ပယီၤသုးအိၣ်ခၠီနခွးသ၀ီပူၤတဖၣ်အံၤနု၁်လီၤဟုၣ်ၦၤကမျၢၢ်တၢ်ဖိတၢ်လံၤဒွဲၣ်အူအီၣ်ဃု၁်ၦၤဟံၣ်
လါယနူၤအါရံၤ ၂၆ သီႇ ၂၀၂၄ နံၣ်ႇ ခ့ၣ်အဲးစံၣ် ပယီၤသုးလၢအအိၣ်ဆီလီၤသးလၢကညီကီၢ်စဲၣ် နိၣ်တကီကီၢ်ဆၣ်ဒီးတလၢၤကၠီၢ်စဲၣ် ကၠဲၣ်မယီကီၢ်ဆၣ်အဆၢ ခၠီနခွးသ၀ီအပူၤတဖၣ်အံၤ အ၀ဲသ့ၣ်နုာ်လီၤဟုၣ်ၦၤသ၀ီဖိတၢ်ဖိတၢ်လံၤဒီးဒွဲၣ်အူအီၣ်ဃုာ်၀ဲၦၤဟံၣ်အဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ အပူၤကွံာ်ခီဖျိတၢ်ဒုးကဲထီၣ်အဃိခၠီနခွးသ၀ီဖိတဖၣ်ဃ့ၢ်ထီၣ်၀ဲဒၣ်ခဲလၢာ်ဃၣ်ဃၣ်ဒီးဖဲ(၂၀၂၃)နံၣ်လၢာ်န့ၣ် ပယီၤသုးအံၤဟဲနုာ်လီၤအိၣ်လၢခၠီနခွးသ၀ီပူၤဒီးအ၀ဲသ့ၣ်နုာ်လီၤဟုၣ်ကမျၢၢ်လၢအဃ့ၢ်ထီၣ်တဖၣ်အတၢ်ဖိတၢ်လံၤ အိၣ်၀ဲကိးမုၢ်နံၤဒီးတကးဒံးဘၣ်ဒွဲၣ်အူအီၣ်ဃုာ်စ့ၢ်ကီး၀ဲၦၤဟံၣ်အဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤႉ လီၢ်က၀ီၤၦၤသ၀ီဖိတဂၤစံး၀ဲလၢ“ပယီၤသုးတဖၣ်န့ၣ်ဟံၦၤတၢ်ဖိတၢ်လံၤ၀ံၤဘျီန့ၣ်ဒွဲၣ်အူအီၣ်ဃုာ်ၦၤဟံၣ်ႉ ဟံၣ်အူအီၣ် န့ၣ်ကအိၣ်ကိးမုၢ်ဒဲးဃၣ်ဃၣ်လီၤႉဖဲအ၀ဲတနံၤန့ၣ်မ့ၣ်အူအီၣ်ၦၤဟံၣ်ဒံး”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါဒူသ၀ီၦၤသ၀ီဖိလၢအိၣ်ဘူးခၠီနခွးလၢအမၤအီၣ်စံာ်တဖၣ်ခဲအံၤတၢ်ဆၢကတီၢ်တုၤလၢ ကဘၣ်ကူးဘုလံဒီးဘၣ်ဆၣ်အ၀ဲသ့ၣ်က့ၤကူးဘုတဘူၣ်ဘၣ်အဂ့ၢ်န့ၣ် ခၠီနခွးသ၀ီဖိတဖၣ် စံး၀ဲန့ၣ်လီၤႉ “ခဲအံၤအခါဘၣ်လၢၦမဘၣ်ကူးကဒါဘုလံႉသ၀ီလၢအအိၣ်ယံၤဒီးခၠီနခွးတဖၣ်တနီၤန့ၣ်အ၀ဲသ့ၣ်က့ၤကူးဘုအိၣ်ႉ မ့မ့ၢ်ဘုလၢအိၣ်ခၠီနခွးအကပိၤကပၤတဖၣ်န့ၣ်ၦၤက့ၤကူးတဘူၣ်ဘၣ်”အဂ့ၢ်န့ၣ် ခၠီနခွးသ၀ီဖိလၢအဂၤတဂၤစ့ၢ်ကီး စံး၀ဲန့ၣ်လီၤႉ ဒူသ၀ီလၢအိၣ်ခၠီနခွးအပိၤကပၤတဖၣ်န့ၣ်ဖဲတၢ်စူၤခါအဆၢကတီၢ်ထံဒိၣ်ထီၣ်ဒီးခီဖျိထံထီၣ်လၢစံာ်ခီးပူၤအဃိ အ၀ဲသ့ၣ်သူၣ်ဘုတသ့ဘၣ်ဒီးတၢ်စူၤမ့လီၤစှၤမးဘၣ်စးထီၣ်သူၣ်လီၤ၀ဲဘုန့ၣ်လီၤႉတကီၢ်ခါခဲအံၤဆၢကတီၢ်ဘၣ်လၢ အ၀ဲသ့ၣ်ဘၣ်ကူးဘုလံဘၣ်ဆၣ် ခီဖျိတၢ်ဒုးတၢ်ယၤတၢ်အိၣ်သးအဃိတၢ်ကီတၢ်ခဲအိၣ်လၢကက့ၤကူးဘုအဂ့ၢ်န့ၣ် လီၢ်က၀ီၤၦၤသ၀ီဖိတဖၣ် စံး၀ဲန့ၣ်လီၤႉ ပယီၤသုးလၢအအိၣ်ဆီလီၤသးဖဲခၠီနခွးသ၀ီအပူၤသ့ၣ်တဖၣ်အံၤအ၀ဲသ့ၣ်နုာ်လီၤဟုၣ်ၦၤကမျၢၢ်အတၢ်ဖိတၢ်လံၤ လၢအလုၢ်ဒိၣ်ၦ့ၤဒိၣ်၀ံၤဒွဲၣ်အူအီၣ်ဃုာ်၀ဲၦၤဟံၣ်ၦၤဃီကဲထီၣ်သးတလီၢ်လီၢ်ဒီးတကးဒံဘၣ်အမဲာ်ညါ တၢ်ဒုးကဲထီၣ်တအိၣ်ဘၣ်ဘၣ်ဆၣ်အ၀ဲသ့ၣ်ခးလီၤကျိဖးဒိၣ်အိၣ်၀ဲကိးမုၢ်နံၤဒဲးအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ကီးတရံး၀့ၢ်ခံလါဃၣ်ဃၣ်အတီၢ်ပူၤမ့ၣ်အူအီၣ်ၦၤဃ့ၢ်မှံဟးဖျိးအဟံၣ်ထီၣ်ဘးလၢ(၃၀၀)ဃၣ်ဃၣ်
လါယနူၤအါရံၤ ၂၅ သီႇ ၂၀၂၄ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ဒူပျာ်ယာ်ကီၢ်ရ့ၣ် ကီးတရံး၀့ၢ်ပူၤန့ၣ် တၢ်ပၢၢ်ဆၢသုးပာ်ဖှိၣ်ဒီးပယီၤသုးအဘၢၣ်စၢၤ တၢ်ဒုးကဲထီၣ်ကအိၣ်လၢခံလါဃၣ်ဃၣ်လံဒီးတကီၢ်ခါခဲအံၤမ့ၣ်အူအီၣ်ကမျၢၢ်ၦၤဃ့ၢ်မှံဟးဖျိးအဟံၣ်အဃီကအိၣ်လၢ (၃၀၀)ဃၣ်ဃၣ်လံအဂ့ၢ်န့ၣ် လီၢ်က၀ီၤကမျၢၢ်လၢအအိၣ်ဘူးဖဲန့ၣ်တဖၣ် စံး၀ဲန့ၣ်လီၤႉ ဖဲတနံၤအံၤလါယနူၤအါရံၤ ၂၅ သီ ဂီၤခီအဆၢကတီၢ်န့ၣ် လၢကီးတရံး၀့ၢ်ပူၤမ့ၣ်အူအီၣ်ဟံၣ်ခုၣ်ထီၣ်ရုၢ်ရုၢ်လီၤဒီး မတၤတဂၤမးနုာ်လီၤလၢ၀့ၢ်ပူၤတဘူၣ်နီဂၤဘၣ်အဂ့ၢ်န့ၣ် ကီးတရံး ကမျၢၢ်လၢအဟံၣ်အူအီၣ်တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“အခဲအံၤမ့ၣ်အူခုၣ်ထီၣ်ခုၣ်ကဖၣ်လီၤႇနလဲၤကွၢ်တဘူၣ်ဘၣ်ႉမ့ၣ်အူအီၣ်ၦၤဟံၣ်ဒုကအိၣ်လၢ(၂၀၀)ႇ (၃၀၀)ဃၣ်ဃၣ်လံႉယဟံၣ်နါက့မ့ၣ်အီၣ်၀ဲကန့ၢ်တလါဘျဲၣ်လံႉမ့ၣ်အူအီၣ်ဟံၣ်လၢလီၢ်ခံတဖၣ်အံၤပလဲၤကွၢ်တဘူၣ်လၢၤဘၣ်ႉ ခဲအံၤခးတၢ်လဲးကူၣ်လီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲတနံၤအံၤန့ၣ်လီၤႉ စးထီၣ်ဖဲအပူၤကွံာ်(၂၀၂၃)လါဒံၣ်စ့ဘၢၣ်ထီၣ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တီခိၣ်ရိၣ်မဲ တၢ်ပၢၢ်ဆၢသုးပာ်ဖှိၣ်နုာ်လီၤခး၀ဲပယီၤသုးလၢကီးတရံး၀့ၢ်ပူၤအံၤဒီးဖဲန့ၣ်တၢ်ဒုးကဲထီၣ်၀ဲလၢခံခီခံကပၤအဘၢၣ်စၢၤ န့ၣ်လီၤႉခီဖျိတၢ်ဒုးကဲထီၣ်အဃိၦၤကမျၢၢ်သံဘၣ်ဒိဘၣ်ထံးအိၣ်၀ဲဒၣ်အါမးဒီးၦၤကမျၢၢ်ဘၣ်ဃ့ၢ်ထီၣ်အိၣ်လၢအကလးညါအဂ့ၢ်န့ၣ် သ့ၣ်ညါဘၣ်န့ၣ်လီၤႉ တကီၢ်ခါခဲအံၤလၢကီးတရံး၀့ၢ်ပူၤတၢ်ဒုးကဲထီၣ်၀ဲလၢတၢ်ပၢၢ်ဆၢသုးပာ်ဖှိၣ်ဒီးပယီၤသုးအဘၢၣ်စၢၤအိၣ်၀ဲကိးမုၢ်နံၤဒဲး ဃၣ်ဃၣ်ဒီးပယီၤသုးအံၤခးလီၤကျိဖးဒိၣ်ႇဟးတ့ၢ်လီၤဒြိမ့ၣ်ပိၢ်အိၣ်၀ဲတလီၢ်လီၢ်အဂ့ၢ်န့ၣ် လီၢ်က၀ီၤကမျၢၢ်လၢအအိၣ်ဘူးဖဲ န့ၣ်တဖၣ်စံး၀ဲန့ၣ်လီၤႉ ဘၣ်ဃးမ့ၣ်အူအီၣ်ၦၤကမျၢၢ်အဟံၣ်လၢကီးတရံး၀့ၢ်ပူၤတၢ်အိၣ်သးလၢလီၢ်ခံကတၢၢ်အံၤန့ၣ် ကီးတရံးကမျၢၢ်လၢအဂၤတဂၤ စ့ၢ်ကီးစံး၀ဲလၢ“ခဲအံၤလၢကီးတရံးအံၤဒုၦၤစံၣ်ထီၣ်လၢာ်လံၦၤစံၣ်ထီၣ်ဒီတ၀့ၢ်လီၤႉကအိၣ်တ့ၢ်က့ၤထဲစှၤဂၤလီၤႉၦၤကမျၢၢ်တဖၣ်လဲၤစံၣ်အိၣ်လၢဖၣ်အၣ်၊က့ၤစံၣ်ထီၣ်လၢမၠၣ်တ၀ံၣ်ႇလဲၤစံၣ်အိၣ်၀ဲလၢသ၀ီလၢအဂၤတဖၣ်မီၤနီၤႉၦၤကမျၢၢ်လၢအတစံၣ်ဘၣ်အအိၣ်ခိးဟံၣ်တဖၣ်စ့ၢ်ကီးဟးထီၣ်တၢ်ချၢတဘူၣ်ဘၣ်ႉကီးတရံး၀့ၢ်ပူၤအံၤမ့ၣ်အူအီၣ်ဟံၣ်ကအိၣ်လၢ(၂၀၀),(၃၀၀)ဘျဲၣ်လံႉဟံၣ်လၢအအူအီၣ်တဖၣ်န့ၣ်အါဒၣ်တက့ၢ်ဟံၣ်ဒိၣ်လီၤႉဟံၣ်အူအီၣ်န့ၣ်ဟံၣ်တၢးႇဟံၣ်သ့ၣ်ပၣ်အါဒၣ် တက့ၢ်ဟံၣ်လၢအဂ့ၤလီၤႇဟံၣ်လၢတဂ့ၤဘၣ်န့ၣ်အိၣ်စှၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲတနံၤအံၤ လါယနူၤအါရံၤ ၂၅ သီအနံၤ န့ၣ်လီၤႉ လၢန့ၣ်အမဲာ်ညါဟံၣ်ဃီလၢမ့ၣ်အူအီၣ်သ့ၣ်တဖၣ်န့ၣ်ဟံၣ်လၢအတဂ့ၤအါအါဘၣ်အစှၤကတၢၢ်အလုၢ်အၦ့ၤကအိၣ်လၢ အကလီၢ်(၃၀၀)ဒီးဟံၣ်လၢအဂ့ၤတဖၣ်အလုၢ်အၦ့ၤကအိၣ်လၢအကလီၢ်လၢအကထိညါန့ၣ်လီၤႉ ဒ်န့ၣ်အသိးဟံၣ်လၢအအူအီၣ်သ့ၣ်တဖၣ်အံၤမ့ၢ်ဒၣ်တၢ်ဒွဲၣ်အူအီၣ်၀ဲဒၣ်လီၤဒီးဘၣ်ဆၣ်မ့ၢ်မတဂၤဒွဲၣ်အူအီၣ်၀ဲလဲၣ်န့ၣ် တဲလီၤတံၢ်တဘၣ်ဘၣ်အဂ့ၢ်န့ၣ် ကီးတရံးကမျၢၢ်တဂၤဃီ၀ဲန့ၣ် စံးအါထီၣ်၀ဲဒၣ်န့ၣ်လီၤႉ ကီးတရံး၀့ၢ်ပူၤခီဖျိတၢ်ဒုးတၢ်ယၤကဲထီၣ်အဃိၦၤကမျၢၢ်တဖၣ်လဲၤစံၣ်အိၣ်၀ဲဒၣ်လၢဖၣ်အၣ်၀့ၢ်ႇမၠၣ်၀တံၣ်၀့ၢ်ႇ ဒူသ၀ီလၢအဂၤအိၣ်၀ဲဒီးဘၣ်ဆၣ်မ့မ့ၢ်ၦၤလၢအလဲၤစံၣ်အိၣ်လၢဖၣ်အၣ်၀့ၢ်ပူၤသ့ၣ်တဖၣ်အံၤထံၣ်ဘၣ်၀ဲတၢ်ကီတၢ်ခဲလၢ တၢ်ငါအိၣ်ဟံၣ်ငါအိၣ်ဃီတကပၤအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ တကီၢ်ခါခဲအံၤလၢကီးတရံး၀့ၢ်ပူၤန့ၣ်ၦၤကမျၢၢ်တအိၣ်လၢၤဘၣ်ဃ့ၢ်ထီၣ်ဒီတ၀့ၢ်ညါဒီးအိၣ်ဒၣ်ၦၤအိၣ်ခိးကွၢ်ထွဲၦၤဟံၣ် ၦၤဃီစှၤဂၤဒ်န့ၣ်လီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢကီးတရံး၀့ၢ်ပူၤတၢ်ဒုးကဲထီၣ်လၢခံခီခံကပၤအဘၢၣ်စၢၤအတီၢ်ပူၤအံၤမ့ၣ်အူအီၣ်ကမျၢၢ်ၦၤဃ့ၢ်မှံဟးဖျိး အဟံၣ်ကဲထီၣ်သးတလီၢ်လီၢ်ဒီးဒ်န့ၣ်အသိးဖဲလါယနူၤအါရံၤ ၂၁ သီအနံၤစ့ၢ်ကီး ခီဖျိမ့ၣ်အူအီၣ်ကဲထီၣ်သးလၢ(က၀ီၤဒ့ ၅) ဒီး(က၀ီၤဒ့ ၇)ပူၤအဃိ ဟံၣ်ဟးဂီၤကအိၣ်၀ဲဒၣ်လၢအဖျၢၣ်(၆၀)ဘျဲၣ်ညါအဂ့ၢ်န့ၣ်...
ခ့ၣ်အဲၣ်ယူၣ်သုးက့(၄)ထီၣ်ဒုးန့ၢ်ကွံာ်ပယီၤသုးကလၢၤတဖျၢၣ်လၢဟဲအိၣ်ဆီလီၤသးန့ၢ်(၂၆)နံၣ်
လါယနူၤအါရံၤႇ ၂၅သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢသုးက့(၄)ႇဘျံးဒ၀ဲၢ်ကီၢ်ရ့ၣ်ႇကစၢၢ်ဒိၣ်ကီၢ်ဆၣ်ႇထူလၢၢ်သ၀ီထူလၢၢ်ပယီၤသုးကလၢၤလၢဟဲအိၣ်ဆီလီၤတ့ၢ်သးန့ၢ်ယံာ်၀ဲ(၂၆)နံၣ်ဃၣ်ဃၣ်အံၤႇဖဲမဟါလါယနူၤအါရံၤ(၂၄)အနံၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်သုး(KNLA)ဒီးသုးပာ်ဖှိၣ်သ့ၣ်တဖၣ်ထီၣ်ဒုးန့ၢ်ကွံာ်၀ဲဒၣ်အဂ့ၢ်သ့ၣ်ညါဘၣ်န့ၣ်လီၤႉ ထူလၢၢ်ပယီၤသုးကလၢၤ၀ဲအံၤအိၣ်ဆီလီၤ၀ဲအသးလၢ(KNLA)သုးရ့ၣ်(၁၂)တၢ်ပၢဟီၣ်က၀ီၤဒီးတၢ်ဒုးစးထီၣ်ကဲထီၣ်၀ဲဒၣ်ဖဲ(၂၄)သီမုၢ်ထူၣ်အဆၢကတီၢ်ဒီးဖဲမုၢ်ဃ့ၢ်လီၤ(၂)နၣ်ရံၣ်အဆၢကတီၢ်(KNLA)သုးက့(၄)၊( KNLA)သုးက့(၆)သုးရ့ၣ်(၂၇)ဒီးကမျၢၢ်တၢ်ဒီသဒၢသုး( PDF)သ့ၣ်တဖၣ်ထီၣ်မၤန့ၢ်ကွံာ်၀ဲဒၣ်န့ၣ်လီၤႉ လၢတၢ်ထီၣ်ဒုးန့ၢ်၀ဲထူလၢၢ်ပယီၤသုးကလၢၤဘျီ၀ဲအံၤန့ၣ် ဒ်ကညီကွဲၤလ့လိၤဒိးန့ၢ်ဘၣ်စိတၢ်ကစီၣ်အသိးန့ၣ် ပယီၤသုးသံ(၆)ဂၤႇ တၢ်ဖီၣ်မူဒံးန့ၢ်(၃)ဂၤႇ ဃ့ၢ်ဖျိးအဂၤ(၃၀)ဘျဲၣ်ႇဒီးတၢ်မၤန့ၢ်ဃုာ်ဒီးတၢ်စုက၀ဲၤတနီၤအဂ့ၢ်သ့ၣ်ညါဘၣ်အသိးခီဖျိပယီၤသုးဃ့ၢ်ဖျိးအိၣ်အဃိတၢ်လူမၤပျီ၀ဲဟီၣ်က၀ီၤအဖၢမုၢ်အဂ့ၢ် သုးက့ၦၤဘၣ်မူဘၣ်ဒါစံးဘၣ်၀ဲဒၣ်ကညီကွဲၤလ့လိၤန့ၣ်လီၤႉ ထူလၢၢ်ပယီၤသုးကလၢၤ၀ဲအံၤန့ၣ် စးထီၣ်ဟဲအိၣ်ဆီလီၤသးဖဲႇခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢသုးက့(၄)တၢ်ပၢဟီၣ်က၀ီၤႇစးထီၣ်လၢ(၁၉၉၈)နံၣ်ဒီးဖဲတၢ်ထီၣ်ဒုးသုးကလၢၤအဆၢကတီၢ်ပယီၤသုးၦၤနီၢ်ဂံၢ်ကအိၣ်အဂၤ၅၀ဃၣ်ဃၣ်အဂ့ၢ်သ့ၣ်ညါဘၣ်ဒ်လီၢ်က၀ီၤဂံၢ်ခီၣ်ထံးတၢ်ကစီၣ်စံး၀ဲအသိးန့ၣ်လီၤႉ
ထါဒိတလ့ၤကညီလံ၁်ခီၣ်ထံး
ထါဒိတလ့ၤကညီလံ၁်ခီၣ်ထံး က. ကညီဖိလၢစိၤခဲအံၤ ခ. ချုးစိၤပီညါအိၣ်အါမံၤ ဂ. ဂု၁်ကျဲးစၢးလၢသုသနၢၣ် ဃ. ဃုထၢဒ်ကစၢ်ဖီတၢၣ် င. ငီင၁်အီပီဟးပဒ့ၣ် စ. စူၢ်န၁်မှံၤၦၢ်အတၢ်ဟ့ၣ် ဆ. ဆီၣ်လီၤပသးအိၣ်ၦၤကျါ ၡ. ၡူးတဂ့ၤကညီမုၣ်ခွါ ည. ညိၣ်ပ၁်ကျဲထွဲထီၣ်ပခီၣ် တ. တၢ်မၤနၢၤကအိၣ်ဖျါထီၣ် ထ. ထိၣ်တဲ၁်လီၤကျဲမၤဒူဒူ ဒ. ဒိၣ်ဆံးပြံသွါလဲၤဃူဃူ န. နသးဒီးနနီၢ်ကစၢ် ပ. ပသးကစၢ်မၤနၢၤတၢ် ဖ. ဖှီၣ်နးကီခဲဘၣ်ခီဖျိ ဘ. ဘူၣ်တီၢ်တတုၤအိၣ်ဒံးဃိ မ. မုၢ်လီၤနု၁်လါစံၣ်ထီၣ်က့ၤ ယ. ယွၤကဟ့ၣ်နၤတၢ်ဆိၣ်ဂ့ၤ ရ. ရ့ၦၤဂၤသ့သ့ဘၣ်ဘၣ် လ. လီၢ်လၤဒီးမံၤသၣ်ဂ့ၤဘၣ် ဝ. ဝံၢ်ထီၣ်သကိးဟံၣ်ထူၣ်ထူ သ. သနူထူမ့ၢ် ပအိၣ်ဃူ ဟ. ဟ့ၣ်ဃၣ်တဂ့ၤတၢ်အိၣ်မူ အ. အဲၣ်ပၢၤဃ၁်ပထူသနူ ဧ. ဧူၢ်ထီၣ်ဒ်မုၢ်တၢ်ကပီၤ ကညီမုၣ်ခွါပှိၢ်ဒီးစှီၤ. လၢ တၢ်အဲၣ်ကကွဲၢ်ကဘီ စီၤကီၢ်ဖျါစ့ (တီနီၢ်ဖိ) ၂၄.၁.၂ဝ၂၄
ပယီၤသုးနီစံၣ်လီၤမယိခိၤသ၀ီဖိတဖၣ်လၢဟံၣ်ပူၤဒီးဒွဲၣ်အူကဒီး၀ဲဟံၣ်တစှၤန့ၢ်(၃၀)ဖျၢၣ်
လါယနူၤအါရံၤ ၂၄ သီ ၂၀၂၄ နံၣ် ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတီအူကီၢ်ရ့ၣ်(သုးက့ ၂)ဟီၣ်က၀ီၤအပူၤ ဖဲမဟါလါယနူၤအါရံၤ(၂၃)သီအနံၤပယီၤသုးကျိၤနုာ်လီၤ၀ဲလၢ ယ့ၤတၤဆ့ၤကီၢ်ဆၣ် မယိခိၤ သ၀ီအပူၤဒီးနီစံၣ်လီၤကွံာ်ၦၤသ၀ီဖိလၢဟံၣ်ပူၤ၀ံၤ ဒွဲၣ်အူကွံာ်၀ဲကမျၢၢ်အဟံၣ်တစှၤန့ၢ်(၃၀)ဖျၢၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ ဖဲအပူၤကွံာ်လါဒံၣ်စ့ဘၢၣ် ၂၅ သီအနံၤန့ၣ်လၢ မယိခိၤ သ၀ီကပၤတၢ်ဒုးကဲထီၣ်လၢခံခီခံကပၤအဘၢၣ်စၢၤဒီး မုၢ်ဆ့ၣ်ထီၣ် ၂၆ သီအနံၤန့ၣ် ပယီၤသုးနုာ်လီၤလၢသ၀ီပူၤဒီးအဆိကတၢၢ်တဘျီဒွဲၣ်အူအီၣ်၀ဲၦၤကမျၢၢ်အဟံၣ် (၄၂)ဖျၢၣ်န့ၣ်လီၤႉ ဖဲန့ၣ်အ၀ံၤလီၢ်ခံဖဲမဟါလါယနူၤအါရံၤ၂၃ သီမုၢ်ဃ့ၢ်လီၤ ၁း၃၀ မံးနံးအဆၢကတီၢ်န့ၣ် ပယီၤသုးကျိၤလၢၦၤနီၣ်ဂံၢ်အိၣ် ၁၅၀ ဃၣ်ဃၣ်အံၤဟဲနုာ်လီၤကဒီး၀ဲလၢ မယိခိၤ သ၀ီပူၤ၀ံၤနီစံၣ်လီၤၦၤသ၀ီလၢဟံၣ်ပူၤဒီးခံဘျီတဘျီဒွဲၣ်အူထီၣ်ကွံာ်၀ဲကမျၢၢ်အဟံၣ်အဂ့ၢ်န့ၣ် လီၢ်က၀ီၤဖိလၢအိၣ်ဘူးဖဲန့ၣ်တဂၤစံး၀ဲန့ၣ်လီၤႉ အ၀ဲစံး၀ဲလၢ “ဖဲၦၤသ၀ီဖိအိၣ်လၢသ၀ီပူၤအဆၢကတီၢ်အ၀ဲသ့ၣ်ဟဲနုာ်လီၤမီၤႉ ဟံၣ်လၢၦၤအိၣ်သ့ၣ်တဖၣ်န့ၣ် မၢ၀ဲၦၤသ၀ီဖိသ့ၣ်တဖၣ်ဟးထီၣ်ကွံာ်ဒီးဒွဲၣ်အူကွံာ်၀ဲမီၤနီၤႉ အ၀ဲသ့ၣ်စးထီၣ်ဒွဲၣ်အူ၀ဲလၢသ၀ီအခိၣ်ထိးတကပၤလီၤႉ ဖံသးၦၢ်လၢအဟံၣ်အိၣ်လၢသ၀ီခိၣ်ထိးတဂၤန့ၣ်ၦၤမၢအဟးထီၣ်လၢဟံၣ်ပူၤမီၤႉ ဖံသးၦၢ်တဂၤန့ၣ်တဲ၀ဲလၢမ့ၢ်အဲၣ်ဒိးဒွဲၣ်န့ၣ်ဒွဲၣ်ကွံာ်ခီမ့ၢ်လၢဖံသးၦၢ်တဂၤန့ၣ်ကလံၤဖၠးအီၤအဃိအ၀ဲတဲလၢအဟးတကဲဘၣ်မီၤနီၤႉ အဃိန့ၣ်တၢ်ပာ်တ့ၢ်ကွံာ်၀ဲဟံၣ်တဖျၢၣ်န့ၣ်လီၤႉ ဟံၣ်အူအီၣ်န့ၣ်ကအိၣ်လၢအဖျၢၣ်(၃၀)ဘျဲၣ်ညါ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ မယိခိၤ သ၀ီပူၤအံၤတၢ်သဘံၣ်သဘုၣ်ကဲထီၣ်သးတအိၣ်၀ဲဘၣ်ဒီးဘၣ်ဆၣ်ပယီၤသုးနုာ်လီၤဒွဲၣ်အူကွံာ်ၦၤကမျၢၢ် အဟံၣ်အဃီအံၤအိၣ်၀ဲခံဘျီလံဒီးဖဲတနံၤဃီ၀ဲန့ၣ်ပယီၤသုးဟးထီၣ်ကွံာ်လၢသ၀ီအပူၤန့ၣ်လီၤႉ မ့မ့ၢ်လၢလီၢ်က၀ီၤဖိသ့ၣ်တဖၣ်ဃ့ၢ်ထီၣ်လဲၤအိၣ်၀ဲဒၣ်လၢခိခိၣ်ၦၢ်လၢ်ကျါအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤတၢ်ပၢၢ်ဆၢသုးပာ်ဖှိၣ်ကရူၢ်အအိၣ်န့ၣ်လီၤႉ ဖဲလါယနူၤအါရံၤထီၣ်သီသီအခါန့ၣ်လၢ ပကိကီၢ်ခီဒိၣ် ဃုာ်ဒီး ယ့ၤတၤစှ့ၤကီၢ်ဆၣ် ဒူသ၀ီသ့ၣ်တဖၣ်အပူၤန့ၣ် ပယီၤသုးဟးထၢ၀ဲၦၤသ၀ီဖိသ့ၣ်တဖၣ်လၢကထီၣ်၀ဲဂၢၤကီၢ်သုးတၢ်မၤလိဒီးဖဲန့ၣ်အကျါပၣ်ဃုာ်စ့ၢ်ကီး၀ဲမယိခိၤ သ၀ီအံၤန့ၣ်လီၤႉ ဒ်န့ၣ်အသိးၦၤပိာ်ခွါအိၣ်လၢသ၀ီပူၤတဖၣ်ဘၣ်ယိၣ်၀ဲလၢကပၣ်ဃုာ်အ၀ဲသ့ၣ်အဃိ ဖဲအ၀ဲသ့ၣ်ဟးအိၣ်ခူသူၣ်အဆၢကတီၢ်တၢ််ကဲထီၣ်အသးဒ်အံၤလီၤအဂ့ၢ်န့ၣ်တၢ်ပၢၢ်ဆၢသုးပာ်ဖှိၣ်ကရူၢ်တကပၤစံး၀ဲန့ၣ်လီၤႉ တီအူကီၢ်ရ့ၣ် တၢ်ဒီသဒၢကမျၢၢ်သုးကရူၢ် သုးရ့ၣ် ၃၅၀၁ တၢ်ကစီၣ်ဒီးတၢ်ဘိးဘၣ်ရၤလီၤမူဒါခိၣ် နၣ်မီၣ်...
ခီကီၢ်-ဆၣ်သူလ့ၤကၠိမၤ၀ဲကၠိဖိတၢ်ရ့လိာ်မုာ်လိာ်တၢ်ဂဲၤလိၣ်ကွဲမုၢ်နံၤ
လါယနူၤအါရံၤ ၂၄ သီႇ ၂၀၂၄ နံၣ်ႇ ခ့ၣ်အဲးစံၣ် ဒ်သိးကၠိဖိတဖၣ်ကအိၣ်ဒီးတၢ်သ့ရ့တံၤရ့သကိး˜တၢ်ပာ်ဖှိၣ်မၤသကိးတၢ်အဂီၢ်ခီကီၢ်ဆၣ်သူလ့ၤတီၤထီကၠိမၤ၀ဲကၠိဖိတၢ်ရ့လိာ်မုာ်လိာ်တၢ်လိာ်ကွဲမုၢ်နံၤလၢကီၢ်ကၠီၣ်တဲၣ်ကီၢ်ပယီၤကီၢ်ဆၢမဲၢ်ဆီး၀့ၢ်ဖဲလါယနူၤအါရံၤ၂၂သီအနံၤဂီၤခီ(၈)နၣ်ရံၣ်တုၤလၢဟါခီ(၃)နၣ်ရံၣ်အဆၢကတီၢ်အဂ့ၢ်သ့ၣ်ညါဘၣ်န့ၣ်လီၤႉ ခီဖျိမၤန့ၢ်၀ဲကၠိဖိတၢ်တဖၣ်တၢ်လိၣ်ကွဲမုၢ်နံၤဒ်အံၤအဖီခိၣ်န့ၣ်ကၠိဖိတဖၣ်ဒိးန့ၢ်ဘၣ်၀ဲနီၢ်ခိတၢ်လိၣ်ခိၣ်လိၣ်ကွဲဒီးဒိးန့ၢ်အါထီၣ်၀ဲတၢ်ရ့တံၤရ့သကိး၊တၢ်ဒိကနၣ်မၤထွဲကၠိသရၣ်သမုၣ်တဖၣ်အသိးတၢ်မၤန့ၢ်၀ဲကၠိဖိတၢ်ရ့လိာ်မုာ်လိာ်တၢ်လိၣ်ကွဲမုၢ်နံၤအံၤမ့ၢ်တၢ်အရ့ဒိၣ်အဂ့ၢ်ဆၣ်သူလ့ၤတီၤထီကၠိၦၤနဲၣ်တၢ်သရၣ်မုၣ်နီၢ်ဖီရ့ၣ်စံး၀ဲန့ၣ်လီၤႉ “ဒ်ကၠိတၢ်ပညိၣ်အိၣ်၀ဲအသိးန့ၣ်လၢတၢ်ကူၣ်ဘၣ်ကူၣ်သ့တကပၤခီန့ၣ်ပကျဲးစၢးသၦၢ်ကတၢၢ်လံတုၤဒၣ်လဲာ်ပကၠိဖိတဖၣ်န့ၢ်ထီၣ်ဘၣ်တုၤလၢဖၠၣ်စိမိၤန့ၣ်အိၣ်အါမးလံဒ်န့ၣ်အသိးလၢတၢ်ဒိၣ်ထီၣ်လၢနီၢ်ခိတၢ်လိၣ်ခိၣ်လိာ်ကွဲတကပၤသနာ်က့အရ့ဒိၣ်၀ဲမီၤကၠိဖိတဖၣ်န့ၣ်ကဘၣ်ဒိၣ်ထီၣ်၀ဲၦဲၤဒီးဂံၢ်ဘါကအိၣ်ဒီးတၢ်အိၣ်ဆူၣ်အိၣ်ချ့တၢ်သ့ၣ်ညါနၢ်ပၢၢ်လုၢ်လၢ်သကဲာ်ပ၀းလၢအဂ့ၤအသိးလၢကၠိပူၤန့ၣ်အိၣ်၀ဲဒီးကရူၢ်တဖၣ်အဃိန့ၣ်ဒ်သိးကၠိပူၤကရူၢ်တဖၣ်အတၢ်မၤသကိးတၢ်တဖၣ်ကအိၣ်၀ဲ˜ကရ့တံၤသကိးကသ့၀ဲရဲၣ်သဲကတီၤလိာ်သးကဒဲကဒဲကသ့၀ဲမီၤနီၤဒီးအဂၤတမံၤန့ၣ်ကကဲ၀ဲတၢ်အိၣ်ဘှံးအိၣ်သါလၢအ၀ဲသ့ၣ်အဂီၢ်မီၤနီၤ” အဂ့ၢ်စံး၀ဲန့ၣ်လီၤႉ လၢန့ၣ်အမဲာ်ညါဒိးန့ၢ်ပာ်ဖှိၣ်မၤသကိးဘၣ်၀ဲကၠိတၢ်လိၣ်ကွဲမုၢ်နံၤဒ်အံၤအဃိသးခု၀ဲဒိၣ်မးဒီးသ့ၣ်ညါအါထီၣ်၀ဲကၠိပူၤၦၤလၢအတီၤတဒ်သိးဘၣ်တဖၣ်အသိးခီဖျိပာ်ဖှိၣ်မၤသကိးဘၣ်တၢ်ဒီးအတံၤသကိးကရူၢ်ခိၣ်တဖၣ်အဃိမၤလိန့ၢ်၀ဲတၢ်ပျၢ်လိာ်သးတၢ်ကမၣ်သ့ၣ်တဖၣ်အဂ့ၢ်(အတီၤတဆံ)ကၠိဖိမုၣ်နီၢ်ထံလီၤလးစံး၀ဲဒ်အံၤန့ၣ်လီၤႉ “ယသးခုတနံၤညါအံၤဒုယသးခုဖးဒိၣ်ကၠံညါယတူၢ်ဘၣ်လၢသရၣ်သရၣ်မုၣ်တဖၣ်န့ၣ်အသးအိၣ်လၢပဖီခိၣ်ဒီးအဲၣ်ၦၤမီၤနီၤဘၣ်မနုၤအဃိလဲၣ်န့ၣ်သရၣ်သရၣ်မုၣ်တဖၣ်မ့တမၤန့ၢ်ၦၤတၢ်လိာ်ကွဲမုၢ်နံၤဒ်အံၤဘၣ်ဒုပအိၣ်လၢကၠိပူၤထီဘိန့ၣ်အလီၤကၢၣ်မီၤနီၤမ့၀ံၤန့ၣ်ခီဖျိကၠိတၢ်လိၣ်ကွဲမုၢ်နံၤအံၤအဃိပသ့ၣ်ညါအါထီၣ်ပသကိးသ့ၣ်တဖၣ်ဒီးတနံၤအံၤယၤန့ၣ်ယဂဲၤကလံၣ်မီၤနီၤဖဲအပူၤကွံာ်ယကၠီးလိတၢ်ဂဲၤကလံၣ်အခါန့ၣ်လၢကရူၢ်တၢ်မၤသကိးအပူၤန့ၣ်ပသးထီၣ်လိာ်သးအိၣ်ခဲအံၤခဲအံၤလီၤမီၤဘၣ်ဆၣ်တနံၤအံၤပကရူၢ်ဒုပကျဲးစၢးအဂ့ၤကတၢၢ်အဃိပသးထီၣ်လိာ်သးသ့ၣ်လီၤမၢ်လံမီၤနီၤပသူၣ်ဖှံသးညီအဃိပမၤလိန့ၢ်လၢပဘၣ်သ့ၣ်ညါပျၢ်လိာ်သးတၢ်ကမၣ်ကမၣ်သ့ၣ်တဖၣ်န့ၣ်မီၤနီၤ” အဂ့ၢ်စံး၀ဲန့ၣ်လီၤႉ ဒ်န့ၣ်အသိးကၠိတၢ်လိၣ်ကွဲတၢ်ရ့လိာ်မုာ်လိာ်မုၢ်နံၤအံၤအတၢ်ပညိၣ်မ့ၢ်၀ဲဒ်သိး ၁။ဒ်သိးကၠိဖိမုၣ်ခွါတဖၣ်ကအိၣ်ဒီးတၢ်ဟူးတၢ်ဂဲၤလၢအဘၣ်ဃးဒီးနီၢ်ခိတၢ်အိၣ်ဆူၣ်အိၣ်ချ့ကလဲၤထီၣ်လဲၤထီအဂီၢ် ၂။ဒ်သိးကၠိဖိမုၣ်ခွါတဖၣ်ကဒုးလဲၤထီၣ်လဲၤထီကရူၢ်တၢ်ဟူးတၢ်ဂဲၤ၊တၢ်ဖံးတၢ်မၤဒီးတၢ်တီခိၣ်ရိၢ်မဲအပတီၢ် ၃။ဒ်သိးကၠိဖိမုၣ်ခွါ၊ကၠိသရၣ်သရၣ်မုၣ်တဖၣ်ဒီးကၠိဖိမိၢ်ပၢ်တဖၣ်ဘၢၣ်ကအိၣ်ဒီးတၢ်လဲၤထီၣ်လဲၤထီလၢတၢ်မၤသကိးတၢ်တကပၤတဖၣ်˜ အဂ့ၢ်ကၠိဖိစီၤအီၤမိဖးဖျါထီၣ်၀ဲဖဲတၢ်အိးထီၣ်တၢ်လိာ်ကွဲမူးတၢ်ရဲၣ်တၢ်ကျဲၤအပူၤန့ၣ်လီၤႉ ဖဲကၠိတၢ်ရ့လိာ်မုာ်လိာ်တၢ်လိာ်ကွဲမုၢ်နံၤတၢ်ရဲၣ်တၢ်ကျဲၤအပူၤန့ၣ်အိၣ်၀ဲဒီးကၠိဖိကရူၢ်(၅)ကရူၢ်တၢ်ဂဲၤကလံၣ်ပြၢႇမံတၢၣ်(၁၀၀ႇ၂၀၀ႇ၄၀၀)တၢ်ဃ့ၢ်ပြၢတဖၣ်˜တၢ်ဃ့ၢ်ပြၢလၢဟုသးထၢၣ်ပူၤ˜တၢ်ယူတပြၢပျံၤသ့ၣ်တဖၣ်အသိး˜ကၠိဖိတၢ်ရ့လိာ်မုာ်လိာ်တၢ်လိာ်ကွဲအတၢ်ရဲၣ်တၢ်ကျဲၤအပူၤကၠိဖိမုၣ်ခွါကၠိသရၣ်သရၣ်မုၣ်ကၠိဖိမိၢ်ပၢ်ဃုာ်ဒီးလံာ်ရိဒၢးတမှံၤခဲလၢာ်အဂၤ(၁၀၀၀)ဘျဲၣ်ပၣ်ဃုာ်ပၣ်ဂီၢ်၀ဲန့ၣ်လီၤႉ
ဒီၣ်ဖးခိၣ်ကလံၤစိးၦၤဃ့ၢ်တၢ်ဒုးဖိတဖၣ်ဃ့ထီၣ်၀ဲလၢတၢ်ကတ့ထီၣ်ဘှီထီၣ်န့ၢ်အ၀ဲသ့ၣ်တၢ်အိၣ်ကဒုလီၢ်
လါယနူၤအါရံၤအါရံၤ၂၄သီ၊၂၀၂၄နံၣ်၊ခ့ၣ်အဲၣ်စံၣ် ကညီဒီး(ကရံၣ်နံၣ်)ကီၢ်စဲၣ်ကီၢ်ဆၢ˜ဒီၣ်ဖးခိၣ်ကလံၤစိးဟီၣ်က၀ီၤအပူၤတၢ်ဒုးတၢ်သဘံၣ်သဘုၣ်အဃိကမျၢၢ်လီၢ်က၀ီၤဖိတဖၣ်ဘၣ်ဃ့ၢ်အိၣ်ကဒုအသးလၢၦၢ်ပူၤဒီးၦၤဃ့ၢ်တၢ်ဒုးဖိသ့ၣ်တဖၣ်အံၤဃ့ထီၣ်၀ဲလီၢ်က၀ီၤၦၤမၤစၢၤၦၤလီၢ်အိၣ်ကမှံဖိတဖၣ်လၢကတ့ထီၣ်န့ၢ်အ၀ဲသ့ၣ်တၢ်အိၣ်ကဒုအလီၢ်တခါအဂ့ၢ်သ့ၣ်ညါဘၣ်လၢလီၢ်က၀ီၤၦၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤႉ ဖဲအပူၤကွံာ်လါယနူၤအါရံၤအသီ(၁၀)တုၤလၢ(၁၈)သီအနံၤအဆၢကတီၢ်˜တၢ်ဒုးကဲထီၣ်၀ဲလၢသုးကီၣ်ကးဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤအဃိဟီၣ်က၀ီၤပူၤသ၀ီလၢအမ့ၢ်သီၣ်ယ့ၣ်ခး၊ကလ့ထၣ်၊ဒါရိ၊လိၣ်ရၣ်ဒိၣ်သ့ၣ်တဖၣ်ဒီးသ၀ီကမျၢၢ်လီၢ်က၀ီၤဖိအဂၤ(၃၀၀၀)ဃၣ်ဃၣ်ဘၣ်ဃ့ၢ်အိၣ်ကဒုဆိ၀ဲအသးလၢၦၢ်ပူၤဒီးသဂၢၢ်ဘၣ်၀ဲတၢ်ကီတၢ်ခဲအိၣ်၀ဲအဂ့ၢ်ၦၤမၤစၢၤၦၤဃ့ၢ်ဒုးၦၤလီၢ်အိၣ်ကမှံဖိတဖၣ်စံး၀ဲန့ၣ်လီၤႉ တကီၢ်ခါခဲအံၤကအိၣ်ကဒုအဂီၢ်တၢ်လီၢ်လီၤတံၢ်လီၤဆဲးတအိၣ်ဒံး၀ဲဘၣ်အဃိဒ်ၦၤဃ့ၢ်အိၣ်ကဒုဖိတဖၣ်ဃ့ထီၣ်တ့ၢ်၀ဲအသိးန့ၣ်လၢတၢ်ကတ့ထီၣ်ဘှီထီၣ်န့ၢ်၀ဲတၢ်အိၣ်ကဒုတၢ်လီၢ်အဂီၢ်ဂုၢ်ကျဲးစၢးဃုန့ၢ်၀ဲကျဲတၢ်ဟးထီၣ်က့ၤလီၤတၢ်ဆဲးကျိးဆဲကျၢဒီးတၢ်လီၢ်လၢအဘံၣ်အဘၢတဖၣ်အဖၢမုၢ်လီၤအဂ့ၢ်ၦၤမၤစၢၤၦၤဃ့ၢ်အိၣ်ကဒုဖိတဂၤစံး၀ဲဒ်အံၤန့ၣ်လီၤႉ “အခဲအံၤသ၀ီယဲၢ်ဖျၢၣ်ဘၣ်ဃ့ၢ်အိၣ်ကဒု၀ဲအသးမီၤနီၤတၢ်လီၢ်လၢကအိၣ်ကဒုအသးလီၤတံၢ်လီၤဆဲးန့ၣ်တအိၣ်၀ဲဒံးဘၣ်ဘၣ်အဃိအ၀ဲသ့ၣ်ဘၣ်အိၣ်ကဒု၀ဲအသးလၢၦၢ်ယိာ်ယိာ်အပူၤ˜တနီၤဒုလၢအဘူးတံၢ်အဟံၣ်˜အိၣ်၀ဲယံာ်ယံာ်တသ့ဘၣ်အဃိဃ့ထီၣ်၀ဲၦၤလၢတၢ်ကတ့ထီၣ်န့ၢ်အ၀ဲသ့ၣ်တၢ်အိၣ်ကဒုအလီၢ်မီၤနီၤႉပဂုၢ်ကျဲးစၢးဃုတၢ်လီၢ်လၢ၀ဲသ့ၣ်အဂီၢ်လၢၦၤမၤဘူၣ်တၢ်ဖိတဖၣ်ဟဲတုၤဟဲသ့ဒီးကဘၣ်မ့ၢ်တၢ်လီၢ်လၢအပူၤဖျဲးဒီးသုးကီၣ်ကးတၢ်ဟူးတၢ်ဂဲၤအလီၢ်မီၤနီၤ” အဂ့ၢ်စံးဘၣ်ခ့ၣ်အဲၣ်စံၣ်ကညီတၢ်ကစီၣ်န့ၣ်လီၤႉ ခီဖျိတၢ်ခးလိာ်သးအဃိတၢ်အီၣ်တၢ်အီ၊ကသံၣ်ကသီအတၢ်လိၣ်ဘၣ်တကပၤအတၢ်ဂ့ၢ်ကီသ့ၣ်အိၣ်၀ဲအသိးလၢခံခီခံကပၤတၢ်ခးလိာ်သးအတီၢ်ပူၤန့ၣ်သီၣ်ယ့ၣ်ခးသ၀ီဖိတနီၤအဟံၣ်ဘၣ်ဟးဂီၤကွံာ်၀ဲအဂ့ၢ်လီၢ်က၀ီၤၦၤဟ့ၣ်တၢ်ကစီၣ်ဖိတဖၣ်စံး၀ဲန့ၣ်လီၤႉ ဒ်န့ၣ်အသိးဖဲအပူၤကွံာ်၂၀၂၃နံၣ်၊လါယူၤလံအတီၢ်ပူၤန့ၣ်(KNU)ကညီဒီကလုာ်စၢဖှိၣ်ကရၢသုးက့(၂)တီအူကီၢ်ရ့ၣ်ဒီၣ်ဖးခိၣ်ကလံၤစိးယၣ်ဒိၣ်လီၢ်က၀ီၤအပူၤတၢ်ဒုးတၢ်ယာ်ဒီးကဘီယူၤတ့ၢ်လီၤမ့ၣ်ပိၢ်အဃိလီၢ်က၀ီၤဖိနီၢ်ဂံၢ်လၢအကထိဘျဲၣ်သ့ၣ်တဖၣ်အံၤတက့ၤအိၣ်ဘၣ်က့ၤလၢအနီၢ်ကစၢ်ဟံၣ်ဒံးဘၣ်ဒီးအသိးဘၣ်အိၣ်ကဒု၀ဲအသးလၢၦၤဃ့ၢ်တၢ်ဒုးအိၣ်ဆိးတၢ်လီၢ်တၢ်ကျဲတတီၤအပူၤတုၤလၢခဲအံၤအိၣ်၀ဲအဂ့ၢ်လီၢ်က၀ီၤဖိတဖၣ်စံး၀ဲန့ၣ်လီၤႉ ၂၀၂၁နံၣ်တုၤလၢ၂၀၂၃နံၣ်လါဒံၤစဲဘၢၣ်အပူၤတီအူကီၢ်ရ့ၣ်ဟီၣ်က၀ီၤအပူၤတၢ်ဒုးတၢ်ယာ်အဃိလီၢ်က၀ီၤဖိတဖၣ်ဘၣ်ဃ့ၢ်အိၣ်ကဒုအသးအိၣ်၀ဲလၢ(၂၀၀၀၀)ခံကလးဘျဲၣ်အဂ့ၢ်ခ့ၣ်အဲၣ်ယူၤတၢ်ကစီၣ်ပာ်ဖျါတ့ၢ်၀ဲဖဲတလါအံၤလါယနူၤအါရံၤ(၁၈)သီအနံၤန့ၣ်လီၤႉ
“တၢ်ပၢၢ်ဆၢအံၤကမၤနၢၤတၢ်ကယံာ်ဆံးလဲၣ်”အလီၢ်မ်ပကသံကွၢ်လီၤသကိးပနီၢ်ကစၢ်သးလၢ“တၢ်ပၢၢ်ဆၢအံၤယမၤတၢ်မနုၤလံလဲၣ်”အဂ့ၢ်ကညီပိာ်မုၣ်ကရၢဆီၣ်တခူစံး၀ဲ
လါယနူၤအါရံၤ ၂၄ သီႇ ၂၀၂၄ နံၣ်ႇ ခ့ၣ်အဲးစံၣ် “တၢ်ပၢၢ်ဆၢအံၤကမၤနၢၤတၢ်ဆံးယံာ်လဲၣ်”အလီၢ်န့ၣ်မ်ကသံကွၢ်လီၤက့ၤပနီၢ်ကစၢ်သးလၢ“တၢ်ပၢၢ်ဆၢအံၤယမၤတၢ်မနုၤလံလဲၣ်”အဂ့ၢ်ကညီပိာ်မုၣ်ကရၢဆီၣ်တခူစံး၀ဲဖဲတနံၣ်အံၤ၂၀၂၄နံၣ်˜လါယနူၤအါရံၤ(၃၁)လၢ˜အကလီၤဘၣ်၀ဲကညီတၢ်ပၢၢ်ဆၢမုၢ်နံၤၦဲၤထီၣ်(၇၅)၀ီတ၀ီအလံာ်ဟ့ၣ်ယုၢ်အပူၤန့ၣ်လီၤႉ တနံၣ်အံၤကညီတၢ်ပၢၢ်ဆၢမုၢ်နံၤအပူၤ˜အဲၣ်ဒိးဆီၣ်တခူထီၣ်၀ဲကညီဖိသ့ၣ်တဖၣ်လၢတၢ်ပၢၢ်ဆၢအတၢ်မၤအံၤတမ့ၢ်သုးမုၢ်သံၣ်ဘိဒီးခိၣ်နၢ်တဖၣ်အတၢ်ဖံးတၢ်မၤဘၣ်အဃိဒ်သိးတၢ်ပၢၢ်ဆၢအံၤကမၤနၢၤတၢ်အဂီၢ်အရ့ဒိၣ်လၢပကဘၣ်သံကွၢ်လီၤက့ၤပသးလၢ“တၢ်ပၢၢ်ဆၢကမၤနၢၤတၢ်အဂီၢ်ယမၤလံတၢ်မနုၤလံလဲၣ်”အဂ့ၢ်ကညီပိာ်မုၣ်ကရၢကရၢခိၣ်လီၢ်ခၢၣ်သးသရၣ်မုၣ်နီၢ်ကညီဖီစံး၀ဲဒ်အံၤန့ၣ်လီၤႉ “ညီနုၢ်န့ၣ်ပသမူသကိးတဖၣ်န့ၣ်အါတက့ၢ်သံကွၢ်ၦၤလၢတၢ်ပၢၢ်ဆၢအံၤကမၤနၢၤတၢ်ဆံးယံာ်လဲၣ်”ကီၢ်သူလ့ၤကန့ၢ်ဆံးလဲၣ်မီၤနီၤႉႉလၢတၢ်သံကွၢ်ဒ်အံၤအဃိတဘျီတခီၣ်န့ၣ်ကဲထီၣ်တၢ်ကီသူၣ်ကီသးလၢပကဘၣ်စံးဆၢအီၤမီၤ˜တၢ်နီၢ်နီၢ်န့ၣ်ပမ့က့ၤသံကွၢ်လီၤက့ၤပကစၢ်သးလၢတၢ်ပၢၢ်ဆၢကမၤနၢၤတၢ်အဂီၢ်ယမၤလံတၢ်မနုၤလံလဲၣ်˜တဂၤလၢပလီၢ်ပသနၢၣ်န့ၣ်ပ၀ဲကညီဖိကိးဂၤကပတုၤဆူပတၢ်မုၢ်လၢ်ဖီတၢၣ်လၢအဆိအချ့လီၤမီၤနီၤ˜တၢ်ပၢၢ်ဆၢတၢ်မၤန့ၣ်တမ့ၢ်ထဲသုးမုၢ်သံၣ်ဘိဒီးခိၣ်နၢ်တဖၣ်အတၢ်မၤဘၣ်˜ပ၀ဲကိးဂၤဒဲးန့ၣ်ဖဲပအိၣ်အလီၢ်န့ၣ်ပမၤတၢ်ပၢၢ်ဆၢတၢ်မၤသ့လီၤအဃိပကဘၣ်သံကွၢ်လီၤပသးလၢတၢ်ပၢၢ်ဆၢကမၤနၢၤတၢ်အဂီၢ်န့ၣ်ယမၤတ့ၢ်တၢ်မနုၤလံလဲၣ် န့ၣ်မ့ၢ်တၢ်အရ့ဒိၣ်မီၤ်နီၤ” လၢန့ၣ်အမဲာ်ညါတၢ်ပၢၢ်ဆၢအနံၣ်(၇၀)ဘျဲၣ်အတီၢ်ပူၤတၢ်တၤတၢ်ဒီးပကညီဖိတဖၣ်အဒိၣ်ကတၢၢ်န့ၣ်မ့ၢ်၀ဲဒုၣ်ဒါအတၢ်မၤလီၤဖးၦၤအဃိပကဘၣ်ဟးဆှဲးတၢ်လၢအကမၤဘၣ်ဒိဘၣ်ထံးပၦၤကလုာ်သ့ၣ်တဖၣ်အသိး˜ပကဘၣ်ဟးဆှဲးစ့ၢ်ကီး၀ဲတၢ်မူးတၢ်ဘှီး˜တၢ်တၤကျိၣ်တၤစ့လၢအမၤတံာ်တာ်ပတၢ်ပၢၢ်ဆၢတၢ်ဖံးတၢ်မၤသ့ၣ်တဖၣ်အံၤစ့ၢ်ကီးအဂ့ၢ်အ၀ဲစံးအါထီၣ်၀ဲဒၣ်န့ၣ်လီၤႉ တကတီၢ်ဃီလၢတၢ်ပၢၢ်ဆၢအတၢ်စံၣ်စိၤတဲစိၤအနံၣ်(၇၀)အပူၤန့ၣ်တနံၣ်အံၤ(၇၅)၀ီတ၀ီတၢ်ပၢၢ်ဆၢမုၢ်နံၤအံၤမ့ၢ်၀ဲနံၣ်လၢအဘူးဒိၣ်ထီၣ်ဒီးပတၢ်မၤနၢၤဖီတၢၣ်ခီဖျိလၢပန့ၢ်ဘၣ်က့ၤပတၢ်လီၢ်တၢ်ကျဲလၢသုးမီၤစိရိအအိၣ်ဒီးပမၤအါထီၣ်န့ၢ်က့ၤပတၢ်ပၢတၢ်ပြးသ့ၣ်တဖၣ်န့ၢ်လံအဃိပမ့ၢ်ပာ်ဖှိၣ်သးမၤလၢာ်သးအီၣ်သူလၢပတၢ်ပၢၢ်ဆၢတၢ်ဖံးတၢ်မၤအပူၤအံၤန့ၣ်တယံာ်ဘၣ်န့ၣ်ပကအိၣ်ဒီးပနီၢ်ကစၢ်တၢ်ပၢလီၤသးခွဲးယာ်အဂ့ၢ် လံာ်ဟ့ၣ်ယုၢ်ပူၤပာ်ဖျါစ့ၢ်ကီး၀ဲန့ၣ်လီၤႉ ကညီတၢ်ပၢၢ်ဆၢမုၢ်နံၤအံၤဖဲ(၁၉၄၆)နံၣ်လါယနူၤအါရံၤ(၃၁)သီ(ပဆဖလ)ပဒိၣ်အစိၤအခါခီဖျိတၢ်ဘိးဘၣ်ရၤလီၤ၀ဲလၢကညီဒီကလုာ်ဂၢၤသးကရၢ(KNDO)အံၤတမ့ၢ်ကရူၢ်ကရၢလၢအဖိးသဲစးဘၣ်အဃိတၢ်ဒုးကဲထီၣ်၀ဲလၢပယီၤသုးဒီး(KNDO)အဘၢၣ်စၢၤဒီးဖဲတၢ်ဒုးအိၣ်ထီၣ်၀ဲ၀ံၤအလီၢ်ခံကညီဖိလၢအိၣ်ထံကီၢ်ဒီတဘ့ၣ်အပူၤပာ်ပနီၣ်က့ၤ၀ဲမုၢ်နံၤအံၤလၢကညီတၢ်ပၢၢ်ဆၢမုၢ်နံၤအဂ့ၢ်သ့ၣ်ညါဘၣ်န့ၣ်လီၤႉ ဒ်န့ၣ်အသိးကညီတၢ်ပၢၢ်ဆၢမုၢ်နံၤအံၤတချူးသုးဟံန့ၢ်တၢ်စိကမီၤဒံးဘၣ်အခါ(KNU)တၢ်ပၢဟီၣ်က၀ီၤအပူၤကိးနံၣ်ဒဲးတၢ်မၤ၀ဲတၢ်ရဲၣ်တၢ်ကျဲၤအိၣ်၀ဲဘၣ်ဆၣ်စးထီၣ်ဖဲ၂၀၂၁နံၣ်သုးဟံန့ၢ်တၢ်စိကမီၤ၀ံၤအလီၢ်ခံခီဖျိဟီၣ်က၀ီၤပူၤတၢ်အိၣ်သးအကလုာ်ကလုာ်အဃိတၢ်မၤက့ၤ၀ဲဒိၣ်ဒိၣ်မုၢ်မုၢ်တအိၣ်လၢၤဘၣ်န့ၣ်လီၤႉ
သုးဟံးန့ၢ်တၢ်စိတၢ်ကမီၤအတီၢ်ပူၤသုးကီၣ်ကးထၢနုာ်လီၤၦၤပိ၁်မုၣ်လၢဃိ၁်ပူၤအိၣ်၀ဲ ၇၀၀ ဘျဲၣ်
လါယနူၤအါရံၤ ၂၄ သီႇ ၂၀၂၄ နံၣ်ႇ ခ့ၣ်အဲးစံၣ် သုးဟံးန့ၢ်တၢ်စိတၢ်ကမီၤအတီၢ်ပူၤလၢကီၢ်ပယီၤဒီတဘ့ၣ်အပူၤန့ၣ် သုးကီၣ်ကးထၢနုာ်လီၤ ၦၤပိာ်မုၣ်ပိာ်မၢၤလၢ ဃိာ်ပူၤအိၣ်၀ဲဒၣ်(၇၀၀)ဘျဲၣ်အဂ့ၢ်န့ၣ် (Burmese Women's Union) ထုးထီၣ်ပာ်ဖျါ၀ဲဖဲတနံၤအံၤလါယနူၤအါရံၤ ၂၄ သီ အနံၤန့ၣ်လီၤႉ စးထီၣ်(၂၀၂၁)လါဖ့ၤဘြူၤအါရံၤ ၁ သီ သုးဟံးန့ၢ်တၢ်စိတၢ်ကမီၤတုၤလၢတနံၣ်အံၤ(၂၀၂၄)လါယနူၤအါရံၤ ၁၉ သီန့ၣ် ကီၢ်ပယီၤထံကီၢ်ဒီတဘ့ၣ်အပူၤသုးကီၣ်ကးထၢနုာ်လီၤၦၤပိာ်မုၣ်ပိာ်မၢၤလၢဃိာ်ပူၤလၢအတဖိးသဲစးခဲလၢာ် အိၣ်၀ဲဒၣ်(၇၁၅)ဂၤအဂ့ၢ်န့ၣ် (Burmese Women's Union)လံာ်တၢ်မၤနီၣ်စရီပူၤအသိး သ့ၣ်ညါဘၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤလီၢ်ခံၦၤပိာ်မုၣ်ပိာ်မၢၤလၢအိၣ်ကီၢ်ပယီၤပူၤတဖၣ်တနီၤန့ၣ်တသ့ဖဲအသ့နုာ်လီၤ ပၣ်ဃုာ်ပၣ်ဂီၢ်၀ဲဒၣ်လၢတၢ်ထီဒါသုးမီၤစိရိၤတၢ်ဟူးတၢ်ဂဲၤပူၤလၢအကျဲအကပၤကပၤအိၣ်၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဘၣ်ဃးသုးကီၣ်ကးထၢနုာ်လီၤၦၤပိာ်မုၣ်ပိာ်မၢၤလၢဃိာ်ပူၤအဂ့ၢ်အံၤ ကညီပိာ်မုၣ်ကရၢ(KWO)ကရၢခိၣ် နီၢ်ကညီဖီ စံး ဘၣ် ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“ပယီၤသုးဖီၣ်ထၢနုာ်လီၤၦၤပိာ်မုၣ်လၢဃိာ်ပူၤတၢ်သ့ၣ်တဖၣ်အံၤအကဲ၀ဲတၢ်လၢအမၤဘၣ်ဒိၦၤဟီၣ်ခိၣ်ဖိ ခွဲးယာ်ဒိၣ်ဒိၣ်မုၢ်မုၢ်လီၤႉဘၣ်မနုၤအဃိလဲၣ်န့ၣ်ၦၤလၢတၢ်ဟ့ၣ်အီၤတၢ်စံၣ်ညီၣ်သံတဖၣ်အံၤတမ့ၢ်လၢအမၤကမၣ်တၢ်နီတမံၤဘၣ်ႉမ့ၢ်ၦၤလၢအပာ်ဖျါထီၣ်သးလၢတၢ်မုာ်တၢ်ခုၣ်အဲၣ်ဒိးတၢ်ဆီတလဲတတူၢ်လိာ်သုးဘၣ်အဃိတၢ်မၤအ၀ဲသ့ၣ်ဒ်အံၤန့ၣ်မ့ၢ်တၢ်မၤကမၣ်၀ဲဒၣ်ၦၤဟီၣ်ခိၣ်ဖိတၢ်ခွဲးတၢ်ယာ်ဒိၣ်ဒိၣ်မုၢ်မုၢ်ဒီး၀ဲဒၣ်န့ၣ်ပအဲၣ်ဒိးလၢထံဂုၤကီၢ်ဂၤသ့ၣ်တဖၣ်အံၤကထံၣ်၀ဲဒၣ်တၢ်သ့ၣ်တဖၣ်အံၤမီၤနီၤႉပယီၤသုးန့ၣ်တၢ်ဆီၣ်သနံးလၢအဖီခိၣ်န့ၣ်မ့တဟဲဒိဘၣ်အီၤဘၣ်န့ၣ်တၢ်သ့ၣ်တဖၣ်အံၤအ၀ဲသ့ၣ်ကဆဲးမၤ၀ဲထီဘိလီၤမီၤနီၤအဃိန့ၣ်တၢ်၀ဲအံၤကဲ၀ဲဒၣ်တၢ်အဒိတခါလီၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါၦၤပိာ်မုၣ်ပိာ်မၢၤလၢသုးကီၣ်ကးထၢနုာ်လီၤ၀ဲဃိာ်ပူၤသ့ၣ်တဖၣ်အံၤဖဲတၢ်ဖီၣ်အီၤအဆၢကတီၢ် မ့ၢ်တၢ်ကမၤဆူးမၤဆါမၤပယွဲအီၤစ့ၢ်ဧါန့ၣ်တၢ်တသ့ၣ်ညါ၀ဲဘၣ်အသိးၦၤပိာ်မုၣ်ပိာ်မၢၤလၢအသံလၢ သုးကီၣ်ကးခးလီၤကျိဖးဒိၣ်အဃိအံၤအိၣ်၀ဲဒၣ်စ့ၢ်ကီးအါမးအဂ့ၢ်န့ၣ် နီၢ်ကညီဖီ စံးအါထီၣ်၀ဲန့ၣ်လီၤႉ ဒ်(Burmese Women's Union)အလံာ်တၢ်ပာ်ဖျါပူၤအသိးန့ၣ် ၦၤပိာ်မုၣ်လၢသုးကီၣ်ကးထၢနုာ်လီၤ၀ဲလၢ ဃိာ်ပူၤလၢတစိၤသးန့ၣ်အိၣ်၀ဲဒၣ်(၃၉)ဂၤဒီးစံၣ်ညီၣ်လီၤလၢဘၣ်သံန့ၣ်အိၣ်၀ဲဒၣ်(၁၆)ဂၤအဂ့ၢ်န့ၣ် ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါၦၤလၢအဘၣ်လီၤလၢဃိာ်ပူၤတနံၣ်တုၤယဲၢ်နံၣ်န့ၣ်အိၣ်၀ဲဒၣ်(၃၁၅)ဂၤႇ ၅ နံၣ်တုၤ ၁၀ နံၣ်န့ၣ် အိၣ်၀ဲ(၂၀၅)ဂၤႇ ၁၀ နံၣ်တုၤ ၂၀ နံၣ်န့ၣ်အိၣ်၀ဲ(၁၀၅)ဂၤႇ ၂၀ နံၣ်တုၤလၢ ၃၀ နံၣ်န့ၣ်အိၣ်၀ဲ(၂၄)ဂၤႇ...
သုးကီၣ်ကးသုးထီထီၣ်သုးခိၣ်ဒိၣ်စိစီၤခၠံၣ်သူၣ်အပတီၢ်န့ၣ် တမ့ၢ်တၢ်အမ့ၢ်အတီ
လါယနူၤအါရံၤႇ ၂၄သီႇ ၂၀၂၄ နံၣ်ႇ ခ့ၣ်အဲးစံၣ် သုးခိးကီၢ်ဆၢ(BGF)အနဲၣ်ရွဲၣ်သုးခိၣ်ဒိၣ်စိ စီၤခၠံၣ်သူၣ် လၢကထုးဖးကွံာ်သးဒီးပယီၤသုးကီၣ်ကးအံၤ ပယီၤသုးကီၣ်ကးတကပၤသုးထီထီၣ်အလီၢ်လၤအဂ့ၢ် တၢ်ကစီၣ်ဟူထီၣ်သါလီၤ၀ဲဒၣ်လၢ(Social Media)အပူၤန့ၣ်လီၤႉ ဒ်တၢ်ကစီၣ်ဟူထီၣ်သါလီၤ၀ဲအသိးန့ၣ် ဖဲမဟါလါယနူၤအါရံၤ ၂၃သီအနံၤ သုးကီၣ်ကးသုးရိၣ်မဲခိၣ်ကျၢၢ်ခံ သုးခိၣ်စိ၀့ဟဲ၀ဲဒၣ်လၢကညီကီၢ်စဲၣ်၀့ၢ်ဖၣ်အၣ်လၢကထံၣ်လိာ်ဘှါရှဲသကိး၀ဲ(BGF)တၢ်ဂ့ၢ်အဂီၢ်၀ံၤအလီၢ်ခံ သုးထီထီၣ်၀ဲသုးခိၣ်ဒိၣ်စိစီၤခၠံၣ်သူၣ်အလီၢ်လၢ သုးခိၣ်ကျၢၢ်ဖိ လီၢ်လၤဒီးအမူဒါမ့ၢ်၀ဲ လီၢ်က၀ီၤဒုးယာ်ဂ့ၢ်၀ီခိၣ်အဂ့ၢ်ဟူထီၣ်သါလီၤ၀ဲဒၣ်လၢ( Social Media)အပူၤန့ၣ်လီၤႉ ဘၣ်ဃးဒီးပယီၤသုးကီၣ်ကးသုးထီထီၣ်၀ဲသုးခိၣ်ဒိၣ်စိစီၤခၠံၣ်သူၣ်လီၢ်လၤတၢ်ဂ့ၢ်အံၤန့ၣ် လၢတၢ်ဟ့ၣ်တၢ်ကလုၢ်အဂီၢ်အပူၤကွံာ်အ၀ဲသ့ၣ်ဃ့ထီၣ်၀ဲလီၢ်လၤလၢပယီၤသုးကီၣ်ကးအအိၣ် အိၣ်ဘၣ်ဆၣ်တၢ်တဟ့ၣ်အ၀ဲသ့ၣ်ဘၣ်ဒီးအခဲအံၤမး တၢ်ကဟ့ၣ်က့ၤအ၀ဲသ့ၣ်အဖီခိၣ်အ၀ဲသ့ၣ်တလိၣ်ဘၣ်လၢၤ၀ဲဘၣ်အဂ့ၢ် သုးခိးကီၢ်ဆၢ(BGF) အကရၢခိၣ် သုးခိၣ်ကျၢၢ်ဂီၢ်ဂ့ၢ် စီၤထိလဲၣ် စံးဘၣ်၀ဲဒၣ် ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“လၢအပူၤကွံာ်ပစးထီၣ်ကဲ(BGF)အခါလံၤလံၤန့ၣ် ပတဲအ၀ဲသ့ၣ်လၢႇတၢ်လၢသုးန့ၣ်ကဘၣ်အိၣ်ဒီးလီၢ်လၤလၢကတဲဖိလံၤသ့ၣ်တဖၣ်တၢ်ကသ့အဂီၢ်ဘၣ်ဆၣ်အ၀ဲသ့ၣ်တဟ့ၣ်ၦၤဘၣ်ႉတုၤလၢခဲအံၤမးကဟ့ၣ်၀ဲဘျီ လိၣ်ဟံလၢာ်၀ဲလဲၣ်ႉ ပ၀ဲပမၤတၢ်တလိၣ်လီၢ်လၤဘၣ်ႉလီၢ်လၤတအိၣ်ဘၣ်သနာ်က့ပမၤသ့လီၤႉလၢညါပတဲအီၤလၢတၢ်လၢသုးန့ၢ်ကဘၣ်အိၣ်တပတီၢ်ဘၣ်တပတီၢ် အ၀ဲတဟ့ၣ်ဘၣ်အဃိန့ၣ် ပတလီကီလၢၤဘၣ်ႉ မ့ၢ်ဟ့ၣ်၀ဲန့ၣ် ၦၤကညီအဂၤ(၁၀၀၀၀)ဒုကဟ့ၣ်၀ဲဖဲသုးခိၣ်ကျၢၢ်ဖိအပတီၢ်ဧါတသ့ၣ်ညါဘၣ်ႉပတဃ့လၢၤဘၣ်အဃိန့ၣ်အ၀ဲသ့ၣ်သနာ်က့တတဲနီတမံၤလၢာ်ဘၣ်ႉ”အဂ့ၢ်စံးဘၣ်၀ဲဒၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ သုးခိးကီၢ်ဆၢ (BGF)ခိၣ်နၢ်သ့ၣ်တဖၣ်အံၤ မၤသကိးတၢ်ဒီးပယီၤသုး အနံၣ်(၃၀)အတီၢ်ပူၤ၀ံၤအလီၢ်ခံ ဖဲတလါအံၤန့ၣ်အ၀ဲသ့ၣ်တီၣ်ထီၣ်၀ဲလံာ်ဆူပယီၤသုးကီၣ်ကးအအိၣ်လၢကထုးဖးကွံာ်သးဒီးပယီၤသုးကီၣ်ကးႇတဟံးန့ၢ်လါလဲဒီးတၢ်အီၣ်လၢာ်ဘၣ်ဒီးကအိၣ်ဆၢထၢၣ်က့ၤအ၀ဲလၢအနီၢ်ကစၢ်ဒၣ်၀ဲအဃိ ဖဲမဟါတနံၤန့ၣ်သုးကီၣ်ကးသုးရိၣ်မဲခိၣ်ကျၢၢ်ခံသုးခိၣ်စိ၀့ဟဲထံၣ်လိာ်သးဒီးအ၀ဲသ့ၣ်လၢအနီၢ်ကစၢ်ဒ်သိးကဘှါရှဲ၀ဲတၢ်ဂ့ၢ်သ့ၣ်တဖၣ်အဂီၢ်န့ၣ်လီၤႉ “အိၣ်၀ဲလၢ မၢ၀ဲ လဲၤဆှၢန့ၣ်အ၀ဲသ့ၣ်(ပယီၤသုး)တၢ်အီၣ်တၢ်အီႇ နမ့ၢ်တအီၣ်ၦၤတၢ်ဘၣ်န့ၣ်ႇၦၤမၢနၤဘၣ်ဆၣ်နမ့တမၤဘၣ်န့ၣ်ႇနအိၣ်သ့လီၤႉအီၣ်ၦၤတၢ်အီၣ်ၦၤမၢနၤ နမ့ၢ်တမၤန့ၣ်ႇလီၤဂာ်ဒ်သိးနမူဒါတ၀ံၤဘၣ်အဃိန့ၣ် ပတဲလိာ်သးဒီးပဖိပလံၤလၢပမၤတၢ်အနံၣ်(၃၀)လံအဃိန့ၣ်ပကအိၣ်ဆၢထၢၣ်က့ၤလၢပနီၢ်ကစၢ်ဒီးပကမၤက့ၤတၢ်လၢတၢ်မုာ်တၢ်ခုၣ်လီၤႉ ဘၣ်ဒုးလိာ်သးဒီး( DKBA)ႇဘၣ်ဒုးလိာ်သးဒီး( KNU) ႇဘၣ်ဒုးလိာ်သးဒီး(ဘိၤဘံၣ်)ႇတၢ်ဒ်န့ၣ် န့ၣ်ပတဲအ၀ဲသ့ၣ်(ပယီၤသုး)လၢပတအဲၣ်ဒိးဒုးလိာ်သးကဒဲကဒဲလၢၤဘၣ်ႉကညီဖိသနာ်က့မ့ၢ်မၤဒ်န့ၣ်သၢပျၢၤန့ၣ်ကဘၣ်လဲၤကိးက့ၤအမိၢ်အပၢ်ဖဲလဲၣ်တသ့ၣ်ညါ၀ဲလၢၤဘၣ်အဃိန့ၣ်ပတအဲၣ်ဒိးဒုးလိာ်သးလၢၤဘၣ်ႉ”အဂ့ၢ် သုးခိၣ်ကျၢၢ်ဂီၢ်ဂ့ၢ် စီၤထိလဲၣ် တဲအါထီၣ်၀ဲဒၣ်စ့ၢ်ကီးန့ၣ်လီၤႉ စးထီၣ်လၢ (၁၉၉၄)နံၣ် (DKBA)တဆီဖဲ(၂၀၁၀)နံၣ် သုးခိးကီၢ်ဆၢ( BGF)ဒီးတုၤခဲအံၤ(၂၀၂၄)နံၣ်...