ခီဖျိကျိဖးဒိၣ်အဃိမူကီၢ်ဆၣ်ဟီၣ်က၀ီၤ (၇)သီအတီၢ်ပူၤ ကမျၢၢ်သံ(၇)ဂၤ ဘၣ်ဒိ(၁၅)ဂၤ
လါမးရှး ၁၂ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကီၢ်သူလ့ၤတၢ်ပၢချၢၣ်လွံၢ်ထူၣ်ကီၢ်ရ့ၣ် မူကီၢ်ဆၣ် လၢ(၇)သီအတီၢ်ပူၤ ခီဖျိပယီၤသုးခးလီၤကျိဖးဒိၣ်ႇ ဟဲတ့ၢ်လီၤဒြိမ့ၣ်ပိၢ်ႇ ကဘီယူၤဟဲခးလီၤတၢ်အဃိ ကမျၢၢ်သံ(၇)ဂၤ ဘၣ်ဒိ(၁၅)ဂၤအဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပာ်ဖျါ၀ဲဖဲလါမးရှး(၉)သီအနံၤန့ၣ်လီၤႉ စးထီၣ်လါမးရှး(၄)သီတုၤ(၁၀)သီ လၢ(၇)သီအတီၢ်ပူၤ ခီဖျိပယီၤသုးခးလီၤကျိဖးဒိၣ်ဟဲတ့ၢ်လီၤဒြိမ့ၣ်ပိၢ်လၢဒူသ၀ီ ကမျၢၢ်တၢ်အိၣ်တၢ်ဆိးလီၢ်အဃိ ၦၤကမျၢၢ်သံဘၣ်ဒိဘၣ်ထံးဘၣ်ကဲထီၣ်သးတကးဒံးဘၣ် ၦၤကမျၢၢ်အဟံၣ်အဃီ ဟးဂီၤ၀ဲအါမးဒီးကၠိတၢ်သူၣ်ထီၣ်စ့ၢ်ကီးဟးဂီၤ၀ဲဒၣ်(၁)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးလံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါမူကီၢ်ဆၣ်ဒူသ၀ီတဖၣ်အပူၤမ့ၢ်လၢပယီၤသုးနုာ်လီၤလၢကမျၢၢ်ဒူသ၀ီပူၤႇ ခးလီၤကျိဖးဒိၣ် ဟဲတ့ၢ်လီၤဒြိမ့ၢ်ပိၢ်ကိးနံၤဒဲးဃၣ်ဃၣ်အဃိတုၤလၢခဲအံၤသ၀ီ(၂၅)ဖျၢၣ် ၦၤနီၣ်ဂံၢ်(၁၀၀၀၀)ဘျဲၣ်ဘၣ်ဃ့ၢ်ထီၣ်၀ဲ အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ သ့ၣ်ညါဘၣ်န့ၣ်လီၤႉ ဒ်ခ့ၣ်အဲၣ်ယူၣ်လံာ်တၢ်ပာ်ဖျါပူၤပာ်ဖျါ၀ဲအသိးန့ၣ်ဒူသ၀ီလၢအဘၣ်ဃ့ၢ်ထီၣ်တဖၣ်န့ၣ်မ့ၢ်၀ဲ သပၠ့ၤကိႇ ယ့ၤတွ့ကိကၠံႇ ယ့ၤတွ့ကိလ့ႇ အိပ့ၤစူၣ်ႇ အူၣ်ရှ့ၣ်ကိႇ ၀ဲၣ်တူႇ အညၤစူၣ်ႇ ငနွါဆ့ၣ်ႇ ယ့တဲၣ်ကိႇ နီကိႇ ယ့လဲကယ့ၤႇ ယ့လဲဘမၤႇ ထွ့နံၤကိႇ ယၢၤမၠိအီၤႇ တမၤခီႇ တီၤစူၣ်(မုၢ်ထီၣ်)ႇ တီၤစူၣ်(မုၢ်နုာ်) ႇ တမီမၣ်ႇ ယွၤကၠံအ့ၤႇ ကၠူကိႇ မယၢစ့ၤကၠံႇ မယၢစ့ၤလ့ႇ ယ့လဲ(မုၢ်နုာ်)ႇ ၀ဲၣ်တူ(မုၢ်နုာ်)ဒီးသ့ၤကၢပ့ၤသ၀ီသ့ၣ်တဖၣ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးခီဖျိပယီၤသုးကီၣ်ကးအတၢ်ဟူးတၢ်ဂဲၤသ့ၣ်တဖၣ်အံၤအဖီခိၣ် ကဲထီၣ်စ့ၢ်ကီး၀ဲတၢ်ကီတၢ်ခဲလၢ ကမျၢၢ်တၢ်အိၣ်မူတၢ်ဘံၣ်တၢ်ဘၢအဂီၢ်အဂ့ၢ်န့ၣ် ကီၢ်ဆၣ်...
သုးကီၣ်ကးအသုးကလၢၤအရ့ဒိၣ်(၃)ဖျၢၣ်ဟးထီၣ်ကွံာ်၀ဲလၢအသုးကလၢၤပူၤအဂ့ၢ်((KNDF)ထုးထီၣ်ပာ်ဖျါ၀ဲ
လါမးရှး ၁၁သီႇ ၂၀၂၄နံၣ်ႇ ခ့ၣ်အဲးစံၣ်ႇ ကရံၣ်နံၣ်ကီၢ်စဲၢ်အပူၤႇအပူၤကွံာ်မဟါလါဖ့ၤဘြူၤအါရံၤတၢ်ဒုးအပူၤသုးကီၣ်ကးအသုးကလၢၤအရ့ဒိၣ်(၃)ဖျၢၣ်ဟးထီၣ်ကွံာ်၀ဲအဂ့ၢ်ကရံၣ်နံၣ်ဒီကလုာ်တၢ်ဒီသဒၢသုး(KNDF)လီၢ်ခၢၣ်သးတၢ်ဘိးဘၣ်ရၤလီၤ၀ဲၤကျိၤထုးထီၣ်ပာ်ဖျါ၀ဲဖဲမဟါလါမးရှးအသီ(၁၀)အနံၤန့ၣ်လီၤႉ သုးကီၣ်ကးအသုးကလၢၤအရ့ဒိၣ်(၃)ဖျၢၣ်လၢဟးထီၣ်ကွံာ်၀ဲဖဲကရံၣ်ကီၢ်စဲၣ်အပူၤအံၤမ့ၢ်၀ဲသုးကီၣ်ကးအသုးကလၢၤလၢအိၣ်ဆီလီၤအသးဖဲဟွ့ၣ်ပိလီဟီၣ်က၀ီၤကၠါပစၣ်ကၠံသုးကလၢၤႇနၣ်ပၣ်ထံကျိနံၤဟွ့ၤအိသုးကလၢၤဒီးဃိၣ်လိာ်ကျိနံၤတးတမီၣ်သုးကလၢၤသ့ၣ်တဖၣ်န့ၣ်လီၤႉဒီးသုးကလၢၤသၢဖျၢၣ်အံၤန့ၣ်ခီဖျိကဘီယူၤဟဲကိးက့ၤ၀ဲအ၀ဲသ့ၣ်အဃိပာ်တ့ၢ်ကွံာ်၀ဲအတၢ်လီၢ်တၢ်ကျဲၤဒီးဟးထီၣ်ကွံာ်၀ဲအဂ့ၢ်(KNDF)လီၢ်ခၢၣ်သးတၢ်ဘိးဘၣ်ရၤလီၤ၀ဲၤကျိၤမူဒါခိၣ်လၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“သုးကီၣ်ကးအသုးကလၢၤလၢအိၣ်ဆီလီၤသးလၢတၢ်မဲာ်ညါန့ၣ်ဒုအိၣ်၀ဲသၢဖျၢၣ်ပမ့ကွၢ်က့ၤလၢအပူၤကွံာ်သုးကီၣ်ကးတၢ်မၤနီၣ်တၢ်ဒူၣ်အဆၢဒုကအိၣ်၀ဲလၢရှါတီကီၢ်ဆၣ်ပူၤမီၤႉဒီးတၢ်လီၢ်သၢတီၤအံၤအိၣ်၀ဲလၢနၣ်ပၣ်ကျိကၢၢ်နံၤဃိၣ်လိာ်ကျိကၢၢ်နံၤဒီးကရ့ၣ်နံၣ်ကီၢ်စဲၣ်ကီၢ်ကၠီၣ်တဲၣ်-ကီၢ်ပယီၤကီၢ်ဆၢဟီၣ်က၀ီၤပူၤအဃိကဲ၀ဲတၢ်လီၢ်လၢအရ့ဒိၣ်၀ဲလၢအ၀ဲသ့ၣ်အဂီၢ်မီၤနီၤႉတချူးအ၀ဲသ့ၣ်ဟးထီၣ်အခါအပူၤကွံာ်စှၤကိာ်သီန့ၣ်ပ၀ဲ(KNDF)တၢ်ပၢၢ်ဆၢပာ်ဖှိၣ်ပထီၣ်ဒုးန့ၢ်ကွံာ်၀ဲသုးကီၣ်ကး(၁၂မဲၤကိ)သုးကလၢၤမီၤႉဖဲသုးကလၢၤ၀ဲအံၤလီၤကွံာ်အလီၢ်ခံန့ၣ်ကၠါပစၣ်ကၠံသုးကလၢၤဒီးဟွ့ၤအိသုးကလၢၤန့ၣ်ဟးထီၣ်ဂုၤကွံာ်အလီၢ်ခံလီၤမီၤႉဒ်န့ၣ်အသိးတးတမီၣ်သုးကလၢၤနါက့ဟးထီၣ်ကွံာ်၀ဲမီၤနီၤႉတမ့ၢ်ဟးထီၣ်လၢအခီၣ်ဘၣ်အ၀ဲသ့ၣ်ကဘီယူၤဟဲကိးက့ၤအီၤအဃိဟးထီၣ်ကွံာ်၀ဲမီၤႉပတၢ်ဆိမိၣ်န့ၣ်အ၀ဲသ့ၣ်(၁၂မဲၤကိ)သုးကလၢၤလီၤကွံာ်အဃိဟးထီၣ်ကွံာ်၀ဲဒၣ်မီၤႉ” အဂ့ၢ်စံးဘၣ်ခ့ၣ်အဲၣ်စံၣ်တၢ်ကစီၣ်န့ၣ်လီၤႉ လၢန့ၣ်အမဲာ်ညါသုးကီၣ်ကးအသုးကလၢၤသၢဖျၢၣ်အံၤအသုးဂံၢ်ဘါပာ်ဖှိၣ်ခဲလၢာ်ကအိၣ်၀ဲ(၂၀၀)ဃၣ်ဃၣ်ဒီးသုးကလၢၤသ့ၣ်တဖၣ်အံၤအရ့ဒိၣ်လၢသုးကီၣ်ကးဒုးယာ်ဂ့ၢ်၀ီအဂီၢ်အသိးအရ့ဒိၣ်စ့ၢ်ကီး၀ဲလၢတၢ်ပၢၢ်ဆၢသုးပာ်ဖှိၣ်ကရူၢ်တဖၣ်အဂီၢ်အဂ့ၢ်အ၀ဲစံးအါထီၣ်၀ဲဒၣ်န့ၣ်လီၤႉ တကးဒံးဘၣ်လါယနူၤအါရံၤ(၁၅)သီတုၤလၢဖ့ၤဘြူၤအါရံၤ(၁၂)သီတလါအပူၤသုးကီၣ်ကးအၦၤသံ၀ဲ(၁၆၀)အကျါပၣ်ဃုာ်၀ဲအသုးခိၣ်ဒိၣ်စိႇသုးခိၣ်ဒိၣ်ဂီၢ်ဂ့ၢ်ႇ သုးခိၣ်စိဃုာ်ဒီးပၢၤကီၢ်တဖၣ်အိၣ်၀ဲအသိး(KNDF)တၢ်ပၢၢ်ဆၢပာ်ဖှိၣ်ကရူၢ်တကပၤမၤန့ၢ်၀ဲတၢ်စုက၀ဲၤအါမံၤအိၣ်၀ဲအမဲာ်ညါဖီၣ်ချူးစ့ၢ်ကီး၀ဲ(စံၣ်သိၣ်ပၤ)ဒီးအဟံၣ်ဖိဃီဖိတဖၣ်အိၣ်၀ဲအဂ့ၢ်လံာ်တၢ်ပာ်ဖျါအပူၤပာ်ဖျါစ့ၢ်ကီး၀ဲဒၣ်န့ၣ်လီၤႉ တကတီၢ်ဃီႇတၢ်ဒုးဒီတလါအတီၢ်ပူၤ(KNDF)တၢ်ပၢၢ်ဆၢသုးပာ်ဖှိၣ်ကရူၢ်အိးထီၣ်တၢ်ဒုးအမဲာ်သၣ်ဒီးက၀ီၤဃာ်သုးကီၣ်လၢအိၣ်ဆီလီၤသးဖဲ၀့ၢ်ပူၤတဖၣ်အဃိသုးကီၣ်ကးအတၢ်၀ံစိာ်တီဆှၢကျဲအဆၢတဲာ်ကွံာ်၀ဲဒီးပာ်ဂံၢ်ပာ်ဘါက့ၤသူက့ၤ၀ဲကဘီယူၤမၤထီဒါၦၤကညီဂ့ၢ်၀ီခွဲးယာ်သူဒြိမ့ၣ်ပိၢ်ကွံာ်လီၤနါစိၤတၢ်ဆူကမျၢၢ်အိၣ်ဆိးဒူသ၀ီတၢ်လီၢ်တၢ်ကျဲအပူၤကိးနံၤဒဲးဃၣ်ဃၣ်အိၣ်၀ဲအဃိကမျၢၢ်ဟံၣ်ဃီဘၣ်အူအီၣ်ကွံာ်အါအါဂီၢ်ဂီၢ်အိၣ်၀ဲအသိးသံဘၣ်ဒိဘၣ်ထံးအိၣ်၀ဲအါမးအဂ့ၢ်ပာ်ဖျါ၀ဲလၢလံာ်ပူၤန့ၣ်လီၤႉ ဒ်န့ၣ်အသိးဖဲတလါအံၤလါမးရှးအတီၢ်ပူၤစ့ၢ်ကီးကရံၣ်နံၣ်ကီၢ်စဲၣ်ဖါစီဒီးဖဲၤခိၤကီၢ်ဆၣ်သ့ၣ်တဖၣ်အပူၤတၢ်ဒုးဆဲးကဲထီၣ်၀ဲအသးလၢသုးကီၣ်ကးဒီးတၢ်ပၢၢ်ဆၢသုးပာ်ဖှိၣ်ကရူၢ်အဘၢၣ်စၢၤအိၣ်၀ဲတပယူာ်ဃီအသိးတကီၢ်ခါခဲအံၤသုးကီၣ်ကးသူကဘီယူၤခးလီၤကျိဖးဒိၣ်မၤအၢမၤသီကမျၢၢ်ဒူသ၀ီဖိအိၣ်၀ဲကိးမုၢ်ဒဲးအဖၢမုၢ်အဂ့ၢ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
ထိၣ်ကီးကိ-ကၠီၤခိၣ်ကျဲမုၢ်အပူၤသိလ့ၣ်တၢ်ဟးထီၣ်က့ၤလီၤႇ လီၤစှၤ၀ဲ(၃၀)မျးကယၤဃၣ်ဃၣ်လံ
လါမးရှး ၁၁သီႇ ၂၀၂၄နံၣ်ႇ ခ့ၣ်အဲးစံၣ်ႇ တၢ်ကးတံာ်ကွံာ်ကီးတရံး-ရၤမတံအ့ရှၢ်ကျဲမုၢ်ဖးဒိၣ်၀ံၤအလီၢ်ခံကမျၢၢ်လီၢ်က၀ီၤဖိတဖၣ်လ့ၢ်ထီၣ်လ့ၢ်လိၤက့ၤ၀ဲလၢထိၣ်ကီကိကျဲမုၢ်တကပၤဒီးႇတကီၢ်ခါခဲအံၤထိၣ်ကီကိ-ကၠီၤခိၣ်ကျဲအံၤႇသိလ့ၣ်တၢ်ဟးထီၣ်က့ၤလီၤလီၤစှၤ၀ဲလၢ(၃၀)မျးကယၤဃၣ်ဃၣ်လံအဂ့ၢ်လီၢ်က၀ီၤၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ထိၣ်ကီးကိ-ကၠီၤခိၣ်ကျဲအံၤခီဖျိတၢ်ဟးထီၣ်က့ၤလီၤတၢ်ဂ့ၢ်ကီအိၣ်၀ဲအါမံၤအဃိသိလ့ၣ်တဖၣ်လ့ၢ်ထီၣ်လ့ၢ်လိၤလီၤစှၤကွံာ်၀ဲဒီးဒ်သိးတၢ်လဲၤတၢ်က့ၤကန့ၢ်ညီအဂီၢ်သိလ့ၣ်ကစၢ်တဖၣ်သူက့ၤ၀ဲကျဲလၢအဂၤအဂ့ၢ်ကညီတၢ်မုာ်တၢ်ခုၣ်ကီၣ်ကးကရၢ(KNLA/PC)ၦၤကတိၤတၢ်ပၢသုးခိၣ်ဒိၣ်စိစီၤကၠီၣ်ညိၣ်စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ပမ့ကွၢ်လၢအလီၤတံၢ်လီၤဆဲးဒုပတဲတဘၣ်ဘၣ်ဆၣ်ယတၢ်ဆိမိၣ်တယးဒုကအိၣ်လၢ(၂၅)မျးကယၤ(၃၀)မျးကယးလံၦၤလ့ၢ်လိၤတအါပသ့းလၢၤဘၣ်ခဲအံၤၦၤလ့ၢ်လိၤလီၤစှၤမီၤႉလီၤတဲာ်ဘၣ်သးကျဲဒၢးတမ့ၢ်ကျဲမုာ်မုာ်နီၢ်နီၢ်ဟီၣ်ခိၣ်ကမူၣ်အါထီၣ်မ့ၢ်ဂ့ၤလၢၢ်လ့ဖျါထီၣ်ၦၤတလဲၤဘၣ်ဘျ့ဘျ့ဆှီဆှီၦၤဘၣ်လဲၤကယီကယီဒ့ခံဒီၣ်ဃီၤတၢ်ကီတၢ်ခဲဒ်အံၤတဖၣ်အိၣ်ထီဘိလီၤအဃိန့ၣ်ၦၤတနီၤနီၤဘၣ်အိၣ်ခိးတၢ်ယံာ်အိၣ်ခိး၀ဲတကဲဘၣ်အိၣ်ခိး၀ဲတချူးဘၣ်အဃိန့ၣ်အ၀ဲသ့ၣ်ကဃုက့ၤ၀ဲကျဲလၢလ့ၢ်လိၤဘၣ်ညီမီၤနီၤႉအခဲအံၤသိလ့ၣ်လၢအပူၤကွံာ်လ့ၢ်လိၤဖဲအံၤတဖၣ်န့ၣ်လဲၤက့ၤ၀ဲလၢ(ကၠဲးအူၣ်တီၤ)ကျဲတနီၤႉလၢကျဲအဂၤတနီၤမီၤတၢ်ကျဲအိၣ်ဒီဒူၣ်ညါမီၤႉ”အဂ့ၢ်စံးဘၣ်ခ့ၣ်အဲးစံၣ်တၢ်ကစီၣ်န့ၣ်လီၤႉ လၢန့ၣ်အမဲာ်ညါထိၣ်ကီးကိကျဲအံၤတၢ်တိာ်ပာ်လီၤထဲဟီၣ်က၀ီၤပူၤဒူသ၀ီလၢအိၣ်ဘူးတဖၣ်ကဟးထီၣ်က့ၤလီၤအဂီၢ်ဘၣ်ဆၣ်ခီဖျိတၢ်ဒုးတၢ်ယာ်တၢ်အိၣ်သးအဖီခိၣ်တၢ်ဘၣ်ပျဲလဲၤ၀ဲၦၤလဲၤတၢ်ဖိလၢအဘူးအယံၤကိးဂၤအဃိကျဲအံၤဟးဂီၤအါထီၣ်၀ဲဒၣ်ကွ့ၢ်ကွ့ၢ်အဖီခိၣ်ဒ်သိးကမျၢၢ်တဖၣ်ကလ့ၢ်ထီၣ်လ့ၢ်လိၤဘၣ်ဘျ့ဘျ့ဆီှဆှီအဂီၢ်ဂုၢ်ကျဲးစၢး၀ဲလၢအဂ့ၤကတၢၢ်အဂ့ၢ်အ၀ဲစံးအါထီၣ်၀ဲဒၣ်န့ၣ်လီၤႉ ထိၣ်ကီးကိကျဲၤအံၤအထီအိၣ်၀ဲ(၁၆)မံာ်လာ်ဒီးခါလၢကဟဲတၢ်စူၤခါအဆၢကတီၢ်ဒ်သိးလီၢ်က၀ီၤကမျၢၢ်လ့ၢ်လိၤလ့ၢ်ကဘၣ်လီၢ်ဘၣ်လီၢ်ဘၣ်စးအဂီၢ်တၢ်ဒါလီၤန့ၢ်၀ဲ(ကိၤကရ့ၣ်)န့ၢ်(၉)မံးလာ်အဂ့ၢ်သ့ၣ်ညါဘၣ်လၢလီၢ်က၀ီၤၦၤဘၣ်မူဘၣ်ဒါန့ၣ်လီၤႉ အ့ရှၢၣ်ကျဲမုၢ်ကးတံာ်သး၀ံၤအလီၢ်ခံတၢ်စးထီၣ်သူ၀ဲထိၣ်ကီကိကျဲဒီတတီၢ်အပူၤခီဖျိကျဲတၢ်ကီတၢ်ခဲအဃိသိလ့ၣ်တနီၤကဒဲကဒဲဘၣ်တဲးလိာ်အသးဒီးတနီၤလီၤတဲာ်လၢတြိၤပူၤကဲထီၣ်တ့ၢ်၀ဲအသးအဖီခိၣ်ကမျၢၢ်ဘၣ်သံ၀ဲ(၄)ဂၤဘၣ်ဒိဘၣ်ထံးလၢစုကၢ်ခီၣ်ကၢ်တဖၣ်အိၣ်၀ဲ(၅)ဂၤလံအဂ့ၢ်သ့ၣ်ညါဘၣ်န့ၣ်လီၤႉ တကတီၢ်ဃီၦၤနီၣ်သိလ့ၣ်ဖိဒီးၦၤလဲၤတၢ်ဖိတဖၣ်အံၤအိၣ်ဟဲ၀ဲဲလၢတၢ်အါတီၤအဃိဒ်သိးကသ့ၣ်ညါဟီၣ်က၀ီၤတၢ်အိၣ်သးဒီးဒ်သိးတဘၣ်ဒိဘၣ်ထံးတၢ်လဲၤတၢ်က့ၤဘၣ်အဂီၢ်အပူၤကွံာ်လါယနူၤအါရံၤ(၂၆)သီအနံၤန့ၣ်ထုးထီၣ်၀ဲကျဲတၢ်သိၣ်တၢ်သီလၢၦၤလဲၤတၢ်ဖိတဖၣ်ကဘၣ်လူၤပိာ်ထွဲ၀ဲတၢ်ကျဲတၢ်သိၣ််တၢ်သီတၢ်ဘျၢဒ်အမ့ၢ်တၢ်တဘၣ်စိာ်ဒီးသူ၀ဲကသံးမူၤဘှီးတဘၣ်မၤ၀ဲတၢ်တၤကျိၣ်တၤစ့တၢ်ကဘၣ်ဟးဆှဲး၀ဲတၢ်အ့ၣ်လိာ်ဆိးက့သးသ့ၣ်တဖၣ်အိၣ်၀ဲအသိးလၢတၢ်ကဒီသဒၢခိၣ်ဃၢၤန့ဆၢၣ်တၢ်ဘၣ်ဒိဘၣ်ထံးအဂီၢ်တၢ်ကဘၣ်စူးကွံာ်၀ဲတၢ်ဘၣ်အၢဘၣ်သီတၢ်တဃာ်တဖၣ်လၢအလီၢ်ဘၣ်ကျဲဘၣ်အိၣ်၀ဲန့ၣ်လီၤႉ ဒ်န့ၣ်အသိးထိၣ်ကီကိ-ကၠီၣ်ခိၣ်ကျဲအံၤတၢ်စးထီၣ်သူအီၤလၢအပူၤကွံာ်(၂၀၂၂)နံၣ်လါဒံၣ်စဲဘၢၣ်အခါလံၤလံၤဒီးဒ်သိးတၢ်ကဘှါရှဲ၀ဲတၢ်ဂ့ၢ်ကီလၢအကဲထီၣ်သးဖဲကျဲတီၤတဖၣ်အဂီၢ်ကညီတၢ်မုာ်တၢ်ခုၣ်ကီၣ်ကးကရၢ KNLA/PC ပာ်လီၤ၀ဲ(တြဲၤ)အိၣ်ခိးတၢ်လၢကျဲ(၅)တီၤအိၣ်၀ဲအဂ့ၢ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
ဒဲၣ်အူကီၢ်ဆၣ်ပူၤၦၤကမျၢၢ်လၢတအဲၣ်ဒိးကဲသုးလၢအဃ့ၢ်ထီၣ်တဖၣ်သုးကီၣ်ကးပံးတံၢ်ကွံာ်အဟံၣ်
လါမးရှး ၁၁ သီႇ ၂၀၂၄ နံၣ်ႇ ခ့ၣ်အဲးစံၣ် လၢပကိကီၢ်ခီဒိၣ် ဒဲၣ်အူကီၢ်ဆၣ်ပူၤဒူသ၀ီတနီၤအပူၤ ဟံၣ်လၢအတအဲၣ်ဒိးကဲသုး လၢအဃ့ၢ်ထီၣ် ဟးစံၣ်အိၣ်ခူသူၣ်သ့ၣ်တဖၣ်အံၤ သုးကီၣ်ကးကးပံးကွံာ်၀ဲအဂ့ၢ် န့ၣ် လီၢ်က၀ီၤကမျၢၢ်တဖၣ် စံး၀ဲန့ၣ်လီၤႉ ဖဲပူၤကွံာ်လါဖ့ၤဘြူၤအါရံၤအခါန့ၣ် ဒူသ၀ီလၢအိၣ်ဒဲၣ်အူကီၢ်ဆၣ်အပူၤသ့ၣ် တဖၣ် ခီဖျိပယီၤသုးဟ့ၣ်ၦၤကမျၢၢ် တၢ်ဆီၣ်သနံးလၢကဘၣ်ကဲသုးအဃိၦၤ ကမျၢၢ်လၢတအဲၣ်ဒိးကဲသုးဘၣ်သ့ၣ်တဖၣ်အံၤ ဟးစံၣ်အိၣ်ခူသူၣ်၀ဲဒၣ် ဟံၣ်ဒီတဖျၢၣ်ညါအဃိဘၣ်တၢ်ဟဲကးတံၢ်ကွံာ်အဟံၣ်ဒ်အံၤလီၤအဂ့ၢ်န့ၣ် ၦၤသ၀ီဖိလၢတအဲၣ်ဒိးပာ်ဖျါအမံၤတဂၤ စံး၀ဲန့ၣ်လီၤႉ အ၀ဲစံး၀ဲလၢ “ဟံၣ်လၢတပာ်ဃုာ်လၢကဘၣ်နုာ်လီၤကဲသုးအံၤန့ၣ်သုးကီၣ်ကး ဟဲပံးတံၢ်ကွံာ်၀ဲမီၤနီၤႉ အပာ်ဃုာ်ကအိၣ်လၢ ၄ ဖျၢၣ် ၅ ဖျၢၣ်လံႉ ခဲအံၤၦၤဘၣ်ယိၣ်လၢပယီၤသုးကပံးတံၢ်ကွံာ်ၦၤဟံၣ်အဃိၦၤဃ့ၢ်တဘၣ်လၢၤဘၣ်ႉ ကိၢ်ညၢ်အပံးကွံာ် ၀ဲလၢဟံၣ်န့ၣ်ႇ မ့ပံးဃုာ်ဒီးစံာ်လီၢ်ကျီးလီၢ်ဒုတညီဘၣ်ႉ သ၀ီလၢအလဲၤနုာ်လီၤသုးန့ၣ်တၢ်တပံာ်ဃာ်တံၢ်အ၀ဲသ့ၣ် ဟံၣ် ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ တၢ်ဘိးဘၣ်ရၤလီၤပာ်ပနီၣ်ၦၤလၢအကဘၣ်ကဲသုးအသးနံၣ်ဘၣ်ဆၣ် တကီၢ်ခါခဲ အံၤသုးကီၣ်ကးထၢသုးတရ့၀ဲ အနီၢ်ဒိၣ်နီၢ်ဆံးသးနံၣ်ဘၣ်ဒီးၦၤလၢနုာ်လီၤ ကဲသုးတမုာ်ဘၣ်သ့ၣ်တဖၣ်န့ၣ်ကဘၣ်ဆီၣ်ထွဲၦၤလၢအနုာ်လီၤကဲသုးသ့ၣ်တဖၣ်အံၤတလါန့ၣ်စ့ပယီၤ(၂)ကလီၢ်ကၠးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ “ၦၤလၢတလဲၤဘၣ်တဖၣ်န့ၣ်ဘၣ်ဟ့ၣ်၀ဲၦၤလၢလဲၤသ့ၣ်တဖၣ်တလါန့ၣ်စ့ပယီၤ(၂)ကလီၢ်ကၠးမီၤနီၤႉ ၦၤကးတံၢ်ဟံၣ် တကးဒံးဘၣ်ပယီၤသုးတဲ၀ဲလၢၦၤမ့တနုာ်လီၤ လၢသုးပူၤဘၣ်န့ၣ်ကဒွဲၣ်အူအီၣ်သ၀ီအဃိၦၤဘၣ်ဟ့ၣ်စ့လီၤ”အဂ့ၢ်န့ၣ် သ၀ီဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ သုးကီၣ်ကးထုးထီၣ်တၢ်ကဘၣ်ကဲသုးသဲးစးတၢ်ဘျၢ၀ံၤလီၢ်ခံစှၤသီအတီၢ်ပူၤန့ၣ် ဒဲၣ်အူကီၢ်ဆၣ်တကးဒံးဘၣ် လၢပကိကီၢ်ခီဒိၣ် ကီၢ်ဆၣ် ဒူသ၀ီသ့ၣ်တဖၣ် အပူၤန့ၣ် သုးကီၣ်ကးဟးထၢသုးဟဲအါထီၣ်၀ဲအဃိ ၦၤသူၣ်ဘီၣ်သးစၢ် တဖၣ်ဟးစံၣ်အိၣ်ခူသူၣ်ဃ့ၢ်ထီၣ်လၢကျဲအဘိဘိန့ၣ်လီၤႉ ကညီၦၤဂ့ၢ်၀ီခွဲးယာ်ကရူၢ်(KHRG) ၦၤကတိၤတၢ်ပၢ စီၤနၢၤတၢ်ဆူ “လၢ(ခ့ၣ်အဲယူၣ်)ဟီၣ်က၀ီၤ...
ဆီထံးကီၢ်ဆၣ်ပူၤ ပယီၤသုးနု၁်လီၤဒွဲၣ်အူအီၣ်ကဒီးဟံၣ်လၢပစိၤမၠီသ၀ီပူၤ
လါမးရှး ၁၁ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃) ဆီထံးကီၢ်ဆၣ်အပူၤ ဖဲလါမးရှး ၉ သီ အနံၤန့ၣ် ပယီၤသုးနုာ်လီၤဒွဲၣ်အူအီၣ်ကဒီး၀ဲဟံၣ်လၢ(ပစိၤမၠီ)သ၀ီပူၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ ဖဲအပူၤကွံာ်လါမးရှး ၉ သီ ဂီၤခီ ၁၁ နၣ်ရံၣ်အဆၢကတီၢ်န့ၣ် ပယီၤသုးလၢအိၣ်ပစိၤမၠီသ၀ီပူၤတဖၣ်အံၤ နုာ်လီၤဟံ၀ဲဒၣ်ၦၤသ၀ီဖိအတၢ်ဖိတၢ်လံၤ၀ံၤဒွဲၣ်အူအီၣ်ကဒီး၀ဲၦၤသ၀ီဖိအဟံၣ်အဃီတဖၣ်ဒီး တုၤလၢခဲအံၤ ပယီၤသုးဒွဲၣ်အူအီၣ်ၦၤဟံၣ်အိၣ်လၢ(၁၀)ဘျီလံအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါတဂၤ စံး၀ဲန့ၣ်လီၤႉ အ၀ဲစံး၀ဲလၢ“ဟံၣ်အူအီၣ်ဒုပမ့ဘၣ်တဲန့ၣ်ဘျ့ၣ်ခဲလၢာ်ဃၣ်ဃၣ်လီၤနီၤႉဒွဲၣ်၀ဲခီန့ၣ်တမ့ၢ်တဘျီခံဘျီသၢဘျီလၢၤဘၣ် ဒွဲၣ်၀ဲအဘျီအါလံႉအိၣ်ဒၣ်ပထံၣ်လၢမ့ၣ်အူခုၣ်လီၤႉပယီၤသုးနုာ်လီၤဒွဲၣ်တၢ်ဒီးတၢ်တဘျီအံၤန့ၣ်အိၣ်အဘျီတဆံလံႉ ပကသမံသမိးလၢအဒွဲၣ်၀ဲၦဲၤဖျၢၣ်လဲၣ်ခီန့ၣ်တန့ၢ်ဘၣ်ဘၣ်မနုၤအဃိလဲၣ်န့ၣ်ပယီၤသုးန့ၣ်ဆ့ၣ်နီၤအိၣ်လၢသ၀ီပူၤႉ ပမ့ကွၢ်လၢဒူသ၀ီလၢပယီၤသုးလဲၤ၀ဲတုၤန့ၣ်ဒွဲၣ်အူအီၣ်ၦၤဟံၣ်ႉထံၣ်ကမျၢၢ်န့ၣ်ဖီၣ်၀ဲမၤကီမၤခဲဃ့အီၣ်စ့တၢ်သ့ၣ်တဖၣ် အံၤထီဘိန့ၣ်အ၀ဲသ့ၣ်မၤ၀ဲလီၤမီၤနီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါပစိၤမၠီသ၀ီဖိတဖၣ်ပယီၤသုးမ့ဟဲန့ၣ်ပျံၤတၢ်ခီၣ်ထံၣ်အသးတဘူၣ်ဘၣ်တကးဒံးဘၣ် ဖဲၦၤသ၀ီဖိဃ့ၢ်ထီၣ် တအိၣ်ဘၣ်အကတီၢ်န့ၣ်ပယီၤသုးနုာ်လီၤဟံ၀ဲဒၣ်ၦၤတၢ်ဖိတၢ်လံၤ၀ံၤဒွဲၣ်အူအီၣ်ဃုာ်၀ဲၦၤဟံၣ် ၦၤဃီအဂ့ၢ်န့ၣ် လီၢ်က၀ီၤကမျၢၢ်ၦၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ ပယီၤသုးတဖၣ်အံၤခီဖျိအ၀ဲသ့ၣ်မၤပျံၤမၤဖုးႇဖီၣ်ၦၤကမျၢၢ်မၤကီမၤခဲ၀ဲအကလုာ်ကလုာ်အဃိ ၦၤကမျၢၢ်တဖၣ်ပျံၤတၢ် လဲၤစံၣ်အိၣ်လၢအဘူးအတံၢ်အပုၢ်အ၀ဲၢ်ဟံၣ်ႇလဲၤအိၣ်လၢသ၀ီအဂၤဒီး တနီၤန့ၣ်လဲၤစံၣ်အိၣ် ၀ဲလၢၦၢ်ပူၤကစၢၢ်ကလိကျါ အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ ဒ်လီၢ်က၀ီၤၦၤဘၣ်မူဘၣ်ဒါစံး၀ဲအသိးန့ၣ်ပစိၤမၠီသ၀ီအံၤပယီၤသုးဒွဲၣ်အီၣ်ၦၤဟံၣ်အံၤတမ့ၢ်ထဲတၢ်တဘျီအံၤဘၣ်ဒီး မ့မ့ၢ်တခီတုၤလၢခဲအံၤန့ၣ်ပယီၤသုးဒွဲၣ်အူအီၣ်ၦၤဟံၣ်ကအိၣ်လၢအဘျီတဆံဃၣ်ဃၣ်လံဒီးမ့ဘၣ်ကွၢ်တုၤလၢခဲအံၤန့ၣ် ဟံၣ်ဃီအူအီၣ်ဟးဂီၤကအိၣ်လၢသၢပူခံပူၤလံအဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါတကီၢ်ခါခဲအံၤလၢပစိၤမၠီသ၀ီအခိၣ်အဃၢၤန့ၣ်ပယီၤသုးဒိးလီၤဃာ်၀ဲမ့ၣ်ပိၢ်၀း၀းတရံးကအိၣ်လၢ အဖျၢၣ်(၃၀၀)ခိၣ်ဃၢၤညါဒီးပယီၤသုးလၢအိၣ်သ၀ီပူၤတဖၣ်အံၤအနီၣ်ဂံၢ်ကအိၣ်လၢ(၁၀၀)ဂၤခိၣ်ဃၢၤညါအဂ့ၢ်န့ၣ် သ့ၣ်ညါဘၣ်န့ၣ်လီၤႉ ပစိၤမၠီသ၀ီအံၤဟံၣ်ခိၣ်ခဲလၢာ်အိၣ်၀ဲအဖျၢၣ်(၁၅၀၀)ဘျဲၣ်ဒီးသ၀ီဖိတဖၣ်အါဒၣ်တက့ၢ်န့ၣ်ထီဒါ၀ဲဒၣ်သုးမီၤစိရိၤတဖု အံၤဒီးသ၀ီဖိတဖၣ်အိၣ်လၢသ၀ီပူၤတဘူၣ်လၢၤဘၣ်ဟးဃ့ၢ်အိၣ်လၢတၢ်လီၢ်အဂၤန့ၣ် ကအိၣ်လၢတနံၣ်ဘျဲၣ်လံအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဒုးမူထီၣ်ကီၢ်သူလ့ၤသး
ဒုးမူထီၣ်ကီၢ်သူလ့ၤသး ကီၢ်သူလ့ၤကညီသုးဖိ ပ၁်ဖှိၣ်ထီၣ်သးလၢအဆိ ဒုးလီၤပှီၢ်ကွံ၁်မီၤစိရိၤ အိၣ်ဃူအိၣ်ဖိးပဘၣ်ပှိၤ သုးမီၤစိရိၤမ့ၢ်ဒုၣ်ဒါ ထီဒါပၢၢ်ဆၢဘၣ်တသါ တဂၤလၢကူၣ်သ့သနၢၣ် ဒုးသကိးတုၤလၢဖီတၢၣ် တၢ်မၤနၢၤကတုၤအိၣ်ၦၤ ကညီမၤကညီတၢ်မၤ လၢထံကီၢ်တၢ်သဘျ့ဂီၢ် တစဲးခံဒံးလၢပဂီၢ် သိၣ်ဒူလၢလဲၤတၢ်မဲ၁်ညါ အီၣ်အီဖှီၣ်နးဒိၣ်ဝဲအါ တၢ်ဒုးပျီပူၤမ့ၢ်တၢ်သံ ဘၣ်ကီၤဝံၤမ့ၤကီၤဝံၤထံ ခိၣ်နၢ်လၢဖီၣ်ပျံၤတဖၣ် ဖံးမၤတၢ်လၢနၣ်ရံၣ်ဘၣ် သးကညီၤဘၣ်ကီၢ်ကညီ ကမျၢၢ်ဖိလံၤကထီၣ်ဖီ ကျဲသနူတိ၁်ကျဲၤတအိၣ် ကမျၢၢ်ဖိလံၤဖှီၣ်နးဒိၣ် တၢ်မူထီၣ်ဂဲၤထီၣ်တဖျါ ဖိလံၤလီၤဖးအိၣ်ပြါသါ ကူၣ်သ့ထံၣ်စိတၢ်မ့ၢ်ထီ တိ၁်ကျဲၤလီၤဘၣ်ဂ့ၢ်ဘၣ်ဝီ ကျဲသနူသဲစးပ၁်လီၤ စူၢ်သကိးဒီးလူၤထွဲအီၤ သးတဖျၢၣ်ဃီတၢ်လဲၤကျဲ တၢ်မၤနၢၤကတုၤအိၣ်ဝဲ အိၣ်ဒီးတၢ်န၁်န့ၢ်လိ၁်သး ဒုးမူထီၣ်ကီၢ်သူလ့ၤသး. လၢ တၢ်အဲၣ်ကကွဲၢ်ကဘီ စီၤကီၢ်ဖျါစ့ ၁၁.၃.၂ဝ၂၄
မုၢ်တြီၢ်ကီၢ်ရ့ၣ် ကညီပိာ်မုၣ်ကရၢမၤ၀ဲခီကရဲးတၢ်ဃုထၢ(၉)၀ီတ၀ီ၀ံၤ၀ဲ
လါမးရှး ၁၀ သီႇ ၂၀၂၄ နံၣ်ႇ ခ့ၣ်အဲးစံၣ် ဖဲလါမးရှး(၄)သီ တုၤလၢ(၆)သီ လၢ(၃)သီအတီၢ်ပူၤ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ် ကညီပိာ်မုၣ်ကရၢမၤ၀ဲခီးကရဲးတၢ်ဃုထၢ(၉)၀ီတ၀ီ၀ံၤ၀ဲလံအဂ့ၢ်န့ၣ် ခ့ၣ်အဲၣ်ယူၣ်မုၢ်တြီၢ်တၢ်ကစီၣ် ထုးထီၣ်ပာ်ဖျါ၀ဲဖဲလါမးရှး(၈)သီအနံၤန့ၣ်လီၤႉ မုၢ်တြီၢ်ကီၢ်ရ့ၣ် ကညီပိာ်မုၣ်ကရၢမၤ၀ဲခီကရဲးတၢ်အိၣ်ဖှိၣ်ဖးဒိၣ်(၉)၀ီတ၀ီဘျီ၀ဲအံၤအပူၤန့ၣ် လၢခါဆူမဲာ်ညါ(၃)နံၣ်တီၢ်ပူၤအဂီၢ်တၢ်ဃုထၢထီၣ်က့ၤ၀ဲထီဘိကမံးတံာ်ခိၣ်နၢ်သီ(၂၅)ဂၤဒီး ဒ်န့ၣ်အသိးလၢထီဘိကမံးတံာ်သ့ၣ်တဖၣ်အံၤအကျါတၢ်ဃုထၢထီၣ်က့ၤ၀ဲပၢဆှၢတၢ်ကမံးတံာ်(၉)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ၦၤပၢဆှၢတၢ်ကမံးတံာ်ခိၣ်နၢ်အသီ(၉)ဂၤန့ၣ် ကရၢခိၣ်န့ၣ်မ့ၢ်၀ဲ နီၢ်ဖီလ့သီႇ ကရၢခိၣ်-၂ န့ၣ်မ့ၢ်၀ဲ နီၢ်အဲၣ်စိ၀ါႇ နဲၣ်ရွဲၣ် နီၢ်ဆၢလၢ်ႇ နဲၣ်ရွဲၣ်သဃဲၤ လါရှံႇ ၦၤပၢၤစ့ နီၢ်ဒါမုၣ်ႇ ၦၤသမံသမိးစ့ နီၢ်ကံလံႇ ၦၤဂ့ၢ်၀ီမူဒါခိၣ် နီၢ်ဃံလၤဖီႇ ကူၣ်သ့ဆူၣ်ချ့မူဒါခိၣ် နီၢ်ဒံကမူၣ်ဖီႇ ဒီးတၢ်ကရၢကရိ၀ဲၤကျိၤမူဒါခိၣ်န့ၣ်မ့ၢ်၀ဲ နီၢ်ဒါထိၣ် သ့ၣ်တဖၣ်အဂ့ၢ်န့ၣ် မုၢ်တြီၢ်တၢ်ကစီၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ ဒ်မုၢ်တြီၢ်တၢ်ကစီၣ်လံာ်တၢ်ပာ်ဖျါပူၤ ပဒိၣ်နီၢ်ဖီလ့သီ လၢအဘၣ်တၢ်ဃုထၢထီၣ်အီၤလၢ ကရၢခိၣ် အံၤစံး၀ဲလၢ “ယဘၣ်တၢ်ဃုထၢထီၣ်ကဒီးယၤလၢကရၢခိၣ်ဒ်သိးအံၤန့ၣ် ဒ်ခိၣ်နၢ်ခၢၣ်စးဒီးကရၢဖိခၢၣ်သးတဖၣ်ဘၣ်သူၣ်ဘၣ်သးဒီးဟ့ၣ်မူဟ့ၣ်ဒါယၤအသိးန့ၣ်ယကကျဲးစၢးလၢအဂ့ၤကတၢၢ်ဒီးတမ့ၢ်ထဲလၢယၤတဂၤယကဲကရၢခိၣ်ဒီးယမၤတၢ်သ့တမ့ၢ်ဘၣ်ႉ ယလိၣ်ဘၣ်ပ၀ဲၦၤမၤသကိးတၢ်ဖိကိးဂၤဒဲးလၢပကဘၣ်ပာ်ဖှိၣ်မၤသကိးတၢ်တဂၤလၢအလီၢ်ဒီးအသနၢၣ် ဒ်တၢ်ဟ့ၣ်မူဟ့ၣ်ဒါၦၤအသိးလၢကီၢ်ရ့ၣ်မ့ၢ်ဂ့ၤႇ ကီၢ်ဆၣ်မ့ၢ်ဂ့ၤပကပာ်ဖှိၣ်မၤသ ကိးလၢအဂ့ၤကတၢၢ်ကိးဂၤဒဲးလၢ ပတၢ်ကရၢကရိတၢ်ဒိၣ်ထီၣ်ထီထီၣ်ခါဆူညါ အဂီၢ်”အဂ့ၢ်န့ၣ် စံး၀ဲန့ၣ်လီၤႉ မုၢ်တြီၢ်ကီၢ်ရ့ၣ်ကညီပိာ်မုၣ်ကရၢတၢ်အိၣ်ဖှိၣ်ဖးဒိၣ်ခီကရဲးတၢ်ဃုထၢ(၉)၀ီတ၀ီတၢ်ရဲၣ်တၢ်ကျဲၤဘျီ၀ဲအံၤန့ၣ် ကီၢ်ရ့ၣ်ႇ ကီၢ်ဆၣ် ပိာ်မုၣ်ကရၢခိၣ်နၢ်ခၢၣ်စး ဃုာ်ဒီးသ၀ီကရူၢ်ခၢၣ်စးတဖၣ် ဟဲထီၣ်၀ဲတၢ်အိၣ်ဖှိၣ်ခဲလၢာ် (၇၃)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဖၣ်အၣ်ကီၢ်ရ့ၣ်ဒီးကညီဖီၣ်စုက၀ဲၤကရူၢ်ပာ်ဖှိၣ်မၤလၤကပီၤ၀ဲ(KNU)ကရၢခိၣ်လီၢ်လံၤသုးခိၣ်ကျၢၢ်စိစီၤမူၤတူစ့ဖိဒီးတၢ်ဒီသဒၢ၀ဲၤကျိၤခိၣ်လီၢ်လံၤစီၤရီကၠၢၣ်ခ့ၣ်
လါမးရှး ၈သီႇ ၂၀၂၄နံၣ်ႇ ခ့ၣ်အဲးစံၣ်ႇ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢသုးက့(၇)ဖၣ်အၣ်ကီၢ်ရ့ၣ်တၢ်ကြဲၢ်ကီၢ်ဆၣ်ပံၢ်တခးသ၀ီဘျီၣ်ဒိၣ်အပူၤတၢ်မၤလၤကပီၤ၀ဲ(KNU)) ကရၢခိၣ်လီၢ်လံၤသုးခိၣ်ကျၢၢ်စိစီၤမူၤတူစ့ဖိဒီးတၢ်ဒီသဒၢခိၣ်စီၤရီကၠၢၣ်ခ့ၣ်ဖဲမဟါလါမးရှး(၇)သီအနံၤအဂ့ၢ်သ့ၣ်ညါဘၣ်န့ၣ်လီၤႉ ခိၣ်နၢ်လီၢ်လံၤခံဂၤအံၤခီဖျိကီၢ်ရ့ၣ်ၦၤဘၣ်မူဘၣ်ဒါဒီးလီၢ်က၀ီၤဖိတဖၣ်ပာ်ပနီၣ်အီၤလၢတၢ်ပၢၢ်ဆၢမိၢ်ပၢ်လၢအဟ့ၣ်လီၤသးအနံၣ်ယံာ်တ့ၢ်လံသ့ၣ်တဖၣ်အဃိဒ်သိးကကဲထီၣ်တၢ်ကွၢ်လိလၢခံအဂီၢ်ဒီးကကဲထီၣ်တၢ်ပနီၣ်လၢအ၀ဲသ့ၣ်တဖၣ်အဂီၢ်တၢ်မၤန့ၢ်၀ဲတၢ်လၤကပီၤတၢ်ရဲၣ်တၢ်ကျဲၤအံၤလီၤအဂ့ၢ်ကီၢ်ရ့ၣ်ၦၤဘၣ်မူဘၣ်ဒါပဒိၣ်နီၢ်ရှံ၀ါစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တၢ်ရဲၣ်တၢ်ကျဲၤဘျီ၀ဲအံၤဒုကဲ၀ဲကီၢ်ရ့ၣ်သုးက့(၇)ရဲၣ်ကျဲၤဘျီပမၤသကိး၀ဲတၢ်ဒီးကညီဖီၣ်စုက၀ဲၤကရူၢ်တဖၣ်မီၤနီၤႉပမၤလၤကပီၤ၀ဲခိၣ်နၢ်ခီန့ၣ်ခံဂၤႉဒီးအ၀ဲသ့ၣ်တဖၣ်န့ၣ်မ့ၢ်၀ဲပဖုမူၤတူစ့ဖိဒီးပဖုရီကၠၢၣ်ခ့ၣ်မီၤနီၤႉအ၀ဲသ့ၣ်န့ၣ်မ့ၢ်၀ဲပခိၣ်ပနၢ်လၢအိၣ်လၢပကီၢ်ရ့ၣ်ပူၤအဃိန့ၣ်ပမၤန့ၣ်တၢ်လၤကပီၤပဟ့ၣ်၀ဲဒၣ်တၢတခါန့ၣ်တၢ်လၤကပီၤအလံာ်ခံခါတခါန့ၣ်ခီဒုဖီကဒိၣ်မီၤနီၤႉမ့မ့ၢ်လၢ(KNA)န့ၣ်ဟ့ၣ်၀ဲဒၣ်တၢ်ဟ့ၣ်ကနၢၤလၢတိၢ်(စ့)မီၤနီၤမ့ၢ်ပၣ်ဆံးအါလဲၣ်ဒုတသ့ၣ်ညါဘၣ်ဒီးမ့မ့ၢ်(KNLA-PC)(DKBA)သ့ၣ်တဖၣ်န့ၣ်ခီန့ၣ်ဟ့ၣ်၀ဲလံာ်ဒၢမီၤနီၤႉပမၤန့ၢ်အ၀ဲသ့ၣ်တၢ်ရဲၣ်တၢ်ကျဲၤအံၤန့ၣ်ပတၢ်ပညိၣ်လီၤဆီဒုတအိၣ် ဘၣ်အိၣ်ဒၣ်လၢပပာ်ပနီၣ်အ၀ဲသ့ၣ်ဒ်တၢ်ပၢၢ်ဆၢမိၢ်ပၢ်အဃိပသူၣ်အိၣ်သးအိၣ်ဒီးပမၤလၤကပီၤလီၤႉဒီးအဂၤတမံၤန့ၣ်ပတၢ်ပညိၣ်အိၣ်၀ဲလၢကကဲထီၣ်က့ၤ၀ဲတၢ်ဒိဂ့ၤတဲာ်ဘၣ်လၢအလီၤကွၢ်လိလၢခံအဂီၢ်မီၤဘၣ်မနုၤအဃိလဲၣ်န့ၣ်ပၦၤကညီန့ၣ်ပလုၢ်ပလၢ်အိၣ်လၢပအဲၣ်ပခိၣ်ပနၢ်ပပာ်လုၢ်ပာ်ၦ့ၤပာ်ကဲအီၤမီၤနီၤႉအဂၤတမံၤခီန့ၣ်လၢအ၀ဲသ့ၣ်အဂီၢ်ကကဲထီၣ်၀ဲတၢ်ပနီၣ်တခါစ့ၢ်မီၤနီၤႉ” အဂ့ၢ်စံးဘၣ်ခ့ၣ်အဲးစံၣ်တၢ်ကစီၣ်န့ၣ်လီၤႉ လၢန့ၣ်အမဲာ်ညါဒ်တိာ်လီၤပာ်လီၤ၀ဲအသိးန့ၣ်တၢ်ရဲၣ်တၢ်ကျဲၤအံၤကဲထီၣ်လိၣ်ထီၣ်၀ဲဂ့ၤဂ့ၤဘၣ်ဘၣ်အသိးတၢ်ကီတၢ်ခဲတၢ်မၤတံာ်တာ်တအိၣ်နီတမံၤဘၣ်အဂ့ၢ်အ၀ဲစံးအါထီၣ်၀ဲန့ၣ်လီၤႉ မဟါတၢ်မၤ၀ဲတၢ်ရဲၣ်တၢ်ကျဲၤအပူၤန့ၣ်(KNU)လီၢ်ခၢၣ်သးခိၣ်နၢ်တဖၣ်ဟဲပၣ်ဃုာ်ပၣ်ဂီၢ်၀ဲတချူးဘၣ်ဆၣ်ကီၢ်ရ့ၣ်ပတီၢ်ခိၣ်နၢ်ဒီးဖီၣ်စုက၀ဲၤကရူၢ်ကရၢလၢအလီၤဖးဒ်အမ့ၢ်ကညီဒီကလုာ်သုးမုၢ်ဒိၣ်(KNA) ကညီတၢ်မုာ်တၢ်ခုၣ်ကီၣ်ကး (KNLA-PC)(DKBA) ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်ဃုာ်ဒီးလီၢ်က၀ီၤကမျၢၢ်အဂၤ(၂၀၀၀)ဘျဲၣ်ဟဲထီၣ်ပၣ်ဃုာ်ပၣ်ဂီၢ်မၤလၤကပီၤ၀ဲအဂ့ၢ်သ့ၣ်ညါဘၣ်န့ၣ်လီၤႉ (KNU)ကရၢခိၣ်လီၢ်လံၤသုးခိၣ်ကျၢၢ်စိစီၤမူၤတူစ့ဖိအံၤအပူၤကွံာ်လါယနူၤအါရံၤ(၃၁)ကညီတၢ်ပၢၢ်ဆၢမုၢ်နံၤၦဲၤထီၣ်(၇၅)၀ီတ၀ီအခါဒိးန့ၢ်ဘၣ်၀ဲၦၤဟူးဂဲၤလၢတၢ်ပၢၢ်ဆၢအနံၣ်(၅၀)ဆူအဖီခိၣ်တၢ်လၤကပီၤအိၣ်၀ဲအသိးဖဲ(၂၀၂၃)နံၣ်လါအီးကၢး(၂၉)သီအနံၤအခါစ့ၢ်ကီးသုးက့(၆)၀ီၢ်ရီကီၢ်ဆၣ်လီၢ်က၀ီၤဖိတဖၣ်ဟ့ၣ်၀ဲအီၤလၢၦၤမၤတၢ်မုာ်တၢ်ခုၣ်တၢ်လၤကပီၤဃုာ်ဒီးဒူပျၢ်ယာ်ကီၢ်ရ့ၣ်ခိၣ်ပဒိၣ်စီၤရွ့ၤမီဖဲဖါပြးသ၀ီ(မ့ၤကလၤသ့ၣ်ပၣ်)သီခါဖၠၣ်ပူၤအဂ့ၢ်သ့ၣ်ညါဘၣ်န့ၣ်လီၤႉ ဒ်န့ၣ်အသိး(KNU)ကရၢခိၣ်လီၢ်လံၤသုးခိၣ်ကျၢၢ်စိစီၤမူတူစ့ဖိအံၤဒိးန့ၢ်ဘၣ်စ့ၢ်ကီး၀ဲ(၀ၤနၣ်ကၠီၣ်ထ့ၣ်)ဘွဲးတၢ်လၤကပီၤလၢသုးကီၣ်ကးအခိၣ်ကျၢၢ်သုးခိၣ်ဒိၣ်ဂီၢ်ဂ့ၢ်မ့အီၤလဲၤအအိၣ်ဖဲ(၂၀၂၂)နံၣ်လါအ့ဖြ့ၣ်အပူၤအိၣ်စ့ၢ်ကီး၀ဲဒၣ်န့ၣ်လီၤႉ
ကဒုးအိၣ်ထီၣ်ဖီၣ်လစံၣ်ဒီးဒုးပၣ်ဃု၁်ပိ၁်မုၣ်လၢတၢ်မၤတၢ်ဆၢတဲ၁်ကိးပတီၢ်ဒဲးအပူၤအဂ့ၢ် (KWO)ဃ့ထီၣ်၀ဲ
လါမးရှး ၇ သီႇ ၂၀၂၄ နံၣ်ႇ ခ့ၣ်အဲးစံၣ် ခဲမုၢ်ဆ့ၣ်လါမးရှး ၈ သီအနံၤန့ၣ် လီၤဘၣ်၀ဲဒၣ်ဟီၣ်ခိၣ်ဒီဘ့ၣ်ပိာ်မုၣ်မုၢ်နံၤအံၤဒီး လၢမုၢ်နံၤအံၤအဖီခိၣ် ၦၤကိးဂၤဒဲးကကျဲးစၢးလၢကဒုးအိၣ်ထီၣ်ဖီၣ်လစံၣ်ႇမၤလိၣ်ထီၣ်ဖးထီၣ်အီၤဒီးဒုးပၣ်ဃုာ်ပၣ်ဂီၢ်ပိာ်မုၣ်လၢ တၢ်မၤတၢ်ဆၢတဲာ်ကိးပတီၢ်ဒဲးအပူၤအဂ့ၢ်န့ၣ် ကညီပိာ်မုၣ်ကရၢ(KWO)ထုးထီၣ်ပာ်ဖျါဃ့ထီၣ်၀ဲဒၣ်န့ၣ်လီၤႉ ဒ်(KWO)လံာ်တၢ်ပာ်ပူၤပာ်ဖျါ၀ဲအသိးန့ၣ်ပကတုၤလၢတၢ်ပညိၣ်အဂီၢ်န့ၣ်ပဒုးအိၣ်ထီၣ်တၢ်ဒုးသ့ထီၣ်ဘၣ်ထီၣ် တၢ်ရဲၣ်တၢ်ကျဲၤႇဒုးအိၣ်ထီၣ်ဖီလစံၣ်ဒီးကတိၤန့ၢ်ခဲးတၢ်လၢပိာ်မုၣ်တၢ်ပၣ်ဃုာ်ပၣ်ဂီၢ်စးထီၣ်လၢၦၤတ၀ၢဒီး ဆူထံရူၢ်ကီၢ်သဲးတၢ်တီခိၣ်ရိၣ်မဲပတီၢ်ဘၣ်ဆၣ်ပကဘၣ်မၤတၢ်အိၣ်ဒံးဖးယံၤညါအဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ လၢဟီၣ်ခိၣ်ဒီဘ့ၣ်ပိာ်မုၣ်မုၢ်နံၤလီၤဘၣ်အံၤအဖီခိၣ်န့ၣ် ကညီပိာ်မုၣ်ကရၢ(KWO)ကရၢခိၣ် နီၢ်ကညီဖီ စံး၀ဲလၢ “ပအဲၣ်ဒိးတဲလၢခဲအံၤန့ၣ်တၢ်ဘျၢခိၣ်သ့ၣ်အကိပူၤန့ၣ်ကဘၣ်ထၢနုာ်ဃုာ်၀ဲပိာ်မုၣ်တၢ်ကဲခိၣ်ကဲနၢ်တခါႇမးတကးဘၣ်တၢ်ကဘၣ်ပာ်လီၤ၀ဲဒၣ်ဖီလစံၣ်လၢတၢ်ကရၢကရိန့ၣ်ကဘၣ်အိၣ်ဒီးမုၣ်ခွါတၢ်တုၤသိးထဲသိးဖီလစံၣ်မီၤနီၤႉဒီးလၢတၢ်ပာ်ထီၣ်ခိၣ်နၢ်မ့ၢ်ဂ့ၤတၢ်(ဖရိးမိၣ်)ထီၣ်ၦၤမၤတၢ်ဖိမ့ၢ်ဂ့ၤန့ၣ်ပိာ်မုၣ်ကဘၣ်ပၣ်ဃုာ်၀ဲန့ၣ်ဖီလစံၣ်ကဘၣ်အိၣ်၀ဲႉတမ့ၢ်ထဲဖီလစံၣ်ဘၣ်နဘၣ်ပာ်လီၤစ့ၢ်ကီးတၢ်မၤတၢ်ရဲၣ်တၢ်ကျဲၤႉဒ်သိးတၢ်သ့ၣ်တဖၣ်အံၤအိၣ်ထီၣ်ကန့ၢ်အဂီၢ်န့ၣ်တၢ်ကရၢကရိတဖုဘၣ်တဖုန့ၣ်ဘၣ် ပာ်လီၤတၢ်ရဲၣ်တၢ်ကျဲၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါ(KWO)အိၣ်ဒီးတၢ်ရဲၣ်တၢ်ကျဲၤဒုးအိၣ်ထီၣ်၀ဲကညီပိာ်မုၣ်သးစၢ်တၢ်မၤလိကၠိတကးဒံးဘၣ်တၢ်မၤလိ တၢ်ခွဲးတၢ်ယာ်မ့အိၣ်န့ၣ်ပဆှၢထီၣ်ပိာ်မုၣ်ႇတၢ်အိၣ်ဖှိၣ်မ့အိၣ်န့ၣ်ပကိးဃုာ်ပိာ်မုၣ်သ့ၣ်တဖၣ်ဒီးဒ်န့ၣ်အသိးတၢ်ကရၢ ကရိလၢအဂၤသ့ၣ်တဖၣ်စ့ၢ်ကီးကဘၣ်မၤ၀ဲဒ်အံၤအဂ့ၢ်န့ၣ် နီၢ်ကညီဖီစံးအါထီၣ်၀ဲဒၣ်န့ၣ်လီၤႉ လၢတၢ်န့ၣ်အဃိကညီပိာ်မုၣ်ကရၢ(KWO)ႇကီၢ်ပယီၤပိာ်မုၣ်ကရၢစၢဖှိၣ်(WLB)ဃုာ်ဒီးပိာ်မုၣ်တၢ်ကရၢကရိလၢ အဂၤ လၢအိၣ်ကီၢ်ပယီၤပူၤတဖၣ်အံၤဂုာ်ကျဲးစၢးဆူၣ်ဆူၣ်လၢကဒုးပၣ်ဃုာ်ပၣ်ဂီၢ်ပိာ်မုၣ်လၢတၢ်မၤတၢ်ဆၢတဲာ်အကျါဒီးတၢ်တီခိၣ်ရိၣ်မဲလၢၦၤတ၀ၢခဲလၢာ်အပူၤန့ၣ်လီၤႉဘၣ်ဆၣ်တကီၢ်ခါခဲအံၤတၢ်လဲၤထီၣ်လဲၤထီအိၣ်တဆံးတက့ၢ်လံ ဘၣ်ဆၣ် ပတထံၣ်ဘၣ်လၢပိာ်မုၣ်တဖၣ်ပၣ်ဃုာ်ပၣ်ဂီၢ်လၢတၢ်မၤတၢ်ဆၢတဲာ်လၢကိးပတီၢ်ဒဲးအပူၤဒံးဘၣ်အဂ့ၢ်န့ၣ် (KWO)စံး၀ဲ န့ၣ်လီၤႉ တကးဒံးဘၣ်လၢတၢ်တီခိၣ်ရိၣ်မဲတကပၤမ့ၢ်ဂ့ၤႇတၢ်ပၢတၢ်ပြးဃုာ်ဒီးသနၢၣ်လၢအဂၤသ့ၣ်တဖၣ်အပူၤန့ၣ် ပိာ်မုာ်အတၢ်ပၣ်ဃုာ်ပၣ်ဂီၢ်အံၤမ့ၢ််တၢ်လၢအရ့ဒိၣ်၀ဲအဂ့ၢ်န့ၣ် (KWO)ကရၢခိၣ် နီၢ်ကညီဖီစံးအါထီၣ်၀ဲဒၣ်အံၤန့ၣ်လီၤႉ “ပိာ်မုၣ်န့ၣ်တၢ်ပၣ်ဃုာ်ပၣ်ဂီၢ်န့ၣ်အရ့ဒိၣ်၀ဲလီၤဘၣ်မနုၤအဃိလဲၣ်န့ၣ်နမ့က့ၤကွၢ်ကဒါက့ၤန့ၣ်လၢပၦၤတ၀ၢအကိပူၤန့ၣ် (၅၀)မျးကယၤန့ၣ်မ့ၢ်ပိာ်မုၣ်လီၤႉအဃိလၢတၢ်တီခိၣ်ရိၣ်မဲအပူၤန့ၣ်ပခၢၣ်စးကဘၣ်ပၣ်၀ဲ(၅၀)မျးကယၤစ့ၢ်မီၤနီၤႉ နၦၤတ၀ၢအိၣ်အဃိနတၢ်ကဲခၢၣ်သးန့ၣ်ကဘၣ်အိၣ်၀ဲလီၤႉအဃိန့ၣ်မ့ၢ်၀ဲဒၣ်တၢ်ခွဲးတၢ်ယာ်တခါလီၤႉဘၣ်ဆၣ်လၢပၦၤတ၀ၢပူၤန့ၣ်ခဲအံၤတၢ်သ့ၣ်တဖၣ်အံၤတအိၣ်ဒံးဘၣ်ႉပမ့က့ၤကွၢ်ကဒါက့ၤန့ၣ်ပိာ်မုၣ်မ့အိၣ်(၅၀)မျးကယၤဘၣ်ဆၣ် လၢပဒိၣ်တၢ်ဖံးတၢ်မၤထံရူၢ်ကီၢ်သဲးတၢ်ဖံးတၢ်မၤပူၤန့ၣ်အါဒၣ်တက့ၢ်ပိာ်ခွါသ့ၣ်တဖၣ်လီၤ”အဂ့ၢ်န့ၣ် စံး၀ဲန့ၣ်လီၤႉ စးထီၣ်လၢ(၂၀၂၁)သုးဟံးန့ၢ်တၢ်စိတၢ်ကမီၤ၀ံၤန့ၣ် ပိာ်မုၣ်တဖၣ်တမ့ၢ်ထဲအကဲၦၤတူၢ်ဘၣ်တၢ်ဖိလၢသုးမီၤ စိရိၤတဖုအံၤအစုပူၤဘၣ်ဒီးမ့မ့ၢ်တခီအ၀ဲသ့ၣ်မ့ၢ်စ့ၢ်ကီးၦၤလၢအပၢၢ်ဆၢတၢ်ဒုးလီၤၦီၢ်ကွံာ်သုးမီၤစိရိၤအဃိ ပကဘၣ်ပာ်ပနီၣ်၀ဲပိာ်မုၣ်တဖၣ်အံၤအတၢ်သူၣ်ဒူသးဒူႇမၤလၤကပီၤအ၀ဲသ့ၣ်တၢ်ပၣ်ဃုာ်ပၣ်ဂီၢ်လၢတၢ်ထီဒါသုးမီၤစိရိၤပူၤအဂ့ၢ်န့ၣ် (KWO)လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ ဒ်န့ၣ်အသိးဟီၣ်ခိၣ်ဒီဘ့ၣ်ပိာ်မုၣ်မုၢ်နံၤအံၤပျဲဒုးသ့ၣ်နီၣ်ထီၣ်စ့ၢ်ကီးၦၤလၢပိာ်မုၣ်လၢအိၣ်မူဒံးလၢတၢ်ပျံၤတၢ်ဖုးပူၤႇ အိၣ်လၢတၢ်ဘၣ်ယိၣ်လၢတၢ်ကမၤသံဒီးတၢ်မၤဆူးမၤဆါအီၤလၢသုးမီၤစိရိၤတဖၣ်န့ၣ်လီၤႉလၢတၢ်န့ၣ်အဃိ ကပဘၣ်ဆီၣ်ထွဲမၤစၢၤအ၀ဲသ့ၣ်ႇဒုးပၣ်ဃုာ်ပၣ်ဂီၢ်အ၀ဲသ့ၣ်ဒီးတမ့ၢ်လၢမၤလီၤသထြုးအ၀ဲသ့ၣ်ဘၣ်အဂ့ၢ်န့ၣ် (KWO)စံး၀ဲန့ၣ်လီၤႉ ဟီၣ်ခိၣ်ဒီဘ့ၣ်ပိာ်မုၣ်မုၢ်နံၤအံၤဘၣ်တၢ်စးထီၣ်မၤလၤကပီၤအီၤဖဲ(၁၉၁၁)နံၣ်ဒီးဖဲ(၁၉၇၇)လါမးရှး ၈ သီအနံၤန့ၣ် ဘီမုၢ်စၢဖှိၣ်ကရၢပာ်ဂၢၢ်ပာ်ကျၢၤက့ၤ၀ဲမုၢ်နံၤအံၤဒီး ဒ်န့ၣ်အသိးမ့တုၤဃီၤဖဲလါမးရှး ၈ သီအနံၤအံၤ ဘၣ်တၢ်မၤလၤကပီၤ၀ဲမုၢ်နံၤအံၤလၢဟီၣ်ခိၣ်ဒီဘ့ၣ်တၢ်လီၢ်အါတီၤအပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
သုးကီၣ်ကးကမျၢၢ်တၢ်ဘၣ်ကဲသုးသဲစးတၢ်ရဲၣ်တၢ်ကျဲၤသုတကဲထီၣ်လိၣ်ထီၣ်တဂ့ၤအဂီၢ်ကရူၢ်ကရၢ(၄၁)ဖုကဟူးဂဲၤ၀ဲလၢကျဲအဘိဘိအဂ့ၢ်(GSC)ထုးထီၣ်ပာ်ဖျါ၀ဲ
လါမးရှး ၇သီႇ ၂၀၂၄နံၣ်ႇ ခ့ၣ်အဲးစံၣ်ႇ သုးကီၣ်ကးအတၢ်မၢဆူၣ်ကမျၢၢ်တၢ်ဘၣ်ကဲသုးတၢ်ရဲၣ်တၢ်ကျဲၤအံၤအမိၢ်လံၤမိၢ်ၦၢ်သုတကဲထီၣ်လိၣ်ထီၣ်တဂ့ၤအဂီၢ်ၦၤပၢၢ်ဆၢတၢ်ကရူၢ်ကရၢ(၄၁)ဖုကဟူးဂဲၤ၀ဲလၢကျဲအဘိဘိအဂ့ၢ်တၢ်ထီဒါသုးမီၤစိရိၤသနူကမံးတံာ်(General Strike Committee-GSC)ထုးထီၣ်ပာ်ဖျါ၀ဲဖဲအပူၤကွံာ်လါမးရှး(၅)သီအနံၤန့ၣ်လီၤႉ သုးကီၣ်ကးအတၢ်မၢဆူၣ်ကမျၢၢ်တၢ်ဘၣ်ကဲသုးတၢ်ရဲၣ်တၢ်ကျဲၤအဖီခိၣ်ကရူၢ်ကရၢ(၄၁)ဖုအံၤကဟူးဂဲၤ၀ဲလၢထံရူၢ်ကီၢ်သဲးဂ့ၢ်၀ီႇဒုးယာ်ဂ့ၢ်၀ီႇထံကီၢ်မီၢ်သီတၢ်ရ့လိာ်မုာ်လိာ်ဒီးကမျၢၢ်တၢ်ဟူးတၢ်ဂဲၤဂ့ၢ်၀ီတၢ်ဖံးတၢ်မၤအပူၤအဂ့ၢ်လံာ်ပာ်ဖျါအပူၤပာ်ဖျါ၀ဲန့ၣ်လီၤႉ ဘၣ်ဃးဒီးကရူၢ်ကရၢ(၄၁)ဖုသးလီၤပလိာ်ထုးထီၣ်ပာ်ဖျါ၀ဲလံာ်အတၢ်ပညိၣ်အံၤန့ၣ်မ့ၢ်ဒ်သိးကဒုးနဲၣ်ဖျါထီၣ်၀ဲၦၤဟူးဂဲၤလၢတၢ်ပၢၢ်ဆၢတဖၣ်အံၤအိၣ်ဃူအိၣ်ၦိၤ၀ဲလၢကမျၢၢ်အပူၤလီၤအဂ့ၢ်(GSC)ၦၤဘၣ်မူဘၣ်ဒါ (ဒီၤန့န့မွ့)စံး၀ဲဒ်အံၤန့ၣ်လီၤႉ အ၀ဲစံး၀ဲလၢ “ ပအဲၣ်ဒိးပာ်ဖျါဒုးသ့ၣ်ညါၦၤအါဂၤလၢၦၤပၢၢ်ဆၢတၢ်ကရူၢ်ကရၢတဖၣ်အံၤအိၣ်ၦိၤ၀ဲကမျၢၢ်ႇဒီးအိၣ်၀ဲဒီးအတၢ်ရဲၣ်တၢ်ကျဲၤလၢကမျၢၢ်အဂီၢ်အဃိန့ၣ်ပထုးထီၣ်ပာ်ဖျါလံာ်၀ဲအံၤလီၤမီၤနီၤႉပမ့ဘၣ်တဲလၢအထီန့ၣ်ႇသုးကီၣ်ကးတၢ်ဘၣ်ကဲသုးသဲစးအံၤတမ့ၢ်တၢ်တီတၢ်တြၢ်ဘၣ်အဃိပကဘၣ်ပာ်ဖှိၣ်သးထီဒါ၀ဲတၢ်ဂ့ၢ်အံၤႇဒီးလၢပတၢ်ထီဒါအံၤန့ၣ်ပဘၣ်သူ၀ဲကျဲသနူအဘိဘိမီၤနီၤႉပမ့ပာ်ဖှိၣ်သးတဖျၢၣ်ဃီမးပမၤလီၤၦီၢ်သုးမီၤစိရိၤသနူအံၤကန့ၢ်လီၤႉဒီးပအဲၣ်ဒိးပာ်ဖျါထီၣ်စ့ၢ်ကီး၀ဲလၢပတၢ်မၤအံၤန့ၣ်အဖီခိၣ်ထံဂုၤကီၢ်ဂၤတဖၣ်ကထံၣ်သ့ၣ်ညါ၀ဲလၢသုးကီၣ်ကးအံၤမၤတၢ်အၢတၢ်သီမၤသံမၤ၀ီမၤထီဒါမၤကမၣ်ၦၤကညီဂ့ၢ်၀ီခွဲးယာ်လၢထံလီၢ်ကီၢ်ပူၤမီၤနီၤႉဒီးလၢပထံလီၢ်ကီၢ်ပူၤအံၤသုးကီၣ်ကးသနူအံၤမ့တအိၣ်လၢၤဘၣ်မးထံဖိကီၢ်ဖိကအိၣ်ဘၣ်မုာ်မုာ်ခုၣ်ခုၣ်မီၤနီၤႉအဃိန့ၣ်ပ၀ဲၦၤပၢၢ်ဆၢတၢ်ကရူၢ်ကရၢတဖၣ်ပပာ်ဖှိၣ်သးကတိၤသကိးတၢ်ဒီးပဆၢတဲာ်ထုးထီၣ်၀ဲလံာ်တဘ့ၣ်အံၤလီၤ”အဂ့ၢ်စံးဘၣ်ခ့ၣ်အဲးစံၣ်တၢ်စီၣ်န့ၣ်လီၤႉ လၢန့ၣ်အမဲာ်ညါသုးကီၣ်ကးအတၢ်မၢဆူၣ်ကမျၢၢ်တၢ်ဘၣ်ကဲသုး၀ဲအံၤအဖီခိၣ်ကရူၢ်ကရၢ(၄၁)အံၤကခီၣ်ဆၢဟူးဂဲၤ၀ဲလၢတၢ်မၤတၢ်ဆဲးကျိးဆဲးကျၢဒီးဖီၣ်စုက၀ဲၤၦၤဘၣ်မူဘၣ်ဒါတဖၣ်ႇလၢတၢ်ကမၤစၢၤ၀ဲသူၣ်ဘီၣ်သးစၢ်လၢကအိၣ်ကဒုအသးမ့ၢ်ဂ့ၤသးဆူၣ်လၢကဖီၣ်ထီၣ်စုက၀ဲၤတဖၣ်အဂီၢ်မ့ၢ်ဂ့ၤသ့ၣ်တဖၣ်အဂီၢ်အဂ့ၢ်အ၀ဲစံးအါထီၣ်၀ဲဒၣ်န့ၣ်လီၤႉ တကတီၢ်ဃီလၢတၢ်ကမၤလီၤၦီၢ်ကွံာ်သုးကီၣ်ကးသနူအံၤအဂီၢ်န့ၣ်လိၣ်ဘၣ်၀ဲကလုာ်ဒူၣ်သိၣ်မှံၤဖီၣ်စုကိးဖုဒဲးအဘၢၣ်စၢၤတၢ်ပာ်ပနီၣ်လိာ်သးယၢ်ခီယၢ်ခီဒီးလၢတၢ်ပာ်ဖှိၣ်သးတၢ်ထံၣ်လီၤဆီအါမံၤတၢ်ခီၣ်ဆၢထီဒါကလုာ်ကလုာ်အဖီခိၣ်နာ်၀ဲလၢကဒိးန့ၢ်က့ၤတၢ်မၤနၢၤအဂ့ၢ်လံာ်ထုးထီၣ်ပာ်ဖျါအပူၤပာ်ဖျါ၀ဲန့ၣ်လီၤႉ ဒ်န့ၣ်အသိးႇသုးကီၣ်ကးတၢ်ဘၣ်ကဲသုးအတၢ်ရဲၣ်တၢ်ကျဲၤအံၤတမ့ၢ်၀ဲတၢ်လၢအဖိးသဲစးဘၣ်အဃိထံဂုၤကီၢ်ဂၤကရူၢ်ကရၢတဖၣ်ကမၤစၢၤဆီၣ်ထွဲ၀ဲတၢ်နုာ်လီၤပၣ်ဃုာ်လၢတၢ်ကမၤန့ၢ်ဖဲၣ်ဒရဲၣ်ဒံၣ်မိၤကရံၣ်စံၣ်တၢ်မၤပူၤအံၤအဂီၢ်ဆီၣ်တခူစံးစ့ၢ်ကီး၀ဲလၢလံာ်တၢ်ပာ်ဖျါအပူၤန့ၣ်လီၤႉ