သုးဟံးန့ၢ်တၢ်စိတၢ်ကမီၤ(၃)နံၣ်ဘျဲၣ်အတီၢ်ပူၤကီၢ်ဆၣ်လၢတၢ်ထုးထီၣ်၀ဲ (Martial Law) အိၣ် ၆၁ ဘ့ၣ်
လါမးရှး ၆ သီႇ ၂၀၂၄ နံၣ်ႇ ခ့ၣ်အဲးစံၣ် စးထီၣ်လၢ (၂၀၂၁) သုးဟံးန့ၢ်တၢ်စိတၢ်ကမီၤတုၤလၢတနံၣ်အံၤ (၂၀၂၄) နံၣ်လါမးရှး (၃) သီန့ၣ် ကီၢ်ပယီၤဒီတဘ့ၣ်အပူၤကီၢ်ဆၣ်လၢတၢ်ဘိးဘၣ်ရၤလီၤ၀ဲ (Martial Law) သုးတၢ်ပၢတၢ်ပြးအံၤအိၣ်၀ဲ (၆၁) ဘ့ၣ်လံအဂ့ၢ် (Data for Myanmar) ထုးထီၣ်ပာ်ဖျါ၀ဲ ဖဲလါမးရှး(၅)သီအနံၤန့ၣ်လီၤႉ ကီၢ်ဆၣ်လၢတၢ်ဒုးကဲထီၣ်၀ဲလၢတၢ်ပၢၢ်ဆၢသုးပာ်ဖှိၣ်ကရူၢ်ဒီးပယီၤသုးအဘၢၣ်စၢၤသ့ၣ်တဖၣ်အံၤန့ၣ် သုးကီၣ်ကးထုးထီၣ်ဘိးဘၣ်ရၤလီၤ၀ဲလၢအမ့ၢ် (Martial Law) ဒီး ဖဲ(၂၀၂၁)နံၣ်ထီၣ်အခါန့ၣ် ကီၢ်ဆၣ်လၢအပာ်ဃုာ်လၢ သုးတၢ်ပၢတၢ်ပြးန့ၢ်အိၣ်ထဲ(၈)ဘ့ၣ်လီၤဒီးဘၣ်ဆၣ် ဖဲ(၂၀၂၃)အတီၢ်ပူၤန့ၣ် ကီၢ်ဆၣ်လၢတၢ်ဘိးဘၣ်ရၤလီၤ၀ဲလၢအမ့ၢ် (Martial Law) အံၤအိၣ်၀ဲ(၄၈)ဘ့ၣ်ဒီးတနံၣ်အံၤ(၂၀၂၄) အတီၢ်ပူၤန့ၣ်ဟဲအါထီၣ်ကဒီး၀ဲ(၅)ဘ့ၣ် ခဲလၢာ်ကီၢ်ဆၣ်ပာ်ဖှိၣ်အိၣ်၀ဲ(၆၁)ဘ့ၣ်လံန့ၣ်လီၤႉ ကီၢ်ဆၣ်လၢသုးကီၣ်ကးဘိးဘၣ်ရၤလီၤလၢအမ့ၢ် (Martial Law) သ့ၣ်တဖၣ်န့ၣ်မ့ၢ်၀ဲ ကခၠ့ၣ်ႇ ကရ့ၣ်နံၣ်ႇ ကညီႇ ခၠီႇ တလၢၤႇ ယိၤဒိၣ်ကီၢ်စဲၣ်ပူၤ ကီၢ်ဆၣ်ခဲလၢာ်(၂၅)ဘ့ၣ်လၢ စကဲႇ တနီသရံၣ်ႇ ပကိႇ ၀့ၢ်တကူၣ်ႇ မကွ့ကီၢ်ခီဒိၣ်န့ၣ် ကီၢ်ဆၣ်ခဲလၢာ်(၃၃)ဘ့ၣ်ဒီး ဒ်န့ၣ်အသိးဖဲလါမးရှး ၄ သီအနံၤန့ၣ် လၢယိၤဒိၣ်ကီၢ်စဲၣ်ကလံၤစိး မၤတိၤႇ...
KYOကအိးထီၣ်၀ဲတၢ်ကိၢ်ခါကီၤလၤ၀ါတၢ်မၤလိဒီးဖျၢၣ်ထူတၢ်လိၣ်ကွဲ
လါမးရှး ၆သီႇ ၂၀၂၄နံၣ်ႇ ခ့ၣ်အဲးစံၣ်ႇ ခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢႇဖၣ်အၣ်ကီၢ်ရ့ၣ်တၢ်ကြဲၢ်ကီၢ်ဆၣ်အပူၤကညီသးစၢ်ကရၢ(KYO)တီခိၣ်ရိၣ်မဲကအိးထီၣ်၀ဲတၢ်ကိၢ်ခါလံာ်အဲကလံးတၢ်မၤလိဒီးတၢ်မၤလိသ့သးဖျၢၣ်ထူတၢ်ဂဲၤလိာ်ကွဲတၢ်မၤလိဖဲတလါအံၤလါမးရှးအတီၢ်ပူၤအဂ့ၢ်တၢ်ကြဲၢ်ကီၢ်ဆၣ်(KYO)ကညီသးစၢ်ကရၢထုးထီၣ်ပာ်ဖျါ၀ဲဖဲလါမးရှး(၃)သီအနံၤန့ၣ်လီၤႉ ဘၣ်ဃးဒီးတၢ်အိးထီၣ်၀ဲကၠိပျၢ်ကသုၣ်တၢ်ကိၢ်ခါကီၤလၤ၀ါတၢ်မၤလိအံၤန့ၣ်အတၢ်ပညိၣ်မ့ၢ်ဒ်သိးဖိဒံဖိသၣ်တဖၣ်ကဒိးန့ၢ်အါထီၣ်လံာ်အဲကလံးတၢ်သိၣ်လိဒီးသူက့ၤ၀ဲလၢကၠိတၢ်မၤလိမၤဒိးပူၤအဂီၢ်ဒီးၦၤလၢကသိၣ်လိတၢ်တဖၣ်န့ၣ်မ့ၢ်(KYO)ကညီသးစၢ်ကရၢအကျါလၢတၢ်ဃုထၢထီၣ်ပာ်အီၤတဖၣ်အဂ့ၢ်တၢ်တြဲၢ်ကီၢ်ဆၣ်((KYO)ကညီသးစၢ်ကရၢအၦၤဘၣ်မူဘၣ်ဒါစီၤနဲၤအူလွ့ၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ပတၢ်ပညိၣ်တၢ်တိာ်ပာ်န့ၣ်ခီမ့ၢ်၀ဲဒၣ်ဖိသၣ်တဖၣ်ဖဲအချူးအဆၢကတီၢ်ကၠိပျၢ်ကသုၣ်အဆၢကတီၢ်ဒ်သိးကမၤလိန့ၢ်အါထီၣ်ဘၣ်၀ဲကီၤလၤ၀ါဒီးကက့ၤသူက့ၤ၀ဲအကျိၤအကျဲလၢအဘၣ်အဂီၢ်မီၤနီၤႉဒီးခီဖျိပထံၣ်လၢအါတက့ၢ်ၦၤအတီၤတဆံဖိတဖၣ်န့ၣ်ဘၣ်ဃးဒီးကီၤလၤ၀ါတကပၤန့ၣ်အတၢ်ဂံၢ်စၢ်ဘါစၢ်အိၣ်မီၤနီၤႉဒီးသရၣ်သရၣ်မုၣ်လၢကသိၣ်လိန့ၢ်၀ဲဖိသၣ်တဖၣ်အံၤန့ၣ်မ့ၢ်၀ဲၦၤလၢပကညီသးစၢ်ကရၢအကျါလီၤမီၤဘၣ်ဆၣ်တမ့ၢ်ဒ်သိးၦၤဘၣ်ပဃုန့ၢ်ၦၤလၢအကြၢး၀ဲဘၣ်ဒီးလၢအကဟ့ၣ်ဖိသၣ်တၢ်သိၣ်လိသ့တဖၣ်မီၤနီၤ”အဂ့ၢ်စံးဘၣ်ခ့ၣ်အဲးစံၣ်တၢ်ကစီၣ်န့ၣ်လီၤႉ လၢန့ၣ်အမဲာ်ညါဘၣ်ဃးတၢ်မၤလိသ့သးဖျၢၣ်ထူတၢ်ဂဲၤလိာ်ကွဲတၢ်သိၣ်လိအံၤစ့ၢ်ကီးအတၢ်ပညိၣ်မ့ၢ်၀ဲဒ်သိးတၢ်ကဒုးအိၣ်ဖျဲၣ်ထီၣ်၀ဲကညီသူၣ်ဘီၣ်သးစၢ်ၦၤလိာ်ကွဲဖိတဖၣ်အဂ့ၢ်အ၀ဲစံးအါထီၣ်၀ဲဒၣ်န့ၣ်လီၤႉ လၢတၢ်မၤလိဘျီ၀ဲအံၤန့ၣ်တၢ်ကသိၣ်လိန့ၢ်၀ဲခီၣ်တဃာ်လံာ်ကိၤလၤ၀ါ(၄)ကလုာ်လၢအမ့ၢ်တၢ်ဖးလံာ်လဲၢ်(Reading) တၢ်ကွဲးလံာ်ကွဲးလဲၢ်((Writing)) တၢ်တဲလိ((Speaking) ဒီး တၢ်ဒိကနၣ်လိတၢ် (Listening) သ့ၣ်တဖၣ်န့ၣ်လီၤႉ တကးဒံးဘၣ်တၢ်သိၣ်လိကီၤလၤ၀ါတၢ်ရဲၣ်တၢ်ကျဲၤအံၤတၢ်ကစးထီၣ်မၤအီၤဖဲလါမးရှး(၁၃)သီဒီးကယံာ်၀ဲလၢ(ခံ)လါအတီၢ်ပူၤဒီးမ့မ့ၢ်တၢ်သိၣ်လိဖျၢၣ်ထူတၢ်ဂဲၤလိာ်ကွဲအံၤန့ၣ်တၢ်ကစးထီၣ်မၤအီၤဖဲလါမးရှး(၆)သီတုၤလၢလါအ့ဖြ့ၣ်(၆)သီထဲ(၁)လါအတီၢ်ပူၤလီၤအသိးသရၣ်လၢကဟဲမၤလိဖျၢၣ်ထူတၢ်ဂဲၤလိာ်ကွဲတဖၣ်န့ၣ်မ့ၢ်၀ဲကီၢ်ပယီၤအပူၤတၢ်လိာ်ကွဲကရၢၦၤနဲၣ်လိတၢ်လၢအအိၣ်ဒီးလံာ်အုၣ်သးတဖၣ်အဂ့ၢ်စံးစ့ၢ်ကီး၀ဲန့ၣ်လီၤႉ တၢ်ကိၢ်ခါတၢ်မၤလိအံၤတူၢ်လိာ်၀ဲဖိဒံဖိသၣ်သူၣ်ဘီၣ်သးစၢ်မုၣ်ခွါလၢအသးနံၣ်(၁၀)တုၤ(၂၁)နံၣ်ကိးဂၤဒီးမ့ၢ်၀ဲတၢ်မၤလိလၢတဘၣ်ဟ့ၣ်အဘူးအလဲဘၣ်အသိးကွဲမုာ်၀ဲၦၤကိးဂၤလၢကဟဲဟ့ၣ်လီၤအမံၤစရီလၢတၢ်မၤလိတဘျီအံၤအပူၤအဂ့ၢ်ပာ်ဖျါစ့ၢ်ကီး၀ဲလၢတၢ်ကြဲၢ်ကီၢ်ဆၣ်(KYO)ကညီသးစၢ်ကရၢ(facebook)အပူၤစ့ၢ်ကီးန့ၣ်လီၤႉ ဒ်န့ၣ်အသိး(KYO)ကညီသးစၢ်ကရၢအတၢ်အိးထီၣ်၀ဲတၢ်ကိၢ်ခါတၢ်မၤလိလၢတၢ်တြဲၢ်ကီၢ်ဆၣ်အပူၤအံၤမ့ၢ်၀ဲတၢ်အဆိကတၢၢ်တဘျီဒီးလၢတၢ်ကိၢ်ခါတၢ်မၤလိဘျီ၀ဲအံၤအပူၤတိာ်လီၤပာ်၀ဲလၢကတူၢ်လိာ်၀ဲၦၤမၤလိတၢ်ဖိအဂၤ(၈၀)အိၣ်၀ဲအသိးတကီၢ်ခါဒိးန့ၢ်ဘၣ်၀ဲၦၤဟဲဆဲးလီၤမံၤနီၢ်ဂံၢ်အဂၤ(၃၀)ဘျဲၣ်ဃၣ်ဃၣ်လံအဂ့ၢ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
သုးဟံးန့ၢ်တၢ်စိတၢ်ကမီၤ၀ံၤလီၢ်ခံ မဲၢ်ဆီး၀့ၢ်ပူၤဟံၣ်လဲအၦ့ၤထီၣ်အါန့ၢ်အပူၤကွံာ်
လါမးရှး ၆ သီႇ ၂၀၂၄ နံၣ်ႇ ခ့ၣ်အဲးစံၣ် သုးကီၣ်ကးဟံးန့ၢ်ထံကီၢ်တၢ်စိတၢ်ကမီၤ၀ံၤလီၢ်ခံ လၢကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်ဆီး၀့ၢ်ပူၤန့ၣ် ခီဖျိၦၤဟးဃုငါအိၣ်ဟံၣ်ဟဲအါထီၣ်၀ဲအဃိဟံၣ်လဲသ့ၣ်တဖၣ်အၦ့ၤထီၣ်၀ဲဒၣ်ကွ့ၢ်ကွ့ၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ကီၢ်ကၠီၣ်တဲၣ် မဲၢ်ဆီး၀့ၢ်ပူၤ စးထီၣ်လၢသုးကီၣ်ကးဟံးန့ၢ်တၢ်စိတၢ်ကမီၤန့ၣ် ခီဖျိထံလီၢ်ကီၢ်ပူၤတၢ်သဘံၣ်သဘုၣ် အိၣ်ထီၣ်အဖီခိၣ်ထံဖိကီၢ်ဖိကမျၢၢ်သ့ၣ်တဖၣ်ဟဲဃ့ၢ်ထီၣ်အိၣ်၀ဲဒၣ်အံၤတကပၤအိၣ်ထီၣ်၀ဲဒီး လၢတၢ်န့ၣ်အဃိ ဟံၣ်လဲစ့ၢ်ကီးအၦ့ၤဒိၣ်ထီၣ်၀ဲဒၣ်ကွ့ၢ်ကွ့ၢ်အဂ့ၢ်န့ၣ် ခီကီၢ်ၦၤမၤတၢ်ဖိလၢအိၣ် မဲၢ်ဆီး၀့ၢ်ပူၤတဖၣ် စံး၀ဲန့ၣ်လီၤႉ ဘၣ်ဃးတၢ်ဂ့ၢ်အံၤခီကီၢ်ၦၤမၤတၢ်ဖိလၢအိၣ်မဲၢ်ဆီး၀့ၢ်ပူၤန့ၢ်အနံၣ်(၁၀)ဘျဲၣ်တဂၤ စံး၀ဲလၢ“ပအိၣ်လၢညါအပူၤကွံာ်န့ၣ် ဟံၣ်ဖဲ(၂၀၀၀),(၃၀၀၀)ဘးန့ၣ်ပပာ်လၢအၦ့ၤဖးဒိၣ်လံမီၤနီၤႉနါက့စးထီၣ်ဖဲသုးဟံးန့ၢ်တၢ်စိတၢ်ကမီၤ၀ံၤလီၢ်ခံန့ၣ် ၦၤဟဲထီၣ်အိၣ်လၢအံၤဟဲအါထီၣ်အဃိဟံၣ်သ့ၣ်တဖၣ်အၦ့ၤဒိၣ်ထီၣ်ႉလၢညါခါဟံၣ်ဖဲတဖျၢၣ်(၃၅၀၀)ဘးန့ၣ်ခဲအံၤ အိၣ်လၢ(၇၀၀၀)ဃၣ်ဃၣ်လံမီၤနီၤႉအဃိသုးကီၣ်ကးဟံးန့ၢ်တၢ်စိတၢ်ကမီၤ၀ံၤလီၢ်ခံန့ၣ်ၦၤကီၢ်ပယီၤဟဲနုာ်လီၤအိၣ်လၢ မဲၢ်ဆီး၀့ၢ်ပူၤအံၤအါထီၣ်ဘျီဟံၣ်အၦ့ၤဒိၣ်ထီၣ်န့ၣ်ပတဲသ့လီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ် လီၤႉ တကးဒံးဘၣ်တချုးသုးဟံးန့ၢ်တၢ်စိတၢ်ကမီၤကဲထီၣ်ဒံးဘၣ်အခါလၢမဲၢ်ဆီး၀့ၢ်ပူၤအံၤ ဟံၣ်လၢတၢ်ငါလီၤ၀ဲသ့ၣ်တဖၣ် လီၤဟိအိၣ်၀ဲဒၣ်အါမးဒီးဘၣ်ဆၣ်တၢ်ကဲထီၣ်သး၀ံၤလီၢ်ခံခီဖျိၦၤကီၢ်ပယီၤဖိနုာ်လီၤအိၣ်အါမးအဃိဟံၣ်လဲထီၣ် နဟးဃုငါအိၣ်ဟံၣ်တညီဒ်အပူၤကွံာ်လၢညါခါအသိးလၢၤဘၣ်အဂ့ၢ်န့ၣ် ခီကီၢ်ၦၤမၤတၢ်ဖိတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ ဒ်န့ၣ်အသိးတကီၢ်ခါခဲအံၤဘၣ်ဃးလၢတၢ်ငါအိၣ်ဟံၣ်တကပၤစ့ၢ်ကီးကၠီၣ်တဲၣ် ၦၤဘၣ်မူဘၣ်ဒါမၤဃံးထီၣ်တၢ်သိၣ် တၢ်သီအိၣ်၀ဲဒီးခီဖျိတၢ်မၤဃံးထီၣ်တၢ်ငါဟံၣ်တၢ်သီတၢ်သီအံၤအဃိၦၤကီၢ်ပယီၤဖိလၢအဟဲအိၣ်၀့ၢ်ပူၤတဖၣ် တနီၤန့ၣ်ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဘၣ်ဃးဒီးဟံၣ်လဲထီၣ်တၢ်ဂ့ၢ်အံၤသုးဟံးန့ၢ်တၢ်စိတၢ်မီၤ၀ံၤလီၢ်ခံၦၤကီၢ်ပယီၤဖိလၢအဟဲစံၣ်ထီၣ်အိၣ်လၢမဲၢ်ဆီး၀့ၢ်ပူၤတဂၤစံး၀ဲလၢ“ဟံၣ်လဲထီၣ်ဘျီပအိၣ်တန့ၢ်လၢၤဘၣ်ႉခဲအံၤပငါအိၣ်က့ၤလၢ(apartment)လီၤႉဟံၣ်ဒီဖျၢၣ်န့ၣ်ပငါအိၣ် တန့ၢ် လၢၤဘၣ်တကးဒံးဘၣ်မ့ၣ်အူလဲထီၣ်ထံလဲထီၣ်ခဲလၢာ်လီၤႉတၢ်အီၣ်တၢ်အီစ့ၢ်ကီးအၦ့ၤထီၣ်ဘၣ်ငါအိၣ်က့ၤလၢအခါအံၣ်အံၣ်ပူၤလီၤႉပအိၣ်ဒ်သိးပစးထီၣ်ဟဲအိၣ်အသီခါဒုပအိၣ်တန့ၢ်လၢၤဘၣ်ႉဟံၣ်အ(စပီၤ)နါက့ထီၣ်ဟံၣ်နါက့အလဲထီၣ်ထီၣ်ခဲလၢာ်လီၤႉလၢညါခါဟံၣ်(၅၀၀၀)န့ၣ်ခဲအံၤအၦ့ၤထီၣ်လၢ(၁၀၀၀၀)ဘျဲၣ်လၢန့ၣ်ညါလံ”အဂ့ၢ်န့ၣ် စံး၀ဲန့ၣ် လီၤႉ ဒ်န့ၣ်အသိးတကီၢ်ခါခဲအံၤခီဖျိဟံၣ်လဲဃီလဲတၢ်အီၣ်တၢ်အီအၦ့ၤထီၣ်ခဲလၢာ်အဃိၦၤလၢအဟဲစံၣ်လီၤအိၣ်လၢ မဲၢ်ဆီးပူၤအံၤတဖၣ်တနီၤန့ၣ်ဘၣ်ဒိးသန့ၤထီၣ်သးဃ့တၢ်မၤစၢၤလၢအဘူးအတံၢ်လၢကီၢ်ချၢတဖၣ်အအိၣ်ဒီး လၢတၢ်အီၣ်တၢ်အီတၢ်သူတၢ်စွဲတကပၤစ့ၢ်ကီးဘၣ်မၤစှၤလီၤ၀ဲဒၣ်အဂ့ၢ်န့ၣ် ၦၤလၢအဟဲထီၣ်စံၣ်အိၣ်လၢ၀့ၢ်ပူၤတဖၣ် စံး၀ဲအသိးသ့ၣ်ညါဘၣ်န့ၣ်လီၤႉ ဒ်ၦၤကီၢ်ပယီၤဖိလၢအဟဲထီၣ်စံၣ်အိၣ်လၢမဲၢ်ဆီး၀့ၢ်ပူၤတဖၣ်စံး၀ဲအသိးန့ၣ်ခီဖျိဟံၣ်လဲထီၣ်အဃိ ၦၤကီၢ်ပယီၤဖိလၢအဟဲထီၣ်အိၣ်ဖဲအံၤတဖၣ်အါဒၣ်တက့ၢ်အ၀ဲသ့ၣ်ဘၣ်ငါဖှိၣ်ငါအိၣ်ဆူး၀ဲဟံၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ မဲၢ်ဆီး၀့ၢ်အံၤခီဖျိအိၣ်ဘူး၀ဲဒၣ်ဒီးမၠၣ်၀တံၣ်ကီၢ်ဆၢအဃိသုးဟံးန့ၢ်တၢ်စိတၢ်ကမီၤတကးဒံးဘၣ်သုးကီၣ်ကးထုးထီၣ်၀ဲဒၣ်တၢ်ကဘၣ်မၤသုးသဲစး၀ံၤလီၢ်ခံအံၤၦၤသူၣ်ဘီၣ်သးစၢ်တဖၣ်ဂုာ်ကျဲးစၢးခီဃီၤနုာ်လီၤ၀ဲလၢယိၤကီၢ်ပူၤလၢအတဖိးသဲစးဘၣ်အံၤအိၣ်၀ဲဒၣ်အါမးဒီးဒ်န့ၣ်အသိးတၢ်ဖီၣ်ချုးန့ၢ်ၦၤလၢအနုာ်လီၤခူသူၣ်တဖၣ်စ့ၢ်ကီးကဲထီၣ်တလီၢ်လီၢ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ
သုးကီၣ်ကးဘှီဂ့ၤထီၣ် (နၣ်သၤကွ့) တိၤ၀ံၤလီၢ်ခံခးလီၤကျိဖးဒိၣ်အါထီၣ်ဒိၣ်န့ၢ်အပူၤကွံာ်လၢညါ
လါမးရှး ၅ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ်အပူၤ သုးကီၣ်ကးဘှီဂ့ၤ ထီၣ်က့ၤ (နၣ်သၤကွ့) တိၤ၀ံၤအလီၢ်ခံအ၀ဲသ့ၣ်ခးလီၤကျိဖးဒိၣ်ဟဲအါထီၣ်ဒိၣ်န့ၢ်အပူၤကွံာ်လၢညါအဂ့ၢ်န့ၣ် ဟီၣ်က၀ီၤၦၤဘၣ်မူဘၣ်ဒါတဖၣ် စံး၀ဲန့ၣ်လီၤႉ သုးကီၣ်ကးဟဲဘှီဂ့ၤထီၣ်က့ၤ (နၣ်သၤကွ့) တိၤအံၤမ့ၢ်ဒ်သိးအ၀ဲသ့ၣ်ကစိးကါ၀ဲလၢဒုးယၤတၢ်ဟူးတၢ်ဂဲၤ အဂီၢ်ဒီး လၢန့ၣ်အမဲာ်ညါတိၤအံၤအရ့ဒိၣ်၀ဲလၢသုးကီၣ်ကးသ့ၣ်တဖၣ်အဂီၢ်အဂ့ၢ်န့ၣ် လၢၢ်ဒိၣ်ကီၢ်ဆၣ် ၦၤကတိၤတၢ်ပၢ ပဒိၣ်စီၤ၀ါမုၢ် စံး၀ဲဒ်အံၤန့ၣ်လီၤႉ “ပကွၢ်က့ၤဖဲလါယနူၤအါရံၤထီၣ်(၂၀၂၄)နံၣ်ဒီးတုၤလၢလါဖ့ၤဘြူၤအါရံၤန့ၣ်အ၀ဲသ့ၣ်ဘှီ၀ဲဒၣ်တိၤတဘိန့ၣ်ဒီး မၤအါထီၣ်အဂံၢ်အဘါဖဲန့ၣ်မီၤနီၤႉ ပကွၢ်ကဒါက့ၤ (နၣ်သၤကွ့) တိၤအံၤန့ၣ် လၢဒုၣ်ဒါအဂီၢ်န့ၣ်မ့ၢ်တိာ်လၢအ ကါဒိၣ် တဘိလၢဒုးယာ်တၢ်ရဲၣ်တၢ်ကျဲၤအဂီၢ်လီၤႉ ဒ်န့ၣ်အသိးတၢ်လ့ၢ်လိၤလ့ၢ်ထီၣ်နါက့န့ၣ်ဘူးဒီးလူၤတၢ် ခံချုးကတၢၢ်န့ၣ်မ့ၢ်၀ဲတိၤတဘိအံၤလီၤႉ ဒ်လဲၣ်ဒ်လဲၣ်ဂ့ၤန့ၣ်ကတူၢ်သံတူၢ်ဟါမၢ်အသးဒီးကဘှီ၀ဲကမၤဂ့ၤထီၣ် ၀ဲလၢအ၀ဲသ့ၣ်ဒုးယၤတၢ်ရဲၣ်တၢ်ကျဲၤအဂီၢ်လီၤ အဃိမ့ၢ်တိၤလၢအရ့ဒိၣ်၀ဲလၢအ၀ဲသ့ၣ်အဂီၢ်ဒီးဘှီထီၣ်၀ဲလၢ ကစိးကါ၀ဲအဂီၢ်မီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ (နၣ်သၤကွ့ၤ) တိၤအံၤအိၣ်၀ဲဒၣ်လၢနၣ်သၤကွ့၀့ၢ်-လၢၢ်ဒိၣ်၀့ၢ်အဘၢၣ်စၢၤဒီးတိၤအံၤဖဲပူၤကွံာ် (၂၀၂၃) လါယူၤ (၆)သီ အနံၤန့ၣ်တၢ်ပၢၢ်ဆၢသုးပာ်ဖှိၣ်ကရူၢ်လဲၤမၤပိၢ်ဖးထီၣ်၀ဲ၀ံၤလီၢ်ခံဖဲတနံၣ်အံၤ(၂၀၂၄)နံၣ်လါယနူၤအါရံၤ ထီၣ်တ၀ာ်ဃၣ်ဃၣ်အခါန့ၣ်သုးကီၣ်ကးစးထီၣ်ဟဲဘှီဂ့ၤထီၣ်က့ၤ၀ဲဒၣ်တိၤအံၤအဂ့ၢ်န့ၣ် လီၢ်က၀ီၤၦၤဘၣ်မူ ဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါ ဘၣ်ဃးသုးကီၣ်ကးဟူးဂဲၤအါထီၣ်လၢ ဟီၣ်က၀ီၤပူၤတၢ်အိၣ်သးအဂ့ၢ်အံၤန့ၣ် လၢၢ်ဒိၣ် ကီၢ်ဆၣ် ၦၤကတိၤတၢ်ပၢ ပဒိၣ်စီၤ၀ါမုၢ် စံးအါထီၣ်၀ဲလၢ “ဘၣ်ထွဲဒီးတိၤလၢ (နၣ်သၤကွ့) ပယီၤသုးတ့၀ဲ၀ံၤ အလီၢ်ခံန့ၣ် ဖဲလါဖ့ၤဘြူၤအါရံၤ(၂၈)သီအနံၤန့ၣ်အ၀ဲသ့ၣ်အတၢ်ဟူးတၢ်ဂဲၤ အိၣ်၀ဲဒၣ်တ၀ီလၢကလဲၤထီၣ်...
ဖၣ်အၣ်၀့ၢ်ပူၤတၢ်မၤဃံးထီၣ်တမှံၤတရီအဃိၦၤလၢဟဲနုာ်အိၣ်ပတုာ်တစိၢ်တလီၢ်တဖၣ်အိၣ်ဒီးတၢ်ဘၣ်ယိၣ်
လါမးရှး ၅ သီႇ ၂၀၂၄ နံၣ်ႇ ခ့ၣ်အဲးစံၣ်ႇ လၢကညီကီၢ်စဲၣ် ဖၣ်အၣ်၀့ၢ်က၀ီၤဒ့တဖၣ်အပူၤ ခီဖျိတၢ်မၤဃံးထီၣ်၀ဲၦၤတမှံၤတရီအဃိ ၦၤလၢအဟဲနုာ်လီၤအိၣ်ပတုာ် တစိၢ်တလီၢ်တဖၣ်အိၣ်၀ဲဒီးတၢ်ဘၣ်ယိၣ်ဘၣ်ဘှီအဂ့ၢ်န့ၣ် ကမျၢၢ်အိၣ်၀့ၢ်ပူၤတဖၣ် စံး၀ဲန့ၣ်လီၤႉ စှၤသီအတီၢ်ပူၤဖၣ်အၣ်၀့ၢ်က၀ီၤဒ့တဖၣ်အပူၤၦၤအိၣ်လၢတၢ်ချၢလၢအဟဲအိၣ်ပတုာ်တစိၢ်တလီၢ်တဖၣ်အံၤ ကဘၣ်လဲၤတီၣ်ထီၣ်တမှံၤစရီဒီးတီၣ်ထီၣ်၀ဲဒ်တၢ်နဲၣ်လီၤအိၣ်အသိးဘၣ်ဆၣ်ခီဖျိတၢ်ဘံၣ်တၢ်ဘၢတအိၣ်ဘၣ်အဃိ ဘၣ်ယိၣ်၀ဲလၢသုးကီၣ်ကးအၦၤကဖီၣ်ချူးအ၀ဲသ့ၣ်ဒီးဒ်န့ၣ်အသိးဟံၣ်ကစၢ်လၢအတူၢ်လိာ်တၢ်တဖၣ်စ့ၢ်ကီး ဘၣ်ယိၣ်တၢ်လၢခံခီယၢ်ပၤအဂ့ၢ်န့ၣ်ဖၣ်အၣ်ကမျၢၢ်လၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ပငါအိၣ်ဟံၣ်န့ၣ်ပဘၣ်လဲၤတီၣ်ထီၣ်တမှံၤစရီ၊ပဘၣ်လဲၤစိာ်ဒီးပတၢ်ဂီၤ(မၣ်ပိၤတ့ၤ)မီၤနီၤ အဃိန့ၣ်ၦၤမ့ဟဲအိၣ်ပတုာ်ဖဲပအိၣ်န့ၣ်ပတၢ်ကိၢ်တၢ်ဂီၤအိၣ်မီၤႉဘၣ်မနုၤအဃိလဲၣ်န့ၣ်ပသကိးဟဲအိၣ်ပတုာ်ဖဲပအိၣ်န့ၣ်အ၀ဲသ့ၣ်ကဲတမှံၤအဃိဘၣ်ပျံၤဘၣ်ဖုးလၢၦၤကမၤကီမၤခဲအီၤဒီးတလဲၤတ့ၣ်ထီၣ်၀ဲတမှံၤစရီဘၣ်မီၤႇအမ့လဲၤတ့ၣ်တီၣ်၀ဲနါက့တၢ်ဘံၣ်တၢ်ဘၢတအိၣ်လၢအ၀ဲသ့ၣ်ဂီၢ်စ့ၢ်ကီးဘၣ်မီၤႉအဃိန့ၣ်ဖဲအ၀ဲသ့ၣ်အိၣ်ပတုာ်၀ဲတသီခံသီအတီၢ်ပူၤဒု ပဘၣ်ကိၢ်တၢ်လၢအ၀ဲသ့ၣ်အဂီၢ်ဒီးအ၀ဲသ့ၣ်နာ်က့ဘၣ်ကိၢ်က့ၤတၢ်လၢပဂီၢ်စ့ၢ်ကီးအိၣ်၀ဲမီၤႉပဘၣ်ယိၣ်လၢတၢ်ကသမံသမိးချူးၦၤမီၤနီၤႉ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါဖၣ်အၣ်၀့ၢ်ပူၤက၀ီၤဒ့ၦၤဘၣ်မူဘၣ်ဒါသးၦၢ်လၢအသမံသမိးတမှံၤစရီတဖၣ်အံၤ မ့ဖီၣ်ချုးၦၤတဂၤလၢ်လၢ်လၢတတီၣ်ထီၣ်တမှံၤစရီဘၣ်အခါန့ၣ်ဟံကွံာ်၀ဲအတၢ်ဂီၤ(မၣ်ပိၤတ့ၤ)ဒီးမၢ၀ဲတၢ်လဲၤ ရ့ထီၣ်က့ၤလၢစ့အိၣ်၀ဲအဂ့ၢ်န့ၣ် ကမျၢၢ်တဂၤဃီ၀ဲန့ၣ် စံးအါထီၣ်၀ဲဒၣ်န့ၣ်လီၤႉ တကးဒံးဘၣ်ဖၣ်အၣ်၀့ၢ်ပူၤက၀ီၤဒ့ခိၣ်ဒီးသးၦၢ်လၢအသမံသမိးၦၤတမှံၤတရီတဖၣ်အံၤဖဲအဟးသမံသမိးတၢ်လၢ က၀ီၤဒ့ပူၤအခါန့ၣ်ပၣ်ဃုာ်၀ဲပယီၤသုးပၢၤကီၢ်သုးသ့ၣ်တဖၣ်ဒီးဒ်န့ၣ်အသိးသံကွၢ်သံဒိး၀ဲတၢ်အါမံၤအဂ့ၢ်န့ၣ် ဖၣ်အၣ်လီၢ်က၀ီၤဖိလၢအဂၤတဂၤ စံးစ့ၢ်ကီး၀ဲဒ်အံၤန့ၣ်လီၤႉ “ဖဲတသီခံသီအတီၢ်ပူၤအံၤၦၤဟဲသမံသမိးတမှံၤစရီဆဲးတဲးလီၤႉနုာ်လီၤဟးထီၣ်ဟံၣ်တဖျၢၣ်၀ံၤ တဖျၢၣ်လီၤမီၤႉၦၤတနီၤန့ၣ်တၢ်သမံသမိး၀ဲအလီတဲစိအိၣ်စ့ၢ်ႉစရီပူၤၦၤလၢအမံၤအိၣ်ဒီးအနီၢ်ကစၢ်တအိၣ်ဘၣ်တဖၣ် န့ၣ်သံကွၢ်၀ဲလၢမ့ၢ်အလဲၤဖဲလဲၣ်က့ၤဖဲလဲၣ်ဒ်န့ၣ်အိၣ်၀ဲ” အဂ့ၢ်န့ၣ် စံး၀ဲန့ၣ်လီၤႉ ဒ်န့ၣ်အသိးကမျၢၢ်လၢအဟဲအိၣ်ဆိးဖၣ်အၣ်၀့ၢ်ပူၤတဖၣ်အံၤဘၣ်တီၣ်ထီၣ်၀ဲတမှံၤစရီကိးဂၤဒဲးဒီးဒ်န့ၣ်အသိး ၦၤလၢအအိၣ်အခီပတာ်တလၢက၀ီၤဒ့သ့ၣ်တဖၣ်ဘၣ်တီၣ်ထီၣ်၀ဲတမှံၤစရီကိးလါဒဲးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ သုးကီၣ်ကးထုးထီၣ်၀ဲတၢ်ကဘၣ်ကဲသုးသဲစး၀ံၤလီၢ်ခံလၢဖၣ်အၣ်၀့ၢ်က၀ီၤဒ့တဖၣ်အပူၤ ခီဖျိတၢ်သမံသမိးတမှံၤတရီအါထီၣ်၀ဲအဃိသူၣ်ဘီၣ်သးစၢ်တဖၣ်တနီၤန့ၣ်ဘၣ်ယိၣ်ဘၣ်ဘှီတၢ်လဲၤထီၣ်စံၣ်အိၣ်လၢ ကီၢ်ကၠီၣ်တဲၣ်ပူၤအိၣ်၀ဲအါမးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကညီကီၢ်စဲၣ်ပူၤ သုးကီၣ်ကးထုးထီၣ်တၢ်ကဘၣ်ကဲသုးသဲစး၀ံၤလီၢ်ခံသးစၢ်လဲၤထီၣ်လၢထံဂုၤကီၢ်ဂၤအါထီၣ်
လါမးရှး ၅ သီႇ ၂၀၂၄ နံၣ်ႇ ခ့ၣ်အဲးစံၣ် လၢကညီကီၢ်စဲၣ်အပူၤ သုးကီၣ်ကးထုးထီၣ်တၢ်ကဘၣ်မၤသုးသဲစး၀ံၤလီၢ်ခံ ကမျၢၢ်သူၣ်ဘီၣ်သးစၢ်လၢအိၣ်ခူပူၤ ၀့ၢ်ပူၤတဖၣ်တနံၤဘၣ်တနံၤလဲၤဃ့ၢ်ထီၣ်၀ဲဒၣ်လၢထံဂုၤကီၢ်ဂၤအါထီၣ်၀ဲဒၣ်ကွ့ၢ်ကွ့ၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ်လါဖ့ၤဘြူၤအါရံၤ ၁၀ သီအနံၤန့ၣ် ကီၢ်ပယီၤအပူၤသုးကီၣ်ကးထုးထီၣ်တၢ်ကလုၢ်လၢ ထံဖိကီၢ်ဖိလၢ တၢ်ပာ်ပနီၣ်သးနံၣ်တဖၣ်ကဘၣ်မၤသုးဒီးဖဲန့ၣ်၀ံၤလီၢ်ခံသူၣ်ဘီၣ်သးစၢ်လၢအမံၤအိၣ်လၢကဘၣ်ကဲသုးတဖၣ်အံၤ ပျံၤ၀ဲလၢကဘၣ်ကဲသုးအဃိအ၀ဲသ့ၣ်ဟးဃ့ၢ်အိၣ်ခူသူၣ်ဟးထီၣ်လၢတၢ်လီၢ်ပူၤဖျဲးအလီၢ်ဟဲအါထီၣ်၀ဲဒၣ် ကိးမုၢ်နံၤဒဲး အဂ့ၢ်န့ၣ် သးစၢ်တဖၣ်စံး၀ဲန့ၣ်လီၤႉ ဘၣ်ဃးဒီးတၢ်ဂ့ၢ်အံၤသးစၢ်လၢအိၣ်၀့ၢ်ပူၤတဂၤစံး၀ဲလၢ“သူၣ်ဘီၣ်သးစၢ်တဖၣ်ဘၣ်မနုၤဘၣ်စးစံၣ်ဟးဖျိးလဲၤထီၣ်လၢ ၦၤထံၦၤကီၢ်လဲၣ်န့ၣ်တၢတထံၣ်န့ၣ်ဖဲအံၤတၢ်ဘံၣ်တၢ်ဘၢတအိၣ်လၢၤဘၣ်ႉခံထံၣ်တထံၣ်ခီန့ၣ်တၢ်ပညိၣ်တအိၣ်လၢၤဘၣ်မီၤနီၤႉ၀ံၤဘျီဒုန့ၣ်ကဘၣ်မၤဒ်လဲၣ်အ၀ဲသ့ၣ်မၤ၀ဲတဘၣ်လၢၤဘၣ်ႉနအိၣ်ဖဲကီၢ်ပယီၤပူၤအံၤနနီၢ်ကစၢ်သးသမူမးန့ၣ် ၦၤအုၣ်ကီၤနၤတအိၣ်ဘၣ်ႉအဒိၦၤမ့ဟဲကိးဆူၣ်ၦၤဒီးပကဘၣ်လဲၤလီၤႉနကဆှဲပၠးအီၤတၢ်ဂ့ၢ်တၢ်ကျိၤနါက့အခွဲးအယာ်တအိၣ်ဘၣ်ႉအဃိသးစၢ်တဖၣ်ဘၣ်ပျံၤဘၣ်ဖုးတၢ်အဃိအ၀ဲသ့ၣ်ဆၢတဲာ်လီၤသးလၢကဟးထီၣ်လၢကီၢ်ပယီၤပူၤလဲၤထီၣ်စံၣ်အိၣ်လၢၦၤထံၦၤကီၢ်ဒ်န့ၣ်မီၤနီၤ”အဂ့ၢ် န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါသုးကီၣ်ကးထုးထီၣ်တၢ်ကဘၣ်မၤသုးသဲစး၀ံၤလီၢ်ခံသူၣ်ဘီၣ်သးစၢ်တဖၣ်အိၣ်ဒီးတၢ်ပျံၤတၢ်ဖုး တၢ်ဘၣ်ယိၣ်ဘၣ်ဘှီဒီးဒ်န့ၣ်အသိးမ့ဆဲးအိၣ်ဒံးလၢကီၢ်ပယီၤပူၤန့ၣ်ကဘၣ်ကဲသုးတကးဒံးဘၣ်တၢ်ပညိၣ်တၢ်မုၢ်လၢ် သ့ၣ်တဖၣ်စ့ၢ်ကီးလီၤမၢ်၀ဲအဃိသးစၢ်တဖၣ်ဘၣ်လဲၤထီၣ်စံၣ်အိၣ်လၢၦၤထံၦၤကီၢ်ဟဲအါထီၣ်ဒ်အံၤလီၤအဂ့ၢ်န့ၣ် သးစၢ်တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ ဒ်န့ၣ်အသိးတကီၢ်ခါခဲအံၤသူၣ်ဘီၣ်သးစၢ်လၢအိၣ်ဒူပူၤသ၀ီပူၤလၢအလဲၤထီၣ်ကၠိလၢခူပူၤ၀့ၢ်ပူၤတဖၣ်တနီၤန့ၣ် ဆဲးအိၣ်လၢ၀့ၢ်ပူၤတဘူၣ်လၢၤဘၣ်ဒီးဘၣ်ယိၣ်လၢကဘၣ်ကဲသုးအဃိတနီၤန့ၣ်က့ၤအိၣ်လၢအနီၢ်ကစၢ်တၢ်လီၢ် တၢ်ကျဲအဒူသ၀ီစ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ သုးကီၣ်ကးပာ်ဂၢၢ်ပာ်ကျၢၤတၢ်ကဘၣ်မၤသုးသဲစး၀ံၤလီၢ်ခံမုၢ်ဆ့ၣ်ထီၣ်တနံၤန့ၣ် သူၣ်ဘီၣ်သးစၢ်မုၣ်ခွါလၢ အသးနံၣ်ပၣ်လၢကဘၣ်နုာ်လီၤကဲသုးတဖၣ်အံၤဂုာ်ကျဲးစၢးလဲၤထီၣ်၀ဲဒၣ်လၢထံဂုၤကီၢ်ဂၤလၢကျဲအဘိဘိဒီး တနီၤန့ၣ်လဲၤထီၣ်စံၣ်လၢယိၤကီၢ်တကပၤစ့ၢ်ကီးအိၣ်၀ဲဒၣ်အါမးအဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢတၢ်န့ၣ်အဃိကိးမုၢ်နံၤဒဲးဃၣ်ဃၣ်တၢ်ဖီၣ်ချုးန့ၢ်၀ဲၦၤကီၢ်ပယီၤဖိလၢအဟဲနုာ်လီၤခူသူၣ်လၢကီၢ်ကၠီၣ်တဲၣ်ပူၤလၢထံဆၢကီၢ်ဆၢအံၤဟဲအါထီၣ်၀ဲဒီးဒ်န့ၣ်အသိးၦၤလၢတၢ်ဖီၣ်ချုး၀ဲသ့ၣ်တဖၣ်အံၤအါဒၣ်တက့ၢ်မ့ၢ်၀ဲသူၣ်ဘီၣ်သးစၢ် သ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါသုးကီၣ်ကးထုးထီၣ်တၢ်ကဘၣ်ကဲသုးသဲစးအဖီခိၣ်အံၤသူၣ်ဘီၣ်သးစၢ်လၢအိၣ်ခ့ၣ်အဲၣ်ယူၣ်-မုၢ်တြီၢ်ကီၢ်ရ့ၣ် ခူ၀့ၢ်ဒူသ၀ီအပူၤတဖၣ် ကထီဒါသကိးသဲးစးတၢ်သိၣ်တၢ်အံၤဒီး တၢ်ဆီၣ်သနံးမ့အိၣ်ထီၣ်လၢကဘၣ်ကဲသုး န့ၣ် ဟဲစံၣ်အိၣ်ကဒုသးလၢဟီၣ်က၀ီၤပူၤသ့၀ဲအဂ့ၢ်န့ၣ် မုၢ်တြီၢ်ကီၢ်ရ့ၣ် ပၢဆှၢတၢ်ကမံးတံာ် ထုးထီၣ်ပာ်ဖျါ၀ဲ ဖဲလါမးရှး ၁ သီအနံၤန့ၣ်လီၤႉ
မူကီၢ်ဆၣ်အပူၤ ပယီၤသုးသူတၢ်စုဆူၣ်ခီၣ်တကး မၤထီဒါၦၤဂ့ၢ်၀ီခွဲးယာ်အဃိ (၄)သီအတီၢ်ပူၤ ကမျၢၢ်သံ(၃) ဂၤ ဘၣ်ဒိ(၅)
လါဖ့ၤဘြူၤအါရံၤ ၄ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် မူကီၢ်ဆၣ်အပူၤ လါဖ့ၤဘြူၤအါရံၤ(၂၈)သီ တုၤ လါမးရှး(၂)သီလၢ(၄)သီအတီၢ်ပူၤ ခီဖျိပယီၤသုးကျိၤနုာ်လီၤဒီးမၤထီဒါၦၤဟီၣ်ခိၣ်ဖိခွဲးယာ်အဃိ ကမျၢၢ်သံ(၃)ဂၤႇ ဘၣ်ဒိ(၅)ဂၤဒီးမ့ၣ်အူအီၣ်ဟးဂီၤကမျၢၢ်ဟံၣ်အါအါဂီၢ်ဂီၢ်အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သး ထုးထီၣ်ပာ်ဖျါ၀ဲ ဖဲလါမးရှး(၃)သီအနံၤန့ၣ်လီၤႉ ပယီၤသုးကျိၤလၢအဟဲနုာ်လီၤလၢဒူသ၀ီပူၤသ့ၣ်တဖၣ်အံၤဖီၣ်မၤဆါမၤပယွဲကမျၢၢ်ဒီးဒွဲၣ်အူအီၣ်ကွံာ်၀ဲကမျၢၢ်အဟံၣ် အဃီတကးဒံးဘၣ်အမဲာ်ညါပယီၤသုးအံၤဖဲအ၀ဲသ့ၣ်နုာ်လီၤအဆၢကတီၢ်ခးလီၤကျိဖးဒိၣ်ဒီးတ့ၢ်လီၤ စ့ၢ်ကီးဒြိမ့ၣ်ပိၢ် အိၣ်၀ဲအဂ့ၢ်န့ၣ် မူကီၢ်ဆၣ် ၦၤမၤစၢၤၦၤဃ့ၢ်မှံဟးဖျိး သရၣ်စီၤစံးပတြၢၤ စံး၀ဲန့ၣ်လီၤႉ အ၀ဲစံး၀ဲလၢ“အ၀ဲသ့ၣ်မ့ၢ်နုာ်လီၤလၢသ၀ီပူၤန့ၣ်ဒွဲၣ်၀ဲၦၤသ၀ီဖိအဟံၣ်မီၤနီၤႉ အ၀ဲသ့ၣ်န့ၣ်ဟဲသုးဘူးထီၣ်အ သးလၢ နၣ်သၤကွ့မီၤႉ (နၣ်သၤကွ့)န့ၣ်အ၀ဲသ့ၣ်ဘှီထီၣ်၀ဲတိာ်ဘျီန့ၣ်အၦၤ သ့ၣ်တဖၣ်ဟဲထီၣ်၀ဲအိၣ်လၢ ကါတဆံယဲၢ်ခိၣ်ၦဲၤၦဲၤမီၤနီၤႉ ဒီးဖဲအ၀ဲသ့ၣ်သုးထီၣ်အဂံၢ်အကတီၢ်ခးလီၤကျိဖးဒိၣ်၊ကဘီယူၤစ့ၢ်ကီးဟဲခး လီၤစၢၤတၢ်အိၣ်၀ဲအဃိကမျၢၢ်သ့ၣ်တဖၣ်ဘၣ်ကွၢ်ဆၢမဲာ်၀ဲတၢ်၀ဲန့ၣ်သ့ၣ်တဖၣ်မီၤနီၤႉ မ့မ့ၢ်လၢတၢ်ဘၣ်ဒိ ဘၣ်ထံးဒီးတၢ်ဟးဂူာ်ဟးဂီၤခီန့ၣ်လီၤဘီလီမုၢ်ညါန့ၣ်လီၤႉ ဟဲခးလီၤတၢ်န့ၣ်ကဘီယူၤမးတကးဘၣ်အ၀ဲသ့ၣ် ဒြိစ့ၢ်ကီးဟဲတ့ၢ်လီၤမ့ၢ်ပိၢ်တဘျီန့ၣ်ကအိၣ်လၢအဖျၢၣ်တဆံထဲန့ၣ်ညါလီၤႉ မ့မ့ၢ်လၢအ၀ဲသ့ၣ်တၢ်ပၢတၢ်ပြး ခီန့ၣ်ဒုဟးဂီၤလၢာ်လံန့ၣ်ပတဲသ့မီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါမူကီၢ်ဆၣ်အပူၤကမျၢၢ်လၢဘၣ်ဃ့ၢ်အိၣ်ကဒုသးတဖၣ်တနီၤန့ၣ်ဘၣ်ဃ့ၢ်၀ဲဒၣ်အဘျီဘၣ်အဘျီလံဒီး ဒူသ၀ီဒ်မ့ၢ် (နၣ်သၤကွ့ႇ တကိၤတဲၤႇ ယ့ၤဒွ့ကိကၠံဒီးယ့ၤဒွ့ကိလ့) သ၀ီၦၤကမျၢၢ်သံဘၣ်ဒိဘၣ်ထံး အိၣ်ထီၣ်၀ဲကိးနံၤဒဲး ဃၣ်ဃၣ်အသိးလၢကလဲၤကူဆါယါဘျါၦၤဆါလၢ၀့ၢ်ပူၤအဂီၢ်ဘၣ်ကွၢ်ဆၢမဲာ်၀ဲတၢ်ကီတၢ်ခဲအိၣ်အဂ့ၢ်န့ၣ် သရၣ်စီၤစံးပတြၢၤ စံးအါထီၣ်၀ဲန့ၣ်လီၤႉ ဒ်န့ၣ်အသိးချၢၣ်လွံၢ်ထူၣ်ကီၢ်ရ့ၣ် မူကီၢ်ဆၣ်အပူၤ သုးကီၣ်ကးအသုးကျိၤဟဲနုာ်လီၤဒွဲၣ်အူအီၣ် ၦၤကမျၢၢ် အဟံၣ်ႇ ခးလီၤကျိဖးဒိၣ်ကျိဖိႇ ကဘီယူၤဟဲခးလီၤတၢ်ဟဲတ့ၢ်လီၤဒြိမ့ၣ်ပိၢ်ဒီးတကးဒံးဘၣ်အမဲာ်ညါ ပယီၤ သုးအံၤသူ၀ဲ...
၀့ၢ်ပူၤကမျၢၢ်တဖၣ်မ့ၢ်သဂၢၢ်ဘၣ်ဒီးတၢ်ဆီၣ်သနံးလၢကဘၣ်ကဲသုးန့ၣ်ကပဒ့ၣ်သးဆူသ၀ီလၢဘူးဒီးအ၀ဲသ့ၣ်အဂ့ၢ် (KNU)မုၢ်တြီၢ်စံး၀ဲ
လါမးရှး ၄သီႇ ၂၀၂၄နံၣ်ႇ ခ့ၣ်အဲးစံၣ်ႇ သုးကီၣ်ကးထုးထီၣ်ပာ်ဖျါ၀ဲတၢ်ဘၣ်ကဲသုးသဲစး၀ံၤအလီၢ်ခံကီၢ်ရ့ၣ်အပူၤကမျၢၢ်အိၣ်ဆိးလၢ၀့ၢ်ပူၤတဖၣ်တၢ်မ့မၤဆူၣ်အီၤလၢကလဲၤကဲသုးန့ၣ်ကဘၣ်လဲၤအိၣ်ကဒု၀ဲအသးလၢသ၀ီလၢအဘူးဒီးခ့ၣ်အဲၣ်ယူၤတၢ်ပၢဟီၣ်က၀ီၤတဖၣ်အပူၤအဂ့ၢ်ခ့ၣ်အဲၣ်ယူၤမုၢ်တြီၢ်ကီၢ်ရ့ၣ်သုးက့(၅)ပၢဆှၢရဲၣ်ကျဲၤကမံးတံာ်ထုးထီၣ်ပာ်ဖျါတ့ၢ်၀ဲဖဲအပူၤကွံာ်လါမးရှး(၁)သီအနံၤန့ၣ်လီၤႉ သုးကီၣ်ကးဒုးမူထီၣ်ဂဲၤထီၣ်၀ဲတၢ်ပာ်ပနီၣ်ကမျၢၢ်သးနံၣ်တၢ်ဘၣ်ကဲသုးသဲစးအံၤမ့ၢ်၀ဲတၢ်မၢန့ၣ်ဆူၣ်ကမျၢၢ်တဖၣ်လၢကနုာ်လီၤဆူတၢ်ဒုးပျီပူၤအဃိကမျၢၢ်လၢအိၣ်၀့ၢ်ပူၤတဖၣ်တၢ်မ့မၤန့ၣ်ဆူၣ်အီၤလၢကဘၣ်လဲၤကဲသုးန့ၣ်လဲၤအိၣ်ကဒု၀ဲအသးလၢသ၀ီလၢအဘူးဒီးခ့ၣ်အဲၣ်ယူၤတၢ်ပၢဟီၣ်က၀ီၤဖဲန့ၣ်တဖၣ်အပူၤသ့၀ဲအဂ့ၢ်ဒ်သိးကမျၢၢ်အိၣ်ကီၢ်ရ့ၣ်အပူၤတဖၣ်ကသ့ၣ်ညါနၢ်ပၢၢ်၀ဲအဂီၢ်ဒီးပဒ့ၣ်ဟးဆှဲးသးကသ့အဂီၢ်မုၢ်တြီၢ်ကီၢ်ရ့ၣ်ဘၣ်ထုးထီၣ်ပာ်ဖျါ၀ဲဒၣ်န့ၣ်လီၤႉ ဒီးကမျၢၢ်လၢကအိၣ်ကဒုအသးလၢသ၀ီပူၤတဖၣ်အံၤကဘၣ်လူၤပိာ်ထွဲ၀ဲၦၤဘၣ်မူဘၣ်ဒါတဖၣ်အတၢ်နဲၣ်လီၤဒီးဒ်သိးကဒိးန့ၢ်ဘၣ်တၢ်အံးထွဲကွၢ်ထွဲတၢ်မၤစၢၤအဂီၢ်ကဘၣ်တီၣ်ထီၣ်၀ဲအမံၤစရီလီၤတံၢ်လီၤဆဲးလီၤအဂ့ၢ်မုၢ်တြီၢ်လံာ်တၢ်ပာ်ဖျါပာ်ဖျါ၀ဲစ့ၢ်ကီးန့ၣ်လီၤႉ လၢန့ၣ်အမဲာ်ညါမုၢ်တြီၢ်ကီၢ်ရ့ၣ်အပူၤကမျၢၢ်လၢအိၣ်သ၀ီပူၤဒီး၀့ၢ်ပူၤတဖၣ်အံၤကဘၣ်ထီဒါ၀ဲသုးကီၣ်ကးတၢ်ဘၣ်ကဲသုးသဲစးအသိးတဘၣ်ပၣ်ဃုာ်ပၣ်ဂီၢ်၀ဲလၢသုးကီၣ်ကးအတၢ်ထၢသုးဘၣ်ဒီးတဘၣ်အိၣ်ၦိၤဟ့ၣ်ဂံၢ်ဟ့ၣ်ဘါ၀ဲသုးကီၣ်ကးဘၣ်အမဲာ်ညါကမျၢၢ်တဖၣ်အံၤမ့ၢ်လီၤဘၣ်တၢ်ကီတၢ်ခဲတၢ်ဃံးတၢ်စ့ၤန့ၣ်ကဘၣ်ဒုးသ့ၣ်ညါ၀ဲတၢ်မဲာ်ညါၦၤဘၣ်မူဘၣ်ဒါလၢအအိၣ်ဘူးဖဲန့ၣ်သ့ၣ်တဖၣ်တဘျီဃီအဂ့ၢ်ခ့ၣ်အဲၣ်ယူၣ်မုၢ်တြီၢ်ကီၢ်ရ့ၣ်စံး၀ဲန့ၣ်လီၤႉ ဒ်န့ၣ်အသိးဘၣ်ဃးဒီးမုၢ်တြီၢ်လံာ်ထုးထီၣ်ပာ်ဖျါအံၤတၢ်မ့ၢ်တလူၤပိာ်ထွဲမၤထွဲ၀ဲဘၣ်ဒီးမ့ၢ်မၤထွဲဒၣ်ဒ်သုးကီၣ်ကးအတၢ်နဲၣ်လီၤအသိးန့ၣ်တၢ်ကပၣ်ပနီၣ်၀ဲၦၤသ့ၣ်တဖၣ်န့ၣ်လၢအမၤန့ၢ်သုးကီၣ်ကးအတၢ်မၤဒီးမ့ၢ်၀ဲသုးကီၣ်ကးကရူၢ်ကရၢဖိလီၤအဂ့ၢ်ဟ့ၣ်ပလီၢ်စံး၀ဲလၢလံာ်ထုးထီၣ်ပာ်ဖျါအပူၤန့ၣ်လီၤႉ သုးကီၣ်ကးပာ်ဂၢၢ်ပာ်ကျၢၤထုးထီၣ်ပာ်ဖျါ၀ဲတၢ်ဘၣ်ကဲသုးသဲစး၀ံၤအလီၢ်ခံတၢ်လီၢ်အါတီၤသူၣ်ဘီၣ်သးစၢ်သ့ၣ်တဖၣ်ဟဲထီၣ်အိၣ်ကဒု၀ဲလၢခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤအိၣ်၀ဲအဂ့ၢ်သ့ၣ်ညါဘၣ်န့ၣ်လီၤႉ
(BGF)တူၢ်လိာ်သးစၢ်လၢဃ့ၢ်တၢ်ဘၣ်ကဲသုး လၢကမၤသကိးတၢ်ဒီးအ၀ဲသ့ၣ်
လါမးရှး ၄သီႇ ၂၀၂၄နံၣ်ႇ ခ့ၣ်အဲးစံၣ် သးစၢ်လၢအအိၣ်လၢ၀့ၢ်ပူၤ လၢအဃ့ၢ်တၢ်ဘၣ်ကဲသုးသ့ၣ်တဖၣ်န့ၣ် (BGF)တူၢ်လိာ်အ၀ဲသ့ၣ်လၢကမၤသကိးတၢ်ဒီး( BGF)အဂ့ၢ် (BGF)အၦၤဘၣ်မူဘၣ်ဒါစံးဘၣ်၀ဲဒၣ် ခ့ၣ်အဲးစံၣ်ကညီတၢ်ကစီၣ်န့ၣ်လီၤႉ ဖဲအပူၤကွံာ်လါဖ့ၤဘြူၤအါရ့ၤ အသီ၁၀ဒီး၁၃သီအနံၤန့ၣ် သုးကီၣ်ကးဘိးဘၣ်ရၤလီၤ၀ဲလံာ်တၢ်ကလုၢ်တဘံၣ်လၢအမ့ၢ်ထံဖိကီၢ်ဖိဘၣ်ကဲသုးတၢ်ဘျၢသဲစးဒီးဖဲ၂၇၊၂၀၂၄ႇ၃၂၊၂၀၂၄န့ၣ်လံာ်၀ဲအံၤဘၣ်တၢ်ဒုးမူထီၣ်အီၤလံအသိးဖဲလါဖ့ၤဘြူၤအါရံၤ၁၃သီအနံၤန့ၣ် ဒုးအိၣ်ထီၣ်၀ဲဒၣ် တၢ်ကိးကမျၢၢ်ဘၣ်ကဲသုးလီၢ်ခၢၣ်သးဒ် ၁၊၂၀၂၄ အဂ့ၢ်ထုးထီၣ်ပာ်ဖျါ၀ဲဒၣ်န့ၣ်လီၤႉ လၢသုးကီၣ်ကးထုးထီၣ်၀ဲကမျၢၢ်ဘၣ်ကဲသုးတၢ်ဘျၢသဲစးဒ်အံၤအဖီခိၣ် အ၀ဲသ့ၣ်ထံၣ်ဘၣ်၀ဲလၢသးစၢ်လၢ၀့ၢ်ပူၤသ့ၣ်တဖၣ်ဃ့ၢ်ထီၣ်ကွံာ်၀ဲအါအါဂီၢ်ဂီၢ်အဃိသးစၢ်သ့ၣ်တဖၣ်အံၤ(BGF)တကပၤတူၢ်လိာ်အ၀ဲသ့ၣ်လၢကမၤသကိးတၢ်အဂ့ၢ် (BGF)သုးဟီၣ်က၀ီၤနီၣ်ဂံၢ်(၂)အဒုးယာ်ခိၣ် သုးခိၣ်ဒိၣ်စိ စီၤတ့ၤ၀ဲစံးဘၣ်၀ဲဒၣ် ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“ ပထံၣ်ဘၣ်လၢသးစၢ်လၢအိၣ်လၢလာ်သ့ၣ်တဖၣ်န့ၣ် ပယီၤသုးထီၣ်ရၤလီၤ၀ဲလၢ ၦၤသးနံၣ်အိၣ်(၁၈)နံၣ်ဒီး(၃၅)နံၣ်အဘၢၣ်စၢၤန့ၣ် ကဘၣ်ကဲသုး ၃နံၣ်ဧါႇ ၅နံၣ်ဧါအိၣ်တခါအဃိန့ၣ် ပထံၣ်ဘၣ်လၢဖိဒံဖိသၣ်သ့ၣ်တဖၣ်န့ၣ်ဟဲထီၣ်၀ဲဒၣ်ဒီဒူၣ်ဒီဂီၢ်လၢကါပူၤဒီးမ့ၢ်အ၀ဲသ့ၣ်ကလဲၤကက့ၤဖဲလဲၣ်န့ၣ်ပတသ့ၣ်ညါဘၣ်အဃိသတးန့ၣ်ႇအ၀ဲသ့ၣ်အလဲၤအက့ၤမ့ၢ်တဘၣ်ဘၣ်န့ၣ် ပဘၣ်ယိၣ်လၢတၢ်ကီကဘၣ်အ၀ဲသ့ၣ်အဃိန့ၣ် ပရၤလီၤန့ၣ် အ၀ဲသ့ၣ်လၢလံာ်ဖိတက့ဒ်သိးအ၀ဲသ့ၣ်လဲၤက့ၤမ့ၢ်တဘၣ် ဘၣ်န့ၣ်ကမၤသကိးတၢ်ဒီးၦၤ ပတူၢ်လိာ်၀ဲအသ့ၣ်န့ၣ်လီၤႉ”အဂ့ၢ်စံးဒၣ်န့ၣ်လီၤႉ လၢန့ၣ်အမဲာ်ညါ(BGF)အံၤတဟံးန့ၣ်သုးကီၣ်ကးအလါလဲဒီးတအီၣ်ပယီၤသုးအတၢ်အီၣ်လၢၤဘၣ်အသိးကမျၢၢ်သ့ၣ်တဖၣ်သုတဘၣ်သးဒ့ဒီလၢ( BGF)ကက့ၤမၤကဒါဒုၣ်ဒါတၢ်မၤတဂ့ၤ အၢၣ်လီၤ၀ဲဒၣ်(၁၀၀)မျးကယာ်အဂ့ၢ်သုးခိၣ်ဒိၣ်စိစီၤတ့ၤ၀့တဲအါထီၣ်၀ဲဒၣ်စ့ၢ်ကီးန့ၣ်လီၤႉ ခီဖျိလၢ သုးကီၣ်ကး အကမျၢၢ်ဘၣ်ကဲသုးသဲစးတၢ်ဘျၢအဃိ တကီၢ်ခါခဲအံၤ ၦၤသးစၢ်လၢ၀့ၢ်ပူၤသ့ၣ်တဖၣ်ဟဲဃ့ၢ်အိၣ်ကဒုလၢကညီဖီၣ်စုက၀ဲၤကရူၢ်ဒ်အမ့ၢ်(KNU)‚( BGF)‚(KTLA)ဒီး( DKBA)အကျါသ့ၣ်တဖၣ်အိၣ်၀ဲတနီၤအသိးဃ့ၢ်၀ဲဒၣ်ဆူထံဂုာ်ကီၢ်ဂၤလၢဘူးဒီးကီၢ်ပယီၤအိၣ်စ့ၢ်ကီး၀ဲဒၣ်အဂ့ၢ်သ့ၣ်ညါဘၣ်န့ၣ်လီၤႉ
(သုးက့ ၅)တလါအတီၢ်ပူၤတၢ်ဒုးကဲထီၣ်(၈၆)ဘျီႇပယီၤသုးသံဘၣ်ဒိဘၣ်ထံးခဲလၢ၁်(၇၀)ဂၤ
လါမးရှး ၄ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤ တလါအတီၢ်ပူၤ ခံခီခံကပၤအဘၢၣ်စၢၤ တၢ်ဒုးကဲထီၣ်၀ဲ(၈၆)ဘျီဒီးပယီၤသုးတကပၤသံဘၣ်ဒိဘၣ်ထံး၀ဲခဲလၢာ်(၇၀)ဂၤအဂ့ၢ်န့ၣ် မုၢ်တြီၢ်တၢ်ကစီၣ် ထုးထီၣ်ပာ်ဖျါ၀ဲ ဖဲလါမးရှး ၂ သီအနံၤန့ၣ်လီၤႉ (သုးက့ ၅)ဟီၣ်က၀ီၤအပူၤ လါဖ့ၤဘြူၤအါရံၤ ၁ သီတုၤလၢ ၂၉ သီ လၢတလါအတီၢ်ပူၤ တၢ်ဒုးကဲထီၣ်၀ဲလၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးက့(၅)အၦၤဒီးပယီၤသုးအဘၢၣ်စၢၤအိၣ်၀ဲ(၈၆)ဘျီဒီး သုးကီၣ်ကး တကပၤသံ၀ဲဒၣ်(၂၅)ဂၤႇဘၣ်ဒိ(၄၅)ဂၤအဂ့ၢ်န့ၣ် မုၢ်တြီၢ်တၢ်ကစီၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ တၢ်ဒုးကဲထီၣ်လၢတလါအတီၢ်ပူၤအံၤန့ၣ်သုးကီၣ်ကးတကပၤသံတဖၣ်အကျါပၣ်ဃုာ်၀ဲသုးခိၣ်ဒိၣ်ဖိ(၁)ဂၤဒီး မ့မ့ၢ်လၢ KNLA (သုးက့ ၅)အၦၤတကပၤခီန့ၣ်တၢ်သံတၢ်ဘၣ်ဒိဘၣ်ထံးအိၣ်တအိၣ်လံာ်တၢ်ပာ်ဖျါပူၤပာ်ဖျါ၀ဲတအိၣ်ဘၣ် န့ၣ်လီၤႉ လၢန့ၣ်အမဲာ်ညါတလါအတီၢ်ပူၤခီဖျိပယီၤသုးလီၤကျိဖးဒိၣ်လၢကမျၢၢ်ဒူသ၀ီတၢ်ဖံးအီၣ်မၤအီၣ်လီၢ်ကျဲအိၣ်၀ဲ(၉)ဖျၢၣ်အဃိ ကမျၢၢ်သံ၀ဲဒၣ်(၂)ဂၤအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ တကးဒံးဘၣ်(သုးက့ ၅)ဟီၣ်က၀ီၤ လါဖ့ၤဘြူၤအါရံၤတလါအတီၢ်ပူၤန့ၣ် ခီဖျိကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)သုးပာ်ဖှိၣ်က၀ီၤခး၀ဲပယီၤသုးကလၢၤဒီးဒီၣ်တဲာ်ကွံာ်၀ဲတၢ်လဲၤတၢ်က့ၤကျဲ၊တၢ်အီၣ်တၢ်အီကျဲ၊တၢ်ဒၢၣ်အီထံကျဲ တဖၣ်အဃိပယီၤသုးကၢတီၢ်ကွံာ်အသုးကလၢၤအိၣ်၀ဲဒၣ်(၃)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးဖဲအပူၤကွံာ်လါယနူၤအါရံၤတလါအတီၢ်ပူၤစ့ၢ်ကီးတၢ်ဒုးကဲထီၣ်လၢ သုးက့ ၅ (KNLA)သုးပာ်ဖှိၣ်ဒီး ပယီၤသုးအဘၢၣ်စၢၤအိၣ်၀ဲ(၈၉)ဘျီဒီးသုးကီၣ်ကးတကပၤသံ၀ဲဒၣ်(၄၁)ႇဘၣ်ဒိစ့ၢ်ကီး၀ဲဒၣ်(၄၁)ဂၤအဂ့ၢ်န့ၣ် ခ့ၣ်အဲၣ်ယူၣ်တၢ်ထုးထီၣ်မၤနီၣ်စရီပူၤအသိးသ့ၣ်ညါဘၣ်န့ၣ်လီၤႉ