ပယီၤသုးတၢ်သမံသမိးတြဲၤလၢအိၣ်ပလီ၀့ၢ်နု၁်လီၤတဖၣ် အိၣ်ခိးသမံသမိးတၢ်ဟဲအါထီၣ်
လါအီကူး ၁၇ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ်အပူၤ ပယီၤသုးတၢ်သမံသမိးတြဲၤလီၢ်လၢအိၣ်ပလီ၀့ၢ်နုာ်လီၤသ့ၣ်တဖၣ်အံၤ အိၣ်ခိးသမံသမိးတၢ်ဖိတၢ်လံၤလၢၦၤဟဲက့ၤတီၣ်၀ဲတဖၣ်ဟဲအါထီၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ် အအိၣ်န့ၣ်လီၤႉ လၢပလီ၀့ၢ်နုာ်လီၤကျဲသ့ၣ်တဖၣ်န့ၣ်ပယီၤသုးတၢ်သမံသမိးတြဲၤကအိၣ်လၢ(၇)ခါဃၣ်ဃၣ်ညါဒီးစှၤသီအတီၢ်ပူၤအံၤ ပယီၤသုးမၤအါထီၣ်တၢ်ဘံၣ်တၢ်ဘၢႇသမံသိးတၢ်ဖိတၢ်လံၤလၢကမျၢၢ်ဟဲက့ၤတီၣ်၀ဲသ့ၣ်တဖၣ်ဟဲအါထီၣ်၀ဲဒၣ် အဂ့ၢ်န့ၣ် လီၢ်က၀ီၤကမျၢၢ်လၢအလ့ၢ်ထီၣ်လ့ၢ်လိၤဖဲန့ၣ်တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“လၢညါန့ၣ်အ၀ဲသ့ၣ်မ့ဟဲထီၣ်လံန့ၣ်အပံးကွံာ်ကျဲခဲလၢာ်လီၤႉဖဲစှၤသီအတီၢ်ပူၤအံၤတၢ်ဒုးကဲထီၣ်လၢ ၀့ၢ်ပူၤ တအိၣ်လၢၤဘၣ်ဘျီအ၀ဲသ့ၣ်က့ၤအိးထီၣ်ကဒါကျဲအိၣ်ခိးသမံသမိးတၢ်လၢတြဲၤန့ၣ်မီၤနီၤႉအ၀ဲသ့ၣ်ထီၣ်သမံသမိးတၢ်ဖိတၢ်လံၤတုၤလၢသိလ့ၣ်ပူၤညါႉမ့၀ံၤတၢ်လၢအ၀ဲသ့ၣ်အဲၣ်ဒိးသံကွၢ်၀ဲန့ၣ်သံကွၢ်၀ဲလီၤႉတၢ်သမံသမိးတြဲၤလီၢ်တခါဒီးတခါန့ၣ်ၦၤသုးဖိလဲလဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤလီၢ်ခံလၢပလီ၀့ၢ်နုာ်လီၤကျဲသ့ၣ်တဖၣ်န့ၣ်ပယီၤသုးတၢ်သမံသမိးတြဲၤဟဲအါထီၣ်၀ဲဒီး တြဲၤသ့ၣ်တဖၣ်အံၤအိၣ်ခိးထၢအီၣ်စ့လၢကမျၢၢ်အအိၣ်တကးဒံးဘၣ်အမဲာ်ညါစးထီၣ်ဖဲတလါအံၤလါအီကူးထီၣ် တၢတနွံအခါန့ၣ်အ၀ဲသ့ၣ်ဟံပၢၢ်တုၤလၢကမျၢၢ်အတၢ်ဖိတၢ်လံၤညါအဂ့ၢ်န့ၣ် ပလီ၀့ၢ်ကမျၢၢ်လၢတအဲၣ်ဒိးပာ်ဖျါ အမံၤတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ၦၤဟဲက့ၤစိာ်ဟုသးမ့ပၣ်န့ၣ်ပယီၤသုးဟံ၀ဲလီၤႉနက့ၤတဲဆၢကဒါတသ့နီတမံၤဘၣ်ႉ သိဘူနါက့ဟံဃုာ်၀ဲ ခဲလၢာ်လီၤႉမ့၀ံၤဒ်အ၀ဲသ့ၣ်ဃ့နၤစ့အသိးန့ၣ်နဘၣ်ဟ့ၣ်လီၤလီၤႉနကလဲၤတရံးကျဲလၢအဂၤခီဒၢးယံၤတလၢအဃိ ပဘၣ်သူ၀ဲကျဲတဘိအံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးဖဲအပူၤကွံာ်လါယူၤလံ ၂၀ သီအနံၤစ့ၢ်ကီး တၢ်သမံသမိးတြဲၤတဖၣ်အကျါ ဖဲ(မီၤကၠီ)သ၀ီ တၢ်သမံသမိးတြဲၤန့ၣ် ပယီၤသုးတပျဲလီၢ်က၀ီၤကမျၢၢ်လ့ၢ်ထီၣ်လ့ၢ်လိၤလၢၤဘၣ်ကဲထီၣ်တ့ၢ်အသိးဒံးအဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲအသိးသ့ၣ်ညါဘၣ်န့ၣ်လီၤႉ လၢပလီကီၢ်ဆၣ်အပူၤတၢ်ဒုးကဲထီၣ်၀ဲလၢပယီၤသုးဒီးတၢ်ဒီသဒၢကမျၢၢ်သုးအဘၢၣ်စၢၤအိၣ်၀ဲခဲအံၤခဲအံၤဒီး ပယီၤသုးဆီလီၤကျိဖးဒိၣ်လၢသ၀ီပူၤခးလီၤတပျုာ်တပျီာ်ကျိဖးဒိၣ်အိၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ် အအိၣ်န့ၣ်လီၤႉ
ခီဖျိတၢ်ဒုးကဲထီၣ်ကဒါလၢ(ယွၤသ့ၣ်ကိ)သ၀ီပူၤအဃိ ၦၤသ၀ီဖိတဖၣ်ဘၣ်ဃ့ၢ်ထီၣ်ကဒီး
လါအီကူး ၁၇ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤ ကီးတရံးကီၢ်ဆၣ်အပူၤ ဖဲမဟါလါအီကူး ၁၆ သီ ဂီၤခီ ၈း၃၀ အဆၢကတီၢ် ပယီၤသုးလၢအိၣ်ဆီလီၤသးဖဲ အ့ရှါကျဲကပၤယွၤသ့ၣ်ကိသ၀ီပူၤ တဖၣ်အံၤဒီး တၢ်ပၢၢ်ဆၢသုးပာ်ဖှိၣ်အဘၢၣ်စၢၤတၢ်ဒုးကဲထီၣ်အဃိ ၦၤသ၀ီဖိတဖၣ်ဘၣ်ဃ့ၢ်ထီၣ်ကဒီး၀ဲအဂ့ၢ်န့ၣ် သ့ၣ်ညါဘၣ် န့ၣ်လီၤႉ ဖဲအပူၤကွံာ်လါအီကူး ၇ သီအခါ ပယီၤသုးလၢအနုာ်လီၤအိၣ်လၢ(ယွၤသ့ၣ်ကိ)သ၀ီပူၤတဖၣ်အံၤဒီး ကညီဒီကလု၁်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤတၢ်ဒုးကဲထီၣ်၀ဲခံဘျီညါဒီး လၢတၢ်န့ၣ်အဃိ ၦၤသ၀ီဖိတဖၣ်အိၣ်လၢသ၀ီပူၤတဘူၣ်လၢၤဘၣ်ဟးစံၣ်ပလဲာ်သးလၢတၢ်လီၢ်အဂၤအဂ့ၢ်န့ၣ် ယွၤသ့ၣ်ကိသ၀ီဖိတဖၣ် စံး၀ဲန့ၣ်လီၤႉ သ၀ီဖိလၢတအဲၣ်ဒိးပာ်ဖျါအမံၤတဂၤစံး၀ဲလၢ“ပယီၤသုးဟဲလၢသ၀ီပူၤအဃိတၢ်ပၢၢ်ဆၢသုးပာ်ဖှိၣ်ကရူၢ်လဲၤခးအ၀ဲသ့ၣ်ဘျီ ၦၤအိၣ်လၢသ၀ီပူၤတဘူၣ်လၢၤဘၣ်ႉၦၤနီၢ်ဒိၣ်ႇၦၤဖိသၣ်ၦၤသ၀ီဖိဟးစံၣ်ပလဲာ်သးခဲလၢာ်လီၤႉတၢ်ဒုးဖဲ(၇)သီန့ၣ်တဘျီဒီး ဖဲတနံၤအံၤလါအီကူး(၁၆)သီန့ၣ်တဘျီအိၣ်ခံဘျီမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်– ကညီတၢ်ကစီၣ် န့ၣ်လီၤႉ တၢ်စူၤခါအတီၢ်ပူၤခီဖျိၦၤသ၀ီဖိသ့ၣ်တဖၣ်အံၤဘၣ်ဟးစံၣ်အိၣ်လၢၦၢ်ပူၤအဃိလိၣ်ဘၣ်၀ဲဒၣ်တၢ်အိၣ်တၢ်ဆိးလီၢ်ကျဲဒီးတၢ်အီၣ်တၢ်အီသ့ၣ်တဖၣ်အဂ့ၢ်န့ၣ် ၦၤပိာ်မုၣ်လၢအဃ့ၢ်တၢ်ဒုးတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ၦၤစံၣ်ထီၣ်တဖၣ်အကျါန့ၣ်ၦၤဖိဒံဖိသၣ်ႇဖိသၣ်အီနုၢ်ပၣ်စ့ၢ်မီၤနီၤႉၦၤစံၣ်ထီၣ်တဖၣ်အံၤအကျါတနီၤန့ၣ် တၢ်အီၣ်တၢ်အီတပၣ်နီတမံၤဘၣ်ႉတၢ်စူၤခါအဃိနးတစဲးမီၤနီၤႉတၢ်ခိၣ်ဒုး(တၤလပၣ်)စ့ၢ်ကီးအံၣ်အဃိမုၢ်နၤခီန့ၣ် ၦၤဘၣ်ဆ့ၣ်နီၤအိၣ်တဂၤတဂၤဒ်န့ၣ်လီၤႉဘၣ်လၢတၢ်စူၤခါအကတီၢ်ၦၢ်ပူၤအံၤတၢ်ဖိဃၢ်လဲလဲလီၤႉမ့မ့ၢ်လၢတၢ်ကိၢ်ခါန့ၣ် နမံလၢသ့ၣ်ကဒုဖီလာ်သ့ဒံးမီၤနီၤႉဘၣ်ဆၣ်မ့မ့ၢ်လၢတၢ်စူၤခါအံၤဒုတဘၣ်ဂီၢ်နီတစဲးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲအပူၤကွံာ်(၂၀၂၂)လါဒံၣ်စ့ဘၢၣ်အခါစ့ၢ်ကီး လၢယွၤသ့ၣ်ကိသ၀ီအပူၤ ခီဖျိတၢ်ဒုးကဲထီၣ်၀ဲလၢပယီၤသုးဒီး တၢ်ပၢၢ်ဆၢသုးပာ်ဖှိၣ်ကရူၢ်အဘၢၣ်စၢၤအဃိ လီၢ်က၀ီၤသ၀ီဖိတဖၣ်အံၤဘၣ်ဃ့ၢ်ထီၣ်ဒံး၀ဲသ၀ီဒီတဖျၢၣ်ညါန့ၣ်လီၤႉ ဒ်န့ၣ်အသိးလၢကီးတရံးကီၢ်ဆၣ် နိၣ်လါႇတန့ၤမူၤႇကီၣ်မူႇကၠီၤစှၤကိႇယွၤသ့ၣ်ကိႇကီးနွဲၣ်ႇအီကြီႇယွၤသ့ၣ်ႇ ကမဲၤကိသ၀ီတကပၤန့ၣ်စ့ၢ်ကီးတၢ်ဒုးကဲထီၣ်၀ဲလၢပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် အဘၢၣ်စၢၤအိၣ်၀ဲတလီၢ်လီၢ်ဒီးခီဖျိပယီၤသုးက့ၤခးလီၤကဒါကျိဖးဒိၣ်အဃိဒူသ၀ီသ့ၣ်တဖၣ်အံၤ ကမျၢၢ်တနီၤအိၣ်လၢ သ၀ီပူၤတဘူၣ်လၢၤဘၣ်ဟးစံၣ်အိၣ်၀ဲလၢတၢ်လီၢ်အဂၤန့ၢ်ယံၤလံဘၣ်ဆၣ်တုၤလၢခဲအံၤအ၀ဲသ့ၣ်က့ၤအိၣ်လၢသ၀ီပူၤတဘူၣ်ဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ၦၤသ၀ီဖိလၢအဘၣ်ဃ့ၢ်တၢ်ဒုးသ့ၣ်တဖၣ်အံၤတနီၤန့ၣ်လဲၤစံၣ်အိၣ်လၢ၀့ၢ်ပူၤႇလဲၤစံၣ်အိၣ်လၢအဘူးအတံၢ်အသမူသကိးဟံၣ်လၢသ၀ီလၢအဂၤအိၣ်၀ဲအသိးတနီၤန့ၣ်လဲၤစံၣ်အိၣ်၀ဲလၢၦၢ်ပူၤစ့ၢ်ကီးအိၣ်၀ဲဒၣ်န့ၣ်လီၤႉတကီၢ်ခါခဲအံၤတၢ်ဖံးတၢ်မၤတအိၣ်ဘၣ်တကးဒံးဘၣ်အမဲာ်ညါခီဖျိအ၀ဲသ့ၣ်တဒိးန့ၢ်ဘၣ်တၢ်ဆီၣ်ထွဲမၤစၢၤကအိၣ်လၢအလါလံအဃိလိၣ်ဘၣ်၀ဲဒၣ်ဂံၢ်ခီၣ်ထံးတၢ်အီၣ်တၢ်အီတၢ်ဆီၣ်ထွဲမၤစၢၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ
(လဲၣ်ခၣ်တီၤ)တၢ်ဒုးအပူၤပယီၤသုးသံ(၁၅)ဂၤအကျါပၣ်ဃု၁်သုးခိၣ်ဒိၣ်ဖိ(၁)ဂၤအဂ့ၢ် ခီၤဘြၤသုးကျိၤ ထုးထီၣ်ပ၁်ဖျါ
လါအီကူး ၁၇ သီႇ၂၀၂၃ နံၣ်ႇ ခ့ၣ်အဲးစံၣ် ပယီၤသုးအံၤလၢကထီၣ်ဟံန့ၢ်က့ၤမၠၣ်၀တံၣ်ကပၤ(လဲၣ်ခၣ်တီၤ)သုးကလၢၤအံၤအဂီၢ် ဖဲလါအီကူး ၁၅ သီအနံၤ အ၀ဲသ့ၣ်ဟဲထီၣ်၀ဲဒီးဖဲခံခီခံကပၤတၢ်ဒုးကဲထီၣ်အတီၢ်ပူၤန့ၣ် ပယီၤသုးတကပၤသံ(၁၅)ဂၤအကျါ ပၣ်ဃုာ်၀ဲ သုးခိၣ်ဒိၣ်ဖိ(၁)ဂၤအဂ့ၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) ခီၤဘြၤသုးကျိၤ သုးဒ့(၃)ထုးထီၣ်ပာ်ဖျါ၀ဲ ဖဲမဟါလါအီကူး ၁၆ သီ အနံၤန့ၣ်လီၤႉ ဒ်ခီၤဘြၤသုးကျိၤထုးထီၣ်ပာ်ဖျါ၀ဲအသိးန့ၣ်စးထီၣ်ဖဲလါအီကူး ၁၅ သီ ဂီၤခီ ၃ နၣ်ရံၣ်အဆၢကတီၢ်န့ၣ် ပယီၤသုးခးလီၤ ကျိဖးဒိၣ်ဆူခီၤဘြၤသုးကျိၤသုးပာ်ဖှိၣ်ဟူးဂဲၤအလီၢ်(လဲၣ်ခၣ်တီၤ)အခိၣ်အဃၢၤန့ၣ်ဒီးဖဲအ၀ဲသ့ၣ်သုးကျိၤနုာ်လီၤအခါ တၢ်ဒုးကဲထီၣ်အဃိ ပယီၤသုးတကပၤသံ(၁၅)ဂၤအကျါ ပၣ်ဃုာ်၀ဲ သုးခိၣ်ဒိၣ်ဖိ(၁)ဂၤႇသုးခိၣ်စိ(၁)ဂၤဒီး ဘၣ်ဒိ၀ဲခဲလၢာ် (၂၁)ဂၤအဂ့ၢ်န့ၣ် လံာ်တၢ်ပာ်ဖျါပူၤပာ်ဖျါ၀ဲန့ၣ်လီၤႉ လၢန့ၣ်အမဲာ်ညါတၢ်မၤန့ၢ်ပယီၤသုးအကျိချံၦာ်သၣ်တဖၣ်လၢအမ့ၢ်(60mm)ခီၣ်မဲဒိၣ်ပျီ တခိၣ်ႇ (MAsniper)တခိၣ်ႇ (MA4)ခံခိၣ်ႇ (MA3)သၢခိၣ်ႇ (MA2)လွံၢ်ခိၣ်ႇ (MA1)တခိၣ်ႇ (M16)တခိၣ်ႇ (MA)ကျိချံဒၢ ၅၃ ခါႇ (MA2)ကျိဒၢ လွံၢ်ခါႇ (M16)ကျိချံဒၢ ခံခါႇ (5.56)အချံ ၅၂၀၀ ဖျၢၣ်ႇ (7.62NATO)အချံ ၂၆၅၀ ဖျၢၣ်ႇ (MAsniper)အချံဒၢ တခါႇ (60mm)မ့ၣ်ပိၢ် ၃၆ ဖျၢၣ်ႇ (RPG)မ့ၣ်ပိၢ်...
နီၢ်ဟ့ၤသံၤကၠူ လၢအတီခိၣ်ရိၣ်မဲဟံးစုနဲၣ်ကျဲလၢတၢ်ကူၣ်ဘၣ်ကူၣ်သ့အံၤ ဒိးန့ၢ်ဘၣ်၀ဲ ၂၀၂၂ နံၣ် ပဒိၣ်မါရှါသးစၢ်ခိၣ်နၢ်ဖိ ခိၣ်ဖး
လါအီကူး ၁၆ သီႇ ၂၀၂၃ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ နဲၣ်ရွဲၣ်ခိၣ်ကျၢၢ်လီၢ်လံၤ ပဒိၣ်မါရှါလါဖါ သးစၢ်ခိၣ်နၢ်ဖိခိၣ်ဖးလၢ ၂၀၂၂ နံၣ် အဂီၢ်အံၤ တၢ်ဟ့ၣ်လၤကပီၤ၀ဲ ကညီသးစၢ်ပိာ်မုၣ် သုးရၣ်မုၣ်ကၠိခိၣ် နီၢ်ဟ့ၤသံၤကၠူ လၢအသိၣ်လိတၢ်ဖဲ ကီၢ်သူလ့ၤတီၤထီကၠိတဖျၢၣ်အပူၤအဂ့ၢ်န့ၣ် ဖါဖီၣ်ဒ့ရှၢၣ်ထုးထီၣ်ပာ်ဖျါ၀ဲဖဲမဟါလါအီကူး ၁၅ သီအနံၤန့ၣ်လီၤႉ နီၢ်ဟ့ၤသံၤကၠူအံၤမ့ၢ်၀ဲဒၣ်ကညီကူၣ်သ့ဆဲးလၤ၀ဲၤကျိၤ(KECD)စုတီၤဖီလာ်ကၠိခိၣ်တဂၤဒီးဖဲအပူၤကွံာ်(၂၀၁၈)အခါအ၀ဲမၤအါထီၣ်အကၠိအံၤတုၤလၢ(Junior College)အပတီၢ်ညါဒီးအခါဖဲန့ၣ်ကၠိအံၤကၠိသရၣ်§မုၣ်အိၣ်ဒၣ်ထဲ အဂၤ(၁၀)ဒံးလီၤဒီး မ့မ့ၢ်ၦၤကၠိဖိခီန့ၣ်အိၣ်ဒၣ်ထဲ(၈၂)ဂၤန့ၣ်လီၤႉဘၣ်ဆၣ်တကီၢ်ခါခဲအံၤၦၤကၠိဖိနီၣ်ဂံၢ်အိၣ်တုၤလၢ အဂၤ(၇၀၀)လံဒီး ကၠိသရၣ်§မုၣ်အိၣ်၀ဲအဂၤ(၃၀)လံန့ၣ်လီၤႉ ပဒိၣ်မါရှါလါဖါအဖိမုၣ်ဆံး နၣ်စိၤယၤဖါစံး၀ဲလၢ“နီၢ်ဟ့ၤသံၤကၠူအံၤမ့ၢ်၀ဲဒၣ်သးစၢ်ခိၣ်နၢ်တဂၤလၢအဖၠဲးအဃိ အကြၢး၀ဲဒီး ပတၢ်ဟ့ၣ်မၤလၤကပီၤအံၤလီၤႉတၢ်လၢၦၤပိာ်မုၣ်သူၣ်ဘီၣ်သးစၢ်အံၤအဒုးဆီတလဲတၢ်လၢၦၤတ၀ၢပူၤထဲလဲၣ်န့ၣ်အ၀ဲတၢ်တီခိၣ်ရိၣ်မဲအတၢ်ဖံးတၢ်မၤအံၤအိၣ်ဖျါ၀ဲဒၣ်လီၤႉခိၣ်ဖး၀ဲအံၤကကဲထီၣ်တၢ်တိစၢၤမၤစၢၤလၢအကဟူး ဂဲၤမၤတၢ်လၢ ခါဆူညါအဂီၢ်ဖးဒိၣ်လီၤ”အဂ့ၢ်န့ၣ် စံး၀ဲန့ၣ်လီၤႉ ဖဲအပူၤကွံာ်လါအီကူး ၁၂ သီအနံၤ လၢတီအူကီၢ်ရ့ၣ်အပူၤ ဖဲတၢ်မၤလၤကပီၤ၀ဲကညီမၤထူရၤမုၢ်နံၤၦဲၤထီၣ် (၇၃)၀ီတ၀ီ တၢ်ရဲၣ်တၢ်ကျဲၤအပူၤန့ၣ် တၢ်ဟ့ၣ်လီၤဃုာ်၀ဲနီၢ်ဟ့ၤသံၤကၠူလၢဖါဖီၣ်ဒ့ရှၢၣ်သးစၢ်ခိၣ်နၢ်ဖိခိၣ်ဖးအံၤဒီး ဖဲန့ၣ်တၢ်ဟ့ၣ်လီၤဃုာ်အီၤဒီးအမဲရံၣ်ကၤစ့ဒီၣ်လၣ်(၄၀၀၀)အဂ့ၢ်န့ၣ် ဖါဖီၣ်ဒ့ရှၢၣ်ထုးထီၣ်ပာ်ဖျါ၀ဲန့ၣ်လီၤႉ ယဒိးန့ၢ်ဘၣ်ခိၣ်ဖးအံၤအဖီခိၣ်သးခုဒိၣ်မးအသိးယပာ်ဒိၣ်ပာ်ကဲ၀ဲဒၣ်ပဒိၣ်မါရှါလါဖါအတၢ်သိၣ်တၢ်သီႇ တၢ်ကဲခိၣ်ကဲနၢ်ႇ တၢ်ဖံးတၢ်မၤသ့ၣ်တဖၣ်အံၤဒိၣ်မးဒီးလံာ်လၢအကွဲးတ့ၢ်ဃာ်၀ဲသ့ၣ်တဖၣ်ကဲထီၣ်တၢ်ဂံၢ်တၢ်ဘါလၢ ယအဂီၢ်အဃိ ဒိးန့ၢ်ဘၣ်ခိၣ်ဖးအံၤအခီပညီအိၣ်၀ဲအဂ့ၢ်န့ၣ် နီၢ်ဟ့ၤသံၤကၠူ စံး၀ဲန့ၣ်လီၤႉ အ၀ဲစံး၀ဲလၢ“ယအဲၣ်ဒိးဟ့ၣ်ဂံၢ်ဟ့ၣ်ဘါသူၣ်ဘီၣ်သးစၢ်အဂၤတဖၣ်လၢပကဘၣ်အိၣ်ဒီးတၢ်သူၣ်ဆူၣ်သးဂဲၤႇ တၢ်ဂုာ်ကျဲစၢးလီၤႉဒ်န့ၣ်မးပမၤစၢၤကဒါက့ၤတၢ်လၢၦၤတ၀ၢပူၤကသ့၀ဲဒၣ်လီၤႉလီၤဆီဒၣ်တၢ်ယအဲၣ်ဒိးဟ့ၣ်ဂံၢ်ဟ့ၣ်ဘါၦၤပိာ်မုၣ်သူၣ်ဘီၣ်သးစၢ်တဖၣ်လၢတၢ်ခဲလၢာ်န့ၣ်ပမၤသ့လီၤႉဒ်သိးပၦၤတ၀ၢကဆီတလဲသးအဂီၢ်န့ၣ်ပမၤအီၤသ့လီၤႉပကဘၣ်နုုာ်လီၤမၤတၢ်လၢပတၢ်ကရၢကရိဒီးတၢ်သဘျ့အဂီၢ်ႉမ့၀ံၤအဲၣ်ဒိးဆီၣ်တခူထီၣ်(ခ့ၣ်အဲၣ်ယူၣ်)လၢ တၢ်လီၢ်အပတီၢ် ကိးပတီၢ်ဒဲးလၢၦၤပိာ်မုၣ်မၤ၀ဲသ့တဖၣ်န့ၣ်ကဟ့ၣ်မူဟ့ၣ်ဒါၦၤပိာ်မုၣ်တဖၣ်”အဂ့ၢ်န့ၣ် စံး၀ဲန့ၣ်လီၤႉ ဖါဖီၣ်ဒ့ရှၢၣ်(Phan Foundation)အံၤဘၣ်တၢ်ဒုးအိၣ်ထီၣ်အီၤဖဲ(၂၀၀၈)နံၣ်အခါဒီး ဘၣ်တၢ်ဒုးအိၣ်ထီၣ်အီၤလၢ ခ့ၣ်အဲၣ်ယူၣ် အနဲၣ်ရွဲၣ်ခိၣ်ကျၢၢ်လီၢ်လံၤ ပဒိၣ်မါရှါလါဖါအဖိမုၣ်ဖိခွါသ့ၣ်တဖၣ်အံၤန့ၣ်လီၤႉ ပဒိၣ်မါရှါသးစၢ်ခိၣ်နၢ်ဖိခိၣ်ဖးအံၤ ကဘၣ်မ့ၢ်သးစၢ်လၢအအိၣ်(၃၅)နံၣ်ဆူဖီာ်ဒီး ကဘၣ်မ့ၢ်ကညီသးစၢ်လၢတကွၢ် လီၤနီၢ်ကစၢ်အဘျုးဘၣ်ႇဂုာ်ကျဲးစၢးဟူးဂဲၤတၢ်လၢကညီဆူၣ်ချ့ႇကူၣ်သ့ႇၦၤဂ့ၢ်၀ီခွဲးယာ်ႇလံာ်လဲၢ်တၢ်ဆဲးတၢ်လၤတကပၤဒီးခိၣ်ဖးအံၤ(Phan...
ပယီၤသုးခးလီၤကျိဖးဒိၣ်အဃိ ကီးတရံးကမျၢၢ်ဘၣ်ဒိ(၃)ဂၤ
လါအီကူး ၁၆ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲမဟါလါအီကူး ၁၅ သီအနံၤ ပယီၤသုးလၢအိၣ်ဆီလီၤသးဖဲကညီကီၢ်စဲၣ် ကီးတရံး၀့ၢ်ပူၤတဖၣ်အံၤ ခီဖျိအ၀ဲသ့ၣ်ခးလီၤ ကျိဖးဒိၣ်အဃိ ကီးတရံး၀့ၢ်ပူၤကမျၢၢ်ဘၣ်၀ဲ(၃)ဂၤအဂ့ၢ်န့ၣ် သ့ၣ်ညါဘၣ်ၦၤအိၣ်၀့ၢ်ပူၤတဖၣ်အအိၣ် န့ၣ်လီၤႉ ပယီၤသုးလၢအိၣ်ဆီလီၤသဖဲကီးတရံး၀့ၢ် က၀ီၤဒ့(၂)ဒၤမၤယၤမၣ်သီခါဖၠၣ်ကရၢၢ်ပူၤတဖၣ်အံၤ ဖဲလါအီကူး ၁၅ သီ မုၢ်ထူၣ် ၁၁ နၣ်ရံၣ်ဃၣ်ဃၣ်အဆၢကတီၢ် ခီဖျိအ၀ဲသ့ၣ်နၣ်ဟူလၢတၢ်ပၢၢ်ဆၢသုးကရူၢ်ဟဲလၢ၀့ၢ်ပူၤဒီးအ၀ဲၣ်သ့ၣ် ဟးခးကျိဖးဒိၣ် ၀့ၢ်ပူၤၦၤကမျၢၢ်(၂)ဂၤဒီးနါကတိသ၀ီဖိ(၁)ဂၤ ခဲလၢာ်ဘၣ်ဒိ၀ဲ(၃)ဂၤအဂ့ၢ်န့ၣ် ကီးတရံးကမျၢၢ်လၢတအဲၣ်ဒိးပာ်ဖျါအမံၤ တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲတၢ်ပၢၢ်ဆၢသုးကရူၢ်ဟဲလီၤလၢ၀့ၢ်ပူၤလဲၤတုၤဖဲတီၤခၢၣ်သးနီၣ်ဂံၢ်(၃)ကၠိမဲာ်ညါဘျီန့ၣ် ပယီၤသုးအိၣ်(ဒၤမၤယၤသီခါဖၠၣ်)တဖၣ်အံၤခးစိဃီၤကျိဖးဒိၣ်အဃိဘၣ်၀ဲဒၣ်(နါကတိ)သ၀ီဖိပိာ်မုၣ်တဂၤႉ မ့၀ံၤဘၣ်၀ဲဒၣ်(၀့ကၠံ)က၀ီၤဒ့ပူၤ အူဘၤဘၤဒီးအဖိဒိၣ်မုၣ်ခံဂၤမီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ ကမျၢၢ်လၢအဘၣ်ဒိဘၣ်ထံး(၃)ဂၤအံၤအကျါမ့မ့ၢ်လၢအူဘၤဘၤအနံၣ်(၆၀)ဘျဲၣ်တဂၤအံၤဘၣ်ဒိနးအဃိ တၢ်လဲၤဆှၢအီၤဆူဖၣ်အၣ်တၢ်ဆါဟံၣ်ဒီးမ့မ့ၢ်ၦၤပိာ်မုၣ်လၢအဘၣ်ဒိခံဂၤအံၤခီန့ၣ်တၢ်ကူစါယါအီၤဖဲကီးတရံး တၢ်ဆါဟံၣ် အဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဖၣ်စံး၀ဲန့ၣ်လီၤႉ ကီးတရံးလီၢ်က၀ီၤကမျၢၢ်လၢအဂၤတဂၤစ့ၢ်ကီးစံး၀ဲလၢ“မ့မ့ၢ်လၢအူဘၤဘၤခီန့ၣ်တၢ်ဘၣ်ယိၣ်အိၣ်အဃိၦၤလဲၤဆှၢ အီၤလၢဖၣ်အၣ်တၢ်ဆါဟံၣ်မီၤနီၤႉမ့မ့ၢ်လၢအ၀ဲခံဂၤခီန့ၣ်အိၣ်ဒံးဖဲကီးတရံးတၢ်ဆါဟံၣ်အံၤဒံးလီၤႉမ့မ့ၢ်လၢ(နါကတိ)သ၀ီဖိ အထွ့ခီန့ၣ်ကျိအက့အခီအိၣ်တ့ၢ်လၢအခံကိၢ်အဃိမ့ၢ်ကဘၣ်ကွဲးဘၣ်ကါဧါဒုတသ့ၣ်ညါဒံးဘၣ်”အဂ့ၢ်န့ၣ် စံး၀ဲန့ၣ်လီၤႉ ပယီၤသုးလၢအိၣ်ဆီလီၤသးဖဲကီးတရံး၀့ၢ်ခိၣ်၀့ၢ်ဃၢၤတဖၣ်အံၤဘၣ်တၢ်နုာ်လီၤခးအ၀ဲသ့ၣ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ကရူၢ်အံၤအိၣ်၀ဲခဲအံၤခဲအံၤဒီးပယီၤသုးတဖၣ်အံၤတၢ်လဲၤခးအ၀ဲသ့ၣ်မ့၀ံၤတဘျီလၢ်လၢ်န့ၣ် ညီနုၢ်အ၀ဲသ့ၣ်ခးလီၤကဒါကျိဖးဒိၣ်တပယူာ်ဃီအဃိကမျၢၢ်အဟံၣ်အဃီဟးဂူာ်ဟးဂီၤဒီးဆၣ်ဖိကီၢ်ဖိႇကမျၢၢ်တဖၣ်သံဘၣ်ဒိဘၣ်ထံးအိၣ်၀ဲဒၣ်န့ၣ်လီၤႉ ခီဖျိတၢ်ဒုးကဲထီၣ်အဃိကီးတရံးကမျၢၢ်လၢအဘၣ်ဃ့ၢ်ထီၣ်တဖၣ်တနီၤန့ၣ်တုၤလၢခဲအံၤအ၀ဲသ့ၣ်က့ၤအိၣ်လၢအဒူသ၀ီ တဘူၣ်ဒံး၀ဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
လၢဒုးယၤတၢ်သဘံၣ်သဘုၣ်အပူၤသၣ်တီၣ်ကလံၤစိးကမျၢၢ်တဖၣ်ဘၣ်ပျံၤစ့ၢ်ကီး၀ဲဟီၣ်လ၁်မ့ၣ်ပိၢ်တၢ်လီၤဘၣ်ယိၣ်
လါအီကူး ၁၆ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ်ဒီးကရ့ၣ်နံၣ်ကီၢ်စဲၣ်အဆၢ သၣ်တီၣ်ကလံၤစိး ဒူသ၀ီတဖၣ်အပူၤ ဒုးယၤတၢ်သဘံၣ်သဘုၣ် ကဲထီၣ်၀ဲလၢပယီၤသုးဒီးဖီၣ်စုက၀ဲၤကရူၢ်အဘၢၣ်စၢၤဒီး တကးဒံးဘၣ်လီၢ်က၀ီၤကမျၢၢ် တဖၣ်အံၤ ဘၣ်ပျံၤစ့ၢ်ကီး၀ဲ ဟီၣ်လာ်မ့ၣ်ပိၢ်တၢ်လီၤဘၣ်ယိၣ်အဃိဘၣ်ဟးထီၣ်က့ၤလီၤလၢတၢ်ပလီၢ်ပဒီပူၤအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိး သ့ၣ်ညါဘၣ်န့ၣ်လီၤႉ ဖဲအပူၤကွံာ်လါယူၤလံအခါလၢသၣ်တီၣ်ကလံၤစိး(ယၤဒိၣ်)ဟီၣ်က၀ီၤအပူၤခီဖျိပယီၤသုးကဘီယူၤဟဲခးလီၤတၢ်အဃိ လီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲဒီးဖဲကမျၢၢ်ဃ့ၢ်ထီၣ်အကတီၢ်ပယီၤသုးနုာ်လီၤအိၣ်၀ဲလၢသ၀ီပူၤအသိး ခီဖျိပယီၤသုးအံၤဒိး လီၤဃာ်ဟီၣ်လာ်မ့ၣ်ပိၣ်လၢယၤဒိၣ်–သီၣ်ယ့ၤခၣ်ဒီးလိၤယၤဒိၣ်သ၀ီပူၤအဃိ ကမျၢၢ်တဖၣ်ဘၣ်ဟးထီၣ်က့ၤလီၤလၢ တၢ်ပလီၢ်ပဒီပူၤအဂ့ၢ်န့ၣ် လီၢ်က၀ီၤကမျၢၢ်ပိာ်မုၣ်တဂၤ စံး၀ဲန့ၣ်လီၤႉ အ၀ဲစံး၀ဲလၢ“ပယီၤသုးနုာ်လီၤဟံန့ၢ်လီၢ်လၢ(လိၤယၤဒိၣ်)သ၀ီတကပၤန့ၣ်ဒီဒူၣ်ညါႉမ့၀ံၤအ၀ဲသ့ၣ်ဒိးလီၤဟီၣ်လာ်မ့ၣ်ပိၢ် ဒီဒူၣ်ညါလီၤႉဟီၣ်က၀ီၤတၢ်ဒီသဒၢကမျၢၢ်သုးကရူၢ်ဟးမၤဆှဲ၀ဲချုးဆၢချုးကတီၢ်အိၣ်စ့ၢ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ပယီၤသုးတဖၣ်အံၤဒ်သိးတၢ်ဒီသဒၢကမျၢၢ်သုးနုာ်လီၤသုတန့ၢ်တဂ့ၤအဂီၢ်န့ၣ်အ၀ဲသ့ၣ်ဟးဒိးလီၤမ့ၣ်ပိၢ်လၢအ၀ဲသ့ၣ်အိၣ်တၢ်လီၢ်အခိၣ်အဃၢၤတဖၣ်န့ၣ်လီၤႉခီဖျိလၢဟီၣ်လာ်မ့ၣ်ပိၢ်အံၤအဃိ တၢ်ဒီသဒၢကမျၢၢ်သုးအၦၤဘၣ်ဒိဘၣ်ထံးအိၣ်၀ဲတနီၤ အဂ့ၢ်န့ၣ် သၣ်တီၣ်ကလံၤစိး ဟီၣ်က၀ီၤလီၤဆီတၢ်ဒီသဒၢကမျၢၢ်သုး(NTDF)တၢ်ဘိးဘၣ်ရၤလီၤမူဒါခိၣ် စံး၀ဲန့ၣ်လီၤႉ အ၀ဲစံး၀ဲလၢ“လၢညါခါတဘျီန့ၣ်နါက့ခီဖျိလၢဟီၣ်လာ်မ့ၣ်ပိၢ်အံၤအဃိန့ၣ်ပၦၤဘၣ်ဒိတဂၤဒံးႉ ပယီၤသုးမ့ဟဲနုာ်လီၤလၢ သ၀ီပူၤလံန့ၣ်အ၀ဲသ့ၣ်ဟးဒိးလီၤဟီၣ်လာ်မ့ၣ်ပိၢ်လၢအ၀ဲသ့ၣ်အခိၣ်အဃၢၤန့ၣ်အိၣ်အဃိ ၦၤသ၀ီဖိတဖၣ်ဘၣ်ဟးထီၣ် က့ၤလီၤလၢတၢ်ပလီၢ်ပဒီပူၤႉလၢ(လိၤယၤဒိၣ်)တကပၤန့ၣ်နါက့အ၀ဲသ့ၣ်ဒိးလီၤဃာ်ဟီၣ်လာ်မ့ၣ်ပိၢ်အိၣ်စ့ၢ်လီၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါဖဲအပူၤကွံာ်စှၤသီအခါဖဲပယီၤသုးကျိၤနုာ်လီၤလၢ(ယၤဒိၣ်)သ၀ီကပၤ (လိၤယၤဒိၣ်)သ၀ီအခါန့ၣ် အ၀ဲသ့ၣ်ခးလီၤစ့ၢ်ကီးကျိဖးဒိၣ်အသိးဖီၣ်က့ၤကိး၀ဲကမျၢၢ်လၢအအိၣ်တ့ၢ်သ၀ီပူၤတနီၤဒံးဒီးသမံသမိးတီၢ်မၤဒၢၣ်၀ဲသးစၢ် တဖၣ်၀ံၤမးပျၢ်လီၤက့ၤ၀ဲအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ ဒ်န့ၣ်အသိးခီဖျိတၢ်သဘံၣ်သဘုၣ်ဒီးကဘီယူၤဟဲခးလီၤတၢ်အဃိ(ယၤဒိၣ်)လီၢ်က၀ီၤကမျၢၢ်အဂၤခံကထိဃၣ်ဃၣ် ဘၣ်ဃ့ၢ်ထီၣ်၀ဲတုၤလၢခဲအံၤတစုအသိးခီဖျိၦၤစံၣ်ထီၣ်တဖၣ်အံၤအကျါပၣ်ဃုာ်၀ဲၦၤသူၣ်က့သးၦၢ်ႇၦၤက့ၦၤကွဲၣ်ႇ ၦၤဖိဒံဖိသၣ်ဒီးမိၢ်ဖိဆံးတဖၣ်အဃိလိၣ်ဘၣ်၀ဲကသံၣ်ကသီႇတၢ်အီၣ်တၢ်အီတဖၣ်လၢကတီၢ်ယံၤအဂီၢ်အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ ဒ်န့ၣ်အသိးခီဖျိပယီၤသုးကဘီယူၤဟဲခးလီၤတၢ်ကအိၣ်လၢအဘျီ(၃၀)ဘျဲၣ်ညါအဃိ ယၤဒိၣ်သ၀ီပူၤ တၢ်ဘူၣ်တၢ်ဘါတၢ်သူၣ်ထီၣ်ဒီးကမျၢၢ်အဟံၣ်အဃီဟးဂီၤ၀ဲအါမးအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲဖဲအပူၤကွံာ် လါယူၤလံ ၃၀ သီအနံၤန့ၣ်လီၤႉ
စ့ပယီၤပှ့ၤလီၤအဃိ စ့ပယီၤတကလီၢ် န့ၢ်က့ၤလၢစ့ယိၤ(၉၉၀)ဘး
လါအီကူး ၁၆ သီႇ၂၀၂၃ နံၣ်ႇ ခ့ၣ်အဲးစံၣ် ဖဲမဟါလါအီကူး ၁၅ သီ မုၢ်ဃ့ၢ်လီၤအဆၢကတီၢ်န့ၣ် စ့ပယိၤအၦ့ၤလီၤ၀ဲဒီး စ့ပယီၤတကလီၢ်န့ၣ် န့ၢ်က့ၤလၢစ့ယိၤ (၉၉၀)ဘးလီၤအဂ့ၢ်န့ၣ် ၦၤလၢအမၤတၢ်ခီလဲစ့ႇတၢ်ဆှၢလီၤစ့တၢ်ဖံးတၢ်မၤလၢအိၣ်ကီၢ်ကၠီၣ်တဲၣ်– ကီၢ်ပယီၤကီၢ်ဆၢတဖၣ် စံး၀ဲအသိး သ့ၣ်ညါ၀ဲန့ၣ်လီၤႉ ဖဲမဟါလါအီကူး ၁၅ သီ ဂီၤခီအဆၢကတီၢ် ကီၢ်ကၠီၣ်တဲၣ်–ကီၢ်ပယီၤကီၢ်ဆၢ မၠၣ်၀တံၣ် စ့အလုၢ်အၦ့ၤအိၣ်၀ဲ စ့ပယီၤ(၁)ကလီၢ်န့ၣ် န့ၢ်ဒံး၀ဲလၢစ့ယိၤ(၁၀၀၀)ဘးဒံးဒီးဘၣ်ဆၣ်ဖဲမုၢ်ဃ့ၢ်လီၤန့ၣ်စ့ယိၤအိၣ်တ့ၢ်က့ၤထဲ(၉၉၀)ဘး လီၤ အဂ့ၢ်န့ၣ် သ့ၣ်ညါဘၣ်လၢမၠၣ်၀တံၣ် တၢ်ခီလဲစ့ႇတၢ်ဆှၢစ့တၢ်ဖံးတၢ်မၤကစၢ်တဖၣ်အအိၣ်န့ၣ်လီၤႉ ခီဖျိစ့ပယီၤအၦ့ၤလီၤအဃိတကီၢ်ခါခဲအံၤၦၤကူၣ်လဲၤမၤကၤတၢ်ဖိတဖၣ်ဟံစ့ယိၤတအိၣ်အါအါလၢၤဘၣ်ဒီး ၦၤဟံစ့ပယီၤဟဲအါထီၣ်၀ဲအဂ့ၢ်န့ၣ် ၦၤမၤတၢ်ခီလဲစ့ႇတၢ်ဆှၢစ့တၢ်ဖံးတၢ်မၤလၢအိၣ်မၠၣ်၀တံၣ်ကီၢ်ဆၢတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ အ၀ဲစံး၀ဲလၢ“တနံၤအံၤစ့ယိၤလီၤတုၤ(၁၀၀၀)ဖီလာ်ညါႉၦၤဟဲခီလဲစ့ယိၤဆူစ့ပယီၤဟဲအါထီၣ်မီၤနီၤႉ အ၀ဲသ့ၣ်န့ၣ် အိၣ်ခိးကွၢ်စ့ယိၤအိၣ်တ့ၢ်(၁၀၀၀)ဆူဖီလာ်မီၤနီၤႉဒ်အ၀ဲသ့ၣ်မုၢ်လၢ်စ့ၦ့ၤအသိးန့ၣ်န့ၢ်လံအဃိၦၤဟဲဆှၢ လီၤစ့ဒီဒူၣ်ညါႉ မ့မ့ၢ်ၦၤကူၣ်လဲၤမၤကၤတၢ်ဖိတဖၣ်ခီန့ၣ်အ၀ဲသ့ၣ်ဟံစ့ယိၤလၢတၢ်လိၣ်အဖီခိၣ်လီၤတဟံစ့ယိၤအါအါ လၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါအီကူး ၁၅ သီအနံၤန့ၣ်လီၤႉ ခီဖျိစ့ပယီၤၦ့ၤလီၤကွ့ၢ်ကွ့ၢ်အဃိၦၤကူၣ်လဲၤမၤကၤတၢ်ဖိလၢအၦ့ၤစ့ယိၤတဖၣ်တၢ်ကီတၢ်ခဲအိၣ်ထီၣ်လၢအ၀ဲသ့ၣ်အဂီၢ် ဒီးဒ်န့ၣ်အသိးၦၤကူၣ်လဲၤမၤကၤတၢ်ဖိလၢအၦ့ၤဆါကၠီၣ်တဲၣ်တၢ်ဖိတၢ်လံၤတဖၣ်အဂီၢ်စ့ၢ်ကီးဆှူ၀ဲအဂ့ၢ်န့ၣ် ဖၣ်အၣ်၀့ၢ် ၦၤကူၣ်လဲၤမၤကၤတၢ်ဖိလၢအဆါကၠီၣ်တဲၣ်တၢ်ဖိတၢ်လံၤတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တၢ်အိၣ်သးခဲအံၤန့ၣ်ၦၤဆါအီၣ်တၢ်ဖိနါက့တဘၣ်ဂီၢ်နီတစဲးလၢၤဘၣ်ႉစ့ၦ့ၤလီၤအဃိဒ်နသ့ၣ်ညါအသိးလီၤႇ ခဲအံၤလၢနကဆါတၢ်အဂီၢ်န့ၣ်မးနဘၣ်ပျံၤတၢ်လံႉတဘၣ်ဂီၢ်ဒ်သိးလၢညါလၢၤဘၣ်ႉအပူၤကွံာ်လၢညါန့ၣ်နဆါတၢ်ဒံးန့ၢ် အမၠးအိၣ်ဒံးအါလီၤႉခဲအံၤတမ့ၢ်ဒ်န့ၣ်လၢၤဘၣ်ႇနဆါတၢ်ဒံးန့ၢ်န့ၣ်ဒံးနဆှူအါလီၤ”အဂ့ၢ်န့ၣ် စံး၀ဲန့ၣ်လီၤႉ ဖဲမဟါကီၢ်ပယီၤမုၢ်ကျိၤ၀ဲၤကွာ်တၢ်ဆါတၢ်ၦ့ၤအပူၤန့ၣ်ထူတဘးန့ၣ်အၦ့ၤအိၣ်၀ဲ(၃၈)ကလီၢ်ခိၣ်ဃၢၤညါဒီး မ့မ့ၢ်(အမဲရံၣ်ကၤ)စ့တဒီၣ်လၣ်န့ၣ်အၦ့ၤအိၣ်၀ဲ(၃၇၀၀)ကၠးန့ၣ်လီၤႉ ဒ်န့ၣ်အသိးလၢ၀့ၢ်တကူၣ် ဒးဆံၣ်သိ(92)တလံးထၢၣ် န့ၣ် အၦ့ၤအိၣ်၀ဲ(၂၃၀၅)ကၠးဒီး မ့မ့ၢ်လၢ(95)တလံးထၢၣ်န့ၣ်အၦ့ၤအိၣ်၀ဲ(၂၄၁၅)ကၠး အဂ့ၢ်န့ၣ် သ့ၣ်ညါဘၣ်လၢကီၢ်ပူၤ ၦၤမၤမုၢ်ကျိၤ၀ဲၤကွာ်ဖိတဖၣ်အအိၣ်န့ၣ်လီၤႉ ခီဖျိစ့ယိၤၦ့ၤထီၣ်ဒီးစ့ပယီၤၦ့ၤလီၤအဃိၦၤလၢအၦ့ၤသူကၠီၣ်တဲၣ်တၢ်ဖိတၢ်လံၤတဖၣ်အံၤထံၣ်ဘၣ်၀ဲတၢ်ကီတၢ်ခဲ တကးဒံးဘၣ်အမဲာ်ညါလၢတၢ်ကစိာ်ဆှၢတၢ်ဖိတၢ်လံၤအဂီၢ်စ့ၢ်ကီးခီဖျိကီၢ်ကၠီၣ်တဲၣ်–ကီၢ်ပယီၤကီၢ်ဆၢကျဲစ့ၢ်ကီး လ့ၢ်ထီၣ်လ့ၢ်လိၤတညီဒ်သိးလၢညါလၢၤဘၣ်အဃိကၠီၣ်တဲၣ်တၢ်ဖိတၢ်လံၤအၦ့ၤဘၣ်ဒိၣ်ထီၣ်၀ဲလီၤအဂ့ၢ်န့ၣ် ၦၤၦ့ၤဆါပနံာ်တၢ်ဖိတၢ်လံၤတဖၣ်စံး၀ဲန့ၣ်လီၤႉ
ကီးတရံးကီၢ်ဆၣ်ပူၤ ထိးဘၣ်တၢ်ဆါကဲထီၣ်သးအဃိထိးသံအါမး
လါအီကူး ၁၅ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကီးတရံးကီၢ်ဆၣ်အပူၤ စှၤသီအတီၢ်ပူၤအံၤထိးဘၣ်တၢ်ဆါကဲထီၣ်သးအဃိ ထိးသံအါမးအဂ့ၢ်န့ၣ် ၦၤဘုၣ်ထိးဖိတဖၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ခီဖျိထိးဘၣ်တၢ်ဆါထိးသံအါအဃိၦၤလၢအဘုၣ်ဆါအီၣ်ထိးလၢဟံၣ်ဖိဃီဖိတၢ်လုၢ်အီၣ်နီၢ်ခိသးသမူအဂီၢ် သ့ၣ်တဖၣ်အံၤ တချုးတၢ်ဆါလီၤဒံးဘၣ်န့ၣ်အ၀ဲသ့ၣ်ဘၣ်ဒိဆါလီၤအီၣ်၀ဲအဂ့ၢ်န့ၣ် ၦၤဘုၣ်ထိးဖိတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲသ၀ီပူၤအံၤထိးဘၣ်တၢ်ဆါထိးသံဒီဒူၣ်ညါႉၦၤတနီၤန့ၣ်တချုးထိးဘၣ်တၢ်ဆါဒံးဘၣ်န့ၣ်အ၀ဲသ့ၣ်ဒိဆါလီၤအီၣ်အညၣ်မီၤနီၤႉယၤနါက့ယဒိဆါလီၤအီၣ်တဒုလံႉအ၀ဲတဒုန့ၣ်ခီဖျိအဆံးဒံးအဃိ ယတဒိဆါလီၤအီၤဘၣ်ႇ ခဲအံၤတၢ်ဆါလီၤဘျီအသံလံ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးဖဲအပူၤကွံာ်လါအခါစ့ၢ်ကီးလၢဒူသ၀ီတဖၣ်အပူၤထိးဘၣ်တၢ်ဆါထိးသံအါအါဂီၢ်ဂီၢ်ကဲထီၣ်တ့ၢ်အသးဒံးဒီးဒ်သိးထိးအံၤသုတဘၣ်တၢ်ဆါတဂ့ၤအဂီၢ်တၢ်ဆဲးဆိဃာ်၀ဲကသံၣ်ဒီသဒၢအိၣ်၀ဲအဂ့ၢ်န့ၣ် ၦၤဘုၣ်ထိးဖိတဂၤ စံး၀ဲဒ်အံၤ န့ၣ်လီၤႉ “ဖဲအပူၤကွံာ်လါအီကူးအခါန့ၣ်နါက့လၢ(ယ့ၤကၠီၤ)န့ၣ်ထိးဘၣ်တၢ်ဆါထိးသံဒီဒူၣ်ညါႉၦၤတဲဘၣ်ယၤဘျီ ယဆဲးဆိန့ၢ် ယထိးကသံၣ်ဒီသဒၢမီၤနီၤႉမ့မ့ၢ်ယထိးခီန့ၣ်တဘၣ်တၢ်ဆါနးနးဘၣ်ႉအိၣ်ဒၣ်လၢအကူးဒ်န့ၣ်လီၤႇ အသံတအိၣ်ဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ထိးလၢၦၤဘုၣ်၀ဲလၢဒူသ၀ီပူၤတဖၣ်အါဒၣ်တက့ၢ်န့ၣ်တၢ်ဒုးအီၣ်အဆၣ်လၢန့ဆၢၣ်တၢ်အီၣ်တၢ်အီတဖၣ်လီၤဒီး တၢ်တဆဲးန့ၢ်ကသံၣ်ဒီသဒၢဘၣ်ႉဘၣ်ဆၣ်မ့မ့ၢ်လၢ(မွေးမြူရေး)ထိးခီန့ၣ်ဒ်သိးတၢ်လၢာ်ဘူၣ်လၢာ်စ့ကစှၤအဂီၢ် အဆၣ်အကျါန့ၣ်ၦၤဒုးအီၣ်ဃါဃုာ်၀ဲဒီးန့ဆၢၣ်တၢ်အီၣ်တၢ်အီၣ်ဒီးတၢ်ဆဲးန့ၢ်၀ဲကသံၣ်ဒီသဒၢထီဘိလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ပယီၤသုးဂု၁်ကျဲးစၢးလၢကထီၣ်ဟံန့ၢ်က့ၤ(လဲၣ်ခၣ်တီၤ)သုးကလၢၤႇတၢ်ဒုးကဲထီၣ်အပူၤပယီၤသုးသံ(၁၇)ဂၤအကျါပၣ်ဃု၁်သုးခိၣ်စိ ၂ ဂၤ
လါအီကူး ၁၅ သီႇ ၂၀၂၃ နံၣ်ႇ ခ့ၣ်အဲးစံၣ် ပယီၤသုးအံၤလၢကထီၣ်ဟံန့ၢ်က့ၤ(လဲၣ်ခၣ်တီၤ)သုးကလၢၤလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးပာ်ဖှိၣ် ထီၣ်မၤန့ၢ်၀ဲအံၤအဂီၢ်န့ၣ်အ၀ဲသ့ၣ်ဟဲထီၣ်ဒီးခီဖျိတၢ်ဒုးကဲထီၣ်အဃိပယီၤသုးတကပၤသံ၀ဲ(၁၇)ဂၤအကျါ ပၣ်ဃုာ်၀ဲ သုးခိၣ်စိ(၂)ဂၤႇ ဘၣ်ဒိ၀ဲ(၃၄)ဂၤအဂ့ၢ်န့ၣ် ခီၤဘြၤသုးကျိၤထုးထီၣ်ပာ်ဖျါ၀ဲဖဲတနံၤအံၤလါအီကူး ၁၅ သီ အနံၤ န့ၣ်လီၤႉ ဖဲအပူၤကွံာ်လါယူၤလံ ၂၁ သီအနံၤ ခီၤဘြၤသုးကျိၤတီခိၣ်ရိၣ်မဲတၢ်ပၢၢ်ဆၢသုးပာ်ဖှိၣ်ကရူၢ်ထီၣ်မၤန့ၢ်၀ဲ(လဲၣ်ခၣ်တီၤ) ပယီၤသုးကလၢၤအံၤဒီးဖဲန့ၣ်၀ံၤလီၢ်ခံပယီၤသုးအံၤဂုာ်ကျဲးစၢး၀ဲသၦၢ်ၦၢ်လၢကထီၣ်ဟံန့ၢ်က့ၤသုးကလၢၤအံၤန့ၣ်လီၤႉလၢတၢ်ဂ့ၢ်အံၤအဃိပယီၤသုးကျိၤဟဲထီၣ်တကးဒံးဘၣ်ခးလီၤကျိဖးဒိၣ်ကိးမုၢ်နံၤဒဲးအဃိတၢ်ဒုးကဲထီၣ်၀ဲလၢခံခီခံကပၤအဘၢၣ်စၢၤကိးမုၢ်နံၤဒဲး အဂ့ၢ်န့ၣ် ခီၤဘြၤသုးကျိၤလံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ (လဲၣ်ခၣ်တီၤ)သုးကလၢၤအံၤလၢသုးဂ့ၢ်၀ီတၢ်တိၤကျဲၤတကပၤန့ၣ်လၢသုးမီၤစိရိၤအဂီၢ်မ့ၢ်သုးကလၢၤတဖျၢၣ်လၢအရ့ဒိၣ် အဃိပယီၤသုးအံၤလၢကက့ၤမၤန့ၢ်က့ၤသုးကလၢၤအံၤအဂီၢ်ဒ်အ၀ဲသ့ၣ်သုးတြိၤ(၄၄)ခိၣ်အတၢ်နဲၣ်လီၤအိၣ်အသိး န့ၣ် အ၀ဲသ့ၣ်ဟဲထီၣ်ႇတၢ်ဒုးကဲထီၣ်အဃိပယီၤသုးတကပၤသံဘၣ်ဒိဘၣ်ထံးအါအါဂီၢ်ဂီၢ်ဒ်အံၤန့ၣ်လီၤႉ ခံခီခံကပၤတၢ်ဒုးကဲထီၣ်အဃိပယီၤသုးတကပၤသံဘၣ်ဒိဘၣ်ထံးအိၣ်အါမးအသိးမ့မ့ၢ်လၢ(ခီၤဘြၤ)သုးကျိၤတကပၤန့ၣ်ဘၣ်ဟ့ၣ်လီၤကွံာ်အသးသမူ(၁)ဂၤႇဘၣ်ဒိ(၈)ဂၤဒီးအ၀ဲသ့ၣ်ဒြိဟးဂီၤ၀ဲတဘ့ၣ်ႇကမျၢၢ်သံတဂၤႇဘၣ်ဒိတဂၤဒီး တၢ်ဘူၣ်တၢ်ဘါတၢ်သူၣ်ထီၣ်ဟးဂီၤ၀ဲ(၅)ဖျၢၣ်အဂ့ၢ်န့ၣ် ခီၤဘြၤသုးကျိၤစံး၀ဲန့ၣ်လီၤႉ လၢန့ၣ်အမဲာ်ညါဖဲအပူၤကွံာ်လါအီကူး ၈ သီအခါစ့ၢ်ကီး ပယီၤသုးအံၤလၢကထီၣ်မၤန့ၢ်က့ၤ(လဲၣ်ခၣ်တီၤ)သုးကလၢၤ အံၤအဂီၢ် ပယီၤသုးတြိၤ(၄၄)စုတီၤဖီလာ်ခီၣ်ချ့သုးရ့ၣ်(ခမရ–၁၁၈)လၢအဟဲထီၣ်သ့ၣ်တဖၣ်အံၤအကျါ သုးစကီၤပြံ(၁)ဂၤဒီးၦၤသုးဖိ(၁)ဂၤ ဟဲက့ၤဟ့ၣ်လီၤသးလၢ(KNLA)သုးပာ်ဖှိၣ်ကရူၢ်အအိၣ်ဃုာ်ဒီးကျိချံၦာ်သၣ် သ့ၣ်တဖၣ် န့ၣ်လီၤႉ (လဲၣ်ခၣ်တီၤ)တၢ်ဒုးအပူၤဘၣ်ဃးတၢ်သံတၢ်ဘၣ်ဒိဘၣ်ထံးတၢ်အိၣ်သးအဂ့ၢ်အကျိၤန့ၣ်မ့မ့ၢ်သုးကီၣ်ကးတကပၤ ထုးထီၣ်ပာ်ဖျါတၢ်ကစီၣ်တအိၣ်နီတမံၤဘၣ်န့ၣ်လီၤႉ တကီၢ်ခါခဲအံၤတၢ်ဒုးဆူၣ်ထီၣ်၀ဲလၢခံခီခံကပၤအဘၢၣ်စၢၤဒီးဖဲမဟါလါအီကူး ၁၄ သီအနံၤစ့ၢ်ကီး ပယီၤသုးခးလီၤကျိဖးဒိၣ်ဆူ(လဲၣ်ခၣ်တီၤ)သုးကလၢၤဒီးတကးဒံးဘၣ်အမဲာ်ညါကဘီယူၤစ့ၢ်ကီးဟဲခးလီၤတၢ် အဂ့ၢ်န့ၣ် လီၢ်က၀ီၤကမျၢၢ်လၢအိၣ်ဘူးဖဲန့ၣ်သ့ၣ်တဖၣ်စံး၀ဲအသိးသ့ၣ်ညါဘၣ်န့ၣ်လီၤႉ
ကီးတရံး–မၠၣ်၀တံၣ်ကစၢၢ်ကျဲလီၢ်လံၤ တၢ်ပျဲလ့ၢ်ထီၣ်လ့ၢ်လိၤက့ၤသိလ့ၣ်ထီၣ်တသီအလီၤတသီ
လါအီကူး ၁၅ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲအပူၤကွံာ်လါအီကူး ၇ သီအနံၤ ဟီၣ်ခိၣ်လာ်၀ဲလၢကီးတရံး–မၠၣ်၀တံၣ်အ့ရှါကျဲသီ တီနီၢ်ထံလီၤဆှူကပၤဒီး လၢတၢ်န့ၣ်အဃိဖဲတၢ်ကက့ၤဘှီဂ့ၤထီၣ်ကဒါက့ၤကျဲအံၤအတီၢ်ပူၤ စးထီၣ်လါအီကူး ၁၄ သီန့ၣ် တၢ်ပျဲလ့ၢ်ထီၣ်လ့ၢ်လိၤက့ၤ သိလ့ၣ်ထီၣ်တသီအလီၤတသီလၢအဆၢကတီၢ်အဂ့ၢ်န့ၣ် သ့ၣ်ညါဘၣ်လၢ ၦၤနီသိလ့ၣ်ဖိတဖၣ်အအိၣ်န့ၣ်လီၤႉ တကီၢ်ခါခဲအံၤခီဖျိကစၢၢ်ကျဲလီၢ်လံၤအံၤကျဲအံၣ်ဘၣ်ဟးထီၣ်က့ၤလီၤလၢတၢ်ပလီၢ်ပဒီပူၤအဃိ မ့ပျဲလ့ၢ်ထီၣ်လ့ၢ်လိၤက့ၤ သိလ့ၣ်ထီၣ်တသီအလီၤတသီဒ်အံၤမးကဘၣ်ဂီၢ်၀ဲအဂ့ၢ်န့ၣ် ၦၤနီသိလ့ၣ်ဖိလၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤ န့ၣ်လီၤႉ အ၀ဲစံး၀ဲလၢ“ကျဲတဘိအံၤခီန့ၣ်အကိၤဘၣ်ဆၣ်အတြီၢ်သိလ့ၣ်ထဲတခိၣ်လီၤမီၤနီၤႉသိလ့ၣ်မ့ဟဲထီၣ်စ့ၢ်ႇမ့က့ၤလီၤစ့ၢ် န့ၣ်တဘၣ်ဂီၢ်ဘၣ်ႉတနံၤညါအံၤၦၤစးထီၣ်ဒုးလ့ၢ်ထီၣ်လ့ၢ်လိၤက့ၤသိလ့ၣ်အထီၣ်တသီအလီၤတသီဒ်န့ၣ်လီၤႉ မ့ၢ်လၢကျဲန့ၣ် အံၣ်အဃိမ့ထီၣ်တသီမ့လီၤတသီမးကဘၣ်ဂီၢ်၀ဲမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲမဟါလါအီကူး ၁၄ သီအနံၤ န့ၣ်လီၤႉ တၢ်ပျဲလ့ၢ်ထီၣ်လ့ၢ်လိၤက့ၤသိလ့ၣ်အထီၣ်တသီအလီၤတသီဒ်အံၤအဖီခိၣ်ဟးထီၣ်က့ၤလီၤတၢ်ဆၢကတီၢ်ယံၤထီၣ် ဘၣ်ဆၣ်တၢ်ဘၣ်ယိၣ်စှၤ၀ဲဒီးဘၣ်ဂီၢ်ဒိၣ်၀ဲအဂ့ၢ်န့ၣ် ၦၤလၢအလ့ၢ်ထီၣ်လ့ၢ်လိၤဖဲန့ၣ်တဖၣ် စံး၀ဲန့ၣ်လီၤႉ “တၢ်မၢၤလၢနအဲၣ်ဒိးလဲၤတဘျီဃီန့ၣ်နဆၢထၢၣ်လဲၤတသ့ဘၣ်မီၤနီၤႉကျဲလီၢ်လံၤခီန့ၣ်ၦၤမ့မၤဒ်အံၤမးတၢ်ဘၣ်ယိၣ်ကစှၤ၀ဲလီၤႉဟးထီၣ်ဟးလီၤဘၣ်ဂီၢ်လီၤမီၤနီၤႉမ့တမ့ၢ်ဘၣ်န့ၣ်ကျဲခီဒၢးအံၣ်ႇသိလ့ၣ်နါက့အထီၣ်စ့ၢ်အလီၤစ့ၢ်အဃိတၢ်ဘၣ်ယိၣ်အိၣ်အါမးမီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးဂာ်သိစ့ၢ်ကီးအၦ့ၤထီၣ်ဒီးကျဲဒီတကျိၤပယီၤသုးဒီးအ၀ဲသ့ၣ်စုတီၤဖီလာ်ကရူၢ်ကရၢအတြဲၤတၢ်သမံသမိးလီၢ် တဖၣ်အိၣ်ခိးထၢစ့အါမးအဃိၦၤနီသိလ့ၣ်ဖိတဖၣ်ဘၣ်ကွၢ်ဆၢၣ်မဲာ်၀ဲတၢ်လၢာ်ဘူၣ်လၢာ်စ့အါထီၣ်၀ဲအဂ့ၢ်န့ၣ် ၦၤနီသိလ့ၣ်ဖိတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“သိၦ့ၤနါက့ထီၣ်ႇလၢကျဲပူၤနါက့တြဲၤတၢ်သမံသမိးလီၢ်လၢအအိၣ်ခိးထၢစ့န့ၣ်အိၣ်ဒီဒူၣ်ညါႉမၠၣ်၀တံၣ်တုၤလၢကီးတရံးန့ၣ်ဘၣ်ဟ့ၣ်လီၤတြဲၤအဘူးကလဲန့ၣ်ကအိၣ်လၢ(၂)ကလးဃၣ်ဃၣ်ညါလံႉတၢ်န့ၣ်မးဖဲအ၀ဲသ့ၣ်ဃ့အသိးန့ၣ် ပတဟ့ၣ်ဒံးဘၣ်ႉမ့ဃ့၀ဲယဲၢ်ကထိကၠးန့ၣ်ပဃ့သးစူၤအ၀ဲသ့ၣ်ပဟ့ၣ်လီၤ သၢကထိကၠးဒ်န့ၣ်အိၣ်လီၤ”အဂ့ၢ်န့ၣ် စံး၀ဲန့ၣ်လီၤႉ ၦၤနီသိလ့ၣ်ဖိလၢအလ့ၢ်ထီၣ်လ့ၢ်လိၤဖဲကစၢၢ်ကျဲလီၢ်လံၤသ့ၣ်တဖၣ်အံၤခီဖျိသိၦ့ၤထီၣ်ဒီးဘၣ်ဟ့ၣ်လီၤတြဲၤတၢ်သမံ သမိးလီၢ်အဘူးအလဲတကးဒံးဘၣ်ကျဲတၢ်ကီတၢ်ခဲအံၤအဃိ ဖၣ်အၣ်–မၠၣ်၀တံၣ်န့ၣ် ဘၣ်ဃ့၀ဲသိလ့ၣ်အဘူးအလဲ တဂၤန့ၣ်အစှၤကတၢၢ်(၅)ကလးကၠးအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲလါအီကူး ၇ သီအနံၤ ခီဖျိတၢ်စူၤတပယူာ်ဃီအဃိ မၠၣ်၀တံၣ်–ကီးတရံးအ့ရှါကျဲသီ တီနီၢ်ထံလီၤဆှူကပၤန့ၣ် ဟီၣ်ခိၣ်လာ်၀ဲဒီး လၢတၢ်အံၤအဃိတလါအတီၢ်ပူၤ ကက့ၤဘှီထီၣ်က့ၤ၀ဲ(ဘ့ၤလံၤ)တိၤအဂ့ၢ်န့ၣ် သုးမီၤစိရိၤအတၢ်ကစီၣ်သန့ မၠၤမၣ်အလ့(မြန်မာ့အလင်း)ထုးထီၣ်ဘိးဘၣ်ရၤလီၤ၀ဲဖဲလါအီကူး ၁၀ သီအနံၤန့ၣ်လီၤႉ