ဒ်သိးတၢ်သုတခးလီၤကျိဖးဒိၣ်ဆူသၣ်တီၣ်၀့ၢ်ပူၤလၢၤတဂ့ၤအဂီၢ်တၢ်ဘူၣ်တၢ်ဘါခိၣ်နၢ်လဲၤထိၣ်ဃူထိၣ်ဖိးဒီးပယီၤသုးဘၣ်ဆၣ်ပယီၤသုးခးလီၤကျိဖးဒိၣ်ဒံး
လါအ့ဖြ့ၣ် ၂၉ သီႇ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် သၣ်တီၣ်၀့ၢ်ပူၤ ဒ်သိးပယီၤသုးသုတခးလီၤကျိဖးဒိၣ်တဂ့ၤအဂီၢ်န့ၣ် ဖဲအပူၤကွံာ်လါမးရှးအခါ တၢ်ဘူၣ်တၢ်ဘါခိၣ်နၢ်လၢအိၣ်သၣ်တီၣ်၀့ၢ်ပူၤတဖၣ်အံၤလဲၤထိၣ်ဃူထိၣ်ဖိးဒီးပယီၤသုးအိၣ်၀ဲဘၣ်ဆၣ် ပယီၤသုးခးလီၤကျိဖးဒိၣ်တုၤလၢခဲအံၤတစုအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဖၣ်စံး၀ဲန့ၣ်လီၤႉ ဖဲအပူၤကွံာ်လါယနူၤအါရံၤ ၂၇ သီအခါ တၢ်ဒုးကဲထီၣ်၀ဲလၢပယီၤသုးဒီးတၢ်ဒီသဒၢကမျၢၢ်သုးအဘၢၣ်စၢၤ၀ံၤလီၢ်ခံ ခီဖျိပယီၤသုးခးလီၤကျိဖးဒိၣ်ဆူသၣ်တီၣ်၀့ၢ်ပူၤတပယူာ်ဃီအဃိ လီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲဒီးဖဲန့ၣ်၀ံၤလီၢ်ခံ ဒ်သိးကမျၢၢ်တဖၣ်ကက့ၤအိၣ်ဘၣ်ဘံၣ်ဘံၣ်ဘၢဘၢအဂီၢ်န့ၣ်တၢ်ဘူၣ်တၢ်ဘါကမံးတံာ်ထံၣ်လိာ်တဲသကိးတၢ်ဒီးပယီၤသုးဘၣ်ဆၣ် ပယီၤသုးခးလီၤကျိဖးဒိၣ်တုၤလၢခဲအံၤလီၤအဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ “အ၀ဲသ့ၣ်ထုးထီၣ်ဒံးလံာ်လၢဟဲက့ၤအိၣ်န့ၢ်လံႉ(လ၀က)ခိၣ်လီၢ်လံၤတီၣ်ထီၣ်ဒံး၀ဲလၢအ(ဖ့းစ်ဘူး)ပူၤဒံးႇခဲအံၤအက့ၤဖၠဲးကဒါ၀ဲလံႉၦၤတဲလၢက့ၤအိၣ်န့ၢ်လံအဃိၦၤက့ၤအိၣ်ဒီဒူၣ်ညါႉပယီၤသုးဟးတဲနါစိၤတၢ်တဲ၀ဲလၢၦၤဟဲက့ၤအိၣ်အကျါန့ၣ်ပၣ်ဃုာ်ၦၤ(PDF)ဖိႉဖဲ၀့ၢ်ပူၤအံၤ(PDF)တအိၣ်ဘၣ်ႉခီဖျိကျိဖးဒိၣ်အဃိန့ၣ်(ဒ့မုၢ်လီ)သ၀ီပူၤန့ၣ်ဟံၣ်ခိၣ်လီၤၦီၢ်ခံဖျၢၣ်ညါႉလၢရီဘၢၣ်ကျီးပူၤနါက့ကျိဖးဒိၣ်လီၤတဲာ်စ့ၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်ဘူၣ်တၢ်ဘါခိၣ်နၢ်လၢအလဲၤထံၣ်လိာ်တဲသကိးတၢ်ဒီးပယီၤသုးတဖၣ်န့ၣ်မ့ၢ်၀ဲ(သၣ်တီၣ်၀့ၢ်)ခရံာ်ဖိတၢ်ဘါယွၤသရိာ် ၉ ဖျၢၣ် သရၣ်ဒိၣ်တဖၣ်ႇ ဘူးဒးသီခါဖၠၣ်(၂)ဖျၢၣ်သီခါတဖၣ်ႇၦၤဘၣ်မူဘၣ်ဒါတဖၣ်ဒီး ဖဲအ၀ဲသ့ၣ်တၢၣ်ပီၣ်တဲသကိးတၢ်ဒီးဟီၣ်က၀ီၤပယီၤသုးအခါန့ၣ်ပယီၤသုးအုၣ်ကီၤ၀ဲလၢကျိဖးဒိၣ်တဘၣ်လီၤတဲာ်လၢ၀့ၢ်ပူၤနီတဖျၢၣ်အဂ့ၢ်န့ၣ် ကမံးတံာ်ဖိတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ပယီၤသုးတဲဃာ်၀ဲလၢၦၤဟဲခးအ၀ဲသ့ၣ်မ့တအိၣ်ဘၣ်န့ၣ်ကျိချံတဘၣ်လီၤတဲာ်လၢ၀့ၢ်ပူၤနီတဖျၢၣ်ဘၣ်ႉ ဘၣ်ဆၣ်ခဲအံၤတၢ်ဒုးကဲထီၣ်တအိၣ်ဘၣ်ႇဘၣ်မနုၤအဃိဘၣ်ခးလီၤ၀ဲဒ်အံၤလဲၣ်န့ၣ်ပတသ့ၣ်ညါဘၣ်ႉအ၀ဲသ့ၣ်န့ၣ်ၦၤဟ့ၣ်အီၤတၢ်ကစီၣ်အိၣ်အဃိခးလီၤ၀ဲဧါန့ၣ်လီၤဆိမိၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါကမံးတံာ်အံၤဒ်သိးလီၢ်က၀ီၤကမျၢၢ်လၢအဘၣ်ဃ့ၢ်ဘၣ်စံၣ်တဖၣ်အံၤတၢ်ဘၣ်ဂီၢ်ဘၣ်ဒွါတအိၣ်ဘၣ်အဃိဘၣ်ရဲၣ်ကျဲၤန့ၢ်၀ဲဒ်အံၤဒီးတမ့ၢ်မၢဟဲက့ၤအိၣ်န့ၢ်ဆူၣ်ဘၣ်အဂ့ၢ်န့ၣ် ကမံးတံာ်ဖိတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ “ၦၤကိးဂၤဒဲးန့ၣ်တၢ်မုာ်ဘၣ်အ၀ဲသ့ၣ်လၢအကစၢ်၀့ၢ်အကစၢ်ဒူသ၀ီပူၤလီၤမီၤနီၤႉတမ့ၢ်ပမၢအဟဲက့ၤအိၣ်န့ၢ်ဆူၣ်ဘၣ်ႉၦၤတနီၤသံကွၢ်၀ဲလၢမ့က့ၤအိၣ်န့ၣ်ၦၤဟံမူဒါလၢတၢ်ဘံၣ်တၢ်ဘၢအဂီၢ်ဧါဒ်န့ၣ်အိၣ်မီၤနီၤႉပကစၢ်တၢ်ဘံၣ်တၢ်ဘၢခီန့ၣ်ပကစၢ်ဘၣ်ဟံမူဒါလီၤႉတဲ၀ဲလၢၦၤလၢအဲၣ်ဒိးဟဲက့ၤအိၣ်န့ၣ်ဟဲက့ၤအိၣ်သ့လီၤႉပတဆိကမိၣ်လၢအကဟဲကဲထီၣ်သးဒ်အံၤဘၣ်ႉ ပတဆၢမုၢ်လၢ်လၢအကကဲထီၣ်စ့ၢ်ကီးဘၣ်ႉအကဲထီၣ်ဘျီဒုလၢကမျၢၢ်အဂီၢ်န့ၣ်ပသးတမုာ်စ့ၢ်ကီးဘၣ်”အဂ့ၢ်န့ၣ် ကမံးတံာ်ဖိတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ တကီၢ်ခါခဲအံၤလၢသၣ်တီၣ်၀့ၢ်ခိၣ်၀့ၢ်ဃၢၤန့ၣ်ပယီၤသုးခးလီၤကျိဖးဒိၣ်တအိၣ်လၢၤ၀ဲဘၣ်ဆၣ် ပယီၤသုးကလၢၤလၢအိၣ်(၇)မဲၤတဖၣ်အံၤအိၣ်ခိးသမံသမိး၀ဲပၢၢ်တုၤလၢၦၤဖိသၣ်ႇသူၣ်က့သးၦၢ်လၢအဟးထီၣ်က့ၤလီၤတဖၣ်အံၤဒီးလီၤဆီဒၣ်တၢ်သမံသမိးအါ၀ဲလၢၦၤပိာ်ခွါတဖၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
တၢ်ကြဲၢ်ကီၢ်ဆၣ် မံၣ်ခၠီကရူၢ် ဒူသ၀ီတဖၣ်အပူၤ တၢ်ကီတၢ်ခဲအိၣ်ထီၣ်လၢကသူထံ
လါအ့ဖြ့ၣ် ၂၈ သီႇ ၂၀၂၃ နံၣ်ႇ ခ့ၣ်အဲးစံၣ် လၢဖၣ်အၣ်ကီၢ်ရ့ၣ် တၢ်ကြဲၢ်ကီၢ်ဆၣ် မံၣ်ခၠီကရူၢ် ဒူသ၀ီတဖၣ်အပူၤ ထံကျိလၢလီၢ်က၀ီၤကမျၢၢ်သူ၀ဲအံၤ ခီဖျိသိလ့ၣ်တီၣ်သ့ၣ်တဖၣ်လ့ၢ်ထီၣ်လ့ၢ်လိၤကိးမုၢ်နံၤဒဲးအဃိထံဒုထီၣ်၀ဲဒီးတၢ်ကီတၢ်ခဲအိၣ်ထီၣ်လၢကသူထံသူနိ အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လီၢ်က၀ီၤကမျၢၢ်တဖၣ်အံၤသူ၀ဲထံကျိထံႇကစၢၢ်ထံအံၤလီၤဒီးခီဖျိသိလ့ၣ်တီၣ်သ့ၣ်လၢအဘၣ်ထွဲဒီးသုးခိးကီၢ်ဆၢ(BGF)ဖီၣ်စုက၀ဲၤကရူၢ်အံၤလ့ၢ်ထီၣ်လ့ၢ်လိၤဖၠး၀ဲထံကျိအံၤအဃိထံဒုထီၣ်သူတသ့လၢၤဘၣ်ဒီးသ၀ီဖိတဖၣ်အံၤဘၣ်လဲၤထုးန့ၢ်က့ၤထံလၢထံကျိဆၢခိၣ်လၢအအိၣ်ယံၤဒီးသ၀ီအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲလၢ“ပသ၀ီအံၤတၢ်မ့ကိၢ်ထီၣ်နါက့ထံကျိအံၤတလီၤသံးဘၣ်ႉ ပသူထံဖဲထံကျိတဘိအံၤလီၤႉသိလ့ၣ်တဖၣ်လ့ၢ်ထီၣ်လ့ၢ်လိၤဖဲထံကျိတဘိအံၤလီၤႉထံဒုထီၣ်အဃိၦၤသူထံတသ့လၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ထံကျိအံၤတုၤလၢတၢ်ကိၢ်ခါခဲအံၤန့ၣ်အထံတလီၤသံး၀ဲဘၣ်လီၤယွၤဒံးအဃိလီၢ်က၀ီၤကမျၢၢ်တဘၣ်ကိၢ်ဘၣ်ဂီၤ လၢကသူထံအဂီၢ်ဘၣ်ႇဘၣ်ဆၣ်တနံၣ်အံၤသိလ့ၣ်ထုးသ့ၣ်လ့ၢ်ထီၣ်လ့ၢ်လိၤလၢထံကျိပူၤအံၤအဃိထံဒုထီၣ်၀ဲဒီးထံပဲးလိတဖၣ်စ့ၢ်ကီးဒုထီၣ်၀ဲအသိးထံ(ပဲးလိ)တဖၣ်စ့ၢ်ကီးဟးဂီၤ၀ဲအါမးအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ မံၣ်ခၠီကရူၢ် ဒူသ၀ီတဖၣ်အံၤအပူၤန့ၣ် ခီဖျိၦၤခူၣ်ထံပူၤႇၦၤထုးထီၣ်ထံလၢဟီၣ်ခိၣ်ဖီလာ်(အ၀ီစိတွင်း)တန့ၢ်ဘၣ်အဃိ အ၀ဲသ့ၣ်ဘၣ်ဟံန့ၢ်၀ဲထံလၢတီၢ်နီၢ်ကစၢၢ်ထံတွံၢ်လီၤ၀ဲဒီး(ပဲးလိ)လၢသ၀ီပူၤအိၣ်၀ဲအသိး ဒူသ၀ီလၢ(ပဲးလိ)တတုၤဘၣ်သ့ၣ်တဖၣ်ခီန့ၣ်ဘၣ်သူ၀ဲထံကျိအံၤန့ၣ်လီၤႉ တကီၢ်ခါခဲအံၤခီဖျိထံဒုထီၣ်အဃိလီၢ်က၀ီၤကမျၢၢ်ဘၣ်လဲၤထုးန့ၢ်ထံလၢကစၢၢ်ထံလၢအအိၣ်ယံၤ၀ဲဒီးသ၀ီအံၤလၢကျဲအဘိဘိဒီးကျဲစ့ၢ်ကီးတဂ့ၤ၀ဲဘၣ်အဂ့ၢ်န့ၣ် လီၢ်က၀ီၤကမျၢၢ်လၢအဂၤတဂၤစ့ၢ်ကီးစံး၀ဲန့ၣ်လီၤႉ အ၀ဲစံး၀ဲလၢ“ၦၤလၢအအိၣ်ဒီး(ထီၣ်လၤကၠံၤ)တဖၣ်ခီန့ၣ်လဲၤထုးန့ၢ်ထံဒီး(ထီၤလၤကၠံၤ)မီၤနီၤႉလၢဆဲးကဲးနါက့ၦၤလဲၤထုးအိၣ်စ့ၢ်ႉပဘၣ်လဲၤထုးထံလၢထံကျိဆၢခိၣ်,ဘၣ်လဲၤထုးလၢထံအိၣ်အလီၢ်န့ၣ်မီၤနီၤႉကျဲနါက့တဂ့ၤဘၣ်ႉ နဘၣ်လဲၤခံဂၤမးန့ၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးဖဲအပူၤကွံာ်(၂၀၂၂)လါဒံၣ်စ့ဘၢၣ်အခါန့ၣ် လၢမံၣ်ခၠီကရူၢ် တမိးလါခံသ၀ီအပူၤ ခီဖျိသိလ့ၣ်တီၣ်သ့ၣ်တဖၣ်အံၤလ့ၢ်ထီၣ်လ့ၢ်လိၤလၢထံ(ပဲးလိ)ဖီခိၣ်အဃိထံပဲးလိဟးဂီၤသူတန့ၢ်လၢၤဘၣ်ဒီး သ၀ီဖိတဖၣ်ဘၣ်လဲၤထုးသူက့ၤထံလၢထံကျိအဂၤကဲထီၣ်တ့ၢ်အသးဒံးန့ၣ်လီၤႉ
ကီးတရံး၀့ၢ်ပူၤခီဖျိမ့ၣ်အူတဟဲဘၣ်အဃိ ထံခုၣ်ကိၣ်လိၣ်(ယ့ၤကဲ)အၦ့ၤဒိၣ်ထီၣ်
လါအ့ဖြ့ၣ် ၂၈ သီ, ၂၀၂၃ နံၣ်, ခ့ၣ်အဲးစံၣ် လၢကညီကီၢ်စဲၣ် ကီးတရံး၀့ၢ်ပူၤ ခီဖျိမ့ၣ်အူတဟဲဘၣ်တၢ်ဆၢကတီၢ်ယံၤထီၣ်လံအဃိ ထံခုၣ်ကိၣ်လိၣ်(ယ့ၤကဲ)အၦ့ၤဒိၣ်ထီၣ်၀ဲအဂ့ၢ်န့ၣ် ကမျၢၢ်လၢအိၣ်ကီးတရံး၀့ၢ်ပူၤတဖၣ်စံး၀ဲန့ၣ်လီၤႉ ကီးတရံး၀့ၢ်ပူၤ မ့ၣ်အူတဟဲဘၣ်၀ံၤလီၢ်ခံန့ၣ် ၦၤဘၣ်လဲၤၦ့ၤထံခုၣ်ကိၣ်လိၣ်(ယ့ၤကဲ)အံၤလၢဖၣ်အၣ်၀့ၢ်ႇတလၢၤကီၢ်စဲၣ် မီၣ်လမၠဲၣ်၀့ၢ်ပူၤဒီး ခီဖျိကျဲတၢ်လၢာ်ဘူၣ်လၢာ်စ့လၢာ်အါအဃိ အၦ့ၤဘၣ်ထီၣ်၀ဲဒ်အံၤလီၤအဂ့ၢ်န့ၣ် ကီးတရံး၀့ၢ်ပူၤ ကမျၢၢ်လၢအလဲၤၦ့ၤဆါထံခုၣ်ကိၣ်လိၣ်(ယ့ၤကဲ)တဂၤစံး၀ဲဒ်အံၤန့ၣ်လီၤႉ “ဖဲကီးတရံးအံၤမ့ၣ်အူတဟဲဘၣ်အဃိ(ယ့ၤကဲ)တၢ်မၤလီၢ်ပံးမီၤနီၤႉခဲအံၤယ့ၤကဲန့ၣ်ပဘၣ်မၢ်လီၤအီၤလၢမီၣ်လမၠဲၣ်ႇ လၢဖၣ်အၣ်၀့ၢ်ညါႉနလဲၤၦ့ၤယ့ၤကဲန့ၣ်ဘၣ်ဟ့ၣ်ကါလဲၦ့ၤဒိၣ်အဃိယ့ၤကဲနါက့အၦ့ၤဘၣ်ထီၣ်၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ခီဖျိတၢ်ကိၢ်ဒိၣ်အဃိပၦ့ၤယ့ၤကဲအါ၀ဲဒီးယ့ၤကဲအံၤတၢ်ထၢနုာ်သူစ့ၢ်ကီး၀ဲလၢတၢ်ဖံးတၢ်ညၣ်သံသိကျါအသိး တကီၢ်ခါခဲအံၤထံခုၣ်ကိၣ်လိၣ်(ယ့ၤကဲ)အၦ့ၤထီၣ်အဃိတၢ်ကီတၢ်ခဲအိၣ်ထီၣ်၀ဲအဂ့ၢ်န့ၣ် ၦၤၦ့ၤဆါညၣ်ဒီးၦၤၦ့ၤဆါတၢ်ခုၣ်ထံတဖၣ်စံး၀ဲန့ၣ်လီၤႉ ၦၤၦ့ၤဆါတၢ်ဖံးတၢ်ညၣ်တဂၤစံး၀ဲလၢ“ယ့ၤကဲအၦ့ၤထီၣ်ဖးဒိၣ်ညါႉယ့ၤကဲန့ၣ်ပဘၣ်သူအီၤထီဘိလီၤႉယ့ၤကဲမ့တအိၣ်ဘၣ်န့ၣ်တၢ်ဖံးတၢ်ညၣ်တဖၣ်အံၤအုၣ်လၢာ်လီၤႉအၦ့ၤထီၣ်နါက့ပဘၣ်ၦ့ၤလီၤႉတဘျီတခီၣ်ဖဲကီးတရံး၀့ၢ်ပူၤအံၤ ယ့ၤကဲလၢာ်ဒီတ၀့ၢ်ညါ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ အပူၤကွံာ်လၢကီးတရံး၀့ၢ်ပူၤအံၤခီဖျိမ့ၣ်အူဟဲဒီးယ့ၤကဲတၢ်မၤလီၢ်တပံးဒံးဘၣ်အခါန့ၣ် ယ့ၤကဲဃၢအပီၢ်(၄၀၀)တလိၣ်န့ၣ်အၦ့ၤအိၣ်၀ဲ(၈၀၀၀)ကၠးလီၤဒီးဘၣ်ဆၣ်တကီၢ်ခါခဲအံၤအဃၢအပီၢ်(၁၀၀)တလိၣ်န့ၣ် အၦ့ၤအိၣ်(၇၀၀၀)တုၤလၢ(၁၀၀၀၀)ဘျဲၣ်ညါဒီးအၦ့ၤဒိၣ်ထီၣ်၀ဲသၢဆးညါအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ဒ်န့ၣ်အသိးလၢကီးတရံးႇမၠၣ်၀တံၣ်ႇနိၣ်တကီကီၢ်ဆၣ်အပူၤစ့ၢ်ကီးမ့ၣ်အူတဟဲဘၣ်ဒီးယ့ၤကဲအၦ့ၤဒိၣ်ထီၣ်စ့ၢ်ကီး၀ဲအသိးကီၢ်ဆၣ်လၢအဂၤသ့ၣ်တဖၣ်အပူၤမ့ၣ်အူဟဲဘၣ်ဆၣ်ယ့ၤကဲအၦ့ၤဒိၣ်ထီၣ်အါန့ၢ်အပူၤကွံာ်နံၣ်ဒံးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤလီၢ်ခံလၢကီးတရံးကီၢ်ဆၣ်အပူၤတၢ်ဒုးဆူၣ်ထီၣ်၀ဲလၢပယီၤသုးဒီးဟီၣ်က၀ီၤကညီဒီကလု၁်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤဒီးတၢ်လဲၤခးမၤဟးဂီၤ၀ဲတၢ်ဟ့ၣ်မ့ၣ်အူအခိၣ်ခၠၢၣ်အသိး တုၤလၢခဲအံၤခီဖျိတၢ်တက့ၤဘှီဂ့ၤထီၣ်အီၤဒံးဘၣ်အဃိကီၢ်ဆၣ်သ့ၣ်တဖၣ်အံၤအပူၤန့ၣ်မ့ၣ်အူတဟဲ၀ဲဘၣ်န့ၣ်လီၤႉ
ကဘီယူၤဟဲတ့ၢ်လီၤမ့ၣ်ပိၢ်အဃိ ကွ့ကလ့လီၢ်က၀ီၤကမျၢၢ်ဘၣ်ဒိ ၄ ဂၤ
လါအ့ဖြ့ၣ် ၂၇ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲလါအ့ဖြ့ၣ် ၂၆ သီ ဟါခီ ၄ နၣ်ရံၣ်ဃၣ်ဃၣ်အဆၢကတီၢ် ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်ဆူမၠၣ်၀တံၣ်ကီၢ်ဆၣ် ကလံၤထံး (ကွ့ကလ့)အချၢတကပၤန့ၣ်အဃိ ဟံၣ်ဖိဃီဖိ(၄)ဂၤဘၣ်ဒိဘၣ်ထံး၀ဲအဂ့ၢ်န့ၣ် ကွ့ကလ့သ၀ီဖိတဖၣ်စံး၀ဲန့ၣ်လီၤႉ လၢကွ့ကလ့သ၀ီအပူၤတၢ်ခးလိာ်သးကဲထီၣ်တအိၣ်၀ဲလၢပယီၤသုးဒီးဟီၣ်က၀ီၤတၢ်ပၢၢ်ဆၢသုးအဘၢၣ်အံၤဘၣ် ဘၣ်ဆၣ်ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်အဃိလီၢ်က၀ီၤသ၀ီဖိဟံၣ်ဖိဃီဖိ(၄)ဂၤဘၣ်ဒိဘၣ်ထံး၀ဲဒၣ်အဂ့ၢ်န့ၣ် ကွ့ကလ့လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲအံၤန့ၣ်သုးတအိၣ်ဘၣ်တၢ်ဒုးကဲထီၣ်တအိၣ်ဘၣ်ႇတၢ်တအိၣ်နီတမံၤဘၣ်ႉ သဲးသဲးဟဲခးလီၤတၢ်ဒီးကဘီယူၤဒ်အံၤလီၤႉၦၤဟံၣ်ဖိဃီဖိ(၄)ဂၤန့ၣ်ဘၣ်ဒိဘၣ်ထံးႉအဟဲကွံာ်လီၤ၀ဲန့ၣ်ခံဖျၢၣ်ႇ အပိၢ်ထီၣ်တဖျၢၣ်လီၤႉမ့ပိၢ်ထီၣ်ခံဖျၢၣ်လၢာ်ဒုၦၤဟံၣ်ဖိဃီဖိတဒူၣ်န့ၣ်ကဘၣ်သံခဲလၢာ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ၦၤဟံၣ်ဖိဃီဖိလၢအဘၣ်ဒိဘၣ်ထံး(၄)ဂၤသ့ၣ်န့ၣ်မ့ၢ်၀ဲစီၤဖါကနိး(၅၀)နံၣ်ဒီးအမါနီၢ်တၢ်လ့ၤခိၣ်ခံဂၤအံၤဒီး အဒဲၣ်မုၣ်တဂၤ,အဖိဒိၣ်ခွါတဂၤန့ၣ်လီၤႉၦၤသ့ၣ်တဖၣ်အံၤဘၣ်၀ဲဒၣ်အခိၣ်ႇအစုႇအခီၣ်ဒီး ဘၣ်ဆၣ်မ့မ့ၢ်လၢနီၢ်တၢ်လ့ၤခိၣ်အံၤခီန့ၣ်အဘၣ်ဒိနးအဃိတၢ်လဲၤဆှၢအီၤဆူကီၢ်ကၠီၣ်တဲၣ်မဲၢ်ဆီးတၢ်ဆါဟံၣ်အဂ့ၢ်န့ၣ် ကွ့ကလ့သ၀ီဖိတဂၤစံး၀ဲန့ၣ်လီၤႉ “မ့မ့ၢ်ၦၤလၢအဘၣ်ဒိနးတဂၤခီန့ၣ်တဂီၤညါအံၤၦၤဆှၢအီၤမဲၢ်ဆီးတၢ်ဆါဟံၣ်လံႉၦၤအဂၤတဖၣ်ခီန့ၣ်ၦၤယါဘျါအီၤလၢသ၀ီပူၤအံၤလီၤႉကဘီယူၤဟဲခးလီၤတၢ်ဒ်အံၤၦၤလဲၤဆှၢမးတဘူၣ်ဘၣ်ႇၦၤဘၣ်လဲၤဆှၢအီၤလၢကစၢၢ်ကျဲလီၤႉတုၤလၢခဲအံၤမ့ၢ်အတုၤလံဧါ,တတုၤဒံးဘၣ်ဧါန့ၣ်ပတသ့ၣ်ညါဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါအ့ဖြ့ၣ် ၂၆ သီအနံၤ န့ၣ်လီၤႉ ဒ်န့ၣ်အသိးဖဲအပူၤကွံာ်စှၤသီအခါစ့ၢ်ကီးသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢမဲၢ်ကနဲသ၀ီကပၤ ကၠီၣ်မဲႇကၠီၣ်တီၤတကပၤဒံးန့ၣ်လီၤႉ
စွ့ၤကိၣ်ကိၤဟီၣ်က၀ီၤပူၤ ကမျၢၢ်အတၢ်အုၣ်ကီၤမ့အိၣ်မး တၢ်ပျဲဟးထီၣ်က့ၤလီၤ၀ဲ
လါအ့ဖြ့ၣ် ၂၇ သီႇ ၂၀၂၃ နံၣ်ႇ ခ့ၣ်အဲးစံၣ် လၢမၠၣ်၀တံၣ်ကလံၤစိး သုးခိးကီၢ်ဆၢ(BGF)တၢ်ပၢဟီၣ်က၀ီၤ စွ့ၤကိၣ်ကိၤလီၢ်က၀ီၤအပူၤန့ၣ် စးထီၣ်ဖဲတလါအံၤလါအ့ဖြ့ၣ် ၂၀ သီအနံၤန့ၣ် လီၢ်က၀ီၤကမျၢၢ်အတၢ်အုၣ်ကီၤမ့တအိၣ်ဘၣ်န့ၣ် သုးခိးကီၢ်ဆၢတၢ်သမံသမိးတြဲၤတပျဲဟးထီၣ်က့ၤလီၤ၀ဲ လၢၤဘၣ်အဂ့ၢ်န့ၣ် စွ့ၤကိၣ်ကိၤလီၢ်က၀ီၤကမျၢၢ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ သိလ့ၣ်ဒီးၦၤကညီလၢအဟဲလၢစွ့ၤကိၣ်ကိၤဟီၣ်က၀ီၤပူၤတဖၣ်အံၤကဘၣ်ဒိးသမံသမိးသးလၢ(BGF)တၢ်သမံသမိးတြဲၤလီၢ်ဒီးၦၤစွ့ၤကိၣ်ကိၤလီၢ်က၀ီၤဖိမ့ဟဲအုၣ်ကီၤ၀ဲမးတၢ်ပျဲနုာ်လီၤ၀ဲလၢစွ့ၤကိၣ်ကိၤသ၀ီပူၤအဂ့ၢ်န့ၣ် သ၀ီဖိတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“စးထီၣ်ဖဲအပူၤကွံာ်အသီ(၂၀)န့ၣ်ၦၤဃၣ်ဃၢၤမ့ဟဲန့ၣ်နကဘၣ်လဲၤတဲစိၦၤအိၣ်ခိးတၢ်လၢတြဲၤတဖၣ်န့ၣ်ႇ ၀ံၤ မးနုာ်လီၤန့ၢ်လီၤႉၦၤလဲၤအုၣ်ကီၤနၤမ့တအိၣ်ဘၣ်န့ၣ်အ၀ဲသ့ၣ်တဟ့ၣ်နုာ်၀ဲဘၣ်ႉဘၣ်လဲၤအုၣ်ကီၤဒ်လဲၣ်န့ၣ်နဘၣ်လဲၤတဲပၠးၦၤအိၣ်ခိးတၢ်တဖၣ်လၢၦၤတဂၤအံၤကဟဲဟးလၢယဟံၣ်ႇအကဲ၀ဲဒၣ်ယဖိဒိၣ်ခွါႇယဖိခွါဒ်န့ၣ်မီၤနီၤႉနမ့လဲၤအုၣ်ကီၤဒ်န့ၣ်မးအ၀ဲသ့ၣ်ပျဲနုာ်လီၤ၀ဲ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ စွ့ၤကိၣ်ကိၤ၀့ၢ်သီဃၢၤတၢ်ဒုးကဲထီၣ်တအိၣ်လၢာ်၀ဲဘၣ်ဆၣ်လၢစွ့ၣ်ကိၣ်ကိၤကျဲနုာ်လီၤဟးထီၣ်တၢ်လီၢ်သ့ၣ်တဖၣ်န့ၣ် (BGF)ဆီလီၤတၢ်ဘံၣ်တၢ်ဘၢဃံးဃီၣ်ဒီၣ်အဂ့ၢ်န့ၣ် ၦၤဟးထီၣ်က့ၤလီၤဖဲန့ၣ်တဖၣ်စံး၀ဲန့ၣ်လီၤႉ ဒ်န့ၣ်အသိးခီဖျိတၢ်ဆီလီၤတြဲၤတၢ်အိၣ်ခိးသမံသမိးတၢ်ဟဲအါထီၣ်အဃိသိလ့ၣ်လၢအစံၣ်ဖဲမၠၣ်၀တံၣ်–စွ့ၤကိၣ်ကိၤ၀့ၢ်သီတဖၣ်အံၤစ့ၢ်ကီးလဲၤလၢစွ့ၤကိၣ်ကိၤတအိၣ်အါအါလၢၤဘၣ်အဂ့ၢ်န့ၣ် ၦၤနီသိလ့ၣ်ဖိလၢအိၣ်မၠၣ်၀တံၣ်၀့ၢ်ပူၤတဂၤစံး၀ဲန့ၣ်လီၤႉ လၢန့ၣ်အမဲာ်ညါဖဲအပူၤကွံာ်လါအ့ဖြ့ၣ် ၅ သီဒီး ၆ သီအခါန့ၣ် လၢစွ့ၤကိၣ်ကိၤ၀့ၢ်သီကပၤ တၢ်ဒုးကဲထီၣ်၀ဲလၢ သုးခိၣ်အဲၣ်စ့၀ါတီခိၣ်ရိၣ်မဲကီၢ်သူလ့ၤသုးမုၢ်ဒိၣ်(KTLA)ဒီး(BGF)အဘၢၣ်စၢၤ၀ံၤလီၢ်ခံ (BGF)ဘၣ်ယိၣ်၀ဲလၢကဘီယူၤ(ဒြိ) ကဟဲလၢစွ့ၤကိၣ်ကိၤဟီၣ်က၀ီၤပူၤအဃိတၢ်မၤတဲာ်ကွံာ်၀ဲ(အ့ထနဲး)အကျိၤတဖၣ်အဂ့ၢ်န့ၣ် စွ့ၤကိၣ်ကိၤလီၢ်က၀ီၤကမျၢၢ်လၢအဂၤတဂၤစံး၀ဲဒ်အံၤန့ၣ်လီၤႉ “စးထီၣ်လၢတၢ်ဒုးကဲထီၣ်တုၤလၢခဲအံၤန့ၣ်ၦၤမၤတဲာ်ကွံာ်(အ့ထနဲး)ခဲလၢာ်လီၤႉနသူ(လိုင်း)တန့ၢ်ခီတခါလၢၤဘၣ်ႉ ယိၤကီၢ်(True Move)နါက့သူတန့ၢ်ဘၣ်ႉ(12 call)နါက့တန့ၢ်ဘၣ်ႉ ကဘၣ်မ့ၢ်သုးခိၣ်ခၠ့ၣ်သူၤအၦၤတဖၣ်န့ၣ်ပံးဃာ်၀ဲလီၤႉ နသူန့ၢ်တထံၣ်ႇတန့ၢ်တထံၣ်ဒ်န့ၣ်ႉဘၣ်ယိၣ်၀ဲလၢကဘီယူၤဒြိကဟဲလၢအ၀ဲသ့ၣ်အိၣ်အဃိအ၀ဲသ့ၣ်ပံးဃာ်၀ဲ(လိုင်း)ခဲလၢာ်လီၤႉနသူန့ၢ်(Wi-fi) တခါလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးစွ့ၣ်ကိၤကိၤ၀့ၢ်သီပူၤတၢ်ဒုးထီၣ်တအိၣ်လၢၤဘၣ်အဃိ(ကၤစံၤနိၤ)တၢ်တၤကျိၣ်တၤစ့လီၢ်တဖၣ်အံၤက့ၤလဲၤတရံးသးဒ်ညီနုၢ်အသိးလံဘၣ်ဆၣ်တရူးထံဖိကီၢ်ဖိလၢအိၣ်၀့ၢ်သီပူၤတဖၣ်အံၤ(BGF)တပျဲဟးထီၣ်က့ၤလီၤ၀ဲဒံးဘၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ
တၢ်ကြဲၢ်ကီၢ်ဆၣ်ပူၤတဃီၤဆံၣ်သၣ်ဃ့အၦ့ၤဂ့ၤအဃိကဲထီၣ်တၢ်တိစၢၤမၤစၢၤလၢလီၢ်က၀ီၤကမျၢၢ်အဂီၢ်
လါအ့ဖြ့ၣ် ၂၆ သီႇ ၂၀၂၃ နံၣ်ႇ ခ့ၣ်အဲးစံၣ် လၢဖၣ်အၣ်ကီၢ်ရ့ၣ် တၢ်ကြဲၢ်ကီၢ်ဆၣ် ဒူသ၀ီတဖၣ်အပူၤ တနံၣ်အံၤတဃီၤဆံၣ်သၣ်ဃ့အၦ့ၤဂ့ၤဒိၣ်န့ၢ်ဒံးအပူၤကွံာ်နံၣ်အဃိ ကဲထီၣ်တၢ်တိစၢၤမၤစၢၤလၢၦၤမၤဃ့တဃီၤဆံၣ်သၣ်ဖိလၢအိၣ်ဟီၣ်က၀ီၤပူၤတဖၣ်အဂီၢ်ဒိၣ်မးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ လၢတၢ်ကြဲၢ်ကီၢ်ဆၣ် ပၣ်တၣ်ႇပံၣ်တခးဒီးမံၣ်ခၠီသ၀ီတကပၤန့ၣ် အပူၤကွံာ်မဟိတနံၣ်တဃီၤဆံၣ်သၣ်ဃ့တပီၢ်န့ၣ် အၦ့ၤအိၣ်၀ဲ(၂၅၀၀)တုၤလၢ(၃၅၀၀)ကၠးလီၤဘၣ်ဆၣ်ႇတနံၣ်အံၤတပီၢ်န့ၣ်အၦ့ၤအိၣ်၀ဲ(၅၀၀၀)တုၤလၢ(၆၀၀၀)ကၠးညါအဃိ ကမျၢၢ်လၢအမၤဃ့တဃီၤဆံၣ်သၣ်လၢအိၣ်ဟီၣ်က၀ီၤပူၤတဖၣ်အံၤဘၣ်ဂီၢ်၀ဲဒၣ်အဂ့ၢ်န့ၣ် လီၢ်က၀ီၤကမျၢၢ်လၢအမၤဃ့တဃီၤဆံၣ်သၣ်တဂၤ စံး၀ဲဒ်အံၤန့ၣ်လီၤႉ “ခဲအံၤတဃီၤဆံၣ်သၣ်ဃ့အၦ့ၤထီၣ်အဃိပသးခုဒိၣ်မးႉအၦ့ၤထီၣ်အံၤခီဖျိအစးထီၣ်ပၢၢ်ထီၣ်သီအဃိလီၤႉပဘၣ်ယိၣ်လၢခံန့ၣ်အၦ့ၤကက့ၤလီၤကဒါလီၤႉဖဲမဟိနါန့ၣ်ဒ်အံၤလီၤႇတနံၣ်ညါအံၤနါက့ကမၤ၀ဲဒ်သိးမဟိန့ၣ်လီၤႉမ့၀ံၤပဘၣ်ယိၣ်လၢၦၤတဟဲၦ့ၤဘၣ်လီၤႉလၢခံန့ၣ်ခီဖျိမူခိၣ်ကလံၤသီၣ်ဂီၤတၢ်အိၣ်သးအဃိပလိဃ့အီၤတညီလၢၤဘၣ်ႉအဃိအၦ့ၤလီၤသ့၀ဲ”အဂ့ၢ်န့ၣ် စံး၀ဲန့ၣ်လီၤႉ တနံၣ်အံၤတဃီၤဆံၣ်သၣ်ဃ့အၦ့ၤဂ့ၤ၀ဲဘၣ်ဆၣ်မ့မ့ၢ်အသၣ်ခီန့ၣ်သၣ်စှၤဒိၣ်န့ၢ်အပူၤကွံာ်နံၣ်ဒံးအသိး ၦၤကညီလၢအကျီးပူၤတဃီၤဆံၣ်သၣ်ထူၣ်တအိၣ်ဘၣ်ဒီးၦၤလၢအတဃီၤဆံၣ်ထူၣ်တသၣ်ဘၣ်တဖၣ်န့ၣ် အ၀ဲသ့ၣ်ဘၣ်လဲၤၦ့ၤ၀ဲဒၣ်အထူၣ်အံၤလၢၦၤဂၤအအိၣ်ဒဲး၀ဲအသၣ်လိဃ့၀ဲ၀ံၤက့ၤဆါကဒါ၀ဲဒ်န့ၣ်စ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ တၢ်ကြဲၢ်လီၢ်က၀ီၤကမျၢၢ် နီၢ်တၤယွဲ စံး၀ဲလၢ“ခဲအံၤတၢ်ၦ့ၤထီၣ်ခဲလၢာ်လီၤအဃိတဃီၤဆံၣ်သၣ်ဃ့နါက့အၦ့ၤထီၣ်၀ဲလီၤႉ အၦ့ၤထီၣ်ဒ်အံၤအဃိပဆါ၀ဲလီၤႉစ့လၢပဆါန့ၢ်သ့ၣ်တဖၣ်န့ၣ်ပက့ၤၦ့ၤအီၣ်က့ၤ၀ဲတၢ်ဆၢကမူၣ်(အချိုမှုန့်)ႇအံသၣ်ဒီးတၢ်အီၣ်တၢ်အီလၢအဂၤတဖၣ်လီၤႉၦၤတနီၤခီန့ၣ်လဲၤမၤဘူၣ်လီၤသိအီၣ်ႇအံသၣ်ဒီးပသၢသၣ်လၢသီခါဖၠၣ်ပူၤဘျီၦၤထီၣ်ဒဲးန့ၢ်အ၀ဲသ့ၣ်ဒ်န့ၣ်အိၣ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ လၢတၢ်ကြဲၢ်ကီၢ်ဆၣ်အပူၤတဃီၤဆံၣ်ထူၣ်တဖၣ်တၢ်တသူၣ်ဆါ၀ဲဒ်မုၢ်ကျိၤ၀ဲၤကွာ်တခါအသိးဘၣ်ႇဘၣ်ဆၣ်သနါက့ တဃီၤဆံၣ်ထူၣ်လၢအိၣ်အ၀ဲသ့ၣ်ကရၢၢ်ပူၤတဖၣ်အံၤအ၀ဲသ့ၣ်ဒဲးလိဃ့၀ဲဒီးက့ၤဆါကဒါ၀ဲအဃိ ကဲထီၣ်ကျိၣ်စ့တၢ်ဟဲနုာ်လၢဟံၣ်ဖိဃီဖိအဂီၢ်တဘိန့ၣ်လီၤႉ ဒ်န့ၣ်အသိးလၢဖၣ်အၣ်ကီၢ်ဆၣ်ဒီးလူၢ်ပျဲၢ်ကီၢ်ဆၣ်အပူၤစ့ၢ်ကီးတနံၣ်အံၤတဃီၤဆံၣ်သၣ်ဃ့အၦ့ၤဂ့ၤ၀ဲဒီး ဘၣ်ဆၣ်မ့မ့ၢ်လၢတလၢၤကီၢ်စဲၣ်တကပၤခီန့ၣ်တဃီၤဆံၣ်သၣ်ဃ့အၦ့ၤတဂ့ၤဘၣ်အဃိအ၀ဲသ့ၣ်မၤက့ၤ၀ဲလၢတဃီၤဆံၣ်သၣ်ယိၣ်ႇတဃီၤဆံၣ်သၣ်ပၠါ၀ံၤဘၣ်ဆါအီၣ်၀ဲဒ်န့ၣ်လီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ကီးတရံး–မၠၣ်၀တံၣ်အ့ရှါကျဲ သိလ့ၣ်ဟးထီၣ်က့ၤလီၤလံဘၣ်ဆၣ် တၢ်ထၢကျိၣ်ထၢစ့အိၣ်
လါအ့ဖြ့ၣ် ၂၆ သီႇ ၂၀၂၃ နံၣ်ႇ ခ့ၣ်အဲးစံၣ် ကီးတရံး–မၠၣ်၀တံၣ်အ့ရှါကျဲ တုၤလၢတလါအံၤလါအ့ဖြ့ၣ် ၂၁ သီအနံၤ တၢ်ပၢၢ်ဆၢသုးပာ်ဖှိၣ်ထုးထီၣ်၀ဲလၢ တၢ်တဘၣ်ဟးထီၣ်က့ၤလီၤ၀ဲဘၣ်ဒီး ဘၣ်ဆၣ်ခဲအံၤခီဖျိတၢ်ပာ်ပနီၣ်အသီၦဲၤထီၣ်လံအဃိ သိလ့ၣ်တဖၣ်ဟးထီၣ်က့ၤလီၤဒ်ညီနုၢ်အသိးလံဒီးပယီၤသုးႇသုးခိးကီၢ်ဆၢ(BGF)တၢ်သမံသမိးတြဲၤတဖၣ်အံၤထၢ၀ဲဒၣ်စ့အဂ့ၢ်န့ၣ် ၦၤနီသိလ့ၣ်ဖိလၢအိၣ်ကီးတရံး၀့ၢ်ပူၤတဖၣ်စံး၀ဲန့ၣ်လီၤႉ ဖဲအပူၤကွံာ်လါအ့ဖြ့ၣ် ၇ သီတုၤလၢလါအ့ဖြ့ၣ် ၂၁ သီန့ၣ် တၢ်ပၢၢ်ဆၢသုးပာ်ဖှိၣ်ထုးထီၣ်တၢ်ကလုၢ်လၢကမျၢၢ်တဘၣ် ဟးထီၣ်က့ၤလီၤလၢကျဲအံၤဘၣ်ဒီး ဘၣ်ဆၣ်ခဲအံၤခီဖျိတၢ်ပာ်ပနီၣ်အိၣ်အသီၦဲၤထီၣ်လံအဃိ ဖဲလီၢ်ခံအံၤသိလ့ၣ်ဟးထီၣ်က့ၤလီၤကဒါ၀ဲလံဘၣ်ဆၣ်ပယီၤသုးစုတီၤဖီလာ်တၢ်သမံသမိးတြဲၤတဖၣ်ထၢ၀ဲစ့အဂ့ၢ်န့ၣ် ၦၤနီပနံာ်တၢ်ဖိတၢ်လံၤဖိတဂၤ စံး၀ဲဒ်အံၤန့ၣ်လီၤႉ “သိလ့ၣ်ဟးထီၣ်က့ၤလီၤဒီဒူၣ်လံလီၤႉတၢ်အိၣ်ခိးသမံသမိးတြဲၤနါက့ဟဲအါထီၣ်ႉလၢနကဟးထီၣ်မၠၣ်၀တံၣ်၀့ၢ်ဘျီန့ၣ်တြဲၤလၢအိၣ်ခိးထၢစ့န့ၣ်အိၣ်ဒီဒူၣ်ႉဘၣ်ဟ့ၣ်ဒီတကျဲလီၤႉလၢပနံာ်တၢ်ကူၣ်လဲၤမၤကၤလီၢ်(ဇုန်)န့ၣ်အါကတၢၢ်လီၤႉနဘၣ်ဟ့ၣ်လီၤပယီၤသုးႇပၢၤကီၢ်ႇ(BGF)စ့န့ၣ်ဘူးဘူးဖိလီၤႉအ၀ဲသ့ၣ်န့ၣ်မၤ၀ဲဒ်ဘၣ်ဟံးန့ၢ်၀ဲတၢ်ဘံၣ်တၢ်ဘၢဃ့အီၣ်စ့လဲလဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါတၢ်ပၢၢ်ဆၢသုးပာ်ဖှိၣ်ထုးထီၣ်တၢ်ကလုၢ်လၢတၢ်တဘၣ်ဟးထီၣ်က့ၤလီၤလၢကီးတရံး–မၠၣ်၀တံၣ်အ့ရှါကျဲဘၣ်အံၤမုၢ်နံၤမုၢ်သီၦဲၤ၀ဲလံဘၣ်ဆၣ်ကမျၢၢ်တဖၣ်ကကွၢ်တၢ်အိၣ်သးဒီးကလ့ၢ်ထီၣ်လ့ၢ်လိၤလၢတၢ်ပလီၢ်ပဒီပူၤအဂ့ၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် ဘီသိၣ်၀ါသုးကျိၤခိၣ် သုးခိၣ်စီၤကၠီၤသဲၣ် စံး၀ဲဒ်အံၤ န့ၣ်လီၤႉ အ၀ဲစံး၀ဲလၢ“လီလီစဲၤဒုၦၤပံးကျဲအသီၦဲၤထီၣ်လံမီၤနီၤႉနါက့ကမျၢၢ်လ့ၢ်လိၤလ့ၢ်ထီၣ်အိၣ်ႉနါက့တၢ်ဒုးမ့တ၀ံၤဘၣ်ဒုတၢ်သူၣ်ကိၢ်သးကိၢ်အိၣ်လီၤႉတၢ်ဒုၣ်ဒါအိၣ်လၢကျဲပူၤဒံးမီၤနီၤႉခီဖျိတၢ်ဒုးတၢ်ယၤတ၀ံၤတတဲာ်ဒံးဘၣ်အဃိဘၣ်လဲၤကနၣ်လဲၤကနၣ်ဒ်န့ၣ်လီၤႉခါဆူညါတၢ်ကမၤသးခီဒုပတယးတဘၣ်ဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ကီးတရံး–မၠၣ်၀တံၣ်အ့ရှါကျဲဒီတကျိၤအံၤတၢ်ဒုးကဲထီၣ်၀ဲတလီၢ်လီၢ်ဒီး ခီဖျိတၢ်ဒုးကဲထီၣ်အဃိ ကျဲႇတိၤသ့ၣ်တဖၣ်ဟးဂူာ်ဟးဂီၤအိၣ်၀ဲအသိးကျဲတိၤလၢအဟးဂီၤတဖၣ်အံၤတၢ်က့ၤဘှီဂ့ၤထီၣ်ကဒါ၀ဲဒီးတၢ်ပျဲဟးထီၣ်က့ၤလီၤ၀ဲဘၣ်ဆၣ်ၦၤလၢအလ့ၢ်လိၤလ့ၢ်ထီၣ်လၢကျဲသ့ၣ်တဖၣ်အံၤန့ၣ်ဘၣ်ဟးထီၣ်က့ၤလီၤ၀ဲလၢတၢ်ဘၣ်ယိၣ်ဘၣ်ဘှီအပူၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
တၢ်လဲၤထီၣ်ခးသုးကလၢၤ(၄)ဖျၢၣ်၀ံၤလီၢ်ခံပယီၤသုးမၤအါထီၣ်ဂံၢ်ဘါလၢခ့ၣ်အဲၣ်ယူၣ်(သုးက့ ၃)ဟီၣ်က၀ီၤပူၤ
လါအ့ဖြ့ၣ် ၂၅ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)ဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ်အပူၤ ဖဲအပူၤကွံာ်(၂၂)သီအနံၤ တၢ်လဲၤထီၣ်ခးပယီၤသုးကလၢၤ(၄)ဖျၢၣ်တဘျီဃီ၀ံၤလီၢ်ခံ ပယီၤသုးပညိၣ်ခးလီၤကျိဖးဒိၣ်ဆူသ၀ီပူၤဒီး မၤအါထီၣ်သုးဂံၢ်ဘါအဂ့ၢ်န့ၣ် သ့ၣ်ညါဘၣ်လၢခ့ၣ်အဲၣ်ယူၣ်ဂံၢ်ခီၣ်ထံးၦၤဟ့ၣ်တၢ်ကစီၣ်ဖိအအိၣ်န့ၣ်လီၤႉ ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ် ညီၣ်ကိဒီးကၠိကိ(ကျွန်းကုန်း)သ၀ီ ပယီၤသုးကလၢၤ(၂)ဖျၢၣ်ဒီး မိကီၢ်ဆၣ် နီၤကိဒီးယၤမၠိအီၤသ၀ီ ပယီၤသုးကလၢၤ(၂)ဖျၢၣ်အံၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် လဲၤထီၣ်ခး၀ဲတဘျီဃီ၀ံၤအလီၢ်ခံ ပယီၤသုးက့ၤခးလီၤကဒါကျိဖးဒိၣ်ဆူဒူသ၀ီပူၤဒီးမၤအါထီၣ်၀ဲသုးဂံၢ်ဘါအဂ့ၢ်န့ၣ် ၦၤလၢဘူးဒီးခ့ၣ်အဲၣ်ယူၣ်တဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တၢ်ဒုးကဲထီၣ်၀ံၤလီၢ်ခံမုၢ်ဆ့ၣ်ထီၣ်န့ၣ်ပယီၤသုးသိလ့ၣ်ဟဲထီၣ်လၢ(နၣ်သၤကွ့)တကပၤန့ၣ်(၆)ခိၣ်ႉ လၢစွ့ၤကၠ့ၣ်တကပၤန့ၣ်နါက့အ၀ဲသ့ၣ်မၤအါထီၣ်အၦၤစ့ၢ်လီၤႉခဲအံၤအ၀ဲသ့ၣ်ခးလီၤကျိဖးဒိၣ်တပယူာ်ဃီလီၤႉတၢ်ခးလိာ်သးဒုတအိၣ်ဘၣ်ႉကဘီယူၤဒုဟဲဆှၣ်တၢ်မၢ်မၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်ခးလိာ်သးကဲထီၣ်၀ံၤလီၢ်ခံသုးမီၤစိရိၤကဘီယူၤဟဲခးလီၤတၢ်လၢညီၤတါသ၀ီႇနီၤကိသ၀ီ သ၀ီ(၈)ဖျၢၣ်အပူၤဒီး ခီဖျိပယီၤသုးခးလီၤစ့ၢ်ကီးကျိဖးဒိၣ်အဃိလီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲဒီးတကီၢ်ခါခဲအံၤပယီၤသုးကးတံၢ်ကွံာ်ကျဲႇပံးဃာ်၀ဲတၢ်စိာ်ထီၣ်စိာ်လီၤတၢ်အီၣ်တၢ်အီဒီးသမံသမိးတၢ်ဟဲအါထီၣ်၀ဲအဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ “ခီဖျိတၢ်ဘၣ်ပယီၤသုးနးအဃိဟဲက့ၤတ့ၢ်လီၤမ့ၣ်ပိၢ်လၢကဘီယူၤႇအ၀ဲသ့ၣ်တ့ၢ်လီၤမ့ၣ်ပိၢ်န့ၣ်လၢကမျၢၢ်အိၣ်တၢ်လီၢ်အဃိၦၤဘၣ်စံၣ်ထီၣ်မီၤနီၤႉခဲအံၤကဘီယူၤတဟဲခးလီၤတၢ်လၢၤဘၣ်သနါက့ပယီၤသုးပံးဃာ်ကျဲဒီးပံးဃာ်၀ဲတၢ်စိာ်ထီၣ်စိာ်လီၤတၢ်အီၣ်တၢ်အီႇအိၣ်ခးသမံသမိးတၢ်အဃိတၢ်ကီတၢ်ခဲအိၣ်လၢကလဲၤမၤစၢၤၦၤဃ့ၢ်မှံဟးဖျိးအဂီၢ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ပယီၤသုးကလၢၤ(၄)ဖျၢၣ်လၢတၢ်လဲၤထီၣ်ခး၀ဲသ့ၣ်တဖၣ်န့ၣ်မ့ၢ်၀ဲဒၣ်ဟီၣ်က၀ီၤခီၣ်သုးရ့ၣ်(ခလရ–၆၀)ႇ ခီၣ်ချ့သုးရ့ၣ်(ခမရ–၃၅၁)ႇခီၣ်ချ့သုးရ့ၣ်(ခမရ–၅၉၈)ႇသုးတြိၤ(၇၇)တဖၣ်ဒီးတၢ်ဒုးကဲထီၣ်ဘျီ၀ဲအံၤအပူၤန့ၣ် ပယီၤသုးသံ(၁၆)ဂၤအကျါပၣ်ဃုာ်၀ဲသုးရ့ၣ်ခိၣ်ခံ(၁)ဂၤဒီးဘၣ်ဒိ၀ဲ(၁၇)ဂၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲ လါအ့ဖြ့ၣ် ၂၃ သီအနံၤန့ၣ်လီၤႉ လၢန့ၣ်အမဲာ်ညါတၢ်လဲၤထီၣ်ခးပယီၤသုးကလၢၤဘျီ၀ဲအံၤမ့မ့ၢ်(KNLA)တကပၤန့ၣ်ဘၣ်ဟ့ၣ်လီၤကွံာ်အသးသမူ(၁)ဂၤႇဘၣ်ဒိ(၂)ဂၤဒီး မၤန့ၢ်၀ဲပယီၤသုးအကျိချံၦာ်သၣ်တနီၤအဂ့ၢ်ခ့ၣ်အဲၣ်ယူၣ်လံာ်တၢ်ပာ်ဖျါ၀ဲအိၣ်ဘၣ်ဆၣ် မ့မ့ၢ်လၢသုးမီၤစိရိၤအ(channel)ပူၤခီန့ၣ်စံး၀ဲလၢတၢ်လီၢ်လၢခ့ၣ်အဲၣ်ယူၣ်လဲၤထီၣ်ခးအံၤမ့ၢ်ၣ်ဘံၣ်ဘၢတၢ်အိၣ်ခိးလီၢ်လီၤအဂ့ၢ်န့ၣ် က့ၤခီၣ်ဆၢစံး၀ဲန့ၣ်လီၤႉ စးထီၣ်ဖဲအပူၤကွံာ်လါအဖြ့ၣ် ၄ သီအခါန့ၣ် ပယီၤသုးကျိၤနုာ်လီၤ၀ဲလၢလၢၢ်ဒိၣ်ကီၢ်ပူၤဒီး ပညိၣ်ခးလီၤကျိဖးဒိၣ်ဆူလီၢ်က၀ီၤကမျၢၢ်ဒူသ၀ီပူၤအဃိ တၢ်ခးလိာ်သးကဲထီၣ်၀ဲလၢဟီၣ်က၀ီၤ(KNLA)ဒီး ပယီၤသုးဘၢၣ်စၢၤဒီး ဒုးယၤတၢ်ဖ့ၣ်စၢဟဲဆူၣ်ထီၣ်၀ဲအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိ အအိၣ်န့ၣ်လီၤႉ
KNLA ထီၣ်န့ၢ်မဲၢ်စံၣ်ထၣ်ပယီၤသုးတြဲၤတၢ်လီၢ်တခါႇပယီၤသုးသံ(၅)ဂၤ
လါအ့ဖြ့ၣ် ၂၅ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤအပူၤ ဖဲလါအ့ဖြ့ၣ် ၂၄ သီ ဂီၤခီအဆၢကတီၢ် မဲာ်စံၣ်ထၣ်ပယီၤသုးတြဲၤအိၣ်ခိးတၢ်လီၢ်တဖျၢၣ်လၢအိၣ်ဒူသထူၣ်ကီၢ်ရ့ၣ်(သုးက့ ၁)ဒီးမုၢ်တြီၢ်ကရီၢ်ရ့ၣ်(သုးက့ ၅) အဘၢၣ်စၢၤအံၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ထီၣ်မၤန့ၢ်ကွံာ်၀ဲအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲန့ၣ်လီၤႉ ပယီၤသုးတြဲၤ၀ဲအံၤအပူၤန့ၣ်နီၣ်ဂံၢ်(၈)ဒုးယၤပၢဆှၢရဲၣ်ကျဲၤ၀ဲၤလီၢ်ခိၣ်သ့ၣ်စုတီၤဖီလာ်ခီၣ်ချ့သုးရ့ၣ်(ခမရ–၄၀၁) အၦၤတဖၣ်ဒီးဖဲဂီၤခီ(၄း၃၀)ဃၣ်ဃၣ်အဆၢကတီၢ်န့ၣ် (KNLA)စးထီၣ်နုာ်လီၤခးကတံာ်တာ်၀ဲတခီနၣ်ရံၣ်ဒီး တၢ်ဒုးဘျီ၀ဲအံၤအပူၤန့ၣ်ပယီၤသုးသံ(၅)ဂၤႇဃ့ၢ်ဖျိးထီၣ်၀ဲအဂၤ(၁၀)အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ မဲာ်စံၣ်ထၣ်ပယီၤသုးတြဲၤတၢ်လီၢ်အံၤမ့ၢ်တၢ်လီၢ်တခါလၢပယီၤသုးအိၣ်ဆီလီၤသးမူၤမူၤနီၢ်နီၢ်ဒီး အ၀ဲသ့ၣ်အိၣ်ခိးသမံသမိးႇဖီၣ်ဒီးမၤဒၢၣ်၀ဲလီၢ်က၀ီၤကမျၢၢ်လၢအဟးထီၣ်က့ၤလီၤဖဲန့ၣ်တဖၣ်အဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ တၢ်လဲၤထီၣ်ခးပယီၤသုးတၢ်လီၢ်ဘျီ၀ဲအံၤန့ၣ်မၤန့ၢ်၀ဲပယီၤသုးအကျိဖုၣ်(MA 5)တခိၣ်ႇ (K3 79)တခိၣ်ႇ (K3)၃ခိၣ်ႇကျိဒၢ(၂၀)ခါႇကျိချံ(၁၅၀၀)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ မဲာ်စံၣ်ထၣ်ပယီၤသုးတြဲၤအိၣ်ခိးတၢ်လီၢ်အံၤဘၣ်တၢ်လဲၤထီၣ်ခးအီၤလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) (သုးက့ ၁)ဒီး(သုးက့ ၅)သုးပာ်ဖှိၣ်တဖၣ်ဒီးတၢ်ဒုးဘျီ၀ဲအံၤဘၣ်တၢ်တီခိၣ်ရိၣ်မဲအီၤလၢ KNLA(သုးက့ ၁) ၀ဲၤဒၢးခိၣ် သုးခိၣ်စိ စီၤရၤဘိၤဒီး KNLA(သုးက့ ၅) ၁၀၂ သုးရ့ၣ် သုးရ့ၣ်ခိၣ်ခံ သုးခိၣ်စိ ဘိၤတီသ့ၣ်တဖၣ်အံၤဒီး (KNLA)တကပၤတၢ်သံတၢ်ဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် ထုးထီၣ်ပာ်ဖျါ၀ဲန့ၣ်လီၤႉ မဲာ်စံၣ်ထၣ်ပယီၤသုးတြဲၤအိၣ်ခိးတၢ်လီၢ်အံၤအိၣ်ဆီလီၤသးဖဲဖၣ်ပူၣ်–ကမၤမိၢ်ကျဲ မံၣ်စဲသ၀ီကရူၢ်ပူၤဒီး ပယီၤသုးတၢ်လီၢ်၀ဲအံၤန့ၣ်ပယီၤသုးကအိၣ်၀ဲ(၁၅)ဂၤဃၣ်ဃၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ခီဖျိတၢ်ကးတံၢ်ဃ၁်တၢ်စိ၁်ထီၣ်စိ၁်လီၤတၢ်အီၣ်တၢ်အီအဃိပလီကီၢ်ဆၣ်ပူၤဟုသးဒီးဂံၢ်ခီၣ်ထံးတၢ်အီၣ်တၢ်အီတဖၣ်လီၤတူ၁်
လါအ့ဖြ့ၣ် ၂၄ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် ပလီကီၢ်ဆၣ် ပလီ၀့ၢ်ဒီးဒူသ၀ီတနီၤအပူၤ ခီဖျိပယီၤသုးပံးဃာ်၀ဲတၢ်စိာ်ထီၣ်စိာ်လီၤ တၢ်အီၣ်တၢ်အီအဃိ ဟုသးဒီးဂံၢ်ခီၣ်ထံးတၢ်အီၣ်တၢ်အီတဖၣ်စးထီၣ်လီၤတူာ်၀ဲလံအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣလီၤႉ စးထီၣ်ဖဲအပူၤကွံာ်လါဖ့ၤဘြူၤအါရံၤသၢနွံတနွံတုၤလၢခဲအံၤန့ၣ်ပယီၤသုးပံးဃာ်၀ဲတၢ်စိာ်ထီၣ်စိာ်လီၤဟုသးဒီးဂံၢ်ခီၣ်ထံးတၢ်အီၣ်တၢ်အီတဖၣ်အဃိကမျၢၢ်လၢအိၣ်(ပလီ၀့ၢ်ပူၤ)ဒီးသ၀ီပူၤတဖၣ်တၢ်အီၣ်တၢ်အီစးထီၣ်လီၤတူာ်၀ဲအဃိ ထံၣ်ဘၣ်၀ဲတၢ်ကီတၢ်ခဲတဖၣ်အဂ့ၢ်န့ၣ် ပလီကီၢ်ဆၣ် လီၢ်က၀ီၤကမျၢၢ်တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“အ၀ဲသ့ၣ်န့ၣ်လၢညါလံၤလံၤလံတပျဲၦၤစိာ်ထီၣ်စိာ်လီၤတၢ်လၢၤဘၣ်ႉအ၀ဲသ့ၣ်ဆိမိၣ်၀ဲလၢၦၤမၤစၢၤ(PDF)အဃိအ၀ဲသ့ၣ်တပျဲၦၤစိာ်တၢ်အီၣ်တၢ်အီလၢၤဘၣ်ႉခဲအံၤလၢ၀့ၢ်ပူၤမ့ၢ်ဂ့ၤႇလၢသ၀ီပူၤမ့ၢ်ဂ့ၤန့ၣ်ဟုသးႇပသၢသၣ်ႇညၣ်ဒၢတဖၣ်န့ၣ်လၢာ်လံႉမ့၀ံၤဖဲပလီအံၤတၢ်ဒုးကဲထီၣ်ခဲအံၤခဲအံၤအဃိပယီၤသုးအံၤမၤ၀ဲဒ်တဲာ်လွံၢ်တဲာ်န့ၣ်မီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ပယီၤသုးအံၤတပျဲၦၤစိာ်ထီၣ်စိာ်လီၤတၢ်အီၣ်တၢ်အီတကးဒံးဘၣ်အမဲာ်ညါတပျဲစိာ်စ့ၢ်ကီးဒးဆံၣ်သိႇဒံၣ်စဲၣ်ဒီးပရံမံယါသိတဖၣ်အံၤဘၣ်အဃိလီၢ်က၀ီၤကမျၢၢ်လၢအသူဒးစံၣ်သ့ၣ်တဖၣ်အံၤထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ “ဒးဆံၣ်ႇဒံၣ်စဲၣ်ႇပရံမံယါသိတဖၣ်ခဲလၢာ်လီၤတဟ့ၣ်စိာ်၀ဲဘၣ်ႉအ၀ဲသ့ၣ်ဆီလီၤတြဲၤဘျီအိၣ်ခိးသမံသမိးတၢ်ႉဒးဆံၣ်ကျးနါက့အ၀ဲသ့ၣ်တဟ့ၣ်ဒုးဆါ၀ဲလၢၤဘၣ်ႉပယီၤသုးဟးမၤပျံၤမၤဖုးတၢ်ႉတၢ်အံၤတၢ်ဖးနးညါ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးလၢပလီ၀့ၢ်ဃၢၤ(ပလၣ်၀့ၢ်)ပူၤန့ၣ်စ့ၢ်ကီးပယီၤသုးပံးဃာ်၀ဲတၢ်စိာ်ထီၣ်စိာ်လီၤဟုသးအိၣ်၀ဲဘၣ်ဆၣ် မ့ပၣ်ဃုာ်၀ဲသးၦၢ်အလံာ်အုၣ်သးမးတၢ်ပျဲလဲၤၦ့ၤ၀ဲဟုသးဒီးၦၤကညီတဂၤန့ၣ်ၦ့ၤဟုသးန့ၢ်ထဲ(၁)ဘူလီၤအဂ့ၢ်န့ၣ် ဟီၣ်က၀ီၤတၢ်ကစီၣ်သန့တဖၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ ပလီကီၢ်ဆၣ်အံၤသုးမီၤစိရိၤဘိးဘၣ်ရၤလီၤ၀ဲလၢအမ့ၢ်သုးတၢ်ပၢတၢ်ပြးဒီးတၢ်ဒုးကဲထီၣ်၀ဲလၢပယီၤသုးဒီးလီၢ်က၀ီၤတၢ်ဒီသဒၢကမျၢၢ်သုးအဘၢၣ်စၢၤခဲအံၤခဲအံၤဒီးပယီၤသုးအံၤသူ၀ဲတဲာ်လွံၢ်တဲာ်ပံးဃာ်၀ဲတၢ်စိာ်ထီၣ်စိာ်လီၤတၢ်အီၣ်တၢ်အီသ့ၣ်တဖၣ်တပယူာ်ဃီအဂ့ၢ်န့ၣ် တၢ်ဒီသဒၢသုးကရူၢ်ပာ်ဂၢၢ်ပာ်ကျၢၤစံး၀ဲန့ၣ်လီၤႉ