(KNLA)သုးရ့ၣ်၀ဲၤလီၢ်လၢပယီၤသုးထီၣ်န့ၢ်၀ဲအံၤတၢ်က့ၤထီၣ်န့ၢ်ကဒါ၀ဲလံအဂ့ၢ် တၢ်ပၢၢ်ဆၢသုးပ၁်ဖှိၣ်စံး၀ဲ
လါဖ့ၤဘြူၤအါရံၤ ၂၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢ(မၠၣ်၀တံၣ်)ကလံၤထံး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၁၀၃)၀ဲၤလီၢ် လၢပယီၤသုးထီၣ်န့ၢ်၀ဲအံၤ ဖဲမဟါလါဖ့ၤဘြူၤအါရံၤ ၂၂ သီ မုၢ်ထူၣ်အဆၢကတီၢ်န့ၣ် တၢ်က့ၤထီၣ်န့ၢ်ကဒါ၀ဲလံအဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်ကရူၢ်စံး၀ဲန့ၣ်လီၤႉ လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၆)ဟီၣ်က၀ီၤ ကီးတရံးကီၢ်ဆၣ် တီၢ်နီၢ်မုၢ်ထီၣ် မၠၣ်၀တံၣ်ကလံၤထံးန့ၣ် ဖဲလါဖ့ၤဘြူၤအါရံၤ ၂၁ သီ မုၢ်ထူၣ်အဆၢကတီၢ် ပယီၤသုးအဂၤ(၅၀)ဃၣ်ဃၣ် ဟဲထီၣ်မၤန့ၢ်ဒွဲၣ်အူအီၣ်ကွံာ်၀ဲ KNLA သုးရ့ၣ်(၁၀၃)၀ဲၤလီၢ်အံၤအဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်ကရူၢ်စံး၀ဲန့ၣ်လီၤႉ သုးကလၢၤလၢပယီၤသုးထီၣ်န့ၢ်၀ဲအံၤန့ၣ်ခီဖျိကညီဒီကလုာ်ဂၢၤသးကရၢဘံၣ်ဘၢသုးရ့ၣ်(၈)ဒီး ခီၣ်မဲဒိၣ်သုးရ့ၣ်လီၤဆီႇ(Federal Wings)သုးပာ်ဖှိၣ်တဖၣ်အံၤလဲၤခးကဒါ၀ဲလၢ(ဒြိ)တပယူာ်ဃီအဃိ ဖဲလါဖ့ၤဘြူၤအါရံၤ ၂၂ သီ ၁၂ နၣ်ရံၣ်ဃၣ်ဃၣ်အဆၢကတီၢ်န့ၣ် မၤန့ၢ်ကဒါက့ၤသုး၀ဲၤလီၢ်ခိၣ်သ့ၣ်အံၤလံအဂ့ၢ်န့ၣ် သုးပာ်ဖှိၣ်သုးခိၣ်တဂၤစံး၀ဲန့ၣ်လီၤႉ “အ၀ဲသ့ၣ်နုာ်လီၤဒွဲၣ်အူအီၣ်ပသုးကလၢၤဒီးပ၀ဲဒၣ်နါက့ပလဲၤတ့ၢ်လီၤအ၀ဲသ့ၣ်လၢ(ဒြိ)တပယူာ်ဃီအဃိ တနၤဃီ၀ဲန့ၣ်အ၀ဲသ့ၣ်ဂုၤက့ၤအလီၢ်ခံလၢတၢ်ခံးကျါန့ၣ်လီၤႉကဘၣ်ဖဲမုၢ်ထူၣ်န့ၣ်ပက့ၤထီၣ်မၤန့ၢ်ကဒါက့ၤပသုးကလၢၤလံ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲလါဖ့ၤဘြူၤအါရံၤ ၂၁ သီ ပယီၤသုးထီၣ်န့ၢ် KNLA သုးရ့ၣ်(၁၀၃)၀ဲၤလီၢ်အခါန့ၣ် ပယီၤသုးအံၤဒွဲၣ်အူအီၣ်ကွံာ်၀ဲတၢ်သူၣ်ထီၣ်တဖၣ်ဒီးမ့မ့ၢ်သုးဖိသံၣ်ဖိခီန့ၣ်တၢ်သံတၢ်ဘၣ်ဒိဘၣ်ထံးတအိၣ်နီတမံၤဘၣ်အဂ့ၢ်န့ၣ် (KNLA)စံး၀ဲန့ၣ်လီၤႉ KNLA သုးရ့ၣ်(၁၀၃)၀ဲၤလီၢ်လၢပယီၤသုးထီၣ်န့ၢ်၀ဲအံၤန့ၣ် အိၣ်ယံၤ၀ဲဒီးသုးခိၣ်ကျၢၢ်ဖိ စီၤနၢၤဒါမၠး တီခိၣ်ရိၣ်မဲ ကီၢ်သူလ့ၤသုးမုၢ်ဒိၣ်(KTLA)သုး၀ဲၤလီၢ်ခိၣ်သ့ၣ် အူကြ့ၣ်ခံသုးကလၢၤအံၤထဲအကဲး(၁၀၀)ဘျဲၣ်ဧိၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ်လါဖ့ၤဘြူၤအါရံၤ ၈ သီအနံၤစ့ၢ်ကီး လၢဂီၤလ့ၤဟီၣ်က၀ီၤပူၤ ခီဖျိတၢ်ဒုးကဲထီၣ်၀ဲလၢ တၢ်ပၢၢ်ဆၢသုးပာ်ဖှိၣ်ဒီးပယီၤသုးအဘၢၣ်စၢၤအဃိ သ၀ီအဖျၢၣ်(၁၀)ဘျဲၣ်...
ကကွၢ်န့ၢ်ကညီဒီတကလု၁်အမဲ၁်ဒီးကမၤကတၢၢ်ကွံာ်တၢ်ခးလိ၁်သးကဒဲကဒဲအဂ့ၢ်န့ၣ် (IKO)ဃ့ကညး၀ဲ
လါဖ့ၤဘြူၤအါရံၤ ၂၃ သီႇ ၂၀၂၃ နံၣ်ႇ ခ့ၣ်အဲးစံၣ် ကကွၢ်န့ၢ်ကညီဒီကတလုာ်အမဲာ်ဒီးကမၤကတၢၢ်ကွံာ်တၢ်ဖ့ၣ်ဆၢလၢအကဲထီၣ်လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ်(သုးက့ ၄)ဟီၣ်က၀ီၤပူၤလၢကညီဖီၣ်စုက၀ဲၤကဒဲကဒဲအဘၢၣ်စၢၤ လၢတကီၢ်ခါခဲအံၤတဖၣ်လၢအဆိကချ့အဂ့ၢ်န့ၣ် ဟီၣ်ခိၣ်ဒီဘ့ၣ်ကညီကရၢ(IKO)ထုးထီၣ်ပာ်ဖျါဃ့ကညး၀ဲ ဖဲလါဖ့ၤဘြူၤ အါရံၤ ၂၂ သီအနံၤန့ၣ်လီၤႉ လၢခ့ၣ်အဲၣ်ယူၣ် ဘျံးဒ၀ဲၢ်ကီၢ်ရ့ၣ်(သုးက့ ၄)ဟီၣ်က၀ီၤအပူၤ ခီဖျိပနၢ်ဟူသ့ၣ်ညါဘၣ်လၢတၢ်ဒုးကဲထီၣ်၀ဲလၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးကီၢ်သူလ့ၤသုးမုၢ်ဒိၣ်(KTLA)အဘၢၣ်စၢၤအဃိ ဟီၣ်ခိၣ်ဒီဘ့ၣ်ကညီကရၢအံၤသးတမုာ်၀ဲဘၣ်အဖီခိၣ်ခံခီခံကပၤခိၣ်နၢ်တဖၣ်ကမၤကတၢၢ်ကွံာ်တၢ်သဘံၣ်သဘုၣ်တဖၣ်အံၤလၢအဆိအချ့အဂီၢ်န့ၣ်ဘၣ်ထုးထီၣ်ဃ့ကညး၀ဲဒ်အံၤလီၤအဂ့ၢ်န့ၣ် IKO စံး၀ဲန့ၣ်လီၤႉ IKO ကရၢခိၣ်–၂ စီၤဆါလွ့ၤ စံး၀ဲလၢ“ပနာ်လၢအ၀ဲသ့ၣ်ကထံၣ်လိာ်တၢၣ်ပီၣ်တဲသကိးတၢ်လီၤႉ မ့ၢ်တၢ်ဂံၢ်စၢ်အိၣ်လၢ ကထံၣ်လိာ်တဲသကိးတၢ်ဧါႇမ့ၢ်တကပၤဒီးတကပၤတၢ်ထံၣ်လိာ်သးတအိၣ်ဘၣ်ခီဧါန့ၣ်တသ့ၣ်ညါဘၣ်ႉဘၣ်ဆၣ်ပနာ်လၢကထံၣ်လိာ်တၢၣ်ပီၣ်သကိးတၢ်လီၤႉဘၣ်မနုၤအဃိလဲၣ်န့ၣ်ပဒုၣ်ဒါမးပဆ့ၣ်နီၤကတိၤတၢ်ဒီးအ၀ဲသ့ၣ်သ့ဒံးမီၤနီၤႉယဆိမိၣ်ဒုပ၀ဲကညီဖိကဒဲကဒဲကဆ့ၣ်နီၤတဲသကိးတၢ်ကသ့လီၤႉပနာ်လၢအဆၢကထီၣ်လၢအဂ့ၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဆၢကတီၢ်တၢ်အိၣ်သးခဲအံၤဘၣ်ဖဲကီၢ်ပူၤဒီတဘ့ၣ်ကမျၢၢ်ထံဖိကီၢ်ဖိခဲလၢာ်ပၢၢ်ဆၢထီဒါကဒါက့ၤ၀ဲသုးမီၤစိရိၤအံၤဒီး ကညီဖီၣ်စုက၀ဲၤကရူၢ်ကဒဲကဒဲက့ၤခးလိာ်ကဒါသးဒ်အံၤတမ့ၢ်တၢ်လၢအကြၢးအဘၣ်၀ဲဘၣ်အဂ့ၢ်န့ၣ် IKO စံး၀ဲန့ၣ်လီၤႉ လၢန့ၣ်အမဲာ်ညါကညီဖိကဒဲကဒဲကက့ၤခးလိာ်ကဒါသးအဂီၢ်န့ၣ်က့ၤဃၣ်ကဒါပကျိခိၣ်အံၤဆူသုးမီၤစိရိၤလၢအဆီၣ်တံၢ်မၤနၢၤမၤသံမၤ၀ီကမျၢၢ်ထံဖိကီၢ်ဖိႇဒွဲၣ်အူအီၣ်ကမျၢၢ်အဟံၣ်အဃီအံၤအအိၣ်အဂ့ၢ်န့ၣ် IKO လံာ်တၢ်ပာ်ဖျါအပူၤ ဆီၣ်တခူထီၣ်၀ဲန့ၣ်လီၤႉ ဖဲတလါအံၤလါဖ့ၤဘြူၤအါရံၤအတီၢ်ပူၤ လၢတနီသရံၣ်ကီၢ်ခီဒိၣ် ဘျံးဒ၀ဲၢ်–ထံခံကျဲဒီတကျိၤန့ၣ် ခီဖျိတၢ်ခးလိာ်သးကဲထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးကီၢ်သူလ့ၤသုးမုၢ်ဒိၣ်(KTLA)အဘၢၣ်စၢၤအံၤအဃိ ခံခီခံကပၤတၢ်သံတၢ်ဘၣ်ဒိဘၣ်ထံးစ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဘၣ်ဃးတၢ်ဖ့ၣ်ဆၢကဲထီၣ်၀ဲလၢ KNLA(သုးက့ ၄)ဒီး(KTLA)အဘၢၣ်စၢၤတၢ်ဂ့ၢ်အံၤ ခံခီခံကပၤခိၣ်နၢ်ကထံၣ်လိာ်တဲသကိးဘှါဆှဲအီၤလၢအဆိအချ့န့ၣ် တနီသရံၣ်ကီၢ်ခီဒိၣ် ကညီကမျၢၢ်စ့ၢ်ကီး ထုးထီၣ်ပာ်ဖျါဃ့ထီၣ်၀ဲဖဲအပူၤကွံာ်လါဖ့ၤဘြူၤအါရံၤ ၇ သီ ဒီး ၂၀ သီအနံၤန့ၣ်လီၤႉ
တၢ်ကီတၢ်ခဲအိၣ်ဘၣ်ဆၣ်(ဖၣ်အၣ်ကီၢ်ရ့ၣ်)ပူၤကီၢ်သူလ့ၤကၠိတဖၣ်ဒိးစဲးနံၣ်ကတၢၢ်တၢ်ဒိးစဲး၀ံၤ၀ဲလံ
လါဖ့ၤဘြူၤအါရံၤ ၂၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဖၣ်အၣ်ကီၢ်ရ့ၣ် တၢ်ကြဲၢ်ကီၢ်ဆၣ်ဒီးတန့ခၠါကီၢ်ဆၣ်အပူၤ ကညီကီၢ်သူလ့ၤကၠိလၢဘၣ်တၢ်အိးထီၣ်၀ဲလၢကညီကူၣ်သ့ဆဲးလၤ(KECD)သ့ၣ်တဖၣ်အံၤ တနံၣ်အံၤ(၂၀၂၂–၂၀၂၃)တၢ်သိလၣ်လိနံၣ်အပူၤတၢ်ကီတၢ်ခဲတၢ်တၤတၢ်အိၣ်၀ဲဘၣ်ဆၣ် ခဲအံၤဒိးစဲးနံၣ်ကတၢၢ်တၢ်ဒိးစဲး၀ံၤ၀ဲလံအဂ့ၢ်န့ၣ် ကၠိသရၣ်/မုၣ်တဖၣ်စံး၀ဲန့ၣ်လီၤႉ ကၠိသ့ၣ်တဖၣ်အံၤလၢတၢ်ဘံၣ်တၢ်ဘၢႇကျိၣ်စ့တၢ်ဆီၣ်ထွဲမၤစၢၤႇတၢ်ကသိၣ်လိဖိဒံဖိသၣ်တဖၣ်အဂီၢ်န့ၣ် ခီဖျိကၠိသရၣ်/မုၣ်တကူတလၢႇကၠိဖိနီၣ်ဂံၢ်အါအဃိတၢ်ကီတၢ်ခဲအိၣ်လၢတၢ်ပီးတၢ်လီတကပၤဒီး ဘၣ်ဆၣ် ဖဲတလါအံၤလါဖ့ၤဘြူၤအါရံၤထီၣ်သီန့ၣ်ဒိးစဲးနံၣ်ကတၢၢ်တၢ်ဒိးစဲး၀ံၤ၀ဲလံအဂ့ၢ်န့ၣ် ကၠိၦၤဘၣ်မူဘၣ်ဒါတဖၣ် စံး၀ဲန့ၣ်လီၤႉ တၢ်ကြဲၢ်ကီၢ်ဆၣ်(KECD)ၦၤဘၣ်မူဘၣ်ဒါတဂၤစံး၀ဲလၢ“ပတၢ်ကီတၢ်ခဲဒုအိၣ်ဒီဒူၣ်ညါႉတၢ်ကီတၢ်ခဲတဖၣ်အကျါန့ၣ်ကျိၣ်စ့မီၤနီၤႉအဂၤတခါန့ၣ်သရၣ်၊မုၣ်လၢအသိၣ်လိတၢ်ခဲအံၤတဖၣ်နါက့အိၣ်ဒီးအဟံၣ်ဖိဃီဖိႇအိၣ်ဒီးအမိအပါမီၤနီၤႉဘၣ်ဆၣ်အ၀ဲသ့ၣ်သိၣ်လိစၢၤ၀ဲလံာ်လီၤႉဒီတနံၣ်အတီၢ်ပူၤန့ၣ်အ၀ဲသ့ၣ်ဟဲသိၣ်လိကလီတၢ်မီၤနီၤႉလၢခံန့ၣ်ၦၤကၠိဖိနီၣ်ဂံၢ်ဟဲအါထီၣ်ႉတၢ်ကီတၢ်ခဲအိၣ်လၢသရၣ်/မုၣ်အိၣ်စှၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ကၠိဖိမိၢ်ပၢ်တနီၤန့ၣ်ဘၣ်ယိၣ်တၢ်လၢအဒံၣ်အဖိဂီၢ်လၢမ့ၢ်ပယီၤသုးကခးလီၤကျိဖးဒိၣ်ကဘီယူၤကဟဲတ့ၢ်လီၤမ့ၣ်ပိၢ်ဒ်န့ၣ်အိၣ်၀ဲအဂ့ၢ်န့ၣ် ကၠိသရၣ်မုၣ် နီၢ်အဲၣ်သးဆၢ စံး၀ဲဒ်အံၤန့ၣ်လီၤႉ “ပသိၣ်လိလံာ်ဒုတၢ်ကီတၢ်ခဲတအိၣ်အါအါဘၣ်ႉအိၣ်တခါလၢၦၤကၠိဖိလၢအဟဲထီၣ်ကၠိဖဲ (KECD)ကၠိတဖၣ်အံၤအမိအပါတနီၤန့ၣ်သူၣ်ကိၢ်သးဂီၤတၢ်လၢအ၀ဲသ့ၣ်အဒံၣ်အဖိဂီၢ်အိၣ်မီၤနီၤႉဘၣ်မနုၤအဃိလဲၣ်န့ၣ်အ၀ဲသ့ၣ်နါက့တၢ်ဂ့ၢ်အိၣ်ႉတဲ၀ဲလၢမ့ၢ်ကဘီယူၤကဟဲတ့ၢ်လီၤမ့ၣ်ပိၢ်လၢကၠိကရၢၢ်ပူၤဧါႇမ့ၢ်တၢ်ဒုးကကဲထီၣ်ဧါဒ်န့ၣ်အိၣ်မီၤနီၤႉတၢ်သူၣ်ကိၢ်သးဂီၤတဖၣ်အံၤကဲထီၣ်၀ဲဒၣ်တၢ်ကီတၢ်ခဲလၢသရၣ်၊မုၣ်တဖၣ်အဂီၢ်လီၤ” အဂ့ၢ်န့ၣ် နီၢ်အဲၣ်သးဆၢ စံး၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံ(KECD)ကၠိလၢအိၣ်ဖၣ်အၣ်ကီၢ်ရ့ၣ် တၢ်ကြဲၢ်ကီၢ်ဆၣ်ပူၤတဖၣ်အံၤ ခီဖျိၦၤကၠိဖိနီၣ်ဂံၢ်ဟဲအါထီၣ်အဃိ တီၤဒၢးတၢ်သူၣ်ထီၣ်ဒီးတၢ်ပီးတၢ်လီတကူတလၢတၢ်ကီတၢ်ခဲဒ်အံၤသ့ၣ်တဖၣ် အိၣ်၀ဲအဂ့ၢ်န့ၣ် ကၠိၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ဒ်န့ၣ်အသိးခ့ၣ်အဲၣ်ယူၣ်(ဖၣ်အၣ်ကီၢ်ရ့ၣ်)တကးဒံးဘၣ်အမဲာ်ညါကီၢ်ရ့ၣ်ႇသုးက့လၢအဂၤတဖၣ်တနီၤန့ၣ် ခီဖျိဒုးယၤတၢ်သဘံၣ်သဘုၣ်အဃိတၢ်ကီတၢ်ခဲအိၣ်လၢၦၤကၠိဖိတဖၣ်တမၤလိမၤဒိးဘၣ်တၢ်ဂ့ၤဂ့ၤလၢၤဘၣ်ဒီး တနံၣ်အံၤတၢ်သိၣ်လိနံၣ်အဂီၢ်စ့ၢ်ကီးဒိးစဲး၀ဲနံၣ်ကတၢၢ်တၢ်ဒိးစဲး၀ံၤ၀ဲလံအဂ့ၢ်န့ၣ်သ့ၣ်ညါဘၣ်န့ၣ်လီၤႉ
ပယီၤသုးခးလီၤကျိဖးဒိၣ်အဃိလီၢ်က၀ီၤကမျၢၢ်ပိ၁်မုၣ်သံ(၁)ဂၤဒီးဖိသၣ်ဘၣ်ဒိနးနးကျံၤကျံၤ(၂)ဂၤ
လါဖ့ၤဘြူၤအါရံၤ ၂၂ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)ဟီၣ်က၀ီၤ မိကီၢ်ဆၣ်အပူၤန့ၣ် ဖဲအပူၤကွံာ်လါဖ့ၤဘြူၤအါရံၤ ၁၈ သီ ဟါခီအဆၢကတီၢ် ပယီၤသုးခီၣ်ချ့သုးရ့ၣ်(ခမရ–၅၉၉)လၢအိၣ်ဆီလီၤသးဖဲ(တုံးတော)သ၀ီပူၤတဖၣ်အံၤ ခးလီၤ(၁၂၀ မမ)ကျိဖးဒိၣ်လၢ(ကျွန်းတော)သ၀ီပူၤအဃိ လီၢ်က၀ီၤကမျၢၢ်ပိာ်မုၣ်သံ၀ဲ(၁)ဂၤဒီး ဖိသၣ်ဘၣ်ဒိ၀ဲ နးနးကျံၤကျံၤ(၂)ဂၤအဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပာ်ဖျါ၀ဲဖဲလါဖ့ၤဘြူၤအါရံၤ ၂၁ သီအနံၤန့ၣ်လီၤႉ ခီဖျိပယီၤသုးခးလီၤကျိဖးဒိၣ်လၢ(ကျွန်းတော)သ၀ီပူၤဒီးကျိချံအံၤလီၤတဲာ်ပိၢ်ဖးထီၣ်၀ဲလၢမၣ်မၠ့ၣ်မၠ့ၣ်ဆါအဟံၣ်ခိၣ်အဃိမၣ်မၠ့ၣ်မၠ့ၣ်ဆါ(၃၈)နံၣ်အံၤသံ၀ဲတဘျီဃီဒီးအဖိမုၣ်မၣ်န့မၠၣ်မိၤ(၁၂)နံၣ်အံၤဒီးအဖိခွါမီၤယၤလ့ထဲၣ်အံၤတဖၣ်အခီၣ်ဘၣ်ဒိ၀ဲနးနးကျံၤကျံၤအဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးလံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ၦၤဖိသၣ်လၢအဘၣ်ဒိဘၣ်ထံးခံဂၤအံၤတၢ်လဲၤဆှၢကူစါယါဘျါအီၤဆူ(ဖၠူ၀့ၢ်)တၢ်ဆါဟံၣ်ဒီး ဖိသၣ်သ့ၣ်တဖၣ်အံၤလိၣ်ဘၣ်၀ဲတၢ်ဆီၣ်ထွဲမၤစၢၤအဂ့ၢ်န့ၣ် အဟံၣ်ဖိဃီဖိတဖၣ်စံး၀ဲန့ၣ်လီၤႉ ဒ်န့ၣ်အသိးတၢ်တနံၤဃီ၀ဲန့ၣ်ဖဲဟါခီ ၉း၁၅ မံးနံးအဆၢကတီၢ်စ့ၢ်ကီး ခီဖျိပယီၤသုးခီၣ်ချ့သုးရ့ၣ်(ခမရ–၃၅၁) အံၤခးလီၤကျိဖးဒိၣ်ဆူ(သစ်ချဆိပ်)သ၀ီပူၤဒီးကျိချံအံၤလီၤတဲာ်ပိၢ်ဖးထီၣ်လၢနီၢ်ထဲန့ၢ်ထူအဟံၣ်ဖီခိၣ်အဃိ မ့ၣ်အူအီၣ်ကွံာ်အတၢ်ဖိတၢ်လံၤလၢအိၣ်ဟံၣ်ပူၤတဖၣ်ခဲလၢာ်အဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ လၢန့ၣ်အမဲာ်ညါဖဲလါဖ့ၤဘြူၤအါရံၤ ၁၆ သီ ဂီၤခီ ၈း၃၀ အဆၢကတီၢ်န့ၣ်စ့ၢ်ကီး ပယီၤသုးလၢဆီလီၤတြဲၤအိၣ်ခိးတၢ်ဖဲနၣ်သၤကွ့–လၢၢ်ဒိၣ်ကျဲ ဆ့ၣ်ကၠံအံၤတဖၣ် ဖီၣ်ထၢနုာ်လီၤ၀ဲ(နိၣ်တီတၤ)သ၀ီဖိ ဒီပုၢ်၀ဲၢ်ခွါ စီၤပံလံ(၃၆)နံၣ်ဒီးစီၤပံပံၤ(၂၈)နံၣ်ခံဂၤအံၤလၢတၢ်ဒုးဃာ်လီၢ်အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သး လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ၦၤဒီပုၢ်၀ဲၢ်ခွါခံဂၤအံၤဖဲအ၀ဲသ့ၣ်ကလဲၤၦ့ၤလီတဲစိလၢ၀့ၢ်ပူၤလဲၤလၢကျဲအခါန့ၣ်ပယီၤသုးဖီၣ်သမံသမိးအီၤလၢ(ဆ့ၣ်ကၠံ)ဒီးခီဖျိပယီၤသုးသမံသမိးထံၣ်၀ဲတၢ်ဂီၤလၢစီၤပံပံၤအလီတဲစိပူၤလၢအိၣ်ဒီးမ့ၣ်ပိၢ်အက့အခီလၢအလီၤတဲာ်ပိၢ်ဖးထီၣ်လၢသ၀ီပူၤအံၤအဃိဖီၣ်မၤဒၢၣ်သမံသမိး၀ဲဒီးတုၤလၢခဲအံၤတၢ်တပျၢ်လီၤ၀ဲဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဘၣ်ဃးဒီးတၢ်ဂ့ၢ်ကဲထီၣ်သးအံၤခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ်ဆဲးကျိး၀ဲခ့ၣ်အဲၣ်ယူၣ်(သုးက့ ၃)ဟီၣ်က၀ီၤၦၤဘၣ်မူဘၣ်ဒါဒီးလီၢ်က၀ီၤကမျၢၢ်အိၣ်၀ဲဘၣ်ဆၣ်ဆဲးကျိးတန့ၢ်၀ဲဘၣ်န့ၣ်လီၤႉ
တၢ်ခိးထုးပယီၤသုးသိလ့ၣ်၀ံၤအလီၢ်ခံတၢ်ခးကဒီးပယီၤသုးလၢအဟဲထီၣ်မၤဆှဲဟီၣ်က၀ီၤတဖၣ်အံၤလၢ(drone)
လါဖ့ၤဘြူၤအါရံၤ ၂၂ သီႇ ၂၀၂၃ နံၣ်ႇ ခ့ၣ်အဲးစံၣ် လၢတလၢၤကီၢ်စဲၣ် သထူၣ်ကီၢ်ဆၣ်(ကမာစိုင်)သ၀ီသီဃၢၤ ၀့ၢ်တကူၣ်–မီၣ်လမၠဲၣ်ကျဲန့ၣ် တၢ်ပၢၢ်ဆၢသုးပာ်ဖှိၣ်ခိးထုးပယီၤသုးသိလ့ၣ်ကဲထီၣ်၀ံၤအလီၢ်ခံတၢ်ခးကဒီးပယီၤသုးတဖၣ်လၢကဟဲထီၣ်မၤဆှဲလဲဟီၣ်က၀ီၤတဖၣ်အံၤလၢ(drone)အဂ့ၢ်န့ၣ် HRS(Drone Force) တၢ်ဘိးဘၣ်ရၤလီၤမူဒါခိၣ်စံး၀ဲန့ၣ်လီၤႉ ဖဲလါဖ့ၤဘြူၤအါရံၤ ၁၉ သီ ဟါခီ ၈ နၣ်ရံၣ်အဆၢကတီၢ်န့ၣ် လၢ(ကမာစိုင်)သ၀ီသီကပၤ ၀့ၢ်တကူၣ်–မီၣ်လမၠဲၣ်ကျဲန့ၣ် (Hawk Revolutionary Squad-HRS)‚ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA(သုးရ့ၣ် ၂) သုးဒ့(၃)‚PDF သုးဒ့(၃)ဒီး ဘံလ့(ပကဖ)သုးပာ်ဖှိၣ်အိၣ်ခိးထုးပယီၤသုးသိလ့ၣ်အဃိ ပယီၤသုးသံ(၇)ဂၤဒီးဘၣ်ဒိ(၄)ဂၤအဂ့ၢ်န့ၣ် သ့ၣ်ညါဘၣ်လၢသုးပာ်ဖှိၣ်ကရူၢ်အအိၣ်န့ၣ်လီၤႉ တၢ်ကဲထီၣ်သးဖဲန့ၣ်၀ံၤအလီၢ်ခံလၢကဟဲထီၣ်မၤဆှဲတၢ်လီၢ်ဟဲထီၣ်ထုးက့ၤသိလ့ၣ်ဟးဂီၤခံခိၣ်အံၤအဂီၢ်န့ၣ် ဖဲအ၀ဲသ့ၣ်ဟဲလၢကျဲအခါဟီၣ်က၀ီၤသုးပာ်ဖှိၣ်ခးကဒီး၀ဲလၢ(ဒြိ)အဃိပယီၤသုးသံဘၣ်ဒိဘၣ်ထံးအိၣ်ဘၣ်ဆၣ် တသ့ၣ်ညါအနီၣ်ဂံၢ်လီၤတံၢ်လီၤဆဲးဒံးဘၣ်အဂ့ၢ်န့ၣ် HRS(Drone Force)တၢ်ဘိးဘၣ်ရၤလီၤမူဒါခိၣ် စံး၀ဲဒ်အံၤန့ၣ်လီၤႉ “ဖဲအသီ ၂၀ ဂီၤခီန့ၣ် ပယီၤသုးလၢအဟဲထီၣ်လၢကဟဲမၤဆှဲလဲတၢ်လီၢ်တဖၣ်အံၤ ပၦၤခးကဒီး၀ဲလၢ(ဒြိ)မီၤနီၤႉ ၦၤခးအီၤဒီး(၆၀ mm)မ့ၣ်ပိၢ်ချံ ၈ ဖျၢၣ်ဘျီ အ၀ဲသ့ၣ်ဟးခးနါစိၤတၢ်ဒီးကျိဖိမီၤနီၤႉ ဖဲဂီၤခီ ၉ နၣ်ရံၣ်ဘျဲၣ်န့ၣ် အ၀ဲသ့ၣ်ခးနါစိၤတၢ်အဃိ ဘၣ်၀ဲဒၣ်ကမျၢၢ်သိလ့ၣ်လၢအဟးထီၣ်က့ၤလီၤဖဲန့ၣ်တခိၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ခီဖျိပယီၤသုးသ့ၣ်တဖၣ်အံၤခးနါစိၤကျိအဃိကမျၢၢ်သံ(၁)ဂၤဒီးဘၣ်ဟးဂီၤ၀ဲကမျၢၢ်အသိလ့ၣ်တခိၣ်အဂ့ၢ်န့ၣ် (Hawk Revolutionary Squad-HRS) စံး၀ဲန့ၣ်လီၤႉ ပယီၤသုးခးနါစိၤတၢ်၀ံၤအလီၢ်ခံအ၀ဲသ့ၣ်မၤအါထီၣ်တၢ်ဘံၣ်တၢ်ဘၢလၢကျဲ၀ဲန့ၣ်ဒီးဟးခးနါစိၤကျိဖးဒိၣ်အိၣ်၀ဲအဂ့ၢ်န့ၣ် လီၢ်က၀ီၤကမျၢၢ်လၢအိၣ်တၢ်ခိၣ်တၢ်ဃၢၤဖဲန့ၣ်တဖၣ်စံး၀ဲန့ၣ်လီၤႉ ဖဲအပူၤကွံာ်စှၤသီအခါစ့ၢ်ကီး(သထူၣ်ကီၢ်ဆၣ်ပူၤ)ပယီၤသုးစုတီၤဖီလာ်ခီၣ်ချ့သုးရ့ၣ်(ခမရ–၉)ခးလီၤကျိဖးဒိၣ်အဃိ ဘၣ်ဒိ၀ဲ(မိချောင်းအိုင်)သ၀ီပူၤ သီခါ(၃)ပါဒီးသီခါဖၠၣ်ဟးဂီၤစ့ၢ်ကီး၀ဲန့ၣ်လီၤႉ
တၢ်ထီၣ်န့ၢ်ပလီၣ်(PDF)သုးကလၢၤ၀ံၤအလီၢ်ခံပယီၤသုးဒွဲၣ်အူအီၣ်သ၀ီဖိအဟံၣ်(၁၀၀)ဘျဲၣ်
လါဖ့ၤဘြူၤအါရံၤ ၂၁ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် ပလီၣ်ကီၢ်ဆၣ်အပူၤ ပယီၤသုးထီၣ်န့ၢ်ပလီၣ်တၢ်ဒီသဒၢကမျၢၢ်(PDF)သုးကလၢၤလၢ အိၣ်ကဒဲသ၀ီဃၢၤအံၤ၀ံၤအလီၢ်ခံ ပယီၤသုးအံၤဒွဲၣ်အူအီၣ်၀ဲကဒဲသ၀ီပူၤကမျၢၢ်ဟံၣ်အဖျၢၣ်(၁၀၀)ဘျဲၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ဖဲအပူၤကွံာ်လါဖ့ၤဘြူၤအါရံၤ ၁၅ သီအနံၤ ပယီၤသုးထီၣ်န့ၢ်၀ဲပလီၣ်(PDF)သုးကလၢၤအံၤ၀ံၤအလီၢ်ခံ စးထီၣ်လါဖ့ၤဘြူၤအါရံၤ ၁၆ သီတုၤလၢ ၁၈ သီန့ၣ် ပယီၤသုးဒွဲၣ်အူအီၣ်၀ဲကဒဲသ၀ီပူၤသီခါဖၠၣ်တၢ်သူၣ်ထီၣ်ဒီး ကမျၢၢ်ဟံၣ်(၁၆၅)ဖျၢၣ်အဂ့ၢ်န့ၣ် ကဒဲသ၀ီဖိလၢပယီၤသုးဒွဲၣ်အူအီၣ်အဟံၣ်တဂၤ စံး၀ဲဒ်အံၤန့ၣ်လီၤႉ “ခဲအံၤလၢသ၀ီပူၤဒုပယီၤသုးတအိၣ်လၢၤဘၣ်ႉပယီၤသုးက့ၤလံဘၣ်ဆၣ်တုၤလၢခဲအံၤပအိၣ်လၢပကစၢ်ကျီးပူၤလီၤႉမ့မ့ၢ်သ၀ီဖိလၢပယီၤသုးဒွဲၣ်အူအီၣ်အဟံၣ်တဖၣ်ခီန့ၣ်လဲၤအိၣ်၀ဲလၢၦၢ်ပူၤတ့ထီၣ်ဒဲအိၣ်၀ဲဒ်န့ၣ်လီၤ” အဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ စးထီၣ်လါဖ့ၤဘြူၤအါရံၤ ၁၆ သီအနံၤန့ၣ်ပယီၤသုးဒွဲၣ်အူအီၣ်၀ဲကမျၢၢ်ဟံၣ်ကအိၣ်အဖျၢၣ်(၆၀)ဃၣ်ဃၣ်ဒီး တုၤလၢလါဖ့ၤဘြူၤအါရံၤ ၁၈ သီန့ၣ် ဒွဲၣ်အူအီၣ်ဆဲးတဲးကမျၢၢ်အဟံၣ်အိၣ်၀ဲ(၁၆၅)ဖျၢၣ်ဒီး လီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲဒၣ်အသိး ခီဖျိတၢ်ဒီသဒၢကမျၢၢ်သုးက့ၤခးကဒါ၀ဲအဃိပယီၤသုးဘၣ်ဂုၤကဒါလီၢ်ခံ အဂ့ၢ်န့ၣ် တၢ်ဒီသဒၢသုးကရူၢ်စံး၀ဲန့ၣ်လီၤႉ ဘၣ်ဆၣ်ဖဲလါဖ့ၤဘြူၤအါရံၤ ၁၈ သီအနံၤန့ၣ် တၢ်ထီၣ်မၤန့ၢ်ကဒါက့ၤ၀ဲသ၀ီ၀ဲအံၤဒီး ခီဖျိပယီၤသုးသံဘၣ်ဒိဘၣ်ထံးအါအဃိဘၣ်ဂုၤကဒါလီၢ်ခံအဂ့ၢ်န့ၣ် ပလီၣ်တၢ်ဒီသဒၢကမျၢၢ်သုးကရူၢ် တၢ်ဘိးဘၣ်ရၤလီၤမူဒါခိၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးဖဲအပူၤကွံာ်လါယနူၤအါရံၤ ၂၀ သီအနံၤစ့ၢ်ကီး ပယီၤသုးနုာ်လီၤဒွဲၣ်အူအီၣ်၀ဲ(ပလီၣ်ကီၢ်ဆၣ်)ပူၤ ဆှၣ်ပိၤသ၀ီဖိအဟံၣ်(၃)ဖျၢၣ်တကးဒံးဘၣ်အမဲာ်ညါနုာ်လီၤဟံးန့ၢ်ကမျၢၢ်တၢ်ဖိတၢ်လံၤလၢသ၀ီပူၤအဂ့ၢ်န့ၣ် လီၢ်က၀ီၤဂံၢ်ခီၣ်ထံးတၢ်ကစီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ
ခိၣ်နၢ်တဖၣ်ကထံၣ်လိ၁်ဘှါဆှဲတၢ်လၢအဆိအချ့အဂ့ၢ် KTLA သုးဖိဃ့ထီၣ်၀ဲ
လါဖ့ၤဘြူၤအါရံၤ ၂၁ သီႇ ၂၀၂၃ နံၣ်ႇ ခ့ၣ်အဲးစံၣ် တကီၢ်ခါခဲအံၤတၢ်ဖ့ၣ်ဆၢလၢအကဲထီၣ်၀ဲလၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ်(သုးက့ ၄)စုတီၤဖီလာ်ဒီးကီၢ်သူလ့ၤသုးမုၢ်ဒိၣ်(KTLA)အဘၢၣ်စၢၤအံၤအဖီခိၣ် ခိၣ်နၢ်တဖၣ်ကထံၣ်လိာ်ဘှါဆှဲအီၤလၢ အဆိအချ့အဂ့ၢ်န့ၣ် (KTLA)သုးဖိတဖၣ်စံး၀ဲန့ၣ်လီၤႉ သုးခိၣ်ကျၢၢ် စီၤနၢၤဒါမၠး တီခိၣ်ရိၣ်မဲ(KTLA)ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA(သုးက့ ၄) အဘၢၣ်စၢၤ တၢ်ခးလိာ်သးကဲထီၣ်၀ဲတလီၢ်လီၢ်ဒီးဒ်သိးတၢ်သ့ၣ်တဖၣ်အံၤကကတၢၢ်ကွံာ်အဂီၢ်န့ၣ် ခိၣ်နၢ်တဖၣ်ကြၢးထံၣ်လိာ်ဘှါဆှဲအီၤလၢအဆိအချ့အဂ့ၢ်န့ၣ် တနီသရံၣ် ဆၣ်ကဆီကီၢ်ဒိၣ်သုး၀ဲၤလီၢ်ခိၣ်သ့ၣ် အၦၤကတိၤတၢ်ပၢ စီၤကီၢ်သူလ့ၤ စံး၀ဲန့ၣ်လီၤႉ အ၀ဲစံး၀ဲလၢ“ပ၀ဲဒၣ်န့ၢ်ပပၢၢ်ဆၢထီဒါ၀ဲဒၣ်သုးမီၤစိရိၤသနူလီၤႉပတအဲၣ်ဒိးက့ၤခးလိာ်ကဒါသးဘၣ်ႉခဲအံၤန့ၣ်တၢ်အိၣ်သးလၢမ့ၢ်အ၀ဲသ့ၣ်ကခးၦၤဧါႇမ့ၢ်ပဘၣ်က့ၤခးကဒါဧါဒ်န့ၣ်မီၤနီၤႉခီဖျိတၢ်တနာ်အီၣ်လိာ်သးဘၣ်အဃိတၢ်ခးလိာ်သးကဲထီၣ်လၢပ၀ဲကဒဲကဒဲအဘၢၣ်စၢၤခဲအံၤခဲအံၤလီၤႉမ့ၢ်ဆဲးလဲၤသးဒ်အံၤဒုကနးဒိၣ်ထီၣ်ကွ့ၢ်ကွ့ၢ်လီၤႉအဲၣ်ဒိးလၢခံခီခံကပၤခိၣ်နၢ်ကထံၣ်လိာ်တၢၣ်ပီၣ်ဘှါဆှဲအီၤလၢအဆိအချ့လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲလါဖ့ၤဘြူၤအါရံၤ ၁၈ သီအနံၤန့ၣ်လီၤႉ ကီၢ်သူလ့ၤသုးမုၢ်ဒိၣ်(KTLA)ဒီးခ့ၣ်အဲၣ်ယူၣ်(သုးက့ ၄)သ့ၣ်တဖၣ်အံၤဟူးဂဲၤ၀ဲဒၣ်ဖဲတနီသရံၣ်ကီၢ်ခီဒိၣ် ဘျံးဒ၀ဲၢ်–ထံခံတၢ်လီၢ်အံၤဒီး ဖဲအပူၤကွံာ်လါဖ့ၤဘြူၤအါရံၤ ၁၈ သီ ဂီၤခီ ၃ နၣ်ရံၣ်အခါစ့ၢ်ကီး တၢ်ခးလိာ်သးကဲထီၣ်၀ဲလၢ KTLA (သုးရ့ၣ် ၁)ဒီး(KNLA)အဘၢၣ်စၢၤဒီး ဖဲန့ၣ်ခံခီခံကပၤတၢ်သံတၢ်ဘၣ်ဒိဘၣ်ထံးအိၣ်၀ဲအဂ့ၢ်န့ၣ် သ့ၣ်ညါဘၣ်လၢပျီပူၤတၢ်မဲာ်ညါၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ ကီၢ်သူလ့ၤသုးမုၢ်ဒိၣ်(KTLA)အံၤ ဖဲအပူၤကွံာ်(၂၀၂၂)လါယူၤလံအခါန့ၣ် ကညီဒီကလုာ်ဂၢၤသးကရၢ(KNDO) သုးရိၣ်မဲခိၣ်ကျၢၢ်လီၢ်လံၤ စီၤနၢၤဒါမၠး တီခိၣ်ရိၣ်မဲဒုးအိၣ်ထီၣ်၀ဲဒီး (KNDO)သုးဖိသံၣ်ဖိလၢအိၣ်ခ့ၣ်အဲၣ်ယူၣ်(သုးက့ ၄)ဟီၣ်က၀ီၤပူၤတဖၣ်တနီၤန့ၣ် အိၣ်ဆၢထၢၣ်က့ၤ၀ဲလၢကီၢ်သူလ့ၤသုးမုၢ်ဒိၣ်(KTLA)အအိၣ်တကပၤန့ၣ်လီၤႉ ကညီဂံၢ်ခီၣ်ထံးခိၣ်နၢ်လၢတအဲၣ်ဒိးပာ်ဖျါအမံၤတဂၤစံး၀ဲလၢ“သုးက့ ၄ န့ၣ်လၢညါ(NCA)အခါန့ၣ်မုာ်မုာ်ခုၣ်ခုၣ်လီၤႉ လၢတၢ်ဂ့ၢ်အကလုာ်ကလုာ်အဃိကမျၢၢ်တုၤအိၣ်ကီၢ်ချၢတဖၣ်ဟဲက့ၤဟးဘၣ်လၢအဟံၣ်အဃီအလီၢ်အကျဲမီၤနီၤႉခ့ၣ်အဲၣ်ယူၣ်နါက့ဖီၣ်လိာ်စုမၤသကိးတၢ်ဒီးပဒိၣ်အိၣ်ႉၦၤလၢနဖီၣ်လိာ်စုမၤသကိးတၢ်ဒီးအီၤနဘၣ်ဒုးကဒါက့ၤအီၤဒုတၢ်ကီတၢ်ခဲအိၣ်မီၤနီၤႉဘၣ်ဆၣ်ပကြၢးသ့ၣ်ညါသုးမီၤစိရိၤအတၢ်အိၣ်သးလီၤႉ တၢ်ဂ့ၢ်ကီလၢအကဲထီၣ်၀ဲလၢကညီဖိကဒဲကဒဲအဘၢၣ်စၢၤအံၤစ့ၢ်ကီးအလီၢ်အိၣ်လၢပကဘၣ်ဘှါဆှဲအီၤလၢစီၤနီၢ်ခိၣ်လၢမဲာ်သကိးမဲာ်လီၤ”အဂ့ၢ်န့ၣ် ပဲာ်ထံနီၤဖးစံး၀ဲ န့ၣ်လီၤႉ တၢ်သဘံၣ်သဘုၣ်လၢအဟဲကဲထီၣ်သးလၢခ့ၣ်အဲၣ်ယူၣ်(သုးက့ ၄)ဒီး(KTLA)အဘၢၣ်စၢၤခဲအံၤသ့ၣ်တဖၣ် ကထံၣ်လိာ်ဘှါဆှဲသကိးအီၤလၢတၢ်မုာ်တၢ်ခုၣ်အကျဲအဂ့ၢ်န့ၣ် တနီသရံၣ်ကီၢ်ဒိၣ် ကညီကမျၢၢ်ထုးထီၣ်ဃ့ထီၣ်စ့ၢ်ကီး ၀ဲဖဲလါဖ့ၤဘြူၤအါရံၤ ၇...
တၢ်ဖ့ၣ်ဆၢလၢအကဲထီၣ်သးလၢ(KTLA)ဒီး KNU(သုးက့ ၄)အဘၢၣ်စၢၤအံၤ ခံခီခံကပၤခိၣ်နၢ်ကထံၣ်လိ၁်ဘှါဆှဲ အီၤလၢအဆိအချ့အဂ့ၢ် တနီသရံၣ်ကညီကမျၢၢ်ဃ့ထီၣ်ကဒီး၀ဲ
လါဖ့ၤဘြူၤအါရံၤ ၂၁ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၄)တၢ်ပၢဟီၣ်က၀ီၤအပူၤ တၢ်ဖ့ၣ်ဆၢလၢအဟဲကဲထီၣ်၀ဲလၢကီၢ်သူလ့ၤသုးမုၢ်ဒိၣ်(KTLA)ဒီး KNU(သုးက့ ၄)အဘၢၣ်စၢၤတဖၣ်အံၤ ခံခီခံကပၤခိၣ်နၢ်ကထံၣ်လိာ်သးဘှါဆှဲအီၤလၢအဆိအချ့အဂ့ၢ်န့ၣ် တနီသရံၣ်ကီၢ်ဒိၣ် ကညီကမျၢၢ်ဃ့ထီၣ်ကဒီး၀ဲ ဖဲလါဖ့ၤဘြူၤအါရံၤ ၂၀ သီအနံၤန့ၣ်လီၤႉ လၢတၢ်ဘှါဆှဲတၢ်ဖ့ၣ်ဆၢလၢအဟဲကဲထီၣ်သးလၢကညီဖီၣ်စုက၀ဲၤကရူၢ်ကဒဲကဒဲအဘၢၣ်စၢၤအံၤအပူၤန့ၣ် တဘၣ်ဘှါဆဲအီၤလၢစုက၀ဲၤဘၣ်န့ၣ်တနီသရံၣ်ကီၢ်ဒိၣ်ကမျၢၢ်ထုးထီၣ်ပာ်ဖျါတ့ၢ်၀ဲဖဲအပူၤကွံာ်လါဖ့ၤဘြူၤအါရံၤ ၇ သီအနံၤလံဘၣ်ဆၣ် တကီၢ်ခါခဲအံၤခံခီခံကပၤအဘၢၣ်စၢၤတၢ်ဖ့ၣ်ဆၢဒိၣ်ထီၣ်ကွ့ၢ်ကွ့ၢ်အဃိ ဘၣ်ထုးထီၣ်ဃ့ကညးကဒီး၀ဲဒ်အံၤလီၤအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ လံာ်တၢ်ပာ်ဖျါလၢပၣ်ဃုာ်၀ဲတၢ်ဂ့ၢ်(၅)ထံၣ်အံၤန့ၣ်စံး၀ဲလၢ(KTLA)ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ခိၣ်နၢ်ဒိၣ်ထီတဖၣ် ကထံၣ်လိာ်တၢၣ်ပီၣ်တဲသကိးတၢ်လၢအဆိအချ့အဂ့ၢ်န့ၣ် ဆီၣ်တခူထီၣ်၀ဲန့ၣ်လီၤႉ ပနၢ်ဟူလၢ(ခ့ၣ်အဲၣ်ယူၣ်)လီၢ်ခၢၣ်သးပျၢ်လီၤ၀ဲဒၣ် သုးခိၣ်ဒိၣ်စိ စီၤလ့မူဒ်သိးကဟံးထီၣ်ဖိၣ်ထီၣ်(သုးက့ ၄) သုးက့ခိၣ်မူဒါဒီးအဃိပသးအိၣ်ဃ့ထီၣ်သုးခိၣ်ဒိၣ်စိ စီၤလ့မူအံၤ လၢကဃုကျဲမၤဘၣ်လိာ်ဘၣ်စးက့ၤတၢ်အိၣ်သး အံၤဒီးကညီဖိဖီၣ်စုက၀ဲၤကဒဲကဒဲဒ်သိးအသုတခးလိာ်သးတဂ့ၤအဂီၢ်ကဟံးမူဟံးဒါကမၤဆိတၢ်အဂ့ၢ်န့ၣ် ဆဲးဆီၣ်တခူထီၣ်၀ဲန့ၣ်လီၤႉ တၢ်ဖ့ၣ်ဆၢလၢအဟဲကဲထီၣ်သးလၢ(KTLA)ဒီးခ့ၣ်အဲၣ်ယူၣ်(သုးက့ ၄)အဘၢၣ်စၢၤလၢတကီၢ်ခါခဲအံၤသ့ၣ်တဖၣ် မ့ၢ်ခ့ၣ်အဲၣ်ယူၣ်(လီၢ်ခၢၣ်သး)ဘှါဆှဲ၀ဲအကျိၤအကျဲအိၣ်ဒ်လဲၣ်န့ၣ် ပခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ် ဆဲးကျိး၀ဲဒီးစံးဆၢကဒါက့ၤလၢတအဲၣ်ဒိးတဲတၢ်နီတမံၤဒံးဘၣ်န့ၣ်လီၤႉ တနီသရံၣ်ကီၢ်ဒိၣ်ကညီကမျၢၢ်လံာ်တၢ်ပာ်ဖျါအပူၤစံး၀ဲလၢပ၀ဲကညီထံဖိကီၢ်ဖိကမျၢၢ်သ့ၣ်တဖၣ်သးအိၣ်ဘိးဘၣ်သ့ၣ်ညါခိၣ်နၢ်သ့ၣ်တဖၣ်လၢကညီဖီၣ်စုက၀ဲၤကရူၢ်ကရၢထီရီၤတဖုလၢအအိၣ်ဒီးသးလၢအအ့ၣ်လိာ်ထီဒါတၢ်ႇ တၢ်မၤနၢၤမၤဃၣ်တၢ်ႇတၢ်ပာ်မၢ်ကွံာ်ကညီကလုာ်ဒီးထံဖိကီၢ်ဖိသ့ၣ်တဖၣ်အတၢ်ဘၣ်ဘျုးအဂီၢ်ဒီးကွၢ်ဒၣ်ထဲလၢ(နီၢ်ကစၢ်တၢ်ဘၣ်ဘျုးအဂီၢ်ဒီးၦၤလၢအဘၣ်ထွဲဒီးအီၤသ့ၣ်တဖၣ်အဂီၢ်ဧိၤ)န့ၣ်ပတတူၢ်လိာ်အီၤလ့ၤတက့ၤဘၣ်န့ၣ်လီၤႉ ကီၢ်သူလ့ၤသုးမုၢ်ဒိၣ်(KTLA)အံၤ ဖဲအပူၤကွံာ်(၂၀၂၂)လါယူၤလံ ၁၉ သီအနံၤန့ၣ် ကညီဒီကလုာ်ဂၢၤသးကရၢ (KNDO)သုးရိၣ်မဲခိၣ်ကျၢၢ်လီၢ်လံၤ သုးခိၣ်ကျၢၢ် စီၤနၢၤဒါမၠး ဒုးအိၣ်ထီၣ်၀ဲဒီး ဖဲန့ၣ်(KNDO)သုးဖိသံၣ်ဖိလၢအိၣ် ခ့ၣ်အဲၣ်ယူၣ်(သုးက့ ၄)ဟီၣ်က၀ီၤပူၤတဖၣ်တနီၤန့ၣ်အိၣ်ဆၢထၢၣ်က့ၤ၀ဲဒ်(KTLA)အသိး၀ံၤအလီၢ်ခံ ခံခီခံကပၤတၢ်ဖ့ၣ်ဆၢစးထီၣ်ကဲထီၣ်၀ဲဒၣ်န့ၣ်လီၤႉ
သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်အဃိကီးတရံးကမျၢၢ်ၦၤဃ့ၢ်တၢ်ဒုးဖိဘၣ်ဒိ(၃)ဂၤ
လါဖ့ၤဘြူၤအါရံၤ ၂၀ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ်ကလံၤထံးအပူၤ ဖဲလါဖ့ၤဘြူၤအါရံၤ ၁၉ သီ မုၢ်နၤခီ ၁၂ နၣ်ရံၣ်ဃၣ်ဃၣ်အဆၢကတီၢ်န့ၣ် ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢၦၤဃ့ၢ်အိၣ်ကဒု တၢ်လီၢ်အဃိ ကမျၢၢ်ၦၤဃ့ၢ်တၢ်ဒုးဖိဘၣ်ဒိ(၃)ဂၤအကျါပၣ်ဃုာ်ဖိသၣ်မုၣ်ဖိ(၁၄)နံၣ်တဂၤအဂ့ၢ်န့ၣ် သ့ၣ်ညါဘၣ်န့ၣ် လီၤႉ သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်ဘျီ၀ဲအံၤနီၢ်နဒၤ၀့(၁၄)နံၣ်ႇနီၢ်လၣ်ထွ့(၃၆)နံၣ်ဒီးစီၤဖါထုးဒီ(၄၄)နံၣ် သ့ၣ်တဖၣ်အံၤဘၣ်ဒိဘၣ်ထံး၀ဲအဂ့ၢ်န့ၣ် သ၀ီၦၤဘၣ်မူဘၣ်ဒါတဂၤပာ်ဂၢၢ်ပာ်ကျၢၤစံးဘၣ် ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ အ၀ဲစံး၀ဲလၢ“ဘၣ်၀ဲဒၣ်ဖိသၣ်မုၣ်(၁၄)နံၣ်တဂၤႉမ့၀ံၤဘၣ်၀ဲဒၣ်သ၀ီဖိလၢအဃ့ၢ်တၢ်ဒုးန့ၣ်(၃)ဂၤမီၤနီၤႉ ယအဲၣ်ဒိးသ့ၣ်ညါလၢကဘီယူၤဟဲခးလီၤတၢ်ခဲအံၤန့ၣ်မ့ၢ်အဟဲခးဒုၣ်ဒါဧါႇမ့ၢ်အဟဲခးကမျၢၢ်ခီဧါႉဟးခးလီၤတၢ်လၢကမျၢၢ်အိၣ်အလီၢ်န့ၣ်လီၤႉနမ့ခးကမျၢၢ်န့ၣ်မ့ၢ်နထံနကီၢ်ကန့ၢ်ညီဧါႉၦၤသ၀ီဖိတဖၣ်အံၤတထီဒါပယီၤသုးဘၣ်ႇထဲအ၀ဲသ့ၣ်ဘၣ်ဟးဃ့ၢ်န့ၣ်လီၤဘၣ်တၢ်ကီတၢ်ခဲလၢာ်လံ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ခီဖျိဒုးယၤတၢ်သဘံၣ်သဘုၣ်ကဲထီၣ်၀ဲလၢပယီၤသုးဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤအဃိ ကီးတရံး၀့ၢ်ခိၣ်၀့ၢ်ဃၢၤလီၢ်က၀ီၤကမျၢၢ်တဖၣ်အံၤစးထီၣ်အပူၤကွံာ်လါဒံၣ်စ့ဘၢၣ်တုၤလၢခဲအံၤဘၣ်ဟးစံၣ်အိၣ်လၢအလါလံန့ၣ်လီၤႉ တကီၢ်ခါခဲအံၤကမျၢၢ်ၦၤဃ့ၢ်တၢ်ဒုးဖိတဖၣ်ဘၣ်ဟးစံၣ်အိၣ်ယံၤထီၣ်၀ဲလံအသိးခီဖျိပယီၤသုးခးလီၤကျိဖးဒိၣ်ဒီးကဘီယူၤဟဲတ့ၢ်လီၤမ့ၣ်ပိၢ်အဃိကမျၢၢ်ၦၤဃ့ၢ်တၢ်ဒုးဖိတဖၣ်အံၤအသူၣ်လီၤဘှံးသးလီၤဘှါတူၢ်ဘၣ်၀ဲသးတၢ်တူၢ်ဘၣ်ခီၣ်ဘၣ်သ့ၣ်တဖၣ်အဂ့ၢ်န့ၣ်ၦၤဃ့ၢ်တၢ်ဒုးဖိတဖၣ်စံး၀ဲန့ၣ်လီၤႉ “ပစံၣ်န့ၢ်ဖးယံၤလံႉအဲၣ်ဒိးက့ၤအိၣ်လၢပကစၢ်ဟံၣ်ကစၢ်ဃီလံႉကမျၢၢ်တနီၤန့ၣ်ဘၣ်လဲၤအိၣ်လၢၦၤဒူသ၀ီႇလၢၦၢ်ပူၤယံၤထီၣ်လံအဃိတၢ်ကီတၢ်ခဲအိၣ်ထီၣ်အမံၤမံၤလီၤႉၦၤစံၣ်အကျါန့ၣ်ပၣ်ဃုာ်၀ဲၦၤတဆူၣ်တချ့ႇၦၤသူၣ်က့သးၦၢ်ဒီးၦၤမိၢ်ဒၢဒီဒူၣ်ညါလီၤႉစံၣ်ယံၤထီၣ်ဘျီသးနါက့လီၤစၢ်၀ဲလီၤ”အဂ့ၢ်န့ၣ် ကီးတရံးကလံၤကမျၢၢ်ၦၤဃ့ၢ်တၢ်ဒုးတဂၤ စံးဘၣ် ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ခီဖျိပယီၤသုးခးလီၤကျိဖးဒိၣ်ဒီးသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢကီးတရံးကီၢ်ဆၣ်ကလံၤထံးသ၀ီပူၤတလီၢ်လီၢ်အဃိ ကမျၢၢ်သံဘၣ်ဒိဘၣ်ထံးအနီၣ်ဂံၢ်ကအိၣ်လၢအဆံဘျဲၣ်လံအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ် လီၤႉ ဒ်န့ၣ်အသိးဖဲတနံၤအံၤလါဖ့ၤဘြူၤအါရံၤ ၂၀ သီ ဂီၤခီ ၉း၃၀ အဆၢကတီၢ်န့ၣ် သုးမီၤစိရိၤကဘီယူၤဟဲတ့ၢ်လီၤကဒီး မ့ၢ်ပိၢ်လၢကမျၢၢ်ၦၤဃ့ၢ်မှံဟးဖျိးအိၣ်တၢ်လီၢ်ဒံးအသိး ဖဲမုၢ်ဃ့ၢ်လီၤ ၁ နၣ်ရံၣ်ဃၣ်ဃၣ်အဆၢကတီၢ်စ့ၢ်ကီး နၢ်ဟူကျိဖိကျိဖးဒိၣ်သီၣ်လၢကီးတရံး၀့ၢ်ဃၢၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
တၢ်စူၤတဘၣ်ဆၢဘၣ်ကတီၢ်ဘၣ်အဃိ(တလိၣ်ထီၤ)ကီၢ်ဆၣ်ပူၤၦၤသူၣ်ပဲဖိတဖၣ်ထံၣ်ဘၣ်တၢ်ကီတၢ်ခဲ
လါဖ့ၤဘြူၤအါရံၤ ၂၀ သီႇ ၂၀၂၃ နံၣ်‚ ခ့ၣ်အဲးစံၣ် လၢအ့ၣ်ယၣ်သတံၣ်ကီၢ်ခီဒိၣ်(ဟ့သၤတၣ်၀့ၢ်)တလိၣ်ထီၤကီၢ်ဆၣ်အပူၤ ဖဲအပူၤကွံာ်လါဖ့ၤဘြူၤအါရံၤ ၁၇ သီအနံၤန့ၣ် ခီဖျိတၢ်စူၤတဘၣ်ဆၢဘၣ်ကတီၢ်ဘၣ်အဃိ ပဲတဖၣ်ဘၣ်စီၣ်၀ဲဒီးဘၣ်ဆါတၢၤကွံာ်အၦ့ၤန့ၢ်က့ၤထဲတ၀၁်လီၤအဖီခိၣ် ၦၤသူၣ်အီၣ်ဖျးအီၣ်ပဲဖိတဖၣ်ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ၦၤဖံးအီၣ်မၤအီၣ်တၢ်ဖိလၢအိၣ်ဖဲန့ၣ်သ့ၣ်တဖၣ်အါဒၣ်တက့ၢ်ဖဲၦၤကူးဘု၀ံၤတၢ်ဂိၢ်ခါဘူးကလၢာ်န့ၣ် အ၀ဲသ့ၣ်သူၣ်ဖျး၀ဲပဲအံၤဒီးတၢ်တနံၤန့ၣ်ခီဖျိတၢ်စူၤသတူၢ်ကလာ်အဃိပဲလၢတၢ်ထဲးဃာ်အီၤ၀ံၤသ့ၣ်တဖၣ်အံၤဘၣ်စီၣ်၀ဲဒီးတန့ၢ်က့ၤအၦ့ၤဒ်လၢညါအသိးလၢၤဘၣ်အဂ့ၢ်န့ၣ် ကမျၢၢ်လၢအသူၣ်အီၣ်ဖျးအီၣ်ပဲတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တၢ်စူၤသတူၢ်ကလာ်အဃိတၢ်ကီတၢ်ခဲဘၣ်ၦၤဖးဒိၣ်ညါႉပဲဘၣ်စီၣ်ဒီတပူၣ်ညါႉပပာ်ပူၣ်ထီၣ်ဃာ်ပဲန့ၣ်ပငါၦၤကညီအိၣ်စ့ၢ်ႉပကူးငါၦၤနါက့အိၣ်စ့ၢ်မီၤနီၤႉပဲလၢအဘၣ်စီၣ်တဖၣ်န့ၣ်နမ့ဆါနါက့ခီဖျိအဘ့ၣ်လီၤအဲးႇအသဲၣ်ဖးအဃိန့ၣ်နတန့ၢ်အၦ့ၤဒ်သိးၦၤပာ်ပနီၣ်၀ဲလၢၤဘၣ်ႉၦၤကမၤဆံးလီၤနတၢ်ၦ့ၤအမဲာ်ညါတနီၤန့ၣ်မးတၦ့ၤပဲလၢၤဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါၦၤၦ့ၤပဲဖိတဖၣ်ဟဲၦ့ၤပဲတုၤလၢ၀့ၢ်ပူၤသ၀ီပူၤညါအိၣ်၀ဲအသိး ၦၤဖံးအီၣ်မၤအီၣ်တၢ်ဖိတဖၣ် စ့ၢ်ကီးလဲၤထီၣ်ဆှၢ၀ဲတုၤလၢ(ပွဲရုံ)ခီၣ်ထံးအိၣ်၀ဲန့ၣ်လီၤႉပဲအံၤအၦ့ၤတဂၢၢ်၀ဲဘၣ်ဒီးတနာ်န့ၣ်အၦ့ၤအိၣ်(၆၀ႇ၀၀၀)ကၠးခိၣ်ဃၢၤဒီးအၦ့ၤထီၣ်လီၤအိၣ်၀ဲအဂ့ၢ်န့ၣ် ၦၤသူၣ်အီၣ်ဖျးအီၣ်ပဲဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ “ၦၤလၢအတထဲးဘၣ်ဒံးပဲနါက့အိၣ်ဒံးႉၦၤထဲး၀ံၤၦၤပာ်ပူၣ်ထီၣ်ဃာ်ဒ်န့ၣ်နါက့အိၣ်လီၤႉဖဲန့ၣ်အဆၢကတီၢ်ခီဖျိတၢ်စူၤသတူၢ်ကလာ်အဃိပဲဘၣ်စီၣ်၀ဲဒီးတန့ၢ်အၦ့ၤဒ်သိးလၢညါခါလၢၤဘၣ်ႉဒိးသန့ၤထီၣ်သးလၢၦၤၦ့ၤတၢ်ဖိအဖီခိၣ်ဒီးၦၤမၤဆံးလီၤအၦ့ၤကအိၣ်တ၀၁်ဃၣ်ဃၣ်ညါႉမ့၀ံၤဖဲမဟိပဲတထၢၣ်န့ၣ်အၦ့ၤအိၣ်(၄၀ႇ၀၀၀)ဘျဲၣ်ညါႉစးထီၣ်ထံရူၢ်ကီၢ်သဲးတၢ်အိၣ်သးတဂ့ၤလၢၤဘၣ်လီၢ်ခံအံၤတထၢၣ်န့ၣ်အၦ့ၤအိၣ်တ့ၢ်က့ၤထဲ(၁၀ႇ၀၀၀)ဘျဲၣ်လီၤ”အဂ့ၢ်န့ၣ် ၦၤသူၣ်အီၣ်ဖျးအီၣ်ပဲလၢအဂၤတဂၤစ့ၢ်ကီးစံး၀ဲန့ၣ်လီၤႉ ဖဲလါဖ့ၤဘြူၤအါရံၤ ၁၇ သီအနံၤန့ၣ် ခီဖျိတၢ်စူၤသတူၢ်ကလာ်ဒီးကလံၤစ့ၢ်ကီးဟဲအဃိ ၦၤသူၣ်အီၣ်ဖျးအီၣ်ပဲဖိတဖၣ်ထံၣ်ဘၣ်၀ဲတၢ်ကီတၢ်ခဲတကးဒံးဘၣ်အမဲာ်ညါၦၤဖံးအီၣ်မၤအီၣ်သဲးကျီးဖိတဖၣ်စ့ၢ်ကီးတနီၤန့ၣ်အသဲးကျီးဟးဂီၤ၀ဲအဂ့ၢ်န့ၣ် ၦၤသူၣ်အီၣ်ဖျးအီၣ်တၢ်ဖိတဖၣ်စံး၀ဲန့ၣ်လီၤႉ ဖဲအပူၤကွံာ်လါယနူၤအါရံၤအခါ လၢအ့ၣ်ယၣ်၀တံၣ်ကီၢ်ခီ ဒူသ၀ီတဖၣ်အပူၤန့ၣ် တၢ်ဃၢ်လီၤ၀ဲလၢပဲကျီးပူၤဒီး ခီဖျိအသၣ်စ့ၢ်ကီးတဂ့ၤဘၣ်အဃိဘၣ်ဖှံ၀ဲဒီးကသံၣ်မၤသံတၢ်ဃၢ်န့ၣ်လီၤႉခီဖျိကသံၣ်မၤသံတၢ်ဃၢ်အံၤစ့ၢ်ကီးအၦ့ၤထီၣ်အဃိၦၤသူၣ်အီၣ်ဖျးအီၣ်တၢ်ဖိတဖၣ်အါဒၣ်တက့ၢ်တဖံးအီၣ်မၤအီၣ်ပဲကျီးလၢၤဘၣ်အဂ့ၢ်န့ၣ် ၦၤသူၣ်အီၣ်ဖျးအီၣ်တၢ်ဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ