လၢဒီၣ်ဖးခိၣ်ကလံၤစိးအပူၤ တယီဃ့အၦ့ၤဂ့ၤဘၣ်ဆၣ်ဒ်ၦၤဟ့ၣ်အၦ့ၤအသိးဘၣ်ဆါ၀ဲ
လါဖ့ၤဘြူၤအါရံၤ ၃၂ သီႇ ၂၀၂၄ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ဒီၣ်ဖးခိၣ်ကီၢ်ဆၣ်အပူၤ တနံၣ်အံၤတယီဃ့အၦ့ၤဂ့ၤ၀ဲဘၣ်ဆၣ် ခီဖျိလၢ(လ့ၣ်သိၤ)ကီၢ်ဆၣ် ဒီၣ်ဖးခိၣ်ကလံၤစိးအပူၤန့ၣ်တၢ်လဲၤတၢ်က့ၤကီခဲ၀ဲအဃိၦၤသူၣ်တယီဖိသ့ၣ်တဖၣ်အံၤဒ်ၦၤဟ့ၣ်အၦ့ၤအသိး ဘၣ်ဆါ၀ဲဒၣ်ဒီးအမၠးတအိၣ်၀ဲဘၣ်အဂ့ၢ်န့ၣ် ၦၤသူၣ်တယီဖိတဖၣ်စံး၀ဲန့ၣ်လီၤႉ ဖဲပူၤကွံာ်နံၣ်အခါန့ၣ်တယီဃ့တပီၢ်န့ၣ်အၦ့ၤအိၣ်၀ဲ(၄၀၀၀)ကၠးဘျဲၣ်ဘၣ်ဆၣ်တနံၣ်အံၤလၢ၀့ၢ်ပူၤတၢ်မၤလီၢ်သ့ၣ်တဖၣ်န့ၣ်တပီၢ်န့ၣ်အၦ့ၤအိၣ်၀ဲတုၤလၢ(၅၈၀၀)ကၠးညါအဂ့ၢ်န့ၣ် ၦၤသူၣ်ဆါတယီဖိတဖၣ်စံး၀ဲန့ၣ်လီၤႉ ဘၣ်ဆၣ်ဒူသ၀ီလၢအိၣ်ဒီၣ်ဖးခိၣ်ကလံၤစိးအပူၤသ့ၣ်တဖၣ်အံၤခီဖျိပယီၤသုးပံးဃာ်၀ဲပနံာ်တၢ်ဖိတၢ်လံၤႇ ပာ်ပနီၣ်၀ဲတၢ်စိာ်ထီၣ်စိာ်လီၤအဃိ ကဆါတယီအဂီၢ်ၦၤၦ့ၤတယီဖိ(ပွဲစား)မ့ၢ်ဟဲမးဆါဘၣ်၀ဲတယီဒီး မ့ၢ်လၢအ၀ဲသ့ၣ်ၦ့ၤတယီအံၤအၦ့ၤစှၤန့ၢ်ဒံး၀့ၢ်ပူၤအဃိအမၠးတအိၣ်၀ဲဘၣ်အဂ့ၢ်န့ၣ် ၦၤသူၣ်အီၣ်တယီဖိတဂၤစံး၀ဲဒ်အံၤ န့ၣ်လီၤႉ အ၀ဲစံး၀ဲလၢ“လၢ၀့ၢ်ပူၤန့ၣ်တယီဃ့အၦၤ့အိၣ်လၢ(၅၀၀၀)ဘျဲၣ်ညါဘၣ်ဆၣ်မ့မ့ၢ်လၢပဒူသ၀ီပူၤအံၤန့ၢ်ထဲ (၄၈၀၀)ကၠးလီၤႉ ၦၤၦ့ၤဆါတယီဖိ(ပွဲစား)တဖၣ်နါက့အ၀ဲသ့ၣ်ဘၣ်စိာ်ထီၣ်စိာ်လီၤတၢ်ကီကီခဲခဲစ့ၢ်မီၤနီၤႉ ၀ဲဒၣ်နါက့ပကလဲၤဆှၢလၢ၀့ၢ်ပူၤပလဲၤတဘၣ်စ့ၢ်ဘၣ်ႇ ပမ့ၢ်လဲၤဆါနါက့အိၣ်ဒီးတြဲၤတၢ်သမံသမိးလီၢ်ႇ လ့ၢ်ထီၣ်လ့ၢ်လိၤဘၣ်ကီခဲစ့ၢ်မီၤနီၤႉ တၢ်အိၣခိးလီၢ်သမံသမိးတၢ်ဖဲန့ၣ်ႇ ပံာ်ကွံာ်ဖဲန့ၣ်အဃိတၢ်လဲၤတၢ်က့ၤကီခဲအိၣ်၀ဲမီၤနီၤႉ ပဆှူဘၣ်ဆၣ်ၦၤၦ့ၤပတၢ်အိၣ်ဒံးအဃိပဘၣ်သးခုလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လီၢ်က၀ီၤကမျၢၢ်လၢအသူၣ်တယီသ့ၣ်တဖၣ်အံၤ တကိးဒိးလဲ၀ဲၦၤမၤတၢ်ဖိတဖၣ်ဘၣ် မ့မ့ၢ်တခီမၤ၀ဲလၢအနီၢ်ကစၢ် အဃိအ၀ဲသ့ၣ်က့ၤဒိးန့ၢ်ဘၣ်က့ၤ၀ဲ(အယ့)ဘၣ်ဆၣ်ခီဖျိလီၢ်က၀ီၤပူၤပယီၤသုးတပျဲၦၤစိာ်တၢ်အီၣ်တၢ်အီဘၣ်အဃိ သဂၢၢ်ဘၣ်၀ဲတၢ်အီတၢ်အီအၦ့ၤထီၣ်၀ဲဒၣ်ကွ့ၢ်ကွ့ၢ်အဂ့ၢ်န့ၣ် လီၢ်က၀ီၤဖိသ့ၣ်တဖၣ်စံး၀ဲအသိးသ့ၣ်ညါဘၣ်န့ၣ်လီၤႉ တယီလၢတၢ်သူၣ်အီၤဖျးအီၣ်လၢဒီၣ်ဖးခိၣ်ကီၢ်ဆၣ်အပူၤသ့ၣ်တဖၣ်အံၤအါဒၣ်တက့ၢ်တၢ်လဲၤစိာ်ဆါအီၤဆူ တီအူတၢ်မၤလီၢ်ဒီးတနံၣ်အံၤခီဖျိတယီဃ့အၦ့ၤဂ့ၤအဃိၦၤသူၣ်အီၣ်ဖျးအီၣ်တယီအိၣ်၀ဲဒၣ်အါမးအဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ ၦၤသူၣ်တယီဖိလၢအိၣ်ဒီၣ်ဖးခိၣ်၀့ၢ်ပူၤတဂၤစံး၀ဲလၢ“ပ၀ဲန့ၣ်ပလဲၤဆါ၀ဲတဘျီဃီတုၤလၢတီအူတၢ်မၤလီၢ်အခီၣ်ထံးလီၤႉ မဟိတနံၣ်န့ၣ်အၦ့ၤအိၣ်ထဲ(၄၀၀၀)ကၠးအခိၣ်အဃၢၤလီၤဘၣ်ဆၣ်တနံၣ်အံၤအၦ့ၤဂ့ၤမီၤနီၤႉ ဖဲမဟိတနံၣ်န့ၣ် ၦၤသူၣ်တယီအိၣ်ဘၣ်ဆၣ်တနံၣ်ညါအံၤန့ၣ်အိၣ်အါထီၣ်မီၤ”အဂ့ၢ်န့ၣ် စံး၀ဲန့ၣ်လီၤႉ ဒ်န့ၣ်အသိးလၢဒီၣ်ဖးခိၣ်ဟီၣ်က၀ီၤအပူၤခီဖျိတၢ်လဲၤတၢ်က့ၤဒီးပယီၤသုးတၢ်သမံသမိးတြဲၤပံာ်ဃာ်တၢ်အဃိ တယီဃုာ်ဒီးသဲးသၣ်စ့ၢ်ကီးအၦ့ၤန့ၢ်စှၤဒိၣ်န့ၢ်ဒံးလၢ၀့ၢ်ပူၤအဂ့ၢ်န့ၣ် သ့ၣ်ညါဘၣ်လၢၦၤသူၣ်သဲးဖိတဖၣ်အအိၣ်န့ၣ်လီၤႉ
ပယီၤသုးလၢအိၣ်ကီးတရံး၀့ၢ်ဃၢၤ(ခွံတၢၣ်)ကျဲပူၤတဖၣ်ဟံန့ၢ်ဆူၣ်ကမျၢၢ်ဘုသး
လါဖ့ၤဘြူၤအါရံၤ ၂၃သီႇ ၂၀၂၄နံၣ်ႇ ခ့ၣ်အဲးစံၣ်ႇ လၢကညီကီၢ်စဲၣ်အပူၤ ပယီၤသုးလၢအိၣ်ဆီလီၤသးဖဲကီးတရံး၀့ၢ်ဃၢၤ(ခွံတၢၣ်)ကျဲမုၢ်အပူၤသ့ၣ်တဖၣ်အံၤ ဟံဆူၣ်၀ဲၦၤကမျၢၢ်အဘုသးလၢအဟဲက့ၤစိာ်၀ဲလၢကျဲတီၤအံၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိတဖၣ်အအိၣ်န့ၣ်လီၤႉ ဖဲအပူၤကွံာ်လါဖ့ၤဘြူၤအါရံၤ(၁၃)သီအနံၤန့ၣ် ဖဲၦၤကမျၢၢ်လဲၤဂံာ်အီၣ်ဘုလၢတြုၢ်တု၀့ၢ်ဃၢၤသ၀ီတဖျၢၣ် အပူၤ၀ံၤဖဲအဟဲက့ၤလၢကျဲအခါပယီၤသုးလၢအိၣ်ခွံတၢၣ်ကျဲမုၢ်ပူၤတဖၣ်ကိးပတုာ်၀ဲလီၢ်က၀ီၤဖိတဖၣ်အံၤအသိလ့ၣ်ဒီးဟံန့ၢ်ကွံာ်၀ဲဘုသးသ့ၣ်တဖၣ်အဂ့ၢ်န့ၣ် ၦၤလၢအဘူးဒီးကမျၢၢ်လၢပယီၤသုးဟံအဘုသးတဂၤစံးဘၣ် ခ့ၣ်အဲးစံၣ်- ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“ပလဲၤဂံာ်ဘု၀ံၤပဟဲက့ၤလၢတုၤဖဲယဲၢ်တၢၣ်(ယ့ၤပူၤ)ကျဲမုၢ်ကပၤဘျီပထံၣ်သုးကီးကးအၦၤခံဂၤဒီးပသံကွၢ်အ၀ဲသ့ၣ်လၢပက့ၤန့ၢ်ဧါႇတဲၦၤလၢက့ၤန့ၢ်မီၤႉတဲၦၤတဘၣ်နီမံၤဘၣ်အဃိပက့ၤ၀ဲန့ၣ်ႇပဆဲးက့ၤဘျီပတိပယီၤသုးခံဂၤ တြီပသိလ့ၣ်၀ံၤသမံသမိးၦၤကွၢ်ပလီတဲစိသမံသမိး၀ဲ၀ံၤမၢပပတုာ်ပသိလ့ၣ်လၢဟံၣ်ခံကထၢတဖျၢၣ်အကပၤ၀ံၤတဲ၀ဲ ဘုသးလၢအပၣ်တဖၣ်န့ၣ်ပာ်လီၤကွံာ်ခဲလၢာ်မီၤႉပကွၢ်ထီၣ်လၢဟံၣ်တၢးအဖီခိၣ်ပထံၣ်ၦၤသုးဖိအိၣ်ၦဲၤၦဲၤလီၤမီၤႉ” အဂ့ၢ်န့ၣ် စံးဘၣ်ခ့ၣ်အဲးစံၣ်-တၢ်ကစီၣ်န့ၣ်လီၤႉ သုးကီၣ်ကးသ့ၣ်တဖၣ်အံၤဟံတီၢ်ကွံာ်၀ဲဘုသး(၁၁)နာ်ႇဘုသးအကၢ်ကုာ်ကၢ်ကျီ(၃)နာ်ဒီးပအံ(၁)နာ် အဂ့ၢ်န့ၣ် လီၢ်က၀ီၤဖိလၢပယီၤသုးဟံဆူၣ်ကွံာ်အဘုသးတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ လၢကီးတရံး၀့ၢ်တုၤလၢကြုၢ်တု၀့ၢ်ကျဲမုၢ်တၢ်လီၢ်တဖၣ်န့ၣ်ပယီၤသုးဟးအိၣ်ခိးခူသူၣ်တၢ်အိၣ်၀ဲဒီး ဒ်န့ၣ်အသိး ပယီၤသုးဒီးပၢၤကီၢ်သုးတဖၣ်တနီၤန့ၣ်အ၀ဲသ့ၣ်ဟးဆှၣ်တၢ်၊ဟးဃုသ့ၣ်ညါတၢ်လၢဒူသ၀ီပူၤအိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိး န့ၣ်လီၤႉ လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲလၢ“အ၀ဲသ့ၣ်အိၣ်ဖဲကျဲကပၤန့ၣ်ဒုပာ်ဖျါအသးစှၤကိးဂၤလီၤမီၤႉ လၢရီဘၢၣ်ကျီးပူၤန့ၣ်ဒုအိၣ်ဒီဒူၣ်ညါမီၤႉလၢ(ယဲၢ်တၢၣ်)တကပၤန့ၣ်နါက့လၢကျဲမုၢ်ကပၤန့ၣ်ပာ်ဖျါအသးထဲတဂၤခံဂၤလီၤဘၣ်ဆၣ်လၢတၢ်ကိပူၤန့ၣ်အိၣ်ဒီဒူၣ်မီၤနီၤႉလၢ(ခွံတၢၣ်)ကျဲန့ၣ်အ၀ဲသ့ၣ်တဲလၢကျဲတပံးဘၣ်တဲ၀ဲလၢလဲၤန့ၢ်မီၤနီၤႉဘၣ်ဆၣ် နမ့လဲၤန့ၣ်ကကိးပတုာ်နသိလ့ၣ်သမံသမိးနၤအဃိန့ၣ်ယအဲၣ်ဒိးတဲလၢလဲၤလၢတၢ်ပလီၢ်ပူၤဒီးကျဲလၢၦၤတလ့ၢ်လိၤအိၣ် တအါဘၣ်န့ၣ်တဘၣ်လဲၤတဂ့ၤမီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ဖဲအပူကွံာ်လါဒံၤစဲဘၢၣ်ဘူးကလၢာ်အခါန့ၣ်စးထီၣ်လၢ(တီၤကၠးအ့)တုၤလၢ(ခွံတၢၣ်)ကျဲဆဲးန့ၣ်တၢ်ပၢၢ်ဆၢသုးပာ်ဖှိၣ် တဖၣ်ထီၣ်ဒုးလုၢ်ဘၢဒိၣ်စိ၀ဲကျဲအံၤဒီးတကီၢ်ခါခဲအံၤကျဲ၀ဲအံၤတၢ်ပၢၢ်ဆၢသုးပာ်ဖှိၣ်တဖၣ်ပၢၤဃာ်၀ဲန့ၢ်လံဘၣ်ဆၣ် မ့မ့ၢ်လၢ(ခွံတၢၣ်)ကျဲဆဲးတကပၤခီန့ၣ်ပယီၤသုးဆီလီၤသးအိၣ်ဒံး၀ဲအဖၢမုၢ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိတဖၣ် အအိၣ်န့ၣ်လီၤႉ
ကီၢ်ဆၣ်ခံဘ့ၣ် လွံၢ်သီအတီၢ်ပူၤကျိဖးဒိၣ်အဃိကမျၢၢ်သံ ၁ ဂၤ ဘၣ်ဒိ ၅ ဂၤ
လါဖ့ၤဘြူၤအါရံၤ ၂၂ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် ဆီထံးကီၢ်ဆၣ်ဒီးမူကီၢ်ဆၣ်အပူၤ ခီဖိပျယီၤခးလီၤကျိဖးဒိၣ်ဒီးကဘီယူၤဟဲခးလီၤတၢ်အဃိ လၢလွံၢ်သီအတီၢ်ပူၤန့ၣ် ကမျၢၢ်သံ၀ဲဒၣ်(၁)ဂၤႇ ဘၣ်ဒိ၀ဲဒၣ်(၅)ဂၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲမဟါလါဖ့ၤဘြူၤအါရံၤ ၂၁ သီအနံၤန့ၣ်လီၤႉ ကီၢ်ဆၣ်ခံဘ့ၣ်အပူၤ ဖဲပူၤကွံာ်လါဖ့ၤဘြူၤအါရံၤ ၁၇သီႇ ၁၈သီႇ ၁၉သီ ဒီး၂၁သီ လၢလွံၢ်သီအတီၢ်ပူၤ ခီဖျိပယီၤသုးခးလီၤကျိဖးဒိၣ်ႇ ကဘီယူၤဟဲခးလီၤတၢ်ဒီးဒြိစ့ၢ်ကီးဟဲတ့ၢ်လီၤမ့ၣ်ပိၢ်အဃိ ကမျၢၢ်သံ၀ဲဒၣ်တဂၤႇ ဘၣ်ဒိ(၅)ဂၤဒီး တကးဒံးဘၣ်ကမျၢၢ်ဟံၣ်ဃီတၢ်သူၣ်ထီၣ်စ့ၢ်ကီးဟးဂီၤ၀ဲဒၣ်အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါခီဖျိပယီၤသုးခးလီၤကျိဖးဒိၣ်အဃိကီၢ်ဆၣ်ခံဘ့ၣ်အပူၤကမျၢၢ်အဟံၣ်အဃီ(၈)ဖျၢၣ်ဃုာ်ဒီး ကၠိႇ သီခါဖၠၣ်ႇ တၢ်ဘါယွၤသရိာ်သ့ၣ်တဖၣ်ဘၣ်ဟးဂီၤကွံာ်၀ဲအဂ့ၢ်န့ၣ် ခ့ၣ်အဲၣ်ယူၣ်ပာ်ဖျါစ့ၢ်ကီး၀ဲန့ၣ်လီၤႉ ဖဲလါဖ့ၤဘြူၤအါရံၤ(၁၇)သီအနံၤန့ၣ်ပယီၤသုးကဘီယူၤဟဲတ့ၢ်လီၤ၀ဲမ့ၢ်ပိၢ်(၃)ဘျီလၢမူကီၢ်ဆၣ်(မၠဲၣ်နံၤကိ)သ၀ီပူၤ အဃိဖဲန့ၣ်ကမျၢၢ်ဟံၣ်အူအီၣ်တဖျၢၣ်ႇ ကၠိဟးဂီၤတဖျၢၣ်ႇ ကမျၢၢ်ဟံၣ်ဟးဂီၤတဖျၢၣ်ဒီးဒ်န့ၣ်အသိးဖဲမုၢ်ဆ့ၣ်ထီၣ် လါဖ့ၤဘြူၤအါရံၤ(၁၈)သီအနံၤန့ၣ်ပယီၤသုးအိၣ်(ကွ့ခၠီ၀ၣ်)တဖၣ်အံၤခးလီၤကျိဖးဒိၣ်အဃိ(ယ့ၤဒွ့ကိလ့)သ၀ီပူၤ သီခါဖၠၣ်အူအီၣ်တဖျၢၣ်ဒီးဆၣ်ဖိကီၢ်ဖိသံအိၣ်၀ဲဒၣ်အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါပူၤအသိးသ့ၣ်ညါဘၣ်န့ၣ်လီၤႉ တကးဒံးဘၣ် မၤကဒီးဖဲလါဖ့ၤဘြူၤအါရံၤ(၁၉)သီအနံၤန့ၣ်ပယီၤသုးခီၣ်ချ့သုးရ့ၣ်လၢအိၣ်(စွ့ၤ၀ါ)သုးလၢၤ တဖၣ်အံၤခးလီၤကျိဖးဒိၣ်(၃)ဖျၢၣ်လီၤတဲာ်ပိၢ်ဖးထီၣ်၀ဲဒၣ်လၢ(လဲၢ်တဲၢ်ကၠံ)သ၀ီပူၤဒီးသ၀ီဃၢၤအဃိ ဘၣ်သံ၀ဲအူစ့ၤလၣ်(၄၈)နံၣ်ဒီးဘၣ်ဒိ၀ဲ အူသ့လွ့ၤ(၆၀)နံၣ်ႇ မၣ်သၢစွ့ၤ(၄၅)နံၣ်ႇ မီၤအၣ်ကၣ်(၅)နံၣ်သ့ၣ်တဖၣ်အံၤဒီး လၢန့ၣ်အမဲာ်ညါကမျၢၢ်ဟံၣ်ဟးဂီၤ၀ဲဒၣ်(၂)ဖျၢၣ်အဂ့ၢ်န့ၣ် လံာ်တၢ်ပာ်ဖျါပူၤပာ်ဖျါ၀ဲလီၤတံၢ်လီၤဆဲးန့ၣ်လီၤႉ ဒ်န့ၣ်အသိးဖဲလါဖ့ၤဘြူၤအါရံၤ(၂၁)သီအနံၤ လၢဆီထံးကီၢ်ဆၣ်အပူၤ သုးကီၣ်ကးအကဘီယူၤဒုးသုး(၂)ဘ့ၣ် ဟဲတ့ၢ်လီၤ၀ဲမ့ၣ်ပိၢ်(၈)ဖျၢၣ်ဆူ(ထံ၀ါထၣ်)သ၀ီပူၤအဃိဘၣ်ဟးဂီၤ၀ဲတၢ်ဘါယွၤသရိာ်တဖျၢၣ်ဒီးကမျၢၢ်ဟံၣ်(၄)ဖျၢၣ်အဂ့ၢ်န့ၣ် ပာ်ဖျါ၀ဲန့ၣ်လီၤႉ စးထီၣ်လၢသုးမီၤစိရိၤဟံးန့ၢ်တၢ်စိတၢ်ကမီၤ၀ံၤအလီၢ်ခံလၢချၢၣ်လွံၢ်ထူၣ်ကီၢ်ရ့ၣ် မူးကီၢ်ဆၣ်ႇ ဆီထံးကီၢ်ဆၣ်ဒီးလၢၢ်ဒိၣ်ကီၢ်ဆၣ်အပူၤန့ၣ် ခီဖျိတၢ်အိၣ်သးအကလုာ်ကလုာ်အဃိ ကမျၢၢ်ဃုာ်ဒီးဖိဒံဖိသၣ်ၦၤကၠိဖိသံ၀ဲဒၣ်ခဲလၢာ် (၁၂၈)ဂၤႇ ဘၣ်ဒိ(၃၅၂)ဂၤဒီးကမျၢၢ်ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲ(၂၄၈၁၆၀)ဂၤ...
သုးကီၣ်ကးထုးထီၣ်ပာ်ဖျါ၀ဲလၢၦၤကဘၣ်ကဲသုးအကျါတပၣ်ဃုာ်ပိာ်မုၣ်ဒံးဘၣ်အဖီခိၣ်အံၤနာ်အီၣ်တသ့ဘၣ်အဂ့ၢ် (KWO)စံး၀ဲ
လါဖ့ၤဘြူၤအါရံၤ ၂၂ သီႇ၂၀၂၄ နံၣ်ႇခ့ၣ်အဲးစံၣ် သုးကီၣ်ကးထုးထီၣ်ဘိးဘၣ်ရၤလိၤ၀ဲလၢမုၣ်ခွါလၢတၢ်ပာ်ပနီၣ်သးနံၣ်တဖၣ်ကဘၣ်ကဲသုး၀ံၤလီၢ်ခံ ဖဲလါဖ့ၤဘြူၤအါရံၤ ၂၀ သီအနံၤန့ၣ် သုးကီၣ်ကးၦၤကတိၤတၢ်ပၢ သုးခိၣ်ကျၢၢ်ဂီၢ်ဂ့ၢ် စီၣ်မ့ထိ က့ၤစံးကဒါက့ၤ၀ဲလၢ ၦၤကဘၣ်ကဲသုးအကျါပိာ်မုၣ်တပၣ်ဃုာ်၀ဲဒံးဘၣ်အဖီခိၣ်အံၤတမ့ၢ်တၢ်လၢအလီၤနာ်အီၣ်သ့ဘၣ်အဂ့ၢ်န့ၣ် ကညီပိာ်မုၣ်ကရၢ(KWO)စံး၀ဲန့ၣ်လီၤႉ သုးကီၣ်ကးက့ၤထုးထီၣ်ပာ်ဖျါက့ၤ၀ဲလၢတၢ်ကထၢသုးအကျါပိာ်မုၣ်တဖၣ်တပၣ်ဃုာ်၀ဲဒံးဘၣ်ဒီးဘၣ်ဆၣ် နာ်အီၣ်အ၀ဲသ့ၣ်တသ့ဘၣ်ခီဖျိသုးကီၣ်ကးအံၤတၢ်လၢအအဲၣ်ဒိးမၤ၀ဲန့ၣ်ညီနုၢ်မၤ၀ဲတုၤအန့ၢ်အဃိ ဒ်လဲၣ်ဂ့ၤဒ်လဲၣ်ဂ့ၤ န့ၣ်နာ်အီၣ်အ၀ဲသ့ၣ်တသ့ဘၣ်အဂ့ၢ်န့ၣ် ကညီပိာ်မုၣ်ကရၢ(KWO) ကရၢခိၣ် နီၢ်ကညီဖီစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“သုးကီၣ်ကးန့ၣ်အဆိကတၢၢ်န့ၣ်ဒုးသ့ၣ်ညါ၀ဲဒၣ်လၢကဘၣ်ကဲသုးကိးဂၤဒဲးလီၤႉနါက့ၦၤကတိၤတၢ်ပၢန့ၣ်အ၀ဲသ့ၣ်က့ၤတဲကဒါက့ၤ၀ဲလၢတကီၢ်ခါခဲအံၤန့မ့မ့ၢ်ပိာ်မုၣ်န့ၣ်တထၢ၀ဲဒံးဘၣ်ဘၣ်ဆၣ်ပနာ်အီၣ်တသ့ဘၣ်ႉ ဘၣ်မနုၤအဃိလဲၣ်န့ၣ်သုးကီၣ်ကးအံၤတၢ်လၢကအဲၣ်ဒိးမၤ၀ဲန့ၣ်ကမၤ၀ဲလီၤမီၤႉအခီပညီန့ၣ်ကအဲၣ်ဒိးယူနုာ်လီၤ၀ဲၦၤကိးဂၤဒဲးလၢတၢ်ဒုးတၢ်ယၤအပူၤလီၤႉပမ့ကွၢ်လၢမုၢ်မဆါတနံၤညါအံၤအတၢ်ဟူးတၢ်ဂဲၤန့ၣ်မၤသံမၤ၀ီထံဖိကီၢ်ဖိအဃိနကနၣ်လၢတဲလီၤတၢ်ဘျီနဆိမိၣ်လၢတဃုထၢနၤလၢၤဘၣ်န့ၣ်တအိၣ်ဘၣ်မီၤႉဘၣ်မနုၤအဃိလဲၣ်န့ၣ်သုးအဖိအမါ မးန့ၣ်ပျဲထီၣ်၀ဲတၢ်မၤလိဟးကိး၀ဲဖီၣ်န့ၣ်ဆူၣ်၀ဲၦၤကညီသ့ၣ်တဖၣ်ဒုးထီၣ်၀ဲတၢ်မၤလိအိၣ်မီၤနီၤႉအလိၣ်ဘၣ်တၢ်ဂံၢ်တၢ်ဘါဖီခိၣ်န့ၣ်မၤ၀ဲလီၤႉအဃိန့ၣ်မ့ၢ်တဲ၀ဲဒ်လဲၣ်ဒ်လဲၣ်န့ၣ်အတၢ်ကူၣ်တရံးန့ၣ်အိၣ်ထီၣ်ဘိလီၤမီၤႉ” အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါလၢတၢ်ဂ့ၢ်တခါအံၤအဖီခိၣ်သူၣ်ဘီၣ်သးစၢ်ဒီးပိာ်မုၣ်ပိာ်မၢၤတဖၣ်ကပာ်သူၣ်ပာ်သးအိၣ်ဒီးတၢ်ပလီၢ် ပဒီဒီးဒ်န့ၣ်အသိးပိာ်မုာ်ပိာ်မၢၤသ့ၣ်တဖၣ်အံၤကွဲမုာ်အ၀ဲသ့ၣ်လၢကဟဲပာ်ဖှိၣ်မၤသကိးတၢ်ဒီးကညီပိာ်မုၣ်ကရၢ အဂ့ၢ်န့ၣ် နီၢ်ကညီဖီ စံးအါထီၣ်၀ဲန့ၣ်လီၤႉ သုးကီၣ်ကးထုးထီၣ်“ထံဖိကီၢ်ဖိတၢ်ဘၣ်မၤသုးသဲစး”၀ံၤလီၢခံ လၢဟီၣ်က၀ီၤတၢ်လီၢ်တနီၤအပူၤသူၣ်ဘီၣ်သးစၢ် ပိာ်၊ခွါတနီၤလီၤမၢ်၀ဲလၢတၢ်တသ့ၣ်ညါထွဲတၢ်ဂ့ၢ်တၢ်ကျိၤဘၣ်အိၣ်၀ဲအဃိဘၣ်ဃးသုးကီၣ်ကးအတၢ်တဲန့ၣ် နာ်အီၣ်တသ့ဘၣ်အဂ့ၢ်န့ၣ် ဖၣ်အၣ်၀့ၢ်ပူၤသးစၢ်ပိာ်မုၣ်လၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“အ၀ဲသ့ၣ်တဲလၢတကိးပိာ်မုၣ်ဘၣ်န့ၣ်တဲလၢအကိာ်ပူၤလီၤနာ်အီၣ်တဘူၣ်ဘၣ်မီၤႉမ့ၢ်ထံၣ်ၦၤတဂၤဂ့ၤ တဂၤဂ့ၤန့ၣ်မ့အဲၣ်ဒိးဖီၣ်၀ဲန့ၣ်ဖီၣ်၀ဲသ့လီၤႉထုးထီၣ်ပာ်ဖျါ၀ဲအတၢ်သိၣ်တၢ်သီန့ၣ်တၢ်သိၣ်တၢ်သီလီၤႉတလူၤပိာ်ထွဲ၀ဲဘၣ်အဃိပဘၣ်အိၣ်ဒီးတၢ်ပလီၢ်ထီဘိလီၤမီၤႉခဲအံၤဘၣ်ပျံၤတၢ်အိၣ်ကလုာ်ကလုာ်လီၤႉထံရုၢ်ကီၢ်သဲးတၢ်အိၣ်သးခီဒၢး ဘၣ်ပျံၤ၀ံၤဒီးဘၣ်ပျံၤစ့ၢ်ကီးလၢကဖီၣ်ဆါအီၣ်ပိာ်မုၣ်စ့ၢ်မီၤႉဖီၣ်၀ဲ၀ံၤမၢလဲၤကဲသုးသ့အသိးန့ၣ်ဆါအီၣ်၀ဲသ့ၣ်သ့အဃိ ဘၣ်ပျံၤခဲလၢာ်လီၤႉလၢယသကိးအိၣ်တကပၤန့ၣ်ဒုတၢ်လီၢ်ဆူၣ်အဃိအခဲအံၤပိာ်မုၣ်တနီၤပျံၤတၢ်ဘၣ်လဲၤအိၣ်ခူသူၣ် လၢၦၢ်ပူၤအိၣ်မီၤႉ၀ံၤဒီးမ့မ့ၢ်လၢ၀့ၢ်ပူၤယသကိးလၢမၤတၢ်တဖၣ်န့ၣ်အ၀ဲသ့ၣ်တူၢ်ဘၣ်၀ဲတၢ်ဘံၣ်တၢ်ဘၢတအိၣ်ဘၣ်အ ဃိအ၀ဲသ့ၣ်မၤတၢ်တခီခီပျံၤတၢ်တခီခီလီၤမီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-တၢ်ကစီၣ်န့ၣ်လီၤႉ ဖဲတလါအံၤဖ့ၤဘြူၤအါရံၤ(၁၀)သီအနံၤန့ၣ် သုးကီၣ်ကးထုးထီၣ်၀ဲ“ထံဖိကီၢ်ဖိတၢ်ဘၣ်မၤသုးသဲစး”လၢသးမုၢ်ခွါ လၢတၢ်ပာ်ပနီၣ်သးနံၣ်တဖၣ်ကဘၣ်နုာ်လီၤကဲသုးဒီးခီဖျိတၢ်သုးကီၣ်ကးတၢ်သိၣ်တၢ်သီအံၤအဃိသူၣ်ဘီၣ်သးစၢ် တဖၣ်အိၣ်ဒီးတၢ်ပျံၤတၢ်ဖုးဟးထီၣ်တၢ်ချၢတဘူၣ်လၢၤဘၣ်အိၣ်၀ဲအသိးတနီၤန့ၣ်လဲၤစံၣ်ထီၣ်၀ဲဒၣ်လၢထံဂုၤကီၢ်ဂၤ စ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
လၢၢ်ဒိၣ်စိကီၢ်ဆၣ်အပူၤ (KNLA)သုးပ၁်ဖှိၣ်ခိးခးပယီၤသုးသိလ့ၣ်အဃိ ပယီၤသုးသံတစှၤန့ၢ်(၃၀)ဂၤ
လါဖ့ၤဘြူၤအါရံၤ ၂၂ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ်(သုးက့ ၄) လၢၢ်ဒိၣ်စိကီၢ်ဆၣ် မုၢ်ထီၣ်ဟီၣ်က၀ီၤအပူၤ ဖဲမဟါလါဖ့ၤဘြူၤအါရံၤ ၂၁ သီအနံၤန့ၣ် (KNLA)သုးပာ်ဖှိၣ်ခိးခး၀ဲပယီၤသုးသိလ့ၣ်လၢတၢ်ဘၢၣ်စၢၤအဃိ ပယီၤသုးသံတစှၤန့ၢ်(၃၀)ဂၤအဂ့ၢ်န့ၣ် (သုးက့ ၄)ၦၤဘၣ်မူဘၣ်ဒါ စံး၀ဲန့ၣ်လီၤႉ ဖဲလါဖ့ၤဘြူၤအါရံၤ ၂၁ သီအနံၤ လၢဒ၀ဲၢ်–ထံခံကျဲ ၀ါကူးသ၀ီဒီး ကၠီၣ်မဲတီၤသ၀ီအဘၢၣ်စၢၤန့ၣ် ပယီၤသုးသိလ့ၣ်ဟဲထီၣ် ၀ဲဒၣ်(၁၇)ခိၣ်ဒီးခီဖျိကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ခိးခး၀ဲလၢ တၢ်ဘၢၣ်စၢၤအဃိ ပယီၤသုးသံတစှၤန့ၢ်(၃၀)ဂၤႇတကးဒံးဘၣ်သိလ့ၣ်ဟးဂီၤ၀ဲဒၣ်(၇)ခိၣ်အဂ့ၢ်န့ၣ် (သုးက့ ၄) နဲၣ်ရွဲၣ် ပဒိၣ်စီၤအဲၣ်နၤ စံး၀ဲန့ၣ်လီၤႉ ခ့ၣ်အဲၣ်ယူၣ်(သုးက့ ၄)နဲၣ်ရွဲၣ် ပဒိၣ်စီၤအဲၣ်နၤ စံး၀ဲလၢ“ဒုၣ်ဒါဒုသံလီၤတံၢ်လီၤဆဲးလၢပတသ့ၣ်ညါဘၣ်ႉ ယဆိမိၣ်ပမ့ကွၢ်လၢၦၤမၤန့ၢ်တၢ်စုက၀ဲၤဖီခိၣ်ဒုဒုၣ်ဒါကဘၣ်သံလၢအဂၤ(၃၀)ဆူဖီခိၣ်လီၤႉပသ့ၣ်ညါဘၣ်န့ၣ်ဒုၣ်ဒါအသိလ့ၣ်ဟးဂီၤ(၇)ခိၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤႉ လၢန့ၣ်အအဲာ်ညါပယီၤသုးသ့ၣ်တဖၣ်အံၤလၢကဟဲထီၣ်ဆှၢတၢ်အီၣ်တၢ်အီဒီးကဟဲမၤၦဲၤထီၣ်သုးဂံၢ်ဘါအဂီၢ် ဖဲလါဖ့ၤဘြူၤအါရံၤ ၁၇ သီ အနံၤန့ၣ် လၢဒ၀ဲၢ်၀့ၢ်အံၤတဆီအ၀ဲသ့ၣ်ဟဲထီၣ်၀ဲဒၣ်ဆူ၀့ၢ်တၢ်အဲၣ် ကၠီၣ်မဲတီၣ်သုးကလၢၤ အံၤဒီးဖဲအဟဲထီၣ်လၢကျဲအခါတၢ်ခိးခးအ၀ဲသ့ၣ်အဃိတၢ်ဒုးကဲထီၣ်၀ဲဒၣ်လၢခံခီခံကပၤ အဘၢၣ်စၢၤအဂ့ၢ်န့ၣ် ပဒိၣ်စီၤအဲၣ်နၤ စံးအါထီၣ်၀ဲဒၣ်န့ၣ်လီၤႉ တၢ်အိၣ်ခိးခးပယီၤသုးသိလ့ၣ်ဘျီ၀ဲအံၤမ့ၢ်၀ဲ(သုးက့ ၄)ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၁၀), သုးရ့ၣ်(၁၂), သုးရ့ၣ်(၂၇) ဒီးတၢ်ဒီသဒၢကမျၢၢ်သုးကရူၢ်(PDF)သုးပာ်ဖှိၣ်သ့ၣ်တဖၣ်လီၤအဂ့ၢ်န့ၣ် ဟီၣ်က၀ီၤၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ တနံၤဃီတၢ်ဒုးကဲလၢခံခီခံကပၤအဘၢၣ်စၢၤ၀ံၤလီၢ်ခံပယီၤသုးကဘီယူၤဟဲခးလီၤတၢ်လၢ၀ါကူးသ၀ီအခိၣ်အဃၢၤဒီး ဘၣ်ဆၣ်လီၢ်က၀ီၤကမျၢၢ်သံဘၣ်ဒိဘၣ်ထံးတအိၣ်၀ဲဒၣ်ဘၣ်အဂ့ၢ်န့ၣ် ဟီၣ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ တၢ်ခိးခးပယီၤသုးသိလ့ၣ်တၢ်ဒုးဘျီ၀ဲအံၤအပူၤန့ၣ်(KNLA)သုးပာ်ဖှိၣ်မၤဟးဂီၤကွံာ်၀ဲပယီၤသုးသိလ့ၣ်(၇)ခိၣ် တကးဒံးဘၣ်မၤန့ၢ်၀ဲကျိစဲးလးႇ(RPG)ဒီး(၈၁)ကျိခဲလၢာ်ကအိၣ်လၢအခိၣ်(၃၀)ဘျဲၣ်အဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိလၢအဘူးဒီး(KNLA)တဖၣ်စံး၀ဲန့ၣ်လီၤႉ လၢန့ၣ်အမဲာ်ညါတကီၢ်ခါခဲအံၤလၢ၀ါကူးသ၀ီတကပၤန့ၣ်ခီဖျိခံခီခံကပၤတၢ်ဒုးဆဲးကဲထီၣ်၀ဲဒၣ်တုၤလၢခဲအံၤတစု...
လၢဟံၣ်ဖိဃီဖိကအီၣ်ကအီအဂီၢ်ကမျၢၢ်ၦၤဃ့ၢ်မှံဟးဖျိးလၢအိၣ်ကီးတရံးကီၢ်ဆၣ်ပူၤတဖၣ်ဆဲးဆါ၀ဲသ့ၣ်လၣ်
လါဖ့ၤဘြူၤအါရံၤ ၂၁ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)ကီးတရံးကီၢ်ဆၣ်အပူၤ တကီၢ်ခါခဲအံၤဘၣ်လၢတလးအီလၣ်လီၤ၀ဲအကတီၢ်ဒီးလၢဟံၣ်ဖိဃီဖိကအီၣ်ဘၣ်အီဘၣ်အဂီၢ်ဆဲးဆါ၀ဲဒၣ်သ့ၣ်လၣ်အဂ့ၢ်န့ၣ် ကမျၢၢ်ၦၤဃ့ၢ်မှံဟးဖျိးတဖၣ် စံး၀ဲန့ၣ်လီၤႉ တကီၢ်ခါခဲအံၤကမျၢၢ်ၦၤဃ့ၢ်မှံဟးဖျိးသ့ၣ်တဖၣ်ဒ်သိးအ၀ဲသ့ၣ်ကအိၣ်ဘၣ်အီဘၣ်အဂီၢ်န့ၣ် မူခိၣ်ကလံၤသီၣ်ဂီၤတၢ်ဆၢကတီၢ်ကိးကတီၢ်ဒဲးအ၀ဲသ့ၣ်ဖံးအီၣ်မၤအီၣ်၀ဲတၢ်ဒီးဒ်န့ၣ်အသိးခဲအံၤဘၣ်လၢတလးအီ လၣ်လီၤအဆၢကတီၢ်အံၤအ၀ဲသ့ၣ်ဆဲးဆါ၀ဲဒၣ်သ့ၣ်လၣ်အဂ့ၢ်န့ၣ် ကမျၢၢ်ပိာ်မုၣ်လၢအဃ့ၢ်တၢ်ဒုးတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဒ်သိးပအီၣ်ဘၣ်အီဘၣ်အဂီၢ်န့ၣ်တလးအီဒံၣ်မ့လီၤန့ၣ်ပလဲၤထၢႉပကုၢ်ဆါ၀ဲဒၣ်သွဲၣ်လး(မံသွ့)ႉ အခဲအံၤ ဘၣ်လၢတလးအီလၣ်လီၤအကတီၢ်အဃိပလဲၤထၢအီၤ၀ံၤပဟဲက့ၤဆဲးဆါ၀ဲမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ကီးတရံးကီၢ်ဆၣ်ပူၤကမျၢၢ်ၦၤဃ့ၢ်မှံဟးဖျိးသ့ၣ်တဖၣ်အံၤကီၢ်ဆၣ်ခိၣ်နၢ်ၦၤဘၣ်မူဘၣ်ဒါလဲၤဟ့ၣ်လီၤဆီၣ်ထွဲမၤစၢၤ၀ဲတၢ်အီၣ်တၢ်အီအိၣ်၀ဲဘၣ်ဆၣ်ခီဖျိတကူတလၢဘၣ်အဃိမ့ဘၣ်လၢအဆၢကတီၢ်တၢ်ဖံးတၢ်မၤမ့ပၢၢ်ထီၣ်န့ၣ် ဘၣ်မၤ၀ဲဒၣ်လီၤအဂ့ၢ်န့ၣ် လီၢ်က၀ီၤသ့ၣ်တဖၣ်စံး၀ဲန့ၣ်လီၤႉ ကီၤတရံးကီၢ်ဆၣ်ပူၤ ကမျၢၢ်ၦၤသ၀ီဖိတဖၣ်တနီၤန့ၣ်တက့ၤဘၣ်လၢအ၀ဲသ့ၣ်အဟံၣ်အဃီကအိၣ်လၢ (၃)နံၣ်ဃၣ်ဃၣ်လံဒီးလၢတၢ်န့ၣ်အဃိအ၀ဲသ့ၣ်အဲၣ်ဒိးက့ၤအိၣ်လၢအကစၢ်အဟံၣ်အဃီအဂ့ၢ်န့ၣ် ပိာ်မုၣ်လၢအဃ့ၢ်တၢ်ဒုးလၢအဂၤတဂၤစ့ၢ်ကီး စံး၀ဲဒ်အံၤန့ၣ်လီၤႉ အ၀ဲစံး၀ဲလၢ “ပဘၣ်ဟးစံၣ်ကအိၣ်လၢ(၃)နံၣ်လံ တၢ်ကီတၢ်ခဲအိၣ်ကလုာ်ကလုာ်လီၤႉ ခီဖျိပဟဲအိၣ်လၢ ၦၤဟံၣ်ၦၤဃီယံၤထီၣ်လံအဃိပ(အါနၣ်)ဘၣ်အ၀ဲသ့ၣ်စ့ၢ်မီၤနီၤႉ တနီၤန့ၣ်တ့ထီၣ်၀ဲဒၣ်ဒဲဖိအိၣ်ဆိး၀ဲဒၣ်လၢကစၢၢ်ကျါလီၤႉ ပကစၢ်ပဒူသ၀ီပဟံၣ်ပဃီပက့ၤမ့ၢ်သ့ဒုပအဲၣ်ဒိးက့ၤလံ” အဂ့ၢ်န့ၣ် စံး၀ဲဒၣ်န့ၣ်လီၤႉ ခီဖျိတၢ်ဒုးတၢ်ယၤႇ ကျိဖးဒိၣ်အဃိၦၤကမျၢၢ်လၢအဃ့ၢ်ထီၣ်တဖၣ်အံၤအဟံၣ်အဃီႇ တၢ်ဖိတၢ်လံၤအူအီၣ်ဟးဂီၤအိၣ်၀ဲ ဒီးဒ်န့ၣ်အသိးတၢ်နုာ်လီၤအီၣ်ဟုၣ်မၤဟးဂီၤကွံာ်၀ဲစ့ၢ်ကီးအိၣ်၀ဲအဂ့ၢ်န့ၣ် ၦၤသ၀ီဖိသ့ၣ်တဖၣ်စံး၀ဲန့ၣ်လီၤ လၢခ့ၣ်အဲၣ်ယူၣ် ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ်အပူၤ ခီဖျိလၢတၢ်ဒုးတၢ်ယၤအဃိ လီၢ်က၀ီၤကမျၢၢ်တဖၣ် လၢကဖံးအီၣ်မၤအီၣ်တၢ်အဂီၢ်တၢ်ကီတၢ်ခဲအိၣ်ထီၣ်၀ဲဒီးလၢန့ၣ်အမဲာ်ညါတၢ်လဲၤတၢ်က့ၤတကပၤစ့ၢ်ကီးကီခဲထီၣ်ႇ ပနံာ်တၢ်ဖိတၢ်လံၤစ့ၢ်ကီးအၦ့ၤထီၣ်အဃိလၢကအီၣ်ကအီအဂီၢ်ကီခဲဒိၣ်ထီၣ်ဒၣ်ရုၢ်ရုၢ်လီၤအဂ့ၢ်န့ၣ် လီၢ်က၀ီၤကမျၢၢ်သ့ၣ်တဖၣ်စံး၀ဲန့ၣ်လီၤႉ
သုးကီၣ်ကးထုးထီၣ်ထံဖိကီၢ်ဖိဘၣ်ကဲသုးသဲးစးအံၤမ့ၢ်အပ၁်ဖျါထီၣ်၀ဲကရူၢ်အတၢ်အိၣ်သးနီၢ်နီၢ်အဂ့ၢ် ခ့ၣ်အဲၣ်ယူၣ် ကရၢခိၣ် စံး၀ဲ
လါဖ့ၤဘြူၤအါရံၤ ၂၁ သီႇ ၂၀၂၄ နံၣ်ႇ ခ့ၣ်အဲးစံၣ် သုးကီၣ်ကးထုးထီၣ်၀ဲလၢထံဖိကီၢ်ဖိဘၣ်ကဲသုးသဲးစးတၢ်သိၣ်တၢ်သီတၢ်ဘျၢဒီးအတၢ်ပာ်ဂၢၢ်ပာ်ကျၢၤတၢ်သိၣ်တၢ်သီတခါအံၤအဖီခိၣ်မ့ၢ်အပာ်ဖျါထီၣ်၀ဲဒၣ်သုးကရူၢ်အတၢ်အိၣ်သးနီၢ်နီၢ်လီၤအဂ့ၢ်န့ၣ် ခ့ၣ်အဲၣ်ယူၣ်–ကညီဒီကလုာ် စၢဖှိၣ်ကရၢ ကရၢခိၣ် ပဒိၣ်စီၤကွဲၤထူ၀့ စံးလီၤ၀ဲဖဲတနံၤအံၤလါဖ့ၤဘြူၤအါရံၤ ၂၁ သီအနံၤန့ၣ်လီၤႉ ဖဲအပူၤကွံာ်လါဖ့ၤဘြူၤအါရံၤ ၁၀ သီအနံၤန့ၣ် သုးမီၤစိရိၤထုးထီၣ်ဘိးဘၣ်ရၤလီၤ၀ဲဒၣ်လၢကီၢ်ပယီၤအပူၤ သးစၢ်ပိာ်ခွါ(၁၈–၃၅),ပိာ်မုၣ်(၁၈–၂၇)တဖၣ်ကဘၣ်နုာ်လီၤမၤတၢ်လၢသုးကျါဒီးသုးကီၣ်ကးထုးထီၣ်သဲစး ပာ်ဂၢၢ်ပာ်ကျၢၤ၀ဲအဖီခိၣ်အံၤမ့ၢ်အ၀ဲသ့ၣ်ပာ်ဖျါထီၣ်၀ဲသုးကရူၢ်အတၢ်အိၣ်သးနီၢ်နီၢ်လီၤအဂ့ၢ်န့ၣ် ခ့ၣ်အဲၣ်ယူၣ် ကရၢခိၣ် စံးလီၤ၀ဲလၢခ့ၣ်အဲၣ်ယူၣ်လီၢ်ခၢၣ်သးအ(ဖ့းစ်ဘူး)ပူၤန့ၣ်လီၤႉ ခ့ၣ်အဲၣ်ယူၣ် ကရၢခိၣ် ပဒိၣ်စီၤကွဲၤထူ၀့ စံး၀ဲလၢ“ လီၤဆီဒၣ်တၢ်ဖဲအပူၤကွံာ်စှၤသီအတီၢ်ပူၤန့ၣ်သုးကီၣ်ကးထုးထီၣ် ၀ဲဒၣ်သဲးစးပတဲအီၤလၢ(ထံဖိကီၢ်ဖိကဘၣ်ကဲသုး)အသဲစးတၢ်ထုးထီၣ်တၢ်သိၣ်တၢ်သီတခါအံၤဒီးတၢ်ပာ်ဂၢၢ်ပာ် ကျၢၤတၢ်သိၣ်တၢ်သီတခါအံၤအဖီခိၣ်မ့ၢ်တၢ်ဂ့ၢ်တခါလၢအပာ်ဖျါထီၣ်၀ဲဒၣ်သုးကရူၢ်အံၤအတၢ်အိၣ်သးနီၢ်နီၢ်န့ၣ်လီၤႉ ဒ်ပစံးတၢ်အသိးတၢ်သိၣ်တၢ်သီတခါအံၤတၢ်ကွဲးပာ်လီၤအီၤလၢ(၂၀၁၀)လါနိၣ်၀့ဘၢၣ် ၄ သီ လၢအပူၤကွံာ် သုးခိၣ်ကျၢၢ် အူသါစွ့ၣ်န့ၣ်လီၤႉ သနါက့တၢ်ပာ်ဂၢၢ်ပာ်ကျၢၤအီၤလၢဆၢကတီၢ်ခဲအံၤန့ၣ်မ့ၢ်လၢမနုၤအဃိလဲၣ်န့ၣ် အလီၢ်အိၣ်လၢ ပကဘၣ်သမံသမိးပဲာ်ထံနီၤဖးအီၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါခီဖျိသုးဟံးန့ၢ်တၢ်စိတၢ်ကမီၤအဖီခိၣ်ထံဖိကီၢ်ဖိကမျၢၢ်တဖၣ်အတၢ်နာ်အီၣ်အတၢ်ပာ်ဂံၢ်ပာ်ဘါ သုးကီၣ်ကးတအိၣ်လၢၤဘၣ်တကးဒံးဘၣ်ခီဖျိၦၤကမျၢၢ်ထီဒါအ၀ဲသ့ၣ်အါထီၣ်အသုးဂံၢ်ဘါလီၤစှၤအဃိဘၣ်ထုးထီၣ်၀ဲဒၣ်တၢ်သိၣ်တၢ်သီတၢ်ဘျၢသဲးစးအံၤလီၤဒီးဒ်န့ၣ်အသိးသုးကီၣ်ကးအံၤလၢအကရၢကရိထီၣ်က့ၤအသုးအဂီၢ် တမ့ၢ်တၢ်ညီလၢၤဘၣ်အဂ့ၢ်န့ၣ် ပဒိၣ်စီၤကွဲၤထူ၀့ စံးအါထီၣ်၀ဲဒၣ်န့ၣ်လီၤႉ စးထီၣ်လၢသုးကီၣ်ကးထုးထီၣ်၀ဲဒၣ်“ထံဖိကီၢ်ဖိတၢ်ကဘၣ်မၤသုးသဲးစး”၀ံၤလီၢ်ခံန့ၣ်လီၤဆီဒၣ်တၢ်ကမျၢၢ်သူၣ်ဘီၣ်သးစၢ်မုၣ်ခွါလၢအိၣ်ခူပူၤ၀့ၢ်ပူၤတဖၣ်အိၣ်ဒီးတၢ်ပျံၤတၢ်ဖုးဟးထီၣ်တၢ်ချၢတဘူၣ်လၢၤဘၣ်ဒီးတနီၤန့ၣ်လဲၤစံၣ်ထီၣ်အိၣ်၀ဲဒၣ်လၢထံဆၢကီၢ်ဆၢတၢ်လီၢ်လၢအဂၤသ့ၣ်တဖၣ်အိၣ်၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢတၢ်န့ၣ်အဃိသူၣ်ဘီၣ်သးစၢ်သ့ၣ်တဖၣ်မ့မၤထွဲတၢ်သိၣ်တၢ်သီအံၤကကဲထီၣ်၀ဲဒၣ်တၢ်ကီတၢ်ခဲလၢအ၀ဲသ့ၣ် တၢ်အိၣ်မူတၢ်ကူၣ်ဘၣ်ကူၣ်သ့ႇတၢ်အိၣ်ဆူၣ်အိၣ်ချ့တကပၤသ့၀ဲအဂ့ၢ်န့ၣ် ပဒိၣ်စီၤကွဲၤထူ၀့ စံးအါထီၣ်၀ဲဒၣ် ဒ်အံၤန့ၣ်လီၤႉ အ၀ဲစံး၀ဲလၢ“တၢ်သိၣ်တၢ်သီအံၤတၢ်မ့မၤထွဲအီၤသၢပျၢၤန့ၣ်ကကဲထီၣ်တၢ်ကီတၢ်ခဲလၢၦၤသူၣ်ဘီၣ်သးစၢ်သ့ၣ်တဖၣ်, ၦၤလၢအိၣ်ဒီးဟံၣ်ဃီသ့ၣ်တဖၣ်,အ၀ဲသ့ၣ်အတၢ်အိၣ်မူအတၢ်ကူၣ်ဘၣ်ကူၣ်သ့အတၢ်အိၣ်ဆူၣ်အိၣ်ချ့သ့ၣ်တဖၣ်အဃိသးန့ၣ်အလီၢ်အိၣ်လၢပကဘၣ်ထီဒါသကိးအီၤန့ၣ်လီၤႉသးစၢ်လၢတၢ်ပာ်ပနီၣ်၀ဲလၢကဘၣ်ကဲသုးတဖၣ်န့ၣ်ကဟးဆှဲး၀ဲအဂီၢ်မ့ၢတၢ်လၢအကီလီၤႉကျဲအိၣ်၀ဲဒၣ်တဘိလၢကမၤထွဲအီၤဧါ(မ့တမ့ၢ်)ကထီဒါက့ၤအီၤဧါန့ၣ်လီၤႉယအဲၣ်ဒိဟ့ၣ်ဂံၢ်ဟ့ၣ်ဘါသးစၢ်တဖၣ်လၢပမ့မၤသုးကီၣ်ကးအတၢ်နဲၣ်လီၤတၢ်ဘျၢန့ၣ်မ့ၢ်ပမၤထီထီၣ်အ၀ဲသ့ၣ်သးသမူအဃိကျဲအိၣ်၀ဲ ဒၣ်တဘိလၢ ပကဘၣ်ထီဒါအ၀ဲသ့ၣ်၊ပကဘၣ်ဘၣ်ပာ်ဖှိၣ်ထီၣ်သးဒီးကရူၢ်ကရၢလၢအထီဒါအ၀ဲသ့ၣ်တဖၣ်”အဂ့ၢ်န့ၣ် စံး၀ဲန့ၣ်လီၤႉ တကတီၢ်ဃီသုးကီၣ်ကးအံၤအဂံၢ်အဘါတအိၣ်လၢၤဘၣ်အဃိအတၢ်ထၢဆူၣ်သုးအံၤဒုးနဲၣ်ဒုးပာ်ဖျါ၀ဲဒၣ်လၢ ၦၤကီၢ်ပယီၤထံဖိကီၢ်ဖိဃုာ်ဒီးကလုာ်ဒူၣ်ထံဖိကီၢ်ဖိသ့ၣ်တဖၣ်လၢတၢ်ကဒီသဒၢ၀ဲဒၣ်အတၢ်စိကမီၤကအိၣ်ဂၢၢ်စိး ကျၢၤအဂီၢ်ဒီးသးစၢ်တဖၣ်မ့အိၣ်ဆၢထၢၣ်လၢသုးမီၤစိရိၤအအိၣ်တကပၤန့ၣ်တပူၤဒီးအ၀ဲသ့ၣ်တၢ်ပၢတၢ်ပြးဘၣ်ဒီး (မ့တမ့ၢ်)ကထီဒါမၤကတၢၢ်ကွံာ်သုးမီၤစိရိၤဧါန့ၣ်မ့ၢ်တၢ်လၢပကဘၣ်ဆိကမိၣ်အီၤအဂ့ၢ်န့ၣ် ပဒိၣ်စီၤကွဲၤထူ၀့ စံး၀ဲန့ၣ်လီၤႉ ဒ်န့ၣ်အသိးဘၣ်ဃးသုးကီၣ်ကးထုးထီၣ်“ထံဖိကီၢ်ဖိတၢ်ကဘၣ်မၤသုးသဲးစး”အံၤန့ၣ် ကီၢ်ပယီၤအပူၤသုးမီၤစိရိၤ...
ၦၤကမျၢၢ်လၢအိၣ်ဒီၣ်ဖးခိၣ်၀့ၢ်(ဘယ့ၣ်နီၤ)သုးကလၢၤအခိၣ်အဃၢၤတဖၣ်ပယီၤသုးမၢသုးလီၢ်သုးကျဲလၢခံနွံအတီၢ်ပူၤ
လါဖ့ၤဘြူၤအါရံၤ ၂၀ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ တီအူကီၢ်ရ့ၣ်(သုးက့ ၂)ဒီၣ်ဖးခိၣ်ကီၢ်ဆၣ် လၢဘယ့ၣ်နီၤသုးကလၢၤ အခိၣ်အဃၢၤန့ၣ်တၢ်ကစီၣ်ဟူထီၣ်သါလီၤလၢတၢ်ဒုးကကဲထီၣ်အဃိပယီၤသုးမၢၦၤကမျၢၢ်လၢအိၣ်ဘူးဒီး သုးကလၢၤအံၤ(၂၀၀)မံာ်လးသ့ၣ်တဖၣ်ကသုးလီၢ်သုးကျဲလၢခံနွံအတီၢ်ပူၤအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤ ၦၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤႉ ဖဲပူၤကွံာ်လါဖ့ၤဘြူၤအါရံၤ(၁၈)သီအနံၤန့ၣ် ပယီၤသုးလၢအိၣ်(ဘယ့ၣ်နီၤ)သုးကလၢၤသ့ၣ်တဖၣ်အံၤ ကိးထံၣ်၀ဲ(ဒီၣ်ဖးခိၣ်)၀့ၢ်တၢ်ဘူၣ်တၢ်ဘါခိၣ်နၢ်သ့ၣ်တဖၣ်ဒီးမၢ၀ဲဒၣ်က၀ီၤဒ့ပူၤၦၤကမျၢၢ်လၢအိၣ်ဘူးဖဲသုးကလၢၤအခိၣ်အဃၢၤအံၤတဖၣ်သုးလီၢ်သုးကျဲအဃိဘၣ်သုးလီၢ်လၢတနံၤဃီအတီၢ်ပူၤအဂ့ၢ်န့ၣ် လီၢ်က၀ီၤပိာ်မုၣ်တဂၤ စံး၀ဲဒ်အံၤ န့ၣ်လီၤႉ အ၀ဲစံး၀ဲလၢ “ဖဲမဟါန့ၣ်အ၀ဲသ့ၣ်ကိး၀ဲပသရၣ်ဒိၣ်၀ံၤမၢၦၤသ၀ီဖိသုးကွံာ်သးလီၤႉ တဲ၀ဲလၢတၢ်တၢ်ဘၣ်ယိၣ်အိၣ် မီၤနီၤႇ သုးကီၣ်ကးန့ၣ်နၢ်ဟူ၀ဲလၢတၢ်ပၢၢ်ဆၢသုးပာ်ဖှိၣ်ကဟဲခးအ၀ဲသ့ၣ်(ဘယ့ၣ်နီၤ)သုးကလၢၤအဃိ တၢ်မ့ၢ်ဟဲခးအ၀ဲသ့ၣ်န့ၣ်အ၀ဲသ့ၣ်ကခးလီၤကဒါက့ၤကျိဖးဒိၣ်လီၤႉ အဃိတဲ၀ဲလၢ အ၀ဲသ့ၣ်ဘၣ်ယိၣ်လၢကဘၣ်ဃုာ်ၦၤအိၣ်လၢက၀ီၤဒ့ပူၤတဖၣ်အဃိမၢၦၤသုးလီၢ်သုးကျဲလီၤႉ က၀ီၤဒ့လၢအဘၣ်သုးလီၢ်သုးကျဲန့ၣ်အိၣ်ထဲတဘ့ၣ်လီၤႉ ဖဲမါဟါန့ၣ်အ၀ဲသ့ၣ်ဟးသုးအသးဒီးသိလ့ၣ်ႇ ဆဲးကၢးလၢာ်လံ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ တကီၢ်ခါခဲအံၤၦၤကမျၢၢ်လၢအဘၣ်သုးလီၢ်သုးကျဲသ့ၣ်တဖၣ်အံၤလဲၤအိၣ်ဆိ၀ဲဒၣ်လၢက၀ီၤဒ့အဂၤ လၢအ၀ဲသ့ၣ်အဘူးအတံၢ်အဟံၣ်ဒီးလၢတၢ်ဘူၣ်တၢ်ဘါတၢ်သူၣ်ထီၣ်တဖၣ်အပူၤအဂ့ၢ်န့ၣ် လီၢ်က၀ီၤကမျၢၢ်တဂၤဃီ ၀ဲန့ၣ်စံးအါထီၣ်၀ဲန့ၣ်လီၤႉ (ဘယ့ၣ်နီၤ)သုးကလၢၤလၢအအိၣ်ဆီလီၤသးဖဲ(ဒီဖးခိၣ်)ကီၢ်ဆၣ်အပူၤအံၤ ညီနုၢ်တၢ်ဒုးမ့ၢ်ကဲထီၣ်တဘျီလၢ်လၢ်န့ၣ် အ၀ဲသ့ၣ်က့ၤခးလီၤကဒါကျိဖးဒိၣ်အိၣ်၀ဲအဂ့ၢ်န့ၣ် ဟီၣ်က၀ီၤၦၤဟ့ၣ်တစီၣ်ဖိတဖၣ်စံး၀ဲန့ၣ်လီၤႉ လၢတၢ်န့ၣ်အဃိၦၤကမျၢၢ်လၢအိၣ်၀့ၢ်ပူၤသ့ၣ်တဖၣ်တကီၢ်ခါခဲအံၤတၢ်အိၣ်သးမ့ၢ်ဂၢၢ်ဒံး၀ဲဘၣ်ဆၣ် အ၀ဲသ့ၣ်ပျံၤ၀ဲလၢကျိဖးဒိၣ်ကလီၤတဲာ်ဒီးဘၣ်အိၣ်၀ဲလၢတၢ်ပျံၤတၢ်ဖုးတၢ်ဘၣ်ယိၣ်ဘၣ်ဘှီပူၤအဂ့ၢ်န့ၣ် ဟီၣ်က၀ီၤကမျၢၢ်စံး၀ဲန့ၣ်လီၤႉ လီၢ်က၀ီၤကမျၢၢ်တဂၤစံး၀ဲလၢ “ၦၤလၢအဘၣ်သုးလီၢ်သုးကျဲတဖၣ်န့ၣ်လၢက၀ီၤဒ့ဖဲအံၤခီန့ၣ်အဘူးအတံၢ်အိၣ်အဃိလဲၤအိၣ်၀ဲဖဲန့ၣ်မီၤနီၤႉ တနီၤခီန့ၣ်လဲၤအိၣ်၀ဲဒၣ်လၢတၢ်ဘါယွၤသရိာ်လီၤႉ ပ၀ဲဒၣ်နါက့ပဘၣ်အိၣ်ဒ်အံၤလီၤႇ မ့ၢ်ကျိဖးဒိၣ်ကလီၤတဲာ်လၢပအိၣ်ဆံးယံာ်လဲၣ်န့ၣ်ပတသ့ၣ်ညါဘၣ်”အဂ့ၢ်န့ၣ် စံး၀ဲဒၣ်န့ၣ်လီၤႉ ဒ်န့ၣ်အသိးက၀ီၤဒ့ဒီးဒူသ၀ီလၢအိၣ်ဘူးဖဲ(ဘယ့ၣ်နီၤ)သုးကလၢၤအံၤတဖၣ်တၢ်ဒုးကဲထီၣ်သးတအိၣ်ဘၣ်ဘၣ်ဆၣ် တဘျီတခီၣ်န့ၣ်ပယီၤသုးခးပိၢ်ထီၣ်ကျိဖိႇ ခးလီၤကျိဖးဒိၣ်အိၣ်၀ဲဒီးတကးဒံးဘၣ်ပယီၤသုးအံၤလၢအ၀ဲသ့ၣ် တၢ်ဘံၣ်တၢ်ဘၢအဂီၢ်လ့ၢ်ထီၣ်လ့ၢ်လိၤအခါတသူ၀ဲသုးသိလ့ၣ်ဘၣ်မ့မ့ၢ်တခီသူက့ၤ၀ဲလၢကမျၢၢ်သိလ့ၣ်အဂ့ၢ်န့ၣ် လီၢ်က၀ီၤဖိစံး၀ဲအသိးသ့ၣ်ညါဘၣ်န့ၣ်လီၤႉ ဖဲပူၤကွံာ်(၂၀၂၃)လါအီးကူးအခါန့ၣ်စ့ၢ်ကီးခီဖျိ(ဘယ့ၣ်နီၤ)သုးကလၢၤအံၤခးလီၤ၀ဲကျိဖးဒိၣ်ဆူက၀ီၤဒ့၀့ၢ်ပူၤအဃိ က၀ီၤဒ့(၁)အပူၤ ၦၤကမျၢၢ်ဟံၣ်ဟးဂီၤဒံး၀ဲဒၣ်(၃)ဖျၢၣ်န့ၣ်လီၤႉ
တၢ်ပၢၢ်ဆၢကမၤနၢၤတၢ်ချ့ချ့အဂီၢ်ကလံၤစိး((KNLA) သုးက့ ၄ ဘ့ၣ်ပာ်ဖှိၣ်မၤ၀ဲ(Campaign)တၢ်ဟူးတၢ်ဂဲၤတခါ
လါဖ့ၤဘြူၤအါရံၤ ၂၀ သီႇ ၂၀၂၄ နံၣ်ႇ ခ့ၣ်အဲးစံၣ် (Campaign) (KNLA) ကညီကလုာ်တၢ်ပၢၢ်ဆၢအံၤယံၤတ့ၢ်၀ဲ(၇၅)နံၣ်လံအဃိဒ်သိးတၢ်ပၢၢ်ကမၤနၢၤတၢ်ချ့ချ့အဂီၢ်ကလံၤစိးကညီဒီကလုာ်တၢ်ထူၣ်ဖျဲးသုးမုၢ်ဒိၣ်() သုးက့(၄)ဘ့ၣ်ပာ်ဖှိၣ်မၤ၀ဲ(Campaign)တၢ်ဟူးတၢ်ဂဲၤတခါအဂ့ၢ်န့ၣ် ခ့ၣ်အဲၣ်ယူၣ် သုးက့(၂)သုးက့ခိၣ် သုးခိၣ်ကျၢၢ်ဖိ စီၤအီကၢးစတံ စံးလီၤ၀ဲဖဲတနံၤအံၤလါဖ့ၤဘြူၤအါရံၤ(၂၀)သီအနံၤ န့ၣ်လီၤႉ တၢ်မၤ၀ဲ(Campaign)တၢ်ဟူးတၢ်ဂဲၤတခါအံၤန့ၣ်မ့ၢ်၀ဲတၢ်အဆိကတၢၢ်တဘျီလၢကလံၤစိးကညီဒီကလုာ်တၢ်ထူၣ်ဖျဲးသုးမုၢ်ဒိၣ်သုးက့(၄)ဘ့ၣ်ပာ်ဖှိၣ်မၤသကိး၀ဲဒီးဒ်သိးသုးဂ့ၢ်၀ီတၢ်ဟူးတၢ်ဂဲၤကလဲၤသးချ့ချ့အဂီၢ်လိၣ်ဘၣ်၀ဲဒၣ်ကမျၢၢ်ထံဖိကီၢ်ဖိအတၢ်ဆီၣ်ထွဲမၤစၢၤနီၢ််နီၢ်အဂ့ၢ်န့ၣ် သုးက့(၂)သုးက့ခိၣ် သုးခိၣ်ကျၢၢ်ဖိ(စီၤအီကၢးစတံ)စံး၀ဲဒ်အံၤန့ၣ်လီၤႉ “ဒ်သိးပတၢ်ပၢၢ်ဆၢတၢ်မၤနၢၤကလဲၤအသးချ့ချ့အဂီၢ်ပလိၣ်ဘၣ်၀ဲဒၣ်ထံဖိကီၢ်ဖိအတၢ်ဆီၣ်ထွဲၦၤသၦၢ်ကတၢၢ်လီၤႉ လၢတၢ်န့ၣ်အဃိပစးထီၣ်မၤ၀ဲတၢ်ရိၣ်ဖှိၣ်ဟ့ၣ်တၢ်သ့ၣ်ညါနၢ်ပၢၢ်(Campaign)လၢကလံၤစိးသုးက့(၄)ဘ့ၣ်လၢအမ့ၢ်၀ဲ သုးက့ ၁ႇ သုးက့ ၂ႇ သုးက့ ၃ ဒီး သုးက့ ၅ သ့ၣ်တဖၣ်န့ၣ်လီၤႉ ဒီးသုကပာ်ဖှိၣ်ထီၣ်သုသးဒီးပ၀ဲဒၣ် ဃူဃူ ဒ်သိးပကတုၤဆူတၢ်မၤနၢၤခ့ချျ့ကသ့အဂီၢ်လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤႉ လၢန့ၣ်အမဲာ်ညါသုးဟံးန့ၢ်ထံကီၢ်တၢ်စိတၢ်ကမီၤ၀ံၤလီၢ်ခံကမျၢၢ်ထံဖိကီၢ်ဖိတနီၤက့ၤထီဒါက့ၤအီၤအဖီခိၣ် သုးမီၤစိရိၤအံၤသူ၀ဲဒၣ်တၢ်စုဆူၣ်ခီၣ်တကးအဃိကမျၢၢ်တဖၣ်ဟဲဃ့ၢ်အိၣ်ကဒုသးလၢ(ခ့ၣ်အဲၣ်ယူၣ်)ဟီၣ်က၀ီၤပူၤဒီး ဒ်န့ၣ်အသိးလၢကဒုးဖျိးထီၣ်ကွံာ်သုးမီၤစိရိၤအံၤအဂီၢ်ၦၤလၢအဟဲဃ့ၢ်ထီၣ်တဖၣ်တၢ်ဟ့ၣ်အ၀ဲသ့ၣ်လၢသုးတၢ်သ့တၢ်ဘၣ်အိၣ်၀ဲ(၂၀၀၀၀)ဂၤဃၣ်ဃၣ်အဂ့ၢ်န့ၣ် (သုးက့ ၂) သုးက့ခိၣ် စံးအါထီၣ်၀ဲဒၣ်န့ၣ်လီၤႉ တၢ်မၤ၀ဲ(Campaign)တၢ်ဟူးတၢ်ဂဲၤတခါအံၤအတၢ်ပညိၣ်န့ၣ်မ့ၢ်၀ဲလၢတၢ်ကထီၣ်ဒုးသဘှံး၀ဲဒုၣ်ဒါသ့ၣ်တဖၣ်အဂီၢ်ႇ သုးမုၢ်သံၣ်ဘိတၢ်ဘၣ်ဒိဘၣ်ထံးကလီၤစှၤအဂီၢ်ဒီးလၢတၢ်သူ၀ဲကျိချံၦာ်သၣ်ဃုာ်ဒီး(ဒြိ)သ့ၣ်တဖၣ်ကန့ၢ်အါထီၣ်၀ဲဒၣ် အဂီၢ်အဂ့ၢ်န့ၣ် (Campaign) သီသံၣ်ခိၣ်ထုးထီၣ်ပာ်ဖျါ၀ဲလၢအ(ဖ့းစ်ဘူး)ပူၤအသိးသ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါကလံၤစိးကညီဒီကလုာ်တၢ်ထူၣ်ဖျဲးသုးမုၢ်ဒိၣ်သုးက့(၄)ဘ့ၣ်အံၤထီၣ်ဒုးရှဲပျီကွံာ်ဒုၣ်ဒါသုးကလၢၤ လၢအိၣ်ဃိာ်လိာ်နံၤတဖၣ်ခဲလၢာ်ဃၣ်ဃၣ်လံဒီးဒ်န့ၣ်အသိးတၢ်ပၢၢ်ဆၢတၢ်မၤနၢၤကလဲၤသး ချ့ချ့အဂီၢ် လိၣ်ဘၣ်၀ဲစ့ၢ်ကီး၀ဲထံဖိကီၢ်ဖိကမျၢၢ်သ့ၣ်တဖၣ်အတၢ်ဆီၣ်ထွဲမၤစၢၤအဂ့ၢ်န့ၣ် ခ့ၣ်အဲၣ်ယူၣ် သုးက့(၂)သုးက့ခိၣ် စံးအါထီၣ်၀ဲဒၣ်န့ၣ်လီၤႉ ဒ်န့ၣ်အသိး(Campaign)တၢ်ဟူးတၢ်ဂဲၤဘျီ၀ဲအံၤမ့ၢ်တၢ်အဆိကတၢၢ်တဘျီလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) စးထီၣ်ဟူးဂဲၤမၤ၀ဲဒီး(Campaign) အံၤတၢ်ကစးထီၣ်အီၤဖဲတနံၤအံၤလါဖ့ၤဘြူၤအါရံၤ(၂၀)သီအနံၤ တၢ်ပာ်ပနီၣ်တၢ်ဆၢကတီၢ်လၢ(၃၀)သီအတီၢ်ပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကီၢ်ပယီၤဖိလၢအဟဲနုာ်ကီၢ်ကၠီၣ်တဲၣ်ပူၤလၢတဖိးသဲးစးဘၣ်တဖၣ်တၢ်ကဟံ၀ဲအရ့အဂ့ၢ် ကၠီၣ်တဲၣ်ကိတိာ်ခိၣ်ကျၢၢ်စံး၀ဲ
လါဖ့ၤဘြူၤအါရံၤ ၂၀ သီႇ ၂၀၂၄နံၣ်ႇ ခ့ၣ်အဲးစံၣ်ႇ သုးကီၣ်ကးထုးထီၣ်၀ဲ“ထံဖိကီၢ်ဖိတၢ်ဘၣ်မၤသုးသဲစး”တၢ်သိၣ်တၢ်သီတၢ်ဘျၢအဖီခိၣ်ၦၤကီၢ်ပယီၤဖိလၢအလဲၤနုာ်လီၤစံၣ်အိၣ်ကဒုသးလၢကၠီၣ်တဲၣ်ပူၤလၢတဖိးသဲစးဘၣ်တဖၣ်တၢ်ကဟံအ၀ဲသ့ၣ်အရ့တုၤလီၤတီၤလီၤအဂ့ၢ်န့ၣ် ကၠီၣ်တဲၣ်ၦၤဘၣ်မူဘၣ်ဒါစံးလီၤ၀ဲဖဲမဟါလါဖ့ၤဘြူၤအါရံၤ(၁၉)သီအနံၤန့ၣ်လီၤႉ ကီၢ်ပယီၤပူၤသုးကီၣ်ကးဘိးဘၣ်ရၤလီၤ၀ဲလၢလါလၢကဟဲလါအ့ဖြ့ၣ်န့ၣ်ကစးထီၣ်ထၢ၀ဲထံဖိကီၢ်ဖိကမျၢၢ်လၢ တၢ်ပာ်ပနီၣ်သးနံၣ်လၢကဘၣ်နုာ်လီၤသုးပူၤ၀ံၤလီၢ်ခံအါဒၣ်တက့ၢ်သးစၢ်တဖၣ်လဲၤမၤ၀ဲကၠီၣ်တဲၣ်လံာ်ခီကီၢ် အိၣ်၀ဲအါမးဒီးလၢတၢ်န့ၣ်အဃိၦၤလၢအဟဲနုာ်လီၤလၢကၠီၣ်တဲၣ်ပူၤလၢတဖိးသဲစးဘၣ်တဖၣ်တၢ်ကဟံအရ့ အဂ့ၢ်န့ၣ် ကၠီၣ်တဲၣ်ကိတိာ်ခိၣ်ကျၢၢၢ် Mr.Srettha Thavisin စံးလီၤ၀ဲလၢ Bangkok-Post တၢ်ကစီၣ်ပူၤဒ်အံၤန့ၣ်လီၤႉ အ၀ဲစံး၀ဲလၢ“ၦၤကီၢ်ပယီၤဖိလၢအဟဲနုာ်အိၣ်ကဒုလၢကၠီၣ်တဲၣ်ပူၤလၢအဖိးသဲစးတဖၣ်ဒုပတူၢ်လိာ်အီၤမုာ်မုာ်လီၤႇ ဘၣ်ဆၣ်သနာ်က့ၦၤလၢအဟဲနုာ်လၢတဖိးသဲစးဘၣ်တဖၣ်ဒုပကဘၣ်ဟံအ၀ဲသ့ၣ်အရ့မီၤနီၤႇအဃိန့ၣ်လၢတၢ်ဂ့ၢ်အ၀ဲအံၤအဖီခိၣ်ပတဲသကိးတၢ်ဒီး( Agency)ဘံၣ်ဘၢခိၣ်နၢ်တဖၣ်၀ံၤလံ”အဂ့ၢ်န့ၣ် Mr.Srettha Thavisin စံး၀ဲန့ၣ်လီၤႉ လၢန့ၣ်အမဲာ်ညါကၠီၣ်တဲၣ်ထံဖိကီၢ်ဖိဘၣ်ယိၣ်ဘၣ်ဘှီလၢၦၤကီၢ်ပယီၤဖိလၢအဟဲနုာ်လီၤအိၣ်လၢကၠီၣ်တဲၣ် ပူၤတဖၣ် ကဂုာ်န့ၢ်ကွံာ်မုၢ်ကျိၤ၀ဲၤကွာ်တၢ်ဖံးတၢ်မၤဒီးလၢတၢ်ဂ့ၢ်အံၤအဖီခိၣ် ကၠီၣ်တဲၣ်ကိာ်တိာ်ခိၣ်ကျၢၢ် (Mr.Srettha Thavisin) ကကျဲးစၢးဘှါဆှဲ၀ဲန့ၣ်လီၤႉဒ်န့ၣ်အသိးလၢကီၢ်ကၠီၣ်တဲၣ်အပူၤတၢ်ဖံးတၢ်မၤလီၤဟိဒံး၀ဲ(၁)မျးကယၤဆူဖီလာ်အဃိ လိၣ်ဘၣ်ဒံး၀ဲခိၣ်ဃၢၤထံကီၢ်ၦၤမၤတၢ်ဖိဒီးၦၤလၢအကဟဲနုာ်လီၤတဖၣ်ကဘၣ်အိၣ်စိာ်၀ဲလံာ်လဲၢ်လၢအဖိးသဲးစး အဂ့ၢ်န့ၣ် Mr.Srettha Thavisin စံးအါထီၣ်၀ဲဒၣ်န့ၣ်လီၤႉ ခီဖျိသးစၢ်တဖၣ်တတူၢ်လိာ်၀ဲ“ထံဖိကီၢ်ဖိတၢ်ဘၣ်မၤသုးသဲစး”တၢ်ဘျၢဘၣ်အဃိအ၀ဲသ့ၣ်ပာ်ဂံၢ်ပာ်ဘါ၀ဲခိၣ်ဃၢၤ ထံကီၢ်ႇဂုၢ်ကျဲးစၢးဟးစံၣ်အိၣ်ခူသူၣ်အိၣ်၀ဲဒီးတကးဒံးဘၣ်ကဟးအိၣ်လၢၦၤထံၦၤကီၢ်အဂီၢ်တၢ်ဂ့ၢ်ကီအိၣ်ထီၣ်၀ဲအ ကလုာ်ကလုာ်လၢကမၤလံာ်ဖိးသဲစးအံၤအဃိၦၤလၢအစံၣ်ထီၣ်တဖၣ်ကြၢးဖီၣ်လိာ်စုဒီးတၢ်ကရၢကရိလၢအဘူးသ့ၣ်တဖၣ်အဂ့ၢ်န့ၣ် ၦၤမၤစၢၤခီကီၢ်ၦၤမၤတၢ်ဖိကရူၢ် YongChiOo အူမိကၠီၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“သးစၢ်တဖၣ်အံၤကလဲၤအိၣ်ကဒုလၢကၠီၣ်တဲၣ်ပူၤတကပၤသနာ်က့ကဘၣ်မၤ၀ဲလံာ်လဲၢ်လၢ အဖိးသဲးစး ဒ်အမ့ၢ် (CI) (PICK Card) (VISA)တဖၣ်အဂီၢ် တၢ်ကီတၢ်ခဲအိၣ်၀ဲအကလုာ်ကလုာ်လီၤမီၤနီၤႉ ဒီးဖဲအ၀ဲသ့ၣ်မၤတၢ်သ့ၣ်တဖၣ်အံၤအဆၢကတီၢ်န့ၣ်ကဘၣ်ကဲသုးသးနံၣ်န့ၣ်ဖျါထီၣ်၀ဲစ့ၢ်ကီးအဃိဒ်လဲၣ်ဂ့ၤဒ်လဲၣ်ဂ့ၤ အ၀ဲသ့ၣ်ကဟးစံၣ်ပူၤဖျဲးသးအဂီၢ်တမ့ၢ်တၢ်ညီဘၣ်ႇအဃိန့ၣ်ယအဲၣ်ဒိးဟ့ၣ်ကူၣ်သးစၢ်သ့ၣ်တဖၣ်ဆၢကတီၢ်ခဲအံၤန့ၣ် ကြၢးဖီၣ်လိာ်စုဒီးတၢ်ကရၢကရိလၢအိၣ်ဘူးတဖၣ်၀ံၤမးဟဲအိၣ်ကဒုဆိသးလၢကီၢ်ဆၢတၢ်လီၢ်လၢအဘံၣ်အဘၢတလိၣ်လိၣ်မီၤနီၤႉ” ...