တၢ်မၤလၤကပီၤဝဲ(BMWEC)ပှဲၤထီၣ်(၂၅)နံၣ်ပှဲၤယူဘလံၣ်
လါယူၤ ၉ သီ, ၂၀၂၆နံၣ်, ခ့ၣ်အဲးစံၣ်, ကီၢ်ကၠီၣ်တဲၣ်ကီၢ်ပယီၤကီၢ်ဆၢမဲၢ်ဆီးဝ့ၢ်တၢ်လီၢ်တတီၤအပူၤတနံၣ်အံၤလါယူၤ(၉)သီအနံၤအပူၤတၢ်မၤလၤကပီၤဝဲကီၢ်ပယီၤခီကီၢ်ကူၣ်သ့ကမံးတံၥ်(Burmese Migrant Education Committee (BMWEC) ပှဲၤထီၣ်(၂၅)နံၣ်ယူဘလံၣ်အဂ့ၢ်,သ့ၣ်ညါဘၣ်န့ၣ်လီၤ. (၂၅)နံၣ်ယူဘလံၣ်စ့အတၢ်ရဲၣ်တၢ်ကျဲၤကဲထီၣ်လိၣ်ထီၣ်ဝဲဒီးတၢ်ဟဲပၣ်ဃုၥ်ပၣ်ဂီၢ်မၤကပီၤဝဲအါအါဂီၢ်ဂီၢ်အဖီခိၣ်,ပှၤဒုးအိၣ်ထီၣ်ကီၢ်ပယီၤခီကီၢ်ကူၣ်သ့ကမံးတံၥ်(BMWEC)နီၢ်ဖီရ့ၣ်စံးဝဲဒၣ်လၢ “တနံၤအံၤလၢယဂီၢ်မ့ၢ်တၢ်ပၥ်ကဖၢလၢသးဒီးတၢ်သးခုလီၤ.ဘၣ်မနုၤလဲၣ်(၂၅)နံၣ်အတီၢ်ပူၤပဘၣ်လဲၤခီဖျိတ့ၢ်တၢ်ကီကီခဲအသိး,တုၤခဲအံၤသနၥ်က့ပဘၣ်လဲၤခီဖျိတၢ်ကီကီခဲခဲလီၤ.ပကတုၤဆူ(၂၅)နံၣ်တမ့ၢ်တၢ်လၢအညီဘၣ်.ဒီးတနံၤအံၤပသးခုစ့ၢ်ကီးလၢပှၤဟဲအါအါဂီၢ်ဂီၢ်ဒီးပထံၣ်ဘၣ်စ့ၢ်ကီးပဖိပလံၤတဖၣ်ဟဲက့ၤဟးအိၣ်သကိးပှၤပၣ်ဃုၥ်ပၣ်ဂီၢ်လၢတၢ်ရဲၣ်တၢ်ကျဲၤအံၤန့ၣ်လီၤ”အဂ့ၢ်စံးဝဲန့ၣ်လီၤ. လၢန့ၣ်အမဲၥ်ညါ,(၂၅)နံၣ်တၢ်လဲၤခီဖျိအပူၤသဂၢၢ်ဘၣ်ဝဲတၢ်ကီတၢ်ခဲအါမံၤဘၣ်ဆၣ်သးခုစံးဘျူးဘၣ်ဝဲခီကီၢ်ကူၣ်သ့ပှၤမၤသကိးတၢ်ဒီးကၠိသရၣ်သရၣ်မုၣ်လၢအတူၢ်ဆါသးတဖၣ်ကိးဂၤဒဲးအဂ့ၢ်,အဝဲစံးဝဲဒၣ်န့ၣ်လီၤ. တၢ်ဟဲထီၣ်မၤလၤကပီၤဘၣ်ဝဲ(၂၅)နံၣ်ပှဲၤထီၣ်(BMWEC)ယူဘလံၣ်စ့တၢ်ရဲၣ်တၢ်ကျဲၤအဃိဘၣ်ကဖၢလၢဘၣ်ဝဲအသးအဂ့ၢ်,(BMWEC)နဲၣ်ရွဲၣ်ပှၤမၤသကိးတၢ်လီၢ်လံၤစီၤန့ၤအူစံးဝဲန့ၣ်လီၤ. (BMWEC)ကရူၢ်ကရၢအံၤခါဆူညါကလဲၤထီၣ်လဲၤထီအါန့ၢ်ဒံးဝဲအလီၢ်အဂီၢ်ဆၢဂ့ၤဆၢဝါစံးဝဲဒ်အံၤစ့ၢ်ကီးန့ၣ်လီၤ. “တၢ်ကွဲမုၥ်ပှၤအဃိပသးခုဒိၣ်မးလီၤ.ပက့ၤကွၢ်ကဒါလၢအပူၤကွံၥ်န့ၣ်တၢ်ကီတၢ်ခဲအိၣ်အါမံၤဘၣ်ဆၣ်,ပထံၣ်ဘၣ်လၢတဆီတဆီတၢ်လဲၤထီၣ်လဲၤထီၣ်အိၣ်ဝဲတယူၥ်ဃီလီၤ.အဃိပနၥ်လၢကရူၢ်ကရၢဝဲအံၤခါဆူညါန့ၣ်ကရူၢ်ကရၢဝဲအံၤကလဲၤထီၣ်လီၤထီအါန့ၢ်ဒံးအလီၢ်န့ၣ်လီၤ.”အဂ့ၢ်စံးဝဲန့ၣ်လီၤ. (၂၅)နံၣ်ပှဲၤထီၣ်(BMWEC)ယူဘလံၣ်စ့တၢ်ရဲၣ်တၢ်ကျဲၤအပူၤကၠီၣ်တဲၣ်ဖၠၣ်စိမိၤခိၣ်နၢ်ဒိၣ်ထီၣ်တဖၣ်ကတိၤဟ့ၣ်ဂံၢ်ဟ့ၣ်လီၤတၢ်ဒီ,တၢ်ဟ့ၣ်လီၤစ့ၢ်ကီးဝဲတၢ်လၤကပီၤလံၥ်အုၣ်သးတဖၣ်ဆူခိၣ်နၢ်ဒိၣ်ထီဒီးကၠိသရၣ်သရၣ်မုၣ်လၢဟ့ၣ်လီၤသးလၢခီကီၢ်တၢ်ကူၣ်ဘၣ်ကူၣ်သ့တဖၣ်အမဲၥ်ညါ,အိၣ်စ့ၢ်ကီးဝဲဒီးခီကီၢ်ကၠိဖိတဖၣ်တၢ်ဒုးနဲၣ်တၢ်ဒ့တၢ်အူ,တၢ်ဂဲၤကလံၣ်သ့ၣ်တဖၣ်န့ၣ်လီၤ. ဒ်န့ၣ်အသိး,တၢ်ရဲၣ်အတၢ်ကျဲၤဘျီဝဲအံၤအပူၤကၠီၣ်တဲၣ်(ChaingMai University),(Rajamagala University of Techology lanna) (Lampang Rajabphat University),(Myanmar Creative University)ဖၠၣ်စိမိၤခိၣ်နၢ်ဒိၣ်ထီတဖၣ်ဟဲထီၣ်ပၥ်ဃုၥ်ပၣ်ဂီၢ်ဝဲအမဲၥ်ညါ,(BMWEC)အစုတီၤဖီလၥ်ကၠိတဖၣ်,ကူၣ်သ့ပှၤမၤသကိးတၢ်ကရူၢ်ကရၢတဖၣ်,ဒီးခီကီၢ်ကၠိဖိလၢဖျိထီၣ်ဝဲဖၠၣ်စိမိၤကၠိတဖၣ်ဟဲထီၣ်မၤလၤကပီၤပၣ်ဃုၥ်ပၣ်ဂီၢ်ဝဲဒၣ်ဒီးပှၤနီၢ်ဂံၢ်ခဲလၢၥ်အိၣ်ဝဲ(၄၀၀)ဘျဲၣ်ဃၣ်ဃၣ်အဂ့ၢ်,သ့ၣ်ညါဘၣ်န့ၣ်လီၤ. ကီၢ်ပယီၤခီကီၢ်ကူၣ်သ့ကမံးတံၥ်(Burmese Migrant Education Committee အံၤတၢ်ဒုးအိၣ်ထီၣ်ဝဲဒၣ်ဖဲ (၂၀၀၀)နံၣ်အပူၤဒီးဘၣ်တၢ်တီခိၣ်ရိၢ်မဲဒုးအိၣ်ထီၣ်တ့ၢ်ဝဲဒၣ်လၢကီၢ်ကၠီၣ်တဲၣ်ကီၢ်ပယီၤကီၢ်ဆၢပှၤဟူးဂဲၤလၢဖိဒံဖိသၣ်ဂ့ၢ်ဝီခွဲးယၥ်ဒီးဖိဒံဖိသၣ်ဆူၣ်ချ့ဂ့ၢ်ဝီခွဲးယၥ်ဒ်အမ့ၢ်ဒီးကထၢၣ်စ့ၣ်သံၣ်ယၣ်မီၤဒီးသရၣ်မုၣ်နီၢ်ဖီရ့ၣ်သ့ၣ်တဖၣ်အဂ့ၢ်သ့ၣ်ညါဘၣ်န့ၣ်လီၤ. ဒီး(BMWEC)ကရူၢ်ကရၢအံၤဟူးဂဲၤဝဲဒၣ်လၢကီၢ်ကၠီၣ်တဲၣ်ကီၢ်ပယီၤကီၢ်ဆၢခီကီၢ်ကၠိဖိတဖၣ်တၢ်ကူၣ်ဘၣ်ကူၣ်သ့အတၢ်လိၣ်ဘၣ်နီၢ်နီၢ်အဂီၢ်အဂ့ၢ်,သ့ၣ်ညါဘၣ်န့ၣ်လီၤ.
ပှၤကၠိဖိလၢလဲၤစဲးလီၤမံၤလၢဝ့ၢ်ပူၤတဖၣ်ကသုးဘၣ်လီၢ်ဆူဝ့ၢ်ပူၤအဂ့ၢ် လီလိဖီၣ်စုကဝဲၤကရူၢ်ထုးထီၣ်လံၥ်အဖီခိၣ် တၢ်ပဲၥ်ထံနီၤဖးအိၣ်ထီၣ်
လါယူၤ ၈ သီ, ၂၀၂၆ နံၣ်, ခ့ၣ်အဲးစံၣ် လၢတနီသရံၣ်ကီၢ်ခီဒိၣ် ဘျံးဒဝဲၢ် တနီသရံၣ်ကီၢ်ဆၣ်အပူၤ ပှၤကၠိဖိဃုၥ်ဒီးကၠိဖိမၢ်ပၢ်လၢအလဲၤစဲးလီၤကၠိမံၤလၢဝ့ၢ်ပူၤတဖၣ် လၢတၢ်ဘံၣ်တၢ်ဘၢအဖီခိၣ် ကသုးလီၢ်သုးကျဲလဲၤအိၣ်က့ၤလၢဝ့ၢ်ပူၤအဂ့ၢ်န့ၣ် လီလိဟီၣ်ကဝီၤဖီၣ်စုကဝဲၤဒီးကူၣ်သ့ကရူၢ်ထုးထီၣ် လံၥ်တၢ်ပၥ်ဖျါအဖီခိၣ် တၢ်ပဲၥ်ထံနီၤဖးအိၣ်ထီၣ်ဝဲဒၣ်န့ၣ်လီၤ. သုးကရူၢ်လၢအဟံတၢ်ဒီသဒၢလၢသိလ့ၣ်တီၣ်ဆှၢပှၤကၠိဖိတဖၣ်အံၤဒီးတၢ်ပၢၢ်ဆၢသုးကရူၢ် အဘၢၣ်စၢၤတၢ်ဒုးကဲထီၣ်သ့အဃိ ပှၤကၠိဖိဒီးကၠိဖိမိၢ်ပၢ်လၢအလဲၤဆဲးလီၤကၠိမံၤလၢဝ့ၢ်ပူၤတဖၣ်အံၤကလဲၤအိၣ်သုးလီၢ်သုးကျဲဆူ ဝ့ၢ်ပူၤအဂ့ၢ်န့ၣ် လီလိ (ပကဖ,ပအဖ,ပလဖ)ဖီၣ်စုကဝဲၤကရူၢ်ဒီး လီလိကူၣ်သ့ကရူၢ်တဖၣ်ထုးထီၣ်လံၥ်တၢ်ပၥ်ဖျါအံၤ ဖဲလါယူၤ ၆ သီအနံၤ န့ၣ်လီၤ. ဖီၣ်စုကဝဲၤအတၢ်လံၥ်တၢ်ပၥ်ဖျါအံၤ မ့ၢ်တၢ်ြတီဝဲကူၣ်သ့တၢ်ခွဲးတၢ်ယၥ်ဒီး ဂံၢ်ခီၣ်ထံးပှၤဂ့ၢ်ဝီခွဲးယၥ်တဖၣ်အသိး လီၢ်ကဝီၤကမျၢၢ် တဖၣ်ကပၥ်တ့ၢ်ကွံၥ်အဟံၣ်အဃီ,အတၣ်ဖံးတၢ်မၤဝံၤကလဲၤသုးလီၢ်သုးကျဲဆူဝ့ၢ်ပူၤအံၤတမ့ၢ်တၢ်လၢအညီဝဲဘၣ် အဂ့ၢ်န့ၣ် တၢ်ပဲၥ်ထံနီၤဖးစံးဝဲန့ၣ်လီၤ. “တမ့ၢ်လၢတၢ်ဒုးကဲထီၣ်ကိးမုၢ်နံၤဒဲးဘၣ်.တၢ်ဒုးမ့ကဲထီၣ်န့ၣ်မတၤတဂၤမးတလဲၤထီၣ်ကၠိဘၣ်.အခဲအံၤအတၢ်လဲၤသးဒ်သိး ပှၤကၠိဖိလၢလဲၤအိၣ်ကၠိ လၢဝ့ၢ်ပူၤတဖၣ်ကဘၣ်လဲၤအိၣ်လၢဝ့ၢ်ပူၤ.ဖဲသုးဟံန့ၢ်တၢ်စိတၢ်ကမီၤအတီၢ်ပူၤအံၤပှၤဒံၣ်ပှၤဖိတအိၣ်ဘၣ် ကၠိဘၣ်အိၣ်ဒီဒူၣ်.ဖဲန့ၣ်(CDM)သရၣ်/မုၣ်အဒံၣ်အဖိပၣ်ဃုၥ်စ့ၢ်ကီးလီၤ.ဝဲဒၣ်တၢ်သ့ၣ်တဖၣ်အံၤပထံၣ်လၢအလုၢ်သ့ၣ်ခါပတၥ်ဝဲပှၤဂ့ၢ်ဝီခွဲးယၥ်လီၤ”အဂ့ၢ်န့ၣ် လီလိ ကမျၢၢ်ပိၥ်မုၣ်လၢအဟူးဂဲၤလၢကူၣ်သ့တကပၤတဂၤ စံးဝဲန့ၣ်လီၤ. ဘၣ်ဃးတၢ်ဂ့ၢ်အံၤအဝဲသ့ၣ်တကပၤတမ့ၢ်အတြီဃၥ်ဝဲတၢ်ဖံးလိမၤဒိးတၢ်ခွဲးတၢ်ယၥ်ဘၣ်ဒီး မ့မ့ၢ်တခီဖဲခံခီခံကပၤတၢ်ဒုး အပူၤ ဘၣ်ယိၣ်ဝဲလၢပှၤကၠိဖိတၢ်ဘၣ်ဒိဘၣ်ထံးအဂီၢ်လီၤအဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ. တကးဒံးဘၣ်လၢန့ၣ်အမဲၥ်ညါ ဟီၣ်ကဝီၤအပူၤဖဲဒုးယၤတၢ်ဖ့ၣ်စၢကဲထီၣ်အတီၢ်ပူၤသုးကရူၢ်အံၤသူကမျၢၢ်ဒ်တၢ်ဒီသဒၢအသိးအိၣ်ဝဲအဂ့ၢ်န့ၣ် ဖီၣ်စုကဝဲၤကရူၢ် တဖၣ်စ့ၢ်ကီးစံးဝဲန့ၣ်လီၤ. ဘျံးဒဝဲၢ်ကီၢ်ရ့ၣ် နီၣ်ဂံၢ်(၈၀၀၃)သုးရ့ၣ် တၢ်ဘိးဘၣ်ရၤလီၤပှၤဘၣ်မူဘၣ်ဒါတဂၤစံးဝဲလၢ “ကၠိတဖျၢၣ်ဂ့ၤတဖျၢၣ်ဂ့ၤ ပးသးကအိၣ် လၢကတြီဃၥ်ပှၤကၠိဖိလၢကမၤလိမၤဒိးတၢ်န့ၣ်တအိၣ်ဘၣ်.တၢ်သ့ၣ်တဖၣ်အံၤလၢပှၤကၠိဖိကပူၤဖျဲးဒီးတၢ်လီၤဘၣ်ယိၣ်အဂီၢ်လီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ်န့ၣ်လီၤ. တကီၢ်ခါခဲအံၤ ပယီၤသုးကျိၤနုၥ်လီၤဟူးဂဲၤလၢတနီသရံၣ်ကီၢ်ဆၣ်ဒူသဝီသ့ၣ်တဖၣ်အပူၤဒီး ဖီၣ်ဝဲကမျၢၢ်သူဝဲဒ်တၢ်ဒီသဒၢစုကဝဲၤ တခါ အသိးဝံၤပျၢ်လီၤကဒါဝဲအိၣ်အသိး အပူၤကွံၥ်လၢညါခါစ့ၢ်ကီးတၢ်ကဲထီၣ်သးဒ်အံၤအိၣ်ဝဲအဂ့ၢ်န့ၣ် လီၢ်ကဝီၤကမျၢၢ်စံးဝဲအသိး သ့ၣ်ညါဘၣ်န့ၣ်လီၤ. ဒ်န့ၣ်အသိးဘၣ်ဃးလံၥ်တၢ်ပၥ်ဖျါအံၤ ဒ်ဒံၣ်မိၣ်ခြ့ၣ်စံၣ်ကူၣ်သ့အဂံၢ်ခီၣ်ထံးတၢ်ပၥ်လီၤအိၣ်ဝဲအသိးန့ၣ်...
ကကၠီးလိခးလိကျိဖးဒိၣ်လၢဖၣ်အၣ် ဃိၣ်လိၥ်ကျိပူၤအဂ့ၢ် သုးကရူၢ်ထုးထီၣ်ဒုးသ့ၣ်ညါဝဲ
လါယူၤ ၈ သီ, ၂၀၂၆ နံၣ်, ခ့ၣ်အဲးစံၣ် လၢကဟဲလါယူၤ ၁၀ သီအနံၤန့ၣ် လၢကကညီကီၢ်စဲၣ် ဖၣ်အၣ်ဃ့ၢ်ဃၢၤ ဃိၣ်လိၥ်ကျိအပူၤတၢ်ရဲၣ်တၢ်ကျဲၤအိၣ်လၢ ကကၠီးလိခးကျိဖးဒိၣ်အဃိ လီၢ်ကဝီၤကမျၢၢ်ကအိၣ်ဒီးတၢ်ပလီၢ်ပဒီအဂ့ၢ်န့ၣ် သုးကရူၢ်ထုးထီၣ်လံၥ်နဲၣ်လီၤဒုးသ့ၣ်ညါဝဲန့ၣ်လီၤ. ဒ်လံၥ်တၢ်နဲၣ်လီၤပူၤအသိးန့ၣ် (မောရ၀တီရေတပ်စခန်းဌာနချုပ်)မီယၣ်ဝတံၤထံသုးဝဲၤလီၢ်ခိၣ်သ့ၣ် နီၣ်ဂံၢ်(၄၆) ဃိၣ်လိၥ်ကျိ သုးကဘီထံ(၃၀၃) ကမၤဝဲတၢ်ကၠီးလိခးကျိဖးဒိၣ်အဃိ ကီၢ်ဆၣ်ပၢြပးကရူၢ်ဘၣ်ထွဲတဖၣ်ကနဲၣ်လီၤက့ၤတၢ်ကလုၢ်ဆူ ဒူသဝီ, ကဝီၤဒ့သးပှၢ်လၢကဒုးသ့ၣ်ညါလီၤက့ၤကမျၢၢ်တဖၣ် န့ၣ်လီၤ. တၢ်ခးလိ(ကၠီးလိ)ကျိဘျီဝဲအံၤ တၢ်ကမၤအီၤလၢကီၣ်လဲၣ်(ကော့လှိုက်)ကီးအဃၢၤဒီး လၢတၢ်န့ၣ်အဃိလၢတၢ်ကမၤဝဲတၢ်လီၢ်အံၤ အခိၣ် အဃၢၤ (၃)မံးလးဝးဝးတရံးန့ၣ် ကဘီလၢအဖီၣ်ညၣ်,ချံသ့ၣ်တဖၣ်တဘၣ်လ့ၢ်လိၤဟးထီၣ်က့ၤလီၤဘၣ်အဂ့ၢ်န့ၣ် ဟ့ၣ်ပလီၢ်ဝဲန့ၣ် လီၤ. လၢတၢ်န့ၣ်အဃိ ကီၣ်လဲၣ်(ကော့လှိုက်),ကီၣ်ကိ(ကော့ဂွန်း) ဃုၥ်ဒီးဒူသဝီကမျၢၢ်လၢအိၣ်ကီးအံၤတခီတဝၢ်ဝၢ် ခံကပၤလၢၤအံၤန့ၣ် သဝီသးပှၢ်ဟးဒုးသ့ၣ်ညါလီၤဝဲဘၣ်ဃးတၢ်ဂ့ၢ်အံၤအိၣ်ဝဲအဂ့ၢ်န့ၣ် လီၢ်ကဝီၤကမျၢၢ်ပိၥ်မုၣ်လၢအိၣ်ဖဲန့ၣ်တဂၤ စံးဘၣ်ခ့ၣ်အဲးစံၣ် -ကညီတၢ်ကစီၣ်န့ၣ်လီၤ. “ဒူသဝီပှၤသူၣ်သ့သးပှၢ်ဟးတဲဟ့ၣ်ပလီၢ်ပှၤကမျၢၢ်အိၣ်မီၤ လၢသဝီပူၤန့ၣ်လၢချံတဘၣ်လဲၤဘၣ်ဒ်န့ၣ်. ခဲအံၤလၢဃိၣ်လိၥ်ကျိပူၤန့ၣ် ပယီၤသုးအချံစဲးဒီးကဘီတဖၣ်န့ၣ်ပထံၣ်အိၣ်မၢ်မၢ်လီၤမီၤ”အဂ့ၢ်န့ၣ် စံးဝဲန့ၣ်လီၤ. သုးကရူၢ်အံၤ အပူၤကွံၥ်ဘၣ်ဃးတၢ်ခးလိ(ကၠီးလိ)ကျိဖးဒိၣ်လၢဃိၣ်လိၥ်ကျိပူၤအံၤအိၣ်ဝဲဘၣ်ဆၣ် အပူၤကွံၥ်န့ၣ်ကၠီးလိဝဲလၢ ဖၣ်အၣ်ဝ့ၢ်ဆၢခိၣ် မံၣ်ကယ့ၤ(မိကရင်) ဒီး မံၣ်စၤကီး(မိဇံကျွန်း)အခိၣ်အဃၢၤဒီး ခဲအံၤန့ၣ်က့ၤမၤကဒါဝဲလၢဖၣ်အၣ်ဝ့ၢ်ဆၢလၥ် တကပၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ကဟံးထီၣ်ဖီၣ်ထီၣ်အိၤလဲတၢ်လံၣ်အီၣ်လီအီၣ်ဒီးတၢ်ခူၣ်လၥ်ပနံၥ်တၢ်ဂ့ၢ်ကီတဖၣ်အဂီၢ်,ကီၢ်သူလ့ၤတၢ်တီတၢ်တြၢ်ပျဲၢ်စီၢ်အပူၤတၢ်အၢၣ်လီၤတူၢ်လိၥ်
လါယူၤ ၇သီ, ၂၀၂၆နံၣ်, ခ့ၣ်အဲးစံၣ်, ကဟံးထီၣ်ထီၣ်ဖီၣ်ထီၣ်ကလံၤကျါတၢ်လံၣ်အီၣ်လီအီၣ်ဒီးတၢ်ခူၣ်လၥ်ပနံၥ်စၢၢ်ထးအတၢ်ဂ့ၢ်ကီတဖၣ်အဂီၢ်,အဆိကတၢၢ်ကီၢ်သူလ့ၤတၢ်တီတၢ်တြၢ်ပျဲၢ်စီၢ်ခိၣ်တၢ်တၢၣ်ပီၣ်တဲသကိးအတၢ်ရဲၣ်တၢ်ကျဲၤအပူၤတၢ်ကတိၤပၣ်ဃုၥ်ဝဲအဂ့ၢ်,သ့ၣ်ညါဘၣ်န့ၣ်လီၤ. ကီၢ်သူလ့ၤတၢ်တီတၢ်တြၢ်ပျဲၢ်စီၣ်အံၤတၢ်မၤဝဲဖဲလါယူၤ(၁)သီတုၤလၢ(၃)သီအနံၤပူၤဒီးအတၢ်ပညိၣ်မ့ၢ်ဝဲဒ်သိးတၢ်ကမၤဆူၣ်ထီၣ်တၢ်တီတၢ်တြၢ်ဒီးသဲးစးတၢ်ဒိၣ်စိလၢကီၢ်သူလ့ၤဟီၣ်ကဝီၤအပူၤဒီး,တၢ်ကမၤဂ့ၤထီၣ်ဝဲပၥ်ဖှိၣ်မၤသကိးတၢ်လၢပှၤဘၣ်မူဘၣ်ဒါသ့ၣ်တဖၣ်အသိးအကျါဒီးကထုးထီၣ်တၢ်မၤကျဲလၢတၢ်ကဘှါလီၤတၢ်ဂ့ၢ်ကီတဖၣ်လၢဘၣ်တၢ်စူးကါအီၤသ့နီၢ်ကီၢ်လၢကမျၢၢ်အကျါအဂီၢ်အဂ့ၢ်,ခ့ၣ်အဲၣ်ယူၣ်ပၥ်ဖျါဝဲဒၣ်ဖဲမဟါလါယူၤ(၆)သီအနံၤန့ၣ်လီၤ. ဒီးပျဲၢ်စီၣ်ခိၣ်အပူၤတၢ်မၤဝဲတၢ်တၢၣ်ပီၣ်တဲသကိးဝဲတၢ်ဂ့ၢ်အကါဒိၣ်ဒ်တၢ်တီတၢ်တြၢ်လၢကီၢ်သူလ့ၤဟီၣ်ကဝီၤအပူၤဒ်အမ့ၢ်သဲးစးတၢ်ဒိၣ်စိ,ပှၤဂ့ၢ်ဝီမုၢ်ကျိၤဝဲၤကွၥ်တၢ်အိၣ်သး,တၢ်ဂ့ၢ်လိၥ်ဘှီလိၥ်ဟီၣ်ခိၣ်ကပံၥ်တၢ်ဂ့ၢ်တဖၣ်အမဲၥ်ညါတၢ်ကတိၤတၢၣ်ပီၣ်ဝဲကလံၤကျါတၢ်လံၣ်အီၣ်လီအီၣ်အတၢ်ဖံးတၢ်မၤဒီးစၢၢ်ပူၤထးပူၤတၢ်ဖံးတၢ်မၤလၢတအိၣ်ဒီးကမျၢၢ်တၢ်ဘံၣ်တၢ်ဘၢ,ပှၤတဝၢခွဲးယၥ်တၢ်တီတၢ်တြၢ်တဖၣ်အဂ့ၢ်,သ့ၣ်ညါဘၣ်န့ၣ်လီၤ. လီၤဆီဒၣ်တၢ်ဘၣ်ဃးတၢ်ကတိၤတၢၣ်ပီၣ်တဲသကိးဝဲကလံၤကျါတၢ်လံၣ်အီၣ်လီအီၣ်ဒီးစၢၢ်ပူၤထးပူၤတၢ်ဖံးတၢ်မၤအဖီခိၣ်, KNU-ကညီဒီကလုၥ်စၢဖှိၣ်ကရၢ လီၢ်ခၢၣ်သး သဲစးဝဲၤကျိၤခိၣ် ပဒိၣ်နီၢ်လွဲထူစ့ စံးဝဲဒၣ်ဒ်အံၤန့ၣ်လီၤ. “ဘၣ်ဃးကလံၤကျါတၢ်လံၣ်အီၣ်လီအီၣ်တၢ်အံၤန့ၣ်မ့ၢ်တၢ်လၢအဟဲဒိဘၣ်ဝဲကမျၢၢ်ဒီးဒိဘၣ်ဝဲသဲးစးတၢ်တီတၢ်တြၢ်အဃိပအၢၣ်လီၤတူၢ်လိၥ်ဒီးပမၤဝဲတၢ်တဲသကိးတၢ်န့ၣ်လီၤ.ဒီးမ့မ့ၢ်စ့ၢ်ကီးတၢ်ခူၣ်စၢၢ်ထးတၢ်ဖံးတၢ်မၤသ့ၣ်တဖၣ်အံၤသနၥ်က့တၢ်ဘၣ်ဒိဘၣ်ထံးအိၣ်လၢကမျၢၢ်အဖီခိၣ်ဒ်လဲၣ်ကမျၢၢ်အတၢ်ဘၣ်ဘျူး,အတၢ်ပၣ်ဃုၥ်ပၣ်ဂီၢ်အိၣ်ဝဲဒ်သ့ၣ်တဖၣ်န့ၣ်ပတဲသကိးဝဲဒၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ. ပျဲၢ်စီၢ်ခိၣ်တၢ်ရဲၣ်တၢ်ကျဲၤဘျီဝဲအံၤ(KNU)လီၢ်ခၢၣ်သးခိၣ်ခၢၣ်စးခိၣ်နၢ်,ကမံးတံၥ်ခိၣ်နၢ်,ကီၢ်ရ့ၣ်ဝဲၤကျိၤခိၣ်နၢ်,ကီၢ်သူလ့ၤပှၤကူၣ်လိၥ်တၢ်ကီၣ်ကးကလုၥ်ဒူၣ်ခိၣ်နၢ်ခၢၣ်စးတဖၣ်,တၢ်ပၢဆၢကတီၢ်ပၢပြးကီၣ်ကးခိၣ်နၢ်တဖၣ်,ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်,လီၢ်ခၢၣ်သးကီၢ်ရ့ၣ်ပၢၤကီၢ်သုးခိၣ်သုးနၢ်,ဒီးပှၤတဝၢဂံၢ်ခီၣ်ထံးတၢ်ကရၢကရိခိၣ်နၢ်ခၢၣ်စးတဖၣ်အမဲၥ်ညါပိၥ်မုၣ်ကရၢခိၣ်နၢ်ခၢၣ်စးဒီးသးစၢ်ကရၢခိၣ်နၢ်တဖၣ်ပၥ်ဖှိၣ်သးခဲလၢၥ်အိၣ်ဝဲအဂၤ(၁၇၇)ဂၤအဂ့ၢ်,ခ့ၣ်အဲၣ်ယူၣ်ပၥ်ဖျါဝဲဒၣ်န့ၣ်လီၤ. ဒ်န့ၣ်အသိး,(၃)သီကီၢ်သူလ့ၤတၢ်တီတၢ်တြၢ်ပျဲၢ်စီၣ်အပူၤပှၤလၢဟဲပၣ်ဃုၥ်ပၣ်ဂီၢ်ဝဲသ့ၣ်တဖၣ်အံၤဒ်သိးတၢ်ကမၤဂ့ၤထီၣ်ဝဲကီၢ်သူလ့ၤဟီၣ်ကဝီၤအပူၤတၢ်တီတၢ်တြၢ်တၢ်ထဲသိးတုၤသိး,သဲးစးတၢ်ဒိၣ်စိဒီးကမျၢၢ်တၢ်ဘံၣ်တၢ်ဘၢအဂီၢ်အၢၣ်လီၤတူၢ်လိၥ်ဝဲတၢ်ဂ့ၢ်အရ့ဒိၣ်(၆)ထံၣ်လၢအမ့ၢ်ဝဲ (၁) တၢ်မၤဂ့ၤထီၣ် တၢ်တီတၢ်တြၢ်ဒီး သဲစးတၢ်ဒိၣ်စိ (၂) ကမျၢၢ်အခွဲးအယၥ်ဒီး တၢ်ဒီသဒၢတၢ်ဘံၣ်တၢ်ဘၢ (၃) တၢ်ပၢဆှၢရဲၣ်ကျဲၤ ဟီၣ်ခိၣ်ကပံၥ်ဒီး န့ဆၢၣ်အတၢ်အိၣ်ယၢၤ (၄) တၢ်ပၢဆှၢရဲၣ်ကျဲၤ မုၣ်ကျိၤဝဲၤကွၥ်တၢ်ဖံးတၢ်မၤ (၅) ပိၥ်မုၣ်, သးစၢ် ဒီး ကရူၢ်လၢအဘၣ်ဒိဘၣ်ထံးညီတဖၣ် အတၢ်ပၥ်ဖှိၣ်မၤသကိးတၢ် (၆) တၢ်ဘျးစဲမၤသကိးတၢ် ဒီး ခါဆူညါတၢ်ပၥ်ဖှိၣ်မၤသကိးတၢ်တဖၣ် သ့ၣ်တဖၣ်အဂ့ၢ်,ပၥ်ဖျါစ့ၢ်ကီးဝဲဒၣ်လၢလံၥ်တၢ်ထုးထီၣ်ရၤလီၤအပူၤန့ၣ်လီၤ.
ကဘီယူၤလဲၤတ့ၢ်လီၤမ့ၣ်ပိၢ်လၢဖၣ်ပူၣ်ဝ့ၢ်ပူၤ ဟံၣ်အူအီၣ်ဟးဂီၤ(၃)ဖျၢၣ်ဒီး ဒုးယၤတၢ်ဖ့ၣ်စၢဆဲးကဲထီၣ်ဒံးဝဲ
လါယူၤ ၅ သီ, ၂၀၂၆ နံၣ်, ခ့ၣ်အဲးစံၣ် မုၢ်တြီၢ်ကီၢ်ရ့ၣ်(သုးက့ ၅)ဖၣ်ပူၣ်ဝ့ၢ်လၢတၢ်ဒုးတၢ်ယၤကဲထီၣ်ဝဲအံၤ ဖဲမဟါလါယူၤ ၄ သီ မုၢ်ဘူးကထူၣ် ၁၁း၂၀ မံးနံးအဆၢ ကတီၢ် န့ၣ် သုးမီၤစိရိၤကဘီယူၤလဲၤ တ့ၢ်လီၤဝဲမ့ၣ်ပိၢ်လၢကဝီၤဒ့(၃)ပူၤ အဃိ ကမျၢၢ်ဟံၣ်အူအီၣ်ဟးဂီၤဝဲ(၃)ဖျၢၣ်အဂ့ၢ်န့ၣ် သ့ၣ်ညါဘၣ် န့ၣ်လီၤ. တကီၢ်ခါခဲအံၤလၢကထီၣ်မၤဆှဲကွံၥ်ဖၣ်ပူၣ်သုးကလၢၤအံၤအဂီၢ် ဒုးယၤတၢ်ဖ့ၣ်စၢဆဲးကဲထီၣ်ဒံးဝဲလၢဟီၣ်ကဝီၤ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် (KNLA)သုးပၥ်ဖှိၣ်ဒီးပယီၤသုးအဘၢၣ်စၢၤအဂ့ၢ်န့ၣ် (သုးက့ ၅)ပှၤကတိၤတၢ်ပၢ ပဒိၣ်စီၤထိၣ်ရီဘ့ၤ စံးဝဲန့ၣ်လီၤ. “ဖဲမဟါန့ၣ်ပယီၤသုးကဘီယူၤဟဲခးလီၤတၢ်ဖဲဖၣ်ပူၣ် ကဝီၤဒ့ ၃ ပူၤန့ၣ်. ဖဲန့ၣ်ဟံၣ်အူအီၣ်ဟးဂီၤ(၃)ဖျၢၣ်. အကဲဝဲကမျၢၢ် အဟံၣ်ခဲလၢၥ်လီၤ. ခဲအံၤမ့မ့ၢ်လၢတၢ်ဒုးတၢ်ယၤဒုဂၢၢ်ထီၣ်ကဒါဖဲအကြၢးတစဲး.ဂၢၢ်ထီၣ်နါက့တမ့ၢ်လၢပှၤအိၣ်ဘှံးဘၣ်. နါက့မ့ကွၢ် ဖဲမဟါဒီး အတဟါခီဒု ဆူၣ်ဒိၣ်မီၤနီၤ. တၢ်ဒုးဒုထီၣ်ထီၣ်လီၤလီၤဒ်အံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် ဖဲတဟါအံၤ န့ၣ်လီၤ. ဖါပူၣ်ဒုးယၤသုးကလၢၤလၢတၢ်ပၢၢ်ဆၢကဝီၤခးဝဲန့ၢ်လၢခံနံၣ်ဃၣ်ဃၣ်အံၤ စးထီၣ်လါယူၤထီၣ်ထီၣ်အံၤန့ၣ် ဟီၣ်ကဝီၤ တၢ်ပၢၢ်ဆၢ သုးပၥ်ဖှိၣ်ကရူၢ်လဲၤထီၣ်ခးကဒီးဝဲဒီး ဖဲန့ၣ်ပယီၤသုးအံၤသူဝဲဒၣ်ကဘီယူၤအါဘ့ၣ် ဟဲခးလီၤစၢၤဝဲတၢ်လၢတၢ်ဒုး ကဲထီၣ်လီၢ် အခိၣ်အဃၢၤဒိၣ်ဒိၣ်မုၢ်မုၢ်လီၤ. လၢတၢ်န့ၣ်အဃိတၢ်ဒုးကဲထီၣ်ဘျီဝဲန့ၣ်အပူၤပယီၤသုးတကပၤသံဘၣ်ဒိဘၣ်ထံးအမဲၥ်ညါ(KNLA)တကပၤတၢ်သံတၢ်ဘၣ်ဒိဘၣ်ထံး အိၣ်ဝဲအဂ့ၢ် သ့ၣ်ညါဘၣ်လၢ(social media)ပူၤတဆီအိၣ်ဝဲဘၣ်ဆၣ် ဘၣ်ဃးတၢ်သံတၢ်ဘၣ်ဒိဘၣ်ထံးတၢ်အိၣ်သးအံၤန့ၣ် ဟီၣ်ကဝီၤ ပှၤဘၣ်မူဘၣ်ဒါထုးထီၣ်ပၥ်ဖျါပၥ်ဂၢၢ်ပၥ်ကျၢၤတအိၣ်နီမံၤဘၣ်န့ၣ်လီၤ. (သုးက့...
ဂီၤလ့ၤကမျၢၢ်လၢဃ့ၢ်ထီၣ်ကၠီၣ်တဲၣ်ပူၤတဖၣ်ဟဲက့ၤကဒါလံဘၣ်ဆၣ်ဒုးယၤတၢ်ဘၣ်ယိၣ်အိၣ်ဒံးအဃိ တနီၤန့ၣ်လိၣ်ဘၣ်ဒံးဝဲ တၢ်ဆီၣ်ထွဲမၤစၢၤ
လါယူၤ ၄ သီ, ၂၀၂၆ နံၣ်, ခ့ၣ်အဲးစံၣ် ဒူပျၥ်ယၥ်ကီၢ်ရ့ၣ်(သုးက့ ၆)ရၤမတံကီၢ်ဆၣ် ဂီၤလ့ၤသုးကလၢၤတၢ်ဒုးအဃိ လီၢ်ကဝီၤကမျၢၢ်ပှၤနီၣ်ဂံၢ်အကထိလၢအဃ့ၢ်ထီၣ် ဆူကီၢ်ကၠီၣ်တဲၣ်ပူၤတဖၣ်ဟဲက့ၤကဒါဆူကီၢ်ပူၤတကပၤလံဘၣ်ဆၣ် မ့မ့ၢ်လီၢ်ကဝီၤကမျၢၢ်လၢအိၣ်ဘူးဝဲတၢ်ဒုးကဲထီၣ်လီၢ်သ့ၣ် တဖၣ်န့ၣ်ခီဖျိကဘီယူၤ,ဒြိ,ကျိဖးဒိၣ်တၢ်လီၤဘၣ်ယိၣ်အိၣ်ဒံးဝဲအဃိ တနီၤန့ၣ်လိၣ်ဘၣ်ဒံးဝဲတၢ်ဆီၣ်ထွဲမၤစၢၤ အဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ. ဖဲအပူၤကွံၥ်လါယူၤ ၂ သီအနံၤ လၢကထီၣ်မၤဆှဲကွံၥ်ဝဲဂီၤလ့ၤသုးကလၢၤအံၤအဂီၢ် ဟီၣ်ကဝီၤ(KNLA)သုးပၥ်ဖှိၣ်လဲၤထီၣ် ခးဝဲဘၣ်ဆၣ် ခီဖျိသုးမီၤစိရိၤကဘီယူၤဟဲခးလီၤစၢၤဝဲတၢ်ဒိၣ်ဒိၣ်မုၢ်မုၢ်အဃိ တၢ်ပၢၢ်ဆၢသုးကရူၢ်တကပၤတၢ်ဘၣ်ဒိဘၣ်ထံး အါဝဲ အဖီခိၣ် ဘၣ်ဂုၤကဒါက့ၤဝဲလီၢ်ခံအဂ့ၢ်န့ၣ် သ့ၣ်ညါဘၣ်န့ၣ်လီၤ. ဘၣ်ဆၣ်တုၤလၢတနံၤအံၤလၢဂီၤလ့ၤသုးကလၢၤအခိၣ်အဃၢၤန့ၣ်ပယီၤသုးကဘီယူၤဟဲတ့ၢ်လီၤတၢ်ဘိၣ်,ဟဲဆှၣ်တၢ်အိၣ်ဒံးဝဲ အသိး တၢ်ပၢၢ်ဆၢသုးပၥ်ဖှိၣ်ကရူၢ်တကပၤစ့ၢ်ကီးသူဝဲဒြိလဲၤတ့ၢ်လီၤဝဲမ့ၣ်ပိၢ်လၢပယီၤသုးအိၣ်အလီၢ်အံၤအဂ့ၢ်န့ၣ် ပှၤလၢဘူးဒီး (KNLA)တဖၣ် စံးဝဲန့ၣ်လီၤ. ခီဖျိလၢတၢ်ဂ့ၢ်သ့ၣ်တဖၣ်အံၤအဃိ ဖဲလါယူၤထီၣ် ၂ သီ ကမျၢၢ်လၢအကထိဃ့ၢ်ထီၣ်ဆူကၠီၣ်တဲၣ်ပူၤတဖၣ် ခဲအံၤဟဲက့ၤအိၣ်လၢ အဟံၣ်အဃီဘူၣ်လံဘၣ်ဆၣ် မ့မ့ၢ်ကဝီၤဒ့-၄, ၅, ၆ ကမျၢၢ်သ့ၣ်တဖၣ်ခီဟဲက့ၤစ့ၢ်ကီးလံဘၣ်ဆၣ် က့ၤအိၣ်လၢအဟံၣ်အဃီ တဘူၣ်ဒံးဝဲဘၣ် ဘၣ်ဟးအိၣ်နီၤဖးလိၥ်အသးလၢအံၤတဒူၣ်လၢန့ၣ်တဒူၣ်ဒ်န့ၣ်လီၤအဂ့ၢ်န့ၣ် သ့ၣ်ညါဘၣ်န့ၣ်လီၤ. ဘၣ်ဃးတၢ်ဂ့ၢ်အံၤ ဖဲပခ့ၣ်အဲးစံၣ်-ကညီတၢ်ကစီၣ်ဆဲးကျိးသံကွၢ်ဝဲလီၢ်ကဝီၤပှၤတဝၢခိၣ်နၢ်လၢအိၣ်ဖဲဘူးဖဲန့ၣ်တဂၤအခါစံးဝဲ လၢ “ဖဲတၢ်ဒုးကဲထီၣ်အခါန့ၣ်အဝဲစံၣ်လဲၤစံၣ်ထီၣ်လၢယိၤကီၢ်တပၤအါအါဂီၢ်ဂီၢ်လီၤ.ခဲအံၤတၢ်ဒုးလီၤကယးဘျီဟဲက့ၤခီဃီၤလၢအံၤတကပၤလံ.ပှၤလၢဃုကျဲဘၣ်တဖၣ်န့ၣ်အိၣ်တ့ၢ်ဝဲလၢန့ၣ်တကပၤ,ငါအိၣ်ဝဲဟံၣ်အိၣ်လီၤ.ပှၤလၢအဟဲက့ၤတဖၣ်န့ၣ်ဟးအိၣ်ဖှိၣ်ဝဲလၢကဝီၤဒ့(၁/၂/၃)အပူၤလၢပှၤဟံၣ်ပူၤတဒူၣ်ခံဒူၣ်ဒ်န့ၣ်လီၤ.မ့မ့ၢ်ထံကျိနံၤခီအိၣ်တသ့လၢၤဘၣ်ထံဒိၣ်လီၤဘၢလၢၤလံ.ပှၤသ့ၣ်တဖၣ်န့ၣ်လၢညါခါတၢ်ဒုးကဲထီၣ်အခါန့ၣ်ဟဲလီၤအိၣ်ဖှိၣ်ဝဲဖဲထံကျိကၢၢ်နံၤလီၤ.မ့မ့ၢ်လၢကဝီၤဒ့(၄/၅/၆)တကပၤခီန့ၣ်ဒြိလီၤလၢအကပၤလီၤ ပှၤအိၣ်တဘူၣ်ဘၣ်.မ့မ့ၢ်လၢကဝီၤဒ့(၁/၂/၃)ခီန့ၣ်အိၣ်ဘူးလၢထံနံၤထံးခီန့ၣ်ကိၢ်ညၢ်တစဲး.” အဂ့ၢ်န့ၣ် စံးဝဲန့ၣ်လီၤ. တကးဒံးဘၣ်အပူၤကွံၥ်တၢ်ဒုးတၢ်ယၤအဃိလီၢ်ကဝီၤကမျၢၢ်ပှၤလီၢ်အိၣ်ကဒုဖိလၢအိၣ်သူမှဲကျိကၢၢ်နံၤသ့ၣ်တဖၣ်အံၤဒီး စ့ၢ်ကီး ခဲအံၤခီဖျိတၢ်စူၤထံထီၣ်အဃိ ဆဲးအိၣ်ဝဲဖဲန့ၣ်တသ့လၢၤဘၣ်,ဘၣ်ဟးအိၣ်နါစိၤဝဲဒ်န့ၣ်လီၤအဖီခိၣ် လၢပှၤသ့ၣ် တဖၣ်အံၤအဂီၢ်လိၣ်ဘၣ်ဝဲဂ့ၢ်ဂီၢ်အူအိၣ်ဆိးလီၢ်ကျဲဒီးတၢ်ဆီၣ်ထွဲမၤစၢၤအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါ တဂၤဃီဝဲန့ၣ်...
ဖရူၤစိၤကီၢ်ဆၣ် (၃)လါအတီၢ်ပူၤပယီၤသုးကျိၤနုၥ်လီၤဒွဲၣ်အူအီၣ်သဝီ(၃)ဖျၢၣ်ပူၤဟံၣ်(၈၀)ဘျဲၣ်အဂ့ၢ် KNDF ထုးထီၣ်ပၥ်ဖျါ
လါယူၤ ၄ သီ, ၂၀၂၆ နံၣ်, ခ့ၣ်အဲးစံၣ် ကရ့ၣ်နံၣ်ကီၢ်စဲၣ် ဖရူၤစိၤကီၢ်ဆၣ်ဟီၣ်ကဝီၤအပူၤ ဖဲအပူၤကွံၥ်လါမးရှးတုၤလါမ့ၤလၢ(၃)လါအတီၢ်ပူၤ ပယီၤသုးကျိၤလၢနုၥ်လီၤ ဟူးဂဲၤသ့ၣ်တဖၣ်အံၤ ဒွဲၣ်အူအီၣ်ကွံၥ်ဝဲဒူသဝီ(၃)ဖျၢၣ်ပူၤ ဟံၣ်ခိၣ်အဖျၢၣ်(၈၀)ဘျဲၣ်လၢတၢ်ဂ့ၢ်တအိၣ်နီတမံၤဘၣ်အဂ့ၢ်န့ၣ် လီၢ်ခၢၣ်သး ကရ့ၣ်နံၣ်ဒီကလုၥ်တၢ်ဒီသဒၢသုးမုၢ်ဒိၣ်(KNDF) ထုးထီၣ်ပၥ်ဖျါဝဲဖဲမဟါလါယူၤ ၃ သီအံၤန့ၣ်လီၤ. ပယီၤသုးကျိၤအံၤဟဲနုၥ်လီၤဝဲဒၣ်လၢဖရူၤစိၤကီၢ်ဆၣ် ဘူခူၤသဝီ, ထါလဲသဝီ ဒီး ပယဲၤတီၤသဝီသ့ၣ်တဖၣ်အံၤအပူၤဝံၤ ဒွဲၣ်အူအီၣ်ကွံၥ်ဝဲပှၤကမျၢၢ်အဟံၣ်အဃီဘၣ်ဟဲအိၣ်ထီၣ်ဝဲဒ်အံၤအဂ့ၢ်န့ၣ် လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ. ဒ်(KNDF)အတၢ်ပၥ်ဖျါပူၤပၥ်ဖျါဝဲအသိးန့ၣ် ဖဲအပူၤကွံၥ်လါမးရှး ၂၈ သီအနံၤ ပယီၤသုးကျိၤနုၥ်လီၤဝဲလၢဘူခူၤသဝီပူၤဒီး ဒွဲၣ်အူအီၣ်ဝဲ ဟံၣ်တစှၤန့ၢ်(၁၆)ဖျၢၣ်န့ၣ်လီၤ. တကးဒံးဘၣ်မၤကဒီးဖဲလါမ့ၤ ၆ သီအနံၤ နုၥ်လီၤဒွဲၣ်အူအီၣ်ကဒီးဝဲ ထါလဲသဝီပူၤဟံၣ် အဖျၢၣ်(၆၀)ဘျဲၣ်အသိး မုၢ်ဆ့ၣ်ထီၣ် ၇ သီအနံၤစ့ၢ်ကီး နုၥ်လီၤဒွဲၣ်အူအီၣ်ကဒီးဝဲထါလဲသဝီဆၢခိၣ် ပယဲၤတီၤသဝီပူၤဟံၣ်(၄)ဖျၢၣ် အဂ့ၢ်န့ၣ် စံးဝဲန့ၣ်လီၤ. တကီၢ်ခါခဲအံၤပယီၤသုးကျိၤသ့ၣ်တဖၣ်အံၤ နုၥ်လီၤဟူးဂဲၤပၥ်လီၤအလီၢ်အကျဲလၢဖရူၤစိၤ-ဘီလခဲကျဲမုၢ်ဒီတကျိၤဒီး တၢ်ဘၣ်သဂၢၢ် ခးလိၥ်သးဝဲဒီးဟီၣ်ကဝီၤတၢ်ပၢၢ်ဆၢသုးပၥ်ဖှိၣ်ကရူၢ်အိၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ. တကးဒံးဘၣ်ပယီၤသုးသ့ၣ်တဖၣ်အံၤ ခးလီၤဝဲကျိဖးဒိၣ်,ဟးတ့ၢ်လီၤတၢ်ဒီးဒြိမ့ၣ်ပိၢ်သ့ၣ်တဖၣ်လၢလီၢ်ကဝီၤကမျၢၢ်ဒူသဝီအိၣ်ဆိး လီၢ်ကျဲအိၣ်ဝဲတလီၢ်လီၢ်အဂ့ၢ်န့ၣ် (KNDF)စံးဝဲန့ၣ်လီၤ. ဒ်ကရ့ၣ်နံၣ်ပှၤဂ့ၢ်ဝီခွဲးယၥ်ကရူၢ်(KnHRG)ထုးထီၣ်ပၥ်ဖျါဝဲအသိးန့ၣ်အပူၤကွံၥ်လါမ့ၤတလါအတီၢ်ပူၤ ကရ့ၣ်နံၣ်ကီၢ်စဲၣ်ဒီတဘ့ၣ် အပူၤ ခီဖျိလၢပယီၤသုးအကျိဖးဒိၣ်, ဒြိဒီးကဘီယူၤအံၤအဃိ လီၢ်ကဝီၤကမျၢၢ်သံ(၂)ဂၤ,ဘၣ်ဒိဘၣ်ထံး(၁၀)ဂၤအမဲၥ်ညါ ကမျၢၢ်ဟံၣ် (၉၆)ဖျၢၣ်,တၢ်ဘူၣ်တၢ်ဘါတၢ်သူၣ်ထီၣ်( ၃)ဖျၢၣ်,ကၠိ(၁)ဖျၢၣ်,တၢ်သူၣ်ထီၣ်လၢအဂၤ(၅)ဖျၢၣ်,သိလ့ၣ်(၁၇)ခိၣ် ဟးဂီၤ...
တနီသရံၣ်ကီၢ်ဆၣ်ပူၤ ပယီၤသုးကျိၤလၢဟဲထီၣ်တဖၣ်ဒွဲၣ်အူအီၣ်ဝဲကၠိ,သရိၥ်ဒီးဟံၣ်တၢ်သူၣ်ထီၣ်တဖၣ်အဂ့ၢ် ဘျံးဒဝဲၣ်ကီၢ်ရ့ၣ် ထုးထီၣ်ပၥ်ဖျါ
လါယူၤ ၃ သီ, ၂၀၂၆ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်(သုးက့ ၄)တနီသရံၣ်ကီၢ်ဆၣ်ဟီၣ်ကဝီၤအပူၤ ပယီၤသုးကျိၤတဖၣ်ဟဲထီၣ်ဒီးနုၥ်လီၤဒွဲၣ်အူအီၣ် ကွံၥ်ဝဲ လီၢ်ကဝီၤကမျၢၢ်အဟံၣ်အဃီအမဲၥ်ညါဒွဲၣ်အူအီၣ်ဃုၥ်ဝဲတၢ်ဘူၣ်တၢ်ဘါ,ကၠိတၢ်သူၣ်ထီၣ်သ့ၣ်တဖၣ်အဂ့ၢ်န့ၣ် ကီၢ်ရ့ၣ်တၢ်ကစီၣ် ထုးထီၣ်ပၥ်ဖျါဝဲဖဲတနံၤအံၤဟါခီအဆၢကတီၢ်န့ၣ်လီၤ. ဖဲအပူၤကွံၥ်လါမ့ၤ ၁၉ သီအနံၤ သုးမီၤစိရိၤဟဲက့ၤထီၣ်ဒိၣ်စိက့ၤမိဒီၢ်(မောတောင်)ဝ့ၢ်ပူၤဝံၤလီၢ်ခံ ပယီၤသုးကျိၤတဖၣ် ဟဲထီၣ်ဒီး နုၥ်လီၤဒွၣ်အူအီၣ်ဝဲတကီဖီလူၢ်သဝီပူၤတၢ်သူၣ်ထီၣ်တဖၣ်ဘၣ်ဟဲအိၣ်ထီၣ်ဝဲဒ်အံၤန့ၣ်လီၤ. ပယီၤသုးကျိၤနုၥ်လီၤဒွဲၣ်အူအီၣ်တၢ်လၢတကီဖီလူၢ်သဝီပူၤဘျီဝဲအံၤန့ၣ် ဒွဲၣ်အူအီၣ်ဝဲကမျၢၢ်အဟံၣ်(၇)ဖျၢၣ်, တီၤတီကၠိ(၁)ဖျၢၣ်, ကၠိဖိဟံၣ်ဒွဲ(၁)ဖျၢၣ်, တၢ်ထုကဖၣ်ဒၢး(၁)ဖျၢၣ်,လံၥ်စီဆှံကၠိတၢ်သူၣ်ထီၣ်(၁)ဖျၢၣ်,တၢ်အိၣ်ဖှိၣ်ဟံၣ်(၁)ဖျၢၣ်ဒီးတၢ်အိၣ်ဖှိၣ်ဘျီၣ်ဒိၣ် (၁)ဖျၢၣ် ပၥ်ဖှိၣ်ခဲလၢၥ်(၇)ဖျၢၣ်အဂ့ၢ်န့ၣ် လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ. ဒ်တၢ်ဂီၤတၢ်မၤနီၣ်ပူၤအိၣ်ဖျါဝဲအသိးန့ၣ် ဟံၣ်,ကၠိ,တၢ်ဘူၣ်တၢ်ဘါတၢ်သူၣ်ထီၣ်လၢတၢ်ဒွဲၣ်အူအီၣ်ကွံၥ်ဝဲသ့ၣ်တဖၣ်အံၤန့ၣ် အါဒၣ်တက့ၢ် မ့ၣ်အူအီၣ်ကွံၥ်ဝဲဒီတဖျၢၣ်အိၣ်တ့ၢ်က့ၤထဲအထူၣ်သ့ၣ်တဖၣ်လီၤအသိး တၢ်သူၣ်ထီၣ်အမဲၥ်ညါလၢမ့ၣ်အူအီၣ်တၢ် ဘျီဝဲအံၤစ့ၢ်ကီးပၣ်ဃုၥ်ဝဲသိလ့ၣ်(၂)ခိၣ်လၢသူအီၣ်တသ့လၢၤဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ. တကးဒံးဘၣ်ပယီၤသုးအံၤဖဲအဝဲသ့ၣ်နုၥ်လီၤဒွဲၣ်အူအီၣ်တၢ်အဆၢကတီၢ် ဟးဃုခွံခွးထုးထီၣ်ဝဲတၢ်ဖိတၢ်လံၤလၢကၠိဖိဟံၣ်ဒွဲ တၢ်သူၣ်ထီၣ်တဖျၢၣ်အပူၤဒီး တီၢ်လီၤပှီၢ်မၤဟးဂီၤဝဲတၢ်ဖိတၢ်လံၤတဖၣ်အဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ. တကီၢ်ခါခဲအံၤခီဖျိလၢပယီၤသုးကျိၤနုၥ်လီၤဟူးဂဲၤ ပၥ်ဝဲတၢ်ခးပနီၣ်ဆူကမျၢၢ်ထံဖိကီၢ်ဖိတကးဒံးဘၣ်အမဲၥ်ညါ ဒွဲၣ်အူအီၣ်ဃုၥ်ဝဲ ကၠိတၢ်သူၣ်ထီၣ်ဒီးတၢ်ဘူၣ်တၢ်ဘါတၢ်သူၣ်ထီၣ်ဒ်အံၤအဖီခိၣ် လီၢ်ကဝီၤကမျၢၢ်လၢအိၣ်ဘူးဖဲတၢ်ကဲထီၣ်သးအခိၣ်အဃၢၤအံၤ သ့ၣ်တဖၣ် အါဒၣ်တက့ၢ်န့ၣ်ဃ့ၢ်ထီၣ်ဟးအိၣ်ဝဲလၢတၢ်ဘံၣ်တၢ်ဘၢလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ. တနီသရံၣ်ကီၢ်အပူၤ ဖဲအပူၤကွံၥ်လါမ့ၤ ၃၁ အနံၤန့ၣ်စ့ၢ်ကီး ပယီၤသုးအံၤဟ့ၣ်ထီၣ်ဝဲတၢ်ဂ့ၢ်လၢပှၤသ့ၣ်တဖၣ်အံၤ ပၥ်ဖှိၣ်မၤသကိး တၢ်ဒီးတၢ်ပၢၢ်ဆၢကရူၢ်အဃိ ဖီၣ်မၤဒၢၣ်မၤပယွဲမၤဆါဝဲမိဒီၢ်(မောတောင်)ဝ့ၢ် ကမျၢၢ်(၃)ဂၤလၢအပၣ်ဃုၥ်ဝဲပိၥ်မုၣ်တဂၤ ပှၤသ့ၣ်တဖၣ်အံၤ တကးဒံးဘၣ်ဖီၣ်မၤဒၢၣ်ဝဲကမျၢၢ်ပိၥ်ခွါတဂၤလၢကနဲၣ်ပၠးဝဲကျဲအဂီၢ်အံၤကဲထီၣ်ဒံးဝဲန့ၣ်လီၤ. ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်ပူၤ အပူၤကွံၥ်လၢညါကျိဖးဒိၣ်,ကဘီယူၤမ့ၣ်ပိၢ်အမဲၥ်ညါ လၢပျီပူၤစ့ၢ်ကီးပယီၤသုးကျိၤအံၤညီနုၢ် အဝဲသ့ၣ်မ့ဟဲထီၣ်ဟူးဂဲၤလံန့ၣ်...
သုးမီၤစရိၤအံၤလၢဃိၥ်ပူၤပၥ်ပနီၣ်ဃၥ်ဝဲတၢ်ကူစါယါဘျါအဃိ တလါအတီၢ်ပူၤထံရူၢ်ကီၢ်သဲးပှၤဃိၥ်ဖိသံ(၃)ဂၤအဂ့ၢ် AAPP ထုးထီၣ်ပၥ်ဖျါ
လါယူၤ ၃ သီ, ၂၀၂၆ နံၣ်, ခ့ၣ်အဲးစံၣ် ဃိၥ်လၢအိၣ်ကီၢ်ပယီၤဒီဘ့ၣ်အပူၤ ထံရူၢ်ကီၢ်သဲးပှၤဃိၥ်ဖိလၢအအိၣ်ဃိၥ်ပူၤသ့ၣ်တဖၣ်အံၤ ခီဖျိသုးမီၤစရိၤအံၤဟ့ၣ်ဝဲဂ့ၢ်ဂီၢ်အူ တၢ်ကူစါယါဘျါဒီးကသံၣ်ကသီတၢ်အံးထွဲကွၢ်ထွဲတလၢတလီၣ်ဝဲဘၣ်အဃိ လါမ့ၤတလါအတီၢ်ပူၤ ထံရူၢ်ကီၢ်သဲး ပှၤဃိၥ်ဖိသံဝဲ (၃)ဂၤအဂ့ၢ်န့ၣ် (AAPP)ထုးထီၣ် ပၥ်ဖျါဝဲဖဲတနံၤအံၤန့ၣ်လီၤ. ထံရူၢ်ကီၢ်သဲးပှၤဃိၥ်ဖိ ကိၤမၠိတ့ၣ် လၢအအိၣ်လၢပကိကီၢ်ခီအံၤ ဖဲအပူၤကွံၥ်(၂၀၂၃)အခါ ဘၣ်တၢ်ဖီၣ်အီၤလၢသုးကရူၢ်ဝံၤ လီၤဘၣ်ဝဲဃိၥ်ပူၤဒီး တူၢ်ဘၣ်ဝဲသးတၢ်ဆါလၢဃိၥ်ပူၤနးနးတချုးဘၣ်ဆၣ် ခီဖျိဃိၥ်ပှၤဘၣ်မူဘၣ်ဒါတဟ့ၣ်ဝဲ တၢ်ကူစါယါ ဘျါတုၤ လီၤတီၤလီၤဘၣ်အဃိ ဖဲအပူၤကွံၥ်လါမ့ၤ ၁၇ သီအနံၤ တၢ်ဆှၢအီၤဆူပကိတၢ်ဆါဟံၣ်ဖးဒိၣ်ဘၣ်ဆၣ် ဖဲအတုၤလၢ တၢ်ဆါဟံၣ် တယံၤတမီၢ်န့ၣ်အသးသမူ ဟးထီၣ်ကွံၥ်ဝဲဒၣ်န့ၣ်လီၤ. ဒ်န့ၣ်အသိးဖဲအပူၤကွံၥ်(၂၀၂၄)လါနိၣ်ဝ့ဘၢၣ်အခါန့ၣ်စ့ၢ်ကီး (NLD)ပၣ်တံၣ်ကရၢဖိ အူထ့အီၤ လၢသုးကရူၢ်ဖီၣ်အီၤဒုး လီၤဃၥ်အီၤ လၢအလီၤဘၣ်ဃိၥ်(၁၅)နံၣ်အံၤစ့ၢ်ကီး တူၢ်ဘၣ်ဝဲတၢ်ဟၢဖၢလူတၢ်ဆါဒီးကလံၤကျိၤတၢ်ဆါနးနးကျံၤကျံၤဘၣ်ဆၣ် ခီဖျိတၢ်ကူစါယါ ဘျါအီၤလၢဃိၥ်ပူၤတၢ်ဆါဟံၣ်ဒ်န့ၣ်လီၤဒီးတဒိးန့ၢ်ဘၣ်ဝဲတၢ်ကူစါယါဘျါလၢလၢပှဲၤပှဲၤဘၣ်အဃိ ဖဲလါမ့ၤ ၂၂ သီ အနံၤန့ၣ် အသးသမူဟးထီၣ်ကွံၥ်ဝဲစ့ၢ်ကီးန့ၣ်လီၤ. တကးဒံးဘၣ်အူမၠ့ၣ်နဲၤလၢဘၣ်တၢ်ဖီၣ်အီၤဖဲအပူၤကွံၥ်(၂၀၂၃)နံၣ်ဝံၤ ဘၣ်လီၤလၢဃိၥ်ပူၤ(၁၀) နံၣ်အံၤစ့ၢ်ကီး လၢတၢ်အ့စ့ၣ် ဃိၥ်ပူၤ အံၤတဆီဖဲတၢ်သုးလီၢ်သုးကျဲလဲၤဆှၢအီၤဆူပၠံၣ်ဃိၥ်ပူၤဝံၤလီၢ်ခံအခါ တူၢ်ဘၣ်ဝဲကလံၤဖၠးတၢ်ဆါအံၤန့ၣ် လီၤ. ဘၣ်ဆၣ်ဖဲအတၢ်ဆါ နး ထီၣ်တၢ်လဲၤဆှၢကူစါယါဘျါအီၤဆူကမျၢၢ်တၢ်ဆါဟံၣ်ဖးဒိၣ်ဘၣ်ဆၣ် ခီဖျိသုးကရူၢ်အံၤအတၢ်ပၥ်ပနီၣ် ဒီး ကသံၣ်ကသီတကူ...
(သုးက့ ၄)ဟီၣ်ကဝီၤပူၤပယီၤသုးဖီၣ်ဒုးဃၥ်မၤဒၢၣ်ဝဲမိဒီၢ်ဝ့ၢ်ကမျၢၢ်(၄)ဂၤ, တဂၤန့ၣ်ဃ့ၢ်ပူၤဖျဲးထီၣ်ကွံၥ်ဝဲ
လါယူၤ ၂ သီ, ၂၀၂၆ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်(သုးက့ ၄)တနီသရံၣ်ကီၢ်ဆၣ်ဟီၣ်ကဝီၤအပူၤ ပယီၤသုးဖီၣ်ဒုးဃၥ်ဝဲမိဒီၢ်ဝ့ၢ် လီၢ်ကဝီၤကမျၢၢ် (၄)ဂၤဒီး ဖဲန့ၣ်အကျါတဂၤလၢဘၣ်တၢ်ဖီၣ်အီၤလၢကနဲၣ်ပၠးဝဲကျဲအဂီၢ်အံၤန့ၣ် ဃ့ၢ်ပူၤဖျဲးထီၣ်ဝဲသးအဂ့ၢ်န့ၣ် ကီၢ်ရ့ၣ်တၢ်ကစီၣ် ထုးထီၣ်ပၥ်ဖျါဝဲဖဲတနံၤအံၤဟါခီအဆၢကတီၢ်န့ၣ်လီၤ. ဖဲအပူၤကွံၥ်လါမ့ၤ ၃၁ သီအနံၤန့ၣ် ပယီၤသုးအံၤနုၥ်လီၤဖီၣ်ဝဲဒၣ်မိဒီၢ်ဝ့ၢ်ကမျၢၢ်ပိၥ်ခွါတဂၤလၢဟံၣ်ပူၤဒီး လၢကနဲၣ်ပၠးဝဲတၢ်ပၢၢ်ဆၢ သုးကရူၢ်အိၣ်ဆိးလီၢ်ကျဲအဂီၢ် တၢ်မၤဒၢၣ်မၤဆါမၤပယွဲဝဲကမျၢၢ်အံၤအဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ. လၢန့ၣ်အမဲၥ်ညါဒ်ကမျၢၢ်တဂၤန့ၣ်က့ၤတဲပၠးဝဲအသိးန့ၣ် ဖဲပယီၤသုးဖီၣ်ဒီးက့ၤကိးအီၤဆူတၢ်လီၢ်တတီၤအခါန့ၣ် ထံၣ်ဝဲဒၣ် လီၢ်ကဝီၤကမျၢၢ်ပိၥ်ခွါ(၂)ဂၤဒီးပိၥ်မုၣ်(၁)ဂၤ ခဲလၢၥ်(၃)ဂၤ ပှၤသ့ၣ်တဖၣ်အံၤဘၣ်တၢ်မၤဒၢၣ်မၤဆါမၤပယွဲတ့ၢ်စ့ၢ်ကီး အဝဲသ့ၣ် စုၥ်စုၥ်အဂ့ၢ်န့ၣ် ခ့ၣ်အဲၣ်ယူၣ် လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ. ဘၣ်ဆၣ်မိဒီၢ်လီၢ်ကဝီၤကမျၢၢ်လၢပယီၤသုးဖီၣ်အီၤလၢကနဲၣ်ပၠးကျဲတဂၤအံၤ ဖဲမဟါလါယူၤ ၁ သီ ဂီၤခီ ၅း၃၀ အဆၢကတီၢ်န့ၣ် အဝဲကိးဃုၥ်အဟံၣ်ဖိဃီဖိ(၅)ဂၤဃ့ၢ်ပူၤဖျဲးထီၣ်အသးလၢတၢ်ဘံၣ်တၢ်ဘၢလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ. ကမျၢၢ်တဂၤအံၤဃ့ၢ်ပူၤဖျဲးထီၣ်အသးမ့န့ၢ်ဘၣ်ဆၣ် မ့မ့ၢ်ကမျၢၢ်လၢအဂၤ(၃)လၢပယီၤသုးဖီၣ်ဒုးဃၥ်အီၤသ့ၣ်တဖၣ် အံၤတုၤလၢခဲအံၤ ဘၣ်တၢ်ဖီၣ်ဒုးဃၥ်အီၤအဖၢမုၢ်ဒံးအဂ့ၢ်န့ၣ် လံၥ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ. မိဒီၢ်ဝ့ၢ်အံၤဖဲအပူၤကွံၥ်(၂၀၂၅)လါနိၣ်ဝ့ဘၢၣ်အခါန့ၣ်ဘၣ်တၢ်ထီၣ်ဒိၣ်စိန့ၢ်ဝဲလၢ(သုးက့ ၄)အပှၤဒီး ဘၣ်ဆၣ်ဖဲ(၂၀၂၆)လါမ့ၤ ၁၉ သီအနံၤန့ၣ် ပယီၤသုးမီၤစိရိၤဟဲက့ၤထီၣ်မၤန့ၢ်ကဒါဝဲဝံၤပယီၤသုးဖီၣ်ဝဲမၤဒၢၣ်ဝဲကမျၢၢ်အမဲၥ်ညါဒုးဃၥ်ဝဲလၢတၢ်ဒုးဃၥ်လီၢ် ဘၣ်ဟဲ အိၣ်ထီၣ်ဝဲဒ်အခဲအံၤအသိးန့ၣ်လီၤ. သုးမီၤစိရိၤအံၤဒ်သိးအဝဲသ့ၣ်တၢ်စိတၢ်ကမီၤကအိၣ်ဂၢၢ်စိးကျၢၤအဂီၢ်န့ၣ် ဒ်အဝဲသ့ၣ်မၤညီနုၢ်ဝဲအသိး ဖီၣ်မၤဒၢၣ်မၤလီၤ, မၤသံမၤဝီဝဲကမျၢၢ်ထံဖိကီၢ်ဖိဆှုၣ်မဲၥ်ကဲၤမဲၥ်တုၤလၢခဲအံၤဆဲးမၤဝဲအဖၢမုၢ်အဂ့ၢ်န့ၣ် ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ် စံးဝဲန့ၣ်လီၤ. ဒ်န့ၣ်အသိးဖဲမဟါလါယူၤ ၁...