KNU လီၢ်ခၢၣ်သးဟီၣ်ကဝီၤ ကဘီယူၤတၢ်လီၤဘၣ်ယိၣ်အိၣ်ဒံးအဃိ ကမျၢၢ်လၢဃ့ၢ်ထီၣ်တဖၣ်က့ၤဆူဟံၣ်တဘူၣ်ဒံး
လါအီကူး ၁၄ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်(သုးက့ ၇)လီၢ်ခၢၣ်သးလၢအိၣ်ဆီလီၤသးဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်တရံးထံဝၢ်ခီအံၤ သုးမီၤစိရိၤအကဘီယူၤ (Y-12)လဲၤ တ့ၢ်လီၤမ့ၣ်ပိၢ်ဝံၤလီၢ်ခံ တုၤလၢခဲအံၤကဘီယူၤတၢ်လီၤဘၣ်ယိၣ်အိၣ်ဒံးအဃိ လီၢ်ကဝီၤကမျၢၢ်လၢအဃ့ၢ်ထီၣ်တဖၣ် က့ၤဆူအဟံၣ် တဘူၣ်ဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ. ဖဲအပူၤကွံၥ်တလါအံၤလါအီကူး ၁၀ သီ ဟါခီ ၈း၀၀ နၣ်ရံၣ်ခိၣ်ဃၢၤအဆၢကတီၢ်န့ၣ် သုးမီၤစိရိၤအကဘီယူၤတဘ့ၣ် လဲၤတ့ၢ်လီၤ ဝဲမ့ၣ်ပိၢ်(၂၀)ဘျဲၣ်လၢ(သုးက့ ၇)ကျိၣ်ယီၢ်လ့ သုးဝဲၤလီၢ်ခိၣ်သ့ၣ်တၢ်လီၢ်အခိၣ်အဃၢၤအဖီခိၣ် ကျိၣ်ယီၢ်လ့ကမျၢၢ်ဃုၥ်ဒီးကမျၢၢ်လၢအိၣ် မီၤပၢၤခိၣ်, ကျီၢ်ကရၢ,ခိရံယါတၢ်ဆါဟံၣ်,သ့ၣ်ဘ့ၣ်ထၣ်,မုၣ်အ့ပူၤသ့ၣ်တဖၣ် ပှၤနီၢ်ဂံၢ်လၢအကထိ ဃ့ၢ်ထီၣ်တဲဆူကီၢ်ကၠီၣ်တဲၣ်တကပၤ န့ၣ်လီၤ. လီၢ်ကဝီၤကမျၢၢ်ဃုၥ်ဒီးပှၤကၠိဖိလၢအဃ့ၢ်ထီၣ်သ့ၣ်တဖၣ်အံၤ တနီၤန့ၣ်လဲၤအိၣ်ဝဲလၢအဘူးအတံၢ်အသမူသကိးဟံၣ်အိၣ်ဝဲဒီး တနီၤန့ၣ်ကၠီၣ်တဲၣ်ပှၤဘၣ်မူဘၣ်ဒါဆီလီၤပၥ်လီၤန့ၢ်အလီၢ်အကျဲပျဲအိၣ်ကဒုဝဲဖဲမဲၢ်တရံးသီခါဖၠၣ်ကရၢၢ်ပူၤစ့ၢ်ကီးအိၣ်ဝဲဒၣ်န့ၣ်လီၤ. ခဲအံၤအဝဲသ့ၣ်ဟးစံၣ်ပလဲၥ်သးတၢ်ဆၢကတီၢ်န့ၢ်(၄)သီလံဘၣ်ဆၣ် (သုးက့ ၇)သုးဝဲၤလီၢ်ခိၣ်သ့ၣ်တၢ်လီၢ်ဒီတကျိၤ လၢအဝဲသ့ၣ် အိၣ်ဆိးလီၢ်ကျဲန့ၣ် တၢ်ကစီၣ်ဟးထီၣ်လၢကဘီယူၤကဟဲခးလီၤဒံးတၢ်ဒီး ခ့ၣ်အဲၣ်ယူၣ်ပှၤဘၣ်မူဘၣ်ဒါတကပၤစ့ၢ်ကီး ဒုးသ့ၣ်ညါ လီၤကမျၢၢ်လၢကသုးလီၢ်သုးကျဲအိၣ်လၢတၢ်ဘံၣ်တၢ်ဘၢလီၢ်အဃိ ကမျၢၢ်က့ၤဆူဟံၣ်တဘူၣ်ဒံးဘၣ်အမဲၥ်ညါကၠိစ့ၢ်ကီးဘၣ်တၢ်ကးတံၢ် ကွံၥ်ဝဲခဲလၢၥ်ဃၣ်ဃၣ်အဂ့ၢ်န့ၣ် လီၢ်ကဝီၤကမျၢၢ် စံးဝဲ န့ၣ်လီၤ. ဘၣ်ဃးတၢ်ဂ့ၢ်အံၤကမျၢၢ်လၢဃ့ၢ်ထီၣ်တဂၤစံးဝဲလၢ“ပှၤလၢဟဲဃ့ၢ်ထီၣ်တဖၣ်အတက့ၤဒံးဘၣ်.တၢ်တတီၤအံၤခိၣ်နၢ်ပှၤဘၣ်မူဘၣ်ဒါမၢအိၣ်လၢတၢ်ပလီၢ်ပဒီပူၤထီဘိလီၤ.ပှၤကၠိဖိနါက့ပှၤတပျဲထီၣ်ကၠိလၢၤဘၣ်. ဖဲမဟါန့ၣ်ကဘီယူၤဟဲဆှၣ် တၢ်တဘျီကဒီးလံ. ဘၣ်သးအုး လၢကဟဲကွံၥ်လီၤဝဲလၢမုၢ်ဟါခါလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. တကီၢ်ခါခဲအံၤကမျၢၢ်ဃုၥ်ဒီးပှၤကၠိဖိလၢလဲၤအိၣ်မဲၢ်တရံးသီခါဖၠၣ်လၢအနီၣ်ဂံၢ်ကအိၣ်ဝဲအဂၤ(၂၀၀)ဘျဲၣ်အံၤတဖၣ်န့ၣ် ကၠီၣ်တဲၣ် တၢ်ကရၢကရိအံးထွဲကွၢ်ထွဲဆီၣ်ထွဲမၤစၢၤဝဲအိၣ်အသိး ကညီဂံၢ်ခီၣ်ထံးတၢ်ကရၢကရိစ့ၢ်ကီးလဲၤဟ့ၣ်လီၤဆီၣ်ထွဲ မၤစၢၤဝဲအိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ. တကီၢ်ခါခဲအံၤဟီၣ်ကဝီၤပူၤဖဲန့ၣ် လၢတၢ်ဘံၣ်တၢ်ဘၢတၢ်အိၣ်သးအဖီခိၣ်...
မူကီၢ်ဆၣ် ၆ သီအတီၢ်ပူၤ ကျိဖးဒိၣ်အဃိ ကမျၢၢ်သံ ၁ ဂၤ,ဘၣ်ဒိ ၆ ဂၤ
လါအီကူး ၁၄ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃)မူကီၢ်ဆၣ် လၢ ၆ သီအတီၢ်ပူၤ ခီဖျိလၢပယီၤသုးခးလီၤကျိဖးဒိၣ် အံၤအဃိ ကမျၢၢ်သံ ၁ ဂၤ ဒီး ဘၣ်ဒိဝဲနးနးကျံၤကျံၤ ၆ ဂၤအဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲအသိး သ့ၣ်ညါဘၣ်န့ၣ်လီၤ. ဒ်ကီၢ်ရ့ၣ်တၢ်ကစီၣ်ပူၤပၥ်ဖျါဝဲအသိးန့ၣ် စးထီၣ်လါအီကူး ၅ သီ တုၤလၢ ၁၀ သီ လၢ(၆)သီအတီၢ်ပူၤအံၤ သုးမီၤစိရိၤစုတီၤဖီလၥ် ပယီၤသုးအံၤ ခးလီၤဝဲကျိဖးဒိၣ်(၅၅)ဖျၢၣ်တကးဒံးဘၣ်တ့ၢ်လီၤဝဲဒြိမ့ၣ်ပိၢ်(၃)ဖျၢၣ်ဆူဒူသဝီကမျၢၢ်အိၣ်ဆိးလီၢ်ကျဲအဃိ ကမျၢၢ်သံဘၣ်ဒိ ဘၣ်ထံးအမဲၥ်ညါဟံၣ်ဟးဂီၤဝဲ(၃)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ. လၢကျိဖးဒိၣ်အံၤအဃိကမျၢၢ်လၢအသံတဂၤမ့ၢ်ဝဲ ယဲလ့သူၤ(၂၀)နံၣ်ဒီးပှၤလၢအဘၣ်ဒိသ့ၣ်တဖၣ်န့ၢ်မ့ၢ်ဝဲ အူအီၤကိၤလ့(၄၃)နံၣ်, ဒီၤနါဘိၤ(၄၉)နံၣ်, အူအီၤသါစီၣ်(၂၄)နံၣ်,ကိၤစ့ၤယၤမၠိ(၂၇)နံၣ်,နီၢ်မူတ့(၄၄)နံၣ်,စီၤသါကၠံ(၂၀)နံၣ်သ့ၣ်တဖၣ်အံၤအဂ့ၢ်န့ၣ် လံၥ်တၢ်ပၥ်ဖျါ အပူၤပၥ်ဖျါဝဲန့ၣ်လီၤ. ဘၣ်ဃးတၢ်ဂ့ၢ်အံၤ မူကီၢ်ဆၣ် ပှၤဘၣ်မူဘၣ်ဒါတဂၤ စံးတဲလၢ“ဒုၣ်ဒါဒုစးထီၣ်လၢပှၤထီၣ်(လဲၣ်ပၤ)ဝံၤလီၢ်ခံန့ၣ် အခးလီၤကျိဖးဒိၣ်ဒီး ဒြိတပယူၥ်ဃီတုၤလၢမုၢ် မဆါတနံၤအံၤလီၤ.ဖဲမူကီၢ်ဆၣ် တမ့ၢ်လၢထံကျိမုၥ်နုၥ်ဘၣ်,ထံကျိမုၢ်ထီၣ်တကပၤနါက့ တလါအံၤမးသး အခးလီၤကျိဖးဒိၣ်တၢ်ဟူးတၢ်ဂဲၤ အါမီၤနီၤ.အဃိကမျၢၢ်သံဘၣ်ဒိဘၣ်ထံးအါမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဒ်န့ၣ်အသိးမူကီၢ်ဆၣ်အမဲၥ်ညါလၢဆီထံးကီၢ်ဆၣ်အပူၤစ့ၢ်ကီး စးထီၣ်ဖဲအပူၤကွံၥ်လါယူၤလံ ၂၈ သီ တုၤတလါအံၤလါအီကူး ၅...
တၢ်ပၥ်ပနီၣ်ကးတံၥ်တၢ်စိၥ်ဆှၢရ့ၣ်နီၣ်သိအဃိ, ရၤမတံဝ့ၢ်ရ့ၣ်နီၣ်သိလၢၥ်
လါအီကူၥ် ၁၄သီ, ၂၀၂၅နံၣ်, ခ့ၣ်အဲးစံၣ်, တၢ်ပၥ်ပနီၣ်စိၥ်ဆှၢဝဲရ့ၣ်နီၣ်သိစးထီၣ်လၢဖၣ်အၣ်ဝ့ၢ်တကပၤအဃိ,ကီၢ်ကၠီၣ်တဲၣ်ကီၢ်ပယီၤကီၢ်ဆၢရၤမတံဝ့ၢ်အပူၤတနံၤအံၤလါအီကူၥ်(၁၄)သီအနံၤအပူၤ,သဂၢၢ်ဘၣ်ဝဲရ့ၣ်နီၣ်သိလၢၥ်ကွံၥ်ဝဲသတူၢ်ကလၥ်ကဲထီၣ်သးအဂ့ၢ်,ဝ့ၢ်လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ. ကီၢ်ပူၤတၢ်စိၥ်ခီဆှၢဝဲရ့ၣ်နီၣ်သိဆူဖၣ်အၣ်ဝ့ၢ်တဆီအံၤ,တၢ်စးထီၣ်မၤစှၤလီၤဝဲစးထီၣ်လၢလါအီကူၥ်(၈)သီအနံၤအခါလံၤလံၤဒီးတၢ်မၤစှၤလီၤကွံၥ်ဝဲအလီၢ်ခံ,ခီဖျိတၢ်ဆဲးပၥ်ပနီၣ်ကးတံၥ်ကဒီးဝဲဖဲဖၣ်အၣ်ဒီးရၤမတံအဃိ,ရ့ၣ်နီၣ်သိလၢၥ်ကဲထီၣ်ဝဲအသးအဂ့ၢ်,ဝ့ၢ်လီၢ်ကဝီၤကမျၢၢ်တဖၣ်စံးဝဲန့ၣ်လီၤ. ဘၣ်ဃးတၢ်ပၥ်ပနီၣ်မၤလီၤစှၤဝဲတၢ်ဆှၢရ့ၣ်နီၣ်သိအဖီခိၣ်ရၤမတံဝ့ၢ်လီၢ်ကဝီၤဖိတဖၣ်တသ့ၣ်ညါထွဲဝဲဘၣ်ဒီးသဂၢၢ်ဘၣ်ဝဲရ့ၣ်နီၣ်သိလၢၥ်အံၤမ့ၢ်တၢ်သတူၢ်ကလၥ်အဂ့ၢ်,ဝ့ၢ်လီၢ်ကဝီၤကမျၢၢ်တဂၤစံးဝဲဒ်အံၤန့ၣ်လီၤ. “တဂီၤညါအံၤသိကျးတဖၣ်ပံးကွံၥ်ဝဲအသးခဲလၢၥ်န့ၣ်လီၤ.ကပံးတၢ်ဒၢးတတဲဆိဝဲဘျီခဲအံၤပှၤဟးလူၤစံၢ်ဃုဘိသိဒီဒူၣ်ဒီထၢၣ်ညါ,ပဝဲပလဲၤဘိသိန့ၣ်တစဲးနါက့ပဆဲးကၢးတပှဲၤဘၣ်.ကဘၣ်လဲၤပှ့ၤကွၢ်လၢထံဝၢ်တပိခံပိ,ဖဲအံၤလၢပယီၤကီၢ်တကပၤဒုသိဟဲထီၣ်လၢလၥ်လီၤ.အဃိန့ၣ်ယိၤမ့ပံးန့ၣ်,တၢ်ဂ့ၢ်ကီတအိၣ်အါဘၣ်ပယီၤကီၢ်တပၤမ့ပံးဒုကဲထီၣ်တၢ်ကီတၢ်ခဲဖးဒိၣ်လီၤ”အဂ့ၢ်စံးဝဲဒၣ်န့ၣ်လီၤ. ရၤမတံဝ့ၢ်အံၤတနံၣ်အံၤကီၢ်ကၠီၣ်တဲၣ်တကပၤဒီၣ်တဲၥ်ကွံၥ်ဝဲအ့ထၢၣ်နဲၣ်,လီတဲစိလဲ,လီမ့ၣ်အူဃုၥ်ဒီးတၢ်စိၥ်ဆှၢရ့ၣ်နီၣ်သိတဖၣ်အဖီခိၣ်,တၢ်ဟံးန့ၢ်သူဝဲရ့ၣ်နီၣ်သိလၢကီၢ်ပူၤတကပၤဖးလံၥ်လံအဂ့ၢ်သ့ၣ်ညါဘၣ်န့ၣ်လီၤ. ဒီးရ့ၣ်နီၣ်သိလၢဟဲထီၣ်လၢကီၢ်ပူၤတကပၤအံၤအပှ့ၤဘၣ်န့ၢ်ဒံးဝဲကၠီၣ်တဲၣ်ရ့ၣ်နီၣ်သိဘၣ်ဆၣ်,တကီၢ်ခါခဲအံၤခီဖျိဝ့ၢ်ပူၤလၢၥ်ကွံၥ်ဝဲသတူၢ်ကလၥ်အဃိ,ကျးလၢအရ့ၣ်နီၣ်သိအိၣ်တ့ၢ်ဒံးဝဲစှၤကိၥ်ဖျၢၣ်တဖၣ်မၤအါထီၣ်ဝဲသိပှ့ၤအဂ့ၢ်ဝ့ၢ်လီၢ်ကဝီၤကမျၢၢ်တဂၤစံးစ့ၢ်ကီးဝဲဒၣ်ဒ်အံၤန့ၣ်လီၤ. “ပနၢ်ဟူလၢ(စကစ)ပံးတံၥ်ကွံၥ်တၢ်ဆှၢထီၣ်သိစးထီၣ်လၢ(စ့ၣ်တီ)ပရဲလိၥ်ကျိၥ်န့ၣ်လံ,ပှၤဟဲစိၥ်နုၥ်သိဆူကညီကီၢ်ပူၤတန့ၢ်ဘၣ်.အဃိန့ၣ်ရၤမတံဝ့ၢ်ပူၤသိကျးတဖၣ်ပံးကွံၥ်သး,ဒီးကျးတနီၤလၢအသိအိၣ်တ့ၢ်ဒံးဝဲတဖၣ်တခီပှၤဆါအပှ့ၤဒိၣ်ထီၣ်,ပသ့ၣ်ညါဘၣ်လၢတလံတၢၣ်န့ၣ်,တကးဆါဝဲအိၣ်အသိး,တနီၤဆါဝဲလၢပိဘီဘီတပိန့ၣ်စ့ယိၤ(၁၂၀၀)ဘးအိၣ်မီၤမ့မ့ၢ်လၢစ့ပယီၤစ့တခီ(၁၉၀၀၀၀)ကၠးန့ၣ်လီၤ.ပိဘီဘီအံၤတဘိန့ၣ်အိၣ်ဝဲ(၄)ဂၣ်လၣ်န့ၣ်လီၤ”အဂ့ၢ်စံးဝဲဒၣ်န့ၣ်လီၤ. ဒ်န့ၣ်အသိး,အပူၤကွံၥ်ဒံၣ်စဲၤတလံထၢၣ်(၃၀၀၀၀)ကၠးအံၤတနံၤအံၤထီၣ်တုၤဝဲလၢ(၄၀၀၀၀)ပူၤလံအဂ့ၢ်,ဝ့ၢ်လီၢ်ကဝီၤဖိတဖၣ်စံးစ့ၢ်ကီးဝဲဒၣ်န့ၣ်လီၤ. အပူၤကွံၥ်(၂၀၂၄)နံၣ်လါအ့ဖြ့ၣ်အပူၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တီခိၣ်ရိၢ်မဲတၢ်ပၢၢ်ဆၢသုးတဖၣ်မၤဝဲတၢ်ထီၣ်ဒုးမၤန့ၢ်က့ၤရၤမတံဝ့ၢ်အဆၢကတီၢ်,ရၤမတံဝ့ၢ်ပူၤသုးကီၣ်ကးပၢြပးပှၤဘၣ်မူဘၣ်ဒါတဖၣ်အိၣ်ဝဲလၢလၢပှဲၤပှဲၤလၢၤဘၣ်ဒီးသုးခိးကီၢ်ဆၢ(BGF)ဟံးန့ၢ်ဝဲဝ့ၢ်တၢ်ဘံၣ်တၢ်ဘၢအဂ့ၢ်,သ့ၣ်ညါဘၣ်န့ၣ်လီၤ. တကီၢ်ခါခဲအံၤ,ဘၣ်ဃးဒီးသုးကီၣ်ကးအတၢ်ပၥ်ပနီၣ်ဆှၢက့ၤဝဲသိတၢ်စိၥ်ဆှၢလၢဖၣ်အၣ်ဒီးရၤမတံဝ့ၢ်အဖီခိၣ်,မ့ၢ်တၢ်မၤဝဲတဲၥ်လွံၢ်တဲၥ်ဖဲကီးတရံး,ရၤမတံအ့ရှၢၣ်ဒုးယၤရဲၣ်ကျဲၤအဆၢကတီၢ်အခါအဂ့ၢ်ဝ့ၢ်ပှၤမၤအီၣ်မုၢ်ကျိၤဝဲၤကွၥ်ခိၣ်နၢ်တဖၣ်ကတိၤပဲၥ်ထံနီၤဖးဝဲဒၣ်န့ၣ်လီၤ. ရၤမတံဝ့ၢ်အံၤမ့ၢ်ဝဲကီၢ်ဆၢဝ့ၢ်လၢတၢ်မၤအီၣ်ဝဲမုၢ်ကျိၤဝဲၤကွၥ်ခွဲးယၥ်ဂ့ၤအလီၢ်တတီၤဒီး,ဟံၣ်ကိးဖျၢၣ်ဒဲးအပူၤဝ့ၢ်လီၢ်ကဝီၤဖိတဖၣ်အံၤအစှၤကတၢၢ်အိၣ်ဝဲဒီးသိလ့ၣ်လၢတမၤပၥ်ဝဲသုးကီၣ်ကးအလဲၤစ့ၣ်ဘၣ်တခိၣ်စုၥ်စုၥ်အသိး,တၢ်ဒိးဝဲသိလ့ၢ်ယီၢ်(ဆဲးကၢး)ကါအါအဖီခိၣ်,ကျဲကတံၥ်ကနိၣ်ကဲထီၣ်သးတလီၢ်လီၢ်အဂ့ၢ်,လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ. ဒ်န့ၣ်အသိး,ဝ့ၢ်အံၤဘၣ်တၢ်သ့ၣ်ညါဝဲလၢ(ကၣ်စံၣ်နိၣ်)အိၣ်အါအလီၢ်ဒီး,မုၢ်နၤအဆၢကတီၢ်တၢ်အိးထီၣ်ဝဲတၢ်တၤကျိၣ်တၤစ့တၢ်လိၣ်ကွဲလီၢ်တဖၣ်အါဝဲအဖီခိၣ်မ့ၢ်ဝ့ၢ်တဝ့ၢ်လၢအသူဝဲရ့ၣ်နီၣ်သိအါဝဲတဖျၢၣ်အဂ့ၢ်သ့ၣ်ညါဘၣ်န့ၣ်လီၤ.
(အီၣ်စ့ၣ်ယၣ်)သုးကျိၤဟဲထီၣ်ကဒါက့ၤဝဲအ့ၡၢၣ်ကျဲမုၢ်သီဒီးတၢ်ဒုးကဲထီၣ်လၢခံသီအတီၢ်ပူၤ
လါအီကူၥ် ၁၄ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ဒူပျၥ်ယၥ်ကီၢ်ရ့ၣ်(သုးက့-၆)တၢ်ပၢဟီၣ်ကဝီၤ,ဖဲလါအီကူၥ်အသီ(၁၀)အနံၤန့ၣ်ပယီၤသုးမီၤစိရိၤမၤဝဲသုး ကျိၤတၢ်ထီၣ်ဒုးလၢကဟဲထီၣ်ကဒါက့ၤဝဲကီးတရံး-ရၤမတံအ့ၡၢၣ်ကျဲမုၢ်သီအဃိတၢ်ဒုးကဲထီၣ်ဝဲဒၣ်ဒီးတၢ်ပၢၢ်ဆၢသုး ပၥ်ဖှိၣ်ကရူၢ်လၢခံသီအတီၢ်ပူၤတပယူၥ်ဃီအဂ့ၢ်သ့ၣ်ညါဘၣ်လၢတၢ်ပၢၢ်ဆၢသုးကျိၤပှၤဘၣ်မူဘၣ်ဒါအအိၣ်န့ၣ်လီၤ. ပယီၤသုးမီၤစိရိၤအံၤဒ်သိးကထီၣ်ဆူအ့ၡၢၣ်ကျဲမုၢ်သီအဖီခိၣ်ကန့ၢ်အဂီၢ်လၢ(တတါကူ)သဝီတဆီဟဲထီၣ်ဝဲဒၣ်အမဲၥ်ညါပယီၤသုးရ့ၣ်အပှၤလၢအအိၣ်ဆ့ၣ်နီၤဖဲဟီၣ်ကဝီၤဖဲန့ၣ်အပူၤသ့ၣ်တဖၣ်ခးလီၤစၢၤန့ၢ်ဝဲကျိဖးဒိၣ်ဒီးဆှၢထီၣ်ဝဲအသုးကျိဒ်အံၤလီၤအဂ့ၢ်တၢ်မဲၥ်ညါ(KNLA)အပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ. “အီၣ်စ့ၣ်ယၣ်သုးကျိၤန့ၣ်ဟဲက့ၤမၤဆူၣ်ထီၣ်က့ၤဝဲအဂံၢ်ဘါန့ၣ်လီၤ. အဝဲသ့ၣ်ဟဲထီၣ်ကဒါဝဲတုၤဖဲ(တတါကူ, ကီးနွဲၢ်, ယွၤသ့ၣ်ကိ)သဝီတကပၤန့ၣ်လီၤ. အခဲအံၤခးလီၤစိဝဲကျိဖးဒိၣ်သီၣ်ဒံးဝဲအဖၢမုၢ်န့ၣ်လီၤ. ပယီၤသုးအံၤနီၤဖးလီၤအသး ဟဲထီၣ်ဝဲဒၣ်လၢ(ယီၢ်ကုၤ)သဝီတကပၤန့ၣ်တဒူၣ်ဒီးလၢ(တတါကူ)တကပၤန့ၣ်တဒူၣ်မီၤနီၤ. ပယီၤသုးဟဲက့ၤထီၣ်ဝဲတ ဘျီညါအံၤကအိၣ်အဂၤ(၇၀၀)ဘျဲၣ်လီၤ. ” အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ပယီၤသုးအံၤဒ်သိးကမၤသုးကျိၤတၢ်ထီၣ်ဒုးအဂီၢ်လၢကြုၢ်တုတဆီတုၤလီၤလၢကီးတရံးဒုးယၤတၢ်ပၢဆှၢရဲၣ်ကျဲၤဝဲၤလီၢ်ခိၣ်သ့ၣ်ဒီးပယီၤသုးခီၣ်သုးရ့ၣ်(ခလရ-၉၇)သုးသ့ၣ်တဖၣ်ပၥ်ဖှိၣ်ထီၣ်သုးဂံၢ်ဘါခဲလၢၥ်အဂၤ(၅၀၀)ဃၣ်ဃၣ်ဝံၤအ လီၢ်ခံမၤဝဲသုးကျိၤတၢ်ထီၣ်ဒုးဒ်အံၤလီၤအဂ့ၢ်သ့ၣ်ညါဘၣ်န့ၣ်လီၤ. ပယီၤသုးမီၤစိရိၤအသုးကျိၤလၢဟဲထီၣ်ဝဲအံၤဟဲထီၣ်ဝဲဒၣ်လၢအ့ၡၢၣ်ကျဲမုၢ်သီကလံၤထံးတကပၤလၢအမ့ၢ်(ကီးနွဲၢ်သဝီ,တတါကူတကပၤအသိးလၢ(ယီၢ်ကုၤ,လဲစ့ၤ,ကီၢ်မူ)သဝီတကပၤစ့ၢ်ကီးဒ်သိးကဟူးဂဲၤမၤဝဲဟီၣ်ကဝီၤတၢ်ဒိၣ်စိအဂီၢ်ပယီၤသုးအံၤကမၤဝဲသုးကျိၤတၢ်ထီၣ်ဒုးစ့ၢ်ကီးအဂ့ၢ်သုးဂံၢ်ခီၣ်ထံးတၢ်ကစီၣ်ပဲၥ်ထံနီၤဖးဝဲန့ၣ်လီၤ. လၢန့ၣ်အမဲၥ်ညါပယီၤဟဲထီၣ်မၤပှဲၤအသုးဂံၢ်ဘါတဘျီအံၤအပူၤန့ၣ်ပၣ်ဃုၥ်စ့ၢ်ကီးဝဲစဲးဖီကဟၣ်တၢ်သ့ၣ်တၢ်ဘၣ်ပီညါသုးဖိသ့ၣ်တဖၣ်အသိးပယီၤသုးအံၤလၢတၢ်ဒုးအပူၤဟဲသူအါထီၣ်ဝဲဒၣ်စဲးဖီကဟၣ်တၢ်သ့တၢ်ဘၣ်ပီညါအါထီၣ်န့ၢ်ဒံးဝဲအပူၤကွံၥ်အဂ့ၢ်သ့ၣ်ညါဘၣ်လၢတၢ်ပၢၢ်ဆၢသုးခိၣ်သုးနၢ်တဖၣ်အအိၣ်န့ၣ်လီၤ. ဒ်န့ၣ်အသိးကီးတရံးဝ့ၢ်ကလံၤစိဖဲတီနီကစၢၢ်လီၢ်လံၤကျဲဒီးအီၣ်ဘိတဲၣ်တကပၤန့ၣ်ဖဲလါအီကူၥ်(၁၁)သီဒီး(၁၂)သီအနံၤန့ၣ်ပယီၤသုး(စကခ-၁၂)ဒီးလဲၣ်ဝၣ်မျိၥ်သုးရ့ၣ်သ့ၣ်တဖၣ်ခးလီၤဝဲကျိဖးဒိၣ်အိၣ်ဝဲခဲအံၤခဲအံၤဒီးလၢကြုၢ်တု(အ့ကၠံ)သဝီ အပူၤစ့ၢ်ကီး(KNLA)တၢ်ပၢၢ်ဆၢသုးပၥ်ဖှိၣ်ဒီးပယီၤသုးကျိၤအဘၢၣ်စၢၤတၢ်ဒုးကဲထီၣ်ဒံးဝဲအဖၢမုၢ်အဂ့ၢ်သ့ၣ်ညါဘၣ်န့ၣ်လီၤ.
ဒဝဲၢ်ခံဟီၣ်ကဝီၤတၢ်ဒုးကဲထီၣ်ဒီးပယီၤသုးသံ (၁၄)ဂၤ,ဘၣ်ဒိ (၁၁)ဂၤ
လါအီကူး ၁၄သီ, ၂၀၂၅နံၣ်, ခ့ၣ်အဲးစံၣ်. ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ သုးက့(၄),ဘျံးဒဝဲၢ်ကီၢ်ရ့ၣ် လၢၢ်ဒိၣ်စိကီၢ်ဆၣ် ဒဝဲၢ်ခံဟီၣ်ကဝီၤ ဖဲမဟါလါအီကူး (၁၃)သီအနံၤန့ၣ် တၢ်ဒုးကဲထီၣ်ဝဲဒၣ်လၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးပၥ်ဖှိၣ်ဒီးပယီၤသုးကရူၢ်အဘၢၣ်စၢၤ ခံဘျီအဃိ ပယီၤသုးသံ(၁၄)အကျါပၣ်ဃုၥ်ဒီးသုးခိၣ်တဂၤအသိး ဘၣ်ဒိဝဲ(၁၁)ဂၤအဂ့ၢ် သ့ၣ်ညါဘၣ်လၢ လီၢ်ကဝီၤ KNLA ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် အပှၤဘၣ်မူဘၣ်ဒါအအိၣ်န့ၣ်လီၤ. ဖဲမဟါလါအီကူး(၁၃)သီအနံၤန့ၣ် ပယီၤသုးလၢမ့ၢ်(ခီၣ်သုးရ့ၣ်-ခလရ-၂၈၂)သုးကလၢၤ အသုးကျိၤခံဘိစးထီၣ်ဟူးဂဲၤဝဲဒၣ်အဃိ တၢ်ဘၣ်သဂၢၢ်ခးလိၥ်ကဲထီၣ်ဖဲ မုၢ်ထူၣ်(၁၂)နၣ်ရံၣ်တဘျီဒီး မုၢ်ဃ့ၢ်လီၤ (၃)နၣ်ရံၣ်တဘျီအဖီခိၣ်ပယီၤသုးကျိၤခံဘိအကျါတဘိန့ၣ် တၢ်ဘၣ်ဒိဘၣ်ထံးအါဝဲဒၣ်အဂ့ၢ် KNLA သုးရ့ၣ်(၂၇)အသုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤမူဂ့ၤစံးဘၣ်ဝဲ ခ့ၣ်အဲးစံၣ် ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲလၢ“ဖဲမဟါန့ၣ်(၂၈၂)သုးကလၢၤပူၤ ပယီၤသုးကျိၤခံဘိစးထီၣ်ဟူးဂဲၤဝဲဒၣ်ဒီးတၢ်ဒုးကဲထီၣ်ဝဲဒၣ်(၂)ဘျီန့ၣ်လီၤ.ဖဲမုၢ်ထူၣ်(၁၂)နၣ်ရံၣ်တဘျီဒီးမုၢ်ဃ့ၢ်လီၤ(၃)နၣ်ရံၣ်တဘျီန့ၣ်လီၤ.”အဂ့ၢ်စံးဝဲဒၣ်န့ၣ်လီၤ. လၢတၢ်ဒုးဘျီဝဲအံၤန့ၣ် KNLA သုးရ့ၣ်-(၂၇,၁၂,၁၀) ဃုၥ်ဒီး တၢ်ပၢၢ်ဆၢသုးပၥ်ဖှိၣ်ဒ်အမ့ၢ် KTLA,တလၢၤကီၢ်သီ,ဒီနၣ်သုးကျိၤသ့ၣ်တဖၣ်ပၣ်ဃုၥ်ပၣ်ဂီၢ်ဝဲဒၣ်လၢတၢ်ဒုးဘျီဝဲအံၤအဂ့ၢ် သုးခိၣ်ဒိၣ်ဂီၢ်ဂ့ၢ်စီၤမူဂ့ၤတဲအါထီၣ်ဝဲဒၣ်စ့ၢ်ကီးန့ၣ်လီၤ. ပယီၤသုးကရူၢ်အံၤန့ၣ်အခဲအံၤအတၢ်တိၥ်အိၣ်လၢကထီၣ်ဒိၣ်စိက့ၤဝဲ ထံခံကီၢ်ဆၢအဃိ အသုးကျိၤခံဘိလၢအစးထီၣ်ဟူးဂဲၤခဲအံၤန့ၣ်ကလဲၤထီၣ်ဆူထံခံကတပၤအဂ့ၢ် သ့ၣ်ညါဘၣ်ဒ် သုးက့(၄)အပှၤဘၣ်မူဘၣ်ဒါစံးဝဲဒၣ်အသိးန့ၣ်လီၤ.
ဒူသထူၣ်ကီၢ်ရ့ၣ် လါယူၤလံတလါအတီၢ်ပူၤ တၢ်ဒုးကဲထီၣ် ၁၅ ဘျီ, ပယီၤသုးသံ ၁၃ ဂၤ
လါအီကူး ၁၃ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဟီၣ်ကဝီၤ လီၤဆီဒၣ်တၢ်ကီၢ်ဆၣ်ဘ့ၣ် လါယူၤလံတလါအတီၢ်ပူၤ တၢ်ဒုးကဲထီၣ်ဝဲလၢ ဟီၣ်ကဝီၤ (KNLA)သုးပၥ်ဖှိၣ်ဒီး ပယီၤသုးအဘၢၣ်စၢၤ အိၣ်ဝဲ(၁၅)ဘျီအဃိ ပယီၤသုးတကပၤသံ(၁၃)ဂၤအဂ့ၢ်န့ၣ် သ့ၣ်ညါဘၣ် လၢ ကီၢ်ရ့ၣ်တၢ်မၤနီၣ်စရီပူၤအသိးန့ၣ်လီၤ. ကၠဲးထိၣ်ကီၢ်ဆၣ်,ဘံလ့ကီၢ်ဆၣ်ဒီးသထူၣ်ကီၢ်ဆၣ်အပူၤ စးထီၣ်ဖဲလါယူၤလံ ၁ သီတုၤ ၃၁ သီ လၢတလါအတီၢ်ပူၤအံၤ တၢ်ဒုးစဲးပြဲးကဲထီၣ်(၆)ဘျီ,တၢ်ခိးထုးပယီၤသုး(၆)ဘျီ,တၢ်ဘၣ်သဂၢၢ်ခးလိၥ်သးကဲထီၣ်(၂)ဘျီ,ပယီၤသုးထွဲဘၣ်မ့ၣ်ပိၢ် ၁ ဘျီအဃိ သံ(၁၃)ဂၤအမဲၥ်ညါ ဘၣ်ဒိ(၄)ဂၤ ဒီး သိလ့ၣ်ဟးဂီၤ(၂)ခိၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ. ဒ်န့ၣ်အသိးလၢခံခီခံကပၤတၢ်ဒုးကဲထီၣ်အတီၢ်ပူၤအံၤစ့ၢ်ကီး ဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ် အပှၤဘၣ်ဟ့ၣ်လီၤကွံၥ်အသးသမူလၢထံကီၢ်ဒီးပှၤကလုၥ်အဂီၢ်(၂)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ. တကးဒံးဘၣ်လၢတလါအတီၢ်ပူၤအံၤ သုးမီၤစိရိၤအကဘီယူၤလဲၤတ့ၢ်လီၤမ့ၣ်ပိၢ်(၂)ဘျီ,ပယီၤသုးခးလီၤဝဲကျိဖးဒိၣ်(၄)ဘျီ အဃိ ကမျၢၢ်သံ(၂)ဂၤ,ဟံၣ်ဟးဂီၤဘၣ်ဒိဘၣ်ထံး(၆)ဖျၢၣ်,ကၠိဟးဂီၤဘၣ်ဒိဘၣ်ထံး(၂)ဖျၢၣ်,သိလ့ၣ်ယီၢ်(စဲးကၢး)ဟးဂီၤဝဲ(၁)ခိၣ်အဂ့ၢ်န့ၣ် တၢ်မၤနီၣ်စရီပူၤပၥ်ဖျါဝဲန့ၣ်လီၤ. လၢန့ၣ်အမဲၥ်ညါဒူသထူၣ်ကီၢ်ရ့ၣ်ပူၤ အပူၤကွံၥ်လါယူၤတလါအတီၢ်ပူၤစ့ၢ်ကီး ဟီၣ်ကဝီၤ(KNLA)သုးပၥ်ဖှိၣ်ဒီးပယီၤသုးအဘၢၣ်စၢၤ တၢ်ဒုးကဲထီၣ်(၁၃)ဘျီအဃိ ပယီၤသုးတကပၤသံ(၉)ဂၤ,ဘၣ်ဒိ(၂၀)ဂၤဒီး ဒ်န့ၣ်အသိးခီဖျိလၢကျိဖးဒိၣ်ဒီးကဘီယူၤအံၤအဃိစ့ၢ်ကီး ကမျၢၢ်သံ(၁)ဂၤ,ဘၣ်ဒိ(၇)ဂၤကဲထီၣ်ဒံးဝဲန့ၣ်လီၤ. ဒူသထူၣ်ကီၢ်ရ့ၣ်ပူၤ ကီၢ်ဆၣ်အိၣ်(၅)ဘ့ၣ်လၢအမ့ၢ် ဘံလ့,ကၠဲးထိၣ်,သထူၣ်,ဖၣ်အၣ်ဒီးမီၤစကိၤကီၢ်ဆၣ်သ့ၣ်တဖၣ်န့ၣ်လီၤ. ဘၣ်ဆၣ်လါယူၤလံအတီၢ်ပူၤအံၤလီၤဆီဒၣ် မ့မ့ၢ်လၢဖၣ်အၣ်ဒီးမီၤစကိၤကီၢ်ဆၣ် ၂ ဘ့ၣ်အံၤ တၢ်ဒုးကဲထီၣ်တအိၣ်ဝဲနီတဘျီဘၣ် အဂ့ၢ်န့ၣ် သ့ၣ်ညါဘၣ်လၢတၢ်မၤနီၣ်စရီအပူၤန့ၣ်လီၤ.
ကဘီယူၤလဲၤတ့ၢ်လီၤတၢ်ဘိၣ်တပယူၥ်ဃီလၢဂီၤလ့ၤသုးကလၢၤဒီးကျိဖးဒိၣ်အဃိကမျၢၢ်ပိၥ်ခွါဘၣ်ဒိနးနးတဂၤ
လါအီကူး ၁၃ သီ, ၂၀၂၅ နံၣ်, ခ့ၣ်အဲးစံၣ် ဂီၤလ့ၤဒုးယၤသုးကလၢၤလၢအိၣ်ဆီလီၤသးဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢ ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆) ကီးတရံး ကီၢ်ဆၣ်အပူၤအံၤ ဖဲမဟါဒီးတနံၤအံၤဂီၤခီအဆၢကတီၢ်န့ၣ် သုးမီၤစိရိၤအကဘီယူၤလဲၤတ့ၢ်လီၤကဒီးဝဲတၢ်ဘိၣ်တဖၣ် အဂ့ၢ်န့ၣ် သ့ၣ်ညါဘၣ်လၢတၢ်ပၢၢ်ဆၢသုးကရူၢ်တဖၣ်အအိၣ်န့ၣ်လီၤ. ဖဲမဟါလါအီကူး ၁၂ သီ ဟါခီ ၃း၅၀ တုၤလၢ ၄း၅၅ မံးနံးန့ၣ် သုးမီၤစိရိၤကဘီယူၤတဘ့ၣ်ဟဲတ့ၢ်လီၤန့ၢ်ဝဲတၢ်ဘိၣ်လၢဂီၤလ့ၤ သုးကလၢၤအံၤကအိၣ်လၢ(၉)ဘိၣ်ညါန့ၣ်လီၤ. ဒ်န့ၣ်အသိးဖဲတနံၤအံၤဂီၤခီ ၁၀း၃၅ တုၤလၢ ၁၁း၀၀ မံးနံးအဆၢကတီၢ်န့ၣ် ဟဲတ့ၢ်လီၤကဒီးဝဲတၢ်ဘိၣ်(၉)ဘိၣ်လၢ သုးကလၢၤအံၤ အပူၤဒီးတၢ်ဘိၣ်လၢကဘီယူၤဟဲတ့ၢ်လီၤဝဲတဖၣ်န့ၣ်ကမ့ၢ်ဝဲတၢ်အီၣ်တၢ်အီဒီးကျိချံပှၥ်သၣ်အဘိၣ်သ့ၣ်တဖၣ်လီၤအဂ့ၢ်န့ၣ် ဂံၢ်ခီၣ်ထံး ပှၤဟ့ၣ်တၢ်ကစီၣ်ဖိတဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. အဝဲစံးဝဲလၢ“ဟဲတ့ၢ်လီၤတၢ်ဘိၣ်န့ၣ်တနံၤအံၤ(၉)ဘိၣ်.ဖဲမဟါန့ၣ်ဟဲတ့ၢ်လီၤဝဲ(၉)ဘိၣ်စ့ၢ်.ဟဲတ့ၢ်လီၤဝဲတၢ်ဘၢၣ်စၢၤန့ၣ်ကအိၣ်ထဲ အမံးနံးတဆံ,တဆံတမံးနံးဒ်န့ၣ်လီၤ.တၢ်ဘိၣ်န့ၣ်ကမ့ၢ်ဝဲကျိချံပှၥ်သၣ်ဒီးတၢ်အီၣ်တၢ်အီလီၤ.တၢ်ဘိၣ်လၢအဟဲတ့ၢ်လီၤဝဲဖဲမဟါဒီးတနံၤအံၤဒုဘၣ်ဒီကလီၤတဲၥ်လၢအဝဲသ့ၣ်သုးကလၢၤပူၤခဲလၢၥ်လီၤ”အဂ့ၢ်န့ၣ် စံးဝဲန့ၣ်လီၤ. တကးဒံးဘၣ်ဖဲမဟါလါအီကူး ၁၂ သီ တချုုးသုးမီၤစိရိၤအကဘီယူၤဟဲတ့ၢ်လီၤတၢ်ဘိၣ်ဒံးဘၣ်ကဘၣ်ဖဲမုၢ်ဃ့ၢ်လီၤ ၂း၃၀ ဘျဲၣ် အဆၢကတီၢ်န့ၣ် ဂီၤလ့ၤသုးကလၢၤအံၤခးလီၤဝဲကျိဖးဒိၣ်ဆူသဝီပူၤအဖီခိၣ် ကမျၢၢ်ပိၥ်ခွါ(၄၅)နံၣ်တဂၤအံၤ ဘၣ်ဝဲအစုအဟၢဖၢ အပှံၥ်ဖျိးထီၣ်လၢတၢ်ချၢအဃိဘၣ်တၢ်ဆှၢထီၣ်အီၤဆူကၠီၣ်တဲၣ်ဖိဖြး တၢ်ဆါဟံၣ်အဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိ တဂၤဃီ ဝဲန့ၣ် စံးအါထီၣ်ဝဲန့ၣ်လီၤ. ဂီၤလ့ၤသုးလၢၤလၢဟီၣ်ကဝီၤတၢ်ပၢၢ်ဆၢထီၣ်ကဝီၤခးဝဲတၢ်ဆၢကတီၢ်ကအိၣ်လၢတလါခိၣ်ဃၢၤအံၤ တုၤလၢခဲအံၤတၢ်ဒုးကဲထီၣ်ဝဲ ကိးမုၢ်နံၤဒဲးဒီး ဒ်န့ၣ်အသိးလၢတၢ်ဒုးဒီတကတီၢ်အပူၤစ့ၢ်ကီးလၢကဘီယူၤအံၤဆီ တၢ်ဟဲတ့ၢ်လီၤန့ၢ်ကျိချံပှၥ်သၣ်ဒီးတၢ်အီၣ် တၢ်အီ အဘိၣ်ကအိၣ်တစှၤန့ၢ်ဝဲလၢအဘျီ(၁၀)ဘျဲၣ်လံအဂ့ၢ်န့ၣ် သ့ၣ်ညါဘၣ်န့ၣ်လီၤ. ဒ်န့ၣ်အသိးဖဲလၢကဘီယူၤဟဲတ့ၢ်လီၤတၢ်ဘိၣ်တဘျီလၢ်လၢ်အတီၢ်ပူၤန့ၣ်စ့ၢ်ကီး...
(KNLA)နုၥ်လီၤခးပယီၤသုးတၢ်သမံသမိးတြဲၤဖဲပလီကီၢ်ဆၣ်ပူၤ,ပယီၤသုးသံ(၁)ဂၤ,ဘၣ်ဒိ(၄)ဂၤ
လါအီကူၥ် ၁၃ သီ, ၂၀၂၅ နံၣ်, ခ့ၣ်အဲးစံၣ် တနီသရံၣ်ကီၢ်ခီဒိၣ်,ပလီကီၢ်ဆၣ်ဟီၣ်ကဝီၤအပူၤပယီၤသုးတၢ်သမံသမိးတြဲၤတဖျၢၣ်လၢအအိၣ်ဆီလီၤအသးဖဲ(နါဒီၣ်)သဝီအပူၤအံၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးပၥ်ဖှိၣ်သ့ၣ်တဖၣ်နုၥ်လီၤခးဝဲအဃိပယီၤသုးမီၤစိရိၤအပှၤသံ(၁)ဂၤ, ဘၣ်ဒိနးနးကျံးကျံး(၄)ဂၤအဂ့ၢ် KNLA သုးက့နီၣ်ဂံၢ်(၄)သုးလီၤဆီပၥ်ဖျါထီၣ်ဝဲဖဲလါအီကူၥ်အသီ(၁၀)အနံၤန့ၣ် လီၤ. ဖဲလါအီကူၥ်(၉)သီအနံၤဂီၤခီ(၆)နၣ်ရံၣ်အဆၢကတီၢ်န့ၣ်ပယီၤသုးတၢ်သမံသမိးတြဲၤတဖျၢၣ်လၢဟဲအိၣ်ဆီလီၤဝဲအသးဖဲ(နါဒီၣ်)သဝီအပူၤအံၤ KNLA သုးက့နီၣ်ဂံၢ်(၄)သုးမုၢ်ဒိၣ်လီၤဆီတၢ်ပၢၢ်ဆၢသုးဖိသ့ၣ်တဖၣ်နုၥ်လီၤခးဝဲဒၣ်န့ၣ်လီၤ. ပယီၤသုးမီၤစိရိၤအံၤခီဖျိတူၢ်ဘၣ်ဝဲလၢအသုးကလၢၤအပူၤတၢ်ဘံၣ်တၢ်ဘၢတအိၣ်လၢဘၣ်အဃိကိးနံၤဒဲးဃၣ်ဃၣ်ဟူးဂဲၤမၤဝဲဒုးယၤရဲၣ်ကျဲၤသ့ၣ်တဖၣ်န့ၣ်လီၤ. လၢတၢ်န့ၣ်အဃိဘၣ်တၢ်ပညိၣ်ထီၣ်ဒုးဝဲဒၣ်ဒ်အံၤလီၤအဂ့ၢ် KNLA သုးက့(၄) သုးမုၢ်ဒိၣ်လီၤဆီစံးဝဲဒၣ်န့ၣ်လီၤ. "အဝဲသ့ၣ်အိၣ်လၢသုးရ့ၣ်အပူၤန့ၣ်ခးဝဲကျိဖးဒိၣ်အိၣ်ဝဲခဲအံၤခဲအံၤလီၤ. အဝဲသ့ၣ်ပညိၣ်ပၥ်ပနီၣ်ခးလီၤဝဲလၢဒူသဝီအပူၤ ဘၣ်ဆၣ်တၢ်ဘၣ်ဒိဘၣ်ထံးဒိၣ်ဒိၣ်မုၢ်မုၢ်တအိၣ်ဘၣ်. ပဝဲဒၣ်န့ၣ်ဒ်သိးပယီၤသုးသ့ၣ်တဖၣ်ကလီၤပြံပြါကွံၥ်ဝဲအဂီၢ်န့ၣ် ပလဲၤထီၣ်ခးဝဲဒၣ်န့ၣ်လီၤ." အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢတၢ်နုၥ်လီၤခးဝဲပယီၤသုးတဘျီအံၤအပူၤန့ၣ်ပယီၤသုးတကပၤက့ၤခီဆၢကဒါက့ၤဝဲလၢကျိဖးဒိၣ်ဒီးဒြိသ့ၣ်တဖၣ်အိၣ်ဝဲဘၣ်ဆၣ်လၢတၢ်ပၢၢ်ဆၢသုးပၥ်ဖှိၣ်တကပၤတၢ်ဘၣ်ဒိဘၣ်ထံးတအိၣ်ဘၣ်ဒီးဂုၥ်လီၤက့ၤဝဲအခံအဂ့ၢ်ဒ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ. ဒ်သုးက့နီၣ်ဂံၢ်(၄)သုးမုၢ်ဒိၣ်လီၤဆီတၢ်ပၥ်ဖျါပူၤအသိးန့ၣ်တကီၢ်ခါခဲအံၤဒုးယၤဟဲဆူၣ်ထီၣ်ဝဲဒီးတၢ်ဟူးတၢ်ဂဲၤအိၣ်လၢတၢ်ကထီၣ်ဒုးပယီၤသုးမီၤစိရိၤသ့ၣ်တဖၣ်အိၣ်ဝဲအဃိကမျၢၢ်ပှၤလီၢ်ကဝီၤဖိသ့ၣ်တဖၣ်ကပလီၢ်ပဒီသးလၢတၢ်လဲၤတၢ်က့ၤဒီးကမျၢၢ်သ့ၣ်တဖၣ်မ်သုတအိၣ်ဘူးဒီးပယီၤသုးအိၣ်တၢ်အလီၢ်တဂ့ၤအဂ့ၢ်ဟ့ၣ်ပလီၢ်ဃၥ်ဝဲဒၣ်န့ၣ်လီၤ.
သုးက့(၄)သုးထီထီၣ်ပှၤသုးဖိခံဂၤလီၢ်လၤဖဲတၢ်မၤ မၤထူရၤမုၢ်နံၤအဆၢကတီၢ်
လါအီကူၥ် ၁၃ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢဘျံးဒဝဲၢ်ကီၢ်ရ့ၣ်,ဖဲမဟါလါအီကူၥ်(၁၂)သီအနံၤလၢအလီၤဘၣ်ဝဲကညီမၤထူ ရၤမုၢ်နံၤအတီၢ်ပူၤန့ၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးက့နီၣ်ဂံၢ်(၄)သုးထီထီၣ်န့ၢ်ဝဲသုးက့အပှၤမၤတၢ်ဖိ(၂)ဂၤလၢလီၢ်လၤအဂ့ၢ်သ့ၣ်ညါဘၣ်လၢကီၢ်ရ့ၣ်ပှၤဘၣ်မူဘၣ်ဒါအအိၣ်န့ၣ်လီၤ. လၢန့ၣ်အမဲၥ်ညါပှၤလၢအဒိးန့ၢ်ဘၣ်ဝဲလီၢ်လၤ(၂)ဂၤအံၤန့ၣ်မ့ၢ်ဝဲ စီၤစိပဲၤ ဟံးမူဒါဒ်သုးက့ဝံစိၥ်တီဆှၢမူဒါခိၣ်ခံတဂၤဒီးမ့ မ့ၢ်လၢအဝဲတဂၤခီန့ၣ်မ့ၢ်ဝဲ စီၤစိမူဝ့ မ့ၢ်သုးက့ဝဲၤဒၢး,ဟံးန့ၢ်မူဒါဒ်ကီၢ်ဆၢတၢ်ရ့လိၥ်မူဒါခိၣ်တဂၤန့ၣ်လီၤ. ပှၤခံဂၤလၢၤ အံၤဘၣ်တၢ်သုးထီထီၣ်န့ၢ်ဝဲလၢဆၣ်တဂၤတဖိးစုၥ်စုၥ်အဂ့ၢ်ကီၢ်ရ့ၣ်ခိၣ်ပဒိၣ်စီၤဖျိးစိဝ့စံးအါထီၣ်ဝဲဒၣ်စ့ၢ်ကီးန့ၣ်လီၤ. "ပှၤလၢတၢ်ထီထီၣ်န့ၢ်ဆၣ်တဖိးတဂၤန့ၣ်မ့ၢ်ဝဲ(စိပဲၤ)ဝံစိၥ်တီဆှၢမူဒါခိၣ်ခံလၢသုးက့တကပၤလီၤ. လၢအဝဲတဂၤန့ၣ်စီၤ စိမူဝ့ အိၣ်လၢသုးက့ဝဲၤဒၢးတကပၤဒီးတၢ်ထီထီၣ်န့ၢ်ဝဲဆၣ်အါထီၣ်တဖိးခဲလၢၥ်အိၣ်ဝဲသၢဖိးဒီးအဝဲန့ၣ်န့ၣ်ဘၣ်ထွဲဒီးသုး က့ဝဲၤဒၢၤအဃိပှၤဟ့ၣ်အီၤမူဒါလၢထံဆၢကီၢ်ဆၢတၢ်ရ့လိၥ်မူဒါခိၣ်န့ၣ်လီၤ." အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ. သုးက့အပှၤလၢအဘၣ်တၢ်သုးထီထီၣ်န့ၢ်ဝဲလီၢ်လၤ(၂)ဂၤအံၤခီဖျိတၢ်တီၣ်ထီၣ်န့ၢ်အဝဲသ့ၣ်အမံၤဒီးမ့ၢ်ပှၤလၢထီၣ်ဘးဝဲအဃိဘၣ်တၢ်ဟ့ၣ်လီၤဝဲဒၣ်ဒ်အံၤလီၤအဂ့ၢ်ဘျံးဒဝဲၢ်ကီၢ်ရ့ၣ်ပဒိၣ်စီၤဖျိးစိဝ့စံးဝဲဒ်အံၤန့ၣ်လီၤ. ဒ်န့ၣ်အသိးဖဲကညီမၤထူရၤမုၢ်နံၤအတီၢ်ပူၤန့ၣ်လၢမုၢ်တြီၢ်ကီၢ်ရ့ၣ်ဟီၣ်ကဝီၤအပူၤကညီဒီကလုၥ်ဂၢၤသးကရၢ(KNDO)သုးထီထီၣ်န့ၢ်စ့ၢ်ကီးအပှၤသုးဖိလီၢ်လၤအဂ့ၢ်သ့ၣ်ညါဘၣ်လၢဃိၣ်လိၥ်တၢ်မုၥ်တၢ်ခုၣ်ကရၢၢ်တၢ်ပၥ်ဖျါပူၤအသိးန့ၣ်လီၤ.
KTLA တဒိၣ်စိဝဲ ကီၢ်ကၠီၣ်တဲၣ်အဂၥ်သဝံကျိၤဘၣ်အဂ့ၢ် လီၢ်ကဝီၤ KNLA အပှၤဘၣ်မူဘၣ်ဒါစံးဝဲ
လါအီကူး ၁၃သီ, ၂၀၂၅နံၣ်, ခ့ၣ်အဲးစံၣ်. ဂၥ်သဝံလၢတၢ်ဆှၢအီၤဆူကီၢ်ကၠီၣ်တဲၣ်ပူၤ, အကျိၤ(ပဲးလိ)တနီၤန့ၣ် KTLA (ကီၢ်သူလ့ၤသုးမုၢ်ဒိၣ်) ဒိၣ်စိန့ၢ်ဝဲဒၣ်အဂ့ၢ်န့ၣ်တမ့ၢ်တၢ်အမ့ၢ်အတီဘၣ်ဒီးဟီၣ်ကဝီၤသ့ၣ်တဖၣ်န့ၣ်အိၣ်ဝဲဒၣ်လၢအဝဲသ့ၣ်ဟူးဂဲၤဟီၣ်ကဝီၤပူၤလီၤအဂ့ၢ် ဘျံးဒဝဲၢ်ကီၢ်ရ့ၣ်,လီၢ်ကဝီၤ KNLA အပှၤဘၣ်မူဘၣ်ဒါလၢအဟူးဂဲၤဖဲဟီၣ်ကဝီၤဝဲန့ၣ်တဂၤစံးဝဲဒၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဂၥ်သဝံအကျိၤဝဲအံၤန့ၣ် စးထီၣ်န့ၢ်ဝဲလၢပီၣ်လဲၣ်ပူၤ ခီတဲၥ်ဝဲဒၣ် ဒဝဲၢ်ဝ့ၢ်ဝံၤ ထီၣ်က့ၤဝဲဆူ နၣ်အ့ၣ်တီၣ်ကီၢ်ဆၢတဆီဆူ ကီၢ်ကၠီၣ်တဲၣ် ကၣ်ခၠၣ်နၣ်ဘူရံကီၢ်ရ့ၣ် အဂ့ၢ်သ့ၣ်ညါဘၣ်န့ၣ်လီၤ.ဂၥ်သဝံကျိၤဝဲအံၤန့ၣ် (KTLA) ဒိၣ်စိဝဲန့ၣ်အထီ ကံလိမံထၢၣ်(၄၀)အဂ့ၢ် ကီၢ်ကၠီၣ်တဲၣ်တၢ်စီၣ်(Bangkokpost) ပၥ်ဖျါတ့ၢ်ဝဲဒၣ်အိၣ်န့ၣ်လီၤ. ဂၥ်သဝံအကျိၤဝဲအံၤန့ၣ် ကီၢ်ကၠီၣ်တဲၣ်ပူၤ ခီပနံၣ်တဖျၢၣ်လၢအမ့ၢ် (PTTEP) ခီပနံၣ်ပၢဝဲဒီး ဂၥ်သဝံကျိၤဝဲအံၤခီတဲၥ်ဘၣ်ဝဲ ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်,လၢၢ်ဒိၣ်စိကီၢ်ဆၣ်န့ၣ်လီၤ.ဒီးဂၥ်သဝံအကျိၤဝဲအံၤန့ၣ် အိၣ်ဝဲဒၣ်လၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA)သုးရ့ၣ်(၂၇)ဒီးသုးရ့ၣ်(၁၀) ဒုးယၤဟူးဂဲၤဟီၣ်ကဝီၤပူၤဒီး ဒ်(KTLA) သုးရိၣ်မဲခိၣ်ကျၢၢ်သုးခိၣ်နၢၤဒါစံးဝဲဒၣ်အသိးန့ၣ်တမ့ၢ်ဘၣ်အဂ့ၢ် (KNLA) သုးရ့ၣ်(၂၇)အသုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤမူဂ့ၤစံးဘၣ်ဝဲ ခ့ၣ်အဲးစံၣ် ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲလၢ“ပမ့ၢ်ဘၣ်ကွၢ်တၢ်အိၣ်သးခဲအံၤန့ၣ် pipelineဝဲအံၤန့ၣ် ပဒုးယၤန့ၣ်ဟူးဂဲၤဝဲလၢ pipeline ဝဲအံၤအဖီခိၣ်ခဲလၢၥ်လီၤ.အခဲအံၤန့ၣ် pipeline ဝဲအံၤန့ၣ် ပတတဲတၢ်နီတမံၤ အဘၣ်ဃးဒီးဒုၣ်ဧီၣ်ပတတဲဘၣ်.တဘၣ်ဃးဒီးဒုၣ်ဒါဒီးတတဲဘၣ်.ကဘၣ်မၤဒ်န့ၣ်ကဘၣ်လဲၤဒ်န့ၣ်ပတတဲနီတမံၤဘၣ်.ခီဖျိလၢထံကီၢ်တဘ့ၣ်အဖီခိၣ်ဒီးမၤဝဲလီၤ.ဘၣ်ဃးဒီးတၢ်မၤအီၣ်မုၢ်ကျိၤဝဲကွၥ်န့ၣ်ပနၢ်တပၢၢ်ဘၣ်.ပသ့ၣ်ညါဒုးယၤတခါလီၤ.ယနၢ်ပၢၢ်လၢတၢ်ခဲလၢၥ်န့ၣ်နကဘၣ်ဒုးန့ၢ်အီၤလီၤ.နမ့ၢ်တဒုးန့ၢ်အီၤဘၣ်န့ၣ်နတန့ၢ်ဘၣ်တၢ်ကလီလီနီတခါဘၣ်.ပမ့ၢ်ကွၢ်ကဒါက့ၤ စးထီၣ်လၢ ပဟဲဆ့ၣ်နီၤဒီး အတၢ်တဲပျံၤတဲဖုးတဖၣ်န့ၣ်တဖိးမံလိၥ်သးဒီးဟီၣ်ခိၣ်မဲၥ်ဖံးခိၣ်တၢ်အိၣ်သးဘၣ်.”အဂ့ၢ်စံးဝဲဒၣ်န့ၣ်လီၤ. ဒ် Bangkokpost တၢ်ကစီၣ်ပၥ်ဖျါဝဲဒၣ်အသိးန့ၣ် ဂၥ်သဝံအကျိၤဝဲအံၤ KTLA...