ဂီၤလ့ၤလီၢ်က၀ီၤကမျၢၢ်လၢဃ့ၢ်ထီၣ်တဖၣ်တနီၤသဂၢၢ်ဘၣ်၀ဲတၢ်အိၣ်ဆိးအီၣ်အီတၢ်ဂ့ၢ်ကီ
လါယူၤလံ ၈ သီ, ၂၀၂၅ နံၣ်, ခ့ၣ်အဲးစံၣ် ဂီၤလ့ၤဒီးအူကြ့ၣ်ထၣ်ပယီၤသုးကလၢၤလၢအိၣ်ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆) ကီးတရံး ကီၢ်ဆၣ်အပူၤအံၤ ခီဖျိတၢ်လဲၤထီၣ်ခး၀ဲအဃိ လီၢ်က၀ီၤကမျၢၢ်လၢဃ့ၢ်ထီၣ်တဖၣ်တနီၤန့ၣ်သဂၢၢ်ဘၣ်၀ဲ အိၣ်ဆိးအီၣ်အီတၢ်ဂ့ၢ်ကီ အဂ့ၢ်န့ၣ် သ့ၣ်ညါဘၣ်လၢကမျၢၢ်ဃ့ၢ်ထီၣ်တဖၣ်အအိၣ်န့ၣ်လီၤ. ဂီၤလ့ၤလီၢ်က၀ီၤကမျၢၢ်လၢလဲၤဃ့ၢ်အိၣ်ယိၤကီၢ်ပူၤတဖၣ်တနီၤန့ၣ်လဲၤအိၣ်လၢလီၢ်အိၣ်ကဒုလီၢ်လၢကၠီၣ်တဲၣ်ပှၤဘၣ်မူဘၣ်ဒါဆီလီၤပၥ်လီၤ၀ဲအံၤအိၣ်အသိးတနီၤလၢအကျိၣ်အစ့အိၣ်တဖၣ်ငါအိၣ်၀ဲဟံၣ်အိၣ်ဘၣ်ဆၣ်မ့မ့ၢ်ကမျၢၢ်လၢအလဲၤအိၣ်ကဒုသးလၢပှၤဟံၣ်ကရၢၢ်ပူၤပှၤတၢ်လီၢ်တဖၣ်န့ၣ်သဂၢၢ်၀ဲအိၣ်ဆိးအီၣ်အီတၢ်ဂ့ၢ်ကီဒ်အံၤလီၤအဂ့ၢ်န့ၣ် ကမျၢၢ်ပိၥ်ခွါလၢအဃ့ၢ်ထီၣ်တဂၤ စံး၀ဲန့ၣ်လီၤ. အ၀ဲစံး၀ဲလၢ“ပဘၣ်ဟးပလဲၥ်သးဒ်အံၤတနီၤအိၣ်ဒီးဖိဆံးဒံၣ်ဆံးတၢ်အီၣ်တၢ်အီဘၣ်ဂီၢ်ဖိးဒ့တလၢၤဘၣ်မီၤနီၤ.ပှၤလၢအအိၣ်ညါဒုကိၢ်ညၢ်၀ဲ.ပှၤလၢအတၢ်တအိၣ်ဘၣ်ညါဘၣ်ဟးအိၣ်လၢပှၤကစူးကတ့ၤဒ်န့ၣ်လီၤ.ပှၤဒုးအီၣ်လၢအံၤတဘျီလၢန့ၣ်တဘျီအီၣ်၀ဲဒ်န့ၣ်လီၤ. အဃိလိၣ်ဘၣ်၀ဲတၢ်အီၣ်တၢ်အီ,ဟုသး,အံသၣ်တဖၣ်,မ့အိၣ်ဒုဂ့ၤလီၤ.တၢ်မၤစၢၤမ့အိၣ်ဒုပသးခုလီၤ.တအိၣ်ဘၣ်ဘျီဘၣ်ဟးဃုအီၣ် လၢပှၤအိၣ်လၢအံၤတစဲးလၢန့ၣ်တစဲးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဒ်လီၢ်က၀ီၤကမျၢၢ်လၢအဃ့ၢ်ထီၣ်တဖၣ်စံး၀ဲအသိးန့ၣ် စးထီၣ်လၢဟီၣ်က၀ီၤပူၤတၢ်ဒုးတၢ်ယၤအိၣ်ထီၣ်လံဘျီန့ၣ် အ၀ဲသ့ၣ် ဃ့ၢ်ထီၣ်လၢယိၤကီၢ်ပူၤတကပၤကအိၣ်လၢတနွံဃၣ်ဃၣ်လံဘၣ်ဆၣ် ကရူၢ်ကရၢလၢကဟဲထီၣ်ထွဲမၤစၢၤအ၀ဲသ့ၣ် တအိၣ်ဘၣ်ဒံး ဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ. တကးဒံးဘၣ်တကီၢ်ခါခဲအံၤတၢ်ထီၣ်၀ဲဂီၤလ့ၤသုးကလၢၤတန့ၢ်ဒံးဘၣ်အဖီခိၣ် ကမျၢၢ်လၢအသူၣ်လီၤဖျးလီၤဃၥ်အဘု,ဘုခ့ တၢ်ထူၣ်တၢ်ဘိတဖၣ်တၢ်ကီတၢ်ခဲအိၣ်လၢကက့ၤကွၢ်၀ဲအဃိဘၣ်ယိၣ်၀ဲလၢထူၣ်တၢ်ဘိကသံဂီၤအဂ့ၢ်န့ၣ် လီၢ်က၀ီၤကမျၢၢ်လၢ အဂၤတဂၤ စ့ၢ်ကီးစံး၀ဲန့ၣ်လီၤ. “တၢ်အိၣ်သးမ့ဆဲးလဲၤသးဒ်အံၤဒုပှၤလၢအမၤအီၣ်ဘုခ့တဖၣ်န့ၣ်မ့တခးဘၣ်ကသံၣ်ဘၣ်ဒုယံၤထီၣ်န့ၣ်နီၣ်ထီၣ်၀ဲန့ၣ်.ဘုနါက့နီၣ်လီၤဘၢကွံၥ်၀ဲန့ၣ်ဘၣ်မနုၤအဃိလဲၣ်ပှၤမးတခးဘၣ်ကသံၣ်အဃိန့ၣ်.မ့အိၣ်ဒ်အံၤဒုတနံၣ်ညါအံၤကဆှူဧါသၢၣ်”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. စးထီၣ်ဖဲအပူၤကွံၥ်လါယူၤ ၂ သီအနံၤန့ၣ် ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်လဲၤထီၣ်ခး၀ဲ ဂီၤလ့ၤဒုးယၤသုးကလၢၤအမဲၥ်ညါအူကြ့ၣ်ထၣ်သုးကလၢၤအံၤစ့ၢ်ကီးတၢ်က၀ီၤခး၀ဲအဖီခိၣ် ပယီၤသုးခးလီၤကဒါကျိဖးဒိၣ်ဆူဒူ သ၀ီပူၤတပယူၥ်ဃီအဃိ လီၢ်က၀ီၤကမျၢၢ်အဂၤ(၃၀၀၀)ဘျဲၣ်ဘၣ်ဃ့ၢ်ထီၣ်၀ဲန့ၣ်လီၤ. ကမျၢၢ်တဖၣ်အံၤအကျါတနီၤန့ၣ်အိၣ်ဒံးကဒုဒံး၀ဲလၢကီၢ်ပူၤတၢ်ဘံၣ်တၢ်ဘၢအလီၢ်အိၣ်၀ဲဒီးတကီၢ်ခါခဲအံၤလၢဂီၤလ့ၤသုးကလၢၤ,အူကြ့ၣ်ထၣ်သုးကလၢၤအခိၣ်အဃၢၤန့ၣ်ဒုးယၤတၢ်ဖ့ၣ်စၢဆဲးကဲထီၣ်ဒံး၀ဲလၢခံခီခံကပၤအဘၢၣ်စၢၤအဖၢမုၢ်န့ၣ်လီၤ.ဒ်န့ၣ်အသိး တၢ်ဒုးအကတီၢ်ဖဲလါယူၤလံ ၃ သီ ဒီး ၄ သီအနံၤခီဖျိပယီၤသုးအကျိဖးဒိၣ်အံၤအဃိ ကမျၢၢ်ဘၣ်ဒိ၀ဲ(၄)ဂၤအဂ့ၢ်န့ၣ် သ့ၣ်ညါဘၣ် န့ၣ်လီၤ. ဒ်န့ၣ်အသိးလၢတၢ်ဒုးတၢ်ယၤအံၤအဃိဆိၣ်စံမၠဲၣ်ဟီၣ်က၀ီၤဒူသ၀ီလၢအိၣ်ဘူး၀ဲဒီးဂီၤလ့ၤဟီၣ်က၀ီၤအံၤစ့ၢ်ကီး အပူၤကွံၥ်တ့ၢ်လါမ့ၤ ဒီးလါယူၤ အခါခီဖျိတၢ်ထီၣ်၀ဲပယီၤသုးကလၢၤတဖၣ်ဒီခဲအံၤသုးကလၢၤလီၤန့ၢ်လၢအလါလံဘၣ်ဆၣ်ခီဖျိလၢကဘီယူၤတၢ်လီၤ ဘၣ်ယိၣ်အိၣ်ဒံးအဃိတုၤလၢခဲအံၤဒူသ၀ီကမျၢၢ်လၢအဃ့ၢ်ထီၣ်ဃၥ်တဖၣ်က့ၤလၢအဟံၣ်အဃီတဘူၣ်ဒံးဘၣ်အိၣ်၀ဲအါမးအဂ့ၢ်န့ၣ် လီၢ်က၀ီၤ ပှၤဘၣ်မူဘၣ်ဒါစံး၀ဲန့ၣ်လီၤ.
ပယီၤသုးဖိလၢဘၣ်တၢ်မၢဆူၣ်ကဲသုး(၂)ဂၤဟဲဃ့ၢ်ဖျိးထီၣ်ဆူ(KNLA)သုးရ့ၣ်(၁၂)
လါယူၤလံ ၈ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢဘျံးဒဝဲၢ်ကီၢ်ရ့ၣ်, ကစၢၢ်ဒိၣ်ကီၢ်ဆၣ်ဟီၣ်ကဝီၤအပူၤဖဲမဟါလါယူၤလံ(၇)သီအ နံၤန့ၣ်ပယီၤသုးဖိလၢဘၣ်တၢ်မၢဆူၣ်ကဲသုး(၂)ဂၤဟဲဃ့ၢ်ထီၣ်ဆူကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးရ့ၣ် (၁၂)အစုပူၤအဂ့ၢ်ကစၢၢ်ဒိၣ်ကီၢ်ဆၣ်အပှၤဘၣ်မူဘၣ်ဒါစံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါ(၇)သီအနံၤန့ၣ်လီၤ. ပယီၤသုးဖိလၢဟဲက့ၤဃ့ၢ်ထီၣ်ဝဲ(၂)ဂၤအံၤမ့ၢ်ပှၤလၢသုးကီၣ်ကးမၢဆူၣ်ကဲဆူၣ်သုးဒီးခီဖျိအဝဲသ့ၣ်တအဲၣ်ဒိးကဲသုးဘၣ်အဃိဟဲဃ့ၢ်ဖျိးဝဲဒၣ်ဆူ(သုးက့-၄)ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးရ့ၣ်(၁၂)အသုးဒ့(၁)အစုပူၤဒ်အံၤလီၤအဂ့ၢ် ကစၢၢ်ဒိၣ်ကီၢ်ဆၣ်အပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ. "အဝဲသ့ၣ်န့ၣ်ခီဖျိလၢမၤဝဲတမုၥ်ဘၣ်ဒီးအိၣ်တဆူၣ်တချ့,အိၣ်ယံၥ်ဒီးဟံၣ်ဖိဃီဖိအဃိဃ့ၢ်ဖျိးထီၣ်ဝဲဒၣ်ဒ်န့ၣ်မီၤနီၤ. အဝဲ သ့ၣ်ဟဲက့ၤဃ့ၢ်ထီၣ်ဝဲဒၣ်လၢပကစၢၢ်ဒိၣ်ကီၢ်ဆၣ်,ဟီၣ်ကဝီၤလၢအမ့ၢ်သုးရ့ၣ်(၁၂),အသုးဒ့(၁)အပူၤလီၤ. ဟဲက့ၤတုၤဝဲ ဒၣ်(၂)ဂၤန့ၣ်လီၤ. " အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ပယီၤသုးဖိလၢအဟဲဃ့ၢ်ပူၤဖျဲးထီၣ်အသး(၂)ဂၤအံၤမ့ၢ်ဝဲပှၤသးစၢ်လၢအသးနံၣ်အိၣ်ဝဲဒၣ်(၁၈)နံၣ်တဂၤ,(၂၁)နံၣ်တဂၤဒီးမ့ၢ်ဝဲပှၤလၢဟဲလီၤဘၣ်မူဒါဖဲပယီၤသုး(ဝ့ဝၣ်)သုးကလၢၤပူၤန့ၣ်လီၤ. ဖဲအဝဲသ့ၣ်ဟဲဃ့ၢ်ဖျိးထီၣ်ဝဲအခါတဟဲက့ၤစိၥ်ဃုၥ် ဝဲတၢ်စုကဝဲၤနီတမံၤဘၣ်အဂ့ၢ်ပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ. ဒ်န့ၣ်အသိးတၢ်လၢပယီၤသုး(ဝ့ဝၣ်)သုးကလၢၤအံၤအိၣ်သူၣ်လီၤအသးဖဲကစၢၢ်ဒိၣ်ကီၢ်ဆၣ်, KNLA သုးရ့ၣ်(၁၂)တၢ်ပၢ ဟီၣ်ကဝီၤဖဲ(မီၤတၤ)သဝီဒီးပယီၤသုးကလၢၤဝဲအံၤအပူၤသုးရ့ၣ်ဒ်အမ့ၢ်(၄၀၃,၄၀၄,၄၀၅)သုးရ့ၣ်ဃုၥ်ဒီးပၢၤကီၢ်ပှၤနီၣ်ဂံၢ်ခဲလၢၥ်အိၣ်ဝဲလၢအဂၤ(၁၀၀)အဂ့ၢ်စံးဝဲဒၣ်န့ၣ်လီၤ.
KNLA သုးက့(၄)ဒီးသုးပၥ်ဖှိၣ်ထီၣ်မၤန့ၢ် သူၣ်ခၣ်ပယီၤသုးကလၢၤ
လါယူၤလံ ၈သီ, ၂၀၂၅နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ထံမိၢ်ပှၢ်ဟီၣ်ကဝီၤ ကီၢ်သူလ့ၤ-ကီၢ်ကၠီၣ်တဲၣ်ကီၢ်ဆၢ သူခၣ်ပယီၤသုးကလၢၤအအိၣ်ဆီလီၤသးဖဲကီၢ်ဆၢထံးန့ၣ် ဖဲမဟါလါယူၤလံ ၇သီအနံၤမုၢ်ထူၣ်ထီၣ်အဆၢကတီၢ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် သုးက့(၄)တီခိၣ်ရိၣ်မဲသုးပၥ်ဖှိၣ်ထီၣ်မၤန့ၢ်ကွံၥ်ဝဲဒၣ်လံအဂ့ၢ် သ့ၣ်ညါဘၣ်လၢသုးက့(၄)အပှၤဘၣ်မူဘၣ်ဒါအအိၣ်န့ၣ်လီၤ. ဘၣ်ဃးဒီး KNLAသုးက့(၄) ထီၣ်မၤန့ၢ် သူခၣ်ပယီၤသုးကလၢၤဘျီဝဲအံၤန့ၣ် သုးက့(၄)အသုးက့ခိၣ် သုးခိၣ်ကျၢၢ်ဖိ စီၤဖိလ့စံးဝဲဒၣ်လၢ“သူၣ်ခၣ်ပယီၤသုးကလၢၤန့ၣ် ဖဲ ၇သီအနံၤမုၢ်ထူၣ်ထီၣ်အဆၢကတီၢ်န့ၣ် သုးမုၢ်ဒိၣ်ထီၣ်မၤန့ၢ်ကွံၥ်ဝဲဒၣ်န့ၣ်ပၥ်ဂၢၢ်ပၥ်ကျၢၤသ့လီၤ. ထံကီၢ်ခံဘ့ၣ်တၢ်နၢ်ပၢၢ်အဖီခိၣ်ပယီၤသုးသ့ၣ်တဖၣ်အံၤဃ့ၢ်နုၥ်ဝဲဒၣ်ဆူကီၢ်ကၠီၣ်တဲၣ်ပူၤလံန့ၣ်လီၤ.တၢ်ရှဲလဲသုးကလၢၤအဖၢမုၢ်လီၤ.”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ တကီၢ်ခါခဲအံၤအိၣ်ဒံးဒၣ်လၢတၢ်ထီၣ်မၤရှဲလဲဝဲသုးကလၢၤအဖၢမုၢ်အဃိ တၢ်ဒိးန့ၢ်ဘၣ်ပယီၤသုးတၢ်ဖိတၢ်လံၤသ့ၣ်တဖၣ်န့ၣ်တၢ်မၤလီၤတံၢ်အီၤတန့ၢ်ဒံးဘၣ်အဂ့ၢ် သုးခိၣ်ကျၢၢ်ဖိစီၤဖိလ့တဲအါထီၣ်ဝဲဒၣ်စ့ၢ်ကီးန့ၣ်လီၤ. သူၣ်ခၣ်ပယီၤသုးကလၢၤဝဲအံၤန့ၣ် အိၣ်ဝဲဒၣ်လၢ ထံခံကီၢ်ဆၢကလံၤစိးတကပၤဒီးသုးကလၢၤအပူၤပယီၤသုးကအိၣ်အဂၤ(၃၀)ဃၣ်ဃၣ်အဂ့ၢ် သ့ၣ်ညါဘၣ်ဒ်လီၢ်ကဝီၤတၢ်ကစီၣ်သန့တနီၤပၥ်ဖျါဝဲဒၣ်အသိးန့ၣ်လီၤ. ကီၢ်ကၠီၣ်တဲၣ်-ကီၢ်သူလ့ၤကီၢ်ဆၢသုးက့(၄)ဟီၣ်ကဝီၤပူၤ ပယီၤသုးကလၢၤဒ်အမ့ၢ် ထံထၣ်,ထံခံ,အံသၣ်ဃ့ၣ်,ညၣ်ပျၤဒီးသူခၣ်သုးကလၢၤသ့ၣ်တဖၣ်အံၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးက့(၄)ဒီးသုးပၥ်ဖှိၣ်ထီၣ်မၤန့ၢ်ကွံၥ်ဝဲဒၣ်လံအဃိဆူထံခံကလံၤစိးတကပၤန့ၣ်အခဲအံၤအိၣ်တ့ၢ်က့ၤ နၣ်အ့ၣ်တီၣ်သုးကလၢၤတဖျၢၣ်အဂ့ၢ်သ့ၣ်ညါဘၣ်လၢသုးက့အပှၤဘၣ်မူဘၣ်ဒါအအိၣ်န့ၣ်လီၤ. တကတီၢ်ဃီ တကီၢ်ခါခဲအံၤန့ၣ် ခီဖျိပယီၤသုးကီၣ်ကးအံၤဘၣ်တူၢ်ဃၣ်ကွံၥ်ဝဲကီၢ်ဆၢဟီၣ်ကဝီၤတၢ်ဒိၣ်စိဒ်အံၤအဖီခိၣ် ဒ်သိးကထီၣ်ဒိၣ်စိက့ၤဝဲ ကီၢ်ဆၢဟီၣ်ကဝီၤအဂီၢ် အခဲအံၤပယီၤသုးအသုးကျိၤဟဲထီၣ်ဝဲခံဘိဒီး လၢကလဲၤထီၣ်ဆူထံခံကီၢ်ဆၢတဘိန့ၣ်ဟဲတုၤဝဲဖဲဝ့ၢ်မတါဒီးလၢကလဲၤထီၣ်ဆူ မိတီၣ်ကီၢ်ဆၢအဂီၢ်သုးကျိၤတဘိန့ၣ်ဟဲတုၤဝဲဖဲသံခိသဝီဟီၣ်ကဝီၤအဂ့ၢ်သ့ၣ်ညါဘၣ်လၢသုးက့(၄)အပှၤဘၣ်မူဘၣ်ဒါအအိၣ်န့ၣ်လီၤ.
ကဘီယူၤလဲၤတ့ၢ်လီၤကျိချံပှၥ်သၣ်ဒီးတၢ်အီၣ်တၢ်အီတဖၣ်လၢ(စကခ-၁၂)သုး၀ဲၤလီၢ်ခိၣ်သ့ၣ်တၢ်လီၢ်
လါယူၤလံ ၇ သီ, ၂၀၂၅ နံၣ်, ခ့ၣ်အဲးစံၣ် သုးကီၣ်ကး(စကခ-၁၂)သုး၀ဲၤလီၢ်ခိၣ်သ့ၣ်တၢ်လီၢ်လၢအိၣ်ကီးတရံး၀့ၢ်ဃၢၤလၢ တၢ်ပၢၢ်ဆၢသုးပၥ်ဖှိၣ်ကရူၢ်က၀ီၤကးတံၢ် ဃၥ်၀ဲအံၤ ဖဲလါယူၤလံ ၄ သီ ဒီး ၆ သီအနံၤန့ၣ် လၢ(Y-8)ကဘီယူၤအံၤတဆီ သုးကီၣ်ကးအံၤသူ၀ဲ(လေထီး) ဒီး လဲၤကွံၥ်လီၤန့ၢ်၀ဲကျိချံ ပှၥ်သၣ်, တၢ်အီၣ်တၢ်အီသ့ၣ်တဖၣ်လၢ သုးကလၢၤပူၤအဂ့ၢ်န့ၣ် ဂံၢ်ခီၣ်ထံးတၢ်ပၢၢ်ဆၢကရူၢ်တကပၤစံး၀ဲန့ၣ်လီၤ. စးထီၣ်လၢလါအ့ဖြ့ၣ်အခါန့ၣ် ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ် က၀ီၤကးတံၢ်ဃၥ်၀ဲ(စကခ-၁၂) သုး၀ဲၤလီၢ်ခိၣ်သ့ၣ်တၢ်လီၢ်အခိၣ်အဃၢၤတဖၣ်အဃိ သုးကီၣ်ကးအံၤလၢကဘီယူၤ(လေထီး)အံၤတဆီဘၣ်ဟဲကွံၥ်လီၤန့ၢ်အပှၤ ကျိချံပှၥ်သၣ်,တၢ်အီၣ်တၢ်အီဘၣ်ဟဲအိၣ်ထီၣ်ဒ်အံၤန့ၣ်လီၤ. ဘၣ်ဃးတၢ်ဂ့ၢ်အံၤဂံၢ်ခီၣ်ထံးပှၤဟ့ၣ်တၢ်ကစီၣ်ဖိလၢအိၣ်တၢ်မဲၥ်ညါတဂၤစံး၀ဲလၢ“ဖဲတလါအံၤလါယူၤလံထီၣ် ၄ သီန့ၣ် ဟဲတ့ၢ်လီၤ န့ၢ်၀ဲတဘျီ. မၤကဒီးဖဲမဟါ ၆ သီ န့ၣ်ဟဲတ့ၢ်လီၤကဒီး၀ဲတဘျီ. ဟဲတ့ၢ်လီၤ၀ဲ(Y-8)ကဘီယူၤ, သူ၀ဲ(လေထီး)ဟဲတ့ၢ်လီၤ၀ဲ တၢ်အီၣ်တၢ်အီ ဒီးကျိချံပှၥ်သၣ်တဖၣ်”အဂ့ၢ်န့ၣ် စံး၀ဲန့ၣ်လီၤ. လၢန့ၣ်အမဲၥ်ညါ ကြုၢ်တု-ကီးတရံးအ့ရှါကျဲလၢအရ့ဒိၣ်၀ဲလၢသုးကီၣ်ကးအဒုးယၤရဲၣ်ကျဲၤအဂီၢ်အံၤန့ၣ် ခီဖျိတၢ်ပၢၢ်ဆၢသုးပၥ်ဖှိၣ်ဒိၣ်စိ ၀ဲအဃိ သုးကီၣ်ကး(အီၣ်စ့ၣ်ယး)သုးကျိၤဂုၥ်ကျဲးစၢးဟဲထီၣ်၀ဲအပှၤနီၣ်ဂံၢ်အါအါဂီၢ်ဂီၢ်လၢကျဲအဘိဘိဘၣ်ဆၣ် တုၤလၢခဲအံၤထီၣ် ၀ဲတဖျိဒံးဘၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ. ဒ်န့ၣ်အသိးစှၤသီအတီၢ်ပူၤအံၤ မီၣ်လမၠဲၣ် မုၢ်ထီၣ်ကလံၤထံးသုး၀ဲၤလီၢ်ခိၣ်သ့ၣ် ကီၢ်ခီပတီၢ်သုးကီၣ်ကးခိၣ်နၢ်ဒိၣ်ထီတဖၣ် ဟဲတုၤ ၀ဲလၢ ကြုၢ်တုခီၣ်ချ့သုးရ့ၣ်(ခမရ-၅၄၅)သုးကလၢၤဒီး ဖဲန့ၣ်နဲၣ်လီၤတၢ်ကလုၢ်လၢတၢ်ကဃိထံသမံသမိးပှၤစံၣ်သုးအါတၢ်ဂ့ၢ်ဒီးပၥ်လီၤ၀ဲ ဒုးယၤ တၢ်မၤ ရဲၣ်ကျဲၤသီလၢကမၤဖျိထီၣ်၀ဲကြုၢ်တု-ကီးတရံးကျဲအဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိစံး၀ဲအသိး...
KNLA ခိၣ်နၢ် ၂ ဂၤလၢအတီခိၣ်ရိၣ်မဲလၢမၤနၢၤပျီတၢ်ဒုးပူၤတဖၣ်တၢ်ဟ့ၣ်လၤကပီၤအီၤလၢတၢ်သးဒူကဘျၣ်တၢ်လၤကပီၤ
လါယူၤလံ ၇ သီ, ၂၀၂၅ နံၣ်, ခ့ၣ်အဲးစံၣ် မၤနၢၤပျီပယီၤသုးကလၢၤလၢအိၣ်ဆီလီၤသးဖဲခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ၀ဲၤလီၢ်ခိၣ်သ့ၣ်လီၢ်လံၤတၢ်လီၢ်လၢန့ၢ်၀ဲ အနံၣ်(၃၀)အံၤန့ၣ် လၢတၢ်ကထီၣ်မၤန့ၢ်က့ၤသုးကလၢၤအံၤအဂီၢ် သုးခိၣ်(၂)ဂၤလၢအတီခိၣ်ရိၣ်မဲရဲၣ်ကျဲၤတၢ်ဒုးဘျီ၀ဲအံၤ တၢ်ဟ့ၣ် လၤကပီၤအီၤလၢကီၢ်သူလ့ၤတၢ်သးဒူကဘျၣ်တၢ်လၤကပီၤအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပၥ်ဖျါဖဲတနံၤအံၤန့ၣ်လီၤ. ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)၀ဲၤလီၢ်ခိၣ်သ့ၣ် တၢ်ဒုးစဲးပြဲးမူဒါခိၣ် သုးခိၣ်ဒိၣ်ဂီၢ်ဂ့ၢ် စီၤခ့ၤလ့ ဒီး သုးရ့ၣ် (၂၂) သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤတ့ၤမၠ့ၣ်ထူ ၂ ဂၤအံၤ လၢကထီၣ်မၤန့ၢ်က့ၤမၤနၢၤပျီသုးကလၢၤအံၤအဂီၢ် ခီဖျိအ၀ဲသ့ၣ် မ့ၢ်ပှၤ လၢအ တီခိၣ်ရိၣ်မဲရဲၣ်ကျဲၤတၢ်အဃိဘၣ်တၢ်ဟ့ၣ်လၤကပီၤအီၤကီၢ်သူလ့ၤတၢ်သးဒူကဘျၣ်တၢ်လၤကပီၤအံၤ ဖဲလါယူၤ ၅ သီ လၢ အလီၤဘၣ်၀ဲ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)မုၢ်နံၤဆၢက့ၤတၢ်ရဲၣ်တၢ်ကျဲၤအပူၤန့ၣ်လီၤ. ဘၣ်ဃးတၢ်ဟ့ၣ်လၤကပီၤ၀ဲတၢ်သးဒူတၢ်လၤကပီၤအံၤန့ၣ် သုးရ့ၣ်(၂၂)သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤတ့ၤမၠ့ၣ်ထူ လၢအဒိး န့ၢ်ဘၣ် တၢ်လၤကပီၤအံၤ စံး၀ဲလၢ “ပထံၣ်ဘၣ်လၢပှၤဟ့ၣ်ပှၤတၢ်လၤကပီၤခီဖျိလၢပမၤန့ၢ်က့ၤမၤနၢၤပျီအဖီခိၣ်မီၤ .တၢ်မၤ သ့ၣ်တဖၣ်အံၤ တမ့ၢ်လၢပမၤသ့တဂၤဘၣ်,ပပၥ်ဖှိၣ်ထီၣ်သးပမၤဒီဒူၣ်လီၤ.တၢ်လၤကပီၤတခါအံၤပှၤဟ့ၣ်ပှၤကညီလၢအပၣ်ဃုၥ်တဖၣ်ကိးဂၤဒဲးဃၣ်ဃၣ်လီၤ.ဘၣ်ဆၣ်မ့မ့ၢ်လၢတၢ်သူၣ်ဒူသးဒူတၢ်လၤကပီၤတခါန့ၣ်ပှၤဟ့ၣ်ဒၣ်ထဲယၤဒီးသုးခိၣ်စီၤခ့ၤလ့ခံဂၤလီၤ.ခိၣ်နၢ်လၢတၢ်ဖီခိၣ်ထံၣ်၀ဲအကြၢး၀ဲဘၣ်၀ဲအဃိဟ့ၣ်၀ဲလီၤ.တၢ်သးသဟီၣ်ဒုအိၣ်ပှဲၤပှဲၤတချုးလၢပှၤဟ့ၣ်ပှၤတၢ်လၤကပီၤဒံးဘၣ်အခါလံ.ဒ်ပမ့ၢ်သုးဖိတဂၤအသိးပဟဲအခါန့ၣ်ပအၢၣ်လီၤသးလၢပကမၤတၢ်လၢထံကီၢ်ဒီးပှၤကလုၥ်ဂီၢ်,ပကဒီသဒၢပပှၤကလုၥ်ဒီးပကမၤထူၣ်ဖျဲးထီၣ်က့ၤပှၤကလုၥ်လၢကုၢ်အလီၢ်အဂီၢ်လီၤ.”အဂ့ၢ်န့ၣ် စံး၀ဲန့ၣ်လီၤ. တကးဒံးဘၣ်လၢတၢ်ကမၤန့ၢ်က့ၤသုးကလၢၤအံၤအဂီၢ် သုးခိၣ်စီၤခ့ၤလ့ ဒီး သုးခိၣ် စီၤတ့ၤမၠ့ၣ်ထူ ခံဂၤအံၤ အမဲၥ်ညါ ခိၣ်နၢ်သိၣ်ဒူ, သုးဖိသံၣ်ဖိလၢအပၣ်ဃုၥ်လၢတၢ်ထီၣ်မၤနၢၤပျီတၢ်ဒုးအပူၤအံၤတဖၣ်လၢအိၣ်ဒီးသးလၢအဒူအဃိၤတဖၣ်စ့ၢ်ကီး ကညီဒီ ကလုၥ်...
တၢ်စူၤခါအဂီၢ်ဒ်သိးတၢ်သူၣ်တၢ်ဖျးကဘၣ်လီၢ်ဘၣ်ဆးဒီးကမျၢၢ်တၢ်အီၣ်ကူအီၣ်လၢကအိၣ်အဂီၢ်(KNU)ရဲၣ်ကျဲၤမၤဝဲ
လါယူၤလံ ၇ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဟီၣ်ကဝီၤအပူၤတၢ်စူၤခါအကတီၢ်ထံဒိၣ်ဟီၣ်လၥ်ဒီးတၢ်သူၣ်တၢ်ဖျးလီၢ်ဘၣ်ဟးဂီၤ ကဲထီၣ်သးအိၣ်ဝဲအဃိဒ်သိးဒီးကမျၢၢ်သ့ၣ်တဖၣ်အတၢ်သူၣ်တၢ်ဖျးကဘၣ်လီၢ်ဘၣ်ဆးအဂီၢ်ဒီးကမျၢၢ်တၢ်အီၣ်ကူအီၣ်လၢကအိၣ်အဂီၢ်ခ့ၣ်အဲၣ်ယူၣ်ရဲၣ်ကျဲၤမၤဝဲအဂ့ၢ်လီၢ်ခၢၣ်သးစံၥ်ပှဲၤသူၣ်ဖျးဝဲၤကျိၤပှၤဘၣ်မူဘၣ်ဒါစံးဝဲန့ၣ်လီၤ. မ့ၢ်ဘၣ်ကွၢ်က့ၤဝဲလၢခ့ၣ်အဲၣ်ယူၣ်တၢ်ပၢဟီၣ်ကဝီၤအပူၤကိးနံၣ်ဒဲးဃၣ်ဃၣ်န့ၣ်ခီဖျိလၢထံဒိၣ်နိယွၤဒီးထံလုၢ်ဘၢဝဲကမျၢၢ်စံၥ်ပှဲၤ,တၢ်သူၣ်တၢ်ဖျးလီၢ်ကဲထီၣ်သးအဃိကမျၢၢ်သ့ၣ်တဖၣ်ထံၣ်ဘၣ်ဝဲတၢ်အီၣ်တၢ်အီတၢ်ဂ့ၢ်ကီဒီးပၢၢ်တုၤလၢဘုဟုလီၤတူၢ်ကွံၥ်ဝဲဒၣ်အိၣ်ထီၣ်ဝဲန့ၣ်လီၤ. အဃိကီၢ်သူလ့ၤတၢ်ပၢဟီၣ်ကဝီၤအပူၤတၢ်စူၤခါကတီၢ်ဒ်သိးဒီးတၢ်သူၣ်တၢ်ဖျးကဘၣ်လီၤဘၣ်ဆး,ထံကလဲၤတရံးအသးဘၣ်ဂ့ၢ်ဘၣ်ဝီဒီးတၢ်အီၣ်ကူၤအီၣ်လၢကဟဲက့ၤအိၣ်ထီၣ်ဝဲအဂီၢ်ဘၣ်တၢ်ပညိၣ်မၤဝဲဒၣ်အီၤအဂ့ၢ်လီၢ်ခၢၣ်သး-ကီၢ်သူ လ့ၤစံၥ်ပှဲၤသူၣ်ဖျးဝဲၤကျိၤခိၣ်ပဒိၣ်(စီၤလ့ၣ်စ့)စံးဝဲဒၣ်ဒ်အံၤန့ၣ်လီၤ. "တၢ်ပညိၣ်န့ၣ်မ့ၢ်ဝဲလၢတၢ်စူၤခါအဂီၢ်တၢ်သူၣ်တၢ်ဖျးကဘၣ်လီၤဘၣ်ဆးဝဲဒီးထံကလဲၤဘၣ်ဂ့ၢ်ဘၣ်ဝီအဂီၢ်န့ၣ်တၢ်မၤဂ့ၤထီၣ်က့ၤထံဘီကျိၤသ့ၣ်တဖၣ်လီၤ. ဒီးဒ်သိးတၢ်အီၣ်ကူၤအီၣ်လၢကဟဲက့ၤအိၣ်ထီၣ်က့ၤဝဲလၢပကီၢ်သူလ့ၤဟိၣ်ကဝီၤပူၤ အဂီၢ်န့ၣ်လီၤ. " အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါလၢကမျၢၢ်ထံဖိကီၢ်ဖိသ့ၣ်တဖၣ်အတၢ်ဖံးအီၣ်မၤဒီးအတၢ်သူၣ်တၢ်ဖျးအပူၤတၢ်ထူၣ်တၢ်ဘိသ့ၣ်တဖၣ်ကဒိးန့ၢ်ဘၣ်ဝဲထံဘၣ်လီၤဘၣ်ဆးအဂီၢ်ကီၢ်ရ့ၣ်(၇)ဘ့ၣ်အကျါကီၢ်ရ့ၣ်(၆)ဘ့ၣ်န့ၣ်တၢ်ခူၣ်န့ၢ်ဝဲထံဘီကျိၤဖးဒိၣ်ခံဘိအသိးတၢ်ဟ့ၣ်လီၤမၤစၢၤစ့ၢ်ကီးဝဲကီၢ်ရ့ၣ်တဘ့ၣ်စုၥ်စုၥ်ဘုချံလၢဟီၣ်ခိၣ်အ့ကၢၣ်(၄၀၀)ဒီးစဲးထဲၣ်တၢ်(Kubota)(၃)ခိၣ်ဒီးမ့မ့ၢ်လၢကီၢ်ရ့ၣ်ဘျံးဒဝဲၢ်န့ၣ်ခီဖျိတၢ်အိၣ်သးအကပၤကပၤအဖီခိၣ်တၢ်နုၥ်လီၤမၤဝဲတၢ်ရဲၣ်တၢ်ကျဲၤဝဲအံၤဒံးဘၣ်အဂ့ၢ်ပဒိၣ်(စီၤလ့ၣ်စ့)စံးအါထီၣ်ဝဲဒၣ်န့ၣ်လီၤ. ဘၣ်ထွဲဒီးတၢ်ရဲၣ်တၢ်ကျဲၤတဘျီအံၤန့ၣ်ဘၣ်တီခိၣ်ရိၣ်မဲအီၤလၢလီၢ်ခၢၣ်သး-ကီၢ်သူလ့ၤစံၥ်ပှဲၤသူၣ်ဖျးဝဲၤကျိၤ(KAD), ခ့ၣ်အဲၣ် ယူၣ်-မုၢ်ကျိၤဝဲၤကွၥ်ကမံးတံၥ်(KECS)ပၥ်ဖှိၣ်မၤသကိးဒီးကီၢ်ရ့ၣ်ကီၢ်ဆၣ်ခိၣ်နၢ်သ့ၣ်တဖၣ်န့ၣ်လီၤ. ဒီးတၢ်ရဲၣ် တၢ်ကျဲၤဝဲအံၤန့ၣ်ဘၣ်တၢ်စးထီၣ်မၤအီၣ်လၢကီၢ်သူလ့ၤတၢ်ပၢဟီၣ်ကဝီၤလၢကီၢ်ရ့ၣ်(၆)ဘ့ၣ်အပူၤလံအဂ့ၢ်သ့ၣ်ညါဘၣ် လၢလီၢ်ခၢၣ်သးပှၤဘၣ်မူဘၣ်ဒါအိၣ်န့ၣ်လီၤ.
သုးဖိလၢတၢ်ဖီလၥ် မ့ၢ်ထၢဆူၣ်ကမျၢၢ်စ့ဒီးသုးန့ၣ် တလိၣ်ပျံၤဘၣ်ဒီးတီၣ်ဖျါထီၣ်အီၤအဂ့ၢ် BGF စံးဝဲ
လါယူၤလံ ၇သီ, ၂၀၂၅ နံၣ်, ခ့ၣ်အဲးစံၣ်. ဖဲပူၤကွံၥ်လါယူၤလၢၥ် လါယူၤလံထီၣ်သီအဆၢကတီၢ်န့ၣ် ကညီကီၢ်စဲၣ်, လူၢ်ပျဲၢ်ကီၢ်ဆၣ်ပူၤ သဝီတနီၤန့ၣ် သုးခိးကီၢ်ဆၢ BGFသုးဟီၣ်ကဝီၤနီၣ်ဂံၢ်(၁)ဒီးနီၣ်ဂံၢ်(၂) ဒီး သဝီသးပှၢ်ပၥ်ဖှိၣ်ထီၣ်သးဟးထၢဝဲဒၣ်စ့ဆူကမျၢၢ်အအိၣ်လၢကမၤစၢၤဝဲ ပှၤကဘၣ်လဲၤထီၣ်သုးတၢ်မၤလိသ့ၣ်တဖၣ်အဂီၢ်အိၣ်ဝဲဒၣ်အဂ့ၢ် တၢ်ကစီၣ်ဟူထီၣ်သါ လီၤဝဲဒၣ်န့ၣ်လီၤ. တၢ်သိၣ်လိ(၃)လါအတီၢ်ပူၤန့ၣ်(BGF)သုးခိၣ်ဖိလၢတၢ်ဖီလၥ်ဒီးသဝီသးပှၢ်ပၥ်ဖှိၣ်သးထၢဝဲဟံၣ်တဖျၢၣ်န့ၣ် တကလီၢ်ကၠးအဂ့ၢ်တၢ်ကစီၣ်ဟးထီၣ်အိၣ်ဝဲဒ်န့ၣ်အဖီခိၣ် တၢ်ထၢကျိၣ်စ့လၢကမျၢၢ်အိၣ်မ့ၢ်ဂ့ၤ,ထၢန့ၢ်ဆူၣ်သုးမ့ၢ်အိၣ်မ့ၢ်ဂ့ၤန့ၣ်တလိၣ်ဘၣ်ပျံၤဘၣ်ဒီးကတီၣ်ဖျါထီၣ်ဘၣ်အဂ့ၢ် BGF သုးဟီၣ်ကဝီၤနီၣ်ဂံၢ်(၂)အသုးဟီၣ်ကဝီၤခိၣ် သုးခိၣ်ကျၢၢ်ဖိ စီၤတ့ၤဝ့စံးဘၣ်ဝဲ ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲလၢ“ပထၢကျိစ့တအိၣ်နီဘျီဘၣ်.ပှၤထၢမ့ၢ်အိၣ်န့ၣ်တဲကျၢပှၤ ပကဟံးန့ၢ်အရ့န့ၣ်လီၤ.လ့ၤတက့ၤပတမၤဘၣ်.ပှၤဒူဖိသဝီဖိတၢ်ကီတၢ်ခဲန့ၣ်ပသ့ၣ်ညါစ့ၢ်ကီးလီၤ.ဟံၣ်တဖျၢၣ်တဂၤကဘၣ်ကဲသုးစ့ၢ်ကီးပတၢ်ကရၢကရိပၥ်လီၤတၢ်ဘျၢတအိၣ်ဘၣ်.မ့မ့ၢ်တၢ်လီၤကရၢကရိသုးဖိဒီးဒူသဝီဘံၣ်ဘၢန့ၣ်အိၣ်လီၤ.မ့ၢ်သ့ၣ်ညါန့ၣ်မတဂၤလဲၣ်လဲၤထၢတၢ်,မတဂၤလဲၤဃ့တၢ် တဲကျၢပှၤဒီးပကဟံးန့ၢ်အရ့တုၤလီၤတီၤလီၤန့ၣ်လီၤ.တဲဘၣ်ကမျၢၢ်န့ၣ်လၢတၢ်ဖီခိၣ်တၢ်နဲၣ်လီၤလၢကဘၣ်ဃ့ကျိၣ်ဃ့စ့ဒ်န့ၣ်တအိၣ်ဘၣ်.ဟဲတၢၣ်မ့ဘူၣ်တခီ.အသဝီသးပှၢ်မ့ၢ်ပၣ်ဃုၥ်တၢၣ်ဝဲမ့တဘၣ်န့ၣ်တၢ်လီၢ်ဖဲန့ၣ်ပှၤဘၣ်မူဘၣ်ဒါအိၣ်ကတၢၢ်တၢၢ်လီၤ.ဟးတၢၣ်ဝဲလၢတၢ်လီၢ်လၢအဘူးသ့လီၤ.တဲကျၢဝဲသ့လီၤ.ဘၣ်ပျံၤအလီၢ်တအိၣ်ဘၣ်.”အဂ့ၢ်စံးဝဲဒၣ်လီၤ. လၢန့ၣ်အမဲၥ်ညါ BGF အံၤလၢဒူသဝီတၢ်ဘံၣ်တၢ်ဘၢအဂီၢ်လီၤကရၢကရိဝဲဒၣ်ကမျၢၢ်ဒီးဒုးထီၣ်ဝဲဒၣ်ဂံၢ်ခီၣ်ထံးသုးတၢ်မၤလိ(၃)လါအိၣ်ဝဲဒၣ်ဒီးပှၤလၢသးဆူၣ်တနီၤန့ၣ်နုၥ်လီၤဝဲလၢသုးပူၤအိၣ်ဒီးလၢသးတဆူၣ်ဘၣ်တဖၣ်န့ၣ်တၢ်တမၢန့ၢ်ဆူၣ်အီၤဘၣ်အဂ့ၢ် သုးခိၣ်ကျၢၢ်ဖိစီၤတ့ၤဝဲတဲအါထီၣ်ဝဲဒၣ်အသိးပှၤလၢဟဲထီၣ်တၢ်မၤလိသ့ၣ်တဖၣ်အဂီၢ်တၢ်တိစၢၤမၤစၢၤအီၤလၢကိၣ်ပှ့ၤအိၣ်ဝဲဒၣ်အဂ့ၢ် သုးခိၣ်ကျၢၢ်ဖိစီၤတ့ၤဝ့တဲအါထီၣ်ဝဲဒၣ်စ့ၢ်ကီးန့ၣ်လီၤ. BGF အံၤ ဂံၢ်ခီၣ်ထံးသုးတၢ်မၤလိဒီးဒူသဝီဘံၣ်ဘၢအဂီၢ်န့ၣ်ဟ့ၣ်ဝဲတၢ်မၤလိလၢ(၃)လါအတီၢ်ပူၤဒီး ပှၤလၢသးအိၣ်ထီၣ်က့ၤကျိဖးဒိၣ်တၢ်မၤလိဒီးခီမဲဒိၣ်(Commando) တၢ်မၤလိသ့ၣ်တဖၣ် ပှဲၤပှဲၤန့ၣ်ကဘၣ်ထီၣ်ဝဲဒၣ်(၂)နံၣ်ဒီးတၢ်သိၣ်လိဝဲအံၤတယံၤလၢၤဘၣ်န့ၣ်ကစးထီၣ်လီၤအဂ့ၢ် သ့ၣ်ညါဘၣ်လၢ BGF အပှၤဘၣ်မူဘၣ်ဒါအအိၣ်န့ၣ်လီၤ. ဖဲအပူၤကွံၥ် လါယူၤ ၂၉သီအနံၤ ဖဲ BGF လီၢ်ခၢၣ်သးစွ့ၣ်ကိၣ်ကိၤဟီၣ်ကဝီၤ BGF သုးဟီၣ်ကဝီၤနီၣ်ဂံၢ်(၃)မၤဝဲ (Commando) တၢ်သိၣ်လိ(၄)ဘျီတဘျီအခါန့ၣ် ပှၤထီၣ်တၢ်မၤလိဖိအိၣ်ဝဲ(၃၀၀)ဃၣ်ဃၣ်အဂ့ၢ်သ့ၣ်ညါဘၣ်ဒ်လီၢ်ကဝီၤတၢ်ကစီၣ်တနီၤပၥ်ဖျါဝဲဒၣ်အသိးန့ၣ်လီၤ. ဒ်န့ၣ်အသိး ဖဲ၂၀၂၄နံၣ်ကတၢၢ်အခါစ့ၢ်ကီး BGF မၤဝဲ(၃)လါတီၢ်ပူၤဂံၢ်ခီၣ်ထံးသုးတၢ်မၤလိဒီးကျိဖးဒိၣ်တၢ်မၤလိအဆၢကတီၢ် ပှၤဖျိထီၣ်အိၣ်ဝဲ(၁,၅၀၀)ဂၤအကျါ ပှၤပိၥ်မုၣ်ပၣ်ဝဲ(၁၀၀)ဃၣ်ဃၣ်အဂ့ၢ်သ့ၣ်ညါဘၣ်စ့ၢ်ကီးန့ၣ်လီၤ.
ပယီၤသုးအပှၤသုးဖိဟဲက့ၤပၥ်လီၤကဒီးတၢ်စုကဝဲၤလၢ(KNLA)သုးရ့ၣ်-၁၁အစုပူၤ(၅)ဂၤ
လါယူၤလံ ၆ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢဘျံးဒဝဲၢ်ကီၢ်ရ့ၣ်, တနီသရံၣ်ကီၢ်ဆၣ်ဟီၣ်ကဝီၤအပူၤဖဲမဟါလါယူၤ(၅)သီအ နံၤန့ၣ်ပယီၤသုးအပှၤသုးဖိ(၅)ဂၤဟဲက့ၤပၥ်လီၤတၢ်စုကဝဲၤလၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးရ့ၣ် (၁၁)အစုပူၤအဂ့ၢ်ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်ထုးထီၣ်ပၥ်ဖျါဝဲဖဲတနံၤအံၤလါယူၤလံ(၆)သီအနံၤန့ၣ်လီၤ. ပယီၤသုးဖိလၢအဟဲက့ၤပၥ်လီၤတၢ်စုကဝဲၤသ့ၣ်တဖၣ်အံၤမ့ၢ်ဝဲ(ခလရ-၂၆၇)အပှၤ(၂)ဂၤဒီး(ခလရ-၁၀၃)အပှၤ(၃)ဂၤခဲ လၢၥ်(၅)ဂၤန့ၣ်လီၤ. ဖဲအဝဲသ့ၣ်ဟဲက့ၤပၥ်လီၤတၢ်စုကဝဲၤအခါဟဲက့ၤစိၥ်ဃုၥ်ဝဲဒၣ်ဒီး MA-1 ကျိ(၂)ခိၣ်, ကျိဆၣ်ဒၢ(၇) ဘ့ၣ်ဒီးကျိချံ(၁၉၈)ဖျၢၣ်အဂ့ၢ်ဒ်လံၥ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ. မ့ၢ်ဘၣ်ကွၢ်က့ၤဝဲဖဲစှၤသီအတီၢ်ပူၤန့ၣ်ပယီၤသုးဟဲက့ၤပၥ်လီၤတၢ်စုကဝဲၤလၢ(KNLA)သုးရ့ၣ်(၁၁)အစုပူၤအိၣ်စ့ၢ်ကီးဝဲအဃိဘၣ်ထွဲဒီးပယီၤဘၣ်ဟဲက့ၤပၥ်လီၤတၢ်စုကဝဲၤအံၤမ့ၢ်လၢတၢ်ဂ့ၢ်မနုၤအဃိလဲၣ်အဂ့ၢ်န့ၣ်ဘျံးဒဝဲၢ်ကီၢ်ရ့ၣ်နဲၣ်ရွဲၣ်ပဒိၣ်စီၤအဲၣ်နၤစံးဝဲဒ်အံၤန့ၣ်လီၤ. "ပယီၤန့ၣ်ဟဲပၥ်လီၤတၢ်စုကဝဲၤအိၣ်ဝဲထီဘိန့ၣ်လီၤ. မ့ၢ်ဝဲန့ၣ်အါထီၣ်ဘျီဘျီ,စှၤလီၤဘျီဘျီလီၤ. ပယီၤသုးန့ၣ်ခီဖျိလၢ တၢ်ဒုးအပူၤသံအါဒီးကဂုၥ်က့ၤခံနါက့ဂုၥ်တသ့ဘၣ်,တအဲၣ်ဒိးမၤလၢၤသုးဘၣ်အဃိဃုကျဲဃ့ၢ်ထီၣ်ဝဲလီၤ. တနီၤနီၤဃု ကျဲဃ့ၢ်ထီၣ်တဖျိးဘၣ်အိၣ်ဝဲလီၤ. လီၤဆီဒၣ်တၢ်ပယီၤသုးခဲခဲအံၤတဖၣ်န့ၣ်မ့ၢ်ဝဲပယီၤသုးဖီၣ်ဆူၣ်မၢဆူၣ်ကဲသုး,တမ့ၢ် လၢအနီၢ်ကစၢ်အဲၣ်ဒိးကဲဝဲဘၣ်." အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဒ်န့ၣ်အသိးဘျံးဒဝဲၢ်ကီၢ်ရ့ၣ်(သုးက့-၄)ဟီၣ်ကဝီၤအပူၤမ့ၢ်ဘၣ်ကွၢ်က့ၤစးထီၣ်ဖဲအပူၤကွံၥ်လါယူၤအတီၢ်ပူၤဒီးတုၤလီၤ လၢတလါအံၤလါယူၤလံ(၆)သီအနံၤအံၤန့ၣ်ပယီၤသုးဖိဟဲက့ၤပၥ်လီၤတၢ်စုကဝဲၤခဲလၢၥ်အိၣ်ဝဲ(၉)ဂၤလံအဂ့ၢ်ဒ်ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်ထုးထီၣ်ပၥ်ဖျါတ့ၢ်ဝဲအသိးသ့ၣ်ညါဘၣ်န့ၣ်လီၤ.
လၢၢ်ဒိၣ်ကီၢ်ဆၣ်ပယီၤသုးဟဲတ့ၢ်လီၤဒြိမ့ၣ်ပိၢ်ဖဲပှၤလီၢ်အိၣ်ကမှံဖိအိၣ်တၢ်အလီၢ်အဃိသံ(၆)ဂၤ,ဘၣ်ဒိ(၃)ဂၤ
လါယူၤလံ ၆ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢတၢ်ပၢလၢအမ့ၢ်ချၢၣ်လွံၢ်ထူၣ်ကီၢ်ရ့ၣ်,လၢၢ်ဒိၣ်ကီၢ်ဆၣ်ဟီၣ်ကဝီၤအပူၤဖဲအပူၤမ ဟါလါယူၤလံ(၅)သီအနံၤ,ဟါခီ(၅)ဘျဲၣ်အဆၢကတီၢ်န့ၣ်ပယီၤသုးအဒြိဟဲတ့ၢ်လီၤမ့ၣ်ပိၢ်ဖဲပှၤလီၢ်အိၣ်ကမှံဖိအိၣ်ဆိးတၢ်လီၢ်ပူၤအဃိပှၤလီၢ်အိၣ်ကမှံဖိသံ(၆)ဂၤ,ဘၣ်ဒိ(၃)ဂၤအဂ့ၢ်သ့ၣ်ညါဘၣ်လၢလၢၢ်ဒိၣ်ကီၢ်ဆၣ်ပှၤဘၣ်မူဘၣ်ဒါအအိၣ်န့ၣ်လီၤ. တၢ်ကဲထီၣ်အသးအံၤဖဲမဟါဟါခီ(၅း၅၅)မံးနံးအဆၢကတီၢ်ဖဲလၢၢ်ဒိၣ်ကီၢ်ဆၣ်,တီကၠီၣ်ပီၣ်သဝီတၢ်မၤလိကၠိအပူၤ,လၢအမ့ၢ်ပှၤလီၢ်အိၣ်ကမှံဖိဟဲဃ့ၢ်အိၣ်ကဒုဝဲသးအလီၢ်န့ၣ်ပယီၤသုးလၢအမ့ၢ်(နၣ်သၣ်ကွ့)ပယီၤသုးဟဲတ့ၢ်လီၤဝဲဒြိမ့ၣ်ပိၢ်(၂)ဖျၢၣ်အဃိပှၤလီၢ်အိၣ်ကမှံဖိဘၣ်သံဝဲ(၆)ဂၤ,ဘၣ်ဒိ(၃)ဂၤအဂ့ၢ်လၢၢ်ဒိၣ်ကီၢ်ဆၣ်ပှၤကတိၤတၢ်ပၢပဒိၣ်စီၤဝါမုၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ. "ကမျၢၢ်ဘၣ်သံ,ဘၣ်ဒိဖဲပယီၤသုးဟဲခးလီၤဒြိဘျီဝဲန့ၣ်န့ၣ်မ့ၢ်ဝဲဒၣ်(နၣ်သၣ်ကွ့)ပှၤကမျၢၢ်ဖိသ့ၣ်တဖၣ်လီၤ. ဖဲလၢ(နၣ် သၣ်ကွ့)တၢ်ကဲထီၣ်အသးဒီးအဝဲသ့ၣ်ဟဲဃ့ၢ်အိၣ်ကဒုအသးလၢ(တီကၠီၣ်ပီၣ်)သဝီလီၤ. မ့ၢ်လၢက့ၤအိၣ်က့ၤဝဲလၢ(နၣ် သၣ်ကွ့)တဘူၣ်လၢၤဘၣ်အဃိတၢ်ပၥ်အဝဲသ့ၣ်ဖဲကၠိကရၢၢ်အပူၤလီၤ. ဒုၣ်ဒါဟဲခးလီၤဒြိဖဲမဟါန့ၣ်ဘၣ်ဒိဝဲ(၃)ဂၤဒီးသံဝဲ (၆)ဂၤန့ၣ်လီၤ. " အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါကမျၢၢ်ပှၤလီၢ်အိၣ်ကမှံဖိလၢဟဲဃ့ၢ်အိၣ်ကဒုအသးဖဲ(တီကၠီၣ်ပီၣ်)တၢ်မၤလိကၠိကရၢအပူၤသ့ၣ်တဖၣ်အံၤမ့ၢ်ဝဲ(နၣ်သၣ်ကွ့)သဝီဖိသ့ၣ်တဖၣ်ဒီးမ့ၢ်လၢပယီၤသုးအဒြိဟဲတ့ၢ်လီၤဝဲမ့ၣ်ပိၢ်ဖဲကၠိကရၢၢ်ပူၤဒ်အံၤအဃိတၢ်ဘၣ်ရဲၣ်ကျဲၤန့ၢ်က့ၤအဝဲသ့ၣ်တၢ်လီၢ်လၢအသီဒီးကတီၢ်အံၤတၢ်ကီတၢ်ခဲအိၣ်လၢတၢ်အိၣ်တၢ်ဆိးအဂီၢ်အဂ့ၢ်ပဒိၣ်စီၤဝါမုၢ်စံးအါထီၣ်ဝဲဒၣ်န့ၣ်လီၤ. တကးဒံးဘၣ်ပှၤလီၢ်အိၣ်ကမှံဖိလၢဘၣ်သံဘၣ်ဒိဘၣ်ထံးဝဲသ့ၣ်တဖၣ်အကျါပၣ်ဃုၥ်စ့ၢ်ကီးဝဲဒၣ်ဒီးပှၤလီၢ်အိၣ်ကမှံဖိဖိသၣ်လၢအသးနံၣ်အိၣ်ဒံးဒၣ်ထဲ(၂)နံၣ်တဂၤဒီး(၆)နံၣ်တဂၤတဖၣ်အဂ့ၢ်ဒ်ကီၢ်ဆၣ်အပှၤဘၣ်မူဘၣ်ဒါတၢ်ပၥ်ဖျါပူၤသ့ၣ်ညါဘၣ်န့ၣ်လီၤ. ဒ်န့ၣ်အသိးလၢမူကီၢ်ဆၣ်,ဖဲ(ဝဲဒီၣ်ဝဲကၠံ)သဝီအပူၤစ့ၢ်ကီးန့ၣ်ဖဲလါယူၤ(၂၉)သီခီဖျိတၢ်ဒုးကဲထီၣ်လၢတၢ်ပၢၢ်ဆၢသုးပၥ်ဖှိၣ်ဒီးပယီၤသုးကီၣ်ကးအဘၢၣ်စၢၤဝံၤအလီၢ်ခံသုးကီၣ်ကးအံၤလၢကလံၤကျါကဘီယူၤတဆီဟဲခးလီၤစၢၤန့ၢ်ဝဲတၢ်အဃိဘၣ်သံဝဲသဝီဖိ(၁၁)ဂၤ,ဘၣ်ဒိနးနးကျံးကျံးဒီးဘၣ်ဒိတဆံးတက့ၢ်အိၣ်ဝဲအဂၤ(၄၀)ဘျဲၣ်ဒီးလၢအကျါပှၤလီၢ်အိၣ်ကမှံဖိစ့ၢ်ကီးပၣ်ဃုၥ်ဝဲအဂ့ၢ်မူကီၢ်ဆၣ်ပှၤလီၢ်ကဝီၤဖိစံးဝဲန့ၣ်လီၤ.
ပတအဲၣ်တၢ်ဒုးတၢ်ယၤဘၣ်ခီဖျိပပှၤကလုၥ်လိၣ်ဘၣ်တၢ်သဘျ့အဃိပဒုးတၢ်လီၤအဂ့ၢ်(KNLA)သုးရိၣ်မဲခိၣ်ကျၢၢ်-၂ သုး ခိၣ်ကျၢၢ်စိစီၤဘီကၠီၣ်ဟဲစံးဝဲ
လါယူၤလံ ၅ သီ, ၂၀၂၅ နံၣ်, ခ့ၣ်အဲးစံၣ် တနံၤလါယူၤလံ(၅)သီအနံၤလၢအမ့ၢ်ဝဲကီၢ်သူလ့ၤသုးမုၢ်ဒိၣ်မုၢ်နံၤပှဲၤထီၣ်ဝဲ(၇၆)ဝီတဝီလံန့ၣ်လီၤ. လၢတၢ်အနံၣ်(၇၀) ဘျဲၣ်အတီၢ်ပူၤပဂဲၤလိၥ်တၢ်အံၤတမ့ၢ်လၢပအဲၣ်တၢ်ဒုးတၢ်ယၤဘၣ်မ့ၢ်လၢပှၤကညီကလုၥ်လိၣ်ဘၣ်ဝဲတၢ်ခွဲးတၢ်ယၥ်, တၢ်သဘျ့လၢကသူၣ်ထီၣ်တၢ်အိၣ်မူဒ်ပှၤတကလုၥ်အသိးအဃိပဒုးတၢ်လီၤအဂ့ၢ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးရိၣ်မဲခိၣ်ကျၢၢ်(၂)သုးခိၣ်ကျၢၢ်ဖိစီၤဘီကၠီၣ်ဟဲစံးလီၤဝဲဖဲတနံၤအံၤန့ၣ်လီၤ. ကညီကလုၥ်အတၢ်မိၣ်န့ၢ်သးလီအဂီၢ်တၢ်ဂဲၤလိၥ်တ့ၢ်ဝဲလၢတၢ်မုၥ်တၢ်ခုၣ်အကျဲအံၤအိၣ်ဝဲအဘျီတဖၣ်အဘျီလံဒီးအကတၢၢ်န့ၣ်တုၤဃီလၢတၢ်စုဆူၣ်ခီၣ်တကးအကျဲလီၤအဃိဘၣ်တၢ်ဒုးအိၣ်ထီၣ်ဝဲကီၢ်သူလ့ၤသုးမုၢ်ဒိၣ်လၢတၢ်ကဒုးန့ၢ်က့ၤဝဲပပှၤကလုၥ်တၢ်ခွဲးတၢ်ယၤ,တၢ်သဘျ့လီၤအဂ့ၢ်(KNLA)သုးရိၣ်မဲခိၣ်ကျၢၢ်-၂ သုးခိၣ်ကျၢၢ်စိ စီၤဘီကၠီၣ်ဟဲစံးလီၤ ဝဲဒၣ်ဒ်အံၤန့ၣ်လီၤ. "တမ့ၢ်လၢပအဲၣ်တၢ်ဒုးတၢ်ယၤဘၣ်. ခီဖျိလၢပပှၤကလုၥ်လိၣ်ဘၣ်နီၢ် ကီၢ်လၢတၢ်ခွဲးတၢ်ယၥ်,တၢ်သဘျ့,လီၢ်အိၣ်လီၢ်ဆိး ဒီးကသူၣ်ထီၣ်တၢ်အိၣ်မူဒ်ပှၤတကလုၥ်အသိးန့ၣ်တၢ်မုၥ်တၢ်ခုၣ်ကျဲန့ၣ်ပဂဲၤလိၥ်တ့ၢ်အီၤအဘျီတဖၣ်အဘျီလံဒီးအကတၢၢ်န့ၣ်ပတုၥ်လၢတၢ်စုဆူၣ်ခီတကးအကျဲဒီးပဘၣ်ဒုးအိၣ်ထီၣ်ဝဲဒၣ်ပသုးမုၢ်ဒိၣ်ဒီးပဘၣ်ဒုးန့ၢ်က့ၤဝဲဒၣ်ပတၢ်ခွဲးတၢ်ယၤ,တၢ်သဘျ့,ပဘၣ်ဒုးန့ၢ်ဝဲဒၣ်ပဟီၣ်ကဝီၤဒ်န့ၣ်န့ၣ်လီၤ. " အဂ့ၢ်စံးဝဲဒၣ်န့ၣ်လီၤ. ဆၢကတီၢ်အခဲအံၤန့ၣ်မ့ၢ်ဝဲစုကဝဲၤတၢ်ပၢၢ်ဆၢအဆၢကတီၢ်အဃိဖဲစုကဝဲၤတၢ်ပၢၢ်ဆၢအဆၢကတီၢ်သုးမုၢ်ဒိၣ်န့ၣ်မ့ၢ်ဝဲဒၣ်နီၣ်ဂံၢ်(၁)လၢကဘၣ်ဟ့ၣ်လီၤအသးသမူဒူဒူဃူဃူလၢထံရူၢ်ကီၢ်သဲးကလၢထီၣ်ပှဲၤထီၣ်ဝဲအဂီၢ်န့ၣ်မ့ၢ်ဒၣ်တၢ်လၢအရ့ဒိၣ်ဝဲအဂ့ၢ်သုးခိၣ်ကျၢၢ်စိစီၤဘီကၠီၣ်ဟဲဆီၣ်တခူထီၣ်ဝဲဒၣ်န့ၣ်လီၤ. ဒ်န့ၣ်အသိးလၢတၢ်အနံၣ်(၇၀)ဘျဲၣ်အတီၢ်ပူၤအံၤသိၣ်ဒူ,ခိၣ်နၢ်သ့ၣ်တဖၣ်လုၢ်ထီၣ်တ့ၢ်ဝဲသးသမူအါအါဂီၢ်ဂီၢ်လံဘၣ်ဆၣ်ပတၢ်ဂဲၤလိၥ်အံၤတကတၢၢ်ဝဲဒၣ်ဒံးဘၣ်,အဃိဒ်သိးဒီးပတၢ်မုၢ်လၢ်ကလၢထီၣ်ပှဲၤထီၣ်ဝဲဒၣ်အဂီၢ်ဘၣ်ဂုၥ်ကျဲးစၢၤဝဲဆူညါအိၣ်ဝဲအါမးဒံးလၢပဖိပလံၤ,ပှၤလၢခံတစိၤကအိၣ်မုၥ်အိၣ်ခုၣ်ဘၣ်ဝဲအဂီၢ်န့ၣ်လီၤ. အဃိလၢအလီၤဘၣ်ဝဲကီၢ်သူလ့ၤသုးမုၢ်ဒိၣ်မုၢ်နံၤအံၤအဖီခိၣ်သိၣ်ဒူ,ခိၣ်နၢ်,သုးဖိသံၣ်ဖိလၢလုၢ်ထီၣ်တ့ၢ်အသးသမူသ့ၣ်တဖၣ်မ့ၢ်ဂ့ၤ,ပှၤလၢအိၣ်မူမၤဒံးတၢ်လၢမူဒါတၢ်ဖံးတၢ်မၤပူၤခဲအံၤသ့ၣ်တဖၣ်မ့ၢ်ဂ့ၤ(KNLA)သုးရိၣ်မဲခိၣ်ကျၢၢ်ခံသုးခိၣ်ကျၢၢ်စိစီၤဘီကၠီၣ်ဟဲဟ့ၣ်ဂံၢ်ဟ့ၣ်ဘါစ့ၢ်ကီးဝဲဒ်အံၤန့ၣ်လီၤ. "လၢကီၢ်သူလ့ၤသုးမုၢ်ဒိၣ်မုၢ်နံၤအဝဲအံၤန့ၣ်ပၥ်လၤပၥ်ကပီၤဘၣ်ဝဲသုးဒူ,ခိၣ်နၢ်ကိးဂဲၤဒဲးန့ၣ်လီၤ. ပှၤလၢလုၢ်ထီၣ်တ့ၢ်သး သမူမ့ၢ်ဂ့ၤ,လၢလုၢ်ထီၣ်ဝဲအက့ၢ်အဂီၤမ့ၢ်ဂ့ၤဒီးပှၤလၢအိၣ်မူဒံးခဲအံၤလၢမၤတၢ်လၢမူဒါတၢ်ဖံးတၢ်မၤပူၤသ့ၣ်တဖၣ်သးဟးဂီၤတဂ့ၤပကန့ၢ်ဘၣ်တၢ်လၢအကြၢးဒီးပှၤလီၤ.ပတူၢ်နးတူၢ်ဖှီၣ်သးအံၤမ့ၢ်ဒ်သိးပဖိပလံၤပအိၣ်မုၥ်အိၣ်ခုၣ်အဂီၢ်,ပှၤလၢခံတစိၤကဘၣ်မုၥ်ဘၣ်ခုၣ်အဂီၢ်န့ၣ်လီၤ.ပတူၢ်ဆါတူၢ်နးသးဒီးပမ့ၢ်လုၢ်ထီၣ်သးသမူဒၣ်လဲၥ်န့ၣ်မ့ၢ်ဒၣ်လၢပပှၤကလုၥ်အဂီၢ်ဒီးပပှၤကလုၥ်တၢ်လိၣ်ဘၣ်အဂီၢ်လီၤ. အဃိသတးန့ၣ်တဘၣ်သးဟးဂီၤတဂ့ၤ,သးဆံးတဂ့ၤ. ပကပၥ်ကဖၢလၢသး လၢပမူပဒါတၢ်မၤအဖီခိၣ်န့ၣ်လီၤ." အဂ့ၢ်ဟ့ၣ်ဂံၢ်ဟ့ၣ်ဘါဝဲဒၣ်န့ၣ်လီၤ. ဒ်န့ၣ်အသိးလၢကညီကလုၥ်အတၢ်သဘျ့အဂီၢ်ကီၢ်သူလ့ၤသုးမုၢ်ဒိၣ်အံၤမ့ၢ်ဝဲဒၣ်ဖီၣ်စုကဝဲၤအါဖုသ့ၣ်တဖၣ်ပၥ်ဖှိၣ်ထီၣ်ဝဲအသးန့ၣ်လီၤ. လၢစုကဝဲၤတၢ်ပၢၢ်ဆၢတဘျီအံၤအပူၤစ့ၢ်ကီးဒ်သိးကတုၥ်ထီၣ်လၢတၢ်မုၢ်လၢ်ဖီၣ်တၢၣ်အဂီၢ်တမ့ၢ်ဒုး တၢ်ထဲတဖုဧိၤဘၣ်, တၢ်ပၥ်ဖှိၣ်မၤသကိးတၢ်ဒီးကလုၥ်ဒူၣ်လၢအဂၤတဖၣ်စ့ၢ်ကီးအဂ့ၢ်သုးခိၣ်ကျၢၢ်စိစီၤဘီကၠီၣ်ဟဲစံးအါ ထီၣ်ဝဲဒၣ်န့ၣ်လီၤ. လၢန့ၣ်အမဲၥ်လၢအလီၤဘၣ်ဝဲကီၢ်သူလ့ၤသုးမုၢ်ဒိၣ်မုၢ်နံၤဆၢက့ၤပှဲၤထီၣ်(၇၆)ဝီတဝီအံၤအဖီခိၣ်ကညီဒီကလုၥ်စၢဖှိၣ်ကရၢ, ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးရိၣ်မဲခိၣ်ကျၢၢ်သုးခိၣ်ကျၢၢ်ဒိၣ်စိစီၤကၠီၣ်နံၣ်,ကညီသးစၢ်ကရၢဒီးကညီပိၥ် မုၣ်ကရၢသ့ၣ်တဖၣ်ထုးထီၣ်ပၥ်ဖျါဝဲဒၣ်လံၥ်ဟ့ၣ်ယုၢ်စ့ၢ်ကီးန့ၣ်လီၤ.