သုးမီၤစိရိၤအသုးကဘီယူၤကွံာ်လီၤမ့ၣ်ပိၢ်လၢ KNU သုးက့-၃ ဟီၣ်က၀ီၤပူၤ ကမျၢၢ်သံ ၁၁ ဂၤႇ ဘၣ်ဒိ ၅ ဂၤ
လါမးရှး ၃၁ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲလါမးရှး ၃၀ သီ မုၢ်ဃ့ၢ်လီၤ ၃ နၣ်ရံၣ်အဆၢကတီၢ် ခီဖျိသုးမီၤစိရိၤအသုးကဘီယူၤကွံာ်လီၤမ့ၣ်ပိၢ်ဆူ ကညီဒီကလုာ်စၢဖှိၣ်ကရၢ KNU သုးက့ ၃ ဟီၣ်က၀ီၤ ဆီထံးကီၢ်ဆၣ် မဲၢ်ဒမၣ်ခၠီဖျါႇ လ့ၤခၠိၤတီၣ်အကပိၤကပၤအဃိ ကမျၢၢ်သံ၀ဲ ၁၁ ဂၤဒီး ဘၣ်ဒိ ၅ ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ တၢ်လီၢ်လၢပယီၤသုးမီၤစိရိၤကွံာ်လီၤမ့ၣ်ပိၢ်အလီၢ်န့ၣ်အိၣ်ဘူး၀ဲဒီး ဆီထံးကီၢ်ဆၣ် KNU စုဒုၣ်တီၤအဖီလာ် KNLA သုးရ့ၣ် ၇ တၢ်လီၢ်န့ၣ်လီၤႉ ၦၤလၢအသံအဘၣ်ဒိတဖၣ်န့ၣ်မ့ၢ်၀ဲဒၣ်ကမျၢၢ်သ့ၣ်တဖၣ်ဒီး ဖဲန့ၣ်ၦၤလၢအဘၣ်ဒိ ၅ ဂၤအကျါပၣ်ဃုာ်၀ဲဒၣ်ဒီး KNU သ့ၣ်ၦၢ်၀ဲၤကျိၤအၦၤမၤတၢ်ဖိတဂၤအဂ့ၢ်န့ၣ် ၦၤဂ့ၢ်၀ီကရူၢ်မူဒါခိၣ်လၢအအိၣ်ဖဲဟီၣ်က၀ီၤဖဲန့ၣ်အပူၤတဂၤ ပာ်ဂၢၢ်ပာ်ကျၢၤစံး၀ဲန့ၣ်လီၤႉ လၢန့ၣ်အမဲာ်ညါ ဖဲမဟါလါမးရှး ၃၁ သီအနံၤစ့ၢ်ကီး ပယီၤသုးမီၤစိရိၤအ drone န)ဟဲဃုသ့ၣ်ညါတၢ်လၢ KNU စုဒုၣ်တီၤအဖီလာ် သုးရ့ၣ် ၇ ဒီး ဆီထံးကီၢ်ဆၣ်အဟီၣ်က၀ီၤပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ “အခီၣ်ထံးတနံၤန့ၣ်ဟဲကွံာ်လီၤမ့ၣ်ပိၢ်ဒီးကဘီယူၤလီၤႉ...
ကီးတရံး၀့ၢ်ပူၤ တၢ်ခးလိာ်သးကဲထီၣ်
လါမးရှး ၃၁ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲတနံၤအံၤ(လါမးရှး ၃၁)သီ ဟါခီ ၇ နၣ်ရံၣ်တခီဘျဲၣ်အဆၢကတီၢ် တၢ်ခးလိာ်သးကဲထီၣ်လၢကညီကီိၢ်စဲၣ်ႇ ကီးတရံး၀့ၢ်ပူၤအဂ့ၢ်န့ၣ် ၦၤအိၣ်လၢ၀့ၢ်ပူၤတဂၤစံးဘၣ်ခ့ၣ်အဲးစံၣ်န့ၣ်လီၤႉ အ၀ဲစံး၀ဲလၢ “တၢ်ကဲထီၣ်သးလၢပၢၤကီၢ်၀ဲၤလီၢ်တကပၤလီၤႉ ခးတၢ်အိၣ်၀ဲမံးနံး ၁၀ ဘျဲၣ်ညါလီၤႉ နၢ်ဟူကျိကလုၢ်ႇမ့ၣ်ပိၢ်ကလုၢ်ရှဲရှဲလီၤႉ အိၣ်၀ဲဒၣ်အထံၣ် ၅၀ ဘျဲၣ်ညါလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ ခီဖျိလၢတၢ်ခးလိာ်သးအဃိ ကမျၢၢ်လၢအအိၣ်ဘူးဒီးပၢၤကီၢ်၀ဲၤလီၢ်အကပိၤကပၤတဖၣ် ဃ့ၢ်ပူၤဖျဲးသးအိၣ်၀ဲဒီး တၢ်ဘၣ်ဒိဘၣ်ထံးတၢ်အိၣ်သးတခီ ဆဲးဃုသ့ၣ်ညါအဖၢမုၢ်န့ၣ်လီၤႉ ဒ်ပဒိးန့ၢ်ဘၣ်တၢ်အိၣ်သးလီၢ်ခံကတၢၢ် ဖဲ ၈နၣ်ရံၣ်တခီအသိးန့ၣ် တၢ်ဆဲးခးလီၤကျိဖးဒိၣ်ကအိၣ်လၢအဖျၢၣ် ၃၀ဘျဲၣ်လံန့ၣ်လီၤႉ
သ၀ီဖိလၢအဘၣ်ဒိ ၇ ဂၤ ဒ်သိးကကူဆါယါဘျါသးအဂီၢ် တၢ်ဆှၢ၀ဲဆူကီၢ်ကၠီၣ်တဲၣ်တကပၤ
လါမးရှး ၃၁ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲအပူၤကွံာ်(လါမးရှး ၂၇)သီအနံၤ ခီဖျိသုးမီၤစိရိၤအသုးကဘီယူၤဟဲကွံာ်လီၤမ့ၣ်ပိၢ်လၢ ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ မုၢ်တြီၢ်(ဖၣ်ပူၣ်)ဟီၣ်က၀ီၤပူၤအဃိ လီၢ်က၀ီၤသ၀ီဖိ ၇ ဂၤလၢအဘၣ်ဒိဘၣ်ထံးတဖၣ် ဒ်သိးကကူစါယါဘျါသးအဂီၢ် ဖဲမဟါ(လါမးရှး ၃၀)သီ မုၢ်ဃ့ၢ်လီၤအဆၢကတီၢ် ဘၣ်တၢ်ဆှၢထီၣ်အီၤဆူကီၢ်ကၠီၣ်တဲၣ်ကတပၤလံအဂ့ၢ်န့ၣ် သ့ၣ်ညါဘၣ်န့ၣ်လီၤႉ ခီဖျိပယီၤသုးမီၤစိရိၤအကဘီယူၤဟဲကွံာ်လီၤမ့ၣ်ပိၢ်အဃိ လီၢ်က၀ီၤသ၀ီဖိပိာ်မုၣ် ၄ ဂၤဒီး ပိာ်ခွါ ၃ ဂၤလၢအဘၣ်ဒိဘၣ်ထံးတဖၣ်အံၤ ဒ်သိးတၢ်ကဟ့ၣ်ကူစါယါဘျါအီၤလၢကီၢ်ကၠီၣ်တဲၣ်တကပၤကန့ၢ်အဂီၢ် ဒ်လီၢ်က၀ီၤၦၤဘၣ်မူဘၣ်ဒါတဖၣ်တၢၣ်ပီၣ်တဲသကိး၀ဲအသိး ဖဲမဟါမုၢ်ဃ့ၢ်လီၤအဆၢကတီၢ် ဟဲတုၤ၀ဲဒၣ်လၢကီၢ်ကၠီၣ်တဲၣ်ကီၢ်ဆၢသီလဲၤထၣ်သ၀ီလံအဂ့ၢ်န့ၣ် သီလဲၤထၣ်သ၀ီဖိတဂၤပာ်ဂၢၢ်ပာ်ကျၢၤ စံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ်(လါမးရှး ၂၇)သီ ဟါခီ ၇ နၣ်ရံၣ် တုၤလၢ ဂီၤခီ ၂ နၣ်ရံၣ်တခီအဆၢကတီၢ် ခီဖျိပယီၤသုးမီၤစိရိၤဟဲကွံာ်လီၤမ့ၣ်ပိၢ်တလီၢ်လီၢ်အဃိ ဖိသၣ်ဃုာ်ဒီးကမျၢၢ်သံ၀ဲ ၃ ဂၤႇ ဘၣ်ဒိဘၣ်ထံး၀ဲ ၈ ဂၤဒီး ဟံၣ်တနီၤစ့ၢ်ကီးမ့ၣ်အူအီၣ်ဟးဂီၤကွံာ်၀ဲန့ၣ်လီၤႉ ဖဲလါမးရှး ၂၇ႇ၂၈ႇ၂၉ သီအနံၤ ခီဖျိပယီၤသုးမီၤစိရိၤအသုးကဘီယူၤဟဲကွံာ်လီၤမ့ၣ်ပိၢ်ဆူ ခ့ၣ်အဲၣ်ယူၣ် သုးက့(၅)ဟီၣ်က၀ီၤပူၤအဃိ ဃိၣ်လိာ်ကျိဒီတကျိၤ မဲၢ်နုာ်ထၣ်ႇဃိၣ်က့ၣ်ႇအံတူၢ်ထၣ်ဒီးအူ၀ဲကျိသ၀ီ လီၢ်က၀ီၤကမျၢၢ် ၃ႇ၀၀၀ ဘျဲၣ် ဘၣ်လဲၤဃ့ၢ်ထီၣ်ဆူဃိၣ်လိာ်ကျိ၀ၢ်ခီကီၢ်ကၠီၣ်တဲၣ်တကပၤန့ၣ်လီၤႉ ခီဖျိပယီၤသုးမီၤစိရိၤအသုးကဘီယူၤဟဲကွံာ်လီၤမ့ၣ်ပိၢ်ဆူ...
သုးမီၤစိရိၤအတၢ်ထီၣ်ဒုးအဖီခိၣ် ကျဲအိၣ်က့ၤထဲဒၣ်လၢကဘၣ်ခီၣ်ဆၢက့ၤအဂ့ၢ် KNU ထုးထီၣ်လံာ်တၢ်ပာ်ဖျါ
လါမးရှး ၃၁ သီႇ ၂၀၂၁ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ် ဟီၣ်က၀ီၤအပူၤ ဒ်သိးကဒီတဒၢကညီကမျၢၢ်ဒီးနီၢ်ကစၢ်တၢ်ဆၢတဲာ်လီၤသးအဂီၢ် သုးမီၤစိရိၤ အတၢ်ထီၣ်ဒုးအဖီခိၣ် ကျဲအိၣ်က့ၤထဲဒၣ်လၢကဘၣ်ခီၣ်ဆၢက့ၤအဂ့ၢ်န့ၣ် ဖဲမဟါ(လါမးရှး ၃၀)သီအနံၤ ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ် သုးက့ ၅ ထုးထီၣ်လံာ်တၢ်ပာ်ဖျါဒီးစံး၀ဲန့ၣ်လီၤႉ “ဆၢကတီၢ်ခဲအံၤ ကီၢ်ပယီၤသုးမုၢ်ဒိၣ်အသုးတဖၣ် ဟဲနုာ်လီၤတလၢ၀ဲလၢပဟီၣ်က၀ီၤအပူၤလံန့ၣ်လီၤႉ ခီဖျိတၢ်အိၣ်သးအံၤအဃိ ပသူၣ်ကိၢ်သးဂီၤတၢ်လၢကမျၢၢ်ထံဖိကီၢ်ဖိတၢ်အိၣ်မူအိၣ်ဂဲၤတၢ်ဘံၣ်တၢ်ဘၢအဂီၢ် ဒိၣ်မးလီၤႉ လၢပဟီၣ်က၀ီၤပူၤႇဒ်သိးကဒီတဒၢကညီကမျၢၢ်ဒီးအ၀ဲသ့ၣ်နီၢ်ကစၢ်တၢ်ဆၢတဲာ်အဂီၢ် ကီၢ်ပယီၤသုးမုၢ်ဒိၣ်လၢအဟံးဆူၣ်ကွံာ်ထံကီၢ်တၢ်စိတၢ်ကမီၤအတၢ်ထီၣ်ဒုးအံၤ ကျဲလၢ ကဃုထၢတအိၣ်ဘၣ်ဒီးကက့ၤခီၣ်ဆၢကဒါလီၤ”အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဖဲအပူၤကွံာ်(လါမးရှး ၂၇)သီအနံၤ ခ့ၣ်အဲၣ်ယူၣ် သုးက့ ၅ လဲၤထီၣ်ဒုးဟံးန့ၢ်ကွံာ် သံမုၢ်ထၣ်ပယီၤသုး ကလၢၤလၢအအိၣ်ဖဲမုၢ်တြီၢ်ကီၢ်ရ့ၣ် ဃိၣ်လိာ်ကျိကၢၢ်နံၤ၀ံၤအလီၢ်ခံ ခီဖျိပယီၤသုးမီၤစိရိၤအသုးကဘီယူၤ ဟဲကွံာ်လီၤမ့ၣ်ပိၢ်လၢခ့ၣ်အဲၣ်ယူၣ်မုၢ်တြီၢ်ကီၢ်ရ့ၣ် သုးက့ ၅ ဟီၣ်က၀ီၤအပူၤအဃိ လီၢ်က၀ီၤကမျၢၢ်ထံဖိကီၢ်ဖိလၢအကလးဘၣ်ဃ့ၢ်မှံဟးဖျိး၀ဲဒၣ်အဖီခိၣ် ခ့ၣ်အဲၣ်ယူၣ် သုးက့ ၅ ဘၣ်ထုးထီၣ်ဘိးဘၣ်ရၤလီၤ၀ဲလံာ်တၢ်ပာ်ဖျါဒ်အံၤန့ၣ်လီၤႉ ခီဖျိပယီၤသုးမီၤစိရိၤအသုးဟဲကွံာ်လီၤမ့ၣ်ပိၢ်ဒီးကဘီယူၤအဃိ ဖိဒံဖိသၣ်ဃုာ်ဒီးကမျၢၢ် ၈ ဂၤသံ၀ဲဒီး ဘၣ်ဒိဘၣ်ထံး၀ဲ ၈ ဂၤအသိး မုၢ်တြီၢ်ကီၢ်ရ့ၣ် လီၢ်က၀ီၤကမျၢၢ် ၁၀ႇ၀၀၀ ဘျဲၣ် ဘၣ်ပာ်တ့ၢ်ကွံာ်အဟံၣ်အဃီအတၢ်ဖံးအီၣ်မၤအီၣ်လီၢ်ကျဲဒီး ဘၣ်လဲၤစံၣ်အိၣ်ခူသူၣ်လၢကစၢၢ်ခိၣ်ကလိကျါန့ၣ်လီၤႉ လၢန့ၣ်အမဲာ်ညါ...
သုးမီၤစိရိၤအသုးကဘီယူၤ ဟဲကွံာ်လီၤမ့ၣ်ပိၢ်အဃိ ဘၣ်သံသ၀ီဖိ ၆ ဂၤ
လါမးရှး ၃၀ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲတနံၤအံၤ(လါမးရှး ၃၀)သီ မုၢ်ဃ့ၢ်လီၤ ၃ နၣ်ရံၣ်ဘျဲၣ်အဆၢကတီၢ် ခီဖျိသုးမီၤစိရိၤအသုးကဘီယူၤ ဟဲကွံာ်လီၤမ့ၣ်ပိၢ်လၢ ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ သုးက့(၃)ဟီၣ်က၀ီၤပူၤအဃိ ထံဖးဒိၣ်သ၀ီဖိသံ၀ဲ ၆ ဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤၦၤဟ့ၣ်တၢ်ကစီၣ်ဖိအအိၣ်န့ၣ်လီၤႉ “ဟဲခးလီၤ၀ဲဒီးကဘီယူၤ ၂ ဘ့ၣ်လီၤႉ သ၀ီဖိ ၅ ဂၤသံ၀ဲဒီး ဘၣ်ဒိ၀ဲနးနးကလဲာ်တဂၤလီၤႉ သ၀ီဖိလၢအဘၣ်ဒိတဂၤန့ၣ်စ့ၢ်ကီးတယံၤဘၣ်ဒီးသံ၀ဲလီၤ”အဂ့ၢ်န့ၣ် လီၢ်က၀ီၤဖိတဂၤပာ်ဂၢၢ်ပာ်ကျၢၤ စံး၀ဲန့ၣ်လီၤႉ သ၀ီလၢတၢ်ဟဲခး၀ဲဒီးကဘီယူၤအံၤ အိၣ်၀ဲဒၣ်လၢ ခ့ၣ်အဲၣ်ယူၣ်ဟီၣ်က၀ီၤ ဆီထံးကီၢ်ဆၣ်ႇ မဲၢ်ကဒံၣ်ကရူၢ်ဒီး စးထီၣ်ဖဲ လါမးရှး ၂၇ သီ တုၤလၢ ၂၉ သီ သၢသီအတီၢ်ပူၤ သုးမီၤစိရိၤအသုးကဘီယူၤဟဲဆှၣ်ကွၢ်တၢ်အိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကၠီၣ်တဲၣ်သုး က့ၤဆှၢကဒီးကညီ ၦၤဃ့ၢ်တၢ်ဒုးဖိ ၅၂၀ ဂၤ
လါမးရှး ၃၀ သီႇ ၂၀၂၁ နံၣ်ႇ ခ့ၣ်အဲးစံၣ် ပယီၤသုးမီၤစိရိၤအသုးလၢအအိၣ်ဖဲမုၢ်တြီၢ်ကီၢ်ရ့ၣ် ဃိၣ်လိာ်ကျိကၢၢ်နံၤတဖၣ် ခီဖျိခးလီၤတၢ်ဒီးကဘီယူၤအဃိ အူ၀ဲကျိဒီးပကီၤဒဲသ၀ီ လီၢ်က၀ီၤဖိ ၅၂၀ ဂၤလၢအလဲၤဃ့ၢ်ဆူကီၢ်ကၠီၣ်တဲၣ်ပူၤတဖၣ် ဖဲတနံၤအံၤမုၢ် ထူၣ်အဆၢကတီၢ် ကီၢ်ကၠီၣ်တဲၣ်ၦၤဘၣ်မူဘၣ်ဒါတဖၣ် က့ၤဆှၢကဒါကဒီး၀ဲလံအဂ့ၢ်န့ၣ် သ့ၣ်ညါဘၣ်န့ၣ်လီၤႉ ခီဖျိသုးမီၤစိရိၤအသုးကွံာ်လီၤကျိဖးဒိၣ်ဒီးကဘီယူၤအဃိ အံတူၢ်ထၣ်သ၀ီဖိ ၂၀၀၉ ဂၤလၢအလဲၤဃ့ၢ်ဆူကီၢ်ကၠီၣ်တဲၣ်ပူၤတဖၣ် ဖဲမဟါ(လါမးရှး ၂၉)သီ ဟါခီအဆၢကတီၢ် ကီၢ်ကၠီၣ်တဲၣ်ၦၤဘၣ်မူဘၣ်ဒါတဖၣ် က့ၤဆှၢကဒါလၢအလီၢ်ကျဲစ့ၢ်ကီးန့ၣ်လီၤႉ ခီဖျိတၢ်ကစီၣ်ဟူထီၣ်လၢသုးမီၤစိရိၤကဟဲခးတၢ်ဒီးကဘီယူၤအဃိ ဖဲအပူၤကွံာ် လါမးရှး ၂၈ သီအနံၤ လီၢ်က၀ီၤဖိလၢအအိၣ်ဖဲဃိၣ်လိာ်ကျိကၢၢ်နံၤအကပိၤကပၤ အဂၤ ၃ႇ၀၀၀ ဃၣ်ဃၣ် ဘၣ်လဲၤဃ့ၢ်ထီၣ်၀ဲဒၣ်ဆူကီၢ်ကၠီၣ်တဲၣ်တကပၤန့ၣ်လီၤႉ
ခမရ (၄၀၈) သုးအသိလ့ၣ်လီၤတကျၢၢ်ဒီး သံဘၣ်ဒိဘၣ်ထံးအါအါဂီၢ်ဂီၢ်
လါမးရှး ၃၀ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲမဟါ(လါမးရှး ၂၉)သီ မုၢ်ထူၣ် ၁၁ နၣ်ရံၣ်အဆၢကတီၢ် ပယီၤသုးမီၤစိရိၤအသုးသိလ့ၣ်လၢအဟဲက့ၤတီၣ်၀ဲ ခီၣ်ချ့သုးရ့ၣ်(ခမရ=၄၀၈)သုးဖိတဖၣ်အံၤ လီၤတကျၢၢ်၀ဲ ဖဲကညီကီၢ်စဲၣ်ႇလူၢ်ပျဲၢ်ကီၢ်ဆၣ် ၀ၣ်ကျဲခိၣ်တၢ်လီၢ်ဒီး သံဘၣ်ဒိဘၣ်ထံးအိၣ်၀ဲအါအါဂီၢ်ဂီၢ်အဂ့ၢ်န့ၣ် လီၢ်က၀ီၤၦၤဟ့ၣ်တၢ်ကစီၣ်ဖိတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ လီၢ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ် သုးခိၣ်တဂၤစံး၀ဲလၢ “ပယီၤသုးသိလ့ၣ်တကျၢၢ်ဒီးသံ၀ဲတဘျီဃီ ၄ ဂၤလီၤႉ ၦၤပၣ်၀ဲဒၣ်လၢသိလ့ၣ်အပူၤ ၃၀ ဂၤလီၤႉ ဖဲအကျါ ၂ ဂၤန့ၣ်တၢ်ဘၣ်ဒိဘၣ်ထံးတအိၣ်ဘၣ်ႉ ၦၤလၢအဂၤတဖၣ်န့ၣ်သံဘၣ်ဒိဘၣ်ထံးအိၣ်၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တၢ်လီၢ်လၢပယီၤသုးသိလ့ၣ်တကျၢၢ်အလီၢ်န့ၣ်မ့ၢ်၀ဲဒၣ် ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ သုးက့(၇)ဟီၣ်က၀ီၤဒီး သုးမီၤစိရိၤအသုး(ခမရ=၄၀၈)အံၤ အိၣ်ဟဲ၀ဲဒၣ်လၢလူၢ်ပျဲၢ်ကီၢ်ဆၣ်တဆီဒီး မ့ၢ်သုးဖိတဖၣ်လၢကလဲၤ၀ဲဆူ ခ့ၣ်အဲၣ်ယူၣ် သုးက့(၅)တကပၤအဂ့ၢ်န့ၣ် သုးရ့ၣ်ခိၣ်တဂၤဃီအ၀ဲန့ၣ်စံး၀ဲန့ၣ်လီၤႉ သိလ့ၣ် ၂ ခိၣ်လၢ နီၣ်ဂံၢ်(၈)ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ် စုဒုၣ်တီၤအဖီလာ်(ခမရ=၄၀၈)ဟဲနီ၀ဲအံၤ သုးဖိနီၣ်ဂံၢ်ပၣ်၀ဲ ၅၀ ဂၤဒီး ခီဖျိသိလ့ၣ်တကျၢၢ်အဃိ ၦၤလၢအဘၣ်ဒိဘၣ်ထံးတဖၣ် တၢ်ဆှၢအ၀ဲသ့ၣ်ဆူလူၢ်ပျဲၢ်ဒီးဖၣ်အၣ်၀့ၢ်တကပၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ယတၢ်အိၣ်မူတၢ်ပၢၢ်ဆၢကၠိသရၣ်အတၢ်လဲၤခီဖျိ(၃)
ယတၢ်အိၣ်မူတၢ်ပၢၢ်ဆၢကၠိသရၣ်အတၢ်လဲၤခီဖျိ(၃) တံနိ(သ၀ီတါ) (တၢ်ကွဲးနီၣ်မၤဃါတၢ်ဂ့ၢ်ဘၣ်ဃးကညီဖိအတၢ်တူၢ်ဘၣ်ခီၣ်ဘၣ်တဖၣ်) ၂၀၀၃ နံၣ်ႇထ့ကူာ်လါလၢာ်သွ့ကီလါထီၣ်(လါအ့ဖြ့ၣ်)တၢ်ကိၢ်ခါႇသ့ၣ်လၣ်၀ၣ်လၣ်လီၤဒီး ထိၣ်မိၢ်ဧူၦ့ၤသယုၢ်အဆၢကတီၢ်ႉႉႉႉတနံၣ်ညါအံၤဖဲတၢ်ကိၢ်ခါကၠိပျၢ်ကသုၣ်တလါဘျဲၣ်ဆၢကတီၢ်ႇပသကိး(သရၣ်ဟ့ၣ်တၢ်သိၣ်လိယဲၢ်ဂၤ)လၢအမ့ၢ်၀ဲ ZOA ဒီး KED ၦၤဟ့ၣ်ကၠိသရၣ်တၢ်သိၣ်လိအသရၣ်တဖၣ်ဖဲပလဲၤဟ့ၣ်“တၢ်ကိၢ်ခါကၠိသရၣ်တၢ်သိၣ်လိ”လၢမဲၤခီၣ်ခါ(စလါ)ကညီဘၣ်ကီဘၣ်ခဲဒဲက၀ီၤအခါန့ၣ်ယထံၣ်လိာ်သ့ၣ်ညါဘၣ်ယဲဒီး“သရၣ်မုၣ်လ့လ့ၣ်ဖီ”ဖဲတၢ်မၤလိအဆၢကတီၢ်ခါန့ၣ်လီၤႉ သရၣ်မုၣ်လ့လ့ၣ်ဖီမ့ၢ်ၦၤစီၤမုၢ်ပျီသ၀ီဖိႇဒီးမ့ၢ်ကၠိသရၣ်မုၣ်သိၣ်လိတၢ်ဖဲသ့ၣ်နွဲၤခံသ၀ီႇမူကီၢ်ဆၣ်န့ၣ်လီၤႉ ဒ်အမ့ၢ်ၦၤစီၤမုၢ်ပျီဖိတဂၤအသိးႇမ့ၢ်ၦၤလၢအဒိထါသ့ဒီးအုၣ်ထါသ့အကလုာ်ကလုာ်န့ၣ်လီၤႉ ယမၤလိနၢ်ပၢၢ်အါထီၣ်ဘၣ်တၢ်ဒိကညီထါအဂ့ၢ်အကျိၤတဘျုးမံၤညါလၢအအိၣ်ႇလီၤဆီဒၣ်တၢ်မ့ၢ်လၢအ၀ဲတဲဘၣ်ယၤအဃိယသ့ၣ်ညါအါထီၣ်ဘၣ်=ထါလၢၢ်မုၢ်ခိၣ်(ထါက့ၣ်)ဟဲကဲထီၣ်သးဒ်လဲၣ်အဂ့ၢ်န့ၣ်လီၤႉ အ၀ဲမ့ၢ်ကၠိသရၣ်မုၣ်အိၣ်ဟဲလၢကီၢ်ပူၤကစၢၢ်ခိၣ်တဂၤႇဒီးယဲတခီယမ့ၢ်ၦၤပၢၤခိၣ်လၢအအဲၣ်ဒိးဃုသ့ၣ်ညါမၤနီၣ်မၤဃါဘၣ်သးတၢ်ဂ့ၢ်ဘၣ်ဃးကညီတၢ်ပၢၢ်ဆၢကၠိသရၣ်အိၣ်လၢကီၢ်ပူၤတဖၣ်အတၢ်အိၣ်မူတၢ်လဲၤခီဖျိအဂ့ၢ်ဒီးတၢ်ပၢၢ်ဆၢကၠိသရၣ်တဖၣ်အတၢ်အိၣ်သးအဂ့ၢ်န့ၣ်လီၤႉ လၢတၢ်န့ၣ်အဃိႇဖဲပဟ့ၣ်တၢ်သိၣ်လိမုၢ်ဆါခီအီၣ်မုၢ်ထူၣ်တၢ်အီၣ်၀ံၤအိၣ်ဘှံးအိၣ်သါအဆၢကတီၢ်န့ၣ်ႇယသံကွၢ်တၢ်ဂ့ၢ်တၢ်ကျိၤဒီးအ၀ဲတဲဘၣ်ယၤလၢအတၢ်လဲၤခီဖျိဘၣ်တၢ်ဂ့ၢ်တဖၣ်ဒ်အဖီလာ်အသိးအံၤလီၤ= “ယစးထီၣ်သိၣ်တၢ်လၢ ၁၉၇၃ နံၣ် ဖဲယကစၢ်သ၀ီႇစီၤမုၢ်ပျီန့ၣ်လီၤႉ ဖဲတၢ်တနံၣ်ဃီ၀ဲန့ၣ်ပယီၤသုးတဖၣ်ဟဲထီၣ်ဆူပလူၤသီကီၢ်ဆၣ်ဟီၣ်က၀ီၤပူၤႇဆီလီၤ၀ဲအသုးတၢ်လီၢ်တၢ်ကျဲဖဲလူၤသီႇဖီဒ့ဒီးဒူသ၀ီအိၣ်ဖဲန့ၣ်တဖၣ်အပူၤအဃိပအိၣ်က့ၤဖဲန့ၣ်တဘူၣ်လၢၤဘၣ်ဒီး ပဘၣ်ဃ့ၢ်ထီၣ်ကွံာ်ဆူတၢ်လီၢ်အဂၤလီၤႉ ပကၠိပကီၣ်တဖၣ်စ့ၢ်ကီးဘၣ်ဆိပတုာ်ကွံာ်အသးခဲလၢာ်လီၤႉ လၢခံန့ၣ်တၢ်အိၣ်သးဂ့ၤထီၣ်က့ၤတစဲးဘၣ်တစဲးဒီးပဒူသ၀ီကၠိတဖၣ်ပသူၣ်ထီၣ်ကဒါက့ၤအီၤအဃိ ယစးထီၣ်သိၣ်လိကဒီးက့ၤတၢ်ဖဲ ၁၉၈၂ နံၣ် တုၤ ၁၉၉၆ နံၣ်န့ၣ်လီၤႉ ဖဲ ၁၉၉၆ နံၣ်န့ၣ် ပယီၤသုးတဖၣ်မၤဆူၣ်ထီၣ်ကဒီးအတၢ်ဒုးတိာ်ကျဲၤလၢပဟီၣ်က၀ီၤပူၤအဃိပဘၣ်ဃ့ၢ်ထီၣ်ကဒီးအသီတဘျီလၢတၢ်ဒုးတၢ်ယၤလီၤႉ ဖဲန့ၣ်ပဒူသ၀ီပကၠိပကီၣ်တဖၣ်ဘၣ်ဟးဂီၤကဒီး၀ဲအသီတဘျီန့ၣ်လီၤႉ ဖဲပဃ့ၢ်ထီၣ်လၢပသ၀ီအခါပယီၤသုးတဖၣ်လူၤဘျီခးၦၤတတီၤဘၣ်တတီၤႇပဃ့ၢ်စိာ်က့ၤပတၢ်ဖိတၢ်လံၤတဖၣ်တန့ၢ်ခဲလၢာ်လၢၤဘၣ်ႉ လၢခံကတၢၢ်ပတၢ်ဖိတၢ်လံၤတဖၣ်တအိၣ်က့ၤဒီးၦၤနီတမံၤလၢၤစ့ၢ်ကီးဘၣ်ႉ ဖဲယလဲၤဃ့ၢ်အိၣ်ဖဲသဲးခံသ၀ီအခါယပၢ်သးၦၢ်လၢအသးအိၣ်(၈၅)နံၣ်တဂၤန့ၣ်မ့ၢ်လၢအသးၦၢ်ဒီးဟးဃ့ၢ်ပိာ်ပခံလၢန့ၣ်လၢအံၤတကဲလၢၤဘၣ်အဃိပသးကညီၤဘၣ်အီၤဒီးပက့ၤပာ်အိၣ်ဘှံးအိၣ်သါအီၤလၢပဟံၣ်အိၣ်လၢသ၀ီပူၤန့ၣ်လီၤႉ ဖဲန့ၣ်ခါပယီၤသုးတဖၣ်ဟး၀့ၢ်၀ီၤဟဲဘူးထီၣ်ဒီးၦၤအဃိ ပက့ၤကွၢ်ထွဲပပၢ်လၢသ၀ီပူၤတဘူၣ်လၢၤဘၣ်ႉ ယပၢ်န့ၣ်အိၣ်လၢဟံၣ်မၤကဲၤမ့ၣ်အူဧီၣ်တကဲၤႇဖီအီၣ်မ့ၤဧီၣ်တန့ၢ်ႇတအီၣ်ဘၣ်မ့ၤလၢၤဘၣ်အဃိ ဘၣ်လီၤ၀ံၤသံကွံာ်၀ဲလၢမ့ၤလၢဟံၣ်ပူၤထဲတဂၤဧိၤန့ၣ်လီၤႉ ယပၢ်သံ၀ံၤလွံၢ်သီမးဒုၣ်ဒါပယီၤသုးတဖၣ်က့ၤယံၤထီၣ်ဒီးၦၤတစဲးအဃိပက့ၤခူၣ်လီၤမၤဂ့ၤဘၣ်က့ၤယပၢ်အစိၣ်န့ၣ်လီၤႉ ဖဲပဘၣ်စံၣ်ပယီၤလၢသဲးခံသ၀ီအခါန့ၣ် မ့ၢ်လၢပဘၣ်စံၣ်ဘၣ်ဟးခဲအံၤခဲအံၤတလီၢ်လီၢ်ဒီး ခီဖျိကသံၣ်ကသီတအိၣ်ဘၣ်အဃိယမိသးၦၢ်ဒီးယဖိမုၣ်သဒါစ့ၢ်ကီးဘၣ်သံကွံာ်၀ဲလၢၦၢ်ပူၤဖှီၣ်ဖှီၣ်ယာ်ယာ်လၢတၢ်ညၣ်ဂိၢ်ဆိက့အဃိလီၤႉ ခဲအံၤယဖိအိၣ်တ့ၢ်က့ၤဒၣ်ထဲခံဂၤလီၤႉ စးထီၣ်ကဒီးဖဲ ၂၀၀၀ နံၣ်န့ၣ်ၦၤကိးကဒီးယၤလၢသ့ၣ်နွဲၤခံသ၀ီအဃိ ယဘၣ်လဲၤသိၣ်လိကဒီးတၢ်ဖဲန့ၣ်တုၤခဲအံၤန့ၢ်သၢနံၣ်လံလီၤႉ ယဟဲတုၤဖဲသ့ၣ်နွဲၤခံန့ၣ်ယဘၣ်ခီဖျိကဒီးပယီၤသုးတဖၣ်အတၢ်ဟဲထီၣ်မၤကိၢ်မၤဂီၤၦၤန့ၣ်လီၤႉ ဖဲ ၂၀၀၀ နံၣ် တၢ်ကိၢ်ခါလါမးရှ်အခါန့ၣ် ပယီၤသုးတဖၣ်ဟဲထီၣ်ခးပသ၀ီအဃိယၦၤကၠိဖိဘၣ်ဒိသံကွံာ်၀ဲခံဂၤလီၤႉ မၤကဒီး ဖဲ ၂၀၀၂ နံၣ် လါအ့ဖြ့ၣ်(၃)သီအနံၤန့ၣ် နအဖ အသုးရ့ၣ်နီၣ်ဂံၢ်(၃၅၁)ဟဲထီၣ်ဒွဲၣ်အူကွံာ်၀ဲ ပသ၀ီဃုာ်ဒီးပကၠိလၢာ်စီဖ့ကရ့န့ၣ်လီၤႉ ပ၀ဲလၢအမ့ၢ်သ၀ီဖိတဖၣ်ပဃ့ၢ်ပီပူၤက့ၤဒၣ်ထဲပနီၢ်ကစၢ်တဂၤနံၣ်တကူာ်ဆ့တဘ့ၣ်လၢပလိၤန့ၣ်လီၤႉ...
အံတူၢ်ထၣ်လီၢ်က၀ီၤဖိ ၂ႇ၀၀၀ ဘျဲၣ်လၢအလဲၤဃ့ၢ်ထီၣ်ဆူကီၢ်ကၠီၣ်တဲၣ်တဖၣ် တၢ်က့ၤဆှၢကဒါ
လါမးရှး ၂၉ သီႇ ၂၀၂၁ နံၣ်ႇ ခ့ၣ်အဲးစံၣ် ခီဖျိလၢသုးမီၤစိရိၤအသုးဟဲခးလီၤတၢ်ဒီးကဘီယူၤအဃိ ဖဲမဟါ(လါမးရှး ၂၈)သီ မုၢ်ထူၣ်အဆၢကတီၢ် အံတူၢ်ထၣ်လီၢ်က၀ီၤဖိ ၂ႇ၀၀၉ ဂၤလၢအလဲၤဃ့ၢ်ဆူကီၢ်ကၠီၣ်တဲၣ်ပူၤတဖၣ် ဖဲတနံၤအံၤဟါခီ ၅ နၣ်ရံၣ်တခီအဆၢကတီၢ် ကီၢ်ကၠီၣ်တဲၣ်ၦၤဘၣ်မူဘၣ်ဒါတဖၣ်က့ၤဆှၢကဒါ၀ဲလၢအလီၢ်ကျဲလံအဂ့ၢ်န့ၣ် လီၢ်က၀ီၤၦၤဟ့ၣ်တၢ်ကစီၣ်ဖိတဖၣ် စံးဘၣ်ခ့ၣ်အဲးစံၣ်န့ၣ်လီၤႉ အံတူၢ်ထၣ်လီၢ်က၀ီၤၦၤဃ့ၢ်တၢ်ဒုးဖိလၢတၢ်က့ၤဆှၢ၀ဲတဖၣ်အံၤ ခီဖျိက့ၤကဒါလၢအ၀ဲသ့ၣ်အဟံၣ်အဃီ တဘူၣ်ဒံးဘၣ်အဃိ တကီၢ်ခါခဲအံၤလဲၤဃ့ၢ်အိၣ်ခူသူၣ်၀ဲလၢကစၢၢ်ခိၣ်ကလိကျါအဂ့ၢ်န့ၣ် သ့ၣ်ညါဘၣ်န့ၣ်လီၤႉ ခီဖျိတၢ်ကစီၣ်ဟူထီၣ်လၢသုးမီၤစိရိၤအသုးကဟဲခးတၢ်ဒီးကဘီယူၤအဃိ မဲၢ်နုာ်ထၣ်ႇဃိၣ်က့ၣ်ႇအံတူၢ်ထၣ်ဒူသ၀ီလီၢ်က၀ီၤဖိတဖၣ်ဒီး လီၢ်က၀ီၤဖိလၢအအိၣ်ဖဲဃိၣ်လိာ်ကျိကၢၢ်နံၤအကပိၤကပၤပာ်ဖှိၣ်ခဲလၢာ်အဂၤ ၃ႇ၀၀၀ ဘျဲၣ် လဲၤဃ့ၢ်ထီၣ်၀ဲဆူကီၢ်ကၠီၣ်တဲၣ်တကပၤန့ၣ်လီၤႉ
သုးမီၤစိရိၤအသုးဟဲခးကဒီး၀ဲ သုးက့ ၅ ဟီၣ်က၀ီၤ ဒ့ၣ်ပူၤနိၣ်သ၀ီ တၢ်ဘၣ်ဒိၣ်ထံးအိၣ်
လါမးရှး ၂၉ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲမဟါ လါမးရှး ၂၈ သီ မုၢ်နၤခီအဆၢကတီၢ် သုးမီၤစိရိၤအသုးကဘီယူၤဟဲခးကဒီး သုးက့ ၅ ဟီၣ်က၀ီၤ ဒ့ၣ်ပူၤနိၣ်သ၀ီဒီး ဖဲန့ၣ်တၢ်ဘၣ်ဒိဘၣ်ထံးတၢ်ဟးဂုၤဟးဂီၤအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲမဟါ ၁၁ နၣ်ရံၣ် ၄၀ မံးနံး တုၤလၢ ဂီၤခီ ၃ နၣ်ရံၣ်တခီအဆၢကတီၢ် သုးမီၤစိရိၤအသုးဟဲခးလီၤတၢ်အိၣ်၀ဲ ၃ ဘျီညါဒီး ဖဲန့ၣ်ဟံၣ်ဃီတနီၤမ့ၣ်အူအီၣ်ဟးဂီၤကွံာ်၀ဲအသိး သ၀ီဖိတဂၤဘၣ်ဒိဘၣ်ထံး၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲလါမးရှး ၂၇ သီ ဂီၤခီအဆၢကတီၢ် KNU သုးက့ ၅ ထီၣ်ဒုးဟံးန့ၢ်ကွံာ် သုးမီၤစိရိၤအသုးကလၢၤလၢအအိၣ်ဆီလီၤသးဖဲဃိၣ်လိာ်ကျိကၢၢ်နံၤသံမုၢ်ထၣ်တၢ်လီၢ်၀ံၤအလီၢ်ခံ သုးမီၤစိရိၤအသုးဟဲခးတၢ်ဒီးကဘီယူၤဟဲကဲထီၣ်အသးန့ၣ်လီၤႉ ဖဲအပူၤကွံာ် လါမးရှး ၂၇ သီ ဟါခီ ၇ နၣ်ရံၣ် တုၤလၢ ဂီၤခီ ၂ နၣ်ရံၣ်အဆၢကတီၢ် ခီဖျိမီၤစိရိၤအသုးဟဲခး မုၢ်တြီၢ်ကီၢ်ရ့ၣ် သုးက့ ၅ သုး၀ဲၤလီၢ်ခိၣ်သ့ၣ်ဒီးကဘီယူၤ ၂ ဘ့ၣ်အဃိ သ၀ီဖိသံ၀ဲ ၃...