BGF သ့ကွံ၁် KNU/KNLA-PC အကျိတဖၣ်
လါအ့ဖြ့ၣ် ၁၂ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲလါအ့ဖြ့ၣ် ၇ သီအနံၤ နီၣ်ဂံၢ်(၂)ဒုးယၤခိၣ် သုးခိၣ်ဒိၣ်စိ စီၤလဲၣ်ကဲၣ်လၢဘၣ်တၢ်ထုးထီၣ်ကွံာ်အီၤလၢ ကညီတၢ်မုာ်တၢ်ခုၣ်ကီၣ်ကး(PC)တၢ်ကရၢကရိပူၤအံၤ ဖဲလါအ့ဖြ့ၣ် ၁၀ သီအနံၤန့ၣ် သုးခိးကီၢ်ဆၢ(BGF)သ့ကွံာ်အ၀ဲသ့ၣ်ကျိအဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံးၦၤဟ့ၣ်တၢ်ကစီၣ်ဖိအအိၣ်န့ၣ်လီၤႉ ဖဲလါအ့ဖြ့ၣ် ၁၀ သီ မုၢ်ဃ့ၢ်လီၤ ၁ နၣ်ရံၣ်ဃၣ်ဃၣ်အဆၢကတီၢ် သုးခိးကီၢ်ဆၢ-BGF သုးဟီၣ်က၀ီၤ(၃) သုးဟီၣ်က၀ီၤခိၣ် သုးခိၣ် စီၤမီၤ၀့လဲၤထံၣ်လိာ်သးဒီး နီၣ်ဂံၢ်(၂)ဒုးယၤခိၣ် သုးခိၣ်ဒိၣ်စိ စီၤလဲၣ်ကဲၣ် ဖဲနဘူကီၢ်ဆၣ် ထၣ်လီၣ်သ၀ီပူၤဒီး သ့ကွံာ်၀ဲကျိတဖၣ်အဂ့ၢ်န့ၣ် (PC)ဂံၢ်ခီၣ်ထံးၦၤဟ့ၣ်တၢ်ကစီၣ်ဖိလၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ကျိန့ၣ်သ့ကွံာ်၀ဲဒၣ်ခဲလၢာ်လီၤႉမ့ၢ်အသ့၀ဲၦဲၤခိၣ်လဲၣ်ဒုပတသ့ၣ်ညါလီၤတံၢ်ဘၣ်ႉအ၀ဲသ့ၣ်တဲ၀ဲခီန့ၣ်သ့၀ဲတစိၢ်တလီၢ်လီၤမီၤနီၤႉတဲ၀ဲလၢအ၀ဲသ့ၣ်မၤရှဲဟီၣ်က၀ီၤမ့၀ံၤန့ၣ်ကဟ့ၣ်ကဒါ၀ဲလီၤႉတဖီၣ်ၦၤကညီနီတဂၤဘၣ်ႉ အ၀ဲသ့ၣ်တဲသကိးတၢ်ဒီးသုးခိၣ်လဲၣ်ကဲၣ်၀ံၤမးအသ့၀ဲလီၤမီၤနီၤႉခဲအံၤလၢ(BGF)ကီၢ်ဆၢတၢ်လီၢ်န့ၣ်ၦၤမၤရှဲဟီၣ်က၀ီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢ(စိၤရှၢၤမံၣ်ဒံၣ်ယၢၣ်)အပူၤတၢ်ကစီၣ်ပာ်ဖျါ၀ဲလၢ(BGF)နုာ်လီၤသမံသမိးသုးခိၣ်လဲၣ်ကဲၣ်ဘၣ်ဆၣ် ဘၣ်ဃးတၢ်သ့ကွံာ်ကျိတၢ်ဂ့ၢ်အံၤန့ၣ်ခံခီခံကပၤတၢ်ခးလိာ်သးကဲထီၣ်တအိၣ်၀ဲဘၣ်ဒီး(PC) ဟ့ၣ်လီၤကျိလၢတၢ်မုာ်တၢ်ခုၣ်အပူၤလီၤအဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ စးထီၣ်ဖဲတလါအံၤလါအ့ဖြ့ၣ် ၅ သီအနံၤ လၢသုးခိးကီၢ်ဆၢ(BGF)တၢ်ပၢဟီၣ်က၀ီၤ စွ့ၤကိၣ်ကိၤ၀့ၢ်သီကပၤန့ၣ် တၢ်ဒုးကဲထီၣ်၀ဲလၢကီၢ်သူလ့ၤသုးမုၢ်ဒိၣ်(KTLA)တီခိၣ်ရိၣ်မဲတၢ်ပၢၢ်ဆၢကရူၢ်ဒီး ပယီၤသုးႇ(BGF)သုးပာ်ဖှိၣ်အဘၢၣ်စၢၤဒီး တၢ်ဒုးဘျီ၀ဲအံၤအပူၤပၣ်ဃုာ်၀ဲ(PC)သုးရ့ၣ် ၇၀၈ သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤကၠီၤကြီဒီး နီၣ်ဂံၢ်(၂)ဒုးယၤခိၣ် သုးခိၣ်ဒိၣ်စိ စီၤလဲၣ်ကဲၣ် ခံဂၤအံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ သုးခိၣ်ခံဂၤလၢအပၣ်ဃုာ်လၢစွ့ၤကိၣ်ကိၤတၢ်ဒုးပူၤတဖၣ်အံၤခီဖျိအ၀ဲသ့ၣ်တလူၤပိာ်မၤထွဲလီၢ်ခၢၣ်သးအတၢ်နဲၣ်လီၤဒီးသုးတၢ်သိၣ်တၢ်သီဘၣ်အဃိဒ်တၢ်ကရၢကရိတၢ်အိၣ်ဖှိၣ်တၢ်ဆၢတဲာ်အသိးဘၣ်တၢ်ထုးထီၣ်အ၀ဲသ့ၣ်ဒ်အံၤလီၤ...
တၢ်လိ၁်ဘၢလိ၁်ကွီၢ်တၢ်လၢ(သုးက့ ၇)အဖီခိၣ်အံၤ ကွၢ်ဆိကမိၣ်နီၤဖးအီၤထံထံဆးဆးအဂ့ၢ် KNLA ၀ဲၤလီၢ်ခိၣ်သ့ၣ်စံး၀ဲ
လါအ့ဖြ့ၣ် ၁၂ သီႇ ၂၀၂၃ နံၣ်ႇ ခ့ၣ်အဲးစံၣ် စှၤသီအတီၢ်ပူၤလၢ(စိၤရှၢၤမံၣ်ဒံၣ်ယၢၣ်)အပူၤတၢ်ကစီၣ်ရၤလီၤသးလၢခ့ၣ်အဲၣ်ယူၣ်(သုးက့ ၇)က၀ီၤခးဖှိၣ်၀ဲ တၢ်ပၢၢ်ဆၢသုးပာ်ဖှိၣ်ကရူၢ်တၢ်ဂ့ၢ်အံၤအဖီခိၣ်န့ၣ် ကွၢ်ဆိကမိၣ်နီၤဖးအီၤထံထံဆးဆးအဂ့ၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)လီၢ်ခၢၣ်သး၀ဲၤလီၢ်ခိၣ်သ့ၣ် ထုးထီၣ်ပာ်ဖျါ၀ဲဖဲလါအ့ဖြ့ၣ် ၁၀ သီ အနံၤန့ၣ်လီၤႉ ဖဲအပူၤကွံာ်လါအ့ဖြ့ၣ် ၅ သီဒီး ၆ သီအနံၤ လၢမၠၣ်၀တံၣ်ကလံၤစိး စွ့ၤကိၣ်ကိၤ၀့ၢ်သီကပၤန့ၣ် တၢ်ဒုးကဲထီၣ်၀ဲဒိၣ်ဒိၣ်မုၢ်မုၢ်လၢတၢ်ပၢၢ်ဆၢသုးပာ်ဖှိၣ်ဒီးပယီၤသုးႇသုးခိးကီၢ်ဆၢ(BGF)အဘၢၣ်စၢၤအံၤန့ၣ်လီၤႉ တၢ်ဒုးကဲထီၣ်ဘျီ၀ဲအံၤအပူၤန့ၣ်ခံခီခံကပၤတၢ်သံတၢ်ဘၣ်ဒိဘၣ်ထံးအိၣ်၀ဲအသိးတၢ်က၀ီၤခးတၢ်ပၢၢ်ဆၢသုးပာ်ဖှိၣ်အဃိတၢ်သံတၢ်ဘၣ်ဒိဘၣ်ထံးဒီးတၢ်မၤန့ၢ်၀ဲကျိချံၦာ်သၣ်အါမးအဂ့ၢ်န့ၣ်ဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်စံး၀ဲန့ၣ်လီၤႉ ဘၣ်ဃးတၢ်ဒုးကဲထီၣ်ဘျီ၀ဲအံၤဖဲအပူၤကွံာ်လါအ့ဖြ့ၣ် ၉ သီအနံၤန့ၣ် (The Voice of Spring)ကွဲးဖျါ၀ဲလၢ ခ့ၣ်အဲၣ်ယူၣ်(သုးက့ ၇)သုးက့ခိၣ်ႇဒုးယၤခိၣ်ဒီးသုးခိးကီၢ်ဆၢ(BGF)ႇကညီတၢ်မုာ်တၢ်ခုၣ်ကီၣ်ကး(PC)တဖၣ် ပာ်ဖှိၣ်ထီၣ်သးက၀ီၤခး၀ဲဒၣ်တၢ်ပၢၢ်ဆၢသုးပာ်ဖှိၣ်တၢ်ဂ့ၢ်အံၤအဖီခိၣ် (KNLA)လီၢ်ခၢၣ်သး၀ဲၤလီၢ်ခိၣ်သ့ၣ် ထုးထီၣ်ပာ်ဖျါကဒါက့ၤလံာ်အံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဘၣ်ဃးတၢ်ကစီၣ်ရၤလီၤသးလၢ(စိၤရှၢၤမံၣ်ဒၣ်ယၢၣ်)လၢဘၣ်ဃးတၢ်ဒုးကဲထီၣ်ဖဲခ့ၣ်အဲၣ်ယူၣ်(သုးက့ ၇)ဟီၣ်က၀ီၤပူၤ တၢ်ဂ့ၢ်အံၤန့ၣ် တသ့ၣ်ညါပျီပူၤတၢ်အိၣ်သးလီၤတံၢ်လီၤဆဲးဘၣ်လိာ်ဘၢလိာ်ကွီၢ်ခ့ၣ်အဲၣ်ယူၣ်(သုးက့ ၇)တခီတၢၤဒ်အံၤန့ၣ် မ့ၢ်တၢ်ဟးပဲာ်ထံနီၤဖးနါစိၤတၢ်လီၤအဂ့ၢ်န့ၣ် (KNLA)လီၢ်ခၢၣ်သး၀ဲၤလီၢ်ခိၣ်သ့ၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤ ႉ ဘၣ်ဆၣ်(PC)သုးခိၣ်လၢအနုာ်လီၤပၣ်ဃုာ်ဒုးစၢၤတၢ်လၢတၢ်ပၢၢ်ဆၢသုးပာ်ဖှိၣ်ကရူၢ်ပူၤအံၤတဂၤ စံး၀ဲလၢ“သုးက့(၇)တၢ်အိၣ်သးဒုမ့ဘၣ်တဲန့ၣ်အ၀ဲသ့ၣ်ဘၣ်ကနၣ်(BGF)အလုၢ်လီၤႉတၢ်အိၣ်သးဘံဘူဒံးအဃိ ယတဘၣ်သးတဲတၢ်နီတမံၤဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်ဒုးကဲထီၣ်ဖဲစွ့ၤကိၣ်ကိၤ၀့ၢ်သီဃၢၤဘျီ၀ဲအံၤအပူၤန့ၣ် KNLA (သုးက့ ၇)တပာ်ဖှိၣ်ဒုးစၢၤၦၤတအိၣ်နီတမံၤဘၣ်ဒီး လၢ(စိၤရှၢၤမံၣ်ဒံၣ်ယၢၣ်)အပူၤတၢ်ကစီၣ်ရၤလီၤသးလၢ(သုးက့ ၇)ပာ်ဖှိၣ်ထီၣ်သးဒီး(BGF)ခးဖှိၣ်ကဒါက့ၤ တၢ်ပၢၢ်ဆၢသုးပာ်ဖှိၣ်အံၤန့ၣ် တမ့ၢ်တၢ်ကစီၣ်လၢအမ့ၢ်အတီဘၣ်အဂ့ၢ်န့ၣ် KNLA (သုးက့ ၇)သုးခိၣ်တဂၤစ့ၢ်ကီး စံး၀ဲန့ၣ်လီၤႉ တကီၢ်ခါခဲအံၤဘၣ်ဃးခ့ၣ်အဲၣ်ယူၣ်(သုးက့ ၇)ခးဖှိၣ်တၢ်ပၢၢ်ဆၢသုးပာ်ဖှိၣ်တၢ်ဂ့ၢ်အံၤအဖီခိၣ်န့ၣ် တၢ်ပဲာ်ထံနီၤဖးဟဲအိၣ်ထီၣ်၀ဲလၢကမျၢၢ်ထံဖိကီၢ်ဖိအကျါကလုာ်ကလုာ်အသိး ကညီကမျၢၢ်ထံဖိကီၢ်ဖိတဖၣ်ဘၣ်ယိၣ်၀ဲလၢတၢ်သဘံၣ်သဘုၣ်ကဟဲဒိၣ်ထီၣ်၀ဲလၢကညီဖီၣ်စုက၀ဲၤကရူၢ်ဒီးတၢ်ပၢၢ်ဆၢကရူၢ်ကဒဲကဒဲအဘၢၣ်စၢၤအဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိစံး၀ဲအသိးသ့ၣ်ညါဘၣ်န့ၣ်လီၤႉ
မါည့မီၣ်ဘိးဘၣ်ရၤလီၤ၀ဲလၢစူးကွံ၁်အဖိမုၣ်ဖိခွါလၢဟံၣ်ဖိဃီဖိစရီပူၤလံ
လါအ့ဖြ့ၣ် ၁၁ သီႇ ၂၀၂၃ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ လီၢ်ခၢၣ်သးပၢဆှၢကမံးတံာ်လီၢ်လံၤတဂၤလၢအမ့ၢ် မါည့မီၣ်အံၤ အ၀ဲစူးကွံာ်အဖိမုၣ်ဒီးအဖိခွါခံဂၤလၢဟံၣ်ဖိဃီဖိစရီပူၤလံအဂ့ၢ်န့ၣ် ထုးထီၣ်ဘိးဘၣ်ရၤလီၤ၀ဲလၢသုးမီၤစိရိၤအလံာ်တၢ်ကစီၣ်ပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ အဖိမုၣ်ဖိခွါခံဂၤအံၤခီဖျိအတဒိကနၣ်လူၤပိာ်မၤထွဲမိၢ်ပၢ်အကလုၢ်ဘၣ်ႇမၤသူၣ်ဖှီၣ်သးယာ်မိၢ်ပၢ်သးအဘျီတဖၣ်အဘျီအဃိဘၣ်ထုးထီၣ်ကွံာ်လၢဟံၣ်ဖိဃီဖိစရီပူၤလီၤအဂ့ၢ်န့ၣ် စံၣ်ညီၣ်ကွီၢ်ပီၢ်ရီဘိးဘၣ်ရၤလီၤ၀ဲလၢ သုးမီၤစိရိၤအတၢ်ကစီၣ်ပူၤ န့ၣ်လီၤႉ လၢခံလၢလာ်တၢ်ဂ့ၢ်တၢ်ကျိၤလၢအဟဲကဲထီၣ်သးဒီးအဖိခွါစီၤအီၤကၠံၤည့ဒီးအဖိမုၣ်နီၢ်အ့မူၤခံဂၤအံၤန့ၣ် လ့ၤတက့ၤအ၀ဲတဟံမူဒါဘှါရှဲ၀ဲလၢၤဘၣ်အဂ့ၢ်န့ၣ် လံာ်တၢ်ဘိးဘၣ်ရၤလီၤအပူၤပာ်ဖျါ၀ဲန့ၣ်လီၤႉ မါည့မီၣ်အံၤအပူၤကွံာ်မ့ၢ်၀ဲဒၣ်ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ လီၢ်ခၢၣ်သးကမံးတံာ်ဖိလီၢ်လံၤတဂၤဒီး ဖဲ(၂၀၂၀)အခါန့ၣ်အ၀ဲဟးထီၣ်ကွံာ်၀ဲလၢလီၢ်ခၢၣ်သးကမံးတံာ်ပူၤဒီး လၢအ့ၣ်ယၣ်၀တံၣ်ကီၢ်ခီဒိၣ် ပါတနီၤကီၢ်ဆၣ် ကမျၢၢ်ဘျီၣ်ဒိၣ်ခၢၣ်စးအလီၢ်န့ၣ် အ၀ဲနုာ်လီၤဒိးတပြၢသးဒ်ကညီကမျၢၢ်ပၣ်တံၣ်(KPP)ကရၢဖိအသိးဘၣ်ဆၣ် အ၀ဲတမၤနၢၤတၢ်ဖးဘၣ်န့ၣ်လီၤႉ စးထီၣ်ဖဲ ၂၀၂၁ နံၣ် သုးဟံးန့ၢ်တၢ်စိတၢ်ကမီၤ၀ံၤလီၢ်ခံ သုးမီၤစိရိၤအခိၣ် မ့အီၤလဲၤ တီၣ်ထီၣ်မါည့မီၣ်လၢ ထံကီၢ်တၢ်ပၢဆှၢရဲၣ်ကျဲၤကမံးတံာ်ကရၢဖိအကျါအဃိ ဘၣ်တၢ်ပဲာ်ထံနီၤဖးအီၤလၢကမျၢၢ်ထံဖိကီၢ်ဖိတကးဒံးဘၣ် အမဲာ်ညါ ဖဲ(၂၀၂၁)အမဲရံၣ်ကၣ်ကီၢ်စၢဖှိၣ် အူၣ်ရီပၣ်ဒီး ၂၀၂၃ လါဖ့ၤဘြူၤအါရံၤအခါန့ၣ် အီၣ်စထြ့လယါပဒိၣ် အတၢ်တြီတံၢ်ဃာ်စရီအကျါပၣ်ဃုာ်၀ဲမါည့မီၤအံၤစ့ၢ်ကီးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တၢ်လဲၤထီၣ်ခးဘံလ့ BGF တြဲၤအိၣ်ခိးတၢ်လီၢ်အဃိ သုးခိၣ်သံ ၂ ဂၤ
လါအ့ဖြ့ၣ် ၁၁ သီႇ ၂၀၂၃ နံၣ်ႇ ခ့ၣ်အဲးစံၣ် လၢတလၢၤကီၢ်စဲၣ် ဒူသထူၣ်ကီၢ်ရ့ၣ် ဘံလ့ကီၢ်ဆၣ်အပူၤ ဖဲလါအ့ဖြ့ၣ် ၉ သီ ဂီၤခီအဆၢကတီၢ်န့ၣ် ကညီဒီကလုာ်တၢ်ထူၣ်ဖျဲးသုးမုၣ်ဒိၣ်(KNLA)သုးပာ်ဖှိၣ်လဲၤထီၣ်ခး၀ဲမဲလၤသုးခိးကီၢ်ဆၢ(BGF)တြဲၤအိၣ်ခိးတၢ်လီၢ်ဒီး ဖဲန့ၣ်သုးခိၣ်သံ၀ဲ(၂)ဂၤအဂ့ၢ်န့ၣ် သထူၣ်ကီၢ်ဆၣ် တၢ်ဒီသဒၢကမျၢၢ်သုး(TPDF)ထုးထီၣ်ပာ်ဖျါ၀ဲန့ၣ်လီၤႉ တၢ်ပၢၢ်ဆၢသုးပာ်ဖှိၣ်လၢအလဲၤထီၣ်ခးတၢ်တဖၣ်အံၤမ့ၢ်၀ဲ(TPDF)ႇကၠဲၣ်ထိၤတၢ်ပၢၢ်ဆၢသုး(KRF)ႇပအိၣ်တၢ်ဒီသဒၢကမျၢၢ်သုး(PPDF-KD)ဒီးဘံလ့ကီၢ်ဆၣ်တၢ်ဒီသဒၢကမျၢၢ်သုးတဖၣ်ဒီး ခီဖျိအ၀ဲသ့ၣ်လဲၤတ့ၢ်လီၤမ့ၣ်ပိၢ်လၢ(BGF)တြဲၤအိၣ်ခိး တၢ်လီၢ်အံၤလၢဒြိအဃိ(BGF)သုးခိၣ်သံ(၂)ဂၤတကးဒံးဘၣ်တၢ်ဘၣ်ဒိဘၣ်ထံးစ့ၢ်ကီးအိၣ်၀ဲအဂ့ၢ်န့ၣ် (TPDF)တၢ်ဘိးဘၣ်ရၤလီၤမူဒါခိၣ် စံး၀ဲန့ၣ်လီၤႉ လၢန့ၣ်အမဲာ်ညါဘၣ်ဃးတၢ်လဲၤထီၣ်ခးဘံလ့ကီၢ်ဆၣ်မဲလၤ(BGF)တြဲၤအိၣ်ခိးတၢ်လီၢ်သုးခိၣ်သံ(၂)ဂၤတၢ်ဂ့ၢ်အံၤန့ၣ် မ့မ့ၢ်သုးမီၤစိရိၤတကပၤထုးထီၣ်ပာ်ဖျါ၀ဲတအိၣ်နီတမံၤဒံးဘၣ်န့ၣ်လီၤႉ ဒ်န့ၣ်အသိးဖဲအပူၤကွံာ်လါမးရှး ၂၁ သီအခါစ့ၢ်ကီး (KNLA)သုးပာ်ဖှိၣ်လဲၤတ့ၢ်လီၤမ့ၣ်ပိၢ်လၢကၠဲၣ်ထိၤကီၢ်ဆၣ် ပယီၤသုးခီၣ်ချ့သုးရ့ၣ်(၄၄)၀ဲၤလီၢ်ခိၣ်သ့ၣ် သုးတြိၤခိၣ်အဟံၣ်ဒီး၀ဲၤလီၢ်ခိၣ်သ့ၣ်၀ဲၤဒၢးတၢ်လီၢ်အဃိ ပယီၤသုးအံၤက့ၤခးလီၤကဒါကျိဖးဒိၣ်ဆူသ၀ီတဖၣ်အပူၤန့ၣ်လီၤႉ တကးဒံးဘၣ်လၢန့ၣ်အမဲာ်ညါလၢဒူသထူၣ်ကီၢ်ရ့ၣ်ပူၤလါမးရှးတလါအတီၢ်ပူၤန့ၣ် (KNLA)သုးပာ်ဖှိၣ်မၤ၀ဲတၢ်ထီၣ်ဒုး ၈ ဘျီအတီၢ်ပူၤန့ၣ် ပယီၤသုးတကပၤသံ၀ဲအဂၤ(၁၀)ဒီး ဘၣ်ဒိဘၣ်ထံးကအိၣ်လၢ(၇)ဂၤဃၣ်ဃၣ်ညါအဂ့ၢ်န့ၣ် (TPDF)ထုးထီၣ်ပာ်ဖျါ၀ဲဖဲလါမးရှး ၃၁ သီအနံၤန့ၣ်လီၤႉ
စွ့ၤကိၣ်ကိၤလီၢ်က၀ီၤကမျၢၢ်လၢအလဲၤဃ့ၢ်ထီၣ်လၢယိၤကီၢ်ပူၤတဖၣ်က့ၤအိၣ်လၢသ၀ီပူၤတနီၤလံ
လါအ့ဖြ့ၣ် ၁၁ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲအပူၤကွံာ်လါအ့ဖြ့ၣ် ၅ သီဒီး ၆ သီအနံၤ ခီဖျိတၢ်ဒုးကဲထီၣ်လၢမၠၣ်၀တံၣ် ကလံၤစိး စွ့ၤကိၣ်ကိၤ၀့ၢ်သီကပၤအဃိ လီၢ်က၀ီၤကမျၢၢ်လဲၤဃ့ၢ်ထီၣ်လၢယိၤကီၢ်ပူၤဒီးတကီၢ်ခါခဲအံၤလီၢ်က၀ီၤကမျၢၢ်က့ၤအိၣ်လၢဒူသ၀ီပူၤတနီၤလံအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ခီဖျိတၢ်ဒုးကဲထီၣ်လၢစွ့ၤကိၣ်ကိၤ၀့ၢ်သီကပၤ ထံကီၤထီဒီးဒူသ၀ီလၢအိၣ်တၢ်ခိၣ်တၢ်ဃၢၤဖဲန့ၣ်တဖၣ်အပူၤအဃိ လီၢ်က၀ီၤကမျၢၢ်လၢအလဲၤဃ့ၢ်ထီၣ်လၢယိၤကီၢ်ပူၤတဖၣ်တနီၤန့ၣ်က့ၤအိၣ်လၢဒူသ၀ီပူၤလံဒီး ယိၤၦၤဘၣ်မူဘၣ်ဒါတဖၣ်စ့ၢ်ကီးက့ၤဆှၢအ၀ဲသ့ၣ်တုၤလၢထံကျိကၢၢ်နံၤအဂ့ၢ်န့ၣ် လီၢ်က၀ီၤကမျၢၢ်လၢအက့ၤအိၣ်လၢသ၀ီပူၤတဂၤ စံး၀ဲဒ်အံၤန့ၣ်လီၤႉ “ၦၤစံၣ်ထီၣ်တဖၣ်န့ၣ်ဟဲက့ၤအိၣ်လၢသ၀ီပူၤလံႉလၢန့ၣ်တကပၤန့ၣ်ၦၤအိၣ်တ့ၢ်အိၣ်ဒံးႉတနီၤန့ၣ်တဟဲက့ၤဒံးဘၣ်ႉ တၢ်ဒုးဂၢၢ်ထီၣ်လံအဃိပဟဲက့ၤအိၣ်လီၤႉလၢ၀ါဖးတကပၤန့ၣ်ယိၤၦၤဘၣ်မူဘၣ်ဒါဟဲက့ၤဆှၢ၀ဲတုၤလၢစွ့ၤကိၣ်ကိၤမီၤနီၤႉ ခီဖျိတၢ်လီၢ်အိၣ်အါတီၤအဃိလၢကၠီၣ်ဖၠၤတကပၤန့ၣ်ၦၤနီဖးလီၤၦၤကညီၦၤဟးဆှၢ၀ဲဒ်န့ၣ်လီၤ”အဂ့ၢ်န့ၣ် စံး၀ဲန့ၣ်လီၤႉ ဖဲအပူၤကွံာ်လါအဖြ့ၣ် ၅ သီဒီး ၆ သီအခါန့ၣ် ခီဖျိတၢ်ဒုးကဲထီၣ်အဃိ စွ့ၤကိၣ်ကိၤလီၢ်က၀ီၤကမျၢၢ်အဂၤ(၃၀၀၀)ဘျဲၣ် ဘၣ်လဲၤဃ့ၢ်ထီၣ်၀ဲလၢယိၤကီၢ်တကပၤန့ၣ်လီၤႉ တကီၢ်ခါခဲအံၤလၢစွ့ၤကိၣ်ကိၤဟီၣ်က၀ီၤဒူသ၀ီတဖၣ်အပူၤခီဖျိတၢ်ဒုးဂၢၢ်ထီၣ်လံအဃိ လီၢ်က၀ီၤကမျၢၢ်က့ၤအိၣ်လၢ အဟံၣ်အဃီအိၣ်၀ဲတနီၤလံအသိးသ၀ီဖိလၢအတက့ၤအိၣ်လၢသ၀ီပူၤဒံးဘၣ်တဖၣ်ဆဲးအိၣ်ကဒုဒံးသးဖဲကီၢ်ကၠီၣ်တဲၣ်ကီၢ်ဆၢတကပၤစ့ၢ်ကီးအိၣ်ဒံး၀ဲအဂ့ၢ်န့ၣ် သ့ၣ်ညါဘၣ်လၢၦၤမၤစၢၤၦၤဃ့ၢ်မှံဟးဖျိးတဖၣ်အအိၣ်န့ၣ်လီၤႉ လၢစွ့ၤကိၣ်ကိၤ၀့ၢ်သီကပၤ ထံကီၤထီဒီးဒူသ၀ီလၢအိၣ်တၢ်ခိၣ်တၢ်ဃၢၤဖဲန့ၣ်သ့ၣ်တဖၣ် တၢ်ဒုးကဲထီၣ်တအိၣ်လၢၤ၀ဲဘၣ်ဆၣ် တုၤလၢလါအ့ဖြ့ၣ် ၉ သီဟါခီန့ၣ် ၦၤနၢ်ဟူကျိဖးဒိၣ်ကလုၢ်သီၣ်ဒံးအဂ့ၢ်န့ၣ် လီၢ်က၀ီၤကမျၢၢ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ အ၀ဲစံး၀ဲလၢ“တနံၤညါအံၤမ့မ့ၢ်ကျိဖးဒိၣ်ခီန့ၣ်ပတနၢ်ဟူလၢၤဘၣ်ႉလၢညါခါန့ၣ်ပနၢ်ဟူကိးမုၢ်နၤဒဲးလီၤႉ ဖဲမဟါန့ၣ်ပနၢ်ဟူတထံၣ်တထံၣ်ဒံး”အဂ့ၢ်န့ၣ် စံး၀ဲန့ၣ်လီၤႉ တကီၢ်ခါခဲအံၤလၢစွ့ၤကိၣ်ကိၤလီၢ်က၀ီၤအပူၤန့ၣ်တၢ်ဒုးလီၤကယးထီၣ်၀ဲလံဘၣ်ဆၣ် တၢ်ပျဲဟးထီၣ်က့ၤလီၤ၀ဲကမျၢၢ်လၢအဆၢကတီၢ်ဒီးသုးခိးကီၢ်ဆၢ(BGF)မၤဃံးထီၣ်တၢ်သမံသမိးအဂ့ၢ်န့ၣ် ကမျၢၢ်လၢအဟးထီၣ်က့ၤလီၤဖဲန့ၣ်တဂၤ စံး၀ဲန့ၣ်လီၤႉ “ခဲအံၤစးထီၣ်လၢဂီၤခီ ၆ နၣ်ရံၣ်တုၤလၢဟါခီ ၆ နၣ်ရံၣ်န့ၣ်အ၀ဲသ့ၣ်ပံးဃာ်၀ဲတၢ်ဟးထီၣ်က့ၤလီၤႉလၢမုၢ်နၤခီန့ၣ် ဟးတန့ၢ်ဘၣ်ႉၦၤအိၣ်ဟဲလၢမၠၣ်၀တံၣ်တကပၤန့ၣ်ကတာ်ထီသးဒီဒူၣ်ညါႉမ့မ့ၢ်ၦၤတၢ်ချၢန့ၣ်အ၀ဲသ့ၣ်တဟ့ၣ်နုာ်လီၤ၀ဲဘၣ်ႉခဲအံၤနဟးထီၣ်က့ၤလီၤဘၣ်ကီခဲတစဲးႉၦၤတၢ်ချၢမ့ဟဲနုာ်လီၤန့ၣ်သံကွၢ်၀ဲနကလဲၤဖဲလဲၣ်ႇနကလဲၤမၤမနု၁်လဲၣ်ဒ်န့ၣ်မီၤနီၤႉအ၀ဲသ့ၣ်ဃ့ကွၢ်၀ဲထံကီၢ်ခိၣ်ဂီၤခဲလၢာ်လီၤႉမ့မ့ၢ်ၦၤသ၀ီဖိန့ၣ်တသမံသမိး၀ဲဘၣ်”အဂ့ၢ်န့ၣ် စံး၀ဲန့ၣ်လီၤႉ လီၢ်က၀ီၤကမျၢၢ်လၢအိၣ်တ့ၢ်လၢကီၢ်ကၠီၣ်တဲၣ်ကီၢ်ဆၢတကပၤန့ၣ်အနီၣ်ဂံၢ်ဒီးလီၢ်က၀ီၤကမျၢၢ်လၢအက့ၤအိၣ်လၢအ၀ဲသ့ၣ်သ၀ီပူၤတဖၣ်အနီၣ်ဂံၢ်ခီန့ၣ် ပခ့ၣ်အဲးစံၣ်–ကညီတၢ်စီၣ်၀ဲၤလီၢ်ခိၣ်သ့ၣ်ပာ်ဂၢၢ်ပာ်ကျၢၤ၀ဲလီၤလီၤဆီဆီတန့ၢ်ဒံး၀ဲဘၣ် န့ၣ်လီၤႉ
ဖၣ်အၣ်၀့ၢ်ပူၤသးစၢ်လၢအဟးထီၣ်တၢ်ချၢလၢမုၢ်နၤခီတဖၣ်ပယီၤသုးဖီၣ်ဃ့အီၣ်စ့
လါအ့ဖြ့ၣ် ၁၀ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ဖၣ်အၣ်ကီၢ်ဆၣ်အပူၤ တၢ်ထုးထီၣ်တၢ်သိၣ်တၢ်သီလၢမုၢ်နၤခီတဘၣ်ဟးထီၣ်တၢ်ချၢတအိၣ်၀ဲဘၣ်ဒီး ဘၣ်ဆၣ်သူၣ်ဘီၣ်သးစၢ်လၢအဟးထီၣ်တၢ်ချၢလၢမုၢ်နၤခီတဖၣ်အံၤပယီၤသုးဖီၣ်ဃ့အီၣ်၀ဲစ့အိၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ ဖဲအပူၤကွံာ်လါအ့ဖြ့ၣ် ၆ သီ ဟါခီ ၈ နၣ်ရံၣ်ဃၣ်ဃၣ်အဆၢကတီၢ် ၦၤသးစၢ်လၢအဟးထီၣ်တၢ်ချၢလၢမုၢ်နၤခီ ၂ ဂၤအံၤ ပယီၤသုးဖီၣ်အ၀ဲသ့ၣ်ဒီးၦၤဘၣ်ဟဲရ့ထီၣ်က့ၤအ၀ဲသ့ၣ်တဂၤန့ၣ်လၢစ့ပယီၤ(၅)ကလီၢ်ကၠးအဂ့ၢ်န့ၣ် ၦၤလၢအိၣ်ဘူးဒီးအဟံၣ်ဖိဃီဖိတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ၦၤဖီၣ်အ၀ဲသ့ၣ်န့ၣ်ကဘၣ်ဖဲ(၈း၃၀)ဒ်န့ၣ်လီၤႉၦၤဖီၣ်အီၤလၢကျဲပူၤႇလၢ(Grace)ဟိၣ်ထဲကျဲလီၢ်ခံႇ ယ့ၤကၠီၤ(ရေကျော်)တကပၤန့ၣ်ႉၦၤဖီၣ်အ၀ဲသ့ၣ်တယံၤဘၣ်ဒီးၦၤဆဲးဃီၤလီတဲစိလၢအ၀ဲသ့ၣ်ဟံၣ်ဖိဃီဖိအအိၣ်ႉမၢၦၤဟဲရ့ထီၣ်အီၤတဂၤန့ၣ်(၅)ကလီၢ်မီၤနီၤႉ ၦၤပျၢ်လီၤက့ၤအ၀ဲသ့ၣ်ဖဲမဟါဟါခီန့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါအ့ဖြ့ၣ် ၈ သီအနံၤန့ၣ်လီၤႉ လၢန့ၣ်အမဲာ်ညါပယီၤသုးအံၤပညိၣ်ဖီၣ်၀ဲသူၣ်ဘီၣ်သးစၢ်လၢအဟးထီၣ်တၢ်ချၢလၢမုၢ်နၤခီတဖၣ်အံၤဒီး လၢမုၢ်နၤခီန့ၣ်အ၀ဲသ့ၣ်ဟးဆှၣ်တၢ်ဒီးသိလ့ၣ်ဟံၣ်ႇဟးနုာ်လီၤသမံသမိးၦၤတမှံၤစရီအိၣ်၀ဲအဂ့ၢ်န့ၣ် ၦၤလၢအသဂၢၢ်ဘၣ်ဒီးတၢ်ကဲထီၣ်သးအံၤတဂၤစံး၀ဲဒ်အံၤန့ၣ်လီၤႉ သးစၢ်လၢအသဂၢၢ်ဘၣ်ဒီးတၢ်ကဲထီၣ်သးအံၤတဂၤစံး၀ဲလၢ“ညီနုၢ်န့ၣ်မုၢ်နၤခီၦၤဟးထီၣ်လၢတၢ်ချၢမ့တန့ၢ်ဘၣ်န့ၣ် က၀ီၤဒ့သးၦၢ်ဟးဒုးသ့ၣ်ညါလီၤ၀ဲအိၣ်မီၤနီၤႉအ၀ဲသ့ၣ်တဟးတဲ၀ဲဘၣ်န့ၣ်န့ၢ်ဖးယံၤလံႉၦၤကမျၢၢ်ဟးထီၣ်က့ၤလီၤဒ်လၢညါအသိးကိးဂၤဒဲးလီၤႉဘၣ်ဆၣ်အ၀ဲသ့ၣ်န့ၣ်ပညိၣ်သမံသမိး၀ဲၦၤဘူၣ်ဘီၣ်သးစၢ်တဖၣ်လီၤႉဖဲယဟးထီၣ်လၢတၢ်ချၢအခါန့ၣ်အ၀ဲသ့ၣ်လူၤယၤဒီးသိလ့ၣ်ဟံၣ်လၢယလီၢ်ခံမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးလၢကီးတရံး၀့ၢ်ပူၤစ့ၢ်ကီးမုၢ်နၤခီန့ၣ်ပယီၤသုးခးလီၤကျိဖးဒိၣ်ဆူကီးတရံး၀့ၢ်ခိၣ်၀့ၢ်ဃၢၤတကးဒံးဘၣ်အမဲာ်ညါ အ၀ဲသ့ၣ်ဟးသမံသမိးၦၤတမှံၤစရီလၢ၀့ၢ်ပူၤဒီးဟးဖီၣ်တၢ်အိၣ်၀ဲအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤၦၤဟ့ၣ်တၢ်ကစီၣ်ဖိ တဖၣ်အအိၣ်န့ၣ်လီၤႉ ဖဲအပူၤကွံာ်လါဖ့ၤဘြူၤအါရံၤ ၂ သီအနံၤန့ၣ် သုးမီၤစိရိၤထုးထီၣ်ဘိးဘၣ်ရၤလီၤ၀ဲ(မၤရှၢၤလီ)အံၤပၣ်ဃုာ်၀ဲဒီး ကညီကီၢ်စဲၣ် ကီးတရံးဒီးနိၣ်တကီကီၢ်ဆၣ်ဘၣ်ဆၣ် မ့မ့ၢ်လၢဖၣ်အၣ်ကီၢ်ဆၣ်အံၤတၢ်ထုးထီၣ်တၢ်ကလုၢ်လၢမုၢ်နၤခီ တဘၣ်ဟးထီၣ်လၢတၢ်ချၢတအိၣ်၀ဲဘၣ်အသိး တမ့ၢ်စ့ၢ်ကီးသုးတၢ်ပၢတၢ်ပြးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကမၤဘူၣ်တါလီၤလၢဖၣ်အၣ်၀့ၢ်ပူၤလီၤဘီလီၤမုၢ်အဂီၢ်သုးမီၤစိရိၤတ့ထီၣ်ဘှီထီၣ်ဃ၁်(မါတး)တၢ်လီၢ်တဖၣ်
လါအ့ဖြ့ၣ် ၉ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် တၢ်လီၢ်အါတီၤအပူၤ တၢ်ဒုးကဲထီၣ်၀ဲလၢတၢ်ပၢၢ်ဆၢသုးပာ်ဖှိၣ်ဒီးပယီၤသုးအဘၢၣ်စၢၤ အိၣ်၀ဲဘၣ်ဆၣ် တၢ်ကမၤဘူၣ်တါလီၤလၢဖၣ်အၣ်၀့ၢ်ပူၤလီၤဘီလီၤမုၢ်အဂီၢ်န့ၣ်သုးမီၤစိရိၤအိၣ်ကတဲၤကတီၤတ့ထီၣ်ဃာ်၀ဲ(မါတး)တၢ်လီၢ်တၢ်ကျဲလၢတၢ်ကမုာ်လၤသးဖှံအဂီၢ်အံၤအါမးအဂ့ၢ်န့ၣ် ကမျၢၢ်လၢအိၣ်ဖၣ်အၣ်၀့ၢ်ပူၤတဖၣ် စံး၀ဲန့ၣ်လီၤႉ စးထီၣ်ဖဲလါမးရှးလၢာ်န့ၣ်လၢဖၣ်အၣ်၀့ၢ်ထံကျိကၢၢ်နံၤ စးထီၣ်လၢ(Hpa-an paradise)တၢ်အီၣ်ကျး တုၤလၢ(လေသာ)သီခါဖၠၣ်ဃၢၤ သ့ၣ်ၦၢ်၀ဲၤဒၢးကပိၤကပၤန့ၣ် တၢ်တ့ထီၣ်ဃာ်၀ဲ(မါတး)တၢ်ဂဲၤလိာ်ကွဲထံလီၢ်ဒီး တၢ်မုာ်လၤသးဖှံအလီၢ်တဖၣ်အဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ၦၤတ့ထီၣ်ဃာ်(မါတး)လီၢ်အိၣ်ဒီဒူၣ်ညါႉပလဲၤမၤတၢ်န့ၣ်ပလ့ၢ်လိၤဘၣ်ဖဲအမဲာ်ညါလီၤႉ လီၤသးဘၣ်ဒိဒိၣ်မးႉၦၤတ့ထီၣ်တၢ်လီၢ်တၢ်ကျဲန့ၣ်မ့ၢ်၀ဲၦၤခိၣ်ၦၤနၢ်တဖၣ်လီၤႉဘၣ်ဆၣ်ယဆိမိၣ်အ၀ဲသ့ၣ်ဘၣ်ယိၣ်၀ဲလၢအကလီၤၦီၢ်အဃိခဲအံၤပထံၣ်အ၀ဲသ့ၣ်တ့ထီၣ်က့ၤ၀ဲလၢထးမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ ဘၣ်ဃးဒီးတၢ်မၤ၀ဲတနံၣ်အံၤဘူၣ်တါလီၤန့ၣ်သးစၢ်လၢအိၣ်ဖၣ်အၣ်၀့ၢ်ပူၤတဂၤစံး၀ဲလၢ“တနံၣ်ညါအံၤပတတ့ထီၣ်ဘၣ်(မါဒး)လၢၤဘၣ်ႉဘၣ်မနုၤအဃိလဲၣ်န့ၣ်ယသကိးတဖၣ်အကျါတနီၤန့ၣ်ဖီၣ်ထီၣ်က့ၤစုက၀ဲၤအိၣ်မီၤနီၤ ယ(အါနၣ်)ဘၣ်အ၀ဲသ့ၣ်ဒိၣ်မးလီၤ”အဂ့ၢ်န့ၣ် စံး၀ဲန့ၣ်လီၤႉ လၢကညီကီၢ်စဲၣ် ကီးတရံးႇမၠၣ်၀တံၣ်ႇဖၣ်ပူၣ်ႇသၣ်တီၣ်ကၠံဒီးနိၣ်တကီကီၢ်ဆၣ်သ့ၣ်တဖၣ်အပူၤ တၢ်ဒုးကဲထီၣ်၀ဲလၢတၢ်ပၢၢ်ဆၢသုးပာ်ဖှိၣ်ဒီးပယီၤသုးအဘၢၣ်စၢၤကိးမုၢ်နံၤဒဲးဒီး ခီဖျိပယီၤသုးသံဘၣ်ဒိဘၣ်ထံး အါအဃိသုးမီၤစိရိၤအံၤသူကဘီယူၤဟဲက့ၤခးလီၤကဒါတၢ်လၢပျီပူၤအဂ့ၢ်န့ၣ် ဟီၣ်က၀ီၤၦၤဟ့ၣ်တၢ်ကစီၣ်ဖိတဖၣ် စံး၀ဲန့ၣ်လီၤႉ ခီဖျိတၢ်ဒုးကဲထီၣ်အဃိလီၢ်က၀ီၤကမျၢၢ်ထံဖိကီၢ်ဖိလၢအကလီၢ်ဘၣ်ဃ့ၢ်မှံဟးဖျိး၀ဲဒီးတုၤလၢခဲအံၤအ၀ဲၣ်သ့ၣ်ဘၣ်ဃ့ၢ်မုၢ်ပြံပြါဒံး၀ဲအဖၢမုၢ်န့ၣ်လီၤႉ ဒ်န့ၣ်အသိးလၢတလၢၤကီၢ်စဲၣ် မီၣ်လမၠဲၣ်၀့ၢ် ထံကျိနံၤကျဲတဖၣ်စ့ၢ်ကီး သုးမီၤစိရီၤတီခိၣ်ရိၣ်မဲ တ့ထီၣ်ဘှီထီၣ်ဃာ်၀ဲ(မါတး)လၢတၢ်ကမုာ်လၤသးဖှံကီၢ်ပယီၤဘူၣ်တါလီၤတၢ်ရဲၣ်တၢ်ကျဲၤအံၤအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဖၣ်စံး၀ဲန့ၣ်လီၤႉ တကီၢ်ခါခဲအံၤလၢကီးတရံးႇကြုၢ်တုႇမၠၣ်၀တံၣ်တကပၤန့ၣ် ခံခီခံကပၤတၢ်ဒုးကဲထီၣ်ဒံး၀ဲတပယူာ်ဃီအသိး ဖဲအပူၤကွံာ်စှၤသီအခါစ့ၢ်ကီး ခံခီခံကပၤတၢ်ဒုးကဲထီၣ်၀ဲဒိၣ်ဒိၣ်မုၢ်မုၢ်လၢသုးခိးကီၢ်ဆၢ(BGF)တၢ်ပၢဟီၣ်က၀ီၤ စွ့ၤကိၣ်ကိၤ၀့ၢ်သီကပၤအဃိ လီၢ်က၀ီၤကမျၢၢ်လၢအကထိဘၣ်ဃ့ၢ်ထီၣ်၀ဲလၢယိၤကီၢ်တကပၤဒံးန့ၣ်လီၤႉ
လၢဖၣ်အၣ်–ထံၤလိၤ–ထိၣ်ကီၤကိကျဲ BGF˜ PC တြဲၤဟဲအါထီၣ်ဒီးထၢတၢ်ခိတၢ်သွဲ
လါအ့ဖြ့ၣ် ၈ သီႇ ၂၀၂၃ နံၣ်ႇ ခ့ၣ်အဲးစံၣ် စးထီၣ်ဖဲအပူၤကွံာ်လါမးရှး လၢကညီကီၢ်စဲၣ် ဖၣ်အၣ်–ထံၤလိၤ–ထိၣ်ကီၤကိကျဲန့ၣ် ပယီၤသုးစုတီၤဖီလာ် သုးခိးကီၢ်ဆၢ(BGF)ဒီးကညီတၢ်မုာ်တၢ်ခုၣ်ကီၣ်ကး(KNU/KNLA-PC)တၢ်အိၣ်ခိးတြဲၤလီၢ်ဟဲအါထီၣ်၀ဲဒီး ထၢ၀ဲဒၣ်တၢ်ခိတၢ်သွဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လၢကညီကီၢ်စဲၣ် မၠၣ်၀တံၣ်–ကီးတရံး–ကြုၢ်တုအ့ရှါကျဲတကပၤန့ၣ် ခီဖျိတၢ်ဒုးကဲထီၣ်၀ဲလၢတၢ်ပၢၢ်ဆၢသုးပာ်ဖှိၣ်ဒီး ပယီၤသုးႇသုးခိးကီၢ်ဆၢ(BGF)အဘၢၣ်စၢၤခဲအံၤခဲအံၤအဃိလၢၦၤကဟးထီၣ်က့ၤလီၤအဂီၢ်တၢ်ဘံၣ်တၢ်ဘၢတအိၣ်လၢၤ၀ဲဘၣ်အဖီခိၣ် ၦၤလ့ၢ်လိၤလ့ၢ်ထီၣ်က့ၤ၀ဲလၢထံၤလိၤ–ထိၣ်ကီၤကိကျဲတကပၤအံၤန့ၣ်လီၤႉ ၦၤနီသိလ့ၣ်တီၣ်ပနံာ်တီၣ်တၢ်ဖိတၢ်လံၤသ့ၣ်တဖၣ်လၢအလ့ၢ်လိၤလ့ၢ်ထီၣ်လၢကျဲ၀ဲအံၤတဖၣ် ခီဖျိကျဲတဂ့ၤဘၣ်တၢ်ဆၢကတီၢ်စ့ၢ်ကီးတံာ်တာ်၀ဲအသိးခီဖျိကျဲဒီတဘိန့ၣ်(BGF)တြဲၤဒီး(PC)တြဲၤတဖၣ်ဟဲအါထီၣ်ထၢတၢ်ခိတၢ်သွဲအဃိၦၤတီၣ်ပနံာ်တၢ်ဖိတၢ်လံၤသိလ့ၣ်ကစၢ်တဖၣ်တဘၣ်ဂီၢ်၀ဲလၢအ၀ဲသ့ၣ်ဂီၢ်ဘၣ်အဂ့ၢ်န့ၣ် ၦၤနီသိလ့ၣ်ဖိတဖၣ်စံး၀ဲန့ၣ်လီၤႉ အ၀ဲသ့ၣ်ထၢတၢ်ခိတၢ်သွဲအံၤဒိးသန့ၤထီၣ်သးလၢသိလ့ၣ်အကလုာ်ဒီးထၢ၀ဲစးထီၣ်စ့ပယီၤ(၅၀၀၀)တုၤလၢ(၁၀၀၀၀)ဘျဲၣ်ညါအဂ့ၢ်န့ၣ် ၦၤနီသိလ့ၣ်ဖိလၢတအဲၣ်ဒိးပာ်ဖျါအမံၤတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“ခဲအံၤစးထီၣ်ဖၣ်အၣ်တုၤလၢမၠၣ်၀တံၣ်န့ၣ်(BGF)တြဲၤဒီး(PC)တြဲၤကအိၣ်လၢအဘ့ၣ်(၅၀)(၆၀)ဃၣ်ဃၣ်ညါႉကယဲၢ်မ့ၢ်တြဲၤအိၣ်န့ၣ်ဘၣ်ဟ့ၣ်လီၤစ့ခဲလၢာ်လီၤႉမ့၀ံၤကျဲနါက့တဂ့ၤဘၣ်ႉလၢညါပလဲၤလၢအ့ရှါကျဲသီန့ၣ် ကအိၣ်ဖဲတနံၤလီၤႇဘၣ်ဆၣ်ခဲအံၤနဘၣ်နီသိလ့ၣ်ယံၤလၢသၢသီလွံၢ်သီညါႉတဘျီတခီၣ်န့ၣ်ယံၤလၢတနွံညါႉ လၢကျဲပူၤသိလ့ၣ်ဖးဒိၣ်မ့ဟးဂီၤပၠးန့ၣ်၀ံၤ၀ဲန့ၣ်ႉခဲအံၤနဒွးတကဲးလၢၤဘၣ်”အဂ့ၢ်န့ၣ် စံး၀ဲန့ၣ်လီၤႉ လၢထံၤလိၤ–ထိၣ်ကီၤကိကျဲန့ၣ်ဖီၣ်စုက၀ဲၤကရူၢ်ကရၢတြဲၤလၢထၢတၢ်ခိတၢ်သွဲတဖၣ်ဟဲအါထီၣ်၀ဲဒီး ခီဖျိကျဲစ့ၢ်ကီးတဂ့ၤဘၣ်အဖီခိၣ်တၢ်တံာ်တာ်အိၣ်၀ဲဖဲတၢ်စိာ်ထီၣ်စိာ်လီၤပနံာ်တၢ်ဖိတၢ်လံၤအကတီၢ်အဃိ ပနံာ်တၢ်ဖိတၢ်လံၤလဲၤတရံးသးနီၢ်ထီၣ်၀ဲအဂ့ၢ်န့ၣ် ၦၤနီပနံာ်သိလ့ၣ်ဖိတဖၣ်စံး၀ဲန့ၣ်လီၤႉ “ကျဲတဘိအံၤသိလ့ၣ်ဖးဒိၣ်ႇသိလ့ၣ်ဖိလ့ၢ်ထီၣ်လ့ၢ်လိၤခဲလၢာ်လီၤႉခီဖျိကျဲအံၣ်အဃိသိလ့ၣ်ပံးတလီၢ်လီၢ်လီၤႉ တဘျီတခီၣ်န့ၣ်တံာ်တာ်လၢတနွံခံနွံညါႉသိလ့ၣ်ပံးအဃိတဘၣ်ဂီၢ်နီတစဲးဘၣ်ႉမ့၀ံၤနမ့တသူကျဲအံၤဘၣ်ခီဒၢးကျဲလၢအဂၤမးတအိၣ်န့ၣ်ႉအဃိပဘၣ်သူ၀ဲကျဲအံၤလီၤ”အဂ့ၢ်န့ၣ် ၦၤဟးပိာ်ၦၤနီသလ့ၣ်ဖိအခံတဂၤစံး၀ဲန့ၣ်လီၤႉ တချုးသုးဟံးန့ၢ်တၢ်စိတၢ်ကမီၤဒံးဘၣ်အခါလၢထံၤလိၤ–ထိၣ်ကီၤကိကျဲန့ၣ် သိလ့ၣ်ဟးထီၣ်က့ၤလီၤတအိၣ်အါအါဘၣ်ဒီး တြဲၤလၢအိၣ်ခိးထၢတၢ်ခိတၢ်သွဲစ့ၢ်ကီးအိၣ်ထဲအဘ့ၣ်(၁၀)ဘျဲၣ်လီၤအဂ့ၢ် န့ၣ်သ့ၣ်ညါဘၣ်န့ၣ်လီၤႉ
ပယီၤသုးခးလီၤကျိဖးဒိၣ်အဃိ ဘၣ်သံ၀ဲဒၣ်ဖံသးၦၢ်တဂၤဒီးဘၣ်ဒိ၀ဲ ၅ ဂၤ
လါအ့ဖြ့ၣ် ၈ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲလါအ့ဖြ့ၣ် ၆ သီ ဟါခီအဆၢကတီၢ် ပယီၤသုးကလၢၤလၢအိၣ်(၇)မဲၤတဖၣ်အံၤ ခးလီၤကျိဖးဒိၣ်ဆူ သၣ်တီၣ်ကီၢ်ဆၣ် ပၠါစခါသ၀ီပူၤအဃိ ဘၣ်သံ၀ဲဒၣ်ဖံသးၦၢ်(၁)ဂၤဒီး ဘၣ်ဒိ၀ဲ(၅)ဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤၦၤဟ့ၣ်တၢ်ကစီၣ်ဖိ တဖၣ်အအိၣ်န့ၣ်လီၤႉ သ၀ီ၀ဲအံၤအကပိၤကပၤန့ၣ်တၢ်ဒုးကဲထီၣ်တအိၣ်၀ဲဘၣ်ဒီးခီဖျိပယီၤသုးအံၤပညိၣ်ခးလီၤ၀ဲကျိဖးဒိၣ်(၄)ဖျၢၣ်ဆူသ၀ီပူၤအဃိဘၣ်သံ၀ဲဖံသးၦၢ်(၁)ဂၤႇဘၣ်ဒိ၀ဲ(၅)ဂၤဒီးလၢၦၤဘၣ်ဒိ ၅ ဂၤအကျါ ၃ ဂၤန့ၣ် တၢ်ဘၣ်ယိၣ်အိၣ်၀ဲအဂ့ၢ်န့ၣ် သၣ်တီၣ်ကမျၢၢ်တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖံသးၦၢ်တဂၤန့ၣ်ဘၣ်လၢအဟဲက့ၤဖဲ(သ၀ီဖးဒိၣ်)ကျဲအခါန့ၣ်ကျိဖးဒိၣ်လီၤတဲာ်၀ဲလိၤလိၤလၢအမဲာ်ညါအဃိသံ၀ဲတဘျီဃီဖဲန့ၣ်လီၤႉမ့မ့ၢ်ၦၤဘၣ်ဒိဘၣ်ထံး(၅)ဂၤအကျါန့ၣ်ပၣ်ဃုာ်၀ဲၦၤဖိသၣ်မုၣ်ဖိလၢအသးနံၣ်တၦဲၤဒံးဘၣ်န့ၣ်(၂)ဂၤႉအ၀ဲသ့ၣ်ခီန့ၣ်တၢ်ဘၣ်ယိၣ်အိၣ်တစဲးႉဖဲအံၤန့ၣ်တၢ်ဒုးကဲထီၣ်တအိၣ်ဘၣ်ႉအ၀ဲသ့ၣ်ပညိၣ်ခးလီၤ၀ဲတီတီလၢသ၀ီပူၤဒ်အံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါမးရှး ၇ သီအနံၤန့ၣ်လီၤႉ တကီၢ်ခါခဲအံၤၦၤလၢအဘၣ်ဒိဘၣ်ထံးသ့ၣ်တဖၣ်တၢ်လဲၤဆှၢကူစါယါဘျါအ၀ဲသ့ၣ်ဆူတီအူတၢ်ဆါဟံၣ်အဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါဖဲအပူၤကွံာ်လါအ့ဖြ့ၣ် ၁ သီအခါ လၢသၣ်တီၣ်ကီၢ်ဆၣ် လ့ၣ်သိၤလီၢ်က၀ီၤတကပၤန့ၣ်စ့ၢ်ကီး တၢ်ဒုးကဲထီၣ်၀ဲလၢပယီၤသုးဒီးဟီၣ်က၀ီၤတၢ်ဒီသဒၢကမျၢၢ်သုးအဘၢၣ်စၢၤ၀ံၤလီၢ်ခံ လီၢ်က၀ီၤကမျၢၢ်သ၀ီဖိဘၣ်ဃ့ၢ်ထီၣ်၀ဲအသိးတကီၢ်ခါခဲအံၤလၢ(လ့ၣ်သိၤ)ဟီၣ်က၀ီၤပူၤန့ၣ် ကမျၢၢ်ၦၤဃ့ၢ်မှံဟးဖျိးဖိအနီၣ်ဂံၢ်အိၣ်၀ဲ(၃၀၀၀)ဃၣ်ဃၣ်လံအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးဖိတဖၣ်စံး၀ဲန့ၣ်လီၤႉ ဒ်န့ၣ်အသိးလၢသၣ်တီၣ်ကၠံ၀့ၢ်ကလံၤစိး (ကၠီၣ်တကါ)သ၀ီကရူၢ် သ၀ီတဖၣ်အပူၤစ့ၢ်ကီး ခီဖျိတၢ်ဒုးကဲထီၣ်၀ဲလၢတၢ်ပၢၢ်ဆၢသုးကရူၢ်ဒီးပယီၤသုးအဘၢၣ်စၢၤအဃိကမျၢၢ်ၦၤဃ့ၢ်တၢ်ဒုးအနီၣ်ဂံၢ်ဟဲအါထီၣ်၀ဲဒီးလၢၦၤဃ့ၢ်မှံဟးဖျိးတဖၣ်အံၤအဂီၢ်လိၣ်ဘၣ်၀ဲဂ့ၢ်ဂီၢ်အူတၢ်အီၣ်တၢ်အီတဖၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
လ့ၤတက့ၤတၢ်တဘၣ်ဟးထီၣ်က့ၤလီၤလၢကီးတရံး–မၠၣ်၀တံၣ်အ့ရှါကျဲဘၣ်အဂ့ၢ် တၢ်ပၢၢ်ဆၢသုးပ၁်ဖှိၣ်ကရူၢ် ထုးထီၣ်ပ၁်ဖျါ
လါအ့ဖြ့ၣ် ၇ သီႇ ၂၀၂၃ နံၣ်ႇ ခ့ၣ်အဲးစံၣ် ကီးတရံး–မၠၣ်တ၀ံၣ်အ့ရှါကျဲဒီတကျိၤ စးထီၣ်လါအ့ဖြ့ၣ် ၇ သီ တုၤလၢ ၂၁ သီအနံၤ ကမျၢၢ်တဖၣ်လ့ၤတက့ၤ တဘၣ်ဟးထီၣ်က့ၤလီၤလၢကျဲ၀ဲအံၤဘၣ်အဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်ကရူၢ်တဖၣ် ထုးထီၣ်၀ဲတၢ်ကလုၢ်န့ၣ်လီၤႉ တၢ်ဒုးကဲထီၣ်ဖဲကီးတရံး–မၠၣ်၀တံၣ်ဟီၣ်က၀ီၤပူၤအခါန့ၣ်ခီဖျိပယီၤသုးသံဘၣ်ဒိဘၣ်ထံးအါအဃိ ပယီၤသုးအံၤဖဲအ၀ဲသ့ၣ်ဆှၢထီၣ်သုးဂံၢ်ဘါႇကျိချံၦာ်သၣ်ဒီးတၢ်အီၣ်တၢ်အီတဖၣ်အခါန့ၣ်သူ၀ဲကမျၢၢ်သိလ့ၣ်အိၣ်၀ဲ အဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်အလံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ (KNLA)သုးပာ်ဖှိၣ် ဘီသိၣ်၀ါ(ကျားဖြူ)သုးကျိၤခိၣ် သုးခိၣ်စီၤကၠီၤသဲၣ် စံး၀ဲလၢ“ဖဲတၢ်တလါခံလါအတီၢ်ပူၤအံၤ အ၀ဲသ့ၣ်သူက့ၤ၀ဲထဲၦၤကမျၢၢ်အသိလ့ၣ်လီၤႉခီဖျိအ၀ဲသ့ၣ်သူက့ၤၦၤကမျၢၢ်သိလ့ၣ်ဒ်အံၤအဃိပမ့တပံးကျဲဘၣ်န့ၣ်ဘၣ်ဒိက့ၤလၢပတၢ်ရဲၣ်တၢ်ကျဲၤတၢ်ဖံးတၢ်မၤစ့ၢ်မီၤနီၤႉၦၤကမျၢၢ်သိလ့ၣ်လဲၤမ့န့ၣ်ဘျီန့ၣ်အ၀ဲသ့ၣ်အသိလ့ၣ်နါက့လဲၤဒ်န့ၣ်မီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လံာ်တၢ်ပာ်ဖျါအံၤမ့ၢ်၀ဲဒၣ်တၢ်ပၢၢ်သုးပာ်ဖှိၣ်ကရူၢ်ကရၢလၢဟူးဂဲၤလၢပျီပူၤတဖၣ်အိၣ်ဖှိၣ်ဆၢတဲာ်လီၤ၀ဲဒီး ကမျၢၢ်တဖၣ်ကလူၤပိာ်မၤထွဲဘၣ်ဒ်တၢ်ကလုၢ်အိၣ်၀ဲအသိးအဂ့ၢ်န့ၣ် သုးခိၣ်စီၤကၠီၤသဲၣ် စံးအါထီၣ်၀ဲန့ၣ်လီၤႉ လံာ်တၢ်ထုးထီၣ်တၢ်ကလုၢ်၀ဲအံၤအပူၤန့ၣ် ပၣ်ဃုာ်၀ဲ(Cobra)သုးကျိၤႇပယိၤ၀ါသုးကျိၤႇ(Lion Battalion)ႇ (ကျားသစ်နက်)သုးကျိၤႇတီနီၢ်သုးကျိၤႇ (ဂဠုန်)သုးကျိၤႇ ဘီသိၣ်၀ါသုးကျိၤႇ ကလံၤထံးဟီၣ်က၀ီၤ သုးဟီၣ်က၀ီၤဒ့ နီၣ်ဂံၢ်(၃)တကးဒံးဘၣ်အမဲာ်ညါပၣ်ဃုာ်စ့ၢ်ကီး၀ဲကညီတၢ်မုာ်တၢ်ခုၣ်ကီၣ်ကး(PC)အဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ