၁၇ ၀ီတ၀ီ DKBAသုးခိၣ်သုးနၢ်တၢ်အိၣ်ဖှိၣ်အပူၤခိၣ်နၢ်ဒိၣ်ထီတနီၤတဟဲပၣ်ဃုာ်ပၣ်ဂီၢ်၀ဲဘၣ်
လါယနူၤအါရံၤ ၁၉ သီႇ ၂၀၂၄ နံၣ်ႇ ခ့ၣ်အဲးစံၣ် ဖဲတလါအံၤလါယနူၤအါရံၤ(၁၅)သီ၊တုၤလၢ(၁၇)သီအနံၤန့ၣ်ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ် DKBAမၤ၀ဲ(၁၇)၀ီတ၀ီသုးခိၣ်နၢ်တဖၣ်တၢ်အိၣ်ဖှိၣ်ဖဲသုး၀ဲၤလီၢ်ခိၣ်သ့ၣ်တၢ်လီၢ်အပူၤ၊သုးခိၣ်သုးနၢ်ဒိၣ်ထီတနီၤတဟဲထီၣ်ပၣ်ဃုာ်ပၣ်ဂီၢ်၀ဲတၢ်အိၣ်ဖှိၣ်ဘျီ၀ဲအံၤဘၣ်အဂ့ၢ်န့ၣ် DKBAၦၤဘၣ်မူဘၣ်ဒါတဖၣ် စံး၀ဲန့ၣ်လီၤႉ လၢသုးခိၣ်နၢ်တၢ်အိၣ်ဖှိၣ်ဘျီ၀ဲအံၤအပူၤသုးခိၣ်နၢ်ဒိၣ်ထီဒ်အမ့ၢ်သုးရိၢ်မဲခိၣ်ကျၢၢ်ခံသုးခိၣ်ကျၢၢ်စိ သုးခိၣ်စီၤတၢ်ခုႇ တီနီၢ်မုၢ်ထီၣ်ဟီၣ်က၀ီၤသုးက့(၁)အသုးက့ခိၣ် သုးခိၣ်ကျၢၢ်ဖိ စီၤစဲကၠီၤလၣ်ဒီး တီနီၢ်မုၢ်နုာ်သုးက့(၂) အဒုးယၤခိၣ် သုးခိၣ်ဒိၣ်စိ သုးခိၣ်စီၤအ့ၤ၀ါသ့ၣ်တဖၣ်တဟဲထီၣ်ပၣ်ဃုာ်ပၣ်ဂီၢ်၀ဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ခိၣ်နၢ်ဒိၣ်ထီလၢတဟဲတၢ်အိၣ်ဖှိၣ်သ့ၣ်တဖၣ်စံး၀ဲလၢတၢ်အိၣ်ဆူၣ်အိၣ်ချ့အဃိပၣ်ဃုာ်ပၣ်ဂီၢ်၀ဲတတုၤဘၣ်အဂ့ၢ်န့ၣ် ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ် DKBAသုးဂ့ၢ်၀ီခိၣ် သုးခိၣ်ကျၢၢ်ဖိ စီၤစ့ၤ၀့စံးဘၣ်ခ့ၣ်အဲးစံၣ်–ကညီတၢ်ကစီၣ် ဒ်အံၤန့ၣ်လီၤႉ “တၢ်အိၣ်ဖှိၣ်ပူၤခိၣ်နၢ်တဟဲထီၣ်ခဲလၢာ်ဘၣ်မီၤဒ်သိးလၢတီနီၢ်မုၢ်နုာ်တကပၤန့ၣ်ခီန့ၣ်သုးခိၣ်အ့ၤ၀ါႇသုးရိၣ်မဲခိၣ်ကျၢၢ်ခံဒီးဒုးယၤခိၣ်သ့ၣ်တဖၣ်န့ၣ်ခီဖျိအတၢ်အိၣ်ဆူၣ်အိၣ်ချ့တဂ့ၤဘၣ်အဃိန့ၣ်တဟဲထီၣ်ပၣ််ဃုာ်ဘၣ်မီၤနီၤႉကိးဘျီခီန့ၣ် ပမ့မၤတၢ်အိၣ်ဖှိၣ်န့ၣ်အါတက့ၢ်ပမၤထဲတသီလီၤႉတဘျီညါအံၤခီတံာ်တာ်သၢသီညါမီၤနီၤပတဲအိၣ်သကိးတၢ်ဘျဲးဘျဲးဘျီးဘျီးလီၤမီၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါဖဲတၢ်အိၣ်ဖှိၣ်သၢသီအတီၢ်ပူၤန့ၣ်ၦၤဟဲထီၣ်တၢ်အိၣ်ဖှိၣ်ဖိတဖၣ်ပာ်ဖျါထီၣ်သကိး၀ဲလီၢ်က၀ီၤပူၤ တၢ်ကီတၢ်ခဲတၢ်အိၣ်သးသ့ၣ်တဖၣ်ဒီးတၢၣ်ပီၣ်ကတိၤသကိး၀ဲတၢ်ဖျိဖျိဖျါဖျါဟ့ၣ်ဂံၢ်ဟ့ၣ်ဘါဟ့ၣ်ကူၣ်ဟ့ၣ်ဖးလိာ်သးကဒဲကဒဲအမဲာ်ညါကတိၤသကိး၀ဲတကီၢ်ခါခဲအံၤထံရူၢ်ကီၢ်သဲးတၢ်အိၣ်သးဒီးဒ်သိးဟီၣ်က၀ီၤပူၤကမျၢၢ်လီၢ်က၀ီၤဖိတဖၣ်ကအိၣ်ဘၣ်ဘံၣ်ဘံၣ်ဘၢဘၢအဂီၢ်ကဖီၣ်လိာ်စုမၤသကိးတၢ်ဒီးဖီၣ်စုက၀ဲၤကရူၢ်ကရၢကိးဖုဒဲးအဂ့ၢ်န့ၣ် သုးခိၣ်ကျၢၢ်ဖိ စီၤစ့ၤ၀့ စံးအါထီၣ်၀ဲန့ၣ်လီၤႉ လၢတၢ်အိၣ်ဖှိၣ်ဘျီ၀ဲအံၤန့ၣ်ခီဖျိလၢခိၣ်နၢ်ဒိၣ်ထီတပၣ်ဃုာ်ပၣ်ဂီၢ်ခဲလၢာ်ဘၣ်အဃိ လၢတၢ်ကက့ၤကွၢ်ကဒါက့ၤ ၂၀၂၃ နံၣ်တၢ်မၤအကျိၤအကျဲစ့ၢ်ကီးတကဲထီၣ်ဘၣ်အသိး လၢတၢ်ကပာ်လီၤ ၂၀၂၄ နံၣ် တၢ်မၤအကျိၤအကျဲအဂီၢ် တၢ်ဆၢတဲာ်သ့ၣ်တဖၣ်စ့ၢ်ကီးတၢ်မၤအီၤတကဲထီၣ်နီတမံၤဘၣ်အဂ့ၢ်န့ၣ် ဒံၣ်ခ့ၣ်ဘံၣ်အ့ၣ် ၦၤဘၣ်မူဘၣ်ဒါတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲတၢ်မၤ၀ဲသုးခိၣ်နၢ်တၢ်အိၣ်ဖှိၣ်အပူၤန့ၣ်သုးရိၣ်မဲခိၣ်ကျၢၢ် စီၤစတံႇ လီၢ်ခၢၣ်သးခီၣ်တဃာ်ဒုးယၤခိၣ် သုးခိၣ်စီၤဆါအီၤႇကျိၣ်ထူဘီလီၢ်ခၢၣ်သးသုးက့ခိၣ် သုးခိၣ် စီၤစွ့ၤ၀ၣ်ႇ...
ဘံလ့ကီၢ်ဆၣ်ပူၤပယီၤသုးခးလီၤကျိဖးဒိၣ်အဃိကမျၢၢ်ၦၤပိ၁်မုၣ်သံ(၃)ဂၤႇဘၣ်ဒိ(၁၀)ဂၤ
လါယနူၤအါရံၤ ၁၉ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ်အပူၤ ဖဲတနံၤအံၤလါယနူၤအါရံၤ ၁၉ သီ ဂီၤခီ ၁၀ နၣ်ရံၣ်ဘျဲၣ်အဆၢကတီၢ်န့ၣ် ခီဖျိပယီၤသုးလီၤကျိဖးဒိၣ်အဃိ တဲၣ်တူၤကိၦၤကမျၢၢ်ပိာ်မုၣ်သံ၀ဲဒၣ် (၃)ဂၤဒီးဘၣ်ဒိ၀ဲဒၣ်(၁၀)ဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤၦၤဘၣ်မူဘၣ်ဒါ အအိၣ်န့ၣ်လီၤႉ ဖဲတနံၤအံၤဂီၤခီ ၁၀ နၣ်ရံၣ်ဘျဲၣ်အဆၢကတီၢ်န့ၣ် သုးကီၣ်ကးအမျိာ်သုး(၃၁၄)လၢအိၣ်စံ၀့(ဇီး၀င်း)သ၀ီနုာ်လီၤ ကျဲမုၢ်ခိၣ်တဖၣ်အံၤ ခီဖျိအ၀ဲသ့ၣ်ခးလီၤကျိဖးဒိၣ်လီၤတဲာ်ပိၢ်ဖးထီၣ်၀ဲဒၣ်လၢစွ့ၤယီၤပၠၣ်ကရူၢ် တဲၣ်တူၤကိသ၀ီပူၤ (၂)ဖျၢၣ်အဃိ ကမျၢၢ်ၦၤပိာ်မုၣ်သံ၀ဲဒၣ်(၃)ဂၤဒီးဘၣ်ဒိဘၣ်ထံး(၁၀)ဂၤအကျါပၣ်ဃုာ်၀ဲဒၣ်ၦၤဖိသၣ်ခံနံၣ်တဂၤ အဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တနံၤညါအံၤကဘၣ်ဖဲ(၁၀)နၣ်ရံၣ်န့ၣ်ပယီၤသုးခးလီၤကျိဖဲတဲၣ်တူၤကိသ၀ီပူၤန့ၣ်ၦၤသံ၀ဲဒၣ်(၃)ဂၤႇ ဘၣ်ဒိအဂၤ(၁၀)”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲတနံၤအံၤလါယနူၤအါရံၤ ၁၉ သီအနံၤန့ၣ်လီၤႉ ကျိဖးဒိၣ်အဃိၦၤကမျၢၢ်ပိာ်မုၣ်လၢအသံ(၃)ဂၤအံၤန့ၣ်မ့ၢ်၀ဲနီၢ်မူ(၄၉)နံၣ်ႇနီၢ်မူအဖိမုၣ်နီၢ်စၤဒၤ(၂၂)နံၣ်ဒီး နီၢ်ကီၤလၤမုၣ် သ့ၣ်တဖၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ လၢခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ဘံလ့ကီၢ်ဆၣ်အပူၤ ခီဖျိပယီၤသုးခးလီၤကျိဖးဒိၣ်တလီၢ်လီၢ်အဃိ ၦၤကမျၢၢ်သံဘၣ်ဒိဘၣ်ထံးကဲထီၣ်အသးအိၣ်၀ဲဒၣ်ခဲအံၤခဲအံၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ ဒ်န့ၣ်အသိးဖဲအပူၤကွံာ်လါဒံၣ်စ့ဘၢၣ်အခါန့ၣ်ခီဖျိတၢ်ဒုးကဲထီၣ်ပယီၤသုးခးလီၤကျိဖးဒိၣ်ႇကဘီယူၤစ့ၢ်ကီး ဟဲခးလီၤတၢ်အဃိတၤပီသ၀ီႇတၤပီခံသ၀ီႇကါမဲသ၀ီဖိအဂၤ(၁၀၀၀)ဘျဲၣ်ဘၣ်ဃ့ၢ်ထီၣ်ဒီးတုၤလၢခဲအံၤအ၀ဲသ့ၣ် တက့ၤဘၣ်လၢအဟံၣ်အဃီဒံးဘၣ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံးတ့ၢ်ဃာ်ခ့ၣ်အဲးစံၣ်–ကညီတၢ်ကစီၣ်ဖဲအပူၤ ကွံာ် လါယနူၤအါရံၤ ၁၆ သီအနံၤန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤလီၢ်ခံလၢခ့ၣ်အဲၣ်ယူၣ်တၢ်ပၢဟီၣ်က၀ီၤတဖၣ်အပူၤတၢ်ဒုးကဲထီၣ်၀ဲလၢတၢ်ပၢၢ်ဆၢသုးပာ်ဖှိၣ်ဒီးပယီၤသုးအဘၢၣ်စၢၤအိၣ်၀ဲကိးမုၢ်နံၤဒဲးဃၣ်ဃၣ်ဒီးဒ်န့ၣ်အသိးခီဖျိပယီၤသုးအံၤခးလီၤကျိဖးဒိၣ်ႇကဘီယူၤဟဲခးလီၤတၢ်အဃိကီၢ်ရ့ၣ်(၇)ဘ့ၣ်(၂၀၂၃)တနံၣ်အတီၢ်ပူၤန့ၣ်ၦၤကမျၢၢ်သံ၀ဲဒၣ်(၁၉၅)ဂၤႇဘၣ်ဒိ၀ဲဒၣ်(၆၆၁)ဂၤအဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သး ထုးထီၣ်ပာ်ဖျါ တၢ်ကစီၣ်အသိးသ့ၣ်ညါဘၣ်န့ၣ်လီၤႉ
၂၀၂၃ဒီတနံၣ်အတီၢ်ပူၤ ကီၢ်သူလ့ၤတၢ်ပၢဟီၣ်က၀ီၤ တၢ်ဒုးကဲထီၣ်အဘျီ(၄၆၀၀)ဘျဲၣ်ႇပယီၤသုးသံ(၅၀၀၀)ဘျဲၣ်
လါယနူၤအါရံၤ ၁၉သီႇ ၂၀၂၄နံၣ်ႇ ခ့ၣ်အဲးစံၣ် ဖဲအပူၤကွံာ် ၂၀၂၃ ဒီတနံၣ်အတီၢ်ပူၤ လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်က၀ီၤပူၤ န့ၣ် တၢ်ဒုးဖးဒိၣ်တၢ်ဒုးဖိဒ်အမ့ၢ်ႇတၢ်ဒုးထီၣ်ဟံးန့ၢ်သုးကလၢၤႇတၢ်ဘၣ်သဂၢၢ်ခးလိာ်သးႇ တၢ်ဒုးစဲးပြဲးဒီးဒြိတၢ်ဒုးသ့ၣ်တဖၣ်န့ၣ် ကဲထီၣ်၀ဲခဲလၢာ်တစှၤန့ၣ် (၄၆၂၃) ဘျီဒီး ဖဲပယီၤသုးကီၣ်ကးတကပၤ သံ၀ဲ ၅၀၀၅ ဂၤႇဘၣ်ဒိ ၃၃၄၅ ဂၤအဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးတၢ်ကစီၣ်ပာ်ဖျါ၀ဲလါယနူၤအါရံၤ ၁၈သီအနံၤန့ၣ်လီၤႉ လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်တီခိၣ်ရိၣ်မဲတၢ်ပၢၢ်ဆၢသုးပာ်ဖှိၣ်တကပၤစ့ၢ်ကီး၂၀၂၃နံၣ်ဒီတနံၣ်တီၢ်ပူၤဘၣ်သံ၀ဲ(၁၅၄)ဂၤႇဘၣ်ဒိ(၅၉၇)ဂၤအဂ့ၢ်ႇ ခ့ၣ်အဲၣ်ယူၣ်လီၢ်ခၢၣ်သးတၢ်ကစီၣ်ပာ်ဖျါ၀ဲဒၣ်န့ၣ်လီၤႉ တၢ်ဒုးအကတီၢ် ပယီၤသုးကီၣ်ကးတကပၤ ပာ်၀ဲကမျၢၢ် ဒ်ဒုၣ်ဒါအသိး၀ံၤ ပညိၣ်ခးလီၤ၀ဲကျိဖးဒိၣ်ႇ ဟဲခးလီၤတၢ်ဒီးကဘီယူၤႇ ဃုာ်ဒီးတၢ်စုဆူၣ်ခီၣ်တကးလၢ အဂၤအကလုာ် ကလုာ်သ့ၣ်တဖၣ် မၤထီဒါအါထီၣ်၀ဲလၢကမျၢၢ်အဖီခိၣ်အဃိ စးထီၣ်၂၀၂၁နံၣ်တုၤ၂၀၂၃နံၣ် လၢသၢနံၣ်အတီၢ်ပူၤ ကမျၢၢ်ဘၣ်ဃ့ၢ်အိၣ်ကမှံၦၤနီၢ်ဂံၢ်အိၣ်၀ဲ(၇၅၀ႇ၀၀၀)ဘျဲၣ်အဂ့ၢ် ခ့ၣ်အဲၣ်ယူၣ်လီၢ်ခၢၣ်သးတၢ်ကစီၣ်စံး၀ဲဒၣ်န့ၣ်လီၤႉ ဖဲအပူၤကွံာ်၂၀၂၂နံၣ်ဒီတနံၣ်အတီၢ်ပူၤစ့ၢ်ကီးကီၢ်သူလ့ၤတၢ်ပၢဟီၣ်က၀ီၤတၢ်ဒုးကဲထီၣ်၀ဲလၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်သုးပာ်ဖှိၣ်ဒီးပယီၤသုးကီၣ်ကးအဘၢၣ်စၢၤအိၣ်၀ဲ (၄၀၀၀)ဘျဲၣ်ႇ ပယီၤသုးသံ(၄၀၀၀)ဘျဲၣ်ဒီး ဘၣ်ဒိ(၃၀၀၀)ဘျဲၣ်အိၣ်၀ဲဒၣ်ခ့ၣ်အဲၣ်ယူၣ်ပာ်ဖျါဃၣ်၀ဲန့ၣ်လီၤႉ ဒ်န့ၣ်အသိး ဖဲအပူၤကံွာ် ၂၀၂၁နံၣ်အတီၢ်ပူၤစ့ၢ်ကီးတၢ်ဒုးကဲထီၣ်၀ဲႇ(၃၀၀၀)ဘျဲၣ်ႇပယီၤသုးသံ(၂၀၀၀)ဘျဲၣ်ဒီးဘၣ်ဒိ၀ဲဒၣ်(၂၀၀၀)ဘျဲၣ်အိၣ်စ့ၢ်ကီး၀ဲအဂ့ၢ် ခ့ၣ်အဲၣ်ယူၣ် ပာ်ဖျါဃာ်၀ဲ့န့ၣ်လီၤႉ စးထီၣ်လၢ၂၀၂၁တုၤ၂၀၂၃နံၣ်အတီၢ်ပူၤ လၢခ့ၣ်အဲၣ်ယူၣ်ကီၢ်သူလ့ၤတၢ်ပၢဟီၣ်က၀ီၤ တၢ်ဒုးတၢ်ယာ်အကတီၢ် ပယီၤသုးသံ တစှၤန့ၣ်အဂၤ(၁၁၀၀၀)ဂၤဘၣ်အသိးႇဘၣ်ဒိတစှၤန့ၣ်အဂၤ(၈၈၀၀)ဂၤႇဘၣ်အဂ့ၢ်သ့ၣ်ညါဘၣ်န့ၣ်လီၤႉ
တၢ်ထၢဆူၣ် ဂၢၤကီၢ်(ပၠံၣ်သူၣ်စ့ၣ်)အဃိ ကၠီၣ်တခါကီၢ်ဆၣ်ပူၤ သးစၢ်သ့ၣ်တဖၣ်ဘၣ်ဃ့ၢ်ပဒ့ၣ်သး
လါယနူၤအါရံၤ ၁၉သီႇ ၂၀၂၄နံၣ်ႇ ခ့ၣ်အဲးစံၣ် ပကိကီၢ်ခီဒိၣ်ႇ ကၠီၣ်တခါကီၢ်ဆၣ်အပူၤ ပယီၤသုးကီၣ်ကး ဖီလာ်သ၀ီသးၦၢ်သ့ၣ် တဖၣ်မၢန့ၢ်ဆူၣ်၀ဲၦၤဖီၣ်တၢ်ဖးလၢတၢ်ကဘၣ်ကဲ ဂၢၤကီၢ် (ပၠံၣ်သူၣ်စ့ၣ်)အဃိ ၀့ၢ်ပူၤက၀ီၤဒ့ဒီးဒူသ၀ီပူၤၦၤသးစၢ်သ့ၣ်တဖၣ်ဘၣ်ဃ့ၢ်ပဒ့ၣ်သးအိၣ်၀ဲဒၣ်အဂ့ၢ်သ့ၣ်ညါဘၣ်လၢၦၤလီၢ်အက၀ီၤဖိအအိၣ်န့ၣ်လီၤႉ တကီၢ်ခါခဲအံၤ ၀့ၢ်ပူၤက၀ီၤဒ့တနီၤန့ၣ် တၢ်စးထီၣ်မၢ၀ဲၦၤဖီၣ်တၢ်ဖးလံအဃိ က၀ီၤဒ့လၢအဂၤၦၤ သး စၢ်သ့ၣ်တဖၣ်ဃ့ၢ်ပဒ့ၣ်သးလၢမုၢ်ထီၣ်ဒူသ၀ီသ့ၣ်တဖၣ်အိၣ်၀ဲအသိး က၀ီၤဒ့ႇ ဒူသ၀ီတနီၤၦၤသးစၢ်သ့ၣ်တဖၣ်အိၣ်ခိးကနၣ်ဒံး၀ဲတၢ်အိၣ်သးအဖၢမုၢ်အိၣ်ဒံး၀ဲဒၣ်အဂ့ၢ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံးဘၣ်၀ဲဒၣ် ခ့ၣ်အဲးစံၣ်-ကညီတၢ်ကစီၣ် ဒ်အံၤန့ၣ်လီၤႉ အ၀ဲစံး၀ဲလၢ“အကိးဖှိၣ်ၦၤကညီဒီးဒုးဘုးမဲႇမ့ၢ်ဘၣ်န့ၣ်ၦၤကဘၣ်လဲၤလီၤႉမ့ၢ်တလဲၤဘၣ်န့ၣ်ကဘၣ်ဟ့ၣ်တဂၤန့ၣ်တနွံ(၅၀၀၀၀၀)ႇဟ့ၣ်မ့ၢ်တန့ၢ်ဒီးမ့ၢ်တလဲၤဘၣ်န့ၣ်စံး၀ဲဒၣ်လၢကဒွဲၣ်အူကွံာ်သ၀ီခဲလၢာ်န့ၣ်လီၤႉအဃိန့ၣ်အခဲအံၤပယီၤကလုာ်သးစၢ်မ့ၢ်ဂ့ၤႇကညီသးစၢ်မ့ၢ်ဂ့ၤတနီၤန့ၣ်ဃ့ၢ်ပဒ့ၣ်သးလံႉ အဃိန့ၣ် ယဖိဒိၣ်နာ်က့တၢ်အိၣ်သးမ့ၢ်နးထီၣ်န့ၣ်ယကဆှၢအ၀ဲသ့ၣ်ဆူတၢ်ပူၤဖျဲးလီၢ်စ့ၢ်ကီးလီၤႉသ၀ီတနီၤနီၤတဲအ၀ဲသ့ၣ်လၢမ့ၢ်ဘၣ်လဲၤကဲ(ပၠံၣ်သူၣ်စ့ၣ်)န့ၣ် ကလဲၤကဲ၀ဲဒီသ၀ီလီၤႉ ဒ်န့ၣ်ခီဒု တတူၢ်လိာ်၀ဲစ့ၢ်ကီးဘၣ်ႉအပျံၤ၀ဲဒၣ်လၢၦၤကလဲၤပာ်လီၤတၢ်စုက၀ဲၤလၢတၢ်ပၢၢ်ဆၢသုးပာ်ဖှိၣ်အအိၣ်ဒီသ၀ီအဃိန့ၣ်လီၤႉ”အဂ့ၢ် စံး၀ဲန့ၣ်လီၤႉ လၢန့ၣ်အမဲာ်ညါ ကမျၢၢ်သ့ၣ်တဖၣ် စံးကတိၤလိာ်သးလၢဖီၣ် တၢ်ဖးဘၣ်ႇ ဟ့ၣ်ကျိၣ်စ့မ့ၢ်တန့ၢ်ႇမ့ၢ်ဘၣ်လဲၤကဲ၀ဲ(ပၠံၣ်သူၣ်စ့ၣ်)ဒီး ထီၣ်တၢ်မၤလိမ့ၢ်၀ံၤႇတၢ်မ့ၢ်ဆှၢအ၀ဲသ့ၣ်လၢတၢ်မဲာ်ညါႇတၢ်ဒုးမ့ၢ်ကဲထီၣ်သၢပျၢၤန့ၣ်အ၀ဲသ့ၣ်ကယူာ်ထီၣ်၀ဲသကိး၀ဲနီၣ်တယၢ်၀ါအဂ့ၢ်လီၢ်က၀ီၤဖိ၀ဲန့ၣ်တဲအါထီၣ်၀ဲဒၣ်စ့ၢ်ကီးန့ၣ်လီၤႉ တကီၢ်ခါတၢ်ထၢ၀ဲဒၣ်ဂၢၤကီၢ်(ပၠံၣ်သူၣ်စ့ၣ်)အံၤန့ၣ်စးထီၣ်လၢသးနံၣ် (၁၈)နံၣ်တုၤအနံၣ်(၆၀)ႇတဘၣ်မ့ၢ်၀ဲ ၀ဲၤကျိၤၦၤမၤတၢ်ဖိဒီးကၠိဖိသ့ၣ်တဖၣ်အဂ့ၢ်သ့ၣ်ညါဘၣ်န့ၣ်လီၤႉ က၀ီၤဒ့တဘ့ၣ်န့ၣ် ၦၤနီၣ်ဂံၢ်ကဘၣ်အိၣ်တုၤအဂၤ(၄၀)ဒီးကဘၣ်မ့ၢ်၀ဲၦၤလၢအိၣ်ဆူၣ်အိၣ်ချ့ႇဒီးတၢ်ကဒုးထီၣ်အ၀ဲသ့ၣ်သုးတၢ်မၤလိ၀ံၤတၢ်ဟ့ၣ်လီၤအ၀ဲသ့ၣ်တၢ်စုက၀ဲၤသ့ၣ်တဖၣ်အဂ့ၢ်သ့ၣ်ညါဘၣ်ဒ်သုးကီၣ်ကးဖီလာ်က၀ီၤဒ့ခိၣ်သ့ၣ်တဖၣ်အလံာ်ဘိးဘၣ်ရၤလီၤအပူၤအိၣ်၀ဲအသိးန့ၣ်လီၤႉ သုးကီၣ်ကးဖီလာ်သ၀ီသးၦၢ်လီၤကရၢကရိ၀ဲဂၢၤကီၢ် (ပၠံၣ်သူၣ်စ့ၣ်)ဒ်အံၤန့ၣ် တမ့ၢ်ထဲကၠီၣ်တခါကီၢ်ဆၣ်တဘ့ၣ်ဘၣ်ႇ မ့မ့ၢ်တခီ ချၢၣ်လွံၢ်ထူၣ်ႇတီအူႇ ဆီထံးဒီးပီထဲၤကီၢ်ဆၣ်သ့ၣ်တဖၣ်စ့ၢ်ကီးတၢ်ထၢန့ၢ်ဆူၣ်(ပၠံၣ်သူၣ်စ့ၣ်)ဒ်အံၤအိၣ်၀ဲဒၣ်န့ၣ်လီၤႉ ဒ်န့ၣ်အသိး လၢကညီကီၢ်စဲၣ် ရၤမတံ၀့ၢ်ကလံၤစိးတကပၤ သုးခိးကီၢ်ဆၢ(္ဘွၠ)တၢ်ပၢဖီလာ် (စွ့ၣ်ကိၣ်ကိၣ်)ဟီၣ်က၀ီၤစ့ၢ်ကီး တၢ်ထၢ၀ဲဒၣ်ဂၢၤကီၢ် (ပၠံၣ်သူၣ်စ့ၣ်)ဒီးတၢ်ထၢကျိၣ်ထၢစ့အိၣ်၀ဲဒၣ်စ့ၢ်ကီးအဂ့ၢ် သ့ၣ်ညါဘၣ်လၢၦၤလီၢ်က၀ီၤဖိအအိၣ်န့ၣ်လီၤႉ
ကီၢ်ကၠီၣ်တဲၣ်–ကီၢ်ပယီၤကီၢ်ဆၢ မၠၣ်၀တံၣ်ကလံၤထံးဟီၣ်က၀ီၤပူၤ ဘ့ခ့အၦ့ၤလီၤ
လါယနူၤအါရံၤ ၁၉ သီႇ ၂၀၂၄ နံၣ်ႇ ခ့ၣ်အဲးစံၣ် လၢကီၢ်ကၠီၣ်တဲၣ်–ကီၢ်ပယီၤကီၢ်ဆၢ မၠၣ်၀တံၣ်ကလံၤထံးဒီတကျိၤန့ၣ် ၦၤဖံးအီၣ်မၤအီၣ်ဘုခ့ဟီၣ်ခိၣ်လီၢ်အအ့ကၢၣ် ကအိၣ်လၢအကလီၢ်ညါဒီး တနံၣ်အံၤၦၤဘိးဘုခ့အကတီၢ်ဘုခ့အၦ့ၤလီၤဒိၣ်န့ၢ်ဒံးလၢမဟိတနံၣ်အဂ့ၢ်န့ၣ် သ့ၣ်ညါဘၣ်လၢၦၤမၤအီၣ်ဘုခ့ဖိတဖၣ်အအိၣ်န့ၣ်လီၤႉ ဖဲမဟိလၢယိၤကီၢ်တကပၤန့ၣ်ဘုခ့အချံ(၁၅)ကံလိတပိန့ၣ်အၦ့ၤအိၣ်၀ဲ(၁၈၀)ဘးဘျဲၣ်ႇ မ့မ့ၢ်လၢကီၢ်ပယီၤ တကပၤန့ၣ်အၦ့ၤအိၣ်ဒၣ်ထဲ(၁၃၀)ဘးလီၤဒီးဘၣ်ဆၣ်တနံၣ်အံၤလၢယိၤကီၢ်တကပၤန့ၣ်အၦ့ၤအိၣ်၀ဲ(၁၄၀)ဘျဲၣ်ႇ လၢကီၢ်ပယီၤတကပၤန့ၣ်အၦ့ၤအိၣ်ဒၣ်ထဲ(၁၀၆)ဘးလီၤအဂ့ၢ်န့ၣ် တနီၤထၣ်သ၀ီပူၤ ၦၤမၤအီၣ်ဘုခ့ဖိတဂၤ စံး၀ဲဒ်အံၤ န့ၣ်လီၤႉ အ၀ဲစံး၀ဲလၢ“ခဲအံၤလၢယိၤကီၢ်တကပၤန့ၣ်ဘုခ့အၦ့ၤအိၣ်(၁၃၀)ဘျဲၣ်ညါႉလၢပအိၣ်တကပၤခီန့ၣ်သ့ၣ်ခိၣ်ဖၠးဃုာ်ဒီး တၢ်ခိတၢ်သွဲၦ့ၤအဃိဘုခ့အၦ့ၤအိၣ်တ့ၢ်က့ၤထဲ(၁၀၆)ဘးလီၤႉဖဲမဟိလၢယိၤကီၢ်တကပၤန့ၣ်ဘုခ့ၦ့ၤအိၣ်(၁၈၀)ဘးႇဘၣ်ဆၣ်လၢပအိၣ်အံၤအၦ့ၤအိၣ်ထဲ(၁၄၀)လီၤႉဘုခ့အၦ့ၤလီၤဘၣ်ဆၣ်မ့မ့ၢ်ဖီၣ်စုက၀ဲၤကရူၢ်ထၢတၢ်ခိတၢ်သွဲဒုအိၣ် ဒ်လၢညါအသိးလီၤထၢ၀ဲဒၣ်(၁၅)ကံလိတပိန့ၣ် ၃၀ ဘးမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီိတၢ်ကစီၣ်န့ၣ်လီၤႉ ဒူသ၀ီလၢအိၣ်ကီၢ်ဆၢတၢ်လီၢ်သ့ၣ်တဖၣ်န့ၣ်လၢကသူၣ်ဖျးဘုခ့အဂီၢ်ယိၤသ့ၣ်ခိၣ်တဖၣ်ထုးထီၣ်န့ၢ်စိ၀ဲဒၣ် ဘုခ့အစ့မိၢ်ၦၢ်၀ံၤအ၀ဲသ့ၣ်သူၣ်လီၤ၀ဲဘုခ့ဒီးဖဲတၢ်က့ၤဘိးကဒါဘုခ့အခါန့ၣ်ၦၤမၤအီၣ်ဘုခ့သ့ၣ်တဖၣ်အံၤ ဘၣ်က့ၤဆါန့ၢ်ကဒါ၀ဲယိၤသ့ၣ်ခိၣ်ဒီးဒ်ယိၤသ့ၣ်ခိၣ်ဟ့ၣ်၀ဲအၦ့ၤအသိးဘၣ်ဟံ၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဘုခ့အၦ့ၤလီၤ၀ဲဘၣ်ဆၣ်မ့မ့ၢ်လၢဖီၣ်စုက၀ဲၤကရူၢ်ကရၢလၢအိၣ်ဟီၣ်က၀ီၤပူၤတဖၣ်အိၣ်ခိးထၢ၀ဲဒၣ်တၢ်ခိတၢ်သွဲအၦ့ၤ ဒ်မဟိအသိးလီၤအဖီခိၣ်ယိၤသ့ၣ်ခိၣ်တဖၣ်အံၤက့ၤဒွးဖှိၣ်ကဒါ၀ဲကျဲတၢ်ခိတၢ်သွဲအဘူးအလဲဒီး၀ံစိာ်တီဆၢအတရံး တဖၣ်အံၤအဃိဘၣ်ပာ်ပနီၣ်၀ဲဒၣ်ဘုခ့အၦ့ၤဒ်အံၤန့ၣ်လီၤႉ ခီဖျိဘုခ့အၦ့ၤလီၤဒ်အံၤအဃိလီၢ်က၀ီၤၦၤကမျၢၢ်လၢအမၤအီၣ်ဘုခ့တဖၣ်တၢ်ကီတၢ်ခဲတအိၣ်ဘၣ်ဘၣ်ဆၣ် မ့မ့ၢ်ၦၤကမျၢၢ်လၢအဘုခ့ဟးထီၣ်တဂ့ၤဘၣ်တဖၣ်ညါခီန့ၣ်ဘၣ်ဒိဆါဆှူ၀ဲဒၣ်အိၣ်အဂ့ၢ်န့ၣ် ၦၤမၤအီၣ်ဘုခ့ဖိတဂၤဃီ၀ဲန့ၣ် စံးအါထီၣ်၀ဲဒၣ်န့ၣ်လီၤႉ လ့ဂီၤလီၢ်က၀ီၤကမျၢၢ်လၢအမၤအီၣ်ဘုခ့တဂၤစ့ၢ်ကီးစံး၀ဲလၢ“ခဲအံၤခီဖျိဟီၣ်က၀ီၤတၢ်အိၣ်သးတဂၢၢ်တကျၢၤ ဘၣ်အဃိ ၦၤမၤအီၣ်ဘုခ့ဖိတဖၣ်န့ၣ်ဘၣ်ဆါတၢၤကွံာ်အ၀ဲသ့ၣ်ဘုခ့ဒ်အၦ့ၤန့ၢ်အသိးလီၤႉလၢယိၤကီၢ်တကပၤအံၤစ့ၢ်ကီး ၦ့ၤအ၀ဲသ့ၣ်ဘုခ့အၦ့ၤဘၣ်ဘၣ်လီၤႉအပူၤကွံာ်လါလၢညါန့ၣ်ဘုခ့တပိန့ၣ်အၦ့ၤအိၣ်ထဲ(၈၀)ဘးလီၤႉ ခဲအံၤဘၣ်လၢဘုခ့ ဘူးကလၢာ်မးအၦ့ၤဟဲထီၣ်ကဒါတစဲးႉဖဲအံၤဘုခ့တပိန့ၣ်အၦ့ၤအိၣ်(၁၀၇)ဘး”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ အပူၤကွံာ်လၢညါန့ၣ်ၦၤၦ့ၤဘုခ့ဖိလၢအိၣ်ကီၢ်ပူၤသ့ၣ်တဖၣ်ဟဲထီၣ်ဆါအ၀ဲသ့ၣ်ဘုခ့ချ့တုၤလၢကီၢ်ကၠီၣ်တဲၣ်–ကီၢ်ပယီၤကီၢ်ဆၢညါဒီးဘၣ်ဆၣ်တကီၢ်ခါခဲအံၤခီဖျိကီးတရံး–မၠၣ်၀တံၣ်အ့ရှါကျဲပံးအဃိ ဘုခ့လၢတၢ်သူၣ်ဖျးအီၤလၢ ကီၢ်ပူၤတဖၣ်ဟဲထီၣ်တအိၣ်ဒံးဘၣ်အဂ့ၢ်န့ၣ် သ့ၣ်ညါဘၣ်လၢကီၢ်ဆၢလီၢ်က၀ီၤဖိတဖၣ် အအိၣ်န့ၣ်လီၤႉ ဒူသ၀ီၦၤကမျၢၢ်လၢအိၣ်ထံဆၢကီၢ်ဆၢတၢ်လီၢ်ဖဲန့ၣ်ဒီတကျိၤန့ၣ်အါဒၣ်တက့ၢ်မၤအီၣ်၀ဲဒၣ်ခုးတကးဒံးဘၣ် တနီၤန့ၣ် ဟံလိၢ်စ့လၢယိၤသ့ၣ်ခိၣ်အအိၣ်၀ံၤသူၣ်အီၣ်၀ဲဒၣ်ဘုခ့စ့ၢ်ကီးအိၣ်၀ဲဒၣ်န့ၣ်လီၤႉ မ့မ့ၢ်ဘုခ့လၢတၢ်စးထီၣ်သူၣ်အီၤ ဖဲလါယူၤလၢတၢ်ဆၢကတီၢ်တံာ်တာ်(၆)လါအံၤသ့ၣ်တဖၣ်ခီန့ၣ်တၢ်က့ၤဘိးကဒါအီၤဖဲမဟါတလါဒီးဖဲန့ၣ်၀ံၤလီၢ်ခံတၢ်မၤလီၤဆှူကွံာ်အချံဖဲတလါအံၤ၀ံၤတၢ်ဆှၢထီၣ်ဆါအီၤဆူကီၢ်ကၠီၣ်တဲၣ်ပူၤန့ၣ်လီၤႉ
ပယီၤသုးခးလီၤကျိးဖးဒိၣ်အဃိ ကၠဲးထိၣ်ကီၢ်ဆၣ်ပူၤသးစၢ်ပိာ်ခွါဘၣ်ဒိ ၂ ဂၤ
လါယနူၤအါရံၤ ၁၈ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ် ကၠဲးထိၣ်ကီၢ်ဆၣ်အပူၤ ဖဲလါယနူၤအါရံၤ ၁၆ သီ ဟါခီအဆၢကတီၢ်န့ၣ် ခီဖျိပယီၤသုးခးလီၤကျိဖးဒိၣ်သၢဖျၢၣ်လီၤတဲာ်ပိၢ်ဖးထီၣ်လၢခယွဲကရူၢ် သိခွၣ်သ၀ီပူၤအဃိ သးစၢ်ပိာ်ခွါဘၣ်ဒိ၀ဲဒၣ်(၂)ဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤၦၤဘၣ်မူဘၣ်ဒါအအိၣ်န့ၣ်လီၤႉ ဖဲဟါခီ ၆ နၣ်ရံၣ်ဘျဲၣ်အဆၢကတီၢ် ခီဖျိအမျိာ်သုးရ့ၣ်(၃၁၀)ခးလီၤကျိဖးဒိၣ်သၢဖျၢၣ်လီၤတဲာ်ပိၢ်ဖးထီၣ်၀ဲလၢ သိခွးသ၀ီ တိၤခိၣ်ထိးတဖျၢၣ်ဒီးထံပူၤကပၤတဖျၢၣ်အဃိ ဘၣ်ဒိ၀ဲဒၣ်သးစၢ်စီၣ်စီၣ်အီၣ်(၁၇)နံၣ်ဒီးလၣ်မၠိထွ့(၁၉)နံၣ် ခံဂၤအံၤ အဂ့ၢ်န့ၣ် ကၠဲးထိၣ်ကီၢ်ဆၣ်တၢ်ကစီၣ်၀ဲၤဒ့ခိၣ် စီၤ၀နၣ်အီၤစံး၀ဲဒ်အံၤန့ၣ်လီၤ “ဖဲ(၁၆)သီဟါခီကဘၣ်ဖဲ ၆ နၣ်ရံၣ်ဘျဲၣ်န့ၣ် ပယီၤသုးန့ၣ်အိၣ်ခးစိ၀ဲဖဲ(အမတ–၃၁၀)န့ၣ်ႉ အခးလီၤကျိဖးဒိၣ် သၢဖျၢၣ်ႇ ၦၤသ၀ီဖိတဲ၀ဲန့ၣ်အပိၢ်ဖးထီၣ်ခံဖျၢၣ်လီၤႉအလီၤတဲာ်လၢသိခွၣ်သ၀ီတိၤခိၣ်ထိးတဖျၢၣ်ႇမ့၀ံၤအလီၤတဲာ်လၢ ၦၤဟံၣ်ကရၢၢ်ပူၤ ထံပူၤဃၢၤထံးန့ၣ်တဖျၢၣ်ႉကျိဖးဒိၣ်လီၤတဲာ်ဘျီဘၣ်ဒိ၀ဲၦၤဖိသၣ်ခံဂၤန့ၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲတနံၤအံၤလါယနူၤအါရံၤ ၁၈ သီအနံၤန့ၣ်လီၤႉ ၦၤသးစၢ်လၢအဘၣ်ဒိဘၣ်ထံးခံဂၤအံၤမ့မ့ၢ်လၢစီၣ်စီၣ်အီၣ်ခီန့ၣ်မ့ၢ်၀ဲဒၣ်အတီၤတဆံကၠိဖိဘၣ်၀ဲဒၣ်အခီၣ်ကံၣ်ဒုၣ်ဒီး လၢလၣ်မၠိထွ့အံၤခီန့ၣ်မ့ၢ်၀ဲဒၣ်ရီဘၢၣ်ကျီးၦၤမၤတၢ်ဖိဘၣ်၀ဲဒၣ်အချၢဃံတၢ်ဘၣ်ယိၣ်အိၣ်၀ဲဒၣ်အဂ့ၢ်န့ၣ် လီၢ်က၀ီၤ ၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ သိခွးသ၀ီအံၤအိၣ်ဘူး၀ဲဒၣ်ဒီးအမျိာ်သုးရ့ၣ်(၃၁၀)ဒီးခီၣ်ချ့သုးရ့ၣ်(ခမရ–၂၀၇)သုးရ့ၣ်အံၤဘူးဘူးဖိလီၤဒီး ဒ်န့ၣ်အသိးအပူၤကွံာ်လၢညါစ့ၢ်ကီးပယီၤသုးတဖၣ်အံၤခးလီၤကျိဖးဒိၣ်လၢသ၀ီပူၤအိၣ်၀ဲတလီၢ်လီၢ်လီၤအဂ့ၢ်န့ၣ် ကၠဲးထိၣ်တၢ်ကစီၣ်၀ဲၤဒ့ခိၣ် စံးအါထီၣ်၀ဲဒၣ်န့ၣ်လီၤႉ ဒ်န့ၣ်အသိးဖဲအပူၤကွံာ်(၂၀၂၃)နံၣ်စးထီၣ်အခါန့ၣ်စ့ၢ်ကီးခီဖျိပယီၤသုး(ခမရ–၂၀၇)ခးလီၤကျိဖးဒိၣ်အဃိ ၦၤကမျၢၢ်ဘၣ်ဒိဘၣ်ထံးဒံး၀ဲဒၣ်(၁၀)ဂၤဒီးဖဲန့ၣ်အကျါသံကွံာ်၀ဲဒၣ်တဂၤကဲထီၣ်တ့ၢ်အသးဒံးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤၦၤဘၣ်မူဘၣ်ဒါအအိၣ်န့ၣ်လီၤႉ
အူးပၠၣ်ဒဲက၀ီၤကၠိဖိသဂၢၢ်ဘၣ်ဒီးလံာ်မိၢ်ၦၢ်ဒီးတၢ်ဆီၣ်ထွဲမၤစၢၤတၢ်ကီတၢ်ခဲ
လါယနူၤအါရံၤ ၁၇ သီႇ ၂၀၂၄ နံၣ်ႇ ခ့ၣ်အဲးစံၣ် ကီၢ်ကၠီၣ်တဲၣ်-ကီၢ်ပယီၤကီၢ်ဆၢ တးခ်ကီၢ်ရ့ၣ်ႇ ဖိၣ်ဖရၣ်ကီၢ်ဆၣ်ႇ အူးပၠၣ်ကညီဘၣ်ကီဘၣ်ခဲ ဒဲက၀ီၤပူၤ တီၤထီကၠိသ့ၣ်တဖၣ် ကိးမုၢ်နံၣ်ဒဲးဃၣ်ဃၣ် သဂၢၢ်ဘၣ်ဒီးလံာ်မိၢ်ၦၢ် တကူတလၢဒီးတၢ်ဆီၣ်ထွဲမၤစၢၤတၢ်ကီတၢ်ခဲအဂ့ၢ်သ့ၣ်ညါဘၣ်လၢဒဲက၀ီၤကူၣ်သ့ၦၤဘၣ်မူဘၣ်ဒါအအိၣ်န့ၣ်လီၤႉ ခီဖျိလၢတၢ်ဆီၣ်ထွဲမၤစၢၤသ့ၣ်တဖၣ်အံၤလီၤဆံးလီၤစှၤလီၤ၀ဲအဃိလၢတၢ်ကထုးထီၣ်န့ၢ်၀ဲၦၤကၠိဖိသ့ၣ်တဖၣ်လံာ်မိၢ်ၦၢ်အဂီၢ်ကဲထီၣ်၀ဲဒၣ်တၢ်ကီတၢ်ခဲအဂ့ၢ်န့ၣ် အူးပၠၣ်ဒဲက၀ီၤ ကူၣ်သ့မူဒါခိၣ်သရၣ်မုၣ် နီၢ်ဖီမးဆှၣ်စံး၀ဲဒ်အံၤန့ၣ်လီၤႉ “ပဒဲက၀ီၤအူးပၠၣ် လၢကူၣ်သ့တကပၤခီန့ၣ် မ့မ့ၢ်လၢလံာ်မိၢ်ၦၢ်န့ၣ်ပထံၣ်ဘၣ်လၢကိးနံၣ်ဒဲးဃၣ်ဃၣ်န့ၣ်မီၤနီၤ တမ့ၢ်တၢ်လၢအလၢဘၣ်ႉ ပၦၤကၠိဖိသ့ၣ်တဖၣ်န့ၣ်ဘၣ်က့ၤသူ၀ဲတၢ်အလီၢ်လံၤလီၤမီၤနီၤႉ ဒီးတၢ်ကထုးထီၣ်အီၤလၢအသီန့ၣ်အိၣ်စှၤလီၤဒီးအိၣ်အါလၢတီၤဖုၣ်သ့ၣ်တဖၣ်လီၤႉ မ့မ့ၢ်လၢတီၤထီသ့ၣ်တဖၣ်န့ၣ်တၢ်ဂုာ်ကျဲးစၢၤထုးထီၣ်န့ၢ်ၦၤနာ်က့န့ၣ် ပသ့ၣ်ညါလၢတၢ်လီၤတူာ်လီၤကၤအိၣ်လၢ ကျဲအဘိဘိအဃိသးန့ၣ် တလၢၦဲၤဘၣ်မီၤနီၤႉ ” အဂ့ၢ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါ ဒဲက၀ီၤပူၤကၠိတနီၤနီၤန့ၣ် ဘၣ်ဒိးသန့ၤထီၣ်အသးလၢကၠိကမံးတံာ်ဒီး ကၠိကမံးတံာ်တနီၤန့ၣ်ဆၢထၢၣ်၀ဲတန့ၢ်လၢၤဘၣ်ခီဖျိလၢပၦၤကၠိဖိမိၢ်ပၢ်သ့ၣ် တဖၣ်အတၢ်သးဆူၣ်သး စဲတဒံးသိးဒီးတတုၤသိးဘၣ်အဃိန့ၣ်ကၠိတနီၤနီၤန့ၣ်ပာ်ပတုာ်ကွံာ်သးအိၣ်၀ဲအဂ့ၢ် ကူၣ်သ့မူဒါခိၣ်စံး၀ဲအါထီၣ်၀ဲန့ၣ်လီၤႉ ခီဖိလျၢၦၤဟ့ၣ်ဆီၣ်ထွဲမၤစၢၤတၢ်သ့ၣ်တဖၣ်လၢဒဲက၀ီၤအပူၤအံၤဆံးလီၤစှၤလီၤ၀ဲအဃိ ကၠိဖိလၢအအိၣ်မၤလိတၢ်ဖဲ ဒဲက၀ီၤအပူၤအံၤန့ၣ် ဘၣ်ကွၢ်ဆၢမဲာ်ဘၣ်၀ဲ တၢ်ကီတၢ်ခဲလၢလံာ်လဲၢ်တကပၤအိၣ်၀ဲအသိး လၢကျိၣ်စ့တၢ်ဂ့ၢ်ကီတကပၤစ့ၢ်ကီးအိၣ်၀ဲအဂ့ၢ်(အူးပၠၣ်)ဒဲက၀ီၤကၠိဖိ(စီၤအဲၣ်လၢာ်သး)စံး၀ဲန့ၣ်လီၤႉ အ၀ဲစံး၀ဲလၢ“ ဒ်ပကဲၦၤကၠိဖိဒု ကျိၣ်စ့လၢကဟဲနုာ်လီၤလၢပဂီၢ်ဒုတအိၣ်၀ဲဒၣ်စ့ၢ်ကီးဘၣ်ႉ ပကစၢ်ပကဘၣ်ဃုကျဲလၢမိၢ်ပၢ်အိၣ်မ့တမ့ၢ်တၢ်ဖံးတၢ်မၤမ့ၢ်အိၣ်န့ၣ်လဲၤဃုဖံးဃုမၤ၀ဲလီၤႉ ဒီးတၢ်ကီတၢ်ခဲအဂၤတခါခီဒု ခီဖျိလၢတၢ်မၤစၢၤလၢကၠိတအိၣ်လၢဘၣ်အဃိန့ၣ်လံာ်လဲၢ်စ့ၢ်ကီးတကူဘၣ်ႉ တနီၤနီၤန့ၣ် ပကဘၣ်ကွၢ်၀ဲဒၣ် ခံဂၤတဘ့ၣ် သၢဂၤတဘ့ၣ်အိၣ်စ့ၢ်ကီး၀ဲဒၣ်”အဂ့ၢ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါကၠိဖိမုၣ်ခွါသ့ၣ်တဖၣ်လၢအမၤလိဘၣ်ဃးဒီးဆူၣ်ချ့ပီညါ(Public Health)သ့ၣ်တဖၣ်အဂီၢ် တၢ်ပီးတၢ်လီလၢကမၤလိတၢ်အဂီၢ်တအိၣ်လၢလၢၦဲၤၦဲၤဘၣ်အသိးဖဲအ၀ဲသ့ၣ်ဘၣ်လီၤမၤလိတၢ်လၢပျီပူၤအဆၢကတီၢ်တၢ်လၢာ်ဘူၣ်လၢာ်စ့သ့ၣ်တဖၣ်စ့ၢ်ကီးဘၣ်ထဲးဂံၢ်ထဲးဘါ၀ဲလၢအနီၢ်ကစၢ်ဒၣ်၀ဲန့ၣ်လီၤႉ လၢတၢ်အိၣ်သးဒ်အံၤအဖီခိၣ်ကဲထီၣ်၀ဲတၢ်တၤတၢ်ဖးဒိၣ်တခါအသိးလၢကဆဲးမၤလိတၢ်ဆူညါပတီၢ်ထီကူၣ်သ့ပီညါတၢ်မၤလိအဂီၢ်ကဲထီၣ်၀ဲတၢ်ကီတၢ်ခဲအဂ့ၢ်အူးပၠၣ်ဒဲက၀ီၤကၠိဖိ(နီၢ်တၢ်မျၢ်နံၤလၤ)လၢအမၤလိတၢ်ဖဲကီၢ်လါပတီၢ်ထီပီညါဖၠၣ်စိမိၤကၠိပူၤတဂၤစံး၀ဲဒ်အံၤန့ၣ်လီၤႉ “မ့မ့ၢ်ခဲခဲအံၤဟီဒုတၢ်ဆီၣ်ထွဲမၤစၢၤတအိၣ်လၢဘၣ်ႉ ပမ့ၢ်ဟးလီၤ(Survey)သ့ၣ်မ့ၢ်ဂ့ၤ ပကမၤတၢ်ဟူးတၢ်ဂဲၤတခါခါဘၣ်ဃးဒီးလၢ(Medical Term)ပလီၤ(Intern)မ့ၢ်ဂ့ၢ်န့ၣ် ပကဘၣ်ထုးထီၣ်လၢ ပကစၢ်ဒၣ်၀ဲလီၤႉ...
ကၠးအ့စ့ၣ်ကၠံဒီးကၠဲးမယီကီၢ်ဆၣ်ခံဘ့ၣ်အပူၤသုးကီၣ်ကးအသုးကလၢၤတဖၣ်တၢ်ထီၣ်သုတန့ၢ်တဂ့ၤအဂီၢ်သုးကီၣ်ကး ဘှီဂ့ၤထီၣ်တၢ်လီၢ်
လါယနူၤအါရံၤ ၁၇ သီႇ ၂၀၂၄နံၣ်ႇ ခ့ၣ်အဲးစံၣ် ကၠၤအ့စ့ၣ်ကၠံ ကၠဲးမယီ–ခၠီနခွးမူၣ်ဒိၣ်ကျဲမုၢ်ဒီတဘိအပူၤ သုးကီၣ်ကးအသုးကလၢၤတဖၣ်အံၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သိၣ်မှံၤသုးပာ်ဖှိၣ်ဒီးကမျၢၢ်တၢ်ဒီသဒၢသုးကရူၢ်သ့ၣ်တဖၣ် ထီၣ်ဒုးသုတန့ၢ်တဂ့ၤအဂီၢ်သုးကီၣ်ကးဒီးသုးခိးကီၢ်ဆၢ(BGF)ကတဲာ်ကတီၤမၤအါထီၣ်၀ဲအသုးဂံၢ်ဘါသ့ၣ်တဖၣ် အဂ့ၢ်န့ၣ် ဂံၢ်ခီၣ်ထံးလီၢ်က၀ီၤၦၤဟ့ၣ်တၢ်ကစီၣ်ဖိတဖၣ်စံး၀ဲန့ၣ်လီၤႉ တကီၢ်ခါခဲအံၤ(Lion-Battalion)အသုးကျိၤခိၣ်သုးခိၣ်ဂီၢ်ဂ့ၢ်စီၤအဲၣ်စ့၀ါဒီး ဒုးယၤဂ့ၢ်၀ီလီၤဆီကရူၢ်(SOF) အသုးခိၣ်အီၣ်စၣ်ရှါဟဲပာ်ဖှိၣ်မၤသကိးတၢ်အိၣ်၀ဲအဃိသုးကီၣ်ကးဘၣ်ယိၣ်၀ဲလၢတၢ်ကထီၣ်ဒုးအ၀ဲသ့ၣ်သုးကလၢၤသ့ၣ်တဖၣ်အဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်ဂံၢ်ခီၣ်ထံးၦၤဟ့ၣ်တၢ်ကစီၣ်ဖိစံး၀ဲန့ၣ်လီၤႉ အ၀ဲစံး၀ဲလၢ“သုးခိၣ်ကီၢ်ဆၢ(BGF)ပၢၤကီၢ်ဒီးသုးကီၣ်ကးသ့ၣ်တဖၣ်ကတီၤဃာ်အ၀ဲသ့ၣ်တၢ်လီၢ်တၢ်ကျဲႇ ဒူၣ်ထီၣ်ဖိးထီၣ်တ့ထီၣ်၀ဲအသုးကလၢၤတၢ်လီၢ်တဖၣ်လၢအသီဒီးမၤၦဲၤက့ၤ၀ဲအသုးဖိနီၣ်ဂံၢ်လၢကဒုးစၢၤတၢ်သ့ၣ်တဖၣ်သနာ်က့လၢတၢ်ချၢသုးကျိၤတၢ်ဟူးတၢ်ဂဲၤတကပၤဒုမၤ၀ဲတဘူၣ်ဘၣ်ႇအ၀ဲသ့ၣ်အိၣ်ဒၣ်ခိးသမံသမိးတၢ်ဃ့စ့မၤဒၢၣ်မၤလီၤတၢ်လၢကျဲမုၢ်ဖးဒိၣ်တၢ်အိၣ်ခိးတြဲၤအလီၢ်တကပၤလီၤမီၤနီၤဒဒအဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ ဖဲအပူၤကွံာ်(၂၀၂၃)နံၣ်အတီၢ်ပူၤန့ၣ်ကၠဲးမယီခၠီနခွးႇကၠးအ့စ့ၣ်ကၠံႇဟီၣ်က၀ီၤအပူၤသိၣ်မှံၤပာ်ဖှိၣ်တဖၣ် ထီၣ်ဒုး၀ဲသုးကီၣ်ကးအသုးကလၢၤအဃိသုးကီၣ်ကးအသုးကလၢၤတၢ်လီၢ်ႇပၢၤကီၢ်၀ဲၤလီၢ်ဒီးအသုးကျိၤလၢဟူးဂဲၤတဖၣ်ဘၣ်ဒိ၀ဲနးမးအဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်ကရူၢ်တကပၤစံး၀ဲန့ၣ်လီၤႉ လၢတၢ်န့ၣ်အဃိဖဲတနံၣ်အံၤ(၂၀၂၄)ထီၣ်သီအတီၢ်ပူၤအံၤဒ်သိးတၢ်ထီၣ်ဒုးအ၀ဲသ့ၣ်သုးကလၢၤတဖၣ်သုတန့ၢ်တဂ့ၤအဂီၢ်သုးကီၣ်ကးတဖၣ်အံၤခးလီၤ၀ဲကျိဖးဒိၣ်ဆူ(KNLA)ကညီတၢ်ထူၣ်ဖျဲးသုးမုၢ်ဒိၣ်သိၣ်မှံၤပာ်ဖှိၣ်တဖၣ်ဟူးဂဲၤအိၣ်ဆိးတၢ်လီၢ်အဃိဒူသ၀ီ(၁၅)ဖျၢၣ်ဒီးလီၢ်က၀ီၤဖိအဂၤ(၅၀၀၀)ဃၣ်ဃၣ်ဘၣ်ဃ့ၢ်အိၣ်ကဒု၀ဲအသးအဖၢမုၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ “သုးကီၣ်ကးအသုးဒုးစၢၤတၢ်တဖၣ်ဟဲတုၤအါထီၣ်၀ဲဒီးတၢ်ခးကျိဖးဒိၣ်အလီၢ်တဖၣ်ဘၣ်တၢ်မၤအါထီၣ်၀ဲလၢ အသီအဃိၦၤမၢ၀ဲက၀ီၤဒ့ပူၤကမျၢၢ်တဖၣ်ဃ့ၢ်အိၣ်ကဒုဆိအသးမီၤနီၤႇသုးကီၣ်ကးတဲ၀ဲလၢတၢ်ဒုးမ့ၢ်ကဲထီၣ်ဒုၦၤသ့ၣ်တဖၣ်အံၤတမ့ၢ်ကပူၤဖျဲးဘၣ်ႉအခဲအံၤၦၤတအိၣ်အါအါလၢၤဘၣ်ၦၤဟးအိၣ်က့ၤလၢန့ၣ်လၢအံၤန့ၢ်သၢလါလံႉ ကျးသ့ၣ်တဖၣ်ၦၤအိးထီၣ်ဘူၣ်ဘူၣ်တဘူၣ်ဘူၣ်အဃိလၢကၦ့ၤအီၣ်က့ၤတၢ်အဂီၢ်တၢ်ကီတၢ်ခဲအိၣ်ထီၣ်ဖးယံာ်လံ” အဂ့ၢ်န့ၣ် လီၢ်က၀ီၤဖိလၢအိၣ်ကၠးအ့စ့ၣ်ကၠံထံကၢၢ်နံၤတဂၤစံး၀ဲန့ၣ်လီၤႉ တကီၢ်ခါခဲအံၤလၢကညီကီၢ်စဲၣ်ကီးတရံးဟီၣ်က၀ီၤအပူၤ(KNLA)ကညီတၢ်ထူၣ်ဖျဲးသုးမုၢ်ဒိၣ်သိၣ်မှံၤသုးပာ်ဖှိၣ်တဖၣ်ထီၣ်ဒုးမၤန့ၢ်၀ဲတီၤကၠးအ့ပၢၤကီၢ်၀ဲၤလီၢ်ဒီးတီၤကၠးအ့တီၤထီကၠိအဘၢၣ်စၢၤသုးကီၣ်ကးအသုးကလၢၤတဖၣ်အိၣ်၀ဲအသိးဟံန့ၢ်၀ဲတၢ်လီၢ်တၢ်ကျဲကးတံာ်ဃာ်၀ဲကီးတရံးႇဃိၣ်သၢဖျၢၣ်ဒီး ကၠၤအ့စ့ၣ်ကၠံ ၀့ၢ်တၢ်လီၢ်တဖၣ်အိၣ်၀ဲအဃိ ခံခီခံကပၤဘၢၣ်စၢၤတၢ်ဖ့ၣ်ဆၢအိၣ်၀ဲအဖၢမုၢ်အဂ့ၢ်န့ၣ် သုးဟီၣ်က၀ီၤတၢ်ကစီၣ်စံး၀ဲန့ၣ်လီၤႉ တကတီၢ်ဃီသုးကီၣ်ကးအသုးကလၢၤလၢအိၣ်ဆီလီၤအသးလၢကညီကီၢ်စဲၣ်ပူၤတဖၣ်အံၤခီဖျိသူဒြိမ့ၢ်ပိၢ်ႇ တၢ်ဒုးဆူၣ်ထီၣ်၀ဲလၢကီးတရံးဟီၣ်က၀ီၤပူၤအဃိကမျၢၢ်လီၢ်က၀ီၤဖိတဖၣ်သံဘၣ်ဒိဘၣ်ထံးအါထီၣ်၀ဲအဂ့ၢ်န့ၣ် ကီးတရံးၦၤဃ့ၢ်အိၣ်ကဒုဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ ကီးတရံးလီၢ်က၀ီၤဖိတဂၤစံး၀ဲလၢ“သုးကီၣ်ကးအၦၤတဖၣ်ထုးထီၣ်ရၤလီၤ၀ဲတၢ်ကစီၣ်လၢအတမ့ၢ်တတီတဖၣ်ဒီး ပာ်ထီၣ်၀ဲလၢကလံၤကျါတဲ၀ဲလၢၦၤက့ၤအိၣ်က့ၤလၢဟံၣ်န့ၢ်လံတၢ်ခးလိာ်သးတအိၣ်လၢၤဘၣ်အဃိၦၤတနီၤက့ၤအိၣ်က့ၤလၢအဟံၣ်မီၤနီၤႉတုၤၦၤက့ၤအိၣ်လၢဟံၣ်ဘျီအ၀ဲသ့ၣ်ဟဲတ့ၢ်လီၤ၀ဲဒြိမ့ၢ်ပိၢ်လီၤတဲာ်လၢက၀ီၤဒ့အပူၤ၀ံၤဘၣ်ဒိဘၣ်ထံး၀ဲၦၤကညီမီၤႉဟံၣ်သ့ၣ်တဖၣ်က့မ့ၣ်အူအီၣ်ကွံာ်တလီၢ်လီၢ်အဃိၦၤဘၣ်စံၣ်ထီၣ်ကဒီးခဲအံၤခဲအံၤမီၤႉဒ်သိးၦၤကဟဲမၤ စၢၤအဂီၢ်ၦၤဘၣ်ဃ့တၢ်မၤစၢၤလၢၦၤဂၤအအိၣ်မီၤနီၤ”အဂ့ၢ်စံး၀ဲန့ၣ်လီၤႉ ကီးတရံး၀့ၢ်ပူၤတၢ်ဒုးတံာ်တာ်၀ဲတလါအတီၢ်ပူၤကမျၢၢ်လီၢ်က၀ီၤဖိဒံဖိသၣ်သူၣ်က့သးၦၢ်သံ၀ဲဒၣ်(၂၀)ဂၤဘျဲၣ် ဒီးဘၣ်ဒိဘၣ်ထံး၀ဲခဲလၢာ်အဂၤ(၃၀)ဃၣ်ဃၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉဒ်န့ၣ်အသိးလၢ၀့ၢ်က၀ီၤဒ့ပူၤဒီး သ၀ီပူၤဟံၣ်အဖျၢၣ်(၂၀၀)ဃၣ်ဃၣ်မ့ၣ်အူအီၣ်ကွံာ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ
သုးကီၣ်ကးအကဘီယူၤဟဲတ့ၢ်လီၤမ့ၣ်ပိၢ်လၢလဲၣ်ခၣ်တီၤဃိၣ်လူၢ်လၢ(KNLA)သုးပ၁်ဖှိၣ်ထီၣ်န့ၢ်ဃ၁်၀ဲအံၤ
လါယနူၤအါရံၤ ၁၇ သီႇ ၂၀၂၄ နံၣ်ႇ ခ့ၣ်အဲးစံၣ် ဖဲမဟါလါယနူၤအါရံၤ ၁၆ သီ ဟါခီ ၄း၂၀ ဃၣ်ဃၣ်အဆၢကတီၢ်န့ၣ် သုးကီၣ်ကးအကဘီယူၤဟဲတ့ၢ်လီၤ၀ဲ မ့ၣ်ပိၢ်(၅၀၀)ပီၣ်လၢမၠၣ်၀တံၣ်၀့ၢ်ဃၢၤ လဲၣ်ခၣ်တီၤဃိၣ်လူၢ် လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် ထီၣ်မၤန့ၢ်ဃာ်၀ဲအံၤအဂ့ၢ်န့ၣ် သုးဂ့ၢ်၀ီဂံၢ်ခီၣ်ထံးၦၤဟ့ၣ်တၢ်ကစီၣ်ဖိ စံး၀ဲန့ၣ်လီၤႉ “ပယီၤသုးကဘီယူၤဟဲတ့ၢ်လီၤမ့ၣ်ပိၢ်(၂)ဖျၢၣ်လၢဃိၣ်လူၢ်န့ၣ်မီၤနီၤႉအပိၢ်ဖးထီၣ်တဖျၢၣ်ႇမ့မ့ၢ်လၢအ၀ဲတဖျၢၣ်န့ၣ် အတပိၢ်ဖးထီၣ်ဘၣ်ႉတၢ်ပၢၢ်ဆၢသုးကျိၤအၦၤခီန့ၣ်တအိၣ်ဖဲန့ၣ်လၢၤဘၣ်အဃိတၢ်ဘၣ်ဒိဘၣ်ထံးတအိၣ်ဘၣ်ႉ မ့မ့ၢ်လၢပျီပူၤန့ၣ်အိၣ်၀ဲဒၣ်ပယီၤသုးဒီး(BGF)န့ၣ်လီၤႉတၢ်ဒုးဒုတကဲထီၣ်ဘၣ်”အဂ့ၢ်န့ၣ် သုးဂ့ၢ်၀ီဂံၢ်ခီၣ်ထံးၦၤဟ့ၣ် တၢ်ကစီၣ်ဖိ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲအပူၤကွံာ်၂၀၂၃လါယူၤလံ(၂၁)သီအနံၤန့ၣ် (KNLA)သုးပာ်ဖှိၣ်ထီၣ်မၤန့ၢ်၀ဲဒၣ်(လဲၣ်ခၣ်တီၤ)ဃိၣ်လူၢ်လၢ အအိၣ်ဖဲ မၠၣ်၀တံၣ်၀့ၢ်ကလံၤထံးအံၤဒီး ဒ်န့ၣ်အသိးသုးကလၢၤအံၤလၢသုးဂ့ၢ်၀ီတကပၤန့ၣ်မ့ၢ်သုးကလၢၤတဖျၢၣ်လၢ အရ့ဒိၣ်၀ဲဒၣ်လၢသုးကီၣ်ကးအဂီၢ်န့ၣ်လီၤ.ဆၢကတီၢ်ဖဲ(KNLA)သုးပာ်ဖှိၣ်လဲၤထီၣ်န့ၢ်၀ဲလဲၣ်ခၣ်တီၤဃိၣ်လူၢ်အံၤအခါန့ၣ် မၤန့ၢ်၀ဲပယီၤသုးအကျိချံၦာ်သၣ်အါအါဂီၢ်ဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ တၢ်ပၢၢ်ဆၢသုးပာ်ဖှိၣ်ထီၣ်မၤန့ၢ်(လဲၣ်ခၣ်တီၤ)ဃိၣ်လူၢ်၀ံၤလီၢ်ခံဖဲလါအီကူး ၁၅ သီအနံၤန့ၣ် ပယီၤသုးအံၤ လၢကထီၣ်ဟံးန့ၢ်က့ၤ(လဲၣ်ခၣ်တီၤ)ဃိၣ်လူၢ်အံၤအဂီၢ် လၢပျီပူၤအ၀ဲသ့ၣ်သုးကျိၤဟဲထီၣ်ႇ ကဘီယူၤဟဲခးလီၤစၢၤတၢ်ႇ ပယီၤသုးစ့ၢ်ကီးခးလီၤဆိ၀ဲဒၣ်ကျိဖးဒိၣ်တဖၣ်အိၣ်၀ဲဘၣ်ဆၣ် ခီဖျိအ၀ဲသ့ၣ်ၦၤသံဘၣ်ဒိ ဘၣ်ထံးအါအဃိ ပယီၤသုးဘၣ်သုးကဒါလီၢ်ခံအဂ့ၢ်န့ၣ် (KNLA)သုးပာ်ဖှိၣ်ထုးထီၣ်ပာ်ဖျါတ့ၢ်ဃာ်၀ဲဒၣ်အိၣ်န့ၣ်လီၤႉ ဒ်န့ၣ်အသိးဖဲအပူၤကွံာ်(၂၀၂၃)လါအီကူး ၁၈ သီ မုၢ်ဃ့ၢ်လီၤ ၁ နၣ်ရံၣ်အခါန့ၣ်စ့ၢ်ကီး သုးကီၣ်ကးအကဘီယူၤ ဟဲတ့ၢ်လီၤ၀ဲ(၅၀၀)ပီၣ် မ့ၣ်ပိၢ်ခံဖျၢၣ်ဒံးလၢလဲၣ်ခၣ်တီၤဃိၣ်လူၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဘံလ့ကီၢ်ဆၣ်ပူၤ ဒူသ၀ီကမျၢၢ်လၢအဃ့ၢ်ထီၣ်တဖၣ် တုၤခဲအံၤတက့ၤဘၣ်လၢဟံၣ်ဒံးဘၣ်
လါယနူၤအါရံၤ ၁၆ သီႇ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ် ဘံလ့ကီၢ်ဆၣ်အပူၤ ခီဖျိပယီၤသုးခးလီၤကျိဖးဒိၣ်ဒီး ကဘီယူၤဟဲခးလီၤတၢ်အဃိ ဒူသ၀ီၦၤကမျၢၢ်လၢအဃ့ၢ်ထီၣ်သ့ၣ်တဖၣ်တုၤလၢခဲအံၤတက့ၤဘၣ်လၢအဟံၣ်အဃီ ဒံးဘၣ်ဘၣ်ဟးဃ့ၢ်အိၣ်ကဒုသးအဖၢမုၢ်လီၤအဂ့ၢ်န့ၣ် ဒူသထူၣ်ကီၢ်ရ့ၣ် ၦၤဘၣ်မူဘၣ်ဒါ စံး၀ဲန့ၣ်လီၤႉ တၢ်ဘၣ်ဂံာ်ဂူာ်မ့ဟဲကဲထီၣ်လၢပယီၤသုးဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)တၢ်ပၢၢ်ဆၢသုးပာ်ဖှိၣ် အဘၢၣ်စၢၤ တဘျီလၢ်လၢ်န့ၣ်ခီဖျိပယီၤသုးအံၤခးလီၤနါစိၤကျိဖးဒိၣ်တကးဒံးဘၣ် ကဘီယူၤစ့ၢ်ကီးဟဲခးလီၤတၢ် အဃိ လီၢ်က၀ီၤၦၤကမျၢၢ်ဘၣ်ဃ့ၢ်၀ဲ(၁၄၆၈)ဂၤညါအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ ထူသထူၣ်ကီၢ်ရ့ၣ် ၦၤဘၣ်မူဘၣ်ဒါတဂၤ စံး၀ဲလၢ“ပယီၤဒုဒ်နသ့ၣ်ညါတၢလီၤတၢ်မ့ကဲထီၣ်သးအ၀ဲသ့ၣ်ဟးခးနါစိၤ ကျိဖးဒိၣ်ဖဲကတိလီၤႉၦၤသ၀ီဖိဒုဘၣ်ဃ့ၢ်ကအိၣ်လၢတလါဘျဲၣ်ခံလါလံႉၦၤဃ့ၢ်ထီၣ်ဟံၣ်ခိၣ်န့ၣ်မ့တယးဒုကအိၣ်လၢခံကယၤဘျဲၣ်ညါႉခီဖျိပယီၤသုးခးလီၤကျိဖးဒိၣ်အဃိသ၀ီသၢဖျၢၣ်အံၤဘၣ်ဃ့ၢ်ထီၣ်မီၤနီၤႉ ဒီးအ၀ဲသ့ၣ်နါက့တနီၤန့ၣ် ပျံၤဘၣ်ကဘီယူၤအိၣ်အဃိဃ့ၢ်ထီၣ်၀ဲဒၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲတနံၤအံၤလါယနူၤအါရံၤ ၁၆ သီ အနံၤန့ၣ်လီၤႉ သ၀ီလၢအဃ့ၢ်ထီၣ်တဖၣ်န့ၢ်မ့ၢ်၀ဲတၤပီသ၀ီႇတၤပီခံသ၀ီႇကါမဲသ၀ီ ဟံၣ်ခိၣ်ပာ်ဖှိၣ်ခဲလၢာ်အိၣ်၀ဲ(၂၈၀)ဘျဲၣ်ဒီး ၦၤသ့ၣ်တဖၣ်အံၤလဲၤဃ့ၢ်အိၣ်၀ဲဒၣ်လၢထံခံကစၢၢ်ကလိကျါႇဒူသ၀ီလၢအဂၤအိၣ်၀ဲတနီၤဒီးဒ်န့ၣ်အသိးတနီၤန့ၣ် အ၀ဲသ့ၣ်လဲၣ်ဃ့ၢ်အိၣ်၀ဲဒၣ်လၢ၀့ၢ်ပူၤစ့ၢ်ကီး အိၣ်၀ဲဒၣ်အဂ့ၢ်န့ၣ်လီၢ်က၀ီၤၦၤဘၣ်မူဘၣ်ဒါတဂီၤဃီ၀ဲန့ၣ် စံးအါထီၣ်၀ဲန့ၣ်လီၤႉ ခီဖျိပယီၤသုးခးလီၤကျိဖးဒိၣ်ႇကဘီယူၤဟဲခးလီၤတၢ်အဃိ စးထီၣ်လၢ(၂၀၂၃)လါဒံၣ်စ့ဘၢၣ် ၁၃ သီအနံၤန့ၣ် ၦၤသ၀ီဖိသ့ၣ်တဖၣ်ဘၣ်ဃ့ၢ်ထီၣ်၀ဲဒၣ်န့ၣ်လီၤႉဒ်န့ၣ်အသိးခီဖျိပယီၤသုးအတၢ်ဖံးတၢ်မၤဒ်အံၤအဖီခိၣ်ၦၤသ၀ီဖိအဟံၣ်အဃီႇအဆၣ်ဖိကီၢ်ဖိသံဘၣ်ဒိဘၣ်ထံးဟးဂူာ်ဟးဂီၤအိၣ်၀ဲဒီးတကီၢ်ခါခဲအံၤလၢသ၀ီသ့ၣ်တဖၣ်အံၤအပူၤန့ၣ် ၦၤသ၀ီဖိတအိၣ်လၢၤဘၣ်ၦၤဃ့ၢ်ထီၣ်ခဲလၢာ်ဃၣ်ဃၣ်ညါအဂ့ၢ်န့ၣ် သ့ၣ်ညါဘၣ်န့ၣ်လီၤႉ ပယီၤသုးလၢအခးလီၤကျိဖးဒိၣ်သ့ၣ်တဖၣ်အံၤမ့ၢ်၀ဲဒၣ် သၣ်ဂီၤပျံၤ သုးခိးကီၢ်ဆၢ(BGF) ၁၀၁၄ သုးရ့ၣ်ဒီး ဘံလ့နီၣ်ဂံၢ်(၃)အမျိာ်သုးကလၢၤသ့ၣ်တဖၣ်အဂ့ၢ်န့ၣ် ဟီၣ်က၀ီၤၦၤဘၣ်မူဘၣ်ဒါ စံး၀ဲအသိး သ့ၣ်ညါဘၣ်န့ၣ်လီၤႉ ၦၤကမျၢၢ်လၢအဃ့ၢ်ထီၣ်သ့ၣ်တဖၣ်အံၤတုၤလၢခဲအံၤမ့ၢ်လၢတက့ၤဘၣ်လၢဟံၣ်ဒံးဘၣ်အဃိတကီၢ်ခါခဲအံၤ တၢ်အိၣ်တၢ်ခဲအိၣ်ထီၣ်လၢတၢ်အီၣ်တၢ်အီႇကသံၣ်ကသီႇအိၣ်ဆိးလီၢ်ကျဲတကပၤဒီး လၢန့ၣ်အမဲာ်ညါၦၤသ့ၣ် တဖၣ်အံၤ တဒိးန့ၢ်ဘၣ်တၢ်ဆီၣ်ထွဲမၤစၢၤတအိၣ်ဘၣ်ႇအီၣ်ဒၣ်အကစၢ်ဒၣ်၀ဲလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဘၣ်ဆၣ်မ့မ့ၢ်လၢၦၤဃ့ၢ်မှံဟးဖျိးသ့ၣ်တဖၣ်အံၤ အတၢ်အိၣ်ဆူၣ်အိၣ်ချ့တကပၤန့ၣ် လၢကသံၣ်ကသီတကူတလၢဘၣ် အပူၤ...