တၢ်ချံတၢ်သၣ်လၢဟးထီၣ်ကညီကီၢ်စဲၣ်ပူၤတဖၣ်အၦ့ၤတအိၣ်ဘၣ်အဃိၦၤသူၣ်အီၣ်ဖျးအီၣ်တၢ်ဖိတဖၣ်ထံၣ်ဘၣ် တၢ်ကီတၢ်ခဲ
လါအီးကထိဘၢၣ် ၂၅ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် မၠၣ်၀တံၣ်ႇကီးတရံးဒီးနိၣ်တကီကီၢ်ဆၣ်တဖၣ်အပူၤ လၢတၢ်လုၢ်အီၣ်နီၢ်ခိသးသမူအဂီၢ် လီၢ်က၀ီၤၦၤကမျၢၢ်တဖၣ်အါဒၣ်တက့ၢ်သူၣ်အီၣ်ဖျးအီၣ်၀ဲတၢ်ဒီးတကီၢ်ခါခဲအံၤခီဖျိတၢ်ချံတၢ်သၣ်အၦ့ၤ တအိၣ်ဘၣ်အဃိ လၢကအီၣ်ကအီအဂီၢ်ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ လၢတၢ်လုၢ်အီၣ်နီၢ်ခိသးသမူအဂီၢ်ၦၤကမျၢၢ်တဖၣ်သူၣ်၀ဲဒၣ်တူၢ်ရ့ၣ်သၣ်ႇတဃီၤဆံၣ်သၣ်ႇဃၢမံၤတံၢ်ႇသးဟီသၣ်ဒီး တခိးဘံၣ်ဘ့ချံသ့ၣ်တဖၣ်န့ၣ်လီၤႉတချုးသုးဟံးန့ၢ်တၢ်စိတၢ်ကမီၤဒံးဘၣ်အခါတၢ်ချံတၢ်သၣ်လၢဟးထီၣ်ဟီၣ်က၀ီၤပူၤ တဖၣ်အၦ့ၤဂ့ၤဒံး၀ဲဒီးဘၣ်ဆၣ်သုးဟံးန့ၢ်တၢ်စိတၢ်ကမီၤအတီၢ်ပူၤတၢ်ချံတၢ်သၣ်အၦ့ၤတအိၣ်၀ဲလၢၤဘၣ်အဂ့ၢ်န့ၣ် နိၣ်တကီကီၢ်ဆၣ် ၦၤကမျၢၢ်ပိာ်မုာ်တဂၤ စံး၀ဲဒ်အံၤန့ၣ်လီၤႉ “သုးဟံးန့ၢ်တၢ်စိတၢ်ကမီၤ၀ံၤလီၢ်ခံတၢ်ဒုးကဲထီၣ်တပတုာ်နီတထံၣ်လၢၤဘၣ်ႉတၢ်ဒုးန့ၣ်ကဲထီၣ်လၢကျဲကပၤလီၤ အဃိ ၦၤဟဲၦ့ၤတၢ်တဘူၣ်နီတဂၤဘၣ်အသိး၀ဲဒၣ်စ့ၢ်ကီးပလဲၤတဘူၣ်ဘၣ်ႉတၢ်ချံတၢ်သၣ်တနီၤန့ၣ်အၦ့ၤတအိၣ်နီတစဲးလၢၤဘၣ်ႉဖဲတၢ်ဘၢၣ်စၢၤအံၤ၀ဲဒၣ်နါက့မ့ၢ်ကဘၣ်မၤအီၣ်မၤအီမတၤလဲၣ်မးပတသ့ၣ်ညါလၢၤဘၣ်ႉတၢ်ၦ့ၤနါက့ထီၣ်ညါ ၦ့ၤအီၣ်တန့ၢ်နီတမံၤလၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤလီၢ်ခံကီၢ်ဆၣ်တဖၣ်အံၤအပူၤဒုးယၤတၢ်သဘံၣ်သဘုၣ်ကဲထီၣ်၀ဲလၢပယီၤသုးႇ သုးခိးကီၢ်ဆၢ(BGF)ဒီးတၢ်ပၢၢ်ဆၢသုးကရူၢ်အဘၢၣ်စၢၤဒီးခီဖျိၦၤဟးထီၣ်က့ၤလီၤတညီလၢၤဘၣ်အဖီခိၣ် ၦၤဟဲၦ့ၤတၢ်ချံတၢ်သၣ်တအိၣ်လၢၤဘၣ်အဃိလီၢ်က၀ီၤၦၤကမျၢၢ်သ့ၣ်တဖၣ်အံၤကျိၣ်စ့တၢ်ဟဲနုာ်တအိၣ်လၢၤဘၣ် ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် ကမျၢၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ခီဖျိတၢ်ဒုးကဲထီၣ်တပယူာ်ဃီအဃိကျဲလၢအဘျုးအိၣ်လၢသုးဂ့ၢ်၀ီအဂီၢ်တဖၣ်အံၤပယီၤသုးမၤဟးဂီၤကျဲပံးဃာ်၀ဲဒီး လၢ၀့ၢ်နုာ်လီၤဟးထီၣ်တၢ်သမံသမိးတြဲၤလီၢ်သ့ၣ်တဖၣ်အံၤစ့ၢ်ကီး ပယီၤသုးအိၣ်ခိးသမံသမိးဖီၣ်၀ဲတၢ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ခီဖျိပယီၤသုးမၤ၀ဲဒ်အံၤအဃိၦၤခိးၦၤ့တၢ်ချံတၢ်သၣ်ဒီးၦၤၦ့ၤဆါတၢ်ဖိသ့ၣ်တဖၣ်အံၤဟးထီၣ်က့ၤလီၤတဘၣ်ဂီၢ် လၢၤဘၣ်အဃိ အ၀ဲသ့ၣ်တၦ့ၤတၢ်ချံတၢ်သၣ်လၢၤဘၣ်အဂ့ၢ်န့ၣ် ၦၤၦ့ၤဆါတၢ်ချံတၢ်သၣ်လၢဟီၣ်က၀ီၤပူၤတဂၤ စံး၀ဲဒ်အံၤန့ၣ်လီၤႉ “အ၀ဲသ့ၣ်တြဲၤန့ၣ်ယတအဲၣ်ဒိးလဲၤဖၠးနီတစဲးဘၣ်ႉနမ့လဲၤန့ၣ်အ၀ဲသ့ၣ်သံကွၢ်၀ဲသုမ့ၢ်(PDF)ဧါႇဆိၣ်ၦၤထုၦၤ ကိးဂၤဒဲးလီၤႉ အ၀ဲသ့ၣ်ကွၢ်၀ဲမ့လီၤဆီန့ၣ်ဃုၦၤတၢ်ကမၣ်ႉဖဲယလဲၤၦ့ၤသဲးသၣ်လၢကီၣ်၀ါလဲသ၀ီႇယဟဲက့ၤလၢကျဲ အခါန့ၣ်အသံကွၢ်ယၤ ဖဲလဲၤ၀ၣ်တၢ်သမံသမိးတြဲၤန့ၣ်မီၤနီၤႉသံကွၢ်ယၤနအိၣ်ဖဲလဲၣ်ႇနၦ့ၤသဲးသၣ်နကမၤမနုၤလဲၣ်ဒ်န့ၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တနံၣ်ညါအံၤဃၢမံၤတံၢ်ႇဘီးက့ၣ်တံၢ်ႇသးဟီသၣ်အၦ့ၤတအိၣ်ဘၣ်တကးဒံးဘၣ်အမဲာ်ညါခီဖျိကျဲတၢ်ကီတၢ်ခဲဒီး ၦၤစိာ်ဆှၢတၢ်အဘူးအလဲစ့ၢ်ကီးဒိၣ်ဒွးတကဲးလၢၤဘၣ်အဃိတၦ့ၤတၢ်ချံတၢ်သၣ်လၢၤဘၣ်အဂ့ၢ်န့ၣ် ၦၤဟးၦ့ၤတၢ်ချံတၢ်သၣ် လၢဟီၣ်က၀ီၤပူၤလၢအဂၤတဂၤစ့ၢ်ကီး စံး၀ဲန့ၣ်လီၤႉ ဒ်န့ၣ်အသိးဖဲတလါအံၤလါအီးကထိဘၢၣ်အခါစ့ၢ်ကီးခီဖျိၦၤၦ့ၤဃၢမံၤတံၢ်ႇဘီးက့ၣ်တံၢ်ႇသးဟီသၣ်တအိၣ်ဘၣ်အဃိ ဆှူ၀ဲဒၣ်ဒီးလီၢ်က၀ီၤၦၤကမျၢၢ်တဖၣ်ကျိၣ်စ့တၢ်ဟဲနုာ်တအိၣ်လၢၤဘၣ်အဃိတၢ်ကီတၢ်ခဲအိၣ်ထီၣ်လၢတၢ်လုၢ်အီၣ်နီၢ်ခိသးသမူတကပၤအဂ့ၢ်န့ၣ် ၦၤသူၣ်အီၣ်ဖျးအီၣ်တၢ်ဖိတဖၣ် စံး၀ဲန့ၣ်လီၤႉ
ယါဒိၤၦၤဃ့ၢ်မှံဟးဖျိးဘၣ်တၢ်ညၣ်ဂိၢ်တိးကွ့တၢ်ဆါအါအဃိလိၣ်ဘၣ်ကသံၣ်ကသီ
လါအီးကထိဘၢၣ် ၂၅ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် သၣ်တီၣ်ကၠံကလံၤစိး ယါဒိၤဟီၣ်က၀ီၤအပူၤ ဖဲအပူၤကွံာ်လါယူၤလံအခါတၢ်ဒုးကဲထီၣ်အဃိ လီၢ်က၀ီၤၦၤကမျၢၢ်ဘၣ်ဃ့ၢ်ထီၣ်၀ဲဒီးတကီၢ်ခါခဲအံၤမ့ၢ်လၢအ၀ဲသ့ၣ်ဘၣ်တၢ်ညၣ်ဂိၢ်တိးကွ့တၢ်ဆါအါအဃိ လိၣ်ဘၣ်၀ဲဒၣ်ကသံၣ်ကသီအဂ့ၢ်န့ၣ် သ့ၣ်ညါဘၣ်လၢၦၤမၤစၢၤၦၤဃ့ၢ်မှံဟးဖျိးတဖၣ်အအိၣ်န့ၣ်လီၤႉ စးထီၣ်ဖဲလါယူၤလံ ၁၁ သီအနံၤ တၢ်ဒုးကဲထီၣ်၀ဲလၢပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးပာ်ဖှိၣ်အဘၢၣ်စၢၤဒီး ပယီၤသုးက့ၤခးလီၤကျိဖးဒိၣ်ႇကဘီယူၤဟဲခးလီၤတၢ်လၢ(ယၤဒိၣ်)ဟီၣ်က၀ီၤပူၤန့ၣ်လီၤႉ ဖဲန့ၣ်၀ံၤလီၢ်ခံပယီၤသုးနုာ်လီၤအိၣ်လၢၦၤကမျၢၢ်ဟံၣ်ပူၤအဃိယါဒိၤၦၤဃ့ၢ်မှံဟးဖျိးတဖၣ်အံၤတက့ၤဘၣ်ဟံၣ် ကအိၣ်လၢလွံၢ်လါဘျဲၣ်လံအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဂၤ စံး၀ဲန့ၣ်လီၤႉ အ၀ဲစံး၀ဲလၢ“ၦၤဘၣ်တၢ်ညၣ်ဂိၢ်တိးကွ့အါအဃိကသံၣ်ကသီလိၣ်မီၤနီၤႉမ့ၢ်လၢကသံၣ်ကသီတကူတလၢဘၣ်အဃိ ၦၤဃ့ၢ်မှံဟးဖျိးတဖၣ်အါဒၣ်တက့ၢ်အိၣ်တဆူၣ်ဘၣ်လီၤႉလၢယါဒိၤသ၀ီပူၤန့ၣ်နါက့ပယီၤသုးကလၢၤအိၣ်ဒံးႉအဃိၦၤအိၣ်တဘူၣ်ဘၣ်ႉယါဒိၤၦၤဃ့ၢ်မှံဟးဖျိးတဖၣ်န့ၣ်အိၣ်ဖဲသ၀ီဃၢၤၦၢ်ပူၤန့ၣ်လီၤႉအ၀ဲသ့ၣ်အိၣ်တၢ်န့ၣ်ဘူးဒီးပယီၤသုးတြဲၤအဃိ ၦၤဟဲမၤစၢၤတၢ်တဘူၣ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၂)တၢ်ပၢဟီၣ်က၀ီၤ တီအူကီၢ်ရ့ၣ် သၣ်တီၣ်ကၠံကီၢ်ဆၣ်အပူၤ ကညီဆူၣ်ချ့မၤစၢၤ၀ဲၤကျိၤ(KDHW)ဟးဟ့ၣ်ကွၢ်ထွဲ၀ဲတၢ်အိၣ်ဆူၣ်အိၣ်ချ့အိၣ်ဘၣ်ဆၣ် ဟီၣ်က၀ီၤတၢ်လီၢ်လၢ လဲၤတတုၤဒံးဘၣ်အိၣ်ဒံး၀ဲတနီၤအဂ့ၢ်န့ၣ် သ့ၣ်ညါဘၣ်လၢ(KDHW)အအိၣ်န့ၣ်လီၤႉ အ၀ဲစံး၀ဲလၢ“ခဲအံၤဘၣ်ဃးတၢ်အိၣ်ဆူၣ်အိၣ်ချ့တကပၤန့ၣ်တသ့ဖဲအသ့ပဟးကွၢ်ထွဲလီၤႉလၢသၣ်တီၣ်ကၠံစ့ၢ်ကီးဒ်န့ၣ်လီၤဖဲန့ၣ်တၢ်လီၢ်လၢပဟးကွၢ်ထွဲန့ၣ်အိၣ်ဒီဒူၣ်ညါႉမ့မ့ၢ်လၢသၣ်တီၣ်ကလံၤစိးသ၀ီတကပၤန့ၣ်ခီန့ၣ်တလီၤတံၢ်ဒံးဘၣ်”အဂ့ၢ်န့ၣ် (KDHW)ၦၤဘၣ်မူဘၣ်ဒါတဂၤ စံး၀ဲန့ၣ်လီၤႉ အပူၤကွံာ်လါယူၤလံအတီၢ်ပူၤပယီၤသုးကဘီယူၤဟဲခးလီၤတၢ်အိၣ်၀ဲ(၃၃)ဘျီညါဒီးလၢတၢ်န့ၣ်အဃိယါဒိၤဒီး၀ၣ်သီခိၣ်ႇတၣ်ကိသ၀ီၦၤကမျၢၢ်တဖၣ်ဘၣ်ဃ့ၢ်ထီၣ်၀ဲဒီးဟံၣ်ဃီတၢ်သူၣ်ထီၣ်ႇတၢ်ဘူၣ်တၢ်ဘါတၢ်သူၣ်ထီၣ်တဖၣ်ဟးဂီၤ၀ဲဒၣ်အဂ့ၢ်န့ၣ် သ့ၣ်ညါဘၣ်လၢခ့ၣ်အဲၣ်ယူၣ်ထုးထီၣ်ပာ်ဖျါ၀ဲဒီးလီၢ်က၀ီၤကမျၢၢ်အအိၣ်န့ၣ်လီၤႉ ဖဲအပူၤကွံာ်(၂၀၂၁)လါယူၤလံအခါန့ၣ်စ့ၢ်ကီး ခီဖျိပယီၤသုးနီၣ်ဂံၢ်အါအါဂီၢ်ဂီၢ်ဟဲနုာ်လီၤအိၣ်ဆီလီၤသးလၢ ယါဒိၤဟီၣ်က၀ီၤပူၤအဃိ လီၢ်က၀ီၤၦၤကမျၢၢ်တနီၤဘၣ်ဃ့ၢ်ထီၣ်ဒံး၀ဲဒၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤလီၢ်ခံလၢ(ခ့ၣ်အဲၣ်ယူၣ်)တီအူကီၢ်ရ့ၣ်ပူၤခီဖျိဒုးယၤတၢ်သဘံၣ်သဘုၣ်အဃိ ၦၤကမျၢၢ်ဘၣ်ဃ့ၢ်မှံဟးဖျိး၀ဲ(၂၀၁၅၂)ဂၤအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါတ့ၢ်ဃာ်၀ဲဖဲလါအီးကထိဘၢၣ် ၁၄ သီ အနံၤ န့ၣ်လီၤႉ
တၢ်ဒုးကဲထီၣ်လၢကီးတရံး စ့ၤကိသ၀ီကပၤ ပယီၤသုးကဘီယူၤဟဲခးလီၤစၢၤတၢ်
လါအီးကထိဘၢၣ် ၂၄ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲတနံၤအံၤလါအီးကထိဘၢၣ် ၂၄ သီ ဂီၤခီအဆၢကတီၢ် လၢကညီကီၢ်စဲၣ် ကီးတရံး၀့ၢ်ဃၢၤ စ့ၤကိသ၀ီကပၤန့ၣ် တၢ်ဒုးကဲထီၣ်၀ဲလၢပယီၤသုးဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤဒီးကဘီယူၤဟဲခးလီၤစၢၤတၢ်အဂ့ၢ်န့ၣ် တၢ်ပၢၢ်ဆၢသုးကရူၢ်စံး၀ဲန့ၣ်လီၤႉ ဖဲတနံၤအံၤဂီၤခီအဆၢကတီၢ်ပယီၤသုးဟဲထီၣ်လၢကီးတရံး၀့ၢ်ပူၤႇတတၤကူသ၀ီတကပၤန့ၣ်ဒီး ဖဲအ၀ဲသ့ၣ်တုၤဖဲစ့ၤကိဒီးတတၤကူသ၀ီဘၢၣ်စၢၤအခါတၢ်ဒုးကဲထီၣ်၀ဲဘူးဘူးအဂ့ၢ်န့ၣ် ဟီၣ်က၀ီၤတၢ်ပၢၢ်ဆၢသုးကရူၢ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ် ဒ်အံၤန့ၣ်လီၤႉ အ၀ဲစံး၀ဲလၢ“ပယီၤသုးလၢတတၤကူတကပၤန့ၣ်လဲၤလီၤႉမ့မ့ၢ်လၢ၀့ကၠံတကပၤန့ၣ်ဟဲထီၣ်ႉလၢစ့ၤကိဒီးတတၤကူ အဘၢၣ်စၢၤန့ၣ်တၢ်ဒုးကဲထီၣ်ဘူးဘူးဖိလီၤႉၦၤခးပယီၤသုးဘူးဘူးလီၤအဃိအ၀ဲသ့ၣ်သံဘၣ်ဒိဘၣ်ထံးအါႉခဲအံၤၦၤမၤဆှဲတၢ်ဖဲတၢ်ဒုးကဲထီၣ်အလီၢ်န့ၣ်အဖၢမုၢ်လီၤ”အဂ့ၢ်န့ၣ် စံး၀ဲန့ၣ်လီၤႉ တၢ်ဒုးကဲထီၣ်အကတီၢ်ပယီၤသုးခးလီၤကျိဖးဒိၣ်တပယူာ်ဃီဒီးတကးဒံးဘၣ်အမဲာ်ညါဖဲမုၢ်ဃ့ၢ်လီၤအံၤ ပယီၤသုးကဘီယူၤဟဲခးလီၤတၢ်အိၣ်ခံဘျီညါအဃိၦၤသ၀ီဖိတဖၣ်အိၣ်တဘူၣ်လၢၤဘၣ်ဃ့ၢ်ထီၣ်၀ဲအဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤႉ တတၤကူသ၀ီဖိတဂၤစံး၀ဲလၢ“ပယီၤသုးအိၣ်ဟဲလီၤလၢတတၤကူတကပၤဒီးတၢ်ဒုးကဲထီၣ်ဘျီယမါန့ၣ်အိၣ်လၢသ၀ီပူၤ တဘူၣ်လၢၤဘၣ်ႉပဘိၣ်ထီၣ်တၢ်ဘိၣ်တၢ်စၢၤဘျီပဟးပလဲာ်သးတဘျီဃီလီၤႉလၢစ့ၤကိတကပၤန့ၣ်နါက့ကျိဖးဒိၣ်လီၤတဲာ်ဒီဒူၣ်ညါ”အဂ့ၢ်န့ၣ် စံး၀ဲန့ၣ်လီၤႉ တကီၢ်ခါခဲအံၤလၢတၢ်ဒုးကဲထီၣ်အလီၢ်န့ၣ်တၢ်ပၢၢ်ဆၢသုးကရူၢ်မၤဆှဲလဲတၢ်ဒီးပယီၤသုးအိၣ်(ကီးတရံး)၀့ၢ်ပူၤတဖၣ်စ့ၢ်ကီးခးလီၤကျိဖးဒိၣ်ႇကဘီယူၤစ့ၢ်ကီးဟဲခးလီၤတၢ်တပယူာ်ဃီအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤဂံၢ်ခီၣ်ထံးတၢ်ကစီၣ် အအိၣ်န့ၣ်လီၤႉ
ၦၤသုးဖိလၢအစံၣ်တၢ်ကမၣ်တဖၣ်တၢ်ကဖီၣ်ဆှၢန့ၢ်ဘၣ်အ၀ဲသ့ၣ်အဂ့ၢ် KTLA စံး၀ဲ
လါအီးကထိဘၢၣ် ၂၄ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလု၁်စၢဖှိၣ်ကရၢ ဒူပျာ်ယာ်ကီၢ်ရ့ၣ် တီၢ်နီၢ်မုၢ်ထီၣ် မီခံကရူၢ်အပူၤ ကီၢ်သူလ့ၤသုးမုၢ်ဒိၣ် (KTLA)အၦၤလၢအမၤဒၢၣ်ၦၤသ၀ီဖိတဖၣ်အံၤဖဲတၢ်ဟ့ၣ်အ၀ဲသ့ၣ်တၢ်ကမၣ်အဆၢကတီၢ် ခီဖျိအ၀ဲသ့ၣ်စံၣ်ဖျိးအဃိ ကရူၢ်တဖုဖုလၢအမ့ၢ်ထံၣ်ဘၣ်ၦၤသ့ၣ်တဖၣ်အံၤကဖီၣ်ဆှၢန့ၢ်အ၀ဲသ့ၣ်အဂ့ၢ်န့ၣ် (KTLA)ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ဖဲအပူၤကွံာ်လါစဲးပထ့ဘၢၣ် ၂၄ သီအနံၤ လၢသ၀ီပူၤတၢ်သမံသမိးတြဲၤလီၢ်န့ၣ် သုးခိၣ်စးလိတီခိၣ်ရိၣ်မဲ(KTLA) ခီၣ်မဲဒိၣ်သုးရ့ၣ် သုးဒ့(၂) သုးဒ့ခိၣ် ဒံၤမိၤအံၤ မၤဒၢၣ်၀ဲဒၣ်ၦၤသ၀ီဖိတကးဒံးဘၣ် ခးပိၢ်ထီၣ်ကျိႇဖီၣ်အီၣ်၀ဲဒၣ် ၦၤကမျၢၢ် အဆၣ်ဖိကီၢ်ဖိအဃိ ဖဲတၢ်ဟ့ၣ်အ၀ဲသ့ၣ်တၢ်ကမၣ်တၢ်ဒုးဃာ်အီၤအဆၢကတီၢ် အ၀ဲသ့ၣ်(၅)ဂၤအံၤ စံၣ်ဖျိး၀ဲဒၣ်န့ၣ်လီၤႉ (KTLA)ၦၤဘၣ်မူဘၣ်ဒါတဂၤစံး၀ဲလၢ“ၦၤလၢအဘၣ်တၢ်ကမၣ်တဒူၣ်န့ၣ်ၦၤလူၤအ၀ဲသ့ၣ်အခိၣ်သၣ်ဃံကိးဂၤဒဲးလီၤႉ ယတထံၣ်အ၀ဲသ့ၣ်နီတဂၤလၢၤဘၣ်ႉဒံၤမိၣ်နါက့စံၣ်ဖျိးႉပဆၢမုၢ်လၢ်လၢၦၤမ့ထံၣ်ဘၣ်အ၀ဲသ့ၣ်န့ၣ်ကဖီၣ်ဆှၢန့ၢ်ၦၤမီၤနီၤႉ ခီဖျိပကဲၦၤသုးဖိအဃိပကဘၣ်မၤဒ်ၦၤကမျၢၢ်တၢ်အဲၣ်ဒိးအသိးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ လၢန့ၣ်အမဲာ်ညါလီၢ်က၀ီၤၦၤကမျၢၢ်တအဲၣ်ဒိးလၢ(KTLA)ခီၣ်မဲဒိၣ်သုးရ့ၣ်အံၤကအိးထီၣ်တၢ်သမံသမိးတြဲၤလၢ သ၀ီပူၤလၢၤဘၣ်ဒီးဒ်န့ၣ်အသိးမ့ၢ်လၢသုးခိၣ်စးလိစ့ၢ်ကီးမၤပျံၤမၤဖုးၦၤကမျၢၢ်အိၣ်အဃိခဲအံၤတၢ်ဆိကတီၢ်ကွံာ် အမူဒါ(၆)လါအဂ့ၢ်န့ၣ် (KTLA)ၦၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ တကီၢ်ခါခဲအံၤ(KTLA)ခီၣ်မဲဒိၣ်သုးရ့ၣ် သုးရ့ၣ်ခိၣ်မူဒါလၢအလီၤဟိလီၤဖျဲၣ်အံၤ တၢ်ဟ့ၣ်လီၤက့ၤမူဒါဆူ(Venom) သုးကျိၤခိၣ် စီၤ၀့မၠ့ၣ် လၢအဟံးထီၣ်ဖီၣ်ထီၣ်မူဒါတစိၢ်တလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ “ယဲန့ၣ်ယတအဲၣ်ဒိးကဲသုးရ့ၣ်ခိၣ်ဒံးဘၣ်ခီဖျိယသးစၢ်ဒံးႉယတၢ်လဲၤခီဖျိစ့ၢ်ကီးစှၤဒံးႉအိၣ်ဒၣ်ယဟံးန့ၢ်စၢၤမူဒါဒ်န့ၣ်လီၤႉလီၤတိၢ်လီၤဆီဒုတအိၣ်ဘၣ်ႉၦၤသုးဖိတဖၣ်န့ၣ်အသုးခိၣ်တအိၣ်ဘၣ်ဘျီအသးဆံးစ့ၢ်ႉလီၢ်လၤတခါအံၤနါက့ ယတလီကီဘၣ်ႉ”အဂ့ၢ်န့ၣ် စီၤ၀့မၠ့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဘၣ်ဃး(KTLA)အၦၤမၤဒၢၣ်ၦၤသ၀ီဖိတၢ်ဂ့ၢ်အံၤ အပူၤကွံာ်လါအီးကထိဘၢၣ် ၄ သီ ဒူပျာ်ယာ်ကီၢ်ရ့ၣ် တီနီၢ်မုၢ်ထီၣ် မီခံကရူၢ် သ၀ီ(၅)ဖျၢၣ် ၦၤသ၀ီဖိဒီး(KTLA)ၦၤဘၣ်မူဘၣ်ဒါတဖၣ်မၤတၢ်အိၣ်ဖှိၣ်ဒီး လၢတၢ်အိၣ်ဖှိၣ်အပူၤ တၢ်ဆၢတဲာ်လီၤဒီးလီၢ်က၀ီၤၦၤကမျၢၢ်ဃ့ထီၣ်၀ဲလၢသုးခိၣ်စးလိတီခိၣ်ရိၣ်မဲခီၣ်မဲဒိၣ်အၦၤတဖၣ်ကဟးထီၣ်ကွံာ်လၢ သ၀ီပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကရ့ၣ်နံၣ်ၦၤလီၢ်အိၣ်ကမှံလီၢ်မ့ၢ်လၢၦၤဘၣ်တၢ်ညၣ်ဂိၢ်တိးကွ့တၢ်ဆါအါအဃိတၢ်ပံးဃ၁်၀ဲကၠိတဖၣ်
လါအီးကထိဘၢၣ် ၂၄ သီႇ ၂၀၂၃ နံၣ်ႇ ခ့ၣ်အဲးစံၣ် လၢကရ့ၣ်နံၣ်ကီၢ်စဲၣ် ၦၤလီၢ်အိၣ်ကမှံအိၣ်အလီၢ်သ့ၣ်တဖၣ်န့ၣ် စှၤသီအတီၢ်ပူၤအံၤမ့ၢ်လၢၦၤဘၣ်တၢ်ညၣ်ဂိၢ်တိးကွ့ တၢ်ဆါ အါအဃိ တၢ်ပံးဃာ်၀ဲဒၣ်နီၢ်ကစၢ်တၢ်ထဲးဂံၢ်ထဲးဘါကၠိတဖၣ်အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ် စံး၀ဲအသိး သ့ၣ်ညါဘၣ်န့ၣ်လီၤႉ လၢယိၤဒိၣ်ကီၢ်စဲၣ်ကလံၤထံးဒီးကရ့ၣ်နံၣ်ကီၢ်ဆၢ ပ့ၤလီႇဖဲၤခိၤႇမိဘၠဲဟီၣ်က၀ီၤဃုာ်ဒီးဒံၤမီၣ်စိၤႇဖရူၤစိၤႇလွဲၤကီၤႇ ဖါဆီဒီးကီၢ်ကၠီၣ်တဲၣ်–ကရ့ၣ်နံၣ်ကီၢ်ဆၢၦၤလီၢ်အိၣ်ကမှံလီၢ်တဖၣ် ၦၤဃ့ၢ်မှံဟးဖျိးတဖၣ်အါဒၣ်တက့ၢ်ဘၣ်၀ဲဒၣ် တၢ်ညၣ်ဂိၢ်တိးကွ့တၢ်ဆါအါမးဒီးလၢတၢ်န့ၣ်အဃိဟီၣ်က၀ီၤဖဲန့ၣ်အပူၤတၢ်ပံးဃာ်၀ဲဒၣ်နီၢ်ကစၢ်တၢ်ထဲးဂံၢ်ထဲးဘါကၠိ တဖၣ်အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဂၤ စံး၀ဲဒ်အံၤန့ၣ်လီၤႉ “ခဲအံၤမ့မ့ၢ်တၢ်ချံၣ်ခါန့ၣ်ၦၤဘၣ်တၢ်ညၣ်ဂိၢ်တိးကွ့တၢ်ဆါအါမးႉကၠိလၢအက့ၤအိးထီၣ်ကဒါဒုအိၣ်ဘၣ်ဆၣ်အိၣ်စှၤ မီၤနီၤႉ ၦၤဘၣ်တိးကွ့တၢ်ဆါအါအဃိကၠိတနီၤန့ၣ်တၢ်ပံးဃာ်အီၤကအိၣ်တနွံဘျဲၣ်လံႉတၢ်လီၢ်တတီၤဒီးတတီၤန့ၣ်တဒ်သိးလိာ်သးဘၣ်ႉမ့မ့ၢ်လၢနီၢ်ကစၢ်တၢ်ထဲးဂံၢ်ထဲးဘါကၠိခီန့ၣ်အါမီၤနီၤႉသ၀ီတဖျၢၣ်န့ၣ်ကၠိအိၣ်တဖျၢၣ်ဒီးဒ်န့ၣ်သိးၦၤလီၢ်အိၣ်ကမှံလီၢ်န့ၣ်ၦၤနီၣ်ဂံၢ်မ့အိၣ်အဂၤ(၂၀၀)န့ၣ်ကၠိအိၣ်ခဲလၢာ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ လၢကရ့ၣ်နံၣ်ကီၢ်စဲၣ်ပူၤ ၦၤဃ့ၢ်မှံဟးဖျိးအနီၣ်ဂံၢ်ခဲလၢာ်အိၣ်(၂၇၀ႇ၀၀၀)ဃၣ်ဃၣ်ညါဒီးၦၤဃ့ၢ်မှံဟးဖျိးတဖၣ်အံၤ ဘၣ်ဟးစံၣ်အိၣ်၀ဲလၢကစၢၢ်ခိၣ်ကလိကျါၦၢ်ပူၤဒ်န့ၣ်လီၤအဃိပစိၤအ့ၣ်တၢ်ဃၢ်ဖျးႇအီဘၣ်ထံအီတကူတလၢႇတၢ်ကဆှဲ ကဆှီတအိၣ်ဘၣ်အဃိအ၀ဲသ့ၣ်အိၣ်တဆူၣ်အိၣ်တချ့ဘၣ်ႇတကးဒံးဘၣ်အမဲာ်ညါအ၀ဲသ့ၣ်အဖံးအဘ့ၣ်စ့ၢ်ကီး သး၀ဲဒၣ်အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ တၢ်ညၣ်ဂိၢ်တိးကွ့တၢ်ဆါအံၤကဲထီၣ်သးအါလၢၦၤဖိဒံဖိသၣ်ႇၦၤသူၣ်က့သးၦၢ်တဖၣ်လီၤဒီးခီဖျိဟီၣ်က၀ီၤဖဲန့ၣ်အပူၤ လ့ၢ်ထီၣ်လ့ၢ်လိၤတညီဘၣ်အဃိကသံၣ်ကသီလိၣ်၀ဲဒၣ်အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးလၢအဂၤတဂၤစ့ၢ်ကီး စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“မ့မ့ၢ်လၢ၀ဲဒၣ်ခီန့ၣ်ပလဲၤၦ့ၤကသံၣ်လၢကသံၣ်ကျး၀ံၤဘျီပလဲၤဟ့ၣ်လီၤၦၤဃ့ၢ်မှံဟးဖျိးတဖၣ်မီၤနီၤႉ တၢ်မၢၤခီန့ၣ်ဖဲအံၤန့ၣ်ကသံၣ်ၦ့ၤဒိၣ်မးႉလၢအံၤတကပၤနါက့ၦၤဟဲက့ၤစိာ်ကသံၣ်တန့ၢ်အါအါဘၣ်ႉတၢ်ကီတၢ်ခဲဒ်န့ၣ်အိၣ်မီၤနီၤႉမ့၀ံၤၦၤမၤစၢၤၦၤဃ့ၢ်မှံဟးဖျိးတဖၣ်စ့ၢ်ကီးအတမ့ၢ်ကသံၣ်သရၣ်ဘၣ်အဃိအ၀ဲသ့ၣ်ၦ့ၤနါစိၤကသံၣ်တဘူၣ်ဘၣ်ႉ” အဂ့ၢ်န့ၣ် စံး၀ဲန့ၣ်လီၤႉ လၢကရ့ၣ်နံၣ်ကီၢ်စဲၣ် ကီၢ်ဆၣ်ကိးဘ့ၣ်ဒဲးဃၣ်ဃၣ်အပူၤတၢ်ဒုးကဲထီၣ်၀ဲဒီး ခီဖျိပယီၤသုးပံးဃာ်ကျဲတပျဲၦၤဟးထီၣ် က့ၤလီၤဘၣ်အဃိၦၤဖိဒံဖိသၣ်တဖၣ်တမၤလိမၤဒိးဘၣ်တၢ်ဘၣ်တကးဒံးဘၣ်ဟီၣ်က၀ီၤပူၤမ့ၢ်လၢပနံာ်တၢ်ဖိတၢ်လံၤ တဟဲလီၤဘၣ်အဃိၦၤဃ့ၢ်မှံဟးဖျိးသ့ၣ်တဖၣ်အံၤတၢ်ကီတၢ်ခဲအိၣ်ထီၣ်လၢကဒိးန့ၢ်ဘၣ်တၢ်အီၣ်တၢ်အီအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ
ပယီၤသုးအိၣ်(နၣ်သၤကွ့)တဖၣ်ခးလီၤကျိဖးဒိၣ်အဃိ ၦၤကမျၢၢ်ဘၣ်ဒိ(၄)ဂၤအကျါပၣ်ဃု၁်ၦၤကၠိဖိ ၂ ဂၤ
လါအီးကထိဘၢၣ် ၂၄ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)ဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ်အပူၤ ပယီၤသုးကလၢၤလၢ အိၣ်(နၣ်သၤကွ့)၀့ၢ်ပူၤတဖၣ်အံၤ ဖဲမဟါလါအီးကထိဘၢၣ် ၂၃ သီ မုၢ်ဃ့ၢ်လီၤအဆၢကတီၢ် ခီဖျိအ၀ဲသ့ၣ်ခးလီၤ ကျိဖးဒိၣ်လီၤတဲာ်ပိၢ်ဖးထီၣ်လၢလၢၢ်ဒိၣ်ကီၢ်ဆၣ်(တီကၠီၤပီၣ်)သ၀ီပူၤအဃိ ဘၣ်ဒိဘၣ်ထံး၀ဲၦၤကၠိဖိ(၂)ဂၤဒီး ၦၤဒီဖိမိၢ်(၂)ဂၤ အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ ဖဲမဟါလါအီးကထိဘၢၣ် ၂၃ သီ မုၢ်ဃ့ၢ်လီၤ ၁ နၣ်ရံၣ်ဃၣ်ဃၣ်အဆၢကတီၢ် ခီဖျိပယီၤသုးခးလီၤကျိဖးဒိၣ်လီၤတဲာ် ပိၢ်ဖးထီၣ်လၢ(တီကၠီၤပီၣ်)သ၀ီဆၢလာ် သီခါဖၠၣ်ကပၤအဃိ ၦၤကၠိဖိ(၂)ဂၤဒီးၦၤဒီဖိမိၢ်(၂)ဂၤဘၣ်ဒိဘၣ်ထံး၀ဲဒၣ် န့ၣ်လီၤႉ လီၢ်က၀ီၤကမျၢၢ်တဂၤစံး၀ဲလၢ“ၦၤကၠိဖိခံဂၤအကျါမ့မ့ၢ်အ၀ဲတဂၤန့ၣ်အအိၣ်လၢ(၀ါပ့ၤစူၣ်)သ၀ီစံၣ်တၢ်ဒုးဟဲအိၣ် ဖဲ(တီကၠီၤပီၣ်)ဟဲထီၣ်လိၤကၠိမီၤနီၤႉမ့မ့ၢ်ၦၤလၢအဂၤတဖၣ်န့ၣ်မ့ၢ်၀ဲဒၣ်(တီကၠီၤပီၣ်)သ၀ီဖိလီၤႉၦၤကၠိဖိတဖၣ်ဘၣ်ဖဲအကၠိပံးလဲၤဂဲၤလိာ်ကွဲလၢသီခါဖၠၣ်ကပၤအခါအဘၣ်ဒ်န့ၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တကီၢ်ခါခဲအံၤၦၤကမျၢၢ်လၢအဘၣ်ဒိဘၣ်ထံး(၄)ဂၤအံၤ(ခ့ၣ်အဲၣ်ယူၣ်)ဆူၣ်ချ့ၦၤဘၣ်မူဘၣ်ဒါကူစါယါဘျါအ၀ဲသ့ၣ် အဂ့ၢ်န့ၣ် ကမျၢၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ နၣ်သၤကွ့ဒီးတီကၠီၤပီၣ်သ၀ီလၢတၢ်ကဲထီၣ်သးခဲအံၤန့ၣ်အဘၢၣ်စၢၤအိၣ်ထဲတတၢၣ်လီၤဒီးအပူၤကွံာ်လၢညါစ့ၢ်ကီး ခီဖျိပယီၤသုးခးလီၤကျိဖးဒိၣ်အဃိ ၦၤကမျၢၢ်ဘၣ်ဒိဘၣ်ထံးအိၣ်၀ဲအဂ့ၢ်န့ၣ် ကညီဂ့ၢ်ဂီၢ်အူတၢ်တိစၢၤမၤစၢၤကရူၢ် ၦၤဘၣ်မူဘၣ်ဒါတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ပယီၤသုးခဲအံၤတဖၣ်အံၤခးလီၤကျိဖးဒိၣ်ကိးမုၢ်နၤဒဲးလီၤႉတၢ်ကဲထီၣ်ဖဲတီကၠီၤပီၣ်ခဲအံၤနါက့ လၢညါနါက့ အကဲထီၣ်သးအိၣ်စ့ၢ်ႉခီဖျိကျိဖးဒိၣ်အံၤအဃိဘၣ်ၦၤမဲာ်သၣ်ချံႇၦၤဘၣ်ကူစါယါဘျါသးအိၣ်ဒီးဒူၣ်ညါႉ ၦၤတနၢ်ဟူလၢ တၢ်ဒုးကဲထီၣ်စ့ၢ်ဘၣ်ႇအ၀ဲသ့ၣ်ခးလီၤကျိဖးဒိၣ်တပယူာ်ဃီအဃိသ၀ီကိးဖျၢၣ်ဒဲးဘၣ်အိၣ်လၢတၢ်ပလီၢ်ပဒီပူၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ စှၤလါတီၢ်ပူၤအံၤပယီၤသုးခးလီၤကျိဖးဒိၣ်တပယူာ်ဃီလၢချၢၣ်လွံၢ်ထူၣ်ကီၢ်ရ့ၣ် ကီၢ်ဆၣ်တဖၣ်အပူၤဒီး သုးဟံးန့ၢ်တၢ်စိတၢ်ကမီၤ၀ံၤလီၢ်ခံ ခီဖျိကဘီယူၤဟဲခးလီၤတၢ်ႇပယီၤသုးခးလီၤကျိဖးဒိၣ်အဃိ ၦၤကမျၢၢ်သံဘၣ်ဒိဘၣ်ထံး အနီၣ်ဂံၢ်နီၣ်ဒွးအိၣ်တစှၤန့ၢ်အဂၤ(၁၀၀)ညါအဂ့ၢ်န့ၣ် ကညီဂ့ၢ်၀ီခွဲးယာ်ကရူၢ်(KHRG) တၢ်မၤနီၣ်မၤဃါစရီအသိး သ့ၣ်ညါဘၣ်န့ၣ်လီၤႉ ဒ်န့ၣ်အသိးလၢခ့ၣ်အဲၣ်ယူၣ်တၢ်ပၢဟီၣ်က၀ီၤ(၇)ဘ့ၣ်အပူၤ ခီဖျိဒုးယၤတၢ်သဘံၣ်သဘုၣ်အဃိ ချၢၣ်လွံၢ်ထူၣ်ကီၢ်ရ့ၣ်ပူၤ ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲခဲလၢာ်(၂၄၈ႇ၁၆၀)ဂၤအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲအသိး...
(FBR)လဲၤဆီၣ်ထွဲမၤစၢၤ ချၢၣ်လွံၢ်ထူၣ်ကီၢ်ရ့ၣ် ၦၤကမျၢၢ်တဖၣ်လၢတၢ်အီၣ်တၢ်အီဒီးကသံၣ်ကသီ
လါအီးကထိဘၢၣ် ၂၃ သီ, ၂၀၂၃ နံၣ်, ခ့ၣ်အဲးစံၣ် ဖဲအပူၤကွံာ်လါအီးကထိဘၢၣ် ၁၄ သီ တုၤ ၁၅ သီအနံၤ (Free Burma Ranger-FBR)ကရူၢ် လဲၤဆီၣ်ထွဲမၤစၢၤ၀ဲ ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်က၀ီၤ သ၀ီ(၃)ဖျၢၣ် ဟံၣ်ခိၣ်(၂၃၉)ဖျၢၣ် ၦၤနီၣ်ဂံၢ်(၁၁၂၄)ဂၤလၢဂံၢ်ခီၣ်ထံးတၢ်အီၣ်တၢ််အီဒီးကသံၣ်ကသီသ့ၣ်တဖၣ်အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သး ထုးထီၣ်ပာ်ဖျါ၀ဲဖဲလါအီးကထိဘၢၣ် ၂၀ သီအနံၤန့ၣ်လီၤႉ ခီဖျိကဘီယူၤဟဲခးလီၤတၢ်ဒီးခံခီခံကပၤအဘၢၣ်စၢၤတၢ်ဒုးကဲထီၣ်အဃိလဲၣ်ကီၣ်၀ၣ်ႇကၠံပ့ၤစူၣ်ႇဒလၣ်စ့ၣ်သ၀ီဖိ တဖၣ်ဘၣ်ဃ့ၢ်ထီၣ်၀ဲဒီးၦၤသ့ၣ်တဖၣ်အံၤထံၣ်ဘၣ်၀ဲတၢ်ကီတၢ်ခဲဒီးလၢအ၀ဲသ့ၣ်ကၦ့ၤအီၣ်ၦ့ၤအီၣ်တၢ်အဂီၢ် (FBR) လဲၤဆီၣ်ထွဲမၤစၢၤ၀ဲဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ အပူၤကွံာ်လါအီးကထိဘၢၣ် ၁၆ သီ တုၤ ၁၇ သီအနံၤ ဖဲ(FBR)လဲၤဆီၣ်ထွဲမၤစၢၤ၀ဲသ၀ီသၢဖျၢၣ်အံၤအခါ (FBR)ဟ့ၣ်ဃုာ်စ့ၢ်ကီး၀ဲဘၣ်ဃးတၢ်ဒီသဒၢစိဃာ်ကဘီယူၤတၢ်လီၤဘၣ်ယိၣ်တၢ်သ့ၣ်ညါနၢ်ပၢၢ်သိၣ်လိတခါ အဂ့ၢ်န့ၣ် ခ့ၣ်အဲၣ်ယူၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါဖဲအပူၤကွံာ်လါအီးကထိဘၢၣ် ၁၈ သီအခါစ့ၢ်ကီး ၦၤဃ့ၢ်မှံဟးဖျိးလၢအိၣ်ခ့ၣ်အဲၣ်ယူၣ်(သုက့ ၃) လၢၢ်ဒိၣ်ကီၢ်ဆၣ် စ့ၣ်တီမၠ့ၣ်မုၢ်နုာ်တကပၤန့ၣ်စ့ၢ်ကီး (ခ့ၣ်အဲၣ်ယူၣ်)လၢၢ်ဒိၣ်ကီၢ်ဆၣ် ဆူၣ်ချ့၀ဲၤကျိၤႇ (Free Burma Ranger-FBR)ဒီးကညီဂ့ၢ်ဂီၢ်အူတၢ်တိစၢၤမၤစၢၤကရူၢ်ပာ်ဖှိၣ်ထီၣ်သးလဲၤဟ့ၣ်၀ဲဒၣ်ဆူၣ်ချ့တၢ်သ့ၣ်ညါနၢ်ပၢၢ်တၢ်သိၣ် လိႇလဲၤမၤစၢၤ၀ဲဒၣ်တၢ်အီၣ်တၢ်အီဒီးဟ့ၣ်၀ဲတၢ်သိၣ်လိဘၣ်ဃးကဘၣ်အိၣ်ကတီၤဆိသးလၢကဘီယူၤတၢ်လီၤဘၣ်ယိၣ်ဒ်လဲၣ်အဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ ဖဲအပူၤကွံာ်လါစဲးပထ့ဘၢၣ်ဒီးလါအီးကထိဘၢၣ်အခါလၢခ့ၣ်အဲၣ်ယူၣ်(သုးက့ ၃)ဟီၣ်က၀ီၤ ဒူသ၀ီတဖၣ်အပူၤ ခီဖျိကဘီယူၤဟဲခးလီၤတၢ်ႇပယီၤသုးခးလီၤကျိဖးဒိၣ်ဒီးမၤ၀ဲတၢ်ထီၣ်ဒုးလၢပျီပူၤအဃိ...
ဟ့ၣ်တၢ်ခိတၢ်သွဲမ့၀ံၤမးတၢ်ကမၤအထီၣ်န့ၢ်၀ဲဖးစ်ပိး(passport)လံ၁်ဟးကီၢ်မုၢ်နံၤမုၢ်သီ
လါအီးကထိဘၢၣ် ၂၀ သီႇ ၂၀၂၃ နံၣ်ႇ ခ့ၣ်အဲးစံၣ် ကီၢ်ပယီၤခီကီၢ်ၦၤမၤတၢ်ဖိလၢအလဲၤမၤတၢ်ဆူထံဂုၤကီၢ်ဂၤတဖၣ်မ့ဟဲက့ၤမၤအါထီၣ်အ(ဖးစ်ပိး)လံာ်မုၢ်နံၤမုၢ်သီန့ၣ် မ့ပၣ်ဃုာ်ဒီးလံာ်အုၣ်သးလၢဟ့ၣ်တၢ်ခွိတၢ်သွဲ၀ံၤလံအံၤမးကမၤအါထီၣ်န့ၢ်၀ဲ(ဖးစ်ပိး)မုၢ်နံၤမုၢ်သီအဂ့ၢ်န့ၣ် သုးမီၤစိရိၤ တၢ်ထုးထီၣ်ကီၢ်ပယီၤလံာ်ဟးကီၢ်ကရူၢ် ထုးထီၣ်ဒုးသ့ၣ်ညါ၀ဲဖဲတလါအံၤလါအီးကထိဘၢၣ်ထီၣ်သၢနွံတနွံအခါန့ၣ် လီၤႉ ကီၢ်ပယီၤခီကီၢ်ၦၤမၤတၢ်ဖိလၢအလဲၤမၤတၢ်မၤလၢထံဂုၤကီၢ်ဂၤလၢအဖီၣ်၀ဲဒၣ် Passport for job (PJ)လံာ်အံၤဒီး Passport for Seaman (PS)ၦၤကဘီဖိလံာ်သ့ၣ်တဖၣ်အံၤ ဒ်တၢ်ပာ်ပနီၣ်အိၣ်အသိးအ၀ဲသ့ၣ်ကဘၣ်ဟ့ၣ် တၢ်ခိတၢ်သွဲဒီး ဖဲအဟဲက့ၤမၤအါထီၣ်(ဖးစ်ပိး)မုၢ်နံၤမုၢ်သီအခါ မ့ဒုးနဲၣ်၀ဲလၢအဟ့ၣ်တၢ်ခိတၢ်သွဲ၀ံၤမး ကမၤအါထီၣ်န့ၢ်၀ဲမုၢ်နံၤမုၢ်သီအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ သုးကီၣ်ကးထၢ၀ဲဒၣ်တၢ်ခိတၢ်သွဲဖီၣ်ဃံးကီၢ်ပယီၤၦၤမၤတၢ်ဖိလၢအလဲၤမၤတၢ်လၢထံဂုၤကီၢ်ဂၤတဖၣ်ဒ်အံၤ ခီဖျိအဖီၣ်ဃံး၀ဲၦၤကညီတန့ၢ်ဘၣ်အဃိဖီၣ်ဃံးက့ၤ၀ဲလၢလံာ်ဟးကီၢ်(ဖးစ်ပိး)အဂ့ၢ်န့ၣ် တၢ်မၤသကိးၦၤကီၢ်ပယီၤဖိဂ့ၢ်၀ီကမံးတံာ်(JACBA)ၦၤပၢၤလီၢ်ဆ့ၣ်နီၤ အူမိကၠိ စံး၀ဲန့ၣ်လီၤႉ အူမိကၠိစံး၀ဲလၢ“သုးကီၣ်ကးအတၢ်ထံၣ်တၢ်ပာ်သးဒုတဲာ်တဲာ်လီၤႉထၢ၀ဲဒၣ်တၢ်ခိတၢ်သွဲလၢၦၤလဲၤမၤတၢ်လၢထံချၢကီၢ်ချၢတဖၣ်အအိၣ်ႉထၢ၀ဲဒၣ်မ့တန့ၢ်ဘၣ်န့ၣ်ကမၤ၀ဲဒၣ်ဖဲၦၤဟဲက့ၤမၤအါထီၣ်(ဖးစ်ပိး)လံာ်မုၢ်နံၤမုၢ်သီအခါန့ၣ်မီၤနီၤႉကသံကွၢ်၀ဲသုဟ့ၣ်တၢ်ခိသွဲ၀ံၤလံဧါကမၤ၀ဲဒ်န့ၣ်ႉအ၀ဲသ့ၣ်မၤၦၤတန့ၢ်ဘၣ်အဃိကမၤ၀ဲလၢလံာ်လဲၢ်ခီမီၤနီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါကီၢ်ပယီၤၦၤမၤတၢ်ဖိလၢအလဲၤမၤတၢ်လၢထံဂုၤကီၢ်ဂၤတဖၣ်အံၤကဘၣ်ဆှၢလီၤစ့(၂၅)မျးကယၤဆူ ကီၢ်ပယီၤပူၤလၢအဖိးသဲစးဒီးကထၢ၀ဲၦၤမၤတၢ်ဖိအလါလဲအခိအသွဲ(၁၀)မျးကယၤအဂ့ၢ်န့ၣ် သုးကီၣ်ကးထုးထီၣ် ပာ်ဖျါတ့ၢ်ဃာ်ဖဲအပူၤကွံာ်လါစဲးပထ့ဘၢၣ်အခါန့ၣ်လီၤႉ ၦၤလၢအမ့အဲၣ်ဒိးမၤ(ဖးစ်ပိး)လံာ်ဟးကီၢ်လၢအသီတဖၣ်ဒီးၦၤလၢအဟဲက့ၤမၤအါထီၣ်လံာ်မုၢ်နံၤမုၢ်သီတဖၣ်အံၤ အ၀ဲသ့ၣ်ဟ့ၣ်တၢ်ခိတၢ်သွဲမ့၀ံၤမးကမၤအါထီၣ်န့ၢ်၀ဲမုၢ်နံၤမုၢ်သီဒီးထုးထီၣ်န့ၢ်၀ဲလံာ်အဂ့ၢ်န့ၣ် သုးကီၣ်ကးရူလၢအထုး ထီၣ်လံာ်ခီကီၢ်တဖၣ်ဘိးဘၣ်ရၤလီၤစ့ၢ်ကီး၀ဲဒၣ်စုာ်စုာ်န့ၣ်လီၤ ကီၢ်ပယီၤၦၤမၤတၢ်ဖိလၢအသူ(PJ)လၢအိၣ်ကီၢ်ကၠီၣ်တဲၣ်ပူၤတဂၤစံး၀ဲလၢ“ယလံာ်န့ၣ်မ့တုၤလၢလါအ့ဖြ့ၣ်န့ၣ်မုၢ်နံၤမုၢ်သီလၢာ်လံမီၤနီၤႉလၢညါန့ၣ်မးထဲဘၣ်လဲၤတီၢ်လံာ်မၤအါထီၣ်လံာ်မုၢ်နံၤမုၢ်သီန့ၣ်မးတဘၣ်ဂီၢ်ဘၣ်ႉအ၀ဲသ့ၣ်ထုးထီၣ်၀ဲ လၢပဘၣ်ဟ့ၣ်တၢ်ခိတၢ်သွဲဒ်အံၤဒုတဘၣ်ဂီၢ်လၢၤဘၣ်ႉပာ်လီၤကွၢ်အဒိနမၤတၢ်မၤမ့န့ၢ်တခါ(၁)ကလးန့ၣ် နမ့က့ၤထုးထီၣ် ကွံာ်ဟံၣ်လဲဃီလဲအီၣ်လဲန့ၣ်ကအိၣ်တ့ၢ်ထဲယဲၢ်ကထိဘးလီၤႉတၢ်ယဲၢ်ကထိအံၤပမ့ဘၣ်ဟ့ၣ်လီၤတၢ်ခိတၢ်သွဲအမျးကယၤ (၁၀)ဒုဘၣ်ဂီၢ်ကသ့၀ဲလဲၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါလၢကညီကီၢ်စဲၣ် မၠၣ်၀တံၣ် တၢ်ထုးထီၣ်(ဖးစ်ပိး)လံာ်ဟးကီၢ်၀ဲၤဒၢးအံၤစ့ၢ်ကီး အပူၤကွံာ်လၢညါ နလဲၤမၤ(ဖးစ်ပိး)ဒီးဟံၣ်ခိၣ်စရီအိၣ်ဟဲလၢတၢ်လီၢ်အဂၤန့ၢ်ဘၣ်ဆၣ်စးထီၣ်ဖဲတလါအံၤလါအီးကထိဘၢၣ် ၁၈ သီန့ၣ် တူၢ်လိာ်၀ဲထဲ(ကညီကီၢ်စဲၣ်)ဟံၣ်ခိၣ်စရီလီၤဒီးမ့မ့ၢ်ဟံၣ်ခိၣ်စရီလၢအိၣ်တၢ်လီၢ်အဂၤတဖၣ်န့ၣ်တမၤန့ၢ်၀ဲလၢၤဘၣ် အဂ့ၢ်န့ၣ် ဘိးဘၣ်ရၤလီၤဃာ်၀ဲအိၣ်န့ၣ်လီၤႉ
ကီးတရံးကီၢ်ဆၣ် ဒူသ၀ီတဖၣ်အပူၤ ၦၤဖိဒံဖိသၣ်ဆိးက့အိၣ်တဆူၣ်ဘၣ်အါမး
လါအီးကထိဘၢၣ် ၂၀ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကီးတရံးကီၢ်ဆၣ် ဒူသ၀ီတဖၣ်အပူၤ တလါအံၤလါအီးကထိဘၢၣ်အတီၢ်ပူၤန့ၣ် ၦၤဖိဒံဖိသၣ်ဆိးက့အနါအ့ၣ်ထံယွၤႇကူးအိၣ်တဆူၣ်အိၣ်ချ့ဘၣ်အိၣ်၀ဲအါမးအဂ့ၢ်န့ၣ် လီၢ်က၀ီၤၦၤကမျၢၢ်တဖၣ် စံး၀ဲန့ၣ်လီၤႉ ကီၢ်တရံးကီၢ်ဆၣ် ဒူသ၀ီတဖၣ်အါဒၣ်တက့ၢ်န့ၣ် ၦၤဖိဒံဖိသၣ်ဆံးတဖၣ်ဆိးက့အနါအ့ၣ်ထံယွၤႇကူးအိၣ်တဆူၣ်တချ့ အိၣ်အါအဃိ ပၢၢ်တုၤလၢၦၤဘၣ်ပံးကွံာ်ကၠိအိၣ်၀ဲတနီၤအဂ့ၢ်န့ၣ် လီၢ်က၀ီၤကညီဆူၣ်ချ့ၦၤမၤတၢ်ဖိတဂၤ စံး၀ဲဒ်အံၤ န့ၣ်လီၤႉ “အခဲအံၤသ၀ီကိးဖျၢၣ်ဒဲးဃၣ်ဃၣ်န့ၣ်ၦၤဖိသၣ်နါအ့ၣ်ထံယွၤအကူးမီၤနီၤႉမ့ၢ်လၢၦၤဖိဒံဖိသၣ်အိၣ်တဆူၣ်အိၣ်တချ့ဘၣ်အါအဃိၦၤဘၣ်ပံးကွံာ်ကၠိအိၣ်တနီၤႉအဘၣ်အါလၢၦၤဖိသၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ ဘၣ်ဃးဒီးၦၤဖိဒံဖိသၣ်ဆိးက့အကူးအနါအ့ၣ်ထံယွၤကဲထီၣ်ခဲအံၤန့ၣ်တဒ်သိးဒီးအပူၤကွံာ်တိးကွ့တၢ်လိၤကိၢ်တၢ်ဆါယိယိဖိန့ၣ်ဘၣ်ဒီးတၢ်ဆါအံၤကဘၣ်နၤတသီယံၤ၀ဲတစဲးဒီးဘၣ်ကူစါယါဘျါလၢသ့ၣ်ဂံၢ်၀ၣ်စဲတဖၣ်အဂ့ၢ်န့ၣ် ကမျၢၢ်တဖၣ် စံး၀ဲန့ၣ်လီၤႉ လီၢ်က၀ီၤကမျၢၢ်တဂၤစံး၀ဲလၢ“တိးကွ့ကဲထီၣ်လၢညါတဖၣ်န့ၣ်နအီကသံၣ်န့ၣ်လီၤမၢ်လီၤႉအခဲအံၤန့ၣ်တမ့ၢ်ဒ်န့ၣ်ဘၣ်နအီကသံၣ်နါက့တလီၤမၢ်ဘၣ်ႉၦၤတနီၤန့ၣ်အီက့ၤ၀ဲသ့ၣ်ဂံၢ်၀ၣ်လၣ်ကသံၣ်ႉအဘၣ်နါက့အိၣ်ႇတဂၤဒီးတဂၤန့ၣ် တဒ်သိးလိာ် သးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးၦၤဖိဒံဖိသၣ်အိၣ်တဆူၣ်အိၣ်ချ့တကးဒံးဘၣ်အမဲာ်ညါၦၤမဲာ်ချံဆါစ့ၢ်ကီးအိၣ်၀ဲဒီး ဆီႇထိးသ့ၣ်တဖၣ်စ့ၢ်ကီးဘၣ်တၢ်ဆါသံ၀ဲအါမးအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လၢန့ၣ်အမဲာ်ညါၦၤဖိဒံဖိသၣ်လၢအအိၣ်တဆူၣ်အိၣ်ချ့ဘၣ်သ့ၣ်တဖၣ်အါဒၣ်တက့ၢ်ကဲထီၣ်သးအါလၢၦၤဖိသၣ်(၁၅)နံၣ်ဆူဖီလာ်တဖၣ်လီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
၁၅ သီအတီၢ်ပူၤ ပယီၤသုးသံ ၁၃ ဂၤႇ ဘၣ်ဒိ ၂၉ ဂၤအဂ့ၢ် (သုးက့ ၅)ထုးထီၣ်ပ၁်ဖျါ
လါအီးကထိဘၢၣ် ၂၀ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ တလါအံၤလါအီးကထိဘၢၣ် ၁ သီ တုၤ ၁၅ သီ လၢတဆံယဲၢ်သီအတီၢ်ပူၤ တၢ်ဒုးကဲထီၣ် ၃၈ ဘျီဒီး ဖဲန့ၣ်ပယီၤသုးတကပၤသံ ၁၃ ဂၤႇ ဘၣ်ဒိ ၂၉ ဂၤ အဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်တၢ်ကစီၣ် ထုးထီၣ်ပာ်ဖျါ၀ဲဖဲလါအီးကထိဘၢၣ် ၁၈ သီအနံၤန့ၣ်လီၤႉ ခံခီခံကပၤတၢ်ဒုးကဲထီၣ်အတီၢ်ပူၤပယီၤသုးတကပၤသံဘၣ်ဒိဘၣ်ထံးအါအသိး မ့မ့ၢ်လၢ(KNLA)တကပၤစ့ၢ်ကီး ဘၣ်ဒိ၀ဲဒၣ်တဂၤအဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ တၢ်ဒုးကဲထီၣ်အကတီၢ်ပယီၤသုးခးလီၤ(၁၂၂ မမ)ဒီး(၁၂၀ မမ)ကျိဖးဒိၣ်အဖျၢၣ်(၁၀)ဃၣ်ဃၣ်ဆူ ဘူသိၣ်ကီၢ်ဆၣ် ဖၣ်ပူၣ်၀့ၢ် ပာ်ဟဲးကရူၢ်ႇမဲၢ်ခူၣ်ကရူၢ်ပူၤဒီး ဒ်န့ၣ်အသိးဖဲလါအီးကထိဘၢၣ် ၅ သီအနံၤ ကဘီယူၤဟဲခးလီၤ၀ဲ ကလဲၤစ်တၤဘိ(Cluster Bomb)ကျိဖးဒိၣ်ခံဖျၢၣ်ဆူလူၤသီကီၢ်ဆၣ် ဘီလ့ဒၢသ၀ီၤပူၤအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ ခ့ၣ်အဲၣ်ယူၣ်(သုးက့ ၅)ဟီၣ်က၀ီၤဒူသ၀ီတဖၣ်အပူၤ ခီဖျိတၢ်ဒုးကဲထီၣ်၀ဲလၢပယီၤသုးဒီး(KNLA)အဘၢၣ်စၢၤအဃိ လီၢ်က၀ီၤၦၤသ၀ီဖိတဖၣ်လဲၤဖံးလဲၤမၤတၢ်လၢကျီးပူၤတဘူၣ်လၢၤဘၣ်ဒီးဘၣ်ဃ့ၢ်ထီၣ်၀ဲတဂ့ၢ်န့ၣ် ဖၣ်ပူၣ်ကမျၢၢ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“အပူၤကွံာ်စှၤသီအခါန့ၣ်ပနၢ်ဟူကျိဖိသီၣ်ဒံးမီၤနီၤႉမ့မ့ၢ်ကျိဖိဒုနၢ်ဟူအိၣ်ကိးမုၢ်နံၤဒဲးလီၤႉဂီၤခီန့ၣ် နကလဲၤလၢကျီးပူၤန့ၣ်နလဲၤတဘူၣ်ညီညီဘၣ်ႉဘၣ်မၤနုၤအဃိလဲၣ်န့ၣ်မ့ၢ်ကျိဖးဒိၣ်ကလီၤတဲာ်လၢပမဲာ်ညါအခါဖဲလဲၣ်န့ၣ်ပတသ့ၣ်ညါဘၣ်ႉမ့သီၣ်ဘူးထီၣ်ဒုအိၣ်ဒၣ်ပဘၣ်နုာ်လီၤအိၣ်ခူသူၣ်လၢဘုခ့ကျီးပူၤန့ၣ်လီၤႉအိၣ်ဒၣ်ဘၣ်အိၣ်ဘၣ်စံၣ်ဘၣ်ဃုဒ်အံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢခ့ၣ်အဲၣ်ယူၣ်(သုးက့ ၅)ဟီၣ်က၀ီၤ ဖၣ်ပူၣ်၀့ၢ်ပူၤ ခီဖျိတၢ်ပံာ်ဃာ်၀ဲပယီၤသုးအဟံၣ်ဖိဃီဖိအတၢ်အီၣ်တၢ်အီကျဲ အဃိ...