ဒီၣ်ဖးခိၣ်ကလံၤစိး(ကၤလၣ်)သ၀ီပူၤပယီၤသုးဒွဲၣ်အူအီၣ်ကမျၢၢ်ဟံၣ်(၅၇)ဖျၢၣ်ဒီးကမျၢၢ်သံခံဂၤ
လါဖ့ၤဘြူၤအါရံၤ ၁၃ သီႇ ၂၀၂၄ နံၣ်ႇ ခ့ၣ်အဲးစံၣ် လၢပကိကီၢ်ခီဒိၣ်မုၢ်ထီၣ် တီအူကီၢ်ရ့ၣ် ဒီၣ်ဖးခိၣ်ကီၢ်ဆၣ်ကလံၤစိး ကလၣ်သ၀ီဒီးကၠါကၢသ၀ီအပူၤ တၢ်ဒုးကဲထီၣ်လၢခံခီခံကပၤအဘၢၣ်စၢၤ၀ံၤလီၢ်ခံဖဲလါဖ့ၤဘြူၤအါရံၤ(၁၀)သီအနံၤန့ၣ်ပယီၤသုးနုာ်လီၤဒွဲၣ်အူအီၣ်၀ဲ (ကၢလၣ်)သ၀ီပူၤၦၤကမျၢၢ်အဟံၣ်(၅၇)ဖျၢၣ်ဒီးကမျၢၢ်သံ၀ဲဒၣ်(၂)ဂၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ဖဲလါဖ့ၤဘြူၤအါရံၤ(၈)သီတုၤလၢ(၁၀)သီဟါခီအဆၢကတီၢ်န့ၣ် တၢ်ခးလိာ်သးကဲထီၣ်၀ဲလၢကညီဒီကလုာ် တၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးကီၣ်ကးအဘၢၣ်စၢၤအံၤ၀ံၤလီၢ်ခံပယီၤမၤအါထီၣ်ဂံၢ်ဘါဒီးနုာ်လီၤ၀ဲလၢ (ကၤလၣ်)သ၀ီပူၤ၀ံၤဒွဲၣ်အူကွံာ်၀ဲကမျၢၢ်ဟံၣ်ဃီဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ လီၢ်က၀ီၤကမျၢၢ်တဂၤစံး၀ဲလၢ“တၢ်ခးလိာ်သးန့ၣ်၀ံၤ၀ဲဖဲဟါခီတၢ်ခံးလီၤန့ၣ်ပယီၤသုး(စ့ၣ်ကူၤ)ဟဲတုၤ၀ဲလီၤႉ အ၀ဲသ့ၣ်ဟးလူၤပာ်ဖှိၣ်က့ၤအၦၤလၢဘၣ်ဒိတဖၣ်န့ၣ်ဒီးနုာ်လီၤဒွဲၣ်အူအီၣ်ၦၤဟံၣ်လၢသ၀ီပူၤလီၤႉ သ၀ီအပူၤဟံၣ်အိၣ်၀ဲ(၉၀)ဘျဲၣ်န့ၣ်ဒွဲၣ်အူ၀ဲခဲလၢာ်ႉဟံၣ်လၢအဟးဂီၤလီၤကရဲခဲလၢာ်န့ၣ်အိၣ်၀ဲ(၅၇)ဖျၢၣ်၊တနီၤန့ၣ်အူအီၣ်တစဲးတမွဲၤလီၤႉ လၢအတအူအီၣ်ညါန့ၣ်တအူအီၣ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ခီဖျိတၢ်ဒုးကဲထီၣ်သတူၢ်ကလာ်လၢကညီဒီကလုာ်တၢ်ပၢၢ်ဆၢသုးပာ်ဖှိၣ်ဒီးပယီၤသုးကျိၤလၢဟဲနုာ်လီၤသ့ၣ်တဖၣ်အံၤအဘၢၣ်စၢၤအဃိကမျၢၢ်လၢအိၣ်သ၀ီပူၤတဖၣ်ဃ့ၢ်ထီၣ်၀ဲဒီးဒ်န့ၣ်အသိးဖံသးၦၢ်လၢအိၣ်တ့ၢ်ဟံၣ်ပူၤတဂၤပၣ်ဃုာ်၀ဲလၢမ့ၣ်အူကျါအဃိသံ၀ဲဒၣ်န့ၣ်လီၤႉလၢန့ၣ်အမဲာ်ညါတၢ်တနံၤဃီ၀ဲန့ၣ်ပယီၤသုးက့ၤကိး၀ဲတၢ်ၦၤသ၀ီဖိပိာ်ခွါတဂၤလၢကဒုးနဲၣ်ပၠးကျဲအဂီၢ်ဒီးအ၀ဲစ့ၢ်ကီးဖဲတၢ်ဒုးကဲထီၣ်အကတီၢ်သံ၀ဲလၢတၢ်ဒုးအဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ် စံးအါထီၣ်၀ဲဒၣ်န့ၣ်လီၤႉ အ၀ဲစံး၀ဲလၢ“တၢ်ခးလိာ်သးကဲထီၣ်သတူၢ်ကလာ်အဃိၦၤသ၀ီဖိဘၣ်ဃ့ၢ်ထီၣ်၀ဲတဘျီဃီလီၤႉ ဖံလၢအပၣ်ဃုာ်လၢမ့ၣ်အူကျါတဂၤန့ၣ်အဘၣ်ကလံၤမီၤႉအဟံၣ်ဖိဃီဖိခီန့ၣ်ဆိကမိၣ်၀ဲလၢပယီၤသုးတဒွဲၣ်အူအီၣ်ဟံၣ်ဘၣ်အဃိ ပံာ်ဃာ်၀ဲဟံၣ်ဒီးပာ်တ့ၢ်ကွံာ်၀ဲဟံၣ်ပူၤဒ်န့ၣ်အဃိပၣ်ဃုာ်၀ဲလၢမ့ၣ်အူကျါလီၤ”အဂ့ၢ်န့ၣ် စံး၀ဲန့ၣ်လီၤႉ ပယီၤသုးဒွဲၣ်အူအီၣ်ၦၤကမျၢၢ်အဟံၣ်အဃီဘျီ၀ဲအံၤအပူၤန့ၣ်ၦၤကမျၢၢ်တၢ်ဘၣ်ဒိဘၣ်ထံးတအိၣ်ဘၣ်ဘၣ်ဆၣ်ခီဖျိလၢတၢ်ဒုးကဲထီၣ်အဃိတုၤလၢခဲအံၤၦၤကမျၢၢ်တဖၣ်ဘၣ်လဲၤစံၣ်အိၣ်လၢ၀့ၢ်ပူၤဒီးသ၀ီလၢအဂၤအဂ့ၢ်န့ၣ် လီၢ်က၀ီၤကမျၢၢ်စံး၀ဲဒၣ်န့ၣ်လီၤႉ ဖဲပူၤကွံာ်လါဖ့ၤဘြူၤအါရံၤအခါန့ၣ်ခီဖျိပယီၤသုးအံၤလိာ်ဘၢလိာ်ကွီၢ်၀ဲတီအူကီၢ်ရ့ၣ် ယ့တၤစှ့ၤကီၢ်ဆၣ်ဒီးထီတထူၣ်ကီၢ်ဆၣ်ပူၤ(ကယါပၠိခၠီ)(ဆါပၠိခၠီ)(မယိခိၤ)(သဖၢစ့ၤ)သ၀ီဖိသ့ၣ်တဖၣ်အံၤလၢအတၢ်ဘၣ်ဘျးစဲလိာ်သးအိၣ်ဒီးတၢ်ပၢၢ်ဆၢသုးကရူၢ်အဃိဒွဲၣ်အူအီၣ်ကွံာ်၀ဲၦၤကမျၢၢ်အဟံၣ်တစှၤန့ၢ်(၁၀၀)ဖျၢၣ်န့ၣ်လီၤႉ
တၢ်မၤ၀ဲတၢ်သ့ၣ်နီၣ်ဆၢက့ၤပဒိၣ်မါရှါလါဖါစူးကွံာ်သးၦဲၤထီၣ်(၁၆)၀ီတ၀ီဖဲ၀့ၢ်မဲၢ်ဆီး
လါဖ့ၤဘြူၤအါရံၤ ၁၄ သီႇ ၂၀၂၄ နံၣ်ႇ ခ့ၣ်အဲးစံၣ် ဖဲတနံၤအံၤလါဖ့ၤဘြူၤအါရံၤ ၁၄ သီအနံၤန့ၣ် တၢ်မၤ၀ဲတၢ်သ့ၣ်နီၣ်ဆၢက့ၤ ခ့ၣ်အဲၣ်ယူၣ်-ကညီဒီလုာ်စၢဖှိၣ်ကရၢ နဲၣ်ရွဲၣ်ခိၣ်ကျၢၢ်လီၢ်လံၤ ပဒိၣ်မါရှါလါဖါစူာ်ကွံာ်သးၦဲၤထီၣ် ၁၆ ၀ီတ၀ီ တၢ်ရဲၣ်တၢ်ကျဲၤတခါ ဖဲကီၢ်ကၠီၣ်တဲၣ်၀့ၢ်မဲၢ်ဆီးတၢ်လီၢ်တတီၢ်ပူၤန့ၣ်လီၤႉ ဖဲတနံၤအံၤဂီၤခီ ၉ နၣ်ရံၣ်အဆၢကတီၢ်န့ၣ် တၢ်ပၢၢ်ဆၢခိၣ်နၢ်ၦၤမၤသကိးတၢ်ဖိတဖၣ်တီခိၣ်ရိၣ်မဲမၤ၀ဲ တၢ်သ့ၣ်နီၣ်ဆၢက့ၤ(ခ့ၣ်အဲၣ်ယူၣ်) နဲၣ်ရွဲၣ်ခိၣ်ကျၢၢ်လီၢ်လံၤ ပဒိၣ်မါရှါလါဖါ စူးကွံာ်သးၦဲၤထီၣ်၀ဲဒၣ်မုၢ်နံၤအံၤဒီး တၢ်ရဲၣ်တၢ်ကျဲၤအပူၤ ခ့ၣ်အဲၣ်ယူၣ် နဲၣ်ရွဲၣ်ခိၣ်ကျၢၢ်သဃဲၤ- ၂ ပဒိၣ်စီၤလၣ်ထိႇ လီၢ်ခၢၣ်သးထီဘိကမံးတံာ် ပဒိၣ်စီၤသမ့ၤထိ ဟဲထီၣ်စံးကတိၤလီၤတၢ်လၢ(အီၤလါ)ပူၤန့ၣ်လီၤႉ ဘၣ်ဃးတၢ်မၤလၤကပီၤ၀ဲမုၢ်နံၤအံၤအဖီခိၣ်မ့ၢ်တၢ်ပာ်ကဖၢလၢသးတခါဒီးခိၣ်နၢ်လၢအစူးကွံာ်သးသ့ၣ်တဖၣ်အံၤပၦၤကလုာ်ပာ်လုၢ်ပာ်ၦ့ၤမၤလၤကပီၤ၀ဲခိၣ်နၢ်သ့ၣ်တဖၣ်အံၤအမဲာ်ညါဆဲးဂဲၤလိာ်ဒံးတၢ်လၢၦၤကလုာ်အဂီၢ်ဒီး ကလုာ်ဒိၣ်စိသနူကလီၤၦီၢ်ကွံာ်၀ဲအဂီၢ်အဂ့ၢ်န့ၣ် ပဒိၣ်မါရှါလါဖါအဖိခွါဆံး စးလိၣ်ဖါ စံး၀ဲဒ်အံၤန့ၣ်လီၤႉ “ယပာ်ကဖၢလၢသးလၢပၦၤကလုာ်န့ၣ်အခိၣ်အနၢ်လၢအဟ့ၣ်လီၤအသးသ့ၣ်တဖၣ်န့ၣ်တသးပ့ၣ်နီၣ်၀ဲဘၣ်ႇ မ့ၢ်သံဘၣ်ဆၣ်န့ၣ်ပာ်လၤပာ်ကပီၤ၀ဲပာ်လုၢ်ပာ်ၦ့ၤ၀ဲဒီးမၤဖျါထီၣ်ခိၣ်နၢ်သ့ၣ်တဖၣ်န့ၣ်အတၢ်ထံၣ်ဒီးဆဲးမၤဂဲၤလိာ်တၢ်မီၤနီၤႉအဃိန့ၣ်စံးဘျုးဘၣ်ပၦၤကညီဖိခဲလၢာ်ႇပကမျၢၢ်သုးမုၢ်သံဘိခဲလၢာ်လၢအ၀ဲသ့ၣ်ပာ်ဃုာ်ပာ်ဂီၢ်လၢတၢ်မၤလီၤၦီၢ်ကွံာ်သုးမီၤစိရိၤမ့ၢ်ဂ့ၤႇတၢ်မၤလီၤၦီၢ်က့ၤကလုာ်ဒိၣ်စိသနူမ့ၢ်ဂ့ၤႉဒီးမၤဆူၣ်ထီၣ်က့ၤပၦၤတ၀ၢႇ ပၦၤသုးမုၢ်သံၣ်ဘိဒီးၦၤလၢအၣ်ဃုာ်ပၣ်ဂီၢ်သ့ၣ်တဖၣ်ပစံးဘျုးပာ်လုၢ်ပာ်ၦ့ၤပာ်လၤပာ်ကပီၤဘၣ်အ၀ဲသ့ၣ်ခဲလၢာ်လီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢတၢ်မၤ၀ဲတၢ်သ့ၣ်နီၣ်ဆၢက့ၤပဒိၣ်မါရှါလါဖါစူးကွံာ်သးနံၣ်ဆၢက့ၤတၢ်ရဲၣ်တၢ်ကျဲၤအပူၤန့ၣ် တၢ်ဟ့ၣ်ထီၣ်တၢ်ယူးယီၣ်ဆူပဒိၣ်မါရှါလါဖါအအိၣ်ႇ တၢ်ဖးဖျါထီၣ်ထါဒီးတကးဒံးဘၣ်အမဲာ်ညါပဒိၣ်မါရှါအဖိမုၣ်ဖိခွါဃုာ်ဒီးခိၣ်နၢ်လၢအဟဲထီၣ်လၢ(အီၤလါ)ပူၤမ့ၢ်ဂ့ၤႇ ဟဲထီၣ်လၢအနီၢ်ကစၢ်တဖၣ်မ့ၢ်ဂ့ၤကတိၤစံးဘျုးစံးဖှိၣ်လီၤ၀ဲပဒိၣ်မါရှါလါဖါအတၢ်ဖံးတၢ်မၤလၢ အမၤတ့ၢ်၀ဲသ့ၣ်တဖၣ်အဂ့ၢ်အကျိၤန့ၣ်လီၤႉ ဒ်န့ၣ်အသိးစီၤဖိထူလၢအဟဲထီၣ်တၢ်ရဲၣ်တၢ်ကျဲၤအံၤစံး၀ဲလၢ“တနံၤပထံၣ်ဘၣ်ဖုမါရှါအဂံၢ်အဘါၦၤလၢမၤသကိးတ့ၢ်ဘၣ်တၢ်ဒီးအီၤႇ အတံၤသကိးသ့ၣ်တဖၣ်ဒီးအတၢ်ဖံးတၢ်မၤမူဒါအဃိန့ၣ်ပသးမုာ်ႉ မ့ၢ်လၢအ၀ဲဘၣ်တူၢ်သံကွံာ်အသးလၢလါဖ့ၤဘြူၤအါရံၤ(၁၄)သီနံၤအံၤအဃိပကညီဒီကလုာ်သ့ၣ်တဖၣ်သးတမုာ်ဘၣ်ႉဒီးမ့မ့ၢ်လၢပ၀ဲသးစၢ်သ့ၣ်တဖၣ်ပကကွၢ်လိကွၢ်ဒိ၀ဲပခိၣ်နၢ်ပဒိၣ်မါရှါလါဖါအတၢ်ဟ့ၣ်လီၤသးအတၢ်မၤသ့ၣ်တဖၣ်အံၤမီၤနီၤႉပကဘၣ်အဲၣ်လိာ်ပသးႇပကဘၣ်ဟူးဂဲၤမၤတၢ်ဒ်သိးဒီးခိၣ်နၢ်လၢဟ့ၣ်လီၤတ့ၢ်အသွံၣ်အထံးသ့ၣ်တဖၣ်အံၤန့ၣ်ပကက့ၤဟူးဂဲၤမၤတၢ်တုၤအန့ၢ်တစုတက့ၢ်”အဂ့ၢ်နၣ် စံး၀ဲဒၣ်န့ၣ်လီၤႉ တၢ်ရဲၣ်တၢ်ကျဲၤအံၤဘျီ၀ဲအံၤအပူၤန့ၣ်ခ့ၣ်အဲၣ်ယူၣ်ခိၣ်နၢ်ဃုာ်ဒီး တၢ်ပၢၢ်ဆၢသိၣ်မှံၤကရူၢ်ခိၣ်နၢ်ႇ ၦၤဘၣ်မူဘၣ်ဒါဃုာ်ဒီး ပဒိၣ်မါရှါလါဖါအဖိမုၣ်ဖိခွါအဟံၣ်ဖိဃီဖိအတံၤအသကိးႇ ၦၤဟံတၢ်ကစီၣ်ဖိဒီးသူၣ်ဘီၣ်သးစၢ်ပာ်ဖှိၣ်ခဲလၢာ်ဟဲထီၣ်၀ဲဒၣ်တစှၤန့ၢ်(၅၀)ဂၤဘၣ်န့ၣ်လီၤႉ ခ့ၣ်အဲၣ်ယူၣ်နဲၣ်ရွဲၣ်ခိၣ်ကျၢၢ်လီၢ်လံၤပဒိၣ်မါရှါလါဖါအံၤ ဖဲအပူၤကွံာ် ၂၀၀၈ နံၣ် လါဖ့ၤဘြူၤအါရံၤ ၁၄ သီအနံၤန့ၣ်ဘၣ်တၢ်ဟဲကူၣ်မၤသံအီၤလၢအဟံၣ်ကီၢ်ကၠီၣ်တဲၣ်၀့ၢ်မဲၢ်ဆီးပူၤဒီးဒ်န့ၣ်အသိးမ့တုၤဃီၤလၢနံၤ၀ဲအံၤကိးနံၣ်ဒဲးန့ၣ်တၢ်မၤ၀ဲတၢ်သ့ၣ်နီၣ်ဆၢက့ၤမုၢ်နံၤအံၤလၢခ့ၣ်အဲၣ်ယူၣ်တၢ်လီၢ်အါတီၤအပူၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ
KNU စံး၀ဲလၢကပ၁်ဖှိၣ်မၤသကိးတၢ်ဒီးခိၣ်ဃၢၤထံကီၢ်ဒီးကမၤလီၤမၢ်ကွံ၁်တၢ်လံၣ်အီၣ်လီအီၣ်ကျိၣ်စ့တၢ်ဖံးတၢ်မၤ, တၢ်တၤကျိၣ်တၤစ့လီၢ်တဖၣ်
လါဖ့ၤဘြူၤအါရံၤ ၁၄ သီႇ ၂၀၂၄ နံၣ်ႇ ခ့ၣ်အဲးစံၣ် လၢတၢ်ကမၤလီၤမၢ်ကွံာ် တၢ်လံၣ်အီၣ်လီအီၣ် ကျိၣ်စ့အတၢ်ဖံးတၢ်မၤ ဒီး(Casino)တၢ်တၤကျိၣ်တၤစ့လၢအိၣ်ထံဆၢ ကီၢ်ဆၢတဖၣ်အံၤအဂီၢ်ကပာ်ဖှိၣ်မၤသကိးတၢ်ဒီးခိၣ်ဃၢၤထံကီၢ်ဘၣ်ထွဲတဖၣ်အဂ့ၢ်န့ၣ် ခ့ၣ်အဲၣ်ယူၣ်–ကညီဒီကလုာ် စၢဖှိၣ်ကရၢ လီၢ်ခၢၣ်သး ထုးထီၣ်ပာ်ဖျါ၀ဲ ဖဲမဟါလါဖ့ၤဘြူၤအါရံၤ ၁၃ သီ အနံၤန့ၣ် လီၤႉ ဒ်(ခ့ၣ်အဲၣ်ယူၣ်)လီၢ်ခၢၣ်သးလံာ်တၢ်ပာ်ဖျါပူၤပာ်ဖျါ၀ဲအသိးန့ၣ်ကရူၢ်ကရၢလၢအလံၣ်အီၣ်လီအီၣ်ကျိၣ်စ့လၢတဖိးမံသဲစး တဖၣ်ခီဖျိလၢသုးကီၣ်ကးအံၤဒိးန့ၢ်ဘၣ်၀ဲတၢ်ဘၣ်ဘျုးအိၣ်အဃိဟ့ၣ်ဂံၢ်ဟ့ၣ်ဘါဒီသဒၢဖီၣ်ပျံၤလၢတၢ်လီၢ်ခံဒီး တကးဒံးဘၣ်အမဲာ်ညါကဲထီၣ်တၢ်ဂ့ၢ်ကီလၢဟီၣ်က၀ီၤကမျၢၢ်ထံဖိကီၢ်ဖိအဂီၢ်အသိးကဲထီၣ်စ့ၢ်ကီးတၢ်တဂၢၢ်တကျၢၤလၢလီၢ်က၀ီၤခိၣ်ဃၢၤထံကီၢ်တဖၣ်အဂီၢ်အဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ လၢတၢ်ကမၤလီၤမၢ်ကွံာ်(ကၣ်စံၣ်နိၣ်)တၢ်တၤကျိၣ်တၤစ့တၢ်ဖံးတၢ်မၤသ့ၣ်တဖၣ်အံၤအဂီၢ်န့ၣ်တၢ်ကဘၣ်မၤသကိးတၢ်ဒီးထံကီၢ်လၢဘၣ်ထွဲတဖၣ်ဒီး တၢ်ပာ်ဖှိၣ်မၤသကိးအဂံၢ်မ့ဆူၣ်န့ၣ်တၢ်မၤလီၤမၢ်ကွံာ်အီၤညီ၀ဲဒၣ်လီၤအဂ့ၢ်န့ၣ် ပထံၣ်ဘၣ်လၢ ခ့ၣ်အဲၣ်ယူၣ် ၦၤကတိၤတၢ်ပၢ ပဒိၣ်စီၤကျၢၤစ့ စံးဘၣ်၀ါခုၣ်အ(Youtube channel)ဒ်အံၤန့ၣ်လီၤႉ အ၀ဲစံး၀ဲလၢ“တၢ်ကဒုးလီၤၦီၢ်ကွံာ်တၢ်ဖံးတၢ်မၤတၢ်သ့ၣ်တဖၣ်အံၤအဂီၢ်န့ၣ်အိၣ်ဒၣ်လၢတၢ်ကပာ်ဖှိၣ်မၤသကိးတၢ်ဒီးထံကီၢ်လၢအဘၣ်ထွဲသ့ၣ်တဖၣ်မီၤနီၤႉလီၤဆီဒၣ်တၢ်ဒ်ပဘိးဘၣ်ရၤလီၤလၢလံာ်ပူၤအသိးန့ၣ်ပကွဲမုာ်ဘၣ်တရူးပဒိၣ် သ့ၣ်တဖၣ်ဒီး ကီၢ်ကၠီၣ်တဲၣ်ၦၤဘၣ်မူဘၣ်ဒါသ့ၣ်တဖၣ်လၢပကပာ်ဖှိၣ်မၤသကိးမၤလီၤၦီၢ်ကွံာ်အီၤအဂီၢ်န့ၣ်ပ၀ဲဒၣ် (ခ့ၣ်အဲၣ်ယူၣ်) ကွဲမုာ်ဘၣ်တ့ၢ်လံန့ၣ်ပအဲၣ်ဒိးဒုးသ့ၣ်ညါက့ၤလီၤႉအညီတညီအဖီခိၣ်န့ၣ်အိၣ်ဒၣ်တၢ်လၢတၢ်ပာ်ဖှိၣ်မၤသကိးအဂံၢ်မ့ဆူၣ်န့ၣ်တၢ်မၤလီၤၦီၢ်ကွံာ်အီၤညီလီၤမီၤနီၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါ(ကၣ်စံၣ်နိၣ်)တၢ်တၤကျိၣ်တၤစ့အတၢ်ဖံးတၢ်မၤဒီးကရူၢ်ကရၢလၢအလံၣ်အီၣ်လီအီၣ်ကျိၣ်စ့တဖၣ်အံၤ အဟဲလီၤစၢၤ၀ဲဒၣ်လၢသနူအအၢအသီဒီးတၢ်အီၣ်ကဘျံးအီၣ်ကဘျၣ်အတၢ်မၤတဖၣ်လၢကီၢ်ပယီၤပဒိၣ်ပၦၢ်အစိၤဘၣ်အစိၤတကးဒံးဘၣ်တၢ်ဟံးန့ၢ်မူဟံးန့ၢ်ဒါဒီးတၢ်တူၢ်မူတူၢ်ဒါႇသဲစးတၢ်ဒိၣ်စိတအိၣ်ဘၣ်အဃိ ထီဒါ၀ဲတဲာ်တဲာ် ဖျုဖျုဒီးကမၤပျီမၤဆှဲကွံာ်၀ဲအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ ဒ်န့ၣ်အသိးတၢ်တၤကျိၣ်တၤစ့တၢ်ဖံးတၢ်မၤလီၢ်လၢအိၣ်ကညီကီၢ်စဲၣ်ပူၤထံဆၢကီၢ်ဆၢအံၤသ့ၣ်တဖၣ်န့ၣ် ၦၤအါဂၤ ထံၣ်၀ဲလၢ(ခ့ၣ်အဲၣ်ယူၣ်)ခိၣ်နၢ်တနီၤအတၢ်ပၣ်ဃုာ်မၤသကိးတၢ်အိၣ်အဃိလၢတၢ်ဂ့ၢ်အံၤအဖီခိၣ်ဖဲအပူၤကွံာ် ၂၀၂၃ (ခ့ၣ်အဲၣ်ယူၣ်)မၤခီကရဲးတၢ်အိၣ်ဖှိၣ် ၁၇ ၀ီတ၀ီအခါန့ၣ် တၢ်ဆၢတဲာ်လီၤအိၣ်ထီၣ်လၢတၢ်ကဃိထံသမံသမိး ၦၤလၢမံၤဟူလၢတၢ်ဖံးတၢ်မၤအကျါအံၤတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ်(၂၀၁၃–၂၀၁၄)အခါန့ၣ်ကၣ်စံၣ်နိၣ်တၢ်တၤကျိၣ်တၤစ့တၢ်ဖံးတၢ်မၤလီၢ်သ့ၣ်တဖၣ်အံၤစးထီၣ်အိၣ်၀ဲ လၢမၠၣ်၀တံၣ်၀့ၢ်ကပၤအံၤအဆိကတၢၢ်ဒီးဖဲန့ၣ်၀ံၤလီၢ်ခံတရူးထံဖိကီၢ်ဖိတဖၣ်ဟဲဆီလီၤအတၢ်ဖံးတၢ်မၤႇတ့ထီၣ်တၢ်သူၣ်ထီၣ်ႇဘျၢလီၤကျိၣ်စ့ဘၣ်ဃးတၢ်တၤကျိၣ်တၤစ့တၢ်လံၣ်အီၣ်လီအီၣ်ကျိၣ်စ့တၢ်ဖံးတၢ်မၤသ့ၣ်တဖၣ်အံၤလၢသုးခိး ကီၢ်ဆၢ- BGF (စွ့ၤကိၣ်ကိၤ)ဟီၣ်က၀ီၤပူၤဒီးမီထိၣ်တလ့တၢ်လီၢ်သ့ၣ်တဖၣ်အဂ့ၢ်န့ၣ် ခ့ၣ်အဲၣ်ယူၣ် ၦၤဘၣ်မူဘၣ်ဒါ စံး၀ဲအသိး သ့ၣ်ညါဘၣ်န့ၣ်လီၤႉ...
တၢ်ကစီၣ်ဟူထီၣ်လၢဟံၣ်အိၣ်လ့က့ၣ်ကိာ်၀့ၢ်ပူၤတဖၣ်တၢ်ကဒုးအိၣ် (BGF) ဟံၣ်ဖိဃီဖိအဃိ ကမျၢၢ်လၢအဃ့ၢ်ထီၣ်တဖၣ်အိၣ်ဒီးဘၣ်ယိၣ်ဘၣ်ဘှီ
လါဖ့ၤဘြူၤအါရံၤ ၁၃ သီ ၂၀၂၄နံၣ် ခ့ၣ်အဲၣ်စံၣ် ခီဖျိတၢ်ကစီၣ်ဟူထီၣ်လၢဟံၣ်လၢအိၣ်လ့က့ၣ်ကိာ်၀့ၢ်သီပူၤအံၤတဖၣ်တၢ်ကဒုးအိၣ်၀ဲသုးခိးကီၢ်ဆၢ(BGF)ဟံၣ်ဖိဃီဖိ အဃိ ၦၤကမျၢၢ်လၢအိၣ်လ့က့ၣ်ကိာ်၀့ၢ်သီလၢအစံၣ်ထီၣ်သ့ၣ်တဖၣ်အံၤဘၣ်ယိၣ်၀ဲလၢကဘၣ်ဟ့ၣ်ဆှူခီလီအဟံၣ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ လ့က့ၣ်ကိာ်၀့ၢ်သီအံၤခီဖျိက၀ီၤဒ့ခိၣ်နၢ်ဒီးသုးခိးကီၢ်ဆၢ(BGF)ၦၤဘၣ်မူဘၣ်ဒါတဖၣ်စံး၀ဲလၢ ကက့ၤမၤဂ့ၤမၤသီထီၣ်က့ၤ၀ဲလ့က့ၣ်ကိာ်၀့ၢ်သီအံၤအဃိဘၣ်ယိၣ်လၢအ၀ဲသ့ၣ်ဟံၣ်ကဆှူဂီၤကွံာ်အဂ့ၢ်န့ၣ် လ့က့ၣ်ကိာ်က၀ီၤဒ့ပူၤကမျၢၢ်လၢအဃ့ၢ်ထီၣ်တဖၣ်စံး၀ဲန့ၣ်လီၤႉ က၀ီၤဒ့(၆)ကမျၢၢ်တဂၤစံး၀ဲလၢ“ၦၤလၢအက့ၤလၢက၀ီၤဒ့ဖဲန့ၣ်အပူၤတဖၣ်ဟ့ၣ်ၦၤတၢ်ကစီၣ်လၢက၀ီၤဒ့ခိၣ်ဒီး(BGF)ခိၣ်နၢ်တဖၣ်စံး၀ဲလၢဟံၣ်လၢၦၤတက့ၤအိၣ်ဘၣ်တဖၣ်န့ၣ်အ၀ဲသ့ၣ်ကဟ့ၣ်ဒုးအိၣ်၀ဲ(BGF)အဟံၣ်ဖိဃီဖိလၢအိၣ် မၠၣ်၀တံတံၣ်၀့ၢ်ပူၤသ့ၣ်တဖၣ်မီၤနီၤႉတၢ်ဒုးတၢ်ယၤခီမ့ၢ်ကအိၣ်တုၤဆံးယံာ်လဲၣ်ပတသ့ညါဘၣ်အဃိပစံၣ်အိၣ်ကဒုသးဒ်အံၤအဖီခိၣ်အ၀ဲသ့ၣ်မၤ၀ဲဒ်အံၤဒုပဟံၣ်ပဟ့ၣ်အိၣ်ၦၤဂၤတကဲဘၣ်မီၤႉလီၤဂာ်လၢပတက့ၤအိၣ်လၢပဟံၣ်ဘၣ်အဃိ ကဲထီၣ်တၢ်ကမၣ်မီၤနီၤႉအပူၤကွံာ်ဟံၣ်လၢၦၤတက့ၤအိၣ်ဒံးဘၣ်သ့ၣ်တဖၣ်န့ၣ်က၀ီၤဒ့ခိၣ်ဃ့၀ဲတၢ်မၤပျီကရၢၢ်လဲ လၢစ့ယိၤတကထိအဃိပဘၣ်ဟ့ၣ်ဒံးမီၤႉ” အဂ့ၢ်န့ၣ် စံး၀ဲန့ၣ်လီၤႉ တကီၢ်ခါခဲအံၤလၢရၤမတံတကပၤန့ၣ်တၢ်ကစီၣ်ဟူထီၣ်လၢတၢ်ဖ့ၣ်ဆၢအိၣ်ထီၣ်လၢသုးကီၣ်ကးဒီးKNLAတၢ်ပၢၢ်ဆၢသုးပာ်ဖှိၣ်ကရူၢ်အဘၢၣ်စၢၤဒီးတၢ်ကစီၣ်ဟူထီၣ်လၢသုးခိးကီၢ်ဆၢ (BGF)ကဟးထီၣ်ကွံာ်လၢ သုးကီၣ်ကးတၢ်ပၢတၢ်ပြးပူၤအဃိ˜ အဟံၣ်ဖိဃီဖိလၢအိၣ်ရၤမတံ၀့ၢ်ပူၤတဖၣ် ကတဲၤကတီၤထီၣ်သးလၢ ကသုးလီၢ်သုးကျဲဆူလ့က့ၣ်ကိာ်၀့ၢ်သီအဂ့ၢ်န့ၣ်˜ လ့က့ၣ်ကီၣ်ကမျၢၢ်တဂၤစံး၀ဲန့ၣ်လီၤႉ အ၀ဲစံး၀ဲလၢ “လၢညါလ့က့ၣ်ကိာ်သးၦၢ်န့ၣ်ခဲအံၤကဲက့ၤကီၢ်ဆၣ်ခိၣ်လံအဃိအခဲအံၤပယီၤကလုာ်၊က၀ီၤဒ့ခိၣ် တဖၣ်အံၤပာ်ဖှိၣ်မၤသကိးတၢ်ဒီး (BGF)လၢအိၣ်ဖဲက့ၣ်ကိာ်ပၢပြၢးရူတဖၣ်အံၤအဃိ ၦၤတဲတဘူၣ်ဘၣ်ႉ အခဲအံၤဟံၣ်လၢၦၤတဟဲက့ၤအိၣ်ဘၣ်န့ၣ်အိၣ်ဒီဒူၣ်ညါႉဟံၣ်တဖၣ်န့ၣ်ပနၢ်ဟူလၢ(BGF)ဟံၣ်ဖိဃီဖိတဖၣ်ကဟဲအိၣ်မီၤနီၤ” အဂ့ၢ်န့ၣ် ကမျၢၢ်လၢအိၣ်က၀ီၤဒ့(၁)ပူၤတဂၤစံး၀ဲန့ၣ်လီၤႉ ဟံၣ်ဃီလၢအိၣ်လ့က့ၣ်ကိာ်၀့ၢ်သီပူၤသ့ၣ်တဖၣ်အံၤအပူၤကွံာ်(၂၀၁၅)နံၣ်အခါ ခ့ၣ်အဲၣ်ယူၣ်-ကညီဒီလုာ်စၢဖှိၣ်ကရၢ ကရၢခိၣ်လီၢ်လံၤ သုးခိၣ်ကျၢၢ်ဒိၣ်စိ စီၤမူတူစ့ဖိဒီး ကညီကီၢ်စဲၣ်ကိာ်တိာ်ခိၣ်ကျၢၢ်လီၢ်လံၤ အူစီၣ်မ့သ့ၣ်တဖၣ် ဖီၣ်လိာ်စုဒီးလၢယပၣ်နံၣ်ပီဖီၣ်ဒ့ရှၢၣ်အတၢ်ဆီၣ်ထွဲမၤစၢၤအံၤတဆီ တၢ်စးထီၣ်သူၣ်ထီၣ်၀ဲလ့က့ၣ်ကိာ်၀့ၢ်သီအံၤလၢ ခ့ၣ်အဲၣ်ယူၣ်(သုးက့ ၆)ဟံၣ်ဖိဃီဖိအဂီၢ်ဒီးၦၤဃ့ၢ်မှံဟးဖျိး˜ကီၢ်ပယီၤခီကီၢ်ဟံၣ်ဖိဃီဖိကက့ၤအိၣ်၀ဲအဂီၢ်န့ၣ်လီၤႉ ဘၣ်ဃးတၢ်ကစီၣ်ဟူထီၣ်လၢတၢ်ကဒုးအိၣ် (BGF)အဟံၣ်ဖိဃီဖိ လၢလ့က့ၣ်ကိာ်၀့ၢ်သီတၢ်ဂ့ၢ်အံၤန့ၣ် ပဆဲးကျိးသံကွၢ်လ့က့ၣ်ကီၣ်၀့ၢ်သီက၀ီၤဒ့ခိၣ်ဒီးသုးခိးကီၢ်ဆၢ (BGF)ၦၤဘၣ်မူဘၣ်ဒါဘၣ်ဆၣ် ဆဲးကျိးတန့ၢ်၀ဲဘၣ်န့ၣ်လီၤႉ ဘၣ်ဃးတၢ်ဂ့ၢ်အံၤန့ၣ်ဒ်န့ၣ်လ့က့ၣ်ကိာ်က၀ီၤဒ့ခိၣ်ဒီး (BGF)ၦၤဘၣ်မူဘၣ်ဒါတဖၣ် ထုးထီၣ်လံာ်ဒုးသ့ၣ်ညါဟံၣ်ကစၢ်...
ပယီၤသုးကဘီယူၤဟဲတ့ၢ်လီၤကဒီးတၢ်ဘိၣ်လၢတးပီသုးကလၢၤဒီးခးလီၤတၢ်အဃိကမျၢၢ်ဟံၣ်ဟးဂီၤ ၉ ဖျၢၣ်
လါဖ့ၤဘြူၤအါရံၤ ၁၃ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ်အပူၤ ဖဲလါဖ့ၤဘြူၤအါရံၤ ၁၀ သီ အနံၤန့ၣ် ခီဖျိပယီၤသုးကဘီယူၤဟဲတ့ၢ်လီၤကဒီးတၢ်ဘိၣ်လၢတးပီသုးကလၢၤပူၤဒီးခးလီၤစ့ၢ်ကီးတၢ်အဃိ ၦၤသ၀ီဖိဟံၣ်ဟးဂီၤ၀ဲဒၣ်(၉)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ထုးထီၣ်ပာ်ဖျါ၀ဲဖဲမဟါလါဖ့ၤဘြူၤအါရံၤ ၁၂ သီ အနံၤန့ၣ်လီၤႉ ဖဲလါဖ့ၤဘြူၤအါရံၤ ၁၀ သီ မုၢ်ဃ့ၢ်လီၤ ၁း၄၀ မံးနံးဃၣ်ဃၣ်အဆၢကတီၢ်န့ၣ် ပယီၤသုးကဘီယူၤဟဲတ့ၢ်လီၤ၀ဲ တၢ်အီၣ်တၢ်အီအဘိၣ်ဒီးကျိချံၦာ်သၣ်အဘိၣ်သ့ၣ်တဖၣ်လၢတးပီသုးကလၢၤအပူၤဒီးဖဲအတ့ၢ်လီၤတၢ်ဘိၣ်အဆၢ ကတီၢ်ခီဖျိခးလီၤဃုာ်စ့ၢ်ကီး၀ဲစဲးလးအဃိၦၤသ၀ီဖိအဟံၣ်ဘၣ်ဟးဂီၤ၀ဲဒၣ်ဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ် စံး၀ဲန့ၣ် လီၤႉ တးပီသ၀ီဖိတဂၤစံး၀ဲဒၣ်လၢ“စးထီၣ်ခး၀ဲန့ၣ်ဖဲမုၢ်ဃ့ၢ်လီၤ ၁း၃၀ တုၤလၢ ၂ နၣ်ရံၣ်န့ၣ်ပတုာ်သးလီၤႉ အခးတၢ်အခါန့ၣ် ဟဲကွံာ်လီၤ၀ဲဒီးတၢ်ဘိၣ်ႉလၢၦၤဟံၣ်ၦၤဃီဒုဘၣ်အိၣ်ႉဘၣ်နါက့မ့ၣ်အူအီၣ်ထီၣ်ဒုတအိၣ်ဘၣ်ႉဘၣ်၀ဲဒၣ်ဟံၣ်အကပိၤကပၤ,ဟံၣ်ခိၣ်ဟံၣ်အဒုၣ်အဒါအိၣ်တၢ်တဖၣ်န့ၣ်လီၤႉၦၤဟံၣ်ဟးဂီၤဒုအိၣ်တဘျုးဖျၢၣ်ညါႉတၢ်ဘၣ်ဒိဘၣ်ထံးဒုတအိၣ်ဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤလါဖ့ၤဘြူၤအါရံၤ ၁၃ သီ အနံၤ န့ၣ်လီၤႉ ပယီၤသုးကဘီယူၤဟဲတ့ၢ်လီၤတၢ်အီၣ်တၢ်အီႇကျိချံဘိၣ်ဘျီ၀ဲအံၤန့ၣ်တၢ်ပၢၢ်ဆၢသုးကရူၢ်ထၢန့ၢ်၀ဲဒၣ်ကျိချံဒီး ဟုသးဘိၣ်တဖၣ်အိၣ်၀ဲအဂ့ၢ်န့ၣ် (KNDO)သုးရ့ၣ်–၂ သုးရ့ၣ်ခိၣ်-၂ စီၤခၠံးခၠံး စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ကဘီယူၤန့ၣ်အဟဲခးလီၤတၢ်၀ံၤဘျီကွံာ်လီၤတၢ်ဘိၣ်ႉၦၤမၤန့ၢ်ဟုသးခံထၢၣ်ႇပဲဒီးကျိချံတကထိၣ်ဘျဲၣ်ႉ အကွံာ်လီၤတၢ်ဘိၣ်န့ၣ်ကအိၣ်လၢအဘိၣ်တဆံဃၣ်ဃၣ်ညါႉတၢ်မၢၤပတထံၣ်ခဲလၢာ်ဘၣ်ႉပမၤန့ၢ်အ၀ဲသ့ၣ်တၢ်တနီၤ မီၤနီၤႉအ၀ဲသ့ၣ်ကစၢ်နါက့န့ၢ်၀ဲတၢ်ဘိၣ်တနီၤစ့ၢ်ႉပမၤန့ၢ်ကျိချံတဖၣ်န့ၣ်နသူတသ့လၢၤဘၣ်အလီၤတဲာ်တဘှံး တဘှးလၢာ်လံႉနခးမးတန့ၢ်လၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါပယီၤအံၤခးလီၤ၀ဲကျိးဖဒိၣ်လၢသ၀ီပူၤအိၣ်၀ဲကိးမုၢ်နံၤကိးမုၢ်နၤဒဲးဒီး ဒ်န့ၣ်အသိးပယီၤသုးလၢ အိၣ်တးပီသုးကလၢၤပူၤသ့ၣ်တဖၣ်အံၤဘၣ်ယိၣ်၀ဲလၢတၢ်ကဟဲခးအ၀ဲသ့ၣ်အဃိ ခးပိၢ်ထီၣ်ကျိအိၣ်၀ဲအဂ့ၢ်န့ၣ် တးပီသ၀ီဖိတဂၤဃီ၀ဲန့ၣ်စံးအါထီၣ်၀ဲဒၣ်ဒ်အံၤန့ၣ်လီၤႉ အ၀ဲစံး၀ဲလၢ“ကျိဖးဒိၣ်ဒုဟဲကိးမုၢ်နၤဒဲးလီၤႉမုၢ်နၤမုၢ်ဆါဟဲမၢ်မၢ်လီၤႉပယီၤသုးခးစိလီၤတၢ်လၢကမၤမိၢ်တကပၤန့ၣ်ႉမ့၀ံၤလၢဘံလ့(အမတ)တကပၤန့ၣ်နါက့ခးစိတၢ်စ့ၢ်ႉခးတဘျီဃီန့ၣ်ခံကပၤႉတးပီသုးကလၢၤဒုခးတၢ်တဘူၣ်လၢၤဘၣ်ႉမုၢ်မ့ဟါန့ၣ်တးပီသုးကလၢၤန့ၣ်ခးပိၢ်ထီၣ်ကျိဖိဒ်န့ၣ်ဒုအိၣ်လီၤႉသးအုး၀ဲလၢၦၤကလဲၤခးအီၤဧါသၢၣ်ႉအ၀ဲသ့ၣ်နါက့ဟးထီၣ်လၢတၢ်ချၢတဘူၣ်စ့ၢ်ဘၣ်ႉခဲအံၤပနၢ်ဟူလၢပယီၤသုး(စစ်ကူ)ဟဲထီၣ်မီၤဟဲထီၣ်တုၤလၢပနွဲၢ်ကျါလံ”အဂ့ၢ်န့ၣ် စံး၀ဲန့ၣ်လီၤႉ ဒ်န့ၣ်အသိးဖဲအပူၤကွံာ်တလါအံၤလါဖ့ၤဘြူၤအါရံၤ ၁...
ကညီဒီကလုာ်မုၢ်နံၤဆၢက့ၤၦဲၤထီၣ် (၇၆) ၀ီတ၀ီ
လါဖ့ၤဘြူၤအါရံၤ ၁၁ သီႇ ၂၀၂၄ နံၣ်ႇ ခ့ၣ်အဲးစံၣ် ၦၤဒိကနၣ်တၢ်ဖိခဲလၢာ်သ့ၣ်ဧၢတနံၤအံၤလါဖ့ၤဘြူၤအါရံၤ(၁၁)သီအံၤမ့ၢ်၀ဲဒၣ်ကညီဒီကလုာ်မုၢ်နံၤဆၢက့ၤၦဲၤထီၣ်(၇၆)၀ီတ၀ီလံန့ၣ်လီၤႉလၢ(၇၆)၀ီတ၀ီကညီဒီကလုာ်မုၢ်နံၤဆၢက့ၤၦဲၤထီၣ်တနံၤအံၤအဖီခိၣ်န့ၣ်ပကပာ်ဖျါထီၣ်၀ဲ ၦၤဟူးဂဲၤဖံးမၤတၢ်လၢကညီတ၀ၢပူၤတဖၣ်လၢအမ့ၢ်ကညီပိာ်မုၣ်ကရၢ (KWO) ကရၢခိၣ် နီၢ်ကညီဖီႇ ကညီဂ့ၢ်၀ီခွဲးယာ်ကရူၢ် (KHGR) ၦၤကတိၤတၢ်ပၢ စီၤနၢၤဒၣ်ဆူ ဒီး ကညီကၠိဖိၦာ်ဘျးစဲကရူၢ် (KSNG) ကရၢခိၣ် စီၤန့ၢ်ကီၢ်စ့ သ့ၣ်တဖၣ်အံၤအတၢ်ကတိၤလၢကညီဒီကလုာ်မုၢ်နံၤဆၢက့ၤအံၤအဖီခိၣ်န့ၣ်လီၤႉ ကညီပိာ်မုၣ်ကရၢ (KWO) ကရၢခိၣ် နီၢ်ကညီဖီ “မုၢ်နံၤတနံၤန့ၣ်မ့ၢ်မုၢ်နံၤလၢပဘၣ်ပာ်သူၣ်ပာ်သးအီၤ ဘၣ်မနုာ်အဃိလဲၣ်န့ၣ်မ့ၢ်မုၢ်နံၤတနံၤလၢကညီဖိလဲၤဃ့ထံဃ့ကီၢ်ပာ်ဖျါထီၣ်အတၢ်ဘၣ်သးသ့ၣ်တဖၣ်လၢလိၣ်ဘၣ်အထံအကီၢ်၊တၢ်တုၤသိးထဲသိးဃ့၀ဲလၢတၢ်မုာ်တၢ်ခုၣ်အပူၤမီၤနီၤႉ မ့ၢ်၀ဲမုၢ်နံၤလၢကညီဖိအိၣ်ဒီးတၢ်ဃူးတၢ်ဖိးလီၤ ဘၣ်မနုၤအဃိလဲၣ်န့ၣ်လၢကီၢ်ပယီၤဒီတဘ့ၣ်ၦၤပာ်ဖှိၣ်ထီၣ်သးလွံၢ်ကလီၢ်ဘျဲၣ်န့ၣ်လီၤႉ လၢတၢ်စံၣ်စိၤတဲစိၤအပူၤန့ၣ်မ့ၢ်၀ဲတၢ်ပာ်ဖျါထီၣ်သးလၢတၢ်မုာ်တၢ်ခုၣ်အပူၤန့ၣ်ၦၤကညီနီၣ်ဂံၢ်အါ၀ဲမီၤအဃိန့ၣ်မ့ၢ်မုၢ်နံၤတနံၤလၢပကဘၣ်သ့ၣ်နီၣ်ထီၣ်အီၤလီၤႉ လၢပတၢ် ပၢၢ်ဆၢကမၤနၢၤတၢ်အဂီၢ်န့ၣ်ပကဘၣ်ဂုာ်ကျဲးစၢးဒီးၦၤကိးဂၤဒဲးကပၣ်ဃုာ်ပၣ်ဂီၢ်မၤသကိးတၢ်ဒီးထိၣ်ဃူထိၣ်ဖိးလိာ်က့ၤသးမီၤနီၤႉ ဘၣ်မနုၤအဃိလဲၣ်န့ၣ်မုၢ်နံၤတနံၤန့ၣ်ၦၤကညီဖိဃူဖိးခဲလၢာ်အဃိသးန့ၣ်မုၢ်တနံၤလၢပၦၤကညီဖိမ့ၢ်ဃူဖိးက့ၤန့ၣ်ယနာ်လၢပကဒိးန့ၢ်ဘၣ်က့ၤတၢ်သဘျ့လီၤ” ကညီဂ့ၢ်၀ီခွဲးယာ်ကရူၢ် (KHGR) ၦၤကတိၤတၢ်ပၢ စီၤနၢၤဒၣ်ဆူ “ကလုာ်ဒူၣ်တဒူၣ်စုာ်စုာ်န့ၣ်ပာ်ပနီၣ်၀ဲအ၀ဲသ့ၣ်တဖၣ် အမုၢ်နံၤအိၣ်၀ဲဒီးဒ်န့ၣ်အသိးပ၀ဲကညီဖိသ့ၣ်တဖၣ်ပအိၣ်စ့ၢ်ကီးဒီးပမုၢ်နံၤလၢပပာ်ဒိၣ်ပာ်ကဲ၀ဲဒ်အမ့ၢ်ကညီဒီကလုာ်အမုၢ်နံၤလီၤႉ လၢမုၢ်နံၤတနံၤအံၤအဖီခိၣ်ကညီဖိကိးဂၤဒဲးပာ်ပနီၣ်၀ဲဒ်အမ့ၢ်ပတၢ်ဆၢထၢၣ်ပတၢ်ဃ့ထီၣ်လၢပလိၣ်ဘၣ်သ့ၣ်တဖၣ်မီၤနီၤႉ ဆၢတကီၢ်ခဲအံၤန့ၣ်မ့ၢ်၀ဲတၢ်ပၢၢ်ဆၢအဆူၣ်အကိာ်အဆၢကတီၢ်လၢထံကီၢ်ဒီတဘ့ၣ်အပူၤမီၤနီၤႉ ကလုာ်ဒူၣ်တဒူၣ်စုာ်စုာ်ကိးသတြီထီၣ်၀ဲဒၣ်တၢ်လိၣ်ဘၣ်သ့ၣ်တဖၣ်အသိးန့ၣ်ပကညီဖိကလုာ်သ့ၣ်တဖၣ်စ့ၢ်ကီးန့ၣ် လၢတၢ်ပၢၢ်ဆၢသနၢၣ်မ့ၢ်ဂ့ၤလၢသနၢၣ်အဂၤမ့ၢ်ဂ့ၤန့ၣ်လၢပတၢ်ထူၣ်ဖျဲးထီၣ်အဂီၢ်န့ၣ်ပဂုာ်ကျဲးစၢး၀ဲမီၤနီၤႉ အဃိန့ၣ်လၢပကညီဒီကလုာ်မုၢ်နံၤအဖီခိၣ်အနံၤစ့ၢ်ကီးန့ၣ်ပကပာ်သူၣ်ပာ်သးဘၣ်ဒီးထဲးဂံၢ်ထဲးဘါတုၤပမၤနၢၤတၢ်တစုန့ၣ်တက့ၢ်” (KSNG) ကရၢခိၣ် စီၤန့ၢ်ကီၢ်စ့ “ကညီဒီကလုာ်အမုၢ်နံၤၦဲၤထီၣ်(၇၆)နံၣ်အံၤန့ၣ်မ့ၢ်၀ဲတၢ်ဃူးတၢ်ဖိးမုၢ်နံၤတနံၤလၢ ကညီဖိသ့ၣ်တဖၣ်ပာ်ဖျါထီၣ်အသးဒ်အမ့ၢ်၀ဲၦၤတကလုာ်အသိးန့ၣ်လီၤႉ ဒ်ပမ့ၢ်၀ဲဒၣ်ကလုာ်ဖးဒိၣ်တကလုာ်အသိး န့ၣ်ပကဘၣ်အိၣ်ဒီးပထံပကီၢ်ပတၢ်စံၣ်ညီပၢလီၤသးဒ်ၦၤတကလုာ်အသိးလီၤႉ ပတၢ်စံၣ်ညီပၢလီၤသးမ့ၢ်တအိၣ်ဘၣ်န့ၣ် ၦၤကမၤကီမၤခဲ မၤအၢမၤသီ မၤဟးဂီၤပၦၤကလုာ်လီၤႉ အဃိန့ၣ်ပတဆၢလီၤမၢ်ဘၣ် ပတဆၢထံၣ်ဘၣ် ဒီးပၦၤကလုာ်ကဘၣ်ဒိၣ်ထီၣ်ထီထီၣ်ဆူညါလီၤႉ ပတဆၢကဲၦၤကုၢ်ဘၣ် ပတဆၢကဲထီၣ်ၦၤဘၣ်ကီဘၣ်ခဲဖိသ့ၣ်တဖၣ်လီၤစိၤဘၣ်ဒီးပတမုၢ်လၢ်ကဲစ့ၢ်ကီးဘၣ်ႉ ပဘၣ်ဟးဃ့ၢ်မှံဟးဖျိးဆူၦၤထံၦၤကီၢ်ထံဘၣ်တၢ်ကီတၢ်ခဲဒ်န့ၣ်အသိးအဃိဒီးပၦၤကလုာ်ပထံရူၢ်ကီၢ်သဲးပတၢ်န့ၢ်သါပကဘၣ်ပၢဘၣ်ဆှၢဘၣ်က့ၤအဂီၢ်ပကြၢးဒိးန့ၢ်ဘၣ်က့ၤ ပကဘၣ်ဂုာ်ဟံးန့ၢ်က့ၤဒီးဒုးထူၣ်ဖျဲးထီၣ်က့ၤပၦၤကလုာ်ဒီးအိၣ်က့ၤလၢတၢ်သဘ့အျပူၤန့ၣ်မ့ၢ်တၢ်လၢအရ့ဒိၣ်၀ဲလီၤ”
တၢ်ကြဲၢ်ကီၢ်ဆၣ်မၤ၀ဲ(၆)၀ီတ၀ီခီကရဲးတၢ်အိၣ်ဖှိၣ်ဒီးဃုထၢထီၣ်ဃုာ်ခိၣ်နၢ်လၢအသီ၀ံၤ၀ဲ
လါဖ့ၤဘြူၤအါရံၤ ၁၂ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢဖၣ်အၣ်ကီၢ်ရ့ၣ်အပူၤတၢ်ကြဲၢ်ကီၢ်ဆၣ်မၤ၀ဲ(၆)၀ီတ၀ီ ခီကရဲးတၢ်အိၣ်ဖှိၣ်ဒီး ခီကရဲးတၢ်အိၣ်ဖှိၣ်အပူၤတၢ်ဃုထၢထီၣ်က့ၤ၀ဲခိၣ်နၢ်သီသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖၣ်အၣ်ကီၢ်ရ့ၣ်တၢ်ကြဲၢ်ကီၢ်ဆၣ်(၆)၀ီတ၀ီခီကရဲးတၢ်အိၣ်ဖှိၣ်ဘျီ၀ဲအံၤဘၣ်တၢ်စးထီၣ်မၤအီၤဖဲအပူၤကွံာ် လါဖ့ၤဘြူၤ အါရံၤ(၆)သီတုၤလၢ(၈)သီလၢသၢသီအတီၢ်ပူၤဒီးဒ်န့ၣ်အသိးတၢ်အိၣ်ဖှိၣ်ဘျီ၀ဲအံၤအပူၤန့ၣ်တၢ်ဃုထၢထီၣ်ဃုာ်စ့ၢ်ကီး၀ဲထီဘိကမံးတံာ်(၃၁)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်တၢ်အိၣ်ဖှိၣ်ခီကရဲးပူၤတၢ်ပာ်လီၤတၢ်တိာ်ကျဲၤအိၣ်၀ဲအသိးန့ၣ်ကမၤဆူၣ်ထီၣ်တၢ်ကရၢကရိဒီး တကးဒံးဘၣ်သုး မီၤစိရိၤတၢ်ပၢတၢ်ပြးကလီၤၦီၢ်ကွံာ်အဂီၢ်တၢ်ပညိၣ်အိၣ်လၢကဆီၣ်သနံး၀ဲအဂ့ၢ်န့ၣ်တၢ်ကြဲၢ်ကီၢ်ဆၣ်ခိၣ် ပဒိၣ်စီၤပလဲဒံၤ၀ါ စံး၀ဲဒ်အံၤန့ၣ်လီၤႉ “ပကမၤဆူၣ်ထီၣ်က့ၤ၀ဲဒၣ်ပဂံၢ်ပဘါတခါလၢပကလဲၤဆူကရူၢ်အပူၤဒီးပကမၤတၢ်အိၣ်ဖှိၣ်ႉ မ့ၢ်၀ံၤန့ၣ်ပကမၤနီၣ်မၤ ဃါက့ၤကရူၢ်အဆၢသ့ၣ်တဖၣ်န့ၣ်မ့ၢ်၀ဲပတၢ်ပညိၣ်အခိၣ်သ့ၣ်တခါလီၤႉ ပမ့ၢ်ဘၣ်ကွၢ်က့ၤလၢပယီၤတကပၤ န့ၣ်တၢ်တီခိၣ်ရိၣ်မဲအဂံၢ်လီၤစှၤ၀ဲဒိၣ်မးအဃိန့ၣ်ပတၢ်ပညိၣ်အိၣ်စ့ၢ်ကီး၀ဲဒ်သုးက့အဂၤမၤ၀ဲလၢတၢ်ဒုးတၢ်ယၤတကပၤလၢဆီၣ်ဖျိးကွံာ်၀ဲဒၣ်တၢ်ပၢတၢ်ပြးမီၤနီၤႉ အဃိန့ၣ်ပ၀ဲနာ်က့ပကဘၣ်ဆီၣ်ဖျိးကွံာ်အီၤလၢထံရူၢ်ကီၢ်သဲးအကျဲတခါခါႉ မ့မ့ၢ်လၢပ၀ဲတကပၤခီန့ၣ်တၢ်ဒုးတၢ်ယၤဒုတအိၣ်ဘၣ်ဘၣ်ဆၣ် လၢထံရူၢ်ကီၢ်သဲးအသနၢၣ်တကပၤခီန့ၣ် ဒ်သိးတၢ်ပၢတၢ်ပြးကလီၤ ပအၣ်ကွံာ်ကလီၤမၢ်ကွံာ်အဂီၢ်န့ၣ်ဒု ပဂုာ်ကျဲးစၢးတိဖျိးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢ(၆)၀ီတ၀ီခီကရဲးအပူၤဘျီ၀ဲအံၤန့ၣ်တၢ်ဃုထၢထီၣ်၀ဲထီဘိကမံးတံာ်(၃၁)ဂၤဒီးဖဲန့ၣ်အကျါကီၢ်ဆၣ်ခိၣ်န့ၣ်မ့ၢ်၀ဲ ပဒိၣ်စီၤပလဲဒံၤ၀ါႇ ကီၢ်ဆၣ်ခိၣ်-၂ န့ၣ်မ့ၢ်၀ဲသုးခိၣ်ဒိၣ်ဂီၢ်ဂ့ၢ် စီၤတ့ၤမၠ့ၣ်ထူႇ ကီၢ်ဆၣ်နဲၣ်ရွဲၣ်ပဒိၣ်စီၤနၤပံႇ နဲၣ်ရွဲၣ်သဃဲၤ ပဒိၣ်စီၤပူၣ်လူဒီး ကီၢ်ဆၣ်စံၣ်ညီၣ်ပီတ့န့ၣ်မ့ၢ်၀ဲပဒိၣ်စီၤဆၢစွ့ၤမၠ့ၣ်သ့ၣ်တဖၣ်န့ၣ်လီၤႉ လၢန့ၣ်အမဲာ်ညါတၢ်အိၣ်ဖှိၣ်ဖးဒိၣ်ဘျီ၀ဲအံၤအပူၤန့ၣ်ခိၣ်နၢ်ခၢၣ်စးသ့ၣ်တဖၣ်က့ၤကွၢ်သမံသမိးတဲသကိးက့ၤ၀ဲဒၣ်(၄)နံၣ်အတီၢ်ပူၤတၢ်ဖံးတၢ်မၤတၢ်လဲၤတရံၤသးအဂ့ၢ်အကျိၤႇ ၀ဲၤကျိၤ၀ဲၤဒ့တဘိစုာ်စုာ်တၢ်အိၣ်သးႇ တၢ်ကူၣ်ဘၣ်ကူၣ်သ့ႇ တၢ်အိၣ်ဆူၣ်အိၣ်ချ့ႇ ပၢပြးဂ့ၢ်၀ီတၢ်ဖံးတၢ်မၤသ့ၣ်တဖၣ်ဒီးဒ်န့ၣ်အသိးတၢ်ပာ်လီၤဃုာ်စ့ၢ်ကီးတၢ်တိာ်ကျဲၤလၢခါဆူညါ (၄)နံၣ်အတီၢ်ပူၤအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ (၆)၀ီတ၀ီတၢ်ကြဲၢ်ကီၢ်ဆၣ်ခီကရဲးတၢ်အိၣ်ဖှိၣ်ဖးဒိၣ်တဘျီအံၤအပူၤန့ၣ်ကရူၢ်ခိၣ်ဃုာ်ဒီးခၢၣ်စး(၈၉)ဂၤဒီး ၦၤဟဲထီၣ်ဃု သ့ၣ်ညါတၢ်ဖိဟဲထီၣ်၀ဲဒၣ်(၃၅)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢအတၢ်သူၣ်ထီၣ်ဆီလီၤအိၣ်ပာ်၀ဲအသိးန့ၣ် ကီၢ်ဆၣ်ခီကရဲးတၢ်အိၣ်ဖှိၣ်အံၤ ဘၣ်တၢ်မၤအီၤ(၄)နံၣ်တဘျီဒီးဒ်န့ၣ်အသိးလၢလွံၢ်နံၣ်တဘျီတၢ်အိၣ်ဖှိၣ်အံၤအပူၤန့ၣ် တၢ်က့ၤဃုထၢထီၣ်ဃုာ်စ့ၢ်ကီး ၀ဲထီဘိကမံးတံာ်ခိၣ်နၢ်လၢအသီသ့ၣ်တဖၣ်န့ၣ်လီၤႉ
ဒ်သိးတၢ်နုာ်လီၤဃုသ့ၣ်ညါကညီဖိတၢ်စံၣ်စိၤလၢကလံၤကျါကန့ၢ်အဂီၢ်တၢ်ဒုးသ့ၣ်ညါလီၤ၀ဲကညီမူပျီ ၦာ်ယဲာ်လံာ်ရိဒၢး
လါဖ့ၤဘြူၤအါရံၤ ၁၂ သီ ၂၀၂၄ နံၣ် ခ့ၣ်အဲးစံၣ် ဒ်သိးကညီသူၣ်ဘီၣ်သးစၢ်ဒီးၦၤဖးလံာ်ဖိတဖၣ်နုာ်လီၤဃုသ့ၣ်ညါကညီတၢ်စံၣ်စိၤတဲစိၤလၢ(ONLINE)ပူၤကန့ၢ်အဂီၢ်တၢ်မၤ၀ဲတၢ်အိးထီၣ်ဒုးသ့ၣ်ညါလီၤကညီမူပျီၦာ်ယဲာ်လံာ်ရိဒၢး(Karen Online Library)တၢ်ရဲၣ်တၢ်ကျဲၤတခါ ဖဲမဟါလါဖ့ၤဘြူၤအါရံၤ(၁၁)သီအနံၤန့ၣ်လီၤႉ တၢ်အိးထီၣ်ဒုးသ့ၣ်ညါ(Karen Online Library)တၢ်ရဲၣ်တၢ်ကျဲၤအံၤန့ၣ် တၢ်မၤ၀ဲလၢ(ONLINE)ပူၤဒီး ဘၣ်ဃးတၢ်ဒုးသ့ၣ်ညါလီၤ(Karen Online Library)အတၢ်မုၢ်လၢ်တၢ်တိာ်ပာ်အံၤန့ၣ်ၦၤကယၢကယဲမူး နီၢ်မူမူဖီ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ တနံၣ်အံၤပတၢ်ဘိးဘၣ်ဒုးသ့ၣ်ညါတၢ်အိးထီၣ်(Karen Online Library) အတၢ်တိာ်ပာ်န့ၣ်မ့ၢ်၀ဲဒ်သိးၦၤဖးလံာ်ဖိတဖၣ်ကသ့ၣ်ညါ၀ဲလၢစးထီၣ်သူ၀ဲ(Karen Online Library)အံၤန့ၢ်လံဒီး နုာ်လီၤဃုဖး၀ဲကညီတၢ်စံၣ်စိၤဂ့ၢ်ကျိၤတဖၣ်လၢ(Karen Online Library)အ(Facebook)ပူၤဒီး လၢ(Website)ပူၤ သ့ၣ်တဖၣ်န့ၣ်၀ဲလံအသိးဒ်သိးတၢ်ကမၤဂ့ၤထီၣ်(Karen Online Library)အံၤအဂီၢ်ၦၤဖးတၢ်ဖိတဖၣ်ဆှၢထီၣ်အတၢ် ဟ့ၣ်ကူၣ်ဟ့ၣ်ဖးဒီးတၢ်ထံၣ်သ့ၣ်တဖၣ်သ့၀ဲ” အဂ့ၢ်န့ၣ် စံး၀ဲန့ၣ်လီၤႉ ဒ်န့ၣ်အသိးခ့ခါဆၢကတီၢ်ခဲအံၤတၢ်ဆီတလဲထီၣ်၀ဲကိးမံၤဒဲးဒီးဒ်သိးၦၤကိးဂၤဒဲးကဃုမၤလိသ့ၣ်ညါက့ၤကညီဖိအဂ့ၢ်အကျိၤကန့ၢ်ကညီအဂီၢ်လၢကညီမူပျီၦာ်ယဲာ်လံာ်ရိဒၢးအံၤအဃိစံးဘျူးဘၣ်ၦၤလၢအသူၣ််ဆူၣ်သးဂဲၤတဖၣ်ဒီး ပာ်ကဖၢလၢသးလၢၦၤသ့ၣ်တဖၣ်အံၤအဖီၣ်ခိၣ်အဂ့ၢ်န့ၣ် ခ့ၣ်အဲၣ်ယူၣ် နဲၣ်ရွဲၣ်ခိၣ်ကျၢၢ်သဃဲၤ(၂)ပဒိၣ်စီၤလၣ်ထိ စံးလီၤစ့ၢ်ကီး၀ဲဖဲတၢ်ဒုးသ့ၣ်ညါကညီမူပျီၦာ်ယဲာ်လံာ်ရိဒၢးတၢ်ရဲၣ်တၢ်ကျဲၤအပူၤဒ်အံၤန့ၣ်လီၤႉ အ၀ဲစံး၀ဲလၢ “ ကညီသူၣ်ဘီၣ်သးစၢ်တဖၣ်အံၤခါဆူညါအတၢ်ဆိမိၣ်အိၣ်၀ဲလၢကညီကလုာ်သူၣ်ဘီၣ်သးစၢ်တဖၣ်ကဃုထံၣ်သ့ၣ်ညါက့ၤကညီတၢ်စံၣ်စိၤတဲစိၤသ့ၣ်တဖၣ်အဃိဒ်စိၤဆၢကတီၢ်လဲၤထီၣ်လဲၤထီအသိးန့ၣ်သူၣ်ဆူၣ်သးဆူၣ်မၤအိးထီၣ်၀ဲတၢ်လံာ်ရိဒၢးဒ်အံၤအဃိမ့ၢ်သးခုစံးဘျုးဘၣ်အ၀ဲသ့ၣ်တဖၣ်ဒိၣ်မးဒီးလံာ်ရိဒၢးအံၤတမ့ၢ်ပကဘၣ်လဲၤလၢကပနီၢ်ကစၢ်ဒီးဃုဖးအီၤဘၣ်ဒ်စိၤဆၢကတီၢ်လဲၤထီၣ်လဲၤထီအသိးပအိးထီၣ်လၢအိၤလဲပူၤ၀ံၤပမၤလိသ့ပသးပဃုသ့ၣ်ညါ၀ဲန့ၢ်ညီညီအဃိမ့ၢ်တၢ်ပာ်ကဖၢလၢပသးလၢအ၀ဲသ့ၣ်ဖီခိၣ်လီၤမီၤ ” အဂ့ၢ်န့ၣ် စံး၀ဲန့ၣ်လီၤႉ လၢ(Karen Online Library)ကညီမူပျီၦာ်ယဲာ်လံာ်ရိဒၢးအ( Facebook ဒီး Website...
သးစၢ်တဖၣ်လၢသနၢၣ်ဒၣ်၀ဲမ့ပာ်ဖှိၣ်မၤသကိးတၢ်န့ၣ်သူၣ်ထီၣ်က့ၤထံကီၢ်န့ၢ်၀ဲအဂ့ၢ် သုးခိၣ်ကျၢၢ်စိ စီၤဘီကၠီၣ်ဟဲ စံး၀ဲ
လါဖ့ၤဘြူၤအါရံၤ ၁၂ သီႇ ၂၀၂၄ နံၣ်ႇ ခ့ၣ်အဲးစံၣ် သးစၢ်တဖၣ်တဂၤလၢသနၢၣ်ဒၣ်၀ဲမ့ပာ်ဖှိၣ်မၤသကိးတၢ်န့ၣ်ပသူၣ်ထီၣ်က့ၤပထံပကီၢ်ကန့ၢ်၀ဲအဂ့ၢ်န့ၣ် KNLA သုးရိၣ်မဲခိၣ်ကျၢၢ်-၂ သုးခိၣ်ကျၢၢ်စိ စီၤဘီကၠီၤဟဲ စံးလီၤ၀ဲလၢကညီဒီကလုာ်မုၢ်နံၤဆၢက့ၤ(၇၆)၀ီတ၀ီ တၢ်ရဲၣ်တၢ်ကျဲၤလၢ ဘၣ်တၢ်မၤအီၤလၢ(အီၤလါ)ပူၤအံၤန့ၣ်လီၤႉ ဖဲမဟါလါဖ့ၤဘြူၤအါရံၤ ၁၁ သီ ဟါခီ ၉ နၣ်ရံၣ်အဆၢကတီၢ်န့ၣ် ကီၢ်နီၣ်၀့ကညီၦၤတ၀ၢတီခိၣ်ရိၣ်မဲမၤ၀ဲဒၣ် ကညီဒီကလုာ်မုၢ်နံၤဆၢက့ၤၦဲၤထီၣ်(၇၆)၀ီတ၀ီတၢ်ရဲၣ်တၢ်ကျဲၤလၢ(အီၣ်လါ)ပူၤတခါဒီး လၢတၢ်ရဲၣ်တၢ်ကျဲအံၤအပူၤ သုးရိၣ်မဲခိၣ်ကျၢၢ်-၂ သုးခိၣ်ကျၢၢ်စိ စီၤဘီကၠီၤဟဲ စံးလီၤ၀ဲဒ်အံၤန့ၣ်လီၤႉ အ၀ဲစံး၀ဲလၢ“ပၦၤသူၣ်ဘီၣ်သးစၢ်လၢအိၣ်လီၢ်ဘူးလီၢ်ယံၤခဲလၢာ်ပမ့ဘျးစဲလိာ်က့ၤပသးဒီးပာ်ဖှိၣ်မၤသကိးတၢ်န့ၣ် ပကဒုးန့ၢ်က့ၤပတၢ်ခွဲးတၢ်ယာ်ဒီးတဂၤလၢပလီၢ်ပကျဲပသနၢၣ်ဒၣ်၀ဲပမ့ပာ်ဖှိၣ်မၤသကိးတၢ်န့ၣ်ယနာ်လၢပသူၣ်ထီၣ်က့ၤပထံပကီၢ်ကီၢ်သဘျ့ကန့ၢ်၀ဲလီၤႉပ၀ဲဒၣ်န့ၣ်ပကိးလီၤသးလၢပဂုာ်ကျဲးစၢးတၢ်လၢတၢ်သဘျ့အဂီၢ်ဂုာ်ကျဲးစၢးဂဲၤဆၢထၢၣ်ဒုးတၢ်လၢတၢ်တီတၢ်တြၢ်လၢအၦၤကလုာ်တၢ်သဘျ့အဂီၢ်ဒီးပကသူၣ်ထီၣ်ပထံပကီၢ်ပကီၢ်သူလ့ၤလီၤႉဒီးပသးလီကီၢ်သူလ့ၤကညီကီၢ်န့ၢ်လၢအနံၣ်ဃုဆံနွံဆံဘျဲၣ်လံႉအဃိန့ၣ်တၢ်ဆၢကတီၢ်ဘၣ်လံလၢပကဘၣ်သူၣ်ထီၣ်က့ၤနီၢ်နီၢ်ကီၢ်ကီၢ်လံ”အဂ့ၢ်န့ၣ် စံး၀ဲန့ၣ်လီၤႉ တကးဒံးဘၣ်လၢအနံၣ်နွံဆံဘျဲၣ်အတီၢ်ပူၤအံၤဘၣ်မနုၤအဃိလၢပတုၤလၢဖီၣ်တၢၣ်ဘၣ်လဲၣ်န့ၣ် ကမ့ၢ်ခီဖျိလၢ ပတၢ်ဖံးတၢ်မၤတၢ်ဂုာ်ကျဲးစၢးအဃိလီၤဒီးခါလၢကဟဲဆူညါစ့ၢ်ကီးလိၣ်ဘၣ်၀ဲဒၣ်တၢ်ဂံၢ်တၢ်ဘါနီၢ်နီၢ်လၢပကပာ်ဖှိၣ်မၤသကိးတၢ်လၢပသနၢၣ်ဒၣ်၀ဲစုာ်စုာ်အဂ့ၢ်န့ၣ် သုးခိၣ်ကျၢၢ်စိ စီၤဘီကၠီၣ်ဟဲ စံးအါထီၣ်၀ဲဒၣ်န့ၣ်လီၤႉ လၢန့ၣ်အမဲာ်ညါတုၤလၢခဲအံၤပၦၤကလုာ်အတၢ်မိၣ်န့ၢ်သးလီန့ၣ်တလၢၦဲၤ၀ဲဒံးဘၣ်ဒီးဘၣ်ဆၣ်ပတၢ်မိၣ်န့ၢ်သးလီအံၤ အတၢ်မုၢ်လၢ်အိၣ်ဒံး၀ဲဒီးဒ်န့ၣ်အသိးကဆဲးပာ််ဖှိၣ်ဆီၣ်ထွဲသကိးကမျၢၢ်လၢအဘၣ်ဃ့ၢ်မှံဟးဖျိးသ့ၣ်တဖၣ်အဂ့ၢ်န့ၣ် (Burma Campaign)ၦၤနဲၣ်တၢ် သရၣ်မုၣ် နၣ်စိၤယါဖါ စံးလီၤ၀ဲလၢတၢ်ရဲၣ်တၢ်ကျဲၤဘျီ၀ဲအံၤအပူၤန့ၣ်လီၤႉ သရၣ်မုၣ်နၣ်စိၤယါဖါ စံး၀ဲလၢ“၇၆ နံၣ်ဘျဲၣ်လံပၦၤကလုာ်အတၢ်မိၣ်န့ၢ်သးလီ၀ဲအံၤတလၢၦဲၤ၀ဲဒံးဘၣ်ႉ တလၢၦဲၤဘၣ်နါက့ပတၢ်မိၣ်န့ၢ်သးလီအံၤအတၢ်မုၢ်လၢ်အိၣ်ဒံးအသးသဟီၣ်အိၣ်ဒံးတလီၤမၢ်န့ၢ်ၦၤဒံးဘၣ်ႉ ၦၤတစိၤလဲၤၦၤတစိၤဟဲလီၤႉလၢယဖံယဖုစိၤယမိယပါစိၤခဲအံၤလၢယစိၤယနာ်စ့ၢ်ကီးလၢပဖိပလံၤမ့ၢ်ဂ့ၤမုၢ်နံၤ၀ဲအံၤကဆဲးအိၣ်ဒံးလီၤမီၤနီၤႉခဲအံၤပမၤလၤကပီၤကညီဒီကလုာ်မုၢ်နံၤအံၤဒ်သိးပအိၣ်လၢထံဂုၤကီၢ်ဂၤအံၤပပာ်ဖှိၣ်မၤလၤကပီၤအီၤလၢတၢ်သဘျ့သအပူၤလီၤဘၣ်ဆၣ်ပၦၤကလုာ်လၢအိၣ်ကီၢ်သူလ့ၤပူၤတဖၣ်အ၀ဲသ့ၣ်တအိၣ်ဒီးတၢ်သဘျ့လၢ ကမၤလၤကပီၤကညီဒီကလုာ်မုၢ်နံၤအံၤဘၣ်ႉကတဲလီၤအသးလၢကညီဖိဒၣ်လဲာ်န့ၣ်တဲ၀ဲတဘူၣ်ဘၣ်အိၣ်ခီဖျိလၢ တၢ်ဂ့ၢ်အကလုာ်ကလုာ်အဃိလီၤႉၦၤဒ်အံၤသ့ၣ်တဖၣ်ပသ့ၣ်နီၣ်ဘၣ်အ၀ဲသ့ၣ်ပတသးပ့ၤနီၣ်အ၀ဲသ့ၣ်ဘၣ်ႉတကးဒံး ဘၣ်ခါဆူညါပကပာ်ဖှိၣ်ဆဲးမၤစၢၤၦၤဃ့ၢ်မှံဟးဖျိးသ့ၣ်တဖၣ်”အဂ့ၢ်န့ၣ် စံး၀ဲန့ၣ်လီၤႉ လၢ(ကီၢ်နီၣ်၀့)ကညီတ၀ၢအတၢ်တီခိၣ်ရိၣ်မဲမၤလၤကပီၤကညီဒီကလုာ်မုၢ်နံၤတၢ်ရဲၣ်တၢ်ကျဲၤလၢ(အီၣ်လါ)ပူၤဘျီ၀ဲ အံၤန့ၣ်သုးခိၣ်ကျၢၢ်စိ စီၤဘီကၠီၣ်ဟဲႇ သရၣ်မုၣ် နၣ်စိၤယါဖါဃုာ်ဒီးၦၤဘၣ်မူဘၣ်ဒါလၢအဂၤတဖၣ် ဟ့ၣ်ဂံၢ်ဟ့ၣ်ဘါ ကတိၤရှဲပၠးလီၤ၀ဲဘၣ်ဃးကညီဒီကလုာ်မုၢ်နံၤကဲထီၣ်အဂ့ၢ်အကျိၤသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးတၢ်ရဲၣ်တၢ်ကျဲၤဘျီ၀ဲအံၤအပူၤန့ၣ်အိၣ်စ့ၢ်ကီး၀ဲတၢ်တၢ်သး၀ံၣ်လၢကညီဒီကလုာ်မုၢ်နံၤအဂီၢ်ဒီး လၢမုၢ်နံၤအံၤအဂီၢ်ၦၤလၢအကွဲးပြၢထါန့ၢ်ခိၣ်ဖးတဖၣ်ဖးဖျါထီၣ်က့ၤအထါသ့ၣ်တဖၣ်န့ၣ်လီၤႉလၢန့ၣ်အမဲာ်ညါ တၢ်ရဲၣ်တၢ်ကျဲၤအံၤအပူၤခိၢ်နၢ်ၦၤဘၣ်မူဘၣ်ဒါဃုာ်ဒီးၦၤထီၣ်ဒိကနၣ်တၢ်ဖိလၢအိၣ်ကီၢ်ပူၤ ထံချၢကီၢ်ချၢတဖၣ် ခဲလၢာ်...
ကအိၣ်ဆၢထၢၣ်ဃုာ်ဒီးကၠိဖိလၢဘၣ်ဃ့ၢ်တၢ်ဒုးတဖၣ်အဂ့ၢ်ခီကီၢ်ကၠိသရၣ်ဒီးကၠိဖိသ့ၣ်တဖၣ်စံး၀ဲ
လါဖ့ၤဘြူၤအါရံၤ ၁၁ သီႇ ၂၀၂၄ နံၣ်ႇ ခ့ၣ်အဲးစံၣ် န့ၢ်မၤလိဘၣ်တၢ်လၢကီၢ်ကၠီၣ်တဲၣ်-ကီၢ်ပယီၤကီၢ်ဆၢပူၤဘၣ်ဆၣ်အိၣ်ဆၢထၢၣ်ဃုာ်ဒီးကၠိဖိမုၣ်ခွါလၢအိၣ်ကီၢ်ပူၤလၢအဖံးလိမၤလိတၢ်လၢတၢ်ဒုးတၢ်ယၤ အကျါသ့ၣ်တဖၣ်အဂ့ၢ်န့ၣ် ကၠိသရၣ်ဒီးကၠိဖိလၢအိၣ်ကီၢ်ကၠီၣ်တဲၣ်-ကီၢ်ပယီၤကီၢ်ဆၢ သူမှဲခံကၠိအံၤတဖၣ်စံး၀ဲန့ၣ်လီၤႉ ဖဲအပူၤကွံာ်လါဖ့ၤဘြူၤအါရံၤ(၉)သီအနံၤန့ၣ် ခီကီၢ်သူမှဲခံကၠိမၤ၀ဲဒၣ်ကၠိဖိမုၣ်ခွါတၢ်လိာ်ကွဲတၢ်ရဲၣ်တၢ်ကျဲၤဒီး လၢတၢ်ရဲၣ်တၢ်ကျဲၤအံၤအပူၤကၠိခိၣ်ဒီး ၦၤကၠိဖိလၢအဟဲထီၣ်တၢ်ရဲၣ်တၢ်ကျဲၤအံၤတဖၣ်စံး၀ဲန့ၣ်လီၤႉ ကီၢ်ပယီၤအပူၤကၠိတၢ်သူၣ်ထီၣ်လၢအိၣ်ဟီၣ်က၀ီၤပူၤတဖၣ်ပယီၤသုးကဘီယူၤဟဲတ့ၢ်လီၤ၀ဲမ့ၣ်ပိၢ်ႇ ခးလီၤ၀ဲကျိဖးဒိၣ်ဒီး တၢ်ဂ့ၢ်လၢအကဲထီၣ်သးသ့ၣ်တဖၣ် အံၤဒ်သိးၦၤအါဂၤကသ့ၣ်ညါဘၣ်၀ဲအဂီၢ်တၢ်တဲသကိးတီၣ်ဖျါထီၣ်၀ဲဆူခီကီၢ်ကၠိတၢ်အိၣ်ဖှိၣ်ဒီးထံဂုၤကီၢ်ဂၤတၢ်အိၣ်ဖှိၣ်အပူၤအိၣ်၀ဲအဂ့ၢ်န့ၣ် သူမှဲခံကၠိခိၣ်သရၣ်စီၤၦ့ၤဒိၣ် စံး၀ဲဒ်အံၤန့ၣ်လီၤ “ကီၢ်ပယီၤအပူၤတၢ်လီၢ်တနီၤနီၤကၠိကီၢ်တနီၤနီၤဘၣ်တၢ်မၤဟးဂူာ်ဟးဂီၤအီၤမီၤနီၤႉ သရၣ်သရၣ်မုၣ်လၢအမ့ၢ်ၦၤမၤတၢ်လၢ တၢ်ကူၣ်ဘၣ်ကူၣ်သ့ဒီးဖိဒံဖိသၣ်တဖၣ်မ့ၢ်ၦၤလၢမၤလိမၤဒိးတၢ်လီၤႇ တၢ်ကမၣ်တအိၣ်ဘၣ်ဘၣ်ဆၣ်တၢ်မၤသံမၤ၀ီအီၤ တၢ်ဟဲ တ့ၢ်လီၤဒီးကဘီယူၤမ့ၢ်ပိၢ်သ့ၣ်တဖၣ်မီၤႉ တၢ်လၢပမၤသ့တခါန့ၣ်ဒုအိၣ်ဒၣ်ပဘၣ်ကတိၤန့ၣ်တၢ်လၢအ၀ဲသ့ၣ်အဂီၢ်ဒီးပာ်ဖျါ ထီၣ်တၢ်ဂ့ၢ်သ့ၣ်တဖၣ်အံၤလၢၦၤအါဂၤကထံၣ်သ့ၣ်ညါ၀ဲဒီးတၢ်ဆီၣ်သနံးကဟဲလီၤဒီးကကဲထီၣ်က့ၤတၢ်မၤစၢၤလီၤႉ ဒ်သိးဖိသၣ် သ့ၣ်တဖၣ်ကမၤလိက့ၤဘၣ်တၢ်လၢတၢ်ဘံၣ်တၢ်ဘၢ တၢ်ပူၤတၢ်ဖျဲးအဂီၢ်န့ၣ်ဒုပကဘၣ်ကိးသတြီလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ်န့ၣ်လီၤႉ တကးဒံးဘၣ်အမဲာ်ညါဒ်သိးသုးကီၣ်ကးအတၢ်ခးလီၤကျိဖးဒိၣ်ႇ ကဘီယူၤဟဲခးလီၤတၢ်ႇ တၢ်သ့ၣ်တဖၣ်အံၤ ကပတုာ်ကွံာ်အဂီၢ်န့ၣ် ကၠိလၢကီၢ်ပူၤႇ ထံဆၢကီၢ်ဆၢသ့ၣ်တဖၣ်အံၤဒ်တၢ်သ့အိၣ်ဒီးပ၀ဲအသိးကဘၣ်ဟူးဂဲၤဟ့ၣ်၀ဲ တၢ်ဆီၣ်သနံးအဂ့ၢ်န့ၣ် သူမှဲခံသရၣ်ကၠိခိၣ်စီၤၦ့ၤဒိၣ် စံးအါထီၣ်၀ဲန့ၣ်လီၤႉ ဒ်ဒီကလုာ်ဃူဖိးပဒိၣ်(NUG)ထုးထီၣ်ပာ်ဖျါ၀ဲအသိးန့ၣ်စးထီၣ်(၂၀၂၁)လါဖ့ၤဘြူအါရံၤ(၁)သီသုးဟံးန့ၢ်တၢ်စိတၢ်ကမီၤ တုၤလၢ(၂၀၂၄)လါဖ့ၤဘြူၤအါရံၤ(၆)သီန့ၣ် ခီဖျိသုးကီၣ်ကးအတၢ်မၤဟးဂီၤလၢကျဲကလုာ်ကလုာ်အဃိ လၢကီၢ်ပယီၤဒီတဘ့ၣ်အပူၤန့ၣ်ကၠိဟးဂီၤ၀ဲဒၣ်အဖျၢၣ်(၂၀၀)ဃၣ်ဃၣ်ဒီးၦၤဖိသၣ်(၁၈)နံၣ်ဆူဖီလာ်သံ၀ဲဒၣ်(၆၃၀)ဂၤ အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဖဲတလါအံၤလါဖ့ၤဘြူၤအါရံၤ(၅)သီအနံၤစ့ၢ်ကီးခီဖျိသုးကီၣ်ကးကဘီယူၤဟဲခးလီၤတၢ်လၢကရ့ၣ်နံၣ်ကီၢ်စဲၣ် ဒံၣ်မီစိကီၢ်ဆၣ် ဒီဆံအံၤဒီးလွဲၤနါဖါသ၀ီ ကၠိကရၢၢ်ပူၤအဃိၦၤသံ(၇)ဂၤအကျါပာ်ဃုာ်ဖိသၣ်(၄)ဂၤဒီး ဘၣ်ဒိဘၣ်ထံးတစှၤန့ၢ်(၂၀)ဘၣ် အဂ့ၢ်န့ၣ် ကရ့ၣ်နံၣ်ဂ့ၢ်၀ီခွဲးယာ်ကရူၢ်(KnHRG)ထုးထီၣ်ပာ်ဖျါတ့ၢ်ဃာ်၀ဲန့ၣ်လီၤႉ လၢတၢ်န့ၣ်အဃိအိၣ်ဆၢထၢၣ်ဃုာ်ဒီးၦၤကၠိဖိလၢအဖံးလိမၤလိတၢ်လၢထံကီၢ်လီၢ်ကီၢ်ပူၤလၢအဘၣ်ဃ့ၢ်မှံဟးဖျိးတဖၣ်ဒီး ခါလၢကဟဲဆူညါစ့ၢ်ကီးတအဲၣ်ဒိးလၢကမၤလိဘၣ်တၢ်ဒ်အံၤဘၣ်ဒီးမ့မ့ၢ်တခီအဲၣ်ဒိးလၢအ၀ဲသ့ၣ်ကမၤလိဘၣ်တၢ် မုာ်မုာ်ခုၣ်ခုၣ်အဂ့ၢ်န့ၣ် သူမှဲခံကၠိဖိနီၢ်မံမံ စံး၀ဲဒ်အံၤန့ၣ်လီၤႉ “ကၠိဖိမုၣ်ခွါသရၣ်သမါသ့ၣ်တဖၣ်သုမ့ၢ်ဘၣ်ကွၢ်ဆၢမဲာ်ဒီးတၢ်ကီတၢ်ခဲသ့ၣ်တဖၣ်မ့ၢ်ဂ့ၤႇ ပယီၤသုးသ့ၣ်တဖၣ်တၢ်ဆီၣ်တံၢ်မၤ နၢၤမ့ၢ်အိၣ်ဘၣ်ဆၣ်သနာ်က့န့ၣ်သုမ့ၢ်ထီၣ်ဘၣ်ကၠိမၤလိဘၣ်တၢ်တကုၤတကျီဒီးမၤလိတခီဘၣ်ဃ့ၢ်တခီသနာ်က့သုတဘၣ်လိၣ်သးဆံးဘၣ်...