၀ီၢ်ရီဟီၣ်က၀ီၤအပူၤ KNU ဒီး သုးမီၤစိရိၤအသုး တၢ်ခးလိာ်သးကဲထီၣ် သ၀ီဖိသံ ၁ ဂၤ ဘၣ်ဒိ ၁ ဂၤ
လါအ့ဖြ့ၣ် ၇ သီႇ ၂၀၂၁ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ၀ီၢ်ရ့ၣ်ကီၢ်ဆၣ်(မိၣ်ကီၢ်စဲၣ်ႇယ့ကီၢ်ဆၣ်) မၤအီၤသ၀ီအပူၤ ဖဲမဟါ(လါအ့ဖြ့ၣ် ၆)သီ ဟါခီအဆၢကတီၢ် ခီဖျိကညီဒီကလုာ်တၢ်ထူၣ်ဖျဲးသုးမုၢ်ဒိၣ် KNLA ဒီး ပယီၤသုးမီၤစိရိၤအသုးအဘၢၣ်စၢၤ တၢ်ခးလိာ်သးကဲထီၣ်အဃိ သ၀ီဖိသံ ၁ ဂၤ ဒီး ဘၣ်ဒိ ၁ ဂၤ အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲမဟါ ဟါခီ ၆ နၣ်ရံၣ်ဘျဲၣ်အဆၢကတီၢ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ် -KNLA သုးရ့ၣ် ၁၆ ဒီး သုးမီၤစိရိၤအသုး ခီၣ်သုးရ့ၣ် ခလရ=၂၃၈ သုးရ့ၣ်တဖၣ်အဘၢၣ်စၢၤ တၢ်ခးလိာ်သးကဲထီၣ်၀ဲဒၣ်န့ၣ်လီၤႉ “ဖဲမဟါ ဟါခီ စးထီၣ်လၢ ၆း၄၀ မံးနံး တၢ်ခးလိာ်သးကဲထီၣ်ယံၤ၀ဲတခီနၣ်ရံၣ်ဘျဲၣ်မီၤနီၤႉ ခီဖျိတၢ်ခးလိာ်သးအဃိ သ၀ီဖိသံ ၁ ဂၤလီၤႉ တဂၤန့ၣ်အခီၣ်ကံၣ်ဒုၣ်ဘၣ်၀ဲဒီးကျိလီၤႉ ခံဂၤလၢာ်န့ၣ်မ့ၢ်ပိာ်ခွါလီၤႉ ၦၤလၢအဘၣ်ဒိတဂၤန့ၣ် တၢ်ဆှၢအီၤဆူတၢ်ဆါဟံၣ်လၢအဘူးဖဲန့ၣ်လီၤ” အဂ့ၢ်န့ၣ် လီၢ်က၀ီၤသ၀ီဖိလၢတအဲၣ်ဒိးပာ်ဖျါအမံၤတဂၤ စံးဘၣ်ခ့ၣ်အဲးစံၣ်န့ၣ်လီၤႉ တၢ်ခးလိာ်သးလၢဘျီ၀ဲအံၤအပူၤ KNLA သုး ဘၣ်ဟ့ၣ်လီၤကွံာ်ဒူသ၀ီတၢ်ဘံၣ်တၢ်ဘၢအလီၢ်တခါအသိး မၤအီၤသ၀ီဃုာ်ဒီး...
KNU သုးက့ ၆ ဒီး သုးမီၤစိရိၤအသုး တၢ်ဒုးကဲထီၣ်
လါအ့ဖြ့ၣ် ၆ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲတနံၤအံၤ(လါအ့ဖြ့ၣ် ၆)သီ ဟါခီ ၆ နၣ်ရံၣ်ဘျဲၣ်အဆၢကတီၢ် ကညီကလုာ်တၢ်ထူၣ်ဖျဲးသုးမုၢ်ဒိၣ် -KNLA သုးရ့ၣ် ၁၆ ဒီး သုးမီၤစိရိၤအသုးအဘၢၣ်စၢၤ တၢ်ဒုးကဲထီၣ် ဖဲဒူပျာ်ယာ်ကီၢ်ရ့ၣ် ၀ီၢ်ရီကီၢ်ဆၣ်(မိၣ်ကီၢ်စဲၣ်ႇယ့ကီၢ်ဆၣ်)မၤအီၤသ၀ီပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤ စံး၀ဲ“မိၣ်ကီၢ်စဲၣ်ႇယ့ကီၢ်ဆၣ်ႇမၤအီၤသ၀ီအပူၤ ဖဲတဟါအံၤ စးထီၣ် ၆ နၣ်ရံၣ် ၄၀ မံးနံး တုၤလၢ ၇း၃၀ မံးနံးတစု တၢ်ခးလိာ်သးကဲထီၣ်အဖၢမုၢ်လီၤႉ တၢ်ပိာ်ထွဲထီၣ်အခံဒုတသ့ၣ်ညါနီတမံၤဒံးဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဘၣ်ထွဲဒီးတၢ်ဒုးကဲထီၣ်တၢ်ဂ့ၢ်လီၤတံၢ်လီၤဆဲးခီန့ၣ် ခ့ၣ်အဲးစံၣ်=ကညီတၢ်ကစီၣ်၀ဲၤလီၢ်ခိၣ်သ့ၣ် ဆဲးဃုသ့ၣ်ညါ၀ဲအဖၢမုၢ်န့ၣ်လီၤႉ
၀ီၢ်ရီဟီၣ်က၀ီၤအပူၤ ခီဖျိသုးမီၤစိရိၤအသုးဟူးဂဲၤအါထီၣ်အဃိ လီၢ်က၀ီၤဖိတဖၣ်အိၣ်ဒီးတၢ်ပျံၤတၢ်ဖုး
လါအ့ဖြ့ၣ် ၆ သီႇ ၂၀၂၁ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ် ဒူပျာ်ယာ်ကီၢ်ရ့ၣ်ႇ၀ီၢ်ရီကီၢ်ဆၣ်အပူၤ စးထီၣ်ဖဲမဟါ(လါအ့ဖြ့ၣ် ၅ သီ)အနံၤ ခီဖျိသုးမီၤစိရိၤအသုးဟူးဂဲၤအါထီၣ်အဃိ လီၢ်က၀ီၤဖိတဖၣ်ဘၣ်ယိၣ်လၢတၢ်ခးလိာ်သးကကဲထီၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ၀ီၢ်ရီလီၢ်က၀ီၤဖိတဂၤစံး၀ဲ “ဖဲမနၤန့ၣ် ပယီၤသုးတဖၣ်ဟဲထီၣ်ဒီဒူၣ်ညါလီၤႉ ဘၣ်ယိၣ်လၢတၢ်ဒုးကဟဲကဲထီၣ်လီၤႉ ကမျၢၢ်တဖၣ်ဘၣ်ယိၣ်ဘၣ်ဘှီတၢ်ဒီးပျံၤတၢ်ဖုးအိၣ်၀ဲလီၤမီၤနီၤႉ အိၣ်လၢၦၢ်ပူၤတဒူၣ်ႇလၢသ၀ီပူၤတဒူၣ် အနီၣ်ဂံၢ်ဖးအါညါလီၤႉ ခဲအံၤကမျၢၢ်တဖၣ်ဘၣ်ယိၣ်ဘၣ်ဘှီတၢ်ဒိၣ်မးလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဖဲတနံၤအံၤ လါအ့ဖြ့ၣ် ၆ သီအနံၤ ဒ်ခ့ၣ်အဲၣ်ယူၣ် ဒူပျာ်ယာ်ကီၢ်ရ့ၣ် ထုးထီၣ်ပာ်ဖျါတၢ်ကစီၣ်အသိးန့ၣ် ၀ီၢ်ရီကီၢ်ဆၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ် -KNLA သုးရ့ၣ် ၁၆ ဟီၣ်က၀ီၤအပူၤ ဖဲမဟါ(လါအ့ဖြ့ၣ် ၅)သီ ဟါခီ(၇း၃၀)အဆၢကတီၢ် သုးမီၤစိရိၤအသုးစုဒုၣ်တီၤအဖီလာ် လ့ဖးထီသ၀ီ ဖယါတီၤ တစိၢ်တလီၢ်သုးကလၢၤ(ခလရ=၂၈၄)သုးရ့ၣ် သုးခိၣ်ဒိၣ်ဖိ ယၤနဲၤအူ တီခိၣ်ရိၣ်မဲဒီးလဲၤဟံကျိဖးဒိၣ်လၢ ဃိၣ်သၢဖျၢၣ်ကီၢ်ဆၣ် နကါတီၤတၢ်လီၢ်န့ၣ်လီၤႉ လၢန့ၣ်အမဲာ်ညါ ဖဲမုၢ်နၤခီ(၁၀း၁၀)မံးနံးအဆၢကတီၢ် (ခလရ=၂၈၃)သုးရ့ၣ် သုးခိၣ်ဒိၣ်ဖိ မၠိထဲၣ်နီၤ ဒီး BGF သုးခိၣ်ဒိၣ်ဖိ မါ၀့ယိၤ တီခိၣ်ရိၣ်မဲဒီး သုးနီၣ်ဂံၢ်ကအိၣ်လၢ(၄၅)ဂၤဃၣ်ဃၣ် လဲၤမၤၦဲၤသုးနီၣ်ဂံၢ်လၢ ကါမဲၣ်လိၣ်(၃)ခိၣ်...
ဒ်သိးတၢ်ကဃုထၢထီၣ်သးၦၢ်အသီလၢသုးကီၣ်ကးဂီၢ်အဂီၢ် BGF ဃ့ထီၣ်၀ဲ
လါအ့ဖြ့ၣ် ၆ သီႇ ၂၀၂၁ နံၣ်ႇ ခ့ၣ်အဲးစံၣ် ကညီကီၢ်စဲၣ်ႇလူၢ်ပျဲၢ်ကီၢ်ဆၣ်ႇ တ၀ိၤဖၤယၤဒိဂ့ၤ(တ၀န်ဖန်ယာစံပြ)သ၀ီအပူၤ သးၦၢ်လၢသုးကီၣ်ကးဃုထၢတီၣ်ထီၣ်၀ဲအဖၣ်အံၤ ခီဖျိလီၢ်က၀ီၤဖိထီဒါဒီးတလိၣ်ဘၣ်၀ဲအဃိ သ၀ီသးၦၢ်လၢအဟးထီၣ်လၢမူဒါတဖၣ်အလီၢ် ဒ်သိးတၢ်ကက့ၤဃုထၢထီၣ်ကဒါလၢအသီအဂီၢ် သုးခိးကီၢ်ဆၢ BGF ဟဲဃ့ထီၣ်၀ဲ ဖဲလါအ့ဖြ့ၣ် ၄ သီအနံၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိတဖၣ်အအိၣ်န့ၣ်လီၤႉ သ၀ီသးၦၢ်အသီလၢသုးကီၣ်ကးဃုထၢတီၣ်ထီၣ်၀ဲလၢအပူၤကွံာ်တဖၣ်အံၤ ကမျၢၢ်ထံဖိ ကီၢ်ဖိလၢအအိၣ်လၢသ၀ီပူၤတဖၣ်ထီဒါ၀ဲ၀ံၤအလီၢ်ခံ ခီဖျိသ၀ီသးၦၢ်တဖၣ်ဟးထီၣ်လၢမူဒါပူၤလံအဃိ BGF ဟဲဃ့ထီၣ်၀ဲဒ်အံၤလီၤအဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤ “ဖဲမဟါန့ၣ် BGF ဟဲဒီးသိလ့ၣ် ၃ ခိၣ်ဒီး ကိး၀ဲသူၣ်က့သးၦၢ်တနီၤလၢသီခါဖၠၣ်ဒီး ဟဲတဲ၀ဲလၢ သုးကီၣ်ကးအဂီၢ် ကဃုထၢထီၣ်သ၀ီသးၦၢ်လၢအသီလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဘၣ်ထွဲသ၀ီသးၦၢ်အသီလၢသုးကီၣ်ကးကဃုထၢတီၣ်ထီၣ်၀ဲတၢ်ဂ့ၢ်အံၤ လီၢ်က၀ီၤဖိတကပၤ ကတူၢ်လိာ်၀ဲဘၣ်ဒီးသမၢကွံာ်၀ဲအဂ့ၢ်န့ၣ် စံး၀ဲန့ၣ်လီၤႉ သ၀ီသးၦၢ်အသီလၢအပူၤကွံာ်သုးကီၣ်ကးဃုထၢထီၣ်၀ဲတဖၣ်အံၤ ခီဖျိလီၢ်က၀ီၤကမျၢၢ်ထံဖိကီၢ်ဖိတ ဖၣ်တအဲၣ်ဒိး၀ဲဘၣ်အဃိ ထီဒါပာ်ဖျါထီၣ်သးဒီး ဖဲန့ၣ်သ၀ီသးၦၢ်အနီၢ် ကစၢ်ဒၣ်၀ဲဆဲးလီၤစုမုၢ်ကျၢၢ်ဟးထီၣ်ကွံာ်၀ဲအဂ့ၢ်န့ၣ် လီၢ်က၀ီၤဖိတဖၣ် စံး၀ဲန့ၣ်လီၤႉ လီၢ်က၀ီၤဖိလၢတအဲၣ်ဒိးပာ်ဖျါအမံၤလၢအဂၤတဂၤစံး၀ဲ “ပ၀ဲသ့ၣ်တဖၣ်မ့ၢ်မတၤတဂၤကထီၣ်သးၦုၢ်လဲၣ်န့ၣ် သ့ၣ်ညါဆိပာ်အဃိ ဟ့ၣ်ဆိအ၀ဲသ့ၣ်တၢ်ဆီၣ်သနံးလီၤႉ အ၀ဲသ့ၣ်ပျံၤတၢ်ဒီးဆဲးလီၤစုမုၢ်ကျၢၢ်ဒီးသမၢ၀ဲလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ် လါမးရှး ၂၇ သီအနံၤ လီၢ်က၀ီၤကမျၢၢ်ထံဖိကီၢ်ဖိတဖၣ် တီၢ်တံၢ်ဃာ်၀ဲသးၦၢ်အ၀ဲၤဒၢးဒီးသ့ၣ်ပၣ်ဒီး...
မၠၣ်၀တံၣ်၀့ၢ်ပူၤ ၦၤလၢတၢ်ဖီၣ်ဃာ်၀ဲ ၁၀၀ ဃၣ်ဃၣ်အကျါ ဟ့ၣ်တၢ်အုၣ်ကီၤန့ၢ်ထဲ(၁၈)နံၣ်ဆူဖီလာ်ဒီး ၦၤလၢအအိၣ်တ့ၢ်တဖၣ် တၢ်ဖီၣ်ဒုးဃာ်၀ဲလၢမၠၣ်၀တံၣ်ဒီးဖၣ်အၣ်ဃိာ်ပူၤ
လါအ့ဖြ့ၣ် ၆ သီႇ ၂၀၂၁ နံၣ်ႇ ခ့ၣ်အဲးစံၣ် ကညီကီၢ်စဲၣ် မၠၣ်၀တံၣ်၀့ၢ်ပူၤ ၦၤလၢတၢ်ဖီၣ်ဃာ်၀ဲအဂၤ ၁၀၀ ဃၣ်ဃၣ်ကျါ ဟ့ၣ်တၢ်အုၣ်ကီၤပျၢ်လီၤကွံာ်ထဲဒၣ်လၢၦၤအသးနံၣ်တၦဲၤဒံး ၁၈ နံၣ်လီၤဒီး ၦၤလၢအအိၣ်တ့ၢ်တဖၣ် တၢ်ဖီၣ်ဒုးဃာ်အ၀ဲသ့ၣ်လၢမၠၣ်၀တံၣ်ဒီးဖၣ်အၣ်ဃိာ်ပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ်စးထီၣ် ဖဲလါဖ့ၤဘြူၤအါရံၤ ခံနွံတနွံ တုၤလၢ လါမးရှး ၂၇ သီအနံၤ မၠၣ်၀တံၣ်၀့ၢ်ပူၤ တၢ်ထီဒါသုးမီၤစိရိၤသနူတၢ်ပာ်ဖျါထီၣ်သးတၢ်ရဲၣ်တၢ်ကျဲၤအပူၤ တၢ်ဖီၣ်၀ဲကမျၢၢ်ခဲလၢာ်အိၣ်၀ဲ ၁၀၀ ဃၣ်ဃၣ်ညါန့ၣ်လီၤႉ “ၦၤလၢအသးနံၣ်တပှဲၤဒံး ၁၈ နံၣ် ဖိသၣ်သးစၢ် ၁၅ ဂၤဃၣ်ဃၣ် နီၢ်ကစၢ်အုၣ်ခီၣ်အသးဒီး တၢ်ပျၢ်လီၤ ကွံာ်၀ဲလီၤႉ ၦၤလၢအအိၣ်တ့ၢ်(၈၀)ဃၣ်ဃၣ်တခီန့ၣ် အါဒၣ်တက့ၢ်တၢ်လိာ်ဘၢလိာ်ကွီၢ်အ၀ဲသ့ၣ်လၢ အဆၢဖိ ၅၀၅(က)ဒီး တၢ်ပၢၤဃာ်အ၀ဲသ့ၣ်လၢမၠၣ်၀တံၣ်ပၢၤကီၢ်ဃိာ်ပူၤဒီးဖၣ်အၣ်တီၣ်ကလ့ဃိာ်ပူၤလီၤႉ အ၀ဲသ့ၣ်ကဘၣ်လဲၤသ့ၣ်နံၤဖးသီဖဲမၠၣ်၀တံၣ်ကွီၢ်ဘျီၣ်လီၤ” အဂ့ၢ်န့ၣ် မၠၣ်၀တံၣ်၀့ၢ် ကမျၢၢ်ပီၢ်ရီကရူၢ် ပီၢ်ရီတဂၤစံး၀ဲန့ၣ်လီၤႉ တကီၢ်ခါဆၢကတီၢ်ခဲအံၤ ဒ်သိးအ၀ဲသ့ၣ်ကဒိးန့ၢ်ဘၣ်တၢ်အုၣ်ကီၤသးအဂီၢ် တီၣ်ထီၣ်လံာ်လံဒီး အိၣ်ခိး၀ဲစံၣ်ညီၣ်ကွီၢ်အတၢ်ဆၢတဲာ်အဖၢမုၢ်လီၤအဂ့ၢ်န့ၣ် သ့ၣ်ညါဘၣ်လၢ မၠၣ်၀တံၣ်၀့ၢ် ကမျၢၢ်ပီၢ်ရီကရူၢ်အအိၣ်န့ၣ်လီၤႉ
တၢ်ဖိတၢ်လံၤလၢတၢ်ကဆှၢ၀ဲဆူၦၤဃ့ၢ်မှံဟးဖျိးတဖၣ်အဂီၢ် ကၠီၣ်တဲၣ်သုးဟ့ၣ်အခွဲးလၢတဘျီအဂီၢ်
လါအ့ဖြ့ၣ် ၅ သီႇ ၂၀၂၁ နံၣ်ႇ ခ့ၣ်အဲးစံၣ် ဒ်သိးတၢ်ကလဲၤဟ့ၣ်မၤစၢၤကညီၦၤဃ့ၢ်မှံဟးဖျိးတဖၣ်အဂီၢ် တၢ်ဖိတၢ်လံၤလၢအအိၣ်ကတာ်ထီအသးဖဲ ကီၢ်ကၠီၣ်တဲၣ်=ကီၢ်ပယီၤကီၢ်ဆၢ ဃိၣ်လိာ်ကျိကၢၢ်နံၤ သီလဲၤထၣ်တၢ်လီၢ်အံၤ ဖဲတနံၤ(လါအ့ဖြ့ၣ် ၅သီ) အံၤဂီၤခီအဆၢကတီၢ် လီၢ်က၀ီၤကၠီၣ်တဲၣ်ၦၤဘၣ်မူဘၣ်ဒါတဖၣ် ဟ့ၣ်အခွဲးလၢကလဲၤဆှၢတၢ်ဖိတၢ်လံၤ တဖၣ်အံၤလၢတဘျီဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ၦၤဟူးဂဲၤမၤတၢ်လၢတၢ်မၤစၢၤၦၤဃ့ၢ်မှံဟးဖျိးတဖၣ်အဂီၢ်တဂၤစံး၀ဲလၢ “ကၠီၣ်တဲၣ်ၦၤဂ့ၢ်၀ီတၢ်ကရၢကရိတဖၣ် ဟဲထိၣ်ဃူထိၣ်ဖိး၀ဲအဃိ ဟ့ၣ်၀ဲအခွဲးအိးထီၣ်၀ဲလီၤႉ တမ့ၢ်လၢတၢ်ဖီခိၣ်နဲၣ်လီၤတၢ်ကလုၢ်ဃိ အိးထီၣ်ဘၣ်ႉ မ့ၢ်ဒၣ်တဘျီအဂီၢ်လီၤႉ ခဲအံၤတီၣ်ထီၣ်တၢ်ဖိးတၢ်လံၤတၢ်အီၣ်တၢ်အီလၢချံပူၤဘၣ်ဖၢလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ခဲအံၤလၢၦၤစံၣ်မှံဟးဖျိးတဖၣ်အဂီၢ် တၢ်မၤစၢၤတၢ်ဖိတၢ်လံၤလၢတၢ်ကလဲၤဆှၢ၀ဲတဖၣ် ခီဖျိကၠီၣ်တဲၣ်ၦၤဂ့ၢ်၀ီတၢ်ကရၢကရိတဖၣ်အတၢ်တၢၣ်ပီၣ်ထိၣ်ဃူထိၣ်ဖိးအဃိ တၢ်ဟ့ၣ်အခွဲးလၢကလဲၤဆှၢဒီး တၢ်မၤစၢၤတၢ်ဖိတၢ်လံၤလၢတၢ်ကလဲၤဆှၢကဒီး၀ဲသ့ၣ်တဖၣ်န့ၣ် ကဘၣ်တၢၣ်ပီၣ်ထိၣ်ဃူဒီးကီၢ်ရ့ၣ်ခိၣ်နၢ်တဖၣ်၀ံၤမး တၢ်ဆှၢအီၤကန့ၢ်၀ဲအဂ့ၢ်န့ၣ် အ၀ဲစံးအါထီၣ်၀ဲန့ၣ်လီၤႉ ဖဲအပူၤကံ၁် လါအ့ဖြ့ၣ် ၃ သီအနံၤ တၢ်မၤစၢၤတၢ်ဖိတၢ်လံၤလၢတၢ်ကလဲၤဆှၢ၀ဲဆူ မုၢ်တြီၢ်ကီၢ်ရ့ၣ် ၦၤဃ့ၢ်မှံဟးဖျိးအအိၣ်တဖၣ် လဲၤတုၤ၀ဲဒၣ်လၢကီၢ်ကၠီၣ်တဲၣ်=ကီၢ်ပယီၤကီၢ်ဆၢ သီလဲၤထၣ်ဘၣ်ဆၣ် ကၠီၣ်တဲၣ်ၦၤဘၣ်မူဘၣ်ဒါတဖၣ် တဟ့ၣ်အခွဲးလၢကလဲၤဆှၢ၀ဲဘၣ်န့ၣ်လီၤႉ တၢ်ဖိတၢ်လံၤသ့ၣ်တဖၣ်အံၤမ့ၢ်၀ဲ ကၠီၣ်တဲၣ်ကညီကရူၢ်(KTG)ဒီး NGO တၢ်ကရၢကရိလၢ အတမ့ၢ်ပဒိၣ်တဖၣ် ဟဲတီၣ်၀ဲလၢသိလ့ၣ်အခိၣ် ၂၀ ဘျဲၣ်ဒီး ဖဲန့ၣ် ဘုသးႇသိႇအံသၣ်ႇခီနီဃ့ႇထံအီ ဒီးတၢ်ဖိတၢ်လံၤလၢအဂၤတဖၣ်ပၣ်ဃုာ်၀ဲအဂ့ၢ်န့ၣ် သ့ၣ်ညါ ဘၣ်န့ၣ်လီၤႉ
တၢ်ထူးသံကွံာ် ၂၀၀၈ တၢ်ဘျၢခိၣ်သ့ၣ်ဒီး ဖဲၣ်ဒရၢၣ်ဒံၣ်မိၣ်ခြ့ၣ်စံၣ်တၢ်အၢၣ်လီၤအီလီၤအဖီခိၣ် PPST သဂၢၢ်တူၢ်လိာ်၀ဲ
လါအ့ဖြ့ၣ် ၅ သီႇ ၂၀၂၁ နံၣ်ႇ ခ့ၣ်အဲးစံၣ် ကီၢ်စၢဖှိၣ် ဘျီၣ်ဒိၣ်ခၢၣ်စးကမံးတံာ်(CRPH)ဘိးဘၣ်ရၤလီၤ၀ဲလၢ ထူးသံကွံာ်၀ဲ ၂၀၀၈ တၢ်ဘျၢခိၣ်သ့ၣ်ဒီး ဖဲၣ်ဒရၢၣ်ဒံၣ်မိၣ်ခြ့ၣ်စံၣ်တၢ်အၢၣ်လီၤအီလီၤ (Federal Democracy Charter)အဖီခိၣ် သဂၢၢ်တူၢ်လိာ်၀ဲအဂ့ၢ်န့ၣ် ကလုာ်ဒူၣ်ဖီၣ်စုက၀ဲၤတၢ်ကရၢကရိလၢ အဆဲးလီၤထံကီၢ်ဒီဘ့ၣ်တၢ်ပတုာ်တၢ်ခးအလံာ်ဃံးဃာ် အတၢ်တီခိၣ်ရိၣ်မဲတၢ်မုာ်တၢ်ခုၣ်တၢ်မၤအကျဲ(PPST) စံး၀ဲန့ၣ်လီၤႉ ဖဲတလါအံၤ လါအ့ဖြ့ၣ် ၃ သီ ဒီး ၄ သီအနံၤ (PPST)မၤ၀ဲဒၣ်တၢ်တၢၣ်ပီၣ်ထိၣ်ဃူထိၣ်ဖိး တကီၢ်ခါထံရူၢ်ကီၢ်သဲးတၢ်အိၣ်သးဒီးကီၢ်ပူၤတၢ်အိၣ်သးတဖၣ်ဒီး တၢ်အိၣ်ဖှိၣ်၀ံၤ ထုးထီၣ်ဘိးဘၣ်ရၤလီၤ၀ဲလံာ်တၢ်ပာ်ဖျါန့ၣ်လီၤႉ လၢန့ၣ်အမဲာ်ညါ သုးကီၣ်ကးမၤဆူၣ်မၤဆိးမၤသံကမျၢၢ်ထံဖိကီၢ်ဖိလၢအတၢ်စုက၀ဲၤတအိၣ်ဘၣ်ႇ ကပတုာ်ကွံာ်တၢ်ခးမၤလီၤမုၢ်ပြံပြါတဖၣ်အဂ့ၢ်ႇ ပျၢ်လီၤကွံာ်ၦၤလၢတၢ်ဖီၣ်ဃာ်၀ဲတဖၣ်လၢအဆိအချ့အဂ့ၢ်ဒီး ကဆဲးမၤစၢၤ၀ဲကမျၢၢ်ထံဖိကီၢ်ဖိအတၢ်ဟူးတၢ်ဂဲၤထီဒါသုးမီၤစိရိၤ (CDM)တဖၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဒီကလုာ်ဒံၣ်မိၣ်ခြ့ၣ်စံၣ်ကရၢ -NLD စ့ၢ်ကီးစံး၀ဲလၢ ပာ်ဂၢၢ်ပာ်ကျၢၤတူၢ်လိာ်၀ဲ “ဖဲၣ်ဒရၢၣ်ဒံၣ်မိၣ်ခြ့ၣ်စံၣ်တၢ်အၢၣ်လီၤအီလီၤ”ဒီး တၢ်ထူးသံကွံာ် ၂၀၀၈ တၢ်ဘျၢခိၣ်သ့ၣ်အံၤ သးလီၤပလိာ်တူၢ်လိာ်၀ဲအဂ့ၢ်န့ၣ် ထုးထီၣ်ဘိးဘၣ်ရၤလီၤ၀ဲ ဖဲလါအ့ဖြ့ၣ် ၄ သီအနံၤန့ၣ်လီၤႉ
ၦၤတဂၤလၢ်လၢ်လၢအမၤတံာ်တာ်၀ဲ(CDM)တၢ်ဟူးတၢ်ဂဲၤတဖၣ် ကဟံးတရ့တုၤလီၤတီၤလီၤအဂ့ၢ် ဒူပျာ်ယာ်ကီၢ်ရ့ၣ်စံး
လါအ့ဖြ့ၣ် ၃ သီႇ ၂၀၂၁ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်ဟီၣ်က၀ီၤအပူၤ ၦၤတဂၤလၢ်လၢ်လၢအမၤတံာ်တာ်(CDM)တၢ်ဟူးတၢ်ဂဲၤတဖၣ် တၢ်ကဟံးအရ့တုၤလီၤတီၤလီၤအဂ့ၢ်န့ၣ် ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆) ထုးထီၣ်ပာ်ဖျါ၀ဲ ဖဲတနံၤအံၤ(လါအ့ဖြ့ၣ် ၃ သီ)အနံၤန့ၣ်လီၤႉ ဒ်သိးတၢ်ဟူးဂဲၤထီဒါသုးမီၤစိရိၤ(CDM)တၢ်ဟူးတၢ်ဂဲၤကပတုာ်သးအဂီၢ် သုးကီၣ်ကးအသုးဒီး ၦၤတနီၤ ခီဖျိမၤတံာ်တာ်ဟ့ၣ်တၢ်ဆီၣ်သနံးလၢကျဲအကလုာ်ကလုာ်အိၣ်၀ဲအဃိ ခ့ၣ်အဲၣ်ယူၣ် ဒူပျာ်ယာ်ကီၢ်ရ့ၣ် ဘၣ်ထုးထီၣ်ဘိးဘၣ်ရၤလီၤဟ့ၣ်ပလီၢ်၀ဲဒ်အံၤန့ၣ်လီၤႉ လၢန့ၣ်အမဲာ်ညါ ဒ်သိးတၢ်ကသူၣ်ထီၣ်ဖဲၣ်ဒရၢၣ်ကီၢ်စၢဖှိၣ်အဂီၢ် ကလုာ်ဒူၣ်ကမျၢၢ်ထံဖိကီၢ်ဖိဒီး ကမျၢၢ်ထံဖိကီၢ်ဖိလၢအပၣ်ဃုာ်လၢ(CDM)တၢ်ဟူးတၢ်ဂဲၤလၢအပာ်ဖျါထီၣ်သးတဖၣ် အ၀ဲသ့ၣ်တၢ်ကီတၢ်ခဲဒီးတၢ်လိၣ်ဘၣ်တဖၣ် ဒ်တၢ်သ့အိၣ်ဒီးၦၤအသိးကဂုာ်ကျဲးစၢးမၤစၢၤ၀ဲဒီး ကဒီတဒၢ၀ဲအဂ့ၢ်န့ၣ် ခ့ၣ်အဲၣ်ယူၣ် ဒူပျာ်ယာ်ကီၢ်ရ့ၣ် စံး၀ဲန့ၣ်လီၤႉ
မ့ၣ်ပိၢ်ပိၢ်ဖးထီၣ်လၢ မၠၣ်၀တံၣ်၀့ၢ် နီၣ်ဂံၢ်(၂)တိၤအဖီလာ်
လါအ့ဖြ့ၣ် ၃ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲလါအ့ဖြ့ၣ် ၂သီအနံၤ ခီဖျိမ့ၣ်ပိၢ်ပိၢ်ဖးထီၣ်လၢမၠၣ်၀တံၣ်၀့ၢ် နီၣ်ဂံၢ် ၅ က၀ီၤဒ့ ယ့ၤပူၤသ၀ီအကပၤ တၢ်ရ့လိာ်မုာ်လိာ်တိၤအဖီလာ်အဃိ ပယီၤပၢၤကီၢ်သုးတဂၤဘၣ်ဒိအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲဟါခီ ၇း၃၀ အဆၢကတီၢ် မၠၣ်၀တံၣ်၀့ၢ် ကီၢ်ကၠီၣ်တဲၣ်=ကီၢ်ပယီၤကီၢ်ဆၢ နီၣ်ဂံၢ် ၂ တၢ်ရ့လိာ်မုာ် လိာ်တိၤအဖီလာ် ၦၤခံဂၤလၢတၢ်သ့ၣ်ညါအမံၤဟဲကွံာ်တ့ၢ်လီၤ၀ဲမ့ၣ်ပိၢ်လၢပၢၤကီၢ်အိၣ်ခိးတၢ်အလီၢ်အဂ့ၢ်န့ၣ် စံး၀ဲန့ၣ်လီၤႉ ခီဖျိမ့ၣ်ပိၢ်ပိၢ်ဖးထီၣ်အဃိ ပယီၤပၢၤကီၢ်သုးတဂၤအစုထွဲဘၣ်၀ဲဒီးမ့ၣ်ပိၢ်အက့အခီအဃိ ဘၣ်တၢ်ဆှၢအီၤဆူသ့ၤကါညံၤနီၤတၢ်ဆါဟံၣ်အဂ့ၢ်န့ၣ် သ့ၣ်ညါဘၣ်လၢ ၦၤလၢအဘူးဒီးပၢၤကီၢ်တၢ်ကစီၣ်၀ဲၤကျိၤတဂၤအအိၣ်န့ၣ်လီၤႉ ဒ်န့ၣ်အသိး ဖဲလါအ့ဖြ့ၣ် ၂ သီ ဟါခီ ၇ နၣ်ရံၣ်အဆၢကတီၢ်စ့ၢ်ကီး မၠၣ်၀တံၣ် ဘယ့ၣ်နီၤကျးအလီၢ် ဒီး နီၣ်ဂံၢ် ၃ က၀ီၤဒ့ ဒံၣ်ထၤအီၤ ဖယါကိအပိၤကပၤစ့ၢ်ကီး နၣ်ဟူ၀ဲဒၣ်မ့ၣ်ပိၢ်ပိၢ်ဖးထီၣ်သီၣ်တထံၣ်စုာ်စုာ်အဂ့ၢ်န့ၣ် မၠၣ်၀တံၣ်၀့ၢ်ဖိကမျၢၢ်တဖၣ်စံး၀ဲန့ၣ်လီၤႉ
KNU သုးက့-၁ ဒီး မီၤစိရိၤသုးအဘၢၣ်စၢၤ တၢ်ခးလိာ်သးကဲထီၣ်
လါအ့ဖြ့ၣ် ၃ သီႇ ၂၀၂၁ နံၣ်ႇ ခ့ၣ်အဲးစံၣ် မိၣ်ကီၢ်စဲၣ်ႇဒူသထူၣ်ကီၢ်ရ့ၣ်ႇ သထူၣ်ကီၢ်ဆၣ် ဖဲလါအ့ဖြ့ၣ် ၂ သီ ဟါခီ ၈ နၣ်ရံၣ်ဃၣ်ဃၣ်အဆၢကတီၢ် KNU-ကညီဒီကလုာ်စၢဖှိၣ်ကရၢ သုးက့=၁ သုးရ့ၣ် ၂ အသုးဒီး ပယီၤသုးမီၤစိရိၤအသုးတဖၣ်အဘၢၣ်စၢၤ တၢ်ခးလိာ်သးကဲထီၣ်၀ဲလၢပနွဲၢ်ကျါသ၀ီအကပၤ တလၤအီဖိကျါအဂ့ၢ်န့ၣ် လီၢ်က၀ီၤသ၀ီဖိတဂၤ စံးဘၣ်ခ့ၣ်အဲးစံၣ်န့ၣ်လီၤႉ အ၀ဲစံး၀ဲလၢ “တၢ်ခးလိာ်သးကဲထီၣ်လၢတလးအီဖိကျါလီၤႉ ခး၀ဲဒီးကျိဖိကျိဖးဒိၣ်လီၤႉ တၢ်ကဲထီၣ်သးယံၤ၀ဲ ၂၀ မံးနံးညါလီၤႉ ခးစိ၀ဲဒၣ်ကျိဖးဒိၣ်ဆူသ၀ီပူၤ မ့ၢ်အဘၣ်ဟံၣ်ဧါတသ့ၣ်ညါဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ် လါမးရှး ၃၁ သီအနံၤ ပယီၤသုးမီၤစိရိၤဘိးဘၣ်ရၤလီၤ၀ဲလၢ စးထီၣ်ဖဲလါအ့ဖြ့ၣ်ထီၣ် ၁ သီ တုၤလၢ ၃၀ သီအနံၤ ကပတုာ်၀ဲတၢ်ခးတလါန့ၣ်လီၤႉ