သုးမီၤစိရိၤအတၢ်မၤကမၣ်ၦၤဂ့ၢ်၀ီခွဲးယ၁်အဖီခိၣ်အံၤဆီထံးဂံၢ်ခီၣ်ထံးကညီတၢ်ကရၢကရိထီဒါပဲ၁်အၢပဲ၁်သီ၀ဲ
လါမ့ၤ ၂၁ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် ဆီထံးကီၢ်ဆၣ်အပူၤ ဘၣ်ဃးပယီၤသုး အတၢ်ခးလီၤကျိဖးဒိၣ်လၢကမျၢၢ်ဒူသ၀ီတၢ်ဖံးအီၣ်မၤအီၣ်လီၢ်ကျဲဒီးဖီၣ်မၤဆါမၤပယွဲ၀ဲထံဖိကီၢ်ဖိကမျၢၢ်အံၤအဖီခိၣ် ထီဒါပဲာ်အၢပဲာ်သီ၀ဲတဲာ်တဲာ်ဖျုဖျုအဂ့ၢ်န့ၣ် ဆီထံးကီၢ်ဆၣ် ဂံၢ်ခီၣ်ထံးကညီၦၤဂ့ၢ်၀ီတၢ်ကရၢကရိ ထုးထီၣ်ပာ်ဖျါ၀ဲဖဲလါမ့ၤ ၁၉ သီအနံၤန့ၣ်လီၤႉ ဘၣ်ဃးပယီၤသုးနုာ်လီၤလၢချၢၣ်လွံၢ်ထူၣ်ကီၢ်ရ့ၣ် ဆီထံးကီၢ်ဆၣ်ဒီးမူကီၢ်ဆၣ် ညီၤပ့ၤသၤသ၀ီပူၤ ဖီၣ်မၤသံဒွဲၣ်အူအီၣ်ကွံာ်၀ဲဟံၣ်ခိၣ်(၈)ဒူၣ်ၦၤအဂၤ(၂၀)ဃၣ်ဃၣ်တၢ်ဂ့ၢ်အံၤမ့ၢ်တၢ်လုၢ်သ့ၣ်ခါပတာ်မၤကမၣ်ၦၤဂ့ၢ်၀ီခွဲးယာ်လၢအအၢအသီအဃိထီဒါပဲာ်အၢပဲာ်သီတဲာ်တဲာ်ဖျုဖျုအဂ့ၢ်န့ၣ် လီၢ်က၀ီၤ ဂံၢ်ခီၣ်ထံးကညီၦၤဂ့ၢ်၀ီကရူၢ် ဂ့ၢ်ဂီၢ်အူတၢ်ဆီၣ်ထွဲမၤစၢၤ ၦၤဘၣ်မူဘၣ်ဒါတဂၤ စံး၀ဲဒ်အံၤန့ၣ်လီၤႉ “ပယီၤသုးအတၢ်မၤကမၣ်လုၢ်သ့ၣ်ခါပတာ်တၢ်လၢပ၀ဲလီၢ်က၀ီၤကမျၢၢ်အဖီခိၣ်ဒ်အံၤန့ၣ်လ့ၤတက့ၤပတူၢ်လိာ်အီၤတသ့ဘၣ်ႉအဃိဒ်သိးၦၤကသ့ၣ်ညါပတၢ်ပာ်သူၣ်ပာ်သးလၢဟီၣ်ခိၣ်ဒီတဘ့ၣ်အဂီၢ်န့ၣ်ပထုးထီၣ်ပာ်ဖျါ၀ဲလံာ်တၢ်ပာ်သးဒ်အံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါကီၢ်ပူၤကီၢ်ချၢတၢ်ကရၢကရိလၢအပၣ်ဃုာ်မၤသကိးတၢ်လၢၦၤဂ့ၢ်၀ီခွဲးယာ်အဂီၢ်သ့ၣ်တဖၣ်အံၤစ့ၢ်ကီးဘၣ်ဃးသုးမီၤစိရိၤအတၢ်ဆီၣ်တံၢ်မၤနၢၤဆီၣ်ဘံၣ်ဆီၣ်ဘၢလီၢ်က၀ီၤကမျၢၢ်အံၤအဖီခိၣ်န့ၣ်ကဟံးဘၣ်အရ့တုၤလီၤတီၤလီၤအဂ့ၢ်န့ၣ် ဃ့ထီၣ်၀ဲလၢလံာ်တၢ်ပာ်ဖျါအပူၤန့ၣ်လီၤႉ တကီၢ်ခါခဲအံၤစ့ၢ်ကီးပယီၤသုးတဖၣ်အံၤဆဲးဟူးဂဲၤအိၣ်ဆီလီၤသးဒံးလၢချၢၣ်လွံၢ်ထူၣ်ကီၢ်ရ့ၣ် ဆီထံးကီၢ်ဆၣ်ဒီးမူကီၢ်ဆၣ် ဒူသ၀ီတဖၣ်အပူၤအဂ့ၢ်န့ၣ် လီၢ်က၀ီၤ ဂံၢ်ခီၣ်ထံးကညီၦၤဂ့ၢ်၀ီတၢ်ကရိကရိ ၦၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲန့ၣ််လီၤႉ ဖဲအပူၤကွံာ်လါမ့ၤ ၁၀ သီအနံၤန့ၣ် ပယီၤသုးနီၣ်ဂံၢ်အဂၤ(၁၀၀)ဘျဲၣ်ဟဲလီၤ၀ဲလၢမူကီၢ်ဆၣ် ညီၤပ့ၤသၤသ၀ီပူၤဒီး ဖီၣ်၀ဲလီၢ်က၀ီၤကမျၢၢ်ပိာ်မုၣ်ပိာ်ခွါဃုာ်ဒီးဖိဒံဖိသၣ်(၁၉)ဂၤ၀ံၤဒွဲၣ်အူအီၣ်ကွံာ်၀ဲဆှုၣ်မဲာ်ကဲၤမဲာ်ဒီး လၢသုးမီၤစိရိၤအတၢ်ဖံးတၢ်မၤဒ်အံၤအဖီခိၣ်(ခ့ၣ်အဲၣ်ယူၣ်)ဃုာ်ဒီးၦၤဂ့ၢ်၀ီခွဲးယာ်တၢ်ကရၢကရိတဖၣ်စ့ၢ်ကီးထီဒါထုးထီၣ်ပာ်ဖျါ၀ဲလံာ်တၢ်ပာ်ဖျါသ့ၣ်တဖၣ်ဒံးန့ၣ်လီၤႉ ဒ်န့ၣ်အသိးဖဲအပူၤကွံာ်လါမ့ၤ ၉ သီအခါစ့ၢ်ကီး ပယီၤသုးနုာ်လီၤဒွဲၣ်အူအီၣ်၀ဲလၢၢ်ဒိၣ်ကီၢ်ဆၣ် ပိလိနိၣ်ဖိသ၀ီပူၤ ဟံၣ်(၂)ဖျၢၣ်ဒီးလဲၤ၀ဲကၠံသ၀ီပူၤဟံၣ်(၄၂)ဖျၢၣ်ႇကၠိတဖျၢၣ်ႇတၢ်ဘါယွၤသရိာ်ႇကတီၤဆိကၠိဒီးတၢ်သူၣ်ထီၣ်လၢအဂၤသ့ၣ်တဖၣ်ကဲထီၣ်သးဒံးအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ခီဖျိတၢ်ပံးဃ၁်ဖၣ်ပူၣ်–ကမၤမိၢ်ကျဲအဃိတၢ်ကီတၢ်ခဲအိၣ်ထီၣ်လၢကစိ၁်ထီၣ်စိ၁်လီၤတၢ်အီၣ်တၢ်အီ
လါမ့ၤ ၂၁ သီႇ ၂၀၂၃ နံၣ်ႇ ခ့ၣ်အဲးစံၣ် ကညီကီၢ်စဲၣ် ဖၣ်ပူၣ်–ကမၤမိၢ်ကျဲအံၤ သုးခိးကီၢ်ဆၢ(BGF)ဒီးပယီၤသုးတပျဲလီၢ်က၀ီၤကမျၢၢ်ဟးထီၣ်က့ၤလီၤလၢာ်ဘၣ်ဒီး ပျဲလဲၤက့ၤ၀ဲလၢၦၢ်ကျဲတကပၤအဃိလီၢ်က၀ီၤသ၀ီဖိတဖၣ်တၢ်ကီတၢ်ခဲအိၣ်ထီၣ်လၢကစိာ်ဆှၢတၢ်အီၣ်တၢ်အီအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤ. အပူၤကွံာ်လၢညါကျဲ၀ဲအံၤတလါန့ၣ်တၢ်ဟ့ၣ်အခွဲးလၢကစိာ်ထီၣ်စိာ်လီၤတၢ်အီၣ်တၢ်အီၣ်(၅)သီဘၣ်ဆၣ် ခဲအံၤခီဖျိ(BGF)ဒိးလီၤဃာ်မ့ၣ်ပိၢ်လၢကျဲ၀ဲန့ၣ်ဖီခိၣ်အဃိတၢ်တပျဲဟးထီၣ်က့ၤလီၤလီၢ်က၀ီၤကမျၢၢ်တဖၣ်လၢၤဘၣ်ဒီးပျဲလဲၤက့ၤကျဲလၢဟီၣ်ခိၣ်ကျဲဒီးခီဖျိမူခိၣ်စူၤကျဲဟးဂီၤအဃိတၢ်ကီတၢ်ခဲအိၣ်ထီၣ်လၢတၢ်ဟးထီၣ်က့ၤလီၤဒီးတၢ်စိာ်ဆှၢတၢ်အီၣ်တၢ်အီတဖၣ်တၢ်အဂ့ၢ်န့ၣ် ဖၣ်ပူၣ်လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“လၢညါတလါန့ၣ်ဟ့ၣ်ဒံးအခွဲးလၢၦၤကလဲၤၦ့ၤတၢ်(၅)သီဒံးမီၤနီၤႉ(BGF)ဒိးလီၤဃာ်မ့ၣ်ပိၢ်လၢကျဲမုၢ်လါအံၤအဃိၦၤတပျဲလဲၤ၀ဲလၢာ်ဘၣ်ႉပျဲလဲၤက့ၤ၀ဲလၢဟီၣ်ခိၣ်ကမူၣ်ကျဲလီၤႉပဘၣ်လဲၤက့ၤကျဲလၢအ၀ဲသ့ၣ်ပျဲလဲၤ၀ဲန့ၣ်လီၤမီၤႉကျဲလၢအ၀ဲသ့ၣ်တပျဲလဲၤ၀ဲဘၣ်န့ၣ်ပလဲၤတဘူၣ်ဘၣ်အိၣ်ဒီးမ့ၣ်ပိၢ်ႉမူခိၣ်စူၤအဃိကျဲပူၤန့ၣ်ကပံာ်လဲလဲလီၤကျဲဟးဂီၤနလဲၤတသ့ဘၣ်”အဂ့ၢ်န့ၣ် စံး၀ဲန့ၣ်လီၤႉ စးထီၣ်ဖဲအပူၤကွံာ်လါအ့ဖြ့ၣ်န့ၣ်ဖၣ်ပူၣ်–ကမၤမိၢ်ကျဲန့ၣ်တၢ်ပျဲစိာ်ထီၣ်စိာ်လီၤတၢ်အီၣ်တၢ်အီတလါန့ၣ်(၅)သီအသိး သ၀ီလၢအိၣ်ဖဲဖၣ်ပူၣ်–ကမၤမိၢ်အခိၣ်အဃၢၤသ့ၣ်တဖၣ်အံၤစ့ၢ်ကီးတၢ်မၤတဲာ်ကွံာ်၀ဲမ့ၣ်အူဒီး တၢ်ပျၢ်လီၤက့ၤလီတဲစိအကျိၤလၢအနၣ်ရံၣ်ဆၢကတီၢ်လီၤအဂ့ၢ်န့ၣ် ဖၣ်ပူၣ်လီၢ်က၀ီၤကမျၢၢ်တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ လၢန့ၣ်အမဲာ်ညါဖၣ်ပူၣ်လီၢ်က၀ီၤသ၀ီဖိတဖၣ်အံၤဖဲတၢ်ကိၢ်ခါအကတီၢ်န့ၣ်စိာ်ထီၣ်စိာ်လီၤ၀ဲတၢ်အီၣ်တၢ်အီဟုသးႇသိအီၣ်ႇအံသၣ်သ့ၣ်တဖၣ်အံၤလၢခိကျဲလီၤဘၣ်ဆၣ် မ့မ့ၢ်တၢ်စူၤခါအကတီၢ်န့ၣ်သူက့ၤ၀ဲလၢချံစဲးအဂ့ၢ်န့ၣ် ၦၤနီချံစဲးဖိတဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ အ၀ဲစံး၀ဲလၢ“ခဲအံၤတၢ်ဆၢကတီၢ်ကွးကၠးတစဲးမီၤနီၤႉတၢ်စူၤခါတတုၤဒံးဘၣ်အဃိနကစိာ်ထီၣ်စိာ်လီၤတၢ်ဖိတၢ်လံၤလၢထံကျိအဂီၢ်န့ၣ်ထံစှၤဒံးမီၤနီၤႉနကစိာ်လၢခိကျဲခီဒၢးဘၣ်ဟ့ၣ်တြဲၤတၢ်ခိတၢ်သွဲအါအဃိတဘၣ်ဂီၢ်ဘၣ်”အဂ့ၢ်န့ၣ် စံး၀ဲန့ၣ်လီၤႉ လၢဖၣ်ပၣ်ပူၣ်ဟီၣ်က၀ီၤအပူၤခီဖျိတၢ်ဒုးဆဲးကဲထီၣ်ဒံး၀ဲလၢသုးခိးကီၢ်ဆၢ(BGF)ႇပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤအဃိလီၢ်က၀ီၤသ၀ီဖိတနီၤက့ၤအိၣ်လၢသ၀ီပူၤတဘူၣ်ဒံးဘၣ်ႇ ဘၣ်ဃ့ၢ်မှံဟးဖျိးဒံး၀ဲအဖၢမုၢ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ
သၣ်တီၣ်၀့ၢ်ပူၤ ပယီၤသုးဖီၣ်က့ၤကိးလီၢ်က၀ီၤကမျၢၢ် ၇ ဂၤ
လါမ့ၤ ၂၀ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် သၣ်တီၣ်၀့ၢ်(၁၃)မဲၤ က၀ီၤဒ့(၁)အပူၤ ဖဲလါမ့ၤ ၁၉ သီ ဂီၤခီ ၉ နၣ်ရံၣ်အဆၢကတီၢ်န့ၣ် ပယီၤသုးနုာ်လီၤဖီၣ်၀ဲလီၢ်က၀ီၤကမျၢၢ်(၇)ဂၤလၢတၢ်ဂ့ၢ်တအိၣ်နီတမံၤဘၣ်အဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဖၣ် စံး၀ဲအသိးသ့ၣ်ညါဘၣ်န့ၣ်လီၤႉ ပယီၤသုးလၢအအိၣ်ဆီလီၤသးဖဲသၣ်တီၣ်၀့ၢ်သ့ၣ်တဖၣ်အံၤအ၀ဲသ့ၣ်ဟဲကအိၣ်လၢအဂၤ(၂၀)ဘျဲၣ်ညါဒီး နုာ်လီၤဖီၣ်၀ဲလီၢ်က၀ီၤကမျၢၢ်ၦၤပိာ်ခွါ(၇)ဂၤအံၤစၢတံၢ်ဃာ်၀ဲဒီးပျံၤဖီၣ်က့ၤကိး၀ဲအဂ့ၢ်န့ၣ် လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ “အ၀ဲသ့ၣ်နုာ်လီၤဃုတၢ်ဟံၣ်ပူၤႇမ့၀ံၤသံကွၢ်၀ဲ(PDF)အိၣ်ဧါႇၦၤဃ့အီၣ်တၢ်ဖိ(သူတောင်းစား)အိၣ်ဧါသံကွၢ်၀ဲဒ်န့ၣ်ႉအတထံၣ်(PDF)ဘၣ်ဘျီကယဲၢ်မ့ၢ်အထံၣ်ၦၤသ့ၣ်တဖၣ်န့ၣ်ဖီၣ်က့ၤကိး၀ဲလီၤႉကမျၢၢ်လၢအဖီၣ်၀ဲသ့ၣ်တဖၣ်န့ၣ်မ့ၢ်ၦၤအိၣ်ဖဲက၀ီၤဒ့ပူၤတဖၣ်အံၤလီၤႉကမျၢၢ်လၢပယီၤသုးဖီၣ်အီၤတဖၣ်န့ၣ်ပယီၤသုးစၢတံၢ်၀ဲဒီးပျံၤထးႇမ့၀ံၤအဒံၣ်အဖိထံၣ်လၢၦၤစၢဃာ်အပါဒ်န့ၣ်ဘျီဟီၣ်ကိးပသူမီၤနီၤႉမ့ၢ်အက့ၤကိး၀ဲဖဲလဲၣ်ဒုပတသ့ၣ်ညါဘၣ်”အဂ့ၢ်န့ၣ် စံး၀ဲန့ၣ်လီၤႉ ကမျၢၢ်ပိာ်ခွါ(၇)ဂၤလၢပယီၤသုးဖီၣ်က့ၤကိး၀ဲသ့ၣ်တဖၣ်န့ၣ်မ့ၢ်ၦၤအိၣ်အနံၣ်(၂၀–၄၀)ဘၢၣ်စၢၤဒီး တနီၤန့ၣ်ပယီၤသုးဖီၣ်၀ဲလၢဟံၣ်ပူၤအိၣ်အသိးတနီၤန့ၣ်တၢ်ဖီၣ်အီၤလၢတီအူကဟဲက့ၤလၢအဟံၣ်အခါဒီး တနီၤန့ၣ်အိၣ်လၢရီဘၢၣ်ကျီးကက့ၤဆူဟံၣ်အခါသ့ၣ်တဖၣ်အဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ်စံး၀ဲန့ၣ်လီၤႉ လၢသၣ်တီၣ်(၁၃)မဲၤန့ၣ်လီၢ်က၀ီၤကမျၢၢ်တဖၣ်အါဒၣ်တက့ၢ်ဘၣ်ဃ့ၢ်မှံဟးဖျိး၀ဲဒီး ၦၤက့ၤအိၣ်လၢသ၀ီပူၤန့ၣ် ကအိၣ်ထဲ(၃၀)မျးကယၤလီၤဒီးခီဖျိပယီၤသုးဖီၣ်ကမျၢၢ်လၢတၢ်ဂ့ၢ်တအိၣ်နီတမံၤဘၣ်ဒ်အံၤအဃိကမျၢၢ်တနီၤန့ၣ်ပျံၤတၢ်ဃ့ၢ်ထီၣ်ကဒီး၀ဲအိၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါလၢသၣ်တီၣ်ကီၢ်ဆၣ်အပူၤခီဖျိပယီၤသုးပံးဃာ်၀ဲတၢ်စိာ်ထီၣ်စိာ်လီၤတၢ်အီၣ်တၢ်အီဟုသးဒီးကသံၣ်ကသီသ့ၣ်တဖၣ်အဃိတၢ်အီၣ်တၢ်အီလီၤစှၤ၀ဲဒီးလီၢ်က၀ီၤကမျၢၢ်တနီၤတၢ်ကီတၢ်ခဲအိၣ်ထီၣ်လၢတၢ်အီၣ်တၢ်အီတကပၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ စးထီၣ်ဖဲအပူၤကွံာ်လါမးရှး ၄ သီတုၤလၢလါမ့ၤန့ၣ် ပယီၤသုးဒွဲၣ်အူအီၣ်ကွံာ်၀ဲ သၣ်တီၣ်၀့ၢ်ပူၤ ခရံာ်ဖိတၢ်ဘူၣ်တၢ်ဘါခိၣ်နၢ်ဒီးခ့ၣ်အဲၣ်ယူၣ်အၦၤအဟံၣ်ဃုာ်ဒီးကမျၢၢ်အဟံၣ်အဖျၢၣ်(၂၀)ဘျဲၣ်အိၣ်၀ဲအသိး ခီဖျိပယီၤသုးခးလီၤကျိဖးဒိၣ်ဆူ၀့ၢ်ပူၤတလီၢ်လီၢ်အဃိက၀ီၤဒ့ပူၤကမျၢၢ်တဖၣ်သံဘၣ်ဒိဘၣ်ထံးအိၣ်၀ဲအဂ့ၢ်န့ၣ် သ့ၣ်ညါဘၣ်လၢကမျၢၢ်အအိၣ်န့ၣ်လီၤႉ
ပယီၤသုးခးလီၤကျိဖးဒိၣ်အဃိ သ၀ီ(၉)ဖျၢၣ်ကမျၢၢ်တကလးဘျဲၣ်ဘၣ်ဃ့ၢ်ထီၣ်
လါမ့ၤ ၂၀ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)ဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ် မူကီၢ်ဆၣ်အပူၤ ဖဲလါမ့ၤ ၁၆ သီ အနံၤန့ၣ် ခီဖျိပယီၤသုးခးလီၤကျိဖးဒိၣ်အဃိ သ၀ီ(၉)ဖျၢၣ်ကမျၢၢ်(၁၃၀၀၀)ဘျဲၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပာ်ဖျါ၀ဲဖဲတနံၤအံၤလါမ့ၤ ၂၀ သီအနံၤန့ၣ်လီၤႉ ပယီၤသုး(ခလရ–၆၀)ခးလီၤကျိဖးဒိၣ်ဆူမူကီၢ်ဆၣ်အပူၤ(၃၆)ဖျၢၣ်ဒီးအဃိကီၢ်ဆၣ်ဖဲန့ၣ်အပူၤသ၀ီလၢအမ့ၢ် စေ၀ႇနှေင်ကုန်းႇတောင်စုႇကွနျ်းတော,ညောင်ပင်ဆိပ်ႇမြောင်းရိုးကြီးႇရွာဟောင်း,တပ်ကုန်းႇညောင်ပင်သာ ဒူသ၀ီ(၉)ဖျၢၣ် ကမျၢၢ်ၦၤနီၣ်ဂံၢ်ခဲလၢာ်(၁၃၉၉၁)ဂၤဘၣ်ဃ့ၢ်ထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သး လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါခီဖျိပယီၤသုး(ခမရ–၅၉၉)ႇ(ခမရ–၅၉၀)ႇသုးတြိၤ(၄၄)ဒီး(ခလရ–၄၈)သ့ၣ်တဖၣ်အံၤ ခးလီၤကျိဖးဒိၣ်ဆူခ့ၣ်အဲၣ်ယူၣ်(ချၢၣ်လွံၢ်ထူၣ်ကီၢ်ရ့ၣ်)မူကီၢ်ဆၣ်ပူၤအဃိကမျၢၢ်သံ၀ဲ(၁)ဂၤႇဘၣ်ဒိ(၂)ဂၤဒီး ကမျၢၢ်အဟံၣ်(၁)ဖျၢၣ်ဒီးသီခါဖၠၣ်(၁)ဖျၢၣ်ဟးဂူာ်ဟးဂီၤ၀ဲအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဒ်န့ၣ်အသိးခီဖျိပယီၤသုးခးလီၤကျိးဖးဒိၣ်အဃိ မီၤမ့ယဲစဲၣ်(၁၄)နံၣ်အံၤသံ၀ဲဒီး မၣ်လၣ်စါ(၄၇)နံၣ်ႇ မီၤမၠ့ၣ်မၠၣ်(၁၈)နံၣ်သ့ၣ်တဖၣ်အံၤဘၣ်ဒိဘၣ်ထံး၀ဲအဂ့ၢ်န့ၣ် ခ့ၣ်အဲၣ်ယူၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ လၢန့ၣ်အမဲာ်ညါပယီၤသုးခးလီၤကျိဖးဒိၣ်အဃိသ၀ီ(၉)ဖျၢၣ်လီၢ်က၀ီၤကမျၢၢ်(၁၃၉၉၁)ဂၤသ့ၣ်တဖၣ်အံၤဃ့ၢ်ထီၣ်၀ံၤလီၢ်ခံန့ၣ်ပယီၤသုးနုာ်လီၤဟံးန့ၢ်အလီၢ်အကျဲလၢသ၀ီသ့ၣ်တဖၣ်န့ၣ်အပူၤအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ ဖဲအပူၤကွံာ်လါမ့ၤ ၁၆ သီအနံၤစ့ၢ်ကီး ပယီၤသုးဟဲနုာ်လီၤလၢခ့ၣ်အဲၣ်ယူၣ်(သုးက့ ၃)ဟီၣ်က၀ီၤ တမၤခီသ၀ီဒီးတီၤစူၣ်လီၢ်ခံဒူသ၀ီတဖၣ်အပူၤ၀ံၤဖီၣ်က့ၤကိး၀ဲကမျၢၢ်(၂)ဂၤသူ၀ဲဒ်တၢ်ဒီသဒၢစုက၀ဲၤအသိးအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါတ့ၢ်ဃာ်၀ဲဖဲလါမ့ၤ ၁၈ သီအနံၤန့ၣ်လီၤႉ
ကမျၢၢ်ၦၤဃ့ၢ်မှံဟးဖျိးဘၣ်တၢ်ညၣ်ဂိၢ်တၢ်ဆါဟဲအါထီၣ်ႇတၢ်ကီတၢ်ခဲအိၣ်လၢကဒိးန့ၢ်ဘၣ်ကသံၣ်ကသီ
လါမ့ၤ ၁၉ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကီးတရံးဟီၣ်က၀ီၤအပူၤ စှၤသီအတီၢ်ပူၤအံၤ ခီဖျိတၢ်စူၤတပယူာ်ဃီအဃိ ကမျၢၢ်ၦၤဃ့ၢ်မှံဟးဖျိးသ့ၣ်တဖၣ်အံၤဘၣ်၀ဲဒၣ်တၢ်ညၣ်ဂိၢ်တၢ်ဆါဟဲအါထီၣ်၀ဲဒီးတၢ်ကီတၢ်ခဲအိၣ်လၢကဒိးန့ၢ်ဘၣ် ကသံၣ်ကသီအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကသံၣ်ၦၤဘၣ်မူဘၣ်ဒါအအိၣ်န့ၣ်လီၤႉ ကမျၢၢ်ၦၤဃ့ၢ်မှံဟးဖျိးလၢအဘၣ်တၢ်ညၣ်ဂိၢ်တၢ်ဆါသ့ၣ်တဖၣ်အံၤလၢကဒိးန့ၢ်ဘၣ်ကသံၣ်ကသီအဂီၢ် ခီဖျိကျဲတၢ်အိၣ်သးတၢ်ဘံၣ်တၢ်ဘၢတအိၣ်ဘၣ်အဃိဒ်လိၣ်ဘၣ်အသိးဟးၦ့ၤတန့ၢ်၀ဲဘၣ်အဂ့ၢ်န့ၣ် ဟီၣ်က၀ီၤ ဆူၣ်ချ့ၦၤဘၣ်မူဘၣ်ဒါတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ၦၤအိၣ်တဆူၣ်ဘၣ်ဟဲအါထီၣ်မီၤနီၤႉယဆိမိၣ်ကဘၣ်မ့ၢ်လၢမူခိၣ်စူၤတၢ်ချံၣ်အဃိလီၤႉပသမံသမိးအသွံၣ်မးကဲ၀ဲဒၣ်တၢ်ညၣ်ဂိၢ်တၢ်ဆါမီၤနီၤႉခဲအံၤဖဲပအိၣ်တၢ်လီၢ်အံၤၦၤဘၣ်အိၣ်အဂၤ(၄၀)ဘျဲၣ်လံႉသ၀ီလၢအဂၤတနီၤနါက့ပသမံသမိးန့ၣ်ပထံၣ်ၦၤဘၣ်တၢ်ညၣ်ဂိၢ်တၢ်ဆါအိၣ်စ့ၢ်မီၤနီၤႉခဲအံၤၦၤဆါဒီးကသံၣ်ကသီန့ၣ်တကၢကီၣ်လိာ်သးဘၣ်ႉကလဲၤၦ့ၤဒၢးတညီဘၣ်”အဂ့ၢ်နၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ကမျၢၢ်ၦၤဃ့ၢ်မှံဟးဖျိးလၢအဘၣ်တၢ်ညၣ်ဂိၢ်တၢ်ဆါသ့ၣ်တဖၣ်အံၤဒ်သိးအ၀ဲသ့ၣ်တၢ်ဆါကကိညၢ်ထီၣ်အဂီၢ်န့ၣ် ဖဲကသံၣ်ကသီအိၣ်အသိးဘၣ်ကွၢ်အံးထွဲကွၢ်ထွဲကူစါယါဘျါ၀ဲဒ်န့ၣ်လီၤဒီးလိၣ်ဘၣ်စ့ၢ်ကီး၀ဲကသံၣ်ကသီသ့ၣ်တဖၣ်အဂ့ၢ်န့ၣ် ဆူၣ်ချ့ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ကီးတရံးဟီၣ်က၀ီၤ တၢ်ပၢၢ်ဆၢသုးပာ်ဖှိၣ်သုးကျိၤ ကသံၣ်သရၣ်တဂၤစံး၀ဲလၢ“တၢ်လၢတၢ်ညၣ်ဂိၢ်တၢ်ဆါန့ၣ်အိၣ်ကမံၤမံၤ မီၤနီၤႉဒိးသန့ၤထီၣ်သးလၢအကလုာ်ဖီခိၣ်ဒီးပဘၣ်ဒုးအီကသံၣ်မီၤနီၤႉအခဲအံၤၦၤဘၣ်အါလၢ(PV)အကလုာ်မီၤနီၤႉ(Primaquine)ကသံၣ်န့ၣ်ကၤဒိၣ်မးႉတၢ်ဆါဟံၣ်ကသံၣ်ဒၢးအိၣ်ဖဲအံၤတဖၣ်နါက့တဒိးန့ၢ်ဘၣ်ကသံၣ်ကသီဘၣ်န့ၣ်မ့ၢ်၀ဲဒၣ်တၢ်ဂ့ၢ်ကီလၢအရ့ဒိၣ်ဖးဒိၣ်တခါညါမီၤနီၤ”အဂ့ၢ်န့ၣ် စံး၀ဲန့ၣ်လီၤႉ ဒ်န့ၣ်အသိးလၢနိၣ်တကီကီၢ်ဆၣ်ဒူသ၀ီတနီၤအပူၤစ့ၢ်ကီးလီၢ်က၀ီၤသ၀ီဖိတဖၣ်ဘၣ်၀ဲတၢ်ညၣ်ဂိၢ်တၢ်ဆါအံၤလံအဂ့ၢ်န့ၣ် ဆူၣ်ချ့ၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ
ခီဖျိပယီၤသုးခးလီၤကျိဖးဒိၣ်အဃိကမျၢၢ်သံ(၁)ဂၤႇဘၣ်ဒိခံဂၤအကျါပၣ်ဃု၁်ဖိသၣ်(၅)နံၣ်တဂၤ
လါမ့ၤ ၁၉ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)တၢ်ပၢဟီၣ်က၀ီၤ ဒူသထူၣ်ကီၢ်ဆၣ်အပူၤ ဖဲလါမ့ၤ ၁၄ သီအနံၤန့ၣ် ပယီၤသုးလၢအိၣ်ပနွဲၢ်ကျါသ၀ီပူၤတဖၣ်အံၤခးလီၤကျိဖးဒိၣ်လၢသ၀ီကရူၢ် ကမျၢၢ်အိၣ်ဆိးလီၢ်ကျဲအဃိ ကမျၢၢ်သံ(၁)ဂၤဒီးဘၣ်ဒိ(၂)ဂၤအကျါပၣ်ဃုာ်၀ဲဖိသၣ်(၅)နံၣ်တဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ တၢ်တနံၤန့ၣ်ပယီၤသုးခးလီၤကျိဖးဒိၣ်(၈)ဖျၢၣ်အကျါလီၤတဲာ်ပိၢ်ဖးထီၣ်လၢပနွဲၢ်ကျဲသ၀ီကရူၢ်ႇ (သာသနာကုန်း)သ၀ီပူၤ သ၀ီဖိတဂၤအဟံၣ်ကပၤတဖျၢၣ်အဃိ သ၀ီဖိပိာ်ခွါသံ(၁)ဂၤဒီး ၦၤဖိသၣ်(၅)နံၣ်တဂၤဒီး ၦၤမုၢ်ၦၢ်(၄၉)နံၣ်တဂၤ ဘၣ်ဒိဘၣ်ထံး၀ဲအဂ့ၢ်န့ၣ် ဟီၣ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်စံး၀ဲန့ၣ်လီၤႉ လၢန့ၣ်အမဲာ်ညါခီဖျိမ့ၣ်ပိၢ်လီၤတဲာ်ပိၢ်ဖးထီၣ်လၢပနွဲၢ်ကျါသ၀ီပူၤတဖျၢၣ်အဃိဘၣ်၀ဲဒၣ်သ၀ီဖိပိာ်ခွါတဂၤအဟၢဖၢအသိး မ့မ့ၢ်ကျိဖးဒိၣ်လၢအဂၤသ့ၣ်တဖၣ်န့ၣ်လီၤတဲာ်ပိၢ်ဖးထီၣ်လၢ(အလယ်)သ၀ီႇနိၣ်ထိၣ်ဒ့ၣ်သီသ၀ီဒီးထံညၣ်လူၢ်သ၀ီပူၤအဃိ ဘၣ်ဟးဂီၤ၀ဲၦၤဟံၣ်ၦၤဃီတနီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ခီဖျိပယီၤသုးခးလီၤကျိဖးဒိၣ်ကမျၢၢ်သံဘၣ်ဒိဘၣ်ထံးအိၣ်အဃိလီၢ်က၀ီၤသ၀ီဖိတဖၣ်စ့ၢ်ကီးပျံၤတၢ်ဖုးတၢ်အဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ “ပယီၤသုခးလီၤကျိဖးဒိၣ်အဃိပဟးထီၣ်က့ၤလီၤဒီးပကလဲၤဖံးလဲၤတၢ်အဂီၢ်န့ၣ်တၢ်ဘံၣ်တၢ်ဘၢတအိၣ်လၢၤဘၣ်ႉ ၦၤဟံၣ်တနီၤန့ၣ်လဲၤစံၣ်အိၣ်လၢအဘူးအတံၢ်အိၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲအပူၤကွံာ်လါမ့ၤ ၁၄ သီအခါန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်နုာ်လီၤခး၀ဲ ပနွဲၢ်ကျါပယီၤသုးကလၢၤအံၤလၢကဘီယူၤဒြိအဃိ ပယီၤသုးသံ(၄)ဂၤႇဘၣ်ဒိ(၅)ဂၤန့ၣ်လီၤႉ တၢ်ကဲထီၣ်သးဖဲန့ၣ်၀ံၤလီၢ်ခံန့ၣ် ပယီၤသုးခးလီၤကဒါကျိဖးဒိၣ်လၢသ၀ီပူၤဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤအ့နဲၤ စံး၀ဲန့ၣ်လီၤႉ အ၀ဲစံး၀ဲလၢ“ၦၤသ၀ီဖိတနီၤန့ၣ်လဲၤစံၣ်အိၣ်လၢတၢ်လီၢ်အဂၤမီၤနီၤႉၦၤအိၣ်တ့ၢ်လၢသ၀ီပူၤတဖၣ်နါက့လဲၤက့ၤဖံးမၤတၢ်တသဘျ့ဘၣ်အဃိကမၤအီၣ်မၤအီတၢ်အဂီၢ်တၢ်ဃံးတၢ်စ့ၤထီၣ်မီၤနီၤႉသ၀ီဖိလၢအဃ့ၢ်ထီၣ်တဖၣ်န့ၣ်အနီၣ်ဂံၢ်အိၣ်ဆံးအါလဲၣ်ခီန့ၣ်ပတသ့ၣ်ညါလီၤတံၢ်လီၤဆဲးဒံးဘၣ်ပဟးထၢစရီအဖၢမုၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ ဒ်န့ၣ်အသိးဖဲအပူၤကွံာ်လါမ့ၤ ၂၂ သီအခါစ့ၢ်ကီး (KNLA)သုးပာ်ဖှိၣ်နုာ်လီၤခးဒံး၀ဲပနွဲၢ်ကျါပယီၤသုးကလၢၤအံၤ လၢကဘီယူၤဒြိဒံးအဂ့ၢ်န့ၣ် သ့ၣ်ညါဘၣ်လၢတၢ်ပၢၢ်ဆၢသုးပာ်ဖှိၣ်ကရူၢ်အအိၣ်န့ၣ်လီၤႉ ဖဲအပူၤကွံာ်လါအ့ဖြ့ၣ်အခါခီဖျိပယီၤသုးခးလီၤကျိဖးဒိၣ်လၢ(ဘံလ့)ကီၢ်ဆၣ် ဒူသ၀ီတဖၣ်အပူၤအဃိ လီၢ်က၀ီၤကမျၢၢ်အဂၤ(၇၀၀၀)ဘျဲၣ်ဘၣ်ဃ့ၢ်ထီၣ်၀ဲအသိး လၢအံကၠုၢ်ခံသ၀ီဒီးနးကၠံသ၀ီအပူၤ လါမ့ၤ ၁၅ သီဒီး ၁၆ သီ လၢခံသီအတီၢ်ပူၤ တၢ်ဒုးကဲထီၣ်၀ဲလၢတၢ်ပၢၢ်ဆၢသုးပာ်ဖှိၣ်ဒီးပယီၤသုးအဘၢၣ်စၢၤအိၣ်၀ဲ(၆)ဘျီညါဒီး...
ကရ့ၣ်နံၣ်ကီၢ်စဲၣ်အပူၤကမျၢၢ်ၦၤဃ့ၢ်မှံဟးဖျိးတဖၣ်လိၣ်ဘၣ်၀ဲတၢ်အိၣ်တၢ်ဆိးလီၢ်ကျဲဒီးတၢ်ခိၣ်ဒုးတဖၣ်
လါမ့ၤ ၁၉ သီႇ ၂၀၂၃ နံၣ်ႇ ခ့ၣ်အဲးစံၣ် လၢကရ့ၣ်နံၣ်ကီၢ်စဲၣ်အပူၤ ခီဖျိတၢ်စူၤလီၤလံအဃိကမျၢၢ်လၢအဘၣ်ဃ့ၢ်မှံဟးဖျိးသ့ၣ်တဖၣ်အံၤ လိၣ်ဘၣ်၀ဲဂ့ၢ်ဂီၢ်အူ တၢ်အိၣ်တၢ်ဆိးလီၢ်ကျဲဒီးတၢ်ခိၣ်ဒုးသ့ၣ်တဖၣ်အဂ့ၢ်န့ၣ် သ့ၣ်ညါဘၣ်လၢၦၤမၤစၢၤၦၤဃ့ၢ်မှံဟးဖျိးတဖၣ်အအိၣ်န့ၣ်လီၤႉ စးထီၣ်ဖဲလါမ့ၤ ၁၁ သီအခါန့ၣ် ခီဖျိတၢ်စူၤတပယူာ်ဃီအဃိ ကရ့ၣ်နံၣ်ကီၢ်စဲၣ် ဖရူၤစိၤဒီးဒံၤမီၣ်စိၤကီၢ်ဆၣ်အပူၤ ကမျၢၢ်ၦၤဃ့ၢ်မှံဟဖျိးသ့ၣ်တဖၣ်အံၤတၢ်ကီတၢ်ခဲအိၣ်ထီၣ်လၢတၢ်အိၣ်တၢ်ဆိးလီၢ်ကျဲအဃိ လိၣ်ဘၣ်၀ဲဒၣ် တၢ်အိၣ်တၢ်ဆိးလီၢ်ကျဲဒီးတၢ်ခိၣ်ဒုးသ့ၣ်တဖၣ်အဂ့ၢ်န့ၣ် ကရ့ၣ်နံၣ်ဂ့ၢ်၀ီခွဲးယာ်ကရူၢ် ၦၤနဲၣ်တၢ် ကိၤဘညါ စံး၀ဲဒ်အံၤ န့ၣ်လီၤႉ အ၀ဲစံး၀ဲလၢ“ဖဲလါထီၣ် ၁၁ သီႇ ၁၂ သီႇ ၁၃ သီအခါန့ၣ် တၢ်စူၤဖးဒိၣ်ညါမီၤနီၤႉဟးထီၣ်က့ၤလီၤနါက့ကီခဲထီၣ်ႉ ပထံၣ်ဘၣ်လၢကမျၢၢ်ၦၤဃ့ၢ်မှံဟးဖျိးလၢအလဲၤစံၣ်အိၣ်လၢၦၢ်ပူၤသ့ၣ်တဖၣ်အံၤပာ်ဖျါထီၣ်ၦၤဆှၢထီၣ်လံာ်လၢတၢ်ကီတၢ်ခဲအိၣ်လၢတၢ်ခိၣ်ဒုးသ့ၣ်တဖၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးကရ့ၣ်နံၣ်ကီၢ်စဲၣ်ပူၤ ဒဲတၢ်သူၣ်ထီၣ်လၢကမျၢၢ်ၦၤဃ့ၢ်မှံဟးဖျိးအိၣ်၀ဲသ့ၣ်တဖၣ်အံၤခီဖျိတၢ်ခိၣ်ဒုး တလၢတလီၣ်ဘၣ်အဃိလၢၦၤသူၣ်က့သးၦၢ်ဒီးၦၤဖိဒံဖိသၣ်တဖၣ်အဂီၢ်တၢ်ကီတၢ်ခဲအိၣ်ထီၣ်လၢတၢ်အိၣ်တၢ်ဆိးလီၢ်ကျဲဒီးတၢ်အိၣ်ဆူၣ်အိၣ်ချ့တကပၤအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ “အ၀ဲသ့ၣ်တ့ထီၣ်ဒဲန့ၣ်တၢ်ခိၣ်ဒုးတလၢဘၣ်ႉအဃိအ၀ဲသ့ၣ်ဘၣ်လဲၤသုးလီၢ်လဲၤအိၣ်ဆိလၢဟံၣ်လၢအခိၣ်တလီၤစီၤ ဘၣ်သ့ၣ်တဖၣ်န့ၣ်မီၤနီၤႉဒဲတဘံၣ်တဘၢဘၣ်အဃိတၢ်ကီတၢ်ခဲအိၣ်လၢၦၤသူၣ်က့သးၦၢ်ဒီးၦၤဖိဒံဖိသၣ်တဖၣ်အဂီၢ်လီၤႉ ခဲအံၤနါက့မူခိၣ်မ့စူၤန့ၣ်စူၤဖးဒိၣ်ႇတၢ်မ့ကိၢ်နါက့ကိၢ်ဖးဒိၣ်လီၤ”အဂ့ၢ်န့ၣ် ကမျၢၢ်ၦၤဃ့ၢ်မှံဟးဖျိးတဂၤစံး၀ဲန့ၣ်လီၤႉ လၢကရ့ၣ်နံၣ်ကီၢ်စဲၣ်အပူၤဟီၣ်က၀ီၤကရ့ၣ်နံၣ်တၢ်ပၢၢ်ဆၢဖီၣ်စုက၀ဲၤကရူၢ်ဒီးပယီၤသုးအဘၢၣ်စၢၤတၢ်ဒုးဆဲးကဲထီၣ်ဒံး၀ဲတပယူာ်ဃီအသိးခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်အဘျီတဖၣ်အဘျီအဃိဟီၣ်က၀ီၤကမျၢၢ်(၂)ကလီၢ်ဘျဲၣ်ဘၣ်ဃ့ၢ်မှံဟးဖျိး၀ဲဒီးလၢၦၤသ့ၣ်တဖၣ်အံၤအဂီၢ်လိၣ်ဘၣ်ဒံး၀ဲတၢ်ဆီၣ်ထွဲမၤစၢၤသ့ၣ်တဖၣ်အဂ့ၢ်န့ၣ် သ့ၣ်ညါဘၣ်လၢၦၤမၤစၢၤ ၦၤဃ့ၢ်မှံဟးဖျိးတဖၣ်အအိၣ်န့ၣ်လီၤႉ
ခီဖျိပယီၤသုးနု၁်လီၤအိၣ်လၢ(သံမိုးတောင်)ကၠိကရၢၢ်ပူၤအဃိတၢ်ကီတၢ်ခဲအိၣ်လၢကက့ၤအိးထီၣ်ကဒါကၠိ
လါမ့ၤ ၁၈ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် သၣ်တီၣ်ကၠံ၀့ၢ် လ့ၣ်သိၤဟီၣ်က၀ီၤအပူၤ စးထီၣ်လါမ့ၤထီၣ်တနွံတုၤလၢခဲအံၤတစုန့ၣ် ခီဖျိပယီၤသုးနုာ်လီၤအိၣ်ဆီလီၤသးလၢ(သံမိုးတောင်)သ၀ီ ကၠိကရၢၢ်ပူၤအဃိ တၢ်ကီတၢ်ခဲအိၣ်လၢကက့ၤအိးထီၣ် ကဒါကၠိအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤႉ ဖဲအပူၤကွံာ်(၂၀၂၂)လါနိၣ်၀့ဘၢၣ်အခါ လၢ(သံမိုးတောင်)သ၀ီအပူၤ တၢ်ဒုးကဲထီၣ်၀ဲလၢပယီၤသုးဒီး ဟီၣ်က၀ီၤတၢ်ပၢၢ်ဆၢသုးကရူၢ်အဘၢၣ်စၢၤဒီးခီဖျိပယီၤသုးခးလီၤကျိဖးဒိၣ်ဒီးကဘီယူၤဟဲခးလီၤတၢ်အဃိ လီၢ်က၀ီၤကမျၢၢ်တဖၣ်အါဒၣ်တက့ၢ်ဘၣ်ဃ့ၢ်ထီၣ်၀ဲဒၣ်န့ၣ်လီၤႉ ဖဲတလါအံၤလါမ့ၤအတီၢ်ပူၤစ့ၢ်ကီးခီဖျိပယီၤသုးအိၣ်ဒံးဖဲကၠိကရၢၢ်ပူၤဒီးတၢ်ဒုးကဲထီၣ်တလီၢ်လီၢ်အဃိ က့ၤအိးထီၣ်ကဒါကၠိတသ့ဒံးဘၣ်အဂ့ၢ်န့ၣ် ၦၤလၢအဘူးဒီးကၠိၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ လီၢ်က၀ီၤပိာ်မုၣ်တဂၤစံး၀ဲလၢ“တနံၣ်အံၤၦၤက့ၤအိးထီၣ်ကဒါကၠိတညီဘၣ်အဃိသရၣ်မုၣ်တဂၤတဲ၀ဲလၢၦၤကၠိဖိလၢအဲၣ်ဒိးလဲၤထီၣ်က့ၤကၠိလၢအဂၤတဖၣ်န့ၣ်မၢဟဲဟံကၠိလံာ်အုၣ်သးမီၤနီၤႉမ့ၢ်ယကဘၣ်ဒ်လဲၣ်မးတသ့ၣ်ညါလၢၤဘၣ်ႉ ၦၤလၢအကျိၣ်အိၣ်စ့အိၣ်ညါလဲၤပာ်က့ၤအဒံၣ်အဖိကၠိလၢအဂၤသ့၀ဲဘၣ်ဆၣ်မ့မ့ၢ်လၢၦၤမုၢ်ဆ့ၣ်မုၢ်ဂီၤဖိတဖၣ်အဂီၢ်ဒုတညီနီတစဲးဘၣ်”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါဒူသ၀ီလၢအိၣ်ဘူးဖဲတၢ်ခိၣ်တၢ်ဃၢၤဖဲန့ၣ်ၦၤကၠိဖိလၢဖျိထီၣ်တီၤဖုၣ်သ့ၣ်တဖၣ်ဟဲထီၣ်ကဒါ၀ဲ (သံမိုးတောင်)တီၤထီကၠိအံၤလီၤဒီးခီဖျိတၢ်က့ၤအိးထီၣ်ကဒါကၠိတသ့လၢၤဘၣ်အဃိဘၣ်ကိၢ်ဘၣ်ဂီၤတၢ်လၢဒံၣ်ဖိတၢ်ကူၣ်ဘၣ်ကူၣ်သ့ခါဆူညါအဂီၢ်ဒိၣ်မးအဂ့ၢ်န့ၣ် ၦၤကၠိဖိမိၢ်ပၢ်လၢအဃ့ၢ်တၢ်ဒုးတဂၤစံး၀ဲန့ၣ်လီၤႉ “ဖဲမဟိတနံၣ်န့ၣ်တၢ်ဒုးကဲထီၣ်၀ံၤကၠိက့ၤအိးထီၣ်ကဒါၦၤဒိးစဲးနံၣ်ကတၢၢ်တၢ်ဒိးစဲးဒံးႉဘၣ်ဆၣ်လၢလီၢ်ခံအံၤတၢ်ဒုးကဲထီၣ်တပယူာ်ဃီအဃိၦၤက့ၤပံးကဒါကၠိမီၤနီၤႉမ့ၢ်ဘၣ်မၤက့ၤဒ်လဲၣ်မးတသ့ၣ်ညါလၢၤဘၣ်လၢဖိသၣ်တၢ်ကူၣ်ဘၣ်ကူၣ်သ့အဂီၢ်အံၤႉခဲအံၤကၠိနါက့ကက့ၤအိးထီၣ်ကဒါလီၤႇပဘၣ်စံၣ်အဖၢမုၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲလီၢ်က၀ီၤကမျၢၢ်သ့ၣ်တဖၣ်အံၤစံၣ်မှံဟးဖျိးအခါန့ၣ်ပယီၤသုးနုာ်လီၤဟုၣ်အ၀ဲသ့ၣ်တၢ်ဖိတၢ်လံၤအိၣ်၀ဲအသိး ခီဖျိပယီၤသုးခးလီၤကျိဖးဒိၣ်ဆူသ၀ီပူၤတၢ်ဖံးအီၣ်မၤအီၣ်လီၢ်ကျဲကရၢၢ်ပူၤအဃိလၢကဖံးအီၣ်မၤအီၣ်တၢ်အဂီၢ်တၢ်အိၣ်နီတမံၤလၢၤဘၣ်အဃိထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ဖဲအပူၤကွံာ်လါမ့ၤ ၁၁ သီအခါစ့ၢ်ကီး ပယီၤသုးလၢအိၣ်(သံမိုးတောင်)ကၠိကရၢၢ်ပူၤတဖၣ်အံၤဒီးကညီဒီကလုာ် တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤတၢ်ဒုးကဲထီၣ်၀ဲအဃိ ပယီၤသုးသံ(၁)ဂၤဒံးအဂ့ၢ်န့ၣ် သ့ၣ်ညါဘၣ်လၢ ခ့ၣ်အဲၣ်ယူၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိအအိၣ်န့ၣ်လီၤႉ လၢန့ၣ်အမဲာ်ညါဖဲတၢ်တနံၤဃီ၀ဲန့ၣ်ဟါခီအဆၢကတီၢ် (Alpha One)ကရူၢ်လဲၤထီၣ်ခး၀ဲ သၤမိတီၤ ပယီၤသုးကလၢၤအံၤ လၢကဘီယူၤဒြိ၀ံၤလီၢ်ခံ ခီဖျိပယီၤသုးက့ၤခးလီၤကဒါကျိဖးဒိၣ်လၢ(သၤမိတီၤ)ဆၢခိၣ် သ၀ီပူၤ အဃိ ဟံၣ်ဟးဂီၤ၀ဲ(၃)ဖျၢၣ်ဒီးကျီးဟးဂီၤ၀ဲတနီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ပယီၤသုးကျိၤလၢအမၤသံမၤ၀ီကမျၢၢ်အါအါဂီၢ်ဂီၢ်တဖၣ်အံၤဆဲးနု၁်လီၤကဒီးလၢမူကီၢ်ဆၣ်ပူၤ
လါမ့ၤ ၁၈ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်က၀ီၤ မိကီၢ်ဆၣ်အပူၤ ပယီၤသုးကျိၤလၢအမၤသံဒွဲၣ်အူအီၣ်ကွံာ်(ညီၤပ့ၤသၤ)ကမျၢၢ် ၁၉ ဂၤသ့ၣ်တဖၣ်အံၤ တကီၢ်ခဲအံၤအ၀ဲသ့ၣ်ဆဲးနုာ်လီၤ ဟူးဂဲၤကဒီး၀ဲလၢမူကီၢ်ဆၣ်ပူၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲလါမ့ၤ ၁၆ သီ အနံၤန့ၣ်လီၤႉ ပယီၤသုးကျိၤအံၤဖဲအပူၤကွံာ်လါမ့ၤ ၁၄ သီအခါဟဲတုၤ၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၈)ဟီၣ်က၀ီၤ (ကျောင်းစု)ပီၤပံၢ်ဒဲကရူၢ်ပူၤ၀ံၤ ဖီၣ်မၤသံဒွဲၣ်အူအီၣ်၀ဲကမျၢၢ်သ့ၣ်တဖၣ်အဃိ သ၀ီလၢအိၣ်တၢ်ခိၣ်တၢ်ဃၢၤဖဲန့ၣ်(၈)ဖျၢၣ်ကမျၢၢ်အဂၤ(၈၀၀၀)ဘျဲၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ ဖဲလါမ့ၤ ၁၀ သီအခါ ပယီၤသုးကျိၤသုးပာ်ဖှိၣ်လၢအမၤသံဒွဲၣ်အူအီၣ်ကွံာ်ကမျၢၢ်(၁၉)ဂၤသ့ၣ်တဖၣ်အံၤန့ၣ် ဖဲလါမ့ၤ ၁၁ သီ အနံၤ ဆဲးနုာ်လီၤလၢ(ရေအိုးစဉ်)သ၀ီပူၤအခါ တၢ်ဒုးကဲထီၣ်၀ဲဒီး(KNLA)သုးရ့ၣ် ၈ အဘၢၣ်စၢၤအသိး ဖဲန့ၣ်တဆီလါမ့ၤ ၁၃ သီအနံၤ တၢ်ဒုးကဲထီၣ်ကဒီးလၢ(မီးတိုင်တော)သ၀ီပူၤတဘျီႇ လါမ့ၤ ၁၄ သီ လၢ(ကျောင်းစု)ပီၤပံၢ်ဒဲသ၀ီပူၤတဘျီ အဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲလၢ“လၢမူကီၢ်ဆၣ်ဟီၣ်က၀ီၤႇမ့၀ံၤလၢမူ–နၣ်သၤကွ့တကပၤန့ၣ် ပယီၤသုးနုာ်ဟူးဂဲၤ၀ဲလီၤႉတၢ်ဒုးကဲထီၣ်တကးဒံးဘၣ်နုာ်လီၤစ့ၢ်ကီးလၢသ၀ီပူၤအဃိနးဒိၣ်ထီၣ်ရုၢ်ရုၢ်လီၤႉၦၤဃ့ၢ်မှံဟးဖျိးတဖၣ်နါက့တၢ်ခိၣ်ဒုးတအိၣ်ဘၣ်ႉတၢ်အီၣ်တၢ်အီနါက့တအိၣ်ဘၣ်ႇတၢ်လဲၤတၢ်က့ၤနါက့ကီခဲထီၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်ခ့ၣ်အဲၣ်ယူၣ်လံာ်တၢ်ထုထီၣ်ပာ်ဖျါအသိးန့ၣ်သ၀ီ(၈)ဖျၢၣ်သ၀ီဖိလၢအဃ့ၢ်ထီၣ်သ့ၣ်တဖၣ်အံၤဟံၣ်ခိၣ်ခဲလၢာ်အိၣ်၀ဲ (၁၇၄၈)ဖျၢၣ်ႇၦၤနီၣ်ဂံၢ်အိၣ်၀ဲ(၈၆၉၆)ဂၤဒီးထံၣ်ဘၣ်၀ဲတၢ်ကီတၢ်ခဲအါမးအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ် လီၤႉ ပယီၤသုးလၢအဟဲနုာ်လီၤလၢ(ခ့ၣ်အဲၣ်ယူၣ်)ချၢၣ်လွံၢ်ထူၣ်ကီၢ်ရ့ၣ်ပူၤသ့ၣ်တဖၣ်အံၤမၤကမၣ်၀ဲၦၤဂ့ၢ်၀ီခွဲးယာ်လၢကမျၢၢ်ထံဖိကီၢ်ဖိအဖီခိၣ်ဒီးကမျၢၢ်လၢအဘၣ်ဃ့ၢ်ထီၣ်လၢပယီၤသုးအဃိသ့ၣ်တဖၣ်အံၤန့ၣ်တၢ်ကီတၢ်ခဲအိၣ်လၢကဒိးန့ၢ်ဘၣ်တၢ်ဆီၣ်ထွဲမၤစၢၤအဂ့ၢ်န့ၣ်ကညီတၢ်တိစၢၤမၤစၢၤတၢ်မုာ်တၢ်ခုၣ်ၦာ်ဘျးစဲ(KPSN)ၦၤကတိၤတၢ်ပၢ နီၢ်၀ါခုၣ်ဆှံ စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ “လၢန့ၣ်တကပၤခီန့ၣ်အိၣ်ယံၤတစဲးမီၤနီၤတအိၣ်လၢကီၢ်ဆၢဘၣ်အဃိကလဲၤလၢအ၀ဲသ့ၣ်အိၣ်အဂီၢ်ခီန့ၣ်လဲၤတတုၤဒ်သိးၦၤဟဲအိၣ်လၢကီၢ်ဆၢသ့ၣ်တဖၣ်အံၤဘၣ်မီၤနီၤႉမ့ဘၣ်တဲကီၢ်ဆၢသ့ၣ်တဖၣ်ဒၣ်လဲာ်န့ၣ်တမ့ၢ်တၢ်လၢတၢ်လီၣ်ဘၣ်ႉအိၣ်ဒၣ်လၢပလဲၤမၤစၢၤလၢဂ့ၢ်ဂီၢ်အူလၢအဘူးဒီးကီၢ်ဆၢသ့ၣ်တဖၣ်မီၤနီၤႉလၢတၢ်ကိပူၤတကပၤခီဒုခဲအံၤခီဖျိပတၢ်ဆီၣ်ထွဲမၤစၢၤတအိၣ်လၢလၢလီၣ်လီၣ်ဘၣ်အဃိမ့အိၣ်န့ၣ်ပမၤစၢၤသ့လီၤႉတၢ်ကီလၢတၢ်မၤစၢၤတအိၣ်ဘၣ်န့ၣ်ႉအိၣ်ဒၣ်လၢပမၤစၢၤလၢဂ့ၢ်ဂီၢ်အူတဘျီတဘျီဒ်န့ၣ်လီၤ”အဂ့ၢ်န့ၣ် စံး၀ဲန့ၣ်လီၤႉ ပယီၤသုးကျိၤလၢအဟဲနုာ််လီၤခဲအံၤသ့ၣ်တဖၣ်န့ၣ်မ့ၢ်၀ဲသုးတြိၤ(၉၉)စုတီၤဖီလာ်(ခမရ–၁၅) နီၣ်ဂံၢ်(၆)ဒုးယၤပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်စုတီၤဖီလာ်(ခလရ–၈၄)ႇကလံၤထံးကီၢ်ခီသုး၀ဲၤလီၢ်ခိၣ်သ့ၣ် စုတီၤဖီလာ်(ခလရ–၇၃)စယၣ်ကၠံႇ (ခမရ–၅၉၉)ဒီး...
သိလ့ၣ်လၢအလ့ၢ်ထီၣ်လ့ၢ်လိၤဖဲမၠၣ်၀တံၣ်(ကုန်သွယ်ရေးဇုန်)မဲာ်ညါတဖၣ်ပယီၤသုးဒီး(BGF)ဃ့စ့လၢအကလီၢ်ညါ
လါမ့ၤ ၁၈ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် မၠၣ်၀တံၣ်၀့ၢ်ဃၢၤ(ကုန်သွယ်ရေးဇုန်)န့ၣ် ပယီၤသုးဒီးသုးခိးကီၢ်ဆၢ(BGF)ဆီလီၤတြဲၤ အိၣ်ခိးထၢစ့ လၢသိလ့ၣ်လ့ၢ်ထီၣ်လ့ၢ်လိၤသ့ၣ်တဖၣ်အအိၣ်အါမးအဂ့ၢ်န့ၣ် ၦၤနီသိလ့ၣ်ဖိလၢအဘၣ်သဂၢၢ်ဒီးတၢ်ကဲထီၣ်သးလၢ အနီၢ်ကစၢ်တဖၣ်အံၤ စံး၀ဲန့ၣ်လီၤႉ စးထီၣ်ဖဲအပူၤကွံာ်လါအ့ဖြ့ၣ်လၢာ်န့ၣ်ပယီၤသုးဒီး(BGF)ပာ်ဖှိၣ်ထီၣ်သးဆီလီၤတြဲၤဒီးထၢ၀ဲစ့လၢသိလ့ၣ်လ့ၢ်ထီၣ်လ့ၢ်လိၤတဖၣ်အအိၣ်ဒီးဒိးသန့ၤထီၣ်သးလၢသိလ့ၣ်အဒိၣ်အဆံးႇတၢ်ဖိတၢ်လံၤအဖီခိၣ်ဒီးထၢ၀ဲဒၣ်စ့အဂ့ၢ်န့ၣ် ၦၤနီသိလ့ၣ်ဖိလၢအတီၣ်ပနံာ်တၢ်ဖိတၢ်လံၤတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“မ့မ့ၢ်သိလ့ၣ်ဖးဒိၣ်န့ၣ်အါဒၣ်တက့ၢ်ဘၣ်ဟ့ၣ်လီၤႉဘၣ်ဟ့ၣ်တခိၣ်န့ၣ်(၂)ကလီၢ်ညါႉမ့တဟ့ၣ်ဘၣ်န့ၣ်တန့ၢ်ဘၣ်ႉဖဲန့ၣ်အိၣ်၀ဲဒၣ်(BGF)သုးတြဲၤန့ၣ် ၂ ခါႇ ပၢၤကီၢ်ဒီးပယီၤသုးတြဲၤန့ၣ် ၂ ခါလီၤႉ စးထီၣ်ဖဲ(ကုန်သွယ်ရေးဇုန်)ခိၣ်ထိးန့ၣ်တြဲၤအိၣ်၀ဲခဲလၢာ်န့ၣ်(၇)ဘ့ၣ်ညါႉမ့မ့ၢ်သိလ့ၣ်အဆံးတဖၣ်န့ၣ်ကွၢ်၀ဲလၢအတီၣ်တၢ်ဖိတၢ်လံၤအဖီခိၣ်ဒီးဘၣ်ဟ့ၣ်၀ဲဒ်န့ၣ်လီၤႉဖဲတၢ်ဒုးစးထီၣ်ကဲထီၣ်၀ံၤသီသီန့ၣ်အ၀ဲသ့ၣ်တထၢစ့တဘျီဃီဒံးဘၣ်ႇလီၢ်ခံမးအ၀ဲသ့ၣ်မၤအါထီၣ်သုးဂံၢ်ဘါထၢ၀ဲစ့မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤ. ခီဖျိတၢ်အိၣ်ခိးထၢစ့ဟဲအါထီၣ်ဒ်အံၤအဃိၦၤနီသိလ့ၣ်ဖိလၢအတီၣ်တၢ်ဖိတၢ်လံၤသ့ၣ်တဖၣ်အံၤလ့ၢ်ထီၣ်လ့ၢ်လိၤလီၤစှၤ၀ဲဒီးသိလ့ၣ်လၢအဆှၢထီၣ်ဆှၢလီၤၦၤလဲၤတၢ်က့ၤတၢ်ဖိတဖၣ်စ့ၢ်ကီးဃ့သိလ့ၣ်အဘူးအလဲဟဲအါထီၣ်အဃိ ၦၤဒိးသိလ့ၣ်တအိၣ်အါအါလၢၤဘၣ်အဂ့ၢ်န့ၣ် ၦၤနီသိလ့ၣ်ဖိတဖၣ်စံး၀ဲန့ၣ်လီၤႉ ၦၤနီသိလ့ၣ်လၢအဆှၢထီၣ်ဆှၢလီၤၦၤလဲၤတၢ်က့ၤတၢ်ဖိတဂၤစံး၀ဲလၢ“ၦၤအိၣ်ခိးထၢစ့အါတလၢဘျီပဘၣ်ဃ့အါထီၣ်တၢ်လဲၤတၢ်က့ၤအဘူးအလဲစ့ၢ်မီၤနီၤႉအဃိဖဲလီၢ်ခံအံၤၦၤဟးထီၣ်က့ၤလီၤတအိၣ်အါအါလၢၤဘၣ်ႉၦၤလၢအလဲၤထီၣ်ဘီးကီးတဖၣ်န့ၣ်လဲၤက့ၤ၀ဲဒီးဆဲးကဲးဒ်န့ၣ်လီၤႉအဃိနမ့က့ၤဒွးက့ၤၦၤဒိးသိလ့ၣ်ဖိဟ့ၣ်လီၤသိလ့ၣ်အဘူးအလဲဒီးနဘၣ်ဟ့ၣ်လီၤၦၤအိၣ်ခိးထၢစ့တဖၣ်အံၤန့ၣ်တကဲးလၢၤဘၣ်ႇနဘၣ်ထုးထီၣ်က့ၤလၢနကစၢ်ထၢၣ်ပူၤအဃိတၢ်ကီတၢ်ခဲအိၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲအပူၤကွံာ်လါမးရှး ၂၅ သီအခါ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA Cobra သုးကျိၤနုာ်လီၤခး၀ဲ မၠၣ်၀တံၣ်(ကုန်သွယ်ရေးဇုန်)၀ံၤလီၢ်ခံ တၢ်လီၢ်ဖဲန့ၣ်ပယီၤသုးဒီးပၢၤကီၢ်တဖၣ်အိၣ်ခိးတၢ်လီၤစှၤ၀ဲဒီး တကီၢ်ခါခဲအံၤအ၀ဲသ့ၣ်မၤအါထီၣ်သုးဂံၢ်ဘါဆီလီၤတြဲၤအိၣ်ခိးထၢစ့အဂ့ၢ်န့ၣ် ၦၤနီသိလ့ၣ်ဖိတဖၣ်စံး၀ဲန့ၣ်လီၤႉ