သုးကီၣ်ကးကဘီယူၤတ့ၢ်လီၤမ့ၣ်ပိၢ်လၢကရ့ၣ်နံၣ်သ၀ီခံဖျၢၣ်အပူၤႇဘၣ်သံ၀ဲလီၢ်က၀ီၤကမျၢၢ်(၃)ဂၤဘၣ်ဒိ(၅)ဂၤ
လါအ့ဖြ့ၣ် ၁၂သီႇ၂၀၂၄နံၣ်ႇခ့ၣ်အဲးစံၣ်ႇ ကရ့ၣ်နံၣ်ကီၢ်စဲၣ်ႇဖဲၤခိၤကီၢ်ဆၣ်ႇယံၤနွဲၣ်သ၀ီကရူၢ်ႇပံၤက့သ၀ီ(သွဲၣ်သီက၀ီၤဒ့)ဒီး(လိးယ့သ၀ီ)ညီၤသၤက၀ီၤဒ့အပူၤႇ ဖဲမဟါလါအ့ဖြ့ၣ်(၁၁)သီမုၢ်နၤခီအဆၢကတီၢ်ႇသုးကီၣ်ကးကဘီယူၤတ့ၢ်လီၤ၀ဲမ့ၣ်ပိၢ်အဃိဘၣ်သံ၀ဲလီၢ်က၀ီၤကမျၢၢ်(၃)ဂၤႇဘၣ်ဒိဘၣ်ထံး၀ဲ(၅)ဂၤအဂ့ၢ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ မဟါမုၢ်နၤခီနၣ်ရံၣ်(၁၀)ဘျဲၣ်အဆၢကတီၢ်ႇသုးကီၣ်ကးကဘီယူၤဟဲတ့ၢ်လီၤ၀ဲမ့ၣ်ပိၢ်ဒီးဘၣ်ဒိဘၣ်ထံးဘၣ်သံ၀ဲလီၢ်က၀ီၤကမျၢၢ်အမဲာ်ညါပၣ်ဃုာ်၀ဲဒီးၦၤလီၢ်အိၣ်ကမှံဖိတဖၣ်အသိးၦၤလၢအဘၣ်ဒိဘၣ်ထံးတဖၣ်အံၤတၢ်ဆှၢဃီၤဆူတၢ်ဆါဟံၣ်အဖၢမုၢ်အဂ့ၢ်ကရ့ၣ်နံၣ်ကတီၢ်ဘၢၣ်စၢၤပၢပြးနဲၣ်ရွဲၣ်သဃဲၤ(၂)ကိၤဘညါစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“မဟါဖဲမုၢ်နၤခီအနၣ်ရံၣ်(၁၀)ဘျဲၣ်အဆၢကတီၢ်န့ၣ်သုးကီၣ်ကးဟဲတ့ၢ်လီၤ၀ဲမ့ၣ်ပိၢ်ဖဲပံၤက့ဒီးလိးယ့ကမျၢၢ်ဒူသ၀ီတၢ်လီၢ်တၢ်ကျဲအပူၤလီၤႉပံၤက့-လိၣ်ယ့သ၀ီခံဖျၢၣ်အံၤမ့ၢ်သ၀ီလၢအအိၣ်စဲဘူးလိာ်သးန့ၣ်လီၤႉဒီးသ၀ီခံဖျၢၣ်အံၤအပူၤသ၀ီလီၢ်က၀ီၤဖိအိၣ်ဆိး၀ဲအိၣ်၀ဲအသိးလီၢ်အိၣ်ကမှံဖိတဖၣ်အိၣ်ကဒုအသးဖဲန့ၣ်အိၣ်၀ဲဒၣ်အဃိသုးကီၣ်ကးကဘီယူၤဟဲတ့ၢ်လီၤ၀ဲမ့ၣ်ပိၢ်အဆၢကတီၢ်ပၣ်ဃုာ်၀ဲလီၢ်အိၣ်ကမှံဖိတနီၤန့ၣ်လီၤႉအခဲအံၤၦၤလၢအဘၣ်ဒိဘၣ်ထံးတဖၣ်န့ၣ်ဘၣ်တၢ်ဆှၢအီၤလၢတၢ်ဆါဟံၣ်လံ”အဂ့ၢ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါႇမ့ၣ်ပိၢ်လီၤတဲာ်ဘၣ်သံ၀ဲကမျၢၢ်(၃)ဂၤအကျါပၣ်ဃုာ်၀ဲဖိသၣ်ဆံးလၢအသးနံၣ်အိၣ်၀ဲ(၁၂)နံၣ်ဂၤဒီး(၃)နံၣ်ခံဂၤအသိးၦၤဘၣ်ဒိဘၣ်ထံး(၅)ဂၤအကျါပၣ်ဃုာ်၀ဲဖိသၣ်လၢအသးနံၣ်(၁၅)နံၣ်ႇ(၁၃)နံၣ်ဒီး(၇)နံၣ်သၢဂၤစ့ၢ်ကီးအဂ့ၢ်အ၀ဲစံးအါထီၣ်၀ဲဒၣ်န့ၣ်လီၤႉ တကးဒံးဘၣ်ႇဖဲၤခိၣ်ကီၢ်ဆၣ်အပူၤသ၀ီခံဖျၢၣ်လၢသုးကီၣ်ကးဟဲတ့ၢ်လီၤမ့ၢ်ပိၢ်အံၤအပူၤကွံာ်တၢ်ဒုးတၢ်ယၤတအိၣ်၀ဲဘၣ်အသိးတကီၢ်ခါခဲအံၤတၢ်ခးလိာ်သးကဲထီၣ်သးတအိၣ်နီတမံၤဘၣ်ႇဘၣ်ဆၣ်ကဘီယူၤအံၤဟဲဆှၣ်တၢ်အိၣ်၀ဲတပယူာ်ဃီကိးနံၤအဂ့ၢ်အ၀ဲစံးစ့ၢ်ကီး၀ဲန့ၣ်လီၤႉ တကတီၢ်ဃီႇဖဲၤခိၤကီၢ်ဆၣ်အပူၤပံၤက့သ၀ီဒီးလိးယ့သ၀ီခံဖျၢၣ်အပူၤႇလီၢ်အိၣ်ကမှံဖိလၢအဟဲဃ့ၢ်အိၣ်ကဒုသးတဖၣ်အံၤႇအပူၤကွံာ်ၦၤနီၢ်ဂံၢ်အိၣ်၀ဲထဲ(၆၀၀၀)ဃုကထိဆူ(၈၀၀၀)ဃီးကထိအဘၢၣ်စၢၤဘၣ်ဆၣ်တကီၢ်ခါခဲအံၤအါထီၣ်၀ဲဘူးထီၣ်လၢ(၁၀၀၀၀)လံအဂ့ၢ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ဒ်န့ၣ်အသိးႇလီၢ်အိၣ်ကမှံဖိလၢအလဲၤဃ့ၢ်အိၣ်ကဒုအသးတဖၣ်အံၤႇတနီၤအိၣ်ကဒု၀ဲအသးလၢအဘူးတံၢ်ဟံၣ်အိၣ်၀ဲအသိးတနီၤတ့ထီၣ်၀ဲဒဲဖိဒီးအိၣ်ဆိး၀ဲအိၣ်၀ဲဒၣ်န့ၣ်လီၤႉဒီးၦၤလီၢ်အိၣ်ကမှံဖိလၢအိၣ်ဆိးဖဲသ၀ီခံဖျၢၣ်အပူၤသ့ၣ်တဖၣ်အံၤအ၀ဲသ့ၣ်စးထီၣ်နုာ်လီၤအိၣ်ကဒု၀ဲဖဲအသးစးထီၣ်လၢ(၂၀၂၁)နံၣ်(လါယူၤလံ)အပူၤအခါလံၤလံၤလံအဂ့ၢ်ၦၤဘၣ်မူဘၣ်ဒါတဖၣ်စံး၀ဲဒ်အံၤန့ၣ်လီၤႉ
တၢ်ကးတံာ်ကွံာ်၀ဲရၤမတံ-မဲၢ်ဆီးကီၢ်ဆၢတၢ်ရ့လိာ်မုာ်လိာ်တိၤနီၣ်ဂံၢ်(၂)
လါအ့ဖြ့ၣ်၁၁သီႇ၂၀၂၄နံၣ်ႇခ့ၣ်အဲးစံၣ်ႇ ကီၢ်ကၠီၣ်တဲၣ်-ကီၢ်ပယီၤကီၢ်ဆၢႇရၤမတံ-မဲၢ်ဆီး၀့ၢ်တၢ်ရ့လိာ်မုာ်လိာ်နီၢ်ဂံၢ်(၂)သိလ့ၣ်တၢ်တီဆှၢပနံၣ်ဖီကၤတၢ်လ့ၢ်ထီၣ်လ့ၢ်တိၤအံၤကၠီၣ်တဲၣ်တကပၤကးတံာ်ကွံာ်၀ဲသတူၢ်ကလာ်ဖဲတနံၤအံၤလါအ့ဖြ့ၣ်(၁၁)သီဂီၤခီအနၣ်ရံၣ်(၁၀)အဆၢကတီၢ်အဂ့ၢ်ၦၤနီသိလ့ၣ်ဖိတဖၣ်စံး၀ဲန့ၣ်လီၤႉ ကီၢ်ဆၢရၤမတံ-မဲၢ်ဆီးတၢ်ရ့လိာ်မုာ်လိာ်တိၤနီၣ်ဂံၢ်(၂)အံၤႇတၢ်စးထီၣ်ကးတံာ်ကွံာ်၀ဲသိလ့ၣ်တီဆှၢပနံၣ်တၢ်ဖိတၢ်လံၤတဖၣ်အတၢ်ဟးထီၣ်က့ၤလီၤဖဲတနံၤအံၤဂီၤခီ(၁၀)နၣ်ရံၣ်အဆၢကတီၢ်ဒီးတၢ်ပံးကွံာ်တိၤ၀ံၤအလီၢ်ခံလၢကက့ၤအိးထီၣ်က့ၤအဂီၢ်တလီၤတံၢ်လၢၤဘၣ်အဂ့ၢ်ရၤမတံၦၤနီသိလ့ၣ်ဖိလၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တၢ်ပံးကွံာ်တိၤတဘျီႇပ၀ဲၦၤနီသိလ့ၣ်တီဆှၢတၢ်ဖိခံခီယၤပၤပလ့ၢ်လိၤတန့ၢ်လၢၤဘၣ်မီၤဖဲတနံၤညါအံၤန့ၣ်ႇဒီးစးထီၣ်ပံး၀ဲဖဲမဂီၤအနၣ်ရံၣ်(၁၀)(၁၁)နံၣ်အဆၢကတီၢ်မီၤႉတိၤပံးဘျီ၀ဲအံၤဒုယဆိမိၣ်လၢကပံးဖးယံာ်ညါတသီခံသီအတီၢ်ပူၤတမ့ၢ်လၢကက့ၤအိးထီၣ်၀ဲညီညီဒံးဘၣ်ႇဘၣ်မနုၤအဃိလဲၣ်န့ၣ်လၢတိၤနီၣ်ဂံၢ်(၁)တကပၤသနာ်က့ခဲဂီၤန့ၣ်တၢ်မ့ပံးကွံာ်၀ဲန့ၣ်ပံးကွံာ်၀ဲသ့အဃိမီၤနီၤႉကီၢ်ဆၢတၢ်အိၣ်သးခဲအံၤဒုမ့ၢ်တၢ်လၢတၢ်ဆိကမိၣ်ဆၢတဲာ်အီၤကီဒံး၀ဲပတဲလီၤတံၢ်တၢ်တဘၣ်နီတမံၤဒံးဘၣ်”အဂ့ၢ်စံး၀ဲဒၣ်န့ၣ်လီၤႉ လၢန့ၣ်အမဲာ်ညါႇကီၢ်ကၠီၣ်တဲၣ်ကီၢ်ပယီၤကီၢ်ဆၢရၤမတံ-မဲၢ်ဆီးတိၤတၢ်ရ့လိာ်မုာ်လိာ်ခံဘိလၢာ်အံၤန့ၣ်ႇမ့ၢ်၀ဲသုးကီၣ်ကးပဒိၣ်ပၢပြးအတၢ်နုာ်လီၤအကျိၤအကျဲအဃိတၢ်ပၢၢ်ဆၢသုးပာ်ဖှိၣ်မ့ၢ်မၤပတုာ်မၤဟးဂီၤကွံာ်သုးကီၣ်ကးပဒိၣ်ပၢပြးတၢ်ဖံးတၢ်မၤအကျိၤအကျဲန့ၣ်ႇတိၤခံဘိလၢာ်အံၤစ့ၢ်ကီးပတုာ်ကွံာ်၀ဲအသးသ့၀ဲအဂ့ၢ်ပဲာ်ဖးနီၤဖးစံးအါထီၣ်၀ဲဒၣ်န့ၣ်လီၤႉ တကးဒံးဘၣ်ႇတကီၢ်ခါခဲအံၤတၢ်ကးတံာ်ကွံာ်၀ဲရၤမတံ-မဲၢ်ဆီး၀့ၢ်အတၢ်ရ့လိာ်မုာ်လိာ်သိလ့ၣ်တီဆှၢတၢ်တိၤလံဘၣ်ဆၣ်မ့မ့ၢ်လၢၦၤကညီဟးထီၣ်ဟးလီၤတၢ်လ့ၢ်လိၤတိၤနီၢ်ဂံၢ်(၁)တကပၤန့ၣ်ႇတၢ်လ့ၢ်လိၤအီၤအဖၢမုၢ်အသိးသုးကီၣ်ကးပၢပြးအၦၤမၤတၢ်ဖိဒီးသုးကီၣ်ကးအၦၤမၤမုၢ်ကျိၤ၀ဲၤကွာ်တဖၣ်အိၣ်ဒံး၀ဲဒ်သိးလၢညါအဖၢမုၢ်အိၣ်၀ဲအဂ့ၢ်အ၀ဲစံးစ့ၢ်ကီး၀ဲန့ၣ်လီၤႉ တကတီၢ်ဃီႇတနံၤအံၤလါအ့့ဖြ့ၣ်(၁၁)သီအပူၤသုးကီၣ်ကးခီၣ်ချ့သုးရ့ၣ်(ခလရ-၂၇၅)အၦၤအဂၤ(၁၀၀)ဘျဲၣ်အံၤလၢကဃ့ၢ်နုာ်ဆူကၠီၣ်တဲၣ်ပူၤအဂီၢ်ဃ့ၢ်ထီၣ်အိၣ်၀ဲလၢနီၣ်ဂံၢ်(၂)တိၤတကပၤအဃိခ့ၣ်အဲၣ်ယူၣ်ဟ့ၣ်ပလီၢ်၀ဲလီၢ်က၀ီၤကမျၢၢ်တဖၣ်လၢတဘၣ်လဲၤမၤဘူးအသးဒီးတိၤနီၢ်ဂံၢ်(၂)ဘၣ်အိၣ်၀ဲအဂ့ၢ်ထုးထီၣ်ဟ့ၣ်ပလီၢ်၀ဲဖဲတနံၤအံၤအိၣ်စ့ၢ်ကီး၀ဲန့ၣ်လီၤႉ ဒ်န့ၣ်အသိးသုးကီၣ်ကးအၦၤလၢအဃ့ၢ်ထီၣ်ဖဲနီၢ်ဂံၢ်(၂)တိၤတဖၣ်အံၤႇစိၤရှၢၣ်မံၤဒံၤယၢၣ်တၢ်ကစီၣ်တနီၤအပူၤပာ်ဖျါ၀ဲလၢတၢ်ဟ့ၣ်နုာ်လီၤအ၀ဲသ့ၣ်ဆူကီၢ်ကီၠၣ်တဲၣ်အပူၤလံအိၣ်၀ဲဘၣ်ဆၣ်ခ့ၣ်အဲးစံၣ်ကညီတၢ်ကစီၣ်တကပၤမၤလီၤတံၢ်၀ဲတန့ၢ်ဒံးဘၣ်အဂ့ၢ်ဒုးသ့ၣ်ညါဘၣ်ၦၤဒိကနၣ်တၢ်ဖိတဖၣ်န့ၣ်လီၤႉ
ၦၤဃ့ၢ်မှံဟးဖျိးဟံၣ်ခိၣ်(၁၀၀)ဖျၢၣ်ဘျဲၣ်လိၣ်ဘၣ်၀ဲလၣ်ဒီး၀ၣ်လၢကသူၣ်ထီၣ်တၢ်အိၣ်တၢ်ဆိးလီၢ်
လါအ့ဖြ့ၣ် ၁၁ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဖၣ်အၣ်ကီၢ်ရ့ၣ်သုးက့နီၣ်ဂံၢ်(၇)ဟီၣ်က၀ီၤအပူၤ ကမျၢၢ်ၦၤဃ့ၢ်မှံဟးဖျိးလၢဟဲ ဃ့ၢ်အိၣ်ကဒုအသးဖဲ (တန့ခၠါ) ကီၢ်ဆၣ်ဟီၣ်က၀ီၤအပူၤသ့ၣ်တဖၣ်ၦၤဃ့ၢ်မှံဟးဖျိးဟံၣ်ခိၣ်(၁၀၀)ဖျၢၣ်ဘျဲၣ် လိၣ်ဘၣ်၀ဲလၣ်ဒီး၀ၣ်လၢ ကသူၣ်ထီၣ်တၢ်အိၣ်တၢ်ဆိးလီၢ်အဂ့ၢ်ၦၤမၤစၢၤၦၤလီၢ်အိၣ်ကမှံဖိစံး၀ဲန့ၣ်လီၤႉ (တန့ခၠါ) ကီၢ်ဆၣ်ဟီၣ်က၀ီၤအပူၤၦၤဃ့ၢ်မှံဟးဖျိး ဟံၣ်ခိၣ်(၁၀၀)ဖျၢၣ်ဘျဲၣ်လၢလိၣ်ဘၣ်၀ဲ လၣ်ဒီး၀ၣ်လၢ ကသူၣ်ထီၣ်၀ဲတၢ်အိၣ်တၢ်ဆိးလီၢ်ကျဲအဂီၢ်ဒီးတကီၢ်ခါခဲအံၤမ့ၢ်လၢတၢ်ကိၢ်ခါအဆၢကတီၢ်အဃိၦၤဃ့ၢ်မှံဟးဖျိးအကျါတနီၤန့ၣ်ထဲးဂံၢ်ထဲးဘါ၀ဲလၢအနီၢ်ကစၢ်ဒၣ်၀ဲဒီးတ့ထီၣ်၀ဲတၢ်အိၣ်တၢ်ဆိးလီၢ်အဂ့ၢ်ၦၤမၤစၢၤၦၤလီၢ်အိၣ်ကမှံဖိ(သရၣ်စီၤသၤစူၤ)စံး၀ဲဒ်အံန့ၣ်လီီၤႉ “ဖဲပူၤကွံာ်သၢနွံအခါန့ၣ်လၣ်ဒီး၀ၣ်န့ၣ်လိၣ်ဘၣ်ဒံး၀ဲဟံၣ်ခိၣ်(၁၀၀)ဖျၢၣ်ဘျဲၣ်အဂီၢ်ဒံးမီၤနီၤႉ ဖဲပူၤကွံာ်အနံၤန့ၣ် ပလဲၤကွၢ်၀ဲၦၤလီၢ်အိၣ်ကမှံဖိန့ၣ်အ၀ဲသ့ၣ်တ့ထီၣ်၀ဲဒၣ်အခိၣ်ဒုးဒီး(တၤလပၣ်)လၢသ့ၣ်ခီၣ်ထံးလီၤႉ အခဲအံၤ န့ၣ်မ့ၢ်လၢတၢ်ကိၢ်ခါအဃိၦၤလီၢ်အိၣ်ကမှံဖိသ့ၣ်တဖၣ်တနီၤန့ၣ်ထဲးဂံၢ်ထဲးဘါ၀ဲလၢအနီၢ်ကစၢ်ဒီးၦ့ၤ၀ဲလၣ်ဒီး၀ၣ်ဒ်အံၤန့ၣ်အိၣ်မီၤနီၤ”အဂ့ၢ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါဖဲပူၤကွံာ်လါမးရှးထီၣ်အတီၢ်ပူၤန့ၣ်စ့ၢ်ကီးကီၢ်ပူၤကညီၦၤလီၢ်အိၣ်ကမှံကမံးတံာ်(CIDKP)လဲၤဆီၣ်ထွဲမၤစၢၤ၀ဲၦၤလီၢ်အိၣ်ကမှံဖိလၢအိၣ်(တန့ခၠါ)ဟီၣ်က၀ီၤအပူၤလၣ်ဒီး၀ၣ်သ့ၣ်တဖၣ်အိၣ်၀ဲဒၣ်ဘၣ်ဆၣ်ၦၤလီၢ်အိၣ်ကမှံဖိဟံၣ်ခိၣ်(၁၀၀)ဖျၢၣ်ဘျဲၣ်လိၣ်ဘၣ်ဒံး၀ဲလၣ်ဒီး၀ၣ်လၢကသူၣ်ထီၣ်ဘှီထီၣ်၀ဲတၢ်အိၣ်တၢ်ဆိးလီၢ်အဂ့ၢ်သ့ၣ်ညါဘၣ်လၢၦၤမၤစၢၤၦၤလီၢ်အိၣ်ကမှံၦၤဘၣ်မူဘၣ်ဒါအိၣ်န့ၣ်လီၤႉ ကမျၢၢ်ၦၤဃ့ၢ်မှံဟးဖျိးလၢဟဲအိၣ်ကဒုအသးဖဲ(တန့ခၠါ)ကီၢ်ဆၣ်ဟီၣ်က၀ီၤအပူၤသ့ၣ်တဖၣ်အံၤအါဒၣ်တက့ၢ်န့ၣ်မ့ၢ်၀ဲၦၤအိၣ်ဟဲလၢသုးက့ (၆) ကီးတရံးကီၢ်ဆၣ်ဒီးကြုၢ်တုကီၢ်ဆၣ်ဟီၣ်က၀ီၤသ့ၣ်တဖၣ်အသိး သုးက့ (၇) (သ့ၣ်ဃးလီၤတီၢ်-သ့ၣ်ကါညံၤနီၤ) လီၢ်က၀ီၤဖိသ့ၣ်တဖၣ်စ့ၢ်ကီးဟဲဃ့ၢ်အိၣ်၀ဲဒီးတကီၢ်ခါခဲအံၤၦၤဃ့ၢ်မှံ ဟးဖျိးဟံၣ်ခိၣ်ခဲလၢာ်အိၣ်၀ဲ(၁၀၀၀)ဖျၢၣ်ဃၣ်ဃၣ်လံအဂ့ၢ်သ့ၣ်ညါဘၣ်န့ၣ်လီၤႉ ကမျၢၢ်လၢအိၣ်ကီးတရံးႇ ကြုၢ်တုဒီးသ့ၣ်ဃးလီၤတီၢ်ဟီၣ်က၀ီၤအပူၤသ့ၣ်တဖၣ်အံၤမ့ၢ်လၢတၢ်ဒုးကဲထီၣ်၀ဲ လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)တၢ်ပၢၢ်ဆၢသုးပာ်ဖှိၣ်ကရူၢ်ဒီးပယီၤသုးကီၣ်ကးအဘၢၣ်စၢၤ အမဲာ်ညါသုးကီၣ်ကးတကပၤခးလီၤကျိဖးဒိၣ်ႇ ကဘီယူၤစ့ၢ်ကီးဟဲခးလီၤတၢ်အဃိကမျၢၢ်လီၢ်က၀ီၤဖိသ့ၣ် တဖၣ်ဘၣ်လဲၤဃ့ၢ်အိၣ်ကဒုသးလၢသုးက့ (၇) ဟီၣ်က၀ီၤ(တန့ခၠါ)ကီၢ်ဆၣ်ပူၤအဂ့ၢ်သ့ၣ်ညါဘၣ်န့ၣ်လီၤႉ ဒ်န့ၣ်အသိးဖဲပူၤကွံာ်လါမးရှး(၂၅)သီအနံၤန့ၣ် ကၠီၣ်တဲၣ်တၢ်တိစၢၤမၤစၢၤတၢ်ဖိတၢ်လံၤတဖၣ်တၢ်စိာ်ခီ၀ဲဆူရၤ မတံ၀့ၢ် သုးကီၣ်ကးဂာ်တဲာ်ဂီၤတဖၣ်အစုပူၤ၀ံၤသုးခိးကီၢ်ဆၢ(BGF)ဟံးန့ၢ်၀ဲမူဒါတီဆှၢဃီၤ၀ဲဆူ ကၢၢ်ဂီၤ-သ့ၣ်ကတ့ၤ အကျဲတဆီဆူ(တန့ခၠါ)ဒီးဖဲန့ၣ်ခ့ၣ်အဲၣ်ယူၣ်ကီၢ်ရ့ၣ်ၦၤဘၣ်မူဘၣ်ဒါတူၢ်လိာ်က့ၤ၀ဲ ကၠီၣ်တဲၣ်အတၢ်ဘိၣ်တၢ်မၤစၢၤ(၃၈၇၄)ဘိၣ်အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
တၢ်ထီၣ်အီၣ်ဟုၣ်၀ဲသ့ၣ်ကါညံၤနီၤလီၢ်က၀ီၤဖိလၢအဃ့ၢ်ပဒ့ၣ်အသးတဖၣ်အဟံၣ်ဒီးကျးတဖၣ်အဂ့ၢ်
လါအ့ဖြ့ၣ် ၁၁သီႇ၂၀၂၄နံၣ်ႇခ့ၣ်အဲးစံၣ်ႇ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢႇရၤမတံ၀့ၢ်ႇသ့ၣ်ဃးလီၤတီၢ်(သ့ၣ်ကါညံၤနီၤ)ဟီၣ်က၀ီၤတၢ်လီၢ်အပူၤႇ(၀့ၢ်ပူၤလီၢ်က၀ီၤ)ၦၤအီၣ်ဟုၣ်တၢ်ဖိတဖၣ်ႇနုာ်လီၤအီၣ်ဟုၣ်၀ဲတၢ်လၢကမျၢၢ်လီၢ်က၀ီၤဖိလၢအဃ့ၢ်ပဒ့ၣ်အသးတဖၣ်အဟံၣ်ဒီးကျးတဖၣ်အပူၤအအိၣ်၀ဲအဂ့ၢ်လီၢ်က၀ီၤဖိတဖၣ်စံး၀ဲန့ၣ်လီၤႉ အပူၤကွံာ်လါအ့ဖြ့ၣ်(၅)သီ(၆)သီအနံၤအပူၤႇတၢ်ပၢၢ်ဆၢသုးပာ်ဖှိၣ်ထီၣ်ဒုး၀ဲသုးကီၣ်ကး(သ့ၣ်ကါညံၤနီၤ)အဒုးယာ်သုးကလၢၤဒီးတၢ်ခးလိာ်သးဒိၣ်ဒိၣ်မုၢ်မုၢ်ကဲထီၣ်၀ဲအဃိ(သ့ၣ်ကါညံၤနီၤ)ကမျၢၢ်လီၢ်က၀ီၤဖိတဖၣ်ဃ့ၢ်ပဒ့ၣ်ကွံာ်၀ဲအသးဒီးဖဲကမျၢၢ်တဖၣ်ဃ့ၢ်ပဒ့ၣ်အသးအဆၢကတီၢ်ႇၦၤအီၣ်ဟုၣ်တၢ်ဖိတဖၣ်အံၤနုာ်လီၤအီၣ်ဟုၣ်၀ဲတၢ်လၢကမျၢၢ်ဟံၣ်ဃီဒီးကျးတဖၣ်အပူၤအဂ့ၢ်သ့ၣ်ကါညံၤနီၤလီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲအံၤန့ၣ်သ့ၣ်ကါညံၤနီၤသ၀ီဒီတဖျၢၣ်အပူၤတၢ်အီၣ်ဟုၣ်တၢ်အိၣ်မီၤႉတၢ်ခးလိာ်သးကဲထီၣ်အဃိႇဟံၣ်ကစၢ်ဒီးကျးကစၢ်တဖၣ်စးထီၣ်လၢတချူးတၢ်ခးလိာ်သးအခါန့ၣ်ပာ်တ့ၢ်ကွံာ်အဟံၣ်အဃီအကျး၀ံၤစးဃ့ၢ်ထီၣ်ကွံာ်၀ဲလံမီၤနီၤႉဒီးလၢတၢ်ဘၢၣ်စၢၤန့ၣ်ပန့ၢ်တၢ်ဆၢကတီၢ်တစိၢ်ဖိအဃိပက့ၤနုာ်လီၤကွၢ်တၢ်လၢသ၀ီပူၤဒီးပထံၣ်၀ဲလၢဖဲကမျၢၢ်တဖၣ်ဃ့ၢ်ပဒ့ၣ်သးအဆၢကတီၢ်န့ၣ်ၦၤအီၣ်ဟုၣ်တၢ်တဖၣ်အံၤနုာ်လီၤအီၣ်ဟုၣ်၀ဲတၢ်ဒ်အသးဒၣ်၀ဲန့ၣ်လီၤႉဒီးၦၤအီၣ်ဟုၣ်တၢ်ဖိတဖၣ်အံၤန့ၣ်ႇပာ်ပနီၣ်ပညိၣ်အီၣ်အုၣ်၀ဲဟံၣ်ဒိၣ်ကျိၤသွါဒီးကျးလၢအဒိၣ်သ့ၣ်တဖၣ်လီၤ”အဂ့ၢ်စံး၀ဲန့ၣ်လီၤႉ လၢန့ၣ်အမဲာ်ညါႇၦၤအီၣ်ဟုၣ်တၢ်ဖိတဖၣ်အံၤနုာ်လီၤအီၣ်ဟုၣ်၀ဲ(သ့ၣ်ကါညံၤနီၤ)သ၀ီပူၤဟံၣ်ဒီးကျးတဖၣ်တကးဘၣ်နုာ်လီၤအီၣ်ဟုၣ်စ့ၢ်ကီး၀ဲတၢ်လၢ(မၠိၣ်သ့ၣ်-၀့ၢ်သီ)ဒီး(သ၀ီသီ)တဖၣ်အပူၤအိၣ်၀ဲအဂ့ၢ်လီၢ်က၀ီၤဖိတဂၤလီၢ်လီၢ်အံၤစံးအါထီၣ်၀ဲဒၣ်န့ၣ်လီၤႉ ဒ်န့ၣ်အသိးႇတၢ်ဒုးတၢ်ယၤအတီၢ်ပူၤကမျၢၢ်လီၢ်က၀ီၤဖိတဖၣ်ဃ့ၢ်ပဒ့ၣ်သးအဆၢကတီၢ်မ့ၢ်တၢ်ခွဲးတၢ်ယာ်ဂ့ၤလၢၦၤအီၣ်ဟုၣ်တၢ်ဖိတဖၣ်ကဟူးဂဲၤအဂီၢ်ဒီးခဲအံၤရၤမတံ၀့ၢ်ဒီတဖျၢၣ်ဃၣ်ဃၣ်တၢ်နုာ်လီၤအီၣ်ဟုၣ်တၢ်ကဲထီၣ်သးအိၣ်၀ဲအဂ့ၢ်က၀ီၤဒ့(၄)ရၤမတံ၀့ၢ်လီၢ်က၀ီၤဖိလၢတၢ်နုာ်လီၤအီၣ်ဟုၣ်တၢ်လၢအဟံၣ်ပူၤတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“အခဲအံၤရၤမတံ၀့ၢ်ပူၤဒုလၢၦၤအီၣ်ဟုၣ်တၢ်ဖိတဖၣ်အဂီၢ်မ့ၢ်တၢ်ခွဲးတၢ်ယာ်ဖးဒိၣ်လီၤႉဖဲတချူးတၢ်ဒုးတၢ်ယၤကဲထီၣ်အိၣ်ထီၣ်ဒံးဘၣ်အခါဒၣ်လဲၣ်န့ၣ်ၦၤအီၣ်ဟုၣ်တၢ်အိၣ်ဒီဒူူၣ်ညါလံမီၤႉအခဲအံၤဒုတလိၣ်တဲလၢအဂ့ၢ်လၢၤဘၣ်ႇဖဲမဟါန့ၣ်ၦၤနုာ်လီၤအီၣ်ဟုၣ်တၢ်လၢယနီၢ်ကစၢ်ဒၣ်ယဲယဟံၣ်ဒံးႇယဟံၣ်န့ၣ်ယတ့ထီၣ်မးတ၀ံၤဒံးဘၣ်အိၣ်ဖဲက၀ီၤဒ့-(၄)(အမၣ်-၄ယၣ်ကွဲၣ်)န့ၣ်ႇတၢ်နုာ်လီၤအီၣ်ဟုၣ်ယဟံၣ်အဆၢကတီၢ်န့ၣ်ပကစၢ်အိၣ်ဒီးခီဖျိၦၤထံၣ်ချူးအဃိကိညၣ်ဒံးတၢ်တပၣ်ဃုာ်နီတမံၤဘၣ်ႉတၢ်ဘျၣ်ကစၢ်န့ၣ်ၦၤထံၣ်ချူးဆိအီၤအဃိဟးစံၢ်ထီၣ်ကွံာ်၀ဲ”အဂ့ၢ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤႉ တကတီၢ်ဃီႇသ့ၣ်ကါညံၤနီၤ(၀့ၢ်သီ-မၠိၣ်သ့ၣ်)ဒီး(သ၀ီသီ-ယွၤသ့ၣ်)တၢ်လီၢ်တဖၣ်အပူၤတၢ်ထီၣ်နုာ်လီၤအီၣ်ဟုၣ်တၢ်အိၣ်၀ဲတကးဘၣ်ရၤမတံ၀့ၢ်ပူၤက၀ီၤဒ့အဂၤတဖၣ်အပူၤစ့ၢ်ကီးတၢ်နုာ်လီၤအီၣ်ဟုၣ်တၢ်အိၣ်၀ဲအဃိႇက၀ီၤဒ့(၁)(၂)(၃)(၄)တၢ်လီၢ်တဖၣ်အပူၤကမျၢၢ်တဖၣ်အဲၣ်ဒိးဃ့ၢ်ပဒ့ၣ်၀ဲအသးဘၣ်ဆၣ်တဃ့ၢ်ထီၣ်၀ဲဘၣ်အိၣ်ဒံး၀ဲဒီးတနီၤဃ့ၢ်ထီၣ်ကွံာ်၀ဲအိၣ်ဘၣ်ဆၣ်ဘၣ်ပာ်တ့ၢ်၀ဲၦၤလၢကအိၣ်ခိးအစှၤကတၢၢ်တဂၤအိၣ်၀ဲအဂ့ၢ်သ့ၣ်ညါဘၣ်ဒ်လီၢ်က၀ီၤဖိတဖၣ်စံး၀ဲအသိးန့ၣ်လီၤႉ ဒ်န့ၣ်အသိးႇတကီၢ်ခါခဲအံၤႇရၤမတံ၀့ၢ်ဒီတဖျၢၣ်အပူၤခီဖျိတၢ်နုာ်လီၤအီၣ်ဟုၣ်တၢ်တဖၣ်အိၣ်၀ဲအါမးအဃိလီၢ်က၀ီၤဖိလၢအဃ့ၢ်ပဒ့ၣ်သးလၢကွၢ်ထွဲက့ၤဟံၣ်တချူးဘၣ်တဖၣ်ႇဘၣ်ကိၢ်ဘၣ်ဂီၤ၀ဲတၢ်လၢအဟံၣ်အဃီအကျးဒီးအတၢ်အိၣ်တၢ်ဆိးလီၢ်တဖၣ်အဂီၢ်အိၣ်၀ဲအါမးအသိးဘၣ်ကိၢ်ဘၣ်ဂီၤစ့ၢ်ကီး၀ဲလၢခါဆူညါတၢ်လုၢ်အီၣ်အသးသမူမုၢ်ကျိၤ၀ဲၤကွာ်တၢ်ဖံးတၢ်မၤအိၣ်၀ဲအဂ့ၢ်သ့ၣ်ညါဘၣ်ဒ်ၦၤဃ့ၢ်ပဒ့ၣ်သးတဖၣ်စံး၀ဲအသိးန့ၣ်လီၤႉ
(KNLA)သုးပာ်ဖှိၣ်ထီၣ်မၤန့ၢ်ကွံာ် ပယီၤသုးကလၢၤ(၂၇၅)
လါအ့ဖြ့ၣ် ၁၁သီႇ ၂၀၂၄ နံၣ်ႇ ခ့ၣ်အဲးစံၣ် ပယီၤသုးကလၢၤခီၣ်သုးရ့ၣ်(၂၇၅)လၢအအိၣ်ခိး၀ဲရၤမတံ၀့ၢ်တၢ်ဘံၣ်တၢ်ဘၢအံၤဖဲတဂီၤအံၤဂီၤခီ(၄)နၣ်ရံၣ်ဘျဲၣ်အဆၢကတီၢ်န့ၣ်(KNLA),(KNDO)ဒီးသုးပာ်ဖှိၣ်(PDF)သ့ၣ်တဖၣ်ထီၣ်မၤန့ၢ်ကွံာ်၀ဲခဲလၢာ်လံအဂ့ၢ် ခ့ၣ်အဲၣ်ယူၣ်လီၢ်ခၢၣ်သးတၢ်ကစီၣ်ပာ်ဖျါ၀ဲဖဲတနံၤအံၤလါအ့ဖြ့ၣ်၁၁သီအနံၤန့ၣ်လီၤႉ ပယီၤသုးခီၣ်သုးရ့ၣ်(၂၇၅)အံၤတၢ်ဟ့ၣ်အ၀ဲသ့ၣ်တၢ်ခွဲးတၢ်ယာ်လၢကပာ်လီၤတၢ်စုက၀ဲၤဘၣ်ဆၣ် အ၀ဲသ့ၣ်တပာ်လီၤတၢ်စုက၀ဲၤဒီးအိၣ်ခိး၀ဲအၦၤလၢကဟဲထီၣ်လူၤအီၤဒီးဒုးတြီဆၢက့ၤတၢ်အဃိစးထီၣ်ဖဲလါအ့ဖြ့ၣ်(၈)အနံၤန့ၣ် ကညီဒီကလုာ်တၢ်ထူၣ်ဖျဲးသုးမုၣ်ဒိၣ်(KNLA)တီခိၣ်ရိၣ်မဲ ကညီဒီကလုာ်ဂၢၤသးကရၢ(KNDO)ဒီးတၢ်ပၢၢ်ဆၢသုးပာ်ဖှိၣ်(PDF)သ့ၣ်တဖၣ်ထီၣ်ခး၀ဲသုးကလၢၤ၀ဲန့ၣ်ဒီးဖဲတနံၤအံၤဂီၤခီန့ၣ်တၢ်မၤန့ၢ်ကွံာ်အီၤခဲလၢာ်ဃုာ်ဒီးတၢ်စုက၀ဲၤကျိချံၦာ်သၣ်အါအါဂီၢ်ဂီၢ်အဂ့ၢ်ခ့ၣ်အဲၣ်ယူၣ်ပာ်ဖျါ၀ဲဒၣ်န့ၣ်လီၤႉ ဒ်န့ၣ်အသိးတကီၢ်ခါခဲအံၤအိၣ်လၢတၢ်ဟးရှဲလဲကွံာ်ပယီၤသုးလၢအအိၣ်တ့ၢ်သ့ၣ်တဖၣ်န့ၣ်အဃိ ထံဖိကီၢ်ဖိကမျၢၢ်သ့ၣ်တဖၣ်သုတပျံၤတၢ်ဖုးတၢ်တဂ့ၤဒီးကပာ်ဖှိၣ်မၤသကိးတၢ်အဂ့ၢ်ခ့ၣ်အဲၣ်ယူၣ်ဟ့ၣ်ဒုးသ့ၣ်ညါ၀ဲစ့ၢ်ကီးန့ၣ်လီၤႉ (KNLA)ႇ(KNDO)ဒီးတၢ်ပၢၢ်ဆၢသုးပာ်ဖှိၣ်(PDF)ထီၣ်မၤန့ၢ်ကွံာ် ပယီၤသုးကလၢၤ(၂၇၅)၀ံၤအလီၢ်ခံတၢ်ကစီၣ်ဟးထီၣ်လၢပယီၤသုးသ့ၣ်တဖၣ်ဃ့ၢ်အိၣ်ကဒုသးလၢကီၢ်ပယီၤ-ကီၢ်ကၠီၣ်တဲၣ် တၢ်ရ့လိာ်မုာ်လိာ်တိၤနီၢ်ဂံၢ်(၂)အဖီလာ်ၦၤကညီနီၢ်ဂံၢ်အဂၤ(၂၀၀)ဘျဲၣ်အကျါပၣ်ဃုာ်ဒီးၦၤဘၣ်ဒိဘၣ်ထံးသ့ၣ်တဖၣ်ဒီးအခဲအံၤအ၀ဲသ့ၣ်တၢၣ်ပီၣ်လိာ်သးဒီးကီၢ်ကၠီၣ်တဲၣ်ၦၤဘၣ်မူဘၣ်ဒါအဖၢမုၢ်ဒ်သိးကနုာ်လီၤအိၣ်ကဒုလၢကီၢ်ကၠီၣ်တဲၣ်ပူၤအဂီၢ်အဂ့ၢ်တၢ်ကစီၣ်တနီၤပာ်ဖျါ၀ဲဒၣ်န့ၣ်လီၤႉ တကတီၢ်ဃီ ပယီၤသုးတြိၤ(၄၄)အသုးတြိၤခိၣ်တခီလဲၤအိၣ်ကဒု၀ဲဒၣ်လၢ(KNA)ကညီဒီကလုာ်သုးမုၢ်ဒိၣ်သုးဟီၣ်က၀ီၤနီၣ်ဂံၢ်(၂)အဒုးယာ်ခိၣ်သုးခိၣ်ဒိၣ်စိစီၤတ့ၤ၀့အအိၣ်အဂ့ၢ်တၢ်ကစီၣ်ဟးထီၣ်၀ဲဒၣ်အဖီခိၣ် ဒ်သိးကသ့ၣ်ညါအါထီၣ်ဘၣ်တၢ်ဂ့ၢ်အံၤအဂီၢ်ကညီကွဲၤလ့လိၤဆဲးကျိသံကွၢ်ဒီးသုးခိၣ်တ့ၤ၀့ဘၣ်ဆၣ်တစံးဆၢလီတဲစိဒံးဘၣ်အဂ့ၢ်ဒုးသ့ၣ်ညါဘၣ်ၦၤဒိကနၣ်တၢ်ဖိကိးဂၤဒဲးန့ၣ်လီၤႉ
ကမျၢၢ်သုတလဲၤဘူးဒီး ရၤမတံတၢ်ရ့လိာ်မုာ်လိာ်တိၤနီၣ်ဂံၢ်(၂)တဂ့ၤအဂ့ၢ်(KNU)ဟ့ၣ်ပလီၢ်
လါအ့ဖြ့ၣ် ၁၁သီႇ ၂၀၂၄ နံၣ်ႇ ခ့ၣ်အဲးစံၣ် (KNLA)ႇ(KNDO)ဒီးတၢ်ပၢၢ်ဆၢသုးပာ်ဖှိၣ်(PDF)ထီၣ်မၤန့ၢ်ကွံာ်ရၤတံ၀့ၢ်ခိၣ်ထိးပယီၤသုးကလၢၤ(၂၇၅)၀ံၤအလီၢ်ခံ ပယီၤသုးဖိသ့ၣ်တဖၣ်လဲၤအိၣ်ခူသူၣ်သးလၢ ရၤမတံတၢ်ရ့လိာ်မုာ်လိာ်တိၤနီၢ်ဂံၢ်(၂)ဒီးပယီၤသုးသ့ၣ်တဖၣ်အံၤခးနါစိၤတၢ်သ့အဃိကမျၢၢ်ထံဖိကီၢ်ဖိသ့ၣ်တဖၣ်သုတလဲၤဘူးဖဲတၢ်ရ့လိာ်မုာ်လိာ်တိၤနီၣ်ဂံၢ်(၂)တဂ့ၤအဂ့ၢ် (KNU)ထုးဟ့ၣ်ပလီၢ်၀ဲဖဲတနံၤလါအ့ဖြ့ၣ်၁၁သီအနံၤအံၤန့ၣ်လီၤႉ ဒ်န့ၣ်အသိးပယီၤသုးသ့ၣ်တဖၣ်အံၤလၢကလဲၤအိၣ်ကဒုဘၣ်လၢကီၢ်ကၠီၣ်တဲၣ်အဂီၢ်ရဲၣ်ကျဲၤ၀ဲအဖၢမုၢ်ဘၣ်ဆၣ်တုၤအခဲအံၤအိၣ်တာ်ထီဒံးဒၣ်အသးဖဲတၢ်ရ့လိာ်မုာ်လိာ်တိၤနီၣ်ဂံၢ်(၂)အဂ့ၢ်(KNU)ပာ်ဖျါ၀ဲစ့ၢ်ကီးန့ၣ်လီၤႉ လၢန့ၣ်အမဲာ်ညါ ပယီၤသုးကီၣ်ကးအံၤဘၣ်ဟ့ၣ်ဃၣ်ကွံာ်၀ဲ ရၤမတံ၀့ၢ်ဟီၣ်က၀ီၤအသုးကလၢၤသ့ၣ်တဖၣ်ခဲလၢာ်ဒ်အံၤအဃိ ပယီၤသုးကီၣ်ကးအံၤ ဟဲတ့ၢ်လီၤမ့ၣ်ပိၢ်ဒီးကဘီယူၤလၢကမျၢၢ်တၢ်အိၣ်တၢ်ဆိးလီၢ်ကျဲသ့၀ဲကိးဆၢကတီၢ်ဒဲးအဖီခိၣ်ထံဖိကီၢ်ဖိကမျၢၢ်တဖၣ်ကအိၣ်ဘၣ်လၢတၢ်ပူၤဖျဲးလီၢ်အဂ့ၢ် (KNU)ဟ့ၣ်ပလီၢ်စ့ၢ်ကီး၀ဲဒၣ်န့ၣ်လီၤႉ ဒ်လီၢ်က၀ီၤတၢ်ကစီၣ်တနီၤဒီးကီၢ်ကၠီၣ်တဲၣ်တၢ်ကစီၣ်တနီၤပာ်ဖျါ၀ဲအသိးန့ၣ် ပယီၤသုးလၢဟဲအိၣ်ခူသူၣ်သးဖဲရၤမတံတိၤနီၣ်ဂံၢ်(၂)န့ၣ်ၦၤနီၣ်ဂံၢ်ကအိၣ်အဂၤ(၂၀၀)ဘျဲၣ်ဒီးအကျါန့ၣ်ပၣ်ဃုာ်ဒီးၦၤဘၣ်ဒိဘၣ်ထံးသ့ၣ်တဖၣ်အဂ့ၢ်ပာ်ဖျါ၀ဲဒၣ်န့ၣ်လီၤႉ
ကဒုးကဒါက့ၤသုးကီၣ်ကးအဂ့ၢ်(KNSO)ကရူၢ်လၢအမၤဃာ်တၢ်မုာ်တၢ်ခုၣ်အံၤဘိးဘၣ်ရၤလီၤ၀ဲ
လါအ့ဖြ့ၣ် ၁၁ သီႇ ၂၀၂၄ နံၣ်ႇ ခ့ၣ်အဲးစံၣ် လၢကရ့ၣ်နံၣ်ကီၢ်စဲၣ် လဲၣ်ပၤခိၤကီၢ်ရ့ၣ် မီၤခၠံဟီၣ်က၀ီၤအပူၤ ကရ့ၣ်နံၣ်ဒီကလုာ်ဃူဖိး(KNSO)ကရူၢ်လၢအဟံ တ့ၢ်ဃာ်တၢ်မုာ်တၢ်ခုၣ်လၢသုးပဒိၣ်ပၢတၢ်စိၤအကတီၢ်အခါန့ၣ် တကီၢ်ခါခဲအံၤကဒုးကဒါက့ၤသုးကီၣ်ကးအဂ့ၢ်န့ၣ် ထုးထီၣ်ဘိးဘၣ်ရၤလီၤ၀ဲဖဲမဟါလါအ့ဖြ့ၣ် ၁၀ သီအနံၤန့ၣ်လီၤႉ ခဲမဖၠူၤသ၀ီလၢကရ့ၣ်နံၣ်ဒီကလုာ်ဃူဖိး(KNSO)ကရူၢ် အ၀ဲၤလီၢ်ရူအိၣ်ဆီလီၤအသးအံၤ ပယီၤသုးကဘီယူၤ ဟဲတ့ၢ်လီၤမ့ၣ်ပိၢ်တကးဒံးဘၣ်အမဲာ်ညါဟးခးလီၤစ့ၢ်ကီးတၢ်လၢ(မီၤခၠံ)ကမျၢၢ်ဒူသ၀ီအိၣ်ဆိးလီၢ်ကျဲပူၤအဃိ တၢ်မုာ်တၢ်ခုၣ်လၢအ၀ဲသ့ၣ်အၢၣ်လီၤဃာ်၀ဲသ့ၣ်တဖၣ်အံၤဘၣ်မၤဟးဂီၤကွံာ်ဒ်အံၤလီၤအဂ့ၢ်န့ၣ် (KNSO)လံာ်တၢ်ပာ်ဖျါ အပူၤပာ်ဖျါ၀ဲန့ၣ်လီၤႉ ဖဲအပူၤကွံာ်(၂၀၂၁)လါဖ့ၤဘြူၤအါရံၤ ၁ သီအနံၤ ခီဖိသျုးကီၣ်ကးအံၤဟံးန့ၢ်ဆူၣ်ကွံာ်၀ဲထံကီၢ်တၢ်စိတၢ်ကမီၤ အဃိ တၢ်ဂ့ၢ်ကီအတၢ်ပိာ်ထွဲထီၣ်အခံတဖၣ်လၢအမ့ၢ်သုးကီၣ်ကးဖီၣ်မၤသံၦၤကမျၢၢ်ထံဖိကီၢ်ဖိႇထၢနုာ်လီၤ၀ဲလၢဃိာ်ပူၤႇမၤဆူးမၤဆါမၤပယွဲႇဒွဲၣ်အူအီၣ်ၦၤကမျၢၢ်အဟံၣ်အဃီတၢ်သ့ၣ်တဖၣ်အံၤတမ့ၢ်အကဲထီၣ်သးထဲလၢ ကရ့ၣ်နံၣ် ကီၢ်စဲၣ်ပူၤ ကမျၢၢ်ထံဖိကီၢ်ဖိဘၣ်ဒီးမ့မ့ၢ်တခီလၢကီၢ်ပယီၤဒီတဘ့ၣ်အပူၤၦၤကမျၢၢ်ဘၣ်သံဘၣ်ၦၢ်အါအါဂီၢ်ဂီၢ်ဒီး တကးဒံးဘၣ် သုးကီၣ်ကးအံၤဖီၣ်ဒုးဃာ်၀ဲဒၣ်ၦၤသူၣ်ဘီၣ်သးစၢ်တဖၣ်အါမးဒီးလၢတၢ်န့ၣ်အဃိ လၢသုးကီၣ်ကးအ တၢ်ဖံးတၢ်မၤအံၤ အဖီခိၣ်ထီဒါ၀ဲဒၣ်အဂ့ၢ်န့ၣ် (KNSO)လံာ်တၢ်ပာ်ဖျါအပူၤ စံး၀ဲန့ၣ်လီၤႉ တကီၢ်ခါခဲအံၤ(KNSO)အံၤပာ်ဖှိၣ်မၤသကိးတၢ်ဒီးကရ့ၣ်နံၣ်သုးမုၢ်ဒိၣ်(KA)ႇကညီဒီကလုာ်ဂၢၤသးသုး(KNDF) ဃုာ်ဒီးတၢ်ပၢၢ်ဆၢသုးပာ်ဖှိၣ်လၢအဂၤတဖၣ်ဒီးကဒုးထီဒါက့ၤသုးကီၣ်ကးႇကပာ်ဖှိၣ်မၤသကိးတၢ်ဒီး ကရ့ၣ်နံၣ်ကီၢ်စဲၣ်ပူၤ ကမျၢၢ်ထံဖိကီၢ်ဖိဒီးကနုာ်လီၤပၢၢ်ဆၢတၢ်တုၤလၢသုးမီၤစိရိၤသနူလီၤၦီၢ်ဒီးဖဲၣ်ဒရၢၣ်ဒံၣ်မိၣ်ခြ့ၣ်စံၣ်န့ၢ်တစုအဂ့ၢ်န့ၣ် (KNSO)လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ကရ့ၣ်နံၣ်ဒီကလုာ်ဃူဖိးကရၢ(KNSO)အံၤ ဖဲအပူၤကွံာ်(၂၀၀၂)လါနိၣ်၀့ဘၢၣ် ၉ သီအနံၤန့ၣ် အ၀ဲသ့ၣ်ဟံးန့ၢ်၀ဲ တၢ်မုာ်တၢ်ခုၣ်ဒီးသုးပဒိၣ်ဒီး ဖဲန့ၣ်အိၣ်ဆၢထၢၣ်က့ၤ၀ဲဒ်(ကြယ်ဖြူပြည်သူ့)ကရူၢ်အသိးန့ၣ်လီၤႉ
(KNLA)သုးပာ်ဖှိၣ်ခိးခးပယီၤသုးလၢကူကၤထီၣ်(DKBA)ကူကၤလၢကဟဲထီၣ်ဆူသ့ၣ်ဘီဘိသုးကလၢၤ
လါဖြ့ၣ် ၁၀သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢ တီနီၢ်မုၢ်ထီၣ်ကီးတရံးကီၢ်ဆၣ် ဖဲမဟါမုၢ်ဃ့ၢ်လီၤ (၃)နၣ်ရံၣ်ဘျဲၣ်အဆၢကတီၢ်န့ၣ် ပယီၤသုးလၢအအိၣ်လၢ(၃)ထၣ်ကွ့ၣ်တဖၣ်သိးထီၣ်(DKBA)ကူကၤလၢကဟဲက့ၤထီၣ်လၢသ့ၣ်ဘီဘိသုးကလၢၤအဂီၢ်(KNLA)ဒီးသုးပာ်ဖှိၣ်ခိးခးအ၀ဲသ့ၣ်ဖဲသ့ၣ်ဘီဘိသ၀ီမုၢ်နုာ် မီထၣ်တၢ်လီၢ်တတီၤဒီးကွံယာ်ပျၢ်တၢ်လီၢ်တတီၤအဃိပယီၤသုးသိလ့ၣ်(၃)ခိၣ်အကျါတခိၣ်န့ၣ်မ့ၣ်အူဟးဂီၤကွံာ်၀ဲဒၣ်အသိးတၢ်ခးလိာ်သးအကဆၢကတီၢ်ဘၣ်သံဃုာ်ဒီးကမျၢၢ်ဖိတဂၤအဂ့ၢ်သ့ၣ်ညါဘၣ်လၢလီၢ်က၀ီၤၦၤဘၣ်မူဘၣ်ဒါအအိၣ်န့ၣ်လီၤႉ သိလ့ၣ်သ့ၣ်တဖၣ်န့ၣ်မ့ၢ်၀ဲ(DKBA)အသိလ့ၣ်ဒီးပယီၤသုးသ့ၣ်တဖၣ်သိးထီၣ်၀ဲ(DKBA)ကူကၤဒ်သိးကဟဲက့ၤထီၣ်လၢသ့ၣ်ဘီဘိသုးကလၢၤအဂီၢ်အဂ့ၢ်ႇ ဒီးဖဲတၢ်ခးလိာ်သးအဆၢကတီၢ်ဘၣ်သံ၀ဲကမျၢၢ်လၢအဟဲက့ၤလၢအကျီးပူၤတဂၤအဂ့ၢ်လီၢ်က၀ီၤၦၤဘၣ်မူဘၣ်ဒါလၢတအဲၣ်ဒိးပာ်ဖျါအမံၤတဂၤစံးဘၣ်၀ဲ ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤႉ “ပယီၤသုးကူကၤထီၣ်(DKBA)ကူကၤႇဟဲက့ၤဒိး၀ဲ(DKBA)သိလ့ၣ်(၃)ခိၣ်အခါတၢ်ခိးခးအီၤလၢကျဲအဃိသိလ့ၣ်လၢအတီၣ်ကျိဖးဒိၣ်ချံႇစုကွံာ်မ့ၣ်ပိၢ်တခိၣ်န့ၣ်မ့ၣ်အူအီၣ်ဟးဂီၤကွံာ်န့ၣ်လီၤႉ တၢ်ခးလိာ်သးအခါဘၣ်သံဃုာ်ဒီးသ၀ီဖိလၢအအိၣ်လၢသူမွဲကျိ၀ၢ်(ကီၢ်ကၠီၣ်တဲၣ်)တကပၤတဂၤဘၣ်ဖဲအဟဲက့ၤလၢအကျီးအဆၢကတီၢ်န့ၣ်လီၤႉ”အဂ့ၢ်စံး၀ဲဒၣ်န့ၣ်လီၤႉ တကတီၢ်ဃီသ၀ီဖိ၀ဲန့ၣ်န့ၣ်မ့ၢ်အဘၣ်ဒီးၦၤဖဲလဲၣ်တဖုကျိလဲၣ်န့ၣ်တၢ်တသ့ၣ်ညါဘၣ်ဒီးကမျၢၢ်ဖိ၀ဲအံၤသးနံၣ်ကအိၣ်၀ဲဒၣ်(၂၀)ဘျဲၣ်ဃၣ်ဃၣ်အဂ့ၢ်အ၀ဲတဲအါထီၣ်၀ဲဒၣ်စ့ၢ်ကီးန့ၣ်လီၤႉ လၢန့ၣ်အမဲာ်ညါ (DKBA)သိၣ်လ့ၣ်(၃)ခိၣ်လၢပယီၤဒိး၀ဲန့ၣ်မ့ၢ်၀ဲ(Revo)တခိၣ်၊(Remax)တခိၣ်ဒီး(Probox)တခိၣ်ၦၤနီၣ်ဂံၢ်ကအိၣ်အဂၤ(၂၀)ဘျဲၣ်ဒီးမ့မ့ၢ်(Probox)သိလ့ၣ်ခီန့ၣ်တီၣ်၀ဲ ကျိဖးဒိၣ်ချံႇမ့ၣ်ပိၢ်ဒီးကျိချံၦာ်သၣ်အဃိအူအီၣ်ကွံာ်၀ဲဖဲတၢ်ကဲထီၣ်သးလီၢ်အသိး ဖဲတၢ်ကဲထီၣ်သးအလီၢ်န့ၣ်ပယီၤသုးသံတီၢ်တဂၤႇဘၣ်ဒိတၢ်ဖီၣ်ချုးန့ၢ်မူဒံးတဂၤႇက့ၤသံလၢအသုးကလၢၤ(၂)ဂၤအဂ့ၢ်သ့ၣ်ညါဘၣ်အသိးလၢ(KNLA)တၢ်ပၢၢ်ဆၢသုးပာ်ဖှိၣ်တကပၤတၢ်ဘၣ်ဒိဘၣ်ထံးတအိၣ်ဘၣ်အဂ့ၢ်သ့ၣ်ညါဘၣ်လၢလီၢ်က၀ီၤၦၤဘၣ်မူဘၣ်ဒါအအိၣ်န့ၣ်လီၤႉ တကီၢ်ခါခဲအံၤလၢတၢ်ကဒုးလီၤၦီၢ်သုးမီၤစိရိၤသနူအဂီၢ်(KNLA)ဒီးသုးပာ်ဖှိၣ်သ့ၣ်တဖၣ်အိၣ်လၢတၢ်ဂဲၤလိာ်အသကွီၢ်ပူၤအဃိ ကညီဖီၣ်စုက၀ဲၤဃုာ်ဒီးၦၤဖီၣ်စုက၀ဲၤလၢအဂၤဖဲလဲၣ်တဖုဂ့ၤဂ့ၤမ့ၢ်တီၣ်ဆှၢႇမၤစၢၤပယီၤသုးန့ၣ် တၢ်ကလုၢ်လီၤလၢတၢ်ကဘၣ်ခးအီၤခဲလၢာ်လီၤအဂ့ၢ် သ့ၣ်ညါဘၣ်လၢကညီဖီၣ်စုက၀ဲၤကရူၢ်အၦၤဘၣ်မူဘၣ်ဒါအအိၣ်န့ၣ်လီၤႉ
သုးကီၣ်ကးကဘီယူၤဟဲတ့ၢ်လီၤမ့ၣ်ပိၢ်အဖီခိၣ်(ဒမသၤ)သ၀ီကမျၢၢ်ဟံၣ်အူအီၣ်ဟးဂီၤကဒီးကွံာ်၀ဲ
လါအ့ဖြ့ၣ် ၁၀ သီႇ ၂၀၂၄ နံၣ်ႇ ခ့ၣ်အဲးစံၣ် တလၢၤကီၢ်စဲၣ်(ကၠဲၣ်မယီၤ)ကီၢ်ဆၣ်(ဒမသၤ)သ၀ီအပူၤအံၤန့ၣ်စးထီၣ်ဖဲလါအ့ဖြ့ၣ်အတီၢ်ပူၤအံၤခီဖျိလၢသုးကီၣ်ကးကဘီယူၤဟဲတ့ၢ်လီၤမ့ၣ်ပိၢ်တပယူာ်ဃီအဃိကမျၢၢ်ဟံၣ်ဃီတၢ်သူၣ်ထီၣ်ဘၣ်အူအီၣ်ဟးဂီၤကဒီးကွံာ်၀ဲအဂ့ၢ်လီၢ်က၀ီၤဖိသ့ၣ်တဖၣ်စံး၀ဲန့ၣ်လီၤႉ (ဒမသၤ)သ၀ီအပူၤအံၤန့ၣ်သုးကီၣ်ကးတကပၤခးလီၤကျိဖးဒိၣ်တကးဒံးဘၣ်အမဲာ်ညါသူ၀ဲကလံၤသုးႇ ထံသုးဒီးခးလီၤ၀ဲတၢ်တပယူာ်ဃီအဃိကမျၢၢ်လီၢ်က၀ီၤဖိအဟံၣ်အဃီသ့ၣ်တဖၣ်ဘၣ်အူအီၣ်ကဒီးကွံာ်၀ဲအဂ့ၢ်(ဒမသၤ)သ၀ီဖိတဂၤစံး၀ဲဒ်အံၤန့ၣ်လီၤႉ “အ၀ဲသ့ၣ်ကဘီယူၤနါက့မ့ၢ်ဂ့ၤႇ သုးကဘီချံနါက့ဟဲခးလီၤတၢ်လီၤႉ ခးလီၤစ့ၢ်ကီးကျိဖးဒိၣ်တပယူာ်ဃီဘျီန့ၣ်ကမျၢၢ်လီၢ်က၀ီၤဖိအဟံၣ်အဃီဘၣ်အူအီၣ်ကဒီးကွံာ်၀ဲမီၤနီၤ” အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ဖဲပူၤကွံာ်မဟါအနံၤန့ၣ်သုးကီၣ်ကးအသုးခိၣ်ကျၢၢ်ခံ(စိ၀့)ဟဲ၀ဲလၢ(မီၣ်လမၠဲၣ်)၀့ၢ်အဆၢကတီၢ်တၢ်ပၢၢ်ဆၢသုးပာ်ဖှိၣ်သ့ၣ်တဖၣ်လဲၤတ့ၢ်လီၤမ့ၣ်ပိၢ်ဒီးဒြိ၀ံၤအလီၢ်ခံ(ဒမသၤ)သ၀ီဃုာ်ဒီးဒူသ၀ီလၢအိၣ်တၢ်ခိၣ်တၢ်ဃၢၤသ့ၣ်တဖၣ်အပူၤသုးကီၣ်ကးတကပၤဟဲတ့ၢ်လီၤမ့ၣ်ပိၢ်ဒီးကဘီယူၤဒ်အံၤလီၤအဂ့ၢ်လီၢ်က၀ီၤဖိသ့ၣ်တဖၣ်စံး၀ဲန့ၣ်လီၤႉ လီၢ်က၀ီၤဖိတဂၤစံး၀ဲလၢ “ဖဲမဟါန့ၣ်သုးကီၣ်ကးအသုးခိၣ်ဟဲလၢမီၣ်လမၠဲၣ်န့ၣ်တၢ်ပၢၢ်ဆၢသုးပာ်ဖှိၣ်ကရူၢ်ဟဲဒုး၀ဲ ဒၣ်ဒီးဒြိမီၤနီၤႉ မ့ၢ်လၢသုးကီၣ်ကးတၢ်လဲၤဒုးအ၀ဲသ့ၣ်အဃိအ၀ဲသ့ၣ်ဟဲခးလီၤတၢ်ဒီးကဘီယူၤဒုးသုးႇ သုးကဘီချံလီၤႉ တုၤလၢတနံၤညါအံၤမုၢ်ဆါခီန့ၣ်ကဘီယူၤဟဲခးလီၤတၢ်အဖၢမုၢ်လီၤႉ ဟဲခးလီၤတၢ်န့ၣ်အိၣ်လၢအဘျီ(၁၀)လံ” အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ဒ်န့ၣ်အသိးဖဲပူၤကွံာ်လါမးရှး(၂၇)သီအနံၤန့ၣ်စ့ၢ်ကီးပယီၤသုးကီၣ်ကးကဘီချံလၢအိၣ်(ကၠဲ)ထံကျိဟီၣ်က၀ီၤအပူၤအံၤခီဖျိခးလီၤကျိဖးဒိၣ်အဃိ(ဒမသၤ)သ၀ီအပူၤကမျၢၢ်ဟံၣ်အူအီၣ်ဟးဂီၤကွံာ်၀ဲ(၃၀၀)ဖျၢၣ်ဘျဲၣ်ဒံးအဂ့ၢ်သ၀ီဖိသ့ၣ်တဖၣ်စံး၀ဲန့ၣ်လီၤႉ တကီၢ်ခါဟီၣ်ခိၣ်မဲာ်ဖံးခိၣ်တၢ်ဒုးအပူၤမ့ၢ်လၢသုးကီၣ်ကးသ့ၣ်တဖၣ်ဘၣ်ကွၢ်ဆၢမဲာ်ဘၣ်၀ဲတၢ်သံတၢ်ၦၢ်တၢ်ဘၣ်ဒိဘၣ်ထံးအိၣ်အါ၀ဲအဃိသုးကီၣ်ကးအံၤဘၣ်ပာ်ဂံၢ်ပာ်ဘါက့ၤ၀ဲလၢကလံၤကျါတၢ်ဟဲခးလီၤစၢၤတၢ်အသိးဒီးဖဲမဟါဟါခီ(၈)နၣ်ရံၣ်ဃၣ်ဃၣ်အဆၢကတီၢ်စ့ၢ်ကီးသုးကီၣ်ကဘီယူၤဟဲတ့ၢ်လီၤမ့ၣ်ပိၢ်လၢ(ကြုၢ်တု)၀့ၢ်ဃၢၤ(ကီကၠဲၣ်)(မံၣ်ဂလိၣ်)သ၀ီအပူၤအဂ့ၢ်(ကြုၢ်တု)၀့ၢ်လီၢ်က၀ီၤဖိသ့ၣ်တဖၣ်စံး၀ဲန့ၣ်လီၤႉ
တၢ်မၤနၢၤဖီတၢၣ်ကတုၤအဂီၢ်လိၣ်ဘၣ်ကမျၢၢ်ထံဖိကီၢ်ဖိအတၢ်ဆီၣ်ထွဲမၤစၢၤအဂ့ၢ် သုးခိၣ် ဒးဘီစံး၀ဲ
လါအ့ဖြ့ၣ် ၁၀ သီ, ၂၀၂၄ နံၣ်, ခ့ၣ်အဲးစံၣ် ဒ်သိးသုးမီၤစိရိၤကလီၤၦီၢ်ကွံာ်ဒီးတၢ်မၤနၢၤဖီတၢၣ်ကတုၤချ့ချ့အဂီၢ်ခါဆူညါပလိၣ်ဘၣ်၀ဲကီၢ်ပူၤကီၢ်ချၢကမျၢၢ်အတၢ်ဆီၣ်ထွဲမၤစၢၤသ့ၣ်တဖၣ်အဂ့ၢ်န့ၣ် (သုးက့ ၆) သုးက့ဘံၣ်ဘၢသုးကျိၤခိၣ် လၢအမ့ၢ်စ့ၢ်ကီး ကညီဒီကလုာ်တၢ်ထူၣ်ဖျဲး သုးမုၢ်ဒိၣ် (KNLA) Cobra သုးကျိၤခိၣ် သုးခိၣ် ဒးဘီ စံး၀ဲန့ၣ်လီၤႉ ဒ်သိးပကပူၤဖျဲးထီၣ်လၢကုၢ်ပူၤဒီးပကန့ၢ်က့ၤပထံပကီၢ်ပတၢ်သဘျ့အဂီၢ်န့ၣ် မူဒါအိၣ်၀ဲဒၣ်လၢၦၤကိးဂၤဒဲးအစုပူၤဒီး ခါဆူညါပလိၣ်ဘၣ်စ့ၢ်ကီး၀ဲဒၣ်ကမျၢၢ်ထံဖိကီၢ်ဖိအတၢ်ဆီၣ်ထွဲမၤစၢၤတကးဒံးဘၣ်ဒ်န့ၣ်အသိးတၢ်မၤနၢၤလၢပမၤနၢၤအီၤသ့ၣ်တဖၣ်အံၤခီဖျိလၢကမျၢၢ်အတၢ်ဆီၣ်ထွဲမၤစၢၤၦၤအဃိလီၤအဂ့ၢ်န့ၣ် ပထံၣ်ဘၣ်လၢသုးခိၣ် ဒးဘီ စံးဘၣ်၀ဲဒၣ် (ယမ့ၢ်ကညီ)န့ၣ်လီၤႉ “တၢ်ခဲလၢာ်တၢ်မၤနၢၤတၢ်ကန့ၢ်ကသ့အဂီၢ်ဒုမ့ၢ်ဒၣ်လၢကမျၢၢ်လီၤႉကမျၢၢ်တၢ်ကွၢ်ထွဲၦၤတၢ်ဆီၣ်ထွဲမၤစၢၤၦၤမ့တအိၣ်ဘၣ်န့ၣ်လၢပတၢ်ပညိၣ်အိၣ်အဖီတၢၣ်အသိးဒုကလဲၤအဂီၢ်န့ၣ်တၢ်ကီတၢ်ခဲအိၣ်ဒီဒူၣ်ႉအဃိပဘၣ်ပာ်ဂံၢ်ပာ်ဘါ၀ဲဒၣ်ကမျၢၢ်ဘၣ်ပာ်မိၢ်ပာ်ပၢ်လၢကမျၢၢ်လီၤႉခဲအံၤပလဲၤ၀ဲဒၣ်ဒုးယၤဂ့ၢ်၀ီတဆီဘၣ်တဆီပတၢ်မၤနၢၤအိၣ်သ့ၣ်တဖၣ်အံၤန့ၣ် ပမ့တဲန့ၣ်ခီဖျိလၢ ကမျၢၢ်လီၤႉကမျၢၢ်အတၢ်ဆီၣ်ထွဲမၤစၢၤၦၤအတၢ်နာ်အီၣ်ၦၤအဃိန့ၣ်ပလဲၤသ့က့ၤသ့ပမၤသ့အဃိန့ၣ် ပမ့က့ၤကွၢ် ကဒါ ပတၢ်ဟူးတၢ်ဂဲၤဒီးကမျၢၢ်တၢ်ဆီၣ်ထွဲန့ၣ်ပတၢ်ဟူးတၢ်ဂဲၤန့ၣ်လဲၤ၀ဲသးလၢအဂ့ၢ်အ၀ီမီၤနီၤႉ”အဂ့ၢ် န့ၣ် စံး၀ဲန့ၣ်လီၤႉ တကးဒံးဘၣ်ခီဖျိလၢထံရူၢ်ကီၢ်သဲးတၢ်ပၢၢ်ဆၢသနူဒီးတၢ်ထံၣ်တဒ်သိးလိာ်သးဘၣ်အဃိထံၣ်ဘၣ်လၢကီၢ်ပူၤကီၢ်ချၢကမျၢၢ်တနီၤတဲအါလိာ်သးကဒဲကဒဲဒီးလၢတၢ်အံၤအဖီခိၣ်ဘၣ်ဒိပသူၣ်ပသးဒိၣ်မးအဂ့ၢ်န့ၣ် (Cobra)သုးကျိၤခိၣ် သုးခိၣ်ဒးဘီ စံးအါထီၣ်၀ဲဒၣ်န့ၣ်လီၤႉ “တဘျီတခီၣ်ပအိၣ်လၢတၢ်ဒုးပျီပူၤပဒုးဒီးဒုၣ်ဒါထဲလဲၣ်ထဲလဲၣ်ဂ့ၤဘၣ်ဆၣ်ပတလီၤဘှံးဘၣ်ႉပဘၣ်ဟ့ၣ်လီၤပသးသမူ ယမ့ၢ်တဲန့ၣ်ယဘၣ်ဒိအိၣ်ယဲၢ်ဘျီလံပကသံအိၣ်အဘျီတစှၤလံဘၣ်ႇဘၣ်ဆၣ်ယသးသဟီၣ်တဘၣ်ဒိသးတဆံး နီတဘျီဘၣ်ႉတခီၣ်တဘျီယထံၣ်ဘၣ်လၢယၦၤကညီအ့ၣ်လိာ်သးလၢကီၢ်ပူၤကီၢ်ချၢလၢတၢ်ပၢၢ်ဆၢသနူအဃိတၢ်ထံၣ်တဒ်သိးဘၣ်တဲဆါလီၤသးတဲအါလိာ်သးတၢ်သ့ၣ်တဖၣ်န့ၣ်ဘၣ်ဒိပသူၣ်ပသးရးမးႉဘၣ်ဆၣ်ဘၣ်ဒိဒ်လဲၣ်ဂ့ၤဒ်လဲၣ်ဂ့ၤ န့ၣ်ပအၢၣ်လီၤပသးလၢကျဲတဘိအံၤပကပိာ်လၢအကတၢၢ်ပကမၤန့ၢ်ပထံပကီၢ်တၢ်သဘျ့လၢအန့ၢ်ပအၢၣ်လီၤသးတုၤလီၤတီၤလီၤ အဃိန့ၣ်ပလဲၤ၀ဲကျဲတုၤလၢအဆၢကတီၢ်၀ဲအံၤလီၤ”အဂ့ၢ်န့ၣ် စံး၀ဲဒၣ်န့ၣ်လီၤႉ စးထီၣ်ဖဲအပူၤကွံာ်လါမးရှး ၇ သီအနံၤန့ၣ် (Cobra)သုးကျိၤသုးပာ်ဖှိၣ်ဒီးပယီၤသုးအဘၢၣ်စၢၤ တၢ်ခးလိာ်သး ကဲထီၣ်၀ဲဒၣ်လၢမၠၣ်၀တံၣ် သ့ၣ်ကါညံၣ်နီၣ် (၃၅၅)သုးရ့ၣ်တၢ်လီၢ်ဒီးတုၤလၢခဲအံၤတၢ်ဒုးကဲထီၣ်တၢ်ဆၢကတီၢ် ကအိၣ်လၢတလါဃၣ်ဃၣ်လံဒီးလၢတၢ်တလါအတီၢ်ပူၤအံၤမၤန့ၢ်၀ဲကျိချံၦာ်သၣ်လၢဒုၣ်ဒါအအိၣ်အိၣ်၀ဲဒၣ်အါမးအဂ့ၢ်န့ၣ် သုးခိၣ် ဒးဘီ စံး၀ဲန့ၣ်လီၤႉ ဖဲတၢ်ဒုးကဲထီၣ်လၢ(သ့ၣ်ကါညံၣ်နီၣ်)တၢ်လီၢ်လၢခံခီခံကပၤအဘၢၣ်စၢၤအံၤအတီၢ်ပူၤန့ၣ် ခီဖျိပယီၤသုးအံၤ ခးလီၤကျိဖးဒိၣ်ႇကဘီယူၤစ့ၢ်ကီးဟဲခးလီၤတၢ်တပယူာ်ဃီအဃိၦၤကမျၢၢ်လၢအိၣ်ဘူးဖဲတၢ်ခိၣ်တၢ်ဃၢၤဖဲန့ၣ်သ့ၣ် တဖၣ်အဟံၣ်အဃီဟးဂီၤဒီးကမျၢၢ်စ့ၢ်ကီးဘၣ်ဃ့ၢ်ထီၣ်၀ဲဒၣ်အါမးတုၤလၢခဲအံၤန့ၣ်လီၤႉ ဒ်န့ၣ်အသိးစးထီၣ်ဖဲတၢ်ပၢၢ်ဆၢသုးပာ်ဖှိၣ်ထီၣ်မၤန့ၢ်၀ဲမၠၣ်၀တံၣ်၀့ၢ်ဃၢၤ(သ့ၣ်ကါညံၣ်နီၣ်)ပယီၤသုးတၢ်လီၢ်တဖျၢၣ်၀ံၤတဖျၢၣ်ကဲ ထီၣ်၀ံၤလီၢ်ခံန့ၣ်တၢ်ဒုးအံၤခီဃီၤ၀ဲဒၣ်တုၤလၢမၠၣ်၀တံၣ်၀့ၢ်ပူၤဒီးတုၤလၢခဲအံၤတၢ်ဒုးကဲထီၣ်၀ဲဒၣ်လၢခံခီခံ ကပၤအဘၢၣ်စၢၤဒီးခီဖျိပယီၤသုးအံၤသူ၀ဲကဘီယူၤသူ၀ဲဒြိခးလီၤ၀ဲဒၣ်ကျိဖးဒိၣ်တပယူာ်ဃီတုၤလၢခဲအံၤအဃိ ခဲအံၤ ၦၤကမျၢၢ်ဘၣ်ဃ့ၢ်ထီၣ်သုးလီၢ်သုးကျဲအါအါဂီၢ်ဂီၢ်အဂ့ၢ်န့ၣ်...