ကညီကီၢ်စဲၣ်ပူၤ ခီဖျိၦၤ(ဘံၣ်ယဲနၣ်)ထံဖိကီၢ်ဖိဟဲၦ့ၤကသ့ၣ်အါအဃိ ကသ့ၣ်အၦ့ၤဂ့ၤ၀ဲ
လါအီကူး ၂၂ သီႇ ၂၀၂၃ နံၣ်ႇ ခ့ၣ်အဲးစံၣ် ကသ့ၣ်လၢၦၤဘုၣ်၀ဲလၢကညီကီၢ်စဲၣ်ပူၤသ့ၣ်တဖၣ်အံၤ ခီဖျိၦၤ(ဘံၣ်ယဲနၣ်)ထံဖိကီၢ်ဖိဟဲၦ့ၤ၀ဲအါအဃိ ကသ့ၣ်အၦ့ၤဂ့ၤ၀ဲဒိၣ်မးအဂ့ၢ်န့ၣ် သ့ၣ်ညါဘၣ်လၢၦၤဘုၣ်ကသ့ၣ်ဖိတဖၣ်အအိၣ်န့ၣ်လီၤႉ အပူၤကွံာ်ကသ့ၣ်ဖးထီၣ်န့ၢ်လၢအလါတဒုန့ၣ်အၦ့ၤအိၣ်ထဲ(၆)ကလီၢ်လီၤဒီးဘၣ်ဆၣ်ခဲအံၤအၦ့ၤအိၣ်တုၤလၢအကလီၢ် (၁၀)ညါအသိး ခီဖျိကသ့ၣ်အၦ့ၤဂ့ၤအဃိၦၤဘုၣ်ကသ့ၣ်ဖိတဖၣ်ဘၣ်ဂီၢ်၀ဲဒိၣ်မးအဂ့ၢ်န့ၣ် သ့ၣ်ညါဘၣ်လၢဖၣ်အၣ်၀့ၢ် ၦၤဘုၣ်ကသ့ၣ်ဖိတဖၣ်အအိၣ်န့ၣ်လီၤႉ “ကသ့ၣ်ဖိလၢအမဲထီၣ်ဒံးထဲလွံၢ်ဘ့ၣ်တဒုန့ၣ်ၦၤဟဲဂုာ်ၦ့ၤအကလီၢ်(၁၀)ဆူဖီခိၣ်လီၤႉၦၤ(ဘံၣ်ယဲနၣ်)ထံဖိကီၢ်ဖိ ဟဲလီၤ ၦ့ၤ၀ဲတုၤလၢကီၢ်ဆၢညါႉအ၀ဲသ့ၣ်တဲ၀ဲလၢက့ၤဘုၣ်ကွၢ်ကီ၀ဲဒ်န့ၣ်လီၤႉကသ့ၣ်အၦ့ၤဂ့ၤဒ်အံၤအဃိၦၤဘုၣ်ကသ့ၣ်ဖိတဖၣ်ဘၣ်ဂီၢ်၀ဲဒိၣ်မး”အဂ့ၢ်န့ၣ် ဖၣ်အၣ်၀့ၢ် စီၤဖၣ်တၤ လၢအဘုၣ်ကသ့ၣ်အံၤ စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲလါအီကူး ၂၀ သီအနံၤန့ၣ်လီၤႉ လၢကညီကီၢ်စဲၣ် ဖၣ်အၣ်ႇကီးတရံးႇလူၢ်ပျဲၢ်ကီၢ်ဆၣ်ဒီးအ့ၤဒူၣ်ဟီၣ်က၀ီၤတကပၤန့ၣ် ၦၤဘုၣ်ကသ့ၣ်အါမးဒီး ကသ့ၣ်သ့ၣ်တဖၣ်အံၤဖဲဘူၣ်ဘၣ်ပွဲဘၣ်အဆၢကတီၢ်ၦၤမၤဘူၣ်တၢ်ကစၢ်တဖၣ်ဟံငါသူ၀ဲလၢတၢ်မၤဘူၣ်မၤတပွဲအဂီၢ် ဒီးသူ၀ဲလၢဘူၣ်ပူၤပွဲပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ကညီကီၢ်စဲၣ်တကးဒံးဘၣ်အမဲာ်ညါကသ့ၣ်လၢၦၤဘုၣ်အီၤလၢတလၢၤကီၢ်စဲၣ်ပူၤဒီးဟီၣ်က၀ီၤတၢ်လီၢ်လၢအဂၤတဖၣ် စ့ၢ်ကီးၦၤဟးဂု၁်ၦ့ၤ၀ဲအၦ့ၤဂ့ၤမးဒီးကသ့ၣ်သ့ၣ်တဖၣ်အံၤလၢကီၢ်ပယီၤကီၢ်ဆၢ ကီၢ်ကၠီၣ်တဲၣ်တဆီ တၢ်ဆှၢထီၣ်အီၤဆူ(ဘံၣ်ယဲနၣ်)ထံကီၢ်အဂ့ၢ်န့ၣ် သ့ၣ်ညါဘၣ်လၢၦၤၦ့ၤဆါကသ့ၣ်သ့ၣ်တဖၣ်အအိၣ်န့ၣ်လီၤႉ ကီၢ်ပယီၤပူၤအပူၤကွံာ်လၢညါခါန့ၣ်ကသ့ၣ်တဖၣ်အံၤတၢ်သူအီၣ်၀ဲလၢတၢ်စိာ်ဆှၢထီၣ်ဆှၢလီၤတၢ်ဒီးလၢသုးဂ့ၢ်၀ီတၢ်လီၢ် တကပၤအါမးဒီးဖဲတၢ်စးထီၣ်သူက့ၤစဲးဖီကဟၣ်သိလ့ၣ်အါထီၣ်လီၢ်ခံဘျီန့ၣ်ၦၤဘုၣ်ကသ့ၣ်စှၤလီၤ၀ဲဒီး ၦၤဘုၣ်ကသ့ၣ်ဖိသ့ၣ်တဖၣ်အံၤစ့ၢ်ကီးဘုၣ်ကွၢ်ကီက့ၤ၀ဲကသ့ၣ်ႇသူက့ၤကသ့ၣ်အံၤလၢတၢ်မၤဘူၣ်မၤတပွဲပူၤဒ်န့ၣ်လီၤ အဂ့ၢ်န့ၣ် ၦၤဘုၣ်ကသ့ၣ်ဖိတဖၣ်စံး၀ဲန့ၣ်လီၤႉ
ပယီၤသုးကျိၤနု၁်လီၤလၢအသီတဆံအတီၢ်ပူၤဟံ၀ဲဒၣ်ဟံၣ်အဖျၢၣ်(၂၀၀)ဘျဲၣ်ပူၤကမျၢၢ်တၢ်ဖိတၢ်လံၤ
လါအီကူး ၂၁ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် ယ့ၤဖၠူၤကီၢ်ဆၣ်အပူၤ ပယီၤသုးကျိၤနုာ်လီၤလၢအသီတဆံအတီၢ်ပူၤန့ၣ် နုာ်လီၤဟံ၀ဲဒၣ် ဟံၣ်အဖျၢၣ်(၂၀၀)ဘျဲၣ်ပူၤကမျၢၢ်အတၢ်ဖိတၢ်လံၤဒီးဒွဲၣ်အူအီၣ်ကွံာ်၀ဲဟံၣ်တနီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ် ညါဘၣ်န့ၣ်လီၤႉ လၢ(ယ့ၤဖၠူၤ)ကီၢ်ဆၣ် နဘူၣ်လဲၤလီၢ်က၀ီၤ ဒူသ၀ီတကပၤန့ၣ် စးထီၣ်ဖဲအပူၤကွံာ်လါအီကူး ၈ သီတုၤလၢ ၁၈ သီ လၢအသီတဆံအတီၢ်ပူၤ ပယီၤသုးကျိၤနုာ်လီၤခးလီၤကျိဖးဒိၣ်လၢမုၢ်နၤခီတကးဒံးဘၣ်အမဲာ်ညါ အ၀ဲသ့ၣ်နုာ်လီၤဟံ ၦၤကမျၢၢ်အတၢ်ဖိတၢ်လံၤလၢဟံၣ်ပူၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ယ့ၤဖၠူၤကီၢ်ဆၣ် ကမျၢၢ်တဂၤ စံး၀ဲလၢ“ပယီၤသုးကျိၤနု၁်လီၤအါထီၣ်ဒုတအိၣ်ဒံးဘၣ်ႉခဲအံၤဂၢၢ်ဒံးႉ ဘၣ်ဆၣ်ၦၤက့ၤလၢ သ၀ီပူၤတဘူၣ်နီတဂၤဒံးဘၣ်ႉဟံၣ်လၢအိၣ်လၢသ၀ီပူၤတဖၣ်န့ၣ်အါဒၣ်တက့ၢ်ပယီၤသုးက့ၤစိာ်ကွံာ်ဟုသးတၢ်ဖိတၢ်လံၤလၢာ်လံႉမ့မ့ၢ်ၦၤအဂၤ(၅၀)လၢပယီၤသုးဖီၣ်၀ဲန့ၣ်ခဲအံၤပျၢ်လီၤက့ၤ၀ဲလံႉဟံၣ်လၢပယီၤသုးဟံဃုာ်ၦၤထူးနါက့အိၣ်ႇဟံၣ်နါက့ဒွဲၣ်အူအီၣ်၀ဲ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ပယီၤသုးအံၤနုာ်လီၤဟံၦၤတၢ်ဖိတၢ်လံၤလၢ(နဘူၣ်လဲၤ)လီၢ်က၀ီၤ ၀စွါတီသ၀ီပူၤန့ၣ် ဟံၣ်(၂၃)ဖျၢၣ်ႇ နုာ်လီၤဟံၦၤတၢ်ဖိတၢ်လံၤလၢအ့ၤကနံၣ်သ၀ီပူၤန့ၣ် ဟံၣ်(၁၇၀)ဘျဲၣ်ႇ ခမီခၠီသ၀ီန့ၣ်(၂၆)ဖျၢၣ်ဒီးဖဲန့ၣ်ဒွဲၣ်အူအီၣ်ကွံာ်၀ဲ ဟံၣ်တနီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ တကးဒံးဘၣ်လၢန့ၣ်အမဲာ်ညါခီဖျိပယီၤသုးခးလီၤကဒီးကျိဖးဒိၣ်အဃိတုၤလၢခဲအံၤၦၤက့ၤအိၣ်လၢဟံၣ်တဘူၣ် ဒံး၀ဲဘၣ်အဂ့ၢ်န့ၣ် နဘူၣ်လဲၤလီၢ်က၀ီၤကမျၢၢ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ “လၢမုၢ်နၤခီန့ၣ်အ၀ဲသ့ၣ်ခးလီၤကျိဖးဒိၣ်ဒံးအဃိၦၤက့ၤအိၣ်လၢၦၤဟံၣ်တဘူၣ်ဒံးဘၣ်ႉမ့မ့ၢ်ၦၤလၢအကျိၣ်အိၣ်စ့အိၣ် ညါန့ၣ်အ၀ဲသ့ၣ်သုးလီၢ်သုးကျဲလဲၤငါအိၣ်ဟံၣ်လၢ(ဒ၀ဲၢ်)မီၤနီၤႉ လၢသ၀ီပူၤနါက့ပယီၤသုးဒွဲၣ်အူအီၣ်ၦၤဟံၣ်ၦၤဃီႇ နုာ်လီၤဟုၣ်တၢ်လၢၦၤဟံၣ်ပူၤႇသူအီၣ်တသ့နီတမံၤလၢၤဘၣ်ႉတၢ်ဆၢကတီၢ်ယံၤထီၣ်ဘျီတၢ်ကိၢ်တၢ်ဂီၤဘၣ်လၢကအီၣ်ကအီကအိၣ်ကဆိးအဂီၢ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ ပယီၤသုးလၢအဟဲနုာ်လီၤလၢသ၀ီပူၤသ့ၣ်တဖၣ်အံၤအါဒၣ်တက့ၢ်န့ၣ်အိၣ်ဆီလီၤသးလၢမၠ့ၣ်၀့ၢ်ႇယ့ၤဖၠူၤကီၢ်ဆၣ်ဒီး ဒ၀ဲၢ်ကီၢ်ဆၣ်ပူၤလၢအမ့ၢ်ခီၣ်ချ့သုးရ့ၣ်(ခမရ–၄၀၈),(ခမရ–၄၀၉),(ခမရ–၄၀၆),(ခမရ–၄၀၇),ခီၣ်သုးရ့ၣ်(ခလရ–၁၀၄),(ခလရ–၁၀၃)ဒီးမျိာ်သုးရ့ၣ်(အမတ–၃၀၄)သ့ၣ်တဖၣ်လီၤအဂ့ၢ်န့ၣ် လီၢ်က၀ီၤတၢ်ဒီသဒၢကမျၢၢ်သုးကရူၢ် စံး၀ဲအသိးသ့ၣ်ညါဘၣ်န့ၣ်လီၤႉ
တၢ်လဲၤခး(စွ့ၣ်ကိ)ပယီၤသုးကလၢၤလၢဒြိ ၦၤဖိသၣ်ဘၣ်ဒိတဂၤ
လါအီကူး ၂၁ သီႇ ၂၀၂၃ နံၣ်ႇ ခ့ၣ်အဲးစံၣ် လၢဖၣ်အၣ်ကီၢ်ရ့ၣ် လူၢ်ပျဲၢ်ကီၢ်ဆၣ်အပူၤ ပယီၤသုးကလၢၤလၢအိၣ်ဆီလီၤသးဖဲ(စွ့ၣ်ကိ)သ၀ီပူၤတဖၣ်အံၤ ဖဲမဟါလါအီကူး ၂၀ သီ ဂီၤခီ ၇ နၣ်ရံၣ်အဆၢကတီၢ် တၢ်လဲၤခးပယီၤသုးကလၢၤအံၤလၢဒြိဒီး ဖဲန့ၣ်ၦၤဖိသၣ်ဘၣ်ဒိ၀ဲ (၁)ဂၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ တၢ်လဲၤခးပယီၤသုးကလၢၤလၢဒြိဘျီ၀ဲအံၤတဘၣ်၀ဲဒၣ်ပယီၤသုးဘၣ်မ့မ့ၢ်တခီမ့ၣ်ပိၢ်ချံလီၤတဲာ်လၢကျဲပူၤတဖျၢၣ်အဃိ ၦၤဖိသၣ်ဘၣ်ဒိ၀ဲတဂၤဒီးဖိသၣ်အံၤဘၣ်ဒိတနး၀ဲဘၣ်အဂ့ၢ်န့ၣ် လီၢ်က၀ီၤကမျၢၢ်တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ၦၤဟဲတ့ၢ်လီၤမ့ၣ်ပိၢ်အကလုၢ်သီၣ်ဖးဒိၣ်ညါႉမ့၀ံၤပယီၤသုးတကပၤစ့ၢ်ကီးက့ၤခးလီၤကဒါကျိဖးဒိၣ်ကအိၣ်လၢဃုဖျၢၣ်နွံဖျၢၣ်ညါႉခီဖျိၦၤဟဲတ့ၢ်လီၤဒြိမ့ၣ်ပိၢ်အဃိၦၤဖိသၣ်ဘၣ်ဒိတဂၤႇတၢ်ဘၣ်ယိၣ်ဒုတအိၣ်ဘၣ်”အဂ့ၢ်န့ၣ် စံး၀ဲန့ၣ်လီၤႉ ခီဖျိတၢ်လဲၤခးပယီၤသုးဒီးဒြိအဃိပယီၤသုးတကပၤက့ၤခးလီၤကဒါကျိဖးဒိၣ်အဖီခိၣ်အ၀ဲသ့ၣ်အိၣ်ခိးသမံသမိးလီၢ်က၀ီၤကမျၢၢ်ဟဲအါထီၣ်၀ဲအဂ့ၢ်န့ၣ် လီၢ်က၀ီၤကမျၢၢ်လၢအထံၣ်တၢ်ကဲထီၣ်သးလၢအမဲာ်တဂၤ စံး၀ဲန့ၣ်လီၤႉ စွ့ၣ်ကိ လီၢ်က၀ီၤကမျၢၢ်တဂၤစံး၀ဲလၢ“တၢ်ပိၢ်ဖးထီၣ်ဘျီသ၀ီသးၦၢ်မၢၦၤပံးကွံာ်ကၠိမီၤနီၤႉပယီၤသုးဒီးပၢၤကီၢ်သုး ဒီဒူၣ်ညါႉ အ၀ဲသ့ၣ်တပျဲခီၦၤကျဲလၢာ်ဘၣ်ႇအိၣ်ခိးသမံသမိးကမျၢၢ်ယံၤညါႉအသံကွၢ်၀ဲနသုအိၣ်ဖဲလဲၣ်ႇကခးသံသုတဘျီဃီလီၤႇ တဲမ့လီၤတံၢ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဘၣ်ဃးတၢ်လဲၤခးပယီၤသုးကလၢၤလၢဒြိတၢ်ဂ့ၢ်အံၤမ့ၢ်ကရူၢ်ကရၢဖဲလဲၣ်တဒူၣ်လဲၤခး၀ဲလဲၣ်န့ၣ် ပခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ်ပာ်ဂၢၢ်ပာ်ကျၢၤ၀ဲတန့ၢ်ဒံး၀ဲဘၣ်အသိးကရူၢ်ကရၢဘၣ်ထွဲတကပၤစ့ၢ်ကီး ထုးထီၣ်ပာ်ဖျါ၀ဲ တအိၣ်နီတမံၤဘၣ်န့ၣ်လီၤႉ ဒ်န့ၣ်အသိးဖဲအပူၤကွံာ်(၂၀၂၁)လါအီးကထိဘၢၣ် ၃၀ သီအခါစ့ၢ်ကီး သိလ့ၣ်တခိၣ်ဟဲတ့ၢ်လီၤမ့ၣ်ပိၢ်လၢ စွ့ၣ်ကိသ၀ီ စွ့ၤပၠံၤတီၤက၀ီၤဒ့ကျဲကပၤ ဒီကလုာ်ဒံၣ်မိၣ်ခြ့စံၣ်ကရၢစိ(NLD)ပၣ်တံၣ်ကရၢဖိ ဒူသ၀ီခိၣ်နၢ်တဂၤ အဟံၣ်ဒံးန့ၣ်လီၤႉ
တၢ်ဒုးကဲထီၣ်လၢ(လဲၣ်ခၣ်တီၤ)ဘၣ်ဆၣ်ကၣ်စံၣ်နိၣ်လၢအိၣ်တၢ်ခိၣ်တၢ်ဃၢၤဖဲန့ၣ်တဖၣ်လဲၤတရံးသးထီဘိ
လါအီကူး ၁၈ သီႇ ၂၀၂၃ နံၣ်ႇ ခ့ၣ်အဲးစံၣ် စးထီၣ်ဖဲအပူၤကွံာ်လါယူၤလံ ၂၀ သီအနံၤ လၢကညီကီၢ်စဲၣ် မၠၣ်၀တံၣ်၀့ၢ်ဃၢၤ(လဲၣ်ခၣ်တီၤ)န့ၣ် တၢ်ဒုးကဲထီၣ်၀ဲလၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီးပယီၤသုးအဘၢၣ်စၢၤအိၣ်၀ဲကိးမုၢ်နံၤဒဲးလီၤဘၣ်ဆၣ် မ့မ့ၢ်(ကၣ်စံၣ်နိၣ်)တၢ်တၤကျိၣ်တၤစ့လီၢ်လၢအိၣ်တၢ်ခိၣ်တၢ်ဃၢၤဖဲန့ၣ်သ့ၣ်တဖၣ်န့ၣ်လဲၤတရံးသးထီဘိလီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ခီဖျိခံခီခံကပၤတၢ်ဒုးကဲထီၣ်အဃိလီၢ်က၀ီၤကမျၢၢ်လၢအိၣ်ဘူးတၢ်ခိၣ်တၢ်ဃၢၤဖဲန့ၣ်တဖၣ်ဘၣ်ဃ့ၢ်ထီၣ်၀ဲတနီၤဒီး လၢမၠၣ်၀တံၣ်ကီၢ်ဆၣ် မဲၢ်ထီးသလ့ကရူၢ် အ့ၤကၠ့မၠဲၤႇမ့လဲၣ်ပၤသ၀ီတဖၣ်အပူၤန့ၣ် တၢ်မၤတဲာ်ကွံာ်မ့ၣ်အူလံဘၣ်ဆၣ် မ့မ့ၢ်(ကၣ်စံၣ်နိၣ်)တၢ်တၤကျိၣ်တၤစ့လီၢ်လၢသုးခိးကီၢ်ဆၢ(BGF)ဒီးတရူးထံဖိကီၢ်ဖိပာ်ဖှိၣ်မၤသကိး၀ဲတဖၣ်အံၤန့ၣ် မ့ၣ်အူကပီၤၦၤလဲၤဂဲၤလိာ်ကွဲကိးမုၢ်နၤဒဲးလီၤအဂ့ၢ်န့ၣ် မ့လဲၣ်ပၤလီၢ်က၀ီၤကမျၢၢ်တဂၤ စံး၀ဲန့ၣ်လီၤႉ အ၀ဲစံး၀ဲလၢ“မ့ၣ်အူတဟဲဘၣ်ကအိၣ်လၢခံလါလံအဃိနဖံးအီၣ်မၤအီၣ်တၢ်တသ့နီတမံၤဘၣ်ႉလၢ(မ့လဲၣ်ပၤ)သ၀ီ ခိၣ်ထိးန့ၣ်အိၣ်ဒီး(ကၣ်စံၣ်နိၣ်)လီၢ်တခါႉ(BGF)လူၢ်ဖဲသ၀ီပူၤအံၤခးလီၤကျိဖးဒိၣ်လၢ(လဲၣ်ခၣ်တီၤ)တကပၤန့ၣ်ကိး မုၢ်နၤဒဲးလီၤႉလၢအခးညါခးလီၤႉဘၣ်ဆၣ်မ့မ့ၢ်လၢ(ကၣ်စံၣ်နိၣ်)လီၢ်န့ၣ်အ၀ဲသ့ၣ်ၦၤသူ၀ဲမ့ၣ်အူစဲးအဃိမ့ၣ်အူဟဲမီၤနီၤႉ ၦၤတရူးဖိတဖၣ်န့ၣ်ဟးထီၣ်က့ၤလီၤအ့ဆ့လီၤႉနမ့လဲၤလၢ(မ့လဲၣ်ပၤ)န့ၣ်မ့ၣ်အူကပီၤလၢ(ကၣ်စံၣ်နိၣ်)တၢ်ဂဲၤလိာ်ကွဲ လီၢ်န့ၣ်ကိးမုၢ်နၤဒဲးလီၤႉမ့ဘၣ်တဲန့ၣ်၀့ၢ်န့ၣ်ဒီၣ်ဖးသး(၂)က့မီၤနီၤႉဘၣ်မနုၤလဲၣ်န့ၣ်လၢအ၀ဲတက့ခီန့ၣ်တၢ်ဒုးကဲထီၣ်ၦၤစံၣ်ႉလၢအံၤတကပၤခီန့ၣ်မ့ၣ်အူကပီၤသီၣ်သထြုးကိးမုၢ်နၤဒဲးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ လၢန့ၣ်အမဲာ်ညါလၢမ့လဲၣ်ပၤသ၀ီႇအ့ၤကၠ့မၠဲၤသ၀ီတဖၣ်န့ၣ်ခီဖျိကီၢ်ကၠီၣ်တဲၣ်မၤတဲာ်ကွံာ်မ့ၣ်အူအဃိ ၦၤသ၀ီဖိတဖၣ် တၢ်ဖံးတၢ်မၤတအိၣ်လၢၤဘၣ်ဘၣ်အိၣ်ကလီ၀ဲဒ်န့ၣ်လီၤအဂ့ၢ်န့ၣ် အ့ကၠ့မၠဲၤသ၀ီဖိပိာ်မုၣ်တဂၤ စံး၀ဲဒ်အံၤ န့ၣ်လီၤႉ “မ့အူတဟဲဘၣ်ကအိၣ်လၢခံလါလံအဃိမၤအီၣ်တၢ်တသ့နီမံၤဘၣ်ႉမ့လဲၤမၤတၢ်မၤလၢတရူး(ကၣ်စံၣ်နိၣ်)ဒု ဘၣ်ဂီၢ်မီၤႉ ဘၣ်ဆၣ်မ့လဲၤမၤတၢ်မၤလၢအ၀ဲသ့ၣ်အိၣ်န့ၣ်တူၢ်ဘၣ်ဒ်သိးသးတဘံၣ်တဘၢဘၣ်ႉဟံၣ်ဖိဃီဖိတၢ်လုၢ်အီၣ်နီၢ်ခိသးသမူတဘၣ်ဂီၢ်ဘၣ်ဘၣ်ဆၣ်ယတအဲၣ်ဒိးမၤတၢ်မၤလၢ(ကၣ်စံၣ်နိၣ်)ဘၣ်ႉၦၤအိၣ်ဖဲအံၤအါဒၣ်တက့ၢ်န့ၣ်တ့၀ဲဒၣ် (CI)လံာ်ဘျီ လဲၤထီၣ်မၤတၢ်လၢဘီကီးမီၤနီၤႉမ့မ့ၢ်တၢ်မၤလၢအိၣ်ဖဲသ၀ီပူၤတဖၣ်အံၤခီန့ၣ်နမၤတၢ်မၤဒီးနဒိးန့ၢ်ဘၣ်စ့န့ၣ် တကဲးလိာ်သးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢမၠၣ်၀တံၣ်ကလံၤစိး စွ့ၤကိၣ်ကိၤလီၢ်က၀ီၤဒီး မၠၣ်၀တံၣ်ကလံၤထံး အ့ၤကၠ့မၠဲၤလီၢ်က၀ီၤတကပၤန့ၣ် မ့ၣ်အူလၢတၢ်ဟံန့ၢ်အီၤလၢကီၢ်ကၠီၣ်တဲၣ်ပူၤအံၤ စးထီၣ်ဖဲအပူၤကွံာ်လါယူၤ ၅ သီ မုၢ်နၤခီအဆၢကတီၢ် ကီၢ်ကၠီၣ်တဲၣ်တကပၤ မၤတဲာ်ကွံာ်၀ဲဒၣ်မ့ၣ်အူန့ၣ်လီၤႉ ဒ်န့ၣ်အသိး(ကၣ်စံၣ်နိၣ်)တၢ်တၤကျိၣ်တၤစ့လီၢ်လၢအိၣ်ကီၢ်ဆၢဒီတကျိၤအံၤသ့ၣ်တဖၣ်မ့ၢ်တၢ်လီၢ်လၢတၢ်မူၤတၢ်ဘှီးႇ ၦၤကူၣ်လဲၤမၤကၤၦၤကညီႇတၢ်ကိးလံၣ်အီၣ်လီအီၣ်ၦၤလၢ(အီၤလါ)ပူၤတၢ်ဖံးတၢ်မၤတဖၣ်အံၤအိၣ်၀ဲအါမးအသိး သုးဟံးန့ၢ်တၢ်စိတၢ်ကမီၤအတီၢ်ပူၤအံၤဘၣ်ဃးတၢ်ဖံးတၢ်မၤလၢအတဖိးသဲစးတဖၣ်ရၤလီၤသးဟဲအါထီၣ်၀ဲဒၣ်ကွ့ၢ်ကွ့ၢ် အဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ တကီၢ်ခါခဲအံၤပယီၤအံၤလၢကထီၣ်ဟံန့ၢ်ကဒါက့ၤ(လဲၣ်ခၣ်တီၤ)သုးကလၢၤအံၤအဂီၢ်န့ၣ်အ၀ဲသ့ၣ်သုးကျိၤဟဲထီၣ်၀ဲ လၢပျီပူၤတကးဒံးဘၣ်ခးလီၤကျိဖးဒိၣ်ႇကဘီယူၤစ့ၢ်ကီးဟဲခးလီၤတၢ်ဘၣ်ဆၣ်အ၀ဲသ့ၣ်တကပၤဒၣ်၀ဲသံဘၣ်ဒိဘၣ်ထံးအါ၀ဲအဂ့ၢ်န့ၣ် ဟီၣ်က၀ီၤဂံၢ်ခီၣ်ထံးတၢ်ကစီၣ်စံး၀ဲအသိးသ့ၣ်ညါဘၣ်န့ၣ်လီၤႉ
တနီသရံၣ်ကီၢ်ဒိၣ်အပူၤ လါယူၤလံအတီၢ်ပူၤ ၦၤဃ့ၢ်မှံဟးဖျိးနီၣ်ဂံၢ်အိၣ်တုၤလၢ(၃)ကလးဘျဲၣ်
လါအီကူး ၁၈ သီႇ ၂၀၂၃ နံၣ်ႇ ခ့ၣ်အဲးစံၣ် ခီဖျိပယီၤသုးနုာ်လီၤလၢသ၀ီပူၤဒွဲၣ်အူအီၣ်ၦၤဟံၣ်ၦၤဃီအဃိ တနံၣ်အံၤ(၂၀၂၃)လါယူၤလံအတီၢ်ပူၤ တနီသရံၣ်ကီၢ်ဒိၣ်အပူၤ ၦၤဃ့ၢ်မှံဟးဖျိးအနီၣ်ဂံၢ်အိၣ်ထီၣ်တုၤလၢ(၃)ကလးဘျဲၣ်လံအဂ့ၢ်န့ၣ် (FE5)တနီသရံၣ် ထုးထီၣ်ပာ်ဖျါလံာ်လၢအမံၤ“သုးဟံးန့ၢ်တၢ်စိတၢ်ကမီၤ၀ံၤတၢ်ကဲထီၣ်သးလၢအသီခွံကယၤဘျဲၣ်အတီၢ်ပူၤ” လံာ်တၢ်ပာ်ဖျါပူၤအသိး သ့ၣ်ညါဘၣ်န့ၣ်လီၤႉ ပယီၤသုးအံၤခီဖျိပညိၣ်ခးလီၤကျိဖးဒိၣ်ဆူဒူသ၀ီပူၤအဃိမ့ဘၣ်က့ၤထိၣ်သတြီၤဒီးအပူၤကွံာ်လါန့ၣ်လါယူၤလံ အတီၢ်ပူၤ ၦၤဃ့ၢ်မှံဟးဖျိးအနီၣ်ဂံၢ်ဟဲအါထီၣ်၀ဲအသိးၦၤဃ့ၢ်မှံဟးဖျိးအနီၣ်ဂံၢ်အါထီၣ်စှၤလီၤအံၤဒိးသန့ၤထီၣ်သးလၢ ခံခီခံကပၤ တၢ်ဒုးကဲထီၣ်အဖီခိၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ “တၢ်လၢထီဘိၦၤဃ့ၢ်မှံဟးဖျိးခီန့ၣ်ခီဖျိပယီၤသုးဒွဲၣ်အူအီၣ်အဟံၣ်အဃီအဃိအ၀ဲသ့ၣ်ကက့ၤအိၣ်အဂီၢ် ဟံၣ်ဃီတအိၣ်ဘၣ်ႇ ဘၣ်ဟးအိၣ်၀ဲလၢၦၢ်ပူၤဒ်န့ၣ်လီၤႉမ့မ့ၢ်ၦၤဃ့ၢ်မှံဟးဖျိးမုၢ်ဆ့ၣ်မုၢ်ဂီၤဖိခီန့ၣ်ပယီၤသုးမ့ဟဲနုာ်လီၤ လၢသ၀ီပူၤလံန့ၣ်အ၀ဲသ့ၣ်ဟးစံၣ်ပလဲာ်သးတစိၢ်တလီၢ်ဘျီပယီၤသုးမ့က့ၤလံန့ၣ်အ၀ဲသ့ၣ်က့ၤအိၣ်လၢသ၀ီပူၤဒ်န့ၣ် မီၤနီၤႉၦၤအိၣ်ဖဲပအိၣ်ဖဲအံၤဒ်အံၤခံကလုာ်န့ၣ်အနီၣ်ဂံၢ်ကအိၣ်လၢအကထိညါ”အဂ့ၢ်န့ၣ် လီလိ၀့ၢ် ကမျၢၢ်တဂၤ စံး၀ဲ န့ၣ်လီၤႉ လၢန့ၣ်အမဲာ်ညါခီဖျိပယီၤသုးအံၤတပျဲၦၤစိာ်ထီၣ်စိာ်လီၤဟုသးဘၣ်အဃိတၢ်ကီတၢ်ခဲအိၣ်လၢၦၤကလဲၤမၤစၢၤ ၦၤဃ့ၢ်မှံဟးဖျိးတဖၣ်အံၤအသိးပယီၤသုးအံၤၦၤမ့တီၣ်ဟုသးတထၢၣ်န့ၣ်ဃ့အီၣ်၀ဲစ့အမံၤမံၤအဃိ ကလဲၤမၤစၢၤ ၦၤဃ့ၢ်မှံဟးဖျိးဖျိဖျိဖျါဖျါအဂီၢ်တၢ်ကီတၢ်ခဲအိၣ်၀ဲအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ ဒ်န့ၣ်အသိးၦၤဃ့ၢ်မှံဟးဖျိး(၃)ကလးဘျဲၣ်သ့ၣ်တဖၣ်အံၤန့ၣ် ဘျံးဒ၀ဲၢ်ကီၢ်ရ့ၣ်ပူၤ ကီၢ်ဆၣ်သ၀ီတဖၣ်အပူၤ ၦၤဃ့ၢ်မှံဟးဖျိးအိၣ်၀ဲ(၁)ကလးဘျဲၣ်ႇမၠ့ၣ်ကီၢ်ရ့ၣ်န့ၣ်(၂)ကလးဘျဲၣ်ဒီးဖဲန့ၣ်အကျါၦၤအိၣ်လၢလီၢ်အိၣ်ကမှံလီၢ်န့ၣ် အိၣ်ထဲ(၆)ကထိဘျဲၣ်လီၤဒီး မ့မ့ၢ်ၦၤလၢအဂၤသ့ၣ်တဖၣ်ခီန့ၣ်လဲၤစံၣ်၀ဲလၢၦၢ်ပူၤႇ၀့ၢ်ပူၤႇသ၀ီလၢအဂၤတဖၣ်အဂ့ၢ်န့ၣ် (FE5)တနီသရံၣ် အလံာ်တၢ်ထုးထီၣ်ပာ်ဖျါအပူၤပာ်ဖျါ၀ဲန့ၣ်လီၤႉ လၢန့ၣ်အမဲာ်ညါအ၀ဲသ့ၣ်ဘၣ်ဟးဃ့ၢ်မှံဟးဖျိးဒီးဟီၣ်က၀ီၤပူၤတၢ်အိၣ်သးတဂၢၢ်တကျၢၤဘၣ်အဃိ တနံၣ်အံၤ တၢ်စူၤခါအတီၢ်ပူၤၦၤမၤအီၣ်စံာ်ဖိတဖၣ်တသူၣ်ဘၣ်ဘုဘၣ်အိၣ်၀ဲအါမးဒီးခီဖျိပယီၤသုးအံၤနုာ်လီၤဖီၣ် မၤသံမၤ၀ီ ၦၤလၢတၢ်ဖံးတၢ်မၤပူၤႇဘၣ်ဒီးကျိဖးဒိၣ်ႇယီၢ်ဘၣ်မ့ၣ်ပိၢ်အိၣ်အဃိသးသမူတၢ်ဘံၣ်တၢ်ဘၢတအိၣ်ဘၣ် အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲလၢ“ဖဲအပူၤကွံာ်ထံဒိၣ်ဃိၣ်ယွၤအခါန့ၣ်စံာ်လီၢ်ဘုလီၢ်ဟးဂီၤ ဘုသံဒီဒူၣ်ညါႉခီဖျိပယီၤသုးနုာ်လီၤတၢ်ဒုးကဲထီၣ်အဃိလၢတနီသရံၣ်ဆၢလာ်တကပၤန့ၣ်ၦၤဘၣ်ပာ်တ့ၢ်ကွံာ်ၦၤစံာ်လီၢ်ႇ ၦၤဟံၣ်ၦၤဃီၦၤဘၣ်ဟးစံၣ်မီၤနီၤႉ”အဂ့ၢ်န့ၣ် စံး၀ဲန့ၣ်လီၤႉ လံာ်တၢ်ပာ်ဖျါအံၤ ဒ်သိးၦၤကသ့ၣ်ညါသုးဟံးန့ၢ်တၢ်စိတၢ်ကမီၤအတီၢ်ပူၤ ကိးမုၢ်နံၤဒဲးပယီၤသုးအတၢ်မၤသံမၤ၀ီ ကမျၢၢ်ထံဖိကီၢ်ဖိႇတၢ်ဟးဂူာ်ဟးဂီၤႇတၢ်ဘၣ်ဒိတၢ်ထံးတၢ်အိၣ်သးတဖၣ်အံၤလီၤတံၢ်လီၤဆဲးအဂီၢ်န့ၣ် တၢ်စးထီၣ်ထၢဖှိၣ် မၤနီၣ်စရီအံၤစးထီၣ်လၢ(၂၀၂၂)လါအ့ဖြ့ၣ်အဂ့ၢ်န့ၣ် (FE5)တနီသရံၣ်ကရူၢ် စံး၀ဲအသိး သ့ၣ်ညါဘၣ်န့ၣ်လီၤႉ
ပယီၤသုးခးလီၤကျိဖးဒိၣ်အဃိ ၄ သီအတီၢ်ပူၤ ကမျၢၢ်သံ ၆ ဂၤဒီး ဘၣ်ဒိ ၇ ဂၤ
လါအီကူး ၁၈ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)ဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ် ကီၢ်ဆၣ်(၃)ဘ့ၣ်အပူၤ လါအီကူး ၁၃ သီ တုၤလၢ ၁၆ သီ လၢလွံၢ်သီအတီၢ်ပူၤ ခီဖျိပယီၤသုးခးလီၤကျိဖးဒိၣ်အဃိ ကမျၢၢ်သံ(၆)ဂၤဒီး ဘၣ်ဒိ(၇)ဂၤအဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပာ်ဖျါ၀ဲဖဲမဟါလါအီကူး ၁၇ သီအနံၤန့ၣ်လီၤႉ ချၢၣ်လွံၢ်ထူၣ်ကီၢ်ရ့ၣ် ဆီထံးကီၢ်ဆၣ်ႇမူကီၢ်ဆၣ်ဒီးလၢၢ်ဒိၣ်ကီၢ်ဆၣ်သၢဘ့ၣ်အံၤအပူၤ ခီဖျိပယီၤသုးခးလီၤ(၁၀၅ မမ)ႇ (၁၂၂ မမ)ႇ (၈၁ မမ)ဒီး (၆၀ မမ)သ့ၣ်တဖၣ်အံၤအဃိ ကမျၢၢ်သံ(၆)ဂၤအကျါပၣ်ဃုာ်၀ဲၦၤကၠိဖိ(၂)ဂၤဒီး ဘၣ်ဒိဘၣ်ထံး၀ဲ(၇)ဂၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ၦၤလၢအသံတဖၣ်န့ၣ်မ့ၢ်၀ဲၦၤကၠိဖိခံဂၤလၢအမ့ၢ်စီၤအဲၣ်ကလုာ်ထူ(၁၃)နံၣ်ႇစီၤဘိၣ်လိၣ်(၁၆)နံၣ်ႇကိၤမီၤထွ့(ကိး) ကၠီၤစ့ၤယၣ်(၆၀)နံၣ်ႇကိၤသၣ်စီၤ(၃၅)နံၣ်သ့ၣ်တဖၣ်အံၤဘၣ်၀ဲဒီးကျိအက့အခီဒီး မ့မ့ၢ်ၦၤဘၣ်ဒိဘၣ်ထံး(၇)ဂၤအကျါ န့ၣ်ပၣ်ဃုာ်၀ဲဖိသၣ်စီၤခွါစံၣ်(၁၁)နံၣ်ႇနီၢ်ဘှဲဘှဲ(၁၅)နံၣ်ႇကၠိသရၣ်မုၣ်(၁)ဂၤဒီးၦၤကၠိဖိပိာ်ခွ(၂)ဂၤအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ လၢန့ၣ်အမဲာ်ညါပယီၤသုးလၢအခးလီၤကျိဖးဒိၣ်သ့ၣ်တဖၣ်အံၤမ့ၢ်၀ဲခီၣ်သုးရ့ၣ်(ခလရ–၂၆၄)ဒီး ပယီၤသုးရ့ၣ်လၢ အိၣ်ဆီလီၤသးကီၢ်ဆၣ်(၃)ဘ့ၣ်အပူၤတဖၣ်အံၤန့ၣ်လီၤႉ ပယီၤသုးတဖၣ်အံၤပညိၣ်ခးလီၤတၢ်လၢ ဒိတါသ၀ီႇ ပဲသီၤႇ အ့ၤကိႇလ့ၤတါႇသထ့ကိႇကိဒလၣ်ကၠံႇအ့ကၣ်ပလ့ၣ်ႇသ့ၣ်ခၠီၣ်ခ့ၤႇစလိၣ်ကၠံႇဖယါလဟၤႇ ငါမၠ့ၣ်အ့သ၀ီသ့ၣ်တဖၣ်အံၤအပူၤ အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ ပယီၤသုးတဖၣ်အံၤခးလီၤကျိဖးဒိၣ်ဆူသ၀ီပူၤ၊ကဘီယူၤစ့ၢ်ကီးဟဲခးလီၤတၢ်တကးဒံးဘၣ်အမဲာ်ညါ ခီဖျိပယီၤသုးကျိၤလၢ အဟဲနုာ်လီၤသ့ၣ်တဖၣ်အံၤဒွဲၣ်အူအီၣ်၀ဲကမျၢၢ်အဟံၣ်ကအိၣ်အဖျၢၣ်(၂၀)ဃၣ်ဃၣ်ညါအဃိ လီၢ်က၀ီၤကမျၢၢ် တဖၣ် ဘၣ်ဃ့ၢ်ထီၣ်၀ဲအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ ပယီၤသုးအံၤခးလီၤကျိဖးဒိၣ်ဆူသ၀ီပူၤႇသူစ့ၢ်ကီးကဘီယူၤဟဲခးလီၤတၢ်ဒီးဒွဲၣ်အူအီၣ်ကမျၢၢ်အဟံၣ်အဃီ တကးဒံးဘၣ် ဟံ၀ဲဒၣ်ကမျၢၢ်အတၢ်ဖိတၢ်လံၤတၢ်သ့ၣ်တဖၣ်အံၤတမ့ၢ်အကဲထီၣ်သးထဲလၢ(သုးက့ ၃)ဟီၣ်က၀ီၤပူၤ ဘၣ်ဒီးမ့မ့ၢ်တခီလၢ...
လၢၢ်ဒိၣ်ဟီၣ်က၀ီၤကမျၢၢ်တဖၣ်လိၣ်ဘၣ်ဆူၣ်ချ့ႇကူၣ်သ့ဒီးအီၣ်အီအိၣ်ဆိးလီၢ်ကျဲတၢ်ဆီၣ်ထွဲမၤစၢၤ
လါအီကူး ၁၇ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)ဟီၣ်က၀ီၤ လၢၢ်ဒိၣ်ကီၢ်ဆၣ်အပူၤ ခီဖျိပယီၤသုးအတၢ် မၤကမၣ် ၦၤဂ့ၢ်၀ီခွဲးယၤဒီးခိၣ်ဃၢၤန့ဆၢၣ်မူခိၣ်ကလံၤသီၣ်ဂီၤတၢ်အိၣ်သးတဖၣ်အဃိ လီၢ်က၀ီၤကမျၢၢ်တဖၣ်အံၤလိၣ်ဘၣ်၀ဲ ဆူၣ်ချ့ႇ ကူၣ်သ့ဒီးအီၣ်အီအိၣ်ဆိးလီၢ်ကျဲတၢ်ဆီၣ်ထွဲမၤစၢၤတဖၣ်အဂ့ၢ်န့ၣ် ကညီဂ့ၢ်ဂီၢ်အူတၢ်တိစၢၤမၤစၢၤကရူၢ်ကမံးတံာ် ထုးထီၣ်ပာ်ဖျါ၀ဲဖဲမဟါလါအီကူး ၁၆ သီအနံၤန့ၣ်လီၤႉ လၢလၢၢ်ဒိၣ်ကီၢ်ဆၣ်အပူၤသုးမီၤစိရိၤကဘီယူၤဟဲခးလီၤတၢ်ဒီးဖီၣ်သူ၀ဲဒၣ်ကမျၢၢ်တဖၣ်ဒ်တၢ်ဒီသဒၢစုက၀ဲၤတခါ အသိး တကးဒံးဘၣ်တကီၢ်ခါခဲအံၤခီဖျိတၢ်စူၤအဃိကျဲဟးဂီၤႇပနံာ်တၢ်ဖိတၢ်လံၤစ့ၢ်ကီးအၦ့ၤဒိၣ်ထီၣ်ကွ့ၢ်ကွ့ၢ်အဃိ လီၢ်က၀ီၤကမျၢၢ်တဖၣ်အံၤတဖံးဘၣ်တၢ်တမၤဘၣ်လၢၤဘၣ်ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် ကညီဂ့ၢ်ဂီၢ်အူတၢ်တိစၢၤ မၤစၢၤကမံးတံာ် အလံာ်တၢ်ပာ်ဖျါအပူၤစံး၀ဲန့ၣ်လီၤႉ စးထီၣ်လါမ့ၤတုၤလၢလါအီကူး ၁၅ သီအနံၤ ကဘီယူၤဟဲခးလီၤတၢ်လၢလၢၢ်ဒိၣ်ကီၢ်ဆၣ်ပူၤအိၣ်(၃၃)ဘျီညါဒီး ပယီၤသုးခးလီၤကျိဖးဒိၣ်ဆူသ၀ီပူၤကအိၣ်အဖျၢၣ်(၄၀၀)ဃၣ်ဃၣ်ညါန့ၣ်လီၤႉခီဖျိပယီၤသုးအတၢ်ဖံးတၢ်မၤအံၤဒ်အံၤအဃိကမျၢၢ်အဟံၣ်အဃီဟးဂီၤ၀ဲအဖျၢၣ်(၂၀)ဃၣ်ဃၣ်ညါအသိးကမျၢၢ်သံ၀ဲ(၆)ဂၤႇဘၣ်ဒိ(၁၃)ဂၤဒီးလၢၦၤသံၦၤဘၣ်ဒိဘၣ်ထံးတဖၣ်အကျါပၣ်ဃုာ်၀ဲၦၤကၠိဖိ(၄)ဂၤဒီးဘၣ်ဒိ၀ဲ(၃)ဂၤအဂ့ၢ်န့ၣ် ကညီဂ့ၢ်ဂီၢ်အူတၢ်တိစၢၤမၤစၢၤကမံးတံာ် ထုးထီၣ်ပာ်ဖျါ ၀ဲန့ၣ်လီၤႉ လၢန့ၣ်အမဲာ်ညါပယီၤသုးဖီၣ်၀ဲဒၣ်ကမျၢၢ်(၁၈)ဂၤႇဖီၣ်မၤဆါမၤယွဲမၤသံကွံာ်၀ဲ(၂)ဂၤဒီးဒွဲၣ်အူအီၣ်သမူ၀ဲ(၃)ဂၤန့ၣ်လီၤႉ တကးဒံးဘၣ်အမဲာ်ညါဒွဲၣ်အူအီၣ်၀ဲကမျၢၢ်အဟံၣ်အဖျၢၣ်(၂၀)ဒီးဟံကွံာ်၀ဲဒၣ်ကမျၢၢ်တၢ်ဖိတၢ်လံၤသ့ၣ်တဖၣ်စ့ၢ်ကီး အဂ့ၢ်န့ၣ် လံာ်တၢ်ပာ်ဖျါပူၤစံး၀ဲန့ၣ်လီၤႉ ဒ်ကညီဂ့ၢ်ဂီၢ်အူတၢ်တိစၢၤမၤစၢၤကမံးတံာ်ထုးထီၣ်ပာ်ဖျါ၀ဲအသိးန့ၣ်ခီဖျိပယီၤသုးခးလီၤကျိဖးဒိၣ်ဒီးဒွဲၣ်အူအီၣ် ၦၤဟံၣ်ၦၤဃီအဃိလၢၢ်ဒိၣ်ကီၢ်ဆၣ်ပူၤသ၀ီအဖျၢၣ်(၁၀)ကမျၢၢ်ဘၣ်ဃ့ၢ်မှံဟးဖျိးအနီၣ်ဂံၢ်အိၣ်၀ဲ(၈၀၀၀)ဃၣ်ဃၣ် ညါအဂ့ၢ်န့ၣ် လံာ်တၢ်ပာ်ဖျါပူၤပာ်ဖျါ၀ဲန့ၣ်လီၤႉ ဒ်န့ၣ်အသိးခီဖျိခိၣ်ဃၢၤန့ဆၢၣ်မူခိၣ်ကလံၤသီၣ်ဂီၤတၢ်အိၣ်သးတၢ်စူၤထံဒိၣ်ထီၣ်အဃိသ၀ီ(၈)ဖျၢၣ် ဟံၣ်ခိၣ်(၆၄၂)ဖျၢၣ် ၦၤနီၣ်ဂံၢ်(၂၀၀၀)ဃၣ်ဃၣ် ဘၣ်သဂၢၢ်၀ဲဒီးထံဒိၣ်ဃိၣ်ယွၤအံၤန့ၣ်လီၤႉ တကးဒံးဘၣ်ခီဖျိတၢ်စူၤထံဒိၣ်ထီၣ်အဃိ တၢ်ပံးကွံာ်၀ဲကၠိ(၃)ဖျၢၣ် ၦၤကၠိဖိအဂၤ(၃၀၀)ဃၣ်ဃၣ်တၢ်ကီတၢ်ခဲအိၣ်လၢကလဲၤထီၣ်ကၠိအဂ့ၢ်န့ၣ် ကညီဂ့ၢ်ဂီၢ်အူ တၢ်တိစၢၤမၤစၢၤကမံးတံာ် အတၢ်မၤနီၣ်စရီအသိး သ့ၣ်ညါဘၣ်န့ၣ်လီၤႉ
ပယီၤသုးတၢ်သမံသမိးတြဲၤလၢအိၣ်ပလီ၀့ၢ်နု၁်လီၤတဖၣ် အိၣ်ခိးသမံသမိးတၢ်ဟဲအါထီၣ်
လါအီကူး ၁၇ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ်အပူၤ ပယီၤသုးတၢ်သမံသမိးတြဲၤလီၢ်လၢအိၣ်ပလီ၀့ၢ်နုာ်လီၤသ့ၣ်တဖၣ်အံၤ အိၣ်ခိးသမံသမိးတၢ်ဖိတၢ်လံၤလၢၦၤဟဲက့ၤတီၣ်၀ဲတဖၣ်ဟဲအါထီၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ် အအိၣ်န့ၣ်လီၤႉ လၢပလီ၀့ၢ်နုာ်လီၤကျဲသ့ၣ်တဖၣ်န့ၣ်ပယီၤသုးတၢ်သမံသမိးတြဲၤကအိၣ်လၢ(၇)ခါဃၣ်ဃၣ်ညါဒီးစှၤသီအတီၢ်ပူၤအံၤ ပယီၤသုးမၤအါထီၣ်တၢ်ဘံၣ်တၢ်ဘၢႇသမံသိးတၢ်ဖိတၢ်လံၤလၢကမျၢၢ်ဟဲက့ၤတီၣ်၀ဲသ့ၣ်တဖၣ်ဟဲအါထီၣ်၀ဲဒၣ် အဂ့ၢ်န့ၣ် လီၢ်က၀ီၤကမျၢၢ်လၢအလ့ၢ်ထီၣ်လ့ၢ်လိၤဖဲန့ၣ်တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“လၢညါန့ၣ်အ၀ဲသ့ၣ်မ့ဟဲထီၣ်လံန့ၣ်အပံးကွံာ်ကျဲခဲလၢာ်လီၤႉဖဲစှၤသီအတီၢ်ပူၤအံၤတၢ်ဒုးကဲထီၣ်လၢ ၀့ၢ်ပူၤ တအိၣ်လၢၤဘၣ်ဘျီအ၀ဲသ့ၣ်က့ၤအိးထီၣ်ကဒါကျဲအိၣ်ခိးသမံသမိးတၢ်လၢတြဲၤန့ၣ်မီၤနီၤႉအ၀ဲသ့ၣ်ထီၣ်သမံသမိးတၢ်ဖိတၢ်လံၤတုၤလၢသိလ့ၣ်ပူၤညါႉမ့၀ံၤတၢ်လၢအ၀ဲသ့ၣ်အဲၣ်ဒိးသံကွၢ်၀ဲန့ၣ်သံကွၢ်၀ဲလီၤႉတၢ်သမံသမိးတြဲၤလီၢ်တခါဒီးတခါန့ၣ်ၦၤသုးဖိလဲလဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤလီၢ်ခံလၢပလီ၀့ၢ်နုာ်လီၤကျဲသ့ၣ်တဖၣ်န့ၣ်ပယီၤသုးတၢ်သမံသမိးတြဲၤဟဲအါထီၣ်၀ဲဒီး တြဲၤသ့ၣ်တဖၣ်အံၤအိၣ်ခိးထၢအီၣ်စ့လၢကမျၢၢ်အအိၣ်တကးဒံးဘၣ်အမဲာ်ညါစးထီၣ်ဖဲတလါအံၤလါအီကူးထီၣ် တၢတနွံအခါန့ၣ်အ၀ဲသ့ၣ်ဟံပၢၢ်တုၤလၢကမျၢၢ်အတၢ်ဖိတၢ်လံၤညါအဂ့ၢ်န့ၣ် ပလီ၀့ၢ်ကမျၢၢ်လၢတအဲၣ်ဒိးပာ်ဖျါ အမံၤတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ၦၤဟဲက့ၤစိာ်ဟုသးမ့ပၣ်န့ၣ်ပယီၤသုးဟံ၀ဲလီၤႉနက့ၤတဲဆၢကဒါတသ့နီတမံၤဘၣ်ႉ သိဘူနါက့ဟံဃုာ်၀ဲ ခဲလၢာ်လီၤႉမ့၀ံၤဒ်အ၀ဲသ့ၣ်ဃ့နၤစ့အသိးန့ၣ်နဘၣ်ဟ့ၣ်လီၤလီၤႉနကလဲၤတရံးကျဲလၢအဂၤခီဒၢးယံၤတလၢအဃိ ပဘၣ်သူ၀ဲကျဲတဘိအံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးဖဲအပူၤကွံာ်လါယူၤလံ ၂၀ သီအနံၤစ့ၢ်ကီး တၢ်သမံသမိးတြဲၤတဖၣ်အကျါ ဖဲ(မီၤကၠီ)သ၀ီ တၢ်သမံသမိးတြဲၤန့ၣ် ပယီၤသုးတပျဲလီၢ်က၀ီၤကမျၢၢ်လ့ၢ်ထီၣ်လ့ၢ်လိၤလၢၤဘၣ်ကဲထီၣ်တ့ၢ်အသိးဒံးအဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲအသိးသ့ၣ်ညါဘၣ်န့ၣ်လီၤႉ လၢပလီကီၢ်ဆၣ်အပူၤတၢ်ဒုးကဲထီၣ်၀ဲလၢပယီၤသုးဒီးတၢ်ဒီသဒၢကမျၢၢ်သုးအဘၢၣ်စၢၤအိၣ်၀ဲခဲအံၤခဲအံၤဒီး ပယီၤသုးဆီလီၤကျိဖးဒိၣ်လၢသ၀ီပူၤခးလီၤတပျုာ်တပျီာ်ကျိဖးဒိၣ်အိၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ် အအိၣ်န့ၣ်လီၤႉ
ခီဖျိတၢ်ဒုးကဲထီၣ်ကဒါလၢ(ယွၤသ့ၣ်ကိ)သ၀ီပူၤအဃိ ၦၤသ၀ီဖိတဖၣ်ဘၣ်ဃ့ၢ်ထီၣ်ကဒီး
လါအီကူး ၁၇ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤ ကီးတရံးကီၢ်ဆၣ်အပူၤ ဖဲမဟါလါအီကူး ၁၆ သီ ဂီၤခီ ၈း၃၀ အဆၢကတီၢ် ပယီၤသုးလၢအိၣ်ဆီလီၤသးဖဲ အ့ရှါကျဲကပၤယွၤသ့ၣ်ကိသ၀ီပူၤ တဖၣ်အံၤဒီး တၢ်ပၢၢ်ဆၢသုးပာ်ဖှိၣ်အဘၢၣ်စၢၤတၢ်ဒုးကဲထီၣ်အဃိ ၦၤသ၀ီဖိတဖၣ်ဘၣ်ဃ့ၢ်ထီၣ်ကဒီး၀ဲအဂ့ၢ်န့ၣ် သ့ၣ်ညါဘၣ် န့ၣ်လီၤႉ ဖဲအပူၤကွံာ်လါအီကူး ၇ သီအခါ ပယီၤသုးလၢအနုာ်လီၤအိၣ်လၢ(ယွၤသ့ၣ်ကိ)သ၀ီပူၤတဖၣ်အံၤဒီး ကညီဒီကလု၁်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤတၢ်ဒုးကဲထီၣ်၀ဲခံဘျီညါဒီး လၢတၢ်န့ၣ်အဃိ ၦၤသ၀ီဖိတဖၣ်အိၣ်လၢသ၀ီပူၤတဘူၣ်လၢၤဘၣ်ဟးစံၣ်ပလဲာ်သးလၢတၢ်လီၢ်အဂၤအဂ့ၢ်န့ၣ် ယွၤသ့ၣ်ကိသ၀ီဖိတဖၣ် စံး၀ဲန့ၣ်လီၤႉ သ၀ီဖိလၢတအဲၣ်ဒိးပာ်ဖျါအမံၤတဂၤစံး၀ဲလၢ“ပယီၤသုးဟဲလၢသ၀ီပူၤအဃိတၢ်ပၢၢ်ဆၢသုးပာ်ဖှိၣ်ကရူၢ်လဲၤခးအ၀ဲသ့ၣ်ဘျီ ၦၤအိၣ်လၢသ၀ီပူၤတဘူၣ်လၢၤဘၣ်ႉၦၤနီၢ်ဒိၣ်ႇၦၤဖိသၣ်ၦၤသ၀ီဖိဟးစံၣ်ပလဲာ်သးခဲလၢာ်လီၤႉတၢ်ဒုးဖဲ(၇)သီန့ၣ်တဘျီဒီး ဖဲတနံၤအံၤလါအီကူး(၁၆)သီန့ၣ်တဘျီအိၣ်ခံဘျီမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်– ကညီတၢ်ကစီၣ် န့ၣ်လီၤႉ တၢ်စူၤခါအတီၢ်ပူၤခီဖျိၦၤသ၀ီဖိသ့ၣ်တဖၣ်အံၤဘၣ်ဟးစံၣ်အိၣ်လၢၦၢ်ပူၤအဃိလိၣ်ဘၣ်၀ဲဒၣ်တၢ်အိၣ်တၢ်ဆိးလီၢ်ကျဲဒီးတၢ်အီၣ်တၢ်အီသ့ၣ်တဖၣ်အဂ့ၢ်န့ၣ် ၦၤပိာ်မုၣ်လၢအဃ့ၢ်တၢ်ဒုးတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ၦၤစံၣ်ထီၣ်တဖၣ်အကျါန့ၣ်ၦၤဖိဒံဖိသၣ်ႇဖိသၣ်အီနုၢ်ပၣ်စ့ၢ်မီၤနီၤႉၦၤစံၣ်ထီၣ်တဖၣ်အံၤအကျါတနီၤန့ၣ် တၢ်အီၣ်တၢ်အီတပၣ်နီတမံၤဘၣ်ႉတၢ်စူၤခါအဃိနးတစဲးမီၤနီၤႉတၢ်ခိၣ်ဒုး(တၤလပၣ်)စ့ၢ်ကီးအံၣ်အဃိမုၢ်နၤခီန့ၣ် ၦၤဘၣ်ဆ့ၣ်နီၤအိၣ်တဂၤတဂၤဒ်န့ၣ်လီၤႉဘၣ်လၢတၢ်စူၤခါအကတီၢ်ၦၢ်ပူၤအံၤတၢ်ဖိဃၢ်လဲလဲလီၤႉမ့မ့ၢ်လၢတၢ်ကိၢ်ခါန့ၣ် နမံလၢသ့ၣ်ကဒုဖီလာ်သ့ဒံးမီၤနီၤႉဘၣ်ဆၣ်မ့မ့ၢ်လၢတၢ်စူၤခါအံၤဒုတဘၣ်ဂီၢ်နီတစဲးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲအပူၤကွံာ်(၂၀၂၂)လါဒံၣ်စ့ဘၢၣ်အခါစ့ၢ်ကီး လၢယွၤသ့ၣ်ကိသ၀ီအပူၤ ခီဖျိတၢ်ဒုးကဲထီၣ်၀ဲလၢပယီၤသုးဒီး တၢ်ပၢၢ်ဆၢသုးပာ်ဖှိၣ်ကရူၢ်အဘၢၣ်စၢၤအဃိ လီၢ်က၀ီၤသ၀ီဖိတဖၣ်အံၤဘၣ်ဃ့ၢ်ထီၣ်ဒံး၀ဲသ၀ီဒီတဖျၢၣ်ညါန့ၣ်လီၤႉ ဒ်န့ၣ်အသိးလၢကီးတရံးကီၢ်ဆၣ် နိၣ်လါႇတန့ၤမူၤႇကီၣ်မူႇကၠီၤစှၤကိႇယွၤသ့ၣ်ကိႇကီးနွဲၣ်ႇအီကြီႇယွၤသ့ၣ်ႇ ကမဲၤကိသ၀ီတကပၤန့ၣ်စ့ၢ်ကီးတၢ်ဒုးကဲထီၣ်၀ဲလၢပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် အဘၢၣ်စၢၤအိၣ်၀ဲတလီၢ်လီၢ်ဒီးခီဖျိပယီၤသုးက့ၤခးလီၤကဒါကျိဖးဒိၣ်အဃိဒူသ၀ီသ့ၣ်တဖၣ်အံၤ ကမျၢၢ်တနီၤအိၣ်လၢ သ၀ီပူၤတဘူၣ်လၢၤဘၣ်ဟးစံၣ်အိၣ်၀ဲလၢတၢ်လီၢ်အဂၤန့ၢ်ယံၤလံဘၣ်ဆၣ်တုၤလၢခဲအံၤအ၀ဲသ့ၣ်က့ၤအိၣ်လၢသ၀ီပူၤတဘူၣ်ဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ၦၤသ၀ီဖိလၢအဘၣ်ဃ့ၢ်တၢ်ဒုးသ့ၣ်တဖၣ်အံၤတနီၤန့ၣ်လဲၤစံၣ်အိၣ်လၢ၀့ၢ်ပူၤႇလဲၤစံၣ်အိၣ်လၢအဘူးအတံၢ်အသမူသကိးဟံၣ်လၢသ၀ီလၢအဂၤအိၣ်၀ဲအသိးတနီၤန့ၣ်လဲၤစံၣ်အိၣ်၀ဲလၢၦၢ်ပူၤစ့ၢ်ကီးအိၣ်၀ဲဒၣ်န့ၣ်လီၤႉတကီၢ်ခါခဲအံၤတၢ်ဖံးတၢ်မၤတအိၣ်ဘၣ်တကးဒံးဘၣ်အမဲာ်ညါခီဖျိအ၀ဲသ့ၣ်တဒိးန့ၢ်ဘၣ်တၢ်ဆီၣ်ထွဲမၤစၢၤကအိၣ်လၢအလါလံအဃိလိၣ်ဘၣ်၀ဲဒၣ်ဂံၢ်ခီၣ်ထံးတၢ်အီၣ်တၢ်အီတၢ်ဆီၣ်ထွဲမၤစၢၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ
(လဲၣ်ခၣ်တီၤ)တၢ်ဒုးအပူၤပယီၤသုးသံ(၁၅)ဂၤအကျါပၣ်ဃု၁်သုးခိၣ်ဒိၣ်ဖိ(၁)ဂၤအဂ့ၢ် ခီၤဘြၤသုးကျိၤ ထုးထီၣ်ပ၁်ဖျါ
လါအီကူး ၁၇ သီႇ၂၀၂၃ နံၣ်ႇ ခ့ၣ်အဲးစံၣ် ပယီၤသုးအံၤလၢကထီၣ်ဟံန့ၢ်က့ၤမၠၣ်၀တံၣ်ကပၤ(လဲၣ်ခၣ်တီၤ)သုးကလၢၤအံၤအဂီၢ် ဖဲလါအီကူး ၁၅ သီအနံၤ အ၀ဲသ့ၣ်ဟဲထီၣ်၀ဲဒီးဖဲခံခီခံကပၤတၢ်ဒုးကဲထီၣ်အတီၢ်ပူၤန့ၣ် ပယီၤသုးတကပၤသံ(၁၅)ဂၤအကျါ ပၣ်ဃုာ်၀ဲ သုးခိၣ်ဒိၣ်ဖိ(၁)ဂၤအဂ့ၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) ခီၤဘြၤသုးကျိၤ သုးဒ့(၃)ထုးထီၣ်ပာ်ဖျါ၀ဲ ဖဲမဟါလါအီကူး ၁၆ သီ အနံၤန့ၣ်လီၤႉ ဒ်ခီၤဘြၤသုးကျိၤထုးထီၣ်ပာ်ဖျါ၀ဲအသိးန့ၣ်စးထီၣ်ဖဲလါအီကူး ၁၅ သီ ဂီၤခီ ၃ နၣ်ရံၣ်အဆၢကတီၢ်န့ၣ် ပယီၤသုးခးလီၤ ကျိဖးဒိၣ်ဆူခီၤဘြၤသုးကျိၤသုးပာ်ဖှိၣ်ဟူးဂဲၤအလီၢ်(လဲၣ်ခၣ်တီၤ)အခိၣ်အဃၢၤန့ၣ်ဒီးဖဲအ၀ဲသ့ၣ်သုးကျိၤနုာ်လီၤအခါ တၢ်ဒုးကဲထီၣ်အဃိ ပယီၤသုးတကပၤသံ(၁၅)ဂၤအကျါ ပၣ်ဃုာ်၀ဲ သုးခိၣ်ဒိၣ်ဖိ(၁)ဂၤႇသုးခိၣ်စိ(၁)ဂၤဒီး ဘၣ်ဒိ၀ဲခဲလၢာ် (၂၁)ဂၤအဂ့ၢ်န့ၣ် လံာ်တၢ်ပာ်ဖျါပူၤပာ်ဖျါ၀ဲန့ၣ်လီၤႉ လၢန့ၣ်အမဲာ်ညါတၢ်မၤန့ၢ်ပယီၤသုးအကျိချံၦာ်သၣ်တဖၣ်လၢအမ့ၢ်(60mm)ခီၣ်မဲဒိၣ်ပျီ တခိၣ်ႇ (MAsniper)တခိၣ်ႇ (MA4)ခံခိၣ်ႇ (MA3)သၢခိၣ်ႇ (MA2)လွံၢ်ခိၣ်ႇ (MA1)တခိၣ်ႇ (M16)တခိၣ်ႇ (MA)ကျိချံဒၢ ၅၃ ခါႇ (MA2)ကျိဒၢ လွံၢ်ခါႇ (M16)ကျိချံဒၢ ခံခါႇ (5.56)အချံ ၅၂၀၀ ဖျၢၣ်ႇ (7.62NATO)အချံ ၂၆၅၀ ဖျၢၣ်ႇ (MAsniper)အချံဒၢ တခါႇ (60mm)မ့ၣ်ပိၢ် ၃၆ ဖျၢၣ်ႇ (RPG)မ့ၣ်ပိၢ်...