တးပီပယီၤသုးလၢက့ၤလီၤတဖၣ်ဘၣ်ဒီးမ့ၣ်ပိၢ်အဃိ ဘၣ်ဒိ(၄)ဂၤအဂ့ၢ် လီၢ်က၀ီၤပှၤဘၣ်မူဘၣ်ဒါစံး၀ဲ
လါယူၤ ၁၂ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ်ပူၤ တးပီသုးကလၢၤပယီၤသုးဟဲထီၣ်ဆီတလဲသုး၀ံၤ သုးလီၢ်လံၤလၢ အိၣ်သုး ကလၢၤပူၤတဖၣ်ဖဲအဟးထီၣ်က့ၤလၢကျဲအခါဘၣ်၀ဲဒၣ်ဒီးသုးက့အပှၤမ့ၣ်ပိၢ်အဃိ ဘၣ်ဒိ၀ဲ(၄)ဂၤအဂ့ၢ်န့ၣ် လီၢ်က၀ီၤ ပှၤဘၣ်မူဘၣ်ဒါ စံး၀ဲန့ၣ်လီၤ. ဖဲလါယူၤ ၈ သီအနံၤန့ၣ် တးပီပယီၤသုးကလၢၤသုးဖိလီၢ်လံၤလၢအက့ၤလီၤသ့ၣ်တဖၣ်အံၤ ဖဲအ၀ဲသ့ၣ်က့ၤလီၤတုၤ လၢသထူၣ် ကီၢ်ဆၣ်လါခိဒီးကါမဲသ၀ီဘၢၣ်စၢၤပှၢ်ပူၤကစၢၢ်ကျါအခါန့ၣ် ယီၢ်ဘၣ်၀ဲဟီၣ်က၀ီၤသုးအမ့ၣ်ပိၢ်အံၤအဃိ ဘၣ်ဒိဘၣ်ထံးတၢ်ဟဲ က့ၤယိးကဒါအ၀ဲသ့ၣ်ဆူတးပီသုးကလၢၤအဂ့ၢ်န့ၣ် သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံး၀ဲန့ၣ်လီၤ. အ၀ဲစံး၀ဲလၢ“ပယီၤသုးလၢအဟဲထီၣ်ခီလဲသးတဒူၣ်န့ၣ်အ၀ဲသ့ၣ်ဟးထီၣ်က့ၤလီၤတုၤလၢလါခိသ၀ီန့ၣ်ဘၣ်ဒီးမ့ၣ်ပိၢ်အဃိအ၀ဲသ့ၣ်ဟဲက့ၤထီၣ်ယိး၀ဲပှၤဘၣ်ဒိန့ၣ်(၃)ယိး.အဘၣ်၀ဲဒၣ်ဖဲလါခိးဒီးကါမဲသ၀ီ ဘၢၣ်စၢၤကစၢၢ်ကျဲန့ၣ်လီၤ.မ့၀ံၤမုၢ်ဆ့ၣ်ထီၣ် ၉ သီ ဟါခီ ၈း၀၀ နၣ်ရံၣ်န့ၣ်က့ၤလီၤကဒီးဘျီဟဲက့ၤယိးအါထီၣ်ကဒီး၀ဲတယိး,ခဲလၢၥ်န့ၣ်လွံၢ်ယိး. မ့မ့ၢ်လၢလ့က့ၣ်က့ၤလီၤလံပှၤခးတချုးနီ တထံၣ်ဘၣ်”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဒ်လီၢ်က၀ီၤပှၤဘၣ်မူဘၣ်ဒါစံး၀ဲအသိးန့ၣ်ပယီၤသုးဂံၢ်ဘါအဂၤ(၇၀)ဃၣ်ဃၣ်လၢအက့ၤလီၤသ့ၣ်တဖၣ်အံၤ ကက့ၤ၀ဲပနွဲၢ်ကျါသုးကလၢၤတကပၤဒီး တုၤလၢတနံၤအံၤတတုၤ၀ဲဒံးဘၣ်ဘၣ်ဆၣ် မ့မ့ၢ်လ့က့ၣ်ပယီၤသုးလီၢ်လံၤလၢအက့ၤလီၤ တဖၣ်ခဲအံၤ တုၤ ၀ဲလၢပနွဲၢ်ကျါသုးကလၢၤပူၤန့ၢ်တသီခံသီလံအဂ့ၢ်န့ၣ် စံး၀ဲန့ၣ်လီၤ. တကီၢ်ခါခဲအံၤပယီၤသုးဟဲထီၣ်ဆီတလဲအပှၤဖဲတးပီသုးကလၢၤအံၤတဖၣ်အတၢ်ဟူးတၢ်ဂဲၤမ့တအိၣ်နီမံၤဒံးဘၣ်ဘၣ်ဆၣ် အ၀ဲသ့ၣ်အံၤလၢကဘှီဂ့ၤထီၣ်က့ၤအသုးကလၢၤအဂီၢ်ဃ့၀ဲလၣ်,၀ၣ်သ့ၣ်တဖၣ်လၢသ၀ီဖိအအိၣ်အဂ့ၢ်န့ၣ် လီၢ်က၀ီၤပှၤဘၣ်မူ ဘၣ်ဒါတဂၤ စ့ၢ်ကီး စံး၀ဲဒ်အံၤန့ၣ်လီၤ. “တးပီပယီၤသုးဒုခဲအံၤအတၢ်ဟူးတၢ်ဂဲၤတအိၣ်နီမံၤဒံးဘၣ်ဘၣ်ဆၣ်အ၀ဲသ့ၣ်ဃ့လၣ်ဃ့၀ၣ်လၢပှၤသ၀ီဖိအအိၣ်.ကဘၣ်မ့ၢ်တၢ်စူၤလီၤဘျီအ၀ဲသ့ၣ်တၢ်ခိၣ်ဒုး,အဒဲခိၣ်လီၤပှီၢ်ကအိၣ်ဒ်န့ၣ်ဧါသၢၣ်.ခဲအံၤပနၢ်ဟူလၢပှၤသ၀ီဖိလဲၤထုးဆှၢန့ၢ်အီၤလၣ်တလ့ၣ်ဒီး၀ၣ်တလ့ၣ်လံတဲ၀ဲ.ပယီၤသုးလၢအဟဲထီၣ်သီတဖၣ်အံၤယဆိမိၣ်လၢညါခါန့ၣ်အကဟဲအိၣ်ဘၣ်လၢတးပီသုးကလၢၤမီၤနီၤ.သုးကလၢၤခီဒုအိၣ်တီတီသ၀ီပူၤဘျီပှၤဟံၣ်လၢအိၣ်သုးကလၢၤခိၣ်ဃၢၤတဖၣ်န့ၣ်အိၣ်လၢဟံၣ်ဃီတဘူၣ်ဘၣ်”အဂ့ၢ်န့ၣ် စံး၀ဲန့ၣ်လီၤ. ပယီၤသုးအံၤလၢကဆီတလဲသုးအဂီၢ်ဖဲအပူၤကွံၥ်တလါအံၤလါယူၤ ၄ သီဒီး ၅ သီအခါန့ၣ် သုးဂံၢ်ဘါအဂၤ(၁၀၀)ဘျဲၣ် ဟဲထီၣ်...
ပယီၤသုးခးလီၤကျိဖးဒိၣ်အဃိ ကၠဲးထိၣ်ကီၢ်ဆၣ် အံလူၢ်ဒိၣ်သ၀ီဖိသံ(၁)ဂၤ, ဘၣ်ဒိ(၄)ဂၤ
လါယူၤ ၁၂ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် အံလူၢ်ကရူၢ်အပူၤ ဖဲမဟါအနံၤခီဖျိပယီၤသုးခးလီၤ၀ဲကျိဖးဒိၣ်အဃိ ဘၣ်သံ၀ဲသ၀ီဖိ(၁)ဂၤဒီးဘၣ်ဒိ၀ဲ(၄)ဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤပှၤဘၣ်မူဘၣ်ဒါအအိၣ်န့ၣ်လီၤ. ဖဲမဟါလါယူၤ ၁၁ သီ ဟါခီ ၅း၂၂ မံးနံးအဆၢကတီၢ်န့ၣ် တၢ်ဒုးကဲထီၣ်တအိၣ် ပယီၤသုးခီၣ်ချ့သုးရ့ၣ်(ခမရ-၃)ခးလီၤ၀ဲ ကျိဖးဒိၣ် (၃)ဖျၢၣ်လီၤတဲၥ်ပိၢ်ဖးထီၣ်၀ဲလၢအံလူၢ်ကရူၢ် အံလူၢ်ဒိၣ်သ၀ီပူၤ(၁)ဖျၢၣ်, သ၀ီလီၢ်ခံ(၁)ဖျၢၣ်ဒီး ထံသဒီၣ်ခံသ၀ီချၢ ကျီးပူၤ(၁)ဖျၢၣ် အဂ့ၢ်န့ၣ် ကီၢ်ဆၣ်ပှၤဘၣ်မူဘၣ်ဒါစံး၀ဲန့ၣ်လီၤ. ခီဖျိလၢကျိဖးဒိၣ်အံၤအဃိ အံလူၢ်သ၀ီဖိ စီၤငွ့ၤလၤ(၃၄)နံၣ်အံၤသံ၀ဲတဘျီဃီဒီး စီၤအီၤပိၤပိၤ(၂၈)နံၣ်,စီၤကၠံၣ်ထူ(၂၄)နံၣ်, စီၤခၠ့ၣ်စွ့ၤ(၅၀)နံၣ်ဒီး စီၤ၀့ကၠဲၤ(၅၀)နံၣ်သ့ၣ်တဖၣ်အံၤဘၣ်ဒိဘၣ်ထံး၀ဲန့ၣ်လီၤ.ဘၣ်ဆၣ်ပှၤဘၣ်ဒိ(၄)ဂၤအံၤအကျါ မ့မ့ၢ်လၢ အ၀ဲ(၂)ဂၤန့ၣ် ဘၣ်ဒိဘၣ်ထံးနးနးကျံၤကျံၤအဃိ ဘၣ်တၢ်ဆှၢအ၀ဲသ့ၣ်ဆူတၢ်ဆါဟံၣ်တဘျီဃီအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါ စံး၀ဲအသိး သ့ၣ်ညါဘၣ်န့ၣ်လီၤ. တကးဒံးဘၣ်လၢန့ၣ်အမဲၥ်ညါခီဖျိလၢကျိဖးဒိၣ်ဘျီ၀ဲအံၤအဃိ ကမျၢၢ်အသိလ့ၣ်ဟးဂီၤ၀ဲတခိၣ်ဒီးဟံၣ်တၢ်သူၣ်ထီၣ်ဟးဂီၤ၀ဲ (၂)ဖျၢၣ် အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ. ဒ်န့ၣ်အသိးဖဲအပူၤကွံၥ်လါမ့ၤ ၁၀ သီအနံၤန့ၣ်စ့ၢ်ကီး အံလူၢ်ကရူၢ်လၢတၢ်ကဲထီၣ်သးတကီၢ်ခါခဲအံၤန့ၣ် ခီဖျိပယီၤသုးခးလီၤကျိဖးဒိၣ် အံၤအဃိ ဘၣ်သံ၀ဲကရၣ်၀့စ့ၣ် သ၀ီဖိပိၥ်မုၣ်(၆၆)နံၣ်တဂၤကဲထီၣ်ဒံး၀ဲဒၣ်န့ၣ်လီၤ. ဒ်ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်တၢ်မၤနီၣ်စရီပူၤအိၣ်၀ဲအသိးန့ၣ် အပူၤကွံၥ်လါမ့ၤတလါအတီၢ်ပူၤ ခီဖျိလၢပယီၤသုးခးလီၤ ကျိဖးဒိၣ်ဒီးကဘီယူၤတ့ၢ်လီၤမ့ၣ်ပိၢ်အံၤအဃိ ကမျၢၢ်သံ(၂)ဂၤဒီးဘၣ်ဒိ(၆)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
တၢ်လဲၤတ့ၢ်လီၤကဒီးဒြိမ့ၣ်ပိၢ်(၅)ဖျၢၣ်လၢ(သုးက့ ၇)သုး၀ဲၤလီၢ်ခိၣ်သ့ၣ်တၢ်လီၢ်
လါယူၤ ၁၂ သီ, ၂၀၂၅ နံၣ်, ခ့ၣ်အဲးစံၣ် ဖဲတနံၤအံၤဂီၤခီမုၢ်တ၀ါဒံးဘၣ်အဆၢကတီၢ်န့ၣ် တၢ်လဲၤတ့ၢ်လီၤ၀ဲ(Kamikazi)ဒြိမ့ၣ်ပိၢ်(၅)ဖျၢၣ်လၢကီၢ်ကၠီၣ်တဲၣ်-ကီၢ်ပယီၤကီၢ်ဆၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဖၣ်အၣ်ကီၢ်ရ့ၣ်(သုးက့ ၇)သုး၀ဲၤလီၢ်ခိၣ်သ့ၣ်တၢ်လီၢ်ကဲထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ် ပှၤဘၣ်မူဘၣ်ဒါပၥ်ဂၢၢ်ပၥ်ကျၢၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဖဲတနံၤအံၤလါယူၤ ၁၂ သီ ဂီၤခီ ၁း၀၀ နၣ်ရံၣ် တဖျၢၣ်, ၂း၀၀ နၣ်ရံၣ် တဖျၢၣ်, ၂း၃၀ တဖျၢၣ်, ၂း၄၀ ခိၣ်ဃၢၤတဖျၢၣ်ဒီး ၄း၀၀ နၣ်ရံၣ်တဖျၢၣ် တၢ်လဲၤတ့ၢ်လီၤ၀ဲဒြိမ့ၣ်ပိၢ်ပၥ်ဖှိၣ်ခဲလၢၥ်(၅)ဖျၢၣ် လီၤတဲၥ်ပိၢ်ဖးထီၣ်၀ဲလၢ(သုးက့ ၇)သုး၀ဲၤလီၢ်ခိၣ်သ့ၣ် တၢ်လီၢ် အခိၣ်အဃၢၤအဂ့ၢ်န့ၣ် ပှၤလၢဘူးဒီးခ့ၣ်အဲၣ်ယူၣ်တဖၣ်စံး၀ဲအသိးသ့ၣ်ညါဘၣ်န့ၣ်လီၤ. တၢ်လဲၤတ့ၢ်လီၤ Kamikazi ဒြိမ့ၣ်ပိၢ်ဘျီ၀ဲအံၤ(၅)ဖျၢၣ်အကျါတဖျၢၣ်န့ၣ်တပိၢ်ဖးထီၣ်ဒံးဘၣ်ဒီး ပှၤကညီတၢ်ဘၣ်ဒိဘၣ်ထံး ,တၢ်ဟးဂူၥ်ဟးဂီၤစ့ၢ်ကီးကဲထီၣ်တအိၣ်၀ဲနီမံၤဘၣ်အဂ့ၢ်န့ၣ် ခ့ၣ်အဲၣ်ယူၣ် ပှၤကတိၤတၢ်ပၢ ပဒိၣ်စီၤကျၢၤစ့ စံးဘၣ်ခ့ၣ်အဲးစံၣ်-ကညီတၢ် ကစီၣ်န့ၣ်လီၤ. “ဟဲတ့ၢ်လီၤ၀ဲခဲလၢၥ်န့ၣ်(၅)ဖျၢၣ်.တတဲၢ်ဖးဘၣ်န့ၣ်(၁)ဖျၢၣ်.အလီၤတဲၥ်န့ၣ်ဘူးဖဲ၀ဲၤလီၢ်ခိၣ်သ့ၣ်ကပိၤကပၤဖဲန့ၣ်လီၤ. ပှၤတဲကျၢယၤန့ၣ်တၢ်ဟးဂူၥ်ဟးဂီၤဒီးတၢ်ဘၣ်ဒိဘၣ်ထံးတအိၣ်ဘၣ်” အဂ့ၢ်န့ၣ် စံး၀ဲန့ၣ်လီၤ. ခ့ၣ်အဲၣ်ယူၣ်(သုးက့ ၇)ဟီၣ်က၀ီၤအပူၤ ဖဲအပူၤကွံၥ်(၂၀၂၄)လါအီးကထိဘၢၣ် ၂၂ သီအခါတဘျီ, တနံၣ်အံၤလါယနူၤအါရံၤ ၃၁ သီအခါတဘျီ ဒီး လါမးရှး ၁၈ သီအခါတဘျီ...
မဲၢ်ဆီးဝ့ၢ်ပူၤတၢ်သမံသမိးအါထီၣ်အဃိခီကီၢ်ကၠိသဂၢၢ်ဘၣ်ဒီးတၢ်တၤတၢ်လၢတၢ်ဟးထီၣ်ဟးလီၤ
လါယူၤ ၁၂သီ, ၂၀၂၅နံၣ်, ခ့ၣ်အဲးစံၣ်, ကီၢ်ကၠီၣ်တဲၣ်ကညီကီၢ်စဲၣ်ကီၢ်ဆၢမဲၢ်ဆီးဝ့ၢ်ပူၤကၠီၣ်တဲၣ်ပၢၤကီၢ်တဖၣ်ဟးသမံသမိးအါထီၣ်အဃိ,ခီကီၢ်ကၠိသရၣ်သရၣ်မုၣ်ဒီးကၠိဖိသ့ၣ်တဖၣ်သဂၢၢ်ဘၣ်ဝဲဒီးတၢ်တၤတၢ်လၢတၢ်ဟးထီၣ်ဟးလီၤအဂီၢ်အဂ့ၢ်,သ့ၣ်ညါဘၣ်လၢခီကီၢ်ကၠိပှၤဘၣ်မူဘၣ်ဒါအအိၣ်န့ၣ်လီၤ. (၂၀၂၅)နံၣ်စးထီၣ်ဖဲကၠိထီၣ်အံၤန့ၣ်ကၠီၣ်တဲၢ်ပၢၤကီၢ်သ့ၣ်တဖၣ်သမံသမိးတၢ်အါထီၣ်ဒီးသမံသမိးဝဲထဲကၠိသရၣ်,သရၣ်မုၣ်တကးဘၣ်အမဲၥ်ညါသမံသမိးဒီးဖီၣ်ဝဲကၠိဖိလၢအနီၢ်ဒိၣ်ထီၣ်တဖၣ်အိၣ်ဝဲခဲအံၤခဲအံၤအဃိကဲထီၣ်ဝဲဒၣ်တၢ်တၤတၢ်အဒိၣ်ကတၢၢ်တခါလၢကီၢ်ပယီၤခီကီၢ်ကၠိဖိဒီးကၠိသရၣ်,သရၣ်မုၣ်သ့ၣ်တဖၣ်အဂီၢ်အဂ့ၢ်ဆၣ်သူလ့ၤကၠိပှၤနဲၣ်တၢ်သရၣ်မုၣ်နီၢ်ဖီရ့ၣ်စံးဝဲဒၣ်ဒ်အံၤန့ၣ်လီၤ. အဝဲစံးဝဲလၢ“ပအိၣ်ဟီၣ်ကဝီၤအပူၤကၠိတဖၣ်အံၤတနံၣ်အံၤပဘၣ်ကွၢ်ဆၢၣ်မဲၥ်အဆိကတၢၢ်အါဒိၣ်ထီၣ်နးဒိၣ်ထီၣ်အဒိၣ်ကတၢၢ်မ့ၢ်ကၠိဖိကၠိသရၣ်အတၢ်ဘံၣ်တၢ်ဘၢလီၤ,သရၣ်သရၣ်မုၣ်ဒၣ်လဲၥ်န့ၣ်ကၠီၣ်တဲၣ်ထံကီၢ်ပဒိၣ်ပလ့းပှၤဘၣ်မူဘၣ်ဒါတဖၣ်သမံသမိးဝဲအဃိပဘၣ်ထံၣ်လိၥ်ကတိၤတၢ်ဒီးအဝဲသ့ၣ်အိၣ်,တကးဒံးဘၣ်မ့မ့ၢ်ကၠိဖိန့ၣ်ဘၣ်နးတစဲး,ဖဲအဝဲသ့ၣ်ကၠိစံၣ်လီၤမ့ၢ်ဂ့ၤ,ကၠိပျၢ်က့ၤလၢဟံၣ်မ့ၢ်ဂ့ၤ,ဟဲလၢကၠိမ့ၢ်ဂ့ၤဟါခီဟးကသုၣ်ကသီမ့ၢ်ဂ့ၤအဆၢကတီၢ်န့ၣ်ကီၣ်တဲၣ်ပၢၤကီၢ်ဖီၣ်အဝဲသ့ၣ်အိၣ်,ဒီးဖီၣ်ဝဲဝံၤန့ၣ်ပလူၤက့ၤတန့ၢ်ညီညီဘၣ်.ကဘၣ်မ့ၢ်ပှၤလၢအစိကမီၤအိၣ်,ပှၤတဲတၢ်ပၢလူၤန့ၢ်ပှၤမးပပှၤကၠိဖိတဖၣ်န့ၣ်ပူၤဖျဲးထီၣ်က့ၤ.အအံၤကၠိစးထီၣ်သီအလါဒံးလီၤကဲထီၣ်တဘျူးဘျီ,အစှၤကတၢၢ်လွံၢ်ဘျီယဲၢ်ဘျီလံန့ၣ်လီၤ.”အဂ့ၢ်စံးဝဲဒၣ်န့ၣ်လီၤ. ဒ်န့ၣ်အသိးခီဖျိကၠီၣ်တဲၣ်ပၢၤကီၢ်တဖၣ်သမံသမိးဖီၣ်ဝဲကၠိဖိတဖၣ်ဒ်အံၤအိၣ်ဝဲအဖီခိၣ်,ဘၣ်ဟးထီၣ်က့ၤလီၤဝဲလၢတၢ်သူၣ်ပျံၤသးဖုးအပူၤအဂ့ၢ်,ဆၣ်သူလ့ၤကၠိဖိနီၢ်ဖီအဲၣ်ခုၣ်စံးဝဲဒ်အံၤန့ၣ်လီၤ. “ယဲယကဲကၠိဖိသီလီၤ.တၢ်ဂီၤတအိၣ်နီတမံၤဘၣ်အဃိကၠိခီန့ၣ်ယလဲၤထီၣ်ကၠိဒိးကၠိကါန့ၣ်လီၤ.ယသကိးတနီၤနီၤဟဲထီၣ်ကၠိဒိးလ့ၣ်ယီၢ်အိၣ်,ဆဲးကဲး(သိလ့ၣ်ယီၣ်)အိၣ်လီၤ.တနီၤအတၢ်ဂီၤအိၣ်နါက့တနီၤတအိၣ်စ့ၢ်ကီးဘၣ်အဃိအဝဲသ့ၣ်ဘၣ်ပျံၤတၢ်အိၣ်,မိပါလၢဟဲဆှၢအသုနါက့ဘၣ်ပျံၤတၢ်အိၣ်စ့ၢ်ကီးလီၤ.ယၤန့ၣ်မ့ၢ်အိၣ်ဟံၣ်ခီဖဲအယံၤအဘူးယတၢ်လိၣ်မ့အိၣ်ယလဲၤလၢခီၣ်လီၤ.နါက့ပကဲကၠိဖိပတၢ်လိၣ်အိၣ်တဘျီတခီၣ်ပမ့အဲၣ်ဒိးပှ့ၤကၠိတၢ်ပီးတၢ်လီနီၢ်တဂၤတၢ်လိၣ်လၢအိၣ်ယံၤသ့ၣ်တဖၣ်န့ၣ်ပဘၣ်ကွၢ်တၢ်အိၣ်သးဝံၤမးဘၣ်ဟးထီၣ်ပှ့ၤ,ပဘၣ်ယိၣ်ပလ့းကဖီၣ်ပှၤ.ပဘၣ်ပျံၤတၢ်ဖုးတၢ်လီၤ”အဂ့ၢ်စံးဝဲဒၣ်န့ၣ်လီၤ. ကီၢ်ကၠီၣ်တဲၣ်အပူၤခီကီၢ်ကၠိလၢအိၣ်သူၣ်လီၤသးတဖၣ်အံၤအပူၤကွံၥ်နံၣ်တဖၣ်အပူၤတၢ်ထုးထီၣ်န့ၢ်ဝဲ(ကၠိဖိကး)ထဲဒၣ်(၅)တီၤဆူအဖီခိၣ်ကၠိဖိသ့ၣ်တဖၣ်အိၣ်ဝဲဒီးလွံၢ်တီၤဆူအဖီလၥ်တီၤဖုၣ်ဖိသၣ်တဖၣ်အံၤညီနုၢ်ကၠီၣ်တဲၣ်ပၢၤကီၢ်ပှၤဘၣ်မူဘၣ်ဒါတဖၣ်သမံသမိးဝဲတအိၣ်ဝဲဒၣ်ဘၣ်ဆၣ်,တနံၣ်အံၤကၠိတၢ်မၤလိနံၣ်အပူၤသမံသမိးဃုၥ်ဝဲတီၤဖုၣ်ဖိသၣ်တဖၣ်အ(ကၠိဖိကး)အိၣ်ဝဲအဂ့ၢ်,ကၠိပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. ဒီးတီၤဖုၣ်ကၠိဖိသ့ၣ်တဖၣ်အံၤဖဲဟးထီၣ်ဟးလီၤဝဲလၢတၢ်ချၢဃုၥ်ဒီးအမိၢ်အပၢ်အဆၢကတီၢ်,ဘၣ်တၢ်သမံသမိးဃ့ကွၢ်ဝဲကၠိဖိကးလၢပၢၤကီၢ်သ့ၣ်တဖၣ်အသိး,မိၢ်ပၢ်လၢဟးထီၣ်ဟးလီၤဝဲဒီးအဖိဆံးတဖၣ်အံၤတၢ်မၤဃံးဒီးမၤပျံၤမၤဖုးဝဲအီၤလၢမၤကၤအီၣ်ဝဲဖိဒံဖိသၣ်,မ့တမ့ၢ်တၢ်မၤကၤပှၤကူပှၤကညီတဖၣ်အိၣ်ဝဲအဂ့ၢ်သ့ၣ်ညါဘၣ်ဒ်ကၠိဖိမိၢ်ပၢ်ဒီးကၠိပှၤဘၣ်မူဘၣ်ဒါတဖၣ်စံးဝဲဒၣ်အသိးန့ၣ်လီၤ. ဝ့ၢ်မဲၢ်ဆီးအံၤမ့ၢ်ဝဲ ကီၢ်ပယီၤ-ကီၢ်ကၠီၣ်တဲၣ်ကီၢ်ဆၢဝ့ၢ်တဖျၢၣ်ဒီး တကီၢ်ခါခဲအံၤ ကီၢ်ပယီၤပူၤ ခီဖျိတၢ်ဒုးတၢ်ယၤ ပှၤလၢဟဲနုၥ်အိၣ်လၢဖိးသဲစးအိၣ်အသိး,ပှၤလၢဟဲနုၥ်လၢတဖိးသဲစးအိၣ်ဝဲဒၣ်အဖီခိၣ် ကၠီၣ်တဲၣ်ပၢၤကီၢ်သ့ၣ်တဖၣ်မၤဃံးထီၣ်ဝဲတၢ်သမံသမိးဒ်အံၤလီၤအဂ့ၢ် သ့ၣ်ညါဘၣ်ဒ်ခီကီၢ်ကၠိပှၤဘၣ်မူဘၣ်ဒါသ့ၣ်တဖၣ်စံးဝဲဒၣ်အသိးန့ၣ်လီၤ.
သ့ၣ်ဘီဘိသုးကလၢၤလီၤလံဘၣ်ဆၣ်တၢ်ကအိးထီၣ်ကၠိအဂီၢ်တၢ်ဘံၣ်တၢ်ဘၢတအိၣ်ဒံးဘၣ်အဂ့ၢ် လီၢ်က၀ီၤပှၤဘၣ်မူဘၣ်ဒါစံး၀ဲ
လါယူၤ ၁၀ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ် သ့ၣ်ဘီဘိကရူၢ်ပူၤ သ့ၣ်ဘီဘိပယီၤသုးကလၢၤလီၤလံဘၣ်ဆၣ် ကၠိလၢအိၣ်ဟီၣ်က၀ီၤပူၤအံၤတဖၣ်ကအိးထီၣ်ကၠိအဂီၢ်တၢ်ဘံၣ်တၢ်ဘၢတအိၣ်ဒံး၀ဲဘၣ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါဒီးကၠိပှၤ ဘၣ်မူဘၣ်မူဘၣ်ဒါတဖၣ်စံး၀ဲန့ၣ်လီၤ. သ့ၣ်ဘီဘိသုးကလၢၤလၢဟီၣ်က၀ီၤ(KNLA)သုးပၥ်ဖှိၣ်ထီၣ်န့ၢ်၀ဲဖဲအပူၤကွံၥ်လါယူၤ ၃ သီအနံၤအံၤ တကီၢ်ခါခဲအံၤသုးကလၢၤ လီၤလံဘၣ်ဆၣ် ဟီၣ်က၀ီၤဖဲန့ၣ်အပူၤခီဖျိတၢ်အိၣ်သးတဂၢၢ်တကျၢၤဒံးဘၣ်ဒီးကဘီယူၤစ့ၢ်ကီးလဲၤဆှၣ်တၢ်အိၣ်ဒံး၀ဲအဃိ ကအိးထီၣ်ကဒါကၠိအဂီၢ် တၢ်ကီတၢ်ခဲအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ. ဘၣ်ဃးတၢ်ဂ့ၢ်အံၤ သ့ၣ်ဘီဘိသ၀ီသးပှၢ် စီၤခုကျဲၤ စံး၀ဲလၢ “သ့ၣ်ဘီဘိသုးကလၢၤလီၤ၀ံၤလီၢ်ခံန့ၣ် ခံသီသၢသီတဘျီပယီၤသုး ကဘီယူၤဟဲဆှၣ်တၢ်မၢ်မၢ်လီၤ.အဃိပှၤမ့အိးထီၣ်ကၠိန့ၣ်ပှၤသးအုးလၢကဘီယူၤကဟဲကွံၥ်လီၤတၢ်ဒ်န့ၣ်မီၤနီၤ.မ့အိးထီၣ်နါက့တအိးထီၣ်လၢကၠိပူၤဘၣ်.ဘၣ်မနုၤအဃိလဲၣ်ကဘီယူၤန့ၣ်မ့ဟးကွံၥ်လီၤတၢ်န့ၣ်ဟးကွံၥ်လီၤတၢ်လၢကၠိလဲလဲလီၤ”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. တကးဒံးဘၣ်စှၤသီအတီၢ်ပူၤအံၤအူကြ့ၣ်ထၣ်,ထံကပျၢၤသုးကလၢၤလၢအိၣ်ဘူးဖဲဟီၣ်က၀ီၤပူၤအံၤစ့ၢ်ကီးဟီၣ်က၀ီၤ(KNLA) သုးပၥ်ဖှိၣ်စးထီၣ်လဲၤက၀ီၤခး၀ဲဒီးဒြိသ့ၣ်တဖၣ်အဃိ ဂီၤလ့ပယီၤသုးကလၢၤက့ၤခးစိဃီၤ၀ဲကျိဖးဒိၣ်အိၣ်၀ဲအဂ့ၢ်န့ၣ် လီၢ်က၀ီၤ ပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤ. ဘၣ်ဆၣ်တကီၢ်ခါခဲအံၤဆၢကတီၢ်တုၤဃီၤ၀ဲလၢကၠိကဘၣ်အိးထီၣ်လံဒီးကၠိဖိတဖၣ်သုတစဲၤခံလၢတၢ်ဖံးလိမၤဒိးတဂ့ၤအဂီၢ် နွံလၢကဟဲတၢ်ရဲၣ်တၢ်ကျဲၤအိၣ်လၢတၢ်ကအိးထီၣ်က့ၤကၠိလၢတၢ်ဘံၣ်တၢ်ဘၢအလီၢ်တတီၤအဂ့ၢ်န့ၣ် သ့ၣ်ဘီဘိသ၀ီပူၤ တီနီၢ်တီၤထီကၠိ ကၠိခိၣ် သရၣ်စီၤအဲၣ်ဃူ စံး၀ဲဒ်အံၤန့ၣ်လီၤ. “အပူၤကွံၥ်န့ၣ်ပတိၤလီၤလၢတလါအံၤ ၂ သီန့ၣ်ပကအိးထီၣ်ကဒါကၠိမီၤနီၤ.ဘၣ်ဆၣ်ခီဖျိလီၢ်က၀ီၤတၢ်ဒုးတၢ်ယၤအဖီခိၣ်ပဘၣ်ဃ့ၢ် ပလဲၥ်သးတစိၢ်ဖိ.အဃိခဲအံၤလါယူၤထီၣ် ၁၀ တုၤလၢ ၁၃ သီပကစးထီၣ်တူၢ်လိၥ်က့ၤပှၤကၠိဖိအမံၤ.ဒီးနွံလၢကဟဲ ၁၆ သီန့ၣ် ပက စးထီၣ်လဲၤက့ၤလၢတၢ်သိၣ်လိလီၤ.ပမ့ကွၢ်လၢတၢ်ဘံၣ်တၢ်ဘၢဒုတအိၣ်ဒံးဘၣ်.ဘၣ်ဆၣ်လၢတၢ်ကီတၢ်ခဲအပူၤဒုပကအိးထီၣ်စိလၢတၢ်ချၢတၢ်ဘံၣ်တၢ်ဘၢအလီၢ်လီၤ.ပကမၤလိတၢ်လၢကၠိပူၤဒုတသ့ဒံးဘၣ်.အခိၣ်သ့ၣ်ပပျံၤလၢကဘီယူၤကဟဲခးလီၤကဒါတၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါခဲအံၤဘၣ်၀ဲဒၣ်လၢတၢ်စူၤခါဒီးခီဖျိတၢ်အိးထီၣ်မၤလိတၢ်လၢကၠိပူၤလိၤလိၤတဘူၣ်ဒံးဘၣ်အဖီခိၣ်အံၤ လၢပှၤကၠိဖိ အဂီၢ်တၢ်ကီတၢ်ခဲတၢ်ဂ့ၢ်ကီပိၥ်ထွဲထီၣ်အခံလၢတၢ်မၤလိမၤဒိးအလီၢ်ဒီးအိၣ်ဆိးလီၢ်ကျဲတကပၤအဂ့ၢ်န့ၣ် သရၣ်ကၠိခိၣ် စီၤအဲၣ်ဃူ စံးအါထီၣ်၀ဲန့ၣ်လီၤ. “ပတၢ်ကီတၢ်ခဲဒုအိၣ်လီၤဘၣ်မနုၤလဲၣ်ခဲအံၤတၢ်စူၤလံပှၤကၠိဖိအိၣ်ဒီဒူၣ်ညါအဃိပတၢ်သူၣ်ထီၣ်တအိၣ်လၢပှၤကၠိဖိကမၤလိတၢ်အဂီၢ်ဘၣ်.ပမၤစိဃၥ်လၢ(တၤလပၣ်)လီၤ.တၢ်လီၢ်တၢ်ကျဲဒုတဘၣ်လီၢ်ဘၣ်ဆးလၢဖိသၣ်အဂီၢ်ဘၣ်.မ့၀ံၤခံခါတခါန့ၣ်တနံၣ်အံၤဟံၣ်ဒွဲကၠိဖိန့ၣ်အိၣ်လၢ(၁၀၀)ဘျဲၣ်ညါ.အဃိလၢအ၀ဲသ့ၣ်အဂီၢ်န့ၣ်တၢ်အိးတၢ်ဆိး,တၢ်မံတၢ်ဂဲၤစ့ၢ်ကီးတၢ်ကီတၢ်ခဲအိၣ်လီၤ.ဘၣ်မနုၤအဃိလဲၣ်ပမၤလိလၢကၠိမိၢ်ပှၢ်တသ့ဒံးဘၣ်,ပဘၣ်မၤလိလၢတၢ်ချၢဒ်အံၤအဃိနသ့ၣ်ညါတၢလီၤတၢ်ကီတၢ်ခဲအိၣ်ခဲလၢၥ်လီၤ”အဂ့ၢ်န့ၣ် စံး၀ဲန့ၣ်လီၤ. ဒ်န့ၣ်အသိးတကီၢ်ခါခဲအံၤ လ့ဂီၤ,ဘျၢၣ်ဒိၣ်ကၠိဃုၥ်ဒီးကၠိလၢအိၣ်ဘူးသ့ၣ်ဘီဘိသ၀ီအံၤစ့ၢ်ကီး...
ကြုၢ်တုကီၢ်ဆၣ်ကဘီယူၤတၢ်ဟဲတ့ၢ်လီၤမ့ၣ်ပိၢ် ဘၣ်သံပှၤ(၆)ဂၤကျါပၣ်ဃုၥ်ကၠိဖိ(၄)ဂၤ
လါယူၤ ၁၀ သီ, ၂၀၂၅ နံၣ်, ခ့ၣ်အဲးစံၣ် ဒူပျၥ်ယၥ်ကီၢ်ရ့ၣ်(သုးက့-၆),ကြုၢ်တုကီၣ်ဆၣ်ဟီၣ်ကဝီၤ,(ပၣ်ယး)သဝီအပူၤဖဲမဟါယူၤ(၉)သီအနံၤဖဲမုၢ်ဃ့ၢ်လီၤ(၂)နၣ် ရံၣ်အဆၢကတီၢ်န့ၣ်ခီဖျိပယီၤသုးကီၣ်ကးဟဲတ့ၢ်လီၤဝဲမ့ၣ်ပိၢ်အဃိဘၣ်သံပှၤကၠိဖိ(၄)ဂၤ,ကၠိသရၣ်မုၣ်တဂၤဒီးကမျၢၢ်တဂၤအဂ့ၢ်ကြုၢ်တုကီၢ်ဆၣ်အပှၤဘၣ်မူဘၣ်ဒါစံးဝဲန့ၣ်လီၤ. တၢ်သူၣ်ထီၣ်လၢပယီၤသုးကီၣ်ကးကဘီယၤဟဲတ့ၢ်လီၤဝဲမ့ၣ်ပိၢ်အံၤန့ၣ်မ့ၢ်ဝဲတၢ်သူၣ်ထီၣ်ကၠိဖိသ့ၣ်တဖၣ်မၤလိတၢ်အလီၢ်အဃိဘၣ်သံဝဲကၠိဖိ(၄)ဂၤ,ကၠိသရၣ်မုၣ်တဂၤဒီးကမျၢၢ်ပှၤသးပှၢ်တဂၤအမဲၥ်ညါဘၣ်ဒိစ့ၢ်ကီးဝဲဒၣ်ကၠိဖိ(၂)ဂၤအဂ့ၢ်ကီၢ်ဆၣ်ပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ. အဃိဘၣ်ထွဲဒီးပယီၤသုးကီၣ်ကးကဘီယူၤဟဲတ့ၢ်လီၤမ့ၣ်ပိၢ်ဖဲ(ပၣ်ယး)သဝီအပူၤကၠိဖိမၤလိတၢ်အလီၢ်အံၤကြုၢ်တု ကီၢ်ဆၣ်အပှၤဘၣ်မူဘၣ်ဒါတဂၤစံးဝဲလၢ "ဖဲမဟါအနံၤဟါလီၤခီ(၂)နၣ်ရံၣ်ဘျဲၣ်အဆၢကတီၢ်န့ၣ်ကဘီၤယူၤဟဲတ့ၢ်လီၤ တၢ်မီၤနီၤ. အဝဲသ့ၣ်န့ၣ်ထီၣ်ကၠိလၢကၠိပူၤတဘူၣ်ဘၣ်ဒီးဘၣ်ထီၣ်ကၠိလၢပှၤဟံၣ်ဖီလၥ်လီၤ. ကၠိန့ၣ်အကဲဝဲဒၣ်ပယီၤပဒိၣ် ကၠိမီၤနီၤ. အခဲအံၤတၢ်လီၢ်ဖဲအိၣ်ဘူးဖဲန့ၣ်ဘၣ်အိၣ်ကနၣ်တၢ်လီၤ. ဘၣ်ဆၣ်တၢ်ဘၣ်ယိၣ်အဒိၣ်ကတၢၢ်တခါလၢပှၤကၠိဖိ န့ၣ်အခဲအံၤမိၢ်ပၢ်သ့ၣ်တဖၣ်ကဆှၢအဖိလၢကၠိဒုကဲထီၣ်တၢ်ဆိကမိၣ်လီၤ." အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ် လီၤ. ခီဖျိကၠိဖိသ့ၣ်တဖၣ်အံၤမၤလိတၢ်လၢတၢ်မၤလိကၠိတီၤဒၢးပူၤတဘူၣ်ဘၣ်အဃိဘၣ်မၤလိတၢ်လၢဟံၣ်တၢ်သူၣ်ထီၣ်အဖီလၥ်ဒ်အံၤအဖီခိၣ်ပယီၤသုးကီၣ်ကးအံၤဟဲတ့ၢ်လီၤဝဲမ့ၣ်ပိၢ်ဒီးကဘီယူၤဒ်အံၤန့ၣ်လီၤ. တကးဒံးဘၣ်တၢ်သ့ၣ်ညါဘၣ် လၢဟီၣ်ကဝီၤတၢ်လီၢ်ဝဲန့ၣ်န့ၣ်တမ့ၢ်တၢ်လီၢ်လၢအအိၣ်ဘူးလိၥ်အသးဒီးတၢ်ဒုးကဲထီၣ်သးအလီၢ်ဘၣ်အဂ့ၢ်စံးကီၢ်ဆၣ်ပှၤဘၣ်မူဘၣ်ဒါစံးအါထီၣ်ဝဲန့ၣ်လီၤ. ဒ်န့ၣ်အသိးဒူပျၥ်ယၥ်ကီၢ်ရ့ၣ်ဟီၣ်ကဝီၤအပူၤအံၤခီဖျိဒုးယၤတၢ်ဖ့ၣ်ဆၢဟဲဆူၣ်ထီၣ်ဝဲဒီးပယီၤသုးကီၣ်ကးတကပၤဘၣ်ပျၢ်စုပျၢ်ခီၣ်ကွံၥ်ဝဲအသုးကလၢၤတၢ်လီၢ်အါထီၣ်ဝဲအဃိပယီၤသုးအံၤမၤဝဲကလံၤကျါကဘီယူၤတၢ်တ့ၢ်လီၤမ့ၣ်ပိၢ်အါထီၣ်ဝဲအဂ့ၢ်သ့ၣ်ညါဘၣ်အသိးဖဲအပူၤကွံၥ်လါမ့ၤ(၂၉)သီအနံၤန့ၣ်လဲၤတ့ၢ်လီၤဝဲမ့ၣ်ပိၢ်လၢကွံလၢၢ်ဆှုၣ်သဝီကၠိကရၢၢ်ပူၤဘၣ်ဒိဝဲကၠိဖိ(၄)ဂၤဒံးအဂ့ၢ်သ့ၣ်ညါဘၣ်န့ၣ်လီၤ. လၢတၢ်န့ၣ်အဃိသုးကီၣ်ကးအံၤကမၤတပျုၤတပျီၤတၢ်အါထီၣ်ဝဲဒီးတၢ်လီၤဘၣ်ယိၣ်,တၢ်ဟးဂူၥ်ဟးဂီၤကအိၣ်အါန့ၢ်ဒံးဝဲနံၣ်လၢအပူၤကွံၥ်အဃိတနံၣ်အံၤ(၂၀၂၅-၂၀၂၆)တၢ်မၤလိနံၣ်အကတီၢ်လၢကၠိတၢ်ဘံၣ်တၢ်ဘၢအဂီၢ်ကၠိပှၤဘၣ်မူဘၣ် ဒါဘၣ်ထွဲတဖၣ်ကအိၣ်ဒီးတၢ်ဟ့ၣ်ပလီၢ်ကၠိ,ကမၤသကိးတၢ်ဒီးလီၢ်ကဝီၤဘံၣ်ဘၢကရူၢ်အဂ့ၢ်ကီၢ်သူလ့ၤကူၣ်သ့ဆဲးလၤဝဲၤကျိၤခိၣ်ပဒိၣ်စီၤလီၤအဲၣ်မူဟ့ၣ်ပလီၢ်စ့ၢ်ကီးဝဲန့ၣ်လီၤ.
KNLAသုးက့(၄)ထီၣ်မၤန့ၢ် အံသၣ်ဃ့ၢ် ပယီၤသုးကလၢၤ
လါယူၤ ၁၀သီ, ၂၀၂၅နံၣ် ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ သုးက့(၄),ဘျံးဒဝဲၢ်ကီၢ်ရ့ၣ်,ထံမိၢ်ပှၢ်ဟီၣ်ကဝီၤ ပယီၤသုးကလၢၤတဖျၢၣ်အအိၣ်ဆီလီၤသးဖဲ ကီၢ်ကၠီၣ်တဲၣ်-ကီၢ်သူလ့ၤကီၢ်ဆၢ လၢအမ့ၢ်အံသၣ်ဃ့ၢ်ပယီၤသုးကအံၤဖဲတနံၤအံၤ လါယူၤ (၁၀)သီ မုၢ်ထူၣ်ထီၣ်(၁၁)နၣ်ရံၣ်ဘျဲၣ်အဆၢကတီၢ်န့ၣ် လီၢ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ် သုးက့(၄)တီခိၣ်ရိၣ်မဲသုးပၥ်ဖှိၣ်ထီၣ်မၤန့ၢ်ကွံၥ်ဝဲဒၣ်အဂ့ၢ် သ့ၣ်ညါဘၣ်လၢသုးက့(၄)အပှၤဘၣ်မူဘၣ်ဒါအအိၣ်န့ၣ်လီၤ. ကီၢ်ဆၢခိၣ် အံသၣ်ဃ့ၢ်ပယီၤသုးအကလၢၤအံၤန့ၣ် ဖဲမဟါလါယူၤ(၉)သီအနံၤအဆၢကတီၢ် ဘၣ်တၢ်ထီၣ်ဒုးအီၤဒီး ဖဲတနံၤအံၤန့ၣ်ပယီၤသုးသ့ၣ်တဖၣ်ဃ့ၢ်ဖျိးကွံၥ်ဝဲဒၣ်ဒီးတၢ်ထီၣ်မၤန့ၢ်ကွံၥ်အီၤလံအဂ့ၢ် သုးက့(၄)အသုးက့ခိၣ် သုးခိၣ်ကျၢၢ်ဖိစီၤဖိလ့စံးဘၣ်ဝဲ ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲလၢ“မ့ၢ်လီၤ.အံသၣ်ဃ့ၢ်ပယီၤသုးကလၢၤန့ၣ်တၢ်ထီၣ်မၤန့ၢ်အီၤဖဲတနံၤအံၤမုၢ်ထူၣ်ထီၣ်(၁၁)နၣ်ရံၣ်(၅၅)မံးနံးအဆၢကတီၢ်န့ၣ်လီၤ. ပယီၤသုးသ့ၣ်တဖၣ်အံၤဃ့ၢ်နုၥ်လီၤဝဲဆူကီၢ်ကၠီၣ်တဲၣ်ပူၤဝံၤဖဲပပှၤလူၤပိၥ်အကျိၤအခါ အကျိၤက့ၤထီၣ်ကဒါက့ၤလၢကီၢ်ဆၢတကပၤလီၤ.တၢ်တယးကွၢ်လၢကက့ၤပၥ်ဖှိၣ်ကဒါက့ၤသးဒီး ကလံၤစိးတကပၤ ညၣ်ပျၤသုးကလၢၤန့ၣ်လီၤ.ပယီၤသုးတၢ်သံတၢ်ဘၣ်ဒိဒီးတၢ်မၤန့ၢ်တၢ်စုကဝဲၤပီးလီန့ၣ်တၢ်မၤလီၤတံၢ်အီၤတဘၣ်ဒံးဘၣ်.ပယီၤသုးအံၤတၢ်စုကဝဲၤဒီးတၢ်ဖိတၢ်လံၤလၢစိၥ်ဝဲန့ၢ်န့ၣ် စိၥ်ဝဲဒီးမ့မ့ၢ်လၢစိၥ်ဝဲတန့ၢ်ဘၣ်သ့ၣ်တဖၣ်န့ၣ်မၤဟးဂီၤဝဲဒ်သုးက့လၢအဂၤအသိးန့ၣ်လီၤ.”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ အံသၣ်ဃ့ၢ်ပယီၤသုးကလၢၤအံၤန့ၣ် မ့ၢ်ဝဲ ခီၣ်သုးရ့ၣ်(ခလရ-၂၅) အသုးဒ့ခံ,ဘၣ်တၢ်တီခိၣ်ရိၣ်မဲအီၤလၢသုးရ့ၣ်ခိၣ်(၂)ပတီၢ်,ဟဲအိၣ်ဆီလီၤသးဒီးပှၤနီၣ်ဂံၢ်ကအိၣ် အဂၤ(၆၀)ဘျဲၣ်ဒီးဖဲတၢ်ထီၣ်ဒုးသုးကလၢၤအဆၢကတီၢ် ဖဲလါယူၤ(၇)သီဒီး(၈)သီအနံၤန့ၣ်သုးကီၣ်ကးဟဲတ့ၢ်လီၤမ့ၣ်ပိၢ်,ခးလီၤတၢ်ဒီးကဘီယူၤအဃိ ဘၣ်သံကမျၢၢ်(၂)အကျါပၣ်ဃုၥ်ဖိသၣ်တဂၤအမဲၥ်ညါဘၣ်ဒိတစှၤန့ၢ်(၆)ဂၤဘၣ်အဂ့ၢ်သ့ၣ်ညါဘၣ်လၢသုးက့(၄)အပှၤဘၣ်မူဘၣ်ဒါအအိၣ်န့ၣ်လီၤ. ကီၢ်သူလ့ၤ-ကီၢ်ကၠီၣ်တဲၣ်ကီၢ်ဆၢ ပယီၤသုးကလၢၤဒ်အံၤ ထံၣ်ထၣ်ဒုးယၤသုးကလၢၤဒီးထံခံကီၢ်ဆၢသုးကလၢၤသ့ၣ်တဖၣ်န့ၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးက့(၄)တီခိၣ်ရိၣ်မဲသုးပၥ်ဖှိၣ်ထီၣ်မၤန့ၢ်ကွံၥ်ဝဲဖဲအပူၤကွံၥ်ခါ အ့ဖြ့ၣ်ဒီးလါအမ့ၤအတီၢ်ပူၤလံအသိးအခဲထီၣ်မၤန့ၢ်ကဒီးဝဲအံသၣ်ဃ့ၢ်သုးကလၢၤလံအဃိတကီၢ်ခါခဲအံၤန့ၣ် ကီၢ်ဆၢဒီတကျိၤပယီၤသုကလၢၤအိၣ်တ့ၢ်က့ၤ(၃)ဖျၢၣ်လၢကလံၤစိးတကပၤဒ်အမ့ၢ်ဝဲ ညၣ်ပျၤ,သူၣ်ခၣ်ဒီးနၣ်အ့ၣ်တီၣ် သ့ၣ်တဖၣ်အဂ့ၢ်သ့ၣ်ညါဘၣ်လၢသုးက့(၄)အပှၤဘၣ်မူဘၣ်ဒါအအိၣ်န့ၣ်လီၤ.
ဒူသထူၣ်ကီၢ်ရ့ၣ် တလါအတီၢ်ပူၤပယီၤသုးခးလီၤကျိဖးဒိၣ်ဒီးကဘီယူၤတ့ၢ်လီၤမ့ၣ်ပိၢ်(၃၉)ဘျီ, ကမျၢၢ်သံ(၂)ဂၤ,ဘၣ်ဒိ(၆)ဂၤ
လါယူၤ ၉ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤအပူၤ လါမ့ၤတလါအတီၢ်ပူၤ ခီဖျိပယီၤသုးခးလီၤ ကျိဖးဒိၣ်ဒီးကဘီယူၤလဲၤတ့ၢ်လီၤမ့ၣ်ပိၢ်ခဲလၢၥ်(၃၉)ဘျီအဃိ ကမျၢၢ်သံ(၂)ဂၤ,ဘၣ်ဒိ(၆)ဂၤအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ် တၢ်မၤနီၣ်စရီ အပူၤန့ၣ်လီၤ. ဒ်ကီၢ်ရ့ၣ်တၢ်မၤနီၣ်စရီပူၤအိၣ်၀ဲအသိးန့ၣ် ဒူသထူၣ်ကီၢ်ရ့ၣ်ပူၤ စးထီၣ်ဖဲလါမ့ၤ ၁ သီတုၤ ၃၁ သီ လၢတလါအတီၢ်ပူၤ ကဘီယူၤ လဲၤတ့ၢ်လီၤ၀ဲမ့ၣ်ပိၢ်(၁၆)ဘျီ, ပယီၤသုးခးလီၤကျိဖးဒိၣ်(၂၃)ဘျီ အဃိ လီၢ်က၀ီၤကမျၢၢ်ပိၥ်မုၣ်သံ(၂)ဂၤဒီး ဘၣ်ဒိဘၣ်ထံး၀ဲ(၆)ဂၤ အကျါပၣ်ဃုၥ်၀ဲဖိသၣ်(၂)ဂၤန့ၣ်လီၤ. တကးဒံးဘၣ်လၢကျိဖးဒိၣ်ဒီးကဘီယူၤအဃိ ကမျၢၢ်သံ(၂)ဂၤအံၤအမဲၥ်ညါ ဖဲလါမ့ၤ ၃၀ သီအနံၤစ့ၢ်ကီး ပယီၤသုးကျိၤလၢအဟဲ ထီၣ် ဆီတလဲအသုးလၢလ့က့ၣ်ဒီးတးပီသုးကလၢၤအံၤတဖၣ် ဖဲဟဲထီၣ်လၢကျဲအခါဖီၣ်၀ဲကးဒီးနံၤသ၀ီဖိ၀ံၤ မၤသံကွံၥ်၀ဲဒၣ်န့ၣ် လီၤ. တကတီၢ်ဃီတလါအတီၢ်ပူၤခီဖျိလၢကဘီယူၤဒီးကျိဖးဒိၣ်အဃိအံၤစ့ၢ်ကီး ကမျၢၢ်ဟံၣ်ဟးဂီၤလီၤပှီၢ်(၁၄)ဖျၢၣ်, ဘၣ်ဒိတဆံးတက့ၢ် (၄၃)ဖျၢၣ်, တၢ်ဆါဟံၣ်စ့ၢ်ကီးလီၤပှီၢ်ဟးဂီၤ၀ဲ(၁)ဖျၢၣ်အမဲၥ်ညါ ကမျၢၢ်အတၢ်ထူၣ်တၢ်ဘိ,ရီဘၢၣ်ထူၣ်သ့ၣ်တဖၣ်ဟးဂီၤဘၣ်ဒိဘၣ် ထံး ၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ. ပယီၤသုးအံၤခီဖျိခးလီၤကျိဖးဒိၣ်,သူ၀ဲကဘီယူၤဟးတ့ၢ်လီၤမ့ၣ်ပိၢ်အဃိ လီၢ်က၀ီၤကမျၢၢ်သ့ၣ်တဖၣ်ဘၣ်အိၣ်လၢ တၢ်ပျံၤတၢ်ဖုး, ဟးထီၣ်က့ၤလီၤလဲၤက့ၤဖံးမၤတၢ်တသဘျ့လၢၤဘၣ်အဖီခိၣ် တၢ်ဃံးတၢ်စ့ၤအိၣ်ထီၣ်၀ဲလၢတၢ်လုၢ်အီၣ်နီၢ်ခိသးသမူတကပၤ အဂ့ၢ်န့ၣ် ဒူသထူၣ်ကီၢ်ရ့ၣ်ပှၤဘၣ်မူဘၣ်ဒါစံး၀ဲန့လီၤ. ဒ်န့ၣ်အသိးလၢတလါအတီၢ်ပူၤ ဒုးယၤတၢ်ဖ့ၣ်စၢကဲထီၣ်၀ဲလၢဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်ဒီး ပယီၤသုးအဘၢၣ်စၢၤ(၆)ဘျီအဃိ ပယီၤသုးတကပၤသံ(၇)ဂၤ,ဘၣ်ဒိ(၆)ဂၤဒီးသိလ့ၣ်ဟးဂီၤတခိၣ်န့ၣ်လီၤ. လၢန့ၣ်အမဲၥ်ညါပယီၤသုးတကပၤဖီၣ်မၤသံ၀ဲ ကၠဲးထိၣ်ကီၢ်ဆၣ်ပူၤ ဒူသ၀ီတၢ်ဒီသဒၢကရူၢ်အပှၤ(၂)ဂၤကဲထီၣ်စ့ၢ်ကီး၀ဲအသိး...
သုးက့-၃ ဟီၣ်ကဝီၤ တၢ်ထီၣ်မၤန့ၢ်ပယီၤသုးလၢဟဲအိၣ်ဆီလီၤအသးဖဲဒူသဝီပူၤတဖၣ်
လါယူၤ ၉ သီ, ၂၀၂၅ နံၣ်, ခ့ၣ်အဲးစံၣ် ချၢၣ်လွံၢ်ထူၣ်ကီၢ်ရ့ၣ်, မူကီၢ်ဆၣ်ဟီၣ်ကဝီၤအပူၤဖဲအပူၤကွံၥ်လါယူၤ(၆)သီအနံၤန့ၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဃုၥ် ဒီးတၢ်ပၢၢ်ဆၢသုးပၥ်ဖှိၣ်သ့ၣ်တဖၣ်ထီၣ်ဒုးမၤန့ၢ်ကွံၥ်ဝဲပယီၤသုးလၢဟဲအိၣ်ဆီလီၤအသးဖဲဒူသဝီပူၤတဖၣ်အဂ့ၢ်ချၢၣ်လွံၢ်ထူၣ်ကီၢ်ရ့ၣ်အပှၤဘၣ်မူဘၣ်ဒါစံးဝဲန့ၣ်လီၤ. ပယီၤသုးတၢ်လီၢ်လၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တၢ်ပၢၢ်ဆၢသုးပၥ်ဖှိၣ်သ့ၣ်တဖၣ်ထီၣ်ဒုးဖျိးကွံၥ်ဝဲန့ၣ်မ့ၢ်ဝဲပယီၤသုးလၢဟဲအိၣ်ဆီလီၤအသးဖဲ(အိပ့ၤစူၣ်)သဝီအပူၤသ့ၣ်တဖၣ်ဒီးပယီၤသုးတကပၤတၢ်သံတၢ်ဘၣ်ဒိဘၣ်ထံးအိၣ်ဝဲဒီးတၢ်မၤန့ၢ်ဝဲတၢ်စုကဝဲၤအိၣ်ဝဲအဂ့ၢ်ချၢၣ်လွံၢ်ထူၣ်ကီၢ်ရ့ၣ်အပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ. "ဘၣ်ထွဲဒီးတၢ်ထီၣ်ဝဲတၢ်လီၢ်န့ၣ်လီၤတံၢ်လီၤ. တၢ်ထီၣ်မၤန့ၢ်ဝဲတၢ်လီၤန့ၢ်ဝဲဘၣ်ဆၣ်တၢ်မၤန့ၢ်ဝဲတၢ်စုကဝဲၤဆံးအါလဲၣ်န့ၣ်ပှၤဘၣ်မူ ဘၣ်ဒါသ့ၣ်တဖၣ်တပၥ်ဖျါဝဲတၢ်ဂ့ၢ်တၢ်ကျိၤလီၤတံၢ်ဒံးဘၣ်. အဃိန့ၣ်တဲလီၤတံၢ်တဘၣ်ဘၣ်န့ၣ်လီၤ." အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤလီၤ. ဘၣ်ဆၣ်ဘၣ်ထွဲဒီးပယီၤသုးကီၣ်ကးတကပၤသံဘၣ်ဒိဘၣ်ထံးဒီးတၢ်မၤန့ၢ်ဃုၥ်ဝဲပယီၤသုးတၢ်စုကဝဲၤသ့ၣ်တဖၣ်ခီန့ၣ်ကီၢ်ရ့ၣ်အပှၤဘၣ်မူဘၣ်ဒါသ့ၣ်တဖၣ်တမၤန့ၢ်ဘၣ်စရီဒံးဘၣ်အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဒ်ချၢၣ်လွံၢ်ကီၢ်ရ့ၣ်အပှၤဘၣ်မူဘၣ်ဒါစံးဝဲအသိးန့ၣ်တၢ်ထီၣ်မၤန့ၢ်ဝဲဒၣ်ပယီၤသုးတၢ်လီၢ်လၢဟဲအိၣ်ဆီလီၤအသးဖဲ(အိပ့ၤစူၣ်)သဝီပူၤအဂ့ၢ်သ့ၣ်ညါဘၣ်အသိးဘၣ်ဆၣ်ဒ်တၢ်ကစီၣ်တနီၤပၥ်ဖျါဝဲအသိးန့ၣ်တၢ်ထီၣ်မၤန့ၢ်ဃုၥ်ဝဲစ့ၢ်ကီးဒီးပယီၤသုးလၢဟဲအိၣ်ဆီလီၤအသးဖဲ(အိၡၣ်ကိ)သဝီပူၤသ့ၣ်တဖၣ်အဂ့ၢ်သ့ၣ်ညါဘၣ်န့ၣ်လီၤ. လၢန့ၣ်အမဲၥ်ညါဖဲတၢ်ထီၣ်ဒုးဝဲပယီၤသုးကီၣ်ကးတၢ်လီၢ်အံၤအဆၢကတီၢ်ပယီၤသုးကီၣ်ကးသ့ၣ်တဖၣ်ဂုၤက့ၤအခံဒီးက့ၤလီၤပၥ်ဖှိၣ်က့ၤအသးဒီးအပှၤလၢအိၣ်ဆီလီၤအသးဖဲ(နၣ်သၤကွ့)သုးကလၢၤပူၤသ့ၣ်တဖၣ်အဂ့ၢ်ဂံၢ်ခီၣ်ထံးတၢ်ကစီၣ်ပၥ်ဖျါဝဲန့ၣ်လီၤ. ဒ်န့ၣ်အသိးမူကီၢ်ဆၣ်ဟီၣ်ကဝီၤအပူၤဖဲအပူၤကွံၥ်လါအ့ဖြ့ၣ်(၂၈)သီအနံၤန့ၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်ထီၣ်မၤန့ၢ်ဝဲပယီၤ သုးဟဲအိၣ်ဆီလီၤသးအလီၢ်ဒ်အမ့ၢ် နီၢ်ကိ, ယ့တဲးကိ, ယၣ်မၠိအီၣ်, နိၣ်ကျီၤ, တီၣ်စူးသ၀ီတၢ်လီၢ်တဖၣ်အံၤဒီးပယီၤသုးသံအကျါပၣ် ဃုၥ်အသုးရ့ၣ်ခိၣ်(၂)တဂၤ, သုးခိၣ်ယီၤတဂၤအမဲၥ်ညါတၢ်မၤန့ၢ်ဃုၥ်စ့ၢ်ကီးဝဲပယီၤသုးတၢ်စုကဝဲၤပီးလီသ့ၣ်တဖၣ်အဂ့ၢ်ခ့ၣ်အဲၣ် ယူၣ်ထုးထီၣ်ပၥ်ဖျါဝဲန့ၣ်လီၤ.
ထံဂုၤကီၢ်ဂၤဒီးကီၢ်ကၠီၣ်တဲၣ်ကူၣ်သ့ပှၤဘၣ်မူဘၣ်ဒါကဟံးစုနဲၣ်ကျဲဆီၣ်ထွဲခီကီၢ်တၢ်ကူၣ်ဘၣ်ကူၣ်သ့အဂ့ၢ် (BMWEC)ဆီၣ်တခူထီၣ်
လါယူၤ ၉သီ, ၂၀၂၅နံၣ်, ခ့ၣ်အဲးစံၣ်, ကီၢ်ကၠီၣ်တဲၣ်အပူၤခီကီၢ်ကၠိတဖၣ်အံၤထံဂုၤကီၢ်ဂၤဒီးကၠီၣ်တဲၣ်ကူၣ်သ့ပှၤဘၣ်မူဘၣ်ဒါတဖၣ်ကဟံးစုနဲၣ်ကျဲဒီးဆီၣ်ထွဲမၤစၢၤဝဲအဂ့ၢ်,ကီၢ်ပယီၤခီကီၢ်ကူၣ်သ့ပှၤမၤတၢ်ဖိကမံးတံၥ်(Burmese Migrant Worker’s Education Committee) (BMWEC)ပှၤဘၣ်မူဘၣ်ဒါတဖၣ်ဆီၣ်တခူစံးဝဲဒၣ်န့ၣ်လီၤ. ကီၢ်ပယီၤခီကီၢ်ကၠိသ့ၣ်တဖၣ်အံၤအိၣ်သူၣ်လီၤဝဲအသးယံၥ်ဝဲလၢအနံၣ်(၃၀)ဘျဲၣ်ဃၣ်ဃၣ်လံဘၣ်ဆၣ်,ကၠိအတၢ်လဲၤတရံးသးအဂီၢ်တၢ်ဆီၣ်ထွဲမၤစၢၤတအိၣ်ဝဲလီၤတံၢ်လီၤဆဲးဒံးဘၣ်အသိး,တၢ်ဟံးစုနဲၣ်ကျဲမူၤမူၤနီၢ်နီၢ်တအိၣ်ဝဲဒံးဘၣ်အဂ့ၢ်,(BMWEC)ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. လၢတၢ်န့ၣ်အဃိ,ဒ်သိးခီကီၢ်ဖိဒံဖိသၣ်တဖၣ်ကထီၣ်ဘၣ်ကၠိဘျ့ဘျ့ဆှီဆှီဒီးကၠိတၢ်လဲၤတရံးသးကဘၣ်ဂ့ၢ်ဘၣ်ဝီအဂီၢ်,မုၢ်လၢ်ဝဲလၢထံဂုၤကီၢ်ဂၤကူၣ်သ့ကရူၢ်ကရၢ,ပှၤဟူးဂဲၤလၢဖိဒံဖိသၣ်ဂ့ၢ်ဝီဒီးကၠီၣ်တဲၣ်ကူၣ်သ့ပှၤဘၣ်မူဘၣ်ဒါတဖၣ်ကနုၥ်လီၤကွၢ်ဝဲကၠိတဖၣ်အံၤအတၢ်အိၣ်သးအဂ့ၢ်,(BMWEC)(Program)ပှၤနဲၣ်တၢ်သရၣ်မုၣ်နီၢ်လါရှံစံးဝဲဒ်အံၤန့ၣ်လီၤ. “ပကၠိသ့ၣ်တဖၣ်အံၤအိၣ်လၢပှဲၤဝဲဒီးကၠိတဖျၢၣ်အက့ၢ်အဂီၤအတၢ်သူၣ်ထီၣ်ဆီလီၤသးလၢၥ်လံ,ပဟ့ၣ်လီၤတၢ်ကူၣ်ဘၣ်ကူၣ်သ့တခါလီၤ.တဖိးမံသဲစးပတမၤဘၣ်.အဃိန့ၣ်ဒ်သိးပကၠိသ့ၣ်တဖၣ်အံၤပကထီၣ်ဘၣ်အီၤဘျ့ဘျ့ဆှီဆှီလၢတအိၣ်ဒီးတၢ်ပျံၤတၢ်ဖုး,တၢ်သူၣ်ကိၢ်သးဂီၤဘၣ်အဂီၢ်န့ၣ်မ့မ့ၢ်ယိၤကၠီၣ်တဲၣ်ပဒိၣ်န့ၣ်ပအဲၣ်ဒိးလၢအဝဲသ့ၣ်ကဟဲကွၢ်ထွဲက့ၤပှၤန့ၣ်လီၤ.ဒီးပလိၣ်ဘၣ်စ့ၢ်ကီးယိၤပှၤတဝၢတဖၣ်လၢကနၢ်ပၢၢ်ပှၤန့ၣ်လီၤ.မ့မ့ၢ်လၢပကၠိတဖၣ်အံၤအတၢ်လဲၤသရံးသးကဘၣ်ဘျီးဘၣ်ဒါအဂီၢ်တခီန့ၣ်,ပအဲၣ်ဒိးလၢထံဂုၤကီၢ်ဂၤကူၣ်သ့ဘၣ်ထွဲကရူၢ်ကရၢသ့ၣ်တဖၣ်ဒီးပှၤလၢဟူးဂဲၤလၢဖိဒံဖိသၣ်ဂ့ၢ်ဝီတဖၣ်ကနၢ်ဟူပကလုၢ်,ဟဲကွၢ်ပတၢ်အိၣ်သး,ဟံးစုနဲၣ်ကျဲပှၤဒီးမၤပှဲၤပတၢ်လိၣ်ဘၣ်သ့ၣ်တဖၣ်န့ၣ်လီၤ”အဂ့ၢ်စံးဝဲဒၣ်န့ၣ်လီၤ. (၂၀၂၁)နံၣ်သုးဟံးန့ၢ်တၢ်စိကမီၤအလီၢ်ခံ,ကီၢ်ပယီၤအပူၤဒုးယၤတၢ်သဘံၣ်သဘုၣ်ဒီးသုးကီၣ်ကးပညိၣ်ခးလီၤဝဲတၢ်ဆူကၠိတၢ်မၤလိတဖၣ်အဃိ,ခီကီၢ်ပှၤမၤတၢ်ဖိတဖၣ်အဖိအလံၤအမဲၥ်ညါ,ထံဆၢကီၢ်ဆၢဖိဒံဖိသၣ်တဖၣ်ဃုၥ်ဒီးတၢ်လီၢ်အဂၤဖိဒံဖိသၣ်တဖၣ်နုၥ်လီၤဝဲလၢခီကီၢ်ကၠိတဖၣ်အပူၤအါထီၣ်ဝဲဒၣ်ကွ့ၢ်ကွ့ၢ်အဂ့ၢ်,(BMWEC)ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. ဒီးကၠိဖိသ့ၣ်တဖၣ်အံၤတနီၤနုၥ်လီၤမၤလိဘၣ်တၢ်လၢပှၤသိးပှၤကျါအိၣ်ဝဲဘၣ်ဆၣ်,တနီၤခီဖျိတီၤဒၢးတကူတလၢအတၢ်ကီတၢ်ခဲဒီး,တနီၤတၢ်ဆီတလဲကၠိ(လံၥ်ဟးထီၣ်ကၠိ)အလံၥ်အုၣ်ကီၤသးဃုၥ်ဒီးတၢ်ဂ့ၢ်လၢကလုၥ်ကလုၥ်လၢအဂၤတဖၣ်အိၣ်ဝဲဒၣ်အဃိ,တန့ၢ်ထီၣ်ဘၣ်ကၠိမၤလိဘၣ်ဝဲတၢ်ဘၣ်အဂ့ၢ်,သ့ၣ်ညါဘၣ်ဒ်ပှၤဟူးဂဲၤလၢခီကီၢ်ကူၣ်သ့ကရူၢ်ကရၢပှၤဘၣ်မူဘၣ်ဒါတဖၣ်စံးဝဲဒၣ်အသိးန့ၣ်လီၤ. ဘၣ်ဃးဒီးဖိဒံဖိသၣ်ဒ်အံၤသ့ၣ်တဖၣ်တန့ၢ်မၤလိဘၣ်ဝဲတၢ်ဘၣ်အဖီခိၣ်,(BMWEC)အစုတီၤဖီလၥ်ဆၣ်တူၢ်ဂီၤကၠိသရၣ်(စီၤမ့ကိၤကိၤ)စံးဝဲဒ်အံၤန့ၣ်လီၤ. “ထဲခီကီၢ်ပှၤမၤတၢ်ဖိအဖိအလံၤဖိသၣ်သ့ၣ်တဖၣ်န့ၣ်အိၣ်ဖးအါလံ,တၢ်ဒုးတၢ်ယၤတၢ်အိၣ်သးကလုၥ်ကလုၥ်အဃိဖိသၣ်ဟဲနုၥ်လီၤအိၣ်အါထီၣ်ကဒီး,တနီၤနီၤခီအလံၥ်အုၣ်ကီၤသးပၣ်သနၥ်က့တနီၤနီၤတပၣ်အဃိပတူၢ်လိၥ်ဘၣ်ကီစ့ၢ်.ဒီးတနီၤနီၤခီတီၤဒၢးတအိၣ်လၢပှဲၤဘၣ်အဃိတန့ၢ်မၤလိဘၣ်တၢ်အိၣ်ဝဲလီၤ.ပမ့ကွၢ်န့ၣ်,ဖိသၣ်တဖၣ်အံၤအတၢ်ခွဲးတၢ်ယၥ်အိၣ်လၢကဘၣ်မၤလိတၢ်သနၥ်က့တန့ၢ်မၤလိဘၣ်ဝဲဘၣ်တၢ်ဘၣ်န့ၣ်လီၤ”အဂ့ၢ်စံးဝဲဒၣ်န့ၣ်လီၤ. ကီၢ်ကၠီၣ်တဲၣ်ဘီကီး,ခၠိဘူရံၣ်တၢ်လီၢ်တဖၣ်အမဲၥ်ညါတးကီၢ်ရ့ၣ်တဘ့ၣ်အပူၤခီကီၢ်ကၠိတဖၣ်အိၣ်ဝဲအဖျၢၣ်(၆၀)ဘျဲၣ်ဒီးအပူၤကွံၥ်နံၣ်ကၠိတၢ်မၤလိအပူၤကၠိဖိအနီၢ်ဂံၢ်အိၣ်ဝဲအဂၤ(၂)ကလးဃၣ်ဃၣ်အဂ့ၢ်,သ့ၣ်ညါဘၣ်န့ၣ်လီၤ. ဒီးကၠိသ့ၣ်တဖၣ်အံၤဒ်သိးအတၢ်လဲၤတရံးသးကဘၣ်ဘျီးဘၣ်ဒါအဂီၢ်ဘၣ်ဒိးသန့ၤထီၣ်ဝဲအသးလၢတၢ်မၤဘူၣ်ကစၢ်တနီၤဒီးကၠိဖိမိၢ်ပၢ်တဖၣ်တနီၤအအိၣ်အိၣ်ဝဲအသိး,ဒ်သိးကၠိဖိတဖၣ်ကန့ၢ်မၤလိဘၣ်တၢ်ဘျ့ဘျ့ဆှီဆှီအဂီၢ်ပှၤဟူးဂဲၤလၢခီကီၢ်တၢ်ကူၣ်ဘၣ်ကူၣ်သ့ကရူၢ်ကရၢတဖၣ်ပၥ်ဖှိၣ်မၤသကိးဝဲတၢ်ဒီးကၠီၣ်တဲၣ်ပဒိၣ်ကူၣ်သ့ပှၤဘၣ်မူဘၣ်ဒါတဖၣ်လၢတၢ်နၢ်ပၢၢ်လိၥ်သးခံခီယၢ်ပၤအပူၤအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.