ကီၢ်ဆၣ်ခဲလၢ၁်ပ၁်ဖှိၣ်ထီၣ်သးမၤလၤကပီၤ၀ဲ(KYO)မုၢ်နံၤၦဲၤထီၣ် ၃၄ ၀ီတ၀ီလၢဘျံးဒ၀ဲၢ်ကီၢ်ရ့ၣ်၀ဲၤလီၢ်ခိၣ်သ့ၣ်
လါမ့ၤ ၂၄ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲမဟါလါမ့ၤ ၂၃ သီအနံၤလၢအလီၤဘၣ်၀ဲကညီသးစၢ်ကရၢ(KYO)မုၢ်နံၤၦဲၤထီၣ် ၃၄ ၀ီတ၀ီအံၤ ကီၢ်ရ့ၣ်(KYO)သးစၢ်တီခိၣ်ရိၣ်မဲဒီးကီၢ်ဆၣ်ခဲလၢာ်ပာ်ဖှိၣ်မၤလၤကပီၤ၀ဲမုၢ်နံၤအံၤဖဲခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ်၀ဲၤလီၢ်ခိၣ်သ့ၣ်တၢ်လီၢ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢဘျံးဒ၀ဲၢ်ကီၢ်ရ့ၣ် ကီၢ်ဆၣ်သ့ၣ်တဖၣ်အပူၤန့ၣ် ခီဖျိဟီၣ်က၀ီၤတၢ်အိၣ်သးတဂၢၢ်တကျၢၤဒီးတၢ်ဘံၣ်တၢ်ဘၢ တၢ်အိၣ်သးအဃိတၢ်တမၤလၤကပီၤဘၣ်၀ဲမုၢ်နံၤအံၤလၢကီၢ်ဆၣ်ခဲလၢာ်အပူၤဘၣ်ႇဘၣ်ပာ်ဖှိၣ်မၤလၤကပီၤ၀ဲဒ်အံၤလီၤဒီးတနံၤအံၤမ့ၢ်မုၢ်နံၤအရ့ဒိၣ်လၢၦၤသးစၢ်တဖၣ်အဂီၢ်အဃိဘၣ်တၢ်မၤကလၤကပီၤ၀ဲဒ်အံၤလီၤအဂ့ၢ်န့ၣ် ဘျံးဒ၀ဲၢ်ကီၢ်ရ့ၣ် (KYO)နဲၣ်ရွဲၣ် စီၤအဲၣ်ထံကီၢ်စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ပ၀ဲကညီသးစၢ်သ့ၣ်တဖၣ်န့ၣ်အလီၢ်အိၣ်၀ဲဒၣ်လၢပကဘၣ်အိၣ်၀ဲဒၣ်ဒီးတၢ်ဆိမိၣ်ဆိမးလၢမိၢ်ပၢ်ခိၣ်နၢ်သရၣ်သမါထံဖိကီၢ်ဖိကမျၢၢ်နာ်န့ၢ်ၦၤကသ့အဂီၢ်လီၤႉပကဘၣ်သ့ၣ်ညါလီၤပသးလၢပမ့ၢ်ၦၤသးစၢ်ႉခိၣ်နၢ်သ့ၣ်တဖၣ်မုၢ်လၢ်တၢ်လၢပ၀ဲၦၤသးစၢ်တဖၣ်အအိၣ်ႉ၀ံၤဒီးပတၢ်ကရၢကရိပထံလီၢ်ကီၢ်ပူၤထံရူၢ်ကီၢ်သဲးအတၢ်လဲၤကျဲအဂီၢ်န့ၣ်ဒိးသန့ၤထီၣ်အသးစ့ၢ်ကီးလၢပ၀ဲကညီသးစၢ်တဖၣ်အတၢ်ဂုာ်ကျဲးစၢးအဖီခိၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်မၤ၀ဲကညီသးစၢ်ကရၢမုၢ်နံၤဘျီ၀ဲအံၤအပူၤန့ၣ် ဘျံးဒ၀ဲၢ်ကီၢ်ရ့ၣ်ခိၣ် ပဒိၣ်စီၤဖျိးစိ၀့ဒီး(သုးက့ ၁)ဒုးယၤခိၣ် သုးခိၣ်ဒိၣ်ဖိ စီၤဖိခၠ့ၣ် ဃုာ်ဒီးကညီသူၣ်ဘီၣ်သးစၢ်အဂၤ(၃၀၀)ဘျဲၣ်ဟဲထီၣ်၀ဲတၢ်ရဲၣ်တၢ်ကျဲၤအံၤဒီး လၢတၢ်ရဲၣ်တၢ်ကျဲၤမူးအပူၤ ခိၣ်နၢ်တဖၣ်စံးကတိၤလီၤ၀ဲတၢ်ဒီးတၢ်ဖးဖျါထီၣ်၀ဲ(KYO)လီၢ်ခၢၣ်သးအလံာ်ဟ့ၣ်ယုၢ်အံၤန့ၣ်လီၤႉ သုးဂ့ၢ်၀ီခိၣ်စီၤဖိခၠ့ၣ် စံး၀ဲလၢ“လၢပတၢ်ကရၢကရိတၢ်မၤအပူၤန့ၣ်အလီၢ်အိၣ်၀ဲဒၣ်လၢကဘၣ်ဟံးထီၣ်ဖီၣ်ထီၣ် တၢ်မၤဒ်ခ့ၣ်အဲၣ်ယူၣ်ကရၢမိၢ်ၦၢ်ပာ်လီၤန့ၢ်ၦၤအသိးဒီးဒ်ပမ့ၢ်ၦၤသးစၢ်တဖၣ်အသိးပကအိၣ်ဒီးတၢ်ကွၢ်စိလၢအထီပာ်လီၤဖီတၢၣ််လၢအဂ့ၤႇပကဘၣ်မ့ၢ်ၦၤလၢအဟ့ၣ်လီၤအသးလၢတၢ်ပၢၢ်ဆၢတၢ်မၤအပူၤႇဒ်သိးပကဒိးန့ၢ်ကဒါက့ၤပထံပကီၢ်အဂီၢ်န့ၣ်ပကတူၢ်ဆါခီၣ်ဆါပသးနုာ်လီၤလၢစုက၀ဲၤတၢ်ဂဲာ်လိာ်အပူၤအဂ့ၢ်န့ၣ်” စံးလီၤ၀ဲလၢမူးတၢ်ရဲၣ်တၢ်ကျဲၤ အပူၤန့ၣ်လီၤႉ ဒ်န့ၣ်အသိးဘျံးဒ၀ဲၢ်ကီၢ်ရ့ၣ်ခိၣ် ပဒိၣ်စီၤဖျိးစိ၀့စ့ၢ်ကီးစံး၀ဲလၢ ကညီသးစၢ်တဖၣ်ကဘၣ်ဒီသဒၢလီၤက့ၤ၀ဲ ပတၢ်ကရၢကရိႇကဘၣ်ဂဲၤလိာ်သကိးမၤတၢ်လၢကညီတၢ်ပၢၢ်ဆၢတၢ်မၤအပူၤဒီးကသူၣ်ထီၣ်တၢ်အဲၣ်တၢ်ကွံအိၣ်ဃူအိၣ်ဖိးလိာ်သးဒီးကဘၣ်သူၣ်ထီၣ်၀ဲဒၣ်သကဲးပ၀းလၢအဂ့ၤလၢအကဲထီၣ်ဒိဂ့ၤတဲာ်ဘၣ်လၢကလုာ်အဂၤတဖၣ်အမဲာ်ညါအဂ့ၢ်န့ၣ် စံးလီၤ၀ဲလၢတၢ်ရဲၣ်တၢ်ကျဲၤမူးအပူၤန့ၣ်လီၤႉ အပူၤကွံာ်တချုးသုးဟံးန့ၢ်တၢ်စိတၢ်ကမီၤဒံးဘၣ်အခါန့ၣ်ကညီသးစၢ်မုၢ်နံၤအံၤတၢ်မၤလၤကပီၤအီၤလၢကီၢ်ဆၣ်ႇကီၢ်ရ့ၣ်တဖၣ်အပူၤဒိၣ်ဒိၣ်မုၢ်မုၢ်ဒီးဘၣ်ဆၣ်သုးဟံးန့ၢ်တၢ်စိတၢ်ကမီၤ၀ံၤလီၢ်ခံခီဖျိတၢ်ဒုးက့ၤကဲထီၣ်ကဒါလၢဟီၣ်က၀ီၤအပူၤအဃိ တၢ်တမၤဘၣ်၀ဲမုၢ်နံၤအံၤလၢၤဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ကညီသးစၢ်ကရၢ(KYO)အံၤဘၣ်တၢ်ဒုးအိၣ်ထီၣ်အီၤဖဲ(၁၉၄၆)နံၣ်အခါဒီးကရၢအံၤဘၣ်တၢ်ဒုးအိၣ်ထီၣ်အီၤလၢကညီခိၣ်နၢ်သ့ၣ်တဖၣ်လၢအမ့ၢ် မါဘးခဲၣ်ႇ မါ၀့မီၤႇ မါကၠီၤစ့ၤသ့ၣ်တဖၣ်အံၤဒီး ဘၣ်ဆၣ်ခီဖျိတၢ်နၢ်ပၢၢ်ကမၣ်လိာ်သးဟဲအိၣ်ထီၣ်၀ဲ လၢကရၢပူၤအဃိကရၢအတၢ်ဟူးတၢ်ဂဲၤဘၣ်ဆိကတီၢ်ကွံာ်အသးန့ၣ်လီၤႉဖဲန့ၣ်၀ံၤလီၢ်ခံဒ်သိးကရၢအံၤကကဲထီၣ်တၢ်တိစၢၤမၤစၢၤလၢ(ခ့ၣ်အဲၣ်ယူၣ်)အဂီၢ်ဒီးကဒုးအိၣ်ဖျဲၣ်ထီၣ်ကညီစၢၤသွဲၣ်သီသးစၢ်ခိၣ်နၢ်သ့ၣ်တဖၣ်ကန့ၢ်အဂီၢ်န့ၣ် ဘၣ်တၢ်က့ၤဒုးအိၣ်ထီၣ်ကဒါက့ၤကရၢအံၤခံဘျီတဘျီဖဲ(၁၉၈၉)နံၣ် လၢခ့ၣ်အဲၣ်ယူၣ်၀ဲၤလီၢ်ခိၣ်သ့ၣ်လီၢ်လံၤ မၤနၢၤပျီတၢ်လီၢ်န့ၣ်လီၤႉ
ပယီၤသုးခးလီၤကျိးဖးဒိၣ်အဃိ မ့ၣ်အူအီၣ်ကီးတရံး(ကမဲၤကိ)သ၀ီပူၤကျးဆါတၢ်တဖျၢၣ်
လါမ့ၤ ၂၄ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ်အပူၤ ဖဲလါမ့ၤ ၂၂ သီ ဟါခီ ၇း၃၀ ဃၣ်ဃၣ် အဆၢကတီၢ်န့ၣ် ခီဖျိကီးတရံးပယီၤသုးခးလီၤကျိဖးဒိၣ်ဆူ(ကမဲၤကိ)သ၀ီပူၤအဃိ မ့ၣ်အူအီၣ်၀ဲကျးဆါတၢ်တဖျၢၣ် အဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤႉ ကမဲၤကိသ၀ီဖိလၢတအဲၣ်ဒိးပာ်ဖျါအမံၤတဂၤစံး၀ဲလၢ“ကျိဖးဒိၣ်လီၤတဲာ်တစှၤဘၣ်ဖဲမနၤန့ၣ်ႉတဂီၤညါအံၤဟဲဒံးတဖျၢၣ်ဒံးလၢမုဂါသ၀ီအံၤႉမ့ၣ်အူအီၣ်ကျးန့ၣ်ကဘၣ်ဖဲ(၇း၃၀)အခါန့ၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲလါမ့ၤ ၂၃ သီ အနံၤန့ၣ်လီၤႉ ကျးလၢမ့ၣ်အူအီၣ်အီၤတဖျၢၣ်န့ၣ်မ့ၢ်ကျးလီၢ်လံၤတဖျၢၣ်လၢအပံာ်ဃာ်သးခီဖျိအပူၤကွံာ်ခီဖျိတၢ်ဒုးကဲထီၣ်လၢပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤအဃိအဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ “စဲၢ်(ကျး)လၢအအူအီၣ်တဖျၢၣ်န့ၣ်အပံးဃာ်သးယံၤလံႉဖဲအပူၤကွံာ်တၢ်ဒုးကဲထီၣ်အခါန့ၣ်အပံးဃာ်၀ဲႉတၢ်ဖိတၢ်လံၤလၢကျးပူၤန့ၣ်တအိၣ်အါအါလၢၤဘၣ်ႉအိၣ်၀ဲဒၣ်လၢဟံၣ်ပူၤဃီပူၤတၢ်ဖိတၢ်လံၤတစဲးတမွဲးဒ်န့ၣ်လီၤႉမ့ၣ်အူအီၣ်တၢ်န့ၣ်လၢကမဲၤကိသီခါဖၠၣ် ကၠိကပၤန့ၣ်မီၤနီၤႇဖဲအကပိၤကပၤန့ၣ်ၦၤတအိၣ်နီတဂၤဘၣ်”အဂ့ၢ်န့ၣ် စံး၀ဲန့ၣ်လီၤႉ ဖဲအပူၤကွံာ်လါမ့ၤ ၁၃ သီဒီး ၁၄ သီအခါန့ၣ် ပယီၤသုးနုာ်လီၤမၤဟးဂီၤကွံာ်ကီးတရံးဒီးနိၣ်တကီကျဲႇ ကၠဲးဒိကျဲဒီး တီၤကၠၤအ့ကျဲသ့ၣ်တဖၣ်အံၤလၢဘူၣ်ဒိၣ်စၣ်သိလ့ၣ်၀ံၤလီၢ်ခံ ပယီၤသုးအံၤစးထီၣ်ခးလီၤကျိဖးဒိၣ်လၢသ၀ီပူၤကိးမုၢ်နံၤဒဲး အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ဒ်န့ၣ်အသိးလၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၇)ဟီၣ်က၀ီၤ ကလံၤစိးဒူသ၀ီတဖၣ်အပူၤစ့ၢ်ကီး စးထီၣ်ဖဲအပူၤကွံာ်လါအ့ဖြ့ၣ်တုၤလၢတလါအံၤလါမ့ၤန့ၣ် ပယီၤသုးခးလီၤကျိဖးဒိၣ်အဃိ လီၢ်က၀ီၤကမျၢၢ်အဟံၣ်အဃီ ဟးဂူာ်ဟးဂီၤဟဲအါထီၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ကၠဲၣ်ထိၤကီၢ်ဆၣ်ပူၤ ပယီၤသုးမၤဟးဂီၤကျဲအိၣ်(၄)ဘိလံ
လါမ့ၤ ၂၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၁)ဟီၣ်က၀ီၤအပူၤ ဒူသထူၣ်ကီၢ်ရ့ၣ် ကၠဲၣ်ထိၤကီၢ်ဆၣ်အပူၤ စးထီၣ်လါမ့ၤ ၁၉ သီတုၤလၢ ၂၁ သီအနံၤ ပယီၤသုးမၤဟးဂီၤကျဲလၢသ၀ီတဖၣ်အပူၤအိၣ်(၄)ဘိလံအဂ့ၢ်န့ၣ် ကမျၢၢ်အိၣ်ကၠဲၣ်ထိၤ၀့ၢ်ပူၤတဖၣ်စံး၀ဲန့ၣ်လီၤႉ ဖဲလါမ့ၤ ၁၉ သီ ဟါခီအဆၢကတီၢ် ပယီၤသုးနုာ်လီၤမၤဟးဂီၤကွံာ်၀ဲ(ကင်မွန်းချောင်း-ဆောင်နိုင်ကြီး)ကျဲအံၤ လၢစဲးခူၣ်ဟီၣ်ထီၣ်ဟီၣ်ခိၣ်၀ံၤလီၢ်ခံ ဖဲလါမ့ၤ ၂၀ သီအနံၤစ့ၢ်ကီး မၤဟးဂီမကဒီး၀ဲ(ကၠဲၣ်ထိၤ–ကင်းမွန်း)ပယီၤသုးကလၢၤ ကျဲအံၤဆူ ၀င်းကလော, တံတားချာင်းႇ ဆောင်နိုင်ကြီး သ၀ီကျဲမုၢ်လၢၦၤလ့ၢ်ထီၣ်လ့ၢ်လိၤသ့၀ဲတဖၣ်အဂ့ၢ်န့ၣ် ဟီၣ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်စံး၀ဲန့ၣ်လီၤႉ ဒ်န့ၣ်အသိးဖဲလါမ့ၤ ၂၁ သီ ဟါခီအဆၢကတီၢ်စ့ၢ်ကီး ပယီၤသုးမၤဟးဂီၤကဒီး၀ဲ(လက်ပံ)ကျဲဒီး(သစ်ကွင်း)ကျဲ သ့ၣ်တဖၣ်အံၤန့ၣ်လီၤႉတကီၢ်ခါခဲအံၤကၠဲၣ်ထိၤကီၢ်ဆၣ်အပူၤပယီၤသုးမၤဟးဂီၤကျဲခဲလၢာ်အိၣ်၀ဲ(၄)ဘိလံအဂ့ၢ်န့ၣ် လီၢ်က၀ီၤကမျၢၢ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ကျဲလၢလီၢ်က၀ီၤကမျၢၢ်သူညီနုၢ်လ့ၢ်ထီၣ်လ့ၢ်လိၤ၀ဲတဖၣ်အံၤဖျိပယီၤသုးမၤဟးဂီၤကွံာ်၀ဲအဃိ တၢ်ကီတၢ်ခဲအိၣ်ထီၣ်လၢတၢ်ဟးထီၣ်က့ၤလီၤအဂ့ၢ်န့ၣ် ကမျၢၢ်အိၣ်ကၠဲၣ်ထိၤ၀့ၢ်ပူၤတဖၣ်စံး၀ဲန့ၣ်လီၤႉ ဒ်န့ၣ်အသိးလၢခ့ၣ်အဲၣ်ယူၣ်(သုးက့ ၆)တၢ်ပၢဟီၣ်က၀ီၤ ဒူပျာ်ယာ်ကီၢ်ရ့ၣ်အပူၤစ့ၢ်ကီး ဖဲလါမ့ၤ ၁၃ သီအခါန့ၣ် ပယီၤသုးမၤဟးဂီၤ၀ဲကီးတရံးကျဲနုာ်လီၤ ကၠဲးဒိကျဲႇကမဲၤကိကျဲႇဖံ၀ါဖၠၣ်ကျဲသ့ၣ်တဖၣ်အံၤအသိး ဖဲလါမ့ၤ ၁၄ သီ အနံၤစ့ၢ်ကီးမၤဟးဂီၤကဒီး၀ဲတီၤကၠၤအ့ကျဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ခီဖျိပယီၤသုးမၤဟးဂီၤကွံာ်ကျဲသ့ၣ်တဖၣ်ဒ်အံၤအဃိဒူပျာ်ယာ်ကီၢ်ရ့ၣ်ပူၤလီၢ်က၀ီၤကမျၢၢ်လၢအမၤတၢ်ဆါတၢ်ၦ့ၤဒီး ၦၤလၢအဟးထီၣ်က့ၤလီၤလၢဆူၣ်ချ့တၢ်ဂ့ၢ်တၢ်ကျိၤသ့ၣ်တဖၣ်အံၤထံၣ်ဘၣ်၀ဲတၢ်ကီတၢ်ခဲအသိးခါလၢကဟဲတၢ်စူၤခါအံၤဟးထီၣ်က့ၤလီၤဖံးအီၣ်မၤအီၣ်ကကီခဲထီၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ
ပယီၤသုးခးလီၤကျိဖးဒိၣ်အဃိသၣ်တီၣ်၀့ၢ်ပူၤတၢ်ဘါယွၤသရိ၁်တၢ်သူၣ်ထီၣ်ဟးဂီၤ
လါမ့ၤ ၂၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် သၣ်တီၣ်၀့ၢ်ပူၤ ဖဲလါမ့ၤ ၂၁ သီအနံၤ ခီဖျိပယီၤသုးခးလီၤကျိးဖဒိၣ်လၢ(၁၃)မဲၤပူၤအဃိ က၀ီၤဒ့(၃) Sunday School တၢ်ဘါယွၤသရိာ်တၢ်သူၣ်ထီၣ်ကပၤဟးဂီၤ၀ဲဒီး တၢ်သူၣ်ထီၣ်အခိၣ်ဒုးလီၤၦီၢ်၀ဲအဂ့ၢ်န့ၣ် သ့ၣ်ညါဘၣ်လၢကမျၢၢ်အိၣ်သၣ်တီၣ်၀့ၢ်ပူၤတဖၣ်အအိၣ်န့ၣ်လီၤႉ ဖဲလါမ့ၤ ၂၁ သီ ဂီၤခီ ၉ နၣ်ရံၣ်ဃၣ်ဃၣ်အဆၢကတီၢ်န့ၣ် ပယီၤသုးခးလီၤကျိဖးဒိၣ်လၢသၣ်တီၣ်၀့ၢ်ပူၤ(၄)ဖျၢၣ် လၢတၢ်ဂ့ၢ်တအိၣ်နီတမံၤဘၣ်ဒီးဖဲန့ၣ်အကျါလီၤတဲာ်ပိၢ်ဖးထီၣ်လၢကျီးပူၤ(၂)ဖျၢၣ်ႇမ့မ့ၢ်အ၀ဲ(၂)ဖျၢၣ်န့ၣ်လီၤတဲာ်ပိၢ်ဖးထီၣ်လၢ(Sunday School)တၢ်ဘါယွၤသရိာ်ဘၣ်ဆၣ်ခီဖျိၦၤလဲၤဘါယွၤတအိၣ်နီတဂၤဘၣ်အဃိ ၦၤဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် လီၢ်က၀ီၤကမျၢၢ်ပိာ်မုၣ်တဂၤ စံး၀ဲန့ၣ်လီၤႉ အ၀ဲစံး၀ဲလၢ“တၢ်ဖိသၣ်လဲၤထီၣ်(Sunday School)လီၢ်တခါန့ၣ်အိၣ်လၢတၢ်ဘါယွၤသရိာ်ဖးဒိၣ်ဖီလာ်မီၤနီၤႉ မုၢ်နွံနံၤအိၣ်ဘှံးနံၤကိးနွံဒဲးစးထီၣ်ဂီၤခီ ၇း၃၀ တုၤလၢ ၈း၃၀ န့ၣ်ၦၤဖိသၣ်ဟဲထီၣ်မၤလိတၢ်မီၤနီၤႉ အိၣ်ဘှံးန့ၣ်တၢ်မၤလိအံၤအါဒၣ်တက့ၢ်ၦၤဖိသၣ်(၁၆)နံၣ်ဆူဖီလာ်သ့ၣ်တဖၣ်ဟဲထီၣ်၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ခီဖျိပယီၤသုးခးလီၤကျိဖးဒိၣ်အဃိၦၤဘၣ်ဒိဘၣ်ထံးတအိၣ်၀ဲဘၣ်ဆၣ်လီၢ်က၀ီၤကမျၢၢ်တဖၣ်ပျံၤတၢ်ဖုးတၢ်အဂ့ၢ်န့ၣ် လီၢ်က၀ီၤကမျၢၢ်ပိာ်မုၣ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ဖဲအပူၤကွံာ်လါမ့ၤ ၁၉ သီ ဂီၤခီအဆၢကတီၢ်စ့ၢ်ကီး ပယီၤသုးကလၢၤလၢအိၣ်သၣ်တီၣ်၀့ၢ်ပူၤတဖၣ်အံၤ အၦၤအဂၤ(၂၀)ဃၣ်ဃၣ်ဖီၣ်၀ဲသၣ်တီၣ်၀့ၢ်ပူၤကမျၢၢ်(၇)ဂၤဒီးဖဲန့ၣ်ခီဖျိသၣ်တီၣ်၀့ၢ်ပူၤသရၣ်ဒိၣ်ၦၤဘၣ်မူဘၣ်ဒါလဲၤထိၣ်ဃူထိၣ်ဖိးတဲသကိးတၢ်အဃိဖဲတၢ်တနံၤဃီ၀ဲန့ၣ်ဟါခီ ၇ နၣ်ရံၣ်အဆၢကတီၢ်န့ၣ် ပယီၤသုးပျၢ်လီၤက့ၤ၀ဲကမျၢၢ်သ့ၣ်တဖၣ်အံၤအဂ့ၢ်န့ၣ် သ့ၣ်ညါဘၣ်လၢကမျၢၢ်အိၣ်၀့ၢ်ပူၤတဖၣ်အအိၣ်န့ၣ်လီၤႉ
ခီဖျိသဲးဘီၣ်အၦ့ၤတအိၣ်ဘၣ်အဃိၦၤၦ့ၤဆါသဲးသၣ်တဖၣ်အိၣ်ဘှံးတဟးၦ့ၤ၀ဲလၢၤဘၣ်
လါမ့ၤ ၂၂ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကီးတရံးကီၢ်ဆၣ်အပူၤ တနံၣ်အံၤခီဖျိသဲးဘီၣ်အၦ့ၤတအိၣ်ဘၣ်အဃိ ဟီၣ်က၀ီၤပူၤ ၦၤၦ့ၤဆါသဲးဘီၣ်ဖိသ့ၣ်တဖၣ်အံၤအိၣ်ဘှံးတဟးၦ့ၤသဲးသၣ်လၢၤဘၣ်အဂ့ၢ်န့ၣ် ၦၤၦ့ၤဆါတၢ်ဖိတဖၣ်စံး၀ဲန့ၣ်လီၤႉ ဖဲမဟိန့ၣ်ခီဖျိသဲဘီၣ်အၦ့ၤဂ့ၤအဃိၦၤဟးၦ့ၤသဲးဘီၣ်အါမးဘၣ်ဆၣ်တနံၣ်အံၤခီဖျိသဲးဘီၣ်အၦ့ၤတအိၣ်ဘၣ်အဃိ ၦၤၦ့ၤတၢ်ဖိတအိၣ်အါအါလၢၤဘၣ်လီၤစှၤ၀ဲအဂ့ၢ်န့ၣ် ၦၤၦ့ၤဆါသဲးသၣ်လၢဟီၣ်က၀ီၤပူၤတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“လၢညါန့ၣ်ၦၤဟးၦ့ၤသဲးဘီၣ်အိၣ်ဒီဒူၣ်ညါႉအၦ့ၤနါက့ဂ့ၤစ့ၢ်ႉပၦ့ၤန့ၢ်သဲးဘီၣ်ဖဲအံၤအဖျၢၣ်တကယၤန့ၣ်(၂၀၀၀)ကၠးႉၦၤထီၣ်ဒဲးသဲးသၣ်အလဲန့ၣ်(၅၀၀)ကၠးမီၤနီၤႉပက့ၤဆါကဒါန့ၣ်တကံလိ(၁၇)ဘးႉၦၤတၢၤကွံာ်ပၠးနတၢ်နဒွးတကဲးလၢၤဘၣ်ႉၦၤဟးၦ့ၤသဲးသၣ်ဖိအိၣ်ဘှံးဒီဒူၣ်လံႉယၤနါက့ယအိၣ်ဘှံးလံ”အဂ့ၢ်န့ၣ် စံး၀ဲန့ၣ်လီၤႉ တကီၢ်ခါခဲအံၤသဲးဘီၣ်အၦ့ၤတအိၣ်ဘၣ်တကးဒံးဘၣ်အမဲာ်ညါသဲးဃ့စ့ၢ်ကီးအၦ့ၤလီၤအဃိ ကမျၢၢ်လၢအဖံးအီၣ်မၤအီၣ်ဘၣ်ဃးသဲးသၣ်သ့ၣ်တဖၣ်အံၤတၢ်ကီတၢ်ခဲအိၣ်ထီၣ်လၢတၢ်လုၢ်အီၣ်နီၢ်ခိသးသမူတကပၤအဂ့ၢ်န့ၣ် ကီးတရံးကလံၤထံး ၦၤသူၣ်သဲးဖိတဖၣ်စံး၀ဲန့ၣ်လီၤႉ လီၢ်က၀ီၤကမျၢၢ်ပိာ်မုၣ်လၢအသူၣ်သဲးတဂၤစံး၀ဲလၢ“တနံၣ်ညါအံၤသဲးသၣ်အၦ့ၤတအိၣ်နီတစဲးဘၣ်ႉလၢညါန့ၣ်သဲးဘီၣ်န့ၣ်ၦၤဟဲၦ့ၤအိၣ်ဒီဒူၣ်ႉခဲအံၤၦၤဟးၦ့ၤသဲးဘီၣ်တအိၣ်လၢၤဘၣ်ႉမၤအီၣ်သဲးတဘၣ်ဂီၢ်လၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ အပူၤကွံာ်မဟိတနံၣ်သဲးဘီၣ်အဖျၢၣ်တကယၤန့ၣ်အၦ့ၤအိၣ်၀ဲ(၆၀၀၀)ကၠးႇဘၣ်ဆၣ်တနံၣ်အံၤအဖျၢၣ်တကယၤန့ၣ်အၦ့ၤအိၣ်တ့ၢ်က့ၤထဲ(၂၅၀၀)ကၠးန့ၣ်လီၤႉဒ်န့ၣ်အသိးသဲးဃ့စ့ၢ်ကီးအပူၤကွံာ်မဟိတပီၢ်န့ၣ်အၦ့ၤအိၣ်၀ဲ(၆၀၀၀)ကၠးႇ ဘၣ်ဆၣ်တနံၣ်အံၤ အၦ့ၤအိၣ်က့ၤထဲ(၃၈၀၀)ကၠးလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးလၢကညီကီၢ်စဲၣ်ဟီၣ်က၀ီၤတဖၣ်အပူၤတကးဒံးဘၣ်လၢတလၢၤကီၢ်စဲၣ်ဒီးတနီသရံၣ်ကီၢ်ခီဒိၣ်တကပၤန့ၣ်စ့ၢ်ကီး တနံၣ်အံၤခီဖျိသဲးဘီၣ်ဒီးသဲးဃ့အၦ့ၤတအိၣ်ဘၣ်အဃိၦၤဟးၦ့ၤသဲးသၣ်လီၤစှၤ၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဒီပုၢ်ဝဲၢ်ကဲထီၣ်ဒုၣ်ဒါ
ဒီပုၢ်ဝဲၢ်ကဲထီၣ်ဒုၣ်ဒါ ၁. ထံမူကျိလၢယွၤလီၤဆှံ ၦၤထံၣ်ဒ်တၢ်စုၣ်အထံ ထံမိၢ်ၦၢ်ကျိလၢယွၤလီၤ ဟံၣ်ဒူၣ်ထၢဖိလၤကပီၤ ၂. ပထံၣ်ဒီးပကွၢ်တဖျါ ကျိၣ်စ့ကျၢၢ်ဘၢပမဲ၁်နါ သ့ၣ်ညါဒီးဆိမိၣ်တတုၤ မ့ၢ်ထံရူၢ်ကီၢ်သဲးတၢ်ဒုး ၃. ပီၢ်ရီသဲစးအိၣ်ဘၣ်ဆၣ် မ့ၢ်ဒၣ်လၢၦၤဟၢဖၢဆၣ် မ့ၣ်အူအီၣ်ထံလီၢ်ကီၢ်ပူၤ အီၣ်ထံဖိသံဂီၤသကုၤ ၄. “ယၤ” ဒိၣ်စိဂု၁်ဟံးထံဆၣ် တၢ်သးကွံကဲထီၣ်သရၣ် တၢ်လံၣ်တၢ်လီအိၣ်ထီၣ်ထီ လီၢ်ကဝီၤဖိထံၣ်တၢ်ကီ ၅. စၢၤသီစိၤဖိလံၤတၢ်မူ ...
သူမှဲကျိ
သူမှဲကျိ ၁.သူမှဲယွၤလီၤပကွၢ်စိ ကဲထီၣ်ၦၤဃ့ၢ်မှံ ဖျ့ဖျိ သူမှဲထံၦၤလၢအီၣ်အီ အိၣ်ဆိးဘၣ်ဟံၣ်ဒိၣ်ကျူထီ ၂.သူမှဲထံဒုႇ ဒီးထံခၣ် လီၢ်ကဝီၤကမျၢၢ်တူၢ်ဘၣ် သူမှဲထံဆှံႇ ဒီးထံဆၢ သုးမုၢ်ဒီးခိၣ်နၢ်ပၢဆှၢ ၃.ကညီဖိအ့ၣ်လိ၁်ဆိးက့ မ့ၢ်ဒၣ်လၢသူမှဲကျိၣ်စ့ ဂု၁်ဝ၁်လိ၁်သးထံက့ၣ်နၢၣ် မ့ၢ်ကျိၣ်စ့ဟဲနု၁်သနၢၣ် ၄.ထံသူမှဲက့ၣ်နၢၣ်အါတီၤ မ့ၢ်ဒုတတီၤႇ ဆှံတတီၤ ပ၁်ဖျါကညီတၢ်အိၣ်မူ ၦဲၤသးချၢၣ်ချဲတအိၣ်ဃူ ၅.ကညီဖိအတၢ်လီၤဖး ကျိၣ်စ့သနူတၢ်အိၣ်သး ထံဆၢကီၢ်ဆၢဝဲၤလီၢ်ဃိ ကညီဖီၣ်သ့ၣ်န၁်ဝၣ်ဖျိ ၆.ဃိၣ်လိ၁်ကျိဒီးသူမှဲကျိ ယွၤလီၤဃု၁်ဝဲဒၣ်ထီဘိ ဘၣ်ဆၣ်အလွဲၢ်တဒ်သိး ...
ခ့ၣ်အဲၣ်ယူၣ် နိၣ်တကီကီၢ်ဆၣ် ခီကရဲးအပူၤ အါဒၣ်တက့ၢ်တၢ်ဃုထၢထီၣ်၀ဲသးစၢ်ခိၣ်နၢ်တဖၣ်
လါမ့ၤ ၂၂ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၣ်ရ့ၣ်အပူၤ ဖဲလါမ့ၤ ၁၅ သီတုၤလၢ ၁၇ သီအနံၤန့ၣ် နိၣ်တကီကီၢ်ဆၣ်မၤ၀ဲ(၈)ဘျီတဘျီ ခီကရဲးတၢ်ဃုထၢဒီး တၢ်ဃုထၢဘျီ၀ဲအံၤအပူၤ ကီၢ်ဆၣ်ခိၣ်ဒီးထီဘိကမံးတံာ်ဖိလၢ တၢ်ဃုထၢထီၣ်၀ဲသ့ၣ်တဖၣ်အါဒၣ်တက့ၢ်မ့ၢ်၀ဲသးစၢ်ခိၣ်နၢ်သ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ နိၣ်တကီကီၢ်ဆၣ််မၤ၀ဲတၢ်ဃုထၢဘျီ၀ဲအံၤဃုထၢထီၣ်ခိၣ်နၢ်သီတဖၣ်ဒ်တၢ်ဟ့ၣ်တၢ်ဖးကျဲသနူအသိးဒီး ၦၤကဲထီၣ်ကီၢ်ဆၣ်ခိၣ်န့ၣ်မ့ၢ်၀ဲ ပဒိၣ်စီၤဒုၣ်ကီၢ်ႇ နဲၣ်ရွဲၣ် ပဒိၣ်စီၤဒိၣ်ထူႇ နဲၣ်ရွဲၣ်သဃဲၤ ပဒိၣ်စးအဲဖီၤဒီး စံၣ်ညီၣ်ကွီၢ်န့ၣ် မ့ၢ်၀ဲစးနံၤသဘးလ့ သ့ၣ်တဖၣ်အဂ့ၢ်န့ၣ် သ့ၣ်ညါဘၣ်လၢဒူပျာ်ယာ်ကီၢ်ရ့ၣ် ၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ ပဒိၣ်စီၤဒုၣ်ကီၢ်လၢဘၣ်တၢ်ဃုထၢထီၣ်အီၤလၢကီၢ်ဆၣ်ခိၣ်အံၤစံး၀ဲလၢ“ကမျၢၢ်ခၢၣ်စးခိၣ်နၢ်လၢအနာ်အီၣ်ယၤဟ့ၣ်ယၤတၢ်ဖးတဖၣ်ခဲလၢာ်ယစံးဘျုးဘၣ်အ၀ဲသ့ၣ်ဒိၣ်မးလီၤႉခဲအံၤတၢ်တၤတၢ်မ့အိၣ်၀ဲထဲလဲၣ်ဘၣ်ဆၣ်သနါက့လၢကမျၢၢ်အဂီၢ်ဒီးကညီတၢ်ပၢၢ်ဆၢအဂီၢ်န့ၣ်ယကဂုာ်ကျဲးစၢၤမၤမီၤနီၤႉပကဖီၣ်လိာ်စုမၤသကိးတၢ်တုၤလၢဖဲၣ်ဒရၢၣ်ဒံၣ်မိၣ်ခြ့ၣ်စံၣ်ကီၢ်စၢဖှိၣ်န့ၢ်တစု”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်ဃုထၢဘျီ၀ဲအံၤအပူၤတၢ်ဃုထၢထီၣ်၀ဲကီၢ်ဆၣ်ခိၣ်နၢ်ဒိၣ်ထီ(၄)ဂၤႇထီဘိကမံးတံာ်(၃၁)ဂၤသ့ၣ်တဖၣ်အံၤ၀ံၤ တၢ်ဆဲးဃုထၢထီၣ်၀ဲပၢပြး၀ဲၤကျိၤ ၀ဲၤကျိၤခိၣ်သ့ၣ်တဖၣ်န့ၣ်လီၤႉတၢ်ဃုထၢဘျီ၀ဲအံၤအပူၤမ့မ့ၢ်ကီၢ်ဆၣ်ခိၣ်လီၢ်လံၤ ပဒိၣ်စီၤဖီဒ့အီၤမၠၣ်အံၤခီဖျိတၢ်အိၣ်ဆူၣ်အိၣ်ချ့တၢ်အိၣ်သးအဃိအတနုာ်လီၤဒိးဃုထၢသးလၢၤဘၣ်န့ၣ်လီၤႉဒ်န့ၣ်အသိး ပဒိၣ်စီၤဒုၣ်ကီၢ်လၢအဘၣ်တၢ်ဃုထၢထီၣ်အီၤလၢကီၢ်ဆၣ်ခိၣ်ခဲအံၤန့ၣ် အပူၤကွံာ်အ၀ဲဟံးတ့ၢ်ဃာ်မူဒါဒ် ကီၢ်ဆၣ် အနဲၣ်ရွဲၣ်ဒီး အသးနံၣ်အိၣ်ဒံးထဲ(၃၀)ဘျဲၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ တၢ်ဃုထၢဘျီ၀ဲအံၤအပူၤကီၢ်ဆၣ်ထီဘိကမံးတံာ်ဒီးကီၢ်ဆၣ်ခိၣ်နၢ်တဖၣ်အါဒၣ်တက့ၢ်ပၣ်ဃုာ်၀ဲၦၤသးစၢ်ဒီးၦၤပိာ်မုၣ်ပိာ်မၢၤသ့ၣ်တဖၣ်အဃိလၢတၢ်ကမၤဖျါထီၣ်တၢ်ဖံးတၢ်မၤအမိၢ်လံၤမိၢ်ၦၢ်အံၤန့ၣ်ကလဲၤအသးချ့ဒိၣ်ထီၣ်၀ဲဒီး အ၀ဲသ့ၣ်န့ၣ်အလီၢ်အိၣ်လၢကဘၣ်ဖီၣ်လိာ်စုမၤသကိးတၢ်ဒီးခိၣ်နၢ်လၢအတၢ်လဲၤခီဖျိအိၣ်ပာ်လၢတၢ်ပၢၢ်ဆၢတကပၤအဂ့ၢ်န့ၣ် ကီၢ်ရ့ၣ်ခိၣ်နၢ်တဖၣ် ဆီၣ်တခူထီၣ်၀ဲန့ၣ်လီၤႉ ဒ်ခ့ၣ်အဲၣ်ယူၣ်တၢ်သူၣ်ထီၣ်ဆီလီၤအိၣ်ပာ်အသိးန့ၣ်လီၢ်ခၢၣ်သးႇကီၢ်ရ့ၣ်ဒီးကီၢ်ဆၣ်အပတီၢ်အံၤ (၄)နံၣ်တဘျီ ကဘၣ်မၤ၀ဲခီကရဲးတၢ်ဃုထၢဒီး ကီၢ်ရ့ၣ်ခိၣ်မူဒါအံၤ တၢ်မၤအီၤသ့၀ဲထဲ(၂)ဘျီလီၤအဂ့ၢ်န့ၣ် တၢ်ဆၢတဲာ်လီၤ၀ဲဖဲအပူၤကွံာ်လါမ့ၤ ၄ သီ (၁၇)ဘျီတဘျီ လီၢ်ခၢၣ်သးခီကရဲးအပူၤန့ၣ်လီၤႉ
စံ၁်လီၢ်ဟီၣ်ခိၣ်လီၢ်လၢအိၣ်သုးကလၢၤကပၤတဖၣ်ပယီၤသုးထုးထီၣ်တၢ်ကလုၢ်လၢသူၣ်ဘုတန့ၢ်ဘၣ်
လါမ့ၤ ၂၂ သီႇ ၂၀၂၃ နံၣ်ႇ ခ့ၣ်အဲးစံၣ် လီၢ်က၀ီၤကမျၢၢ်အဟီၣ်ခိၣ်စံာ်လီၢ်နာ်လီၢ်လၢအိၣ်ကြုၢ်တု၀့ၢ် ပယီၤသုး(ခမရ–၅၄၅),(၅၄၆)သုးကလၢၤ အခိၣ်အဃၢၤ တဖၣ်အံၤဒ်သိးတၢ်ပၢၢ်ဆၢသုးပာ်ဖှိၣ်သုတဟဲခးအ၀ဲသ့ၣ်ႇသုတဟဲတ့ၢ်လီၤမ့ၣ်ပိၢ်လၢဒြိတဂ့ၤအဂီၢ်န့ၣ်ပယီၤသုးထုးထီၣ်တၢ်ကလုၢ်လၢတနံၣ်အံၤတၢ်တဘၣ်သူၣ်အီၣ်ဖျးအီၣ်ဘုဘၣ်အဂ့ၢ်န့ၣ် ကီၣ်၀ါလဲသ၀ီဖိလၢတအဲၣ်ဒိးပာ်ဖျါအမံၤတဂၤ စံး၀ဲဒၣ်န့ၣ်လီၤႉ အ၀ဲစံး၀ဲလၢ“လၢကီၣ်၀ါလဲသ၀ီတကပၤန့ၣ်ႇစံာ်လီၢ်လၢအိၣ်(၅၄၅)ႇ(၅၄၆)သုးကလၢၤကပၤတဖၣ်န့ၣ် အ၀ဲသ့ၣ်ထုးထီၣ်တၢ်ကလုၢ်လၢသူၣ်ဘုတန့ၢ်ဘၣ်ႉမ့အဲၣ်ဒိးသူၣ်န့ၣ်ၦၤကညီတဘၣ်အါန့ၢ်သၢဂၤဘၣ်ႉမၤ၀ဲဒ်အံၤနကသူၣ်ဘုအဂီၢ်တၢ်ကီအိၣ်မီၤနီၤႉပယီၤသုးနုာ်လီၤအိၣ်ဆီလီၤသးလၢသ၀ီပူၤႉလၢသ၀ီချၢရီဘၢၣ်ကျီးတကပၤန့ၣ်နါက့အ၀ဲသ့ၣ်အိၣ်အဃိနကဟးထီၣ်ဖံးမၤတၢ်လၢတၢ်ချၢန့ၣ်နဟးထီၣ်တဘူၣ်ဘၣ်ႉ”အဂ့ၢ်န့ၣ် စံး၀ဲန့ၣ်လီၤႉ တကီၢ်ခါခဲအံၤပယီၤသုးကလၢၤခံဖျၢၣ်အံၤခးလီၤဒံးကျိဖးဒိၣ်လၢကြုၢ်တုဒူသ၀ီတဖၣ်အပူၤကိးမုၢ်နံၤမုၢ်နၤအဃိ လီၢ်က၀ီၤကမျၢၢ်လၢအဃ့ၢ်မှံဟးဖျိးသ့ၣ်တဖၣ်က့ၤအိၣ်လၢသ၀ီပူၤတဘူၣ်ဒံး၀ဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ “လၢြကုၢ်တုမုၢ်ထီၣ်တကပၤန့ၣ်ဒၢးခးလီၤ,လၢမုၢ်နုာ်တကပၤန့ၣ်ဒၢးခးလီၤအဃိဘၣ်ပှၤဟံၣ်ပှၤဃီဟးဂီၤဒီဒူၣ်. ပှၤကညီမ့အိၣ်ဒုကဘၣ်ပှၤကညီလီၤ.အဃိဘၣ်ကွၢ်တၢ်အိၣ်သး၀ံၤမးပက့ၤကွၢ်ပဟံၣ်ပဃီမီၤ.”အဂ့ၢ်န့ၣ် နီၤတမၤသ၀ီဖိတဂၤစံး၀ဲန့ၣ်လီၤ. ဒ်န့ၣ်အသိးတကီၢ်ခါခဲအံၤပယီၤသုးမၤဟးဂီၤကွံာ်၀ဲကီးတရံး၀့ၢ်ကျဲနုာ်လီၤႇတီၤကၠၤအ့သ၀ီကျဲသ့ၣ်တဖၣ်ဒီး ဒီၣ်တဲာ်ကွံာ်၀ဲဒၣ်ဒူသ၀ီဒီး၀့ၢ်ပူၤဘၢၣ်စၢၤတၢ်ဟးထီၣ်က့ၤလီၤသ့ၣ်တဖၣ်န့ၣ်လီၤႉလၢန့ၣ်အမဲာ်ညါဒူသ၀ီကျဲလၢကလဲၤထီၣ်လၢ၀့ၢ်ပူၤသ့ၣ်တဖၣ်န့ၣ်စ့ၢ်ကီးခီဖျိပယီၤသုးနုာ်လီၤအိၣ်အဃိတၢ်ကီတၢ်ခဲအိၣ်ထီၣ်လၢတၢ်ဆါတၢ်ၦ့ၤႇတၢ်အီၣ်တၢ်အီႇတၢ်အိၣ်ဆူၣ်အိၣ်ချ့ဒီးကူၣ်သ့တကပၤအဂ့ၢ်န့ၣ် ကီးတရံး ကြုၢ်တု လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ
တၢ်ပၢၢ်ဆၢသုးပ၁်ဖှိၣ်မၤ၀ဲတၢ်ခးလိ(စနဲးဖၢး)ကျိတၢ်သိၣ်လိ၀ံၤလံ
လါမ့ၤ ၂၂ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤအပူၤ တၢ်ပၢၢ်ဆၢသုးကရူၢ်တဖၣ်ပာ်ဖှိၣ်ထီၣ်သးမၤ၀ဲတၢ်ခး(စနဲးဖၢး)ကျိတၢ်သိၣ်လိတခါလၢတၢ်မဲာ်ညါတၢ်လီၢ်တတီၤ၀ံၤ၀ဲဖဲလါမ့ၤ ၁၉ သီအနံၤအဂ့ၢ်န့ၣ် ကရူၢ်ဘၣ်ထွဲထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ တၢ်သိၣ်လိဘျီ၀ဲအံၤအပူၤန့ၣ်ဒုးယၤလီၤဆီကရူၢ်(S.O.F)ႇနကါနံၤသုးကျိၤႇယ့ဘလူကရူၢ်ဒီး(MSRF)သုးကရူၢ် သုးဖိအဂၤ(၃၀)ဘျဲၣ်ဟဲထီၣ်၀ဲတၢ်သိၣ်လိအံၤန့ၣ်လီၤႉၦၤသုးဖိသံၣ်ဖိသ့ၣ်တဖၣ်အံၤတၢ်သိၣ်လိန့ၢ်၀ဲ(စာတွေ့လက်တွေ့)ယံၤ၀ဲတလါဒီးဒ်သိးတၢ်ကဟူးဂဲၤမၤ၀ဲဒုးယၤတၢ်မၤရဲၣ်ကျဲၤခိၣ်သ့ၣ်လၢတၢ်ဒုးတၢ်ယၤလီၤဆီပူၤအံၤလီၤတံၢ်လီၤဆဲးကန့ၢ်အဂီၢ် ဘၣ်တၢ်ဟ့ၣ်၀ဲတၢ်သိၣ်လိအံၤလီၤအဂ့ၢ်န့ၣ် ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ နကါနံၤသုးကျိၤၦၤဘၣ်မူဘၣ်ဒါတဂၤစံး၀ဲလၢ“လၢတၢ်ကီတၢ်ခဲအပူၤန့ၣ်ပဘၣ်ဂုာ်ကျဲးစၢးမၤဖးအါညါႉကမျၢၢ်ထံဖိကီၢ်ဖိစ့ၢ်ကီးပာ်ဆူၣ်သးပာ်စၢၤႉပကမၤနၢၤတၢ်သၦၢ်ကတၢၢ်လီၤႉတၢ်ပၢၢ်ဆၢအပူၤန့ၣ်တဘၣ်အိၣ်ဒ်အတဘၣ်ဃးဒီးၦၤဘၣ်ဒ်န့ၣ်တဂ့ၤႉတဘၣ်မုာ်လၢသုးမီၤစိရိၤအတၢ်ဆီၣ်တံၢ်မၤနၢၤဆီၣ်ဘံၣ်ဆီၣ်ဘၢအဖီလာ်တဂ့ၤႉယအဲၣ်ဒိးတဲသးလၢတဘၣ်သးပ့ၤနီၣ်စ့ၢ်ကီးတၢ်ပၢၢ်ဆၢအံၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါမ့ၤ ၂၀ သီအနံၤ န့ၣ်လီၤႉ ၦၤသုးဖိသံၣ်ဖိလၢအဟဲထီၣ်တၢ်သိၣ်လိသ့ၣ်တဖၣ်အံၤကဘၣ်လီၤက့ၤဒုးယၤမူဒါလၢခ့ၣ်အဲၣ်ယူၣ်(သုးက့ ၆)ႇ (သုးက့ ၄)ဟီၣ်က၀ီၤပူၤဒီးဒီကလု၁်ဃူဖိးပဒိၣ်(NUG)တၢ်ဒီသဒၢ၀ဲၤကျိၤ ကလံၤထံးဟီၣ်က၀ီၤသုးကျိၤသ့ၣ်တဖၣ်အပူၤဒီး တၢ်ပၢၢ်ဆၢသုးကရူၢ်သုးမုၢ်သံၣ်ဘိတဖၣ်ကပာ်ဖှိၣ်မၤသကိးတၢ်လၢတၢ်ဒုးတၢ်ယၤပူၤအဂ့ၢ်န့ၣ် သုးကျိၤဘၣ်ထွဲလံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ လၢခ့ၣ်အဲၣ်ယူၣ်(သုးက့ ၆)ဟီၣ်က၀ီၤအပူၤန့ၣ်ခီဖျိသုးမီၤစိရိၤကဘီယူၤဟဲတ့ၢ်လီၤ၀ဲမ့ၣ်ပိၢ်ကိးမုၢ်နံၤဒဲးဃၣ်ဃၣ်အဃိ လီၢ်က၀ီၤကမျၢၢ်လၢအလးဘၣ်ဃ့ၢ်မှံဟးဖျိး၀ဲဒၣ်န့ၣ်လီၤႉတကးဒံးဘၣ်လၢန့ၣ်အမဲာ်ညါသုးမီၤစိရိၤအံၤသူ၀ဲကဘီယူၤဟဲတ့ၢ်လီၤမ့ၣ်ပိၢ်လၢကမျၢၢ်ဒူသ၀ီတၢ်ဖံးအီၣ်မၤအီၣ်လီၢ်ကျဲဒီးတၢ်ဘူၣ်တၢ်ဘါတၢ်သူၣ်ထီၣ်အလီၢ်သ့ၣ်တဖၣ်အဂ့ၢ်န့ၣ် ဟီၣ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ