ကလုာ်ဒူၣ်ကမျၢၢ်ခဲလၢာ်တဘၣ်ပၣ်ဃုာ်လၢသုးကီၣ်ကးသဲစးတၢ်ဘျၢပူၤဘၣ်ႇမ့မ့ၢ်တခီကပာ်ဖှိၣ်မၤသကိးတၢ်ဒီးတၢ်ပၢၢ်ဆၢကရူၢ်ကရၢအဂ့ၢ် ခ့ၣ်အဲၣ်ယူၣ်စံး၀ဲ
လါဖ့ၤဘြူၤအါရံၤ ၁၉သီႇ ၂၀၂၄ နံၣ်ႇ ခ့ၣ်အဲးစံၣ် အပူၤကွံာ်လါဖ့ၤဘြူၤအါရံၤ(၁၀)သီအနံၤသုးကီၣ်ကးထုးထီၣ်၀ဲ“ထံဖိကီၢ်ဖိတၢ်ဘၣ်မၤသုးသဲးစး”တၢ်သိၣ်တၢ်သီတၢ်ဘျၢဒီးလၢတၢ်အံၤအဖီခိၣ်ကလုာ်ဒူၣ်ကမျၢၢ်ခဲလၢာ်တဘၣ်ပၣ်ဃုာ်လၢသုးကီၣ်ကးသဲစးတၢ်ဘျၢပူၤဘၣ်ဒီး မ့မ့ၢ်တခီကပာ်ဖှိၣ်မၤသကိးတၢ်ဒီးတၢ်ပၢၢ်ဆၢသုးပာ်ဖှိၣ်ကရူၢ်ကရၢတဖၣ်အဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲ ဖဲတနံၤအံၤလါယနူၤအါရံၤ(၁၉)သီအနံၤန့ၣ်လီၤႉ စၢၤသွဲၣ်သီသးစၢ်ဃုာ်ဒီးကလုာ်ဒူၣ်ထံဖိကီၢ်ဖိကမျၢၢ်ခဲလၢာ်သုတပၣ်ဃုာ်ပၣ်ဂီၢ်မၤသကိးတၢ်လၢသုးကီၣ်ကးအသဲစးတၢ်ဖံးတၢ်မၤပူၤအံၤဘၣ်ဒီးမ့မ့ၢ်တခီကခီၣ်ရီီၣ်ထီဒါသကိး၀ဲသုးကီၣ်ကးအသဲစးအံၤလၢထံရူၢ်ကီၢ်သဲးတၢ်ခီၣ်ရီၣ် အကျဲ၊ကပာ်ဖှိၣ်မၤသကိးတၢ်ဒီးတၢ်ပၢၢ်ဆၢကရူၢ်ကရၢ၊ကမၤတၢ်မၤလၢကဒီသဒၢလိာ်သးတဂၤဒီးတဂၤ၊ကပာ်ဖှိၣ်ထီဒါမၤဟးဂီၤတၢ်မၤလၢကျဲသနူအကလုာ်ကလုာ်အဂ့ၢ်န့ၣ် ခ့ၣ်အဲၣ်ယူၣ်ဆီၣ်တခူစံး၀ဲလၢလံာ်တၢ်ပာ်ဖျါအပူၤ န့ၣ်လီၤႉ ဒ်လံာ်တၢ်ပာ်ဖျါပူၤပာ်ဖျါ၀ဲအသိးန့ၣ်စၢၤသွဲၣ်သီသးစၢ်တဖၣ်ကစူးကါ၀ဲတၢ်ကူၣ်ထီၣ်ဖးလီၤတၢ်သ့တၢ်ဘၣ် တၢ်ဂံၢ်တၢ်ဘါလၢအိၣ်ဒီးအ၀ဲသ့ၣ်လၢအဖိးမံဒီးစိၤတဖၣ်ဒီးလၢန့ၣ်အမဲာ်ညါကထီဒါမၤလီၤၦီၢ်သကိးသုးကီၣ်ကး အတၢ်မၤလၢအတဖိးသဲစးဘၣ်တဖၣ်ကိးမံၤဒဲးလၢကျဲကလုာ်ကလုာ်အဂ့ၢ်န့ၣ် လံာ်တၢ်ပာ်ဖျါပူၤ ခ့ၣ်အဲၣ်ယူၣ် စံး၀ဲန့ၣ်လီၤႉ ဒ်န့ၣ်အသိးသူၣ်ဘီၣ်သးစၢ်လၢအထီဒါသုးမီၤစိရိၤသနူတဖၣ်ကန့ၢ်အိၣ်ကဒုလၢခ့ၣ်အဲၣ်ယူၣ်တၢ်ပၢဟီၣ်က၀ီၤပူၤ လၢကဲဘျူးကဲဖှိၣ်အဂီၢ်ခ့ၣ်အဲၣ်ယူၣ်ခိၣ်နၢ်အိၣ်ဒီးတၢ်ရဲၣ်တၢ်ကျဲၤလၢကဆီၣ်ထွဲမၤစၢၤ၀ဲဒၣ်သးစၢ်တဖၣ်အံၤလၢ ကျဲအဂ့ၤကတၢၢ်အဂ့ၢ်န့ၣ် ခ့ၣ်အဲၣ်ယူၣ် ၦၤကတိၤတၢ်ပၢ ပဒိၣ်စီၤကျၢၤစ့စ့ၢ်ကီးစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ပကွၢ်ကဒါက့ၤသုးကီၣ်ကးထုးထီၣ်တၢ်ဘျၢ၀ဲအံၤန့ၣ်လၢပတၢ်ပၢၢ်ဆၢတၢ်လဲၤကျဲအဖီခိၣ်န့ၣ်ပထံၣ်စိတၢ်လၢသူၣ်ဘီၣ်သးစၢ်တဖၣ်အဂီၢ်လံအဃိန့ၣ်သူၣ်ဘီၣ်သးစၢ်လၢကဟဲအိၣ်ကဒုလၢပခ့ၣ်အဲၣ်ယူၣ်ဟီၣ်က၀ီၤတဖၣ်န့ၣ်အဂ့ၤကတၢၢ်အကြၢးကတၢၢ်သုတဘၣ်ဒိပတၢ်အိၣ်ဆၢထၢၣ်တဂ့ၤအဂီၢ်ပတၢ်ရဲၣ်တၢ်ကျဲၤအိၣ်၀ဲလၢပကဆီၣ်ထွဲမၤစၢၤ လၢအသ့လၢအလီၢ်သနၢၣ်ဒၣ်၀ဲမီၤနီၤႉ” အဂ့ၢ်န့ၣ် စံး၀ဲန့ၣ်လီၤႉ တကးဒံးဘၣ်တၢ်ဒုးအိၣ်ထီၣ်“ထံဖိကီၢ်ဖိတၢ်ဘၣ်မၤသုးသဲးစး”န့ၣ်မ့ၢ်ဒ်သိးတၢ်ကဒီတဒၢ၀ဲဒၣ် ကီၢ်ချၢထံကီၢ်သ့ၣ်တဖၣ်အတၢ်နုာ်လီၤဘၢၣ်ဖိဒျုးန့ၢ်ထံကီၢ်အခါမ့ၢ်ဂ့ၤႇန့ဆၢၣ်တၢ်တတၢၤတနါဒီးတၢ်ကဲထီၣ်သး သတူၢ်ကလာ်လၢအဒိၣ်အမုၢ်သ့ၣ်တဖၣ်အဂီၢ်အခါမ့ၢ်ဂ့ၤႇတၢ်ဟ့ၣ်နီၤလီၤတၢ်ဒိသူၣ်ဒိသးတၢ်မၤစၢၤသ့ၣ်တဖၣ်ဃုာ်ဒီးတၢ်သူၣ်ထီၣ်ဘှီထီၣ်က့ၤထံကီၢ်အဆၢကတီၢ်အခါတၢ်ကဘၣ်မၤအီၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ လၢတၢ်န့ၣ်အဃိဘၣ်ဃးသုးကီၣ်ကးဒုးအိၣ်ထီၣ်၀ဲသဲစးအံၤကမျၢၢ်ထံဖိကီၢ်ဖိတဖၣ်အလီၢ်တအိၣ်လၢကဘၣ်လူၤပိာ် မၤထွဲသဲစးအံၤဘၣ်ဒီးဒ်န့ၣ်အသိးၦၤလၢအလူၤပိာ်ထွဲမၤထွဲတၢ်ဒီးသုးကီၣ်ကးတဖၣ်န့ၣ်ကဘၣ်ဟံဒီးတူၢ်မူတူၢ်ဒါ၀ဲထံရူၢ်ကီၢ်သဲးဂ့ၢ်၀ီႇၦၤဂ့ၢ်၀ီဒီးမုၢ်ကျိၤ၀ဲၤကွာ်ဂ့ၢ်၀ီတၢ်ဂ့ၢ်ပိာ်ထွဲထီၣ်အခံတဖၣ်အဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ တကတီၢ်ဃီသုးကီၣ်ကးအသဲးစးအံၤတမ့ၢ်လၢအဖိးသဲစးဘၣ်ႇမ့ၢ်တၢ်ထၢန့ၣ်ဆူၣ်၀ဲသုးသီလၢကဆှၢဃီၤ၀ဲစၢၤသီ သးစၢ်တဖၣ်ဒီးၦၤမၤတၢ်ဂံၢ်တၢ်ဘါတၢ်အိၣ်ယၢၤဒီတစိၤဆူတၢ်ဒုးကပျၢၤပူၤအဃိ ထံဖိကီၢ်ဖိကမျၢၢ်တဖၣ်အလီၢ်တအိၣ်လၢကလူၤပိာ်မၤထွဲ၀ဲဘၣ်အဂ့ၢ်န့ၣ် အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ သုးကီၣ်ကးထုးထီၣ်“ထံဖိကီၢ်ဖိတၢ်ဘၣ်မၤသုးသဲးစး”၀ံၤလီၢ်ခံကီၢ်ပယီၤပူၤၦၤသူၣ်ဘီၣ်သးစၢ်လၢအိၣ်ခူပူၤ၀့ၢ်ပူၤ တဖၣ်ဟးထီၣ်တၢ်ချၢတဘူၣ်လၢၤဘၣ်၊ဘၣ်အိၣ်၀ဲဒၣ်ဒီးတၢ်ဘၣ်ယိၣ်ဘၣ်ဘှီအသိးတနီၤန့ၣ်ဟးစံၣ်အိၣ်ခူသူၣ် လဲၤထီၣ်ဃုဖံးဃုမၤလၢထံဂုၤကီၢ်ဂၤစ့ၢ်ကီးဟဲအါထီၣ်၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
(သုးက့ ၅) ၁၅ သီအတီၢ်ပူၤ တၢ်ဒုးကဲထီၣ်(၄၅)ဘျီႇ သုးကီၣ်ကးအၦၤသံ(၁၇)ဂၤ
လါဖ့ၤဘြူၤအါရံၤ ၁၉ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ လၢ(၁၅)သီအတီၢ်ပူၤန့ၣ် တၢ်ဒုးကဲထီၣ်၀ဲ(၄၅)ဘျီဒီး သုးကီၣ်ကးတကပၤသံ၀ဲဒၣ်(၁၇)ဂၤႇဘၣ်ဒိ(၃၉)ဂၤအဂ့ၢ်န့ၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဖဲလါဖ့ၤဘြူၤအါရံၤ ၁၆ သီအနံၤန့ၣ်လီၤႉ လၢမုၢ်တြီၢ်ကီၢ်ရ့ၣ်(သုးက့ ၅)အပူၤ လါဖ့ၤဘြူၤအါရံၤ ၁ သီ တုၤလၢ(၁၅)သီ လၢတဆံယဲၢ်သီအတီၢ်ပူၤန့ၣ် တၢ်ဒုးကဲထီၣ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီးပယီၤသုးကဘၢၣ်စၢၤအခါ ပယီၤသုးသံ(၁၇)ဂၤအကျါပၣ်ဃုာ်၀ဲသုးခိၣ်ဒိၣ်ဖိတဂၤအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဒ်န့ၣ်အသိးတၢ်ဒုးကဲထီၣ်လၢ(၁၅)သီအတီၢ်ပူၤအံၤမ့မ့ၢ်လၢ(သုးက့ ၅) ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) သုးပာ်ဖှိၣ်တကပၤန့ၣ်ဘၣ်ဒိ၀ဲဒၣ်(၇)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါပယီၤသုးကၢတီၢ်ကွံာ်အသုးကလၢၤခံဖျၢၣ်ဒီးပယီၤသုးခးလီၤ၀ဲကျိဖးဒိၣ်လၢကမျၢၢ်ဒူသ၀ီတၢ်ဖံးအီၣ်မၤအီၣ်လီၢ်ကျဲအိၣ်၀ဲ(၄)ဖျၢၣ်န့ၣ်လီၤႉဘၣ်ဆၣ်ပယီၤသုးခးလီၤကျိးဖးဒိၣ်ဘျီ၀ဲအံၤၦၤကမျၢၢ်သံဘၣ်ဒိဘၣ်ထံး တအိၣ်၀ဲဘၣ် အဂ့ၢ်န့ၣ် မုၢ်တြီၢ်တၢ်ကစီၣ်စံး၀ဲန့ၣ်လီၤႉ ဒ်န့ၣ်အသိးဖဲအပူၤကွံာ်လါယနူၤအါရံၤတလါအတီၢ်ပူၤန့ၣ်တၢ်ဒုးကဲထီၣ်၀ဲလၢ(သုးက့ ၅)အၦၤဒီး ပယီၤသုးအဘၢၣ်စၢၤ အိၣ်၀ဲအဘျီ(၈၀)ဘျဲၣ်ဒီးဖဲန့ၣ်သုးကီၣ်ကးတကပၤသံ၀ဲဒၣ်(၄၁)ဂၤႇဘၣ်ဒိစ့ၢ်ကီး၀ဲ(၄၁)ဂၤ အဂ့ၢ်န့ၣ် မုၢ်တြီၢ်တၢ်ကစီၣ်စရီပူၤအသိးသ့ၣ်ညါဘၣ်န့ၣ်လီၤႉ
သုးကီၣ်ကးထုးထီၣ်သုးတၢ်သိၣ်တၢ်သီတၢ်ဘျၢအံၤမ့ၢ်တၢ်ဆီၣ်ဘံၣ်ဆီၣ်ဘၢကမျၢၢ်ထံဖိကီၢ်ဖိအဂ့ၢ် ခ့ၣ်အဲၣ်ယူၣ် စံး၀ဲ
လါဖ့ၤဘြူၤအါရံၤ ၁၈ သီႇ ၂၀၂၄ နံၣ်ႇ ခ့ၣ်အဲးစံၣ် ဖဲလါဖ့ၤဘြူၤအါရံၤ(၁၀)သီအနံၤန့ၣ်သုးကီၣ်ကးထုးထီၣ်တၢ်သိၣ်တၢ်သီတၢ်ဘျၢလၢပိာ်ခွါ(၁၈-၃၅)နံၣ်ႇ ပိာ်မုၣ် (၁၈-၂၇)နံၣ်သးစၢ်တဖၣ်ကဘၣ်နုာ်လီၤလၢသုးပူၤဒီးလၢတၢ်အံၤအဖီခိၣ်မ့ၢ်တၢ်ဆီၣ်ဘံၣ်ဆီၣ်ဘၢ ကမျၢၢ်ထံဖိကီၢ်ဖိလီၤ အဂ့ၢ်န့ၣ် ခ့ၣ်အဲၣ်ယူၣ် စံး၀ဲဒၣ်န့ၣ်လီၤႉ ခီဖျိသုးမီၤစိရိၤအံၤအထံရုၢ်ကီၢ်သဲးဂ့ၢ်၀ီဒီးဒုးယၤဂ့ၢ်၀ီၢ်တဖၣ်လီၤပအၣ်ကွံာ်၀ဲလံအဃိတၢ်ပညိၣ်အိၣ်လၢကမၤအါထီၣ်သုးဂံၢ်ဘါဒီးထုးထီၣ်၀ဲတၢ်သိၣ်တၢ်သီတၢ်ဘျၢဒ်အံၤမ့ၢ်တၢ်ဆီၣ်ဘံၣ်ဆီၣ်ဘၢကမျၢၢ်ထံဖိကီၢ်ဖိတဖၣ်လီၤအဂ့ၢ်န့ၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ၦၤကတိၤတၢ်ပၢ ပဒိၣ်စီၤကျၢၤစ့ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ “ပကွၢ်ကဒါက့ၤသုးမီၤစိရိၤထုးထီၣ်၀ဲတၢ်ထၢသုးတၢ်သိၣ်တၢ်သီတၢ်ဘျၢလၢတၢ်ကဘၣ်မၤအီၤန့ၣ်အခဲအံၤန့ၣ်သူၣ်စၢ်သးဘီၣ်တဖၣ်အိၣ်ဒီးတၢ်ဘၣ်ယိၣ်ဘၣ်ဘှီမီၤနီၤႉဒီး၀ဲပထံၣ်ခီန့ၣ်သုးကီၣ်ကးတဖၣ်အံၤဘၣ်မနုၤအဃိဘၣ်ထုးထီၣ်၀ဲလဲၣ်န့ၣ်ခ့ခါဆၢကတီၢ်ခဲအံၤသုးမီၤစိရိၤကရူၢ်အံၤန့ၣ်ထံရုၢ်ကီၢ်သဲးဂ့ၢ်၀ီမ့ၢ်ဂ့ၤဒုးယၤဂ့ၢ်၀ီမ့ၢ်ဂ့ၤန့ၣ်အတၢ်အိၣ်သးတဂ့ၤလၢၤဘၣ်လီၤဆီဒၣ်တၢ်လၢဒုးယာ်ဂ့ၢ်၀ီတကပၤန့ၣ်အသုးမုၢ်သံၣ်ဘိတအိၣ်လၢၤဘၣ်အသုးမုၢ်သံၣ်ဘိလၢအိၣ်တဖၣ်န့ၣ်သနာ်က့အသးသဟီၣ်တအိၣ်လၢၤဘၣ်အဃိန့ၣ်ဒီးအ၀ဲသ့ၣ်တၢ်ပညိၣ်ခီန့ၣ်မ့ၢ်ဒ်ကမၤအါထီၣ်အသုးမီၤနီၤဒီးဘၣ်ဃးတၢ်၀ဲအံၤန့ၣ်၀ဲပထံၣ်ခီန့ၣ်မ့ၢ်၀ဲတၢ်လၢအကမၤဆီၣ်ဘံၣ်ဆီၣ်ဘၢ၀ဲကမျၢၢ်အဂီၢ်ထၢ၀ဲသုးမီၤနီၤႉ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါခီဖျိသုးကီၣ်ကးအတၢ်သိၣ်တၢ်သီအံၤအဃိသူၣ်ဘီၣ်သးစၢ်တဖၣ်ဟးစံၣ်အိၣခူသူၣ်အိၣ်၀ဲဒီး ဒ်န့ၣ်အသိးမ့ၢ်ဟဲအိၣ်ကဒုသးလၢခ့ၣ်အဲၣ်ယူၣ်တၢ်ပၢဟီၣ်က၀ီၤပူၤန့ၣ်ကတူၢ်လိာ်ခီၣ်ဆၢအ၀ဲသ့ၣ်အဂ့ၢ်န့ၣ် ပဒိၣ်စီၤကျၢၤစ့ စံးအါထီၣ်၀ဲန့ၣ်လီၤႉ သုးကီၣ်ကးဘိးဘၣ်ရၤလီၤလၢတၢ်ကဘၣ်နုာ်လီၤလၢသုးပူၤ၀ံၤလီၢ်ခံစှၤသီသီအတီၢ်ပူၤအံၤ သးစၢ်(၁၈)န့ၣ်တုၤ (၂၅)နံၣ်အဘၢၣ်စၢၤတဖၣ်လဲၤမၤ၀ဲလံာ်ခီကီၢ်အိၣ်၀ဲအါမးအသိး တနီၤန့ၣ်လဲၤခီဃီၤခူသူၣ်လၢကၠီၣ်တဲၣ်တကပၤဒီး တၢ်ဖီၣ်ချုးအီၤစ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ခီဖျိသုးကီၣ်ကးထုးထီၣ်တၢ်သိတၢ်သီလၢကဘၣ်နုာ်လီၤသုးပူၤအံၤအဃိသူၣ်ဘီၣ်သးစၢ်လၢအိၣ်ခူပူၤ၀့ၢ်ပူၤတနီၤ ပျံၤတၢ်ဟးထီၣ်လၢတၢ်ချၢတဘူၣ်လၢၤဘၣ်ဘၣ်အိၣ်လၢတၢ်ဘၣ်ယိၣ်ဘၣ်ဘှီအပူၤဒီးမိၢ်ပၢ်တဖၣ်စ့ၢ်ကီးဘၣ်ကိၢ်ဘၣ်ဂီၤတၢ်လၢအ၀ဲသ့ၣ်အဒံၣ်အဖိဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးစးထီၣ်တနံၣ်အံၤ(၂၀၂၄)လါအ့ဖြ့ၣ်တါလီၤ၀ံၤန့ၣ်ကစးထီၣ်ထၢ၀ဲစရီဒီးဒ်န့ၣ်အသိးကိးလါဒဲးန့ၣ် ကထၢ၀ဲအဂၤ(၅၀၀၀)ဂၤဒီးတနံၣ်အတီၢ်ပူၤန့ၣ်ကထၢ၀ဲအဂၤ(၅၀၀၀၀)ဂၤအဂ့ၢ်န့ၣ် သုးကီၣ်ကးအၦၤကတိၤတၢ်ပၢ သုးခိၣ်ကျၢၢ်ဂီၢ်ဂ့ၢ် စီၣ်မ့ထိစံးဘၣ်အ၀ဲသ့ၣ်စုတီၤဖီလာ်အတၢ်ကစီၣ်သန့ဖဲလါဖ့ၤဘြူၤအါရံၤ(၁၅)သီအနံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ရှါတီ၀့ၢ်တၢ်ဒုးအပူၤသုးကီၣ်ကးတကပၤသံ(၁၆၀)ဂၤအဂ့ၢ် KNDF ထုးထီၣ်ပာ်ဖျါ၀ဲ
လါဖ့ၤဘြူၤအါရံၤ ၁၇ သီႇ ၂၀၂၄ နံၣ်ႇ ခ့ၣ်အဲးစံၣ်ႇ လၢကရ့ၣ်နံၣ်ကီၢ်စဲၣ်အပူၤ သုးကီၣ်ကးအသုးကလၢၤလၢအိၣ်ဆီလီၤသးဖဲ ရှါတီ၀့ၢ်ခိၣ်၀့ၢ်ဃၢၤတဖၣ်အံၤ ဖဲလါဖ့ၤဘြူၤအါရံၤ ၁၂ သီအနံၤန့ၣ် ကရ့ၣ်နံၣ်တၢ်ပၢၢ်ဆၢသုးပာ်ဖှိၣ်ထီၣ်မၤန့ၢ်၀ဲဒီး ဖဲန့ၣ်သုးကီၣ်ကးတကပၤ သံ၀ဲအဂၤ(၁၆၀)ဂၤအဂ့ၢ်န့ၣ် ကရ့ၣ်နံၣ်ဒီကလုာ်ဂၢၤသးသုး(KNDF)ထုးထီၣ်ပာ်ဖျါ၀ဲဖဲတနံၤအံၤ လါဖ့ၤဘြူၤ(၁၆)သီအနံၤန့ၣ်လီၤႉ ရှါတီ၀့ၢ်တၢ်ဒုးဘျီ၀ဲအံၤအပူၤန့ၣ် ကရ့ၣ်နံၣ်ဒီကလုာ်တၢ်ဒီသဒၢသုး KA KNDF, Loikaw PDF တၢ်ဒီသဒၢကမျၢၢ်သုးကရုၢ်တဖၣ်ပာ်ဖှိၣ်သးလဲၤထီၣ်ဒုး၀ဲဃိၣ်လူၢ်သုးကလၢၤႇဒုးယၤသုးကလၢၤလူၢ်ခံဖျၢၣ်အံၤ တံာ်တာ်လၢတလါဃၣ်ဃၣ်ညါဒီးတၢ်ထီၣ်န့ၢ်သုးကလၢၤအံၤအခါသုးကီၣ်ကးတကပၤဘၣ်သံ၀ဲဒၣ်အါအါဂီၢ်ဂီၢ် ဒ်အံၤလီၤအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ တၢ်ဒုးအံၤဘျီ၀ဲအံၤအပူၤသုးကီၣ်ကးသံတဖၣ်အကျါပၣ်ဃုာ်၀ဲခီၣ်ချ့သုးရ့ၣ်(ခမရ-၄၂၈)ဒီးခီၣ်သုးရ့ၣ်(ခလရ-၂၄၉)အသုးခိၣ်ဒိၣ်စိႇ သုးခိၣ်ဒိၣ်ဂီၢ်ဂ့ၢ်ႇ သုးခိၣ်ဒိၣ်ဖိႇ၀ံစိာ်တီဆှၢႇအ့ၣ်ကၠံၣ်နံၣ်ယၢၣ်ဃုာ်ဒီးပၢၤကီၢ်ခိၣ်နၢ်သ့ၣ်တဖၣ် အဂ့ၢ်န့ၣ် ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါကရ့ၣ်နံၣ်တၢ်ပၢၢ်ဆၢသုးပာ်ဖှိၣ်ကရူၢ်မၤန့ၢ်၀ဲသုးကီၣ်ကးအစုက၀ဲၤလၢအမ့ၢ်ကျိဖိ(၁၂၈)ခိၣ်၊ ကျိဖးဒိၣ်(၁၈)ခိၣ်Smoke ကျိ(၃)ခိၣ် Jammer ကျိ(၁)ခိၣ် တၢ်ဆဲးကျိးစဲးတဖၣ်ဃုာ်ဒီးကျိချံၦာ်သၣ်သ့ၣ်တဖၣ်အါမး အဂ့ၢ်န့ၣ် ပာ်ဖျါစ့ၢ်ကီး၀ဲန့ၣ်လီၤႉ တချုးလၢတၢ်ထီၣ်န့ၢ်သုးကလၢၤသ့ၣ်တဖၣ်အံၤဒံးဘၣ်ဖဲကရ့ၣ်နံၣ်တၢ်ပၢၢ်ဆၢသုးပာ်ဖှိၣ်လဲၤထီၣ်က၀ီၤဃာ်အီၤအခါန့ၣ် ၦၤဟ့ၣ်သုးကီၣ်ကးအတၢ်ခွဲးတၢ်ယာ်အဘျီတဖၣ်အဘျီလၢကပာ်လီၤစုက၀ဲၤပာ်ဖှိၣ်မၤသကိးတၢ်ဒီးကမျၢၢ်ဘၣ်ဆၣ်သုးကီၣ်ကးအံၤတတူၢ်ဃၣ်အသးဘၣ်မ့မ့ၢ်တခီပျၢ်လီၤဆှၢအါထီၣ်၀ဲသုးဂံၢ်ဘါအဂၤ(၇၀)ဘျဲၣ်၊ကဘီယူၤ(၃)ဘ့ၣ် ဟဲခးလီၤစၢၤတၢ်အိၣ်၀ဲ(၂၀၅)ဘျီဒီးလီၢ်ခံကတၢၢ်ဘၣ်ဟ့ၣ်ဃၣ်ကွံာ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ လါယနူၤအါရံၤ(၁၅)သီအနံၤန့ၣ် သုးကီၣ်ကးခီၣ်ချ့သုးရ့ၣ်(ခမရ-၄၂၈)ဒီးခီၣ်သုးရ့ၣ်(ခလရ-၂၄၉)သ့ၣ်တဖၣ်အံၤ စးထီၣ်နုာ်လီၤဟံးန့ၢ်အလီၢ်အကျဲလၢ ကရ့ၣ်နံၣ်ကီၢ်စဲၣ် ရှါတီၢ်၀့ၢ်ပူၤဒီး သုးရ့ၣ်အၦၤသ့ၣ်တဖၣ်မၤကီမၤခဲ၀ဲ ၦၤကမျၢၢ်အကလုာ်ကလုာ်အဂ့ၢ်န့ၣ် သ့ၣ်ညါဘၣ်န့ၣ်လီၤ...
လၢကီၢ်ဆၢၦၤဃ့ၢ်မှံဟးဖျိးအဂီၢ်တၢ်ဆီၣ်ထွဲမၤစၢၤမ့ၢ်လဲၤခီဖျိလၢသုးမီၤစိရိၤန့ၣ်တမ့ၢ်လၢလိၣ်ထီၣ်ဖးထီၣ်သ့၀ဲဘၣ် အဂ့ၢ် ပဒိၣ်စီၤကျၢၢၤစ့စံး၀ဲ
လါဖ့ၤဘြူၤအါရံၤ ၁၇ သီႇ ၂၀၂၄ နံၣ်ႇ ခ့ၣ်အဲးစံၣ် ASEAN-တၢ်ဒိသူၣ်ဒိသးတၢ်တိစၢၤမၤစၢၤလၢအကဟ့ၣ်တၢ်ဆီၣ်ထွဲမၤစၢၤဆူကီၢ်ကၠီၣ်တဲၣ်ထံဆၢကီၢ်ဆၢ ၦၤဃ့ၢ်မှံဟးဖျိးဖိတဖၣ်အဂီၢ်အံၤမ့ၢ်လဲၤခီဖျိလၢသုးမီၤစိၤရိၤအအိၣ်တဆီန့ၣ်တမ့ၢ်လၢအလိၣ်ထီၣ်ဖးထီၣ်သ့၀ဲဘၣ်အဂ့ၢ်န့ၣ်ႇ ခ့ၣ်အဲၣ်ယူၣ် ၦၤကတိၤတၢ်ပၢပဒိၣ်စီၤကျၢၤစ့စံး၀ဲန့ၣ်လီၤႉ လၢတၢ်ကဟ့ၣ်မၤစၢၤ၀ဲတၢ်အီၣ်တၢ်အီ၊ကသံၣ်ကသီတၢ်ဖၣ်အံၤဆူၦၤဃ့ၢ်မှံဟးဖျိအဂၤ(၂၀၀၀၀)လၢ အိၣ်ကီၢ်ကၠီၣ်တဲၣ်-ကီၢ်ပယီၤကီၢ်ဆၢအံၤအဂီၢ်န့ၣ်ကၠီၣ်တဲၣ်ပဒိၣ်ဖီၣ်လိာ်စုမၤသကိး၀ဲတၢ်ဒီးသုးကီၣ်ကး အဃိတၢ်တိစၢၤမၤစၢၤအံၤတမ့ၢ်ကလဲၤတုၤလၢၦၤဃ့ၢ်မှံဟးဖျိးအအိၣ်ဘၣ်ဒီးတကးဒံးဘၣ်ကၠီၣ်တဲၣ်ပဒိၣ်ဒီးသုးကီၣ်ကးအတၢ်ရဲၣ်တၢ်ကျဲၤအံၤတမ့ၢ်ကကဲထီၣ်လိၣ်၀ဲဘၣ်အဂ့ၢ်န့ၣ် ခ့ၣ်အဲၣ်ယူၣ် ၦၤကတိၤတၢ်ပၢ ပဒိၣ်စီၤကျၢၤစ့စံး၀ဲန့ၣ်လီၤႉ ပဒိၣ်စီၤကျၢၤစ့စံး၀ဲလၢ “ဒ်သိးပတၢ်ဆိကမိၣ်တၢ်ရဲၣ်တၢ်ကျဲၤအသိးန့ၣ်ဒုတကဲထီၣ်လိၣ်ထီၣ်၀ဲဘၣ်ႇ အခဲအံၤတၢ်မၤစၢၤန့ၣ်ကၠီၣ်တဲၣ်ပဒိၣ်မၤသကိးတၢ်ဒီးသုးမီၤစိရိၤအခိၣ်မ့အီၤလဲၤဒီးအ၀ဲသ့ၣ်ကဒုးအိၣ်ထီၣ်၀ဲတၢ်လီၢ်သၢတီၤအဖီခိၣ်ဒီးပနၢ်ပၢၢ်လၢတၢ်ရဲၣ်တၢ်ကျဲၤ၀ဲအံၤကလိၣ်ထီၣ်ဖးထီၣ်၀ဲဒၣ်တညီဘၣ်ႇ ဘၣ်မနုၤအဃိလဲၣ်န့ၣ်ၦၤလၢအဃ့ၢ်မှံဟးဖျိးတဖၣ်န့ၣ်တနာ်အီၣ််သုးမီၤစိရိၤဘၣ်အ၀ဲသ့ၣ်ဘၣ်ယိၣ်ဘၣ်ဘှီတၢ်အိၣ်၀ဲအါမးအဃိကလဲၤအိၣ်ကဒုလၢသုးကီၣ်ကးအတၢ်တ့ထီၣ်အဖီလာ်ဒုတညီဘၣ်ဒီးတကတီၢ်ဃီန့ၣ်အ၀ဲသ့ၣ်မ့မၤဒ်န့ၣ်န့ၣ်တၢ်ဆီၣ်ထွဲမၤစၢၤအံၤကအိၣ်ဖဲတၢ်လီၢ်၀ဲန့ၣ်အပူၤအဃိကကဲထီၣ်တၢ်ကီတၢ်ခဲဖးဒိၣ်လၢၦၤဘၣ်ကီဘၣ်ခဲဖိတဖၣ်လၢကဘၣ်ဟဲလၢတၢ်လီၢ်ယံၤတဖၣ်မီၤ” အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါတကီၢ်ခါခဲအံၤထံရူၢ်ကီၢ်သဲးတၢ်အိၣ်သးအဖီခိၣ်သုးကီၣ်ကးကအိးထီၣ်တၢ်လီၢ်သၢတီၤလၢၦၤဃ့ၢ်မှံဟးဖျိးအဂီၢ်အံၤတမ့ၢ်ကအိၣ်ကၢအိၣ်ခိးဘၣ်ဒီးထံဂုၤကီၢ်ဂၤတၢ်ဆီၣ်ထွဲမၤစၢၤတဖၣ်မ့ၢ်ဟဲ ခီဖျိလၢကီၢ်ဆၢကညီတၢ်ကရၢကရိတဖၣ်အစုပူၤမးၦၤဃ့ၢ်မှံဟးဖျိးတဖၣ်ကဒိးန့ၢ်ဘၣ်၀ဲတၢ်မၤစၢၤ လီၤတံၢ်လီၤဆဲးအဂ့ၢ်န့ၣ် ပဒိၣ်စီၤကျၢၤစ့စံးအါထီၣ်၀ဲဒၣ်န့ၣ်လီၤႉ ဒ်န့ၣ်အသိးတၢ်တိစၢၤမၤစၢၤလၢၦၤဃ့ၢ်မှံဟးဖျိးတဖၣ်အံၤတလဲၤဆူကလုာ်ဒူၣ်ဖိတဖၣ်အအိၣ်တဘျီဃီဘၣ်ဒီး မ့မ့ၢ်တခီလဲၤက့ၤလၢသုးမီၤစိရိၤအစုပူၤအဃိဒ်သိးထံဂုၤကီၢ်ဂၤတၢ်တိစၢၤမၤစၢၤကလဲၤကတုၤလၢ ၦၤဃ့ၢ်မှံဟးဖျိးအစုပူၤလီၤတံၢ်လီၤဆဲးအဂီၢ်န့ၣ်တၢ်ကဘၣ်သမံသမိး၀ဲ ASEAN Coordinating Centre for Humanitarian Assistance on Disaster Management- AHA Centre-AHAအတၢ်ရဲၣ်တၢ်ကျဲၤ တၢ်ဖံးတၢ်မၤစ့ၢ်ကီးအဂ့ၢ်န့ၣ် ခ့ၣ်အဲၣ်ယူၣ် ၦၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤႉ လၢတၢ်ကဆီၣ်ထွဲမၤစၢၤထံဆၢကီၢ်ဆၢၦၤဃ့ၢ်မှံဟးဖျိးတဖၣ်အံၤအဂီၢ်ကၠီၣ်တဲၣ်ခိၣ်နၢ်ဆၢတဲာ်လီၤ၀ဲလၢကဖီၣ်လိာ်စု မၤသကိးတၢ်ဒီးသုးမီၤစိရိၤ ဂာ်တဲာ်ဂီၤ(ကၠဲၣ်ခၠ့ၤနံၤ)ကရူၢ်အဂ့ၢ်န့ၣ် ကၠီၣ်တဲၣ်ခိၣ်နၢ်စံးလီၤတ့ၢ်၀ဲဖဲအပူၤကွံာ် လါယနူၤအါရံၤဘူးကလၢာ် ASEAN ထံဂုၤကီၢ်ဂၤကိာ်တိာ်ခိၣ်နၢ်တၢ်အိၣ်ဖှိၣ်ဖဲ(လါအိၣ်)ထံကီၢ်ပူၤအခါန့ၣ်လီၤႉ သုးဟံန့ၢ်တၢ်စိကမီၤ၀ံၤလီၢ်ခံခီဖျိတၢ်ဒုးတၢ်ယၤအိၣ်ထီၣ်လၢထံလီၢ်ကီၢ်ပူၤ၊ကမျၢၢ်ထံဖိကီၢ်ဖိတဖၣ် ဘၣ်ဃ့ၢ်မှံဟးဖျိးအဃိကရူၢ်ကရၢလၢအမၤစၢၤၦၤဃ့ၢ်မှံဟးဖျိးသ့ၣ်တဖၣ်အံၤဃ့ထီၣ်၀ဲဒၣ် ထံဂုၤကီၢ်ဂၤလၢ ကဟ့ၣ်တၢ်ဆီၣ်ထွဲမၤစၢၤဆူၦၤဃ့ၢ်မှံဟးဖျိးဖိတဖၣ်အအိၣ်အဂ့ၢ်န့ၣ်ႇ သ့ၣ်ညါဘၣ်န့ၣ်လီၤႉ...
လၢၢ်ဒိၣ်ကီၢ်ဆၣ်တသီအတီၢ်ပူၤပယီၤသုးခးလီၤကျိဖးဒိၣ်အဃိကမျၢၢ်သံ ၂ ဂၤ ဘၣ်ဒိ ၆ ဂၤ
လါဖ့ၤဘြူၤအါရံၤ ၁၆ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ် တသီအတီၢ်ပူၤခီဖျိပယီၤသုးခးလီၤကျိဖးဒိၣ်အဃိ ကမျၢၢ်သံ ၂ ဂၤ ဘၣ်ဒိ ၆ ဂၤအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲဖဲမဟါလါဖ့ၤဘြူၤအါရံၤ ၁၅ သီအနံၤန့ၣ်လီၤႉ ဖဲလါဖ့ၤဘြူၤအါရံၤ(၁၄)သီအနံၤ ခီဖျိပယီၤသုးခီၣ်ချ့သုးရ့ၣ်(ခမရ-၂၆၄)ခးလီၤကျိဖးဒိၣ်ဆူဒူသ၀ီသ့ၣ်တဖၣ် ပူၤအဃိတသီအတီၢ်ပူၤကမျၢၢ်ဘၣ်သံ(၂)ဂၤဒီး ဘၣ်ဒိ(၆)ဂၤအကျါ ပာ်ဃုာ်ဖိသၣ်(၁၈)နံၣ်ဆူဖီလာ်(၃)ဂၤ အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ထုးထီၣ်ပာ်ဖျါပူၤအသိး သ့ၣ်ညါဘၣ်န့ၣ်လီၤႉ ဖဲလါဖ့ၤဘြူၤအါရံၤ(၁၄)သီဟါခီ(၇)နၣ်ရံၣ်ဃၣ်ဃၣ်အဆၢကတီၢ်န့ၣ် ပယီၤသုးခီၣ်ချ့သုးရ့ၣ်(ခမရ-၂၆၄)လၢ အိၣ်ဆီလီၤအသးဖဲ(ပ့ၤစလိး)သုးကလၢၤသ့ၣ်တဖၣ်အံၤခီဖျိအ၀ဲသ့ၣ်ခးလီၤကျိဖးဒိၣ်ဆူကည့ၣ်ကၠိသ၀ီပူၤအဃိဘၣ် သံ၀ဲ မၣ်ယူၣ်မီၤ(၄၂)နံၣ်ဒီးဘၣ်ဒိ၀ဲ မီၤဆါအီၤ(၄၁)နံၣ်ႇ ယိယိ(၈)နံၣ်ႇ မံၣ်မၤ(၁၃)နံၣ်ႇ ကလါလ့(၄၂)နံၣ်ဒီး စွ့ၤလၣ်၀ိ(၃၅)နံၣ်သ့ၣ်တဖၣ်အံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးဖဲတၢ်တဟါဃီ၀ဲန့ၣ်စ့ၢ်ကီးပယီၤသုးတဒူၣ်ဃီ၀ဲအံၤခးလီၤကျိဖးဒိၣ်လီၤတဲာ်ပိၢ်ဖးထီၣ်လၢ(ခ့ၤကၣ်လၣ်) သ၀ီပူၤအဃိဘၣ်သံ၀ဲ မၣ်ယ့ၤဒွ့(၈၅)နံၣ်တဂၤဒီး ဘၣ်ဒိစ့ၢ်ကီးမၣ်ကၠူကၠူ(၄၄)နံၣ်သ့ၣ်တဖၣ်အံၤ အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဘၣ်ထွဲဒီးပယီၤခးလီၤကျိဖးဒိၣ်ႇ ဟဲခးလီၤတၢ်ဒီးကဘီယူၤဒ်အံၤအဖီခိၣ်န့ၣ်ကမျၢၢ်သ့ၣ်တဖၣ်ဘၣ်ကွၢ်ဆၢၣ်မဲာ်ဘၣ်၀ဲ တၢ်ပျံၤတၢ်ဖုးတကးဒံးဘၣ်အမဲာ်ညါကဖံးကမၤတၢ်အဂီၢ်တၢ်ဘံၣ်တၢ်ဘၢတအိၣ်လၢၤဘၣ်အဂ့ၢ်န့ၣ် လၢၢ်ဒိၣ်ကီၢ်ဆၣ် ၦၤအၦၤဘၣ်မူဘၣ်ဒါတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဘၣ်ထွဲဒီးဒုၣ်ဒါအတၢ်မၤပျံၤမၤဖုးတၢ်လၢကျိဖးဒိၣ်မ့ၢ်ဂ့ၤႇ ကဘီယူၤမ့ၢ်ဂ့ၤန့ၣ်တကီၢ်ခါခဲအံၤပၦၤကမျၢၢ်သ့ၣ်တဖၣ်ဘၣ်ကွၢ်ဆၢၣ်မဲာ်ဘၣ်၀ဲတၢ်ပျံၤတၢ်ဖုးမီၤနီၤႉတကးဒံးဘၣ်အမဲာ်ညါလၢကလဲၤဖံးလဲၤမၤအီၣ်တၢ်အဂီၢ် သးတၢ်ဘံၣ်တၢ်ဘၢတအိၣ်လၢၤဘၣ်ဒီးကလဲၤမၤတၢ်အဂီၢ်လဲၤ၀ဲတဘူၣ်လၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ဒ်န့ၣ်အသိးလၢလၢၢ်ဒိၣ်ကီၢ်ဆၣ်အပူၤ ဖဲလါဖ့ၤဘြူၤအါရံၤ(၈)သီအနံၤန့ၣ်စ့ၢ်ကီး ပယီၤသုးဒွဲၣ်အူအီၣ်၀ဲကမျၢၢ်အဟံၣ်လၢအိၣ်(နၣ်သၤကွ့)ပၢၤကီၢ်သုးကလၢၤအဃၢၤ(၄)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါတ့ၢ်ဃာ်၀ဲ ဖဲလါဖ့ၤဘြူၤအါရံၤ(၈)သီအနံၤန့ၣ်လီၤႉ လၢန့ၣ်အမဲာ်ညါချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ်အပူၤ လါယနူၤအါရံၤတလါအတီၢ်ပူၤန့ၣ် ခီဖျိသုးကီၣ်ကးအၦၤခးလီၤကျိဖးဒိၣ်ဒီးကဘီယူၤဟဲတ့ၢ်လီၤမ့ၢ်ပိၢ်အဃိကမျၢၢ်ဘၣ်သံ(၁၀)ဂၤဒီး...
သုးကီၣ်ကးထုးထီၣ်သိၣ်တၢ်သီတၢ်ဘျၢလၢကဘၣ်နု၁်လီၤသုး၀ံၤလီၢ်ခံ ဖၣ်အၣ်၀့ၢ်ပူၤသးစၢ်တဖၣ်အိၣ်ဒီးတၢ်ဘၣ်ယိၣ် ဘၣ်ဘှီ
လါဖ့ၤဘြူၤအါရံၤ ၁၆ သီႇ ၂၀၂၄ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ဖၣ်အၣ်၀့ၢ်ပူၤ သုးကီၣ်ကးထုးထီၣ်တၢ်သိၣ်တၢ်သီတၢ်ဘျၢလၢကဘၣ်နုာ်လီၤလၢသုးပူၤ၀ံၤလီၢ်ခံ သူဘီၣ်သးစၢ်လၢအိၣ်၀့ၢ်ပူၤတဖၣ်အိၣ်ဒီးတၢ်ဘၣ်ယိၣ်ဘၣ်ဘှီဟးထီၣ်က့ၤလီၤတဘူၣ်အါအါလၢၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ်လါဖ့ၤဘြူၤအါရံၤ ၁၀ သီအနံၤန့ၣ် ကီၢ်ပယီၤဒီဘ့ၣ်အပူၤသုးကီၣ်ကးထုးထီၣ်တၢ်သိၣ်တၢ်သီတၢ်ဘျၢလၢ ပိာ်ခွါ(၁၈–၃၅)နံၣ်ႇပိာ်မုၣ်(၁၈–၂၇)နံၣ်သးစၢ်တဖၣ်ကဘၣ်နုာ်လီၤလၢသုးကျါဒီး ဖဲန့ၣ်၀ံၤလီၢ်ခံတကီၢ်ခါခဲအံၤ သူၣ်ဘီၣ်သးစၢ်လၢအိၣ်ဖၣ်အၣ်၀့ၢ်ပူၤတဖၣ်အိၣ်ဒီးတၢ်ဘၣ်ယိၣ်ဘၣ်ဘှီဟးထီၣ်လၢတၢ်ချၢတဘူၣ်အါအါလၢၤဘၣ်အဂ့ၢ်န့ၣ် သးစၢ်လၢအိၣ်ဖၣ်အၣ်၀့ၢ်ပူၤတဖၣ် စံး၀ဲန့ၣ်လီၤႉ သးစၢ်လၢအိၣ်ဖၣ်အၣ်၀့ၢ်ပူၤတဂၤစံး၀ဲလၢ“အါဒၣ်တက့ၢ်န့ၣ်အ၀ဲသ့ၣ်ဟးထီၣ်တၢ်ချၢတဘူၣ်ဘၣ်၀ဲဒၣ်နါက့ပဟးထီၣ််တၢ်ချၢတဘူၣ်ဘၣ်ႉယသ့ၣ်ညါဖဲအံၤတနီၤန့ၣ်အါဒၣ်တက့ၢ်အ၀ဲသ့ၣ်တၢ်ကိၢ်တၢ်ဂီၤအိၣ်ဘျီဒုန့ၣ်မ့ၢ်အ၀ဲသ့ၣ်ကဘၣ်က့ၤဘၣ်လဲၤဘၣ်ဆဲးမၤဒ်လဲၣ်န့ၣ်အ၀ဲသ့ၣ်တသ့ၣ်ညါ၀ဲဘၣ်မီၤနီၤႉမ့၀ံၤအ၀ဲသ့ၣ်သူၣ်ကိၢ်သးဂီၤအိၣ်လၢကဘၣ်ကဲသုးဒ်န့ၣ်မီၤနီၤႉအါဒၣ်တက့ၢ်လၢသ၀ီန့ၣ်ၦၤမ့လဲၤမၤတၢ်အိၣ်ဖှိၣ်လံန့ၣ်အ၀ဲသ့ၣ်ဘၣ်ယိၣ်၀ဲလၢၦၤကဟဲထၢသုးႇၦၤကဟဲဖီၣ်အ၀ဲ သ့ၣ်လၢကဘၣ်လဲၤကဲသုးဒ်န့ၣ်အိၣ်ႉမ့၀ံၤခဲအံၤအ၀ဲသ့ၣ်နၢ်ဟူတၢ်ကစီၣ်လၢကီၢ်ဆၢန့ၣ်ၦၤလၢအဟဲက့ၤလၢယိၤကီၢ်ဒီးၦၤမ့လဲၤထီၣ်လၢယိၤကီၢ်န့ၣ်သုးကီၣ်ကးကဖီၣ်၀ဲခဲလၢာ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲတနံၤအံၤ န့ၣ်လီၤႉ လၢန့ၣ်အမဲာ်ညါသုးကီၣ်ကးထုးထီၣ်တၢ်သိၣ်တၢ်သီတၢ်ဘျၢဒ်အံၤအဖီခိၣ်ကဲထီၣ်တၢ်ကီတၢ်ခဲလၢသူၣ်ဘီၣ်သးစၢ် တဖၣ်အဂီၢ်ဒီးတကးဒံးဘၣ်သးစၢ်သ့ၣ်တဖၣ်အံၤအနီၢ်ကစၢ်စ့ၢ်ကီးတအဲၣ်ဒုးကဲသုးဘၣ်အမိၢ်အပၢ်စ့ၢ်ကီးသူၣ်ကိၢ်သးဂီၤတၢ်အဒံၣ်အဖိဂီၢ်ကဘၣ်ဆဲးမၤ၀ဲဒ်လဲၣ်မးတသ့ၣ်ညါ၀ဲလၢၤဘၣ်အဂ့ၢ်န့ၣ် သးစၢ်တဂီၤဃီ၀ဲန့ၣ် စံးအါထီၣ်၀ဲဒၣ်န့ၣ်လီၤႉ ဒ်န့ၣ်အသိးတကီၢ်ခါခဲအံၤလၢဖၣ်အၣ်၀့ၢ်ပူၤမုၢ်နၤခီန့ၣ်ပယီၤသုးဆီလီၤတၢ်သမံသမိးလီၢ်အိၣ်ခိးတၢ်ဟဲအါထီၣ်အါန့ၢ် လၢညါအပူၤကွံာ်ဒံးအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ ဘၣ်ဃးဒီးတၢ်အိၣ်သးအံၤသးစၢ်လၢအိၣ်ဖၣ်အၣ်၀့ၢ်ပူၤလၢအဂၤတစ့ၢ်ကီးစံး၀ဲလၢ“တၢ်အိၣ်သးခဲအံၤဒ်သိးပသ့ၣ်ညါ န့ၣ်သူၣ်ဘီၣ်သးစၢ်(၁၈)နံၣ်တုၤ(၃၅)တဖၣ်န့ၣ်အ၀ဲသ့ၣ်ဟးထီၣ်ဟးလီၤကီခဲထီၣ်ႉဒ်သိးပ၀ဲနါက့ပဟးထီၣ်ဟးလီၤ တညီလၢၤဘၣ်ႉဟးဒုဟးဘၣ်ဆၣ်ခဲအံၤနဟးန့ၣ်အိၣ်ဒီးတၢ်ပျံၤတၢ်ဖုးမီၤနီၤႉအပူၤကွံာ်လၢမုကၢၤတလါန့ၣ်တၢ်ပျံၤတၢ်ဖုးန့ၣ်အိၣ်ဘၣ်ဆၣ်အအိၣ်စှၤမီၤနီၤႉခဲအံၤဘျီပမ့ဟးထီၣ်န့ၣ်မ့ၢ်ၦၤကဖီၣ်ၦၤဧါႇပမ့ထံၣ်ပယီၤသုးပၢၤကီၢ်သုးန့ၣ်ပပျံၤတၢ်လီၤႉခဲအံၤယသ့ၣ်ညါယသကိးအိၣ်အဂၤလၢအဆံဘျဲၣ်လံအါလၢကလဲၤထီၣ်လၢဘီကီးလီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တကီၢ်ခါခဲအံၤခီဖျိသုးကီၣ်ကးအံၤအဂံၢ်လီၤစၢ်လံအဃိကိးအါထီၣ်၀ဲဒၣ်အသုးလီၤဒီးဒ်န့ၣ်အသိးသုးကီၣ်ကး တဲ၀ဲလၢတဆှၢၦၤသ့ၣ်တဖၣ်အံၤလၢတၢ်မဲာ်ညါဘၣ်ဘၣ်ဆၣ်သုးကီၣ်ကးအံၤနာ်အီၣ်တသ့ဘၣ်ဒီးအထီထီၣ်အခီၣ် ဖဲလဲၣ်န့ၣ်ပသ့ၣ်ညါပာ်စၢၤလံအဂ့ၢ်န့ၣ် သးစၢ်တဂၤဃီ၀ဲန့ၣ်စံးအါထီၣ်၀ဲဒၣ်န့ၣ်လီၤႉ ဒ်န့ၣ်အသိးသုးကီၣ်ကးထုးထီၣ်တၢ်သိၣ်တၢ်သီတၢ်ဘျၢလၢၦၤကဘၣ်နုာ်လီၤလၢသုးကျါ၀ံၤလီၢ်ခံ ဖၣ်အၣ်ဃုာ်ဒီးကညီကီၢ်စဲၣ်လၢ အဂၤသ့ၣ်တဖၣ်စ့ၢ်ကီးသူၣ်ဘီၣ်သးစၢ်မုၣ်ခွါတဖၣ်အိၣ်ဒီးတၢ်ပျံၤတၢ်ဖုး တၢ်ဘၣ်ယိၣ်ဘၣ်ဘှီလၢကဘၣ်နုာ်လီၤကဲသုးဒီးလၢတၢ်န့ၣ်အဃိတနီၤန့ၣ်ဟးစံၣ်အိၣ်ခူသးလၢတၢ်လီၢ်ပူၤဖျဲးလီၢ်အိၣ်၀ဲ အဂ့ၢ်န့ၣ် ကီၢ်ပူၤကမျၢၢ်တဖၣ်စံး၀ဲအသိးသ့ၣ်ညါဘၣ် န့ၣ်လီၤႉ
သုးကီၣ်ကးထုးထီၣ်တၢ်သိၣ်တၢ်သီတၢ်ဘျၢလၢ ကီၢ်ပယီၤဒီဘ့ၣ်အပူၤ ပိာ်ခွါ(၁၈)နံၣ်တုၤ(၃၅)နံၣ်ဒီးပိာ်မုၣ်(၁၈)တုၤ(၂၇)နံၣ်အံၤကဘၣ်နုာ်လီၤလၢသုးပူၤ
ဖဲအပူၤကွံာ်လါဖ့ၤဘြူၤအါရံၤ(၁၀)သီအနံၤန့ၣ် သုးကီၣ်ကးထုးထီၣ်တၢ်သိၣ်တၢ်သီတၢ်ဘျၢလၢ ကီၢ်ပယီၤဒီဘ့ၣ်အပူၤ ပိာ်ခွါ(၁၈)နံၣ်တုၤ(၃၅)နံၣ်ဒီးပိာ်မုၣ်(၁၈)တုၤ(၂၇)နံၣ်အံၤကဘၣ်နုာ်လီၤလၢသုးပူၤန့ၣ်လီၤႉလၢတၢ်ဂ့ၢ်အံၤအဃိၦၤကမျၢၢ်သ့ၣ်တဖၣ်အိၣ်ဒီးတၢ်ပျံၤတၢ်ဖုးဃ့ၢ်အိၣ်ခူသူၣ်သးအိၣ်၀ဲတနီၤလံန့ၣ်လီၤႉဘၣ်ဃးသုးကီၣ်ကးထုးထီၣ်တၢ်သိၣ်တၢ်သီလၢကဘၣ်ကဲသုးအဖီခိၣ်အံၤန့ၣ် ပကပာ်ဖျါ၀ဲကမျၢၢ်အကလုၢ်သ့ၣ်တဖၣ်န့ၣ်လီၤႉ လါဖ့ၤဘြူၤအါရံၤ ၁၅ သီႇ ၂၀၂၄ နံၣ်ႇ ခ့ၣ်အဲးစံၣ် ဖၣ်အၣ်သးစၢ်ပိာ်ခွါတဂၤ “အ၀ဲသ့ၣ်ထုးထီၣ်၀ဲတၢ်ဘျၢတခါအံၤန့ၣ်မ့ၢ်၀ဲအ၀ဲသ့ၣ်ကမၤအၢမၤနး၀ဲကမျၢၢ်ဖိသ့ၣ်တဖၣ်လီၤႉ တကီၢ်ခါခဲအံၤန့ၣ်ပကဘၣ်ပျံၤဒိၣ်စ့ၢ်ကီးလၢၦၤကဖီၣ်ပီၣ်တၣ်မီၤနီၤႉ ဒီးန့မ့ၢ်ဟးလၢကျဲပူၤနါက့ဘၣ်ပျံၤစ့ၢ်ကီးၦၤကအိၣ်ခိးဖီၣ်ဘၣ်ဖုးပီၣ်တၣ်မီၤနီၤႉ တၢ်အိၣ်သးမ့ၢ်ဟဲဆူၣ်ထီၣ်ဘၣ်ဖုးဒုႇ အ၀ဲသ့ၣ်မ့ၢ်ဟူးဂဲၤဆူၣ်ထီၣ်ဒုအိၣ်ဒၣ်ပကဘၣ်ဃုထၢကျဲလၢအဘၣ်ဂီၢ်တဘိကျဲလၢအဘံၣ်အဘၢတဘိလီၤ” ထံထၣ်စွ့သးစၢ်ပိာ်မုၣ်တဂၤ “တကီၢ်ခါခဲအံၤအ၀ဲသ့ၣ်ထုးထီၣ်ပာ်ဖျါ၀ဲတၢ်ကဲသုးတၢ်ဘျၢ၀ဲအံၤအဖီခိၣ်န့ၣ်ယထံၣ်လၢတကီၢ်ခါခဲအံၤသုးကီၣ်ကးတကပၤအဂံၢ်ဘါလီၤစှၤလီၤမီၤ လၢခံအ၀ဲသ့ၣ်အဲၣ်ဒိး၀ဲလၢကမျၢၢ်ကဒဲကဒဲက့ၤဒုးလိာ်သးမီၤနီၤႉ ဒီးမ့ၢ်တၢ်လၢမၤဟးဂီၤကွံာ်၀ဲထံကီၢ်တဘ့ၣ်အံၤမီၤနီၤႉ လၢတၢ်ကဘၣ်နုာ်လီၤကဲသုးအဖီခိၣ်န့ၣ်ယထံၣ်လၢအ၀ဲသ့ၣ်ပာ်ပနီၣ်၀ဲသးနံၣ်သနါက့ဒ်ယနၢ်ဟူဘၣ်အသိးန့ၣ်သးနံၣ်မ့တၦဲၤဘၣ်ဆၣ်နီၢ်ခိက့ၢ်ဂီၤမ့ၢ်ဒိၣ်တုၤခိၣ်ၦဲၤသးနံၣ်မ့ၢ်တၦဲၤဒၣ်လဲာ်ကိး၀ဲမီၤနီၤႉ အ၀ဲသ့ၣ်ကိး၀ဲကမျၢၢ်လၢကဘၣ်နုာ်လီၤကဲသုးသ့ၣ်တဖၣ်အံၤန့ၣ် လီၤဂာ်ဒ်သိးကသူ၀ဲလၢကမျၢၢ်တၢ်ဒီသဒၢစုက၀ဲၤတခါလီၤႉ အဃိသးန့ၣ်ပိာ်ခွါမ့ၢ်ဂ့ၤႇ ပိာ်မုၣ်မ့ၢ်ဂ့ၤဘၣ်ကိၢ်ဘၣ်ဂီၤတၢ်မီၤနီၤႉ မ့ၢ်သ့န့ၣ်ဃ့ၢ်ပူၤဖျဲးသး န့ၣ်အဂ့ၤကတၢၢ်လီၤႉ လၢတၢ်ကိပူၤန့ၣ်တၢ်ဘံၣ်တၢ်ဘၢတအိၣ်လၢၤဘၣ်ႇ ဒ်လဲၣ်ဂ့ၤဒ်လဲၣ်ဂ့ၤပကဘၣ်ကွၢ်ဆၢၣ်မဲာ်ပယီၤသုးအတၢ်ဖီၣ် ပီၣ်တၣ်လီၤ” ကီးတရံးသးစၢ်ပိာ်ခွါတဂၤ “ခဲခဲအံၤန့ၣ်ကမျၢၢ်သ့ၣ်တဖၣ်တနီၤန့ၣ်ဘၣ်ဃ့ၢ်ပူၤဖျဲးအသးလံႇ ၦၤဃ့ၢ်မှံဟးဖျိးလၢအလဲၤဃ့ၢ်အိၣ်ကဒုလၢ ဖၣ်အၣ် သ့ၣ်တဖၣ်စ့ၢ်ကီးကဘၣ်ပလီၢ်သးလီၤႉ လၢယအိၣ်ကတပၤန့ၣ်ကၠိဖိဟဲက့ၤထီၣ်တနံၤညါအံၤအိၣ်၀ဲမီၤနီၤႉ ဘၣ်မနုၤအဃိလဲၣ်န့ၣ်လၢန့ၣ်တကပၤန့ၣ်နီၢ်ကစၢ်အဂီၢ်တၢ်ဘံၣ်တၢ်ဘၢတအိၣ်လၢဘၣ်ႉ အဃိပိာ်မုၣ်မ့ၢ်ဂ့ၤပိာ်ခွါမ့ၢ်ဂ့ၤခဲခဲအံၤန့ၣ်ဘၣ်ဃ့ၢ်အိၣ်ခူသူၣ်ႇ ဘၣ်ပလီၢ်သးအိၣ်၀ဲမီၤနီၤႉ မ့မ့ၢ်လၢဖၣ်အၣ်သးစၢ်သ့ၣ်တဖၣ်ဘၣ်ဃ့ၢ်အိၣ်ခူသူၣ်လၢသ၀ီပူၤအိၣ်၀ဲအါမးမီၤနီၤ မ့ၢ်လၢအ၀ဲသ့ၣ်ပျံၤတၢ်လီၤ” ၀့ၢ်တကူၣ်ကီၢ်ဒိၣ်သးစၢ်မိၢ်ပၢ်တဂၤ “လၢ၀့ၢ်တကူၣ်ကီၢ်ဒိၣ်ဟီၣ်က၀ီၤတကပၤန့ၣ်ဃ့၀ဲၦၤသ၀ီဖိလၢသ၀ီသးၦၢ်အိၣ် အိၣ်၀ဲမီနီၤႇ အ၀ဲသ့ၣ်ကိး၀ဲၦၤမ့ၢ်တန့ၢ်ဘၣ်ခီန့ၣ်ဃ့၀ဲလၢစ့အကလီၢ်(၅၀)ႇ ဘၣ်လီၤလၢဃိာ်ပူၤ(၅)နံၣ်ကမၤ၀ဲဒ်န့ၣ်ဆိပာ်လီၤႉ မိၢ်ပၢ်သ့ၣ်တဖၣ်ကိၢ်ဂီၤတၢ်လၢအဖိသ့ၣ်တဖၣ်အဂီၢ်မီၤနီၤႉ အခဲအံၤဒိးစဲးအတီၤတဆံတ၀ံၤဒံးဘၣ်ႇ ဒိးစဲးမ့ၢ်၀ံၤနါက့ တၢ်ကကဲထီၣ်အသးဒ်လဲၣ်ပကလဲၤဖဲလဲၣ်ပမၤတဘၣ်လၢၤဘၣ်ႉ ပဖိပလံၤနါက့အိၣ်ႇ ၦၤဖိၦၤလံၤနါက့အိၣ် အခဲအံၤအ၀ဲသ့ၣ်အကျဲဟးမၢ်လံႇ တၢ်လဲၤထီၣ်လဲၤထီၣ်တအိၣ်ဘၣ်ႇ ဘၣ်ပျံၤဘၣ်ဖုးတၢ်မီၤနီၤႉ ကဘၣ်မၤတၢ်မနုၤလဲၣ်တသ့ၣ်ညါ၀ဲ ဟးတဘၣ်က့ၤတဘၣ်လၢၤဘၣ်ႉ ပကဘၣ်ပာ်ခူၣ်သူၣ်ပဖိအဂီၢ်ပပာ်တဘူၣ်ဘၣ် အ၀ဲသ့ၣ်သမံသမိး၀ဲလၢဟံၣ်ခိၣ်စရီမီၤနီၤႇ ကွၢ်၀ဲလၢဟံၣ်အံၤၦၤကညီအိၣ်၀ဲၦဲၤဂၤလဲၣ်ဒ်န့ၣ်မီၤ”
KYOကပာ်ဖှိၣ်မၤ၀ဲ“ကျိၣ်ကညီၢ်ကွဲၤဟူကိးဖှိၣ်”တၢ်ဒ့တၢ်အူတၢ်ဃုစ့ပာ်ကီၤအမူးလၢကညီၦၤဃ့ၢ်မှံဟးဖျိးအဂီၢ်
လါဖ့ၤဘြူၤအါရံၤ ၁၅ သီ ˜ ၂၀၂၄ နံၣ် ˜ ခ့ၣ်အဲးစံၣ် လၢကဟဲတလါအံၤလါဖ့ၤဘြူၤအါရံၤ(၁၇)သီအနံၤန့ၣ် KYOကပာ်ဖှိၣ်သးကမၤ၀ဲ “ကျိၣ်ကညီၢ်ကွဲၤဟူကိးဖှိၣ်” တၢ်ဒ့တၢ်အူတၢ်ဃုစ့ပာ်ကီၤအမူးလၢကညီၦၤဃ့ၢ်မှံဟးဖျိးတဖၣ်အဂီၢ်အဂ့ၢ်န့ၣ် ကညီသးစၢ်ကရၢ(KYO) ထုးထီၣ်ဒုးသ့ၣ်ညါလီၤ၀ဲလၢအ(FacebookPage)ပူၤန့ၣ်လီၤႉ ကီၢ်သူလ့ၤဟီၣ်က၀ီၤအပူၤကညီကမျၢၢ်လၢအဃ့ၢ်တၢ်ဒုးတဖၣ်ကဒိးန့ၢ်ဘၣ်တၢ်ဆီၣ်ထွဲမၤစၢၤအဂီၢ်န့ၣ်လၢကဟဲ(၁၇) သီအနံၤန့ၣ်ကညီသးစၢ်ကရၢ(KYO)ကလုာ်ဒူၣ်ပာ်ဖှိၣ်တၢ်ဒုးနဲၣ်ဖျါထီၣ်တၢ်ပာ်သးကမံတံာ်(GSCN) ဒီး ကညီဒွဲလၤကရၢKAA(Karen Art Association)သ့ၣ်တဖၣ်အံၤကပာ်ဖှိၣ်ထီၣ်သးမၤ၀ဲ“ကျိၣ်ကညီၢ်ကွဲၤဟူကိးဖှိၣ် ”တၢ်ဒ့တၢ်အူတၢ်ဃုစ့ပာ်ကီၤမူးတၢ်ရဲၣ်တၢ်ကျဲၤတခါလၢကမျၢၢ်ၦၤဃ့ၢ်မှံဟးဖျိးဟံၣ်အဂီၢ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ ဒ်န့ၣ်အသိးတၢ်သူၣ်၀ံၣ်သးဆၢတၢ်ရဲၣ်တၢ်ကျဲၤအံၤတၢ်ကမၤအီၤလၢ(ခ့ၣ်အဲၣ်ယူၣ်)ဟီၣ်က၀ီၤ သ၀ီတဖျၢၣ်အပူၤဃုာ်ဒီး ဒီးစ့ပာ်ကီၤလၢတၢ်ဒိးန့ၢ်၀ဲလၢတၢ်ရဲၣ်တၢ်ကျဲၤအံၤအပူၤတဖၣ်တၢ်ကက့ၤဟ့ၣ်လီၤမၤစၢၤက့ၤ ကညီၦၤဃ့ၢ်မှံဟးဖျိးဟံၣ်ခိၣ်(၁၀၀၀)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဘၣ်ဃးဒီး (KYO, KAA, GSCN) ကပာ်ဖှိၣ်မၤ၀ဲ “ကျိၣ်ကညီၢ်ကွဲၤဟူကိးဖှိၣ်” တၢ်ဒ့တၢ်အူတၢ်ဃုစ့ပာ်ကီၤလၢ ကညီၦၤဃ့ၢ်မှံဟးဖျိးတဖၣ်အဂီၢ်အံၤန့ၣ် သရၣ်စီၤအဲလ်ဘၢၣ်ခၠိၤ လၢအဟူးဂဲၤလၢထံရူၢ်ကီၢ်သဲးပူၤအံၤ စံး၀ဲဒၣ်ဒ်အံၤန့ၣ်လီၤႉ အ၀ဲစံး၀ဲလၢ“ ...
ခံသီအတီၢ်ပူၤပယီၤသုးကၢတီၢ်ကဒီးအသုးကလၢၤ(၂)ဖျၢၣ်လၢမုၢ်တြီၢ်ကီၢ်ရ့ၣ်ပူၤ
လါဖ့ၤဘြူၤအါရံၤ ၁၅ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ လၢခံသီအတီၢ်ပူၤ ပယီၤသုးကၢတီၢ်ကဒီးအသုးကလၢၤ(၂)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်တၢ်ကစီၣ် ထုးထီၣ်ပာ်ဖျါ၀ဲဖဲမဟါ လါဖ့ၤဘြူၤအါရံၤ ၁၄ သီအနံၤန့ၣ်လီၤႉ ဒ်မုၢ်တြီၢ်တၢ်ကစီၣ်လံာ်တၢ်ပာ်ဖျါပူၤပာ်ဖျါ၀ဲအသိးန့ၣ် ဖဲလါဖ့ၤဘြူၤအါရံၤ ၁၀ သီအနံၤ ပယီၤသုးခီၣ်ချ့သုးရ့ၣ် (ခမရ–၃၄၉)လၢအိၣ်လၢၢ်ကျ့ကၠိသုးကလၢၤအံၤ အ၀ဲသ့ၣ်ကၢတီၢ်ကွံာ်အသုးကလၢၤ၀ံၤလဲၤသုးကွံာ်အသးလၢ လူၤသီကီၢ်ဆၣ် တ့မုၢ်ဒၢကရူၢ် ကၠူၣ်လူၢ်သုးကလၢၤအဂ့ၢ်န့ၣ် လံာ်တၢ်ပာ်ဖျါအပူၤစံး၀ဲန့ၣ်လီၤႉ ဒ်န့ၣ်အသိးတကတီၢ်ဃီဖဲမုၢ်ဆ့ၣ်ထီၣ်လါဖ့ၤဘြူၤအါရံၤ ၁၁ သီ အနံၤန့ၣ်စ့ၢ်ကီး လၢၢ်ကျ့ကၠိပယီၤသုးလၢအလဲၤသုးကွံာ် အသးလၢကၠူၣ်လူၢ်သုးကလၢၤပူၤသ့ၣ်တဖၣ်အံၤ ဟးထီၣ်ကဒီး၀ဲလၢ ကၠူၣ်လူၢ်သုးကလၢၤပူၤအံၤခဲလၢာ်ဒီး က့ၤထုးဖှိၣ်က့ၤအသးလၢၦဲၤလိာ်ကျိကၢၢ်ခိၣ် ယဲၤမုၢ်ပျီကရူၢ် (မီၤဖူ)သုးကလၢၤ အဂ့ၢ်န့ၣ် လံာ်တၢ်ပာ်အပူၤပာ်ဖျါ၀ဲန့ၣ်လီၤႉ တကီၢ်ခါခဲအံၤမီၤဖူသုးကလၢၤလၢပယီၤသုးလဲၤထုးဖှိၣ်က့ၤအသးအံၤန့ၣ်စ့ၢ်ကီး (သုးက့ ၅) ကညီဒီကလုာ် တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်က၀ီၤခးအ၀ဲသ့ၣ်အိၣ်တပယူာ်ဃီအဂ့ၢ်န့ၣ် မုၢ်တြီၢ်တၢ်ကစီၣ်စံး၀ဲအသိး သ့ၣ်ညါဘၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤလီၢ်ခံပယီၤသုးကလၢၤလၢအအိၣ်ဆီလီၤသးဖဲခ့ၣ်အဲၣ်ယူၣ်(သုက့ ၅)ဟီၣ်က၀ီၤပူၤတဖၣ် တၢ်ပၢၢ်ဆၢသုးကရူၢ်ထီၣ်မၤန့ၢ်၀ဲတနီၤဒီးသုးကလၢၤလၢတၢ်ထီၣ်၀ဲတန့ၢ်ဒံးဘၣ်တဖၣ်အံၤခီဖျိတၢ်ဒီၣ်တဲာ်အ၀ဲသ့ၣ် တၢ်လဲၤတၢ်က့ၤကျဲႇတၢ်ဒၢၣ်အီထံကျဲႇတၢ်အီၣ်တၢ်အီကျဲဆၢကတီၢ်ယံာ်ထီၣ်အဃိအ၀ဲသ့ၣ်ထံၣ်ဘၣ်တၢ်ကီတၢ်ခဲ သးသဟီၣ်လီၤစၢ်တူၢ်၀ဲတန့ၢ်လၢၤဘၣ်အဖီခိၣ်အ၀ဲသ့ၣ်ဘၣ်ကၢတီၢ်ကွံာ်သုးကလၢၤဟးထီၣ်ကွံာ်ဒ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢၢ်ကျ့ကၠိပယီၤသုးကလၢၤအံၤစးထီၣ်ဟဲအိၣ်ဆီလီၤသးလၢခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤပူၤ အံၤဖဲ(၁၉၉၇)နံၣ်အခါဒီး မ့မ့ၢ်လၢကၠူၣ်လူၢ်သုးကလၢၤအံၤဟဲအိၣ်ဆီလီၤသးဖဲ(၂၀၀၇)နံၣ်အခါအဂ့ၢ်န့ၣ် မုၢ်တြီၢ်တၢ်ကစီၣ် ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ ဒ်န့ၣ်အသိးဖဲအပူၤကွံာ်(၂၀၂၃)လါဒံၣ်စ့ဘၢၣ် ၁၆ သီအနံၤန့ၣ်စ့ၢ်ကီး(သုးက့ ၅)အၦၤဒီးကရ့ၣ်နံၣ်တၢ်ကပၢၢ်ဆၢ...