ပ၁်လီၤတၢ်ပညိၣ်ဖီတၢၣ်ဒီးလူၤပိ၁်မၤထွဲအီၤတုၤအလိၣ်ထီၣ်ဖးထီၣ်လၢနီၢ်ဖီဖီ
ပ၁်လီၤတၢ်ပညိၣ်ဖီတၢၣ်ဒီးလူၤပိ၁်မၤထွဲအီၤတုၤအလိၣ်ထီၣ်ဖးထီၣ်လၢနီၢ်ဖီဖီ နီအ့ပၠိ (လါနိၣ်၀့ဘၢၣ် ၇ သီ, ၂၀၂၃ နံၣ်) “ၦၤကိးဂၤဒဲးအိၣ်ဒီးအတၢ်ကီတၢ်ခဲလီၤႉ ပတၢ်ကီတၢ်ခဲအိၣ်ထဲလဲၣ်ဘၣ်ဆၣ်ႇ လၢပတၢ်အိၣ်မူဆူညါအဂီၢ် တၢ်လၢပမံမီၢ်ပာ် ပတၢ်မုၢ်လၢ်တၢ်တိာ်ပာ်သ့ၣ်တဖၣ်ပဘၣ်ပာ်လီၤသးကျၢၤမုစုဒီးပဘၣ်မၤလိၣ်ထီၣ်ဖးထီၣ်အီၤန့ၣ်လီၤ” ပှၤလၢအစံးတၢ်တဂၤအံၤန့ၣ်မ့ၢ်၀ဲကညီသးစၢ်မုၣ် နီၢ်ဖီဖီလၢအသးနံၣ်ကအိၣ်(၂၅)ခိၣ်ဃၢၤအံၤန့ၣ်လီၤ အပူၤကွံ၁်နီၢ်ဖီဖီထီၣ်၀ဲဒၣ်ကၠိလၢကီၢ်ကၠီၣ်တဲၣ်-ကီၢ်ပယီၤကီၢ်ဆၢ ခီကီၢ်ဆၣ်သူလ့ၤတီၤထီကၠိအံၤဒီး ဖဲန့ၣ်တဆီအ၀ဲဖျိထီၣ်၀ဲဒၣ်(Payap University)ကၠိ၀ံၤ တကီၢ်ခါခဲအံၤအ၀ဲဟဲက့ၤသိၣ်လိက့ၤတၢ်လၢ ၀့ၢ်မဲၢ်ဆီး ယိၤပဒိၣ်ကၠိတဖျၢၣ်အပူၤန့ၣ်လီၤ. ဖဲ(၂၀၂၂)နံၣ်အခါ နီၢ်ဖီဖီဖျိထီၣ်၀ဲဒၣ် payap (University)ကၠိအံၤဖဲ ကီၢ်ကၠီၣ်တဲၣ် ၀့ၢ်ကံၣ်မဲ အပူၤန့ၣ်လီၤႉ နီၢ်ဖီဖီစံး၀ဲလၢၦၤကိးဂၤဒဲးအိၣ်ဒီးအတၢ်ကီတၢ်ခဲလီၤႉဘၣ်ဆၣ်ပကဘၣ်ပာ်လီၤဖီတၢၣ်မၤထွဲအီၤႇ ပကဘၣ်အိၣ်ဒီး တၢ်နာ်အီၣ်လီၤပကစၢ်သးန့ၣ်လီၤႉ နီၢ်ဖီဖီအနီၢ်ဆံးခါအိၣ်၀ဲဒၣ်လၢကညီကီၢ်စဲၣ် မၠၣ်၀တံၣ်ဒီးဖဲန့ၣ်တဆီအ၀ဲသုးလီၢ်ဟဲထီၣ်အိၣ်က့ၤလၢ ကီၢ်ကၠီၣ်တဲၣ် ကီၢ်ဆၢ(သ့ၣ်ဘီဘိ)သ၀ီဒီး အဒီပုၢ်၀ဲၢ်အိၣ်ခဲလၢာ်(၇)ဂၤန့ၣ်လီၤႉ နီၢ်ဖီဖီမ့ၢ်ၦၤအဒိၣ်ကတၢၢ်တဂၤလၢအဒီပုၢ်၀ဲၢ်ကျါ ဒီး ခီဖျိတၢ်အိၣ်သးအကလုာ်ကလုာ်အဃိ ဖဲ(၂၀၁၃)နံၣ်အခါန့ၣ်အ၀ဲဟဲထီၣ်က့ၤကၠိလၢကီၢ်ကၠီၣ်တဲၣ် ၀့ၢ်မဲၢ်ဆီး ခီကီၢ်ဆၣ်သူလ့ၤတီၤထီကၠိ ဖဲအတီၤတဆံအခါန့ၣ်လီၤႉ “ယဒီပုၢ်၀ဲၢ်အိၣ်၀ဲနွံဂၤႇ ယကဲ၀ဲဒၣ်ၦၤအဒိၣ်ကတၢၢ်တဂၤႉယအိၣ်သ၀ီလၢသ့ၣ်ဘီဘိမီၤႉလၢညါခါန့ၣ်ယအိၣ်လၢ ရၤမတံဘျီဒုပဟဲက့ၤသုးက့ၤသးလၢဖလူႉခဲအံၤယမိယပါအိၣ်သ့ၣ်ဘီဘိမ့မ့ၢ်ယတီၢ်ကစၢ်ခီဒုခဲအံၤယအိၣ်လၢမဲၢ်ဆီးႉ တချုးယဟဲထီၣ်ဆၣ်သူလ့ၤကၠိဒံးဘၣ်န့ၣ်ယထီၣ်ကၠိဆိလၢသူမှဲခံကၠိႉယထီၣ်ကၠိဖဲန့ၣ်(၈)တီၤ,(၉)တီၤယထီၣ်ကၠိဖဲန့ၣ်ခံနံၣ်ႉယထီၣ်ဖဲန့ၣ်ခံနံၣ်၀ံၤမးယဟဲက့ၤပၠီက့ၤလၢဆၣ်သူလ့ၤကၠိ”အဂ့ၢ်န့ၣ် နီၢ်ဖီဖီ စံး၀ဲန့ၣ်လီၤႉ နီၢ်ဖီဖီဟဲထီၣ်ကၠိဖဲခီကီၢ်(ဆၣ်သူလ့ၤ)ကၠိသီသီအခါထံၣ်ဘၣ်စ့ၢ်ကီး၀ဲတၢ်ကီတၢ်ခဲအိၣ်တဆံးတက့ၢ်ဒီး ဘၣ်ဆၣ်အ၀ဲအိၣ်ဖဲန့ၣ်တၢ်ဆၢကတီၢ်ယံၤထီၣ်ဘျီတၢ်ကီတၢ်ခဲသ့ၣ်တဖၣ်အံၤတမ့ၢ်အကဲတၢ်ဂ့ၢ်ကီလၢအဂီၢ် လၢၤဘၣ်အဂ့ၢ်န့ၣ် အ၀ဲစံး၀ဲန့ၣ်လီၤႉ နီၢ်ဖီဖီဖျိထီၣ်ဆၣ်လ့ၤကၠိတဆံခံတီၤ၀ံၤအ၀ဲဆဲးဃုသ့ၣ်ညါမၤလိအါထီၣ်တၢ်ဒံးဖဲမဲၢ်ဆီး၀့ၢ်(Minmahaw School) တီၤတလၢကၠိတနံၣ်ဒံးလၢအကဆဲးထီၣ်(University)ကၠိအံၤအဂီၢ်ဒီးဖဲ(၂၀၁၈)နံၣ်အခါန့ၣ်အ၀ဲလဲၤထီၣ်က့ၤကၠိလၢ၀့ၢ်ကံၣ်မဲ payap (University)ကၠိအံၤအဂ့ၢ်န့ၣ် စံး၀ဲန့ၣ်လီၤႉ အ၀ဲစံး၀ဲလၢ“ယလဲၤထီၣ်ကၠိအံၤလၢယနီၢ်ကစၢ်လီၤႉဘၣ်မနုၤဃိလဲၣ်ဖဲန့ၣ်ခါန့ၣ်ဒ်သိးယသ့ၣ်ညါအသိးန့ၣ် ကၠိလၢအဃုန့ၢ်ၦၤကၠိဖိကျဲလၢကလဲၤထီၣ်ကၠိလၢ(international)ယူၣ်နံၣ်၀ၢၣ်စတံၣ်ဒ်န့ၣ်ခီဒုတအိၣ်ဒံးဘၣ်မီၤနီၤ ဆၢကတီၢ်ဖဲန့ၣ်ႉဒ်သိးကစၢ်ဘၣ်ဃုကျဲလၢကစၢ်လီၤ”အဂ့ၢ်န့ၣ် စံး၀ဲန့ၣ်လီၤႉ အ၀ဲလဲၤထီၣ် (University)တၢတၢတနံၣ်ခါန့ၣ် လဲၤ၀ဲလၢအကစၢ်တၢ်ရဲၣ်တၢ်ကျဲၤဘၣ်ဆၣ်...
လၢကညီကီၢ်စဲၣ်ကလံၤစိးဟီၣ်က၀ီၤအပူၤကမျၢၢ်တဖၣ်လိၣ်ဘၣ်ကသံၣ်ကသီဒီးတၢ်အံးထွဲကွၢ်ထွဲ
လါနိၣ်၀့ဘၢၣ် ၇ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ်ကလံၤစိး သၣ်တီၣ်ကၠံကီၢ်ဆၣ် ငွ့ၤတီၤသ၀ီကရူၢ်အပူၤ ခီဖျိမူခိၣ်ကလံၤသီၣ်ဂီၤတၢ်ဆီတလဲအဃိ ၦၤကမျၢၢ်တဖၣ်ဘၣ်၀ဲဒၣ်တၢ်ညၣ်ဂိၢ်တိးကွ့တၢ်ဆါအါမးဒီးလိၣ်ဘၣ်၀ဲဒၣ်ကသံၣ်ကသီတကးဒံးဘၣ်လိၣ်ဘၣ်စ့ၢ်ကီး ၀ဲဆူၣ်ချ့ၦၤမၤတၢ်ဖိအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ လၢကရ့ၣ်နံၣ်ကီၢ်စဲၣ်ဒီးန့ၣ်ပၠံၣ်တီၣ် ပၠ့မနါဟီၣ်က၀ီၤအခိၣ်အဃၢၤ ငွ့ၤတီၤသ၀ီကရူၢ် ငွ့ၤတီၤႇကိဒ့ၣ်သယဲၣ်တီၤႇ ကိဒ့ၣ်ယွၤတါစှ့ၤႇနါခၠိၤသ၀ီဆၢခိၣ်သ၀ီဆၢလာ်သ့ၣ်တဖၣ်အံၤအပူၤန့ၣ် ဆူၣ်ချ့ၦၤမၤတၢ်ဖိတဖၣ်တအိၣ်၀ဲဘၣ်ဒီး တကးဒံးဘၣ်ခီဖျိတၢ်ညၣ်ဂိၢ်တိးကွ့တၢ်ဆါအံၤအဃိလီၢ်က၀ီၤၦၤကမျၢၢ်ဒီးၦၤစံၣ်တၢ်ဒုးဖိလၢအဟဲဃ့ၢ်အိၣ်ဖဲသ၀ီ ၀ဲန့ၣ်အပူၤတဖၣ်ဘၣ်၀ဲဒၣ်တၢ်ညၣ်ဂိၢ်တိးကွ့တၢ်ဆါအဃိလိၣ်ဘၣ်၀ဲဒၣ်ကသံၣ်ကသီအဂ့ၢ်န့ၣ် ၦၤမၤစၢၤၦၤဃ့ၢ်မှံ ဟးဖျိးတဂၤ စံးဘၣ်ခ့ၣ်အဲးစံၣ်-ကညီိတၢ်ကစီၣ်ဒ်အံၤန့ၣ်လီၤႉ “လၢသၣ်တီၣ်ကလံၤစိးတကပၤန့ၣ်တၢ်ဒုးကဲထီၣ်အဃိၦၤကမျၢၢ်လၢအအိၣ်ဖဲန့ၣ်တဖၣ်ဟဲစံၣ်အိၣ်က့ၤလၢ(ငွ့ၤတီၤ) တကပၤအံၤမီၤနီၤႉလၢန့ၣ်တကပၤန့ၣ်ၦၤဘၣ်တၢ်ညၣ်တိးကွ့တၢ်ဆါအါမးႉၦၤဘၣ်မ့၀ံၤနါက့က့ၤၦၤက့ၤဘၣ်ကဒါ ကအိၣ်ကိးဂၤဒဲးဃၣ်ဃၣ်လီၤႉအခိၣ်သ့ၣ်ခီန့ၣ်လၢတၢ်ညၣ်ဂိၢ်တိးကွ့ကသံၣ်ကသီတကပၤန့ၣ်လိၣ်မီၤနီၤႉမ့၀ံၤကသံၣ် ကသီလၢၦၤနါအ့ၣ်ယွၤအဂီၢ်ႇၦၤကူးႇၦၤလိၤတကံယီၢ်တကးတဖၣ်အဂီၢ်လိၣ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ ခီဖျိကျဲတၢ်ဟးထီၣ်က့ၤလီၤကီခဲဒီးတၢ်ဒုးကဲထီၣ်အဃိကရ့ၣ်နံၣ်ကီၢ်စဲၣ်ပူၤဆူၣ်ချ့ၦၤမၤတၢ်ဖိတနီၤဘၣ်ဟဲကူစါ ယါဘျါန့ၢ်ၦၤဆါလၢ(ငွ့ၤတီၤ)ကရူၢ်တကပၤအံၤအဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ တီအူကီၢ်ရ့ၣ် သၣ်တီၣ်ကၠံကီၢ်ဆၣ်အပူၤ (ခ့ၣ်အဲၣ်ယူၣ်) ဆူၣ်ချ့တၢ်ကရၢကရိအ၀ဲၤကျိၤအိၣ်၀ဲဘၣ်ဆၣ်တၢ်လီၢ်လၢအ၀ဲသ့ၣ်လဲၤ၀ဲတတုၤဒံးဘၣ်စ့ၢ်ကီးအိၣ်၀ဲဒီးဒ်န့ၣ်အသိး ဘၣ်ပလီၢ်သးလၢပယီၤသုးတၢ်သမံသမိးတြဲၤအဂ့ၢ်န့ၣ် ကညီဆူၣ်ချ့မၤစၢၤကရူၢ်(KDHW) စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ (KDHW)ၦၤဘၣ်မူဘၣ်ဒါတဂၤစံး၀ဲလၢ“တၢ်ဆီၣ်ထွဲမၤစၢၤတနီၤန့ၣ်မ့တမ့ၢ်ကျဲလၢပလဲၤဆှၢညီနုၢ်အီၤဘၣ်တဖၣ်န့ၣ် ခီဖျိပကဘၣ်လဲၤခီတဲာ်၀ဲဒၣ်ပယီၤသုးတၢ်သမံသမိးလီၢ်အဃိအဘၣ်ဂီၢ်တဘၣ်ဂီၢ်အိၣ်ဒံးမီၤနီၤႉ၀ဲဒၣ်န့ၣ်ပအိၣ်၀ဲဒီး ခီကီၢ်ဆူၣ်ချ့ကရူၢ်အဃိတၢ်ဂ့ၢ်လၢအကဲထီၣ်သးလၢ(ငွ့ၤတီၤ)ခဲအံၤန့ၣ်ပကဘၣ်တၢၣ်ပီၣ်တဲသကိးအီၤဒီးကီၢ်ရ့ၣ်ဆူၣ်ချ့ မူဒါခိၣ်ဒီးၦၤမၤတၢ်ဖိတဖၣ်”အဂ့ၢ်န့ၣ် စံး၀ဲန့ၣ်လီၤႉ ဖဲအပူၤကွံာ်(၂၀၂၁)လါယနူၤအါရံၤ ခံနွံတနွံအခါန့ၣ် သုးကီၣ်ကးစုတီၤဖီလာ် သၣ်တီၣ်ကၠံကီၢ်ဆၣ် ဒူသ၀ီတၢ်ဂုၤထီၣ် ပသီထီၣ်၀ဲၤကျိၤအံၤ မၤ၀ဲဒၣ်တၢ်ဂုၤထီၣ်ကသီထီၣ်တၢ်တိၤကျဲၤအံၤဒံးလၢ သၣ်တီၣ်ကၠံကီၢ်ပူၤ ငွ့ၤတီၤဆၢလာ်သ၀ီဃုာ်ဒီး သ၀ီ(၂၁)ဖျၢၣ်အပူၤဒံးန့ၣ်လီၤႉ ဘၣ်ဆၣ်ငွ့ၤတီၤသ၀ီကရူၢ်ဃုာ်ဒီးကညီကီၢ်စဲၣ်ကလံၤစိးအကပိၤကပၤဒူသ၀ီတဖၣ်အပူၤ ဘၣ်ဃးဒီးကျဲတၢ်ဟးထီၣ် က့ၤလီၤႇဆူၣ်ချ့ဃုာ်ဒီးတၢ်အသနၢၣ်လၢအဂၤသ့ၣ်တဖၣ်တၢ်ဂုၤထီၣ်ပသီထီၣ်တအိၣ်ဘၣ်အိၣ်ဒံး၀ဲဒၣ်အါမးန့ၣ်လီၤႉ ဒ်န့ၣ်အသိးသုးပဒိၣ်အဆူၣ်ချ့၀ဲၤကျိၤ၀ဲၤဒ့အိၣ်၀ဲတနီၤဘၣ်ဆၣ်ၦၤမၤတၢ်ဖိတအိၣ်လၢကကွၢ်ထွဲၦၤဆူးၦၤဆါအံၤဘၣ် အဂ့ၢ်န့ၣ် လီၢ်က၀ီၤတၢ်ကစီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ ဒ်န့ၣ်အသိးလၢယၤဒိၣ်ဟီၣ်က၀ီၤဒီးကရ့ၣ်နံၣ်ကီၢ်စဲၣ်(ဒံၤမီၣ်စိၤ)မုၢ်နုာ် ကမျၢၢ်ၦၤဃ့ၢ်မှံဟးဖျိးတဖၣ်အံၤ ခီဖျိတၢ်ညၣ်ဂိၢ်တိးကွ့တၢ်ဆါအဃိ လိၣ်ဘၣ်၀ဲဒၣ်ကသံၣ်ကသီအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ
သုးခိးကီၢ်ဆၢ(BGF)မၤအါထီၣ်တၢ်ဘံၣ်တၢ်ဘၢလၢမၠၣ်၀တံၣ်၀့ၢ်ပူၤ၀့ၢ်ချၢ
လါနိၣ်၀့ဘၢၣ် ၇ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် မၠၣ်၀တံၣ်ကီၢ်ဆၣ်အပူၤ စှၤသီအတီၢ်ပူၤအံၤ ကညီသုးခိးကီၢ်ဆၢ(BGF)မၤအါထီၣ်သုးဂံၢ်ဘါလၢ ၀့ၢ်ပူၤ၀့ၢ်ချၢဒီးဟၣ်ဆှၣ်တၢ်ဟဲအါထီၣ်၀ဲအဂ့ၢ်န့ၣ် ၀့ၢ်ပူၤကမျၢၢ်တဖၣ်စံး၀ဲန့ၣ်လီၤႉ ပယီၤသုးတဖၣ်အံၤပျိာ်လဲထီၣ်အသးဒ်(BGF)အသိးဒီးဟးဆှၣ်တၢ်လၢ၀့ၢ်ပူၤ၀့ၢ်ချၢအဂ့ၢ်န့ၣ် မၠၣ်၀တံၣ်ကမျၢၢ်တဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“ဖဲမၠၣ်၀တံၣ်အံၤပယီၤသုးပျိာ်လဲထီၣ်အသးဒ်(BGF)အသိးဒီးဟးဆှၣ်တၢ်ဟးအိၣ်ဆီလီၤသးဒ်န့ၣ် အိၣ်မီၤနီၤႉလၢမၠ့ၤနံၤကိႇတၢ်ကူၣ်လဲၤမၤကၤလီၢ်(ကုန်သွယ်ရေးဇုန်),နီၢ်ဂံၢ်(၁)နီၢ်ဂံၢ်(၂)တိၤႇသုးတၢ်မဲာ်ညါရူ ကရၢၢ်ပူၤႇ မဲၣ်ထီးသလ့ကျဲဖးဒ့ႇမဲၢ်ကနဲႇယွၤသ့ၣ်ႇမၠၣ်စၤနံၤက၀ီၤဒ့တၢ်အိၣ်ခိးတၢ်လီၢ်တဖၣ်န့ၣ် ပယီၤသုးမၤအါထီၣ်သုးဂံၢ်ဘါမီၤနီၤႉ လၢ(BGF)တြဲၤနါက့အိၣ်လီၤႉသုးနီၣ်ဂံၢ်ဒုအိၣ်ဖးအါညါသုးသိလ့ၣ်စ့ၢ်ကီးဟးဆှၣ်တၢ်ဒီဒူၣ်ညါ” အဂ့ၢ်န့ၣ် မၠၣ်၀တံၣ်ကမျၢၢ်တဖၣ် စံး၀ဲန့ၣ်လီၤႉ ခီဖျိပယီၤသုးမၤအါထီၣ်သုးဂံၢ်ဘါဟးဆှၣ်တၢ်လၢမၠၣ်၀တံၣ်၀့ၢ်တၢ်လီၢ်သကုၤဆးဒးအံၤအဃိ က၀ီၤဒ့ပူၤကမျၢၢ်တဖၣ် ဘၣ်ယိၣ်၀ဲလၢတၢ်ဒုးကကဲထီၣ်ဒီးတၢ်မ့နုာ်လီၤခးတရူး(ကၣ်စံၣ်နိၣ်)တၢ်တၤကျိၣ်တၤစ့လီၢ်ဒ်သိးဒီး ယိၤဒိၣ်ကီၢ်စဲၣ် ကလံၤစိးအံၤန့ၣ်ၦၤကမျၢၢ်ဒီးၦၤမၤတၢ်ဖိလၢအမၤတၢ်ဖဲ(ကၣ်စံၣ်နိၣ်)အံၤသ့ၣ်တဖၣ် ကသံဘၣ်ဒိ ဘၣ်ထံး၀ဲအဂ့ၢ်န့ၣ် မၠၣ်၀တံၣ်ကမျၢၢ်စံး၀ဲန့ၣ်လီၤႉ “ခဲအံၤဖဲမဟါလၢစွ့ၤကိၣ်ကိၤန့ၣ်ၦၤထုးထီၣ်လံာ်မီၤနီၤႉပသ့ၣ်ညါဘၣ်လၢၦၤကပံး၀ဲဒၣ်တရူးတၢ်ဟးထီၣ်က့ၤလီၤ တလါ မီၤနီၤႉလၢယိၤဒိၣ်ကီၢ်တကပၤန့ၣ်စ့ၢ်ကီးကလုာ်ဒူၣ်ဖီၣ်စုက၀ဲၤနုာ်လီၤခး၀ဲဒၣ်(ကၣ်စံၣ်နိၣ်)တၢ်တၤကျိၣ်တၤစ့လီၢ်မီၤနီၤႉလၢပအိၣ်ကီၢ်ဆၢအံၤတကပၤနါက့အတကဲထီၣ်ဘၣ်န့ၣ်ပတဲတသ့ဘၣ်ႉမ့ခးဒုကဘၣ်ဒိဘၣ်ထံး၀ဲဒၣ်ၦၤက၀ီၤဒ့ဖိႇၦၤမၤတၢ်ဖိလၢအမၤတၢ်ဖဲ(ကၣ်စံၣ်နိၣ်)အံၤလီၤႉခဲအံၤလၢကီးတရံးႇကြုၢ်တုႇနိၣ်တကီတကပၤန့ၣ်စ့ၢ်ကီးၦၤနုာ်လီၤခးတုၤလၢ၀့ၢ်ပူၤလံအဃိမၠၣ်၀တံၣ်နါက့တညီလၢၤဘၣ်”အဂ့ၢ်န့ၣ် ၦၤလၢအအိၣ်ဘူးဒီးနီၣ်ဂံၢ်(၅)ကၠိတီသဲပိၤတြဲၤ ကၣ်စံၣ်နိၣ်ကပၤအံၤတဖၣ် စံး၀ဲန့ၣ်လီၤႉ ဖဲတလါအံၤလါနိၣ်၀့ဘၢၣ်ထီၣ်အခါန့ၣ်လၢကီးတရံး၀့ၢ်ပူၤ၀့ၢ်ချၢအခိၣ်အဃၢၤန့ၣ်တၢ်ဒုးကဲထီၣ်၀ဲလၢပယီၤသုးဒီး (KNLA) သုးပာ်ဖှိၣ်အဘၢၣ်စၢၤဒီးဒ်န့ၣ်အသိးဖဲမဟါလါနိၣ်၀့ဘၢၣ် ၆ သီ ဂီၤခီအဆၢကတီၢ်စ့ၢ်ကီး လၢကီးတရံးတီနီၢ်ကျဲလီၢ်လံၤ ကျဲသီဒီးလ့က့ၣ်ကိာ်ႇလဲၣ်ခၣ်တီၤတကပၤန့ၣ် ပယီၤသုးဆှၢထီၣ်ဆီတလဲ၀ဲဒၣ် သုးကျိၤအံၤကအိၣ်လၢသုးသိလ့ၣ်အခိၣ် (၅၀)ဘျဲၣ်ညါအဂ့ၢ်န့ၣ် ကမျၢၢ်အိၣ်၀့ၢ်ပူၤတဖၣ်စံး၀ဲန့ၣ်လီၤႉ
ခီဖျိတၢ်မၤလဲၢ်ထီၣ်တန့ခၠါ-ထံၤလိၤကျဲအဃိၦၤကမျၢၢ်လၢအိၣ်ကျဲကပၤတဖၣ်ဘၣ်ဟ့ၣ်ဆှူကွံ၁်အဟီၣ်ခိၣ်
လါနိၣ်၀့ဘၢၣ် ၇ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဖၣ်အၣ်ကီၢ်ရ့ၣ်(သုးက့ ၇)ဟီၣ်က၀ီၤအပူၤ ခီဖျိသုးကီၣ်ကးကမၤလဲၢ်ထီၣ် တန့ခၠါ-ထံၤလိၤကျဲဒီတကျိၤအဃိ ဒူသ၀ီအဖျၢၣ်(၃၀)ဘျဲၣ်လၢအိၣ်ကျဲကပၤအံၤသ့ၣ်တဖၣ် ဘၣ်ဟ့ၣ်ဆှူကွံာ်အဟီၣ်ခိၣ် အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ တၢ်မၤလဲၢ်ထီၣ်ကျဲအံၤမ့ၢ်၀ဲဒၣ်သုးကီၣ်ကးကီၢ်ဆၢဒီးကလုာ်ဒူၣ်တၢ်ဂုၤထီၣ်ပသီထီၣ်၀ဲၤကျိၤ(နတလ)အတၢ်ရဲၣ်တၢ်ကျဲၤဒီး ခီဖျိတၢ်မၤလဲၢ်ထီၣ်ကျဲအံၤအဃိလီၢ်က၀ီၤၦၤကမျၢၢ်တဖၣ်ဘၣ်ဟ့ၣ်ဆှူကွံာ်၀ဲအကျးႇကျးဖးဒိၣ်ဒီး အဟံၣ်အဃီသ့ၣ်တဖၣ် အဂ့ၢ်န့ၣ် လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“အ၀ဲသ့ၣ်ကမၤလဲၢ်ထီၣ်ကျဲဒီးမ့၀ံၤဟီၣ်ခိၣ်လီၢ်လၢအတပူၤဘၣ်တဖၣ်မ့ၢ်ဂ့ၤႇကျးဆါတၢ်ႇၦၤဟံၣ်ၦၤဃီတဖၣ် ၦၤဘၣ်မၤလီၢ်ၦီၢ်ကွံာ်ခဲလၢာ်လီၤႉတမၤလီၤၦီၢ်ဘၣ်တန့ၢ်ဘၣ်အဃိဘၣ်မၤဟးဂီၤခဲလၢာ်လီၤႉခဲအံၤအ၀ဲသ့ၣ် တဟ့ၣ်ဟီၣ်ခိၣ် အဘူးအလဲနီတမံၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢ(နတလ)အတၢ်မၤလဲၢ်ထီၣ်ကျဲအဖီခိၣ်အံၤၦၤဟံၣ်ၦၤဃီႇၦၤကျးဆါတၢ်လၢအိၣ်ကျဲကပၤအံၤတဖၣ် တၢ်ဟ့ၣ်လီၤ အ၀ဲသ့ၣ်ဟီၣ်ခိၣ်လီၢ်လၢအဘၣ်ဟ့ၣ်ဆှူ၀ဲအံၤအၦ့ၤတအိၣ်နီတမံၤဒံးဘၣ်အဂ့ၢ်န့ၣ် သ့ၣ်ညါဘၣ်လၢဟီၣ်ခိၣ်ကစၢ်အအိၣ် န့ၣ်လီၤႉ ၦၤဆါသဘျုၣ်(ကိယၤ)ကျးလၢကျဲ၀ဲန့ၣ်ကပၤတဂၤစံး၀ဲလၢ“ယဆါသဘျုၣ်(ကိယၤ)ဖဲကျဲ၀ဲအံၤန့ၢ်ဖးယံၤလံႉ လၢပအီၣ်ပအီအဂီၢ်န့ၣ်ပမၤအီၣ်တၢ်၀ဲအံၤလီၤႉပၣ်ဃုာ်ဒီးယဟံၣ်အမဲာ်ညါၦၤတမှံၤအိၣ်လီၢ်န့ၣ်အဃိပကဘၣ်ရိၢ်လီၤအီၤ မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ကျဲလၢသုးကီၣ်ကးကမၤလဲၢ်ထီၣ်၀ဲအံၤအိၣ်၀ဲဒၣ်လၢ(ခ့ၣ်အဲၣ်ယူၣ်)ဖၣ်အၣ်ကီၢ်ရ့ၣ်အဟီၣ်က၀ီၤပူၤဘၣ်ဆၣ် ဘၣ်ဃးတၢ်မၤလဲၢ်ထီၣ်ကျဲတၢ်ဂ့ၢ်အံၤန့ၣ်အိၣ်ဒၣ်သုးကီၣ်ကးဒုးသ့ၣ်ညါ(ခ့ၣ်အဲၣ်ယူၣ်)ၦၤဘၣ်မူဘၣ်ဒါလီၤဒီးမ့မ့ၢ်တခီ ခံခီခံကပၤတၢ်ထံၣ်လိာ်တၢၣ်ပီၣ်တဲသကိးတအိၣ်နီတမံၤဒံးဘၣ်အဂ့ၢ်န့ၣ် သ့ၣ်ညါဘၣ်လၢခ့ၣ်အဲၣ်ယူၣ်ဂံၢ်ခီၣ်ထံး တၢ်ကစီၣ်အအိၣ်န့ၣ်လီၤႉ ဒ်န့ၣ်အသိးအပူၤကွံာ်(၂၀၂၂)တုၤ(၂၀၂၃)အခါစ့ၢ်ကီး လၢသုးကီၣ်ကးကီၢ်ဆၢဒီးကလုာ်ဒူၣ်တၢ်ဂုၤထီၣ်ပသီထီၣ် ၀ဲၤကျိၤ(နတလ)အတၢ်ရဲၣ်တၢ်ကျဲၤအံၤတဆီ ဖဲတၢ်တ့တိၤလၢတန့ခၠါ-ထံၤလိၤကျဲအံၤအခါ ဟီၣ်ခိၣ်ႇဂာ်လၢၢ်ကမူၣ်ႇ လၢၢ်လၢအ၀ဲသ့ၣ်သူ၀ဲလၢအတ့တိၤအခါအံၤတဖၣ်အိၣ်တ့ၢ်လၢကျဲကပၤစံာ်ပျီပူၤအဃိၦၤမၤအီၣ်စံာ်ဟီၣ်ခိၣ်ကစၢ်တဖၣ်သူၣ်ဘုတသ့လၢၤဘၣ်ထံၣ်ဘၣ်၀ဲတၢ်ကီတၢ်ခဲကဲထီၣ်တ့ၢ်အသးဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကၠၤအ့စ့ၣ်ကၠံ၀့ၢ်တၢ်ဒုးအတီၢ်ပူၤပယီၤသုးသံ(၄၅)ဂၤအဂ့ၢ် SOF ထုးထီၣ်ပ၁်ဖျါ
လါနိၣ်၀့ဘၢၣ် ၇ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ(သုးက့ ၆)ဟီၣ်က၀ီၤ ကၠၤအ့စ့ၣ်ကၠံ၀့ၢ်ပူၤ ဖဲအပူၤကွံာ်လါအီးကထိဘၢၣ် ၂၇ သီ တုၤလါနိၣ်၀့ဘၢၣ် ၂ သီအနံၤ တၢ်ပၢၢ်ဆၢသုးပာ်ဖှိၣ်ကရူၢ်နုာ်လီၤခး၀ဲပယီၤသုးကျိၤဒီးပယီၤသုးကလၢၤ အတီၢ်ပူၤန့ၣ် ပယီၤသုးတကပၤသံ၀ဲဒၣ်(၄၅)ဂၤအဂ့ၢ်န့ၣ် သုးဂ့ၢ်၀ီလီၤဆီကရူၢ်(SOF) ထုးထီၣ်ပာ်ဖျါတၢ်ကစီၣ် ဖဲလါနိၣ်၀့ဘၢၣ် ၅ သီ အနံၤ န့ၣ်လီၤႉ ပယီၤသုးခီၣ်ချ့သုးရ့ၣ်(ခမရ-၃၅၈ႇ၅၅၈),ခီၣ်သုးရ့ၣ်(ခလရ-၅၆၁ႇ၅၅၇)သုးကျိၤတဖၣ်လၢအနီၣ်ဂံၢ်ကအိၣ် အဂၤ(၁၀၀)ဃၣ်ဃၣ်အံၤလၢအ၀ဲသ့ၣ်ကလဲၤဆှၢထီၣ်တၢ်အီၣ်တၢ်အီကျိချံၦာ်သၣ်ဆူဖိခၠံၣ်မုၢ်သုးကလၢၤအံၤအဂီၢ် ခီဖျိကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ခိးခး၀ဲအဃိပယီၤသုးတကပၤသံ၀ဲဒၣ်အဂၤ(၃၀)ဒီး တကးဒံးဘၣ်ခီဖျိနုာ်လီၤခး၀ဲပယီၤသုးပၢၤကီၢ်၀ဲၤလီၢ်ႇပၢပြးရူႇ(လ၀က)ရူႇသ့ၣ်ၦၢ်ရူဒီးတၢ်မၤသံမ့ၣ်အူရူအဃိ ပယီၤသုးသံအါထီၣ်ကဒီး၀ဲ(၁၁)ဂၤအဂ့ၢ်န့ၣ် SOF လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါဖဲအပူၤကွံာ်လါနိၣ်၀့ဘၢၣ် ၂ သီအနံၤစ့ၢ်ကီး ခီဖျိ(KNLA)ဒီး(SOF)သုးကျိၤသုးပာ်ဖှိၣ်အံၤ နုာ်လီၤခး ကဒီး၀ဲကွံလၢၢ်တၢပယီၤသုးကလၢၤအဃိပယီၤသုးတကပၤသံ၀ဲ(၄)ဂၤဒီးစံၣ်ထီၣ်ကွံာ်လၢသုးကလၢၤပူၤ အိၣ်၀ဲတနီၤ အဂ့ၢ်န့ၣ် (SOF)စံး၀ဲန့ၣ်လီၤႉ (SOF)တၢ်ဘိးဘၣ်ရၤလီၤမူဒါခိၣ်တဂၤစံး၀ဲလၢ“လၢကၠၤအ့စ့ၣ်ကၠံပူၤန့ၣ်ပယီၤသုးအဒုးယၤႇခီၣ်သုးရ့ၣ်တဖၣ်အိၣ်မီၤနီၤႉ (ခလရ-၂၈၃)သုးရ့ၣ်အိၣ်ႉပမၤဒုးယၤတၢ်ဟူးတၢ်ဂဲၤခဲအံၤန့ၣ်မ့ၣ်၀ဲဒၣ်(KNLA)အတၢ်တီခိၣ်ရိၣ်မဲဒီးပၣ်ဃုာ်၀ဲ ပကရူၢ် (SOF)မီၤနီၤႉကပၣ်ဃုာ်၀ဲဒီးကၠၤအ့စ့ၣ်ကၠံ(ပုဏ္ဏက)အၦၤတနီၤမီၤနီၤႉဃုာ်ဒီးဒြိကရူၢ်စ့ၢ်ကီးပပာ်ဖှိၣ်ထီၣ်သး ခဲလၢာ် ပမၤ၀ဲဒၣ်ဒုးယၤတၢ်ဟူးတၢ်ဂဲၤအံၤမီၤနီၤႉပယီၤသုးတကပၤသံဘၣ်ဒိဘၣ်ထံးအါႉအစံၣ်ထီၣ်ကွံာ်လၢသုးကလၢၤပူၤနါက့အိၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ကၠၤအ့စ့ၣ်ကၠံ၀့ၢ်ပူၤတၢ်ဒုးကဲထီၣ်လၢခံခီခံကပၤအဘၢၣ်စၢၤအတီၢ်ပူၤန့ၣ်ပယီၤသုးတကပၤသံ၀ဲ(၄၅)ဂၤဒီး ဘၣ်ဒိဘၣ်ထံး၀ဲ အါမးန့ၣ်လီၤႉဒ်န့ၣ်အသိးမ့မ့ၢ်တၢ်ပၢၢ်ဆၢသုးပာ်ဖှိၣ်ကရူၢ်တကပၤစ့ၢ်ကီးသံဘၣ်ဒိဘၣ်ထံးအိၣ်၀ဲဒၣ်အဂ့ၢ်န့ၣ် (SOF)လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ လၢန့ၣ်အမဲာ်ညါလၢခ့ၣ်အဲၣ်ယူၣ်(သုးက့ ၆)ဟီၣ်က၀ီၤ ကၠၤအ့စ့ၣ်ကၠံ၀့ၢ်ဒီးဒူသ၀ီတဖၣ်အပူၤ ခီဖျိ(KNLA)တီခိၣ်ရိၣ်မဲ တၢ်ပၢၢ်ဆၢသုးပာ်ဖှိၣ်ကရူၢ်နုာ်လီၤလုၢ်ဘၢဒိၣ်စိ၀ဲသုးကီၣ်ကးစုတီၤဖီလာ်၀ဲၤကျိၤရူတၢ်လီၢ်သ့ၣ်တဖၣ်န့ၢ်အဃိ ပယီၤသုးဟးထီၣ်ကွံာ်၀ဲဒၣ်ဒ်အံၤလီၤအဂ့ၢ်န့ၣ် (SOF)တၢ်ဘိးဘၣ်ရၤလီၤမူဒါခိၣ် စံးအါထီၣ်၀ဲန့ၣ်လီၤႉ ဖဲပတၢ်ပၢၢ်ဆၢသုးပာ်ဖှိၣ်ကရူၢ်နုာ်လီၤခးသုးကီၣ်ကးအ၀ဲၤကျိၤရူဒီးပယီၤသုးကလၢၤတၢ်လီၢ်၀ံၤလီၢ်ခံန့ၣ် ခီဖျိပယီၤသုးကဘီယူၤဟဲက့ၤခးလီၤကဒါတၢ်လၢတၢ်ဒုးကဲထီၣ်အခိၣ်အဃၢၤဒူသ၀ီပူၤအဃိ ၦၤကမျၢၢ်ဘၣ်ဒိဘၣ်ထံး ကအိၣ်လၢအဂၤ(၁၀)ညါအဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်ကရူၢ်တကပၤ...
ကျိဖးဒိၣ်လီၤတဲ၁်ပိၢ်ဖးထီၣ်လၢကီးတရံး၀့ၢ်ပူၤအဃိၦၤကမျၢၢ်ပိ၁်မုၣ်ဘၣ်ဒိ(၅)ဂၤအကျါပၣ်ဃု၁်ဖိသၣ်ဆံးတဂၤ
လါနိၣ်၀့ဘၢၣ် ၆ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲလါနိၣ်၀့ဘၢၣ် ၄ သီ မုၢ်ထူၣ် ၁၁ နၣ်ရံၣ်ဃၣ်ဃၣ်အဆၢကတီၢ် ခီဖျိကျိဖးဒိၣ်လီၤတဲာ်ပိၢ်ဖးထီၣ်လၢကညီကီၢ်စဲၣ် ကီးတရံး၀့ၢ် က၀ီၤဒ့(၁) ရှါပဲ(ရှမ်းပိုင်း)န့ၣ်အဃိ ကမျၢၢ်ၦၤပိာ်မုၣ်ဘၣ်ဒိ(၅)ဂၤအကျါပၣ်ဃုာ်၀ဲၦၤဖိသၣ်ဆံး(၁)ဂၤ အဂ့ၢ်န့ၣ် က၀ီၤပူၤကမျၢၢ်တဖၣ်စံး၀ဲန့ၣ်လီၤႉ ခီၣ်သုးရ့ၣ်(ခလရ-၉၇)လၢအိၣ်ဆီလီၤသးဖဲကီးတရံး၀့ၢ်ပူၤအံၤခီဖျိအ၀ဲသ့ၣ်ခးလီၤကျိဖးဒိၣ်တတလၢထီၣ်၀့ၢ်ဘၣ် လီၤတဲာ်ပိၢ်ဖးထီၣ်လၢက၀ီၤဒ့ပူၤဟံၣ်လၢၦၤအိၣ်တဆူၣ်အိၣ်တချ့ဘၣ်အံၤအကပၤအဃိ ၦၤဆါဃုာ်ဒီးၦၤတမှံၤလၢ အဟဲဟးလၢဟံၣ်၀ဲအံၤတဖၣ်ဘၣ်ဒိဘၣ်ထံး၀ဲအဂ့ၢ်န့ၣ် က၀ီၤဒ့၀ဲန့ၣ်ပူၤကမျၢၢ်တဖၣ် စံး၀ဲန့ၣ်လီၤႉ ၀့ၢ်ပူၤကမျၢၢ်တဂၤစံး၀ဲလၢ“ကျိဖးဒိၣ်န့ၣ်ဟးထီၣ်(၃)ဖျၢၣ်ႉအ၀ဲခံဖျၢၣ်န့ၣ်တလၢ၀့ၢ်မီၤနီၤႉဘၣ်ဆၣ်မ့မ့ၢ်အ၀ဲတဖျၢၣ် ခီန့ၣ် လီၤတဲာ်ပိၢ်ဖးထီၣ်လၢၦၤဆိးက့တဂၤန့ၣ်အဟံၣ်ခိၣ်မီၤနီၤႉၦၤဆါဃုာ်ဒီးၦၤတမှံၤလၢအလဲၤဟးလၢၦၤဆိးက့တဂၤန့ၣ်အဟံၣ်ဘၣ်ဒိ၀ဲဒၣ်(၅)ဂၤႉဖဲန့ၣ်ပၣ်ဃုာ်၀ဲဒၣ်ဒီးၦၤဖိသၣ်မုၣ်ဆံးဆံးဖိ(၄)နံၣ်တဂၤစ့ၢ်မီၤနီၤႉၦၤလၢအဆိးက့တဂၤန့ၣ်ကျိဖးဒိၣ်လီၤတဲာ်၀ံၤတစိၢ်ဖိဘျီအသံလီၤ”အဂ့ၢ်န့ၣ် စံး၀ဲန့ၣ်လီၤႉ ၦၤလၢအဘၣ်ဒိဘၣ်ထံးသ့ၣ်တဖၣ်အံၤမ့ၢ်၀ဲမၣ်န့မၠဲၤ(၆၀)နံၣ်ႇမၣ်ညိၣ်စ့ၤႇနီၢ်ဖီလွဲထူ(၂၀)နံၣ်ႇတၢ်ပိာ်မုၣ်ဒီး ၦၤဖိသၣ်မုၣ်ဆံးဆံးဖိ(၄)နံၣ်အံၤသ့ၣ်တဖၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ခီဖျိကျိဖးဒိၣ်လီၤတဲာ်ပိၢ်ဖးထီၣ်လၢ(က၀ီၤဒ့ ၁) ရှါပဲအဃိ ၦၤဘၣ်ဒိဘၣ်ထံးအါ၀ဲဒီး ဒ်န့ၣ်န့ၣ်အသိး ၦၤအိၣ်လၢက၀ီၤဒ့ပူၤတဖၣ်ဒီးလီၢ်က၀ီၤၦၤသ၀ီဖိလၢအဟဲစံၣ်အိၣ်ဖဲအံၤတဖၣ်ပျံၤတၢ်ဖုးတၢ်အဂ့ၢ်န့ၣ် ၦၤကမျၢၢ် စံး၀ဲန့ၣ်လီၤႉ အ၀ဲစံး၀ဲလၢ“ပအိၣ်လၢသ၀ီတဘူၣ်ဘၣ်အဃိပဟဲစံၣ်အိၣ်လၢ၀့ၢ်ပူၤမီၤနီၤႉပဟဲစံၣ်အိၣ်ဖဲက၀ီၤဒ့အံၤခီဒၢးတပူၤဘၣ်ႉ မ့ၢ်ဘၣ်လဲၤအိၣ်က့ၤဖဲလဲၣ်မးတသ့ၣ်ညါလၢၤဘၣ်ႉခဲအံၤၦၤလၢအသုးလီၢ်ညါန့ၣ်သုးလံႉဘၣ်အိၣ်လၢတၢ်ပျံၤတၢ်ဖုး ပူၤလီၤ”အဂ့ၢ်န့ၣ် ကမျၢၢ်ၦၤဃ့ၢ်မှံဟးဖျိးလၢအဟဲစံၣ်အိၣ်ဖဲက၀ီၤဒ့ပူၤအံၤတဂၤ စံး၀ဲန့ၣ်လီၤႉ ဖဲစှၤလါအတီၢ်ပူၤအံၤတၢ်ဒုးဆူၣ်ထီၣ်၀ဲလၢကီးတရံး၀့ၢ်ပူၤဒီးခီဖျိပယီၤသုးခးလီၤကျိဖးဒိၣ်အဃိ ၦၤကမျၢၢ်အိၣ်လၢ၀့ၢ်ပူၤတဖၣ်အံၤစ့ၢ်ကီးသံဘၣ်ဒိဘၣ်ထံးကဲထီၣ်၀ဲဒၣ်ကိးမုၢ်နံၤဒဲးအဂ့ၢ်န့ၣ် ကီးတရံးကမျၢၢ်တဖၣ် စံး၀ဲန့ၣ်လီၤႉ
လ့ၣ်သိၤ-တီအူကျဲ သိလ့ၣ်တီၣ်မာ်အံးသၣ်တဖၣ်ဘၣ်ဟ့ၣ်လီၤပယီၤသုးတြဲၤအဘူးအလဲအိၣ်လၢအကလး
လါနိၣ်၀့ဘၢၣ် ၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢလ့ၣ်သိၤအံၤတဆီသိလ့ၣ်လၢအကလဲၤဆါမာ်အံးသၣ်ဆူတီအူ၀့ၢ်ပူၤအံၤတဖၣ် ပယီၤသုးတၢ်သမံသမိးတြဲၤလီၢ် လၢအမ့ၢ်လ့ၣ်သိၤႇစလဲႇထိဘိၤကၠံႇနွံမဲၤကျဲဖးဒ့ဒီးတီအူ၀့ၢ်နုာ်လီၤ(စ့ၣ်တီ)တြဲၤခိၣ်ထိးကျဲဒီတကျိၤညါန့ၣ် သိလ့ၣ်တီၣ် မာ်အံးသၣ်တဖၣ်ဘၣ်ဟ့ၣ်လီၤ၀ဲဒၣ်တၢ်လ့ၢ်ထီၣ်လ့ၢ်လိၤအဘူးအလဲဒီး ဃ့၀ဲဒၣ်အါန့ၢ်ဒံးသိလ့ၣ်တီၣ် ၦၤလ့ၢ်ထီၣ်လ့ၢ်လိၤဖိ တဖၣ်အဂ့ၢ်န့ၣ် သၣ်တီၣ်၀့ၢ်ကမျၢၢ်လၢအဘူးဒီးၦၤနီသိလ့ၣ်ဖိတဂၤ စံး၀ဲန့ၣ်လီၤႉ အ၀ဲစံး၀ဲလၢ“အါဒၣ်တက့ၢ်ဘၣ်ဟ့ၣ်လီၤတြဲၤကိးဘ့ၣ်ဒဲးလီၤႉစးထီၣ်လၢလ့ၣ်သိၤတုၤလၢတီအူ(စ့ၣ်တီ)တိၤခိၣ်ထီး န့ၣ်တၢ်ဘၢၣ်စၢၤန့ၣ်တြဲၤအိၣ်(၅)ဘ့ၣ်ညါႉမ့မ့ၢ်သိလ့ၣ်လၢအတီၣ်ၦၤလ့ၢ်ထီၣ်လ့ၢ်လိၤတဖၣ်န့ၣ်ဘၣ်ဟ့ၣ်လီၤတြဲၤအဘူး အလဲတဘ့ၣ်န့ၣ်ကအိၣ်လၢအမၢလီၤႉပတီၣ်မးအံးသၣ်ဘျီဆိမိၣ်၀ဲလၢၦၤမၤမုၢ်ကျိၤ၀ဲၤကွာ်ဖိအဃိဃ့အါ၀ဲဒ်န့ၣ်မီၤနီၤႉ ”အဂ့ၢ်န့ၣ် စံး၀ဲန့ၣ်လီၤႉ တနံၣ်အံၤသၣ််တီၣ်ကၠံကီၢ်ဆၣ်အပူၤခီဖျိမူခိၣ်ကလံၤသီၣ်ဂီၤတဘၣ်ဆၢဘၣ်ကတီၢ်ဘၣ်အဃိမာ်အံးသၣ် ဟးထီၣ်တဂ့ၤ၀ဲဘၣ်ဒီးဒ်န့ၣ်အသိးပယီၤသုးတၢ်သမံသမိးတြဲၤတဖၣ်ဟံးန့ၢ်တၢ်ခွဲးတၢ်ယၤဃ့အီၣ်၀ဲဒၣ်စ့ဆူသိလ့ၣ် တီၣ်မာ်အံးသၣ်အအိၣ်လၢအကလီၢ်စ့ၢ်ကီးအိၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လ့ၣ်သိၤလီၢ်က၀ီၤကမျၢၢ်လၢအဂၤတဂၤစ့ၢ်ကီးစံး၀ဲလၢ“ၦၤအိၣ်ခိးတၢ်ဖဲတြဲၤန့ၣ်ဆီတလဲသးကိးမုၢ်နံၤဒဲးလီၤအဃိ ပဘၣ်ဟ့ၣ်လီၤစ့တနံၤဒီးတနံၤန့ၣ်တဒ်သိးလိာ်အသးဘၣ်မီၤနီၤႉသိၣ်လ့ၣ်လၢအတီၣ်မာ်အံးသၣ်တနီၤန့ၣ် ဃ့၀ဲ(၅)ကလး ပၢၢ်တုၤလၢ(၂)ကလီၢ်ဘျဲၣ်ညါႉအစှၤကတၢၢ်ဘၣ်ဟ့ၣ်လၢကလးလီၤႉဘၣ်ဟ့ၣ်လီၤဒ်အံၤဖဲမာ်အံးသၣ်ဟးထီၣ်အဆၢကတီၢ်တကတီၢ်လီၤႉဘၣ်ဘျီဘျီအ၀ဲသ့ၣ်မ့မူၤထီၣ်န့ၣ်မၤဘံဘူတၢ်ညါ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ်န့ၣ်လီၤႉ သၣ်တီၣ်ကၠံ၀့ၢ်လီၢ်က၀ီၤၦၤကမျၢၢ်တဖၣ်အါဒၣ်တက့ၢ်န့ၣ်သူၣ်၀ဲသဲးသၣ်ႇခီဖံၣ်(coffee),တူၢ်ရ့ၣ်ဒီး မာ်အံးသၣ်သ့ၣ် တဖၣ် န့ၣ်လီၤႉ တချုးသုးဟံးန့ၢ်တၢ်စိတၢ်ကမီၤဒံးဘၣ်အခါလၢသၣ်တီၣ်ကၠံကီၢ်ဆၣ်အပူၤ မာ်အံးတပီၢ်န့ၣ်အၦ့ၤအိၣ်၀ဲ(၂)ကလးဒီး ဘၣ်ဆၣ်သုးဟံးန့ၢ်တၢ်စိတၢ်ကမီၤ၀ံၤလီၢ်ခံအၦ့ၤလီၤကအိၣ်လၢအမၢညါန့ၣ်လီၤႉတနံၣ်အံၤစ့ၢ်ကီးခီဖျိမူခိၣ်ကလံၤ သီၣ်ဂီၤ အဃိမာ်အံးသၣ်ဟးထီၣ်လီၤစှၤဒိၣ်န့ၢ်အပူၤကွံာ်မဟိ(၃)ဆးညါအဂ့ၢ်န့ၣ် ၦၤသူၣ်မာ်အံးဖိတဖၣ် စံး၀ဲန့ၣ်လီၤႉ ဒ်န့ၣ်အသိးခီဖျိဟီၣ်က၀ီၤပူၤတၢ်အိၣ်သးတဂၢၢ်တကျၢၤဘၣ်အဃိၦၤလီၢ်က၀ီၤကမျၢၢ်တဖၣ်အံၤကလဲၤလီၤလၢ မာ်အံးကျီးပူၤအဂီၢ်ဖဲလဲၤလၢကျဲအခါပယီၤသုးသမံသမိးအ၀ဲသ့ၣ်ဒီးဒ်န့ၣ်အသိးခီဖျိကျိဖးဒိၣ်တၢ်လီၤဘၣ်ယိၣ်အဃိ အိၣ်လၢကျီးပူၤတဘူၣ်လၢၤတၢ်ကီတၢ်ခဲအိၣ်ထီၣ်မုၢ်ကျိၤ၀ဲၤကွာ်တကပၤန့ၣ်လီၤႉ မာ်အံးသၣ်လၢဟးထီၣ်ကညီကီၢ်စဲၣ်ပူၤအံၤတဖၣ် လၢတီအူဒီး၀့ၢ်တကူၣ်(ပွဲရုံ)အံၤတဆီ တၢ်ဆှၢထီၣ်ဆါအီၤဆူ တရူးထံကီၢ်ဒီး လၢကညီကီၢ်စဲၣ်ပူၤ ဟီၣ်ခိၣ်လၢတၢ်သူၣ်မာ်အံးန့ၣ်အအ့ကၢၣ်ခဲလၢာ်အိၣ်၀ဲ(၇၅၀၀၀)အ့ကၢၣ်ဒီး အပူၤကွံာ်ကိးမုၢ်နံၣ်ဒံးတၢ်ထုးထီၣ်ဆါ၀ဲမာ်အံးသၣ်အိၣ်၀ဲအပီၢ်(၂)ကကွဲၢ်ခိၣ်ဃၢၤညါအဂ့ၢ်န့ၣ် ကီၢ်ပယီၤမာ်အံးကရူၢ် ထုးထီၣ်ပာ်ဖျါတ့ၢ်ဃာ်၀ဲဖဲအပူၤကွံာ်(၂၀၂၀)နံၣ်အခါန့ၣ်လီၤႉ
အိၣ်ဆိး “မီ” ပူၤၦဲၤသးခု.
အိၣ်ဆိး “မီ” ပူၤၦဲၤသးခု. ၁.ကညီဖိလၢသ့လံ၁်လဲၢ် အိၣ်ဝဲဒၣ်ဒီးအတၢ်လဲၣ် ကွၢ်တၢ်အိၣ်ဖျါဒီးၦၤမဲ၁် ဂ့ၤဘ့ၣ်ခိၣ်ပ၁်နံၤအမဲ၁် ၂.အိၣ်ဆိးလၢထံဆၢကီၢ်ဆၢ ကူၣ်သ့အါန့ၢ်တသမၢ ဘၣ်ဆၣ်နမဲ၁်ကွၢ်ကျိၣ်စ့ ခိၣ်နၢ်ဒ်နၤလီၤသးဟ့ ၃.တၢ်ဖံးတၢ်မၤလၢလီၤဟိ ရၤလီၤလံ၁်ပတံထီဘိ ၦၤမ့ၢ်ပတံထီၣ်တဘျီ မ့ၢ်ဒၣ်တၢ်ကလီကလီ ၅.ကိၤလၤႇ ပံၤယီၤဒီးကၠီၣ်တဲၣ် နမ့ၢ်တကျၢကျိ၁်လံ၁်လဲၢ် ထံၣ်ဆံးထံၣ်အံၣ်ဂ့ၢ်လိ၁်နၤ တဟ့ၣ်နၤတၢ်ဖံးတၢ်မၤ ၆.ကျိၣ်စ့စူးကါဝဲပတီၢ် မ့ၢ်ဒီလၣ် ဒီးဘးပတီၢ် လိ၁်သ့သးအိၣ်ၦၤထံကီၢ် တမဲ၁်ဆှးလၢကညီကီၢ် ၇.ကရူၢ်ကရၢလၢနမၤ လီၤဟ့သးလၢနတၢ်မၤ စံးလီၤသးမၤကလု၁်တၢ် ကစၢ်ဘျုးဂီၢ်မၤသၦၢ် ၈.ပမှံၤပၦၢ်စံးတ့ၢ်ဝဲ ...
တနီသရံၣ်ကီၢ်ဆၣ်ပူၤကမျၢၢ်ၦၤဃ့ၢ်မှံဟးဖျိးလီၢ်အိၣ်ကဒုလီၢ်တဖၣ်သဂၢၢ်ဘၣ်ကသံၣ်ကသီလီၤတူ၁်
လါနိၣ်၀့ဘၢၣ် ၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် တနီသရံၣ်ကီၢ်ဆၣ် ကမျၢၢ်ၦၤဃ့ၢ်မှံဟးဖျိးလီၢ်အိၣ်ကဒုလီၢ်တဖၣ်န့ၣ် ၦၤဃ့ၢ်မှံဟးဖျိးအဂၤ (၃၀၀၀)ဘျဲၣ်အံၤအဂီၢ်သဂၢၢ်ဘၣ်၀ဲဒၣ်ကသံၣ်ကသီလီတူာ်အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးဘူးဘူးတံၢ်တံၢ်တဖၣ် စံး၀ဲန့ၣ်လီၤႉ ခီဖျိပယီၤသုးခးလီၤကျိဖးဒိၣ်အဃိ တနီသရံၣ်ကီၢ်ဆၣ် တမိၣ်ခၠိႇဘီဒံၣ်ကါသ၀ီႇဘၤလီသ၀ီဒီးလဲၤတီယၤသ၀ီ ၦၤလီၢ်က၀ီၤကမျၢၢ်အဂၤ(၃၀၀၀)ဘျဲၣ်အံၤဘၣ်ဟးစံၣ်ပူၤဖျဲးသးတလီၢ်လီၢ်န့ၣ်လီၤႉ တကီၢ်ခါခဲအံၤခီဖျိ ပယီၤသုးပံးဃာ်ကျဲ အဃိတၢ်ကီတၢ်ခဲအိၣ်လၢကစိာ်ထီၣ်စိာ်လီၤကသံၣ်ကသီဒီးလၢတၢ်န့ၣ်အဃိ ၦၤဃ့ၢ်မှံဟးဖျိး သ့ၣ်တဖၣ်အံၤအဂီၢ် ကသံၣ်ကသီတအိၣ်လၢၤဘၣ်အဂ့ၢ်န့ၣ် တၢ်ကရၢကရိလၢအမၤစၢၤၦၤဃ့ၢ်မှံဟးဖျိး ၦၤဘၣ်မူဘၣ်ဒါတဂၤ စံး၀ဲဒ်အံၤန့ၣ်လီၤႉ “ခဲအံၤတုၤဃီၤလၢတၢ်ယီၤထီၣ်လံအဃိတၢ်ကီတၢ်ခဲအိၣ်ထီၣ်လၢကသံၣ်ကသီတကပၤမီၤနီၤႉမ့၀ံၤဖဲၦၢ်ပူၤအံၤတၢ်ချံၣ်ထီၣ်လံအဃိၦၤအိၣ်တဆူၣ်အိၣ်ချ့ဘၣ်နါက့ဟဲအိၣ်ထီၣ်ႉလၢတၢ်န့ၣ်အဃိလိၣ်ဘၣ်၀ဲဒၣ်ကသံၣ်ကသီမီၤနီၤႉလၢညါန့ၣ် ၦၤမၤစၢၤတၢ်ဖိအိၣ်ဒီဒူၣ်ညါႉအဃိပလဲၤမၤစၢၤအ၀ဲသ့ၣ်သ့မီၤနီၤႉဘၣ်ဆၣ်ဖဲလီၢ်ခံအံၤၦၤမၤစၢၤတၢ်ဖိတအိၣ်အါအါလၢၤဘၣ်လီၤစှၤကွ့ၢ်ကွ့ၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါလၢသုးကီၣ်ကးအတၢ်သမံသမိးတြဲၤလီၢ်သ့ၣ်တဖၣ်န့ၣ်ပယီၤသုးမၤဃံးထီၣ်၀ဲတၢ်ဘံၣ်တၢ်ဘၢဒီး ပယီၤသုးအံၤတပျဲၦၤကမျၢၢ်စိာ်ထီၣ်စိာ်လီၤဟုသးဒီးတၢ်အီၣ်တၢ်အီတဖၣ်ဘၣ်အဃိလါနိၣ်၀့ဘၢၣ်အတီၢ်ပူၤအံၤ ၦၤဃ့ၢ်မှံဟးဖျိးအဂီၢ်တၢ်အီၣ်တၢ်အီလီၤတူာ်သ့၀ဲအဂ့ၢ်န့ၣ်တၢ်ကရၢကရိၦၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ် ၀ဲန့ၣ်လီၤႉ ဖဲအပူၤကွံာ်လါအီးကထိဘၢၣ် ၁၄ သီအနံၤ သုးကီၣ်ကးအမျိာ်သုး(အမတ–၃၀၆)လၢအိၣ်ဆီလီၤသးဖဲ တနီသရံၣ်ကီၢ်ဆၣ် မီၤတိအံၤ ခီဖျိအ၀ဲသ့ၣ်ခးလီၤကျိဖးဒိၣ်အဃိ ၦၤဃ့ၢ်မှံဟးဖျိးလၢအဟးစံၣ်အိၣ်တစိၢ်တလီၢ် သ့ၣ်တဖၣ်အံၤဘၣ်ဃ့ၢ်ထီၣ်၀ဲဒီးတုၤလၢခဲအံၤအ၀ဲသ့ၣ်တက့ၤဘၣ်လၢဟံၣ်ဒံးဘၣ်အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိး တဖၣ်စံး၀ဲန့ၣ်လီၤႉ ဒ်န့ၣ်အသိးလၢပလီကီၢ်ဆၣ်ၦၤဃ့ၢ်မှံဟးဖျိးလီၢ်အိၣ်ကဒုလီၢ်သ့ၣ်တဖၣ်န့ၣ်စ့ၢ်ကီးသဂၢၢ်ဘၣ်၀ဲကသံၣ်ကသီ တအိၣ်လၢၤဘၣ်ဒီးခီဖျိပယီၤသုးပံးဃာ်ကျဲအဃိစှၤလါအတီၢ်ပူၤအံၤတမၤစၢၤဘၣ်ၦၤဃ့ၢ်မှံဟးဖျိးအမျးကယၤၦဲၤၦဲၤလၢၤဘၣ်အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးလၢအဂၤတဂၤစ့ၢ်ကီး စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲမဟိတနံၣ်န့ၣ်ၦၤဃ့ၢ်မှံဟးဖျိးနီၣ်ဂံၢ်အိၣ်(၁၈၀၀)ညါႉတနံၣ်အံၤအတီၢ်ပူၤန့ၣ်ၦၤဃ့ၢ်မှံဟးဖျိးအနီၣ်ဂံၢ် အါထီၣ်တုၤလၢ(၂၈၀၀)လံမီၤနီၤႉတလါတလါန့ၣ်အါထီၣ်မၢ်မၢ်လီၤႉမ့၀ံၤပယီၤသုးစ့ၢ်ကီးသူ၀ဲဒၣ်တဲာ်လွံၢ်တီၤသနူ အါထီၣ် မီၤနီၤႉဒ်သိးတၢ်အီၣ်တၢ်အီႇကသံၣ်ကသီႇအ့ထနဲးႇကျဲသ့ၣ်တဖၣ်အံၤသုတန့ၢ်နီတခါတဂ့ၤအဂီၢ်န့ၣ် ပယီၤသုးမၤတဲာ်ကွံာ်၀ဲ ခဲလၢာ်လီၤႉအဃိဖဲတၢ်ဂိၢ်ခါအံၤလၢၦၤဃ့ၢ်မှံဟးဖျိးအဂီၢ်ကသံၣ်ကသီတအိၣ်လၢၤဘၣ်” အဂ့ၢ်န့ၣ် စံး၀ဲန့ၣ်လီၤႉ လၢတနီသရံၣ်ကီၢ်ဆၣ်ဒီးပလီကီၢ်ဆၣ်အပူၤတၢ်ဒုးဂၢၢ်ထီၣ်လံဘၣ်ဆၣ်ခီဖျိပယီၤသုးခးလီၤကျိဖးဒိၣ်တကးဒံးဘၣ် ပယီၤသုးမၤအါထီၣ်သုးဂံၢ်ဘါမၤအါထီၣ်တၢ်အီၣ်တၢ်အီအဃိလီၢ်က၀ီၤၦၤသ၀ီဖိတဖၣ်တုၤလၢခဲအံၤတက့ၤဘၣ်လၢ ဟံၣ်ဒံးဘၣ်ႇဘၣ်ဃ့ၢ်မှံဟးဖျိးဒံး၀ဲအဖၢမုၢ်အဂ့ၢ်န့ၣ် သ့ၣ်ညါဘၣ်လၢၦၤမၤစၢၤၦၤဃ့ၢ်မှံဟးဖျိးတဖၣ်အအိၣ်န့ၣ်လီၤႉ
တၢ်နု၁်လီၤခးကၠၤအ့စ့ၣ်ကၠံ၀့ၢ်တၢ်ဒုးကဲထီၣ်အပူၤခံခီခံကပၤတၢ်သံတၢ်ဘၣ်ဒိဘၣ်ထံးအိၣ်
လါနိၣ်၀့ဘၢၣ် ၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကၠၤအ့စ့ၣ်ကၠံ၀့ၢ်ပူၤ ဖဲမဟါလါနိၣ်၀့ဘၢၣ် ၂ သီ ဂီၤခီအဆၢကတီၢ် ကညီဒီကလုာ်တၢ်ထူၣ်ဖျဲး သုးမုၢ်ဒိၣ်(KNLA)သုးပာ်ဖှိၣ်ကရူၢ်နုာ်လီၤခး၀ဲဒီးတၢ်လီၢ်လၢပယီၤသုးအိၣ်ဆီလီၤသး အလီၢ်တဖၣ်ဒီးဖဲန့ၣ်ခံခီခံကပၤ တၢ်သံတၢ်ဘၣ်ဒိဘၣ်ထံးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲမဟါလါနိၣ်၀့ဘၢၣ် ၂ သီ ဂီၤခီအဆၢကတီၢ် (KNLA)သုးပာ်ဖှိၣ်နုာ်လီၤခး၀ဲကၠၤအ့စ့ၣ်ကၠံ၀့ၢ်ပူၤ သုးကီၣ်ကးအပၢၤကီၢ် ၀ဲၤလီၢ်ႇ ပၢပြး၀ဲၤဒၢးတၢ်လီၢ်သ့ၣ်တဖၣ်ဒီး ဖဲန့ၣ်ခီဖျိသုးကီၣ်ကးကဘီယူၤဟဲက့ၤလီၤစၢၤတၢ်လၢပျီပူၤ အဃိ တၢ်ဒုးဆူၣ်ထီၣ်၀ဲအဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဒ်သိးသုးကီၣ်ကးအတၢ်ပၢတၢ်ပြးကပတုာ်ကွံာ်အဂီၢ်န့ၣ်ပလဲၤနုာ်လီၤခးသုးကီၣ်ကးစုတီၤဖီလာ် အ၀ဲၤဒၢးတဖၣ်မီၤနီၤႉဘၣ်ဆၣ်ပၢၤကီၢ်၀ဲၤလီၢ်လၢပလဲၤခးအီၤခဲအံၤန့ၣ်လၢအကပိၤကပၤန့ၣ်ပယီၤသုးကလၢၤအိၣ် ၀း၀းလီၤႉဘၣ်ဆၣ်၀ဲဒၣ်ဒုပတၢ်မၤအိၣ်န့ၣ်ပမၤလီၤႉအတၣ်ဒုတတၣ်ဘၣ်ႇတၢ်ဘၣ်ဒိဘၣ်ထံးဒုအိၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်နုာ်လီၤခးကၠၤအ့စ့ၣ်ကၠံ၀့ၢ်ပူၤပယီၤသုးတၢ်လီၢ်ဘျီ၀ဲအံၤတၢ်နုာ်လီၤခး၀ဲသုးကီၣ်ကးအပၢၤကီၢ်၀ဲၤလီၢ်ႇ စမံၣ်ဘျီၣ်ႇ (လ၀က)ရူႇပၢပြး၀ဲၤဒၢးသ့ၣ်တဖၣ်ဒီးဒ်န့ၣ်အသိးပယီၤသုးတကပၤသံဘၣ်ဒိဘၣ်ထံးအိၣ်၀ဲဒီး တၢ်မၤန့ၢ်ဃုာ်၀ဲ ကျိချံၦာ်သၣ်တနီၤအဂ့ၢ်န့ၣ် တၢ်ပၢၢ်ဆၢသုးကရူၢ်စံး၀ဲန့ၣ်လီၤႉ တကီၢ်ခါခဲအံၤလီၢ်က၀ီၤၦၤကမျၢၢ်တနီၤစံး၀ဲလၢတၢ်ပၢၢ်ဆၢသုးကရူၢ်သုးပာ်ဖှိၣ်ဖီၣ်ဂၢၢ်၀ဲကၠၤအ့စ့ၣ်ကၠံ၀့ၢ်န့ၢ်၀ဲဒီး ဘၣ်ဆၣ်ခီဖျိတဒိးန့ၢ်ဘၣ်တၢ်ကစီၣ်တၢ်ဂ့ၢ်တၢ်ကျိၤလီၤတံၢ်လီၤဆဲးဒံးဘၣ်အဃိပာ်ဂၢၢ်ပာ်ကျၢၤအီၤတန့ၢ်ဒံးဘၣ် အဂ့ၢ်န့ၣ် (KNLA)ၦၤဘၣ်မူဘၣ်ဒါတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်နုာ်လီၤခးပယီၤသုးတၢ်လီၢ်ဖဲကၠၤအ့စ့ၣ်ကၠံ၀့ၢ်ဘျီ၀ဲအံၤအပူၤန့ၣ် (KNLA)သုးပာ်ဖှိၣ်ကရူၢ် (Lion Battalion Commando Special Forces)သုးကျိၤခိၣ်–၂ စီၤလါ ဘၣ်ဟ့ၣ်လီၤကွံာ်အသးသမူဒီး လၢပယီၤသုးတကပၤစ့ၢ်ကီး သံ၀ဲဒၣ်(၂)ဂၤအဂ့ၢ်န့ၣ် တၢ်ကွဲးပာ်ဖျါထီၣ်အီၤဖဲသုးကီၣ်ကးအ(Telegram)ခၠၣ်နၢၣ်ပူၤန့ၣ်လီၤႉ စးထီၣ်ဖဲ(၂၀၂၂)န့ၣ်တၢ်ပၢၢ်ဆၢသုးပာ်ဖှိၣ်ကရူၢ်နုာ်လီၤခး၀ဲကၠၤအ့စ့ၣ်ကၠံ၀့ၢ် ပၢၤကီၢ်၀ဲၤလီၢ်ဒီးပယီၤသုးကလၢၤ တၢ်လီၢ်သ့ၣ်တဖၣ်အံၤခဲအံၤခဲအံၤဒီးဒ်န့ၣ်အသိးခီဖျိပယီၤသုးကဘီယူၤဟဲက့ၤခးလီၤစၢၤတၢ်ႇပယီၤသုးခးလီၤကျိဖးဒိၣ် အဃိ ၦၤကမျၢၢ်သံဘၣ်ဒိဘၣ်ထံးကဲထီၣ်တ့ၢ်အသးအိၣ်၀ဲအဂ့ၢ်န့ၣ် ဂံၢ်ခီၣ်ထံးတၢ်ကစီၣ်စံး၀ဲအသိးသ့ၣ်ညါဘၣ် န့ၣ်လီၤႉ လၢကၠၤအ့စ့ၣ်ကၠံ၀့ၢ်ပူၤန့ၣ်ပယီၤသုးခီၣ်သုးရ့ၣ်(ခလရ–၃၂),(ခလရ–၂၈၃)ဒီး(ခလရ–၂၈၄)သ့ၣ်တဖၣ်အံၤ အိၣ်ဆီလီၤသး အဂ့ၢ်န့ၣ်...