ဘံလ့ကီၢ်ဆၣ်ပူၤပယီၤသုးခးလီၤကျိဖးဒိၣ်အဃိလီၢ်က၀ီၤကမျၢၢ်ဘၣ်ဃ့ၢ်ထီၣ်ကဒီး
လါအ့ဖြ့ၣ် ၂၁ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ဒူသထူၣ်ကီၢ်ရ့ၣ် ဘံလ့ကီၢ်ဆၣ်အပူၤ ဖဲလါအ့ဖြ့ၣ် ၁၉ သီ မုၢ်ဃ့ၢ်လီၤအဆၢကတီၢ် ပယီၤသုးလၢအိၣ်ဆီလီၤသးဖဲ(အလိၤတီၤ)သ၀ီပူၤတဖၣ်အံၤခးလီၤကျိဖးဒိၣ်ဆူ(အလူ)သ၀ီပူၤအဃိ လီၢ်က၀ီၤကမျၢၢ်ဘၣ်ဃ့ၢ်ထီၣ်ကဒီး၀ဲအဂ့ၢ်န့ၣ် ကမျၢၢ်လၢအိၣ်ဘံလ့၀့ၢ်ပူၤတဖၣ်စံး၀ဲန့ၣ်လီၤႉ ဖဲအပူၤကွံာ်လါအ့ဖြ့ၣ် ၁၂ သီအနံၤ လၢ(အလူလ့)သ၀ီအပူၤ တၢ်ဒုးလီၤကယးထီၣ်၀ဲလၢကညီဒီကလုာ်တၢ်ထူၣ်ဖျဲး သုးမုၢ်ဒိၣ်(KNLA)သုးပာ်ဖှိၣ်ဒီးပယီၤသုးအဘၢၣ်စၢၤ၀ံၤလီၢ်ခံ လီၢ်က၀ီၤကမျၢၢ်က့ၤအိၣ်လၢသ၀ီပူၤလံဘၣ်ဆၣ် ခီဖျိပယီၤသုးခးလီၤကဒါကျိဖးဒိၣ်လၢတၢ်ဂ့ၢ်တအိၣ်နီတမံၤဘၣ်အဃိကမျၢၢ်ဘၣ်ဃ့ၢ်ထီၣ်ကဒီး၀ဲအဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤႉ ကမျၢၢ်လၢအိၣ်ဘံလ့၀့ၢ်ပူၤတဂၤစံး၀ဲလၢ“ကဘၣ်ဖဲဖဲမုၢ်ထူၣ် ၁၁ နၣ်ရံၣ်န့ၣ်အ၀ဲသ့ၣ်ခးအိၣ်ဘှံးခးအိၣ်ဘှံး ခးတုၤလၢမုၢ်နၤခီညါႉလၢ(အလူ)သ၀ီပူၤအံၤတၢ်ဒီသဒၢကမျၢၢ်သုးတအိၣ်စ့ၢ်ကီးဘၣ်ႉကဘၣ်မ့ၢ်ဖဲအပူၤကွံာ်န့ၣ်တၢ်ဒုးကဲၣ်ထီၣ်မီၤနီၤႇအ၀ဲသ့ၣ်ၦၤဘၣ်ဒိဘၣ်ထံးအါအဃိကမ့ၢ်အက့ၤခးလီၤကဒါတၢ်ဒ်န့ၣ်လီၤႉကျိဖးဒိၣ်န့ၣ်လီၤတဲာ်၀ဲလၢသ၀ီအခိၣ်အဃၢၤန့ၣ်လီၤႉၦၤသ၀ီဖိတဖၣ်ခီန့ၣ်အ၀ဲသ့ၣ်ဟးပလဲာ်ဆိသးအဃိတၢ်ဘၣ်ဒိဘၣ်ထံးတအိၣ်ဘၣ်ႉခဲအံၤနါက့ၦၤဟးပလဲာ်သးလၢာ်လံ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါဖဲအပူၤကွံာ်လါအ့ဖြ့ၣ် ၁၂ သီအနံၤ တၢ်ဒုးကဲထီၣ်ဖဲ(အလူ)သ၀ီပူၤအခါစ့ၢ်ကီးန့ၣ် ပယီၤသုးလၢအိၣ်(၀့ပၠၤ)သ၀ီပူၤတဖၣ်အံၤက့ၤခးလီၤစၢၤကျိဖးဒိၣ်အိၣ်၀ဲအသိး ပယီၤသုးနုာ်လီၤဒွဲၣ်အူအီၣ်၀ဲ သ၀ီပူၤကမျၢၢ်အဟံၣ်(၄)ဖျၢၣ်ဒံးန့ၣ်လီၤႉ ဒ်န့ၣ်အသိးဖဲလါအ့ဖြ့ၣ် ၁၆ သီအခါစ့ၢ်ကီး ခီဖျိမ့ၣ်ပိၢ်ပိၢ်ဖးထီၣ်လၢဘံလ့ကီၢ်ဆၣ် တီၤကၠံသ၀ီဒီးတီၤဆိသ၀ီပူၤအဃိ လီၢ်က၀ီၤကမျၢၢ်ဘၣ်ဒိ(၄)ဂၤအကျါပၣ်ဃုာ်၀ဲၦၤဖိသၣ်(၁၀)နံၣ်တဂၤစ့ၢ်ကီးအဂ့ၢ်န့ၣ် လီၢ်က၀ီၤတၢ်ကစီၣ်သန့တဖၣ်ပာ်ဖျါ၀ဲဒၣ်န့ၣ်လီၤႉ
မဲၢ်ကနဲတၢ်ဒုးအပူၤပယီၤသုးသံ(၂၄)ဂၤဒီးမၤန့ၢ်ဃု၁်ကျိချံၦ၁်သၣ်တဖၣ်အဂ့ၢ်(Cobra)သုးကျိၤထုးထီၣ်ပ၁်ဖျါ
လါအ့ဖြ့ၣ် ၂၁ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် မၠၣ်၀တံၣ်ကလံၤထံး မဲၢ်ကနဲသ၀ီကပၤ ကၠီၣ်မဲလီၢ်က၀ီၤအပူၤန့ၣ် ဖဲလါအ့ဖြ့ၣ် ၁၉ သီအနံၤ တၢ်ဒုးကဲထီၣ်၀ဲလၢ(Cobra)သုးကျိၤသုးပာ်ဖှိၣ်ဒီးပယီၤသုးအဘၢၣ်စၢၤအခါ ပယီၤသုးသံ(၂၄)ဂၤဒီး မၤန့ၢ်၀ဲကျိချံၦာ်သၣ်တနီၤအဂ့ၢ်န့ၣ် (Cobra)သုးကျိၤထုးထီၣ်ပာ်ဖျါ၀ဲဖဲလါအ့ဖြ့ၣ် ၁၉ သီအနံၤန့ၣ်လီၤႉ ပယီၤသုးကျိၤခံကျိၤလၢအခးလီၤကျိဖးဒိၣ်နုာ်လီၤဆူမဲၢ်ကနဲသ၀ီဃၢၤ(ကၠီၣ်မဲ)လီၢ်က၀ီၤပူၤတဖၣ်အံၤ ဘၣ်တၢ်ခိးခးအ၀ဲသ့ၣ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA (Cobra)သုးကျိၤ(၁)ႇ Cobra သုးကျိၤ(၂)ႇ ခ့ဖါသူ သုးကျိၤႇ Federal Wings, Golden Eagle, ယီၣ်နံၣ်သုးပာ်ဖှိၣ်တဖၣ်အံၤ အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ် လီၤႉ Cobra သုးကျိၤ သုးကျိၤခိၣ်ခံ စီၤကီၢ်စံး၀ဲလၢ“ပမၤန့ၢ်၀ဲဒၣ်ကျိ(၉)ခိၣ်ႇဖဲမဟါတနံၤန့ၣ်ဟဲခးၦၤနီတနံၤကျၢၤ ဟဲခးၦၤဒီးကဘီယူၤႉ မ့၀ံၤအၦၤန့ၣ်ဟဲထီၣ်၀ဲဒၣ်သုးကျိၤခံကျိၤႉတိဒီးပၦၤဘျီပၦၤခးဘျီဒုအ၀ဲသ့ၣ်က့ၤစံၣ်လီၤက့ၤႉ အ၀ဲသ့ၣ်ကျိအိၣ်တ့ၢ်တၢ်ကူတၢ်ကၤအိၣ်ဘျီပလဲၤထၢန့ၢ်မီၤနီၤႉ ခဲအံၤဒုအက့ၤဂုၤလီၤလီၢ်ခံလံႉ ကဘီယူၤဟဲခးလီၤတၢ်န့ၣ် ဖဲမဲၢ်ကနဲကပၤ(ကၠီၣ်မဲ)မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်ဖဲလါအ့ဖြ့ၣ် ၂၀ သီအနံၤန့ၣ်လီၤႉ ပယီၤသုးဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤတၢ်ဒုးကဲထီၣ်လၢခံသီအတီၢ်ပူၤန့ၣ် ပယီၤသုးတကပၤသံ၀ဲ(၂၄)ဂၤဒီး ဘၣ်ဒိ၀ဲ(၂၃)ဂၤန့ၣ်လီၤႉဒ်န့ၣ်အသိးမ့မ့ၢ်လၢတၢ်ပၢၢ်ဆၢသုးပာ်ဖှိၣ်တကပၤန့ၣ်ဘၣ်ဟ့ၣ်လီၤကွံာ်အသးသမူ(၁)ဂၤဒီး ဘၣ်ဒိ၀ဲ(၇)ဂၤအဂ့ၢ်န့ၣ် (Cobra)သုးကျိၤ လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ တၢ်ကဲထီၣ်သးဖဲန့ၣ်၀ံၤလီၢ်ခံခီဖျိခံခီခံကပၤတၢ်ဒုးဆူၣ်ထီၣ်အဃိသုးခိးကီၢ်ဆၢ(BGF)ဒီးယီၤသုးတဖၣ်အံၤ မၤအါထီၣ်တၢ်ဘံၣ်တၢ်ဘၢလၢမၠၣ်၀တံၣ်၀့ၢ်ချၢဒီးသူမှဲကျိဒီတကျိၤညါအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဖၣ်စံး၀ဲန့ၣ်လီၤႉ လၢန့ၣ်အမဲာ်ညါလၢမၠၣ်၀တံၣ်ကလံၤထံးမဲၢ်ကနဲႇကၠီၣ်တီၤႇကၠီၣ်မဲသ၀ီတဖၣ်အပူၤန့ၣ် တၢ်ခးလိာ်သးကဲထီၣ်၀ဲလၢ ပယီၤသုးဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤအိၣ်၀ဲဘၣ်ဆၣ် မ့မ့ၢ်လၢမၠၣ်၀တံၣ်၀့ၢ်ပူၤခီန့ၣ်တၢ်ဂဲၤလိာ်ကွဲ(အၤ၀ၤဒ့) တၢ်တၤကျိၣ်တၢ်စ့လီၢ်တဖၣ်ဆီလီၤသးစံၢ်၀ဲဒိၣ်မးအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဖၣ်စံး၀ဲန့ၣ်လီၤႉ “မ့တုၤဖဲဟါခီ ၁၀ နၣ်ရံၣ်လံန့ၣ်နနၢ်ဟူကျိဖးဒိၣ်ကလုၢ်ႇတၢ်မၤဘူၣ်မၤပွဲကလုၢ်သီၣ်ထီၣ်လီၤႉ မ့မ့ၢ်(အၤ၀ၤဒ့)ပွဲဒုဟဲအါထီၣ်ကွ့ၢ်ကွ့ၢ်လီၤႉလၢ(အ့ၤကၠ့မၠဲၤ)တၢ်ဂဲၤလိာ်ကွဲထံလီၢ်န့ၣ်စံၢ်ညါႉမ့ၢ်ၦၤဂဲၤကလံၣ်ကၠၤဧါအိၣ်ဒီဒူၣ်ႉၦၤထုးထီၣ်တၢ်ကလုၢ်လၢမုၢ်နၤခီတဘၣ်ဟးထီၣ်ဘၣ်နါက့ၦၤလဲၤဒီဒူၣ်လီၤ”အဂ့ၢ်န့ၣ်...
သုးဟံးန့ၢ်တၢ်စိတၢ်ကမီၤအတီၢ်ပူၤလၢကညီဟီၣ်က၀ီၤအပူၤၦၤဖိဒံဖိသၣ်သံဘၣ်ဒိဘၣ်ထံးအိၣ်အဂၤ(၄၀)ဘျဲၣ်
လါအ့ဖြ့ၣ် ၂၀ သီႇ ၂၀၂၃ နံၣ်ႇ ခ့ၣ်အဲးစံၣ် သုးဟံးန့ၢ်တၢ်စိတၢ်ကမီၤအတီၢ်ပူၤခီဖျိတၢ်သဘံၣ်သဘုၣ်အဃိလၢကညီကလုာ်ဒူၣ်ဟီၣ်က၀ီၤတဖၣ်အပူၤန့ၣ် ၦၤဖိဒံဖိသၣ်ဘၣ်သံဘၣ်ဒိဘၣ်ထံး၀ဲအဂၤ(၄၀)ဘျဲၣ်အဂ့ၢ်န့ၣ် ကညီၦၤဂ့ၢ်၀ီခွဲးယာ်ကရူၢ်(KHRG)အတၢ်မၤနီၣ်စရီပူၤအသိး သ့ၣ်ညါဘၣ်န့ၣ်လီၤႉ လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤအပူၤ ခီဖျိပယီၤသုးခးလီၤကျိဖးဒိၣ်ဒီး ကဘီယူၤဟဲတ့ၢ်လီၤမ့ၣ်ပိၢ်အဃိ (၁၈)နံၣ်ဆူဖီလာ်ၦၤဖိသၣ်သံ၀ဲ(၂၅)ဂၤဒီးဘၣ်ဒိ၀ဲ(၁၉)ဂၤအဂ့ၢ်န့ၣ် (KHRG)ၦၤကတိၤတၢ်ပၢ စီၤနဒၣ်ဆူ စံး၀ဲန့ၣ်လီၤႉ အ၀ဲစံး၀ဲလၢ“တၢ်အိၣ်သးခဲအံၤန့ၣ်လီၤဆီဒၣ်တၢ်လၢခ့ၣ်အဲၣ်ယူၣ်(သုးက့ ၅)ႇ(သုးက့ ၆)အပူၤမီၤနီၤႉ လၢန့ၣ်တကပၤန့ၣ်တၢ်ဒုးဆဲးကဲထီၣ်ဒံးအဃိပတန့ၢ်ဘၣ်(update)ဒံးဘၣ်မီၤနီၤႉအဃိဘၣ်ဃးဒီးတၢ်သံတၢ်ဘၣ်ဒိဘၣ်ထံးအနီၣ်ဂံၢ်စရီန့ၣ်တၢ်လိၣ်တၢ်လဲးအိၣ်ဒံးအဖၢမုၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ခီဖျိကဘီယူၤဟဲတ့ၢ်လီၤမ့ၣ်ပိၢ်အဃိၦၤဖိသၣ်လၢအသံ(၂၅)ဂၤအံၤတဖၣ်အကျါန့ၣ်ပၣ်ဃုာ်၀ဲၦၤဖိသၣ်လၢအိၣ်မိၢ်ဟၢဖၢပူၤတဖၣ်ဒီးဘၣ်ဃးၦၤနီၣ်ဂံၢ်စရီလီၤတံၢ်လီၤဆဲးန့ၣ်(KHRG)ကက့ၤဃိထံသမံသမိးကဒါ၀ဲအဂ့ၢ်န့ၣ် စီၤနၢၤဒၣ်ဆူ စံးအါထီၣ်၀ဲန့ၣ်လီၤႉ လၢန့ၣ်အမဲာ်ညါခီဖျိသုးမီၤစိရိၤကဘီယူၤဟဲခးလီၤတၢ်ဟဲအါထီၣ်၀ဲအဃိလၢကညီကလုာ်ဒူၣ်ဟီၣ်က၀ီၤတဖၣ်အပူၤန့ၣ် ကမျၢၢ်သံ၀ဲအဂၤ(၅၀)ဘျဲၣ်ဒီးဘၣ်ဒိဘၣ်ထံးကအိၣ်လၢအဂၤ(၁၀၀)ဃၣ်ဃၣ်ညါအသိး လီၢ်က၀ီၤကမျၢၢ်အဂၤ(၆)ကလီၢ် ဃၣ်ဃၣ် ဘၣ်ဃ့ၢ်မှံဟးဖျိး၀ဲအဂ့ၢ်န့ၣ် (KHRG)ထုးထီၣ်ပာ်ဖျါ၀ဲဖဲလါအ့ဖြ့ၣ် ၁၂ သီအနံၤန့ၣ်လီၤႉ ဒ်န့ၣ်အသိးစးထီၣ်(၂၀၂၁)သုးဟံးန့ၢ်တၢ်စိတၢ်ကမီၤကဲထီၣ်တုၤလၢခဲအံၤတစုန့ၣ်ခီဖျိတၢ်သဘံၣ်သဘုၣ်အဃိ လၢကီၢ်ပယီၤအပူၤန့ၣ်ၦၤဖိဒံဖိသၣ်သံ၀ဲ(၃၉၆)ဂၤလံဒီးပယီၤသုးဖီၣ်ဒုးဃာ်၀ဲဖိသၣ်(၁၈)နံၣ်ဆူဖီလာ်အိၣ်၀ဲ(၃၅၅)ဂၤအဂ့ၢ်န့ၣ် ဒီကလုာ်ဃူဖိးပဒိၣ်(NUG) ပိာ်မုၣ်ႇသးစၢ်ဒီးဖိသၣ်ဂ့ၢ်၀ီ ကိတိာ်၀ဲၤကျိၤ ထုးထီၣ်ပာ်ဖျါ၀ဲဖဲလါအ့ဖြ့ၣ် ၁၈ သီအနံၤ န့ၣ်လီၤႉ
သုးမီၤစိရိၤကဘီယူၤလဲၤတ့ၢ်လီၤမ့ၣ်ပိၢ်လၢ(ပစံၤကၠံ)သ၀ီပူၤတၢ်ဂ့ၢ်အဖီခိၣ်အံၤ KNU(သုးက့ ၅)ထီဒါ၀ဲတဲ၁်တဲ၁်ဖျုဖျု
လါအ့ဖြ့ၣ် ၂၀ သီႇ ၂၀၂၃ နံၣ်ႇ ခ့ၣ်အဲးစံၣ် လၢစကဲကီၢ်ခီ ကၣ်ဘလူကီၢ်ဆၣ်အပူၤ ဖဲလါအ့ဖြ့ၣ် ၁၁ သီအနံၤန့ၣ် သုးမီၤစိရိၤကဘီယူၤလဲၤတ့ၢ်လီၤမ့ၣ်ပိၢ်လၢ (ပစံၤကၠံ)သ၀ီပူၤတၢ်ဂ့ၢ်အဖီခိၣ်အံၤ ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၅) ထီဒါပဲာ်အၢပဲာ်သီ၀ဲတဲ၁်တဲ၁် ဖျုဖျုအဂ့ၢ်န့ၣ် ထုးထီၣ်ပာ်ဖျါ၀ဲဖဲလါအ့ဖြ့ၣ် ၁၇ သီအနံၤန့ၣ်လီၤႉ ခီဖျိသုးမီၤစိရိၤကဘီယူၤလဲၤတ့ၢ်လီၤမ့ၣ်ပိၢ်လၢ(ပစံၤကၠံ)သ၀ီပူၤအဘျီတဖၣ်အဘျီအဃိ ကမျၢၢ်သံ၀ဲလၢအကယၤညါဒီးနၢ်ဟူကမျၢၢ်သံဘၣ်ဒိဘၣ်ထံးအါအါဂီၢ်ဂီၢ်ဒ်အံၤအဖီခိၣ် လီၤသူၣ်ဘၣ်ဒိသးဘၣ်ဒိ၀ဲဒိၣ်မးအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)စံး၀ဲန့ၣ်လီၤႉ လၢန့ၣ်အမဲာ်ညါဒ်သိးကမျၢၢ်ထံဖိကီၢ်ဖိတဖၣ်ကထူၣ်ဖျဲးထီၣ်လၢတၢ်ဆီၣ်တံၢ်မၤနၢၤပူၤအဂီၢ် ၦၤလၢအဟ့ၣ်လီၤအသးသမူသ့ၣ်တဖၣ်အံၤစ့ၢ်ကီးယူးယီၣ်ပာ်ကဲဘၣ်အ၀ဲသ့ၣ်ကိးဂၤဒဲးလီၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅) မုၢ်တြီၢ်ကီၢ်ရ့ၣ် စံး၀ဲန့ၣ်လီၤႉ စးထီၣ်ဖဲ(၂၀၂၁)လါဖ့ၤဘြူၤအါရံၤ ၁ သီတုၤလၢခဲအံၤန့ၣ် တမ့ၢ်ထဲလၢကလုာ်ဒူၣ်တၢ်ပၢၢ်ဆၢဟီၣ်က၀ီၤအပူၤဘၣ် တၢ်လီၢ်လၢၦၤပယီၤဖိအိၣ်အလီၢ်အကျဲအပူၤတနီၤဒီးခူပူၤ၀့ၢ်ပူၤတဖၣ်န့ၣ်သုးမီၤစိရိၤအံၤပာ်၀ဲကမျၢၢ်ထံဖိကီၢ်ဖိတဖၣ်ဒ်အဒုၣ်အဒါအသိးဒီးဖီၣ်မၤသံမၤ၀ီ၀ဲကမျၢၢ်ထံဖိကီၢ်ဖိတဖၣ်အဖီခိၣ်အံၤ ခ့ၣ်အဲၣ်ယူၣ်(သုးက့ ၅)ထီဒါ၀ဲတဲာ်တဲာ်ဖျုဖျုအဂ့ၢ်န့ၣ် လံာ်တၢ်ပာ်ဖျါအပူၤစံး၀ဲန့ၣ်လီၤႉ သုးမီၤစိရိၤအတၢ်ဖံးတၢ်မၤတၢ်ဟူးတၢ်ဂဲၤသ့ၣ်တဖၣ်အံၤမၤ၀ဲလၢအ၀ဲသ့ၣ်ကလုာ်ဒိၣ်စိသနူဒီးသုးမီၤစိရိၤကအိၣ်ဂၢၢ်ဆိးကျၢၤအဂီၢ်လီၤအဃိဒ်သိးသုးမီၤစိရိၤကလီၤၦီၢ်ကွံာ်အဂီၢ်န့ၣ်ပ၀ဲကလုာ်ဒူၣ်တၢ်ပၢၢ်ဆၢကရူၢ်ကရၢဃုာ်ဒီးကရူၢ်လၢအထီဒါပၢၢ်ဆၢက့ၤသုးမီၤစိရိၤတဖၣ်အံၤကပာ်ဖှိၣ်မၤသကိးတၢ်အဂ့ၢ်န့ၣ် ခ့ၣ်အဲၣ်ယူၣ်(သုးက့ ၅) စံး၀ဲန့ၣ်လီၤႉ ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအံၤမ့ၢ်စ့ၢ်ကီးဟီၣ်က၀ီၤတၢ်လီၢ်တခါလၢအသဂၢၢ်ဘၣ်၀ဲ သုးမီၤစိရိၤအတၢ်ဟဲတ့ၢ်လီၤမ့ၣ်ပိၢ်အိၣ်၀ဲတလီၢ်လီၢ်အသိးခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၣ်အဃိ ကမျၢၢ်သံဘၣ်ဒိဘၣ်ထံးအိၣ်၀ဲဒီးကမျၢၢ်ထံဖိကီၢ်ဖိလၢအကထိဘၣ်ဃ့ၢ်မှံဟးဖျိး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ခီဖျိတၢ်ဒုးကဲထီၣ်လၢသ၀ီပူၤအဃိကမျၢၢ်လၢအကယၤဘၣ်ဃ့ၢ်ထီၣ်လၢယိၤကီၢ်တကပၤ
လါအ့ဖြ့ၣ် ၁၉ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် ကီၢ်သီကီၢ်ဆၣ် ခမီၣ်ကၠံ၀့ၢ် စ့ၣ်ဖူသ၀ီအပူၤန့ၣ် တၢ်ဒုးကဲထီၣ်လၢသုးမီၤစိရိၤစုတီၤဖီလာ် (ဘၠူၣ်စီထံ)ကရူၢ်ဒီး ကီၢ်သီ၀့ၢ်တၢ်ဒီသဒၢကမျၢၢ်သုးအဘၢၣ်စၢၤ၀ံၤလီၢ်ခံ လီၢ်က၀ီၤကမျၢၢ်လၢအကယၤ ဘၣ်လဲၤဃ့ၢ်ထီၣ်လၢယိၤကီၢ်တကပၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲလါအ့ဖြ့ၣ် ၁၆ သီအနံၤန့ၣ် တနီသရံၣ်ကီၢ်ဆၣ် တၢ်ဒီသဒၢကမျၢၢ်သုးလဲၤခး၀ဲ သုးမီၤစိရိၤစုတီၤဖီလာ်ဂၢၤကီၢ်အသုးခိၣ် ကၠီၣ်၀့ဒီး သုးခိၣ်ခံ မၠ့ၣ်အီၣ်လၢ(ခမီၣ်ကၠံ)၀့ၢ် စ့ၣ်ဖူသ၀ီပူၤအံၤဒီး ဖဲန့ၣ်ခီဖျိခံခီခံကပၤတၢ်ခးလိာ်သးကဲထီၣ်အဃိ ကမျၢၢ်လၢအိၣ်သ၀ီပူၤတဖၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် (People Defense Organization-Taninthary Division) တၢ်ဘိးဘၣ်ရၤလီၤမူဒါခိၣ် စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ပလဲၤခးအ၀ဲသ့ၣ်(၂)ဂၤန့ၣ်မီၤနီၤႉတၢ်ခးလိာ်သးကဲထီၣ်ဘျီပမၤန့ၢ်အ၀ဲသ့ၣ်ကျိႉ တၢ်ဒုးကဲထီၣ်အဃိ ၦၤသ၀ီဖိလဲၤစံၣ်ထီၣ်လၢယိၤကီၢ်တကပၤန့ၣ်,ခဲအံၤပနၢ်ဟူန့ၣ်ၦၤက့ၤအိၣ်လၢသ၀ီပူၤတနီၤလံ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်ခးလိာ်သးကဲထီၣ်ဘျီ၀ဲအံၤအပူၤန့ၣ်သုးမီၤစိရိၤအဂၢၤကီၢ်သုးခိၣ်သံ၀ဲ(၂)ဂၤဒီးတၢ်မၤန့ၢ်၀ဲ(AK 47)ကျိခံခိၣ်ႇ (47)ချံ(၁၁၉)ဖျၢၣ်ႇကျိဖုၣ်(၁)ခိၣ်ႇဆ့က့ၤဒီသဒၢကျိချံ(၄)ဘ့ၣ်ႇသုးဆ့ကၤ(၂)စိၢ်ဒီးမၤန့ၢ်ဃုာ်၀ဲတၢ်ဖိတၢ်လံၤလၢအဂၤသ့ၣ်တဖၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဒ်န့ၣ်အသိးဖဲအပူၤကွံာ်လါမးရှးအခါစ့ၢ်ကီး လၢကီၢ်သီကီၢ်ဆၣ်(၀ဲဒ့ၤ)သ၀ီအပူၤန့ၣ် ခီဖျိတၢ်ဒုးကဲထီၣ်၀ဲလၢပယီၤသုးဒီးတၢ်ဒီသဒၢကမျၢၢ်သုးအဘၢၣ်စၢၤအဃိ လီၢ်က၀ီၤကမျၢၢ်အဂၤ(၅၀၀)ဘျဲၣ် ဘၣ်လဲၤဃ့ၢ်ထီၣ်ဒံး၀ဲလၢယိၤကီၢ်တကပၤဒံးအဂ့ၢ်န့ၣ် ဟီၣ်က၀ီၤဂံၢ်ခီၣ်ထံးပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ
ကညီကီၢ်စဲၣ်(တီၣ်ကလ့)ဃိ၁်ပူၤတၢ်ပျၢ်လီၤၦၤဃိ၁်ဖိ(၈၃)ဂၤအကျါပၣ်ဃု၁်ထံရူၢ်ကီၢ်သဲးၦၤဃိ၁်ဖိ(၂)ဂၤ
လါအ့ဖြ့ၣ် ၁၉ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲလါအ့ဖြ့ၣ် ၁၈ သီအနံၤန့ၣ် လၢကီၢ်ပယီၤအနံၣ်ထီၣ်သီတၢ်သ့ၣ်နီၣ်အဂီၢ် သုးမီၤစိရိၤပျၢ်လီၤ၀ဲၦၤဃိာ်ဖိခဲလၢာ်(၃၀၁၅)ဒီး ဖဲန့ၣ်အကျါမ့မ့ၢ်ကညီကီၢ်စဲၣ်(တီၣ်ကလ့)ဃိာ်ပူၤန့ၣ် ပျၢ်လီၤ၀ဲၦၤဃိာ်ဖိ(၈၃)ဂၤအကျါ ပၣ်ဃုာ်၀ဲထံရူၢ်ကီၢ်သဲးၦၤဃိာ်ဖိခံဂၤ အဂ့ၢ်န့ၣ် သ့ၣ်ညါဘၣ်န့ၣ်လီၤႉ ၦၤဟဲက့ၤထူၣ်ဖျဲးထီၣ်လၢဃိာ်ပူၤ(၈၃)ဂၤအကျါ(၁၇)ဂၤန့ၣ်မ့ၢ်၀ဲပှၤကီၢ်ပယီၤဖိတဖၣ်န့ၣ်လီၤႉ ၦၤဃိာ်ဖိ(၁၇)ဂၤအံၤကျါန့ၣ်ပၣ်ဃုာ်၀ဲထံရူၢ်ကီၢ်သဲးၦၤဃိာ်ဖိ(၂)ဂၤလၢဘူးကဘၣ်ဟးထီၣ်လၢဃိာ်ပူၤအဂ့ၢ်န့ၣ် သ့ၣ်ညါဘၣ်လၢၦၤဟဲက့ၤထူၣ်ဖျဲးထီၣ်လၢဃိာ်ပူၤတဖၣ် အအိၣ်န့ၣ်လီၤႉ “ၦၤပျၢ်လီၤၦၤဃိာ်ဖိတဖၣ်အကျါန့ၣ်ပၣ်ဃုာ်၀ဲ(၅၀၅ က)ခံဂၤႉလၢအ၀ဲ(၁၅)ဂၤန့ၣ်မ့ၢ်၀ဲဒၣ်ၦၤစံၣ်ပယီၤသုး,ပၢၤကီၢ်သုးႇ (လ၀က)တၢ်မူးတဖၣ်န့ၣ်လီၤႉၦၤပျၢ်လီၤၦၤသ့ၣ်တဖၣ်အံၤ၀ံၤမးပျၢ်လီၤက့ၤ၀ဲၦၤ(ဘံၣ်ယဲနၣ်)ဖိႇတရူးႇဘ့ၤကၤလံၤဖိတဖၣ်ႇကအိၣ်လၢ(၁၅)ဂၤညါႉဖဲတီၣ်ကလ့ဃိာ်ပူၤအံၤန့ၣ်ပျၢ်လီၤ၀ဲၦၤတဖၣ်အံၤလီၤ”အဂ့ၢ်န့ၣ် ၦၤလၢအဟဲက့ၤထူၣ်ဖျဲးထီၣ်လၢဃိာ်ပူၤတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢတီၣ်ကလ့ဃိာ်ပူၤန့ၣ်(CDM)ႇၦၤကၠိဖိႇကမျၢၢ်လၢတၢ်ဖီၣ်ဒုးဃာ်အီၤလၢထံရူၢ်ကီၢ်သဲးတၢ်ဘျၢသဲစးတဖၣ် အိၣ်ဒံး၀ဲအဂၤ(၂၀၀)ဃၣ်ဃၣ်ဒံးအသိးၦၤကၠိဖိလၢတၢ်ဆှၢအီၤဆူဃိာ်လၢအဂၤစ့ၢ်ကီးအိၣ်ဒံး၀ဲအဂၤ(၁၀၀)ဘျဲၣ်ဒံးဒီးၦၤသ့ၣ်တဖၣ်အံၤတၢ်လဲၤဆှၢအီၤဆူ(သၣ်ယၣ်၀တံၣ်)ဃိာ်ပူၤႇတီအူႇကၠဲၣ်မယီဃိာ်ပူၤသ့ၣ်တဖၣ်အဂ့ၢ်န့ၣ် ၦၤဟဲက့ၤထူၣ်ဖျဲးထီၣ်လၢဃိာ်ပူၤတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ သုးမီၤစိရိၤပျၢ်လီၤဃိာ်(၁၁)ဖျၢၣ်အကျါပၣ်ဃုာ်စ့ၢ်ကီးကညီကီၢ်စဲၣ်(တီၣ်ကလ့)ဃိာ်အံၤဒီး ၦၤဃိာ်ဖိလၢတၢ်ပျၢ်လီၤ၀ဲသ့ၣ်တဖၣ်န့ၣ်အါဒၣ်တက့ၢ်မ့ၢ်ၦၤလီၤဘၣ်တၢ်ကမၣ်လၢတၢ်ဟုၣ်တၢ်ဘျၣ်အမူးႇကသံၣ်မူၤဘှီးအမူးႇၦၤစံၣ်သုးႇစံၣ်ပၢၤကီၢ်သ့ၣ်တဖၣ်လီၤဒီးတၢ်ပျၢ်လီၤၦၤဃိာ်ဖိတဘျီအံၤတပၣ်ဃုာ်ၦၤထံရူၢ်ကီၢ်သဲးဖိႇ ၦၤမၤတၢ်ကစီၣ်ဖိႇၦၤကၠိဖိဒီးၦၤ(CDM)ဖိတဖၣ်ဘၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ ဒ်န့ၣ်အသိးထံဂုၤကီၢ်ဂၤၦၤဃိာ်ဖိ(၉၈)ဂၤလၢတၢ်ပျၢ်လီၤ၀ဲတဖၣ်အံၤစ့ၢ်ကီး ဒ်သိးထံကီၢ်တဘ့ၣ်ဒီးတဘ့ၣ် တၢ်ရ့လိာ်မုာ်လိာ်သုတဟးဂီၤတဂ့ၤအဂီၢ်န့ၣ်တၢ်ပျၢ်လီၤ၀ဲလီၤအဂ့ၢ်န့ၣ် သုးမီၤစိရိၤစံး၀ဲန့ၣ်လီၤႉ
တၢ်နု၁်လီၤခးကၠဲၣ်ကီၤပၢၤကီၢ်၀ဲၤလီၢ် ပၢၤကီၢ်သံ(၆)ဂၤအဂ့ၢ် တၢ်ဒီသဒၢကမျၢၢ်သုးစံး၀ဲ
လါအ့ဖြ့ၣ် ၁၈ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်အပူၤ ဖဲလါအ့ဖြ့ၣ် ၁၇ သီ ဂီၤခီအဆၢကတီၢ်န့ၣ် တၢ်ပၢၢ်ဆၢသုးပာ်ဖှိၣ်နုာ်လီၤခး၀ဲကၠဲၣ်ကီၤ(သိမ်ဆိပ်)ပၢၤကီၢ်၀ဲၤလီၢ်ဒီး ဖဲန့ၣ်ပၢၤကီၢ်သံ၀ဲ(၆)ဂၤအဂ့ၢ်န့ၣ် တၢ်ဒီသဒၢကမျၢၢ်သုးတကပၤစံး၀ဲန့ၣ်လီၤႉ ဖဲဂီၤခီ ၁၀း၁၅ မံးနံးအဆၢကတီၢ် သထူၣ်တၢ်ဒီသဒၢကမျၢၢ်သုး(ပကဖ)တီခိၣ်ရိၣ်မဲ(Hawk Revolutionary Squad-HRS ) ဒီး (သုးက့ ၁) သုးရ့ၣ် ၂ႇ သုးဒ့(၃)ပာ်ဖှိၣ်ထီၣ်သးနုာ်လီၤခး၀ဲဒၣ်အဂ့ၢ်န့ၣ် ၦၤလၢဘူးဒီးတၢ်ဒီသဒၢကမျၢၢ်သုးတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဒ်ပနၢ်ဟူတၢ်ကစီၣ်လၢလီၢ်ခံကတၢၢ်အသိးန့ၣ်အ၀ဲသ့ၣ်ၦၤသံ၀ဲဒၣ်(၆)ဂၤႉမ့မ့ၢ်အ၀ဲ(၃)ဂၤခီန့ၣ် ပၦၤလဲၤခးအ၀ဲသ့ၣ်လၢကျိဖိမီၤနီၤႉပခးအ၀ဲသ့ၣ်ဒီး(၄၀ mm)ကျိ လီၤတဲာ်ပိၢ်ဖးထီၣ်လၢအ၀ဲသ့ၣ်တၢ်လီၢ်န့ၣ် (၅)ဖျၢၣ်ႉ မ့မ့ၢ်လၢနီၣ်ဂံၢ်(၉)သုးခီန့ၣ်ပလဲၤခးလၢဒြိလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်နုာ်လီၤခးကၠဲၣ်ကီၤပၢၤကီၢ်၀ဲၤလီၢ်အတၢ်ပညိၣ်ခီန့ၣ်ဒ်သိးပယီၤသုးအံၤကသ့ၣ်ညါ၀ဲလၢပနုာ်လီၤခးအ၀ဲသ့ၣ်လၢ၀့ၢ်ပူၤသ့၀ဲကိးဆၢတကီၢ်ဒဲးလီၤအဂ့ၢ်န့ၣ် ၦၤလၢဘူးဒီးတၢ်ဒီသဒၢကမျၢၢ်သုးတဂီၤဃီ၀ဲန့ၣ် စံးအါထီၣ်၀ဲန့ၣ်လီၤႉ “ပယီၤသုးအံၤလၢအသးပူၤန့ၣ်ဆိမိၣ်၀ဲလၢ၀့ၢ်ပူၤအံၤတၢ်ဘံၣ်တၢ်ဘၢအိၣ်လံႉဆိမိၣ်၀ဲပလဲၤခးအ၀ဲသ့ၣ်တတုၤလၢ၀့ၢ်ပူၤဘၣ်ဆိမိၣ်၀ဲဒ်န့ၣ်ႉအခိၣ်သ့ၣ်န့ၣ်သထူၣ်၀့ၢ်မီၤနီၤႉသထူၣ်၀့ၢ်န့ၣ်ပယီၤသုးက၀ီၤဃာ်အီၤခဲလၢာ်လီၤႉပမ့အဲၣ်ဒိးနုာ်လီၤခးအ၀ဲသ့ၣ်လၢ၀့ၢ်ပူၤန့ၣ်ပနုာ်လီၤခးအီၤသ့ကိးဆၢကတီၢ်ဒဲးလီၤ”အဂ့ၢ်န့ၣ် အ၀ဲစံး၀ဲန့ၣ်လီၤႉ တၢ်နုာ်လီၤခးပၢၤကီၢ်၀ဲၤလီၢ်ဘျီ၀ဲအံၤအပူၤန့ၣ်တၢ်ပၢၢ်ဆၢသုးပာ်ဖှိၣ်တကပၤတၢ်ဘၣ်ဒိဘၣ်ထံးတအိၣ်၀ဲဘၣ်အဂ့ၢ် တၢ်ပၢၢ်ဆၢသုးပာ်ဖှိၣ်စံး၀ဲအိၣ်ဘၣ်ဆၣ် ဘၣ်ဃးတၢ်သံတၢ်ဘၣ်ဒိဘၣ်ထံးတၢ်အိၣ်သးအံၤန့ၣ် ပခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ်ပာ်ဂၢၢ်ပာ်ကျၢၤ၀ဲလီၤလီၤဆီဆီတန့ၢ်ဒံး၀ဲဘၣ်န့ၣ်လီၤႉ
လ့နိးသ၀ီပူၤ သီခါယီၢ်ဘၣ်မ့ၣ်ပိၢ်လၢပယီၤသုးဒိးလီၤဃ၁်၀ဲအံၤအဃိအခီၣ်တူ၁်ကွံ၁်တကပၤ
လါအ့ဖြ့ၣ် ၁၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် နိၣ်တကီကီၢ်ဆၣ် ၀ီၢ်ရ့ၣ်ဟီၣ်က၀ီၤ လ့နိးသ၀ီအပူၤ ဖဲလါအ့ဖြ့ၣ် ၁၂ သီအနံၤန့ၣ် သီခါတပါယီၢ်ဘၣ်၀ဲမ့ၣ်ပိၢ်လၢပယီၤသုးဒိးလီၤဃာ်၀ဲဖဲသီခါဖၠၣ်ကရၢၢ်ပူၤအဃိ သီခါအံၤအခီၣ်တူ၁်ကွံ၁်၀ဲတကပၤအဂ့ၢ်န့ၣ် သ့ၣ်ညါဘၣ်လၢသီခါအတကၢ်မုၣ်တကၢ်ခွါတဖၣ်အအိၣ်န့ၣ်လီၤႉ ဖဲလါအ့ဖြ့ၣ် ၁၂ သီ ဂီၤခီ ၉ နၣ်ရံၣ်အဆၢကတီၢ် လၢလ့နိးသီခါဖၠၣ်ကရၢၢ်အပူၤ အူစ့(အစှ့ၤစၤဒၣ်)တပါအံၤ ဒီးအတကၢ်ခံဂၤ ဖဲအလဲၤထီၣ်လၢတၢ်လူၢ်ခိၣ်လဲၤထီၣ်ပိာ်ဃီအခါ ယီၢ်ဘၣ်၀ဲမ့ၣ်ပိၢ်အဂ့ၢ်န့ၣ် ၀ီၢ်ရ့ၣ်လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“လၢတၢ်လူၢ်ခိၣ်န့ၣ်ၦၤတ့ထီၣ်ဃာ်ဃိၣ်အိၣ်မီၤနီၤႉၦၤတ့ထီၣ်ဃီလၢတၢ်လူၢ်ခိၣ်န့ၣ်က၀ံၤတ၀၁်ဃၣ်ဃၣ်လံႉ တၢ်ဒုးကဲထီၣ်ဘျီၦၤအိၣ်ဘှံးမီၤနီၤႉတၢ်တနံၤန့ၣ်သီခါလဲၤထီၣ်မၤကဆှဲကဆှီတၢ်လၢတၢ်လူၢ်ခိၣ်ႉဖဲအဟဲက့ၤစံၣ်လီၤလၢတၢ်လူၢ်ခိၣ်ကန့ၢ်တ၀၁်လံဖဲန့ၣ်အယီၢ်ဘၣ်မ့ၣ်ပိၢ်ႉအခီၣ်တူာ်ကွံာ်တကပၤလီၤ,ခဲအံၤၦၤလဲၤဆှၢအီၤလၢမီၣ်လမၠဲၣ်တၢ်ဆါဟံၣ်” အဂ့ၢ်န့ၣ် စံး၀ဲန့ၣ်လီၤႉ ပယီၤသုးလၢအအိၣ်ဆီလီၤသးဖဲလ့နိးသ၀ီပူၤတဖၣ်အံၤညီနုၢ်န့ၣ်အ၀ဲသ့ၣ်ဒိးလီၤဃာ်မ့ၣ်ပိၢ်လၢဒူသ၀ီၦၤဟံၣ်ၦၤဃီႇ ၦၤကရၢၢ်ၦၤကျီးပူၤဒီးသီခါဖၠၣ်ကရၢၢ်ပူၤအိၣ်အဃိဆၣ်ဖိကီၢ်ဖိလၢအိၣ်သ၀ီပူၤတဖၣ်ယီၢ်ဘၣ်မ့ၣ်ပိၢ်သံဘၣ်ဒိဘၣ်ထံး ကဲထီၣ်သးအိၣ်၀ဲတလီၢ်လီၢ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ “လၢၦၤဟံၣ်ၦၤကရၢၢ်ၦၤကျီးပူၤန့ၣ်အ၀ဲသ့ၣ်ဒိးလီၤဃာ်၀ဲမ့ၣ်ပိၢ်အိၣ်လီၤႉလၢညါခါတၢ်လီၢ်လၢၦၤဟဲခးအ၀ဲသ့ၣ်သုးကလၢၤအလီၢ်တဖၣ်န့ၣ်အ၀ဲသ့ၣ်ဟးဒိးလီၤဃာ်၀ဲမ့ၣ်ပိၢ်ႉခီဖျိလၢအ၀ဲသ့ၣ်မ့ၣ်ပိၢ်အဃိန့ၣ်သ၀ီပူၤအံၤၦၤကျီၢ်သံ(၅)ဒုလံႉ ဖဲမဟါတလါန့ၣ်နါက့သီခါလၢအဟဲက့ၤဒိးသိလ့ၣ်အံၤပယီၤသုးခး၀ဲအဃိအူစ့ဘၣ်ဒိဘၣ်ထံးကဲထီၣ်သးဒံးႉ အ၀ဲသ့ၣ်ဟးဒိးလီၤကြီမ့ၣ်ပိၢ်ဒ်အံၤအဃိၦၤက့ၤအိၣ်လၢသ၀ီပူၤတဘူၣ်နီတဂၤဘၣ်”အဂ့ၢ်န့ၣ် လီၢ်က၀ီၤကမျၢၢၢ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ၀ီၢ်ရ့ၣ်ကီၢ်ဆၣ်တၢ်ပၢဟီၣ်က၀ီၤ လ့နိးႇနိၣ်ခၠိနဲၣ်ႇ လိၣ်ရှါသ၀ီတဖၣ်အပူၤန့ၣ် ပယီၤသုးႇသုးခိးကီၢ်ဆၢ(BGF)ဆီလီၤသုးကလၢၤအိၣ်၀ဲတပူၤဃီဒီးခီဖျိအ၀ဲသ့ၣ်ဒိးလီၤဃာ်မ့ၣ်ပိၢ်အံၤလၢအသုးကလၢၤခိၣ်ဃၢၤအဃိသ၀ီဖိအကျီၢ်ယီၢ်ဘၣ်မ့ၣ်ပိၢ်တလီၢ်လီၢ်အဖီခိၣ်အံၤအ၀ဲသ့ၣ်တဲပျံၤမၢကမျၢၢ်လီးလီၤမ့ၣ်ပိၢ်အဘူးအလဲအိၣ်၀ဲစ့ၢ်ကီးအဂ့ၢ်န့ၣ် သ့ၣ်ညါဘၣ်လၢသ၀ီဖိတဖၣ်အအိၣ်န့ၣ်လီၤႉ လၢန့ၣ်အမဲာ်ညါလီၢ်က၀ီၤကမျၢၢ်လၢအဟးထီၣ်က့ၤလီၤဖဲအ၀ဲသ့ၣ်သုကလၢၤမဲာ်ညါတဖၣ်န့ၣ်စ့ၢ်ကီး အ၀ဲသ့ၣ်ဃ့ဆူၣ်၀ဲစ့ဒီးခးစိ၀ဲဒီးကျိအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
စွ့ၤကိၣ်ကိၤဟီၣ်က၀ီၤတၢ်ဒုးကဲထီၣ်၀ံၤလီၢ်ခံတၢ်မၤဃံးထီၣ်တၢ်ဘံၣ်တၢ်ဘၢလၢကျဲနု၁်လီၤဟးထီၣ်အလီၢ်တဖၣ်
လါအ့ဖြ့ၣ် ၁၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢမၠၣ်၀တံၣ်ကလံၤစိး စွ့ၤကိၣ်ကိၤ၀့ၢ်သီကပၤ အပူၤကွံာ်စှၤသီအခါ တၢ်ဒုးကဲထီၣ်၀ဲလၢတၢ်ပၢၢ်ဆၢသုးပာ်ဖှိၣ်ဒီး ပယီၤသုးႇသုးခိးကီၢ်ဆၢ(BGF)သုးပာ်ဖှိၣ်အဘၢၣ်စၢၤဒီးဘၣ်ဆၣ်ခဲအံၤတၢ်ဒုးကဲထီၣ်တအိၣ်လၢၤ၀ဲဘၣ်ဆၣ် လၢစွ့ၤကိၣ်ကိၤဟီၣ်က၀ီၤကျဲနုာ်လီၤဟးထီၣ်န့ၣ်(BGF)ဆီလီၤတြဲၤမၤဃံးထီၣ်တၢ်ဘံၣ်တၢ်ဘၢဃံးဃီၣ်ဒီၣ်အဂ့ၢ်န့ၣ် ၦၤလၢအဟးထီၣ်က့ၤလီၤဖဲန့ၣ်တဖၣ်စံး၀ဲန့ၣ်လီၤႉ တၢ်ဒုးကဲထီၣ်လၢစွ့ၤကိၣ်ကိၤလီၢ်က၀ီၤဒီးဒူသ၀ီလၢအိၣ်ဘူးတၢ်ခိၣ်တၢ်ဃၢၤဖဲန့ၣ်သ့ၣ်တဖၣ်၀ံၤလီၢ်ခံန့ၣ် ဘၣ်ယိၣ်၀ဲလၢတၢ်ဒုးကဆူၣ်ထီၣ်လၢစွ့ၤကိၣ်ကိၤလီၢ်က၀ီၤပူၤအဃိ(BGF)ဆီလီၤတြဲၤလၢကျဲနုာ်လီၤဟးထီၣ်အလီၢ်တဖၣ်ဒီးအိၣ်ခိးသမံသမိးတၢ်အဂ့ၢ်န့ၣ် ကမျၢၢ်လၢအဟးထီၣ်က့ၤလီၤဖဲန့ၣ်တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ကယဲၢ်မ့ၢ်ကစၢၢ်ခိၣ်န့ၣ်သုးအိၣ်ခဲလၢာ်လီၤႉဖဲတၢ်ကနုာ်လီၤစွ့ၤကိၣ်ကိၤန့ၣ်တၢ်ပံးဃာ်၀ဲဒီးတြဲၤကအိၣ်(၆)ဘ့ၣ်ညါႉတချုးတၢ်ဒုးကဲထီၣ်ဒံးဘၣ်န့ၣ်ၦၤတသမံသမိးတၢ်ဒ်အံၤညါဘၣ်ႉတချုးတုၤလၢ၀့ၢ်ပူၤဘၣ်န့ၣ်တြဲၤလၢအအိၣ်ခိးသမံသမိးတၢ်န့ၣ်ကအိၣ်လၢ(၅)ဘ့ၣ်ဒံးညါအိၣ်ခိးသမံသမိးတၢ်ႉမ့၀ံၤတြဲၤတၢ်လီၢ်ကိးတီၤဒဲးန့ၣ်တ့ထီၣ်၀ဲဒဲႇ ခူၣ်ဃာ်၀ဲတၢ်ပူၤႇ မၤထီၣ်ဃာ်၀ဲတၢ်သူၣ်ထီၣ်ဖးထီလၢကကွၢ်စိလီၤတၢ်အဂီၢ်မီၤနီၤႉ ဘၣ်မနုၤအဃိလဲၣ်န့ၣ်ဘၣ်ယိၣ်၀ဲလၢ တၢ်ဒုးကကဲထီၣ်လၢစွ့ၤကိၣ်ကိၤ၀့ၢ်ပူၤအဃိဒီသဒၢဆိ၀ဲဒ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါစွ့ၤကိၣ်ကိၤ၀့ၢ်ပူၤန့ၣ်တၢ်ပျဲဟးထီၣ်က့ၤလီၤကမျၢၢ်လၢအဆၢကတီၢ်အသိး ကမျၢၢ်ဒီးသိလ့ၣ်လၢအဟးထီၣ်က့ၤလီၤတဖၣ်(BGF)သမံသမိး၀ဲမၣ်ပိၤတ့ၤဒီးဟံၣ်ခိၣ်စရီအဂ့ၢ်န့ၣ် ကမျၢၢ်လၢအဟးထီၣ်က့ၤလီၤတဖၣ်စံး၀ဲန့ၣ်လီၤႉ ဒ်န့ၣ်အသိးစွ့ၤကိၣ်ကိၤလီၢ်က၀ီၤခီဖျိတၢ်ဒုးဂၢၢ်ထီၣ်လံအဃိကမျၢၢ်လၢအဃ့ၢ်ထီၣ်တဖၣ်က့ၤအိၣ်လၢအဟံၣ်အဃီလံဒီးခီဖျိတၢ်ဒုးကဲထီၣ်အဃိလီၢ်က၀ီၤ(က၀ီၤဒ့)တဖၣ်အပူၤဂံၢ်ခီၣ်ထံးတၢ်အီၣ်တၢ်အီအၦ့ၤဒိၣ်ထီၣ်၀ဲအဂ့ၢ်န့ၣ် သ၀ီဖိလၢအက့ၤအိၣ်လၢအဟံၣ်တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“လၢညါခါဖဲက၀ီၤဒ့ပူၤအံၤဟုသးဃုတလီးတထၢၣ်န့ၣ်အၦ့ၤအိၣ်ထဲ(၂၇၀)ဘးလီၤႉ ဘၣ်ဆၣ်ခဲအံၤ အၦ့ၤအိၣ်လၢ(၃၅၀)ႇ(၄၀၀)လံႉလၢညါခါဆီဒံၣ်တဖျၢၣ်န့ၣ်(၅)ဘးခဲအံၤအိၣ်လၢ(၁၀)လံႉနဟးၦ့ၤဟုသးမးတန့ၢ်လၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢစွ့ၤကိၣ်ကိၤလီၢ်က၀ီၤကျဲနုာ်လီၤဟးထီၣ်တဖၣ်န့ၣ်ပယီၤသုးႇသုးခိးကီၢ်ဆၢ(BGF)တဖၣ်ပာ်ဖှိၣ်ထီၣ်သး မၤအါထီၣ်၀ဲတၢ်ဘံၣ်တၢ်ဘၢအိၣ်ခိးသမံသမိးတၢ်ဘၣ်ဆၣ်မ့မ့ၢ်လၢမုၢ်နၤခီန့ၣ်တၢ်ဂဲၤကလံၣ်တါဒီးတၢ်တ့ထီၣ်ဘှီထီၣ်၀ဲ(မါတး)တၢ်ဂဲၤလိ၁်ကွဲထံလီၢ်တဖၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲအသိး သ့ၣ်ညါဘၣ်န့ၣ်လီၤႉ
BGF သ့ကွံ၁် KNU/KNLA-PC အကျိတဖၣ်
လါအ့ဖြ့ၣ် ၁၂ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲလါအ့ဖြ့ၣ် ၇ သီအနံၤ နီၣ်ဂံၢ်(၂)ဒုးယၤခိၣ် သုးခိၣ်ဒိၣ်စိ စီၤလဲၣ်ကဲၣ်လၢဘၣ်တၢ်ထုးထီၣ်ကွံာ်အီၤလၢ ကညီတၢ်မုာ်တၢ်ခုၣ်ကီၣ်ကး(PC)တၢ်ကရၢကရိပူၤအံၤ ဖဲလါအ့ဖြ့ၣ် ၁၀ သီအနံၤန့ၣ် သုးခိးကီၢ်ဆၢ(BGF)သ့ကွံာ်အ၀ဲသ့ၣ်ကျိအဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံးၦၤဟ့ၣ်တၢ်ကစီၣ်ဖိအအိၣ်န့ၣ်လီၤႉ ဖဲလါအ့ဖြ့ၣ် ၁၀ သီ မုၢ်ဃ့ၢ်လီၤ ၁ နၣ်ရံၣ်ဃၣ်ဃၣ်အဆၢကတီၢ် သုးခိးကီၢ်ဆၢ-BGF သုးဟီၣ်က၀ီၤ(၃) သုးဟီၣ်က၀ီၤခိၣ် သုးခိၣ် စီၤမီၤ၀့လဲၤထံၣ်လိာ်သးဒီး နီၣ်ဂံၢ်(၂)ဒုးယၤခိၣ် သုးခိၣ်ဒိၣ်စိ စီၤလဲၣ်ကဲၣ် ဖဲနဘူကီၢ်ဆၣ် ထၣ်လီၣ်သ၀ီပူၤဒီး သ့ကွံာ်၀ဲကျိတဖၣ်အဂ့ၢ်န့ၣ် (PC)ဂံၢ်ခီၣ်ထံးၦၤဟ့ၣ်တၢ်ကစီၣ်ဖိလၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ကျိန့ၣ်သ့ကွံာ်၀ဲဒၣ်ခဲလၢာ်လီၤႉမ့ၢ်အသ့၀ဲၦဲၤခိၣ်လဲၣ်ဒုပတသ့ၣ်ညါလီၤတံၢ်ဘၣ်ႉအ၀ဲသ့ၣ်တဲ၀ဲခီန့ၣ်သ့၀ဲတစိၢ်တလီၢ်လီၤမီၤနီၤႉတဲ၀ဲလၢအ၀ဲသ့ၣ်မၤရှဲဟီၣ်က၀ီၤမ့၀ံၤန့ၣ်ကဟ့ၣ်ကဒါ၀ဲလီၤႉတဖီၣ်ၦၤကညီနီတဂၤဘၣ်ႉ အ၀ဲသ့ၣ်တဲသကိးတၢ်ဒီးသုးခိၣ်လဲၣ်ကဲၣ်၀ံၤမးအသ့၀ဲလီၤမီၤနီၤႉခဲအံၤလၢ(BGF)ကီၢ်ဆၢတၢ်လီၢ်န့ၣ်ၦၤမၤရှဲဟီၣ်က၀ီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢ(စိၤရှၢၤမံၣ်ဒံၣ်ယၢၣ်)အပူၤတၢ်ကစီၣ်ပာ်ဖျါ၀ဲလၢ(BGF)နုာ်လီၤသမံသမိးသုးခိၣ်လဲၣ်ကဲၣ်ဘၣ်ဆၣ် ဘၣ်ဃးတၢ်သ့ကွံာ်ကျိတၢ်ဂ့ၢ်အံၤန့ၣ်ခံခီခံကပၤတၢ်ခးလိာ်သးကဲထီၣ်တအိၣ်၀ဲဘၣ်ဒီး(PC) ဟ့ၣ်လီၤကျိလၢတၢ်မုာ်တၢ်ခုၣ်အပူၤလီၤအဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ စးထီၣ်ဖဲတလါအံၤလါအ့ဖြ့ၣ် ၅ သီအနံၤ လၢသုးခိးကီၢ်ဆၢ(BGF)တၢ်ပၢဟီၣ်က၀ီၤ စွ့ၤကိၣ်ကိၤ၀့ၢ်သီကပၤန့ၣ် တၢ်ဒုးကဲထီၣ်၀ဲလၢကီၢ်သူလ့ၤသုးမုၢ်ဒိၣ်(KTLA)တီခိၣ်ရိၣ်မဲတၢ်ပၢၢ်ဆၢကရူၢ်ဒီး ပယီၤသုးႇ(BGF)သုးပာ်ဖှိၣ်အဘၢၣ်စၢၤဒီး တၢ်ဒုးဘျီ၀ဲအံၤအပူၤပၣ်ဃုာ်၀ဲ(PC)သုးရ့ၣ် ၇၀၈ သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤကၠီၤကြီဒီး နီၣ်ဂံၢ်(၂)ဒုးယၤခိၣ် သုးခိၣ်ဒိၣ်စိ စီၤလဲၣ်ကဲၣ် ခံဂၤအံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ သုးခိၣ်ခံဂၤလၢအပၣ်ဃုာ်လၢစွ့ၤကိၣ်ကိၤတၢ်ဒုးပူၤတဖၣ်အံၤခီဖျိအ၀ဲသ့ၣ်တလူၤပိာ်မၤထွဲလီၢ်ခၢၣ်သးအတၢ်နဲၣ်လီၤဒီးသုးတၢ်သိၣ်တၢ်သီဘၣ်အဃိဒ်တၢ်ကရၢကရိတၢ်အိၣ်ဖှိၣ်တၢ်ဆၢတဲာ်အသိးဘၣ်တၢ်ထုးထီၣ်အ၀ဲသ့ၣ်ဒ်အံၤလီၤ...