ကၠဲးဒိတၢ်ဒုးပယီၤသုးသံ(၁၂)ဂၤႇတၢ်ဖီၣ်ချူးမူဒံးန့ၢ်အဂၤ(၆၀)ဘျဲၣ်အကျါပၣ်ဃုာ်ဒီးအဒုးယာ်ခိၣ်
လါမးရှး ၁၅သီႇ ၂၀၂၄နံၣ်ႇ ခ့ၣ်အဲးစံၣ်ႇ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢႇဒူပျၢ်ယာ်ကီၢ်ရ့ၣ်ႇသုးက့(၆)ကီးတရံးကီၢ်ဆၣ်ကလံၤထံးႇကၠဲးဒိ၀့ၢ်ႇတၢ်ထီၣ်ဒုးသုးကီၣ်ကးအဒုးယၤသုးကလၢၤ(၂)သီတၢ်ဒုးအပူၤပယီၤသုးသံ၀ဲ(၁၂)ဂၤဒီးတၢ်ဖီၣ်ချူးမူဒံးန့ၢ်၀ဲအဂၤ(၆၆)အကျါပၣ်ဃုာ်၀ဲဒီးအဒုးယၤခိၣ်(၁)ဂၤအဂ့ၢ်(KNLA)တၢ်ပၢၢ်ဆၢၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ သုးကီၣ်ကးအဒုးယၤသုးကလၢၤလၢအိၣ်ကၠဲးဒိ၀့ၢ်ပူၤတဖျၢၣ်အံၤ(ု္ဒူဗ)တီခိၣ်ရိၣ်မဲတၢ်ပၢၢ်ဆၢသုးပာ်ဖှိၣ်ထီၣ်မၤန့ၢ်ကွံာ်၀ဲဖဲမဟါလါမးရှး(၁၄)သီအနံၤမုၢ်ဃ့ၢ်လီၤ(၃း၀၀)ဘျဲၣ်အဆၢကတီၢ်ဒီးဖီၣ်ချူးမူဒံးန့ၢ်၀ဲသုးကီၣ်ကးအၦၤသုးဖိအဂၤ(၆၆)အကျါပၣ်ဃုာ်၀ဲဒီးအဒုးယာ်ခိၣ်(အီၣ်ကၠီၣ်စိ)လၢသးနံၣ်အိၣ်၀ဲ(၄၄)နံၣ်တဂၤအံၤစ့ၢ်ကီးအဂ့ၢ်တၢ်ပၢၢ်ဆၢၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ဖဲတၢ်ထီၣ်ဒုးမၤန့ၢ်၀ဲသုးကီၣ်ကးအဒုးယၤသုးကလၢၤဘျီ၀ဲအံၤအခါန့ၣ်တၢ်ပၢၢ်ဆၢသုးပာ်ဖှိၣ်တဖၣ်မၤန့ၢ်ဃုာ်၀ဲတၢ်စုက၀ဲၤအဒိၣ်ဒ်အမ့ၢ်(၁၂၀မးမး)(၄၀မးမး)(၆၀မးမး)ဒီး(ဆဲးလးဖီးယဲၢ်)ဃုာ်ဒီးကျိဖိတဖၣ်ခဲလၢာ်အိၣ်၀ဲ(၁၀၀)ဘျဲၣ်ဒီးမၤန့ၢ်စ့ၢ်ကီး၀ဲကျိချံၦာ်သၣ်သ့ၣ်တဖၣ်အါအါဂီၢ်ဂီၢ်အဂ့ၢ်သ့ၣ်ညါဘၣ်ဒ်ၦၤဘၣ်မူဘၣ်ဒါတဖၣ်စံး၀ဲအသိးန့ၣ်လီၤႉ တကးဒံးဘၣ်တၢ်ဒုးဘျီ၀ဲအံၤအပူၤတၢ်ပၢၢ်ဆၢသုးပာ်ဖှိၣ်တကပၤဘၣ်ဟ့ၣ်လီၤကွံာ်၀ဲအသးအိၣ်၀ဲအသိးဘၣ်ဒိဘၣ်ထံး၀ဲအိၣ်၀ဲအမဲညါတၢ်ထီၣ်ဒုးသုးကလၢၤအံၤဒီတကတီၢ်အပူၤသုးကီၣ်ကးအကဘီယူၤဟဲခးလီၤတၢ်အိၣ်၀ဲတပယူာ်ဃီအဂ့ၢ်ၦၤဘၣ်မူဘၣ်ဒါတဖၣ်စံးစ့ၢ်ကီး၀ဲဒၣ်န့ၣ်လီၤႉ တကတီၢ်ဃီကၠဲးဒိသုးကီၣ်ကးအဒုးယာ်သုးကလၢၤလၢ(KNLA)ဒီးတၢ်ပၢၢ်ဆၢသုးပာ်ဖှိၣ်ထီၣ်မၤန့ၢ်ကွံာ်၀ဲတဖျၢၣ်အံၤတၢ်ပၢၢ်ဆၢသုးပာ်ဖှိၣ်ထီၣ်က၀ီၤဃာ်၀ဲဖဲအပူၤကွံာ်လါမးရှး(၇)သီအနံၤ၀ံၤအလီၢ်ခံတဲ၀ဲသုးကီၣ်ကးတဖၣ်လၢကပာ်လီၤစုက၀ဲၤဒီးဟ့ၣ်ဃၣ်ကွံာ်အသးအိၣ်၀ဲဘၣ်ဆၣ်သုးကီၣ်ကးတဖၣ်အံၤတဟ့ၣ်ဃၣ်သးပာ်လီၤစုက၀ဲၤဘၣ်အဃိဘၣ်တၢ်ခးအ၀ဲသ့ၣ်လီၤအဂ့ၢ်တၢ်ပၢၢ်ဆၢသုးပာ်ဖှိၣ်အၦၤဘၣ်မူဘၣ်ဒါစံး၀ဲဒၣ်န့ၣ်လီၤႉ ဒ်န့ၣ်အသိးဖဲအပူၤကွံာ်လါမးရှး(၁၁)သီအနံၤန့ၣ်(Cobra Column 2 Venmo)သသုးကျိၤထီၣ်ဒုးမၤန့ၢ်၀ဲ(ဖလူးမဆုတ်တမ်းခံစစ်စခန်း)သုးကလၢၤလၢအိၣ်ရၤမတံကလံၤထံးတဖျၢၣ်အပူၤအိၣ်၀ဲအသိးဖဲလါမးရှး(၇)သီအနံၤအခါစ့ၢ်ကီး(KNLA)တၢ်ပၢၢ်ဆၢသုးပာ်ဖှိၣ်ထီၣ်မၤန့ၢ်၀ဲ(ရၤမတံကီၢ်ဆၣ်ႇသုးကီၣ်ကး(ခမရ)(၃၅၅)အစုတီၤဖီလာ်သ့ၣ်ကါညံၤနီၤသုးကလၢၤ)အိၣ်စ့ၢ်ကီး၀ဲအဂ့ၢ်သ့ၣ်ညါဘၣ်စ့ၢ်ကီးန့ၣ်လီၤႉ တကီၢ်ခါခဲအံၤလၢသုးက့(၆)၀ီၢ်ရီၢ်ကီၢ်ရ့ၣ်ႇနိၣ်တကီကီၢ်ဆၣ်ႇနိၣ်ခၠိနဲၣ်သ၀ီတကပၤစ့ၢ်ကီးတၢ်ပၢၢ်ဆၢသုးပာ်ဖှိၣ်ထီၣ်ဒုး၀ဲသုးကီၣ်ကးအသုးအလၢၤအဃိခံခီခံကပၤတၢ်ခးလိာ်သးကဲထီၣ်၀ဲ(၂)သီလံအဂ့ၢ်သ့ၣ်ညါလီၢ်က၀ီၤဖိတဖၣ်စံး၀ဲန့ၣ်လီၤႉ
ပယီၤသုးခးလီၤကျိဖးဒိၣ်အဃိ ၀့ၣ်ဆှါက၀ီၤဒ့ပူၤ ကမျၢၢ်သံ(၂)ဂၤဒီးဘၣ်ဒိ(၄)ဂၤ
လါမးရှး ၁၅ သီႇ ၂၀၂၄ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ် မၠၣ်၀တံၣ်၀့ၢ်ဃၢၤ ဖဲမဟါလါမးရှး ၁၄ သီ မုၢ်နၤခီ အဆၢကတီၢ်န့ၣ် ခီဖျိပယီၤသုးခးလီၤကျိဖးဒိၣ်လီၤတဲာ်ပိၢ်ဖးထီၣ်လၢ၀့ၣ်ဆှါက၀ီၤဒ့ပူၤအဃိ ကမျၢၢ်သံ(၂)ဂၤဒီးဘၣ်ဒိ၀ဲဒၣ်(၄)ဂၤ အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲမဟါမုၢ်နၤခီ ၁၁ နၣ်ရံၣ်ဃၣ်ဃၣ်အဆၢကတီၢ် ကါညံၣ်နီၣ်ပယီၤသုး(၂၇၅)သုးကလၢၤအံၤ ခးလီၤ၀ဲဒၣ်ကျိဖးဒိၣ် လီၤတဲာ်ပိၢ်ဖးထီၣ်၀ဲလၢ ၀့ၣ်ဆှါက၀ီၤဒ့(၇)ပူၤ တဖျၢၣ်အဃိ ဖံသးၦၢ်(၇၀)ဘျဲၣ်ဒီး အဖိခွါ(၄၀)ဘျဲၣ်အံၤသံ၀ဲတဘျီဃီဒီး ဖံသးၦၢ်အဖိမုၣ်ဘၣ်ဒိ၀ဲဒၣ်နးနး(၂)ဂၤန့ၣ်လီၤႉ ဒ်န့ၣ်အသိးတကတီၢ်ဃီခီဖျိကျိဖးဒိၣ်လီၤတဲာ်ပိၢ်ဖးထီၣ်စ့ၢ်ကီးလၢ၀့ၣ်ဆှါက၀ီၤဒ့(၁)ပူၤတဖျၢၣ်အဃိ ဖဲန့ၣ်ၦၤကမျၢၢ်ဘၣ်ဒိၣ်၀ဲ(၂)ဂၤ အဂ့ၢ်န့ၣ် ဟီၣ်က၀ီၤဂံၢ်ခီၣ်ထံး ၦၤဟ့ၣ်တၢ်ကစီၣ်ဖိစံး၀ဲန့ၣ်လီၤႉ ခီဖျိပယီၤသုးခးလီၤကျိဖးဒိၣ်အဃိ တကီၢ်ခါခဲအံၤ ၀့ၣ်ဆှါၦၤကမျၢၢ်တဖၣ်ဃ့ၢ်ထီၣ်ခဲလၢာ်လံအဂ့ၢ်န့ၣ် လီၢ်က၀ီၤဂံၢ်ခီၣ်ထံး ၦၤဟ့ၣ်တၢ်ဖိလၢအိၣ်ဘူးဖဲန့ၣ်တဂၤ စံးဘၣ် ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“ခဲအံၤပယီၤသုး(၃၅၇)သုးရ့ၣ်န့ၣ်ၦၤလဲၤခးအီၤမီၤႉတၢ်မၢၤဖဲ၀့ၣ်ဆှါသ၀ီန့ၣ်ၦၤစံၣ်လၢာ်လံစံၣ်သီသ၀ီလီၤႉတၢ်ဖဲမဂီၤန့ၣ်ကျိဖးဒိၣ်လီၤလဲးလိးလီၤမီၤနီၤႉ စးထီၣ်ဖဲမုၢ်၀ါထီၣ် ၄ နၣ်ရံၣ်န့ၣ်သီၣ်လဲးလိးလီၤႉ ခဲအံၤမးကဘီယူၤ ဟဲဒံးႉအသီၣ်န့ၣ်သီၣ်လၢမဟါလံဘၣ်ဆၣ်အသီၣ်စှၤဒံးႉပယီၤသုးလၢအိၣ်(၂၇၅)သုးရ့ၣ်တဖၣ်န့ၣ် ခးလီၤစၢၤကျိဖးဒိၣ် ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ဒ်န့ၣ်အသိးဖဲတနံၤအံၤလါမးရှး ၁၅ သီ ဂီၤခီ ၄ နၣ်ရံၣ်အဆၢကတီၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)သုးပာ်ဖှိၣ်ထီၣ်ခး၀ဲမၠၣ်၀တံၣ် သ့ၣ်ကါညံၣ်နီၣ်ပယီၤသုးခီၣ်ချ့သုးရ့ၣ်(ခမရ-၃၅၆)ႇ(၃၅၇)သုးရ့ၣ်တၢ်လီၢ် တၢ်ဒုးကဲထီၣ်အဃိ ပယီၤသုးကဘီယူၤဟဲခးလီၤစၢၤ၀ဲတၢ်လၢပျီပူၤအဂ့ၢ်န့ၣ် လီၢ်က၀ီၤၦၤဟ့ၣ်တဖၣ်ကစီၣ်ဖိတဖၣ်...
သုးကီၣ်ကးဟံၣ်ဖိဃီဖိ(၇၁)ဂၤလၢတၢ်ဖီၣ်န့ၢ်၀ဲဖဲမူကီၢ်ဆၣ်တၢ်ဒုးပူၤတဖၣ်အံၤတၢ်ပျၢ်လီၤက့ၤ၀ဲ
လါမးရှး ၁၄ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်တၢ်ပၢ ချၢၣ်လွံၢ်ထူၣ်ကီၢ်ရ့ၣ် သုးက့(၃) မူကီၢ်ဆၣ်အပူၤ သုးကီၣ်ကးဟံၣ်ဖိဃီဖိ(၇၁)ဂၤ လၢတၢ်ဖီၣ်န့ၢ်၀ဲဖဲမူကီၢ်ဆၣ်တၢ်ဒုးပူၤအခါသ့ၣ်တဖၣ်အံၤ ဖဲလါမးရှး(၁၂)သီဂီၤခီအဆၢကတီၢ်န့ၣ် တၢ်ပျၢ်လီၤက့ၤ၀ဲလံအဂ့ၢ်န့ၣ် မူကီၢ်ဆၣ်အၦၤဘၣ်မူဘၣ်ဒါစံး၀ဲန့ၣ်လီၤႉ သုးကီၣ်ကးအဟံၣ်ဖိဃီဖိလၢဘၣ်တၢ်ဖီၣ်န့ၢ်အီၤဖဲမူ၀့ၢ်တၢ်ဒုးပူၤအခါသ့ၣ်တဖၣ်အံၤ အပူၤကွံာ်(၂၀၂၃) လါဒံၣ်စ့ဘၢၣ် (၂)သီအနံၤ ဖဲကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်လဲၤထီၣ်ခး၀ဲမူ၀့ၢ်ပယီၤသုး ခီၣ်ချ့သုးရ့ၣ် (ခမရ-၅၉၀ႇ ခမရ-၅၉၉)တဖၣ်အံၤအဆၢကတီၢ်ဘၣ်တၢ်ဖီၣ်န့ၢ်အ၀ဲသ့ၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ပယီၤသုးဟံၣ်ဖိဃီဖိသ့ၣ်တဖၣ်အံၤတၢ်ဖီၣ်ဃာ်အ၀ဲသ့ၣ်ထီၣ်ဘးလၢ(၃)လါဘျဲၣ်ဒီးခီဖျိဒူၣ်ဖိထၢၣ်ဖိသ့ၣ်တဖၣ်အံၤ ပာ်ဖျါထီၣ်၀ဲလၢအဲၣ်ဒိးက့ၤအိၣ်လၢအနီၢ်ကစၢ်ဟံၣ်ဃီအဃိ ဟီၣ်က၀ီၤခိၣ်နၢ်ၦၤဘၣ်မူဘၣ်ဒါ ရဲၣ်ကျဲၤပျၢ်လီၤက့ၤ၀ဲ အဂ့ၢ်န့ၣ် မူကီၢ်ဆၣ် ၦၤဘၣ်မူဘၣ်ဒါစံး၀ဲန့ၣ်လီၤႉ ဘၣ်ဃးတၢ်ပျၢ်လီၤက့ၤသုးကီၣ်ကးအဟံၣ်ဖိဃီဖိတၢ်ဂ့ၢ်အံၤန့ၣ် မူကီၢ်ဆၣ် ၦၤကတိၤတၢ်ပၢ ပဒိၣ်စီၤဟဲဂ့ၤ စံး၀ဲလၢ “တၢ်ပျၢ်လီၤအ၀ဲသ့ၣ်အံၤန့ၣ်ဖဲတၢ်ဒုးပျီပူၤအံၤန့ၣ်ပဖီၣ်န့ၢ်အီၤလီၤႉ ပဖီၣ်န့ၢ်အ၀ဲသ့ၣ်၀ံၤအလီၢ်ခံန့ၣ် ပသမံသမိး၀ဲတၢ်အိၣ်သးမီၤနီၤႉ မ့ၢ်၀ံၤန့ၣ်အ၀ဲသ့ၣ်ပာ်ဖျါထီၣ်ဃ့ထီၣ်၀ဲလၢအဲၣ်ဒိးက့ၤလၢအဟံၣ်အဃီ လၢအမိၢ်အပၢ်အိၣ်န့ၣ်လီၤႉ အဃိသတးဒီးလၢတၢ်ပာ်ဖျါထီၣ်အဖီခိၣ်န့ၣ်ပရဲၣ်ကျဲၤဒီးပပျဲက့ၤအ၀ဲသ့ၣ်လီၤႉ အ၀ဲသ့ၣ်အတၢ်က့ၤအံၤန့ၣ်တမ့ၢ်က့ၤ၀ဲလၢ သုးရ့ၣ်၀ဲၤလီၢ်လၢမူဘၣ်ႉ အ၀ဲသ့ၣ်ကက့ၤ၀ဲဒၣ်လၢအမိၢ်အပၢ် အိၣ်တၢ်အလီၢ်အပုၢ်အ၀ဲၢ်အိၣ်တၢ်လီၢ်လီၤႉ တၢ်သ့ၣ်တဖၣ်န့ၣ်မ့ၢ်အ၀ဲသ့ၣ်အတၢ်ပာ်သးအိၣ်ဒ်န့ၣ်မီၤနီၤႉ ပဆှၢက့ၤအ၀ဲသ့ၣ်ဂ့ၤဂ့ၤဘၣ်ဘၣ်ပကျဲၤန့ၣ်အ၀ဲသ့ၣ်သိလ့ၣ် တၢ်လဲၤတၢ်က့ၤဒီးပဆှၢက့ၤအ၀ဲသ့ၣ်၀ံၤလံ” အဂ့ၢ်န့ၣ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါတကီၢ်ခါခဲအံၤပယီၤသုးအဟံၣ်ဖိဃီဖိလၢတၢ်ပျၢ်လီၤက့ၤ၀ဲသ့ၣ်တဖၣ်အံၤက့ၤတုၤ၀ဲလၢ အတၢ်အိၣ်တၢ်ဆိးလီၢ်လံဒီးဒ်န့ၣ်အသိးဟံၣ်ဒူၣ်လၢအက့ၤတဖၣ်အကျါတနီၤန့ၣ် ချၢၣ်လွံၢ်ထူၣ် သုးကီၣ်ကး(ခမရ-၂၀)သမံသမိးအ၀ဲသ့ၣ်အိၣ်၀ဲအဂ့ၢ်န့ၣ် ပဒိၣ်စီၤဟဲဂ့ၤ စံးအါထီၣ်၀ဲန့ၣ်လီၤႉ ဒ်န့ၣ်အသိးအပူၤကွံာ်လါမးရှး ၄ သီ တုၤ ၁၀ သီ...
ကလုာ်ဒူၣ်တၢ်ပၢၢ်ဆၢကရူၢ်တဖၣ်ကပာ်ဖှိၣ်မၤသကိးတၢ်ဒီးကမျၢၢ်ဒီးထီဒါသကိးတၢ်ကတ့ထီၣ်ထံတမၢၢ်အဂ့ၢ် (KRW)ဃ့ထီၣ်၀ဲ
လါမးရှး ၁၄ သီႇ ၂၀၂၄ နံၣ်ႇ ခ့ၣ်အဲးစံၣ် ကလုာ်ဒူၣ်တၢ်ပၢၢ်ဆၢကရူၢ်တဖၣ်ကပာ်ဖှိၣ်မၤသကိးတၢ်ဒီးကမျၢၢ်ဒီးထီဒါသကိးတၢ်ကတ့ထီၣ်ထံတမၢၢ်လၢအိၣ် ကလုာ်ဒူၣ်တၢ်ပၢဖီလာ်တဖၣ်လၢတအိၣ်ဒီးကမျၢၢ်တၢ်ဘၣ်သးအံၤဘၣ်အဂ့ၢ်န့ၣ် ကညီတၢ်ကွၢ်စူၣ်ကယာ်ထံကျိ ထံကွာ်ကရူၢ်(Karen Rivers Watch)ထုးထီၣ်ပာ်ဖျါဃ့ထီၣ်၀ဲဖဲတနံၤလါမးရှး ၁၄ သီလၢအလီၤဘၣ်၀ဲဟီၣ်ခိၣ်ဒီဘ့ၣ် ထံကျိထံကွာ်ဒီးတၢ်ထီဒါထံတမၢၢ်မုၢ်နံၤအံၤန့ၣ်လီၤႉ ဒ်ကညီတၢ်ကွၢ်စူၣ်ကယာ်ထံကျိထံကွာ်ကရူၢ်လံာ်တၢ်ပာ်ဖျါပူၤပာ်ဖျါ၀ဲအသိးန့ၣ် ကလုာ်ဒူၣ်တၢ်ပၢၢ်ဆၢကရူၢ်တဖၣ် သုတဟ့ၣ်အါထီၣ်တၢ်ကီတၢ်ခဲခီဖျိတၢ်မၤကဲထီၣ်လိၣ်ထီၣ်တၢ်ဂုၤထီၣ်ပသီထီၣ်တၢ်တိာ်ကျဲၤဖဲလၢထံဖိကီၢ်ဖိဘၣ်ဃ့ၢ်မှံဟးဖျိးအကတီၢ်အံၤဘၣ်ဒီးမ့မ့ၢ်တခီကဒုးဖျိးကွံာ်သုးမီၤစိရိၤသနူလၢအတၢ်ဟံးန့ၢ်တၢ်အဘျုးလၢကလုာ်ဒူၣ်အ ဟီၣ်လာ်တၢ်ထူးတၢ်တီၤခီဖျိလီၢ်ခၢၣ်သးတၢ်ဖီၣ်ပျံၤသနူဒီးကပာ်ပနီၣ်ဟီၣ်က၀ီၤတၢ်ပၢတၢ်ပြးသနူအဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ လၢတၢ်ထီဒါထံတမၢၢ်မုၢ်နံၤလံာ်တၢ်ပာ်ဖျါအပူၤန့ၣ်ပထံၣ်ဘၣ်လၢ(KRW)ဃ့ထီၣ်၀ဲတၢ်ဂ့ၢ်(၈)ထံၣ်ဆူ ကလုာ်ဒူၣ် တၢ်ပၢၢ်ဆၢကရူၢ်ႇဒီကလုာ်တၢ်ဃူတၢ်ဖိးတၢ်တၢၣ်ပီၣ်ကီၣ်ကးကရၢ(NUG)ဒီး ထံဂုၤကီၢ်ဂၤတၢ်ကရၢ ကရိသ့ၣ်တဖၣ် အအိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ တၢ်ဃ့ထီၣ်(၈)ထံၣ်အကျါပၣ်ဃုာ်၀ဲတၢ်ကဟ့ၣ်တၢ်ဆီၣ်ထွဲမၤစၢၤကမျၢၢ်လၢအဘၣ်ဃ့ၢ်မှံဟးဖျိးတဖၣ်ဒီး ကပာ်ဖှိၣ်မၤသကိးတၢ်ဒီးဂံၢ်ခီၣ်ထံးတၢ်ကရၢကရိလၢတၢ်ကတိၤန့ၢ်ခဲးတၢ်ဆူထံဂုၤကီၢ်ဂၤဘၣ်ဃးသုးဟံးန့ၢ်တၢ်စိ တၢ်ကမီၤလီၢ်ခံခိၣ်ဃၢၤန့ဆၢၣ်တၢ်ဘၣ်ဒိဘၣ်ထံးဟးဂူၤဟးဂီၤအဂ့ၢ်အကျိၤဒီးကမၤကတၢၢ်ကွံာ်ကလုာ်ဒူၣ်ဟီၣ်က၀ီၤတၢ်သဘံၣ်သဘုၣ်ဒီးကဆိမိၣ်တၢ်ဂုၤထီၣ်ပသီထီၣ်တၢ်တိာ်ကျဲၤတဖၣ်လၢအအိၣ်ဒီးကလုာ်ဒူၣ်အနီၢ်ကစၢ်တၢ်ဆၢတဲာ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ကီၢ်ပယီၤအပူၤဒ်လီမ့ၣ်အူဂံၢ်ဘါဖီလစံၣ်အဖီခိၣ်အသိးဒ်သိးတၢ်ကဒိးန့ၢ်ဘၣ်လီမ့ၣ်အူအဂီၢ်ၦၤဒိၣ်စိဒိၣ်ကမီၤ အစိၤဘၣ်အစိၤတုၤလၢခဲအံၤသုးမီၤစိရိၤဒီးထံဂုၤကီၢ်ဂၤတၢ်ကရၢကရိတဖၣ်ကျဲးစၢးလၢကတ့ထီၣ်ထံတမၢၢ်ဒီး လၢတၢ်န့ၣ်အဃိတၢ်သ့ၣ်တဖၣ်အံၤမ့ၢ်တၢ်လၢအမၤပျံၤၦၤဖုး၀ဲၦၤထူလံၤဖိအနီၢ်ကစၢ်တၢ်စံၣ်ညီၣ်ပၢလီၤသးဒီး တၢ်ပၢတၢ်ပြးသနူတကးဒံးဘၣ်မၤဘၣ်ဒိ၀ဲခိၣ်ဃၢၤန့ဆၢၣ်ဒီးမူခိၣ်ကလံၤသီၣ်ဂီၤတၢ်ဆီတလဲအဂ့ၢ်န့ၣ် (KRW)လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ လၢတၢ်ကတ့ထီၣ်ဟးကၠံထံတမၢၢ်လၢဃိၣ်လိာ်ကျိအံၤအဂီၢ်တချုးတၢ်စးထီၣ်တၢ်တိာ်ကျဲၤဒံးဘၣ်အခါန့ၣ် ပယီၤသုး တ့ထီၣ်ကျဲႇပာ်လီၤအါထီၣ်သုးဂံၢ်ဘါဒီးတၢ်ဒုးကဲထီၣ်၀ဲဒၣ်ဒီးကလုာ်ဒူၣ်ဖီၣ်စုက၀ဲၤကရူၢ်သ့ၣ်တဖၣ်န့ၣ်လီၤႉ ခီဖျိတၢ်ဒုးကဲထီၣ်လၢဟီၣ်က၀ီၤပူၤခဲအံၤခဲအံၤအဃိကမျၢၢ်ၦၤထူလံၤဖိတဖၣ်ဘၣ်သံဘၣ်ၦၢ်ဘၣ်ဒိဘၣ်ထံး၀ဲဒၣ်အါမးအသိးဘၣ်ဃ့ၢ်ထီၣ်ဟးအိၣ်ကဒုလၢတၢ်လီၢ်အဂၤအဂ့ၢ်န့ၣ် (KRW) စံး၀ဲန့ၣ်လီၤႉ တကးဒံးဘၣ်အမဲာ်ညါစှၤနံၣ်အတီၢ်ပူၤအံၤခီဖျိဒုးယၤတၢ်သဘံၣ်သဘုၣ်ဆူၣ်ထီၣ်၀ဲလၢဃိၣ်လိာ်ဒီတကျိၤညါအဃိ ကမျၢၢ်သူၣ်က့သးၦၢ်ဃုာ်ဒီးပိာ်မုၣ်ပိာ်မၢၤဖိဒံဖိသၣ်သံဘၣ်ဒိဘၣ်ထံးႇဟံၣ်ဃီဟးဂီၤတကးဒံးဘၣ် အ၀ဲသ့ၣ်ဘၣ်ကွၢ် ဆၢၣ်မဲာ်၀ဲတၢ်ကီတၢ်ခဲကိးမုၢ်နံၤဒဲးဒီးဒ်န့ၣ်အသိးအ၀ဲသ့ၣ်ဘၣ်သုးလီၢ်သုးကျဲစ့ၢ်ကီးဟဲအါထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တၢ်ပၢၢ်ဆၢသုးပာ်ဖှိၣ်ထီၣ်ဒုး၀ဲသုးကီၣ်ကးအဒုးယာ်သုးကလၢၤလၢအိၣ်ကၠဲးဒိ၀့ၢ်ပူၤ
လါမးရှး ၁၄သီႇ ၂၀၂၄နံၣ်ႇ ခ့ၣ်အဲးစံၣ်ႇ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢႇဒူပျၢ်ယာ်ကီၢ်ရ့ၣ်ႇကီးတရံးကီၢ်ဆၣ်ႇကၠဲးဒိ၀့ၢ်အပူၤကွံာ်မဟါလါမးရှး(၁၃)သီအနံၤန့ၣ်တၢ်ပၢၢ်ဆၢသုးပာ်ဖှိၣ်ကရူၢ်ထီၣ်ဒုး၀ဲသုးကီၣ်ကးအဒုးယာ်သုးကလၢၤလၢအိၣ်ကၠဲးဒိ၀့ၢ်ပူၤအံၤအဂ့ၢ်ကၠဲးဒိလီၢ်က၀ီၤၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ သုးကီၣ်ကးအဒုးယာ်သုးကလၢၤလၢအိၣ်ကၠဲးဒိ၀့ၢ်ပူၤတဖျၢၣ်အံၤတၢ်ပၢၢ်ဆၢသုးပာ်ဖှိၣ်ထီၣ်ဒုးမၤန့ၢ်၀ဲစုက၀ဲၤတနီၤဒီးတၢ်လီၢ်တနီၤလံဘၣ်ဆၣ်မ့မ့ၢ်လၢသုးကီၢ်ကးအဒုးယာ်ခိၣ်အိၣ်ဆိးတၢ်လီၢ်န့ၣ်တၢ်ထီၣ်ဒုး၀ဲတန့ၢ်ဒံးဘၣ်ဒီးသုးကီၣ်ကးတဖၣ်အံၤအကဘီယူၤဟဲဆှၣ်တၢ်တုၤလၢခဲအံၤအိၣ်၀ဲတပယူာ်ဃီအဂ့ၢ်ဂံၢ်ခီၣ်ထံးၦၤဟ့ၣ်တၢ်ကစီၣ်ဖိလၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“မဟါန့ၣ်စးထီၣ်ခးလိာ်သးဖဲ(၅)နၣ်ရံၣ်၀ံၤအလီၢ်ခံဖဲ(၆း၄၅)မံးနံးန့ၣ်တၢ်ပၢၢ်ဆၢသုးပာ်ဖှိၣ်တကပၤမၤန့ၣ်၀ဲသုးကီၣ်ကးတၢ်လီၢ်တနီၤဒီးတၢ်မၤန့ၢ်ကျိဖးဒိၣ်၁၂၀မးမးဃုာ်ဒီးကျိဖးဒိၣ်လၢအဂၤခဲလၢာ်၅ခိၣ်မီၤနီၤႉကျိဖိတနီၤနါက့ပၣ်ဘၣ်ဆၣ်အိၣ်တ့ၢ်ဒံး၀ဲလၢသုးကီၣ်ကးအဒုးယာ်ခိၣ်အိၣ်တၢ်လီၢ်တတီၤန့ၣ်ဒံးမီၤႉအဒုးယာ်ခိၣ်တၢ်လီၢ်န့ၣ်ဒုတုၤလၢတဂီၤညါအံၤန့ၣ်တၢ်ထီၣ်တန့ၢ်ဒံးဘၣ်ဒီးတၢ်လီၢ်၀ဲန့ၣ်ကထီၣ်ညီညီနါက့တန့ၢ်ဒံးဘၣ်ဘၣ်မနုၤအဃိလဲၣ်န့ၣ်အ၀ဲသ့ၣ်န့ၣ်က့ၤပာ်ဖှိၣ်အသးဖဲန့ၣ်အဃိမီၤနီၤႉဒီးမဟါန့ၣ်ဒုသုးကီၣ်ကးအကဘီယူၤဟဲခးလီၤတၢ်ကအိၣ်လၢ(၇)ဘျီညါမီၤႉမ့မ့ၢ်လၢတဂီၤညါအံၤဒုစးထီၣ်လၢမဂီၤတုၤလၢခဲအံၤဒုကဘီယူၤဟဲဆှၣ်အိၣ်သၢဘျီလံကွံာ်လီၤမ့ၢ်ပိၢ်ခံဘျီအ၀ဲတဘျီန့ၣ်ဒုဆှၣ်ကွၢ်တၢ်လီၤ”အဂ့ၢ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါတၢ်ထီၣ်ဒုး၀ဲသုးကီၣ်ကးအဒုးယာ်သုးကလၢၤအတီၢ်ပူၤကၠဲးဒိ၀့ၢ်ပူၤလီၢ်က၀ီၤဖိလၢအအိၣ်တ့ၢ်ဒံးတနီၤတဖၣ်ဘၣ်ဃ့ၢ်ထီၣ်ကွံာ်ခဲလၢာ်အသိးခိၣ်ဃၢၤသ၀ီတနီၤဃ့ၢ်ထီၣ်ကွံာ်ဆူတၢ်လီၢ်အဂၤအိၣ်၀ဲအဂ့ၢ်ဒီးတကီၢ်ခါခဲအံၤကၠဲး၀့ၢ်ဒီတဖျၢၣ်အပူၤအိၣ်က့ၤထဲၦၤသုးဖိသ့ၣ်တဖၣ်လီၤအဂ့ၢ်ဂံၢ်ခီၣ်ထံးၦၤဟ့ၣ်တၢ်ကစီၣ်လၢအဂၤတဂၤစံးစ့ၢ်ကီး၀ဲဖဲမဟါလါမးရှး(၁၃)အနံၤဒ်အံၤန့ၣ်လီၤႉ အ၀ဲစံး၀ဲလၢ“လၢအပူၤကွံာ်ခီန့ၣ်ၦၤတနီၤဒုတဃ့ၢ်ထီၣ်ဘၣ်အိၣ်ကြီအိၣ်ကြး၀ဲသ့ဒံးမီၤနီၤဒီတနီၤခီန့ၣ်တအဲၣ်ဒိးဟးထီၣ်ဘၣ်ကအိၣ်ဘၣ်သးဖဲအဟံၣ်လီၤတုၤလၢတၢ်သီၣ်ထီၣ်တၦၢ်ကတၢၢ်ဘျီဒုအိၣ်၀ဲတဘူၣ်လၢၤဘၣ်မီၤနီၤႉအဃိန့ၣ်၀့ၢ်ပူၤလီၢ်က၀ီၤဖိတကးဘၣ်အခဲအံၤၦၤမဲၢ်တီႇမဲၢ်နီအးႇသ့ၣ်မတၤန့ၣ်ဟဲထီၣ်လၢကၠီၣ်ထၣ်တနီၤႇပိယ့တနီၤႇ လဲၤလီၤလၢလာ်စံၢ်လၢ၀ီၢ်လူတနီၤႇ လၢယီၢ်ဒိတနီၤႇ ဃ့ၢ်၀ဲတကုၤန့ၣ်လီၤႉႉကၠဲးဒိပူၤခီခဲအံၤတၢ်တဟ့ၣ်အိၣ်ကမျၢၢ်နီတဂၤလၢၤဘၣ်မီၤနီၤႉအိၣ်ထဲၦၤသုးဖိလီၤ”အဂ့ၢ်စံးစ့ၢ်ကီး၀ဲန့ၣ်လီၤႉ ကၠဲးဒိ၀့ၢ်ပူၤအံၤအပူၤကွံာ်လါယနူၤအါရံၤ(၂၃)အနံၤအခါခီဖျိတၢ်ဒုးကဲထီၣ်လၢတၢ်ပၢၢ်ဆၢသုးပာ်ဖှိၣ်ဒီးသုးကီၣ်ကးအဘၢၣ်စၢၤအိၣ်၀ဲတပယုာ်ဃီအဃိလီၢ်က၀ီၤကမျၢၢ်လၢအဘၣ်ဃ့ၢ်အိၣ်ကဒုသးတဖၣ်အံၤဘၣ်ဆဲးအိၣ်ကဒု၀ဲအသးအသိးၦၤဃ့ၢ်ထီၣ်ဖဲန့ၣ်အကျါပၣ်ဃုာ်၀ဲဒီးသုးကီၣ်ကးအစုတီၤဖီလာ်ၦၤမၤတၢ်ဖိတဖၣ်အဂ့ၢ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ တကတီၢ်ဃီအပူၤကွံာ်လါဖ့ၤဘြူၤအါရံၤအပူၤသုးကီၣ်ကးကဘီယူၤဟဲခးလီၤတၢ်အိၣ်၀ဲခဲအံၤခဲအံၤအဃိဘၣ်ဒိဘၣ်ထံး၀ဲကမျၢၢ်လီၢ်က၀ီၤဖိဒီးဟံၣ်တၢ်သူၣ်ထီၣ်ကၠိတၢ်သူၣ်ထီၣ်တဖၣ်အိၣ်၀ဲအမဲာ်ညါတၢ်ဘၣ်ဆိကတီၢ်ကွံာ်၀ဲတၢ်မၤလိကၠိတဖၣ်အိၣ်၀ဲအဂ့ၢ်သ့ၣ်ညါဘၣ်စ့ၢ်ကီးန့ၣ်လီၤႉ
နံၣ်လၢကဟဲတၢ်မၤလိနံၣ်အဂီၢ်ကတူၢ်လိာ်၀ဲထဲ(KG)ကၠိဖိသီတဖၣ်လီၤအဂ့ၢ်ခီကီၢ်ဆၣ်သူလ့ၤကၠိၦၤဘၣ်မူဘၣ်ဒါစံး၀ဲ
လါမးရှး ၁၄သီႇ ၂၀၂၄နံၣ်ႇ ခ့ၣ်အဲးစံၣ် ကီၢ်ကၠီၣ်တဲၣ်-ကီၢ်ပယီၤကီၢ်ဆၢႇဆၣ်သူလ့ၤခီကီၢ်ကညီတီၤထီကၠိအံၤႇခါလၢကဟဲ(၂၀၂၄-၂၀၂၅)တၢ်မၤလိနံၣ်အဂီၢ်ကတူၢ်လိာ်က့ၤ၀ဲထဲ(Kindergarten)(KG)ကၠိဖိအသီသ့ၣ်တဖၣ်လီၤအဂ့ၢ်ဘိးဘၣ်ရၤ၀ဲလၢကၠိအ(Facebook Page) စိၣ်ရှၢၣ်မံၤဒံၣ်ယၢၣ်အပူၤဖဲမဟါလါမးရှး(၁၃)သီအနံၤန့ၣ်လီၤႉ ဘၣ်ဃးဒီးတၢ်တတူၢ်လိာ်၀ဲတီၤအဂၤကၠိဖိအသီတဖၣ်လၢၤဘၣ်ဒီးကတူၢ်လိာ်က့ၤ၀ဲထဲ(KG)အတီၤကၠိဖိအသီတဖၣ်လီၤအဂ့ၢ်န့ၣ်ဆၣ်သူလ့ၤကညီတီၤထီကၠိၦၤနဲၣ်တၢ်သရၣ်မုၣ်နီၢ်ဖီရ့ၣ်စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တၢ်ကတူၢ်လိာ်၀ဲထဲ(KG) စံးတၢ်န့ၣ်အခီပညီတၢ်လၢမူၤကၠိၤ(0ne-Two)န့ၣ်မ့ၢ်၀ဲဒၣ်(KG) (0ne-Two)လီၤမီၤဖိသၣ်လၢအသးနံၣ်အိၣ်လွံၢ်နံၣ်ၦဲၤထီၣ်န့ၣ်ကမ့ၢ်၀ဲ-(KG-1)ဒီးယဲၢ်နံၣ်ၦဲၤထီၣ်တဖၣ်န့ၣ်ကမ့ၢ်၀ဲ(Kindergarten)(KG)စဲးစဲးမီၤႉခီဖျိလၢတၢ်လီၢ်တၢ်ကျဲပဘၣ်သိၣ်လိတၢ် (Tent)အပူၤန့ၣ်တဘၣ်ဘျီးဘၣ်ဒါဒီးကီၢ်ကၠီၣ်တဲၣ်ပဒိၣ်အတၢ်ကူၣ်ဘၣ်ကူၣ်သ့အတၢ်သိၣ်တၢ်သီဘၣ်အဃိန့ၣ်ပဘၣ်မၤစှၤလီၤ၀ဲဒၣ်ပၦၤကၠိဖိႉအ၀ဲသ့ၣ်မၢပပာ်လီၤ(၈၀၀)လီၤႉခီဖျိလၢတၢ်ဂ့ၢ်အကလုာ်ကလုာ်ဒီးၦၤလိၣ်ဘၣ်၀ဲဒၣ်တၢ်မၤလိမၤဒိးအဃိန့ၣ်ပဘံၣ်လီၤပမဲာ်ဒီးပတလူၤပိာ်ထွဲ၀ဲအတၢ်သိၣ်တၢ်သီတၢ်ဘျၢ၀ံၤပတူၢ်လိာ်၀ဲကၠိဖိအဂၤတကထိအဃိန့ၣ်တနံၣ်ညါအံၤနါက့န့ၣ်အ၀ဲသ့ၣ်ဟဲတဲၦၤလံခီဖျိလၢသုတၢ်လီၢ်တၢ်ကျဲတ(Secure)ဘၣ်သုသိၣ်လိတၢ်လၢ(Tent) ပူၤန့ၣ်တကြၢးဘၣ်အဃိန့ၣ်ဒီးပဟံ၀ဲဒၣ်ကၠိဖိအသီတသ့ဘၣ်ႉပဃုတၢ်လီၢ်တၢ်ကျဲတဘၣ်ဘၣ်အဃိန့ၣ်ဒီးမ့ၢ်တၢ်ဂ့ၢ်ကီလၢပဂီၢ်မီၤ”အဂ့ၢ်စံးဘၣ်ခ့ၣ်အဲၣ်စံၣ်ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါနံၣ်လၢကဟဲကၠိတၢ်မၤလိအပူၤတတူၢ်လိာ်စ့ၢ်ကီး၀ဲ(GED)ကၠိဖိအသီလၢကဟဲနုာ်လီၤဒိးစဲးလၢတၢ်ချၢတဖၣ်လၢၤဘၣ်ဒီးမ့မ့ၢ်တခီကတူၢ်လိာ်၀ဲထဲကၠိဖိလီၢ်လံၤအအိၣ်တ့ၢ်ပာ်လၢကၠိတဖၣ်ကနုာ်လီၤဒိးစဲးလီၤအဂ့ၢ်ဒုးသ့ၣ်ညါစံး၀ဲတဘျီဃီစ့ၢ်ကီးန့ၣ်လီၤႉ တကးဒံးဘၣ်ႇဘၣ်ဃးဒီးကၠိအံၤကၠိဖိအနီၣ်ဂံၢ်အါတလၢအဖီခိၣ်တၢ်ဂ့ၢ်အံၤကၠိမ့ၢ်တလူၤပိာ်ထွဲ၀ဲဒ်ကၠီၣ်တဲၣ်ကူၣ်သ့ခိၣ်နၢ်တဖၣ်နဲၣ်လီၤ၀ဲအသိးဘၣ်န့ၣ်တၢ်ဂ့ၢ်ကီပိာ်ထွဲထီၣ်သးသ့၀ဲလၢတၢ်ကဘၣ်ကးတံာ်ကွံာ်ကၠိသ့ၣ်တဖၣ်အိၣ်ထီၣ်၀ဲသ့အဂ့ၢ်ဒုးသ့ၣ်ညါစ့ၢ်ကီး၀ဲဒၣ်န့ၣ်လီၤႉ ဆၣ်သူလ့ၤကၠိအံၤသိၣ်လိ၀ဲစးထီၣ်လၢကတီၤဆိအတီၤတုၤလၢတဆံခံတီၤကၠိဖိအတီၤသ့ၣ်တဖၣ်ဒီးသိၣ်လိ၀ဲလံာ်အကလုာ်ကလုာ်အကျါသိၣ်လိဃုာ်စ့ၢ်ကီး၀ဲဒီးကညီလံာ်ဖးန့ၣ်လီၤႉဒီးကၠိဖိလၢအထီၣ်၀ဲတဆံခံတီၤသ့ၣ်တဖၣ်အံၤတုၤမ့ၢ်အဖျိထီၣ်ဒ်သိးကန့ၢ်ဆဲးထီၣ်ဘၣ်ဖၠၣ်စိမိၤကၠိလၢကၠီၣ်တဲၣ်ပူၤအဂီၢ်မၤလိန့ၢ်၀ဲ(General Educational Development)စ့ၢ်ကီးအသိးဃုန့ၣ်၀ဲကၠိဖိတၢ်မၤစၢၤလၢကထီၣ်ဖၠၣ်စိမိၤစ့ၢ်ကီးအဂ့ၢ်ကၠိၦၤဘၣ်မူဘၣ်ဒါတဖၣ်စံး၀ဲန့ၣ်န့ၣ်လီၤႉ တကတီၢ်ဃီႇကီၢ်ပယီၤအပူၤကွံာ်တချူးသုးဟံန့ၢ်တၢ်စိကမီၤဒံးဘၣ်အခါဆၣ်သူလ့ၤကၠိအံၤကိးနံၣ်ဒဲးကၠိဖိနီၢ်ဂံၢ်အိၣ်၀ဲထဲ(၈၀၀)ခိၣ်ဃၢၤဘၣ်ဆၣ်စးထီၣ်ဖဲ(၂၀၂၁)နံၣ်သုးဟံန့ၢ်တၢ်စိကမီၤ၀ံၤအလီၢ်ခံကၠိအံၤကၠိဖိနီၢ်ဂံၢ်အါထီၣ်၀ဲကွ့ၢ်ကွ့ၢ်ဒီးဖဲ(၂၀၂၃-၂၀၂၄)မဟိတနံၣ်ကၠိတၢ်မၤလိနံၣ်အပူၤကၠိဖိနီၢ်ဂံၢ်အိၣ်၀ဲတုၤထီၣ်လၢ(၁၀၅၀)ဂၤဃၣ်ဃၣ်အဂ့ၢ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ဒ်န့ၣ်အသိးသုးဟံန့ၢ်တၢ်စိကမီၤလၢ(၃)နံၣ်အတီၢ်ပူၤကီၢ်ကၠီၣ်တဲၣ်-ကီၢ်ပယီၤကီၢ်ဆၢမဲဆီး၀့ၢ်ပူၤခီကီၢ်ကၠိလၢအဂၤတဖၣ်စ့ၢ်ကီးကၠိဖိနီၢ်ဂံၢ်ဟဲအါထီၣ်အိၣ်၀ဲအဃိဒ်သိးကဖိးမံလိာ်သးဒီး ကီၢ်ကၠီၣ်တဲၣ်ကူၣ်သ့ခိၣ်နၢ်တဖၣ်အတၢ်ပာ်ပနီၣ်ကၠိဖိနီၢ်ဂံၢ်အဂီၢ်ကၠိလၢအဂၤတဖၣ်စ့ၢ်ကီးတနီၤတတူၢ်လိာ်၀ဲကၠိဖိအသီလၢၤဘၣ်အိၣ်စ့ၢ်ကီး၀ဲဒၣ်အဂ့ၢ်သ့ၣ်ညါဘၣ်န့ၣ်လီၤႉ ဆၣ်သူလ့ၤခီကီၢ်ကညီတီၤထီကၠိအံၤခီဖျိကီၢ်ပူၤတၢ်ဒုးတၢ်ယာ်အဃိဒ်သိးကၠိဖိတဖၣ်ကဒိးန့ၣ်မၤလိတၢ်အဂီၢ်ဖဲ(၁၉၉၉)နံၣ်အခါတၢ်စးသူၣ်ထီၣ်၀ဲကၠိအံၤဒီးအဆိကတၢၢ်တၢ်မၤလိနံၣ်အပူၤထံဆၢကီၢ်ဆၢကညီဖိဒံဖိသၣ်လၢဘၣ်ဃ့ၢ်တၢ်ဒုးတၢ်ယာ်တဖၣ်ဟဲနုာ်လီၤမၤ၀ဲတၢ်အိၣ်၀ဲထဲ(၂၅)ဂၤအဂ့ၢ်ၦၤဘၣ်မူဘၣ်ဒါစံး၀ဲန့ၣ်လီၤႉ
မုၢ်တြီၢ်ကီၢ်ရ့ၣ် ကညီသးစၢ်ကရၢမၤ၀ဲတၢ်သူၣ်ထီၣ်န့ၢ်သးစၢ်ကံၢ်စီတၢ်မၤလိကၠိပျၢ်အမူး၀ံၤ၀ဲ
လါမးရှး ၁၄ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်ကညီသးစၢ်ကရၢမၤ၀ဲတၢ်သူၣ်ထီၣ်န့ၢ်သးစၢ်ကံၢ်စီ တၢ်မၤလိ(Karen Youth Capacity Building Training)ကၠိပျၢ်အမူးအံၤဘၣ်တၢ်မၤအီၤဖဲလါမးရှး(၁၁) သီအနံၤအဂ့ၢ်န့ၣ် ခ့ၣ်အဲၣ်ယူၣ်မုၢ်တြီၢ်တၢ်ကစီၣ်ပာ်ဖျါ၀ဲ ဖဲလါမးရှး(၁၂)သီအနံၤန့ၣ်လီၤႉ တၢ်ဟ့ၣ်သးစၢ်ကံၢ်စီတၢ်မၤလိဘျီ၀ဲအံၤၦၤကၠိဖိမုၣ်ခွါဟဲထီၣ်၀ဲဒၣ်(၂၀)ဂၤဒီးတၢ်မၤလိအတၢ်ပညိၣ်ခီန့ၣ် မ့ၢ်ဒ်သိးတၢ်ကဒုးအိၣ်ဖျဲၣ်ထီၣ်န့ၢ်၀ဲအဲၣ်ကလုာ်သးစၢ်ခိၣ်နၢ်တဖၣ်လၢကလုာ်ဒံၣ်မိၣ်ကရ့ၣ်စံၣ်တၢ်ပၢၢ်ဆၢအဂီၢ်ႇ ကမၤစၢၤဆီၣ်ထွဲခ့ၣ်အဲၣ်ယူၣ်အတၢ်ပာ်လီၤကျဲသနူဒီးကအိၣ်ဒီးတၢ်သူၣ်ဆူၣ်သးဂဲၤလၢတၢ်မၤရဲၣ်ကျဲၤအ ပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ တၢ်မၤ၀ဲတၢ်သူၣ်ထီၣ်န့ၢ်သးစၢ်ကံၢ်စီတၢ်မၤလိအံၤမ့ၢ်ဒ်သိးသးစၢ်တဖၣ်ကသ့ၣ်ညါနၢ်ပၢၢ်ဘၣ်ဃးထံရူၢ်ကီၢ်သဲးႇ ကလုာ်ဂ့ၢ်၀ီဒီးတၢ်ပၢဆှၢရဲၣ်ကျဲၤကံၢ်စီတၢ်သ့တၢ်ဘၣ်တဖၣ်အဂီၢ်အဂ့ၢ်န့ၣ် ကညီသးစၢ်ကရၢ(KYO) လီၢ်ခၢၣ်သးကရၢခိၣ် ပဒိၣ်စီၤလၢၢ်နၢၣ်စံး၀ဲဒ်အံၤန့ၣ်လီၤႉ “ပ၀ဲကညီသးစၢ်ကရၢအမူအဒါန့ၣ်ပဘၣ်သူၣ်ထီၣ်ၦၤသူၣ်ဘီသးစၢ်သ့ၣ်တဖၣ်ဒီးဘၣ်ဒုးအိၣ်ဖျဲၣ်ထီၣ်၀ဲစၢၢ်သွဲၣ်သီခိၣ် နၢ်သ့ၣ်တဖၣ်အဃိန့ၣ်ဒီးတၢ်သ့ၣ်ညါနၢ်ပၢၢ်ဘၣ်ဃးထံရူၢ်ကီၢ်သဲးမ့ၢ်ဂ့ၤႇ ကလုာ်ဂ့ၢ်၀ီမ့ၢ်ဂ့ၤႇ တၢ်သ့ပၢဆှၢရဲၣ်ကျဲၤ မ့ၢ်ဂ့ၤႇ တၢ်သ့တၢ်ဘၣ်ကံၢ်စီသ့ၣ်တဖၣ်လိၣ်၀ဲအဖီခိၣ်န့ၣ်ကညီသးစၢ်သ့ၣ်တဖၣ်မၤ၀ဲ တၢ်မၤလိအံၤမီၤနီၤႉ အဃိမ့ၢ်တၢ်လၢအရ့ဒိၣ်၀ဲလၢကဆဲးဟံထီၣ်ဖီၣ်ထီၣ်မူဒါလၢဆူညါအဂီၢ်” အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ တၢ်ဟ့ၣ်တၢ်မၤလိဘျီ၀ဲအံၤတၢ်စးထီၣ်မၤအီၤဖဲအပူၤကွံာ်လါယနူၤအါရံၤ(၈)သီတုၤလါမးရှး(၁၁)သီ တၢ်ဆၢကတီၢ်လၢ(၂)လါဘျဲၣ်အတီၢ်ပူၤဒီးတၢ်မၤလိအပူၤတၢ်မၤလိန့ၢ်၀ဲ ခိၣ်နၢ်တၢ်တီခိၣ်ရိၣ်မဲတၢ် ပၢဆှၢရဲၣ်ကျဲၤႇ ခ့ၣ်အဲၣ်ယူၣ်လီၢ်ခၢၣ်သးတၢ်ဘျၢခိၣ်သ့ၣ်ႇ ၀ဲၤကျိၤသ့ၣ်တဖၣ်အကျဲသနူဒီးကညီသးစၢ်ကရၢဒီးကညီပိာ်မုၣ်ကရၢ ဂံၢ်ခီၣ်ထံးတၢ်ဘျၢခိၣ်သ့ၣ်ဃုာ်ဒီးတၢ် ဂ့ၢ်ခိၣ်တီလၢအဂုၤအဂၤသ့ၣ်တဖၣ်တၢ်မၤလိန့ၢ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ တၢ်သူၣ်ထီၣ်န့ၢ်သးစၢ်ကံၢ်စီတၢ်မၤလိပျၢ်အမူးတၢ်ရဲၣ်တၢ်ကျဲၤအပူၤန့ၣ်တၢ်တဲဖျါထီၣ်က့ၤ၀ဲတၢ်မၤလိအဂ့ၢ်အကျိၤႇ တၢ်ဟ့ၣ်လီၤက့ၤၦၤကၠိဖိလၢအဟဲထီၣ်တၢ်မၤလိသ့ၣ်တဖၣ်အံၤလံာ်အုၣ်သးႇ တၢ်ဟ့ၣ်လီၤက့ၤ၀ဲခိၣ်ဖး ဒီးခိၣ်နၢ်လၢအဟဲထီၣ်တဖၣ်ကတိၤဟ့ၣ်ဂံၢ်ဟ့ၣ်ဘါလီၤတၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးတၢ်ပျၢ်တၢ်မၤလိမူးဘျီ၀ဲအံၤန့ၣ် ခ့ၣ်အဲၣ်ယူၣ်လီၢ်ခၢၣ်သးခိၣ်နၢ်ႇ ကညီသးစၢ်ကရၢလီၢ်ခၢၣ်သးခိၣ် နၢ်ႇ ကီၢ်ရ့ၣ်ခိၣ်နၢ်ဒီး၀ဲၤကျိၤ၀ဲၤဒ့ခိၣ်နၢ်သ့ၣ်တဖၣ်ဟဲထီၣ်၀ဲခဲလၢာ်(၃၇)ဂၤအဂ့ၢ်န့ၣ် မုၢ်တြီၢ်တၢ်ကစီၣ်ပာ်ဖျါ၀ဲ အသိး သ့ၣ်ညါဘၣ်န့ၣ်လီၤႉ
တၢ်ထီၣ်မၤန့ၢ် (သ့ၤညါညံၤနီၤ) ပယီၤသုးခီၣ်ချ့သုးရ့ၣ်(၃၅၅)သုးလၢၤ၀ံၤအလီၢ်အခါ (KNLA) တၢ်မၤန့ၢ်တၢ်စုက၀ဲၤ အါအါဂီၢ်ဂီၢ်
လါမးရှး ၁၃ သီႇ ၂၀၂၄နံၣ်ႇ ခ့ၣ်အဲးစံၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တၢ်ပၢၢ်ဆၢသုးကျိၤပာ်ဖှိၣ်သ့ၣ်တဖၣ်ထီၣ်မၤန့ၢ်ကွံာ်၀ဲပယီၤသုးကီၣ်ကးအသုးကလၢၤလၢအိၣ်ဆီလီၤအသးဖဲ(ရၤမတံကီၢ်ဆၣ်ႇ သ့ၣ်ကါညံၤနီၤ)၀ံၤအလီၢ်ခံတၢ်မၤန့ၣ်သုးကီၣ်ကး စုက၀ဲၤကျိချံၦာ်သၣ်အါအါဂီၢ်ဂီၢ်အဂ့ၢ်(KNLA)လီၢ်ခၢၣ်သးပာ်ဖျါ၀ဲဖဲတနံၤအံၤလါမးရှး(၁၃)သီအနံၤန့ၣ်လီၤႉ ပယီၤသုးပၢဆှၢရဲၣ်ကျဲၤ၀ဲၤလီၢ်ခိၣ်သ့ၣ်(စကခ-၁၂)အစုတီၤဖီလာ်(ခမရ-၃၅၅)လၢအအိၣ်ဆီလီၤသးဖဲ(ရၤမတံၤ ကီၢ်ဆၣ်)(သ့ၣ်ကါညံၤနီၤ)ဟီၣ်ကအပူၤအံၤဖဲပူၤကွံာ်လါမးရှး(၇)သီအနံၤန့ၣ်ကညီဒီကလုာ််တၢ်ထူၣ်ဖျဲးသုးမုၢ်ဒိၣ်(KNLA)တၢ်ပၢၢ်ဆၢသုးပာ်ဖှိၣ်တဖၣ်ထီၣ်မၤန့ၢ်ကွံာ်၀ဲသုးကလၢၤအံၤအဂ့ၢ်သ့ၣ်ညါဘၣ်န့ၣ်လီၤႉ တၢ်ထီၣ်မၤန့ၢ်သုးကလၢၤဘျီ၀ဲအံၤအပူၤန့ၣ်တၢ်မၤန့ၢ်သုးကီၣ်ကးတၢ်စုက၀ဲၤဒ်အမ့ၢ်(RPG ၊ NATO)ကျိစဲးႇ ကျိဖိအ ကလုာ်ကလုာ်ခဲလၢာ်(၁၂၇)ခိၣ်ႇ (၆၀ မမ ၊ ၈၁ မမ)စုက၀ဲၤဒိၣ်ကလုာ်ကလုာ်(၁၃)ခိၣ်ဃုာ်ဒီးကျိချံအကလုာ်ကလုာ် သ့ၣ်တဖၣ်ဒီးသုးတၢ်ပီးတၢ်လီတၢ်ဖိတၢ်လံၤသ့ၣ်တဖၣ်အါအါဂီၢ်ဂီၢ်အဂ့ၢ်(KNLA)လီၢ်ခၢၣ်သးတၢ်ပာ်ဖျါပူၤအသိးသ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါတၢ်ထီၣ်မၤန့ၢ်ပယီၤသုးခီၣ်ချ့သုးရ့ၣ်-၃၅၅သုးကလၢၤ(၄)သီအတီပူၤကွံာ်အလီၢ်ခံဖဲလါမးရှး(၁၁)သီ အနံၤန့ၣ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တၢ်ပၢၢ်ဆၢသုးပာ်ဖှိၣ်သ့ၣ်တဖၣ်ထီၣ်မၤန့ၢ်ကဒီး၀ဲ(ရၤမတံၤ)ကလံၤထံးဟီၣ်က၀ီၤႇ ဖလူပယီၤသုးကလၢၤစ့ၢ်ကီးအဂ့ၢ်သ့ၣ်ညါဘၣ်န့ၣ်လီၤႉ
လၢတၢ်ကဒီၣ်တဲာ်ကွံာ်တၢ်ဆါန့ၢ်ကဘီယူၤသိဆူသုးကီၣ်ကးအိၣ်အံၤအဂီၢ်တၢ်မၤ၀ဲ(Campaign)တၢ်ဟူးတၢ်ဂဲၤတခါ
လါမးရှး ၁၃ သီႇ ၂၀၂၄ နံၣ်ႇ ခ့ၣ်အဲးစံၣ် သုးဟံးန့ၢ်တၢ်စိိတၢ်ကမီၤ၀ံၤလီၢ်ခံဒုးယၤတၢ်သဘံၣ်သဘုၣ်အိၣ်ထီၣ်လၢကီၢ်ပယီၤဒီတဘ့ၣ်ပူၤဒီးပယီၤသုးအံၤသူ ၀ဲကဘီယူၤခးလီၤတၢ်လၢကမျၢၢ်ဒူသ၀ီတၢ်အိၣ်တၢ်ဆိးလီၢ်ကျဲအဃိဒ်သိးတၢ်ကဒီၣ်တဲာ်ကွံာ်တၢ်ဆါန့ၢ်ကဘီယူၤသိဆူသုးကီၣ်ကးအအိၣ်အံၤအဂီၢ်န့ၣ်တၢ်မၤ၀ဲ(Campaign)တၢ်ဟူးတၢ်ဂဲၤလၢ(အီၤလါ)ပူၤတခါအဂ့ၢ်န့ၣ် သ့ၣ်ညါဘၣ်န့ၣ်လီၤႉ (Campaign)တၢ်ဟူးတၢ်ဂဲၤအံၤဘၣ်တၢ်စးထီၣ်မၤအီၤဖဲအပူၤကွံာ်လါမးရှး ၁၀ သီအနံၤဒီး ဒ်သိးထံဂုၤကီၢ်ဂၤတဖၣ် အံၤကဒီၣ်တဲာ်ကွံာ်တၢ်ဆါန့ၢ်ကဘီယူၤသိဆူသုးကီၣ်ကးအအိၣ်အံၤအဂီၢ် ကီၢ်ပူၤကီၢ်ချၢကမျၢၢ်ထံဖိကီၢ်ဖိဃုာ်ဒီး ဖိဒံဖိသၣ်လၢအဘၣ်ဃ့ၢ်မှံဟးဖျိးတဖၣ်ပာ်ဖှိၣ်ထီၣ်သးကွဲးဖျါထီၣ်အ၀ဲသ့ၣ်တၢ်ဘၣ်သးလၢလံာ်က့ ပူၤလၢအမ့ၢ် ပတသးလီကဘီယူၤတၢ်ထီၣ်ဒုးဘၣ်ႇဒီၣ်တဲာ်ကွံာ်တၢ်ဆါန့ၢ်ကဘီယူၤသိႇပအဲၣ်ဒိးဒိၣ်ထီၣ်လၢတၢ်သဘျ့ဃုာ်ဒီးတၢ်ဃ့ထီၣ်တၢ်ဘၣ်သးလၢအဂၤသ့ၣ်တဖၣ်ပၣ်ဃုာ်၀ဲဒၣ်အါမးန့ၣ်လီၤႉ ဘၣ်ဃးတၢ်မၤ၀ဲ(Campaign)တၢ်ဟူးတၢ်ဂဲၤဘျီ၀ဲအံၤန့ၣ် (Burma Campaign UK) ၦၤနဲၣ်တၢ် သရၣ်မုၣ် နၣ်စိၤယါဖါ စံး၀ဲလၢ“ပတၢ်ဟူးတၢ်ဂဲၤအိၣ်၀ဲဒၣ်အါမံၤလၢပကဒိးန့ၢ်ဘၣ်အါထီၣ်၀ဲဒၣ်ထံဂုၤကီၢ်ဂၤအတၢ်ဆီၣ်သနံးလၢသုးမီၤစိရိၤအဖီခိၣ်ဘၣ်ဃးလၢကျိၣ်စ့တၢ်ဆီၣ်သနံးမ့ၢ်ဂ့ၤႇလၢစံၣ်ညီၣ်ပီတ့အတၢ်ဆီၣ်သနံးမ့ၢ်ဂ့ၤဒီးလၢမုၢ်ကျိၤ၀ဲၤကွာ်ဒီးထံရူၢ်ကီၢ်သဲးအတၢ်ဆီၣ်သနံးတဖၣ်မီၤနီၤႉဖဲန့ၣ်အကျါန့ၣ်ပမၤစ့ၢ်ကီးတၢ်ဆီၣ်သနံးတခါလၢဒ်သိးတၢ်ကတြီဃာ်၀ဲဒၣ်ကဘီယူၤသိအတၢ်လဲၤနုာ်လီၤဆူကီၢ်ပယီၤသုးမုၢ်ဒိၣ်အစုပူၤမီၤနီၤႉပမၤသကိးတၢ်ဒီးကီၢ်ပယီၤတၢ်ကရၢကရိႇကလုာ်ဒူၣ်တၢ်ကရၢကရိႇတၢ်ပၢၢ်ဆၢကရူၢ်ကရၢဒီးထံဂုၤကီၢ်ဂၤတၢ်ကရၢကရိတဖၣ်အါမးလီၤႉပဃ့ထီၣ်၀ဲဒၣ်ကီၢ်(UK)ႇ (USA)ႇ (EU)ဒီးထံကီၢ်အဂၤ တဖၣ်လၢကဒီၣ်တဲာ်ဒီးတြီဃာ်၀ဲဒၣ်ကဘီယူၤသိအတၢ်လဲၤနုာ်လီၤလၢကီၢ်ပယီၤအပူၤမီၤနီၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါခီဖျိလၢတၢ်ဟူးတၢ်ဂဲၤအံၤအဃိထံကီၢ်တနီၤဟ့ၣ်၀ဲဒၣ်တၢ်ဆီၣ်သနံးလၢသုးမီၤစိရိၤအဖီခိၣ်အံၤ အိၣ်၀ဲတနီၤလံဒီးဘၣ်ဆၣ်တလၢၦဲၤ၀ဲဒံးဘၣ်မ့မ့ၢ်တခီထံဂုၤကီၢ်ဂၤတဖၣ်တၢ်လၢအ၀ဲသ့ၣ်ဘၣ်ဆဲးမၤ၀ဲအိၣ်အါန့ၢ် အ၀ဲအံၤအိၣ်ဒံး၀ဲအါမးအဂ့ၢ်န့ၣ် သရၣ်မုၣ် နၣ်စိၤယါဖါ စံးအါထီၣ်၀ဲန့ၣ်လီၤႉ တၢ်ဟူးတၢ်ဂဲၤအံၤအတၢ်ပညိၣ်မ့ၢ်ဒ်သိးတၢ်ကမၤစှၤလီၤ၀ဲဒၣ်ကလံၤဒုးသုးႇကမၤစှၤလီၤ၀ဲဒၣ်တၢ်ပျံၤတၢ်ဖုး တၢ်ကိၢ်တၢ်ဂီၤတၢ်ဘၣ်ဃ့ၢ်မှံဟးဖျိးလၢထံဖိကီၢ်ဖိကမျၢၢ်ဘၣ်ကွၢ်ဆၢမဲာ်၀ဲလၢမုၢ်မဆါတနံၤအံၤအဂ့ၢ်န့ၣ် (Burma Campaign UK)ၦၤဘၣ်မူဘၣ်ဒါ စံး၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤလီၢ်ခံသၢနံၣ်အတီၢ်ပူၤအံၤခီဖျိအ၀ဲသ့ၣ်သူ၀ဲကလံၤကျါတၢ်ဒုးအဃိထံဖိကီၢ်ဖိကမျၢၢ် ဘၣ်ဃ့ၢ်မှံဟးဖျိး၀ဲဒၣ်အါအါဂီၢ်ဂီၢ်ဒီးၦၤသ့ၣ်တဖၣ်အံၤအါဒၣ်တက့ၢ်ဘၣ်ဃ့ၢ်မှံဟးဖျိးခီဖျိလၢဒုၣ်ဒါကလံၤဒုးသုး ဟဲခးလီၤတၢ်လၢကဘီယူၤအဃိလီၤအဂ့ၢ်န့ၣ် သရၣ်မုၣ် နၣ်စိၤယါဖါ စံးအါထီၣ်၀ဲန့ၣ်လီၤႉ “စးထီၣ်ဖဲသုးမီၤစိရိၤဟံးန့ၢ်ဆူၣ်ထံကီၢ်တၢ်စိတၢ်ကမီၤပၢဆူၣ်ပၢဆိးတၢ်သၢနံၣ်အတီၢ်ပူၤအံၤန့ၣ်ထံဖိကီၢ်ဖိကမျၢၢ်လၢကီၢ်ပယီၤဒီတဘ့ၣ်အပူၤန့ၣ်ဘၣ်ကီဘၣ်ခဲဘၣ်နးဘၣ်ဖှီၣ်ဘၣ်ဃ့ၢ်မှံဟးဖျိးအိၣ်အါမးလီၤႉလီၤဆီဒၣ်တၢ်လၢကလုာ်ဒူၣ် ဟီၣ်က၀ီၤတဖၣ်အပူၤမီၤနီၤႉအ၀ဲသ့ၣ်တဖၣ်န့ၣ်သူ၀ဲဒၣ်သုးအဂံၢ်အဘါႇကလံၤဒုးသုးအဂံၢ်အဘါ၊ထီၣ်ဒုး၀ဲဒၣ်ကမျၢၢ်ဒီးတၢ်ပၢၢ်ဆၢကရူၢ်ကရၢတဖၣ်မီၤနီၤႉခဲအံၤမ့ဘၣ်တဲန့ၣ်လၢကီၢ်ပယီၤဒီဘ့ၣ်အပူၤန့ၣ်ၦၤဘၣ်ဃ့ၢ်မှံဟးဖျိးခီဖျိလၢကလံၤဒုးသုးအဃိန့ၣ်အိၣ်ဖးအါညါမီၤနီၤႉၦၤဘၣ်ဃ့ၢ်မှံဟးဖျိးအနီၣ်ဂံၢ်အိၣ်(သၢကကွဲၢ်)ဃၣ်ဃၣ်ညါႉအါတက့ၢ်ၦၤတဖၣ်အံၤန့ၣ်ဘၣ်ဃ့ၢ်မှံဟးဖျိးန့ၣ်ခီဖျိလၢဒုးဒါသုးမီၤစိရိၤအကလံၤဒုးသုးဟဲခးလီၤတၢ်လၢကဘီယူၤမ့ၣ်ပိၢ်တဖၣ်လီၤမီၤနီၤ” အဂ့ၢ်န့ၣ် စံး၀ဲန့ၣ်လီၤႉ ခီဖျိပယီၤသုးသူ၀ဲကဘီယူၤအဃိကမျၢၢ်ထံဖိကီၢ်ဖိသံဘၣ်ဒိဘၣ်ထံး၀ဲဒၣ်အါအါဂီၢ်ဂီၢ်ဒီး တကးဒံးဘၣ် ၦၤကမျၢၢ်အဟံၣ်အဃီႇကၠိႇတၢ်ဆါဟံၣ်ႇတၢ်ဘူၣ်တၢ်ဘါတၢ်သူၣ်ထီၣ်စ့ၢ်ကီးဟးဂီၤ၀ဲဒၣ်အါမးန့ၣ်လီၤႉ ဒ်န့ၣ်အသိးသုးဟံးန့ၢ်တၢ်စိတၢ်ကမီၤ၀ံၤလီၢ်ခံကီၢ်ပယီၤအပူၤထံဖိကီၢ်ဖိအဂၤ(သၢကကွဲၢ်)ဃၣ်ဃၣ်ဘၣ်ဃ့ၢ်မှံဟးဖျိး ၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါသုးကီၣ်ကးအံၤခီဖျိအဂံၢ်အဘါလီၤစှၤထီၣ်အဃိသူအါက့ၤ၀ဲဒၣ်ကလံၤကျါတၢ်ဒုးဒီး သုးဒီးၦၤကမျၢၢ်ထံဖိကီၢ်ဖိန့ၣ်အ၀ဲသ့ၣ်တပာ်၀ဲအဒူၣ်အဆၢလၢာ်ဘၣ်အဃိမၤ၀ဲဒၣ်တၢ်ထီၣ်ဒုးလၢကလံၤကျါ ကိးမုၢ်နံၤဒဲးလၢတၢ်လီၢ်အါတီၤအပူၤတုၤလၢခဲအံၤတစုအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ၦၤမၤအီၣ်မုၢ်ကျိၤ၀ဲၤကွာ်လၢအဟးသူ၀ဲကဲၤဘါအမံၤတဖၣ်တၢ်ကဟံးအရ့လီၤတုၤလီၤတီၤလီၤအဂ့ၢ် KNU သုးက့(၂)စံး၀ဲ
လါမးရှး ၁၂သီႇ ၂၀၂၄နံၣ်ႇ ခ့ၣ်အဲးစံၣ်ႇ ၦၤတဂၤကအိၣ်ဘီၣ်အိၣ်ညီအဂီၢ်ဒီးသုးကီၣ်ကးအတၢ်ဘၣ်ဘျူးကအိၣ်အဂီၢ်ၦၤလၢအတီခိၣ်ရိၢ်မဲဒီးဒုးအိၣ်ထီၣ်၀ဲသုးမုၢ်သံၣ်ဘိလၢအသူ၀ဲကဲၤဘါအမံၤတဖၣ်ဒီးမၤတံာ်တာ်မၤဟးဂီၤ၀ဲခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢပၢပြးဒီးကမျၢၢ်တၢ်ဖံးတၢ်မၤတဖၣ်အံၤတၢ်ကဟံး၀ဲအရ့တုၤလီၤတီၤလီၤအဂ့ၢ် KNU သုးက့နီၢ်ဂံၢ်(၂)ထုးထီၣ်ပာ်ဖျါ၀ဲန့ၣ်လီၤႉ ဘၣ်ဃးဒီးၦၤဒုးအိၣ်ထီၣ်၀ဲဂ့ၤဘါသုးမုၢ်ဒိၣ်ဒီးဟ့ၣ်၀ဲသုးတၢ်သိၣ်လိသ့ၣ်တဖၣ်အံၤန့ၣ် KNU သ့ၣ်ညါတ့ၢ်လံ၀ဲအဃိထုးထီၣ်ပာ်ဖျါ၀ဲလံာ်ဟ့ၣ်ပလီၢ်အိၣ်၀ဲဘၣ်ဆၣ်တၢ်မ့ၢ်တလူၤပိာ်ထွဲဒီးမ့ၢ်ဆဲးမၤ၀ဲရုၢ်ရုၢ်န့ၣ်ကဘၣ်တၢ်ကိးထံၣ်ဒီးဟံးန့ၢ်အီၤအရ့လီၤအဂ့ၢ်ဘၣ်ဃးလံာ်ထုးထီၣ်ပာ်ဖျါဖဲလါမးရှး(၇)သီအနံၤသုးက့(၂)ၦၤဘၣ်မူဘၣ်ဒါတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ “ပကထုးထီၣ်လံာ်မ့ၢ်တလူၤပိာ်ထွဲမၤထွဲ၀ဲဘၣ်န့ၣ်ပကကိးထံၣ်တၢၣ်ပီၣ်အီၤႉမတၤသ့ၣ်တဖၣ်မၤလဲၣ်န့ၣ်ပခ့ၣ်အဲၣ်ယူၣ်သ့ၣ်ညါလံပကိးထံၣ်တၢၣ်ပီၣ်အ၀ဲသ့ၣ်မ့၀ံၤအလီၢ်ခံမ့တဒိကနၣ်၀ဲဘၣ်န့ၣ်ပကလဲၤက့ၤလၢတၢ်ဟံအရ့ပတီၢ်မီၤႉသုးက့(၂)သးၦၢ်ၦၤဘၣ်မူဘၣ်ဒါတဖၣ်အိၣ်ဖှိၣ်၀ံၤမးပထုးထီၣ်လံာ်လီၤမီၤႉ ” အဂ့ၢ်စံးဘၣ်ခ့ၣ်အဲးစံၣ်တၢ်ကစီၣ်န့ၣ်လီၤႉ သုးကီၣ်ကးအၦၤကရူၢ်ကရၢလၢအသူ၀ဲကဲၤဘါအမံၤသ့ၣ်တဖၣ်အံၤစးထီၣ်ဖဲအပူၤကွံာ်လါယနူၤအါရံၤအဆၢကတီၢ်နုာ်လီၤ၀ဲလၢသုးက့(၂)လ့ၣ်သိၤဟီၣ်က၀ီၤကဲၤဘါကလုာ်ဒူၣ်အိၣ်ဆိးဒူသ၀ီအပူၤ၀ံၤထၢဖှိၣ်ပာ်ဖှိၣ်၀ဲလီၢ်က၀ီၤဖိတဖၣ်ဒီးတကီၢ်ခါခဲအံၤဟ့ၣ်ထီၣ်၀ဲသုးတၢ်သိၣ်လိလံအဂ့ၢ်လီၢ်က၀ီၤဖိဒီးခ့ၣ်အဲၣ်ယူၣ်တကပၤစံး၀ဲအသိးသ့ၣ်ညါဘၣ်န့ၣ်လီၤႉ တကီၢ်ခါခဲအံၤသုးကီၣ်ကးကမျၢၢ်တၢ်ဘၣ်ကဲသုးအဖီခိၣ်လၢတၢ်ကမၤအါထီၣ်သုးဂံၢ်ဘါအဂီၢ်မ့ၢ်ဆၢကတီၢ်လၢဂုၢ်ကျဲးစၢး၀ဲသၦၢ်ၦၢ်ဒီးၦၤလၢအစံၣ်လီၤဂ့ၤဘါသုးတၢ်သိၣ်လိ၀ံၤတဖၣ်အံၤသုးကီၣ်ကးပျၢ်လီၤအ၀ဲသ့ၣ်လၢကလဲၤဒုးတၢ်လၢဟီၣ်က၀ီၤအဂၤအဃိကမျၢၢ်တဖၣ်သုတပၣ်ဃုာ်ပၣ်ဂီၢ်လၢသုးကီၣ်ကးအတၢ်ကွဲန့ၢ်လွဲန့ၢ်အပူၤတဂ့ၤဒီးမ့မ့ၢ်တခီကဘၣ်ခီၣ်ဆၢထီဒါသကိးအဂ့ၢ် KNU ဟ့ၣ်ဂံၢ်ဟ့ၣ်ဘါစံး၀ဲဖဲလံာ်တၢ်ပာ်ဖျါအပူၤန့ၣ်လီၤႉ တကးဒံးဘၣ်ၦၤလၢအပၢပြး၀ဲသုးမီၤစိၤရိၤသနူတဆီဘၣ်တဆီတဖၣ်အံၤစးထီၣ်လၢ(၁၉၅၃)နံၣ်လံၤလံၤအခါမၤအိၣ်ထီၣ်တၢ်သဘံၣ်သဘုၣ်လၢလ့ၣ်သိၣ်ဟီၣ်ဟီၣ်က၀ီၤအပူၤဒီးမၤ၀ဲတၢ်ဘၣ်ဘျူးထဲအနီၢ်ကစၢ်တဂၤအိၣ်၀ဲအဃိဒုးအိၣ်ထီၣ်၀ဲတၢ်ဘၣ်ဒိဘၣ်ထံးလၢကညီကလုာ်ဒူၣ်အကျါအမဲာ်ညါမၤဟးဂီၤ၀ဲလီၢ်က၀ီၤပူၤန့ဆၢၣ်တၢ်အိၣ်ယၢၤအဂ့ၢ်ခ့ၣ်အဲၣ်ယူၣ်စံး၀ဲန့ၣ်လီၤႉ သုးက့(၂)တကပၤသနာ်က့ဒ်သိးအတၢ်စံၣ်ညီၣ်ပၢလီၤက့ၤအသးဒီးတၢ်ထဲသိးတုၤသိးအဂီၢ်ဂုၢ်ကျဲးစၢး၀ဲအဃိလ့ၣ်သိၣ်ဟီၣ်က၀ီၤပူၤကဲၤဘါကညီကလုာ်ဒူၣ်တဖၣ်ကဟံန့ၢ်က့ၤတၢ်မၤလိလၢတၢ်စံၣ်စိၤတဲစိၤတဖၣ်ဒီးကပၣ်ဃုာ်မၤသကိးတၢ်လၢခ့ၣ်အဲၣ်ယူၣ်အကျဲသနူတၢ်ဖံးတၢ်မၤပူၤအဂ့ၢ်ဆီၣ်တခူထီၣ်၀ဲလၢလံာ်ထုးထီၣ်ပာ်ဖျါအပူၤန့ၣ်လီၤႉ လ့ၣ်သိၣ်ဟီၣ်က၀ီၤအပူၤၦၤလၢအထံၣ်တၢ်တခီတၢၤတဖၣ်အံၤတီခိၣ်ရိၣ်မဲဒုးအိၣ်ထီၣ်၀ဲဂ့ၤဘါသုးမုၢ်ဒိၣ်အဂံၢ်ဘါပာ်ဖှိၣ်ကအိၣ်၀ဲလၢအကယၤဒီးဒုးထီၣ်၀ဲသုးတၢ်သိၣ်လိလၢသုးကီၣ်ကးပၢပြးအစုတီၤဖီလာ်အံၤမ့ၢ်၀ဲတၢ်ဒုးအိၣ်ထီၣ်တၢ်သဘံၣ်ကဘုၣ်လၢကလုာ်ဒူၣ်ဖိတဖၣ်အကျါတကးမ့ၢ်တၢ်မၤလီၤစၢၤသွဲၣ်အမံၤအဃိဘၣ်ဃးဒီးသုးကီၣ်ကးအတၢ်မၤအံၤန့ၣ်ကဲၤဘါစၢၤသွဲၣ်လီၢ်က၀ီၤၦၤထူလံၤဖိတဖၣ်ဒုးသ့ၣ်ညါစံး၀ဲန့ၣ်လီၤႉ