ်စၢၤအိၣ်၀ဲအဂ့ၢ်သ့ၣ်ညါဘၣ်ဒ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
ခီဖျိတၢ်ဒုးအဃိရၤမတံၤနီၣ်ဂံၢ်(၁)တိၤလၢတၢ်ပံးဃာ်အီၤန့ၢ်လၢတနွံၤအံၤန့ၣ်တၢ်က့ၤအိးထီၣ်ကဒါက့ၤ၀ဲလံ
လါအ့ဖြ့ၣ် ၂၇ သီႇ ၂၀၂၄ နံၣ်ႇ ခ့ၣ်အဲးစံၣ် ကီၢ်ပယီၤ-ကီၢ်ကၠီၣ်တဲၣ်ကီၢ်ဆၢရၤမတံၤနီၣ်ဂံၢ်(၁)တိၤလၢတၢ်ပံးဃာ်အီၤထီၣ်ဘးလၢတနွံအတီၢ်ပူၤအံၤန့ၣ်ဖဲ တနံၤအံၤလါအ့ဖြ့ၣ်(၂၇)သီဂီၤခီ(၁၀)နၣ်ရံၣ်အဆၢကတီၢ်တၢ်က့ၤအိးထီၣ်ကဒါက့ၤ၀ဲလံအဂ့ၢ်လီၢ်က၀ီၤကမျၢၢ်ဖိသ့ၣ်တဖၣ်စံး၀ဲအသိးသ့ၣ်ညါဘၣ်န့ၣ်လီၤႉ ဖဲတနံၤအံၤဂီၤခီအဆၢကတီၢ်န့ၣ်ရၤမတံၤနီၣ်ဂံၢ်(၁)တိၤအံၤတၢ်က့ၤအိးထီၣ်ကဒါက့ၤ၀ဲလံဒီးကမျၢၢ်သ့ၣ်တဖၣ်ဟဲအိၣ်ခိးတၢ်ရဲၣ်လီၤအသးအိၣ်၀ဲအါမးဒီးၦၤလ့ၣ်လိၤလ့ၣ်ထီၣ်ဒ်အပူၤကွံာ်အသိးသ့၀ဲလံအဂ့ၢ်ၦၤရၤမတံၤလီၢ်က၀ီၤဖိလၢအိၣ်ဘူးဖဲန့ၣ်တဂၤစံး၀ဲဒ်အံၤန့ၣ်လီၤႉ “တိၤအံၤအိးထီၣ်၀ဲလံမီၤနီၤႉ အိးထီၣ်၀ဲဖဲတနံၤညါအံၤဂီၤခီန့ၣ်လီၤမီၤႉ ၦၤလ့ၣ်လိၤလ့ၣ်ထီၣ်န့ၣ် ဒ်သိးအလီၢ်လီၢ်လီၤႉ ဖဲတိၤခိၣ်ထိးန့ၣ်ယထံၣ်ဘၣ်၀ဲၦၤအိၣ်ရဲၣ်လီၤအသးအိၣ်ဒီဒူၣ်လီၤႉ ၦၤဘၣ်နီၤနီၤဟဲက့ၤထီၣ်အိၣ်ခိးတၢ်န့ၢ်ခံသီသၢသီလံဒၢၤႉ တိၤအံၤအိးထီၣ်လံမီၤနီၤ အိးထီၣ်ထံဆးလံႉ ၦၤလဲၤ၀ဲဒၣ်ဒီဒူၣ်လံ”အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ရၤမတံၤတၢ်ရ့လိာ်မုၣ်လိာ်နီၣ်ဂံၢ်(၁)တိၤအံၤခီဖျိတၢ်ဒုးတၢ်ယာ်ကဲထီၣ်၀ဲလၢရၤမတံၤ၀့ၢ်ပူၤအဃိစးထီၣ်ဖဲလါအဖြ့ၣ်(၂၁)သီအနံၤန့ၣ်သုးကီၣ်ကးတကပၤကးတံၢ်ကွံာ်တိၤအံၤတစိၢ်တလီၢ်အဂ့ၢ််န့ၣ်သ့ၣ်ညါဘၣ်လၢရၤမတံၤကမျၢၢ်လၢအဟဲဃ့ၢ်ထီၣ်အိၣ်ဘူးဖဲန့ၣ်သ့ၣ်တဖၣ်အအိၣ်န့ၣ်လီၤႉ တၢ်က့ၤအိးထီၣ်ကဒါက့ၤ၀ဲတိၤအံၤဘၣ်ဆၣ်လၢကီၢ်ပယီၤတကပၤမၤဃံးထီၣ်၀ဲတၢ်ဘံၣ်တၢ်ဘၢၣ်ဃံးဒိၣ်န့ၢ်ဒံးခါလၢပူၤကွံာ်အသိးၦၤလၢတ့တၢ်ခီတိာ်လံာ်လဲၢ်အသီသ့ၣ်တဖၣ်တၢ်သမံသမိးအ၀ဲသ့ၣ်အါ၀ဲအဂ့ၢ်ၦၤလၢခီထီၣ်ခီလီၤတိၤသ့ၣ်တဖၣ်စံး၀ဲဒၣ်န့ၣ်လီၤႉ ဒ်န့ၣ်အသိးရၤမတံၤတၢ်ဒုးအဃိၦၤလၢဘၣ်ဃ့ၢ်ထီၣ်အိၣ်ကဒုအသးဖဲမဲးဆီးတၢ်ရ့လိာ်မုၣ်လိာ်တိၤနီၣ်ဂံၢ်(၂)အဃၢၤ(၁၈ - Gate)တၢ်အိၣ်ခိးတြဲၤ-မဲးတဲးလဲးကရၢအပူၤသ့ၣ်တဖၣ်ၦၤနီၣ်ဂံၢ်အိၣ်၀ဲ(၈၀၀)ဘျဲၣ်ဒီးခီဖျိရၤမတံၤ တကပၤတၢ်သီၣ်တၢ်သဲတအိၣ်လၢၤဘၣ်အဃိကီၢ်ကၠီၣ်တဲၣ်သုးခိၣ်နၢ်တဖၣ်ပျဲၤက့ၤကဒါက့ၤ၀ဲအ၀ဲသ့ၣ်တဖၣ်လံအဂ့ၢ်ၦၤမၤစၢၤၦၤဃ့ၢ်တၢ်ဒုးၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
သုးကီၣ်ကးအံၤပညိၣ်ခးလီၤကျိဖးဒိၣ်အဃိကမျၢၢ်ဘၣ်ဒိ(၂)ဂၤဒီးကမျၢၢ်ဟံၣ်ဟးဂီၤ(၈)ဖျၢၣ်
လါအ့ဖြ့ၣ် ၂၇ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဒူသထူၣ်ကီၢ်ရ့ၣ်သုးက့(၁)သထူၣ်ကီၢ်ဆၣ်ဟီၣ်က၀ီၤအပူၤဖဲလါအ့ဖြ့ၣ်(၂၅) သီမုၢ်ထူၣ်(၁၂)နၣ်ရံၣ်ဃၣ်ဃၣ်အဆၢကတီၢ်ခီဖျိသုးကီၣ်ကးခးလီၤ၀ဲကျိဖးဒိၣ်ဆူကမျၢၢ်ဒူသ၀ီပူၤအဃိကမျၢၢ်ဘၣ်ဒိ(၂)ဂၤဒီးကျိဖးဒိၣ်အက့အခီဖျိးဘၣ်ကမျၢၢ်ဟံၣ်ဃီ(၈)ဖျၢၣ်အဂ့ၢ်လီၢ်က၀ီၤအၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ ပယီၤသုးကီၣ်ကးမျိာ်သုးရ့ၣ်နီၣ်ဂံၢ်(၃၁၄)လၢအအိၣ်(စးတရီ)သ၀ီမုၢ်နုာ်ထံဖိညၣ်လံၣ်ဒီးပယီၤသုးခီၣ်ချ့သုးရ့ၣ်(ခမရ-၉)လၢအအိၣ်သူၣ်လီၤဖဲ(၀ၣ်ပာ်သီ)သ၀ီအပူၤသ့ၣ်တဖၣ်အံၤပညိၣ်ပာ်ပနီၣ်ခးလီၤကျိဖးဒိၣ်(၇) ဖျၢၣ်လီၤတဲာ်ပိၢ်ဖးထီၣ်၀ဲလၢစွ့ၤယီၤပၠၣ်ကရူၢ် မယါကိ သ၀ီပူၤ(၃)ဖျၢၣ်ဒီးမံၣ်ခၠီအဲၤသ၀ီအခိၣ်အဃၢၤ(၄)ဖျၢၣ် အဃိဘၣ်ဒိ၀ဲ မယါကိ သ၀ီဖိ(၂)ဂၤဒီးဘၣ်၀ဲကမျၢၢ်ဟံၣ်(၈)ဖျၢၣ်အဂ့ၢ်သ့ၣ်ညါဘၣ်န့ၣ်လီၤႉ ပယီၤသုးကီၣ်ကးအံၤတၢ်ဒုးတၢ်ယာ်ကဲထီၣ်သးတအိၣ်ဘၣ်ဆၣ်ပညိၣ်ပာ်ပနီၣ်၀ဲဒၣ်ကမျၢၢ်ဒ်တၢ်ခးပနီၣ်အသိးဒီးခးလီၤ၀ဲကျိဖးဒိၣ်ဒ်အံၤလီၤအဂ့ၢ်လီၢ်က၀ီၤအၦၤဘၣ်မူဘၣ်ဒါစံး၀ဲန့ၣ်လီၤႉ “ပယီၤသုးမီၤစိၤရိၤတဖုအံၤပာ်ပနီၣ်ကမျၢၢ်ထံဖိကီၢ်ဖိဒ်သိးဒီးတၢ်ခးပနီၣ်အလီၢ်ဒီးခးစိကျိဖးဒိၣ်ဆူဒူသ၀ီတဖၣ်အပူၤအိၣ်၀ဲထီဘိဒီးတၢ်ဒုးကဲထီၣ်သးတအိၣ်ဘၣ်ဘၣ်ဆၣ်ပယီၤသုးအံၤဖဲလါအ့ဖြ့ၣ်၂၅သီအနံၤဂီၤခီ(၁၁း၅၅)မံးနံးအဆၢကတီၢ်န့ၣ်ပယီၤသုးသ့ၣ်တဖၣ်အံၤခးလီၤကျိဖးဒိၣ်ဆူစွ့ၤယီၤပၠၣ်ကရူၢ်မယါကိသ၀ီပူၤ(၃)ဖျၢၣ်ဒီးမံၣ်ခၠီအဲၤသ၀ီအခိၣ်အဃၢၤ၄ဖျၢၣ်လီၤ”အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါခီဖျိလၢပယီၤသုးကီၣ်ကးခးလီၤ၀ဲကျိဖးဒိၣ်ဒ်အံၤဖီခိၣ်ဘၣ်အူအီၣ်ကွံာ်၀ဲၦၤသ၀ီဖိ(စီၤမီၤစီၤ)အရီဘၢၣ်ကျီးဒီးဘၣ်ဟးဂီၤကွံာ်၀ဲတၢ်မုၢ်တၢ်ဘိတၢ်ချံတၢ်သၣ်သ့ၣ်တဖၣ်အဂ့ၢ်သ့ၣ်ညါဘၣ်န့ၣ်လီၤႉ ဒ်န့ၣ်အသိးဒူသထူၣ်ကီၢ်ရ့ၣ်(သုးက့-၁)ဖၣ်အၣ်ကီၢ်ဆၣ်ဟီၣ်က၀ီၤအပူၤဖဲလါအ့ဖြ့ၣ်(၂၀)သီအနံၤ ဟါခီ(၈)နၣ်ရံၣ်တခီတုၤလၢ(၉)နၣ်ရံၣ်ဘျဲၣ်အဆၢကတီၢ်န့ၣ်ခီဖျိပယီၤသုးကဘီယူၤဟဲတ့ၢ်လီၤမ့ၣ်ပိၢ်လၢ(ဟၣ်တရဲး)ကရူၢ်ထံနုာ်သ၀ီသီခါဖၠၣ်ကရၢၢ်ပူၤအဃိကမျၢၢ်ပိာ်မုၣ်ဘၣ်ဒိ၀ဲဒၣ်(၂)ဂၤအဂ့ၢ်သ့ၣ်ညါဘၣ်လၢလီၢ်က၀ီၤၦၤဘၣ်မူဘၣ်ဒါအိၣ်န့ၣ်လီၤႉ
(KNLA) ဒီးသုးပာ်ဖှိၣ်ထီၣ်ဒုးန့ၢ်ကွံာ် ပယီၤသုးကလၢၤလၢအိၣ်ဆီလီၤသးဖဲဖၣ်ပူၣ်၀့ၢ်
လါအ့ဖြ့ၣ် ၂၆ႇ သီ ၂၀၂၄ နံၣ်ႇ ခ့ၣ်အဲးစံၣ် ကညီဒီလုာ်တၢ်ထူၣ်ဖျဲးသုးမုၢ်ဒိၣ်ဒီးသုးပာ်ဖှိၣ်သ့ၣ်တဖၣ်ဖဲလါအ့ဖြ့ၣ်၂၅သီအနံၤန့ၣ်ထီၣ်မၤန့ၢ်ကွံာ်၀ဲပယီၤသုးကလၢၤလၢအအိၣ်ဆီလီၤသးလၢဖၣ်ပူၣ်၀့ၢ်လၢအမ့ၢ် ခီၣ်ချ့သုးရ့ၣ်(ခမရ ၄၃၄)အဂ့ၢ်သ့ၣ်ညါဘၣ်ဒ်ခ့ၣ်အဲၣ်ယူၣ်မုၢ်တြီၢ်အတၢ်ပာ်ဖျါအိၣ်၀ဲအသိးန့ၣ်လီၤႉ ဖဲတၢ်ထီၣ်မၤန့ၢ်ပယီၤသုးကလၢၤဘျီ၀ဲန့ၣ် န့ၣ် တၢ်မၤန့ၣ်ဃုာ်၀ဲကျိချံၦာ်သၣ်အါအါဂီၢ်ဂီၢ်ဘၣ်ဆၣ် စရီလီၤတံၢ်လီၤဆဲးကပာ်ဖျါက့ၤလၢခံဒ်အလီၢ်အိၣ်၀ဲအသိးအဂ့ၢ်ခ့ၣ်အဲၣ်ယူၣ်မုၢ်တြီၢ်တၢ်ကစီၣ်ပာ်ဖျါ၀ဲဒၣ်စ့ၢ်ကီးန့ၣ်လီၤႉ ဒ်န့ၣ်အသိး လၢတၢ်ဘံၣ်တၢ်ဘၢအဂီၢ်အ၀ဲသ့ၣ်တၢ်ဖံးတၢ်မၤသ့ၣ်တဖၣ်န့ၣ်တအဲၣ်ဒိးပာ်ဖျါ၀ဲလၢ (Social Media) ချ့ချ့ခီဖျိတၢ်လၢအ၀ဲသ့ၣ်ကဘၣ်ဆဲးမၤ၀ဲခါဆူၣ်ညါအိၣ်ဒံး၀ဲအါမးဘၣ်ဆၣ်ခီဖျိ တၢ်အိၣ်သးကိၢ်ကိၢ်လၢၤလၢၤဒ်အံၤအဖီခိၣ် ထံဖိကီၢ်ဖိဒီးကလုာ်ဂၤလၢဆီၣ်ထွဲမၤစၢၤအ၀ဲသ့ၣ် သ့ၣ်တဖၣ်အသးသဟီၣ်လီၤစၢ်အဃိ တသ့တဘၣ်ဘၣ်အဃိဘၣ်ပာ်ဖျါထီၣ်၀ဲအတၢ်မၤနၢၤအစၢအဂ့ၢ် သုးခိၣ်ဖိစီၤအဲၣ်ခုစိလၢအအိၣ်တၢ်ဒုးပျီပူၤစံးဘၣ်၀ဲဒၣ် ခ့ၣ်အဲၣ်ယူၣ်မုၢ်-တီၢ်တၢ်စီၣ်န့ၣ်လီၤႉ လၢန့ၣ်အမဲာ်ညါ လၢသုးမီၤစိရိၤသနူကလီၤၦီၢ်ကွံာ်ဒီးတၢ်ကသူၣ်ထီၣ်နီၢ်ကစၢ်ဘူၣ်တီၢ်အဂီၢ် အ၀ဲသ့ၣ်ဒုးတၢ်လၢၤမုၢ်နၤမုၢ်ဆါအဂ့ၢ်ဒီး ၦၤလၢဟ့ၣ်လီၤတ့ၢ်သးလၢ ကျိၣ်စ့၊ၦၤနီၢ်ဂံၢ်၊ဒီးသးသဟီၣ်သ့ၣ်တဖၣ် သုတဘၣ်သးဒ့ဒီတဂ့ၤအဂ့ၢ် သုးခိၣ်ဖိစီၤအဲၣ်ခုၣ်စိစံးဘၣ်၀ဲ ကီၢ်ပူၤ၊ကီၢ်ချၢ၊ကီၢ်ဆၢ ကမျၢၢ် ခီဖျိခ့ၣ်အဲၣ်ယူၣ်မုၢ်တြီၢ်တၢ်ကစီၣ်တဆီန့ၣ်လီၤႉ လၢတၢ်ထီၣ်မၤန့ၢ်ကွံာ်၀ဲပယီၤသုးကလၢၤဘျီ၀ဲန့ၣ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်တီခိၣ်ရိၣ်မဲ၀ဲဒီး သုးပာ်ဖှိၣ် (PDF) လၢအမ့ၢ် အၣ်န၀ကၣ် သုးကျိၤ၊ (Spring warriors) သုးကျိၤ၊ (FFD) ကရူၢ်ဒီးလၢတၢ်ဒုးဘျီ၀ဲန့ၣ်န့ၣ် ပယီၤသုးသံ(၃၀)ဃၣ်ဃၣ်ဒီးတၢ်မၤန့ၢ်ကျိ ဖီးယဲၢ် (.၅)၂ခိၣ် ဃုာ်ဒီးကျိလၢအဂုာ်အဂၤခဲလၢာ်အခိၣ်(၆၀)ဃၣ်ဃၣ်အဂ့ၢ်သ့ၣ်ညါဘၣ်လၢသုးရ့ၣ်အၦၤမူဘၣ်ဒါအအိၣ်န့ၣ်လီၤႉ တကီၢ်ခါခဲအံၤ ပယီၤသးလၢၤလၢအအိၣ်ဆီလီၤသးလၢဖၣ်ပူၣ်၀့ၢ်ဒ်အမ့ၢ် ခီၣ်သုးရ့ၣ်(၁၉)ဒီးခီၣ်ချ့သုးရ့ၣ်(၄၃၄)သ့ၣ်တဖၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်ဒီးသုးပာ်ဖှိၣ်ထီၣ်မၤန့ၢ်ကွံာ်၀ဲလံဘၣ်ဆၣ် ပယီၤသုးကလၢၤဒ်အမ့ၢ် ၃၄၀၊၃၄၁ ၆၄၂ဒီးဒုးယၤသုးကလၢၤသ့ၣ်တဖၣ်အိၣ်တ့ၢ်ဒံး၀ဲဒၣ်အဂ့ၢ် သ့ၣ်ညါဘၣ်လၢ သုးရ့ၣ်အၦၤဘၣ်မူဘၣ်ဒါအအိၣ်န့ၣ်လီၤႉ
သုးကီၣ်ကးအဟီၣ်လာ်မ့ၣ်ပိၢ်အဃိ(၅)သီအတီၢ်ပူၤမူကီၢ်ဆၣ်ၦၤလီၢ်အိၣ်ကမှံဖိဘၣ်ဒိ(၆)ဂၤ
လါအ့ဖြ့ၣ် ၂၆ႇ သီ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢချၢၣ်လွံၢ်ထူၣ်ကီၢ်ရ့ၣ်သုးက့နီၣ်ဂံၢ်(၃)မူကီၢ်ဆၣ်ဟီၣ်က၀ီၤအပူၤၦၤလီၢ်အိၣ်ကမှံဖိလၢ က့ၤကွၢ်ဆူၣ်ဟံၣ်ဒီးက့ၤဟံးန့ၢ်တၢ်ဖိတၢ်လံၤလၢအနီၢ်ကစၢ်ဒူသ၀ီသ့ၣ်တဖၣ်မ့ၢ်လၢပယီၤသုးကီၣ်ကးအံၤဒိးလီၤဃာ်ဟီၣ်လာ်မ့ၣ်ပိၢ်အဃိ(၅)သီအတီၢ်ပူၤၦၤလီၢ်အိၣ်ကမှံဖိယီၢ်ဘၣ်၀ဲအိၣ်(၆)ဂၤအဂ့ၢ်ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲမဟါတနံၤလါအ့ဖြ့ၣ်(၂၅)သီအနံၤန့ၣ်လီၤႉ ပယီၤသုးကီၣ်ကးအံၤဖဲအ၀ဲသ့ၣ်ဟဲနုာ်လီၤလၢဒူသ၀ီဖိပူၤ၀ံၤအလီၢ်ခံဒိးလီၢ်ဃာ်၀ဲဟီၣ်လာ်မ့ၣ်ပိၢ်လၢကမျၢၢ်အိၣ်တၢ်အလီၢ်ဒ်အမ့ၢ်ဟံၣ်ခီၣ်ထံးႇ ဒဲခီၣ်ထံးဒီးကျဲမုၢ်ခိၣ်သ့ၣ်တဖၣ်ပူၤအဃိဖဲလၢကမျၢၢ်ဒူသ၀ီဖိသ့ၣ်တဖၣ်မ့ၢ်ဟဲက့ၤကွၢ်ဟုၣ်ကွၢ် ဆူၣ်တၢ်လၢဟံၣ်ဃီမ့ၢ်ဂ့ၤႇ ဟဲက့ၤဟံန့ၢ်တၢ်ဖိတၢ်လံၤမ့ၢ်ဂ့ၤယီၢ်ဘၣ်၀ဲဒ်အံၤလီၤအဂ့ၢ်မူကီၢ်ဆၣ်အၦၤဘၣ်မူဘၣ်ဒါစံး၀ဲ ဒ်အံၤန့ၣ်လီၤႉ “ပယီၤသုးအံၤဒွး၀ဲဒၣ်လၢမ့ၢ်ဂုၤက့ၤအခံန့ၣ်ၦၤသုးဖိသ့ၣ်တဖၣ်ကလဲၤထီၣ်ရှဲက့ၤတၢ်လီၢ်ဒ်န့ၣ်မီၤနီၤႉ ၦၤသုးဖိသ့ၣ်တဖၣ် လဲၤထီၣ်ရှဲ၀ဲဘၣ်ဆၣ်သနာ်က့န့ၣ်ဒိးလီၤ၀ဲဒၣ်တၢ်လီၢ်လၢၦၤတဆိမိၣ်အလီၢ်ဘၣ်ဒ်န့ၣ်မီၤႉ ၦၤတနီၤနီၤန့ၣ်ယီၢ်ဘၣ်၀ဲဒၣ် လၢဒဲခီၣ်ထံးႇ ဟံၣ်ခီၣ်ထံးဒီးကျဲမုၢ်ခိၣ်န့ၣ်လီၤႉ ဖဲၦၤသ၀ီဖိမ့ၢ်ဟဲက့ၤလၢသ၀ီပူၤဟဲက့ၤကွၢ်တၢ်ဖိတၢ်လံၤအဖီခိၣ်န့ၣ် ယီၢ်ဘၣ်၀ဲဒၣ်ဒ်န့ၣ်မီၤနီၤႉ ကမျၢၢ်ဘုၣ်ဆၣ်ဖိကီၢ်ဖိကျီၢ်ပနၢ်စ့ၢ်ကီးယီၢ်ဘၣ်၀ဲဒၣ်လီၤ”အဂ့ၢ်စံးဘၣ်ခ့ၣ်အဲးစံၣ်-ကညီတၢ်က စီၣ်န့ၣ်လီၤႉ စးထီၣ်ဖဲလါအ့ဖြ့ၣ်(၈)သီႇ (၁၁)သီႇ (၁၂)သီႇ (၁၄)သီဒီး(၂၄)သီအနံၤလၢ(၅)သီအတီၢ်ပူၤန့ၣ်ၦၤလီၢ်အိၣ်ကမှံဖိလၢအ ယီၢ်ဘၣ်၀ဲသုးကီၣ်ကးမ့ၢ်ပိၢ်(၆)ဂၤအံၤန့ၣ်မ့ၢ်၀ဲၦၤပိာ်ခွါသးစၢ်(၂)ဂၤဒီးၦၤသးၦၢ်သးနံၣ်(၃၅)နံၣ်ဘျဲၣ်တုၤ(၅၀)နံၣ်ဘျဲၣ်(၄)ဂၤသ့ၣ်တဖၣ်အဂ့ၢ်သ့ၣ်ညါဘၣ်အသိးၦၤလီၢ်အိၣ်ကမှံဖိလၢအယီၢ်ဘၣ်မ့ၢ်ပိၢ်(၆)ဂၤအံၤန့ၣ်မ့ၢ်၀ဲ စီၤတံၤသ၀ီဖိႇ ယ့ၤလဲဘမၤသ၀ီဖိႇ နိၣ်ကူၤသ၀ီဖိႇ အညါစူၣ်သ၀ီဖိႇ နိၣ်ကလီသ၀ီဖိဒီးယ့ၤလဲကယ့ၤၦၤသ၀ီဖိသ့ၣ်တဖၣ်အံၤအဂ့ၢ် ခ့ၣ်အဲၣ်ယူၣ်တၢ်ပာ်ဖျါပူၤအသိးသ့ၣ်ညါဘၣ်န့ၣ်လီၤႉ ဒ်န့ၣ်အသိးကမျၢၢ်သ့ၣ်တဖၣ်ကြၢးပာ်သူၣ်ပာ်သးအိၣ်လၢတၢ်ပလီၢ်ပဒီအပူၤဒီးလူၤပိာ်ဒိကနၣ်မၤထွဲဘၣ်ခိၣ်နၢ်ၦၤဘၣ်မူဘၣ်ဒါသ့ၣ်တဖၣ်တၢ်နဲၣ်လီၤအဂ့ၢ်ချၢၣ်လွံၢ်ထူၣ်ကီၢ်ရ့ၣ်ၦၤကတိၤတၢ်ပၢပဒိၣ်စီၤဟဲဂ့ၤစံး၀ဲန့ၣ်လီၤႉ “ခါဆူမဲာ်ညါန့ၣ်ကမျၢၢ်ထံဖိကီၢ်ဖိသ့ၣ်တဖၣ်ကြၢးဒိကနၣ်လူၤပိာ်မၤထွဲဘၣ်၀ဲခိၣ်နၢ်ၦၤအဘၣ်မူဘၣ်ဒါသ့ၣ်တဖၣ်အတၢ်နဲၣ်လီၤတဲလီၤသ့ၣ်တဖၣ်မီၤနီၤႉ တၢ်လီၢ်လၢတကြၢးဟးဘၣ်န့ၣ်ပတကြၢးဟးအီၤတဂ့ၤဒီးတၢ်လၢတကြၢးလဲၤအလီၢ် န့ၣ်ပကြၢးလဲၤအီၤဘၣ်မီၤနီၤႉ ဒုၣ်ဒါသုးသ့ၣ်တဖၣ်န့ၣ်ဟးထီၣ်၀ဲတယံာ်ဒံးဘၣ်ဒီးတၢ်၀ဲန့ၣ်သ့ၣ်တဖၣ်န့ၣ်ပရှဲအီၤတန့ၢ်၀ဲ ခဲလၢာ်ဘၣ်ႉ အဃိန့ၣ်ကမျၢၢ်သ့ၣ်တဖၣ်ကြၢးပာ်သူၣ်ပာ်သးဒီးကြၢးဒိကနၣ်၀ဲဒၣ်လီၢ်က၀ီၤခိၣ်နၢ်သ့ၣ်တဖၣ်အတၢ်က လုၢ်လီၤ” အဂ့ၢ်န့ၣ်စံးဘၣ်၀ဲခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါခီဖျိလၢပယီၤသုးကီၣ်ကးဟူးဂဲၤဒိးလီၤ၀ဲဟီၣ်လာ်မ့ၣ်ပိၢ်လၢကမျၢၢ်တၢ်အိၣ်တၢ်ဆိးလီၤဒ်အံၤန့ၣ်ကဲထီၣ်၀ဲတၢ် ပျံၤတၢ်ဖုးလၢကမျၢၢ်ဒူဖိသ၀ီဖိသ့ၣ်တဖၣ်အဂီၢ်တကးဒံးဘၣ်ကဲထီၣ်၀ဲတၢ်တံၤတၤလၢကမျၢၢ်ဖိသ့ၣ်တဖၣ် တၢ်လဲၤတၢ်က့ၤတၢ်ဖံးအီၣ်မၤအီၣ်ဒီးတၢ်အိၣ်တၢ်ဆိးအဂီၢ်အဂ့ၢ်ပဒိၣ်စီၤဟဲဂ့ၤစံးအါထီၣ်စ့ၢ်ကီးန့ၣ်လီၤႉ ခ့ၣ်အဲၣ်ယူၣ်-ချၢၣ်လွံၢ်ထူၣ်ကီၢ်ရ့ၣ်လၢၢ်ဒိၣ်ကီၢ်ဆၣ်ဟီၣ်က၀ီၤအပူၤဖဲပူၤကွံာ်လါအဖြ့ၣ်(၂၂)သီအနံၤန့ၣ်ခီဖျိပယီၤသုး ကီၣ်ကးကဘီယူၤဟဲခးလီၤကျိဖးဒိၣ်အဃိတသီအတီၢ်ပူၤကမျၢၢ်သံ(၂)ဂၤဘၣ်ဒိ(၉)ဂၤအကျါပာ်ဃုာ်ဖိသၣ်(၆)လါတဂၤအဂ့ၢ်လၢၢ်ဒိၣ်ကီၢ်ဆၣ်ၦၤဘၣ်မူဘၣ်ဒါစံး၀ဲန့ၣ်လီၤႉ
ပယီၤသုးကဘီယူၤဟဲတ့ၢ်လီၤမ့ၣ်ပိၢ်လၢလ့က့ၣ်ကိာ်ဟီၣ်က၀ီၤဒူသ၀ီပူၤတစှၤန့ၢ်(၉)ဘျီ
လါအ့ဖြ့ၣ် ၂၆ သီႇ ၂၀၂၄ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ် မၠၣ်၀တံၣ်၀့ၢ်ဃၢၤ ဖဲမဟါလါအ့ဖြ့ၣ် ၂၅ သီ မုၢ်နၤခီ အဆၢကတီၢ်န့ၣ်သုးကီၣ်ကးအကဘီယူၤဟဲတ့ၢ်လီၤမ့ၣ်ပိၢ်လၢလ့က့ၣ်ကိာ်ဟီၣ်က၀ီၤ ဒူသ၀ီတဖၣ်အပူၤ ကအိၣ်လၢ(၉)ဘျီဃၣ်ဃၣ်ညါအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါ စံး၀ဲန့ၣ်လီၤႉ ဖဲမဟါမုၢ်နၤခီ ၁၁း၀၀ အဆၢကအတီၢ်န့ၣ် ပယီၤသုးကဘီယူၤတဘ့ၣ်ဟဲတ့ၢ်လီၤမ့ၣ်ပိၢ်လၢ လ့က့ၣ်ကိာ်ႇ ထံမဲာ်၀ါခံသ၀ီႇတလးအ့းသ့းသ၀ီ(ယသ့ၣ်ကူၤ)တၢ်လီၢ်သ့ၣ်တဖၣ်အံၤကအိၣ်လၢ(၉)ဘျီဃၣ်ဃၣ်ညါအဂ့ၢ်န့ၣ် ကီးတရံးကီၢ်ဆၣ်ခိၣ် စီၤဖၣ်ထယါ စံး၀ဲန့ၣ်လီၤႉ အ၀ဲစံး၀ဲလၢ“ဖဲမနၤ ၁၁ နၣ်ရံၣ်န့ၣ် ကဘီယူၤဟဲကွံာ်လီၤ၀ဲမ့ၣ်ပိၢ်မီၤနီၤႉ တၢ်လီၢ်ခီဒုတလးအ့းသ့ဖၠၣ်(ယသ့ၣ်ကူၤ) န့ၣ်ကွံာ်လီၤ၀ဲစ့ၢ်ႉမ့၀ံၤလၢထံမဲး၀ါခံႇလ့က့ၣ်ကိာ်တဖၣ်နါက့ဟဲကွံာ်လီၤ၀ဲစ့ၢ်ႉကွံာ်၀ဲတၢ်ဆၢကတီၢ်ဒုကအိၣ်လၢ ၁၁ နၣ်ရံၣ် တုၤလၢ ၁၂ နၣ်ရံၣ်ဃၣ်ဃၣ်ညါမီၤနီၤႉ ခဲလၢာ်ခဲစ့န့ၣ်ကွံာ်လီၤ၀ဲ(၉)၀ီမီၤႉပတယးကွၢ်န့ၣ် တ၀ီဒုကွံာ်လီၤ၀ဲ အစှၤကတၢၢ် (၆)ဖျၢၣ်ႇ(၇)ဖျၢၣ်လီၤမီနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါကဘီယူၤဟဲတ့ၢ်လီၤမ့ၣ်ပိၢ်ဘျီ၀ဲအံၤခီဖျိလီၢ်က၀ီၤဒူသ၀ီကမျၢၢ်လၢအိၣ်ဘူးဖဲန့ၣ်တဖၣ် ဃ့ၢ်ထီၣ်ဟးစံၣ် အိၣ်လၢတၢ်လီၢ်အဂၤန့ၢ်ဖးယံၤလံအဃိတၢ်သံတၢ်ဘၣ်ဒိဘၣ်ထံးတအိၣ်နီမံၤဘၣ်အဂ့ၢ်န့ၣ် ကီးတရံးကီၢ်ဆၣ်ခိၣ် စံးအါထီၣ်၀ဲန့ၣ်လီၤႉ ဒူသ၀ီတၢ်လီၢ်လၢသုးကီၣ်ကးအကဘီယူၤဟဲခးလီၤတၢ်အခိၣ်အဃၢၤအံၤအိၣ်ဘူး၀ဲဒၣ်ဒီးပယီၤသုး(စွဲၤတီၤကိ) ကျိဖးဒိၣ်လူၢ်ဒီး ဒ်န့ၣ်အသိးတၢ်လီၢ်အံၤအခိၣ်အဃၢၤန့ၣ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် ဟူးဂဲၤ၀ဲအိၣ်ဘၣ်ဆၣ် စှၤသီအတီၢ်ပူၤအံၤတၢ်ဒုးတၢ်ယၤကဲထီၣ်တအိၣ်၀ဲဘၣ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါ စံး၀ဲအသိးသ့ၣ်ညါဘၣ်န့ၣ်လီၤႉ ဒ်န့ၣ်အသိးဖဲအပူၤကွံာ်လါမးရှး ၃၁ သီအနံၤန့ၣ် (KNLA)တၢ်ပၢၢ်ဆၢသုးပာ်ဖှိၣ်ထီၣ်မၤန့ၢ်၀ဲဒၣ် လ့က့ၣ်ကိာ်၀့ၢ်သီဃၢၤ သုးကီၣ်ကးအသုးကလၢၤတဖျၢၣ်လၢအမ့ၢ်(ယ့ၤကၤကိ)တၢ်လီၢ်အံၤဒံးဒီး ဖဲန့ၣ်ပယီၤသုးတကပၤသံဘၣ်ဒိ ဘၣ်ထံး...
ပယီၤသုးဖီၣ်မၤဒၢၣ်ကီးတရံး၀့ၢ်ပူၤၦၤကမျၢၢ်ဒီးဟံဆူၣ်ၦၤစ့ၦၤတၢ်ဖိတၢ်လံၤ
လါအ့ဖြ့ၣ် ၂၅ သီႇ ၂၀၂၄ နံၣ်ႇ ခ့ၣ်အဲးစံၣ် ပယီၤသုးလၢအဟဲထီၣ်ဆူမၠၣ်၀တံၣ်၀့ၢ်ပူၤသ့ၣ်တဖၣ်အံၤအ၀ဲသ့ၣ်ဖီၣ်မၤဒၢၣ်၀ဲဒၣ်ကီးတရံး၀့ၢ်ပူၤၦၤကမျၢၢ်တနီၤဒီး ဟံဆူၣ်၀ဲၦၤကျိၣ်ၦၤစ့ႇၦၤတၢ်ဖိတၢ်လံၤတဖၣ်အဂ့ၢ်န့ၣ် ကီးတရံး၀့ၢ်ပူၤကမျၢၢ်တဖၣ် စံး၀ဲန့ၣ်လီၤႉ သုးကီၣ်ကးအံၤလၢကထီၣ်ဟံန့ၢ်ကဒါက့ၤမၠၣ်၀တံၣ်၀့ၢ်အံၤအဂီၢ်န့ၣ်အ၀ဲသ့ၣ်သုးကျိၤဟဲထီၣ်၀ဲဒၣ်ဒီး ဖဲအပူၤကွံာ်လါအ့ဖြ့ၣ် ၁၂ သီအနံၤန့ၣ် သုးတြိၤ(၅၅)ဟဲတုၤ၀ဲဒၣ်လၢကီးတရံး၀့ၢ်ဒီး ဖဲန့ၣ်ၦၤကမျၢၢ်လၢ အက့ၤအိၣ်၀့ၢ်ပူၤတဖၣ်တနီၤန့ၣ်အ၀ဲသ့ၣ် ဖီၣ်မၤဒၢၣ်၀ဲဒီးဟံဆူၣ်၀ဲဒၣ်ၦၤကျိၣ်ၦၤစ့ႇၦၤတၢ်ဖိတၢ်လံၤသ့ၣ်တဖၣ်အဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဂၤ စံး၀ဲဒ်အံၤန့ၣ်လီၤႉ “ဖဲပယီၤသုးဟဲထီၣ်လၢကျဲအခါန့ၣ်ကယဲၢ်မ့ၢ်အထံၣ်ၦၤန့ၣ်ဖီၣ်၀ဲခဲလၢာ်လီၤႉတနီၤန့ၣ်ပယီၤသုးမၤဒၢၣ်အီၤႉ ၦၤလၢအညါ အိၣ်ဒံးတဖၣ်န့ၣ်ပယိၤသုးဖီၣ်ဆၢဃာ်အစုလၢလီၢ်ခံခဲလၢာ်လီၤႉၦၤစ့ၦၤလီတဲစိနါက့ဟံ၀ဲခဲလၢာ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ပယီၤသုးတဖၣ်အံၤဖဲအ၀ဲသ့ၣ်ဖီၣ်ၦၤကမျၢၢ်ဟံၦၤစ့ၦၤတၢ်ဖိတၢ်လံၤ၀ံၤဘျီန့ၣ်ပျၢ်လီၤ၀ဲဘၣ်ဆၣ် မၢၦၤကမျၢၢ်သ့ၣ်တဖၣ်အံၤ လဲၤစံၣ်အိၣ်လၢဖၣ်အၣ်၀့ၢ်တကပၤဒီးတဲပျံၤစ့ၢ်ကီးၦၤကမျၢၢ်တဖၣ်အံၤလၢ မ့ထံၣ်ကဒီးအ၀ဲသ့ၣ်လၢကီးတရံးကီၢ်ဆၣ် ကလံၤထံးသ၀ီပူၤကဒီးတဘျီန့ၣ် ကမၤသံ၀ဲဒၣ်လီၤအဂ့ၢ်န့ၣ် ၀့ၢ်ပူၤကမျၢၢ်တဂၤလၢအသဂၢၢ်ဘၣ်ဒီးတၢ်ကဲထီၣ်သး အံၤစံး၀ဲန့ၣ်လီၤႉ အ၀ဲစံး၀ဲဒၣ်လၢ“ၦၤကမျၢၢ်လၢအက့ၤအိၣ်လၢအဟံၣ်သ့ၣ်တဖၣ်န့ၣ်ပယီၤသုးဖီၣ်မၤဒၢၣ်၀ဲႉကျိၣ်စ့လီတဲစိစ့ၢ်ကီးယီၤသုးဟံအ၀ဲသ့ၣ်တၢ်ခဲလၢာ်လီၤႉဖီၣ်သမံသမိးအ၀ဲသ့ၣ်၀ံၤဘျီမၢအလဲၤစံၣ်အိၣ်က့ၤလၢဖၣ်အၣ်၀့ၢ်တကပၤန့ၣ်ႉပယီၤသုးတဲအ၀ဲသ့ၣ်လၢမ့ထံၣ်အ၀ဲသ့ၣ်မဲာ်သၣ်ကဒီးတဘျီန့ၣ်ကမၤသံ၀ဲဒၣ်ႉနမ့လဲၤစံၣ်အိၣ်လၢ၀့ၢ်ပူၤန့ၣ်နကအီၣ်ဒီးမၤနုၤလဲၣ် သ့ၣ်ညါၦၤနါက့တအိၣ်ဘၣ်ႉမ့မ့ၢ်သ၀ီခီန့ၣ်ၦၤဒုးအီၣ်ၦၤအိၣ်ဒံးမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီ တၢ်ကစီၣ်န့ၣ် လီၤႉ လၢန့ၣ်အမဲာ်ညါၦၤကမျၢၢ်လၢပယီၤသုးဖီၣ်သမံသမိးမၤဒၢၣ်၀ဲသ့ၣ်တဖၣ်အံၤအိၣ်၀ဲဒၣ်လၢကီးတရံး နီၣ်ဂံၢ်(၁)က၀ီၤဒ့ တကပၤဒီး ပယီၤသုးဖီၣ်မၤဒၢၣ်ၦၤဖိသၣ်ႇသးစၢ်ဒီးၦၤနီၢ်ဒိၣ်ကအိၣ်လၢ(၅၈)ဂၤဃၣ်ဃၣ် ညါအဂ့ၢ်န့ၣ် သ့ၣ်ညါဘၣ် န့ၣ်လီၤႉ
သုးကီၣ်ကးဟဲတ့ၢ်လီၤမ့ၣ်ပိၢ်လၢခ့ၣ်အဲၣ်ယူၣ်၀ီၢ်ရ့ၣ်ကီၢ်ဆၣ်၀ဲၤဒၢးဒီးတၢ်မၤလိကၠိတဖျၢၣ်အပူၤ
လါအ့ဖြ့ၣ် ၂၄ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဒူပျာ်ယာ်ကီၢ်ရ့ၣ်သုးက့(၆)ဟီၣ်က၀ီၤအပူၤဖဲလါအ့ဖြ့ၣ်(၂၃)သီဂီၤခီအဆၢက တီၢ်န့ၣ်ပယီၤသုးကီၣ်ကးကဘီယူၤဒုးသုးဟဲတ့ၢ်လီၤမ့ၢ်ပိၢ်လၢ၀ီၢ်ရ့ၣ်ကီၢ်ဆၣ်၀ဲၤဒၢးဒီး(ယွၤသီၣ်ထၣ်)တၢ်မၤလိကၠိအပူၤအဂ့ၢ်သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ဖဲမဟါဂီၤခီ(၉)နၣ်ရံၣ်ဘျဲၣ်အဆၢကတီၢ်န့ၣ်မ့ၢ်လၢပယီၤသုးကဘီယူၤဟဲတ့ၢ်လီၤမ့ၣ်ပိၢ်အဃိဘၣ်ဟးဂီၤကွံာ်၀ဲ၀ီၢ်ရ့ၣ်ကီၢ်ဆၣ်ဟီၣ်က၀ီၤအပူၤ(ယွၤသီၣ်ထၣ်)တၢ်မၤလိကၠိတီၤဒၢး(၃)ဖျၢၣ်အသိးဖဲဂီၤခီ(၁၁)နၣ်ရံၣ်ခိၣ်ဃၢၤအတီၢ်ပူၤန့ၣ်ဟဲတ့ၢ်လီၤကဒီးမ့ၣ်ပိၢ်လၢ(ဖါပြး)သ၀ီအဃၢၤခ့ၣ်အဲၣ်ယူၣ်၀ီၢ်ရ့ၣ်ကီၢ်ဆၣ်၀ဲၤဒၢးဟီၣ်က၀ီၤအဃိဘၣ်ဟးဂီၤကွံာ်၀ဲဘျီၣ်တၢ်သူၣ်ထီၣ်တဖျၢၣ်အဂ့ၢ်သ့ၣ်ညါဘၣ်န့ၣ်လီၤႉ လီၢ်က၀ီၤဖိတဂၤစံး၀ဲလၢ “တၢ်ဒုးတၢ်ယာ်တအိၣ်နီၤတမံၤဘၣ်ႉ အ၀ဲသ့ၣ်ဟဲတ့ၢ်လီၤမ့ၣ်ပိၢ်ဒ်အံၤလီၤမီၤႉ တၢ် လၢပယီၤသုးဟဲတ့ၢ်လီၤမ့ၣ်ပိၢ်ခံတီၤန့ၣ်တဘူးလိာ်သးဘၣ်ႉ ပသ့ၣ်ညါဘၣ်န့ၣ်တၢ်လီၢ်ခံတီၢ်လီၤႉ တၢ်သူၣ် ထီၣ်န့ၣ်တၢ်ဘၣ်ဒိဘၣ်ထံးအိၣ်၀ဲအါလီၤႉ မ့မ့ၢ်ၦၤကမျၢၢ်ဒုတၢ်ဘၣ်ဒိဘၣ်ထံးတအိၣ်ဘၣ်အဃိန့ၣ်ကိၢ်ညါဒံးႉ တၢ်လီၢ်လၢအိၣ်တ့ၢ်န့ၣ်ဘၣ်သ့ၣ်သ့ၣ်ကခးဒုကခး၀ဲလီၤႉ မ့ၢ်ကျိဖးဒိၣ်ဧါႇ ဟဲတ့ၢ်လီၤမ့ၣ်ပိၢ်ကလုၢ်သီၣ်ဧါတ သ့ၣ်ညါဘၣ်ႉ အကလုၢ်ဒုသီၣ်ဖးဒိၣ်ညါႉ နၢ်ဟူသီၣ်၀ဲ(၈)ထံၣ်မီၤနီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်က စီၣ်န့ၣ်လီၤႉ တကီၢ်ခါခဲအံၤမ့ၢ်၀ဲ(ဖါပြး)သ၀ီမၤလၤမၤကပီၤ၀ဲတနံၣ်တဘျီဃိၣ်ဧိၤ၀ၣ်ဧိၤအဆၢကတီၢ်အသိးတၢ်လီၢ်တၢ်ကျဲၤလၢပယီၤသုးကီၣ်ကးဟဲတ့ၢ်လီၤမ့ၣ်ပိၢ်အံၤန့ၣ်ခီဖျိဘူး၀ဲဒီးတၢ်မၤလၤကပီၤ၀ဲဘူးဧိၤပွဲဧိၤတၢ်လီၢ်အဃိၦၤကမျၢၢ်လၢဟဲထီၣ်ဘူးဧိၤပွဲဧိၤသ့ၣ်တဖၣ်ဘၣ်ဃ့ၢ်အိၣ်ကဒုသးအဂ့ၢ်ဒူသ၀ီဖိသ့ၣ်တဖၣ်စံး၀ဲန့ၣ်လီၤႉ လၢန့ၣ်အမဲာ်ညါ၀ီၢ်ရ့ၣ်ကီၢ်ဆၣ်ဟီၣ်က၀ီၤအပူၤသုးကီၣ်ကးတကပၤဟးဆှၣ်ကွၢ်တၢ်ဒီးကဘီယူၤဒုးသုးအိၣ်၀ဲကိးနံၤဒဲးဃၣ်ဃၣ်အသိးဖဲတနံၤအံၤဟါခီစ့ၢ်ကီးဟဲဆှၣ်ကွၢ်တၢ်အိၣ်ဒံး၀ဲအဂ့ၢ်သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ဒ်န့ၣ်အသိးခ့ၣ်အဲၣ်ယူၣ်-ဒူသထူၣ်ကီၢ်ရ့ၣ်ဖၣ်အၣ်ကီၢ်ဆၣ်ဟီၣ်က၀ီၤအပူၤဖဲပူၤကွံာ်လါအ့ဖြ့ၣ်(၂၀)သီအနံၤ န့ၣ်စ့ၢ်ကီးပယီၤသုးကီၣ်ကးအံၤတၢ်ဒုးတၢ်ယာ်ကဲထီၣ်သးတအိၣ်ဘၣ်ဘၣ်ဆၣ်ဟဲတ့ၢ်လီၤမ့ၣ်ပိၢ်ဒီးကဘီယူၤဖဲ(ထံၤနူ)သ၀ီအသီခါဖၠၣ်ကရၢၢ်ပူၤအဃိဘၣ်ဒိဒံး၀ဲဒၣ်ၦၤလီၢ်က၀ီၤဖိ(၂)ဂၤအဂ့ၢ်သ့ၣ်ညါဘၣ်န့ၣ်လီၤႉ