တၢ်ပံးဃာ်၀ဲ မၠၣ်၀တံၣ် နီၣ်ဂံၢ်(၁)တိၤလၢကီၢ်ပယီၤတကပၤတစိၢ်တလီၢ်
လါအ့ဖြ့ၣ် ၂၁ သီႇ ၂၀၂၄ နံၣ်ႇ ခ့ၣ်အဲးစံၣ် ဖဲတနံၤအံၤလါအ့ဖြ့ၣ် ၂၁ သီ ဂီၤဆၢအဆၢကတီၢ်န့ၣ် မၠၣ်၀တံၣ် နီၣ်ဂံၢ်(၁)တိၤလၢကီၢ်ပယီၤတကပၤ လၢအဘူး၀ဲဒီး တၢ်ဒုးကဲထီၣ်အလီၢ်အံၤန့ၣ် တၢ်ပံးဃာ်၀ဲတစိၢ်တလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ တဂီၤအံၤဂီၤခီအဆၢကတီၢ် လၢမၠၣ်၀တံၣ် နီၣ်ဂံၢ်(၁)တိၤန့ၣ် ခီဖျိလၢလံာ်ခီကီၢ်(တနွံ)ဂီၢ်သ့ၣ်တဖၣ်အံၤလၢၤ အဃိဘၣ်တၢ်ကးတံၢ်ကွံာ်တိၤအံၤတစိၢ်တလီၢ်အဂ့ၢ်န့ၣ် မၠၣ်၀တံၣ်ကမျၢၢ်လၢအဟဲဃ့ၢ်ထီၣ်အိၣ်ဘူးဖဲန့ၣ်တဂၤ စံး၀ဲန့ၣ်လီၤႉ အ၀ဲစံး၀ဲလၢ“လၢပယီၤကီၢ်တခီန့ၣ်ၦၤတဲလၢလံာ်လါလါဖၣ်န့ၣ်တအိၣ်လၢၤဘၣ်ႉပယီၤအပၢၤကီၢ်တဖၣ်န့ၣ်အိၣ်ဒၣ်ဟးမၤသဘံၣ်သဘုၣ်တၢ်ဒ်န့ၣ်လီၤလံာ်လါတအိၣ်ဘၣ်ကသ့ဧါႉပဟဲထီၣ်ဖဲမဟါန့ၣ်အိၣ်ဒၣ်ပယီၤအပၢၤကီၢ်တဖၣ်န့ၣ်လီၤႉ ခဲအံၤတအိးထီၣ်ဒံးဘၣ်ႉၦၤဘၣ်တနီၤနီၤတဲ၀ဲဒၣ်လၢကခိးကွၢ်၀ဲလၢမုၢ်ထူၣ်အံၤမီၤနီၤႉမ့မ့ၢ်ၦၤဟဲထီၣ်အိၣ်လၢမဲၢ်ဆီးတကပၤခီန့ၣ်က့ၤလီၤန့ၢ်၊လၢၦၤဟဲ၀ၣ်လီၤခီတန့ၢ်လၢၤဘၣ်ႉမ့ၢ်လိၣ်လၢၦၤစံၣ်ထီၣ်အါထီၣ်တလၢခီဧါဒုတသ့ၣ်ညါဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ စးထီၣ်ဖဲလါအ့ဖြ့ၣ် ၁၉ သီ ဟါခီအဆၢကတီၢ်န့ၣ် ခီဖျိကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် နုာ်လီၤ က၀ီၤခး၀ဲဒၣ်ပယီၤသုး(ခလရ-၂၇၅)သုးရ့ၣ်လၢအလဲၤစံၣ်ဖဲမၠၣ်၀တံၣ် နီၣ်ဂံၢ်(၂)တိၤအံၤဒီး တၢ်ဒုးအံၤဆဲး ကဲထီၣ်၀ဲဒိၣ် ဒိၣ်မုၢ်မုၢ်တုၤမုၢ်ဆ့ၣ်ထီၣ်တကးဒံးဘၣ်ခီဖျိပယီၤသုးကဘီယူၤဟဲခးလီၤတၢ်ပယူာ်ဃီအဃိၦၤကမျၢၢ်သ့ၣ်တဖၣ် ဃ့ၢ်ထီၣ်၀ဲဆူမဲၢ်ဆီးကီၢ်ဆၢယိၤကီၢ်တကပၤအါအါဂီၢ်ဂီၢ်တုၤလၢခဲအံၤတစုန့ၣ်လီၤႉ တကီၢ်ခါခဲအံၤလၢမၠၣ်၀တံၣ် နီၣ်ဂံၢ်(၂)တိၤန့ၣ်စ့ၢ်ကီးပယီၤသုးကဘီယူၤဟဲခးလီၤတၢ်ဒံးဒီးတကးဒံးဘၣ် မ့ၢ်လၢတၢ်ပံးဃာ်၀ဲဒၣ်မၠၣ်၀တံၣ် နီၣ်ဂံၢ်(၁)တိၤတစိၢ်တလီၢ်အဃိ ၦၤကမျၢၢ်လၢကဟဲစံၣ်ထီၣ်လၢမဲၢ်ဆီးတဖၣ် အိၣ်ကတာ်ထီသးလၢတိၤကီၢ်ပယီၤတပၤအါအါဂီၢ်ဂီၢ်န့ၣ်လီၤႉ ဘၣ်ဃးတၢ်ပံးဃာ်၀ဲဒၣ်မၠၣ်၀တံၣ် နီၣ်ဂံၢ်(၁)တိၤလၢကီၢ်ပယီၤတကပၤတစိၢ်တလီၢ်အံၤန့ၣ် ၦၤကမျၢၢ်တဖၣ် စံး၀ဲလၢ လံာ်ခီကီၢ်(တနွံ)ဂီၢ်တအိၣ်လၢၤဘၣ်ဘၣ်ဆၣ် တၢ်ပံးဃာ်အီၤလၢတၢ်ဂ့ၢ်အဂၤမနုၤအိၣ်ဒံးလဲၣ်န့ၣ် ပခ့ၣ်အဲးစံၣ်-ကညီတၢ်ကစီၣ် ပာ်ဂၢၢ်ပာ်ကျၢၤ၀ဲလီၤလီၤဆီဆီတန့ၢ်ဒံးဘၣ်န့ၣ်လီၤႉ ဒ်န့ၣ်အသိးစှၤသီအတီၢ်ပူၤအံၤမၠၣ်၀တံၣ်တၢ်အိၣ်သးနးထီၣ်ကွ့ၢ်ကွ့ၢ်အဃိ စးထီၣ်ဖဲမါဟါလါအ့ဖြ့ၣ် ၂၀ သီအနံၤန့ၣ် ကၠီၣ်တဲၣ်ထံဖိကီၢ်ဖိလၢအလဲၤမၤတၢ်လၢမၠၣ်တ၀ံၣ် (ကၣ်စံၣ်နိၣ်)လီၢ်သ့ၣ်တဖၣ်စ့ၢ်ကီး ဘျံးခိၣ်ဟဲက့ၤထီၣ်ကဒါလၢ မဲၢ်ဆီးတကပၤအိၣ်၀ဲအဂ့ၢ်န့ၣ် မၠၣ်၀တံၣ်ကမျၢၢ် တဖၣ်စံး၀ဲန့ၣ်လီၤႉ
မၠၣ်၀တံၣ် နီၣ်ဂံၢ်(၂)တိၤတၢ်ဒုးအကတီၢ် ကျိဖိအချံလီၤတဲာ်လၢယိၤကီၢ်ပူၤအိၣ်တနီၤအဂ့ၢ် မဲၢ်ဆီးတၢ်ကစီၣ်စံး၀ဲ
လါအ့ဖြ့ၣ် ၂၀ သီႇ ၂၀၂၄ နံၣ်ႇ ခ့ၣ်အဲးစံၣ် ဖဲတနံၤအံၤလါအ့ဖြ့ၣ် ၂၀ သီ ဂီၤခီအဆၢကတီၢ်န့ၣ် ပယီၤသုး(ခလရ-၂၇၅)သုးရ့ၣ်လၢအလဲၤစံၣ်အိၣ်ဖဲမၠၣ်၀တံၣ် နီၣ်ဂံၢ်(၂)တိၤသ့ၣ်တဖၣ်အံၤ တၢ်ပၢၢ်ဆၢသုးပာ်ဖှိၣ်နုာ်လီၤခး၀ဲဒီး ဖဲတၢ်ဒုးကဲထီၣ်လၢခံခီခံကပၤအဆၢကတီၢ်န့ၣ် ကျိဖိအချံလီၤတဲာ်ဃီၤ၀ဲဒၣ်လၢယိၤကီၢ် က၀ီၤဒ့ပူၤအိၣ်၀ဲတနီၤအဂ့ၢ်န့ၣ် (Mae Sot Media)တၢ်ကစီၣ်ပာ်ဖျါ၀ဲအသိး သ့ၣ်ညါဘၣ် န့ၣ်လီၤႉ ဒ်(Mae Sot Media)တၢ်ကစီၣ်ပာ်ဖျါ၀ဲအသိးန့ၣ် တဂီၤအံၤဖဲတၢ်ဒုးကဲထီၣ်လၢမၠၣ်၀တံၢ် နီၣ်ဂံၢ်(၂)တိၤ လၢပယီၤသုးဒီး တၢ်ပၢၢ်ဆၢသုးပာ်ဖှိၣ်အဆၢကတီၢ်န့ၣ် ကျိဖိအချံလီၤတဲာ်၀ဲဒၣ်ထံ၀ၢ်ခီယိၤကီၢ် မဲၢ်ဆီး ထၣ်စၤလူၣ်၀ၢၣ် က၀ီၤဒ့(၇) ၦၤဟံၣ်တဖျၢၣ်အပဲတြီပူၤအဂ့ၢ်န့ၣ် စံး၀ဲန့ၣ်လီၤႉ လၢတၢ်န့ၣ်အဃိတကီၢ်ခါခဲအံၤခီဖျိတၢ်ဒုးဆူၣ်ထီၣ်လၢမၠၣ်၀တံၣ် နီၣ်ဂံၢ်(၂)တိၤ ပယီၤသုးကဘီယူၤစ့ၢ်ကီးဟဲခးလီၤ တၢ်တပယူာ်ဃီဒီးကျိဖိအချံစ့ၢ်ကီးလီၤတဲာ်လၢယိၤကီၢ်တကပၤအိၣ်ထီၣ်အဃိ ကၠီၣ်တဲၣ်သုးသ့ၣ်တဖၣ် ဆီလီၤအါထီၣ်၀ဲတၢ်ဘံၣ်တၢ်ဘၢဃံးဃီၣ်ဒီၣ်လၢမၠၣ်၀တံၣ်-မဲၢ်ဆီးကီၢ်ဆၢဒီတကျိၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးခီဖျိတၢ်ဒုးဆူၣ်ထီၣ်လၢမၠၣ်၀တံၣ် နီၣ်ဂံၢ်(၂)တိၤအဃိ ၦၤကမျၢၢ်ဃ့ၢ်ထီၣ်၀ဲဒၣ်လၢယိၤကီၢ်တကပၤ အါအါဂီၢ်ဂီၢ်ဒီး ဒ်န့ၣ်အသိးတကီၢ်ခါခဲအံၤလၢၦၤဟဲဃ့ၢ်ထီၣ်တဖၣ်အံၤအကျါၦၤအဂၤ(၂၀၀)ဘျဲၣ်န့ၣ် ကၠီၣ်တဲၣ်ၦၤဘၣ်မူ ဘၣ်ဒါသုးကျဲၤဆီလီၤန့ၢ်၀ဲအလီၢ်လၢ(၀ါစက့)ကျီၢ်ကရၢအဂ့ၢ်န့ၣ် မဲၢ်ဆီးတၢ်ကစီၣ်ပာ်ဖျါ ၀ဲန့ၣ်လီၤႉ တကးဒံးဘၣ်လၢန့ၣ်အမဲာ်ညါခီဖျိလၢပယီၤသုးကဘီယူၤဟဲခးလီၤတၢ်တပယူာ်ဃီအဃိ ခဲအံၤၦၤကမျၢၢ်လဲၤစံၣ်ထီၣ် ၀ဲဒၣ်လၢနီၣ်ဂံၢ်(၁)တိၤအိၣ်၀ဲဒၣ်အါမးဒီးဒ်န့ၣ်အသိးၦၤကမျၢၢ်လၢအိၣ်တ့ၢ်လၢ၀့ၢ်ပူၤသ့ၣ်တဖၣ်စ့ၢ်ကီးပာ်ထီၣ်ဃာ် အတၢ်ဘိၣ်တၢ်စၢၤလၢသိလ့ၣ်ပူၤအိၣ်၀ဲအဂ့ၢ်န့ၣ် မၠၣ်၀တံၣ်ကမျၢၢ်တဂၤ စံး၀ဲန့ၣ်လီၤႉ “ကဘီယူၤဟဲခးလီၤတၢ်ဘူးဘူးဖိလီၤ၊ပအိၣ်ဘူၣ်လၢၤ၀ဲလဲၣ်ပစံၣ်၀ဲန့ၣ်ႉဟးခးတၢ်၀း၀းလီၤႉဖဲမုကၢၤယလဲၤလၢ တိၤခိၣ်ထိးန့ၣ်ၦၤလဲၤအါထီၣ်ဘျီသိလ့ၣ်ကတံာ်ကတူးပးလီၤႉတဟါညါအံၤနါက့ယကဘၣ်မၤလၢယိၤကီၢ်တကပၤစ့ၢ်လီၤႉတၢ်မၢၤလၢသိလ့ၣ်ပူၤန့ၣ်ၦၤတီၣ်ထီၣ်ဃာ်ၦၤတၢ်ဘိၣ်အိၣ်ပာ်ကိးဂၤဒဲးလီၤႉခးလီၤတၢ်တခါအံၤလီၤပျံၤညါ၊ခးလီၤအဒိၣ်ဖဲန့ၣ်အဆံးဖဲန့ၣ်ႉၦၤမၤတၢ်ပၢၢ်ဆၢဖိလၢအိၣ်ဖဲယဟံၣ်ကပၤတဖၣ်အံၤသုးအလီၢ်ဒံးဘျီဒု၀ဲဒၣ်နါက့ပဘၣ်သုးလီၢ်စ့ၢ်လီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ပယီၤသုး(ခလရ-၂၇၅)သုးရ့ၣ်လၢအလဲၤစံၣ်အိၣ်ဖဲမၠၣ်၀တံၣ် နီၣ်ဂံၢ်(၂)တိၤသ့ၣ်တဖၣ်အံၤ စးထီၣ်ဖဲမဟါလါအ့ဖြ့ၣ် ၁၉ သီ...
(KNLA)သုးပာ်ဖှိၣ်ထီၣ်မၤန့ၢ်ကဒီး၀ဲမၠၣ်၀တံၣ် နီၣ်ဂံၢ်(၂)တိၤလၢပယီၤသုးလဲၤစံၣ်အိၣ်၀ဲအံၤ
လါအ့ဖြ့ၣ် ၂၀ သီႇ ၂၀၂၄ နံၣ်ႇ ခ့ၣ်အဲးစံၣ် ပယီၤသုးခီၣ်သုးရ့ၣ်(ခလရ-၂၇၅)လၢအလဲၤစံၣ်အိၣ်ဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢ မၠၣ်၀တံၣ် နီၣ်ဂံၢ်(၂)တိၤ သ့ၣ်တဖၣ်အံၤ ဖဲတနံၤအံၤလါအ့ဖြ့ၣ် ၂၀ သီ ဂီၤခီအဆၢကတီၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးပာ်ဖှိၣ် ထီၣ်မၤန့ၢ်၀ဲလံအဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိ စံး၀ဲန့ၣ်လီၤႉ အ၀ဲစံး၀ဲလၢ“ယသံကွၢ်တၢ်ပၢၢ်ဆၢသုးကရူၢ်သုးဖိတဖၣ်န့ၣ်အတဲယၤလၢအ၀ဲသ့ၣ်ထီၣ်နီၣ်ဂံၢ်(၂)တိၤန့ၢ်လံႉ မ့မ့ၢ်လၢခးဒြိဒုသီတနၤကျၢၤလီၤႉတၢ်မၢၤဖဲဂီၤခီ ၄ နၣ်ရံၣ်ဘျဲၣ်န့ၣ်အစးထီၣ်သီၣ်အါထီၣ်က့ၤတစဲးႉ တၢ်မၢၤဒ်ပကဲ ၦၤကမျၢၢ်အသိးန့ၣ်ပဘၣ်ကိၢ်က့ၤလၢကဘီယူၤကဟဲက့ၤခးလီၤကဒါတၢ်ႉ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ ဖဲမဟါလါအ့ဖြ့ၣ် ၁၉ သီ ဟါခီအဆၢကတီၢ်န့ၣ် (KNLA)သုးပာ်ဖှိၣ်က၀ီၤဃာ်၀ဲဒၣ်မၠၣ်၀တံၣ် နီၣ်ဂံၢ်(၂)တိၤ တ့ၢ်လီၤ၀ဲဒၣ် ဒြိမ့ၣ်ပိၢ်ဒီး ဒ်န့ၣ်အသိးကျိဖးဒိၣ်,ဒြိသီၣ်၀ဲဒၣ်တုၤလၢတဂီၤညါအံၤသီၣ်ဟူတုၤဃီၤ၀ဲဒၣ်လၢယိၤကီၢ်တကပၤညါ အဂ့ၢ်န့ၣ် သ့ၣ်ညါဘၣ်န့ၣ်လီၤႉ ပယီၤသုးလၢအလဲၤစံၣ်အိၣ်ဖဲမၠၣ်၀တံၣ် နီၣ်ဂံၢ်(၂)တိၤသ့ၣ်တဖၣ်အံၤ ခီဖျိအ၀ဲသ့ၣ်တဟ့ၣ်အဃၣ်တပာ်လီၤစုက၀ဲၤ ဘၣ်အိၣ်ခိး၀ဲဒၣ်(စစ်ကူ)အဃိ စးထီၣ်ဖဲမဟါန့ၣ်(KNLA)သုးပာ်ဖှိၣ်ဘၣ်နုာ်လီၤခးအ၀ဲသ့ၣ်ဒ်အံၤလီၤအဂ့ၢ်န့ၣ် ပျီပူၤၦၤဟ့ၣ်တၢ်ကစီၣ်ဖိတဖၣ် စံး၀ဲန့ၣ်လီၤႉ တကီၢ်ခါခဲအံၤခီဖျိတၢ်ဒုးကဲထီၣ်လၢမၠၣ်၀တံၣ် နီၣ်ဂံၢ်(၂)တိၤအဃိ ၦၤကမျၢၢ်လၢအိၣ်၀့ၢ်ပူၤတဖၣ်တနီၤန့ၣ် လဲၤစံၣ်ထီၣ်လၢယိၤကီၢ်တကပၤအိၣ်၀ဲအဂ့ၢ်န့ၣ် မၠၣ်၀တံၣ်ကမျၢၢ်တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ “ၦၤစံၣ်ထီၣ်ဒီဒူၣ်လၢနီၣ်ဂံၢ်(၁)တိၤတကပၤန့ၣ်ႉၦၤသုးဖိမၢအသုးလီၢ်ဘၣ်ယိၣ်၀ဲလၢကဘီယူၤကဟဲခးလီၤတၢ်မီၤနီၤႉ ၦၤလၢအဒံၣ်အဖိအိၣ်ပာ်လၢယိၤကီၢ်တကပၤန့ၣ်တစံၣ်ဘၣ်အ၀ဲသ့ၣ်န့ၣ်ႉတၢ်မၢၤတဂီၤညါအံၤၦၤလဲၤစံၣ်လၢတိၤခိၣ်ထိး တကပၤန့ၣ်အါလၢၦၤသူၣ်က့သးၦၢ်ၦၤဖိဒံဖိသၣ်လီၤႉဒ်ၦၤသုးဖိတဂၤတဲ၀ဲဒၣ်အသိးန့ၣ်ပယီၤသုးအံၤခးၦၤတနၢၤလၢၤဘၣ်ႉအိၣ်ဒၣ်အ၀ဲသ့ၣ်န့ၣ်ကဟဲက့ၤမၤတၢ်ဒီးကဘီယူၤအိၣ်ဒၣ်တၢ်တထံၣ်န့ၣ်လီၤႉမ့မ့ၢ်ၦၤမၠၣ်၀တံၣ်ကမျၢၢ်ဒုခဲအံၤၦၤမံၦၤအိၣ်ဒီးတၢ်ကိၢ်တၢ်ဂီၤကိးဂၤဒဲးလီၤႉနဘၣ်အိၣ်လၢတၢ်သူၣ်ကိၢ်သးဂီၤလဲလဲဘျီနသးဖှီၣ်လၢၤ”အဂ့ၢ်န့ၣ် စံး၀ဲန့ၣ်လီၤႉ တကီၢ်ခါခဲအံၤလၢမၠၣ်၀တံၣ်၀့ၢ်ပူၤန့ၣ် တၢ်ပၢၢ်ဆၢဖီၣ်စုက၀ဲၤကရူၢ်ကရၢသုးပာ်ဖှိၣ်နုာ်လီၤအိၣ်ခိးတၢ်ဟံးန့ၢ် တၢ်ဘံၣ်တၢ်ဘၢ၀း၀းတရံးဒီးလၢန့ၣ်အမဲာ်ညါတၢ်အိၣ်သးမ့ဆဲးလဲၤသးဒ်အံၤန့ၣ်ခါဆူညါတၢ်ဒုးကဆဲးဆူၣ်ထီၣ်၀ဲဒၣ် သ့ အဂ့ၢ်န့ၣ် မၠၣ်၀တံၣ်ကမျၢၢ်တဖၣ် စံး၀ဲန့ၣ်လီၤႉ ပယီၤသုး(ခလရ-၂၇၅)သုးရ့ၣ်အၦၤလၢအလဲၤစံၣ်အိၣ်ဖဲမၠၣ်၀တံၣ်...
တၢ်လဲၤတ့ၢ်လီၤဒြိမ့ၣ်ပိၢ်လၢသ့ၣ်ဘီဘိဒီးလ့ဂီၤပယီၤသုးကလၢၤတပယူာ်ဃီႇ ကမျၢၢ်ပျံၤတၢ်လဲၤစံၣ်အိၣ်လၢသူမှဲကျိကပၤ
လါအ့ဖြ့ၣ် ၁၉ သီႇ ၂၀၂၄ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ဒူပျာ်ယာ်ကီၢ်ရ့ၣ် မၠၣ်၀တံၣ်ကလံၤထံး ဂီၤလ့ၤဟီၣ်က၀ီၤအပူၤန့ၣ် စှၤသီအတီၢ်ပူၤအံၤ တၢ်ပၢၢ်ဆၢသုးပာ်ဖှိၣ်ကရူၢ်လဲၤခး၀ဲစနဲးဖၢးႇလဲၤတ့ၢ်လီၤ၀ဲဒြိမ့ၣ်ပိၢ်လၢပယီၤသုးကလၢၤတၢ်လီၢ်သ့ၣ်တဖၣ် တပယူာ်ဃီဒီးကမျၢၢ်တဖၣ်ပျံၤတၢ်လဲၤစံၣ်အိၣ်လၢသူမှဲကျိကၢၢ်နံၤအိၣ်၀ဲအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါ စံး၀ဲန့ၣ်လီၤႉ ဖဲတနံၤအံၤလါအ့ဖြ့ၣ် ၁၉ သီ ဂီၤခီအဆၢကတီၢ်န့ၣ် တၢ်ပၢၢ်ဆၢသုးပာ်ဖှိၣ်လဲၤခး၀ဲစနဲးဖၢးႇလဲၤတ့ၢ်လီၤ၀ဲဒြိမ့ၣ်ပိၢ် လၢသ့ၣ်ဘီဘိသုးကလၢၤဒီးလ့ဂီၤပယီၤသုးကလၢၤတၢ်လီၢ်သ့ၣ်တဖၣ်အိၣ်၀ဲကိးမုၢ်နံၤဒဲးအဃိ ၦၤကမျၢၢ်တဖၣ်လဲၤ စံၣ်အိၣ်သုးအလီၢ်လၢထံကျိကၢၢ်နံၤအဂ့ၢ်န့ၣ် သ့ၣ်ဘီဘိကရူၢ်ခိၣ် လၢအမ့ၢ်စ့ၢ်ကီး(DKBA)ၦၤဘၣ်မူဘၣ်ဒါ စီၤထီပျိၢ် စံး၀ဲန့ၣ်လီၤႉ အ၀ဲစံး၀ဲလၢ“အလဲၤတၢၤလီၤ၀ဲဒၣ်လၢသ့ၣ်ဘီဘိဒီးလ့ဂီၤသုးကလၢၤႉဖဲဂီၤခီတချုးတုၤ ၈ နၣ်ရံၣ်ဘၣ်န့ၣ် လၢသ့ၣ်ဘီဘိသုးကလၢၤန့ၣ်လဲၤတ့ၢ်လီၤ၀ဲဒြိမ့ၣ်ပိၢ်(၂)ဖျၢၣ်ႉမၤကဒီးဖဲ(၉)နၣ်ရံၣ်ဘျဲၣ်န့ၣ် လဲၤတ့ၢ်လီၤ၀ဲလၢလ့ဂီၤ သုးကလၢၤန့ၣ်ကအိၣ်လၢအဖျၢၣ်(၁၀)ဘျဲၣ်ညါႉအဟဲကၠုး၀ဲကိးမုၢ်နံၤကိးမုၢ်ဂီၤလီၤႉတၢ်အိၣ်သးမ့တဂ့ၤဘၣ်န့ၣ် ၦၤကမျၢၢ်န့ၣ်လဲၤသုးသးလၢထံကျိနံၤလီၤႉတၢ်အိၣ်သးမ့ဂ့ၤခီဒၢးက့ၤထီၣ်၀ဲဒၣ်လၢဟံၣ်န့ၣ်ႉတၢ်မ့ သီမ့သဲန့ၣ်ဟဲက့ၤ အိၣ်ဖှိၣ်က့ၤထီၣ်စံၣ်အိၣ်လၢထံကျိနံၤန့ၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤႉ စးထီၣ်ဖဲတလါအံၤလါအ့ဖြ့ၣ် ၁၅ သီအနံၤန့ၣ် ပယီၤသုးကလၢၤသ့ၣ်တဖၣ်အံၤ တၢ်ပၢၢ်ဆၢသုးပာ်ဖှိၣ် ကရူၢ် လဲၤတ့ၢ်လီၤ၀ဲဒြိမ့ၣ်ပိၢ်တပယူာ်ဃီတုၤလၢခဲအံၤကိးမုၢ်နံၤဒဲးဃၣ်ဃၣ်ဒီးဘၣ်ဆၣ် မ့မ့ၢ်လၢပယီၤသုးတကပၤ ခီန့ၣ်က့ၤခးလီၤကဒါကျိဖးဒိၣ်တအိၣ်ဒံးဘၣ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ ခီဖျိတၢ်ပၢၢ်ဆၢသုးပာ်ဖှိၣ်လဲၤခး၀ဲသ့ၣ်ဘီဘိပယီၤသုးကလၢၤတၢ်လီၢ်သ့ၣ်တဖၣ်အံၤလၢဒြိႇစနဲးဖၢးတလီၢ်တလီၢ် အဃိသ့ၣ်ဘီဘိသ၀ီဖိဃုာ်ဒီးယသ့ၣ်ကူၤႇမဲၢ်ကနဲသ၀ီဖိလၢအဟဲစံၣ်အိၣ်ဖဲန့ၣ်သ့ၣ်တဖၣ်အိၣ်ဒီးတၢ်ပျံၤတၢ်ဖုးတကး ဒံးဘၣ်ပယီၤသုးတၢ်လီၢ်လၢတၢ်ဟဲတ့ၢ်လီၤဒြိမ့ၣ်ပိၢ်အံၤအဘၢၣ်စၢၤအိၣ်ယံၤ၀ဲဒီးသ၀ီဖးယံၤညါအဂ့ၢ်န့ၣ် သ့ၣ်ဘီဘိ သ၀ီသးၦၢ် စီၤလါဒိၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“ၦၤသ၀ီဖိန့ၣ်လဲၤစံၣ်အိၣ်လၢသူမှံၤကၢၢ်နံၤဒုဖးယံၤလံႉတၢ်ၦၤစးထီၣ်ခးဒြိန့ၢ်သၢသီလွံၢ်သီလံႉ တဂီၤညါအံၤဒုအဖျၢၣ်အါတစဲးႉတၢ်ကခးတၢ်န့ၣ်ဘၣ်ကွၢ်ထံကွၢ်ဆးတၢ်စ့ၢ်မီၤႉခးဒုၣ်ဒါန့ၣ်ကဘၣ်ဃုသ့ၣ်ညါ၀ံၤမးခး မီၤနီၤႉတၢ်မၢၤခီခးတဂ့ၤဒုပတတဲစ့ၢ်ဘၣ်ႉအ၀ဲသ့ၣ်တၢ်မၤအိၣ်ဒုဘၣ်မၤ၀ဲသနါက့ဘၣ်ကွၢ်ဘၣ်ဃုသ့ၣ်ညါစ့ၢ်မီၤနီၤႉ သ၀ီပူၤန့ၣ်ၦၤအိၣ်ႉပယီၤသုးအိၣ်ဧါတအိၣ်ဧါဃုသ့ၣ်ညါ၀ံၤမးမၤမီၤနီၤႉမၤဒ်အံၤခီန့ၣ်ဘၣ်ဒိ၀ဲဒၣ်ဒူဖိသ၀ီအဟံၣ်အဃီန့ၣ်ႉသ၀ီပူၤဒီးသုးကလၢၤန့ၣ်အိၣ်တၢ်လီၢ်န့ၣ်အဘၢၣ်စၢၤအိၣ်ဖးယံၤညါ”အဂ့ၢ်န့ၣ် စံး၀ဲန့ၣ်လီၤႉ သ့ၣ်ဘီဘိသ၀ီဖိဃုာ်ဒီးၦၤလီၢ်အိၣ်ကဒုဖိလၢအဟဲအိၣ်ဖဲန့ၣ်သ့ၣ်တဖၣ်အံၤမ့ဟဲကဲထီၣ်သးလၢတၢ်အိၣ်သးမ့တဂ့ၤဘၣ် န့ၣ်ညီနုၢ်အ၀ဲသ့ၣ်လဲၤအိၣ်သုးလီၢ်လၢသူမှဲကျိကပၤဒီးဒ်န့ၣ်အသိးသ့ၣ်ဘီဘိသ၀ီဖိဃုာ်ဒီးမဲၢ်ကနဲႇယသ့ၣ်ကူၤ သ၀ီဖိ လၢအဟဲစံၣ်အိၣ်ဖဲသ၀ီပူၤသ့ၣ်တဖၣ်အံၤမ့ပာ်ဖှိၣ်ခဲလၢာ်န့ၣ်ၦၤနီၣ်ဂံၢ်အိၣ်၀ဲ(၇၀၀)ဘျဲၣ်အဂ့ၢ်န့ၣ် သ၀ီၦၤဘၣ်မူဘၣ်ဒါ စံး၀ဲအသိးသ့ၣ်ညါဘၣ်န့ၣ်လီၤႉ...
သုးကီၣ်ကးပျၢ်ကွံာ်၀ဲၦၤဃိာ်ဖိအဂၤ(၃၀၀၀)အကျါထံရူၢ်ကီၢ်သဲးၦၤဃိာ်ဖိပၣ်၀ဲထဲ(၁၀၁)ဂၤ
လါအ့ဖြ့ၣ် ၁၉သီႇ ၂၀၂၄နံၣ်ႇ ခ့ၣ်အဲးစံၣ်ႇ အပူၤကွံာ်လါအ့ဖြ့ၣ်(၁၇)သီကီၢ်ပယီၤနံၣ်ထီၣ်သီလါထီၣ်(၁)သီအနံၤႇတၢ်ပျၢ်ကွံာ်၀ဲကီၢ်ပယီၤဒီတဘ့ၣ်ဃိာ်ကိးဖျၢၣ်ဒဲးအပူၤၦၤဃိာ်ဖိအဂၤ(၃၃၀၃)ဂၤအကျါထံရုၢ်ကီၢ်သဲးၦၤဃိာ်ဖိပၣ်ဃုာ်၀ဲထဲ(၁၀၁)ဂၤအဂ့ၢ်သ့ၣ်ညါဘၣ်ဒ်ကီၢ်ပယီၤၦၤဘၣ်ထွဲဘၣ်ဃးထံရုၢ်ကီၢ်သဲးဂ့ၢ်၀ီၦၤဃိာ်ဖိၦာ်ဘျးစဲ PPNM(Political Prisoner Network Myanmar ထုးထီၣ်ပာ်ဖျါ၀ဲအသိးန့ၣ်လီၤႉ အပူၤကွံာ်လါအ့ဖြ့ၣ်(၁၇)သီအပူၤထံရုၢ်ကီၢ်သဲးၦၤဃိာ်ဖိလၢအထူၣ်ဖျဲးထီၣ်ကွံာ်တဖၣ်အံၤႇမ့ၢ်၀ဲမိၢ်ကီၢ်စဲၣ်ကၠဲးမယီကီၢ်ဆၣ်ဃိာ်ပူၤထံရုၢ်ကီၢ်သဲးၦၤဃိာ်ဖိ(၃)ဂၤႇတနီသရံၣ်ကီၢ်ခီဒိၣ်(ဘျံး)ဒ၀ဲၢ်ဃိာ်ပူၤၦၤမၤထံရုၢ်ကီၢ်သဲးၦၤဃိာ်ဖိ(၂)ဒီးႇကီၢ်ဆၣ်-ကီၢ်ခီဒိၣ်လၢအဂၤထံရုၢ်ကီၢ်သဲးၦၤဃိာ်ဖိပိာ်ခွါပာ်ဖှိၣ်ခဲလၢာ်(၅၃)ဂၤႇပိာ်မုၣ်(၂၅)ဂၤဃုာ်ဒီးၦၤဃိာ်ဖိလၢတၢ်ထၢမုၣ်ခွါစရီအဖၢမုၣ်(၁၈)ဂၤသ့ၣ်တဖၣ်အဂ့ၢ် PPNM ပာ်ဖျါ၀ဲလၢအတၢ်မၤနီၣ်စရီအပူၤန့ၣ်လီၤႉ ဒ်ထံကီၢ်ဒီတဘ့ၣ်ပတီၢ်ၦၤဃိာ်ဖိအနီၢ်ဂံၢ်တၢ်ထိၣ်တၢ်ဒွးအိၣ်၀ဲအဖီခိၣ်ႇသုးကီၣ်ကးအတၢ်ပျၢ်လီၤကွံာ်၀ဲၦၤဃိာ်ဖိစရီအတၢ်မၤနီၣ်မၤဃါအံၤႇအိၣ်ဒၣ်ထဲ(၄)မျးကယၤအဃိ PPNM တကပၤကဂုၢ်ကျဲးစၢးထၢ၀ဲစရီဒ်သိးကဒိးန့ၢ်ဘၣ်တၢ်မၤနီၣ်မၤဃါလၢအလီၤတံၢ်လီၤဆဲးအဂီၢ်အိၣ်၀ဲအဂ့ၢ်ကရူၢ်ၦၤတီခိၣ်မဲတၢ်ကမံတံာ်ကိၤသဲးထိအူစံး၀ဲဒ်အံၤန့ၣ်လီၤႉ အ၀ဲစံး၀ဲလၢ “အခဲအံၤဒ်ပဒိးန့ၢ်ဘၣ်စရီအသိးန့ၣ်ထံရုၢ်ကီၢ်သဲးၦၤဃိာ်ဖိလၢအထူၣ်ဖျဲးထီၣ်တဖၣ်န့ၣ်ကအိၣ်၀ဲအဂၤ(၁၀၀)ဘျဲၣ်လံဘၣ်ဆၣ်ပမ့ကွၢ်လၢအမျးကယၤန့ၣ်တၦဲၤ(၄)မျးကယၤဒံးဘၣ်တၢ်လီၢ်လၢပဖီၣ်တတုၤဒံးဘၣ်တဖၣ်န့ၣ်အကျါန့ၣ်ဘၣ်သ့ၣ်သ့ၣ်ဒုကအိၣ်၀ဲစ့ၢ်ကီးလီၤႉအစှၤကတၢၢ်(၄)မျးကယၤန့ၣ်ၦၤနီၢ်ဂံၢ်ကဘၣ်အိၣ်၀ဲ(၁၅၀)ညါမီၤႉပမ့ထၢနုာ်ဃုာ်တၢ်လီၢ်လၢပဖီၣ်တတုၤဘၣ်တဖၣ်သ့ၣ်တဖၣ်နာ်က့(၄)မျးကယၤတထီၣ်ဘးဘၣ်န့ၣ်ပတဲသ့၀ဲလီၤအဂ့ၢ်ဒဒစံးဘၣ်ခ့ၣ်အဲးစံၣ်တၢ်ကစီၣ်န့ၣ်လီၤႉ လၢန့ၣ်အမဲာ်ညါတၢ်ထၢဖှိၣ်၀ဲထံရူၢ်ကီၢ်သဲးၦၤဃိာ်ဖိလၢအပူၤဖျဲးထီၣ်တဖၣ်စရီအံၤကလီၤတံၢ်လီၤဆဲးအဂီၢ်ကီခဲ၀ဲခီဖျိလၢသုးကီၣ်ကးအံၤတပာ်ဖျါ၀ဲၦၤဃိာ်ဖိလၢထူၣ်ဖျဲးထီၣ်တဖၣ်ဒီးထံရုၢ်ကီၢ်သဲးၦၤဃိာ်ဖိလၢအထူၣ်ဖျဲးတဖၣ်အစရီဖျိဖျိဖျါဖျါဘၣ်အဃိဒီးဘၣ်သံကွၢ်သံဒိး၀ဲလၢၦၤလၢအဘူးဒီးထံရုၢ်ကီၢ်သဲးၦၤဃိာ်ဖိလၢအထူၣ်ဖျဲးထီၣ်တဖၣ်လီၤအဂ့ၢ်PPNM စံး၀ဲန့ၣ်လီၤႉ တကးဒံးဘၣ်ႇၦၤထူၣ်ဖျဲးထီၣ်(၁၀၁)ဂၤ၀ံၤအလီၢ်ခံဖဲလါအ့ဖြ့ၣ်(၁၇)သီအနံၤဟါခီန့ၣ်သုးကီၣ်ကးအံၤက့ၤဖီၣ်ကဒါက့ၤ၀ဲမၠ့ၣ်ကၠံနါဃိာ်ပူၤကခၠ့ၣ်ဘျၢထံခရံာ်ဖိတၢ်အိၣ်ဖှိၣ်ကရၢခိၣ်(KBC))အၦၤဟ့ၣ်ကူၣ်တၢ်အိၣ်ဖှိၣ်သရၣ်တဂၤဒံးအဂ့ၢ်သ့ၣ်ညါဘၣ်ဒ် PPNMပာ်ဖျါ၀ဲအသိးန့ၣ်လီၤႉ သုးကီၣ်ကးဟံန့ၢ်တၢ်စိကမီၤ၀ံၤအလီၢ်ခံႇမုၢ်နံၤဒိၣ်မုၢ်နံၤထီတဖၣ်အပူၤပျၢ်လီၤကွံာ်၀ဲထံကီၢ်ဒီတဘ့ၣ်ပတီၢ်ဃိာ်ကိးဖျၢၣ်ဒဲးအပူၤၦၤဃိာ်ဖိသ့ၣ်တဖၣ်အိၣ်၀ဲဒီးဖဲအပူၤကွံာ်လါယနူၤအါရံၤ(၄)သီတၢ်သဘျ့မုၢ်နံၤန့ၣ်ႇပျၢ်ကွံာ်၀ဲၦၤဃိာ်ဖိ(၉၀၀၀)ဂၤဒီးၦၤတဖၣ်အံၤအကျါကညီကီၢ်စဲၣ်အပူၤၦၤဃိာ်ဖိအဂၤ(၂၀၀)ပၣ်ဃုာ်၀ဲအသိးထံရုၢ်ကီၢ်သဲးၦၤဃိာ်ဖိ(၇)ဂၤထူၣ်ဖျဲးထီၣ်ကွံာ်စ့ၢ်ကီး၀ဲဒၣ်န့ၣ်လီၤႉ ဒ်န့ၣ်အသိးႇစးထီၣ်လၢ(၂၀၂၁)နံၣ်တုၤလၢအဆၢကတီၢ်ခဲအံၤသုးကီၣ်ကးဖီၣ်၀ဲၦၤဟူးဂဲၤလၢထံရုၢ်ကီၢ်သဲးတဖၣ်ခဲလၢာ်ပာ်ဖှိၣ်အိၣ်၀ဲလၢ(၂၆ႇ၅၃၄)ဂၤဒီးၦၤတဖၣ်အံၤအကျါ(၂၀၃၄၂)ဂၤအံၤတၢ်ဖီၣ်ဃာ်အီၤအဖၢမုၢ်အိၣ်၀ဲအသိးအဂၤ(၈၉၃၁)ဂၤဘၣ်တၢ်ဖီၣ်ဒၢနုာ်လၢဃိာ်ပူၤအိၣ်၀ဲအဂ့ၢ်သ့ၣ်ညါဘၣ်ဒ်ၦၤမၤစၢၤထံရုၢ်ကီၢ်သဲးၦၤဃိာ်ဖိကရူၢ် AAPP အတၢ်မၤနီၣ်မၤဃါအသိးန့ၣ်လီၤႉ
ပယီၤသုးကဘီယူၤဟဲခးလီၤတၢ်အဃိ ကီးတရံး၀့ၢ်ဃၢၤ မၠိၣ်ဟီသ၀ီ သီခါဖးဒိၣ်သံဒီး သ၀ီဖိဘၣ်ဒိ(၃)ဂၤ
လါအ့ဖြ့ၣ် ၁၉ သီႇ ၂၀၂၄ နံၣ်ႇ ခ့ၣ်အဲးစံၣ် ဖဲမဟါလါအ့ဖြ့ၣ် ၁၈ သီ မုၢ်ထူၣ်အဆၢကတီၢ်န့ၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ် ကီးနွဲၣ်ကရူၢ်အပူၤ ခီဖျိပယီၤသုးကဘီယူၤဟဲခးလီၤတၢ်လၢ(မၠိၣ်ဟီ)သ၀ီပူၤအဃိ သီခါဖးဒိၣ်သံ၀ဲဒီး ၦၤသ၀ီဖိစ့ၢ်ကီးဘၣ်ဒိ၀ဲဒၣ်(၃)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ စှၤသီအတီၢ်ပူၤအံၤလၢကီးတရံး၀့ၢ်ခိၣ်၀့ၢ်ဃၢၤန့ၣ်တၢ်ဒုးကဲထီၣ်၀ဲဒၣ်လၢပယီၤသုးဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤဒီး ဖဲန့ၣ်ပယီၤသုးကဘီယူၤဟဲခးလီၤတၢ်ကအိၣ်လၢကိးမုၢ်နံၤဒဲးဃၣ်ဃၣ်ဒီးဖဲမဟါဟါခီအဆၢကတီၢ် ခီဖျိကဘီယူၤ ဟဲခးလီၤတၢ်လီၤတဲာ်ပိၢ်ဖးထီၣ်၀ဲလၢ(မၠိၣ်ဟီ)သ၀ီပူၤ ၅ ဖျၢၣ်အဃိ သီခါဖးဒိၣ်ဃုာ်ဒီးၦၤသ၀ီသံဘၣ်ဒိဘၣ်ထံး ကဲထီၣ် အသးဒ်အံၤလီၤအဂ့ၢ်န့ၣ် မၠိၣ်ဟီသ၀ီဖိတဖၣ်စံး၀ဲန့ၣ်လီၤႉ ဘၣ်ဃးကဘီယူၤဟဲခးလီၤတၢ်အံၤသီခါသံဒီးၦၤသ၀ီဖိဘၣ်ဒိဘၣ်ထံးကဲထီၣ်သးအံၤန့ၣ် “ဖဲတနံၤအံၤကဘၣ်ဖဲ ၁၂ နၣ်ရံၣ် ဃၣ်ဃၣ်န့ၣ် ဖဲကီးတရံး ကီးနွဲၣ် မၠိၣ်ဟီသီခါဖၠၣ်ပူၤန့ၣ် အ၀ဲသ့ၣ်ဟဲခးလီၤ၀ဲဒီးကဘီယူၤန့ၣ်ႉ မ့မ့ၢ်လၢသ၀ီတပါန့ၣ်ယူၤလံႉ ဘၣ်ဒိ၀ဲဒၣ်ၦၤသ၀ီဖိ(၃)ဂၤ,ၦၤသၢဂၤအံၤအကျါန့ၣ်တၢ်ဘၣ်ယိၣ်ဒုအိၣ်တဂၤ” အဂ့ၢ်န့ၣ် ကီးတရံးကီၢ်ဆၣ်ခိၣ် ပဒိၣ်စီၤဖၣ်ထယါ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ခီဖျိပယီၤသုးကဘီယူၤဟဲခးလီၤတၢ်အဃိ(မၠိၣ်ဟီ)သ၀ီ သီခါဖးဒိၣ်(၈၇)နံၣ် လၢကလံၤဖၠးအီၤအံၤသံ၀ဲဒၣ်ဒီး ၦၤလၢအဘၣ်ဒိသ့ၣ်တဖၣ်န့ၣ်မ့ၢ်၀ဲ အူဖါဒ့(၄၃)နံၣ်ႇ အူမီၤနံ(၅၀)နံၣ် ဒီး စီၤဖံအဲၣ်ဂီၤ(၂၃)နံၣ်သ့ၣ်တဖၣ်ဒီး ဖဲန့ၣ်အကျါတဂၤန့ၣ်ဘၣ်၀ဲဒၣ်အခိၣ်နးနးကျံၤကျံၤတၢ်ဘၣ်ယိၣ်အိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ တကီၢ်ခါခဲအံၤ လီၢ်က၀ီၤသ၀ီဖိလၢအိၣ်ကီးတရံး၀့ၢ် ဒီး ကီးတရံးကီၢ်ဆၣ်ကလံၤထံး မီမးသ၀ီကရူၢ် ဒီး ကီးနွဲၣ်သ၀ီကရူၢ်အပူၤတဖၣ် ဃ့ၢ်ထီၣ်၀ဲဒၣ်ခဲလၢာ်ဃၣ်ဃၣ်တကးဒံးဘၣ်အမဲာ်ညါ လၢယွၤတါစှ့ၤႇအီးဖးဖးဒိၣ်ဒီး သိစဲၤသိစူးသ၀ီကရူၢ် ကမျၢၢ်တဖၣ်စ့ၢ်ကီး...
(KNA)ဒိးန့ၢ်ဘၣ်တၢ်ကစီၣ်လၢသုးကီၣ်ကးကဟဲမၤလီၤဘျဲးအ၀ဲသ့ၣ်တၢ်လီၢ်အဂ့ၢ်(KNA)စံး၀ဲ
လါအ့ဖြ့ၣ် ၁၈ သီႇ ၂၀၂၄ နံၣ်ႇ ခ့ၣ်အဲးစံၣ် လၢ( KNA)ကဲတ့ၢ်သုးခိးကီၢ်ဆၢ( BGF)အဆၢကတီၢ်တၢ်စုက၀ဲၤလၢပယီၤသုးထုးထီၣ်န့ၢ်အ၀ဲသ့ၣ်ဒီးဖဲအပူၤကွံာ်သ့ၣ်ဃးလီၤတီၢ်အဒုးယာ်ခိၣ်ဒီးအၦၤပာ်လီၤတၢ်စုက၀ဲၤအခါစုက၀ဲၤလၢ( KNA)ဟံးန့ၢ်ကွံာ်သ့ၣ်တဖၣ်ပယီၤသုးဃ့က့ၤကဒါက့ၤလၢ( KNA)အအိၣ်အဂ့ၢ် တၢ်ကစီၣ်ဟးထီၣ်၀ဲဒၣ်လၢ( Social Media)အပူၤအသိး( KNA)မ့ၢ်တက့ၤဟ့ၣ်အ၀ဲသ့ၣ်သၢပျၢၤဘၣ်န့ၣ် သုးကီၣ်ကးတကပၤကဟဲမၤလီၤဘျဲးကွံာ်(KNA)တၢ်လီၢ်အဂ့ၢ်တၢ်ကစီၣ်ဟးထီၣ်၀ဲဒၣ်န့ၣ်လီၤႉ လၢတၢ်ကစီၣ်ဟးထီၣ်ဒ်အံၤအဖီခိၣ်န့ၣ် သုးကီၣ်ကးကဟဲမၤလီၤဘျဲးအ၀ဲသ့ၣ်တၢ်လီၢ်န့ၣ် အ၀ဲသ့ၣ်စ့ၢ်ကီးနၢ်ဟူ၀ဲဘၣ်ဆၣ်ႇဘၣ်အိၣ်ခိးကွၢ်ဒံးတၢ်အိၣ်သးအဂ့ၢ် (KNA)သုးဟီၣ်က၀ီၤနီၣ်ဂံၢ်(၂)အဒုးယာ်ခိၣ်သုးခိၣ်ဒိၣ်စိစီၤတ့ၤ၀့စံးဘၣ်၀ဲ ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“( KNA)တၢ်ပာ်သးန့ၣ်ကခး၀ဲနီၢ်ကီၢ်ဧါန့ၣ်ဘၣ်အိၣ်ခိးကွၢ်ဒံးႉတဲ၀ဲန့ၣ်တဲ၀ဲလၢကမၤဘီၤဘျဲးပတၢ်လီၢ်တၢ်ကျဲခဲလၢာ်လီၤႉဘၣ်အိၣ်ခိးကွၢ်တဘျးဒံး”အဂ့ၢ်အ၀ဲစံး၀ဲဒၣ်န့ၣ်လီၤႉ လၢန့ၣ်အမဲာ်ညါ လၢပယီၤသုးသ့ၣ်တဖၣ်အံၤလၢကဟဲခးလီၤတၢ်အဂီၢ် မၢ၀ဲဒၣ်ရၤမတံ၀့ၢ်ၦၤလီၢ်က၀ီၤကမျၢၢ်သ့ၣ်တဖၣ်လၢကပဒ့ၣ်သးအစဲၤခံကတၢၢ်ဖဲလါအ့ဖြ့ၣ် ၁၈သီအနံၤအဂ့ၢ်တၢ်ကစီၣ်ဟးထီၣ်အိၣ်စ့ၢ်ကီး၀ဲဒၣ်န့ၣ်လီၤႉ လၢတၢ်ဂ့ၢ်၀ဲအံၤအဖီခိၣ်န့ၣ်“ခဲအံၤတၢ်အိၣ်သးဂၢၢ်ဒံးလီၤႉ တမ့ၢ်တၢ်မ့ၢ်တၢ်တီဘၣ်ႉ ရၤမတံ၀့ၢ်ပူၤကမျၢၢ်အိၣ်ဒီဒူၣ်ဒီထၢဒီးရၤမတံ၀့ၢ်အံၤမ့ၢ်၀့ၢ်ဖးဒိၣ်အဃိန့ၣ်ကမျၢၢ်မ့ၢ်ဃ့ၢ်ပဒ့ၣ်သးသနာ်က့ဃ့ၢ်ကလၢၤ၀ဲလဲၣ်ႉပထံၣ်ဘၣ်လၢတၢ်ကစီၣ်အပူၤလၢ တၢ်မၢပဃ့ၢ်ပဒ့ၣ်သးသနာ်က့အခဲအံၤရၤမတံပူၤန့ၣ်တဘၣ်တၢ်နီတမံၤဒံးဘၣ်ႉတၢ်မၢၦၤဒ်သိးန့ၣ်တအိၣ်ဘၣ်ႉ”အဂ့ၢ်ရၤမတံလီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲဒၣ်န့ၣ်လီၤႉ တကတီၢ်ဃီ သုးကီၣ်ကးဃ့က့ၤတၢ်စုက၀ဲၤလၢ( KNA)အအိၣ်ဒ်အံၤန့ၣ်မ့ၢ်ဒ်သိးကဆီၣ်သနံး၀ဲ(KNA)လၢတၢ်ကက့ၤမၤသကိးက့ၤတၢ်ဒီးအ၀ဲသ့ၣ်အဂီၢ်ဒီးသုးကီၣ်ကးမ့ၢ်ခးဘၣ်ဖုး( KNA)န့ၣ်တမ့ၢ်လၢ(KNA)ကအိၣ်ဆၢထၢၣ်ဒ်န့ၣ်ဘၣ်အဂ့ၢ် ကညီသးစၢ်လၢကွၢ်ဟုၣ်ကွၢ်စုၣ်ကညီထံရူၢ်ကီၢ်သဲးစီၤအဲလ်ဘၢၣ်ခၠိၣ် ပဲၤထံနီၤဖး၀ဲတကီၢ်ခါခဲအံၤ ပယီၤသုးကီၣ်ကးဒီး( KNA)အဘၢၣ်တၢ်ဖ့ၣ်ဆၢတၢ်အိၣ်သးဒ်အံၤစ့ၢ်ကီးန့ၣ်လီၤႉ အ၀ဲစံး၀ဲလၢ“တၢ်အိၣ်သးတခါအံၤန့ၣ်လၢ( KNA)အဂီၢ်န့ၣ် မ့ၢ်၀ဲ သုးကီၣ်ကးဟ့ၣ်အီၤတၢ်ဆီၣ်သနံးန့ၣ်လီၤႉအခဲအံၤတၢ်အိၣ်သးအဖီခိၣ်န့ၣ် သုးကီၣ်ကးတၢ်ပၢတၢ်ပြးဟးဂီၤအဆၢကတီၢ်ႇ (KNU)စ့ၢ်ကီး ကနုာ်လီၤမၤ၀ဲတၢ်ပၢတၢ်ပြးတန့ၢ်ဘၣ်အဆၢကတီၢ် အ၀ဲသ့ၣ်အိၣ်လၢတၢ်ဘၢၣ်စၢၤန့ၣ်လီၤႉအဃိန့ၣ်ယဲယထံၣ်လၢ( KNA)တၢ်အိၣ်ဆၢထၢၣ်န့ၣ်အိၣ်လၢတၢ်ဘၢၣ်စၢၤလီၤႉပယီၤက့ၤဃ့က့ၤအ၀ဲသ့ၣ်ကျိန့ၣ်မ့ၢ်ဒၣ်တၢ်ဟ့ၣ်အ၀ဲသ့ၣ်တၢ်ဆီၣ်သနံးန့ၣ်လီၤႉသုးကီၣ်ကးတအဲၣ်အ၀ဲသ့ၣ်အိၣ်လၢတၢ်ဘၢၣ်စၢၤဘၣ်ႉသုးကီၣ်ကးအဲၣ်ဒိးလၢတၢ်ကက့ၤမၤသကိးတၢ်ဒီးအ၀ဲသ့ၣ်န့ၣ်လီၤႉအဃိန့ၣ်သုးခိၣ်ခၠံၣ်သူၣ် န့ၣ်ဘၣ်ကွၢ်က့ၤလၢအတၢ်တဲဒီးအတၢ်မၤလီၤႉ၀ဲပအိၣ်လၢတၢ်ချၢဒ်ကမျၢၢ်အသိးန့ၣ်ပတဲတဘၣ်ခဲလၢာ်ဘၣ် ဘၣ်ဆၣ်ပနၢ်ပၢၢ်ထွဲလၢ ၦၤမ့ၢ်ဟဲဒဲအမဲာ်သၣ်န့ၣ်တမ့ၢ်လၢအကအိၣ်ဆၢထၢၣ်ဒ်န့ၣ်ဘၣ်ႉ”အဂ့ၢ် အ၀ဲပဲၤထံနီၤဖး၀ဲဒၣ်န့ၣ်လီၤႉ တကီၢ်ခါခဲအံၤသုးကီၣ်ကးတကပၤ ဒ်သိးမၤ၀ဲဟီၣ်က၀ီၤတၢ်ဒိၣ်စိလၢရၤမတံ၀့ၢ်ကန့ၢ်အဂီၢ်ဒုးအိၣ်ထီၣ်၀ဲ ထံကီၢ်ဒီဘ့ၣ်ပတီၢ်ဒုးယၤရဲၣ်ကျဲၤတခါလၢအမ့ၢ် “အီၣ်စ့ၣ်ယၣ်”ဒုးယာ်ရဲၣ်ကျဲၤ၀ံၤဟဲထီၣ်ဒီး ထးသိလ့ၣ်ႇသုးသိလ့ၣ်အါအါဂီၢ်ဂီၢ်ဒီးအခဲအံၤတုၤဖဲကီးတရံး၀့ၢ်ဟီၣ်၀ီၤဒီးတၢ်ဘၣ်သဂၢၢ်ခးလိာ်သးကဲထီၣ်လၢလီၢ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဖၢမုၢ်အဂ့ၢ်သ့ၣ်ညါဘၣ်ဒ်(KNU)အတၢ်ပာ်ဖျါအိၣ်၀ဲအသိးန့ၣ်လီၤႉ
(KNLA)ခိးတြီကးတံာ်ဃာ်၀ဲသုးကီၣ်ကးအသုးကျိၤလၢအဟဲထီၣ်ဆူရၤမတံ၀့ၢ်တဖၣ်အဖၢမုၢ်
လါအ့ဖြ့ၣ် ၁၈သီႇ ၂၀၂၄နံၣ်ႇ ခ့ၣ်အဲးစံၣ်ႇ သုးကီၣ်ကးအသုးကျိၤဟူးဂဲၤလၢအဟဲထီၣ်ဆူကီၢ်ကၠီၣ်တဲၣ်-ကီၢ်ပယီၤကီၢ်ဆၢရၤမတံ၀့ၢ်ပူၤတဖၣ်အံၤႇကညီတၢ်ထူၣ်ဖျဲးသုးမုၢ်ဒိၣ်(KNLA)တီခိၣ်ရိၢ်မဲခိးတြီကးတံာ်၀ဲလၢကျဲတီၤအဖၢမုၢ်အိၣ်၀ဲအဂ့ၢ်ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲတနံၤအံၤလါအ့ဖြ့ၣ်(၁၈)သီအနံၤန့ၣ်လီၤႉ သုးကီၣ်ကးအၦၤသုးဖိလၢဟဲထီၣ်ဆူရၤမတံ၀့ၢ်ပူၤတဖၣ်အံၤႇကညီတၢ်ထူၣ်ဖျဲးသုးမုၢ်ဒိၣ်(KNLA)ကညီဒီကလုာ်ဂၢၤသးကရၢ(K.N.D.O)ဒီးကမျၢၢ်တၢ်ဒီသဒၢသုး(PDF)သ့ၣ်တဖၣ်အိၣ်ခိးခးကးတံာ်၀ဲအ၀ဲသ့ၣ်အကျဲလၢကျဲတီၤတပယူာ်ဃီအိၣ်၀ဲအဂ့ၢ်ခ့ၣ်အဲၣ်ယူၣ်ထုးထီၣ်ပာ်ဖျါ၀ဲလၢအတၢ်ကစီၣ်အပူၤန့ၣ်လီၤႉ သုးကီၣ်ကးအၦၤတဖၣ်အံၤခီဖျိတၢ်ပၢၢ်ဆၢသုးကရူၢ်တဖၣ်အိၣ်ခိးခးအ၀ဲသ့ၣ်အဃိအထးသိလ့ၣ်(သံချပ်ကာယာဉ်)ဒီးအသုးအသိလ့ၣ်(စစ်သုံးကား)တနီၤဟးဂီၤကွံာ်၀ဲအမဲာ်ညါအၦၤသုးဖိအဂၤတကယၤဘျဲၣ်ဘၣ်ဒိဘၣ်ထံးသံကွံာ်၀ဲအဃိလဲၤထီၣ်၀ဲဆူညါတန့ၢ်လၢၤဘၣ်ဒီးဘၣ်အိၣ်ပတုာ်ကွံာ်၀ဲဖဲတီနီၢ်ကစၢၢ်မုၢ်နုာ်ကစၢၢ်ကပၤအဂ့ၢ်ခ့ၣ်အဲၣ်ယူၣ်တၢ်ကစီၣ်ပာ်ဖျါ၀ဲစ့ၢ်ကီးန့ၣ်လီၤႉ တကးဒံးဘၣ်ႇသုးကီၣ်ကးအၦၤလၢအဟဲထီၣ်ဆူရၤမတံ၀့ၢ်ပူၤတဖၣ်အံၤဖဲအဟဲလၢကျဲအဆၢကတီၢ်ခးလီၤ၀ဲကျိဖးဒိၣ်ဆူကမျၢၢ်ဒူသ၀ီအပူၤဒီးသူကဘီယူၤကွံာ်လီၤမ့ၣ်ပိၢ်အိၣ်၀ဲအဃိဘၣ်ဒိဘၣ်ထံးဘၣ်သံ၀ဲကမျၢၢ်လီၢ်က၀ီၤဖိတဖၣ်အိၣ်၀ဲအသိးကမျၢၢ်တၢ်ဖိတၢ်လံၤတဖၣ်ဘၣ်ဟးဂုၤဟးဂီၤ၀ဲအိၣ်စ့ၢ်ကီး၀ဲအဂ့ၢ်ခ့ၣ်အဲၣ်ယူၣ်စံး၀ဲန့ၣ်လီၤႉ ရၤမတံ၀့ၢ်အံၤႇအပူၤကွံာ်လါအ့ဖြ့ၣ်(၁၁)သီအနံၤႇတၢ်ပၢၢ်ဆၢသုးပာ်ဖှိၣ်ထီၣ်မၤန့ၢ်ကွံာ်၀ဲသုးကီၣ်ကးခီၣ်ချ့သုးရ့ၣ်(ခလရ-၂၇၅)သုးကလၢၤ၀ံၤအလီၢ်ခံသုးကီၣ်ကးတဖၣ်အံၤလၢကဒိးန့ၢ်က့ၤ၀ဲရၤမတံ၀့ၢ်အဂီၢ်ဒုးအိၣ်ထီၣ်၀ဲထံကီၢ်ဒီတဘ့ၣ်ပတီၢ် “အီၤစ့ၤယၣ်”ဒုးယာ်ရဲၣ်ကျဲၤဒီးဟဲထီၣ်၀ဲဆူရၤမတံအဂ့ၢ်ခ့ၣ်အဲၣ်ယူၣ်ပာ်ဖျါ၀ဲန့ၣ်လီၤႉ
တၢ်လဲၤခးကဒီး၀ဲ(န့ၣ်ပၠံၣ်ဒီၣ်)အ့လါကဘီယူၤသန့ဒီး(၁၀၇)မမကျိဖးဒိၣ်ချံ
လါအ့ဖြ့ၣ် ၁၂ သီႇ ၂၀၂၄ နံၣ်ႇ ခ့ၣ်အဲးစံၣ် သုးကီၣ်ကး(န့ၣ်ပၠံၣ်ဒီၣ်)ကဘီယူၤသန့အံၤ ဖဲလါအ့ဖြ့ၣ်(၁၁)သီအနံၤဟါခီ(၄)နၣ်ရံၣ်တခီအဆၢကတီၢ်တၢ်ပၢၢ်ဆၢသုးပာ်ဖှိၣ်ကရူၢ်လဲၤခးကဒီး၀ဲဒီး(၁၀၇)မမမျိာ်သၣ်(၇)ဖျၢၣ်အဂ့ၢ် (Brave Warriors for Myanmar-BWM) ထုးထီၣ်ပာ်ဖျါ၀ဲဖဲမဟါအနံၤန့ၣ်လီၤႉ (န့ၣ်ပၠံၣ်ဒီၣ်)ကဘီယူၤသန့၀ဲအံၤန့ၣ်မ့ၢ်၀ဲထံဂုၤကီၢ်ဂၤကဘီယူၤသန့လီၢ်တခါအသိးမ့ၢ်၀ဲလီၢ်ခၢၣ်သးတၢ်လီၢ်တၢ်ကျဲအမဲာ်ညါလၢကလံၤကျိၤတၢ်ဒုးအဂီၢ်မ့ၢ်စ့ၢ်ကီး၀ဲတၢ်လီၢ်အကါဒိၣ်တခါလၢတၢ်ပျဲလီၤ၀ဲကဘီယူၤအဂီၢ်ဒီးမ့ၢ်၀ဲကဘီယူၤသန့လၢအပတီၢ်ထီအလီၢ်တခါအဃိပာ်ပနီၣ်၀ဲတၢ်လီၢ်အံၤလၢဒုးယၤတၢ်ပနီၣ်ဒီးဘၣ်တၢ်လဲၤခးအီၤဒ်အံၤလီၤအဂ့ၢ်(BWM)ၦၤသုးဖိတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ “ပလဲၤခး၀ဲ(အ့လါ)ကဘီယူၤသန့ဒီးကျိဖးဒိၣ်န့ၣ်ဃုာ်ဒီးတၢ်တဘျီညါအံၤန့ၣ်အိၣ်၀ဲ၄ဘျီလံမီၤနီၤႉ တၢ်လဲၤခး အပူၤအ၀ဲသ့ၣ်တကပၤသံဘၣ်ဒိဘၣ်ထံးကအိၣ်၀ဲလီၤႉ ဘၣ်ဆၣ်သနါက့တသ့ၣ်ညါတၢ်ဂ့ၢ်တၢ်ကျိၤ လၢလၢၦဲၤၦဲၤဒံးဘၣ်ႉ တၢ်ပၢၢ်ဆၢသုးပာ်ဖှိၣ်ကရူၢ်သ့ၣ်တဖၣ်(န့ၣ်ပၠံၣ်ဒီၣ်)အပူၤအံၤတၢ်လီၢ်မတၤ တၢ်မနုၤအိၣ်လဲၣ်န့ၣ်သ့ၣ်ညါဘၣ်၀ဲလံအဃိတၢ်ဟူးတၢ်ဂဲၤလၢကဟဲဆူညါတဖၣ်တၢ်ကဟူးဂဲၤမၤ၀ဲဒုးယၤဂ့ၢ်၀ီတုၤလီၤတီၤလီၤပတီၢ်ထီန့ၢ်ဘျီ၀ဲအံၤလီၤန့ၣ်အဲၣ်ဒိးတဲဒ်အံၤလီၤ” အဂ့ၢ်စံး၀ဲဒၣ်န့ၣ်လီၤႉ လၢတၢ်လဲၤခး၀ဲကဘီယူၤသန့ဘျီ၀ဲအံၤအပူၤန့ၣ်ဘၣ်ဃးဒီးတၢ်ဘၣ်ဒိဘၣ်ထံးတၢ်အိၣ်သးတခီတၢ်ထုးထီၣ်ပာ်ဖျါ၀ဲတၢ်ဂ့ၢ်တၢ်ကျိၤတၢ်ပာ်ဖျါတအိၣ်ဘၣ်အသိးသုးကီၣ်ကးတကပၤစ့ၢ်ကီးထုးထီၣ်ပာ်ဖျါ၀ဲတၢ်ပာ်ဖျါတထံၣ်ဘၣ်နီၤမံၤဒံးဘၣ်န့ၣ်လီၤႉ လၢန့ၣ်အမဲာ်ညါ(အ့လါ)ကဘီယူၤသန့အံၤမ့ၢ်ကဘီယူၤသန့လၢသုးကီၣ်ကးခိၣ်နၢ်ဒိၣ်ထီသ့ၣ်တဖၣ်ကဃ့ၢ်ပူၤဖျဲးသးအဂီၢ်ကျဲတဘိအသိးသုးကီၣ်ကးကဘီယူၤသန့လၢတၢ်ဘံၣ်တၢ်ဘၢဃံးကတၢၢ်ဒီးအပတီၢ်ထီၣ်ကတၢၢ်၀ဲအံၤတၢ်ပၢၢ်ဆၢသုးပာ်ဖှိၣ်သ့ၣ်တဖၣ်ဟဲတုၤဘူးထီၣ်၀ဲလံအဂ့ၢ်(BWM)ပာ်ဖျါထီၣ်၀ဲဒီးဟ့ၣ်ဒုးသ့ၣ်ညါ၀ဲဒၣ်န့ၣ်လီၤႉ ဖဲပူၤကွံာ်လါအ့ဖြ့ၣ်(၄)သီအနံၤန့ၣ်စ့ၢ်ကီးသုးကီၣ်ကးသုး၀ဲၤလီၢ်ခိၣ်သ့ၣ်ဒီးကဘီယူၤသန့လၢအိၣ်(န့ၣ်ပၠံၣ်ဒီၣ်)အပူၤအံၤဒီကလုာ်တၢ်ဃူးတၢ်ဖိးပဒိၣ်(NUG)ဒီးတၢ်ဒီသဒၢကိတိာ်၀ဲၤကျိၤ(MOD)အစုတီၤဖီလာ်ဒြိကရူၢ်သ့ၣ်တဖၣ်လဲၤတ့ၢ်လီၤ၀ဲဒြိမ့ၢ်ပိၢ်အဂ့ၢ်(NUG-MOD)တကပၤထုးထီၣ်ပာ်ဖျါ၀ဲန့ၣ်လီၤႉ ဒ်န့ၣ်အသိးသုးကီၣ်ကးကဘီယူၤသုးကလၢၤလၢဘၣ်တၢ်သူအီၤလၢဒုးယၤအဂီၢ်မ့ၢ်ဂ့ၤႇ ၀ံာ်စိာ်တီဆှၢမ့ၢ်ဂ့ၤဒီးတၢ်အကကပၤကပၤမ့ၢ်ဂ့ၤန့ၣ်တၢ်ပၢၢ်ဆၢသုးပာ်ဖှိၣ်သ့ၣ်တဖၣ်ဒ်သိးထံကီၢ်ဒီဘ့ၣ်တၢ်ပၢၢ်ဆၢကကဲထီၣ်တၢ်ဆီတလဲတခါအဂီၢ်ကဆဲးဟူးဂဲၤမၤ၀ဲဒုးယာ်တၢ်ဟူးတၢ်ဂဲၤအဂ့ၢ်(BWM)စံး၀ဲန့ၣ်လီၤႉ
ဒြိခးလီၤတၢ်အဃိကီးတရံးကမျၢၢ်လီၢ်အိၣ်ကမှံဖိလၢအက့ၤကွၢ်ထဲအွဟံၣ်သံ(၄)ဂၤႇဘၣ်ဒိ(၄)ဂၤ
လါအ့ဖြ့ၣ် ၁၂သီႇ၂၀၂၄နံၣ်ႇခ့ၣ်အဲးစံၣ်ႇ ကီးတရံး၀့ၢ်ႇက၀ီၤဒ့(၅)လီၢ်အိၣ်ကမှံလီၢ်က၀ီၤဖိလၢအက့ၤကွၢ်ထွဲအဟံၣ်လၢႇယ့ၤလဲၤကိတကပၤတဖၣ်အံၤႇမဟါတၢ်ခးလီၤဒီးအ၀ဲသ့ၣ်ဒီးဒြိအဃိသံ၀ဲ(၄)ဂၤဘၣ်ဒိဘၣ်ထံး၀ဲ(၄)ဂၤအဂ့ၢ်ၦၤမၤစၢၤၦၤလီၢ်အိၣ်ကမှံဖိတဖၣ်စံး၀ဲန့ၣ်လီၤႉ ယ့ၤလဲၤကိလီၢ်က၀ီၤဖိလၢလဲၤအိၣ်ကဒုအသးလၢႇခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢသုးက့(၇)ဟီၣ်က၀ီၤႇနီၣ်တပွဲသ၀ီပူၤတဖၣ်အံၤႇဖဲအ၀ဲသ့ၣ်က့ၤကွၢ်ထွဲအဟံၣ်အဆၢကတီၢ်ႇတၢ်ခးလီၤဒီးအ၀ဲသ့ၣ်ဒီးဒြိအဂ့ၢ်လီၢ်အိၣ်ကမှံဖိလၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲမဟါ(၁၁)နၣ်ရံၣ်ၦၤလီၢ်အိၣ်ကမှံဖိတဖၣ်က့ၤကွၢ်အဟံၣ်အဃီအဆၢကတီၢ်တၢ်ခးလီၤဒြိအဃိဘၣ်ဒိ၀ဲနးမးႉသံကွံာ်၀ဲ(၄)ဂၤမ့မ့ၢ်လၢအ၀ဲခံဂၤန့ၣ်ဂ့ၢ်ဂီၢ်အူတၢ်လီၤဘၣ်ယိာ်အိၣ်အဃိတၢ်ဆှၢအီၤဆူဖၣ်အၣ်တၢ်ဆါဟံၣ်လံယၤန့ၣ်ယဘၣ်ဒိတစဲးဖိလီၤအဃိယလဲၤထီၣ်တၢ်ဆါဟံၣ်ဖဲအဘူးအံၤလီၤဒဒ အဂ့ၢ်စံး၀ဲနၣ်လီၤႉ လၢန့ၣ်အမဲာ်ညါႇကမျၢၢ်လီၢ်အိၣ်ကမှံဖိလၢအသံတဖၣ်အံၤမ့ၢ်၀ဲၦၤလၢသးၦၢ်ထီၣ်တဖၣ်ဒီးဒီးၦၤသးစၢ်တဖၣ်ဒီးၦၤသံအကျါန့ၣ်ပၣ်၀ဲပိာ်ခွါန့ၣ်(၃)ဂၤႇအပိာ်မုၣ်(၁)ဂၤစ့ၢ်အသိးၦၤဘၣ်ဒိ(၄)ဂၤအကျါအပိာ်ခွါ(၂)ဂၤဘၣ်တၢ်ဆှၢဃီဆူဖၣ်အၣ်တၢ်ဆါဟံၣ်အဃိခဲအံၤဘၣ်အိၣ်၀ဲလၢတီၤကလ့တၢ်ဆါဟံၣ်ဒီးမ့မ့ၢ်လၢလီၢ်က၀ီၤကမျၢၢ်ပိာ်ခွါလၢအဂၤတဂၤဒီးပိာ်မုၣ်လၢအဂၤတဂၤတခီန့ၣ်တၢ်ဆှၢအီၤဖဲဟီၣ်က၀ီၤတၢ်ဆါဟံၣ်သ့ၣ်တဖၣ်အပူၤလီၤအဂ့ၢ်ၦၤမၤစၢၤၦၤလီၢ်အိၣ်ကမှံတဖၣ်စံး၀ဲန့ၣ်လီၤႉ အ၀ဲစံး၀ဲလၢ“အ၀ဲသ့ၣ်ဆိမိၣ်၀ဲလၢတါလါဒုတဘၣ်နီတမံၤဘၣ်အဃိန့ၣ်ဟဲဃ့က့ၤယၤတသီမီၤနီၤႉတဲ၀ဲလၢကက့ၤမၤကဆှီအဟံၣ်ဖဲတါလီၤဆၢကတီၤမီၤနီၤႉအ၀ဲသ့ၣ်က့ၤတဘျီတၢ်ဟဲကဲထီၣ်သးဒ်အံၤလီၤႉၦၤသံလွံၢ်ဂၤအကျါသၢဂၤန့ၣ်ပဘၣ်ခူၣ်လီၤကွံာ်ဖဲန့ၣ်လီၤႉပစိာ်န့ၢ်ထဲတဂၤလီၤဒဒအဂ့ၢ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤႉ တကတီၢ်ဃီဘၣ်ဃးဒီးမဟါတၢ်ကဲထီၣ်သးအဖီခိၣ်အံၤန့ၣ်ႇမ့ၢ်တၢ်ပညိၣ်ခးလီၤ၀ဲကမျၢၢ်လီၢ်အိၣ်ကမှံဖိတဖၣ်ဒီးမဟါတၢ်ကဲထီၣ်သးအဆၢကတီၢ်ဟီၣ်က၀ီၤအပူၤတၢ်ခးလိာ်သးလၢခံခီယၢ်ပၤတၢ်ဒုးတၢ်ယၤတအိၣ်၀ဲဘၣ်အဃိမ့ၢ်ကရူၢ်ကရၢဖဲလဲၣ်တဖုမၤ၀ဲအဂ့ၢ်န့ၣ်တသ့ၣ်ညါ၀ဲဘၣ်အဂ့ၢ်လီၢ်က၀ီၤဖိတဖၣ်စံး၀ဲန့ၣ်လီၤႉ