ပယီၤသုးကီၣ်ကးဖီလာ်သ၀ီသးၦၢ်လီၤကရၢကရိထၢသုးစံး၀ဲလၢကဟ့ၣ်၀ဲကျိၣ်စ့ဒီးဟုသး
ယနူၤအါရံၤ ၁၆သီႇ၂၀၂၄နံၣ်၊ ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ သုးက့(၂)တီအူကီၢ်ရ့ၣ်ႇ ထီတထူၣ်ကီၢ်ဆၣ် တီအူ၀့ၢ်ဃုာ်ဒီးပၢၤထံးဟီၣ်က၀ီၤဒူသ၀ီသ့ၣ်တဖၣ် ဖဲမဟါလါယနူၤအါရံၤ ၁၅သီအနံၤန့ၣ် ပယီၤသုးကီၣ်ကးဖီလာ်သ၀ီသးၦၢ်သ့ၣ်တဖၣ်ကိးအိၣ်ဖှိၣ်၀ဲကမျၢၢ်လၢကလီၤကရၢကရိထၢသုးအသီအဂ့ၢ်သ့ၣ်ညါဘၣ်လၢၦၤလီၢ်က၀ီၤဖိအအိၣ်န့ၣ်လီၤႉ ပယီၤသုးကီၣ်ကးဖီလာ်ဒူသ၀ီၦၤဘၣ်မူဘၣ်ဒါသ့ၣ်တဖၣ်အံၤကိးအိၣ်ဖှိၣ်၀ဲကမျၢၢ်လၢကဘၣ်လဲၤကဲသုးဘၣ်ဆၣ်ခီဖျိၦၤလဲၤကဲသုးတအိၣ်ဘၣ်အဃိလၢခံတဲကဒါက့ၤ၀ဲလၢၦၤမ့ၢ်သးအိၣ်ကဲသုးတဂၤလၢ်လၢ်န့ၣ်တလါန့ၣ်ကဟ့ၣ်၀ဲဒီးကျိၣ်စ့ႇဟုသးသ့ၣ်တဖၣ်အိၣ်၀ဲဒၣ်အဂ့ၢ် တီအူ၀့ၢ်လီၢ်က၀ီၤဖိလၢ တအဲၣ်ဒိးပာ်ဖျါအမံၤတဂၤစံးဘၣ်၀ဲခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“တဲ၀ဲလၢၦၤပိာ်ခွါ(၁၈)နံၣ်တုၤအနံၣ်(၅၀)တဟံၣ်တဂၤကဘၣ်လဲၤကဲသုးဘၣ်ဆၣ်ၦၤလဲၤတအိၣ်ဘၣ်အဃိလၢခံတဲက့ၤ၀ဲလၢၦၤမ့ၢ်သးအိၣ်ကဲသုးန့ၣ် ကဟ့ၣ်၀ဲလၢစ့ပယီၤ တလါ(၁၅၀ႇ၀၀၀)ဒီးဟုသးအဃိန့ၣ်ၦၤလၢတၢ်ဟဲနုာ်တအိၣ်ဒီးတနၢ်ပၢၢ်တၢ်သ့ၣ်တဖၣ်ကလဲၤ ၀ဲဒၣ်အိၣ်”အဂ့ၢ်စံးန့ၣ်လီၤႉ လၢန့ၣ်အမဲာ်ညါ တီအူ၀့ၢ်က၀ီၤဒ့ပူၤ တၢ်မ့ၢ်ထံၣ်ၦၤဟးထီၣ်တၢ်ချၢလၢမုၢ်နၤခီန့ၣ် တၢ်ဖီၣ်န့ၢ် အ၀ဲသ့ၣ်ဒီးတၢ်မၢကဲန့ၢ်ဆူၣ်သုးအိၣ်၀ဲအဃိမုၢ်နၤခီႇလီၤဆီဒၣ်တၢ်ၦၤသးစၢ်သ့ၣ်တဖၣ်ဟးထီၣ်လၢတၢ်ချၢတဘူၣ်လၢၤဘၣ်အသိးတၢ်ဟးသမံသမိး၀ဲၦၤတမှံစရီလၢမုၢ်နၤခီအိၣ်၀ဲခဲအံၤခဲအံၤအဂ့ၢ်အ၀ဲတဲအါထီၣ်၀ဲဒၣ်စ့ၢ်ကီးန့ၣ်လီၤႉ ပယီၤသုးကီၣ်ကးဖီလာ်ဒူသ၀ီသးၦၢ်ဘၣ်မူဘၣ်ဒါလီၤကရၢကရိထၢသုးအသီဒ်အံၤန့ၣ် ကဲထီၣ်အါတက့ၢ်လၢပယီၤသုးကီၣ်ကးတၢ်ပၢဖီလာ်လိၤလိၤ၀့ၢ်ပူၤႇ ပၢၤထံးဟီၣ်က၀ီၤဒူသ၀ီလၢအဘၣ်တၢ်ပၢအီၤလၢၦၤခံဖုလၢာ်လၢအမ့ၢ်ပယီၤသုးကီၣ်ကးဒီးကညီဒီကလုာ်စၢဖှိၣ်ကရၢသ့ၣ်တဖၣ်အဂ့ၢ်သ့ၣ်ညါဘၣ်လၢၦၤလီၢ်က၀ီၤဖိအအိၣ်န့ၣ်လီၤႉ ဒ်န့ၣ်အသိး လၢကညီဒီကလုာ်စၢဖှိၣ်ကရၢသုးက့(၃)ႇ ချၢၣ်လွံၢ်ထူၣ်ကီၢ်ရ့ၣ်ႇလၢၢ်ဒိၣ်ကီၢ်ဆၣ် ကၠီၣ်တခါ၀့ၢ်ဒီးချၢၣ်လွံၢ်ထူၣ်၀့ၢ်သ့ၣ်တဖၣ်စ့ၢ်ကီး ပယီၤသုးကီၣ်ကးမၢန့ၢ်ဆူၣ်တၢ်ကထီၣ်သုးတၢ်မၤလိႇဃ့အီၣ်ကျိၣ်စ့လၢတၢ်ဖံးတၢ်မၤကစၢ်အိၣ်ဒီးမၤပျံၤမၤဖုးကမျၢၢ်အိၣ်၀ဲဒၣ်အဂ့ၢ်သ့ၣ်ညါဘၣ်လၢၦၤလီၢ်က၀ီၤဖိအအိၣ်န့ၣ်လီၤႉ
ခီဖျိသုးကီၣ်ကးအတၢ်မၤထီဒါၦၤဟီၣ်ခိၣ်ဖိခွဲးယာ်အဃိ ဒူသ၀ီ(၁၉)ဖျၢၣ်ထုးထီၣ်ပာ်ဖျါအတၢ်မိၣ်န့ၢ်သးလီ
လါယနူၤအါရံၤ ၁၆ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢ သုးက့(၃) ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ်အပူၤ ၦၤဃ့ၢ်မှံဟးဖျိးလၢအိၣ်(ၦဲာ်လိာ်ကျိ)မုၢ်နုာ်တၢ်လီၢ်သ့ၣ်တဖၣ်အံၤခီဖျိလၢသုးကီၣ်ကးအၦၤသ့ၣ်တဖၣ်ခးလီၤကျိဖးဒိၣ်ဟဲခးလီၤတၢ်ဒီးကဘီယူၤအိၣ်၀ဲကိးနံၤဒဲးဃၣ်ဃၣ်အဃိဒူသ၀ီ(၁၉)ဖျၢၣ် ၦၤလီၢ်အိၣ်ကမှံဖိသ့ၣ်တဖၣ်ပာ်ဖျါဃ့ထီၣ်၀ဲအတၢ်မိၣ်န့ၢ်သးလီသ့ၣ်တဖၣ်အဂ့ၢ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲလါယနူၤအါရံၤ(၁၃)သီအနံၤန့ၣ်လီၤႉ ခီဖျိလၢသုးကီၣ်ကးခးလီၤကျိဖးဒိၣ်အဃိကမျၢၢ်လီၢ်က၀ီၤဖိဘၣ်ဟးဃ့ၢ်အိၣ်ကဒုသးဆူတၢ်လီၢ်အဂၤဒီးတလဲၤတက့ၤဘၣ်လၢတၢ်သဘျ့ပူၤဘၣ်ဒ်အံၤအဖီခိၣ်ကမျၢၢ်သ့ၣ်တဖၣ်ဃ့ထီၣ်အတၢ်မိၣ်န့ၢ်သးလီလၢအဲၣ်ဒိးဒိးန့ၢ်မၤလိဘၣ်တၢ်ကူၣ်ဘၣ်ကူၣ်သ့ႇတၢ်အိၣ်ဆူၣ်အိၣ်ချ့ဒီးတၢ်ခွဲးတၢ်ယာ်သ့ၣ်တဖၣ်လၢတၢ်သဘျ့အပူၤအသိးသုးကီၣ်ကးကပတုာ်ကွံာ်တၢ်ခးလီၤကျိဖးဒိၣ်ဒီးတလိၣ်ဘၣ်မီၤစိရိၤသနူ၀ဲအံၤဘၣ်အဂ့ၢ်န့ၣ် လၢၢ်ဒိၣ်ကီၢ်ဆၣ်အၦၤကတိၤတၢ်ပၢ ပဒိၣ်စီၤ၀ါမုၢ် စံး၀ဲဒ်အံၤန့ၣ်လီၤႉ “အ၀ဲသ့ၣ်အတၢ်ဃ့ထီၣ်တခီဒုမီၤစိရိၤဖဲလဲၣ်တကလုၢ်လဲၣ်န့ၣ်တလိၣ်ဘၣ်၀ဲဘၣ်ႇတလိၣ်ဘၣ်၀ဲစ့ၢ်ကီးသုးကီၣ်ကးအတၢ်ခးလီၤကျိဖးဒိၣ်ဟဲခးလီၤတၢ်ဒီးကဘီယူၤဘၣ်ႉ စးထီၣ်လၢမီၤစိရိၤဟံးန့ၢ်ဆူၣ်တၢ်စိတၢ်ကမီၤ၀ံၤလီၢ်ခံကၠိစ့ၢ်ကီးတထီၣ်အဃိၦၤကၠိဖိသ့ၣ်တဖၣ်အဲၣ်ဒိးမၤလိက့ၤတၢ်ႉ ကမျၢၢ်သ့ၣ်တဖၣ်မ့ၢ်လၢကျိဖးဒိၣ်အဃိတက့ၤမံဘၣ်လၢဟံၣ် ဘၣ်န့ၣ်န့ၢ်လၢအလါလံႉ အဃိန့ၣ်အ၀ဲအံၤမ့ၢ်၀ဲတၢ်အခိၣ်သ့ၣ်လၢအ၀ဲသ့ၣ်ဃ့ထီၣ်၀ဲဒၣ်လီၤႉ လၢတၢ်အိၣ်ဆူၣ်အိၣ်ချ့ တခီဘၣ်ကွၢ်ဆၢမဲာ်၀ဲကီခဲ၀ဲႇကလဲၤပၠးသးဆူ၀့ၢ်ပူၤတညီဘၣ်ႇဒူသ၀ီပူၤတၢ်ဆါဟံၣ်စ့ၢ်ကီးတလဲၤတရံးအသးလၢဘၣ်ႉ ဒီးတၢ်လဲၤတၢ်က့ၤတကပၤန့ၣ်သမံသမိး၀ဲတုၤၦၤစံးဆၢမ့ၢ်တဘၣ်န့ၣ်ဖီၣ်စၢတံၢ်ဃာ်၀ဲ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒူသ၀ီ(၁၉)ဖျၢၣ်လၢပာ်ဖျါထီၣ်၀ဲအ၀ဲသ့ၣ်အတၢ်မိၣ်န့ၢ်သးလီသ့ၣ်တဖၣ်န့ၣ်မ့ၢ်၀ဲ ဖယါငိၣ်တိၣ်ႇတီၤခ့ၤႇကၠ့ၣ်ကွ့ႇအလဲၤႇလ့အ့ၤစူၣ်ႇနွါယ့ၤခၠီႇသမ့ၤအ့ကိႇနၤစၣ်ႇတလဲခ့ၤႇဖိတၣ်ႇခၠီ၀ၣ်ႇတဲစူၣ်ႇပီၣ်ကိႇကၠီစိႇယွၤသၤယၤႇငဖဲၤအ့ႇဘၤဘူကိႇ ယ့ၤတွ့ကိႇဖၠၤတလ့ ဒူသ၀ီသ့ၣ်တဖၣ်အံၤအဂ့ၢ်န့ၣ် ခ့ၣ်အဲၣ်ယူၣ်တၢ်ပာ်ဖျါပူၤအသိးပာ်ဖျါ၀ဲန့ၣ်လီၤႉ လၢန့ၣ်အမဲာ်ညါ(ၦဲာ်လိာ်ကျိ)အမုၢ်နုာ်ဒူသ၀ီအဖျၢၣ်(၄၀)ဘျဲၣ် ဘၣ်ကွၢ်ဆၢမဲာ်ဘၣ်၀ဲသုးကီၣ်ကးအတၢ်ခးလီၤကျိဖးဒိၣ်ဟဲခးလီၤတၢ်ဒီးကဘီယူၤအိၣ်၀ဲအသိး ကမျၢၢ်လီၢ်က၀ီၤဖိလၢဃ့ၢ်တၢ်ဒုးသ့ၣ်တဖၣ် တုၤလၢခဲအံၤဒၣ်လဲာ်က့ၤအိၣ်က့ၤဆိးလၢဒူသ၀ီဟံၣ်ဃီအပူၤတဘူၣ်ဒံးဘၣ်အဖီခိၣ်ဘၣ်အိၣ်ဘၣ်ဆိး၀ဲလၢအပုၢ်အ၀ဲၢ်အဟံၣ်ႇတၢ်ဘူၣ်တၢ်ဘါတၢ်သူၣ်ထီၣ်သ့ၣ်တဖၣ်ဒီးဒူသ၀ီအဂၤပူၤအိၣ်၀ဲအဖၢမုၢ်ဒံးလီၤအဂ့ၢ်န့ၣ် လၢၢ်ဒိၣ်ကီၢ်ဆၣ် အၦၤကတိၤတၢ်ပၢ ပဒိၣ်စီၤ၀ါမုၢ်စံးအါထီၣ်၀ဲဒၣ်န့ၣ်လီၤႉ ဒ်န့ၣ်အသိးချၢၣ်လွံၢ်ထူၣ်ကီၢ်ရ့ၣ် ကၠီၣ်တကါကီၢ်ဆၣ် ၦၤပၢဆှၢတၢ်မူဒါခိၣ်ဒီးသုးကီၣ်ကးဖီလာ်ပၢကီၢ်သုးသ့ၣ်တဖၣ် ကိး၀ဲသ၀ီသးၦၢ်တၢ်အိၣ်ဖှိၣ်လၢမၢ၀ဲဒူသ၀ီတဖျၢၣ်ၦၤအဂၤ(၂၀)ကဘၣ်နုာ်လီၤကဲ၀ဲကမျၢၢ်သုးအသိးဃ့၀ဲကျိၣ်စ့လၢၦၤမၤအီၣ်မုၢ်ကျိၤ၀ဲၤကွာ်တၢ်မၤကစၢ်သ့ၣ်တဖၣ်အအိၣ်အိၣ်၀ဲအဖီခိၣ်မ့ၢ်တနုာ်လီၤကဲမ့ၢ်တဟ့ၣ်ဘၣ်န့ၣ်တဲပျံၤတဲဖုး၀ဲ လၢကဟဲခးလီၤဒူသ၀ီပူၤလၢကဘီယူၤအဂ့ၢ်ခ့ၣ်န့ၣ် အဲၣ်ယူၣ်ပာ်ဖျါ၀ဲဖဲလါယနူၤအါရံၤ(၁၃)သီအနံၤ အိၣ်စ့ၢ်ကီး၀ဲဒၣ်န့ၣ်လီၤႉ
ချၢၣ်လွံၢ်ထူၣ်ကမျၢၢ် ၦၤဃ့ၢ်မှံဟးဖျိးအနီၣ်ဂံၢ်ဟဲအိၣ်အါထီၣ်သၢကလးဘျဲၣ်
လါယနူၤအါရံၤ ၁၆ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢချၢၣ်လွံၢ်ထူၣ်ကီၢ်ရ့ၣ်(သုးက့-၃) လၢၢ်ဒိၣ်ကီၢ်ဆၣ်ႇမူကီၢ်ဆၣ်ဒီးဆီထံးကီၢ်ဆၣ် ကီၢ်ဆၣ်သၢဘ့ၣ်လၢာ်အံၤအပူၤ စးထီၣ်လၢလါဖ့ၤဘြူၤအါရံၤ(၁)သီ(၂၀၂၁)နံၣ် သုးကီၣ်ကးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ တုၤလါဒံၣ်စဲဘၢၣ်လၢာ်အတီၢ်အပူၤအံၤ ကမျၢၢ်ၦၤဃ့ၢ်မှံဟးဖျိးအနီၣ်ဂံၢ်ဟဲအိၣ်အါထီၣ်၀ဲတုၤလၢ(၂၄၈ ၁၆၀)ဂၤလံအဂ့ၢ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲတလါအံၤလါယနူၤအါရံၤအတီၢ်ပူၤန့ၣ်လီၤႉ ဒ်ကညီတၢ်မၤစၢၤဆီၣ်ထွဲတၢ်မုာ်တၢ်ခုၣ်ၦာ်ဘျးစဲ(KPSN)အတၢ်ပာ်ဖျါအသိးန့ၣ် စးထီၣ်လၢသုးကီၣ်ကးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံတုၤလါယူၤလံ(၂၀၂၃)နံၣ်အတီၢ်ပူၤန့ၣ်ချၢၣ်လွံၢ်ထူၣ်ကီၢ်ရ့ၣ်ၦၤဃ့ၢ်မှံဟးဖျိးအနီၢ်ဂံၢ်အိၣ်၀ဲ(၂၁၆ ၇၅၄)ဂၤန့ၣ်လီၤႉ ဘၣ်ဆၣ်ခီဖျိလၢသုးကီၣ်ကးအတၢ်မၤထီဒါၦၤဟီၣ်ခိၣ်ဖိခွဲးယာ်သ့ၣ်တဖၣ် ကဲထီၣ်ဒံး၀ဲအသး အဖၢမုၢ်အဃိတုၤလီၤလၢ(၂၀၂၃)နံၣ် နံၣ်လၢာ်အတီၢ်ပူၤအံၤၦၤဃ့ၢ်မှံဟးဖျိးအနီၢ်ဂံၢ်ဟဲအိၣ်အါထီၣ်တုၤလၢ(၂၄၈ ၁၆၀)ဂၤလံအဂ့ၢ် ခ့ၣ်အဲၣ်ယူၣ်တၢ်ပာ်ဖျါပူၤအသိးသ့ၣ်ညါဘၣ်န့ၣ်လီၤႉ ခီဖျိလၢမျၢၢ်ၦၤဃ့ၢ်မှံဟးဖျိးဟဲအါထီၣ်၀ဲအဖီခိၣ်ကီၢ်ဆၣ်ဂ့ၢ်ဂီၤအူတၢ်တိစၢၤမၤစၢၤကမံးတံာ်သ့ၣ်တဖၣ်ဒီးတၢ်မၤစၢၤဆီၣ်ထွဲကရူၢ်ကရၢသ့ၣ်တဖၣ်ပာ်ဖှိၣ်မၤသကိးတၢ်အိၣ်၀ဲအသိးကမျၢၢ်ကဒဲကဒဲစ့ၢ်ကီးတိစၢၤမၤစၢၤလိာ်သးအိၣ်၀ဲဒၣ်န့ၣ်လီၤႉ ဒ်န့ၣ်အသိးသုးကီၣ်ကးအကဘီယူၤကလံၤကျါအဃိ လၢကပာ်ပနီၣ်န့ၢ်၀ဲ ၦၤလီၢ်အိၣ်ကမှံဖိတၢ်လီၢ်လီၤတံၢ်လီၤဆဲးအဂီၢ်တအိၣ်ဘၣ်အဂ့ၢ် လၢၢ်ဒိၣ်ကီၢ် ဆၣ်အၦၤကတိၤတၢ်ပၢပဒိၣ်စီၤ၀ါမုၢ်စံး၀ဲဒ်အံၤန့ၣ်လီၤႉ “မ့မ့ၢ်လၢတၢ်ဆီၣ်ထွဲမၤစၢၤဒု အါတက့ၢ်န့ၣ် ပကီၢ်ဆၣ်ဂ့ၢ်ဂီၢ်အူတၢ်တိစၢၤမၤစၢၤကမံးတံာ်သ့ၣ်တဖၣ်အံၤ တၢ်မၤစၢၤမ့ၢ်ဟဲတဖုလၢ်လၢ်န့ၣ် ကပာ်ဖှိၣ်မၤသကိးတၢ်ဒီး ပမၤသကိးတၢ်လီၤႉ ဒ်န့ၣ်အသိးကမျၢၢ်ကဒဲကဒဲစ့ၢ်ကီးမၤစၢၤလိာ်က့ၤသးအိၣ်၀ဲႇ မ့မ့ၢ်လၢပကီၢ််ဆၣ်ပတီၢ်ခီန့ၣ်ပကပာ်ပနီၣ်န့ၣ်၀ဲၦၤတၢ်လီၢ်ခီန့ၣ်ပမၤအီၤတန့ၢ်ဘၣ်ႉ ဘၣ်မနုၤလဲၣ်န့ၣ်တၢ်ဘၣ်ကွၢ်ဆၢၣ်မဲာ်၀ဲကလံၤကျါကဘီယူၤအဃိလၢကဟံန့ၢ်၀ဲတၢ်ဘံၣ်တၢ်ဘၢဒီးပာ်ပနီၣ်န့ၣ်တၢ်လီၢ်တၢ်ကျဲလီၢ်တံၢ်လီၤဆဲးအဂီၢ်တအိၣ်ဘၣ်ႉ အိၣ်ဒၣ်အ၀ဲသ့ၣ်ပာ်ဖှိၣ်ထီၣ်သးတပူၤဃီဒ်န့ၣ်ဒုအိၣ်မီၤ”အဂ့ၢ်စံး ဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါ တကီၢ်ခါခဲအံၤ ကမျၢၢ်လၢဘၣ်ဃ့ၢ်သ့ၣ်တဖၣ် လၢကက့ၤအိၣ်က့ၤဆိးလၢဟံၣ်ဃီ အဂီၢ်အါဒၣ်တၢ်တက့ၢ်တအိၣ်ဒံး၀ဲဘၣ်ဒီးအိၣ်ဒၣ်က့ၤကွၢ်ဟုကွၢ်စူၣ်ဟံၣ်ဃီတဘျီတဘျီလၢမုၢ်ဆါခီကတီၢ်န့ၣ်လီၤႉ မ့မ့ၢ်လၢမုၢ်နၤခီအဆၢကတီၢ်ဘၣ်အိၣ်ဆိးဒံးလၢတၢ်လီၢ်လၢအတဒၢအလီၢ်အဂ့ၢ်သ့ၣ်ညါဘၣ်လၢကီၢ် ဆၣ်လီၢ်က၀ီၤအၦၤဘၣ်မူဘၣ်ဒါအအိၣ်န့ၣ်လီၤႉ ဒ်န့ၣ်အသိးလၢခ့ၣ်အဲၣ်ယူၣ်ကီၢ်ရ့ၣ်(၇)ဘ့ၣ်အံၤအပူၤ စးထီၣ်လၢသုးမီၤစိရိၤဟံန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံတုၤလါစဲးပထ့ဘၢၣ်(၂၀၂၃)နံၣ်အတီၢ်ပူၤအံၤ ၦၤဃ့ၢ်မှံဟးဖျိအနီၣ်ဂံၢ်ခဲလၢာ်အိၣ်၀ဲ (၇၁၇ႇ၆၂၆)ဂၤအသိး ကီၢ်ရ့ၣ်(၇)ဘ့ၣ်အကျါချၢၣ်လွံၢ်ထူၣ်ကီၢ်ရ့ၣ် ဟီၣ်က၀ီၤအံၤၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲအါကတၢၢ်လီၤအဂ့ၢ် ဖဲလါအီးကထိဘၢၣ်(၁၄)သီ ခ့ၣ်အဲၣ်ယူၣ်တၢ်ပာ်ဖျါပူၤအိၣ်၀ဲအသိး သ့ၣ်ညါဘၣ်န့ၣ်လီၤႉ
ပယီၤသုးနီၣ်နဲၣ်ဖျါမူဒါခိၣ် ဟဲက့ၤဟ့ၣ်လီၤသးလၢ သုးက့(၁)အအိၣ်
လါယနူၤအါရံၤ ၁၅သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ သုးက့(၁) ဒူသထူၣ်ကီၢ်ရ့ၣ်၊ ဘံလ့ကီၢ်ဆၣ်အပူၤ ဖဲအပူၤကွံာ် လါယနူၤအါရံၤ(၁၁)အနံၤန့ၣ် ပယီၤသုးကီၣ်ကးအၦၤလၢအိၣ်ဆီလီၤသး ဖဲတးပီသုးကလၢၤ လၢ အဖီၣ်နီၣ်နဲၣ်ဖျါ တဂၤဟဲက့ၤဟ့ၣ်လီၤသုးလၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)သုးက့(၁) အိၣ်အဂ့ၢ်သ့ၣ်ညါ ဘၣ်လၢ သုးက့(၁)အၦၤဘၣ်မူဘၣ်ဒါအအိၣ်န့ၣ်လီၤႉ ပယီၤသုး သုးဖိလၢအဖီၣ်နီၣ်နဲၣ်ဖျါမူဒါခိၣ် ဖဲတးပီသုးကလၢၤန့ၣ်မ့ၢ်၀ဲ ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ် - စကခ (၈)၊ ခီၣ်ချ့သုးရ့ၣ်(ခမရ-၄၁၀)ႇ သုးဖိ စိနဲၣ်၀့ၤဒီး ဖဲဟဲဟ့ၣ်လီၤသးအခါ စိာ်ဃုာ်စ့ၢ်ကီး၀ဲဒီးတၢ်စုက၀ဲၤ ဒ်အမ့ၢ်(MA-၃ ) တခိၣ်ႇ ကျိဆၣ်ဒၢ(၄)ဘ့ၣ်ႇ ကျိချံအဖျၢၣ်(၃၀၀)ႇ အံၣ်နၣ်ကၣ်(၂)ဖျၢၣ်ႇ စုကွံာ် မ့ၣ်ပိၢ်(၁)ဖျၢၣ်သ့ၣ်တဖၣ်အဂ့ၢ် သ့ၣ်ညါဘၣ်စ့ၢ်ကီးန့ၣ်လီၤႉ ခီဖျိပယီၤသုးကီၣ်ကး စိနဲၣ်၀့ၤအံၤ တအဲၣ်ဒိးမၤတၢ်မၤလၢ သုးကီၣ်ကးလၢဟံးန့ၢ် ဆူၣ်ထံကီၢ်တၢ်စိ တၢ်ကမီၤအဖီလာ်ဘၣ်အဃိ အ၀ဲဟဲဟ့ၣ်လီၤကွံာ်အသးလၢ(KNLA) သုးက့(၁)အအိၣ်အဂ့ၢ် သုးက့(၁) ၦၤဘၣ်မူဘၣ်ဒါစံး၀ဲန့ၣ်လီၤႉ လၢအ၀ဲဟဲဟ့ၣ်လီၤသးဒ်အံၤအဖီခိၣ် သုးက့(၁)ခိၣ်နၢ် ဟ့ၣ်ကနၢၤအီၤလၢကျိၣ်စ့အိၣ်စ့ၢ်ကီး၀ဲဒၣ်အဂ့ၢ်သ့ၣ်ညါဘၣ် လၢ(KNLA)သုးက့(၁)အၦၤဘၣ်မူဘၣ်ဒါအအိၣ်န့ၣ်လီၤႉ
လၢၢ်ဒိၣ်ကီၢ်ဆၣ် နၣ်သၤကွ့ဟီၣ်က၀ီၤပူၤ ကမျၢၢ်ဟံၣ်ဃီဟးဂီၤကွံာ်အိၣ်လၢအကယၤဘျဲၣ်လံ
လါယနူၤအါရံၤ ၁၃ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢ ချၢၣ်လွံၢ်ထူၣ်ကီၢ်ရ့ၣ်(သုးက့-၃) လၢၢ်ဒိၣ်ကီၢ်ဆၣ်ဟီၣ်က၀ီၤအပူၤ ခီဖျိလၢတၢ်ဒုးတၢ်ယၤကဲထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်သုးပာ်ဖှိၣ်ဒီးသုးကီၣ်ကးအၦၤအဘၢၣ်စၢၤအဃိသုးကီၣ်ကးတကပၤဟဲခးလီၤတၢ်ဒီးကဘီယူၤႇခးလီၤကျိဖးဒိၣ်အိၣ်၀ဲဒၣ်အဖီခိၣ်(နၣ်သၤကွ့)ဟီၣ်က၀ီၤအပူၤ ကမျၢၢ်ဟံၣ်ဃီဒီးတၢ်သူၣ်ထီၣ်ဟးဂီၤကွံာ်အိၣ်၀ဲလၢအကယၤဘျဲၣ်လံအဂ့ၢ်န့ၣ် သ့ၣ်ညါဘၣ်လၢ ကီၢ်ရ့ၣ်အၦၤဘၣ်မူဘၣ်ဒါအအိၣ်န့ၣ်လီၤႉ စးထီၣ်ဖဲအပူၤကွံာ်လါဒံၣ်စဲဘၢၣ်(၂၆)သီအနံၤန့ၣ်(KNLA)သုးပာ်ဖှိၣ်နုာ်လီၤခး၀ဲသုးကီၣ်ကးအသုးကလၢၤလၢအိၣ် (နၣ်သၤကွ့)ဟီၣ်က၀ီၤပူၤ၀ံၤလီၢ်ခံသုးကီၣ်ကးအကဘီယူၤဟဲခးလီၤတၢ်အိၣ်၀ဲကိးနံၤဒဲးဃၣ်ဃၣ်အဃိ ကမျၢၢ်တၢ်သူၣ်ထီၣ်ဒီးဟံၣ်ဃီသ့ၣ်တဖၣ်ဟးဂီၤအူအီၣ်ကွံာ်အိၣ်၀ဲအဖျၢၣ်လၢအကယၤဘျဲၣ်လံအဂ့ၢ်န့ၣ် လၢၢ်ဒိၣ်ကီၢ်ဆၣ် ၦၤကတိၤတၢ်ပၢ ပဒိၣ်စီၤ၀ါမူ စံး၀ဲဒ်အံၤန့ၣ်လီၤႉ လၢၢ်ဒိၣ်အၦၤကတိၤတၢ်ပၢပဒိၣ်စီၤ၀ါမူစံး၀ဲလၢ “သုးကီၣ်ကးသ့ၣ်တဖၣ်ခးလီၤ၀ဲကျိဖးဒိၣ်အံၤန့ၣ် အါတက့ၢ်ဘၣ်ဟးဂီၤကွံာ်၀ဲကမျၢၢ်တၢ်သူၣ်ထီၣ်သ့ၣ်တဖၣ်မီၤနီၤႉ ပမ့ၢ်ကွၢ်လၢနၣ်သၤကွ့၀့ၢ်ပူၤတကပၤခီန့ၣ် သုးကီၣ်ကးခးလီၤကျိဖးဒိၣ်မ့ၢ်ဂ့ၤဟဲခးလီၤတၢ်ဒီးကဘီယူၤမ့ၢ်ဂ့ၤန့ၣ်ဘၣ်ဟးဂီၤကွံာ်၀ဲဟံၣ်ဃီတၢ်သူၣ်ထီၣ်အိၣ်၀ဲဒၣ်လၢသၢပူခံပူညါမီၤႉ မ့ၢ်လၢသုးကီၣ်ကးသ့ၣ်တဖၣ်အံၤခးလီၤစိတၢ်ကိးနံၤဒဲးဃၣ်ဃၣ်လီၤတဲာ်ပိၢ် ဖးထီၣ်၀ဲလၢဒူသ၀ီပူၤကိးဖျၢၣ်ဒဲးဃၣ်ဃၣ်အဃိ ဘၣ်ဟးဂီၤကွံာ်၀ဲကမျၢၢ်ဟံၣ်ဃီကအိၣ်လၢခံကယၤညါလံ” အဂ့ၢ်န့ၣ် စံးဘၣ်ခ့ၣ်အဲးစံၣ်– ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါခီဖျိလၢသုးကီၣ်ကးအတၢ်ဟဲတ့ၢ်လီၤမ့ၢ်ပိၢ်ဒီးခးလီၤကျိဖးဒိၣ်ဆူကမျၢၢ်တၢ်လီၢ်တၢ်ကျဲၤပူၤဒ်အံၤအဖီခိၣ်ဘၣ်ဟးဂီၤကွံာ်၀ဲဟံၣ်ဃီတၢ်သူၣ်ထီၣ်တကးဒံးဘၣ်အမဲာ်ညါကမျၢၢ်တၢ်သူၣ်ထီၣ်ဒ်အမ့ၢ်တၢ်ဘူၣ်တၢ်ဘါတၢ်သူၣ်ထီၣ်ႇ ကၠိတၢ်သူၣ်ထီၣ်ဒီးတၢ်ဆါဟံၣ်ကသံၣ်ဒၢးသ့ၣ်တဖၣ် ဘၣ်ဟးဂီၤကွံာ်စ့ၢ်ကီးအဂ့ၢ်န့ၣ် သ့ၣ်ညါဘၣ်န့ၣ် လီၤႉ တကီၢ်ခါခဲအံၤသုးကီၣ်ကးသ့ၣ်တဖၣ်လၢကဆှၢန့ၢ်အၦၤတၢ်အီၣ်တၢ်အီအဂီၢ်အါဒၣ်တက့ၢ်သူက့ၤ၀ဲလၢကလံၤကျါတကပၤလၢကဟဲတ့ၢ်လီၤန့ၢ်အၦၤတၢ်အီၣ်တၢ်အီအသိးဖဲပူၤကွံာ်မဟါတနံၤစ့ၢ်ကီးတၢ်ဘၣ်သဂၢၢ်ခးလိာ်သးကဲထီၣ်ဒံး၀ဲဒၣ်အဂ့ၢ်န့ၣ် လၢၢ်ဒိၣ်ကီၢ်ဆၣ်အၦၤကတိၤတၢ်ပၢစံးအါထီၣ်၀ဲန့ၣ်လီၤႉ ဒ်န့ၣ်အသိးချၢၣ်လွံၢ်ထူၣ်ကီၢ်ရ့ၣ်လၢၢ်ဒိၣ်ကီၢ်ဆၣ်ဟီၣ်က၀ီၤအပူၤစးထီၣ်တလါအံၤလါယနူၤအါရံၤ(၁)သီတုၤ (၅)သီ လၢယဲၢ်သီအတီၢ်ပူၤသုးကီၣ်ကးသ့ၣ်တဖၣ်ခးလီၤကျိဖးဒိၣ်အိၣ်၀ဲအဖျၢၣ်(၆၀)ကဘီယူၤဟဲတ့ၢ်လီၤ မ့ၢ်ပိၢ်(၁၃)ဖျၢၣ်ဒီး ခးလီၤ(အီးလံကၢး)ကျိ(၉)ဘျီအဃိဘၣ်ဒိဘၣ်ထံး၀ဲကမျၢၢ်(၄)ဂၤအသိး ဘၣ်ဟးဂီၤကွံာ်၀ဲ ကမျၢၢ်ဟံၣ်ဃီ (၄)ဖျၢၣ်ဃုာ်ဒီးဆၣ်ဖိကီၢ်ဖိဘၣ်ဒိဘၣ်ထံးစ့ၢ်ကီးအိၣ်၀ဲအဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သး ထုးထီၣ်ပာ်ဖျါ ၀ဲဖဲလါယနူၤအါရံၤ(၆)သီအနံၤန့ၣ်လီၤႉ
သူၣ်ဘီၣ်သးစၢ်တဖၣ်ကအဲၣ်လီၤက့ၤအၦၤကလုာ်ဒီးကသ့ၣ်ညါမၤက့ၤကလုာ်တၢ်ဖံးတၢ်မၤအဂ့ၢ် သုးခိးကီၢ်ဆၢ အနဲၣ်ရွဲၣ် စီၤခၠံၣ်သူၣ် ဆီၣ်တခူစံး၀ဲ
လါယနူၤအါရံၤ ၁၂ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုာ်စၢ်ဖှိၣ်ကရၢ ဖၣ်အၣ်ကီၢ်ရ့ၣ် လူၢ်ပျဲၢ်ကီၢ်ဆၣ် မၠဲၣ်ကၠံငူၣ်ဟီၣ်က၀ီၤ တၢ်မၤလၤကပီၤ၀ဲတနံၣ်အံၤကညီနံၣ်ထီၣ်သီမူးတၢ်ရဲၣ်တၢ်ကျဲၤအပူၤ ကညီဖိသူၣ်ဘီၣ်သးစၢ်သ့ၣ်တဖၣ် ကသ့အဲၣ်လီၤက့ၤအၦၤကလုာ်ဒီးကသ့ၣ်ညါမၤက့ၤအၦၤကလုာ်တၢ်ဖံးတၢ်မၤသ့ၣ်တဖၣ်အဂီၢ်အဂ့ၢ်သုးခိးကီၢ်ဆၢ (BGF) နဲၣ်ရွဲၣ်ခိၣ်ကျၢၢ် သုးခိၣ်ဒိၣ်စိစီၤခၠံၣ်သူၣ် ဆီၣ်တခူစံး၀ဲဖဲမဟါလါယနူၤအါရံၤ(၁၁)သီအနံၤန့ၣ်လီၤႉ လၢတၢ်ရဲၣ်တၢ်ကျဲၤအပူၤန့ၣ် ခိၣ်ဒိၣ်စိ စီၤခၠံၣ်သူၣ် ဆီၣ်တခူစံး၀ဲဒၣ်လၢ “ပၦၤကလုာ်တၢ်မၤပမ့တမၤဘၣ် မတဂၤ မးတဟဲမၤန့ၢ်ၦၤတအိၣ်ဘၣ်န့ၣ်အဆိကတၢၢ်ပဘၣ်သ့ၣ်ညါလီၤပနီၢ်ကစၢ်အသးယပကလုာ်တၢ်မၤပမ့တမၤဘၣ်န့ၣ်ၦၤဟဲမၤန့ၢ်ၦၤတအိၣ်ဘၣ်န့ၣ်ပသ့ၣ်ညါကိးဂၤဒဲးလီၤႉပကလုာ်တၢ်မၤပမ့မၤမးပကတုၤလၢပၦၤကလုာ်တၢ်မုၢ်လၢ်ဖီတၢၣ်အဃိန့ၣ်အဲၣ်တၢ်ဃံတၢ်လၤသူၣ်စၢ်သးဘီၣ်ဖိဒိၣ်မုၣ်ဖိဒိၣ်ခွါကိးဂၤဒဲးလၢနံၣ်သီအံၤန့ၣ်လၢသုၦၤကလုာ်အဂီၢ်လၢသုဒူသ၀ီထံကီၢ်အဂီၢ်န့ၣ်တဘၣ်ကၢၣ်လၢၦၤကလုာ်ဒီးထံကီၢ်အဂီၢ်အတၢ်ဖံးတၢ်မၤတဂ့ၤန့ၣ်မ့ၢ်ယတၢ်ဟ့ၣ်ဂံၢ်ဟ့ၣ်ဘါဒီးတၢ်လၢယအဲၣ်ဒိးမၢ်လိာ်သုအလီၢ်ခံကတၢၢ်လီၤ” အဂ့ၢ်န့ၣ် စံး၀ဲဒၣ်န့ၣ်လီၤႉ လၢန့ၣ်အမ့ၢ်ညါလၢနံၣ်သီလါသီအပူၤအံၤဆၢဂ့ၤဆၢ၀ါဘၣ်၀ဲကညီဖိကိးဂၤဒဲးလၢကမၤန့ၢ်အီၣ်ကဲပူၤဖျဲးဒီးဒုၣ်ဒါ တၢ်မၤအၢမၤသီအသိးလၢနံၣ်သီအံၤန့ၣ်မုၢ်လၢ်ဆၢထံၣ်၀ဲလၢကညီဒီတကလုာ်ကအိၣ်တၢ်ပာ်သူၣ်ပာ်သးလၢအလဲၢ်ႇ လုၢ်လၢ်သကဲးပ၀းတၢ်ထံၣ်လၢအသီအဂ့ၢ်န့ၣ် စံးအါထီၣ်၀ဲဒၣ်န့ၣ်လီၤႉ တကတီၢ်ဃီ ဆၢကတီၢ်မုၢ်မဆါတနံၤညါအံၤ ကညီဖိအလုၢ်လၢ်ထူသနူတၢ်ဆဲးတၢ်လၤသ့ၣ်တဖၣ် လဲၤထီၣ်လဲၤထီ အိၣ်၀ဲဘၣ်ဆၣ်လၢတၢ်စံၣ်ညီၣ်ပၢလီၤသးခွဲးယာ်တကပၤတအိၣ်ဒံးဘၣ်အဃိ ဒ်ကလုာ်ဂၤအိၣ်ဒီးတၢ်စံၣ်ညီၣ်ပၢလီၤသး ခွဲးယာ်အသိးကညီကလုာ်ကအိၣ်ဒီးနီၢ်ကစၢ်တၢ်စံၣ်ညီၣ်ပၢလီၤသးခွဲးယာ်အဂီၢ်ကညီသူၣ်ဘီၣ်သးစၢ်သ့ၣ်တဖၣ် ကသ့ၣ်ညါလီၤက့ၤအမူအဒါသုတမံခ့မံသပ့ၤလၢကလုာ်တၢ်ဖံးတၢ်မၤအဂီၢ်တဂ့ၤအဂ့ၢ်န့ၣ် သုးခိၣ်ဒိၣ်စိ စီၤခၠံၣ်သူၣ် ဆီၣ်တခူထီၣ်၀ဲစ့ၢ်ကီးန့ၣ်လီၤႉ ကညီနံၣ်ထီၣ်သီမုၢ်နံၤအံၤမ့ၢ်၀ဲမုၢ်နံၤလၢကညီဖိတဖၣ်ကပာ်ဖှိၣ်မၤလၤကပီၤ၀ဲအသိးလၢတနံၣ်အံၤ ၂၇၆၃ နံၣ်ကညီနံၣ်ထီၣ်သီမုၢ်နံၤလၢအလီၤဘၣ်၀ဲဖဲတလါအံၤလါယနူၤအါရံၤ ၁၁သီ သလ့ၤလါထီၣ်တသီအနံၤန့ၣ် (ခ့ၣ်အဲၣ်ယူၣ်)ကညီဒီကလုာ်စၢဖှိၣ်ကရၢႇ ကညီဒီတၢ်မုာ်တၢ်ခုၣ်ကီၣ်ကး(PC)ႇ တၢ်ဘၣ်ဘျုးဒံၣ်မိၣ်ကရ့ၣ်စံၣ် ကညီသုးမုၢ်ဒိၣ်(DKBA) ႇ ကီၢ်သူလ့ၤသုးမုၢ်ဒိၣ်(KTLA) ႇ သုးခိးကီၢ်ဆၢ(BGF) သ့ၣ်တဖၣ်မၤလၤကပီၤ သကိး၀ဲဒၣ်လၢအ၀ဲသ့ၣ်တၢ်ပၢဟီၣ်က၀ီၤဒၣ်၀ဲစုာ်စုာ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
လၢတၢ်ကသ့ၣ်ညါပ၁်ပနီၣ်ၦၤအဂီၢ်ပနီၢ်ကစၢ်ဒၣ်၀ဲပကဘၣ်သူၣ်ထူၣ်လီၤက့ၤပသးအဂ့ၢ်န့ၣ် သုးခိၣ်ကျၢၢ်စိ စီၤဘီကၠီၣ်ဟဲ စံး၀ဲ
လါယနူၤအါရံၤ ၁၂ သီႇ ၂၀၂၄ နံၣ်ႇ ခ့ၣ်အဲးစံၣ် ဒ်သိးတၢ်ကသ့ၣ်ညါပာ်ပနီၣ်ၦၤအဂီၢ်ပနီၣ်ကစၢ်ဒၣ်၀ဲပကဘၣ်သူၣ်ထီၣ်အီၤအဂ့ၢ်န့ၣ် ခ့ၣ်အဲၣ်ယူၣ် (သုးက့ ၅) ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးရိၣ်မဲခိၣ်ကျၢၢ်–၂ သုးခိၣ်ကျၢၢ်စိ စီၤဘီကၠီၣ်ဟဲ စံး၀ဲဖဲမဟါ လါယနူၤအါရံၤ ၁၁ သီလၢအလီၤဘၣ်၀ဲ(၂၇၆၃)၀ီတ၀ီ ကညီနံၣ်ထီၣ်သီမုၢ်နံၤအံၤန့ၣ်လီၤႉ ဒ်သုးရိၣ်မဲခိၣ်ကျၢၢ်-၂ သုးခိၣ်ကျၢၢ်စိ စီၤဘီကၠီၣ်ဟဲ အလံာ်ဟ့ၣ်ယုၢ်ပူၤပာ်ဖျါ၀ဲအသိးန့ၣ် ကညီအနံၣ်အံၤ အိၣ်၀ဲ(၂၇၆၃)နံၣ်လံဒီးလၢနံၣ်လါတဖၣ်အံၤအပူၤလၢပၦၤကလုာ်အဂီၢ်တၢ်မုာ်တၢ်ခုၣ်ႇတၢ်သူၣ်ဖှံသးညီႇတၢ်သဘျ့ တအိၣ်ဘၣ်အမဲာ်ညါပၦၤကလုာ်ဘၣ်သဂၢၢ်ဒၣ်ထဲတၢ်ကီတၢ်ခဲႇတၢ်နးတၢ်ဖှီၣ်ႇတၢ်ဆီၣ်တံၢ်မၤနၢၤႇတၢ်ကိၢ်တၢ်ဂီၤ သ့ၣ်တဖၣ်လီၤႉဒ်န့ၣ်အသိးပ၀ဲကိးဂၤပထံၣ်ဘၣ်ၦဲၤမဲာ်ၦဲၤနါတုၤလၢမုၢ်မဆါတနံၤအံၤဒၣ်လဲာ်လၢပၦၤကလုာ်အဂီၢ်တၢ်ဘံၣ်တၢ်ဘၢတအိၣ်တၢ်မၤပျံၤမၤဖုးႇတၢ်မၤအၢမၤသီႇတၢ်မၤကိၢ်မၤဂီၤပၦၤကမျၢၢ်တဖၣ်လၢကျဲအကလုာ်ကလုာ် အဂ့ၢ်န့ၣ် စံး၀ဲန့ၣ်လီၤႉ လၢကညီဖိသ့ၣ်တဖၣ်အဂီၢ်နံၣ်သီလါသီမ့ၢ်ဟဲတုၤအိၣ်၀ဲဘၣ်ဆၣ်တၢ်တူၢ်ဘၣ်ခီၣ်ဘၣ်တဖၣ်တလီၤမၢ်ႇ တပတုာ်၀ဲဒံးဘၣ် အိၣ်ဒၣ်ဒံးအလီၢ်လီၢ်န့ၣ်လီၤႉလၢန့ၣ်အမဲာ်ညါပ၀ဲကိးဂၤပကဘၣ်သ့ၣ်ညါလၢပၦၤကလုာ်ကထူၣ်ဖျဲးထီၣ်လၢတၢ်ကိၢ်တၢ်ဂီၤတၢ်မၤအၢမၤသီႇတၢ်ဆီၣ်တံၢ်မၤနၢၤသ့ၣ်တဖၣ်ဒံးဘၣ်ႉတၢ်တူၢ်ဘၣ်ခီၣ်ဘၣ်တဖၣ်အိၣ်၀ဲတပယူာ်ဃီလၢမိၢ်ပၢ်ဖံဖုအစိၤဒီးတုၤလီၤလၢပစိၤဆၢကတီၢ်ခဲအံၤဒၣ်လဲာ်အဂ့ၢ်န့ၣ် လံာ်ဟ့ၣ်ယုၢ်အပူၤ စံး၀ဲန့ၣ်လီၤႉ သုးခိၣ်ကျၢၢ်ဒိၣ်စိ စီၤဘီကၠီၤဟဲ စံး၀ဲလၢ “ၦၤကလုာ်ဂၤသ့ၣ်တဖၣ်မ့ၢ်ဂ့ၤ၊ထံဂုၤကီၢ်ဂၤမ့ၢ်ဂ့ၤတပာ်ဒိၣ်ပာ်ကဲၦၤႇ တအိၣ်ၦိၤမၤစၢၤၦၤဘၣ်အမဲာ်ညါထံၣ်အံၣ်ထံၣ်ဆံးၦၤထီဘိန့ၣ်လီၤႉလၢတၢ်န့ၣ်အဃိပကဘၣ်နၢ်ပၢၢ်လၢဒ်သိး တၢ်ကသ့ၣ်ညါပာ်ပနီၣ်ၦၤအဂီၢ်ပနီၢ်ကစၢ်ဒၣ်၀ဲပကဘၣ်မၤအီၤႇသူၣ်ထီၣ်လီၤက့ၤသးႇပာ်ပနီၣ်လီၤက့ၤသးႇ ပကဘၣ်အိၣ်ဒီးတၢ်စံၣ်ညီၣ်ပၢလီၤသးပကဘၣ်အိၣ်ဒီးတၢ်သဘျ့အထံကီၢ်”အဂ့ၢ်န့ၣ် စံး၀ဲန့ၣ်လီၤႉ လၢတၢ်န့ၣ်အဃိဆၢကတီၢ်ဘၣ်လံလၢပကဘၣ်ဆၢတဲာ်တၢ်ႇတၤတၢ်ႇထိၣ်ဃူထိၣ်ဖိးလိာ်သးႇပာ်ဂံၢ်ပာ်ဘါလိာ်သးႇ ပာ်ဖှိၣ်မၤသကိးတၢ်တဂၤလၢပသနၢၣ်ဖဲတၢ်တၤလၣ်အိၣ်ဒီးၦၤအသိးလၢတၢ်သးတီတၢ်သးကဆှီဃုာ်ဒီး တၢ်သူၣ်ဒူသးဒူအဂ့ၢ်န့ၣ် စံး၀ဲန့ၣ်လီၤႉ လၢတၢ်ကိၢ်တၢ်ဂီၤအကျါပဆၢဂ့ၤဆၢ၀ါလိာ်သးအံၤန့ၣ်တမ့ၢ်လၢပသးခုအဃိဘၣ်ႉမ့ၢ်၀ဲတၢ်ပနီၣ်ဟ့ၣ်တၢ်ယူးယီၣ်ဆူမိၢ်ပၢ်ဖံဖုႇခိၣ်နၢ်သိၣ်ဒူႇကညီဖိႇထံဖိကီၢ်ဖိကမျၢၢ်သ့ၣ်တဖၣ်လၢအကျဲးစၢးတ့ၢ်တၢ်လၢပၦၤကလုာ်အဂီၢ်အဃိလီၤ အဂ့ၢ်န့ၣ် သုးခိၣ်ကျၢၢ်ဒိၣ်စိ စီၤဘီကၠီၣ်ဟဲ နံၣ်ထီၣ်သီအလံာ်ဟ့ၣ်ယုၢ်ပူၤ စံး၀ဲန့ၣ်လီၤႉ လၢကညီနံၣ်ထီၣ်သီမုၢ်နံၤလၢအသီအံၤကဟဲစိာ်ၦၤတၢ်ဂံၢ်တၢ်ဘါႇတၢ်အိၣ်ဆူၣ်အိၣ်ချ့ႇတၢ်သူၣ်ဒူသးဒူဒီး မ်ပၦၤကလုာ်ခဲလၢာ်ကအိၣ်ဒီးတၢ်သူၣ်ပ့ၢ်သးဆှါတၢ်ပလီၢ်သူၣ်ပလီၢ်သးႇတၢ်ပာ်ဂံၢ်ပာ်ဘါလီၤသးႇ တၢ်ပာ်ပနီၣ်လီၤသးႇတၢ်ပာ်လုၢ်ပာ်ၦ့ၤလီၤသးတကးဒံးဘၣ်မ်တၢ်တီတၢ်ကလိၤကပၢၦၤဒီးပကတီဒီးပၦၤကလုာ်ႇ ၦၤကမျၢၢ်ႇပကတီဒီးပၦၤမၤသကိးတၢ်ပကတီဒီးပတၢ်အၢၣ်လီၤသ့ၣ်တဖၣ်အဂ့ၢ်န့ၣ် သုးခိၣ်ကျၢၢ်စိ စီၤဘီကၠီၣ်ဟဲ ကတိၤဆၢဂ့ၤဆၢ၀ါ၀ဲကမျၢၢ်ထံဖိကီၢ်ဖိသ့ၣ်တဖၣ်န့ၣ်လီၤႉ ဒ်န့ၣ်အသိးဖဲမဟါလါယနူၤအါရံၤ ၁၁ သီ သလ့ၤလါထီၣ် ၁ သီလၢအလီၤဘၣ်၀ဲကညီနံၣ်ထီၣ်အံၤစ့ၢ်ကီး ခ့ၣ်အဲၣ်ယူၣ်...
ပၠိခၠီသ၀ီ ပယီၤသုးဒွဲၣ်အူဟံၣ်(၃)ဘျီတဘျီ၊ဟံၣ်ခိၣ် အူအီၣ်ကွံာ်အဖျၢၣ် (၄၀)ဘျဲၣ်
လါယနူၤအါရံၤ ၁၂သီႇ၂၀၂၄ နံၣ်ႇခ့ၣ်အဲးစံၣ် ခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢ သုးက့(၂) တီအူကီၢ်ရ့ၣ်၊ ထီတထူၣ်ကီၢ်ဆၣ် ဖဲအပူၤကွံာ်လါယနူၤအါရံၤအသီ(၁၀)အနံၤန့ၣ် ခီဖျိလၢ တၢ်ခးလိာ်သးကဲထီၣ်လၢပယီၤသုးကီၣ်ကးအၦၤဒီး တၢ်ပၢၢ်ဆၢသုးပာ်ဖှိၣ်ကရူၢ်အဘၢၣ်စၢၤဖဲတၢ်လီၢ်လၢအဘူးဒီး(ပၠိခၠီ)သ၀ီအဃိ ပယီၤသုးကီၣ်ကးအၦၤနုာ်လီၤဒွဲၣ်အူကဒီး၀ဲ(ပၠိခၠီ)သ၀ီ(၃)ဘျီတဘျီအဂ့ၢ် လီၢ်က၀ီၤဖိစံး၀ဲဒၣ်န့ၣ်လီၤႉ ပယီၤသုးလၢဟဲနုာ်လီၤဒွဲၣ်အူကမျၢၢ်ဟံၣ်န့ၣ်၀ဲ ခီၣ်သုးရ့ၣ် (၃၉) ခံဘျီ၊ခီၣ်ချ့သုးရ့ၣ် (၁၂၄)တဘျီခဲလၢာ်(၃)ဘျီ၊ဒီးဟံၣ်အူအီၣ်လၢာ်ကွံာ်၀ဲအဖျၢၣ်(၄၀)ဘျဲၣ်လံအဂ့ၢ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံးဘၣ်၀ဲကညီကွဲၤလ့လိၤဒ်အံၤန့ၣ်လီၤႉ အ၀ဲစံး၀ဲဒၣ်လၢ“ဖဲအပူၤကွံာ်လါယနူၤအါရံၤအသီ(၁၀)အနံၤန့ၣ် တၢ်ဒုးကဲထီၣ်အဃိပယီၤသုးနုာ်လီၤဒွဲၣ်အူကဒီးဟံၣ်လၢပၠိခၠီသ၀ီပူၤ(၃)ဘျီတဘျီလံႉ ပၠိခၠီသ၀ီဟံၣ်အဖျၢၣ် (၁၀၀)ဘျဲၣ်အကျါအဖျၢၣ်(၄၀)ဘျဲၣ်န့ၣ်အူအီၣ်ကွံာ် ၦၤအိၣ်တသ့လၢာ်ဘၣ်ႉ မ့ၢ်နုာ်လီၤဒွဲၣ်အူကဒီး၀ဲလၢအသီတဘျီန့ၣ် ပၠိခၠီသ၀ီပူၤတမ့ၢ်လၢဟံၣ်ကအိၣ်လၢာ်နီတဖျၢၣ်လၢၤဘၣ်”အဂ့ၢ်စံး၀ဲဒၣ်န့ၣ်လီၤႉ လၢန့ၣ်အမဲာ်ညါ တၢ်ကီတၢ်ခဲအိၣ်အကလုာ်ကလုာ်ဒီးလီၤဆီဒၣ်တၢ်တကီၢ်ခါခဲအံၤခီဖျိ တၢ်ဂိၢ်ခါအဆၢကတီၢ်အဃိတၢ်ကီတၢ်ခဲအိၣ်၀ဲဒၣ်လၢဖိသၣ်ဆံးတဖၣ်ဒီးၦၤသူၣ်က့သးၦၢ်သ့ၣ်တဖၣ်အဂီၢ်အဂ့ၢ်၊ ဒီးပၠိခၠီၦၤလီၢ်အိၣ်ကမှံဖိသ့ၣ်တဖၣ်အံၤအါတက့ၢ်ဘၣ်လဲၤၦ့ၤအီၣ်တၢ်လၢတီအူ၀့ၢ်ပူၤအဃိသဂၢၢ်ဘၣ်၀ဲဒီးပယီၤသုးကီၣ်ကးအၦၤအတၢ်တြီမၤတံာ်အိၣ်၀ဲဒၣ်အဖီခိၣ်လၢကဒိးန့ၢ်ဘၣ်တၢ်အီၣ်တၢ်အီအဂီၢ်စ့ၢ်ကီးကီခဲ၀ဲဒၣ်အမဲာ်ညါအ၀ဲသ့ၣ်တဒိးန့ၢ်ဘၣ်၀ဲတၢ်ဆီၣ်ထွဲမၤစၢၤလၢဂံၢ်ခီၣ်ထံးတၢ်ကရၢကရိအအိၣ်နီတဖုအအိၣ်ဘၣ်အဃိလၢတနံၤအဂီၢ်တနံၤဂီၢ်ကအီၣ်ဘၣ်အဂီၢ်ဘၣ်ကူၣ်ထီၣ်၀ဲဒၣ်လၢအနီၢ်ကစၢ်အဂ့ၢ် လီၢ်က၀ီၤဖိစံး၀ဲဒၣ်န့ၣ်လီၤႉ ပၠိခၠီသ၀ီအံၤဖဲအပူၤကွံာ်၂၀၂၃နံၣ်၊လါစဲးပထ့ဘၢၣ်အတီၢ်ပူၤတဘျီ၊လါနိၣ်၀့ဘၢၣ်တဘျီဒီး၂၀၂၄လါယနူၤအါရံၤအတီၢ်ပူၤတဘျီပယီၤသုးနုာ်လီၤဒွဲၣ်အူကမျၢၢ်ဟံၣ်(၃)ဘျီအဃိ သ၀ီပူၤဟံၣ်ခိၣ်(၁၀၀)ဘျဲၣ်၊ၦၤကမျၢၢ်(၅၀၀)ဘျဲၣ်ဘၣ်ဃ့ၢ်အိၣ်ကဒု၀ဲဒၣ်လၢ်ခိခိၣ်ၦၢ်လၢ်ကျါအိၣ်၀ဲတနီၤအသိး လဲၤအိၣ်ကဒု၀ဲဒၣ်လၢ ဘွဲမိၢ်ၦၢ်အိးထီၣ်၀ဲၦၤလီၢ်အိၣ်ကမှံအလီၢ်အိၣ်၀ဲဒၣ်တနီၤအဂ့ၢ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ဒ်ကီၢ်ပူၤကညီၦၤလီၢ်အိၣ်ကမှံကမံးတံာ်အတၢ်မၤနီၣ်အိၣ်၀ဲဒၣ်အသိးန့ၣ် ခီဖျိတၢ်ဒုးတၢ်ယာ်အဃိ သုးက့(၂)တီအူကီၢ်ရ့ၣ်ၦၤလီၢ်အိၣ်ကမှံဖိအိၣ်၀ဲ ၂ကလး၁ကယၤဘျဲၣ်အဂ့ၢ်သ့ၣ်ညါဘၣ်န့ၣ်လီၤႉ
ကီးတရံး၀့ၢ်ပူၤဟံၣ်ဃီတၢ်သူၣ်ထီၣ်ဟးဂူာ်ဟးဂီၤဟဲအါထီၣ်၀ဲကိးနံၤဒဲး
လါယနူၤအါရံၤ ၁၂ သီႇ ၂၀၂၄နံၣ်ႇ ခ့ၣ်အဲးစံၣ် ကညီကီၢ်စဲၣ် ကီးတရံး၀့ၢ်ပူၤ တုၤတနံၤအံၤလါယနူၤအါရံၤအသီ(၁၀)အနံၤ ခီဖျိတၢ်ခးလိာ်သးဆဲးကဲထီၣ်ဒံး၀ဲလၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီးပယီၤသုးအဘၢၣ်စၢၤအဃိလီၢ်က၀ီၤကမျၢၢ်အဟံၣ်အဃီ တၢ်သူၣ်ထီၣ်တဖၣ်ဟးဂီၤဟဲအါထီၣ်၀ဲဒၣ်ကိးမုၢ်နံၤဒဲးအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ခီဖျိတၢ်ပၢၢ်ဆၢသုးပာ်ဖှိၣ်နုာ်လီၤအိၣ်လၢကီးတရံး၀့ၢ်ပူၤဒီးပယီၤသုးအံၤခးလီၤကျိဖးဒိၣ်ဆူက၀ီၤဒ့ပူၤအဃိ မ့ၣ်အူအီၣ်၀ဲဒၣ်ၦၤဟံၣ်ၦၤဃီ၊ကျးတၢ်သူၣ်ထီၣ်သ့ၣ်တဖၣ်ဟဲအါထီၣ်၀ဲဒၣ်တပယူာ်ဃီအဂ့ၢ်န့ၣ် ကီးတရံးကမျၢၢ်တဖၣ် စံး၀ဲန့ၣ်လီၤႉ ကီးတရံးကမျၢၢ်လၢအဟံၣ်ဒီးအကျးအူအီၣ်ဟးဂီၤကွံာ်တဂၤစံး၀ဲလၢ“လၢမုဂါအိၣ်တကပၤအံၤ ဖဲမဟါမုၢ်နၤခီန့ၣ် မ့ၣ်အူအီၣ်၀ဲဒၣ်ဟံၣ်ဒီးကျးဆါတၢ်(၆)ဖျၢၣ်မီၤနီၤႉ မုဂါအကျးစ့ၢ်ကီးမ့ၣ်အူအီၣ်ကွံာ်ခဲလၢာ်လီၤႉ သးဘၣ်ဖှီၣ်ဒိၣ်မးလီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါက၀ီၤဒ့တၢ်လီၢ်လၢတၢ်ပၢၢ်ဆၢသုးပာ်ဖှိၣ်ကရူၢ်လုၢ်ဘၢဒိၣ်စိ၀ဲန့ၣ်သ့ၣ်တဖၣ်အံၤ အ၀ဲသ့ၣ်မၤဆှဲန့ၢ်၀ဲကျဲဒီးပျဲကီးတရံးၦၤကမျၢၢ်လၢအဃ့ၢ်ထီၣ်တဖၣ်အံၤဟဲက့ၤဟံးန့ၢ်က့ၤအ၀ဲသ့ၣ်တၢ်ဖိတၢ်လံၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ အ၀ဲစံး၀ဲလၢ “တၢ်လီၢ်လၢ(တၢ်ပၢၢ်ဆၢသုးကရူၢ်)ဒိၣ်စိ၀ဲန့ၢ်ညါန့ၣ်အ၀ဲသ့ၣ်ပျဲၦၤကမျၢၢ်မီၤနီၤ လၢကက့ၤဟံတၢ်ဖိတၢ်လံၤက့ၤကွၢ်ဟံၣ်က့ၤကွၢ်ဃီဒ်န့ၣ်ႉ အ၀ဲသ့ၣ်မၤဆှဲကျဲအဃိတနံၤညါအံၤပက့ၤကွၢ်ပဟံၣ်မီၤနီၤ” အဂ့ၢ်န့ၣ်စံး၀ဲန့ၣ်လီၤႉ ဒ်န့ၣ်အသိးကီးတရံး၀့ၢ်ပူၤတၢ်ဒုးကဲထီၣ်လၢတလါဘျဲၣ်အတီၢ်ပူၤအံၤဟံၣ်အူအီၣ်ဟးဂီၤ၀ဲဒၣ်(၁၀၀)ဘျဲၣ်အဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ တကီၢ်ခါခဲအံၤပယီၤသုးခးလီၤ၀ဲကျိဖးကိးမုၢ်နံၤဒဲးတကးဒံးဘၣ်အ၀ဲသ့ၣ်ဟးတ့ၢ်လီၤဒြိမ့ၣ်ပိၢ်လၢက၀ီၤဒ့၀့ၢ်ပူၤ အိၣ်၀ဲအဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်လၢအိၣ်တၢ်မဲာ်ညါသ့ၣ်တဖၣ်စံး၀ဲဒၣ်န့ၣ်လီၤႉ
ကညီဖိလၢအတုၤအိၣ်ကီၢ်ဆၢတဖၣ်ပ၁်ဖှိၣ်မၤလၤကပီၤသကိး၀ဲကညီနံၣ်ထီၣ်သီလၢ၀့ၢ်မဲၢ်ဆီး
လါယနူၤအါရံၤ ၁၁ သီႇ ၂၀၂၄ နံၣ်ႇ ခ့ၣ်အဲးစံၣ် ဖဲတနံၤအံၤလါယနူၤအါရံၤထီၣ် ၁၁ သီ ဂီၤခီအဆၢကတီၢ်န့ၣ် ကညီဖိလၢအတုၤအိၣ်ဖဲကီၢ်ဆၢတဖၣ် ပာ်ဖှိၣ်မၤလၤကပီၤသကိး၀ဲ(၂၇၆၃)ကညီနံၣ်ထီၣ်သီလၢ၀့ၢ်မဲၢ်ဆီးတၢ်လီၢ်တတီၤဒီး တၢ်ရဲၣ်တၢ်ကျဲၤအံၤဘၣ်တၢ်တီခိၣ် ရိၣ်မဲအီၤလၢခီကီၢ်ကွဲၢ်ကဘီတီၤထီကၠိအံၤန့ၣ်လီၤႉ ကညီနံၣ်ထီၣ်သီတၢ်ရဲၣ်တၢ်ကျဲၤအံၤဘၣ်တၢ်စးထီၣ်အီၤဖဲဂီၤခီ ၆ နၣ်ရံၣ် လၢတၢ်အီၣ်ဘုသီခိၣ်ဖံဘုယီၤတၢ်ရဲၣ်တၢ်ကျဲၤ ဒီး တကတီၢ်ဃီ၀ဲန့ၣ်ကညီခိၣ်နၢ်ၦၤဘၣ်မူဘၣ်ဒါတဖၣ်ဟ့ၣ်ဂံၢ်ဟ့ၣ်ဘါစံးကတိၤလီၤ၀ဲတၢ်ဘၣ်ဃး ကညီနံၣ်ထီၣ်သီအဂ့ၢ်အကျိၤ တဂၤဘၣ်တဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်သိးတၢ်မၤကညီနံၣ်ထီၣ်မူးတၢ်ရဲၣ်တၢ်ကျဲၤဘျီ၀ဲအံၤကကဲထီၣ်လိၣ်ထီၣ်အဂီၢ်တၢ်ရဲၣ်ကျဲၤအီၤဒ်လဲၣ်အဂ့ၢ်န့ၣ် ကညီနံၣ်ထီၣ်သီကကဲထီၣ်လိၣ်ထီၣ်အဂီၢ် ၦၤတီခိၣ်ရိၣ်မဲတၢ်ၦၤဘၣ်မူဘၣ်ဒါလၢအမ့ၢ်စ့ၢ်ကီး(စံၣ်ဒံၣ်စံၣ်)ကၠိခိၣ် စီၤစွ့ၤန့ စံး၀ဲဒၣ်အံၤန့ၣ်လီၤႉ အ၀ဲစံး၀ဲလၢ“ပကမၤလၤကပီၤကညီနံၣ်ထီၣ်သီအံၤအဂီၢ်န့ၣ်အခိၣ်တိန့ၣ်ပတဲသကိးတၢ်၊ကတဲသကိးတၢ်လၢမ့ၢ်သ့ မ့ၢ်ဘၣ်န့ၣ်တၢ်လီၢ်တခါဂ့ၤတခါဂ့ၤန့ၣ်ပမ့မၤဖှိၣ်ခဲလၢာ်န့ၣ်အဂ့ၤႉအဃိန့ၣ်ပကွၢ်ကဒါက့ၤလၢမဲၢ်ပးဟီၣ်က၀ီၤန့ၣ် ပၦၤကညီဖိအိၣ်အါစ့ၢ်၊၀ံၤဒီးလၢတၢ်အိၣ်သးအဖီခိၣ်န့ၣ်ကွဲၢ်ကဘီကၠိအံၤမ့ၢ်၀ဲဒၣ်ကညီဒီကလုာ်အကၠိအဃိန့ၣ် ပဃုထၢမၤ၀ဲဒၣ်ကညီနံၣ်ထီၣ်သီတၢ်လီၢ်တၢ်ကျဲဖဲအံၤလီၤႉ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ တၢ်မၤလၤကပီၤကညီနံၣ်ထီၣ်သီဘျီ၀ဲအံၤအပူၤပထံၣ်ဘၣ်စ့ၢ်ကီးတၢ်ပာ်လီၤကွၢ်ကီ၀ဲကညီနံၣ်ထီၣ်သီအတၢ်စံၣ်စိၤ တဲစိၤဟဲကဲထီၣ်အဂ့ၢ်အကျိၤႇကညီခိၣ်နၢ်အတၢ်စံၣ်စိၤတဲစိၤအတၢ်ဂီၤသ့ၣ်တဖၣ်စ့ၢ်ကီးအိၣ်၀ဲန့ၣ်လီၤႉ အပူၤကွံာ်ခီဖျိတၢ်အိၣ်သးတဂ့ၤဘၣ်အဃိတမၤဘၣ်နံၣ်ထီၣ်သီဘၣ်ဒီးတနံၤအံၤထံၣ်ဘၣ်ၦၤဟဲထီၣ်မၤလၤကပီၤ ကညီနံၣ်ထီၣ်သီဒ်အံၤအဖီခိၣ်ဘၣ်သးမုာ်ဒိၣ်မးအဂ့ၢ်န့ၣ် ခီကီၢ် ကၠိဖိမုၣ် နါသ့ၤစၤယံၤ လၢအဟဲထီၣ်မၤလၤကပီၤ ကညီနံၣ်ထီၣ်သီအံၤ စံး၀ဲဒၣ်န့ၣ်လီၤႉ အ၀ဲစံး၀ဲလၢ“အပူၤကွံာ်န့ၣ်နံၣ်ထီၣ်သီတအိၣ်ဘၣ်ခီဖျိတၢ်အိၣ်သးတဂ့ၤဘၣ်အဃိမီၤနီၤႉခဲအံၤပထံၣ်ဘၣ်ၦၤကညီဖိဟဲဒီဒူၣ် ပထံၣ်လိာ်ဘၣ်ပသးကညီဖိကဒဲကဒဲဘၣ်ပသးမုာ်ဒိၣ်မးလီၤႉမ့၀ံၤပတတုၤဘၣ်လၢတၢ်လီၢ်ဒ်အံၤန့ၢ်ဖးယံၤလံမီၤနီၤႉ လၢနံၣ်ထီၣ်သီအံၤယအဲၣ်ဒိးဆၢဂ့ၤဆၢ၀ါဘၣ်ၦၤကညီဖိလၢပအိၣ်လၢယိၤကီၢ်မ့ၢ်ဂ့ၤႇဘီကီးမ့ၢ်ဂ့ၤႇ ကီၢ်ပယီၤမ့ၢ်ဂ့ၤ တဘၣ်လိၣ်ပဲာ်ဖးနီၤဖးအဒူၣ်အဆၢတအိၣ်နီမံၤဘၣ်ႉပမၤသကိးနံၣ်ထီၣ်သီတနံၤဃီအံၤပဘၣ်ပာ်ကဖၢလၢပသး” အဂ့ၢ်န့ၣ် စံး၀ဲန့ၣ်လီၤႉ တကးဒံးဘၣ်အမဲာ်ညါပတဘၣ်မဲာ်ဆှးလီၤပသးလၢပတၢ်ကူတၢ်သိးႇပတၢ်ကတိၤႇလၢပမ့ၢ်ၦၤကညီအံၤဘၣ်ဒီး မ့မ့ၢ်တခီပကဘၣ်ပာ်ဒိၣ်လီၤက့ၤပသးလၢပမ့ၢ်ၦၤကညီပအိၣ်ဒီးတၢ်ကူပကၤႇပတၢ်တိၤႇပတၢ်ဆဲးတၢ်လၤအဂ့ၢ်န့ၣ် နါသ့ၤစၤယံၤ စံးအါထီၣ်၀ဲဒၣ်န့ၣ်လီၤႉ ဒ်န့ၣ်အသိးကညီနံၣ်ထီၣ်သီအံၤအရ့ဒိၣ်၀ဲဒၣ်လၢကညီဖိအဂီၢ်ထဲလဲၣ်ဒီးဘၣ်မနုၤအဃိအရ့ဒိၣ်၀ဲလဲၣ်န့ၣ် ကွဲၢ်ကဘီကၠိခိၣ် သရၣ် စီၤကၠီၤချ့ဆှူစံး၀ဲဒ်အံၤန့ၣ်လီၤႉ “ကညီနံၣ်ထီၣ်သီအံၤပဘၣ်ဟံးဃာ်ပၢၤဃာ်အီၤကိးဂၤဒဲးလီၤႉဘၣ်မနုၤပဘၣ်ဟံးဃာ်ပၢၤဃာ်အီၤလဲၣ်န့ၣ် ဒ်သိးပတၢ်ဆဲးတၢ်လၤတလီၤဘၣ်အဂီၢ်န့ၣ်ပကဘၣ်ဟံးဃာ်ပၢၤဃာ်ထုးဖှိၣ်က့ၤအီၤမီၤနီၤႉဘၣ်မနုၤအဃိအရ့ဒိၣ်လဲၣ် န့ၣ်ပကညီတၢ်ဆဲးတၢ်လၤမ့လီၤမၢ်န့ၣ်ၦၤကကျၢၢ်ဘၢနၤညီကၣ်က့းလီၤႉအဃိထီၣ်က့ၤဖိလံၤတဆီဘၣ်တဆီန့ၣ်ဒ်သိး အ၀ဲသ့ၣ်ကသ့ၣ်ညါနၢ်ပၢၢ်၀ဲအဂီၢ်န့ၣ်ပဒုးနဲၣ်ဖျါထီၣ်က့ၤလၢပတၢ်ဆဲးတၢ်လၤလီၤ”အဂ့ၢ်န့ၣ် စံး၀ဲန့ၣ်လီၤႉ တနံၤအံၤမ့ၢ်၀ဲကညီမုၢ်နံၤဒိၣ်မုၢ်နံၤထီတနံၤလၢကညီဖိခဲလၢာ်အဂီၢ်ဒီးတကးဒံးဘၣ်အမဲာ်ညါမုၢ်နံၤအံၤ ဘၣ်တၢ်မၤလၤကပီၤစ့ၢ်ကီး၀ဲလၢကီၢ်ပူၤကီၢ်ချၢထံဆၢကီၢ်ဆၢဒဲက၀ီၤတၢ်လီၢ်အါတီၤအပူၤအဂ့ၢ်န့ၣ်...