မ့မ့ၢ်ၦၤထံဂုၤကီၢ်ဂၤဖိတဂၤဘၣ်ဆၣ် သရၣ်(Brandon)ဟ့ၣ်လီၤသးနီၢ်နီၢ်လၢၦၤကၠိသ့ၣ်တဖၣ်အဂီၢ်
လါယနူၤအါရံၤ ၃၀ သီႇ ၂၀၂၄ နံၣ်ႇ ခ့ၣ်အဲးစံၣ် အ၀ဲအံၤမ့ၢ်၀ဲသရၣ်(Brandon)လၢဘၣ်တၢ်သ့ၣ်ညါအီၤအါတဂၤဒီးဘၣ်တၢ်ကိးလိာ်ကွဲစ့ၢ်ကီးအမံၤလၢသရၣ် ဖးထီၣ်ႇ သရၣ်ဖုသဘျုၣ်စ့ၢ်ကီးန့ၣ်လီၤႉသရၣ်(Brandon)အံၤအိၣ်တၢ်ဆိးတၢ်ယိယိဖိအီၣ်သဘျုၣ်ဆူၣ်မးဒီး အ၀ဲသိၣ်လိတၢ်လၢကီၢ်ပယီၤ-ကီၢ်ကၠီၣ်တဲၣ်ကီၢ်ဆၢခီကီၢ်သူမွဲခံတီၤထီကၠိအံၤန့ၣ်လီၤႉအ၀ဲမ့ၢ်၀ဲဒၣ်ၦၤကီၢ် အမဲ ရၤဖိတဂၤဒီး အ၀ဲသိၣ်လိတၢ်လၢသူမှဲခံကၠိအံၤကထီၣ်ဘးလၢ(၁၅)နံၣ်ဃၣ်ဃၣ်လံန့ၣ်လီၤႉ သရၣ်(Brandon)အံၤအိၣ်ဖျဲၣ်ထီၣ်ဒီးဒိၣ်ထီၣ်၀ဲဒၣ်လၢကီၢ်အမဲရကၤ(မဲစံးကဲ)ကီၢ်စဲၣ်ပူၤဒီးခဲအံၤအသးနံၣ်အိၣ်၀ဲ(၃၈)နံၣ်လံန့ၣ်လီၤႉ ဒ်န့ၣ်အသိးအဒီပုၢ်၀ဲၢ်ခဲလၢာ်အိၣ်၀ဲ(၇)ဂၤဒီးလၢအဒီပုၢ်၀ဲၢ်ကျါအ၀ဲမ့ၢ်ၦၤ(၂)ဂၤတဂၤန့ၣ် လီၤႉ သရၣ်(Brandon)ဖျိထီၣ်တီၤထီကၠိဖဲ(မဲးစံးကဲ)ကီၢ်စဲၣ်၀ံၤလီၢ်ခံဒ်တၢ်ခွဲးတၢ်ယာ်အိၣ်၀ဲဒၣ်အါမးဘၣ်ဆၣ်ခီဖျိလၢအတၢ်ကတီၤဆိသးတအိၣ်ဘၣ်အဃိအ၀ဲဃုထၢက့ၤ၀ဲဒၣ်တၢ်နီကဘီယူၤတၢ်သိၣ်လိ(ခီလ်လ့)ကၠိန့ၣ်လီၤႉ ဖဲအ၀ဲထီၣ်တၢ်နီကဘီယူၤကၠိတနံၣ်ဒီးနီလိကဘီယူၤန့ၢ်သၢလါ၀ံၤလီၢ်ခံဘျီန့ၣ်အ၀ဲပတုာ်ကွံာ်၀ဲဒၣ်တၢ်နီ ကဘီယူၤကၠိအံၤန့ၣ်လီၤႉ သရၣ်(Brandon)အံၤမ့ၢ်ၦၤလၢအသးစဲ၀ဲဒၣ်တၢ်ဟးအယံၤတၢ်ပြၢတဂၤဒီးဒ်န့ၣ်အ သိးဖဲအ၀ဲထီၣ်(ခီလ်လ့ၤ)ကၠိအခါန့ၣ်အ၀ဲနုာ်လီၤပြၢဒံးတၢ်လၢတၢ်ဟးအယံၤလၢသၢလါအတီၢ်ပူၤအဂ့ၢ်န့ၣ် အ၀ဲစံး၀ဲဒၣ်န့ၣ်လီၤႉ “ယသ့ၣ်ညါယဘၣ်သးထီၣ်ကၠိ ယကဘၣ်လဲၤထီၣ်ကၠိဖဲလဲၣ်ႇ ယကဘၣ်မၤလိမနုၤလဲၣ်န့ၣ်တၢ်ခွဲးတၢ်ယာ် အိၣ်ဒီဒူၣ်ဘၣ်ဆၣ်ယတကတီၢ်သးဆိဘၣ်ႇ ယတဆိမိၣ်ဆိဘၣ်အဃိန့ၣ် တၢတနံၣ်ယဃုထၢကၠိတဖျၢၣ် ဘၣ်ဃးတၢ်နီကဘီယူၤကၠိတဖျၢၣ် ဘၣ်ဆၣ်ယထီၣ်တၢတနံၣ်၀ံၤဒီးယစးထီၣ်နီကဘီယူၤကအိၣ်ခံလါသၢ လါလီၤႉ ယဆိမိၣ်ယတမၤလၢၤဘၣ်ႇ ဖဲပသးစၢ်အခါပအဲၣ်ဒိးမၤတၢ်လၢ(Adventure)တစဲးဖိဧါႉ ဖဲယထီၣ် (ခီလ်လ့ၣ်)ကၠိအခါယသကိးဟ့ၣ်ဂံၢ်ဟ့ၣ်ဘါယၤလၢနတၢ်အိၣ်ဆူၣ်အိၣ်ချ့ဂ့ၤဒီးယသကိးအဲၣ်ဒိးလၢပကဟးတၢ်ပြၢအယံာ်လၢခီၣ်မီၤႉ အဃိန့ၣ်ဖဲတၢ်ကိၢ်ခါအကတီၢ်န့ၣ်ပစးထီၣ်ဟးလၢ(New Jersey)ကီၢ်စဲၣ်မုၢ်ထီၣ်တ ကပၤဒီးပဟးလၢခီၣ်တုၤလၢမုၢ်နုာ်တကပၤလီၤႉ ပဟးလၢခီၣ်သၢလါဘျဲၣ်တစဲးဖိ” အဂ့ၢ်န့ၣ် သရၣ် (Brandon) စံး၀ဲန့ၣ်လီၤႉ လၢန့ၣ်အမဲာ်ညါ(Brandon)အံၤမ့ၢ်စ့ၢ်ကီး၀ဲ ၦၤလၢအသးစဲတၢ်ဟးကသုၣ်ကသီလၢထံဂုာ်ကီၢ်ဂၤတဂၤဒီး ဖဲအ ၀ဲအသးနံၣ်အိၣ်(၁၉)နံၣ်အခါအ၀ဲဒိးန့ၢ်ဘၣ်တၢ်ခွဲးတၢ်ယာ်လၢ ကဘၣ်လဲၤ၀ဲဆူ(ကီၢ်အံးသံးယိဖံယါ)ထံကီၢ်ဒီး ဖဲအလဲၤတုၤလၢတၢ်လီၢ်ဖဲန့ၣ်အခါ ထံၣ်ဘၣ်၀ဲဒၣ်တၢ်အိၣ်သးအကလုာ်အလုာ်လၢ တၢ်လိၣ်အိၣ်၀ဲဒီး ၦၤလီၢ် က၀ီၤဖိဖဲန့ၣ်သ့ၣ်တဖၣ်အါမးန့ၣ်လီၤႉ ခီဖျိလၢတၢ်အိၣ်သးသ့ၣ်တဖၣ်အံၤထိးဘၣ်အသးလၢ အဲၣ်ဒိးမၤစၢၤ ၦၤလၢအလိၣ်ဘၣ်တၢ်မၤစၢၤသ့ၣ်တဖၣ်ဒီးအဲၣ်ဒိးမၤတၢ်လၢအကဲဘျုးလၢၦၤဂၤအဂီၢ်အဃိ သရၣ်(Brandon) အံၤစးထီၣ်ဖဲန့ၣ်၀ံၤအလီၢ်ခံ အ၀ဲဆၢတဲာ်လီၤအသးလၢကက့ၤထီၣ်က့ၤ(ဖၠၣ်စိမိၤ)ကၠိဒီးဃုထၢမၤလိအါထီၣ်၀ဲ (Anthropology)အဂ့ၢ်အကျိၤသ့ၣ်တဖၣ်လၢအဘၣ်ဃးဒီး(Community Development)တကပၤန့ၣ်လီၤႉ ခီဖျိလၢတၢ်အိၣ်သးတခါအဖီခိၣ်သရၣ်(Brandon)အံၤ ဖဲအ၀ဲထီၣ်(ဖၠၣ်စိမိၤ)ကၠိအဆၢကတီၢ် အ၀ဲဒိးန့ၢ်ဘၣ်...
ပယီၤသုးခးလီၤကျိဖးဒိၣ်အဃိမူကီၢ်ဆၣ်ဒီးဆီထံးကီၢ်ဆၣ်ပူၤကမျၢၢ်ဘၣ်ဒိ(၃)ဂၤအကျါပၣ်ဃုာ်ဖိသၣ် ၂ ဂၤ
လါယနူၤအါရံၤ ၃၀ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့-၃) မူကီၢ်ဆၣ်ဒီးဆီထံးကီၢ်ဆၣ် အပူၤ ဖဲပူၤကွံာ်လါယနူၤအါရံၤ(၂၇)သီအနံၤ ခီဖျိပယီၤသုးခးလီၤကျိဖးဒိၣ်ဆူကမျၢၢ်ဒူသ၀ီပူၤအဃိကမျၢၢ် ဘၣ်ဒိ(၃)ဂၤအကျါပာ်ဃုာ်ဖိသၣ်ခံဂၤအဂ့ၢ်န့ၣ် ခ့ၣ်အဲၣ်ယူၣ်တၢ်ကစီၣ်ထုးထီၣ်ပာ်ဖျါ၀ဲ ဖဲလါယနူၤအါရံၤ (၂၈)သီအနံၤန့ၣ်လီၤႉ ချၢၣ်လွံၢ်ထူၣ်ကီၢ်ရ့ၣ်ဆီထံးကီၢ်ဆၣ်အပူၤ ဖဲလါယနူၤအါရံၤ (၂၇)သီအနံၤ ခီဖျိပယီၤသုးခီၣ်ချ့သုးရ့ၣ် (ခမရ-၂၀) လၢအိၣ်(ပစိၤမၠီၣ်တၤဖၠဲၣ်)သ၀ီပူၤတဖၣ်အံၤ ခးလီၤ (၈၁ မမ)ကျိဖးဒိၣ် (၃)ဖျၢၣ်ဆူ (စိၤကိ) သ၀ီပူၤလီၤ တဲာ်ပိၢ်ဖးထီၣ်လၢကသံၣ်ဒၢးအဃိကသံၣ်သရၣ်မုၣ်အဖိလၢအိၣ်ဒံးဒၣ်အလါတဂၤအံၤဘၣ်၀ဲအစုထွဲစုခံဘိအသိး ဖိသၣ်မုၣ်(၁၄)နံၣ်တဂၤစ့ၢ်ကီး ကျိက့ဘၣ်၀ဲဒၣ်အခီၣ်လၢအဆ့ၣ်တကပၤအဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ ဒ်န့ၣ်အသိးဖဲလါယနူၤအါရံၤ(၂၇)သီအနံၤ လၢချၢၣ်လွံၢ်ထူၣ်ကီၢ်ရ့ၣ် မူကီၢ်ဆၣ်အပူၤစ့ၢ်ကီး ခီဖျိလၢပယီၤ သုးခီၣ်ချ့သုးရ့ၣ် (ခမရ-၅၉၉)လၢအအိၣ်(တိဒီ)သုးကလၢၤသ့ၣ်တဖၣ်အံၤဒိးလီၤဃာ်၀ဲမ့ၢ်ပိၢ်ဖဲ သုးကလၢၤ အခိၣ်အဃၢၤအဃိ(ခိၤမၠီၣ်)သ၀ီဖိ မမၠိသူၤစၤ၀့(၂၁)နံၣ်အံၤယီၢ်ဘၣ်၀ဲဒၣ်မ့ၣ်ပိၢ် အခီၣ်ထွဲတကပၤတူာ်ကွံာ် ၀ဲအဂ့ၢ်န့ၣ် ခ့ၣ်အဲၣ်ယူၣ်ပာ်ဖျါ၀ဲန့ၣ်လီၤႉ ပယီၤသုးကလၢၤလၢအိၣ်(တိဒီ)အံၤ ဖဲအပူၤကွံာ်တၢ်ထီၣ်မၤန့ၢ်၀ဲဒၣ်ဘၣ်ဆၣ် အ၀ဲသ့ၣ်ဟဲက့ၤမၤအါထီၣ် သုးဂံၢ်ဘါဒီး ဒိးလီၤဃာ်၀ဲမ့ၢ်ပိၣ်လၢသုးကလၢၤအခိၣ်အဃၢၤ လၢအဘူးဒီးကမျၢၢ်ဒူသ၀ီတၢ်ဖံးအီၣ်မၤအီၣ် လီၢ်ကျဲအဂ့ၢ်န့ၣ် မူကီၢ်ဆၣ်ၦၤကတိၤတၢ်ပၢ သရၣ်စီၤစံးပတြၢၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တၢ်ထီၣ်၀ဲဒၣ် (ခမရ-၅၉၀) (ခမရ-၅၉၉)ဒီးမူကီၢ်ဆၣ်ပၢၤကီၢ်သုးကလၢၤသ့ၣ်တဖၣ်တၢ်ထီၣ်၀ဲ တသီဃီန့ၣ်ဖျိးခဲလၢာ်လီၤႉ ထီၣ်၀ဲ၀ံၤအလီၢ်ခံန့ၣ်ဟဲက့ၤပာ်လီၤအ၀ဲသ့ၣ်အဂံၢ်ဘါဒီးကဘီယူၤ၀ံၤဆီလီၤ၀ဲဒၣ် အဂံၢ်ဘါဖဲန့ၣ်မီၤနီၤႉ ဒီးအ၀ဲသ့ၣ်ဒိးလီၤဃာ်၀ဲဒၣ်မ့ၣ်ပိၢ်ဖဲတၢ်ကပိၤကပၤန့ၣ်ႉ ကမျၢၢ်ဖိလၢအိၣ်တၢ်ကပိၤက...
ကီးတရံး၀့ၢ်ပူၤမ့ၣ်အူအီၣ်ကဒီးၦၤကမျၢၢ်အဟံၣ်(၅၀)ဘျဲၣ်အကျါပၣ်ဃု၁်ကၠိတဖျၢၣ်
လါယနူၤအါရံၤ ၃၀ သီႇ ၂၀၂၄ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကီးတရံး၀့ၢ်ပူၤ တၢ်ဒုးကဲထီၣ်လၢခံခီခံကပၤအဘၢၣ်စၢၤထီၣ်ဘးလၢခံလါလံဒီး ခီဖျိပယီၤသုးခးလီၤကျိဖးဒိၣ်အဃိ မ့ၣ်အူအီၣ်ကဒီးၦၤကမျၢၢ်လၢအဃ့ၢ်ထီၣ်တဖၣ်အံၤအဟံၣ်အဃီ အိၣ်(၅၀)ဘျဲၣ် အကျါပၣ်ဃုာ်၀ဲကၠိတၢ်သူၣ်ထီၣ်တဖျၢၣ်အဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲအသိးသ့ၣ်ညါဘၣ်န့ၣ်လီၤႉ ကီးတရံး၀့ၢ်ပူၤခီဖျိတၢ်ဖ့ၣ်ဆၢဆဲးကဲထီၣ်ဒံး၀ဲလၢပယီၤသုးဒီးတၢ်ပၢၢ်ဆၢသုးပာ်ဖှိၣ်ကရူၢ်အဘၢၣ်စၢၤဒံးဒီး ခီဖျိပယီၤသုးအံၤခးလီၤကျိဖးဒိၣ်ကအိၣ်လၢကိးမုၢ်နံၤဒဲးအဃိ ဖဲလါယနူၤအါရံၤ ၂၇ သီအနံၤလၢတသီအတီၢ်ပူၤန့ၣ် မ့ၣ်အူအီၣ်ကဒီးၦၤကမျၢၢ်အဟံၣ်အိၣ်၀ဲ(၅၁)ဖျၢၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ဖဲအပူၤကွံာ်လါယနူၤအါရံၤ ၂၇ သီအနံၤန့ၣ် မ့ၣ်အူအီၣ်ကဒီး၀ဲက၀ီၤဒ့(၁) ဟံၣ်(၄၂)ဖျၢၣ်ႇ က၀ီၤဒ့(၂)န့ၣ်မ့ၣ်အူအီၣ်၀ဲ (၉)ဖျၢၣ်ဒီး ဖဲတနံၤဃီမုၢ်နၤခီအဆၢကတီၢ်န့ၣ်မ့ၣ်အူအီၣ်ကဒီး၀ဲက၀ီၤဒ့(၇)တီၤထီကၠိတဖျၢၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲလၢ“ကျိဖးဒိၣ်လီၤတဲာ်လၢယဟံၣ်ကပၤယဟံၣ်နါက့မ့ၣ်အူအီၣ်လၢာ်လံႉဖဲ(၂၇)သီန့ၣ်မ့ၣ်အူအီၣ်တီၤထီကၠိႇမ့မ့ၢ်လၢယဟံၣ်န့ၣ်မ့ၣ်အူအီၣ်ကဘၣ်ဖဲမုၢ်ဃ့ၢ်လီၤန့ၣ်ႉယသိလ့ၣ်နါက့ဟးဂီၤႇတၢ်န့ၣ်ဘၣ်လၢယၤဒီးယပါယမါယဖိပဟဲက့ၤအိၣ်လၢဟံၣ်မီၤနီၤႉကွံာ်လီၤမ့ၣ်ပိၢ်ဒီဒူၣ်ညါႉကျိဖးဒိၣ်လီၤ တဲာ်အဃိ ယၤဒီးယပါစ့ၢ်ကီးပဘၣ်ဒိစ့ၢ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲတနံၤအံၤလါယနူၤအါရံၤ ၃၀ သီ အနံၤ န့ၣ်လီၤႉ တကီၢ်ခါခဲအံၤလၢကီးတရံး၀့ၢ်ပူၤန့ၣ်ဒုးယၤတၢ်ဖ့ၣ်စၢဆဲးကဲထီၣ်ဒံး၀ဲဒီးဒ်န့ၣ်အသိးပယီၤသုးအံၤခးလီၤဒံး၀ဲကျိဖးဒိၣ် အိၣ်၀ဲကိးမုၢ်နံၤဒဲးန့ၣ်လီၤႉလၢတၢ်န့ၣ်အဃိတုၤလၢခဲအံၤလၢကီးတရံး၀့ၢ်ဒီတ၀့ၢ်အပူၤန့ၣ်မ့ၣ်အူအီၣ်ၦၤဟံၣ်ၦၤဃီ ခုၣ်ထီၣ်အိၣ်ကိးမုၢ်နံၤဒဲးအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လၢန့ၣ်အမဲာ်ညါဒ်လီၢ်က၀ီၤကမျၢၢ်စံး၀ဲအသိးန့ၣ်ကီးတရံး၀့ၢ်ပူၤဒီတ၀့ၢ်န့ၣ်စးထီၣ်လၢတၢ်ဒုးကဲထီၣ်တုၤလၢခဲအံၤန့ၣ်မ့ၣ်အူအီၣ်ၦၤကမျၢၢ်အဟံၣ်အဃီကအိၣ်လၢ(၃၀၀)ဃၣ်ဃၣ်လံအဂ့ၢ်န့ၣ် သ့ၣ်ညါဘၣ်န့ၣ်လီၤႉ စးထီၣ်ဖဲအပူၤကွံာ်(၂၀၂၃)လါဒံၣ်စ့ဘၢၣ်ထီၣ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တီခိၣ်ရိၣ်မဲ တၢ်ပၢၢ်ဆၢ သုးပာ်ဖှိၣ်နုာ်လီၤခး၀ဲပယီၤသုးလၢကီးတရံး၀့ၢ်ပူၤအံၤဒီးဖဲန့ၣ်တၢ်ဒုးကဲထီၣ်၀ဲဒိၣ်ဒိၣ်မုၢ်မုၢ်လၢခံခီခံကပၤအဘၢၣ်စၢၤဒီးခီဖျိတၢ်ဒုးကဲထီၣ်အဃိၦၤကမျၢၢ်သံဘၣ်ဒိဘၣ်ထံးအိၣ်၀ဲဒၣ်အါမးအသိးၦၤကမျၢၢ်လၢအဃ့ၢ်ထီၣ်တဖၣ်စ့ၢ်ကီးတုၤလၢခဲအံၤက့ၤနုာ်လီၤလၢ၀့ၢ်ပူၤတဘူၣ်ႇဘၣ်ဟးစံၣ်အိၣ်လၢတၢ်လီၢ်အဂၤကအိၣ်လၢခံလါလံအဂ့ၢ်န့ၣ် သ့ၣ်ညါဘၣ်န့ၣ်လီၤႉ
KSNG-ကညီကၠိဖိၦာ်ဘျးစဲကရူၢ်မၤ၀ဲ(၂၈)၀ီတ၀ီနံၣ်ကတၢၢ်တၢ်အိၣ်ဖှိၣ်ဒီး(၁၅)၀ီတ၀ီတၢ်ဃုထၢ၀ံၤ၀ဲ
လါယနူၤအါရံၤ ၂၉ သီႇ ၂၀၂၄ နံၣ်ႇ ခ့ၣ်အဲးစံၣ် KNUကညီဒီကလုာ်စၢဖှိၣ်ကရၢဒူပျာ်ယာ်ကီၢ်ရ့ၣ်˜ကီးတရံးကီၢ်ဆၣ်˜သ့ၣ်ဘီဘိသ၀ီ˜တီနီၢ်တီၤထီကၠိကရၢၢ်အပူၤကညီကၠိဖိၦာ်ဘျးစဲကရူၢ်မၤ၀ဲ(၂၈)၀ီတ၀ီနံၣ်ကတၢၢ်တၢ်အိၣ်ဖှိၣ်ဖးဒိၣ်ဒီး(၁၅)၀ီတ၀ီကၠိဖိခိၣ်နၢ်သီတၢ်ဃုထၢ၀ံၤ၀ဲလံဖဲတလါအံၤလါယနူၤအါရံၤ(၂၇)သီအနံၤအဂ့ၢ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ကညီကၠိဖိၦာ်ဘျးစဲတၢ်အိၣ်ဖှိၣ်ဒီးတၢ်ဃုထၢဘျီ၀ဲအံၤအပူၤတၢ်မၤအီၤစးထီၣ်လၢလါယနူၤအါရံၤ(၂၃)သီတုၤလၢ(၂၇)သီလၢ(၅)သီအတီၢ်ပူၤဒီးတနံၣ်အံၤတၢ်ဃုထၢ၀ဲကညီကၠိဖိၦာ်ဘျးစဲကရူၢ်ခိၣ်နၢ်သီအပူၤစီၤန့ၢ်ကီၢ်စ့ဘၣ်တၢ်ဃုထၢထီၣ်အီၤလၢကရၢခိၣ်အလီၢ်ဒီးခီဖျိလၢကရူၢ်ခၢၣ်စးတဖၣ်နာ်န့ၢ်အီၤဒီးဃုထၢထီၣ်အီၤအဃိမ့ၢ်တၢ်ခွဲးတၢ်ယာ်တမံၤအသိးလၢကတၢ်ဖံးတၢ်မၤအပူၤတိာ်လီၤပာ်၀ဲအသးလၢခါဆူညါကမၤသကိးတၢ်ဘူးဘူးတံၢ်တံၢ်ဒီးကညီကူၣ်သ့ဆဲးလၤ၀ဲၤကျိၤဃုာ်ဒီးခ့ၣ်အဲၣ်ယူၤကရၢမိၢ်ၦၢ်အဂ့ၢ်အ၀ဲစံး၀ဲဒ်အံၤန့ၣ်လီၤႉ “ၦၤဃုထၢထီၣ်ယၤအဃိယသးခုသးမုာ်ဒိၣ်မးလီၤ˜မ့ၢ်တၢ်ခွဲးတၢ်ယာ်တခါလၢယကဘၣ်တီခိၣ်ရိၢ်မဲမၤသကိးတၢ်လီၤဆီဒၣ်တၢ်လၢကညီကၠိဖိၦာ်ဘျးစဲတၢ်ဖံးတၢ်မၤအံၤအပူၤဒီးယတူၢ်ဘၣ်လၢယမူဒါအိၣ်အါထီၣ်လၢယကဘၣ်မၤတၢ်မီၤနီၤ˜ ယပာ်လီၤယသးလၢပကမၤဆူၣ်ထီၣ်က့ၤပတၢ်ဖံးတၢ်မၤသ့ၣ်တဖၣ်˜ဒ်ခိၣ်နၢ်တဖၣ်မၤတ့ၢ်လံ၀ဲပာ်လီၤတ့ၢ်လံ၀ဲအကျိၤအကျဲအသိးန့ၣ်ပကဘၣ်မၤ˜ပကဘၣ်ဒုးလိၣ်ထီၣ်ဖးထီၣ်အီၤမီၤနီၤဒီးတၢ်လၢကဘၣ်ဒုးအိၣ်ထီၣ်အီၤအသီတဖၣ်ကအိၣ်စ့ၢ်ကီး၀ဲလၢပတၢ်ဖံးတၢ်မၤအသီအပူၤန့ၣ်ပကမၤသကိးတၢ်ဘူးဘူးတံၢ်တံၢ်ဒီးကညီကူၣ်သ့ဆဲးလၤ၀ဲၤကျိၤဃုာ်ဒီးပကရၢမိၢ်ၦၤလၢအမ့ၢ်ကညီဒီကလုာ်စၢဖှိၣ်ကရၢ˜တၢ်မၤသကိးတၢ်ဒီးပကရၢမိၢ်ၦၢ်အံၤန့ၣ်အရ့ဒိၣ်၀ဲလၢတၢ်ဟံးစုနဲၣ်ကျဲၦၤတကပၤမီၤနီၤ” လၢန့ၣ်အမဲာ်ညါတနံၣ်အံၤဟီၣ်က၀ီၤပူၤတၢ်အိၣ်သးအဖီခိၣ်တၢ်ကီတၢ်ခဲအိၣ်လၢတၢ်ကမၤ၀ဲတၢ်အိၣ်ဖှိၣ်ရိဖှိၣ်အတၢ်တၢ်ရဲၣ်တၢ်ကျဲၤဒ်အံၤဘၣ်ဆၣ်ခီဖျိခိၣ်နၢ်ဒီးကညီကၠိဖိၦာ်ဘျးစဲတဖၣ်အတၢ်သူၣ်ဆူၣ်သးဂဲၤအဃိတၢ်ရဲၣ်တၢ်ကျဲၤကဲထီၣ်လိၣ်ထီၣ်၀ဲဒီးမ့ၢ်တၢ်သးလီၤသူၣ်မံသးမုာ်အသိးကၠိဖိၦာ်ဘျးစဲကရူၢ်တဖၣ်ခါဆူညါကဂုၢ်ကျဲးစၢးပာ်ဖှိၣ်မၤသကိးတၢ်အါန့ၢ်အလီၢ်အဂ့ၢ်တီနီၢ်မုၢ်ထီၣ်ကၠိခိၣ်သရၣ်အဲၣ်ဃူဆီၣ်တခူစံး၀ဲဖဲတၢ်ရဲၣ်တၢ်ကျဲၤအပူၤဒ်အံၤန့ၣ်လီၤႉ “ဒ်ပ၀ဲကညီကၠိဖိၦာ်ဘျးစဲအိၣ်ဒီးတၢ်ဖံးတၢ်မၤတၢ်ရဲၣ်တၢ်ကျဲၤလၢ၂နံၣ်တဘျီတၢ်အိၣ်ဖှိၣ်တၢ်ဃုထၢဒီးပာ်လီၤ၀ဲမုၢ်နံၤမုၢ်သီအိၣ်၀ဲအသိးန့ၣ်ပထံၣ်ဘၣ်လၢကၠိဖိမုၣ်ခွါခၢၣ်စးတဖၣ်သူၣ်ဆူၣ်သးဂဲၤဒီးတူၢ်နးတူၢ်ဖှီၣ်သးဘၣ်ဟဲ၀ဲကီကီခဲခဲတကးဘၣ်ပမ့ကွၢ်လၢတနံၣ်ညါအံၤဟီၣ်က၀ီၤပူၤတၢ်အိၣ်သးန့ၣ်တမ့ၢ်တၢ်အညီလၢပကမၤဘၣ်တၢ်ရဲၣ်တၢ်ကျဲၤအ၀ဲအံၤဘၣ်-ထံဆၢကီၢ်ကီၢ်ဆၢသနာ်က့တၢ်ဟးထီၣ်က့ၤလီၤတညီဘၣ်˜ဘၣ်ဆၣ်ခီဖျိပခိၣ်ပနၢ်သ့ၣ်တဖၣ်အတၢ်ဂုၢ်ကျဲးစၢးလၢပဂီၢ်အဃိပမၤတုၤထီၣ်လၢၦဲၤလံအဃိန့ၣ်ခါဆူညါပတၢ်ဖံးတၢ်မၤအပူၤပကဘၣ်ဂုၢ်ကျဲးစၢးအါန့ၣ်အလီၢ်ဒီးတဘၣ်ပျံၤလၢပကမၤကမၣ်တၢ်တဂ့ၤၦၤလၢအမၤကမၣ်တၢ်အါန့ၣ်တၢ်ကမၣ်ကအိၣ်အါ၀ဲဒီးလၢတၢ်ကမၣ်န့ၣ်ကဒုးကဲထီၣ်က့ၤ၀ဲတၢ်အဘၣ်မီၤနီၤ” ကညီကၠိဖိၦာ်ဘျးစဲကရူၢ်အံၤအ၀ဲၤကျိၤ၀ဲၤဒ့အိၣ်၀ဲခဲလၢာ်(၁၄)ဖုဘၣ်ဆၣ်တနံၣ်အံၤတၢ်အိၣ်ဖှိၣ်ဒီးတၢ်ဃုထၢတၢ်ရဲၣ်တၢ်ကျဲၤအပူၤကရူၢ်ဖိဒ်အမ့ၢ်တီနီၢ်˜သူမွဲခံ˜ကျိၣ်ယီၢ်˜ထံဃီၤခံ˜၀ါခး˜မုၢ်တြီၢ်˜တီအူ˜မဲၢ်ခီၣ်ခါ˜မဲၢ်လးဒီးကၠိဖိဟူးဂဲၤသ့ၣ်တဖၣ်ဟဲထီၣ်ပာ်ဖှိၣ်၀ဲအသးဘၣ်ဆၣ်ဘျံးဒ၀ဲၢ်˜ထံဆဲးမဲၤယွၤ˜စိကျိ˜ကဆီ၀ါလ့ကရူၢ်ဖိတဖၣ်အံၤခီဖျိတၢ်ဟးထီၣ်က့ၤလီၤတၢ်ကီတၢ်ခဲတဖၣ်အိၣ်၀ဲအဃိတပၣ်ဃုာ်ပၣ်ဂီၢ်၀ဲဘၣ်အဂ့ၢ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ တကတီၢ်ဃီလၢတၢ်ကီတၢ်ခဲဒ်အံၤအဖီခိၣ်ထံၣ်ဘၣ်၀ဲကညီကၠိဖိၦာ်ဘျးစဲကရူၢ်ခၢၣ်စးတဖၣ်သူၣ်ဆူၣ်သးဂဲၤလၢတၢ်မၤလိသ့သးဘၣ်ဃးတၢ်တီခိၣ်ရိၢ်မဲဒီးဟဲဒိးဃုထၢ၀ဲအသးအဃိသးခု၀ဲဒိၣ်မးဒီးဟ့ၣ်ဂံၢ်ဟ့ၣ်ဘါ၀ဲကညီကၠိဖိၦာ်ဘျးစဲကရူၢ်ဖိတဖၣ်လၢကဂုၢ်ကျဲးစၢးမၤတၢ်အဂ့ၤကတၢၢ်လၢတၢ်ကဲခိၣ်ကဲနၢ်တကပၤအဂ့ၢ်ကညီကၠိဖိၦာ်ဘျးစဲကရူၢ်ၦၤဟ့ၣ်ကူၣ်ဟ့ၣ်ဖးတၢ်သရၣ်မုၣ်နီၢ်ဖီဂ့ၤခုၣ်ဆီၣ်တခူစံး၀ဲဒ်အံၤန့ၣ်လီၤႉ “ပထံၣ်ဘၣ်လၢကၠိဖိခၢၣ်စးသ့ၣ်တဖၣ်ဟဲထီၣ်၀ဲဒၣ်အိၣ်ဒီးတၢ်သူၣ်ဆူၣ်သးဆူၣ်လၢတၢ်ကဟံထီၣ်ဖီၣ်ထီၣ်မူဒါလၢခါဆူညါအဂီၢ်အဃိမ့ၢ်တၢ်သးခုမီၤနီၤႉပကွၢ်ကဒါက့ၤတၢ်လၢၦၤသးစၢ်သ့ၣ်တဖၣ်န့ၣ်မ့ၢ်၀ဲခါဆူညါခိၣ်နၢ်အဃိသတးန့ၣ်ဒ်ပမ့ၢ်၀ဲဒၣ်ကညီကၠိဖိၦာ်ဘျးစဲကရူၢ်ပအိၣ်ဒီးပတၢ်ကိးသတြီလၢကညီကၠိဖိလၢၦၤတ၀ၢသီအဂီၢ်အသိးန့ၣ်ယနာ်လၢတၢ်မၤသကိးတၢ်လၢကရူၢ်အပတီၢ်န့ၣ်ၦၤလၢကဟံထီၣ်ဖီၣ်ထီၣ်တၢ်လၢခါဆူညါတဖၣ်ကမၤ၀ဲအဂ့ၤကတၢၢ်ကမၤ၀ဲဂ့ၤန့ၢ်အလီၢ်-ကကျဲးစၢးဃုထံၣ်န့ၢ်ကျဲလၢတၢ်သ့ကဲခိၣ်ကဲနၢ်လၢတၢ်တီခိၣ်ရိၢ်မဲက့ၤအၦၤကလုာ်ၦၤတ၀ၢအဂီၢ်မီၤနီၤ” ကညီကၠိဖိၦာ်ဘျးစဲကရူၢ်အံၤညီနုၢ်မၤ၀ဲတနံၣ်တဘျီတၢ်အိၣ်ဖှိၣ်အိၣ်၀ဲအသိးမၤ၀ဲခံနံၣ်တဘျီတၢ်ဃုထၢဖိခိၣ်နၢ်အသီတၢ်ရဲၣ်တၢ်ကျဲၤအိၣ်စ့ၢ်ကီး၀ဲန့ၣ်လီၤႉတနံၣ်အံၤကညီကၠိဖိၦၤဘျးစဲကရူၢ်(၂၈)၀ီတ၀ီနံၣ်ကတၢၢ်တၢ်အိၣ်ဖှိၣ်ဒီး(၁၅)၀ီတ၀ီတၢ်ဃုထၢတၢ်ရဲၣ်တၢ်ကျဲၤအပူၤတၢ်ဃုထၢထီၣ်၀ဲကညီကၠိဖိၦာ်ဘျးစဲကရူၢ်ကရၢခိၣ်စီၤန့ၢ်ကီၢ်စ့˜ကရၢခိၣ်ခံနီၢ်ဒါအ့˜ နဲၣ်ရွဲၣ်စီၤအီကၢးမူ˜နဲၣ်ရွဲၣ်သဃဲၤနီၢ်ဂ့ၤ၀ါဟဲဒီးၦၤပၢၤစ့နီၢ်ဟ့ၣ်လၢၦဲၤသ့ၣ်တဖၣ်အသိးတၢ်အိၣ်ဖှိၣ်ဒီးတၢ်ဃုထၢတၢ်ရဲၣ်တၢ်ကျဲၤအပူၤၦၤဘၣ်မူဘၣ်ဒါဒီးကညီကၠိဖိၦာ်ဘျးစဲကရူၢ်ဖိတဖၣ်ဟဲထီၣ်ပာ်ဖှိၣ်အသးခဲလၢာ်အိၣ်၀ဲ(၅၂)ဂၤအဂ့ၢ်သ့ၣ်ညါဘၣ်န့ၣ်လီၤႉ ကညီကၠိဖိၦာ်ဘျးစဲကရူၢ်အံၤမ့ၢ်၀ဲကၠိဖိဒီးသးစၢ်တၢ်ကရၢကရိလၢအသဘျ့တဖုအသိးမ့ၢ်စ့ၢ်ကီး၀ဲကၠိဖိတၢ်ကရၢကရိအဆိကတၢၢ်တဖုလၢကညီဟီၣ်က၀ီၤအပူၤန့ၣ်လီၤႉကရၢအံၤဘၣ်တၢ်သူၣ်ထီၣ်အီၤဖဲ၁၉၉၆နံၣ်လါယူၤလံ(၆)သီလၢမဲၢ်လးဒဲက၀ီၤအပူၤဒီးတနံၣ်ဃီအတီၢ်ပူၤန့ၣ်တၢ်ဒုးအိၣ်ထီၣ်၀ဲကညီကၠိဖိၦာ်ဘျးစဲကရူၢ်အနီၢ်တယၢ်စ့ၢ်ကီးအသိးကရၢအံၤမၤသကိး၀ဲတၢ်ဒီးကၠိဖိဒီးသးစၢ်လၢအိၣ်လၢဘၣ်ကီဘၣ်ခဲဒဲက၀ီၤ˜ကီၢ်ကၠီၣ်တဲၣ်-ကီၢ်ပယီၤကီၢ်ဆၢ˜ ဟီၣ်ခိၣ်ဒီဘ့ၣ်ဃုာ်ဒီးကီၢ်သူလ့ၤဟီၣ်က၀ီၤကီၢ်ပယီၤအပူၤသ့ၣ်တဖၣ်န့ၣ်လီၤႉ ဒ်န့ၣ်အသိးကညီကၠိဖိၦာ်ဘျးစဲကရူၢ်အံၤအိၣ်၀ဲဒီးအတၢ်ပညိၣ်ကွၢ်စိ(၅)ထံၣ်လၢအမ့ၢ်၀ဲတၢ်ဃုန့ၢ်၀ဲကၠိဖိတဖၣ်လီၢ်က၀ီၤတၢ်ကူၣ်ဘၣ်ကူၣ်သ့ခွဲးယာ်˜တၢ်ကတဲာ်ကတီၤကၠိဖိဒီးသးစၢ်တဖၣ်လၢခါဆူညါတၢ်တီခိၣ်ရိၢ်မဲ˜ တၢ်ဒုးအိၣ်ထီၣ်န့ၢ်ကညီကၠိဖိသးစၢ်တဖၣ်အတၢ်နၢ်ပၢၢ်ဘၣ်ဃးၦၤဂ့ၢ်၀ီမုၢ်ကျိၤ၀ဲၤကွာ်ဒီးထံဂုၢ်ကီၢ်သဲးတၢ်အိၣ်သး˜တၢ်ဟူးဂဲၤလၢတၢ်ပၢၤဃာ်ကၢၤဃာ်ကညီလုၢ်လၢ်တၢ်ဆဲးတၢ်လၤ˜ကျိာ်လံာ်လဲၢ်တဖၣ်ဃုာ်ဒီးတၢ်သူၣ်ထီၣ်ကညီသးစၢ်တဖၣ်အတၢ်နာ်န့ၢ်လီၤသးဒီးတၢ်ဆၢထၢၣ်လၢနီၢ်ကစၢ်ခီၣ်တဖၣ်န့ၣ်လီၤႉ
သုးကီၣ်ကးအသုးကလၢၤ(၃)ဖျၢၣ်လၢအိၣ်ဆီလီၤအသးန့ၢ် ၂၈ နံၣ်အံၤဂုၤက့ၤအခံ
လါယနူၤအါရံၤ ၂၉ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ တီအူကီၢ်ရ့ၣ်(သုးက့-၂)ဟီၣ်က၀ီၤအပူၤ ပယီၤသုးကီၣ်ကးအသုးကလၢၤ(၃)ဖျၢၣ်လၢအအိၣ်ဆီလီၤသးန့ၢ် ၂၈ နံၣ်အံၤလၢ(၃)သီအတီၢ်ပူၤ အ၀ဲသ့ၣ်အၦၤဟးထီၣ်ကွံာ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ပယီၤသုးနီၣ်ဂံၢ်(၂၀)ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ-၂၀)စုတီၤဖီလာ် ခီၣ်ချ့သုးရ့ၣ်(ခမရ-၅၂၈)ဒီး(ခမရ-၅၉၃)လၢအမ့ၢ် ထံတီၤပၢၤသုးကလၢၤႇ ဘုဆၣ်ခံသုးကလၢၤဒီးသံမုၢ်ပီၤသုးကလၢၤသ့ၣ်တဖၣ်အံၤ စးထီၣ်ဖဲလါယနူၤအါရံၤ (၁၃) သီတုၤလၢလါယနူၤအါရံၤ (၁၅) သီလၢသၢသီအတီၢ်ပူၤအံၤ အ၀ဲသ့ၣ်ပာ်တ့ၢ်ကွံာ် သုးကလၢၤဟးထီၣ်ကွံာ်၀ဲဒၣ်အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ခ့ၣ်အဲၣ်ယူၣ် တီအူကီၢ်ရ့ၣ် ၦၤဘၣ်မူဘၣ်ဒါတဂၤစံး၀ဲလၢ “ခီဖျိတၢ်ဒီၣ်တဲာ်ကွံာ်တၢ်အီၣ်အဃိအ၀ဲသ့ၣ်ဟးထီၣ်၀ဲဒီးခီဖျိလၢ (၁၀၂၇) ဒီး (၁၁၁၁) မၤ၀ဲဒၣ်ဒုးယာ်တၢ်ဟူးတၢ်ဂဲၤအလီၢ်ခံတၢ်ပိာ်ထွဲ အဃိတုၤလီၤလၢတီအူဟီၣ်က၀ီၤအပူၤ တၢ်ပၢၢ်ဆၢသုးပာ်ဖှိၣ်ဒုးအိၣ်ထီၣ်၀ဲတၢ်ဒုးမဲာ်သၣ်သ့အဃိအ၀ဲသ့ၣ်က့ၤမၤအါထီၣ်သုးဂံၢ်ဘါလၢ၀့ၢ်ပူၤ တၢ်လီၢ်ခံသုးကလၢၤသ့၀ဲ”အဂ့ၢ်န့ၣ် စံး၀ဲန့ၣ်လီၤႉ ထံတီၤပၢၤသုးကလၢၤအံၤအိၣ်ဆီလီၤသးလၢခ့ၣ်အဲၣ်ယူၣ် (သုးက့ ၂) ဒီး (သုးက့ ၅)အဆၢ (သုးက့ ၂)ဟီၣ်က၀ီၤအပူၤဒီးသုးကလၢၤသ့ၣ်တဖၣ်အံၤ မ့ၢ်သုးကလၢၤသ့ၣ်တဖၣ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးကညီဒီကလုာ်ဂၢၤသးကရၢ(KNDO)ဒီၣ်တဲာ်ကွံာ်အ၀ဲသ့ၣ်တၢ်အီၣ်အကျိၤကန့ၢ်လၢ အလါညါလံအဂ့ၢ်န့ၣ် သ့ၣ်ညါဘၣ်န့ၣ်လီၤႉ ပယီၤသုးကလၢၤ(၃)ဖျၢၣ်လၢအဟးထီၣ်ကွံာ်သ့ၣ်တဖၣ်အံၤလၢဟီၣ်က၀ီၤတၢ်ဘံၣ်တၢ်ဘၢအဂီၢ် ဖဲလါယနူၤအါရံၤ (၂၀) သီအနံၤန့ၣ် (KNDO) သုးရ့ၣ်(၄)ဒီးသုးက့သုးကရူၢ်လီၤဆီသ့ၣ်တဖၣ်ပာ်ဖှိၣ်ထီၣ်သးနုာ်လီၤမၤဆှဲလဲ၀ဲတၢ်လီၢ်အဂ့ၢ်န့ၣ် ခ့ၣ်အဲၣ်ယူၣ်တကပၤစံး၀ဲန့ၣ်လီၤႉ ဖဲအပူၤကွံာ် (၁၉၉၅) လါနိၣ်၀့ဘၢၣ် (၁၅) သီဒီး (၂၀) သီအနံၤန့ၣ် လၢတီအူကီၢ်ရ့ၣ်အပူၤ ထံတီၤပၢၤသုးကလၢၤဒီး ဘုဆၣ်ခံသုးကလၢၤခံဖျၢၣ်အံၤဟဲနုာ်လီၤအိၣ်၀ဲလၢတီအူကီၢ်ရ့ၣ်ပူၤဒီး...
ပယီၤသုးကဘီယူၤဘၣ်တၢ်ခးလီၤတဲာ်အီၤဖဲ(သ့ၣ်ကါညံၣ်နီၣ်)ႇၦၤသံ(၅)ဂၤအကျါပၣ်ဃုာ်သုးတြိၤ(၄၄)ခိၣ်သုးခိၣ်ကျၢၢ်ဖိ အ့မ့နီၣ်
လါယနူၤအါရံၤ ၂၉သီႇ ၂၀၂၄နံၣ်ႇ ခ့ၣ်အဲးစံၣ် ကညီကီၢ်စဲၣ်၊ ရၤမတံ၀့ၢ်ဃၢၤ ဖဲသ့ၣ်ကါညံၣ်နီၣ် ပယီၤသုးကီၣ်ကးခီၣ်ချ့သုးရ့ၣ်(ခမရ)၃၅၅အသုးကလၢၤဃၢၤန့ၣ် ဖဲတနံၤအံၤမုၢ်ဃ့ၢ်လီၤ ၂နၣ်တခီအဆၢကတီၢ်န့ၣ် ပယီၤသုးကဘီယူၤတဘ့ၣ်ဘၣ်တၢ်ခးလီၤတဲာ်အီၤဒီး ၦၤသံ(၅)ဂၤအကျါ သုးတြိၤ(၄၄)အခိၣ် သုးခိၣ်ကျၢၢ်ဖိ အ့မ့နီၣ်ဘၣ်ဃုာ်၀ဲဒၣ်အဂ့ၢ်သ့ၣ်ညါဘၣ်န့ၣ်လီၤႉ ပယီၤသုးကဘီယူၤအံၤဟဲဒ်သိးကဆီတလဲၦၤသုးဖိအဂီၢ်ဒီး တၢ်ပၢၢ်ဆၢသုးပာ်ဖှိၣ်ခး၀ဲဒီးကျိ(Sniper)ဒီးဘၣ်၀ဲၦၤနီကဘီယူၤဖိအဃိ ကဘီယူၤလီၤတဲာ်ကွံာ်၀ဲအဂ့ၢ် သ့ၣ်ညါဘၣ်လၢသုးတၢ်မဲာ်ညါတၢ်ကစီၣ်အအိၣ်န့ၣ်လီၤႉ ပယီၤသုးကဘီယူၤ၀ဲန့ၣ်န့ၣ် လီၤတဲာ်၀ဲဖဲ ခီၣ်ချ့သုးရ့ၣ်(ခမရ) ၃၅၅ဒီး၃၅၆ သုးကလၢၤအဘၢၣ်စၢၤၦၢ်ကျါတတီၤဒီးတၢ်လဲၤမၤစၢၤက့ၤ၀ဲအဖၢမုၢ်အဂ့ၢ်သ့ၣ်ညါလၢ(သ့ၣ်ကါညံၣ်နီၣ်)လီၢ်က၀ီၤဖိအအိၣ်န့ၣ်လီၤႉ
ပယီၤသုးခးတပျုၤတပျီၤကျိဖးဒိၣ်အဃိဒၢဖံလီၢ်က၀ီၤအိၣ်ဒီးတၢ်ဘၣ်ယိၣ်ဘၣ်ဘှီလၢကဖံးအီၣ်မၤအီၣ်တၢ်အဂီၢ်
လါယနူၤအါရံၤ ၂၉သီႇ ၂၀၂၄နံၣ်ႇ ခ့ၣ်အဲးစံၣ်ႉ ခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢႇဒူပျာ်ယာ်ကီၢ်ရ့ၣ်ႇ၀ီၢ်ရ့ၣ်ကီၢ်ဆၣ်ႇဒၢဖံသ၀ီဟီၣ်က၀ီၤ ဖဲအပူၤကွံာ်လါယနူၤအါရံၤ ၂၇သီအနံၤႇအနၣ်ရံၣ်၁၀း၃၀အဆၢကတီၢ်န့ၣ်ႇခီဖျိပယီၤသုးခးတပျုၤပျီၤနါစိၤကျိဖးဒိၣ်ဒီးလီၤတဲာ်၀ဲဒၣ်လၢဒၢဖံသ၀ီပူၤအဃိ တကီၢ်ခါခဲအံၤလီၢ်က၀ီၤဖိသ့ၣ်တဖၣ်အိၣ်ဒိးတၢ်ဘၣ်ယိၣ်ဘၣ်ဘှီလၢကဖံးအီၣ်မၤအီၣ်တၢ်လုၢ်အီၣ်နီၢ်ခိသးသမူအဂ့ၢ် သ့ၣ်ညါဘၣ်လၢ လီၢ်က၀ီၤၦၤဘၣ်မူဘၣ်ဒါအအိၣ်န့ၣ်လီၤႉ ဒၢဖံသ၀ီအံၤ လၢအပူၤကွံာ်တၢ်ကဲထီၣ်တ့ၢ်သးဒ်အံၤတအိၣ်နီတဘျီဘၣ်အဖီခိၣ်အခဲအံၤ သ၀ီဖိတနီၤဃ့ၢ်အိၣ်ကဒု၀ဲဒၣ်လၢအဂၤအိၣ်၀ဲဒၣ်အသိး လၢကဖံးအီၣ်မၤအီၣ်တၢ်အဂီၢ်ကဲထီၣ်၀ဲဒၣ်တၢ်ပျံၤတၢ်ဖုးလၢအ၀ဲသ့ၣ်ဂီၢ်ဂ့ၢ်လီၢ်က၀ီၤၦၤဘၣ်မူဘၣ်ဒါလၢတအဲၣ်ဒိးပာ်ဖျါအမံၤတဂၤစံးဘၣ်၀ဲ ခ့ၣ်အဲးစ့ၣ် ကညီတၢ်ကစီၣ်ဒ်အံၤန့ၣ်လီၤႉ “ဒၢဖံသ၀ီအံၤလၢညါလံၤလံၤတုၤခဲအံၤန့ၣ်မုာ်မုာ်ခုၣ်ခုၣ်လီၤႉတဘၣ်သဂၢၢ်ဒီးတၢ်ဒ်အံၤနီတဘျီဘၣ်ႉအခဲအံၤမ့ၢ်၀ဲနီၣ်ဂံၢ်တၢတဘျီလၢအ၀ဲသ့ၣ်အဂီၢ်အဃိ တနီၤန့ၣ်ဃ့ၢ်အိၣ်ကဒုတုၤလၢတလၢၤသ၀ီႇလၢၢ်မုာ်ႇမီၤကနဲသ၀ီသ့ၣ်တဖၣ်န့ၣ်အိၣ်၀ဲအသိးတနီၤန့ၣ်အိၣ်တ့ၢ်လၢသ၀ီပူၤအိၣ်လၢတၢ်ပူၤ ဘၣ်ပျံၤဘၣ်ဖုးတၢ်န့ၣ်လီၤႉလၢတၢ်န့ၣ်အဃိကဲထီၣ်၀ဲတၢ်တံာ်တာ်လၢကဖံးအီၣ်မၤအီၣ်ကကွးက့ၤရီဘၢၣ်(ကီၣ်)ႇကလုၢ်အီၣ်ဟၢဖၢဆၣ်အဂီၢ်န့ၣ်လီၤႉကဲထီၣ်၀ဲတၢ်ကီတၢ်ခဲဖးဒိၣ်ခီဖျိလီၢ်က၀ီၤဖိသ့ၣ်တဖၣ်မၤလၢဂီၤအီၣ်လၢဧါစ့ၢ်ကီးလီၤႉမ့ၢ်ကွးရီဘၢၣ်(ကီၣ်)မးအီၣ်ဘၣ်မ့ၤလီၤႉဒီးတၢ်ဃံးတၢ်စ့ၤ သဲးသၣ်စ့ၢ်ကိးအၦ့ၤတအိၣ်ႉအခဲအံၤရီဘၢၣ်အၦ့ၤအီၣ်ဒတစဲးဖိအဃိန့ၣ် မ့ၢ်တကွးဘၣ်၀ဲဘၣ်န့ၣ်တအီၣ်ဘၣ်မ့ၤဘၣ်ႉမ့ၢ်တကွးဘၣ်တနွံဘၣ်န့ၣ်လီၤဒိလံ”အဂ့ၢ်စံး၀ဲဒၣ်န့ၣ်လီၤႉ လၢန့ၣ်အမဲာ်ညါ တမ့ၢ်လၢတၢ်ဒုးတၢ်ယာ်အိၣ်အဃိပယီၤသုးသ့ၣ်တဖၣ်အံၤခါတပျုၤတပျီၤနါစိၤကျိဖးဒိၣ်ဘၣ်ႉစံး၀ဲဒၣ်လၢၦၤလဲၤက၀ီၤတံၢ်အ၀ဲသ့ၣ်ဒီးဘၣ်ယိၣ်၀ဲလၢၦၤကလဲၤထီၣ်အသုးကလၢၤအဃိခးတပျုၤတပျီၤနါစိၤကျိဖးဒိၣ်လီၤအဂ့ၢ်လီၢ်က၀ီၤၦၤဘၣ်မူဘၣ်ဒါစံး၀ဲဒၣ်စ့ၢ်ကီးန့ၣ်လီၤႉ ပယီၤသုးလၢခးတပျုၤပျီၤနါစိၤကျိဖးဒိၣ်ခဲအံၤမ့ၢ်၀ဲ ခီၣ်သုးရ့ၣ်(ခလရ)၁၀၆ဒီးခီၣ်ချ့သုးရၣ် (ခမရ) ၅၈၈လၢအအိၣ်ဆီလီၤသးဖဲ နီၢ်ဂံၢ်(၈)ယ့-ဒ၀ဲၢ် ကျဲမုၣ်ဖးဒိၣ်ကပၤဒီးခးလီၤ၀ဲကျိဖးဒိၣ်(၁၂၀)မၣ်မၣ် (၆)ဖျၢၣ်ဒီးအကျါသၢဖျၢၣ်န့ၣ်လီၤတဲာ်၀ဲဒၣ်လၢဒၢဖံသ၀ီပူၤအဃိ ဘၣ်ဟးဂီၤ၀ဲၦၤကမျၢၢ်ဟံၣ်(၄)ဖျၢၣ်အဂ့ၢ်သ့ၣ်ညါဘၣ်လၢလီၢ်က၀ီၤၦၤဘၣ်မူဘၣ်ဒါအအိၣ်န့ၣ်လီၤႉ ဒၢဖံသ၀ီအံၤ ဟံၣ်ခိၣ်အိၣ်၀ဲ(၁၃၀)ဘျဲၣ်ႇၦၤနီၢ်ဂံၢ်အိၣ်၀ဲ(၈၇၄)ဂၤႇ ဒီးၦၤလီၢ်က၀ီၤဖိသ့ၣ်တဖၣ်အံၤအါတက့ၢ်လုၢ်အီၣ်နီၢ်ခိသးသမူလၢတၢ်ကွးရီဘၢၣ်(ကီၣ်)ဒီးတၢ်မၤကၤအီၣ်သဲးသၣ်အဂ့ၢ်သ့ၣ်ညါဘၣ်စ့ၢ်ကီးန့ၣ်လီၤႉ
ကညီတၢ်ပၢၢ်ဆၢမုၢ်နံၤဆၢက့ၤအဂီၢ် သုးခိၣ်ကျၢၢ်စိ စီၤဘီကၠီၤဟဲ ဃ့ထီၣ်လၢကဒုၣ်သကိးတၢ်အီၣ်လၢ(၁၂)နၣ်ရံၣ်အတီၢ်ပူၤ
လါယနူၤအါရံၤ ၂၉ သီႇ ၂၀၂၄ နံၣ်ႇ ခ့ၣ်အဲးစံၣ် လၢကဟဲတလါအံၤလါယနူၤအါရံၤ ၃၁ သီအနံၤန့ၣ်လီၤဘၣ်၀ဲဒၣ်ကညီတၢ်ပၢၢ်ဆၢမုၢ်နံၤဆၢက့ၤ(၇၅)၀ီတ၀ီဒီး လၢမုၢ်နံၤဆၢက့ၤအံၤအဖီခိၣ်မ်ထံဖိကီၢ်ဖိကမျၢၢ်တဖၣ်ကဒုၣ်သကိးတၢ်အီလၢ(၁၂)နၣ်ရံၣ်အတီၢ်ပူၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးရိၣ်မဲခိၣ်ကျၢၢ်–၂ သုးခိၣ်ကျၢၢ်စိ စီၤဘီကၠီၣ်ဟဲ ဃ့ကညးထုးထီၣ်၀ဲလံာ်ဖဲမဟါလါယနူၤအါရံၤ ၂၈ သီအနံၤန့ၣ်လီၤႉ ဒ်လံာ်တၢ်ဃ့ထီၣ်အပူၤပာ်ဖျါ၀ဲအသိးန့ၣ်လၢတၢ်ဆီၣ်လီၤသးႇတၢ်သကွံာ်ကညးႇလၢတၢ်ကစုဒုအပူၤတဂၤလၢပတၢ်စူၢ်တၢ်နာ်ဒၣ်၀ဲစုာ်စုာ်ခီဖျိတၢ်ဒုးတၢ်အီၣ်ဃ့သကွံာ်ကညးလၢပၦၤကလုာ်အတၢ်ထူးဖျဲးႇတၢ်သဘျ့ပထံပကီၢ်အဂီၢ် န့ၣ် စးထီၣ်လါယနူၤအါရံၤ(၃၀)သီ ဖးမုၢ်တုၤလၢလါယူနူၤအါရံၤ ၃၁ သီ မုၢ်ထူၣ် ၁၂ နၣ်ရံၣ် လၢ(၁၂)နၣ်ရံၣ် အတီၢ်ပူၤ ကမျၢၢ်ထံဖိကီၢ်ဖိတဖၣ်ကဒုၣ်သကိးတၢ်အီၣ်အဂ့ၢ်န့ၣ် သုးခိၣ်ကျၢၢ်စိ စီၤဘီကၠီၤဟဲ ဃ့ကညး၀ဲလၢ လံာ်တၢ်ပာ်ဖျါပူၤန့ၣ် လီၤႉ ကညီတၢ်ပၢၢ်ဆၢမုၢ်နံၤဆၢက့ၤ(၇၅)၀ီတ၀ီလၢအလီၤဘၣ်၀ဲအံၤကမၤလၤကပီၤအီၤထဲလၢတၢ်သ့ၣ်နီၣ်ထီၣ်သုးမုၢ်သံၣ်ဘိႇခိၣ်နၢ်သိၣ်ဒူလၢအလုၢ်ထီၣ်ကွံာ်အသးသမူလၢထံကီၢ်ဒီးၦၤကလုာ်အဂီၢ်ဒ်အံၤတလၢၦဲၤ၀ဲဘၣ်ဒီးတကးဒံးဘၣ် သုးဖိသံၣ်ဖိႇကမျၢၢ်ထံဖိကီၢ်ဖိတအီၣ်ဘၣ်မ့ၤဘၣ်ကီၤမ့ၤအိၣ်အဃိလၢတၢ်သးတဖျၢၣ်ဃီအပူၤကဒုၣ်သကိးတၢ်အီၣ်လၢ (၁၂)နၣ်ရံၣ်အတီၢ်ပူၤအဂ့ၢ်န့ၣ် (KNLA)သုးရိၣ်မဲခိၣ်ကျၢၢ်–၂ သုးခိၣ်ကျၢၢ်စိ စီၤဘီကၠီၣ်ဟဲ စံးလီၤ၀ဲလၢခ့ၣ်အဲၣ်ယူၣ် လီၢ်ခၢသးတၢ်ကစီၣ်အပူၤဒ်အံၤ န့ၣ်လီၤႉ အ၀ဲစံး၀ဲလၢ“တၢ်ပၢၢ်ဆၢ(၇၅)နံၣ်ပကမၤလၤကပီၤအီၤထဲသိးပကသ့ၣ်နီၣ်ထီၣ်ပၦၤသုးမုၢ်သံၣ်ဘိ၊ခိၣ်နၢ်သိၣ်ဒူကမျၢၢ်ထံဖိကီၢ်ဖိလၢအလုၢ်ထီၣ်အသးသမူဒ်အံၤန့ၣ်တလၢၦဲၤဘၣ်ယၤဘၣ်ႉဒ်သိးအ၀ဲသ့ၣ်ခီဖျိတၢ်ပခီဖျိတ့ၢ်ဘၣ်တၢ်လၢတၢ်(၇၅)နံၣ်အတီၢ်ပူၤအံၤကမျၢၢ်တနီၤန့ၣ်ဃ့ၢ်မှံဟးဖျိးတုၤလၢကပၢၤနီၣ်ဒိမ့ထံတၢ်အီၣ်တၢ်အီတဘၣ်ဃုာ်အ၀ဲသ့ၣ်အခံ ဘၣ်ကီၤမ့ၤ အိၣ်၀ဲဒၣ်ႉၦၤသုးဖိနါက့တၢ်ဒုးတၢ်ယၤအပူၤမ့တတုၤဘၣ်န့ၣ်ဘၣ်ကီၤမ့ၤကီၤထံအိၣ်စ့ၢ်ႉတဘျီတခီၣ်လၢတၢ်ကိၢ်တၢ်ဂီၤအပူၤန့ၣ်တၢ်အီၣ်မ့အိၣ်လၢမဲာ်ညါဒၣ်လဲာ်န့ၣ်ယူၢ်၀ဲတလီၤလၢၤဘၣ်ခီဖျိလၢတၢ်သူၣ်ကးသးကးအဃိန့ၣ်ႉ(၇၅)နံၣ်အတီၢ်ပူၤအံၤဖျါဘၣ်ယၤလၢကမျၢၢ်၊သူၣ်ဘီၣ်သးစၢ်၊သုးဖိသံၣ်ဖိမ့ၢ်ဂ့ၤအတၢ်လဲၤခီဖျိအိၣ်၀ဲတုၤလၢပနီၢ်ကစၢ်ပခီဖျိဘၣ်အဃိန့ၣ်လၢတၢ်သးတဖျၢၣ်ဃီန့ၣ်ပကမၤလၤကပီၤဃုာ်ဒီးတၢ်ဒုၣ်တၢ်အီၣ်လၢတၢ်သ့ၣ်နီၣ်ထီၣ်က့ၤအ၀ဲသ့ၣ်အသးသမူအလုၢ်အၦ့ၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါတဂၤလၢပတၢ်စူၢ်တၢ်နာ်ဒၣ်၀ဲပကဆီၣ်လီၤသးႇပကပာ်သးတဖျၢၣ်ဃီတခါဃီလၢတၢ်တမံၤဃီ တခါဃီဒီးခါဆူညါပကလဲၤသကိးလၢတၢ်ဃူတၢ်ဖိးအဂ့ၢ်န့ၣ် သုးခိၣ်ကျၢၢ်စိ စီၤဘီကၠီၤဟဲ စံးအါထီၣ်၀ဲဒၣ်န့ၣ်လီၤႉ ဒ်န့ၣ်အသိးပကဘၣ်ကွၢ်ဆၢၣ်မဲာ်ႇပကဘၣ်ဆဲးတူၢ်ဆဲးမၤႇဆဲးခီဖျိဒံးဆူပၦၤကလုာ်အတၢ်မုၢ်လၢ်ဖီတၢၣ် ကလၢၦဲၤအဂီၢ် ပလိၣ်ဘၣ်ပၦၤကလုာ်တၢ်အဲၣ်တၢ်ကွံတၢ်ဃူတၢ်ဖိးႇတၢ်ပာ်လုၢ်ပာ်ၦ့ၤၦၤကလုာ်ဒီး တၢ်ဂုာ်ကျဲးစၢးနီၢ်နီၢ်ဆူညါန့ၣ်လီၤႉ ခါဆူညါပၦၤကလုာ်ကတုၤဖီတၢၣ်အဂီၢ်န့ၣ်ပကဘၣ်ဟ့ၣ်အၦ့ၤအါအါႇဘၣ်တူၢ်သံသးအါမးဒံးအဃိ ပကဘၣ်ဆဲးလဲၤအီၤဂုာ်ကဒါခံတသ့၀ဲဘၣ်အဂ့ၢ်န့ၣ် သုးခိၣ်ကျၢၢ်စိ စီၤဘီကၠီၤဟဲစံးအါထီၣ်၀ဲဒ်အံၤန့ၣ်လီၤႉ အ၀ဲစံး၀ဲလၢ“ခါဆူညါပဖီတၢၣ်ကတုၤအဂီၢ်န့ၣ်ပဘၣ်ဟ့ၣ်အၦ့ၤအါအါဒံးလီၤႉပကဘၣ်တူၢ်သံ၊ပကဘၣ်ဟီၣ်ဒံးလီၤ န့ၣ်ပသ့ၣ်ညါဆိဃာ်လီၤႉအဃိယအဲၣ်ဒိးတဲယၦၤကလုာ်လၢၦၤတကလုာ်လၢအကထူၣ်ဖျဲးထီၣ်ကန့ၢ်တၢ်သဘျ့န့ၣ် အလုၢ်ထီၣ်အသးသမူၦ့ၤ၀ဲလၢသွံၣ်လၢထံန့ၣ်အဒိအတဲာ်အိၣ်ခဲလၢာ်လီၤႉအဃိန့ၣ်တဘၣ်သးဆံးသးဟးဂီၤတဂ့ၤႉ လၢ(၇၅)နံၣ်အတီၢ်ပူၤအံၤၦၤဘၣ််လုၢ်ထီၣ်သးသမူအိၣ်ဆံးအါလံလဲၣ်န့ၣ်ပကဘၣ်ဆဲးလဲၤန့ၣ်ပကဘၣ်ဆဲးလဲၤလီၤကျဲအဂၤတအိၣ်ဘၣ်ႉဂုၤခံတသ့ဘၣ်ပကဘၣ်ဆဲးလဲၤလီၤ”အဂ့ၢ်န့ၣ် စံး၀ဲန့ၣ်လီၤႉ လၢတၢ်န့ၣ်အဃိလၢတၢ်နာ်တၢ်မုၢ်လၢ်ဖးဒိၣ်အပူၤကညီဖိကိးဂၤဒဲးဖဲကညီတၢ်ပၢၢ်ဆၢၦဲၤထီၣ်(၇၅)နံၣ်အံၤလၢတၢ်မၤလၤကပီၤၦၤကလုာ်လၢအလုၢ်ထီၣ်တ့ၢ်အသးသမူဃုာ်ဒီးၦၤလၢအလုၢ်ထီၣ်နီၢ်ခိးက့ၢ်ဂီၤတဖၣ်အဂီၢ်လၢတၢ်ပာ်လုၢ်ပာ်ၦ့ၤနီၢ်နီၢ်အပူၤတကးဒံးဘၣ်အမဲာ်ညါၦၤလၢအတူၢ်ဘၣ်ခီၣ်ဘၣ်လၢတၢ်သးပ့ၤနီၣ်တသ့တန့ၢ်အါအါဂီၢ်ဂီၢ်လၢ(၇၅)နံၣ်တၢ်လဲၤခီဖျိအံၤတ၀ံၤတကတၢၢ်ဖဲအံၤဘၣ်အဂ့ၢ်န့ၣ် သုးခိၣ်ကျၢၢ်စိ...
ချၢၣ်လွံၢ်ထူၣ်ကီၢ်ရ့ၣ်ပူၤ(KPSN)မၤစၢၤ၀ဲဂံၢ်ခီၣ်ထံးတၢ်အီၣ်တၢ်အီဒီးကျိၣ်စ့လၢၦၤဃ့ၢ်မှံဟးဖျိး(၂၀၀၀)ဂၤအဂီၢ်
လါယနူၤအါရံၤ ၂၆ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကီၢ်သူလ့ၤတၢ်ပၢ ချၢၣ်လွံၢ်ထူၣ်ကီၢ်ရ့ၣ် သုးက့ၤ(၃)ဟီၣ်က၀ီၤအပူၤ ဖဲလါယနူၤအါရံၤခံနွံတနွံအတီၢ်ပူၤန့ၣ်(KPSN)ဆီၣ်ထွဲမၤစၢၤ၀ဲဒၣ်ၦၤဃ့ၢ်မှံဟးဖျိးဖိအဂၤ(၂၀၀၀)လၢဂံၢ်ခီၣ်ထံးတၢ်အီၣ်တၢ်အီဒီးကျိၣ်စ့သ့ၣ်တဖၣ်အဂ့ၢ်န့ၣ် ကညီတၢ်ဆီၣ်ထွဲမၤစၢၤတၢ်မုာ်တၢ်ၦာ်ဘျးစဲကရူၢ်(KPSN)ထုးထီၣ်ပာ်ဖျါ၀ဲဖဲလါယနူၤအါရံၤ(၂၄)သီအနံၤန့ၣ်လီၤႉ တၢ်လဲၤဆီၣ်ထွဲမၤစၢၤကမျၢၢ်ၦၤဃ့ၢ်မှံဟးဖျိးဘျီ၀ဲအံၤမ့ၢ်၀ဲလၢၢ်ဒိၣ်ကီၢ်ဆၣ်ႇ ဆီထံးကီၢ်ဆၣ်ဒီးမ့မ့ၢ်လၢလၢၢ်ဒိၣ်ကီၢ်ဆၣ်ခီန့ၣ်တၢ်ဟ့ၣ်လီၤဆီၣ်ထွဲမၤစၢၤ၀ဲတၢ်အီၣ်မိၢ်ၦၢ်ဟုသးဒီးလၢဆီထံးကီၢ်ဆၣ်တကပၤခီန့ၣ်တၢ်ဟ့ၣ်လီၤဆီၣ်ထွဲ၀ဲလၢစ့အဂ့ၢ်န့ၣ် (KPSN)အၦၤနဲၣ်တၢ် သရၣ်မုၣ်နီၢ်၀ါခုၣ်ဆှံ စံး၀ဲဒ်အံၤန့ၣ်လီၤႉ “ပတၢ်န့ၣ်အိၣ်ခံခါမီၤနီၤႉ ကီၢ်ဆၣ်အ၀ဲတဘ့ၣ်န့ၣ်ဟ့ၣ်၀ဲလၢတၢ်အီၣ်မီၤ မ့မ့ၢ်လၢကီၢ်ဆၣ်အ၀ဲတဘ့ၣ်ဟီဒုန့ၣ်ဟ့ၣ်၀ဲ လၢစ့မီၤနီၤႉ ဘၣ်မနုၤအဃိလဲၣ်ဟီဒု မ့မ့ၢ်တၢ်လီၢ်လၢၦ့ၤတၢ်ညီအလီၢ်ဒီးလဲၤစိာ်တၢ်ညီအလီၢ်ဟီဒုန့ၣ် အ၀ဲသ့ၣ်ၦ့ၤ ဟ့ၣ်နီၤ၀ဲလၢတၢ်အီၣ်တၢ်အီမီၤႉ မ့မ့ၢ်လၢကီၢ်ဆၣ်အ၀ဲတဘ့ၣ်ဟီဒုန့ၣ် အ၀ဲသ့ၣ်ဟ့ၣ်၀ဲလၢစ့ဒီးအနီၢ်ကစၢ်ဒၣ်၀ဲၦ့ၤ အီၣ်က့ၤ၀ဲတၢ်အီၣ်မီၤနီၤႉ လၢတၢ်ဆီၣ်ထွဲမၤစၢၤတကပၤဟီဒု ပတလဲၤလီၤလၢနီၢ်ကစၢ်ဘၣ် အ၀ဲန့ၣ်ဟီဒု ကီၢ်ရ့ၣ်ဒီးဟီၣ်က၀ီၤ(CIDKP)သ့ၣ်တဖၣ်ရဲၣ်ကျဲၤက့ၤ၀ဲလီၤ”အဂ့ၢ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ တၢ်ဆီၣ်ထွဲမၤစၢၤတဘျီ၀ဲအံၤန့ၣ်လၢၢ်ဒိၣ်ကီၢ်ဆၣ်ပူၤန့ၣ် တၢ်မၤစၢၤ၀ဲဟံၣ်ခိၣ်(၂၇၆)ဖျၢၣ် ၦၤဃ့ၢ်မှံဟးဖျိးဖိ (၁၂၀၀)ဂၤ ဒီးဒ်န့ၣ်အသိးမ့မ့ၢ်လၢဆီထံးကီၢ်ဆၣ်တကပၤန့ၣ်တၢ်မၤစၢၤ၀ဲဟံၣ်ခိၣ်(၁၈၅)ဖျၢၣ် ၦၤဃ့ၢ်မှံဟးဖျိးဖိ(၈၀၀)ဂၤ ခဲလၢာ်ပာ်ဖှိၣ်အဂၤ(၂၀၀၀)ဃၣ်ဃၣ်အဂ့ၢ်န့ၣ် (KPSN)စံး၀ဲအသိးသ့ၣ်ညါဘၣ်န့ၣ်လီၤႉ ဘၣ်ဃးဒီးတၢ်ဆီၣ်ထွဲမၤစၢၤသ့ၣ်တဖၣ်အံၤန့ၣ်အါတက့ၢ်အိၣ်ဟဲန့ၢ်၀ဲဒၣ်လၢနီၢ်တဂၤအအိၣ်ႇ ကညီတၢ်ကရၢကရိသ့ၣ်တဖၣ်အအိၣ်ႇ ကညီၦၤတ၀ၢလၢအိၣ်ထံဂုၤကီၢ်ဂၤသ့ၣ်တဖၣ်အအိၣ်ဒီးတၢ်ကရၢကရိလၢအဆီၣ်ထွဲမၤစၢၤ ပတၢ်ဖံးတၢ်မၤသ့ၣ်တဖၣ်ပပာ်ဖှိၣ်ထီၣ်သးဒီးလၢဂ့ၢ်၀ီအူတၢ်လိၣ်အဖီခိၣ်တၢ်ဟ့ၣ်လီၤဆီၣ်ထွဲ၀ဲဒ်အံၤလီၤအဂ့ၢ်န့ၣ်(KPSN)အၦၤဘၣ်မူဘၣ်ဒါစံး၀ဲန့ၣ်လီၤႉ လၢန့ၣ်အမဲာ်ညါဘၣ်ထွဲဒီးတၢ်ဆီၣ်ထွဲမၤစၢၤၦၤဃ့ၢ်မှံဟးဖျိးဖိသ့ၣ်တဖၣ်အံၤန့ၣ်ခါလၢကဟဲဆူညါအဂီၢ်စ့ၢ်ကီး (KPSN)တၢ်ရဲၣ်တၢ်ကျဲၤအိၣ်လၢကလဲၤဆီၣ်ထွဲမၤစၢၤ၀ဲကီၢ်ရ့ၣ်လၢအဂၤအိၣ်ဒံး၀ဲဒၣ်အဂ့ၢ်န့ၣ် (KPSN)အၦၤနဲၣ်တၢ်သရၣ်မုၣ်နီၢ်၀ါခုၣ်ဆှံစံးအါထီၣ်၀ဲန့ၣ်လီၤႉ ဒ်န့ၣ်အသိးဖဲပူၤကွံာ်လါယနူၤအါရံၤ(၉)သီအနံၤန့ၣ်(KPSN)လဲၤဆီၣ်ထွဲၤစၢၤတ့ၢ်စ့ၢ်ကီး၀ဲကမျၢၢ်ၦၤဃ့ၢ်မှံဟးဖျိး ဒူသ၀ီ(၂၅)ဖျၢၣ် ၦၤနီၣ်ဂံၢ်(၁၄၉၆)ဂၤလၢအိၣ်ဒူပျာ်ယာ်ကီၢ်ရ့ၣ်(သုးက့ ၆)အပူၤအံၤဒံးအဂ့ၢ်န့ၣ်သ့ၣ်ညါဘၣ်န့ၣ်လီၤႉ
ထူလၢၢ်တၢ်ဒုး ပယီၤသုးအသုးသံ(၁၄)ဂၤအကျါဘၣ်ဃုာ်သုးရ့ၣ်ခိၣ်ခံ(၁)ဂၤ အဂ့ၢ်(KNLA)ပာ်ဂၢၢ်ပာ်ကျၢၤ
လါယနူၤအါရံၤႇ ၂၆သီႇ ၂၀၂၄နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ သုးက့(၄)ႇဘျံးဒ၀ဲၢ်ကီၢ်ရ့ၣ်ႇ ကစၢၢ်ဒိၣ်ကီၢ်ဆၣ်ႇ ထူလၢၢ်သ၀ီဟီၣ်က၀ီၤ ဖဲတၢ်ထီၣ်မၤန့ၢ်၀ဲ ထူလၢၢ်ပယီၤသုးကလၢၤအခါ ပယီၤသုးသံ(၁၄)ဂၤအကျါပၣ်ဃုာ်သုးရ့ၣ်ခိၣ်ခံ(၁)သုးခိၣ်ဒိၣ်ဖိတဂၤအဂ့ၢ် သ့ၣ်ညါဘၣ်လၢ(KNLA)သုးရ့ၣ်အၦၤဘၣ်မူဘၣ်ဒါအအိၣ်န့ၣ်လီၤႉ ထူလၢၢ်သုးကလၢၤအံၤပယီၤသုးကအိၣ်အဂၤ(၃၀)ဘျဲၣ်ဃၣ်ဃၣ်ဒီးတၢ်ဒုးအကတီၢ်ပယီၤသုးသံ(၁၄)ဂၤႇဘၣ်ဒိ(၁)ဂၤဒီးထူလၢၢ်သုးကလၢၤအံၤကဲထီၣ်၀ဲတၢ်ဘျုးတၢ်ဖှိၣ်လၢပယီၤသုးကလဲၤထီၣ်က့ၤလီၤလၢသုးကလၢၤတဖျၢၣ်ဒီးတဖျၢၣ်အဂီၢ်အဃိ ထီၣ်မၤပျီကွံာ်၀ဲလီၤအဂ့ၢ် သုးရ့ၣ်(၂၇)ႇသုးရ့ၣ်(၁၂)အသုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ်စီၤမူဂ့ၤစံးဘၣ်၀ဲခ့ၣ်အဲးစံၣ်-ကညီကွဲၤလ့လိၤဒ်အံၤန့ၣ်လီၤႉ “သုးကလၢၤ၀ဲန့ၣ်အကဲ၀ဲဒၣ်ခီၣ်တခါလၢအ၀ဲသ့ၣ်ဂီၢ်တခါလီၤႉအ၀ဲအိၣ်ဖဲအံၤန့ၣ်မ့ၢ်၀ဲ(Main)တၢ်လီၢ်တလိၣ်လၢကလဲၤထီၣ်က့ၤလီၤ၀ဲအဂီၢ်န့ၣ်လီၤႉပယီၤသုးန့ၣ်အသံ(၁၄)ဂၤႇအဘၣ်ဒိ(၁)ဂၤႇမ့မ့ၢလၢပၦၤတၢ်ဘၣ်ဒိဘၣ်ထံးတအိၣ်ဘၣ်ႉ ပယီၤသုးသ့ၣ်တဖၣ်အံၤတဘၣ်တၢ်ဒုးတၢ်ယာ်နီတဘျီဘၣ်အဃိန့ၣ်အသးသဟီၣ်ဆူၣ်၀ဲဒၣ်လီၤႉ အခဲအံၤန့ၣ်စၢလီၤဖးဒိၣ်ညါႉတိခိၣ်ယတဲအီၤလၢ ယကလဲၤထီၣ်သုတၢ်လီၢ် ပာ်လီၤကျိႇအ၀ဲသ့ၣ်တဲဆၢယၤလၢ မ့ၢ်ဘၣ်ပာ်လီၤကျိတပာ်လီၤကျိဘၣ်ႉမ့ၢ်ဘၣ်သံန့ၣ်ကသံ အဃိအၢၣ်ဒၢးမ့ၢ်ဘၣ်သံဒီးပထီၣ်၀ဲန့ၣ်”အဂ့ၢ်စံးဘၣ်၀ဲ ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါ လၢတၢ်ကထီၣ်ဟံးန့ၢ် ထူလၢၢ်သုးကလၢၤအဂီၢ် စးထီၣ်ဂဲာ်လိာ်၀ဲဖဲလါယနူၤအါရံၤ(၂၃)အနံၤတုၤ(၂၅)အနံၤလၢသၢသီအတီၢ်ပူၤဒီးဖီၣ်မူဒံးန့ၢ်ဃုာ်စ့ၢ်ကီး၀ဲဒီးပယီၤသုး(၇)ဂၤအကျါ ပၣ်ဃုာ်သုးဒ့ခိၣ်(၂)ဂၤအဂ့ၢ် သုးခိၣ်ဒိၣ်ဂီၢ်ဂ့ၢ်စီၤမူဂ့ၤတဲအါထီၣ်စ့ၢ်ကီး၀ဲဒၣ်န့ၣ်လီၤႉ ဒ်န့ၣ်အသိး ထူလၢၢ်သုးကလၢၤတၢ်ဒုးအပူၤ တၢ်မၤန့ၢ်၀ဲပယီၤသုးတၢ်စုက၀ဲၤ ဒ်အမ့ၢ် (MA1)-၄ခိၣ်ႇ(MA2)-၂ခိၣ်ႇ(MA3)-၆ခိၣ်ႇ(MA4)-၁ခိၣ်ႇ(MA5)-ခိၣ်ႇကျိစဲးလးညၣ်မဲၢ်-၁ခိၣ်ဃုာ်ဒီးအပျီဖုၣ်တခါ၊အချံတကးႇ(RPG7)-၁ခိၣ်ႇအချံ၅ဖျၢၣ်ႇတၢ်ဆှၢ( RPG)ကျိချံ၃ခါႇကျိဆၣ်ဒၢခဲလၢာ် ၃၃ဘ့ၣ်ႇ (60MM)၂ခိၣ်ႇအချံ ၁၆ဖျၢၣ်ႇ(40MM)အချံ ၄၂ဖျၢၣ်ႇစုကွံာ်မ့ၣ်ပိၢ်၄ဖျၢၣ်ႇဒဲနမိၣ်သွီကွဲၤဒီနၢ်ဂံၢ်-၁ဖျၢၣ်ႇ မ့ၣ်ပိၢ်အလုာ်ကလုာ်ဒီးတၢ်ဖိတၢ်လံၤဘၣ်ဃးမ့ၢ်ပိၢ်ခဲလၢာ်၁၁၈ခါႇအံၣ်နၣ်ကၣ် ၄ဖျၢၣ်ႇစဲးကတိၤတၢ်အဒိၣ်အဆံးခဲလၢာ်၃ဖျၢၣ်ႇ(60MM)အပျီခံဒါတခါႇအတၢၣ်တခါႇ၅ႉ၅၆ကျိချံအဖျၢၣ် ၃၀၉၀ႇ၇ႉ၆၂ကျိချံအဖျၢၣ် ၁၁၀၀အဂ့ၢ် သ့ၣ်ညါဘၣ်ဒ်သုးရ့ၣ်အတၢ်မၤနီၣ်မၤဃါအိၣ်၀ဲအသိးန့ၣ်လီၤႉ ထူလၢၢ်ပယီၤသုးကလၢၤအံၤ အိၣ်၀ဲဒၣ်လၢ ခ့ၣ်အဲၣ်ယူၣ်သုးက့(၄)၊သုးရ့ၣ်(၁၂)ဟီၣ်က၀ီၤဒီးဖဲတၢ်ထီၣ်ဟံးန့ၢ် သုးကလၢၤဘျီ၀ဲအံၤန့ၣ်ႇ(KNLA)သုးရ့ၣ်(၁၂)ႇသုးရ့ၣ်(၂၇)ႇ(PDF)ဒီမ့သုးကျိၤႇ(ဿ-၅)သုးကျိၤဒီး( ဿ-၁)သုးကျိၤသ့ၣ်တဖၣ်ပၣ်ဃုာ်၀ဲဒၣ်အဂ့ၢ် သ့ၣ်ညါဘၣ်လၢသုးရ့ၣ်အၦၤဘၣ်မူဘၣ်ဒါအအိၣ်န့ၣ်လီၤႉ ထူလၢၢ်ပယီၤသုးကလၢၤအံၤစးထီၣ်ဟဲအိၣ်သူၣ်လီၤသးလၢခ့ၣ်အဲၣ်ယူၣ်သုးက့(၄)ဟီၣ်က၀ီၤစးထီၣ်လၢ ၁၉၉၈နံၣ်ဒီးဟဲသူၣ်လီၤသးန့ၢ် (၂၆)နံၣ်၀ံၤအလီၢ်ခံ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်သုးပာ်ဖှိၣ်ထီၣ်ဟံးန့ၢ်ကွံာ်အီၤဖဲ၂၀၂၄လါယနူၤအါရံၤ၂၄သီအနံၤန့ၣ်လီၤႉ