တၢ်ဒုးကဲထီၣ်လၢခၠီနခွၣ်သ၀ီကပၤအခါကဘီယူၤဟဲက့ၤခးလီၤတၢ်အဃိၦၤဖိသၣ်သံ ၂ ဂၤ
လါနိၣ်၀့ဘၢၣ် ၁၃ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲမဟါလါနိၣ်၀့ဘၢၣ် ၁၂ သီ ဂီၤခီအဆၢကတီၢ် တၢ်ဒုးကဲထီၣ်၀ဲလၢကညီကီၢ်စဲၣ် နိၣ်တကီကီၢ်ဆၣ် ဒီး တလၢၤကီၢ်စဲၣ် ကၠဲၣ်မယီကီၢ်ဆၣ်အဆၢ ခၠီနခွၣ်သ၀ီကပၤဒီးခီဖျိသုးကီၣ်ကးကဘီယူၤဟဲက့ၤခးလီၤတၢ်အဃိ ၦၤဖိသၣ်သံ၀ဲဒၣ် ၂ ဂၤ အဂ့ၢ်န့ၣ် သ့ၣ်ညါဘၣ်လၢကမျၢၢ်အအိၣ်န့ၣ်လီၤႉ ဖဲမဟါဂီၤခီ ၁၁ နၣ်ရံၣ်ဃၣ်ဃၣ်အဆၢကတီၢ်န့ၣ် ခီဖျိသုးကီၣ်ကးကဘီယူၤဟဲခးလီၤတၢ်လၢကၠဲၣ်မယီကီၢ်ဆၣ် ခၠီနခွၣ်သ၀ီပူၤအဃိ ဘၣ်သံ၀ဲဒၣ်ပီလီသ၀ီ ဖိသၣ်မုၣ်ဆံးဆံးဖိ(၇)နံၣ်တဂၤဒီး(၈)နံၣ်တဂၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လီၢ်က၀ီၤကမျၢၢ်လၢအတအဲၣ်ဒိးပာ်ဖျါအမံၤတဂၤစံး၀ဲလၢ“ခးကိးမုၢ်နံၤဒဲးလီၤႇမ့ၢ်အလီၤတဲာ်ဖဲလဲၣ်အဘၣ်မနုၤလဲၣ်ဒုတသ့ၣ်ညါဘၣ်ႉဘၣ်ဒုဘၣ်ဖးအါညါႉတဂီၤညါအံၤခးလီၤသးဂီၤဂီၤလီၤႉ၀ံၤဘျီကဘီယူၤဟဲခးလီၤစၢၤတၢ်ႉ ကဘီယူၤဟဲခးလီၤတၢ်အဃိၦၤဖိသၣ်သံ၀ဲခံဂၤမီၤနီၤႉၦၤဟံၣ်ၦၤဃီနါက့ဟးဂီၤအိၣ်ဒီဒူၣ်ညါ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ဖဲအပူၤကွံာ်လါနိၣ်၀့ဘၢၣ် ၁၀ သီအနံၤနၣ် တၢ်ပၢၢ်ဆၢသုးပာ်ဖှိၣ်နုာ်လီၤခး၀ဲပယီၤသုးအိၣ်ခၠီနခွၣ်သ၀ီတိၤဒီး ခၠီနခွၣ်ပယီၤသုးကလၢၤအဃိ တၢ်ဒုးကဲထီၣ်၀ဲလၢခံခီခံကပၤအဘၢၣ်စၢၤဒီး တၢ်ကဲထီၣ်သးဖဲန့ၣ်လီၢ်ခံတၢ်ပံးကွံာ် ၀ဲဒၣ်တိၤ ၦၤကမျၢၢ်ဟးထီၣ်က့ၤလီၤတန့ၢ်၀ဲလၢၤဘၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လၢခံခီခံကပၤတၢ်ဒုးကဲထီၣ်ဘျီ၀ဲန့ၣ်အပူၤန့ၣ်ပၣ်ဃုာ်၀ဲသုးကီၣ်ကးစုတီၤဖီလာ်သုးခိးကီၢ်ဆၢ(BGF)ဒီး ဒ်န့ၣ်အသိး ခီဖျိပယီၤသုးႇ(BGF)တကပၤသံဘၣ်ဒိဘၣ်ထံးအိၣ်အါတၢ်ဒုးကဲထီၣ်ဒိၣ်ဒိၣ်မုၢ်မုၢ်အဃိ ပယီၤသုးမၤအါထီၣ်သုးဂံၢ်ဘါ အဂ့ၢ်န့ၣ် ဟီၣ်က၀ီၤဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤႉ ဟီၣ်က၀ီၤလၢတၢ်ဒုးကဲထီၣ်ခဲအံၤန့ၣ်မ့ၢ်၀ဲစီၤဘလူတီခိၣ်ရိၣ်မဲ(BGF) ၁၀၂၁ သုးရ့ၣ် အိၣ်ဆီလီၤသးဟူးဂဲၤ၀ဲဒီး ဒ်န့ၣ်အသိးလၢခၠီနခွၣ်တိၤတၢ်သမံသမိးတြဲၤဒီးပၢၤကီၢ်၀ဲၤလီၢ်န့ၣ်စ့ၢ်ကီး (BGF)သုးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ခီဖျိတၢ်ဒုးဆူၣ်ထီၣ်အဃိခၠီနခွၣ်သ၀ီပူၤၦၤဟံၣ်ၦၤဃီအူအီၣ်ဟးဂီၤအိၣ်၀ဲဒီး ဒ်န့ၣ်အသိးခၠီနခွၣ်ႇ ယ့ၤပူၤ-ကီၣ်ကၠဲၣ် ဒီး ကီၣ်ပနီဖၤသ့ၤသ၀ီအခိၣ်အဃၢၤ ၦၤကမျၢၢ်တဖၣ်ဃ့ၢ်ထီၣ်၀ဲဒၣ်ဒီး တနီၤန့ၣ်ကတာ်ထီ၀ဲဒၣ်လၢသ၀ီပူၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ ဖဲအပူၤကွံာ်(၂၀၂၂)အခါစ့ၢ်ကီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးတၢ်ဒီသဒၢကမျၢၢ်သုးကရူၢ် (PDF)နုာ်လီၤ ဒွဲၣ်အူအီၣ်၀ဲဒၣ်...
လၢကီၢ်ပယီၤမုၢ်ထီၣ်ကလံၤထံး ၦၤလၢအလီၤမၢ်တၢ်တနၢ်ဟူပရၢပစၢၢ်ဘၣ်ဟဲအါထီၣ်အဂ့ၢ် KHRG စံး၀ဲ
လါနိၣ်၀့ဘၢၣ် ၁၀ သီႇ ၂၀၂၃ နံၣ်ႇ ခ့ၣ်အဲးစံၣ် လၢကီၢ်ပယီၤမုၢ်ထီၣ်ကလံၤထံးဟီၣ်က၀ီၤအပူၤစးထီၣ်(၂၀၂၁)သုးဟံးန့ၢ်တၢ်စိတၢ်ကမီၤ၀ံၤလီၢ်ခံ ပယီၤသုးကျိၤဟဲထီၣ် အဆၢကတီၢ်ဖီၣ်က့ၤကိး၀ဲဒၣ်ၦၤကမျၢၢ်တဖၣ်ဒီးၦၤလၢအလီၤမၢ်တၢ်တနၢ်ဟူပရၢပစၢၢ်နီတမံၤလၢၤဘၣ်အံၤဟဲအါထီၣ်၀ဲအဂ့ၢ်န့ၣ် ကညီဂ့ၢ်၀ီခွဲးယာ်ကရူၢ်(KHRG)ထုးထီၣ်ပာ်ဖျါ၀ဲဖဲလါနိၣ်၀့ဘၢၣ် ၈ သီအနံၤန့ၣ် လီၤႉ လံာ်တၢ်ထုးထီၣ်ပာ်ဖျါအမံၤလၢ“သုးဟံးန့ၢ်ဆူၣ်တၢ်စိတၢ်ကမီၤ(၂၀၂၁)၀ံၤလီၢ်ခံတၢ်မၤလီၤမၢ်န့ၢ်ဆူၣ် ၦၤကညီလၢကီၢ်ပယီၤမုၢ်ထီၣ်ကလံၤထံးတၢ်ဂ့ၢ်တၢ်ကျိၤတဖၣ်”လၢအဒုးနဲၣ်၀ဲကညီကီၢ်စဲၣ်ပူၤၦၤလီၤမၢ်လၢ တၢ်နတၢ်ဟူပရၢပစၢၢ်လၢၤဘၣ်အဂ့ၢ်န့ၣ် (KHRG)လံာ်တၢ်ပာ်ဖျါအပူၤ စံး၀ဲန့ၣ်လီၤႉ (KHRG)ၦၤကတိၤတၢ်ပၢ စီၤနၢၤဒၣ်ဆူ စံး၀ဲလၢ“ဘၣ်ဃးဒီးသ၀ီဖိလၢအလဲၤခိဖျိဘၣ်၀ဲတၢ်မၤလီၤမၢ်န့ၢ်ဆူၣ်အံၤ အက့ၢ်အဂီၤန့ၣ်ပထံၣ်ဘၣ်အီၤလၢအါတက့ၢ်အိၣ်၀ဲဒၣ်ခံခါမီၤနီၤႉတၢတခါန့ၣ်ခီဖျိလၢပယီၤသုးသ့ၣ်တဖၣ်အံၤ ပာ်ပနီၣ်၀ဲသ၀ီဖိတဖၣ်အံၤလၢတၢ်ဘၣ်ဘျးစဲဒီးလၢထံရူၢ်ကီၢ်သဲးတကပၤမ့ၢ်ဂ့ၤလီၤဆီဒၣ်တၢ်ထံၣ်၀ဲၦၤသ၀ီဖိတဖၣ် အံၤလၢအဆီၣ်ထွဲမၤစၢၤ၀ဲဒၣ်သုးဖီၣ်စုက၀ဲၤတဖၣ်လၢအထီဒါအ၀ဲသ့ၣ်တဖၣ်အံၤအဖီခိၣ်အဃိန့ၣ်အ၀ဲသ့ၣ်ဖီၣ်၀ဲသ၀ီဖိဒီးမၤလီၤမၢ်၀ဲဒၣ်ဒ်န့ၣ်မီၤနီၤႉၦၤသ၀ီဖိသ့ၣ်တဖၣ်မ့ၢ်အသံဧါအမူဧါန့ၣ်တၢ်ပာ်ဂၢၢ်ပာ်ကျၢၤအီၤတသ့ဘၣ်ဒီးတၢ်နတၢ်ဟူသ့ၣ်ညါထွဲ၀ဲဒၣ်အဂ့ၢ်အကျိၤနီတမံၤဘၣ်ႉခံထံၣ်တထံၣ်န့ၣ်ဒ်သိးလၢပယီၤသုးတဖၣ်မ့ဟဲထီၣ်လၢတၢ်မဲာ်ညါမ့ထံၣ်သ၀ီဖိတဖၣ်န့ၣ်ဖီၣ်၀ဲႉမ့ၢ်အလဲၤကိး၀ဲတုၤဖဲလဲၣ်ၦၤသ၀ီဖိလၢလီၤမၢ်တဖၣ်န့ၣ်ဟံၣ်ဖိဃီဖိတသ့ၣ်ညါထွဲ၀ဲတၢ်နီတမံၤဘၣ်ႉမ့ၢ်မတၤဖီၣ်အသုလဲၣ်ႇမ့ၢ်အ၀ဲသ့ၣ်လဲၤတုၤဖဲလဲၣ်ႇအအိၣ်ဒ်လဲၣ်အီၣ်ဒ်လဲၣ်တသ့ၣ်ညါထွဲ၀ဲနီတမံၤဘၣ်ႉတကးဒံးဘၣ်ဖီၣ်သူ၀ဲဒၣ်ဒ်သိးတၢ်ဒီသဒၢၦၤကညီမီၤနီၤႉအဃိတၢ်သ့ၣ်တဖၣ်အံၤမ့ၢ်တၢ်မၤကမၣ်၀ဲကွီၢ်မ့ၣ်ဒီးၦၤဂ့ၢ်၀ီခွဲးယာ်ဖးဒိၣ်တခါလီၤအဂ့ၢ်န့ၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ၦၤလၢပယီၤသုးဖီၣ်မၤသံအီၤတဖၣ်အါဒၣ်တက့ၢ်န့ၣ်မ့ၢ်၀ဲဒၣ်ၦၤသးစၢ်တဖၣ်ဒီးဒ်န့ၣ်အသိးလၢခံခီခံကပၤဟီၣ်က၀ီၤတၢ်ပၢအပူၤစ့ၢ်ကီးဖီၣ်စုက၀ဲၤကရူၢ်ဃုာ်ဒီးဖီၣ်စုက၀ဲၤကရူၢ်လၢအဂၤတဖၣ်လုၢ်သ့ၣ်ခါပတာ်မၤကမၣ်၀ဲတၢ်ဂ့ၢ်အံၤ ပၣ်ဃုာ်၀ဲအိၣ် အဂ့ၢ်န့ၣ် စီၤနၢၤဒၣ်ဆူ စံးအါထီၣ်၀ဲန့ၣ်လီၤႉ လၢကီၢ်ပယီၤမုၢ်ထီၣ်ကလံၤထံး(ခ့ၣ်အဲၣ်ယူၣ်)ဟီၣ်က၀ီၤအပူၤ ၦၤလၢပယီၤသုးဖီၣ်ဒုးဃာ်အီၤဖီၣ်မၤဆါမၤပယွဲအီၤ အိၣ်၀ဲဒၣ်ခဲလၢာ်(၁၅၉)ဂၤညါဒီးလၢပျီပူၤန့ၣ်ၦၤနီၣ်ဂံၢ်ကအါန့ၢ်အ၀ဲအံၤသ့၀ဲအသိး ဟီၣ်က၀ီၤတၢ်ဘံၣ်တၢ်ဘၢအဃိ တၢ်ကီတၢ်ခဲအိၣ်လၢကဟးလူၤထၢဖှိၣ်မၤနီၣ်မၤဃါ၀ဲအဂ့ၢ်န့ၣ် KHRG)စံး၀ဲန့ၣ်လီၤႉ ဒ်ကညီဂ့ၢ်၀ီခွဲးယာ်ကရူၢ်အတၢ်မၤနီၣ်စရီအသိးန့ၣ် လၢခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤ ၦၤလၢတၢ်ဖီၣ်မၤသံအီၤ အလီၤမၢ်တၢ်တနၢ်ဟူပရၢပစၢၢ်ဘၣ်န့ၣ် ဒူပျာ်ယာ်ကီၢ်ရ့ၣ်ပူၤန့ၣ်အိၣ်၀ဲ(၅၂)ဂၤႇ ဘျံးဒ၀ဲၢ်ကီၢ်ရ့ၣ်ပူၤန့ၣ်အိၣ်(၄၆)ဂၤႇ ချၢၣ်လွံၢ်ထူၣ်ကီၢ်ရ့ၣ်ပူၤန့ၣ်အိၣ်(၃၃)ဂၤႇ ဒူသထူၣ်ကီၢ်ရ့ၣ်ပူၤန့ၣ်အိၣ်(၁၀)ဂၤႇ မုၢ်တြီၢ်ကီၢ်ရ့ၣ်န့ၣ်အိၣ်(၁၀)ဂၤဒီး တီအူကီၢ်ရ့ၣ်ပူၤန့ၣ်အိၣ်၀ဲ(၈)ဂၤအဂ့ၢ်န့ၣ် (KHRG)တၢ်မၤနီၣ်စရီအသိး သ့ၣ်ညါဘၣ်န့ၣ်လီၤႉ ၦၤလၢအလီၤမၢ်တၢ်တနၢ်ဟူအပရၢပစၢၢ်သ့ၣ်တဖၣ်အံၤမ့ၢ်တၢ်လုၢ်သ့ၣ်ခါပတာ်မၤကမၣ်၀ဲကွီၢ်မ့ၣ်ဒီး အပူၤကွံာ်တၢ်သ့ၣ်တဖၣ်အံၤကဲထီၣ်အိၣ်၀ဲအသိးတုၤလၢခဲအံၤတၢ်တဟံးထီၣ်ဖီၣ်ထီၣ်ဂ့ၢ်၀ီဘၣ်မ့မ့ၢ်ဆဲးကဲထီၣ်သးဒံး အဃိကီၢ်ပူၤဟီၣ်က၀ီၤၦၤဘၣ်မူဘၣ်ဒါဒီးထံဂုၤကီၢ်ဂၤကသ့ၣ်ညါထွဲဟံးထီၣ်ဖီၣ်ထီၣ်ဂ့ၢ်၀ီအဂ့ၢ်န့ၣ် (KHRG)စံး၀ဲန့ၣ်လီၤႉ စီၤနၢၤဒၣ်ဆူစံး၀ဲလၢ“ပတၢ်တိာ်ပာ်လၢပထုးထီၣ်ရၤလီၤ၀ဲဒၣ်လံာ်တၢ်ပာ်ဖျါတဘ့ၣ်အံၤခီန့ၣ်ဒ်သိးၦၤလၢအဘၣ်မူဘၣ်ဒါသ့ၣ်တဖၣ်လၢဟီၣ်က၀ီၤအပတီၢ်မ့ၢ်ဂ့ၤႇထံဂုၤကီၢ်ဂၤအပတီၢ်မ့ၢ်ဂ့ၤကထံၣ်သ့ၣ်ညါထွဲ၀ဲဒၣ်လၢကညီကီၢ်စဲၣ်ပူၤလၢ အဘၣ်ဃးဒီးတၢ်မၤလီၤမၢ်၀ဲၦၤကညီတၢ်ဂ့ၢ်တၢ်ကျိၤသ့ၣ်တဖၣ်ဒီးၦၤလၢအတူၢ်ဘၣ်တၢ်သ့ၣ်တဖၣ်ကန့ၢ်ဘၣ်တၢ်ဆီၣ်ထွဲမၤစၢၤဒီးတၢ်တီတၢ်တြၢ်အဂီၢ်န့ၣ်ပပာ်ဖျါထီၣ်အီၤလီၤ”အဂ့ၢ်န့ၣ် စံး၀ဲန့ၣ်လီၤႉ ကညီဂ့ၢ်၀ီခွးယာ်ကရူၢ်(KHRG)အံၤဘၣ်တၢ်ဒုးအိၣ်ထီၣ်အီၤဖဲ(၁၉၉၂)နံၣ်အခါဒီး ကရၢအံၤမၤနီၣ်မၤဃါ၀ဲ တၢ်မၤဘၣ်ဒိဘၣ်ထံးၦၤဂ့ၢ်၀ီခွဲးယာ်လၢကီၢ်ပယီၤခိခိၣ်ဒူသ၀ီတဖၣ်အပူၤဒီး ဟ့ၣ်ဂံၢ်ဟ့ၣ်ဘါလီၢ်က၀ီၤႇထံဂုၤကီၢ်ဂၤ တၢ်ကရၢကရိတဖၣ်လၢကဆီၣ်ထွဲမၤစၢၤသ၀ီဖိအတၢ်သ့ၣ်တၢ်ဘၣ်လၢအသူ၀ဲလၢတၢ်တြီဆၢလီၤက့ၤနီၢ်ကစၢ်သးအဂီၢ်အံၤ န့ၣ်လီၤႉ
တၢ်ကစီၣ်ဟးထီၣ်လၢၦၤကနု၁်လီၤခးမၠၣ်၀တံၣ်အဃိၦၤလၢအဘၣ်ဃးဒီးသုးကီၣ်ကးတဖၣ်သုးလီၢ်သုးကျဲႇ ၦ့ၤဖှိၣ်ဃ၁်တၢ်အီၣ်တၢ်အီ
လါနိၣ်၀့ဘၢၣ် ၁၀ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲလါနိၣ်၀့ဘၢၣ် ၈ သီ ဟါခီအဆၢကတီၢ် တၢ်ကစီၣ်ဟးထီၣ်လၢတၢ်ပၢၢ်ဆၢသုးပာ်ဖှိၣ်ကရူၢ် ခီၤဘြၤသုးကျိၤ ကနုာ်လီၤခး မၠၣ်၀တံၣ်ဒီးဖဲန့ၣ်လီၢ်ခံၦၤလၢအဘၣ်ထွဲဒီးပယီၤသုးအံၤတဖၣ်ဟးသုးလီၢ်သုးကျဲႇၦ့ၤဖှိၣ်ဃာ်၀ဲတၢ်အီၣ် တၢ်အီတဖၣ် အဂ့ၢ်န့ၣ် ၀့ၢ်ပူၤကမျၢၢ်တဖၣ်စံး၀ဲန့ၣ်လီၤႉ မၠၣ်၀တံၣ် ကၠိတီက၀ီၤဒ့ပူၤ ကမျၢၢ်တဂၤစံး၀ဲလၢ“ဖဲမဟါဟါခီန့ၣ်ပထံၣ်လၢပယီၤသုးကဒူၣ်အထၢတဖၣ်န့ၣ် သုးအလီၢ်အကျဲႇက့ၤလီၤလၢဖၣ်အၣ်တကပၤဘျီပသံကွၢ်အ၀ဲသ့ၣ်တဲ၀ဲလၢအနၢ်ဟူလၢစှၤသီအတီၢ်ပူၤအံၤ (PDF)ခီၤဘြၤကရူၢ်ကနုာ်လီၤခးမၠၣ်၀တံၣ်မီၤနီၤႉမ့မ့ၢ်၀ဲဒၣ်ဒုကဟးစံၣ်တၢ်လီၢ်တၢ်ကျဲတအိၣ်ဘၣ်ႉကၦ့ၤအီၣ်ဟုသး ကၦ့ၤအီၣ်သိဒၢးစ့တအိၣ်ဘၣ်ပကဘၣ်ဆဲးအိၣ်ဒ်အံၤလီၤႉမ့မ့ၢ်ၦၤလၢအဂၤခီန့ၣ်ဘၣ်ယိၣ်လၢၦၤကဟဲတ့ၢ်လီၤဒြိမ့ၣ်ပိၢ် မီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါလါနိၣ်၀့ဘၢၣ် ၉ သီအနံၤန့ၣ်လီၤႉ စှၤသီအတီၢ်ပူၤအံၤလၢအ့ရှါကျဲသီဒီးကီးတရံးႇခွံတၢၣ်(ကိတဲၤ)ႇကြုၢ်တုကျဲတကပၤန့ၣ်တၢ်ခးလိာ်သးကဲထီၣ်၀ဲလၢ ပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤဒီး ဒ်န့ၣ်အသိးဖဲလါနိၣ်၀့ဘၢၣ် ၇ သီ ဟါခီ အဆၢကတီၢ် ခီဖျိ(KNLA)သုးပာ်ဖှိၣ်ဒြိကရူၢ်လဲၤတ့ၢ်လီၤဒြိမ့ၣ်ပိၢ်လၢ(စံၣ်နၣ်သူၣ်ခၣ်)သီခါဖၠၣ်ကရၢၢ်ပူၤလၢ ခီၣ်သုးရ့ၣ် (ခလရ-၉၇)သုးကျိၤနုာ်လီၤအိၣ်၀ဲအံၤအဃိ ပယီၤသုးသံဘၣ်ဒိဘၣ်ထံး(၂)ဂၤအကျါပၣ်ဃုာ်၀ဲ သုးခိၣ်တဂၤ အဂ့ၢ်န့ၣ် ဟီၣ်က၀ီၤဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤႉ တၢ်ပၢၢ်ဆၢသုးပာ်ဖှိၣ်ၦၤဟ့ၣ်တၢ်ကစီၣ်ဖိစံး၀ဲလၢ“လၢကီးတရံးတကပၤန့ၣ်တၢ်ဒုးကဲထီၣ်တပယူာ်ဃီလီၤႉ ပယီၤသုးန့ၣ် တဟးထီၣ်လၢတၢ်ချၢလၢၤဘၣ်ခးလီၤကျိဖးဒိၣ်ဆူၦၤကမျၢၢ်အအိၣ်ႇၦၤကမျၢၢ်ဘၣ်ဒိဘၣ်ထံးအဃိ ကညီကရူၢ်ဒီး (PDF)အံၤကမၤ၀ဲအဂီၢ်ဘၣ်ထိၣ်ဘၣ်စီၤ၀ဲထံထံဆးဆးလီၤႉလၢ၀့ၢ်ပူၤအံၤန့ၣ် အ၀ဲသ့ၣ်အၦၤမၤတၢ်ဖိတအိၣ်လၢၤဘၣ်ႉ ၦၤဃိာ်ဖိတဖၣ်စ့ၢ်ကီးၦၤဆၢလီၤဆူတီၤကလ့ဃိာ်ပူၤလံအဃိလၢန့ၣ်တကပၤန့ၣ်တၢ်အိၣ်သးတဂ့ၤလၢၤဘၣ်ႉပယီၤသုးထ့၀ဲတန့ၢ်လၢၤဘၣ်”အဂ့ၢ်န့ၣ် စံး၀ဲန့ၣ်လီၤႉ တကီၢ်ခါခဲအံၤလၢကီးတရံးဒီးကၠၤအ့စ့ၣ်ကၠံႇမၠၣ်၀တံၣ်ဟီၣ်က၀ီၤအပူၤ ခီဖျိ KNLA သုးပာ်ဖှိၣ်နုာ်လီၤခး၀ဲ ပယီၤသုးကလၢၤႇ သုးကျိၤတဖၣ်အဃိပယီၤသုးတကပၤသံဘၣ်ဒိဘၣ်ထံးအိၣ်ဒီး လၢတၢ်န့ၣ်အဃိပယီၤသုးအံၤ လၢကမၤၦဲၤထီၣ် ကျိချံၦာ်သၣ်ႇကဆှၢထီၣ်(စစ်ကူ)အဂီၢ်ဟံးန့ၢ်၀ဲဒၣ်တၢ်မၤစၢၤလၢသုးခိးကီၢ်ဆၢ(BGF)အအိၣ် အဂ့ၢ်န့ၣ် သုးဂ့ၢ်၀ီဂံၢ်ခီၣ်ထံး တၢ်ကစီၣ်စံး၀ဲအသိးသ့ၣ်ညါဘၣ်န့ၣ်လီၤႉ တကီၢ်ခါခဲအံၤတၢ်ကစီၣ်ဟူထီၣ်သါလီၤလၢတၢ်ဒုးကကဲထီၣ်လၢမၠၣ်၀တံၣ်၀့ၢ်ပူၤဒီးဘၣ်ဆၣ်သုးဟံးန့ၢ်တၢ်စိ တၢ်ကမီၤ၀ံၤ လီၢ်ခံန့ၣ်(ကၣ်စံၣ်နိၣ်)တၢ်တၤကျိၣ်တၤစ့လီၢ်လၢအတဖိးသဲစးသ့ၣ်တဖၣ်ဟဲအါထီၣ်၀ဲလၢမၠၣ်၀တံၣ်၀့ၢ်ပူၤ...
ဒူသထူၣ်ကီၢ်ရ့ၣ်အပူၤ (BGF)ထၢ၀ဲဒၣ်စ့လၢသ၀ီ ၂၄ ဖျၢၣ်ၦၤကမျၢၢ်အအိၣ်
လါနိၣ်၀့ဘၢၣ် ၁၀ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုက့ ၁)ဟီၣ်က၀ီၤ ဖၣ်အၣ်ကီၢ်ဆၣ်အပူၤ ဖဲအပူၤကွံာ် လါနိၣ်၀့ဘၢၣ် ၃ သီအနံၤန့ၣ် သုးခိးကီၢ်ဆၢ(BGF) ၁၀၁၄ သုးရ့ၣ် စုတီၤဖီလာ် သုးဒ့ခိၣ် ဘိၤတ့ၤ၀့ ထၢ၀ဲဒၣ်စ့လၢသ၀ီ (၂၄)ဖျၢၣ်ၦၤကမျၢၢ်အအိၣ်အဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သးထုးထီၣ်ပာ်ဖျါ၀ဲဖဲလါနိၣ်၀့ဘၢၣ် ၈ သီ အနံၤ န့ၣ်လီၤႉ မ့ၣ်ထံၤလၤ(BGF)သုးကလၢၤ သုးဒ့ခိၣ် ဘိၤတ့၀့အံၤ ကိးထံၣ်၀ဲဒၣ်(၀ဲပၠၣ်)ကရူၢ်ႇ(တကီၤဘိ)ကရူၢ် သ၀ီသးၦၢ် တဖၣ်ဒီး ဖဲန့ၣ်တဲ၀ဲလၢတၢ်ကဖျီၣ်ထီၣ်ဃိၣ်သဒၢလၢသုးကလၢၤပူၤအံၤအဂီၢ် ဃ့၀ဲဒၣ်စ့(တကယၤခွံဆံလွံၢ်ကလီၢ်)ကၠးလၢ သ၀ီ(၂၄)ဖျၢၣ်ၦၤကမျၢၢ်အအိၣ်အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးလံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ သ၀ီလၢ(BGF)ဃ့စ့သ့ၣ်တဖၣ်န့ၣ်မ့ၢ်၀ဲ၀ဲပၠၣ်ကရူၢ်ပူၤ ၀ဲပၠၣ်သ၀ီႇပ့ၤပ့ၤစ့ၣ်သ၀ီႇဖယါစ့ၣ်သ၀ီႇမ့ၣ်ထံၤလၤသ၀ီႇ မဲၤကၠံၣ်ႇ ဖါဘီၤသ၀ီႇမဲၤကၠံၣ်ကစၢၢ်ခီၣ်ထံးႇတိၣ်ကၠံသ၀ီ ဒီး တကီၤဘိကရူၢ်ပူၤ တကီၤဘိသ၀ီႇကိဒါကၠံသ၀ီႇ မံပိသ၀ီႇ ဘီၣ်သပၠူၣ်သ၀ီႇကၠိပ့ၤစ့ၣ်သ၀ီႇနိကွါသ၀ီႇမဲလၤသ၀ီႇ မဲလၤခၠီ၀ၣ်သ၀ီႇထံဖိနဲၣ်ႇနီၤသယ့သ၀ီႇကွံသခီၣ်ႇ လၤခဲၣ်ခီၤသ၀ီႇ စ့ၣ်ခၠီသ၀ီႇလဲၣ်ပတါ,၀ဲပၠၣ်ခၠီ၀ၣ်ႇမၠဲၤသ၀ီသ့ၣ်တဖၣ်အံၤဒီး သ၀ီတဖျၢၣ်န့ၣ်ဃ့၀ဲစ့(၂)ကလီၢ်တုၤ (၁၃)ကလီၢ်ညါအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါပူၤ ပာ်ဖျါ၀ဲန့ၣ်လီၤႉ ဘၣ်ဃးတၢ်ထၢစ့လၢကမျၢၢ်အအိၣ်တၢ်ဂ့ၢ်အံၤပခ့ၣ်အဲးစံၣ်-ကညီတၢ်ကစီၣ်ဆဲးကျိးသုးခိးကီၢ်ဆၢ(BGF) ၁၀၁၄ သုးရ့ၣ် သုးဒ့ခိၣ် ဘိၤတ့ၤ၀့ဘၣ်ဆၣ် ဆဲးကျိးတန့ၢ်ဘၣ်န့ၣ်လီၤႉ လၢန့ၣ်အမဲာ်ညါဖဲအပူၤကွံာ်(၂၀၂၂)လါမ့ၤ ၂ သီအခါစ့ၢ်ကီး...
ကၠၤအ့စ့ၣ်ကၠံ၀့ၢ်ပူၤသုးကီၣ်ကးအတၢ်ပၢတၢ်ပြးဆိကတီၢ်ကွံ၁်သးခဲလၢ၁်လံ
လါနိၣ်၀့ဘၢၣ် ၉ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤ ကၠၤအ့စ့ၣ်ကၠံ၀့ၢ်ပူၤ စးထီၣ်ဖဲတၢ်နုာ်လီၤခးသုးကီၣ်ကးအစုတီၤဖီလာ်၀ဲၤကျိၤရူတၢ်လီၢ်တဖၣ်၀ံၤလီၢ်ခံန့ၣ်တကီၢ်ခါခဲအံၤတၢ်ပၢတၢ်ပြး ဆိကတီၢ်ကွံာ်သးခဲလၢာ်လံအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ်တနွံအခါန့ၣ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်နုာ်လီၤခး၀ဲကၠၤအ့စ့ၣ်ကၠံ၀့ၢ်ပူၤ သုးကီၣ်ကးအပၢၤကီၢ်၀ဲၤလီၢ်ႇ(လ၀က)ရူႇသ့ၣ်ၦၢ်ရူႇပၢပြးရူႇတၢ်မၤသံမ့ၣ်အူရူသ့ၣ်တဖၣ်ဒီး တၢ်ကဲထီၣ်သးဖဲန့ၣ် ၀ံၤလီၢ်ခံတကီၢ်ခါခဲအံၤသုးကီၣ်ကးအတၢ်ပၢတၢ်ပြးဆိကတီၢ်ကွံာ်သးခဲလၢာ်လံအဂ့ၢ်န့ၣ် သုးဂ့ၢ်၀ီလီၤဆီကရူၢ်(SOF)တၢ်ဘိးဘၣ်ရၤလီၤမူဒါခိၣ်တဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ လၢန့ၣ်အမဲာ်ညါသုးကီၣ်ကးသုးကျိၤလၢအဟဲထီၣ်ဆှၢသုးဂံၢ်ဘါႇတၢ်အီၣ်တၢ်အီဆူသုးကလၢၤပူၤတဖၣ်အံၤ ခီဖျိတၢ်ပၢၢ်ဆၢသုးပာ်ဖှိၣ်ခိးခးအ၀ဲသ့ၣ်လၢကျဲအဃိအ၀ဲသ့ၣ်အိၣ်က့ၤဒၣ်လၢအသုးကလၢၤပူၤဒ်န့ၣ်လီၤဒီး လၢ၀့ၢ်ခိၣ်၀့ၢ်ဃၢၤဒူသ၀ီကျဲတဖၣ်န့ၣ်(KNLA)သုးပာ်ဖှိၣ်လုၢ်ဘၢဒိၣ်စိ၀ဲအဂ့ၢ်န့ၣ် (SOF)တၢ်ဘိးဘၣ်ရၤလီၤမူဒါခိၣ် စံးအါထီၣ်၀ဲန့ၣ်လီၤႉ အ၀ဲစံး၀ဲလၢ“လၢကၠၤအ့စ့ၣ်ကၠံ၀့ၢ်န့ၣ်တၢ်စံၣ်ညီၣ်ပီတ့တအိၣ်နီတမံၤလၢၤဘၣ်ႉအ၀ဲသ့ၣ်န့ၣ်အိၣ်ဒၣ်အအိၣ်က့ၤလၢ အ၀ဲသ့ၣ်သုးကလၢၤပူၤဒ်န့ၣ်လီၤႉကၠၤအ့စ့ၣ်ကၠံကီၢ်ဆၣ်ဒီတဘ့ၣ်အပူၤန့ၣ်ဒူသ၀ီကျဲမ့ၢ်ဂ့ၤႇကျဲမ့ၢ်ဂ့ၤန့ၣ်တၢ်ပၢၢ်ဆၢ သုးကရူၢ်ပၢၤဃာ်၀ဲမီၤနီၤႉအ၀ဲသ့ၣ်မၤတၢ်တဘၣ်နီတမံၤလၢၤဘၣ်ႉမ့၀ံၤအဂၤတခါန့ၣ်လၢနိၣ်တကီကီၢ်ဆၣ် သုးကလၢၤႇ ကီၢ်ဆၢတၢ်ဘံၣ်တၢ်ဘၢလီၢ်တကပၤန့ၣ်စ့ၢ်ကီးအ၀ဲသ့ၣ်သုးကျိၤလဲၤတသ့နီတစဲးလၢၤဘၣ်”အဂ့ၢ်န့ၣ် စံး၀ဲန့ၣ်လီၤႉ ဖဲအပူၤကွံာ်လါအီးကထိဘၢၣ် ၂၇ သီတုၤလါနိၣ်၀့ဘၢၣ် ၂ သီအနံၤ တၢ်ပၢၢ်ဆၢသုးပာ်ဖှိၣ်ကရူၢ်နုာ်လီၤခး၀ဲ ကၠၤအ့စ့ၣ်ကၠံ၀့ၢ်ပယီၤသုးကျိၤဒီးပၢၤကီၢ်၀ဲလီၢ်ႇပၢပြးရူႇ(လ၀က)ရူႇသ့ၣ်ၦၢ်ရူႇတၢ်မၤသံမ့ၣ်အူရူသ့ၣ်တဖၣ်ဒီး ဖဲန့ၣ်ပယီၤသုးတကပၤသံ၀ဲဒၣ်(၄၅)ဂၤအဂ့ၢ်န့ၣ် (SOF)ထုးထီၣ်ပာ်ဖျါတ့ၢ်ဃာ်၀ဲဒံးန့ၣ်လီၤႉ ခီဖျိတၢ်ဒုးကဲထီၣ်လၢကၠၤအ့စ့ၣ်ကၠံ၀့ၢ်ပူၤဒီး၀့ၢ်ခိၣ်၀့ၢ်ဃၢၤအဃိၦၤကမျၢၢ်တဖၣ်ဃ့ၢ်ထီၣ်၀ဲဒီးတကီၢ်ခါခဲအံၤ ၦၤကမျၢၢ်လၢအဃ့ၢ်ထီၣ်တဖၣ်အ၀ဲသ့ၣ်ကဟးထီၣ်က့ၤလီၤအဂီၢ်ဘၣ်ကွၢ်တၢ်အိၣ်သးအဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ “တၢ်ဒုးဂၢၢ်ထီၣ်တစဲးလံဘၣ်ဆၣ်ပက့ၤလၢဟံၣ်တဘူၣ်ဒံးဘၣ်ႉလၢမုၢ်နၤခီစ့ၢ်ကီးပယီၤသုးခးလီၤကျိဖးဒိၣ်အဃိ ပက့ၤဆှၢပဟံၣ်ဖိဃီဖိတဘူၣ်ဒံးဘၣ်ႉပကက့ၤဟံတၢ်လၢဟံၣ်န့ၣ်ပဘၣ်ကွၢ်တၢ်အိၣ်သး၀ံၤမးပက့ၤမီၤနီၤႉ ကျိဖးဒိၣ်လၢ အတပိၢ်ဖးထီၣ်ဒံးဘၣ်စ့ၢ်ကီးအိၣ်ဒံးမီၤနီၤႉပစံၣ်ထီၣ်ကရီကဒးအဃိတၢ်လိၣ်တၢ်လဲးဒုအိၣ်လီၤမီၤနီၤ” အဂ့ၢ်န့ၣ် စံး၀ဲန့ၣ်လီၤ လၢကၠၤအ့စ့ၣ်ကၠံ၀့ၢ်ပူၤဒီးတၢ်ခိၣ်တၢ်ဃၢၤဖဲန့ၣ်သ့ၣ်တဖၣ်န့ၣ်ဒုးယၤတၢ်ဖ့ၣ်စၢကဲထီၣ်ဒံး၀ဲလၢ(KNLA)သုးပာ်ဖှိၣ်ဒီး ပယီၤသုးအဘၢၣ်စၢၤဒီးဒ်န့ၣ်အသိးခီဖျိသိလ့ၣ်လ့ၢ်ထီၣ်လ့ၢ်လိၤလၢ၀့ၢ်ပူၤတအိၣ်ဘၣ်ဒီးပနံာ်တၢ်ဖိတၢ်လံၤစ့ၢ်ကီး ဟဲလီၤတုၤအိၣ်စှၤအဃိဟီၣ်က၀ီၤပူၤဂံၢ်ခီၣ်ထံးတၢ်အီၣ်တၢ်အီတဖၣ်အၦ့ၤဒိၣ်ထီၣ်၀ဲအဂ့ၢ်န့ၣ် လီၢ်က၀ီၤကမျၢၢ် စံး၀ဲန့ၣ်လီၤႉ ဒ်န့ၣ်အသိးအပူၤကွံာ်စှၤသီအခါလၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤ အပူၤ (KNLA)တၢ်ပၢၢ်ဆၢသုးပာ်ဖှိၣ်ကရူၢ်နုာ်လီၤခး၀ဲနိၣ်တကီကီၢ်ဆၣ် ကးလံၣ်ခံသုးကလၢၤႇ ကွံလၢၢ်တၢသုးကလၢၤႇ ကီးတရံးသုးကီၣ်ကး၀ဲၤကျိၤရူဒီး မၠၣ်၀တံၣ်ကီၢ်ဆၣ် ကနဲလ့ပယီၤသုးကလၢၤသ့ၣ်တဖၣ်အံၤ အဂ့ၢ်န့ၣ် သ့ၣ်ညါဘၣ်န့ၣ် လီၤႉ
လူၢ်ပျဲၢ်ဒီးတၢ်ကြဲၢ်ဟီၣ်က၀ီၤပူၤၦၤဟ့ၣ်ဘီးက့ၣ်တံၢ်ၦ့ၤဘၣ်ဘၣ်လီၤအဃိၦၤဖံးအီၣ်မၤအီၣ်တၢ်ဖိတဖၣ် ထံၣ်ဘၣ်တၢ်ကီတၢ်ခဲ
လါနိၣ်၀့ဘၢၣ် ၉ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် လူၢ်ပျဲၢ်ဒီးတၢ်ကြဲၢ်ကီၢ်ဆၣ် ဟီၣ်က၀ီၤတဖၣ်အပူၤ ခီဖျိၦၤၦ့ၤဘီးက့ၣ်တံၢ်ဖိတဖၣ် ဟ့ၣ်ဘီးက့ၣ်တံၢ်အၦ့ၤ ဘၣ်ဘၣ်လီၤအဃိလီၢ်က၀ီၤကမျၢၢ်လၢအသူၣ်အီၣ်ဖျးအီၣ်ဘီးက့ၣ်တဖၣ်အံၤထံၣ်ဘၣ်၀ဲ တၢ်ကီတၢ်ခဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢတၢ်ကြဲၢ်ဒီးလူၢ်ပျဲၢ်ကီၢ်ဆၣ်အပူၤၦၤကမျၢၢ်လၢအိၣ်ဘူးကီၢ်ကၠီၣ်တဲၣ်-ကီၢ်ပယီၤကီၢ်ဆၢလၢအသူၣ်အီၣ်ဖျးအီၣ် ဘီးက့ၣ်တံၢ်သ့ၣ်တဖၣ်အံၤလၢအ၀ဲသ့ၣ်ကသူၣ်လီၤဘီးက့ၣ်အဂီၢ်ဘၣ်လဲၤဟံလိၢ်စိစ့လၢယိၤသ့ၣ်ခိၣ်အအိၣ်၀ံၤမး သူၣ်လီၤဘၣ်၀ဲဘီက့ၣ်အံၤန့ၣ်လီၤႉဘၣ်ဆၣ်ဖဲအ၀ဲသ့ၣ်က့ၤခူၣ်ထီၣ်ကဒါက့ၤဘီးက့ၣ်တံၢ်အခါန့ၣ်ဘၣ်ဆါန့ၢ်က့ၤ၀ဲ ယိၤသ့ၣ်ခိၣ်အံၤလီၤအဃိဒ်အ၀ဲသ့ၣ်ဟ့ၣ်အၦ့ၤအသိးန့ၣ်ဘၣ်ဆါန့ၢ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ၦၤသူၣ်ဘီးက့ၣ်တဂၤစံး၀ဲလၢ“အ၀ဲသ့ၣ်န့ၣ်ဟ့ၣ်ၦၤဘီးက့ၣ်တံၢ်အၦ့ၤဘၣ်ဘၣ်လီၤအဃိဒီးပဘၣ်မၤန့ၣ်တတၣ်ဘၣ်မီၤနီၤႉ ဒ်ပဟ့ၣ်လီၤသးပမၤအသိးန့ၣ်ပမ့က့ၤန့ၢ်ကဒါက့ၤအမၠးဒုဂ့ၤ၀ဲႉခဲအံၤလီၤဂာ်ဒ်သိးမၤန့ၢ်ၦၤတၢ်ႇနလဲၤဟ့ၣ်လီၤအီၤစ့ ဒ်န့ၣ်လီၤႉ အန့ၣ်မးကမၢ်ထီၣ်ဒီးအ၀ဲသ့ၣ်ဒံး”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လီၢ်က၀ီၤကမျၢၢ်လၢအိၣ်ဟီၣ်က၀ီၤဖဲန့ၣ်အပူၤတဖၣ်အါဒၣ်တက့ၢ်ဆါန့ၢ်၀ဲဒၣ်တၢ်ချံတၢ်သၣ်သ့ၣ်တဖၣ်အံၤဆူ ယိၤခီပနံၣ် အအိၣ်ဒီးတကီၢ်ခါခဲအံၤခီဖျိယိၤခီပနံၣ်ဟ့ၣ်တၢ်ၦ့ၤဘၣ်ဘၣ်လီၤအဃိလီၢ်က၀ီၤၦၤကမျၢၢ်တဖၣ် တၢ်ကီတၢ်ခဲအိၣ်ထီၣ်လၢ တၢ်လုၢ်အီၣ်နီၢ်ခိသးသမူအဂ့ၢ်န့ၣ် ၦၤသူၣ်ဘီးက့ၣ်ဖိတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ လၢကီၢ်ပယီၤအပူၤသုးဟံးန့ၢ်တၢ်စိတၢ်ကမီၤအတီၢ်ပူၤပထံၣ်ဘၣ်လၢယိၤတနီၤဟံးန့ၢ်၀ဲတၢ်ခွဲးတၢ်ယာ်မၤလီၤစှၤ ၀ဲဒၣ် ၦၤမၤတၢ်ဖိအဘူးအလဲဒီးဟ့ၣ်၀ဲဒၣ်တၢ်ချံတၢ်သၣ်အၦ့ၤဘၣ်ဘၣ်ဖိလီၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါတဂၤ စံး၀ဲန့ၣ်လီၤႉ အ၀ဲစံး၀ဲလၢ“မ့ဆဲးလဲၤသးဒ်အံၤဒုဒ်သိးသုတဘၣ်ဒိဘၣ်ထံးပတၢ်ဖံးတၢ်မၤတဂ့ၤအဂီၢ်န့ၣ်ဒ်အလီၢ်အိၣ်အသိးန့ၣ် ပကဘၣ်ဒီသဒၢအီၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ဖဲအပူၤကွံာ်(၂၀၂၁)လါဖ့ၤဘြူၤအါရံၤ ၁သီ သုးဟံးန့ၢ်တၢ်စိတၢ်ကမီၤ၀ံၤလီၢ်ခံန့ၣ် ခီဖျိစ့ယိၤအၦ့ၤထီၣ်ဒီး ကီၢ်ပူၤတၢ်ၦ့ၤထီၣ် ကွ့ၢ်ကွ့ၢ်အဃိ ၦၤလၢအသူၣ်အီၣ်ဖျးအီၣ်ဖံးအီၣ်မၤအီၣ်တၢ်သ့ၣ်တဖၣ်အံၤထံၣ်ဘၣ်၀ဲတၢ်ကီတၢ်ခဲဒီး တၢ်ကီတၢ်ခဲအိၣ်ထီၣ် လၢတၢ်လုၢ်အီၣ်နီၢ်ခိသးသမူတကပၤအဂ့ၢ်န့ၣ် လူၢ်ပျဲၢ်ဒီးတၢ်ကြဲၢ် ကမျၢၢ်လၢအသူၣ်အီၣ်ဖျးအီၣ် တၢ်တဖၣ်စံး၀ဲန့ၣ်လီၤႉ ဒ်န့ၣ်အသိးဖဲအပူၤကွံာ်(၂၀၂၂)နံၣ်အခါစ့ၢ်ကီး ၦၤသူၣ်အီၣ်ဖျးအီၣ်တၢ်ဖိလၢအိၣ်ကီၢ်ပယီၤ-ကီၢ်ကၠီၣ်တဲၣ်ကီၢ်ဆၢ သူမှဲကျိကပၤအံၤတဖၣ် ဖဲတၢ်ချံတၢ်သၣ်ဟးထီၣ်အဆၢကတီၢ်န့ၣ် ခီဖျိယိၤသ့ၣ်ခိၣ်တဖၣ်ဟ့ၣ်တၢ်ချံတၢ်သၣ်အၦ့ၤ ဘၣ်ဘၣ်လီၤအဃိ ဖဲန့ၣ်ကမျၢၢ်တဖၣ်ထံၣ်ဘၣ်၀ဲတၢ်ဂ့ၢ်ကီဒံးအဂ့ၢ်န့ၣ် ၦၤသူၣ်အီၣ်ဖျးအီၣ်တၢ်ဖိတဖၣ်စံး၀ဲန့ၣ်လီၤႉ
ဒ၀ဲၢ်၀့ၢ်ပူၤခီဖျိၦၤၦ့ၤသဲးသၣ်တအိၣ်ဘၣ်အဃိသဲးသၣ်ၦ့ၤဟးဂီၤ
လါနိၣ်၀့ဘၢၣ် ၉ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် ဒ၀ဲၢ်၀့ၢ်အပူၤ တနံၣ်အံၤခိဖျိၦ့ၤသဲးသၣ်တအိၣ်ဘၣ်အဃိ သဲးသၣ်တၢ်ဆါတၢ်ၦ့ၤဟးဂီၤ၀ဲဒၣ် အဂ့ၢ်န့ၣ် ၦၤၦ့ၤဆါသဲးသၣ်တဖၣ် စံး၀ဲန့ၣ်လီၤႉ လၢဒ၀ဲၢ်၀့ၢ်ပူၤတုၤလၢမဟိန့ၣ်သဲးသၣ်တပီၢ်န့ၣ်အၦ့ၤအိၣ်၀ဲ(၄၀၀၀)တုၤ(၄၅၀၀)ကၠးညါဒီးဘၣ်ဆၣ်ဖဲတနံၣ်အံၤ လါမ့ၤအတီၢ်ပူၤန့ၣ်သဲးသၣ်တပီၢ်န့ၣ်အၦ့ၤအိၣ်တ့ၢ်က့ၤထဲ(၂၀၀၀)တုၤ(၂၅၀၀)ကၠးလီၤအဂ့ၢ်န့ၣ် ၦၤၦ့ၤဆါသဲးဖိတဖၣ် စံး၀ဲန့ၣ်လီၤႉ စးထီၣ်ဖဲလါအီးကထိဘၢၣ်တၢတနွံန့ၣ်ခီဖျိၦၤၦ့ၤသဲးတအိၣ်အါအါဘၣ်လၢၤဘၣ်လီၤစှၤအဃိ သဲးသၣ်အၦ့ၤလီၤ အါန့ၢ်အပူၤကွံာ်မဟိတ၀ာ်ဘျဲၣ်ညါဒီးသဲးသၣ်တၢ်ဆါတၢ်ၦ့ၤဟးဂီၤ၀ဲအဂ့ၢ်န့ၣ် ၦၤၦ့ၤဆါသဲးဖိတဂၤ စံး၀ဲန့ၣ်လီၤႉ အ၀ဲစံး၀ဲလၢ“ဖဲ၀့ၢ်ပူၤအံၤၦၤၦ့ၤသဲးသၣ်တအိၣ်အဃိၦၤပာ်တ့ၢ်ကွံာ်အီၤဒ်န့ၣ်လီၤႉသဲးၦ့ၤလီၤအဃိဆှူခဲလၢာ်လီၤႉ ၦၤၦ့ၤတၢ်ဖိတဖၣ်နါက့အိၣ်ဘှံးတၦ့ၤ၀ဲလၢၤဘၣ်ႉသဲးၦ့ၤန့ၣ်အိၣ်ထဲအလီၤလီၤႉဒ်သိးဒီးယသ့ၣ်ညါ(ပွဲရုံ)ကစၢ်တဂၤ န့ၣ်တလါအံၤအ၀ဲဆှူအကလီၢ်(၆၀၀)ဘျဲၣ်ညါႉလၢမုၢ်ထီၣ်ခိခိၣ်ဒူသ၀ီတကပၤန့ၣ်ခီန့ၣ်အါဒၣ်ၦၤမၤအီၣ်သဲးလီၤအဃိ ဒ်အၦ့ၤန့ၢ်အသိးန့ၣ်အ၀ဲသ့ၣ်ဟဲထီၣ်ဆါအ၀ဲသ့ၣ်သဲးသၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢကီၢ်ပယီၤမုၢ်ထီၣ်ခိခိၣ်ဒူသ၀ီအပူၤန့ၣ်လီၢ်က၀ီၤၦၤကမျၢၢ်သ့ၣ်တဖၣ်အါဒၣ်တက့ၢ်န့ၣ်သူၣ်၀ဲဒၣ်သဲးဒီး ခီဖျိပယီၤသုးကျိၤဟဲနုာ်လီၤလၢသ၀ီပူၤခဲအံၤခဲအံၤအဃိၦၤဟဲလီၤၦ့ၤသဲးသၣ်လၢလီၢ်က၀ီၤပူၤတအိၣ်ဒ်လၢညါအသိးလၢၤဘၣ်အဂ့ၢ်န့ၣ် လီၢ်က၀ီၤကမျၢၢ်တဂၤ စံး၀ဲန့ၣ်လီၤႉ “လၢညါန့ၣ်ၦၤဟဲၦ့ၤသဲးသၣ်တုၤလၢဟီၣ်က၀ီၤပူၤညါႇဟဲၦ့ၤ၀ဲဒီးသိလ့ၣ်တီၣ်တၢ်ဖိတၢ်လံၤႉခဲအံၤစ့ၢ်ကီးတၢ်ဒုးကဲထီၣ်ႉလၢပယီၤသုးတၢ်သမံသမိးတြဲၤလီၢ်န့ၣ်နါက့ၦၤအိၣ်ခိးထၢစ့အဃိလၢအံၤတကပၤန့ၣ်ၦၤဟဲတအိၣ်အါအါလၢၤဘၣ်ႉ ပမ့တဆါအီၤဘၣ်ပမ့ပာ်အီၤဒ်အံၤခီဒၢးပဘၣ်ယိၣ်လၢအကအုၣ်ဂီၤအဃိဒ်အၦ့ၤန့ၢ်န့ၣ်ပဆါကွံာ်အီၤလီၤ”အဂ့ၢ်န့ၣ် မုၢ်ထီၣ်ခိခိၣ်ကမျၢၢ်တဂၤ စံး၀ဲန့ၣ်လီၤႉ ခီဖျိသဲးသၣ်ၦ့ၤတအိၣ်လၢၤဘၣ်အဃိၦၤမၤအီၣ်သဲးဖိတဖၣ်အံၤဘၣ်ဆါဆှူကွံာ်အ၀ဲသ့ၣ်သဲးသၣ်ဒ်န့ၣ်လီၤဒီး ဒ်န့ၣ်အသိးထံၣ်ဘၣ်စ့ၢ်ကီး၀ဲတၢ်ကီတၢ်ခဲလၢတၢ်လုၢ်အီၣ်နီၢ်ခိသးသမူတကပၤအဂ့ၢ်န့ၣ် ၦၤသူၣ်သဲးဖိတဖၣ်စံး၀ဲန့ၣ်လီၤႉ လၢန့ၣ်အမဲာ်ညါဂံၢ်ခီၣ်ထံးတၢ်အီၣ်တအီတဖၣ်လၢအမ့ၢ်ဟုသးႇသိႇအံသၣ်ႇမိၢ်ဂံာ်သၣ်ႇပသၢသၣ်သ့ၣ်တဖၣ်အံၤစ့ၢ်ကီး ခီဖျိအၦ့ၤထီၣ်အါထီၣ်ခံဆးဘျဲၣ်ညါအဃိၦၤမၤအီၣ်သဲးဖိတဖၣ်အံၤအ၀ဲသ့ၣ်စ့ဟးထီၣ်ဒီးစ့နုာ်လီၤတကၢကီၣ်လိာ်သးဘၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ ဒ်န့ၣ်အသိးလၢကညီကီၢ်စဲၣ် ကီးတရံးကီၢ်ဆၣ် ကလံၤထံးဟီၣ်က၀ီၤ ဒူသ၀ီတဖၣ်အပူၤစ့ၢ်ကီး တနံၣ်အံၤၦၤၦ့ၤသဲးသၣ် တအိၣ်အါအါလၢၤဘၣ်လီၤစှၤ၀ဲဒၣ်အဂ့ၢ်န့ၣ် ဟီၣ်က၀ီၤဂံၢ်ခီၣ်ထံးတၢ်ကစီၣ်စံး၀ဲအသိး သ့ၣ်ညါဘၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤန့ၢ်(၂)နံၣ်ဘျဲၣ်လီၢ်ခံအံၤ လီၢ်က၀ီၤၦၤကမျၢၢ်လၢအသူၣ်အီၣ်ဖျးအီၣ်တၢ်တဖၣ်သဂၢၢ်ဘၣ်၀ဲ သဲးသၣ်ႇဃၢမံၤတံၢ်ႇမာ်အံးသၣ်သ့ၣ်တဖၣ်အံၤအၦ့ၤတအိၣ်၀ဲဘၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲအသိး သ့ၣ်ညါဘၣ် န့ၣ်လီၤႉ
ထံရူၢ်ကီၢ်သဲးတၢ်ပညိၣ်တဒ်သိးလိ၁်သးဘၣ်အဃိပ၁်ဖှိၣ်မၤသကိးတၢ်ဒီး(KTLA)တသ့ဘၣ်အဂ့ၢ် KNU စံး၀ဲ
လါနိၣ်၀့ဘၢၣ် ၈ သီႇ ၂၀၂၃ နံၣ်ႇ ခ့ၣ်အဲးစံၣ် ခီဖျိထံရူၢ်ကီၢ်သဲးတၢ်မုၢ်လၢ်ကွၢ်စိတဒ်သိးဘၣ်ဒီးပာ်ဖှိၣ်မၤသကိးတၢ်ဒီးကီၢ်သူလ့ၤသုးမုၢ်ဒိၣ်(KTLA)တသ့ဘၣ်အဃိ ဒ်သိးၦၤအိၣ်လၢ(ခ့ၣ်အဲၣ်ယူၣ်)တၢ်အိၣ်ဆၢထၢၣ်ပူၤတဖၣ်အံၤအတၢ်ပာ်ဖှိၣ်မၤဘၣ်ထွဲလိာ်သးဒီး(KTLA)သုတအိၣ်တဂ့ၤ အဂီၢ် တၢ်ကဒုးသ့ၣ်ညါကဒါက့ၤကရူၢ်ကရၢဘၣ်ထွဲတဖၣ်အဂ့ၢ်န့ၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ထုးထီၣ်ပာ်ဖျါ ၀ဲဖဲလါနိၣ်၀့ဘၢၣ် ၆ သီအနံၤ န့ၣ်လီၤႉ တၢ်မၤခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ(၁၇)၀ီတ၀ီခီကရဲး၀ံၤလီၢ်ခံ ဖဲတလါအံၤလါနိၣ်၀့ဘၢၣ် ၃ သီတုၤ ၅ သီ အနံၤ လၢသၢသီအတီၢ်ပူၤ သၢ၀ီတ၀ီ လီၢ်ခၢၣ်သးပၢဆှၢတၢ်ကမံးတံာ်မၤ၀ဲတၢ်အိၣ်ဖှိၣ်ဒီး တၢ်အိၣ်ဖှိၣ်၀ံၤ တၢ်ထုးထီၣ် ဘိးဘၣ်ရၤလီၤ၀ဲဒ်အံၤန့ၣ်လီၤႉ KNU ၦၤကတိၤတၢ်ပၢ ပဒိၣ်စီၤကျၢၤစ့ စံး၀ဲလၢ“ဖဲတၢ်မဲာ်ညါတၢ်ဒုးအပူၤခ့ခါဆၢကတီၢ်ခဲအံၤန့ၣ်တၢ်ကရၢကရိလၢ ခံဖုထံရူၢ်ကီၢ်သဲးတၢ်ပညိၣ်တဒ်သိးဘၣ်သုးဂ့ၢ်၀ီတၢ်ပညိၣ်တဒ်သိးဘၣ်အဖီခိၣ်အံၤပမၤသကိးတၢ်တသ့ဘၣ်ႇ တကြၢးဘၣ် တဘၣ်ဘၣ်အဂ့ၢ်န့ၣ်ပအဲၣ်ဒိးတဲဒ်န့ၣ်လီၤႉတၢ်လၢ(KNLA)သုးမုၢ်ဒိၣ်န့ၣ်အိၣ်ဒီးတၢ်သိၣ်တၢ်သီတၢ်ဘျၢ သ့ၣ်တဖၣ်ႇ တၢ်ဒိကနၣ်တၢ်နဲၣ်လီၤတၢ်ကလုၢ်လီၤတံၢ်လီၤဆဲးသ့ၣ်တဖၣ်န့ၣ်လီၤႉလီၤဆီဒၣ်တၢ်သုးဂ့ၢ်၀ီအတၢ်ထံၣ်ဒီးတၢ်ဒိကနၣ်လူၤပိာ်မၤထွဲ၀ဲဒၣ်တၢ်ကလုၢ်မ့ၢ်ဂ့ၤႇတၢ်သိၣ်တၢ်သီတၢ်ဘျၢသ့ၣ်တဖၣ်မ့ၢ်ဂ့ၤန့ၣ်(KNLA)ဒီးအ၀ဲသ့ၣ်ခီန့ၣ် တဒ်သိးဘၣ် အဖီခိၣ် ဖဲတၢ်ဒုးပျီပူၤဘၣ်ကွၢ်ဆၢၣ်မဲာ်ဒီးတၢ်ဂ့ၢ်ကီသ့ၣ်တဖၣ်အတၢ်ဒိကနၣ်လူၤပိာ်မၤထွဲ၀ဲဒၣ်ၦၤဂ့ၢ်၀ီခွဲးယာ်သ့ၣ်တဖၣ်တၢ်ရ့လိာ်မုၣ်လိာ်ဒီးဒူဖိသ၀ီဖိသ့ၣ်တဖၣ်မ့ၢ်ဂ့ၤတၢ်သ့ၣ်တဖၣ်အံၤတဒ်သိးဘၣ်အဖီခိၣ်ဒီးကဲထီၣ်အဃိ ပ(ခ့ၣ်အဲၣ်ယူၣ်)ထံၣ်၀ဲလၢ တကြၢးတဘၣ်ဘၣ်အဖီခိၣ်ဒီးပဘိးဘၣ်ရၤလီၤ၀ဲဒၣ်လံာ်အံၤလီၤမီၤနီၤ”အဂ့ၢ်န့ၣ် စံး၀ဲန့ၣ် လီၤႉ (ခ့ၣ်အဲၣ်ယူၣ်)ထုးထီၣ်ဘိးဘၣ်ရၤလီၤလံာ်ဘၣ်ဆၣ်တကီၢ်ခါခဲအံၤလၢပျီပူၤတၢ်မဲညါန့ၣ်တဒူၣ်ဒီးတဒူၣ်တၢ်ပာ်ဖှိၣ် မၤသကိးတၢ်အိၣ်၀ဲဒီးဒ်န့ၣ်အသိးကမျၢၢ်တဖၣ်စ့ၢ်ကီးကခိးကွၢ်ပဲာ်ထံနီၤဖး၀ဲလီၤအဂ့ၢ်န့ၣ် (KTLA)သုးရိၣ်မဲခိၣ်ကျၢၢ် သုးခိၣ်ကျၢၢ်ဂီၢ်ဂ့ၢ် စီၤနၢၤဒါမၠး စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“လၢတၢ်မဲာ်ညါန့ၣ်ယထံၣ်ၦၤမၤသကိးတၢ်လီၤမီၤနီၤႉလၢတၢ်လီၢ်ခံခီမၤ၀ဲဒ်လဲၣ်တဲတဘၣ်ဘၣ်ႉ လၢထံဖိကီၢ်ဖိတၢ်အိၣ်သးခီဒၢးကွၢ်ထံကွၢ်ဆး၀ံၤလီၤ” အဂ့ၢ်န့ၣ် စံး၀ဲန့ၣ်လီၤႉ (KNU)ဒီး(KTLA)တၢ်ဂ့ၢ်ကီလၢအဟဲကဲထီၣ်သးခဲအံၤတဖၣ်ကဲထီၣ်တၢ်လီၤမုၢ်လီၤဖးလၢကညီကမျၢၢ်ကဒဲကဒဲ အဘၢၣ်စၢၤသ့အဃိခံခီခံကပၤကဘၣ်ထံၣ်လိာ်သးမးသ့လီၤအဂ့ၢ်န့ၣ် ဂံၢ်ခီၣ်ထံးကညီတၢ်ကရၢကရိ ခိၣ်တဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“တၢ်ဂ့ၢ်၀ဲအံၤတၢ်ကြၢးလၢကျဲၤဃူကျဲၤဖိးအီၤစိအီၤအလီၢ်မ့ၢ်အိၣ်လၢတၢ်ကဘၣ်ဃု၀ဲဒၣ်ၦၤသၢဖုတဖုလၢကနုာ်လီၤ၀ဲဒၣ်လၢတၢ်ဘၢၣ်စၢၤလၢကဂုာ်ကျဲးစၢးကျဲၤဃူကျဲၤဖိးတၢ်န့ၣ်ယထံၣ်သၦၢ်ကတၢၢ်လီၤႉယဆိမိၣ်ၦၤကညီဖိန့ၣ်တအဲၣ်ဒိးထံၣ်ဘၣ်၀ဲလၢကဒဲကဒဲဘၣ်ခးလိာ်သးဘၣ်ႉပဘၣ်ယိၣ်လၢတၢ်ဂ့ၢ်ကီလၢအကဲထီၣ်လၢကဒဲကဒဲဘၢၣ်စၢၤအံၤကတုၤလၢၦၤကမျၢၢ်အကျါမီၤနီၤႉတၢ်သ့ၣ်တဖၣ်အံၤကဲထီၣ်၀ဲဒၣ်တၢ်လီၤမုၢ်ပြံပြါ”အဂ့ၢ်န့ၣ် စံး၀ဲန့ၣ်လီၤႉ (ခ့ၣ်အဲၣ်ယူၣ်)မ့ဆဲးလဲၤဒ်ထံရူၢ်ကီၢ်သဲးကျဲခဲအံၤအသိးန့ၣ်တမ့ၢ်လၢထံရူၢ်ကီၢ်သဲးအတၢ်ပညိၣ်လၢထီၣ်ၦဲၤထီၣ်ၦဲၤထီၣ်တညီ၀ဲဘၣ်အဂ့ၢ်န့ၣ် ကီၢ်သူလ့ၤသုးမုၢ်ဒိၣ်(KTLA)သုးရိၣ်မဲခိၣ်ကျၢၢ် သုးခိၣ်ကျၢၢ်ဂီၢ်ဂ့ၢ် စီၤနၢၤဒါမၠး...
တၢ်အိးထီၣ်ကီၢ်စဲၣ်မုၢ်နံၤတၢ်ရဲၣ်တၢ်ကျဲၤအပူၤၦၤဟဲထီၣ်တၢ်တဖၣ်အိၣ်ထဲသုးကီၣ်ကး၀ဲၤကျိၤၦၤမၤတၢ်ဖိဟံၣ်ဖိဃီဖိတဖၣ်လီၤ
လါနိၣ်၀့ဘၢၣ် ၈ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲမဟါလါနိၣ်၀့ဘၢၣ် ၇ သီ ဂီၤခီအဆၢကတီၢ် လၢဖၣ်အၣ်၀့ၢ် သံၤရံၣ်ပျီပူၤန့ၣ် တၢ်မၤ၀ဲတၢ်အိးထီၣ်(၆၈)၀ီတ၀ီ ကညီကီၢ်စဲၣ်မုၢ်နံၤတၢ်ရဲၣ်တၢ်ကျဲၤဒီးၦၤဟဲထီၣ်တၢ်သ့ၣ်တဖၣ်အိၣ်ဒၣ်ထဲ ကီၢ်စဲၣ်သုးကီၣ်ကးစုတီၤဖီလာ်၀ဲၤကျိၤ ၦၤမၤတၢ်ဖိဟံၣ်ဖိဃီဖိႇလီၢ်က၀ီၤကရူၢ်ကရၢလၢအဟ့ၣ်ဂံၢ်ဟ့ၣ်ဘါသုးကီၣ်ကးအံၤလီၤဒီး တၢ်မၤဃံးထီၣ်စ့ၢ်ကီး၀ဲ တၢ်ဘံၣ်တၢ်ဘၢအဂ့ၢ်န့ၣ် ၀့ၢ်ပူၤကမျၢၢ်တဖၣ်စံး၀ဲန့ၣ်လီၤႉ ၦၤအိၣ်ဘူးဖဲသံၤရံၣ်ပျီကပၤအံၤတဂၤစံး၀ဲလၢ“ဖဲတဂီၤအံၤလၢ(ပၠံၣ်ထီၣ်စူၣ်)ကျဲဖးဒ့ႇကွီၢ်ဘျီၣ်ရူကျဲႇကၤသၤယၤ ဘျီၣ်ကျဲႇကူၣ်သ့ခိၣ်ရူကျဲႇသံၤရံၣ်ပျီကပၤ၀း၀းတရံးကျဲတဖၣ်န့ၣ်ၦၤပံးဃာ်အီၤခဲလၢာ်လီၤႉပယီၤသုးပံးဃာ်၀ဲ စးထီၣ်လၢ သုးဟံးန့ၢ်တၢ်စိတၢ်ကမီၤတုၤလၢခဲအံၤတစုလီၤႉနကလဲၤလၢပျီပူၤအဂီၢ်န့ၣ်အ၀ဲသ့ၣ်အိးထီၣ်၀ဲဒၣ်ထဲ (ပၠံၣ်ထီၣ်စူၣ်)ရူကျဲမုၢ် ဖးဒိၣ်အံၤလီၤႉဒိဒုနုာ်လိၤပြၢတၢ်အိၣ်ဘၣ်ဆၣ်အိၣ်ဒၣ်အ၀ဲသ့ၣ်ဂဲၤကလံၣ်အ၀ဲသ့ၣ်က့ၤကွၢ်လီၤကဒါက့ၤအကစၢ်သးဒ်န့ၣ်လီၤႉတၢ်ကွၢ်ကီလီၢ်နါက့ပာ်လီၤပၠး၀ဲဒ်န့ၣ်လီၤႉၦၤဆါတၢ်နါက့တအိၣ်အါအါဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် ဖဲမဟါလါနိၣ်၀့ဘၢၣ် ၇ သီအနံၤန့ၣ်လီၤႉ တၢ်မၤ(၆၈)၀ီတ၀ီ ကီၢ်စဲၣ်မုၢ်နံၤမူးတၢ်ရဲၣ်တၢ်ကျဲၤဘျီ၀ဲအံၤအပူၤန့ၣ် သုးကီၣ်ကးကရၢဖိ မါည့မီၣ် ဒီး ကီၢ်စဲၣ်သုးကီၣ်ကးၦၤပၢၤလီၢ်ဆ့ၣ်နီၤ စီၤမၠ့ၣ်အူ ဟဲထီၣ်၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ “တနံၣ်အံၤဒိနုာ်လီၤတပြၢတၢ်အိၣ်၀ဲအဒူၣ်(၂၀)ညါႉအဂဲၤကလံၣ်ကိးမုၢ်နၤဒဲးလီၤႉၦၤက၀ီၤဒ့ဖိဟဲကွၢ်တၢ်ႇဟဲဟးလၢဘူၣ်တအိၣ်အါအါဘၣ်ႉလၢတၢ်ဂဲၤကလံၣ်ဒိလီၢ်န့ၣ်အိၣ်၀ဲဒၣ်သုးကီၣ်ကး၀ဲၤကျိၤၦၤမၤတၢ်ဖိႇၦၤနုာ်လီၤဂဲၤကလံၣ်ပြၢ တၢ်ဖိႇ စံၣ်ညီၣ်ကွီၢ်လၢအဟ့ၣ်ၦၤမးတဖၣ်လီၤႉလၢအဂၤတဖၣ်န့ၣ်အိၣ်ဒၣ်ပယီၤသုးႇပၢၤကီၢ်ႇ(BGF)ဟးဆှၣ်တၢ်လီၤ” အဂ့ၢ်န့ၣ် ၦၤအိၣ်လၢဖၣ်အၣ်(က၀ီၤဒ့ ၄)ပတီၣ်ကျဲတဂၤအံၤစ့ၢ်ကီး စံး၀ဲန့ၣ်လီၤႉ လၢန့ၣ်အမဲာ်ညါတနံၣ်အံၤကီၢ်စဲၣ်မုၢ်နံၤမူးတၢ်ရဲၣ်တၢ်ကျဲၤအပူၤန့ၣ်ၦၤဟဲထီၣ်တၢ်တဖၣ်အိၣ်ဒၣ်ၦၤလၢအဘူးဒီး သုးကီၣ်ကးတဖၣ်လီၤဒီး ဒ်န့ၣ်အသိးအ၀ဲသ့ၣ်ပာ်လီၤတၢ်ဘံၣ်တၢ်ဘၢအိၣ်ခိးသမံသမိးတၢ်အါဒိၣ်န့ၢ်အပူၤကွံာ်နံၣ် အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လီၢ်က၀ီၤကမျၢၢ်လၢအဂၤတဂၤစ့ၢ်ကီးစံး၀ဲလၢ“ၦၤဟဲထီၣ်တၢ်တဖၣ်န့ၣ်အိၣ်ဒၣ်ၦၤလၢအဘူးအတံၢ်လိာ်သးဒီး သုးကီၣ်ကးႇ သုးကီၣ်ကးၦၤမၤတၢ်ဖိတဖၣ်လီၤႉမ့မ့ၢ်ၦၤလၢတၢ်ချၢဒုလဲၤတအိၣ်ဘၣ်ႉမ့၀ံၤအ၀ဲသ့ၣ်ပာ်လီၤတၢ်ဘံၣ်တၢ်ဘၢ၀း၀းတရံးလီၤႉၦၤမ့လဲၤကီၢ်စဲၣ်ဘူၣ်ပူၤန့ၣ်ၦၤကဘၣ်ဒုးနဲၣ်ပၠးလီၤ၀ဲဒၣ်ထံကီၢ်တၢ်ဂီၤ(မၣ်ပိၤတ့ၤ)ႇတၢ်လီၢ်တၢ်ကျဲမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ (၆၈)၀ီတ၀ီ ကညီကီၢ်စဲၣ်မုၢ်နံၤဘူၣ်လၢသုးကီၣ်ကးမၤ၀ဲအံၤ တၢ်စးထီၣ်မၤအီၤဖဲလါနိၣ်၀့ဘၢၣ် ၅ သီတုၤ ၁၁ သီ အနံၤ န့ၣ်လီၤႉ ဒ်န့ၣ်အသိးတၢ်ရဲၣ်တၢ်ကျဲၤဘျီ၀ဲအံၤအပူၤန့ၣ်အိၣ်၀ဲဒီးတၢ်ဂဲၤကလံၣ်ပြၢဒိႇ တၢ်ထိႇ တၢ်၀ၢ်ပြၢချံႇ...
တၢ်တဘၣ်မၤဘူၣ်မၤပွဲဒီးမၤတၢ်သူၣ်ဖှံသးညီမူးဘၣ်အဂ့ၢ် လီလိ(ပကဖ)ထုးထီၣ်ဟ့ၣ်ပလီၢ်၀ဲ
လါနိၣ်၀့ဘၢၣ် ၈ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် ဘျံးဒ၀ဲၢ်ကီၢ်ရ့ၣ် လီလိကီၢ်ဆၣ်အပူၤ တၢ်ဆၢကတီၢ်တုၤဃီၤလၢတၢ်ကမၤဆူၣ်ထီၣ်ဒုးယၤ တၢ်ဟူးတၢ်ဂဲၤလံအဃိ တၢ်တဘၣ်မၤဘူၣ်မၤပွဲဒီးမၤတၢ်သူၣ်ဖှံသးညီအမူးဘၣ်အဂ့ၢ်န့ၣ် လီလိကီၢ်ဆၣ်တၢ်ဒီသဒၢ ကမျၢၢ်သုးကရူၢ်(LLPDF)ထုးထီၣ်ဟ့ၣ်ပလီၢ်၀ဲဖဲအပူၤကွံာ်လါနိၣ၀့ဘၢၣ် ၅ သီအနံၤန့ၣ်လီၤႉ လၢယိၤဒိၣ်ကလံၤစိးဟီၣ်က၀ီၤအပူၤတၢ်မၤ၀ဲ(၁၀၂၇)ဒုးယၤတၢ်ဟူးတၢ်ဂဲၤအံၤအဃိ တၢ်ဒုးတၢ်ယၤကရၤလီၤအသး သ့၀ဲလၢထံကီၢ်ဒီတဘ့ၣ်အပူၤဒီး ဒ်န့ၣ်အသိးလၢ၀့ၢ်ပူၤစ့ၢ်ကီးတၢ်နုာ်လီၤမၤဒုးယၤတၢ်ဟူးတၢ်ဂဲၤသ့အဃိ ဒ်သိးကမျၢၢ်တဖၣ် ကအိၣ်ဘၣ်လၢတၢ်ပလီၢ်ပဒီပူၤအဂီၢ် ဘၣ်ထုးထီၣ်ဟ့ၣ်ပလီၢ်၀ဲဒ်အံၤလီၤအဂ့ၢ်န့ၣ် (LLPDF)မူဒါခိၣ်တဂၤ စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ အ၀ဲစံး၀ဲလၢ“စးထီၣ်ဖဲ(၁၀၂၇)ဒုးယၤတၢ်ဟူးတၢ်ဂဲၤဘျီန့ၣ်တၢ်ဒုးတၢ်ယၤရၤလီၤအသးတုၤလၢထံကီၢ်ဒီတဘ့ၣ်အပူၤသ့လီၤႉအဃိပအဲၣ်ဒိးဟ့ၣ်ပလီၢ်စိ၀့ၢ်ပူၤၦၤကမျၢၢ်တဖၣ်လၢကအိၣ်ကလဲၤကက့ၤလၢတၢ်ပလီၢ်ပဒီပူၤ”အဂ့ၢ်န့ၣ် စံး၀ဲန့ၣ်လီၤႉ ဆၢကတီၢ်ဖဲဒုးယၤတၢ်ဟူးတၢ်ဂဲၤရၤလီၤသးအါထီၣ်အတီၢ်ပူၤအံၤ စးထီၣ်ဖဲလါအီးကထိဘၢၣ်န့ၣ် ၦၤကမျၢၢ်လၢအိၣ် လီလိကီၢ်ဆၣ်ပူၤအံၤတဖၣ် တဘၣ်မၤတၢ်ဘူၣ်မၤပွဲႇမၤတၢ်သူၣ်ဖှံသးညီအမူးဘၣ်ဒီး မ့မ့ၢ်တခီကဒိသူၣ်ဒိသးသ့ၣ်ညါ ဘၣ်န့ၢ်ၦၤလၢအဟ့ၣ်လီၤသးသမူတဖၣ်ဒီးၦၤလၢအဘၣ်ဃ့ၢ်မှံဟးဖျိးတဖၣ်အံၤအဂီၢ် အဂ့ၢ်န့ၣ် (LLPDF)စံး၀ဲန့ၣ်လီၤႉ လၢန့ၣ်အမဲာ်ညါဖဲအပူၤကွံာ်(၂၀၂၂)လါဒံၣ်စ့ဘၢၣ်လီၢ်ခံကတၢၢ်တနွံအခါန့ၣ်စ့ၢ်ကီး လၢလီလိကီၢ်ဆၣ် ၀့ၤဒံၤသ၀ီအပူၤ မ့ၣ်ပိၢ်ပိၢ်ဖးထီၣ်၀ဲလၢတၢ်တ့တၢ်ဖျီမူးတၢ်ရဲၣ်တၢ်ကျဲၤပူၤတခါဒီး လၢတၢ်န့ၣ်အဃိ ၦၤဖိဒံဖိသၣ်ဃုာ်ဒီးၦၤဟဲထီၣ်တၢ်ဖျီအမူး တဖၣ်ခဲလၢာ်ဘၣ်ဒိဘၣ်ထံး၀ဲဒၣ်(၁၆)ဂၤအဂ့ၢ်န့ၣ် လီၢ်က၀ီၤကမျၢၢ် စံး၀ဲန့ၣ်လီၤႉ ဘၣ်ဃးမ့ၣ်ပိၢ်ပိၢ်ဖးထီၣ်တၢ်ဂ့ၢ်အံၤန့ၣ် လီလိကီၢ်ဆၣ် တၢ်ဒီသဒၢကမျၢၢ်သုးကရူၢ်စံး၀ဲလၢ တၢ်ပိၢ်ဖးထီၣ်အံၤ တမ့ၢ်အ၀ဲသ့ၣ်မၤ၀ဲဘၣ်ႇတဘၣ်ဃးဒီးအ၀ဲသ့ၣ်ဘၣ်ဒီး မ့ၢ်မ့ၢ်တခီမ့ၢ်ဒၣ်သုးကီၣ်ကးအတၢ်ကူၣ်တရံးမၤ၀ဲဒ်သိး တၢ်ထံၣ်ကမၣ်ကအိၣ်ထီၣ်လီၤအဂ့ၢ်န့ၣ် လံာ်တၢ်ပာ်ဖျါအပူၤစံး၀ဲန့ၣ်လီၤႉ