လၢၢ်ဒိၣ်ကီၢ်ဆၣ်အပူၤပယီၤသုးခးလီၤကဒီးကျိဖးဒိၣ်အဃိကမျၢၢ်ဘၣ်ဒိ ၅ ဂၤအကျါပာ်ဃုာ်ပိာ်မုၣ် ၁ ဂၤ
လါယနူၤအါရံၤ ၂၃ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့-၃)လၢၢ်ဒိၣ်ကီၢ်ဆၣ်အပူၤ ဖဲမဟါလါယနူၤအါရံၤ ၂၂ သီ ဟါခီ(၉း၁၀)မံးနံးအဆၢကတီၢ် ခီဖျိပယီၤသုးခီၣ်သုးရ့ၣ်(ခလရ–၂၆၄) ခးလီၤကျိဖးဒိၣ်(၁၂၀ မမ)ဆူ ကၠီကိသ၀ီပူၤအဃိလီၢ်က၀ီၤကမျၢၢ်ဘၣ်ဒိ(၅)ဂၤအကျါပာ်ဃုာ်၀ဲပိာ်မုၣ် ၁ တဂၤအဂ့ၢ်န့ၣ် လၢၢ်ဒိၣ်ကီၢ်ဆၣ် ၦၤဘၣ်မူဘၣ်ဒါ စံး၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤလီၢ်ခံလၢလၢၢ်ဒိၣ်ကီၢ်ဆၣ်ဟီၣ်က၀ီၤအပူၤဒူသ၀ီကိးဖျၢၣ်ဒဲးဃၣ်ဃၣ်ဘၣ်ကွၢ်ဆၢမဲာ်၀ဲဒၣ် ပယီၤသုးအတၢ်ခးလီၤကျိဖးဒိၣ်ဆူဒူသ၀ီပူၤအိၣ်၀ဲတလီၢ်လီၢ်အဂ့ၢ်န့ၣ် လၢၢ်ဒိၣ်ကီၢ်ဆၣ် ၦၤကတိၤတၢ်ပၢ ပဒိၣ်စီၤ၀ါမုၢ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ “ဘၣ်ထွဲဒီးဒုၣ်ဒါခးလီၤကျိဖးဒိၣ်လၢဒူသ၀ီပူၤခီန့ၣ် ပကွၢ်က့ၤန့ၣ်စးထီၣ်ဖဲသုးဟံန့ၢ်ဆူၣ်ထံကီၢ်တၢ်စိတၢ်ကမီၤ ၀ံၤအလီၢ်ခံန့ၣ် ဒူသ၀ီကိးဖျၢၣ်ဒဲးဃၣ်ဃၣ် လၢလၢၢ်ဒိၣ်ကီၢ်ဆၣ်ဟီၣ်က၀ီၤအပူၤခီဒု ဘၣ်ကွၢ်ဆၢမဲာ်၀ဲဒၣ်တၢ်၀ဲအံၤန့ၣ် သ၀ီကိးဖျၢၣ်ဒဲးဃၣ်ဃၣ်န့ၣ်ပတဲသ့လီၤမီၤ”အဂ့ၢ်န့ၣ် စံး၀ဲန့ၣ်လီၤႉ ခီဖျိပယီၤသုးခးလီၤကျိဖးဒိၣ်အဃိ ကၠီကိ ၦၤသ၀ီဖိလၢအဘၣ်ဒိဘၣ်ထံးသ့ၣ်တဖၣ်န့ၣ်မ့ၢ်၀ဲ ကိၤလါမ့(၅၃)နံၣ်ႇ စ့ၤထ့(၅၂)နံၣ်ႇ ဖိကၠီၤ၀့(၆၈)နံၣ်ႇ ဘူကၠံ(၁၅)နံၣ် ဒီး မၣ်မ့ၤသဲၣ်နဲၤ(၅၂)နံၣ်သ့ၣ်တဖၣ်အံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးလၢၢ်ဒိၣ်ကီၢ်ဆၣ်အပူၤ စးထီၣ်တလါအံၤလါယနူၤအါရံၤ(၂၀)သီတုၤ(၂၂)သီလၢသၢသီအတီၢ်ပူၤအံၤ ခီဖျိပယီၤသုးခီၣ်သုးရ့ၣ်(ခလရ–၂၆၄)အံၤ ခးလီၤကျိဖးဒိၣ်လၢ ငဖဲၤအ့သ၀ီႇ လ့ၣ်ပ့ၤ၀ဲႇ ၀ါခၠဲဒီးကၠီကိသ၀ီသ့ၣ်တဖၣ်အံၤအပူၤအဃိ ၦၤကမျၢၢ်ဘၣ်ဒိ၀ဲခဲလၢာ်(၉)ဂၤႇ သံ၀ဲဒၣ်(၁)ဂၤအဂ့ၢ်န့ၣ် သ့ၣ်ညါလၢလၢၢ်ဒိၣ်ကီၢ်ဆၣ် ၦၤဘၣ်မူဘၣ်ဒါ အအိၣ်န့ၣ်လီၤႉ တကးဒံးဘၣ်ဖဲလါယနူၤအါရံၤ(၂၁)သီအနံၤစ့ၢ်ကီး နၣ်သၤကွ့ကမျၢၢ် တံမီၤယီလၤ(၆၀)နံၣ်အံၤ ဖဲအဟဲက့ၤဟံန့ၢ်တၢ်ဖိတၢ်လံၤလၢဟံၣ်အဆၢကတီၢ်ပယီၤသုးလၢအိၣ်...
ခ့ၣ်အဲၣ်ယူၣ်မၤ၀ဲ(၉)၀ီတ၀ီစၢၤသွဲၣ်သီခိၣ်နၢ်တၢ်မၤလိပျၢ်အမူး
လါယနူၤအါရံၤ ၂၃ သီႇ ၂၀၂၄ နံၣ်ႇ ခ့ၣ်အဲးစံၣ် ဖဲမဟါလါယနူၤအါရံၤ ၂၂ သီအနံၤန့ၣ် တၢ်မၤ၀ဲဒၣ်(၉)၀ီတ၀ီ စၢၤသွဲၣ်သီခိၣ်နၢ်တၢ်မၤလိပျၢ်အမူးလၢ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ လီၢ်ခၢၣ်သးအိးထီၣ်၀ဲဒၣ်အံၤဒီး တၢ်ပျၢ်တၢ်မၤလိအမူးအံၤ ဘၣ်တၢ်မၤအီၤလၢလီၢ် ခၢၣ်လီၢ်ခၢၣ်သး၀ဲၤလီၢ်ခိၣ်သ့ၣ်န့ၣ်လီၤႉ ၦၤလၢအဟဲထီၣ်တၢ်မၤလိဘျီ၀ဲအံၤသ့ၣ်တဖၣ်န့ၣ်ဟဲ၀ဲဒၣ်လၢခ့ၣ်အဲၣ်ယူၣ် ကီၢ်ရ့ၣ်ႇသုးက့(၇)ဘ့ၣ်အခၢၣ်စးဃုာ်ဒီး သုးဂ့ၢ်၀ီဒီး၀ဲၤကျိၤဘၣ်ထွဲအခၢၣ်စးတဖၣ်ခဲလၢာ်ဟဲထီၣ်၀ဲဒၣ်တၢ်မၤလိအိၣ်၀ဲ(၃၅)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်သိးတၢ်ထီၣ်ကဒါက့ၤခ့ၣ်အဲၣ်ယူၣ်ခိၣ်နၢ်အလီၢ်ကသ့အဂီၢ်န့ၣ်ဘၣ်တၢ်အိးထီၣ်၀ဲဒၣ်တၢ်မၤလိအံၤဒီး (၉)၀ီတ၀ီတၢ်မၤဘျီ၀ဲအံၤဘၣ်တၢ်စးထီၣ်အိးထီၣ်အီၤဖဲအပူၤကွံာ်(၂၀၂၂)အခါန့ၣ်လီၤႉလၢန့ၣ်အမဲာ်ညါတၢ်မၤလိအံၤတံာ်တာ်၀ဲတနံၣ်ဘျဲၣ်ဒီးကၠိအံၤတၢ်သိၣ်လိန့ၢ်၀ဲ ဂံၢ်ခီၣ်ထံးသုးဂ့ၢ်၀ီႇထံရူၢ်ကီၢ်သဲးဒီးတၢ်စံၣ်စိၤတဲစိၤအဂ့ၢ်အကျိၤ သ့ၣ်တဖၣ်န့ၣ်လီၤႉ ကၠိအံၤၦၤအိၣ်ဟဲထီၣ်၀ဲဒၣ်လၢခ့ၣ်အဲၣ်ယူၣ် သုးက့ႇကီၢ်ရ့ၣ်(၇)ဘ့ၣ်အပူၤဒီး ကီၢ်ရ့ၣ်ႇသုးက့တဘ့ၣ်န့ၣ် ခၢၣ်စးဟဲထီၣ်၀ဲ(၅)ဂၤဒီးတကးဒံးဘၣ်အမဲာ်ညါတၢ်မၤလိဘျီ၀ဲအံၤပၣ်ဃုာ်စ့ၢ်ကီး၀ဲကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)လီၢ်ခၢၣ်သးဒီးကညီသးစၢ်ကရၢ(KYO),ကညီပိာ်မုၣ်ကရၢ(KWO),ခ့ၣ်အဲၣ်ယူၣ်လီၢ်ခၢၣ်သး၀ဲၤလီၢ်ခိၣ်သ့ၣ် အခၢၣ်စးသ့ၣ်တဖၣ်န့ၣ်လီၤႉ ဒူပျာ်ယာ်ကီၢ်ရ့ၣ် ခၢၣ်စး စီၤသဘျ့ၣ်ထူလၢအဟဲထီၣ်တၢ်မၤလိအံၤစံး၀ဲလၢ“နကကဲထီၣ်ခိၣ်နၢ်တဂၤန့ၣ်တမ့ၢ်တၢ်ညီဘၣ်ႉ နကကဲထီၣ်ခိၣ်နၢ်တဂၤအဂီၢ်န့ၣ်တၢ်ဃုသ့ၣ်ညါမၤလိမၤဒိးန့ၣ်အရ့ဒိၣ်၀ဲဒၣ်လီၤႉခဲအံၤပမၤလိ၀ဲဒၣ်ထံရူၢ်ကီၢ်သဲးႇတၢ်စံၣ်စိၤတဲစိၤအဂ့ၢ်အကျိၤသ့ၣ်တဖၣ်မီၤနီၤႉတၢ်သ့ၣ်တဖၣ်အံၤနမ့သ့ၣ်ညါမးနကကဲထီၣ်ဘၣ်ခိၣ်နၢ်လီၤႉအဃိတၢ်လၢပကဘၣ်ဃုသ့ၣ်ညါအီၤန့ၣ်အိၣ်ဒီဒူၣ်ညါဒံးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်မၤတၢ်ပျၢ်တၢ်မၤလိတၢ်ရဲၣ်တၢ်ကျဲၤဘျီ၀ဲအံၤန့ၣ် ခ့ၣ်အဲၣ်ယူၣ် ကရၢခိၣ် ပဒိၣ်စီၤကွဲၤထူ၀့ႇ ခ့ၣ်အဲၣ်ယူၣ်လီၢ်ခၢၣ်သး ခိၣ်နၢ်ႇသုးခိၣ်သုးနၢ်တဖၣ်ႇကမံးတံာ်ဖိႇကၠိဖိမုၣ်ခွါဃုာ်ဒီး၀ဲၤကျိၤဘၣ်ထွဲၦၤဘၣ်မူဘၣ်ဒါတဖၣ်ဟဲထီၣ်၀ဲဒၣ်န့ၣ်လီၤႉ လၢန့ၣ်အမဲာ်ညါတၢ်ရဲၣ်တၢ်ကျဲၤအပူၤသုးက့ႇကီၢ်ရ့ၣ်ခၢၣ်စးၦၤကၠိဖိလၢအဖျိးစိသ့ၣ်တဖၣ်န့ၣ် ခိၣ်နၢ်ဘၣ်ထွဲတဖၣ်ဟ့ၣ်လီၤ၀ဲခိၣ်ဖးဖျိးစိတဂၤစုာ်စုာ်န့ၣ်လီၤႉ
ဘံလ့ကီၢ်ဆၣ်အပူၤတၢ်ခးသံ၀ဲ(ဇုတ်သုတ်)သုးကီၣ်ကးအၦၤ ဘၠူၣ်စီထံအခိၣ်
လါယနူၤအါရံၤ ၂၃ သီႇ ၂၀၂၄ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ဒူသထူၣ်ကီၢ်ရ့ၣ် ဘံလ့ကီၢ်ဆၣ် စွဲကလၤသ၀ီအပူၤ ဖဲမဟါလါယနူၤအါရံၤ ၂၂ သီ ဟါခီ ၇း၃၀ အဆၢ ကတီၢ် တၢ်ခးသံ၀ဲဒၣ်သုးကီၣ်ကးအၦၤဘၠူၣ်စီထံအခိၣ် အူညၤထိ(ကိး)အူပီအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါ စံး၀ဲအသိးသ့ၣ်ညါဘၣ်န့ၣ်လီၤႉ ဘၠူၣ်စီထံအခိၣ် အူညၤထိအံၤအဟံၣ်အိၣ်၀ဲဒၣ်ခံဖျၢၣ်အိၣ်၀ဲဒၣ်လၢစွဲကလၤသ၀ီတဖျၢၣ်ႇ စိးသိး(ဇုတ်သုတ်)သ၀ီတဖျၢၣ်ဒီး ဖဲဟါခီ ၇ တခီအဆၢကတီၢ်ဖဲအက့ၤဆူ(စွဲကလၤ)အဟံၣ်အခါန့ၣ် တၢ်ဒီသဒၢကမျၢၢ်သုးခးသံအီၤဖဲသ၀ီကျဲခိၣ်ထိးအဂ့ၢ်န့ၣ် စိးသိး(ဇုတ်သုတ်)သ၀ီဖိ တဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“ၦၤခးသံအိၤဖဲစွဲကလၤသ၀ီန့ၣ်ႉအဟံၣ်န့ၣ်အိၣ်ခံဖျၢၣ်အိၣ်လၢစိးသိးတဖျၢၣ်စွဲကလၤတဖျၢၣ်ႉ ဖဲအက့ၤလၢစွဲကလၤသ၀ီအခါန့ၣ်အက့ၤဒိး၀ဲဒၣ်(Honda Fit)သိလ့ၣ်အ၀ါ ၦၤခးအီၤန့ၣ်ဖဲသ၀ီခိၣ်ထိးန့ၣ်လီၤႉ အဟံၣ်န့ၣ်အိၣ်ဖဲသ၀ီခိၣ်ထိးႇ(PDF)ခးအီၤႉအ၀ဲန့ၣ်မ့ၢ်၀ဲဒၣ်(ဇုတ်သုတ်)ဘၠူၣ်စီထံအခိၣ်လီၤ”အဂ့ၢ်န့ၣ် စံး၀ဲန့ၣ်လီၤႉ ဘၠူၣ်စီထံအခိၣ် အူညၤထိ(ကိး)အူပီအံၤအသးနံၣ်အိၣ်၀ဲဒၣ်(၆၆)နံၣ်ဒီး ခီဖျိတၢ်ခးအီၤကျိဘၣ်၀ဲဒၣ်အသးနါၦၢ် အစ့ၣ်တကပၤန့ၣ်ခံထံၣ်အဃိ တၢ်လဲၤဆှၢအီၤတဘျီဃီဆူဘံလ့ကီၢ်ဆၣ် ကမျၢၢ်တၢ်ဆါဟံၣ်ဒီး ကဘၣ်ဖဲ ၈ နၣ်ရံၣ် ဘျဲၣ်အဆၢကတီၢ်န့ၣ်အသံ၀ဲဒၣ်လီၤအဂ့ၢ်န့ၣ် လီၢ်က၀ီၤသ၀ီဖိတဂၤဃီ၀ဲန့ၣ် စံးအါထီၣ်၀ဲဒၣ်န့ၣ်လီၤႉ ဒ်န့ၣ်အသိးအပူၤကွံာ်လၢညါန့ၣ်ဘၠူၣ်စီထံအခိၣ် အူညၤထိအံၤ ဟ့ၣ်ဂံၢ်ဟ့ၣ်ဘါ၀ဲဒၣ်သွံၣ်ဃူဖိး(ကြံ့ခိုင်ရး)ပၣ်တံၣ်ဒီး အကဲဘၠူၣ်စီထံအခိၣ်အံၤကအိၣ်ဒၣ်ထဲတနံၣ်ခိၣ်ဃၢၤဒံးလီၤအသိး စှၤသီအတီၢ်ပူၤအံၤၦၤဒိးန့ၢ်တၢ်ကစီၣ်လၢ သုးကီၣ်ကးကဟဲဟ့ၣ်လီၤအ၀ဲသ့ၣ်ကျိအဃိတချုးၦၤဟဲဟ့ၣ်လီၤအ၀ဲသ့ၣ်ကျိဒံးဘၣ်အခါန့ၣ် ဘၣ်တၢ်လဲၤခးစိအီၤ ဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိး သ့ၣ်ညါဘၣ်န့ၣ်လီၤႉ အူညၤထိအံၤဖဲသုးကီၣ်ကးဟဲလၢသ၀ီပူၤအခါတၢ်လိၣ်မ့အိၣ်တမံၤမံၤန့ၣ်အ၀ဲဟးရဲၣ်ကျဲၤမၤစၢၤ၀ဲဒၣ်ဒီး ဒူသ၀ီၦၤကမျၢၢ်လၢအအိၣ်ဘူးဖဲန့ၣ်သ့ၣ်တဖၣ်အါဒၣ်တက့ၢ်န့ၣ်ထီဒါသုးကီၣ်ကးတအိၣ်အါအါဘၣ်မ့ၢ်လၢအ၀ဲသ့ၣ် အံၤပျံၤဘၣ်တၢ်အဃိလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တၢ်ထီၣ်န့ၢ်(၀ီၢ်ရ့ၣ်ကီၢ်ဆၣ်)ကၠိတတါတၢ်သမံသမိးတြဲၤအပူၤ သုးကီၣ်ကးအၦၤသံ ၁၀ ဂၤ
လါယနူၤအါရံၤ ၂၂ သီႇ ၂၀၂၃ နံၣ်ႇ ခ့ၣ်အဲးစ့ၣ် သုးကီၣ်ကးအစုတီၤဖီလာ် ကၠိတတါသုးကလၢၤလၢ အိၣ်တလၢၤကီၢ်စဲၣ် ၀ီၢ်ရ့ၣ်ကီၢ်ဆၣ် မီၤကန့ၤသ၀ီပူၤအံၤ ဖဲလါယနူၤအါရံၤ(၂၀)သီ ဂီၤခီ ၇ နၣ်ရံၣ်တခီအဆၢကတီၢ်န့ၣ် တၢ်ပၢၢ်ဆၢသုးပာ်ဖှိၣ်ကရူၢ်လဲၤထီၣ်မၤန့ၢ်၀ဲဒီး တၢ်ဒုးအပူၤသုးကီၣ်ကးအၦၤတကပၤသံ၀ဲအဂၤ(၁၀)အဂ့ၢ်န့ၣ် ၀ီၢ်ရ့ၣ်တၢ်ဒုးစဲးပြဲးကရူၢ်(YGF)ထုးထီၣ်ပာ်ဖျါ၀ဲ ဖဲလါယနူၤအါရံၤ ၂၀ သီအနံၤန့ၣ်လီၤႉ လၢတၢ်ထီၣ်သုးကီၣ်ကးအတြဲၤဘျီ၀ဲအံၤတံာ်တာ်၀ဲတနၣ်ရံၣ်ဃၣ်ဃၣ်ဒီးသုးကီၣ်ကးတကပၤသံ၀ဲ(၁၀)ဂၤ တကးဒံးဘၣ်အမဲာ်ညါဃ့ၢ်ပူၤဖျဲးသးစ့ၢ်ကီးအိၣ်၀ဲအဂ့ၢ်(YGF)ၦၤဘၣ်မူဘၣ်ဒါတဂၤ စံး၀ဲဒ်အံၤန့ၣ်လီၤႉ “သုးကီၣ်ကးတကပၤန့ၣ်သံ၀ဲအဂၤ(၁၀)ႇ မ့မ့ၢ်လၢသုးကလၢၤခီန့ၣ်ပဒွဲၣ်အူကွံာ်အီၤလၢမဟါလံႉ သုးကလၢၤလၢအိၣ်ဘူးဖဲန့ၣ်သ့ၣ်တဖၣ်ခးကျိဖးဒိၣ်ဒီတနၤလီၤ” အဂ့ၢ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးတၢ်လဲၤထီၣ်ပယီၤသုးတၢ်သမံသမိးတြဲၤဘျီ၀ဲအံၤန့ၣ်မ့မ့ၢ်လၢတၢ်ပၢၢ်ဆၢသုးပာ်ဖှိၣ်တကပၤ ဘၣ်ဒိ၀ဲဒၣ်(၃)ဂၤအဂ့ၢ်န့ၣ် (YGF)ထုးထီၣ်ပာ်ဖျါ၀ဲန့ၣ်လီၤႉ တၢ်ထီၣ်မၤန့ၢ်၀ဲ ကၠိတတါတၢ်သမံသမိးတြဲၤတဘျီအံၤန့ၣ်မ့ၢ်၀ဲ တီနီၢ်သုးကျိၤသုးဒ့(၃) ဃုာ်ဒီးတီနီၢ်သုးကျိၤႇ တလၢၤတၢ်ပၢၢ်ဆၢသုး(MSRF)ႇ ABSDF သုးရ့ၣ်(၁)ႇ တလၢၤတၢ်ပၢၢ်ဆၢတၢ်ကရၢကရိ(MSRO)ႇ (Ye Defence Force (YDF)ဒီး ၀ီၢ်ရ့ၣ် သ့ငဲၣ်(သိမ်းငှက်)တၢ်ပၢၢ်ဆၢသုးပာ်ဖှိၣ်သ့ၣ်တဖၣ်အံၤန့ၣ်လီၤႉ ကၠိတတါတၢ်သမံသမိးတြဲၤအံၤအိၣ်၀ဲဒၣ်လၢသုးကီၣ်ကးအခီၣ်ချ့သုးရ့ၣ်(ခမရ-၅၈၇)ႇ ခီၣ်သုးရ့ၣ်(ခလရ-၃၄၃)ႇ (ခမရ-၅၈၈)ဒီး(ခလရ-၁၀၆)သုးရ့ၣ်သ့ၣ်တဖၣ်အံၤအဘၢၣ်စၢၤဒီး ခီဖျိပယီၤသုးခးလီၤကျိဖးဒိၣ်တပယူာ်ဃီအဃိ တၢ်ဒွဲၣ်အူကွံာ်ပယီၤသုးကလၢၤ၀ံၤတၢ်ဂုၤက့ၤလီၢ်ခံအဂ့ၢ် YGF လံာ်တၢ်ပာ်ဖျါအပူူၤပာ်ဖျါ၀ဲန့ၣ်လီၤႉ တၢ်ထီၣ်ဟံန့ၢ်၀ဲတၢ်သမံသမိးတြဲၤအံၤအပူၤန့ၣ်တၢ်မၤန့ၢ်၀ဲ ၆၀ မမ ကျိပျီ တခိၣ်ႇ MA-1 (၁)ခိၣ်ႇ M16...
ကီးတရံး၀့ၢ်ပူၤ မ့ၣ်အူအီၣ်ကဒီးကမျၢၢ်ၦၤဃ့ၢ်မှံဟးဖျိးအဟံၣ်(၅၀)ဘျဲၣ်
လါယနူၤအါရံၤ ၂၂ သီႇ ၂၀၂၄ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကီးတရံး က၀ီၤဒ့(၅)အပူၤန့ၣ် ဖဲမဟါလါယနူၤအါရံၤ ၂၁ သီ ဟါခီအဆၢကတီၢ်န့ၣ် မ့ၣ်အူအီၣ်ကဒီး၀ဲ ကမျၢၢ်ၦၤဃ့ၢ်မှံဟးဖျိးအဟံၣ်တစှၤန့ၢ်(၅၀)ဖျၢၣ်ဘၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ကီးတရံးကမျၢၢ်ၦၤဃ့ၢ်မှံဟးဖျိးတဂၤစံး၀ဲလၢ“ပနၢ်ဟူလၢဟံၣ်အူအီၣ်ကအိၣ်လၢအဖျၢၣ်(၅၀)ဘျဲၣ်ညါႉလၢန့ၣ်တကပၤန့ၣ်ၦၤ(PDF)တအိၣ်ဘၣ်ႉၦၤတဲ၀ဲဒၣ်လၢပယီၤသုးဒွဲၣ်အူအီၣ်၀ဲလီၤႉဟံၣ်အူအီၣ်တဖၣ်န့ၣ်အါလၢဟံၣ်သ့ၣ်ပၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါဖဲမဟါလၢကီးတရံး၀့ၢ်ပူၤန့ၣ်တၢ်ဒုးကဲထီၣ်ဒီတနံၤကျၢၤညါဒီး ကမျၢၢ်ၦၤဃ့ၢ်မှံဟးဖျိးအဟံၣ် အူအီၣ်အံၤမ့ၢ်၀ဲဒၣ်ပယီၤသုးဒွဲၣ်အူအီၣ်၀ဲလီၤအဂ့ၢ်န့ၣ် တၢ်မဲာ်ညါတၢ်ပၢၢ်ဆၢသုးကရူၢ်တဖၣ် စံး၀ဲန့ၣ်လီၤႉ “တနံၤညါအံၤတၢ်ဒုးကဲထီၣ်ဒီတနံၤကျၢၤလီၤႉလၢက၀ီၤဒ့(၅)တကပၤနါက့ဟံၣ်အူအီၣ်အိၣ်စ့ၢ်ႉ ဟံၣ်တဖၣ်န့ၣ် ပယီၤသုးဒွဲၣ်အီၣ်၀ဲဒၣ်လီၤ”အဂ့ၢ်န့ၣ် တၢ်ပၢၢ်ဆၢသုးဖိတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲမဟါလါယနူၤအါရံၤ ၂၁ သီအနံၤန့ၣ်လီၤႉ ကီးတရံး က၀ီၤဒ့(၅)လၢမ့ၣ်အူအီၣ်ဟံၣ်ကဲထီၣ်သးအံၤ တၢ်ပၢၢ်ဆၢသုးပာ်ဖှိၣ်ကရူၢ်အိၣ်ဆီလီၤသးတအိၣ်၀ဲဘၣ်ဒီး မ့ၢ်ဒၣ်ပယီၤသုးအံၤနုာ်လီၤဟုၣ်တၢ်ၦၤဟံၣ်ပူၤ၀ံၤဒွဲၣ်အူအီၣ်ၦၤဟံၣ်လီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လီၢ်က၀ီၤကမျၢၢ်လၢအဂၤတဂၤစ့ၢ်ကီးစံး၀ဲလၢ“မ့ၣ်အူအီၣ်တၢ်လၢအ့ၤစလၤမ်(က၀ီၤဒ့ ၂)ပူၤႉ ပယီၤသုးန့ၣ် တမၢသိလ့ၣ်မၤသံမ့ၣ်အူအံၤလဲၤမၤပံာ်မ့ၣ်အူဘၣ်ႉၦၤတဲလၢပယီၤသုးပျၢ်လီၤအၦၤမၢဒွဲၣ်အူအီၣ်၀ဲ”အဂ့ၢ်န့ၣ် စံး၀ဲန့ၣ်လီၤႉ ဘၣ်ဃးဒီးတၢ်ဂ့ၢ်ကဲထီၣ်သးအံၤသုးကီၣ်ကးတကပၤထုးထီၣ်ပာ်ဖျါတၢ်ကစီၣ်တအိၣ်နီတမံၤဒံးဘၣ်န့ၣ်လီၤႉ တကီၢ်ခါခဲအံၤလၢကီးတရံး၀့ၢ်ပူၤတၢ်ဒုးကဲထီၣ်၀ဲဒၣ်ကိးမုၢ်နံၤဒဲးဒီးပယီၤသုးအံၤခးလီၤကျိဖးဒိၣ်လၢက၀ီၤဒ့ပူၤႇ ဟဲတ့ၢ်လီၤမ့ၣ်ပိၢ်ဒီးဒြိတကးဒံးဘၣ်ဒွဲၣ်အူအီၣ်ကမျၢၢ်ဟံၣ်အဃီအဃိခဲအံၤမ့ၣ်အူအီၣ်ၦၤကမျၢၢ်အိၣ်၀ဲအဖျၢၣ်(၂၀၀) ဃၣ်ဃၣ် လံအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ကညီတၢ်ပၢၢ်ဆၢကဲထီၣ်သးအဂ့ၢ်အူနူးတဲ၀ဲ
ကညီတၢ်ပၢၢ်ဆၢကဲထီၣ်သးအဂ့ၢ်အူနူးတဲ၀ဲ တံနိ(သ၀ီတါ) ဘၣ်ဃးဒီးကညီတၢ်ပၢၢ်ဆၢဟဲကဲထီၣ်သးအဂ့ၢ်န့ၣ်ပသ့ၣ်ညါဘၣ်တၢ်ဂ့ၢ်တၢ်ကျိၤခီဖျိလၢပခိၣ်ပနၢ်တဖၣ်အတၢ်တဲနၢ်ပၢၢ်ၦၤဒီးပဖးဘၣ်တၢ်ဂ့ၢ်ကျိၤလၢလံာ်လဲၢ်လၢအဘၣ်ထွဲတဖၣ်အပူၤအိၣ်၀ဲအါမးလီၤႉကညီတၢ်ပၢၢ်ဆၢစးထီၣ်အခါလၢကီၢ်ပယီၤပဒိၣ်အပူၤၦၤလၢအဘၣ်ထွဲဒီးတၢ်ဂ့ၢ်အံၤအဒိၣ်ကတၢၢ်တၢ်စိတၢ်ကမီၤခဲလၢာ်အိၣ်လၢအစုပူၤၦၤအကါဒိၣ်ကတၢၢ်အကျါတဂၤန့ၣ်မ့ၢ်၀ဲကီၢ်ပယီၤကိတိာ်ခိၣ်ကျၢၢ်အူနူး(ကိး)သခ့ၣ်နူးန့ၣ်လီၤႉဆၢကတီၢ်ဖဲန့ၣ်အခါကီၢ်ပယီၤထံလီၢ်ကီၢ်ပူၤတၢ်ဂ့ၢ်မ့ၢ်ကဲထီၣ်သးတမံၤလၢ်လၢ်အ၀ဲမ့ၢ်ဟ့ၣ်လီၤတၢ်ကလုၢ်ထဲတထံၣ်ဧိၤဒီးကဲထီၣ်၀ဲတၢ်ဂၢၢ်တၢ်ကျၢၤခဲလၢာ်န့ၣ်လီၤႉတၢ်ဆၢကတီၢ်ဖဲန့ၣ်အခါ တၢ်ဘၣ်ဟ့ၣ်ကညီကီၢ်ဧါ တၢ်တဘၣ်ဟ့ၣ်ကညီကီၢ်ဘၣ်လဲၣ်” အတၢ်ဆၢတဲာ်ဒီး တၢ်စိကမီၤခဲလၢာ်အိၣ်ဖှိၣ်၀ဲလၢအစုပူၤလီၤႉတၢ်ဂ့ၢ်လၢအဖီလာ်တခါအံၤမ့ၢ်ထတၢ်ကွဲးကျိးထံက့ၤကီၢ်ပယီၤကိတိာ်ခိၣ်ကျၢၢ်လီၢ်လံၤအူနူး(ကိး)သခ့ၣ်နူးအတၢ်ကွဲးလၢ(တာတေစနေသား)လံာ်ပူၤလၢအနူးပာ်ဖျါထီၣ်အတၢ်ထံၣ်အတၢ်ပာ်သးဘၣ်ဃးကညီတၢ်ပၢၢ်ဆၢဟဲကဲထီၣ်သးအဂ့ၢ်န့ၣ်လီၤႉမ့ၢ်ဒ်သိးပကသ့ၣ်ညါဘၣ်ပယီၤ(ဖဆပလ)ပဒိၣ်အနူးအတၢ်ပာ်သးမ့ၢ်ဒ်လဲၣ်ဒီးပပဲာ်ထံနီၤဖးကီၢ်ပယီၤပဒိၣ်ဆၢကတီၢ်ဖဲန့ၣ်ခါအတၢ်ထံၣ်လၢကညီဖိအဖီခိၣ်အိၣ်ဒ်လဲၣ်အဂ့ၢ်န့ၣ်လီၤႉ …………………………………………………………………………………………… ဒ်တၢ်ကတိၤဒိတခါစံး၀ဲတၢ်ဖှီၣ်တၢ်နးမ့ၢ်ဟဲလံန့ၣ်တဟဲထဲအနီၢ်ကစၢ်တဂၤဧိၤဘၣ်,ဟဲပုဟဲစိာ်ဃုာ်၀ဲဒီးအဖိဆံးဘံစၢ်တဖၣ်လီၤအသိး ကီၢ်ပယီၤလၢတၢ်ဖှီၣ်တၢ်နးဟဲနုာ်လီၤဆူအပူၤတဘ့ၣ်အံၤ တမ့ၢ်ထဲလၢခီၣ်မၠူၣ်နံး သုးမုၢ်ဒိၣ် ပၢၤကီၢ်သုးသိၣ်ဒူ၀ါ(ရဲဘော်ဖြူ)တဖၣ်ပူထီၣ်လီထီၣ်တၢ်ဒီး၀ံၤ၀ဲန့ၣ်ဘၣ်ႉတၢ်ဂ့ၢ်ကီလၢအဟဲပိာ်ထွဲထီၣ်အခံအဂၤ တဖၣ်အိၣ်ဒံးအါမးလီၤႉယကတဲဘၣ်သုတၢ်ဂ့ၢ်တဖၣ်ခဲအံၤႉဖဲသိၣ်ဒူ၀ါတဖၣ်ထီဒါက့ၤပဒိၣ်ဒီးနုာ်လီၤဆူၦၢ်ပူၤအခါန့ၣ်သခ့ၣ်နူးပဒိၣ်(သခင်နုအစိုးရ)အံၤလီၤဂာ်ဒ်ဟံၣ်သးၦၢ်အိရိၤတဖျၢၣ်လၢၦၤမ့ၢ်ဆီၣ်ဘၣ်အကပၤထဲတစဲးဖိဧိၤဒီးကလီၤၦီၢ်ကွံာ်၀ဲညီကဒၣ်တဖျၢၣ်အသိးန့ၣ်လီၤႉခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢလၢအထံၣ်တၢ်ဂ့ၢ်တဖၣ်အံၤန့ၣ်စးထီၣ်ဟူးဂဲၤ၀ဲလီၤႉအ၀ဲသ့ၣ်စးထီၣ်အတၢ်ဟူးတၢ်ဂဲၤန့ၣ်အတၢ်ဂ့ၢ်အိၣ်ကဒီးစ့ၢ်ႉတၢ်ဂ့ၢ်၀ဲန့ၣ်အလီၢ်အိၣ်လၢယကဘၣ်တဲပၠးတစဲးႉ ကညီဒီးပယီၤခံဒူၣ်ဘၢၣ်စၢၤအတၢ်ရ့လိာ်မုာ်လိာ်န့ၣ်တုၤဃီၤဆူဟီၣ်ခိၣ်တၢ်ဒုးဖးဒိၣ်ခံဘျီတဘျီကဲထီၣ်သး၀ံၤတစုန့ၣ်အတၢ်ဘၣ်ဂံာ်ဂူာ်တအိၣ်နီတမံၤဘၣ်ႉပမ့ၢ်ဘၣ်တဲန့ၣ်တၢ်လၢၦၤပယီၤဖိၣ်တဖၣ်န့ၣ်လၢအိၣ်ဖျဲၣ်လီၤတဘျီဃီဟဲ၀ဲဟဲစိာ်ဃုာ်န့ၢ်၀ဲဒီးအလုၢ်အလၢ်လၢအမ့ၢ်၀ဲၦၤလၢအအဲၣ်ဒိးဟးဃုထီၣ်န့ၢ်တၢ်အ့ၣ်လိာ်ဒီးၦၤဂၤန့ၣ်လီၤႉဘၣ်ဆၣ်မ့မ့ၢ်ၦၤကညီဖိတဖၣ်တခီတမ့ၢ်ဒ်န့ၣ်ဘၣ်ႉအ၀ဲသ့ၣ်န့ၣ်မ့ၢ်ၦၤလၢအမၤကလုၢ်အီၣ်ကစုတသီၣ်တသဲအိၣ်ဒၣ်အတၢ်ကစုဒုမုာ်မုာ်ခုၣ်ခုၣ်လီၤႉလၢတၢ်န့ၣ်အဃိလၢၦၤခံဒူၣ်အံၤအဘၢၣ်စၢၤန့ၣ်တၢ်ဘၣ်ဂံာ်ဂုာ်ကအိၣ်ထီၣ်အဂီၢ်အလီၢ်တအိၣ်နီတစဲးဘၣ်ႉ ပတဲတၢ်လၢၦၤကညီဖိတဖၣ်မ့ၢ်ၦၤအိၣ်ခုၣ်ခုၣ်မုာ်မုာ်မၤကလုၢ်အီၣ်ကစုအဂ့ၢ်န့ၣ်ပမ့ၢ်ကွၢ်ကဒါက့ၤအပူၤကွံာ်တချုးလၢဟီၣ်ခိၣ်တၢ်ဒုးဖးဒိၣ်ခံဘျီတဘျီကဲထီၣ်ဒံးဘၣ်အဆၢကတီၢ်အခါကီၢ်ပယီၤပူၤၦၤမၤကမၣ်ဘၢကွီၢ်တဖၣ်စရီအတၢ်မၤနီၣ်မၤဃါန့ၣ်ပသ့ၣ်ညါအီၤသ့ညီကဒၣ်လီၤႉဖဲန့ၣ်အခါကွီၢ်မ့ၣ်တၢ်မူးတၢ်ရၢ်လၢအမ့ၢ်၀ဲတၢ်ဒိတမျာ်၊တၢ်မၤသံအမူး, တၢ်မူၤဆူၣ်မၤတရီတပါပိာ်မုၣ်ပိာ်မၢၤ,အီၣ်ဟုၣ်တၢ်၊ၦၤလၢအတူၢ်ဘၣ်ဘၢတူၢ်ဘၣ်ကွီၢ်လၢတၢ်ဂ့ၢ်တဖၣ်အံၤအါတက့ၢ်န့ၣ်မ့ၢ်ထဲၦၤပယီၤဖိတဖၣ်လီၤႉပတထံၣ်ဘၣ်ဒၣ်လဲာ်ၦၤကညီဖိတဖၣ်အမံၤလၢဘၢလၢကွီၢ်စရီပူၤဘၣ်န့ၣ်ပတဲသ့လီၤႉၦၤကညီဖိတဖၣ်ခုၣ်ထဲလဲၣ်ပမ့ၢ်ကွၢ်က့ၤန့ၣ်ပကထံၣ်ဘၣ်လၢအ၀ဲသ့ၣ်န့ၣ်တအဲၣ်ဒိး၀ဲလၢအတၢ်ဂ့ၢ်တဖၣ်ကတုၤထီၣ်ဆူရူဆူတ့ဘၣ်ႉလၢတၢ်န့ၣ်အဃိအ၀ဲသ့ၣ်မ့ၢ်တူၢ်ဘၣ်ဒၣ်လဲာ်ၦၤဂုၤဂၤအတၢ်လံၣ်တၢ်လီအတၢ်မၤဆူးမၤဆါအီၤထဲလဲၣ်ဘၣ်ဆၣ်တူၢ်ကစုဒု၀ဲဒီးမၤလီၤမၢ်ကွံာ်တၢ်ဂ့ၢ်တၢ်ကျိၤလၢတူၢ်ဘၣ်၀ဲတဖၣ်ဒၣ်လဲာ်န့ၣ်လီၤႉ ကညီဒီးပယီၤအတၢ်ရ့လိာ်ဘူးဘူးတံၢ်တံၢ်အိၣ်ထဲလဲၣ်အဂ့ၢ်ၦၤဖးလံာ်ဖိကသ့ၣ်ညါဘၣ်အဂီၢ်ယအဲၣ်ဒိးတဲပၠးက့ၤ ယနီၢ်ဆံးခါယတၢ်လဲၤခီဖျိဘၣ်အဂ့ၢ်တခါခံခါလီၤႉယနီၢ်ဆံးခါယအိၣ်ကၠိလၢ၀ါခဲၣ်မး၀့ၢ်န့ၣ်ယအိၣ်ဘၣ်တပူၤဃီဒီးၦၤကညီဖိတဖၣ်လီၤႉကၠိမ့ၢ်ပျၢ်န့ၣ်ယဟးခးအီၣ်ထိၣ်ဒီးအ၀ဲသ့ၣ်တပူၤဃီလီၤႉမ့ၢ်တုၤဃီၤဆူမုၢ်အိၣ်ဘှံးနံၤလံန့ၣ်ယလဲၤထီၣ်ဘၣ်ယွၤဒီးအ၀ဲသ့ၣ်ပူၤဘျီပူၤဘျီစ့ၢ်ႉနအိၣ်လၢ၀ါခါၣ်မးနမ့ၢ်လဲၤဆူကၠိၣ်မင့(ကျုံမငေး)တပၤနမ့ၢ်လဲၤဒိးဒီးကဘီန့ၣ်နဘၣ်လဲၤခီဂာ်၀ဲရှါယွၤစူး(ရှမ်းရွာစု)သ၀ီလီၤႉလၢသ၀ီ၀ဲအံၤအထံကျိ၀ၢ်ဘးခီတကပၤန့ၣ်အိၣ်ဒီးၦၤကညီသ၀ီတဖျၢၣ်အမံၤလၢမီၢ်ဒံၣ်သ၀ီလီၤႉဖဲသ၀ီ၀ဲအံၤန့ၣ်အိၣ်ဒီးယမိယပါအစံာ်တလီၢ်ခံလီၢ်စ့ၢ်ႉနံၣ်မ့ၢ်ဘၣ်ယမိယပါမ့ၢ်လဲၤဟံက့ၤအစံာ်လဲန့ၣ်ယလဲၤပိာ်အခံပူၤဘျီပူဘျီလီၤႉပလဲၤမ့ၢ်တုၤဆူၦၤကညီသ၀ီတဘျီလၢ်လၢ်ယမိယပါအသကိးၦၤကညီဖိဖဲန့ၣ်တဖၣ်ပာ်ၦၤဒ်အဒီပုၢ်ဒီ၀ဲၢ်ကိးအီၣ်ၦၤမ့ၤပဘၣ်လဲၤအီၣ်လၢန့ၣ်တဒၢးလၢအံၤတဒၢးဒီးထဲပဘၣ်ဟးအီၣ်မ့ၤဟံၣ်အါဖျၢၣ်အဃိပအီၣ်က့ၤတကဲလၢၤဘၣ်လီၤႉဘၣ်တဟါပလဲၤအီၣ်မ့ၤလၢၦၤကညီကွဲဒုးအီၣ်ၦၤမ့ၤဟံၣ်တဖျၢၣ်န့ၣ်ဖီကျဲၣ်ကျီအီၣ်၀ဲညၣ်ဃ့ထိၣ်ဒ့ၣ်ဒီးလူၢ်လ့သၣ်အကသူတကပၢၤန့ၣ်ယအီၣ်၀ံၣ်ပသံးတုၤဒၣ်လဲာ်ခဲအံၤပူၤကွံာ်လံအနံၣ်(၅၀)လံန့ၣ်ယတသးပ့ၤနီၣ်အီၤနီတဘျီဒံးဘၣ်ႉၦၤတမှံၤမ့ၢ်လဲၤဆူအ၀ဲသ့ၣ်အအိၣ်န့ၣ်ကွဲဒုးအီၣ်၀ဲအမ့ၤတကးဒံးဘၣ်ၦၤမ့ၢ်ဟဲက့ၤန့ၣ်ဟ့ၣ်ထွဲ၀ဲအခံဒီးတၢ်လၢအိၣ်ဒိးအ၀ဲသ့ၣ်တဖၣ်ဒ်ထံလူၤသၣ်,ညၣ်လူၢ်သၣ်ဃ့အဃိပမ့ၢ်ဟဲက့ၤတဘျီတဘျီပချံပူၤၦဲၤမးဒီးအ၀ဲသ့ၣ်အတၢ်ဟ့ၣ်တဖၣ်လီၤႉဘၣ်ဆၣ်အ၀ဲသ့ၣ်တခီမ့ၢ်ဟဲတုၤဆူပအိၣ်၀ါခဲၣ်မးန့ၣ်ပအဲၣ်ဒိးတူၢ်လိာ်ဆၢကဒါက့ၤအ၀ဲသ့ၣ်အဃိပမ့ၢ်ကွဲမုာ်အ၀ဲသ့ၣ်လၢကဟဲဟးဆူပဟံၣ်န့ၣ်တဟဲ၀ဲနီတဘျီဘၣ်ႉအ၀ဲသ့ၣ်အတၢ်မၤမ့ၢ်၀ံၤတဘျီဃီက့ၤခူသ့ၣ်၀ဲကစုကစုတတဲကျၢက့ၤၦၤလၢၤဘၣ်ႉအ၀ဲသ့ၣ်န့ၣ်အဲၣ်ဒိးတူၢ်လိာ်ခီၣ်ဆၢဘၣ်သးဒၣ်ၦၤတမှံၤလီၤႉလၢအ၀ဲသ့ၣ်အဃိၦၤဂုၤဂၤတၢ်မၤကအါ၊ကကဲထီၣ်တၢ်သးတံာ်တာ်လၢဟံၣ်ကစၢ်အဂီၢ်န့ၣ်တဘၣ်သးမၤ၀ဲဒၣ်ဘၣ်ႉလၢတၢ်န့ၣ်အဃိပမ့ၢ်လဲၤဘၣ်ကဒီးဆူအ၀ဲသ့ၣ်အအိၣ်လၢခံမးပဘၣ်လဲၤၦ့ၤန့ၢ်က့ၤတၢ်ဟ့ၣ်တခါခါလၢအ၀ဲသ့ၣ်အဂီၢ်ပဘၣ်မၤဒၣ်ဒ်န့ၣ်လီၤႉတုၤဃီၤဆူဟီၣ်ခိၣ်တၢ်ဒုးခံဘျီတဘျီတချုးကဲထီၣ်ဒံးဘၣ်အဆၢကတီၢ်လံၤလံၤကညီဒီးပယီၤအဘၢၣ်စၢၤတၢ်ရ့လိာ်မုာ်လိာ်အိၣ်၀ဲဒ်ယတဲအီၤခဲအံၤအသိးလီၤႉမတၤတဂၤမးဂ့ၢ်လိာ်ဒီးသမၢ၀ဲတသ့ဘၣ်လီၤႉ မ့မ့ၢ်ဒ်န့ၣ်ဒီးတၢ်သံကွၢ်ကအိၣ်ထီၣ်၀ဲလၢဘၣ်မနုၤအဃိပယီၤဒီးကညီအဘၢၣ်စၢၤတၢ်ရ့လိာ်မုာ်လိာ်ဘၣ်ဟးဂီၤကွံာ်၀ဲန့ၣ်လဲၣ်ႉတၢ်ဂ့ၢ်၀ဲန့ၣ်ယကတဲပၠးခဲအံၤႉတၢ်ဆၢကတီၢ်ဖဲ၁၉၄၂နံၣ်အဲးကလံးဂုၤကွံာ်အခံဒီးကၠပၣ်သုးမုၢ်ဟဲနုာ်လီၤဆူကီၢ်ပယီၤပူၤသီသီတၢ်ဘၢၣ်စၢၤအဆၢကတီၢ်ခါန့ၣ်ပယီၤခိၣ်နၢ်တနီၤကရၢကရိဒုးအိၣ်ထီၣ်၀ဲ ပယီၤတၢ်သဘျ့သုးမုၢ်ဒိၣ် ပကိးအမံၤလၢဘံၣ်အဲၣ်အ့ၣ်(BIA)န့ၣ်လီၤႉဆၢကတီၢ်ဖဲန့ၣ်အခါ(BIA)တဖၣ်န့ၣ်ဟးဟံးန့ၢ်ဆူၣ်ၦၤကျိၣ်ၦၤစ့ ကျိဧိၤ ၀ၣ်ဧိၤသိလ့ၣ်ဒီးတၢ်ထူးတၢ်တီၤတဖၣ်လၢထံဖိကီၢ်ဖိအအိၣ်န့ၣ်လီၤႉဖဲန့ၣ်တၢ်ကဲထီၣ်အသးဘံၣ်အဲၣ်အ့ၣ်အိၣ်လၢမၠီမၠးကီၢ်ရ့ၣ်တဖၣ်လဲၤဟံးန့ၣ်ကျိလၢကညီဖိတဖၣ်အအိၣ်န့ၣ်ၦၤကညီဖိအိၣ်ဖဲန့ၣ်တဖၣ်တဟ့ၣ်လီၤအ၀ဲသ့ၣ်ဘၣ်ႉတၢ်ဆၢကတီၢ်ဖဲန့ၣ်အခါကီၢ်ပယီၤပူၤပဒိၣ်ပၦၢ်အတၢ်ပၢတၢ်ပြးလီၤတံၢ်လီၤဆဲးတအိၣ်ဘၣ်ႉထီဘိန့ၣ်ၦၤကိးဂၤဒဲးဘၣ်အိၣ်ဒၣ်လၢတၢ်ဘၣ်ယိၣ်ဘၣ်ဘှီပူၤအဃိကညီဖိတဖၣ်န့ၣ်ကလဲၤဟ့ၣ်လီၤအတၢ်စုက၀ဲၤဆူဘံၣ်အဲၣ်အ့ၣ်အစုပူၤနီဘျီ၀ဲလဲၣ်ႉမ့ၢ်လၢအ၀ဲသ့ၣ်တဟ့ၣ်လီၤအကျိဘၣ်အဃိကညီဒီးပယီၤခးလိာ်အသးတၢ်ဒုးကဲထီၣ်၀ဲလၢတၢ်လီၢ်တနီၤနီၤအပူၤန့ၣ်လီၤႉတၢ်ဒုးစဲးပြဲးကဲထီၣ်အသးလၢမၠီမၠးကီၢ်ရ့ၣ်ပူၤတဖၣ်အံၤအတကွီၣ်လဲၢ်ထီၣ်၀ဲဆူပသံၣ်ကီၢ်ရ့ၣ်ဒီးဆူမအူၤပ့ၣ်ကီၢ်ရ့ၣ်ဒီးပြါထီၣ်အသးသကုၤဆးဒးလီၢ်ခံကတၢၢ်ပၢၢ်တုၤဆူကညီပယီၤအိၣ်တၢ်လီၢ်ကိးတီၤဒဲးန့ၣ်လီၤႉစးထီၣ်ဖဲန့ၣ်တဘျီကညီဒီးပယီၤအတၢ်မၤသံမၤ၀ီလိာ်အသးတဖၣ်အံၤပထံၣ်ဘၣ်လၢကညီဖိအိၣ်အါအလီၢ်န့ၣ်ပယီၤတဖၣ်တူၢ်ဘၣ်တၢ်ဖးဆါဒီးပယီၤအိၣ်အါအလီၢ်န့ၣ်ကညီဖိတဖၣ်တူၢ်ဘၣ်တၢ်ဖးဆါန့ၣ်လီၤႉတၢ်အဲၣ်တၢ်ကွံအလၢၢ်ထူၣ်ဘၣ်တၢ်သူၣ်ထီၣ်တ့ၢ်အီၤအနံၣ်ယံာ်အလါအါလၢကညီဒီးပယီၤခံဖုအဘၢၣ်စၢၤတခါန့ၣ်ခဲအံၤတဘျီဘူးတ့ၢ်မးလၢကလီၤၦီၣ်ဟးဂီၤန့ၢ်ကွံာ်ၦၤခဲလၢာ်ခဲဆ့ဃၣ်ဃၣ်န့ၣ်လီၤႉဖဲဒီးကထၢၣ်ဘးမီၣ်တီခိၣ်ရိၢ်မဲကရၢကရၢဒုးအိၣ်ထီၣ်၀ဲ တၢ်ပၢတၢ်ပြးကမံတံာ် ၀ံၤဒီးကွဲမုာ်ကညီခိၣ်နၢ်တဖၣ်အဃိကညီခိၣ်နၢ်လၢအမ့ၢ်၀ဲဒီးကထၢၣ်စၣ်စံၣ်ဖိဒီးကညီခိၣ်နၢ်ဂုၤဂၤတနီၤဟဲဆူ၀့ၢ်တကူၣ်လီၤႉပယီၤတၢ်ပၢတၢ်ပြးထံရူၢ်ကီၢ်သဲးခိၣ်နၢ်လၢအမ့ၢ်၀ဲဒီးကထၢၣ်ဘၣ်မီၣ်,သုးခိၣ်အီၣ်ဆါ,သ့ခ့ၣ်မၠး,သခ့ၣ်သါထိ,သခ့ၣ်နူး(အူနူး)တဖၣ်တူၢ်လိာ်မုာ်အ၀ဲသ့ၣ်အခိၣ်လီၤႉပခံဒူၣ်ပထိးဖှိၣ်လိာ်ပခိၣ်ပတဲသကိးတၢ်ဂ့ၢ်တဖၣ်အံၤအဘျီအါမးလီၤႉဖဲန့ၣ်အလီၢ်ခံကရၢဖိတဒူၣ်လၢယဘၣ်တီခိၣ်ရိၢ်မဲအီၤန့ၣ်ပလဲၤလီၤဆူထံထၣ်စွ့ကညီပယီၤဒူသ၀ီတၢ်လီၢ်တၢ်ကျဲတဖၣ်ပကျဲးစၢးတဲကျဲၤဘၣ်လီၢ်ဘၣ်စးစၢၤတၢ်ဒ်သိးကညီဒီးပယီၤဘၢၣ်စၢၤတၢ်ဘၣ်လီၢ်ဘၣ်စးတၢ်မုာ်တၢ်ခုၣ်ကအိၣ်ထီၣ်က့ၤအဂီၢ်လီၤႉကညီဒီးပယီၤမ့ၢ်ဆုလိာ်ဒၣ်အသးဒ်အံၤန့ၣ်ကဘၣ်ဒိဆါဒၣ်ၦၤခံကပၤလၢာ်ဒ်သီးပံၢ်သၣ်ခံဖျၣ်နထိၣ်ထံးအီၤအသိးန့ၣ်လီၤႉအဟံၣ်အဃီတၢ်ဖိတၢ်လံၤတဖၣ်စ့ၢ်ကိးကကဲထီၣ်ဖၣ်ဆါကလၢာ်ဒၣ်ဒ်လီၤႉတၢ်ဟးဂုာ်ဟးဂီၤဒီးတၢ်သံတၢ်ၦၢ်တဖၣ်အကျါၦၤလၢအတၢ်သရူးတၢ်ကမၣ်တအိၣ်နီတမံၤဘၣ်ဒ်ဖိသၣ်၊ပိာ်မုၣ်ပိာ်မၢၤသ့ၣ်တဖၣ်ကသံအါထီၣ်ကဒီးလီၤႉတၢ်ဆိကမိၣ်တဖၣ်အံၤနုာ်လီၤဆူယခိၣ်နူာ်ပူၤဒီးမၤကိၢ်မၤဂီၤယၤထီဘိအဃိတုၤယကဲထီၣ်ကိတိာ်ခိၣ်ကျၢၢ်တစုယကျဲးစၢးမၤဘၣ်လီၢ်ဘၣ်စးကညီပယီၤတၢ်ဂ့ၢ်ကီအံၤဒ်တၢ်သ့အိၣ်ဒီးယၤအသိးလီၤႉယထံၣ်လိာ်အိၣ်သကိးတၢ်ဂ့ၢ်တဖၣ်အံၤဒီးစီၤဘးအူကၠံ၊မါကၠ့(မ)ထိအီၣ်၊သရၣ်သၣ်ထိၣ်သ့ၣ်တဖၣ်အဘျီတဖၣ်အဘျီလီၤႉပလဲၤသကိးတၢ်ဒီးကညီခိၣ်နၢ်တဖၣ်အံၤဆူထံထၣ်စွ့ကညီပယီၤအိၣ်အလီၢ်ပကျဲးစၢးစံးကတိၤတဲဘၣ်လီၢ်ဘၣ်စးတၢ်ဂ့ၢ်တဖၣ်အံၤလီၤႉဘၣ်ဆၣ်သနာ်က့ကညီပယီၤတၢ်သးဆါလိာ်သးအတၢ်ဆါအၢတခါအံၤအီၣ်ဂိာ်လီၤအသးလၢအဒွဲပူၤယိာ်မးလံအဃိယၤဒီးစီၤဘးအူကၠံခံဂၤအံၤမုၢ်တနံၤလၢကကဲထီၣ်က့ၤပယီၤဒီးကညီအတၢ်ဘၣ်ဂံာ်ဂုာ်အတၢ်ဂ့ၢ်ကီဖးဒိၣ်တခါအံၤပကျဲးစၢးတြီအီၤထဲလဲၣ်ဘၣ်ဆၣ်ပမၤအီၤတန့ၢ်လၢၤဘၣ်ႉ ဒ်လဲၣ်ဂ့ၤလၢပတၢ်ဖီၣ်လိာ်စုမၤသကိးတၢ်ဒ်အံၤအဃိလၢခံန့ၣ်ပယီၤဒီးကညီအဘၢၣ်စၢၤတၢ်ဘၣ်ဂံာ်ဂူာ်အတၢ်ဂ့ၢ်ကီကဲထီၣ်အသးဘၣ်ဆၣ်ယဒိးန့ၢ်ဘၣ်တၢ်အိၣ်ၦိၤဆီၣ်ထွဲယၤလၢကညီကမျၢၢ်တနီၤန့ၣ်လီၤႉ(ဖဆပလ)ဒီးခ့ၣ်အဲၣ်ယူၣ်ပခံဒူၣ်အံၤ လၢပ၀ဲတဒူၣ်ဒီးတဒူၣ်အဘၢၣ်စၢၤမ့ၢ်ဂ့ၤ လၢသနူတခါဒီးတခါအဘၢၣ်စၢၤမ့ၢ်ဂ့ၤ ပမ့ၢ်ဒုးလိာ်ယၤလိာ်ပသးဘၣ်ဆၣ်လၢပခံဒူၣ်အဘၢၣ်စၢၤခိၣ်နၢ်တနီၤအကျါပ၀ဲဒၣ်တဂၤဒီးတဂၤအဘၢၣ်စၢၤန့ၣ်ပအိၣ်ဒီးတၢ်အဲၣ်တၢ်ကွံပအိၣ်ဒီးတၢ်နၢ်ပၢၢ်လိာ်ပသးတုၤလၢတၢ်သးမံသ့အပတီၢ်န့ၣ်အိၣ်၀ဲစ့ၢ်ကီးလီၤဖဲအံၤယအဲၣ်ဒိးဟ့ၣ်အဒိတခါ-တၢ်ဆၢတီၢ်မ့ၢ်၀ဲဖဲ၁၉၄၈နံၣ်လါယူၤအလီၢ်ခံကတၢၢ်တနွံအပူၤန့ၣ်လီၤႉသုးရ့ၣ်(၃) လၢမူကျာ်တိၢ်(မ့ၤကလၤဒိၣ်) န့ၣ်လီၤဖးကွံာ်၀ဲခံက့ဒီးအတက့န့ၣ်ကဲထီၣ်က့ၤ၀ဲၦၤပူထီၣ်ထီဒါပဒိၣ်လီၤႉသုးရ့ၣ်(၁)အိၣ်လၢသယဲးအသုးတရ့ၣ်စ့ၢ်ကိးဟဲလိၤဆူလာ်ခီလၢကထီၣ်ဒုးဟံးန့ၢ်၀့ၢ်တကူၣ်န့ၣ်လီၤႉပ၀ဲလၢအမ့ၢ်(ဖဆပလ)ပဒိၣ်တဖုအံၤစ့ၢ်ကိးပကထံၣ်န့ၢ်တၢ်ဒိးသန့ၤပသးအဂီၢ်အလီၢ်တအိၣ်နီတပူၤလၢၤစ့ၢ်ကိးဘၣ်ႉဖဲဘၣ်သဂၢၢ်ဒီးတၢ်ကီတၢ်ခဲဒိၣ်ဒိၣ်မုၢ်မုၢ်ဒ်အံၤအခါတနံၤတခီၣ်န့ၣ်စီၤဘးအူကၠံဒီးအတံၤသကိးတဖၣ်ဃ့ထီၣ်၀ဲလၢကအဲၣ်ဒီးဟဲထံၣ်လိာ်ဘၣ်သးဒီးယၤန့ၣ်လီၤႉဖဲပထံၣ်လိာ်သးအခါပတဲသကိးတၢ်ဘၣ်ဃးတကီၢ်ခါကီၢ်ပယီၤထံရူၢ်ကီၢ်သဲးအတၢ်ဂ့ၢ်ကီဒီးတၢ်ဘၣ်ယိၣ်အဂ့ၢ်အကျိၤတဖၣ်န့ၣ်လီၤႉဖဲန့ၣ်မါကၠ့(မ)ထိအီၣ်တဲထီၣ်၀ဲကိတိာ်ခိၣ်ကျၢၢ်ဧၢ နတဘၣ်ကိၢ်သူၣ်ဂီၤသးတၢ်နီတမံၤတဂ့ၤ ခီၣ်မၠူၣ်နံးတဖၣ် မ့ၢ်ဟဲနုာ်လီၤဆူ၀့ၢ်တကူၣ်ပူၤန့ၣ်ပကလဲၤပာ်ခူသူၣ်ဃာ်နၤလၢတၢ်တဒၢအိၣ်အလီၢ်တပူၤပူၤဒီးဖဲန့ၣ်ပကဟံးန့ၢ်တၢ်ဘံၣ်တၢ်ဘၢလၢနဂီၢ်လီၤႉတၢ်ဆၢကတီၢ်ဖဲန့ၣ်အခါလၢကီၢ်ပယီၤတၢ်ပၢတၢ်ပြးအပူၤလၢယပဒိၣ်ပၦၢ်တနီၤနီၤဒၣ်လဲာ်န့ၣ်တူၢ်လိာ်ခီၣ်မၠူၣ်နံးအိၣ်လံႉယနၢ်ဟူပာ်စၢၤတၢ်ဂ့ၢ်လၢပၢၤကီၢ်ဒီးပၢပြးခိၣ်နၢ်တနီၤနီၤအကျါဒၣ်လဲာ်ဟ့ၣ်လီၤတၢ်ကလုၢ်လၢခီၣ်မၠူၣ်နံးမ့ၢ်ဟဲနုာ်လီၤဆူ၀့ၢ်တကူၣ်ပူၤန့ၣ်တဘၣ်ခးအ၀ဲသ့ၣ်နီတဂၤတဂ့ၤႉပာ်လီၤကွံာ်သုစုက၀ဲၤဆူအ၀ဲသ့ၣ်အအိၣ်န့ၣ်စံး၀ဲဖဲယထံၣ်ဘၣ်သဂၢၢ်ဒီးတၢ်ကီတၢ်ခဲတၢ်ကိၢ်တၢ်ဂီၤဒီးတၢ်ဒိးသန့ၤအလီၢ်တအိၣ်ဘၣ်ဒ်အံၤအခါတုၤမ့ၢ်ယနၢ်ဟူဘၣ်မါကၠ့(မ)ထိအီၣ်အတၢ်ကတိၤဒ်အံၤတဘျီတၢ်သးခုတဖၣ်လုၢ်ဘၢကွံာ်ယၤဒီတဂၤညါလီၤႉ ဖဲအံၤယအဲၣ်ဒီးတဲဘၣ်သးဘၣ်မနုၤအဃိကညီဒီးပယီၤတၢ်ဘၣ်ဂံာ်ဂူာ်ဘၣ်ကဲထီၣ်သးလဲၣ်အဂ့ၢ်တစဲးဒ်အံၤတၢ်ဂ့ၢ်(၁)တထံၣ်ဖဲ၁၉၄၇နံၣ်တချုးဒံးလၢသုးခိၣ်ကျၢၢ်အီၣ်ဆါသ့ၣ်တၢ်ကူၣ်မၤသံအီၤဒံးဘၣ်အခါလံၤလံၤန့ၣ်ကညီဒီကလုာ်စၢဖှိၣ်ကရၢအံၤဒုးအိၣ်ထီၣ်၀ဲကညီဒီကလုာ်ဂၢၤသးကရၢလံန့ၣ်လီၤႉတၢ်ကိးကရၢအံၤလၢအမံၤဖုၣ်တခီမ့ၢ်၀ဲခ့ၣ်အဲန်ဒံၣ်အိၣ်န့ၣ်လီၤႉတၢ်အံၤကမျၢၢ်သုး(ပြည်သူ့ရဲဘော်)ဒီးခီၣ်မၠူနံးတဖၣ်ဒုးအိၣ်ထီၣ်၀ဲအနီၢ်ကစၢ်အသုးကရူၢ်အဃိခ့ၣ်အဲၣ်ယူၣ်စ့ၢ်ကိးဒုးအိၣ်ထီၣ်၀ဲခ့ၣ်အဲန်ဒံၣ်အိၣ်န့ၣ်အလီၢ်အိၣ်၀ဲသၢၣ်ႉဆၢကတီၢ်ဖဲန့ၣ်အခါပ၀ဲပဒိၣ်တဖုတခီပဂံၢ်ပဘါစၢ်အဃိသုးကရူၢ်လၢတၢ်ဒုးအိၣ်ထီၣ်တဖၣ်န့ၣ်ပကမၤဟးဂီၤကွံာ်အီၤဧီၣ်ပမၤတသ့ပကဟံးန့ၢ်ကွံာ်အ၀ဲသ့ၣ်အတၢ်စုက၀ဲၤဧီၣ်ပဟံးတသ့လၢၤတၢ်ကီတၢ်ခဲအိၣ်ဒီးၦၤအါမးလီၤႉတၢ်အိၣ်သး၀ဲအံၤမ့ၢ်တၢ်ဂ့ၢ်ဖးဒိၣ်တခါလၢမုၢ်တနံၤကညီဒီးပယီၤအတၢ်ဘၣ်ဂံာ်ဂူာ်ကကဲထီၣ်အဂီၢ်န့ၣ်လီၤႉတၢ်ဂ့ၢ်(၂)ထံၣ်တထံၣ်ခ့ၣ်အန်ယူၣ်ကညီဒီကလုာ်စၢဖှိၣ်ကရၢအံၤဃ့ထီၣ်၀ဲဒၣ်တၢ်ဂ့ၢ်(၃)ထံၣ်(က)တၢ်ကဘၣ်ဟ့ၢ်လီၤကညီကီၢ်စဲၣ်လီၤဆီ(ခ)ကညီကီၢ်စဲၣ်အံၤကဘၣ်အိၣ်ဒီးတၢ်ခွဲးတၢ်ယာ်အလၢအၦဲၤလၢမ့ၢ်အဲၣ်ဒိးထုးဖးကွံာ်အသးလၢကီၢ်စၢဖှိၣ်ပူၤန့ၣ်ထုးဖးသးအခွဲးကဘၣ်အိၣ်ႉ(ဂ)ကညီကီၢ်စဲၣ်အံၤအဟီၣ်က၀ီၤကဘၣ်ပၣ်ဃုာ်၀ဲဒီးပကိကီၢ်,တနီသရံးကီၢ်ဒီးပျ့ၣ်လိာ်ကီၢ်ခီ(ဧရာ၀တီတိုင်း)အဟီၣ်က၀ီၤတ၀ာ်န့ၣ်လီၤႉ ခ့ၣ်အဲန်ယူၣ်ဃ့ထိၣ်၀ဲတၢ်ဂ့ၢ်သၢမံၤအကျါတၢ်ဂံၢ်(က)န့ၣ်ယတူၢ်လိာ်လူၤဘၣ်အ၀ဲသ့ၣ်အတၢ်အဲၣ်ဒိးသ့ႉ တၢ်ဂ့ၢ်(ခ)လ့ၤတက့ၤယတူၢ်လိာ်အီၤတသ့ဘၣ်ႉမ့မ့ၢ်တၢ်ဂ့ၢ်(ဂ)န့ၣ်ယၤဒီးယပဒိၣ်တဖုအံၤပဆၢတဲာ်အီၤလၢဒ်ကီၢ်သူလ့ၤကီၢ်ဆၢခီၣ်မရှ့ၣ်ကရၢ(ကော်သူးလေနယ်နိမိတ်ေကာ်မရှင်အဖွဲ့)အတၢ်ကဃုထၢပာ်ပနီၣ်န့ၢ်အဟီၣ်က၀ီၤအသိးပကတူၢ်လိာ်ပာ်ပနီၣ်န့ၢ်က့ၤဟီၣ်က၀ီၤ၀ဲန့ၣ်လၢကညီကီၢ်စဲၣ်န့ၣ်လီၤႉလၢခ့ၣ်အဲန်ယူၣ်ဒီးယပဒိၣ်ပခံဖုအဘၢၣ်စၢၤတၢ်ပာ်သးတလီၤပလိာ်ဘၣ်ဒ်အံၤန့ၣ်မ့ၢ်တဂ့ၢ်သၢခါတခါလၢမုၢ်ကအိၣ်၀ဲတနံၤကညီဒီးပယီၤခံဖုအံၤအဘၢၣ်စၢၤတၢ်ဘၣ်ဂံာ်ဂူာ်ကအိၣ်ထီၣ်၀ဲအဂီၢ်န့ၣ်လီၤႉတၢ်သးတမံဘၣ်အတၢ်ဂ့ၢ်သၢမံၤလၢယပာ်ဖျါထီၣ်အီၤတဖၣ်အံၤအတၢ်ဆီၣ်သနံာ်အဃိ ဖဲ၁၉၄၈နံၣ်လါယူၤလံဒီးလါအီကၢးစ်အတီၢ်ပူၤကညီဖိလၢအကဲကီၢ်စၢဖှိၣ်သုးပၢၤကီၢ်(UMP)တဖၣ်န့ၣ်စိာ်ထီၣ်ဃုာ်အကျိက၀ၣ်ဒီးလဲၤပာ်ဖှိၣ်ထီၣ်အသးမၤသကိးက့ၤတၢ်ဒီးခ့ၣ်အဲန်ဒံၣ်အိၣ်လီၤႉခ့ၣ်အဲန်ဒံၣ်အိၣ်ကညီဒိကလုာ်ဂၢၤသးအိၣ်လၢဖၣ်ပူၣ်ဒီးဘှဲကီၢ်စဲၣ်ပူၤတဖၣ်န့ၣ်စ့ၢ်ကိးနုာ်လိၤခး၀ဲပဒိၣ်အသုးမုၢ်၊ခ့ၣ်အဲန်ဒံၣ်အိၣ်ထီၣ်ဒုးမၤန့ၢ်၀ဲသထူၣ်၀့ၢ်ဒီးခိၣ်ထၣ်၀့ၢ်(မီၣ်လမၠဲၣ်)တတီၤဖိဒံးလီၤႉမ့ၢ်လၢခီၣ်မၠူၣ်နံးဒီးသိၣ်ဒူ၀ါပူထီၣ်လီထီၣ်တၢ်အဃိပ၀ဲပဒိၣ်တဖုအံၤတၢ်ကိၢ်တၢ်ဂီၤဘၣ်အါထီၣ်ၦၤကဒီးဘူးမးလၢပကကသါမၣ်ကျဲဘၣ်ပသးန့ၣ်လီၤႉဆၢကတီၢ်ဖဲန့ၣ်အခါကီၢ်ပယီၤသုးမုၢ်ဒိၣ်အပူၤသုးဖိနီၣ်ဂံၢ်(၆၀)မျးကယၤန့ၣ်ဖီၣ်လိာ်စုမၤသကိးတၢ်ဒီးၦၤပူထီၣ်တၢ်တဖၣ်၀ံၤထီဒါကဒါက့ၤပဒိၣ်အဃိယဲယမၤတၢ်တသ့နီတမံၤလၢာ်ဘၣ်ႉအိၣ်က့ၤဒၣ်ထဲတမံၤဧိၤယဘၣ်ကွဲမုာ်စီၤဘးအူကၠံဒီးအၦၤတဖၣ်ခဲအံၤခဲအံၤဒီးဃ့၀ံသးစူၤဘၣ်အ၀ဲသ့ၣ်ဒ်သိးအသုတမၤဆူၣ်မၤစိးတၢ်ဒီးတၢ်စုက၀ဲၤတဂ့ၤဒီးကတဲနၢ်ပၢၢ်အၦၤသ့သ့ဘၣ်ဘၣ်အဂီၢ်ယမၤသ့က့ၤဒၣ်ထဲန့ၣ်လီၤႉတုၤဃီၤဆူ၁၉၄၈နံၣ်လါနိၤ၀့ဘၢၣ်အလၢာ်ဃၣ်ဃၣ်န့ၣ်တၢ်အိၣ်သးဟဲနးဒိၣ်ထီၣ်န့ၣ်ဒံးအလီၢ်လီၤႉလၢတၢ်န့ၣ်အဃိဒ်ယဒိးန့ၢ်ဘၣ်တၢ်ကစီၣ်အိၣ်ဟဲလၢကီၢ်ပယီၤတၢ်လီၢ်ကိးပူၤဒဲးအအိၣ်အသိးဖဲလါဒံၣ်စဲဇဲဘၢၣ်(၄)သီအနံၤန့ၣ်ယဘိးဘၣ်ရၤလီၤဒုးသ့ၣ်ညါက့ၤထံဖိကီၢ်ဖိတဖၣ်လၢဆၢကတီၢ်ခဲအံၤကီၢ်ပယီၤအိၣ်လၢတၢ်ဘၣ်ယိၣ်ဘၣ်ဘှီဒိၣ်ဒိၣ်မုၢ်မုၢ်အပူၤအဂ့ၢ်န့ၣ်လီၤႉ ဖဲန့ၣ်၀ံၤဒီးခီၣ်ခါလၢခံကတၢၢ်တခါလၢတၢ်မုာ်တၢ်ခုၣ်အဂီၢ်တၢ်လၢယမၤန့ၣ်မ့ၢ်၀ဲယကွဲမုာ်စီၤဘးအူကၠံဒီးအၦၤတဖၣ်ဒီးယမၢစီၤဘးအူကၠံတဲဘၣ်ခ့ၣ်အဲန်ဒံၣ်အိၣ်ခိၣ်နၢ်တဖၣ်လၢအသုတမၤဆူၣ်မၤစိးတၢ်ဒီးတၢ်စုက၀ဲၤတဂ့ၤအဂီၢ်န့ၣ်လီၤႉစီၤဘးအူကၠံဟ့ၣ်ယၤတၢ်အၢၣ်လီၤလၢသါကသ့ၣ်န့ၢ်ယၤမုၢ်နံၤမုၢ်သီလၢယကလဲၤထံၣ်လိာ်သးတဲဘၣ်တၢ်ဒီးခ့ၣ်အဲန်ဒံၣ်အိၣ်ခိၣ်နၢ်တဖၣ်အဂီၢ်န့ၣ်လီၤႉတုၤမ့ၢ်ယတံၤသကိးၦၤမၤသကိးတၢ်ဒီးယၤတဖၣ်နၢ်ဟူ၀ဲလၢယကလဲၤထံၣ်လိာ်တၢၣ်ပီၣ်တဲသကိးတၢ်ဒီးခ့ၣ်အဲန်ဒံၣ်အိၣ်ခိၣ်နၢ်တဖၣ်ဆူနိၣ်တၢ်မျၢ်ခ့ၣ်အဲန်ဒံၣ်အိၣ်၀ဲၤလီၢ်ခိၣ်သ့ၣ်န့ၣ်အ၀ဲသ့ၣ်တဲယၤလၢတကြၢးယလဲၤဘၣ်ဒီးတီ၀ဲယၤလီၤႉလၢၦၤတြီတၢ်အကျါယမါဒီၢ်မၠးယံၣ်မ့ၢ်ၦၤလၢအတြီတၢ်အဆူၣ်အကိၤကတၢၢ်တဂၤလီၤႉဘၣ်ဆၣ်မတၤမးတြီယၤတန့ၣ်ဘၣ်ႉတုၤမ့ၢ်တၢ်သ့ၣ်ဆၢဖးကတီၢ်အမုၢနံၤမုၢ်သီတုၤဃီၤန့ၣ်စီၤဘးအူကၠံဒီးအသကိးတဂၤဟဲအိၣ်ယၤလၢယဟံၣ်လီၤႉယလဲၤပိာ်စီၤဘးအူကၠံအခံဒီးသိလ့ၣ်လၢစီၤဘးအူကၠံအနီၢ်ကစၢ်နီၣ်၀ဲတခိၣ်န့ၣ်လီၤႉယလဲၤကိးဃုာ်ၦၤခိးယသးသမူသုးခိၣ်စိမၠ့းထဲတဂၤဧိၤလၢကလဲၤဃုာ်တၢ်ဒီးယၤန့ၣ်လီၤႉယတလဲၤကိးဃုာ်ၦၤလၢအဂၤနီတဂၤဘၣ်ႉသုးခိၣ်စိမၠ့းစ့ၢ်ကိးယတမၢလဲၤစိာ်တၢ်စုက၀ဲၤနီတမံၤဘၣ်ႉတုၤမ့ၢ်ပလဲၤတုၤဆူနိၣ်တၢ်မျၢ်န့ၣ်အ၀ဲသ့ၣ်တူၢ်လိာ်မုာ်ယၤဖဲစီၤဘးအူကၠံမံၤၦၢ်အူဇၣ်အဟံၣ်ပအီၣ်သကိးဃီၤနုၢ်ထံခီနီဘီ(အုန်းနို့ကြာဇံခေါက်ဆွဲ)လီၤႉပအီၣ်တၢ်၀ံၤယတဲသကိးတၢ်ဒီးခ့ၣ်အဲန်ဒံၣ်အိၣ်ခိၣ်နၢ်တဖၣ်လီၤႉခ့ၣ်အဲန်ဒံၣ်အိၣ်ခိၣ်နၢ်တဖၣ်တူၢ်လိာ်ရ့ယၤလၢတၢ်ပာ်ကဲအပူၤလီၤႉဘၣ်ဆၣ်ဒီးယထံၣ်ဘၣ်လၢဖဲယတဲအ၀ဲသ့ၣ်လၢတဘၣ်မၤတၢ်စုဆူၣ်ခီၣ်တကးတဂ့ၤကညီဒီးပယီၤအတၢ်ဂ့ၢ်ကီအံၤပ၀ဲခိၣ်နၢ်ခံခီယၢ်ပၤတဖၣ်ပကကျဲၤအီၤလၢတၢ်ခုၣ်တၢ်မုာ်အပူၤလီၤန့ၣ်ယထံၣ်လၢအ၀ဲသ့ၣ်အမဲာ်သၣ်တဖျါကပုာ်လုးဘၣ်ယၤဘၣ်ႉလၢယဟံၣ်တခီယမါဒီၢ်မၠးယံၣ်ဒီးယတံၤသကိးၦၤကိးဂၤဒဲးန့ၣ်သူၣ်ကိၢ်သးဂီၤန့ၢ်တၢ်လၢယဂီၢ်လီၤႉမ့ၢ်ကနၢ်ဟူဘၣ်၀ဲယဂ့ၢ်ယကျိၤလၢအကိၢ်အဂီၤတဖၣ်ဒ်လဲၣ်သၢၣ်ႉတုၤမ့ၢ်ယဟဲက့ၤတုၤလၢဟံၣ်တဘျီမးအ၀ဲသ့ၣ်အတၢ်ကိၢ်တၢ်ဂီၤတဖၣ်လီၤမၢ်ကွံာ်ဒီးသါသဖှိလီၤက့ၤ၀ဲတကူၢ်သ့ၣ်န့ၢ်၀ဲလီၤႉ မ့ၢ်လၢယတၢ်ဃ့ကညးအဃိတၢ်ဂ့ၢ်လၢအလီၤကယးက့ၤ၀ဲဖဲအကြၢးတဖၣ်န့ၣ်တအိၣ်တူၢ်ယံာ်ခိးကျၢၤအသးယံာ်ယံာ်ထၢထၢဘၣ်ႉဖဲ၁၉၄၉နံၣ်လါယနူၤအါရံၤထီၣ်တ၀ာ်ဆၢကတီၢ်န့ၣ်ခ့ၣ်အဲန်ဒံၤအိၤတဖၣ်ကျဲၤ၀ဲလၢအထီၣ်ဒုး၀့ၢ်ပသံၣ်လၢထံဒီးလၢခိခံကပၤထံသုးမုၢ်ဒိၣ်ခိၣ်စီၤကၠဲးကဘၣ်ဟံးမူဒါလၢထံတပၤဒီးခ့ၣ်အဲန်ဒံၤအိၤကဟံးမူဒါလၢခိတပၤလီၤႉတၢ်ဆၢကတီၢ်ဖဲန့ၣ်အခါတၢ်လီၢ်ဖဲမအူၣ်ပ့ၣ်ဒီးပသံၣ်တဖၣ်န့ၣ်ကညီဒီးပယီၤအတၢ်ရ့လိာ်တၢ်အိၣ်သးတဂ့ၤနီတစဲးဘၣ်ႉလၢတၢ်န့ၣ်အဃိယဘၣ်နီၤဖးလီၤသုးရ့ၣ်(၄)အသုးတဖၣ်ခံဖုဖဲဟီၣ်က၀ီၤ၀ဲန့ၣ်လီၤႉယသုးခိၣ်သုးနၢ်ဒီးအၦၤသုးဖိတဖၣ်န့ၣ်အတၢ်သးဒူအိၣ်လၢၦဲၤထံဆးဂ့ၤမးႉၦၤကညီအသုးဟဲထီၣ်ဒုးဆီၣ်တံၢ်အ၀ဲသ့ၣ်လၢထံဒီးလၢခိခံကပၤလၢာ်ဆူၣ်ဆူၣ်ကိၤကိၤဘၣ်ဆၣ်အ၀ဲသ့ၣ်တတူၢ်ဃၣ်အသးနီတဘှဲဖိဘၣ်ႉဖဲအဂံၢ်အဘါအိၣ်ဒီးအီၤန့ၣ်ဒုးတြီဆၢက့ၤဒုၣ်ဒါဆူၣ်ဆူၣ်ကိၤကိၤအဃိလၢခံကတၢၢ်ခ့ၣ်အဲန်ဒံၤအိၤတဖၣ်ဘၣ်ဂုၤကဒါက့ၤအခံန့ၣ်လီၤႉထံသုးခိၣ်စီၤကၠဲးအကဘီဒုးသုးတဘ့ၣ်န့ၣ်စ့ၢ်ကီးဘၣ်တၢ်ခးဖှိၣ်အီၤလၢပကဘီယူၤဒုးသုးအဃိဟးဂီၤကွံာ်၀ဲဖးဆါညါလီၤႉထံသုးဖိတဖၣ်သံဘၣ်ဒိတဘျုးညါ သုးခိၣ်စီၤကၠဲးဒီးအသုးဖိထဲသၢဂၤဧိၤဃ့ၢ်ပူၤဖျဲးကွံာ်အသးပီပူၤလီၤႉ တၢ်ဒုး၀ံၤတဘျီဃီဒ်သိးတၢ်သုတကဲထီၣ်ကဒီးအသးဒိၣ်ဒိၣ်မုၢ်မုၢ်အသီတဘျီလၢၤတဂ့ၤအဂီၢ်ယကရီလဲၤဆူ၀့ၢ်ပသံၣ်လီၤႉယလဲၤထံၣ်လိာ်သးဒီးကညီပယီၤခိၣ်နၢ်အိၣ်ဖဲန့ၣ်တဖၣ်ပဟးတဲနၢ်ပၢၢ်စၢၤတၢ်ဃူလိာ်ဖိးလိာ်ကအိၣ်ထီၣ်က့ၤအဂီၢ်လီၤႉကညီဖိဒီးပယီၤဖိလၢအဟံၣ်အဃီမ့ၣ်အူအီၣ်ဟးဂီၤကွံာ်လၢတၢ်ဒုးတၢ်ယၤအဃိတဖၣ်န့ၣ်ပဟ့ၣ်လီၤမၤစၢၤဆီၣ်ထွဲက့ၤအ၀ဲသ့ၣ်လၢကျိၣ်စ့တၢ်မၤစၢၤတနီၤႉမ့ၢ်လၢပယီၤတဖၣ်မၤဟးဂီၤ၀ဲအဃိကညီခိၣ်နၢ်ဒီးကထၢၣ်စၢၣ်စၣ်စံၣ်ဖိအတၢ်သွၣ်ခိၣ်လၢအဟးဂီၤကွံာ်၀ဲန့ၣ်ယလဲၤဟ့ၣ်လီၤကျိၣ်စ့ဆူအဖိခွါတဂၤအစုပူၤလၢတၢ်ကဘှီဂ့ၤထီၣ်ကဒါက့ၤအပါသွၣ်ခိၣ်အဂီၢ်လီၤႉဒ်န့ၣ်အသိးယလဲၤဟ့ၣ်လီၤကျိၣ်စ့လၢလၢၦဲၤၦဲၤဆူက၀ီၤၦၤဘၣ်မူဘၣ်ဒါတဖၣ်အစုပူၤလၢတၢ်ကဘှီဂ့ၤထီၣ်က့ၤကစၢ်ကျီဂီၤ(မြတ်စွါဘုရားရုပ်ပွါးတော်)လၢၦၤကညီဖိတဖၣ်မၤဟးဂီၤကွံာ်အီၤအဂီၢ်န့ၣ်လီၤႉ တုၤဃီၤဆူ၁၉၄၉နံၣ်လါယနူၤအါရံၤထီၣ်တ၀ာ်ဆၢကတီၢ်န့ၣ်ပ၀ဲပဒိၣ်ပၦၢ်တဖၣ်ပဒိးန့ၢ်ဘၣ်တၢ်ကစီၣ်တခါလီၤႉ တၢ်ကစီၣ်၀ဲန့ၣ်တမ့ၢ်တၢ်ဂၤဘၣ်ႉမ့ၢ်၀ဲခ့ၣ်အဲန်ဒံၤအိၤ၀ဲၤလီၢ်ခိၣ်သ့ၣ်လၢနိၣ်တၢ်မျၢ်အၦၤတဖၣ်ဟးလူၤဟံးန့ၢ်က့ၤတၢ်စုက၀ဲၤလၢပဒိၣ်ပၦၢ်ၦၤဘၣ်မူဘၣ်ဒါအအိၣ်ဖဲနိၣ်တၢ်မျၢ်၊ကၠိးကိ၊သမဲတဖၣ်အအိၣ်န့ၣ်လီၤႉတၢ်လီၢ်တဖၣ်န့ၣ်အဘၢၣ်စၢၤအိၣ်စီၤစုၤဒီး၀့ၢ်တကူၣ်ထဲ(၇)မံၤလာ်ဧိၤလီၤႉလၢတၢ်န့ၣ်အဃိပကွၢ်ကီအီၤဒ်န့ၣ်တသ့လၢၤဘၣ်အဃိပ၀ဲပဒိၣ်တခီပနဲၣ်လီၤဆူသုးၦၤဖီၣ်တၢ်စုက၀ဲၤတဖၣ်အိၣ်လၢကဘၣ်လဲၤဆူတၢ်လီၢ်လၢတၢ်ဂ့ၢ်ကဲထီၣ်သးဟီၣ်က၀ီၤန့ၣ်ဒီးတြီခ့ၣ်အဲန်ဒံၤအိၤလၢအသုးတဟးဟံးန့ၢ်တၢ်စုက၀ဲၤဒ်န့ၣ်တဂ့ၤအဂီၢ်လီၤႉလၢပလဲၤတြီတၢ်ဒ်န့ၣ်အဖီခိၣ်ဖဲ၁၉၄၉နံၣ်လါယနူၤအါရံၤ(၃၁)သီအနံၤန့ၣ်ပၦၤသုးဖိဒီးခ့ၣ်အဲန်ဒံၤအိၤတဖၣ်ကဲထီၣ်ကဒီးတၢ်သဘံၣ်သဘုၣ်ဒီးဖဲန့ၣ်ခ့ၣ်အဲန်ဒံၤအိၤ၀ဲၤလီၢ်ခိၣ်သ့ၣ်အိၣ်လၢနိၣ်တၢ်မျၢ်တဖၣ်ထီၣ်ဒုးဟံးန့ၣ်က့ၤ၀ဲနိၣ်တၢ်မျၢ်၀့ၢ်န့ၣ်လီၤႉအ၀ဲသ့ၣ်ပျဲဟးထီၣ်ကွံာ်ၦၤလီၤဘၣ်ဃိာ်ဖိအဂၤ၂၀၀၀ဆူတၢ်ချၢဒီးနုာ်လီၤဟံးန့ၢ်ကွံာ်ပဒိၣ်အစ့အိၣ်လၢစ့တၢးပူၤတဖၣ်ခဲလၢာ်လီၤႉ နိၣ်တၢ်မျၢ်၀့ၢ်အံၤအိၣ်လၢ၀့ၢ်တကူၣ်အခိၣ်ထိးအဃိပ၀ဲလၢအမ့ၢ်(ဖဆပလ)ပဒိၣ်တဖုအံၤဒီးၦၤအိၣ်လၢ၀့ၢ်တကူၣ်ပူၤၦၤခူဖိ၀့ၢ်ဖိတဖၣ်ပကဘၣ်ယိၣ်ဘၣ်ပျံၤတၢ်ပကအိၣ်ဒီးတၢ်သူၣ်ကနိးသးကနိးမဲာ်တကျိၣ်နါတကျိၣ်ထဲလဲၣ်အဂ့ၢ်ယမ့ၢ်ကဘၣ်ကွဲးဖျါထီၣ်အီၤလၢလံာ်ပူၤလီၤတံၢ်လီၤဆဲးန့ၣ်ယကဘၣ်ကွဲးအီၤဒ်လဲၣ်မးယတဲတသ့လၢၤဘၣ်ႉၦၤဖးလံာ်ဖိသုနီၢ်ကစၢ်ဒၣ်ကွၢ်ဆိမိၣ်ခီၣ်မှံက့ၤလၢသုနီၢ်ကစၢ်ဒၣ်သု၀ဲတက့ၢ်.စးထီၣ်ဖဲန့ၣ်ဒီးလၢခ့ၣ်အဲန်ယူၣ်ကညီဒီကလုာ်စၢဖှိၣ်ကရၢအတၢ်တီခိၣ်ရိၢ်မဲတၢ်အဖီလာ်န့ၣ်ခ့ၣ်အဲန်ယူၣ်အတၢ်ပူထီၣ်လီထီၣ်က့ၤပဒိၣ်တၢ်ဂ့ၢ်အံၤကဲထီၣ်၀ဲဒၣ်အသးန့ၣ်လီၤႉ တံနိ(သ၀ီတါ)
ပယီၤသုးခးလီၤကျိဖးဒိၣ်အဃိၦၤသ၀ီဖိသံတဂၤဒီးဖိသၣ်ဘၣ်ဒိတဂၤ
လါယနူၤအါရံၤ ၂၁ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကီၢ်သူလ့ၤတၢ်ပၢ ချၢၣ်လွံၢ်ထူၣ်ကီၢ်ရ့ၣ်(သုးက့-၃)လၢၢ်ဒိၣ်ကီၢ်ဆၣ်အပူၤ ဖဲမဟါလါယနူၤအါရံၤ ၂၀ သီ ဟါခီ ၆း၃၀ အဆၢကတီၢ်ခီဖျိပယီၤသုးပညိၣ်ခးလီၤကျိဖးဒိၣ်ဆူ ငဖဲၤအ့သ၀ီပူၤအဃိ ၦၤသ၀ီဖိသံ၀ဲဒၣ်တဂၤဒီးဘၣ်ဒိ၀ဲဒၣ်ဖိသၣ်(၁၄)နံၣ်တဂၤအဂ့ၢ်န့ၣ် လၢၢ်ဒိၣ်ကီၢ်ဆၣ်ၦၤဘၣ်မူဘၣ်ဒါ စံး၀ဲန့ၣ်လီၤႉ ခီဖျိပယီၤသုးခီၣ်သုးရ့ၣ်(ခလရ–၂၆၄)အံၤခးလီၤကျိဖးဒိၣ်ဆူ ငဖဲအ့သ၀ီပူၤအဃိ ဘၣ်သံ၀ဲၦၤသ၀ီဖိတဂၤႇ ဘၣ်ဒိ၀ဲဖိသၣ်တဂၤဒီးမ့မ့ၢ်ဖိသၣ်လၢအဘၣ်ဒိတဂၤအံၤခီန့ၣ် ဆူၣ်ချ့၀ဲၤကျိၤတကပၤကွၢ်ကဟုကယာ်အီၤအဂ့ၢ်န့ၣ် လၢၢ်ဒိၣ်ကီၢ်ဆၣ် ၦၤကတိၤတၢ်ပၢ ပဒိၣ်စီၤ၀ါမုၢ်စံး၀ဲဒၣ်န့ၣ်လီၤႉ ဘၣ်ဃးဒီးတၢ်ကဲထီၣ်သး၀ဲအံၤန့ၣ် ပဒိၣ်စီၤ၀ါမုၢ်စံး၀ဲလၢ “ဖဲမနၤအသီ ၂၀ လါယနူၤအါရံၤန့ၣ်န့ၣ် ခးလီၤ၀ဲဒၣ်ကျိဖးဒိၣ် ဖဲလၢၢ်ဒိၣ်ကီၢ်ဆၣ်ဟီၣ်က၀ီၤတၢ်ပၢလၢအမ့ၢ်၀ဲဒၣ်(ငဖယ်အင်း)သ၀ီအပူၤမီၤနီၤႉ လီၤတဲာ်ဘၣ်၀ဲဒၣ်ကမျၢၢ်ခံဂၤလီၤႉ အတဂၤခီဘၣ်၀ဲလၢအဟၢဖၢဒီးသံကွံာ်၀ဲဒၣ်မီၤႉ ဒီးအတဂၤခီန့ၣ်ဘၣ်ဒိ၀ဲလၢအခီၣ်လီၤႉ မ့မ့ၢ်လၢၦၤဘၣ်ဒိတဂၤန့ၣ်ဒု ဆူၣ်ချ့၀ဲၤကျိၤကွၢ်ထွဲကဟုကယာ်အီၤလီၤ”အဂ့ၢ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ငဖဲၤအ့သ၀ီဖိလၢအသံတဂၤအံၤန့ၣ်မ့ၢ်၀ဲ ညါတခၠါ(၆၈)နံၣ်ဒီး ၦၤဖိသၣ်လၢအဘၣ်ဒိတဂၤန့ၣ်မ့ၢ်၀ဲ န့ၤလ့ထိ(၁၄)နံၣ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါဘၣ်ထွဲဒီးတၢ်ခးလီၤကျိဖးဒိၣ်တၢ်ဂ့ၢ်တၢ်ကျိၤအံၤန့ၣ်မ့ၢ်လၢသုးကီၣ်ကးသ့ၣ်တဖၣ်ပာ်၀ဲကမျၢၢ်သ့ၣ်တဖၣ်ဒ်ဒုၣ်ဒါအသိးအဃိ ကွၢ်၀ဲဖဲတၢ်မ့ၢ်လိၤဘၣ်အီၤတကပၤန့ၣ်ခးလီၤ၀ဲကျိဖးဒိၣ်ဆူဒူသ၀ီပူၤဒ်အံၤအဖီခိၣ် တၢ်၀ဲအံၤန့ၣ်မ့ၢ်တၢ်လၢတၢ်တပာ်လုၢ်ပာ်ၦ့ၤကမျၢၢ်ထံဖိကီၢ်ဖိဘၣ်အဂ့ၢ် လၢၢ်ဒိၣ်ကီၢ်ဆၣ်အၦၤကတိၤတၢ်ပၢစံးအါထီၣ်စ့ၢ်ကီး၀ဲဒ်အံၤန့ၣ်လီၤႉ “ဘၣ်ထွဲဒီးတၢ်ခးလီၤကျိဖးဒိၣ်အဂ့ၢ်အကျိၤခီဒု ဒုၣ်ဒါတဖၣ်ပာ်၀ဲကမျၢၢ်တဖၣ်ဒ်သိးဒီးဒုၣ်ဒါအဃိ ကွၢ်၀ဲလၢဒူသ၀ီ အတၢ်လိၤဘၣ်အီၤဖဲလဲၣ်တဖျၢၣ်န့ၣ်ခးလီၤ၀ဲလီၤမီၤႉ အဃိသးန့ၣ်ပထံၣ်လၢတၢ်ခးလီၤကျိဖးဒိၣ်၀ဲအံၤန့ၣ်မ့ၢ်ဒၣ် တၢ်တပာ်လုၢ်ပာ်ၦ့ၤ၀ဲကမျၢၢ်ဘၣ်ဒီးတပာ်ကမျၢၢ်လၢနီၣ်ဂံၢ်တၢဘၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ် ကစီၣ်န့ၣ်လီၤႉ ဒ်န့ၣ်အသိးဖဲပူၤကွံာ်လါယနူၤအါရံၤ(၁၆)သီလၢလၢၢ်ဒိၣ်ကီၢ်ဆၣ်အပူၤပယီၤသုးနုာ်လီၤ၀ဲလၢ အနါဘီၤ သ၀ီပူၤ၀ံၤဖီၣ်၀ဲၦၤသ၀ီဖိ(၄)ဂၤဒီးမၤသံကွံာ်၀ဲဒၣ်န့ၣ်လီၤႉ ၦၤသ၀ီဖိလၢအဘၣ်တၢ်မၤသံအီၤတဖၣ်န့ၣ်မ့ၢ်၀ဲ မီၤစီၣ်မ့သ့ႇ ဖိစီၣ်ဒီး မ့မ့ၢ်လၢအ၀ဲခံဂၤခီန့ၣ် တၢ်ဃုသ့ၣ်ညါအမံၤအဖၢမုၢ်လီၤအဂ့ၢ်န့ၣ်...
၁၇ ၀ီတ၀ီ DKBAသုးခိၣ်သုးနၢ်တၢ်အိၣ်ဖှိၣ်အပူၤခိၣ်နၢ်ဒိၣ်ထီတနီၤတဟဲပၣ်ဃုာ်ပၣ်ဂီၢ်၀ဲဘၣ်
လါယနူၤအါရံၤ ၁၉ သီႇ ၂၀၂၄ နံၣ်ႇ ခ့ၣ်အဲးစံၣ် ဖဲတလါအံၤလါယနူၤအါရံၤ(၁၅)သီ၊တုၤလၢ(၁၇)သီအနံၤန့ၣ်ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ် DKBAမၤ၀ဲ(၁၇)၀ီတ၀ီသုးခိၣ်နၢ်တဖၣ်တၢ်အိၣ်ဖှိၣ်ဖဲသုး၀ဲၤလီၢ်ခိၣ်သ့ၣ်တၢ်လီၢ်အပူၤ၊သုးခိၣ်သုးနၢ်ဒိၣ်ထီတနီၤတဟဲထီၣ်ပၣ်ဃုာ်ပၣ်ဂီၢ်၀ဲတၢ်အိၣ်ဖှိၣ်ဘျီ၀ဲအံၤဘၣ်အဂ့ၢ်န့ၣ် DKBAၦၤဘၣ်မူဘၣ်ဒါတဖၣ် စံး၀ဲန့ၣ်လီၤႉ လၢသုးခိၣ်နၢ်တၢ်အိၣ်ဖှိၣ်ဘျီ၀ဲအံၤအပူၤသုးခိၣ်နၢ်ဒိၣ်ထီဒ်အမ့ၢ်သုးရိၢ်မဲခိၣ်ကျၢၢ်ခံသုးခိၣ်ကျၢၢ်စိ သုးခိၣ်စီၤတၢ်ခုႇ တီနီၢ်မုၢ်ထီၣ်ဟီၣ်က၀ီၤသုးက့(၁)အသုးက့ခိၣ် သုးခိၣ်ကျၢၢ်ဖိ စီၤစဲကၠီၤလၣ်ဒီး တီနီၢ်မုၢ်နုာ်သုးက့(၂) အဒုးယၤခိၣ် သုးခိၣ်ဒိၣ်စိ သုးခိၣ်စီၤအ့ၤ၀ါသ့ၣ်တဖၣ်တဟဲထီၣ်ပၣ်ဃုာ်ပၣ်ဂီၢ်၀ဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ခိၣ်နၢ်ဒိၣ်ထီလၢတဟဲတၢ်အိၣ်ဖှိၣ်သ့ၣ်တဖၣ်စံး၀ဲလၢတၢ်အိၣ်ဆူၣ်အိၣ်ချ့အဃိပၣ်ဃုာ်ပၣ်ဂီၢ်၀ဲတတုၤဘၣ်အဂ့ၢ်န့ၣ် ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ် DKBAသုးဂ့ၢ်၀ီခိၣ် သုးခိၣ်ကျၢၢ်ဖိ စီၤစ့ၤ၀့စံးဘၣ်ခ့ၣ်အဲးစံၣ်–ကညီတၢ်ကစီၣ် ဒ်အံၤန့ၣ်လီၤႉ “တၢ်အိၣ်ဖှိၣ်ပူၤခိၣ်နၢ်တဟဲထီၣ်ခဲလၢာ်ဘၣ်မီၤဒ်သိးလၢတီနီၢ်မုၢ်နုာ်တကပၤန့ၣ်ခီန့ၣ်သုးခိၣ်အ့ၤ၀ါႇသုးရိၣ်မဲခိၣ်ကျၢၢ်ခံဒီးဒုးယၤခိၣ်သ့ၣ်တဖၣ်န့ၣ်ခီဖျိအတၢ်အိၣ်ဆူၣ်အိၣ်ချ့တဂ့ၤဘၣ်အဃိန့ၣ်တဟဲထီၣ်ပၣ််ဃုာ်ဘၣ်မီၤနီၤႉကိးဘျီခီန့ၣ် ပမ့မၤတၢ်အိၣ်ဖှိၣ်န့ၣ်အါတက့ၢ်ပမၤထဲတသီလီၤႉတဘျီညါအံၤခီတံာ်တာ်သၢသီညါမီၤနီၤပတဲအိၣ်သကိးတၢ်ဘျဲးဘျဲးဘျီးဘျီးလီၤမီၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါဖဲတၢ်အိၣ်ဖှိၣ်သၢသီအတီၢ်ပူၤန့ၣ်ၦၤဟဲထီၣ်တၢ်အိၣ်ဖှိၣ်ဖိတဖၣ်ပာ်ဖျါထီၣ်သကိး၀ဲလီၢ်က၀ီၤပူၤ တၢ်ကီတၢ်ခဲတၢ်အိၣ်သးသ့ၣ်တဖၣ်ဒီးတၢၣ်ပီၣ်ကတိၤသကိး၀ဲတၢ်ဖျိဖျိဖျါဖျါဟ့ၣ်ဂံၢ်ဟ့ၣ်ဘါဟ့ၣ်ကူၣ်ဟ့ၣ်ဖးလိာ်သးကဒဲကဒဲအမဲာ်ညါကတိၤသကိး၀ဲတကီၢ်ခါခဲအံၤထံရူၢ်ကီၢ်သဲးတၢ်အိၣ်သးဒီးဒ်သိးဟီၣ်က၀ီၤပူၤကမျၢၢ်လီၢ်က၀ီၤဖိတဖၣ်ကအိၣ်ဘၣ်ဘံၣ်ဘံၣ်ဘၢဘၢအဂီၢ်ကဖီၣ်လိာ်စုမၤသကိးတၢ်ဒီးဖီၣ်စုက၀ဲၤကရူၢ်ကရၢကိးဖုဒဲးအဂ့ၢ်န့ၣ် သုးခိၣ်ကျၢၢ်ဖိ စီၤစ့ၤ၀့ စံးအါထီၣ်၀ဲန့ၣ်လီၤႉ လၢတၢ်အိၣ်ဖှိၣ်ဘျီ၀ဲအံၤန့ၣ်ခီဖျိလၢခိၣ်နၢ်ဒိၣ်ထီတပၣ်ဃုာ်ပၣ်ဂီၢ်ခဲလၢာ်ဘၣ်အဃိ လၢတၢ်ကက့ၤကွၢ်ကဒါက့ၤ ၂၀၂၃ နံၣ်တၢ်မၤအကျိၤအကျဲစ့ၢ်ကီးတကဲထီၣ်ဘၣ်အသိး လၢတၢ်ကပာ်လီၤ ၂၀၂၄ နံၣ် တၢ်မၤအကျိၤအကျဲအဂီၢ် တၢ်ဆၢတဲာ်သ့ၣ်တဖၣ်စ့ၢ်ကီးတၢ်မၤအီၤတကဲထီၣ်နီတမံၤဘၣ်အဂ့ၢ်န့ၣ် ဒံၣ်ခ့ၣ်ဘံၣ်အ့ၣ် ၦၤဘၣ်မူဘၣ်ဒါတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲတၢ်မၤ၀ဲသုးခိၣ်နၢ်တၢ်အိၣ်ဖှိၣ်အပူၤန့ၣ်သုးရိၣ်မဲခိၣ်ကျၢၢ် စီၤစတံႇ လီၢ်ခၢၣ်သးခီၣ်တဃာ်ဒုးယၤခိၣ် သုးခိၣ်စီၤဆါအီၤႇကျိၣ်ထူဘီလီၢ်ခၢၣ်သးသုးက့ခိၣ် သုးခိၣ် စီၤစွ့ၤ၀ၣ်ႇ...
ဘံလ့ကီၢ်ဆၣ်ပူၤပယီၤသုးခးလီၤကျိဖးဒိၣ်အဃိကမျၢၢ်ၦၤပိ၁်မုၣ်သံ(၃)ဂၤႇဘၣ်ဒိ(၁၀)ဂၤ
လါယနူၤအါရံၤ ၁၉ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ်အပူၤ ဖဲတနံၤအံၤလါယနူၤအါရံၤ ၁၉ သီ ဂီၤခီ ၁၀ နၣ်ရံၣ်ဘျဲၣ်အဆၢကတီၢ်န့ၣ် ခီဖျိပယီၤသုးလီၤကျိဖးဒိၣ်အဃိ တဲၣ်တူၤကိၦၤကမျၢၢ်ပိာ်မုၣ်သံ၀ဲဒၣ် (၃)ဂၤဒီးဘၣ်ဒိ၀ဲဒၣ်(၁၀)ဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤၦၤဘၣ်မူဘၣ်ဒါ အအိၣ်န့ၣ်လီၤႉ ဖဲတနံၤအံၤဂီၤခီ ၁၀ နၣ်ရံၣ်ဘျဲၣ်အဆၢကတီၢ်န့ၣ် သုးကီၣ်ကးအမျိာ်သုး(၃၁၄)လၢအိၣ်စံ၀့(ဇီး၀င်း)သ၀ီနုာ်လီၤ ကျဲမုၢ်ခိၣ်တဖၣ်အံၤ ခီဖျိအ၀ဲသ့ၣ်ခးလီၤကျိဖးဒိၣ်လီၤတဲာ်ပိၢ်ဖးထီၣ်၀ဲဒၣ်လၢစွ့ၤယီၤပၠၣ်ကရူၢ် တဲၣ်တူၤကိသ၀ီပူၤ (၂)ဖျၢၣ်အဃိ ကမျၢၢ်ၦၤပိာ်မုၣ်သံ၀ဲဒၣ်(၃)ဂၤဒီးဘၣ်ဒိဘၣ်ထံး(၁၀)ဂၤအကျါပၣ်ဃုာ်၀ဲဒၣ်ၦၤဖိသၣ်ခံနံၣ်တဂၤ အဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တနံၤညါအံၤကဘၣ်ဖဲ(၁၀)နၣ်ရံၣ်န့ၣ်ပယီၤသုးခးလီၤကျိဖဲတဲၣ်တူၤကိသ၀ီပူၤန့ၣ်ၦၤသံ၀ဲဒၣ်(၃)ဂၤႇ ဘၣ်ဒိအဂၤ(၁၀)”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲတနံၤအံၤလါယနူၤအါရံၤ ၁၉ သီအနံၤန့ၣ်လီၤႉ ကျိဖးဒိၣ်အဃိၦၤကမျၢၢ်ပိာ်မုၣ်လၢအသံ(၃)ဂၤအံၤန့ၣ်မ့ၢ်၀ဲနီၢ်မူ(၄၉)နံၣ်ႇနီၢ်မူအဖိမုၣ်နီၢ်စၤဒၤ(၂၂)နံၣ်ဒီး နီၢ်ကီၤလၤမုၣ် သ့ၣ်တဖၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ လၢခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ဘံလ့ကီၢ်ဆၣ်အပူၤ ခီဖျိပယီၤသုးခးလီၤကျိဖးဒိၣ်တလီၢ်လီၢ်အဃိ ၦၤကမျၢၢ်သံဘၣ်ဒိဘၣ်ထံးကဲထီၣ်အသးအိၣ်၀ဲဒၣ်ခဲအံၤခဲအံၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ ဒ်န့ၣ်အသိးဖဲအပူၤကွံာ်လါဒံၣ်စ့ဘၢၣ်အခါန့ၣ်ခီဖျိတၢ်ဒုးကဲထီၣ်ပယီၤသုးခးလီၤကျိဖးဒိၣ်ႇကဘီယူၤစ့ၢ်ကီး ဟဲခးလီၤတၢ်အဃိတၤပီသ၀ီႇတၤပီခံသ၀ီႇကါမဲသ၀ီဖိအဂၤ(၁၀၀၀)ဘျဲၣ်ဘၣ်ဃ့ၢ်ထီၣ်ဒီးတုၤလၢခဲအံၤအ၀ဲသ့ၣ် တက့ၤဘၣ်လၢအဟံၣ်အဃီဒံးဘၣ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံးတ့ၢ်ဃာ်ခ့ၣ်အဲးစံၣ်–ကညီတၢ်ကစီၣ်ဖဲအပူၤ ကွံာ် လါယနူၤအါရံၤ ၁၆ သီအနံၤန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤလီၢ်ခံလၢခ့ၣ်အဲၣ်ယူၣ်တၢ်ပၢဟီၣ်က၀ီၤတဖၣ်အပူၤတၢ်ဒုးကဲထီၣ်၀ဲလၢတၢ်ပၢၢ်ဆၢသုးပာ်ဖှိၣ်ဒီးပယီၤသုးအဘၢၣ်စၢၤအိၣ်၀ဲကိးမုၢ်နံၤဒဲးဃၣ်ဃၣ်ဒီးဒ်န့ၣ်အသိးခီဖျိပယီၤသုးအံၤခးလီၤကျိဖးဒိၣ်ႇကဘီယူၤဟဲခးလီၤတၢ်အဃိကီၢ်ရ့ၣ်(၇)ဘ့ၣ်(၂၀၂၃)တနံၣ်အတီၢ်ပူၤန့ၣ်ၦၤကမျၢၢ်သံ၀ဲဒၣ်(၁၉၅)ဂၤႇဘၣ်ဒိ၀ဲဒၣ်(၆၆၁)ဂၤအဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သး ထုးထီၣ်ပာ်ဖျါ တၢ်ကစီၣ်အသိးသ့ၣ်ညါဘၣ်န့ၣ်လီၤႉ
၂၀၂၃ဒီတနံၣ်အတီၢ်ပူၤ ကီၢ်သူလ့ၤတၢ်ပၢဟီၣ်က၀ီၤ တၢ်ဒုးကဲထီၣ်အဘျီ(၄၆၀၀)ဘျဲၣ်ႇပယီၤသုးသံ(၅၀၀၀)ဘျဲၣ်
လါယနူၤအါရံၤ ၁၉သီႇ ၂၀၂၄နံၣ်ႇ ခ့ၣ်အဲးစံၣ် ဖဲအပူၤကွံာ် ၂၀၂၃ ဒီတနံၣ်အတီၢ်ပူၤ လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်က၀ီၤပူၤ န့ၣ် တၢ်ဒုးဖးဒိၣ်တၢ်ဒုးဖိဒ်အမ့ၢ်ႇတၢ်ဒုးထီၣ်ဟံးန့ၢ်သုးကလၢၤႇတၢ်ဘၣ်သဂၢၢ်ခးလိာ်သးႇ တၢ်ဒုးစဲးပြဲးဒီးဒြိတၢ်ဒုးသ့ၣ်တဖၣ်န့ၣ် ကဲထီၣ်၀ဲခဲလၢာ်တစှၤန့ၣ် (၄၆၂၃) ဘျီဒီး ဖဲပယီၤသုးကီၣ်ကးတကပၤ သံ၀ဲ ၅၀၀၅ ဂၤႇဘၣ်ဒိ ၃၃၄၅ ဂၤအဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးတၢ်ကစီၣ်ပာ်ဖျါ၀ဲလါယနူၤအါရံၤ ၁၈သီအနံၤန့ၣ်လီၤႉ လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်တီခိၣ်ရိၣ်မဲတၢ်ပၢၢ်ဆၢသုးပာ်ဖှိၣ်တကပၤစ့ၢ်ကီး၂၀၂၃နံၣ်ဒီတနံၣ်တီၢ်ပူၤဘၣ်သံ၀ဲ(၁၅၄)ဂၤႇဘၣ်ဒိ(၅၉၇)ဂၤအဂ့ၢ်ႇ ခ့ၣ်အဲၣ်ယူၣ်လီၢ်ခၢၣ်သးတၢ်ကစီၣ်ပာ်ဖျါ၀ဲဒၣ်န့ၣ်လီၤႉ တၢ်ဒုးအကတီၢ် ပယီၤသုးကီၣ်ကးတကပၤ ပာ်၀ဲကမျၢၢ် ဒ်ဒုၣ်ဒါအသိး၀ံၤ ပညိၣ်ခးလီၤ၀ဲကျိဖးဒိၣ်ႇ ဟဲခးလီၤတၢ်ဒီးကဘီယူၤႇ ဃုာ်ဒီးတၢ်စုဆူၣ်ခီၣ်တကးလၢ အဂၤအကလုာ် ကလုာ်သ့ၣ်တဖၣ် မၤထီဒါအါထီၣ်၀ဲလၢကမျၢၢ်အဖီခိၣ်အဃိ စးထီၣ်၂၀၂၁နံၣ်တုၤ၂၀၂၃နံၣ် လၢသၢနံၣ်အတီၢ်ပူၤ ကမျၢၢ်ဘၣ်ဃ့ၢ်အိၣ်ကမှံၦၤနီၢ်ဂံၢ်အိၣ်၀ဲ(၇၅၀ႇ၀၀၀)ဘျဲၣ်အဂ့ၢ် ခ့ၣ်အဲၣ်ယူၣ်လီၢ်ခၢၣ်သးတၢ်ကစီၣ်စံး၀ဲဒၣ်န့ၣ်လီၤႉ ဖဲအပူၤကွံာ်၂၀၂၂နံၣ်ဒီတနံၣ်အတီၢ်ပူၤစ့ၢ်ကီးကီၢ်သူလ့ၤတၢ်ပၢဟီၣ်က၀ီၤတၢ်ဒုးကဲထီၣ်၀ဲလၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်သုးပာ်ဖှိၣ်ဒီးပယီၤသုးကီၣ်ကးအဘၢၣ်စၢၤအိၣ်၀ဲ (၄၀၀၀)ဘျဲၣ်ႇ ပယီၤသုးသံ(၄၀၀၀)ဘျဲၣ်ဒီး ဘၣ်ဒိ(၃၀၀၀)ဘျဲၣ်အိၣ်၀ဲဒၣ်ခ့ၣ်အဲၣ်ယူၣ်ပာ်ဖျါဃၣ်၀ဲန့ၣ်လီၤႉ ဒ်န့ၣ်အသိး ဖဲအပူၤကံွာ် ၂၀၂၁နံၣ်အတီၢ်ပူၤစ့ၢ်ကီးတၢ်ဒုးကဲထီၣ်၀ဲႇ(၃၀၀၀)ဘျဲၣ်ႇပယီၤသုးသံ(၂၀၀၀)ဘျဲၣ်ဒီးဘၣ်ဒိ၀ဲဒၣ်(၂၀၀၀)ဘျဲၣ်အိၣ်စ့ၢ်ကီး၀ဲအဂ့ၢ် ခ့ၣ်အဲၣ်ယူၣ် ပာ်ဖျါဃာ်၀ဲ့န့ၣ်လီၤႉ စးထီၣ်လၢ၂၀၂၁တုၤ၂၀၂၃နံၣ်အတီၢ်ပူၤ လၢခ့ၣ်အဲၣ်ယူၣ်ကီၢ်သူလ့ၤတၢ်ပၢဟီၣ်က၀ီၤ တၢ်ဒုးတၢ်ယာ်အကတီၢ် ပယီၤသုးသံ တစှၤန့ၣ်အဂၤ(၁၁၀၀၀)ဂၤဘၣ်အသိးႇဘၣ်ဒိတစှၤန့ၣ်အဂၤ(၈၈၀၀)ဂၤႇဘၣ်အဂ့ၢ်သ့ၣ်ညါဘၣ်န့ၣ်လီၤႉ