အီၣ်ဘၣ်ကိၣ်လၢအိၣ်ဒီးအစုၣ်အပျၢ်အဃိမဲၢ်လးဒဲကဝီၤဖိ(၁၀)ဂၤဘၣ်တၢ်ဆှၢဆူတၢ်ဆါဟံၣ်
လါယူၤ ၈ သီ, ၂၀၂၅ နံၣ်, ခ့ၣ်အဲးစံၣ် ဖဲမဟါအံၤလါယူၤ(၇)သီ, ဟါခီ(၄)နၣ်ရံၣ်ဘျဲၣ်အဆၢကတီၢ်န့ၣ်ဖဲကညီဘၣ်ကီဘၣ်ခဲမဲၢ်လးဒဲကဝီၤအပူၤ, ခီဖျိအီၣ် ဘၣ်ဝဲကိၣ်လၢအိၣ်ဒီးတၢ်စုၣ်တၢ်ပျၢ်အဃိပှၤဒဲကဝီၤဖိအဂၤ(၁၀)ဘၣ်တၢ်ဆှၢအဝဲသ့ၣ်ဆူတၢ်ဆါဟံၣ်ကဲထီၣ်အသးအဂ့ၢ်မဲၢ်လးဒဲကဝီၤအပှၤဘၣ်မူဘၣ်ဒါစံးဝဲန့ၣ်လီၤ. ဘၣ်ထွဲဒီးမဲၢ်လးဒဲကဝီၤအပူၤတၢ်အီၣ်ဘၣ်ဝဲကိၣ်လၢအိၣ်ဒီးတၢ်စုၣ်တၢ်ပျၢ်ကဲထီၣ်အသးအံၤန့ၣ်တၢ်သ့ၣ်ညါဘၣ်လၢကိၣ်အံၤဘၣ်တၢ်မၤလိၥ်အီၤလၢ(အီၣ်လဲ)ပူၤတဆီအဖီခိၣ်အီၣ်ဘၣ်ဝဲဒၣ်ဒ်အံၤလီၤအဂ့ၢ်သ့ၣ်ညါဘၣ်န့ၣ်လီၤ. မဲၢ်လးဒဲကဝီၤဖိအဂၤ(၁၀)အံၤတကီၢ်ခါခဲအံၤဘၣ်တၢ်ဆှၢအဝဲသ့ၣ်လၢဒဲကဝီၤအပူၤတၢ်ဆါဟံၣ်ဒီးဘၣ်တၢ်ဒုးကသါအဝဲသ့ၣ်လၢ(အီးစံၣ်ကၠ့ၣ်)အဂ့ၢ်သ့ၣ်ညါဘၣ်အသိးလၢအကျါပှၤလၢတူၢ်ဘၣ်နးနးကျံးကျံးအိၣ်လၢတၢ်ဘၣ်ယိၣ်အပူၤ(၃)ဂၤအဂ့ၢ်မဲၢ်လးဒဲကဝီၤနဲၣ်ရွဲၣ်စီၤဆါဒ့စံးဝဲဒ်အံၤန့ၣ်လီၤ. "တဟါညါအံၤကဘၣ်ဖဲ(၄)နၣ်ရံၣ်ဘျဲၣ်ပဖိပလံၤမၢ်လိၥ်အီၣ်တၢ်လၢတၢ်ချၢ(အီၣ်လဲ)တဖၣ်အီၣ်ဘၣ်ဝဲဒီးဘၣ်ထီၣ်တၢ်ဆါဟံၣ်န့ၣ်လီၤ. ပၣ်ဃုၥ်ဝဲဖိသၣ်ဒီးပိၥ်မုၣ်သ့ၣ်တဖၣ်န့ၣ်လီၤ. ပှၤသ့ၣ်တဖၣ်အံၤတၢ်ဘၣ်ဒုးကသါဝဲ(အီၣ်ကစံၣ်ကၠ့ၣ်)ဒီး လၢအကျါနးနးန့ၣ်အိၣ်ဝဲ(၃)ဂၤလီၤ. တဟါအံၤကဲထီၣ်အသးန့ၣ်မ့ၢ်ဝဲကိၣ်တခါအံၤမီၤနီၤ. ဘၣ်ဆၣ်အဲၣ်ဒိးတဲလၢတမ့ၢ် ထဲကိၣ်တခါအံၤဘၣ်,ကိၣ်လၢမုၢ်နံၤမုၢ်သီတလၢတဖၣ်ကကွၢ်သမံသမိးဝဲဝံၤမးဆါအီၤမီၤနီၤ" အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ပှၤလၢဘၣ်တၢ်ဆှၢဝဲဆူတၢ်ဆါဟံၣ်သ့ၣ်တဖၣ်အံၤမ့ၢ်ဝဲပှၤပိၥ်မုၣ်(၇)ဂၤ,ပိၥ်ခွါ(၃)ဂၤခဲလၢၥ်ပှၤအဂၤ(၁၀)ဒီးအကျါ(၈)ဂၤန့ၣ်ဝဲမ့ၢ်ဝဲဖိသၣ်လၢအသးနံၣ်အိၣ်စးထီၣ်(၇)လါတုၤ(၁၃)နံၣ်အဘၢၣ်စၢၤသ့ၣ်တဖၣ်န့ၣ်လီၤ. ပှၤသ့ၣ်တဖၣ်အံၤအိၣ်ဝဲ ဒၣ်လၢကဝီၤဒိၣ်(C),ကဝီၤဒ့(၄)သ့ၣ်တဖၣ်အဂ့ၢ်သ့ၣ်ညါဘၣ်လၢပှၤဘၣ်မူဘၣ်ဒါအိၣ်န့ၣ်လီၤ. လၢန့ၣ်အမဲၥ်ညါခီဖျိမဲၢ်လးဒဲကဝီၤအပူၤအံၤပှၤလၢတၢ်ချၢသ့ၣ်တဖၣ်ဟဲဆါဝဲကိၣ်ဟဲအါထီၣ်ဝဲအသိးကိၣ်လၢအမုၢ်နံၤမုၢ်သီတလၢသ့ၣ်တဖၣ်စ့ၢ်ကီးဟဲအါထီၣ်ဝဲအဃိဘၣ်ထွဲဒီးဒဲကဝီၤအပူၤပှၤလၢဟဲက့ၤပှ့ၤစိၥ်ဆါဝဲကိၣ်သ့ၣ်တဖၣ်ကကွၢ်ထံသမံသမိးဝဲမုၢ်နံၤမုၢ်သီလီၤတံၢ်လီၤဆဲးဒီးအသုတဆါဝဲကိၣ်လၢမုၢ်နံၤမုၢ်သီတလၢသ့ၣ်တဖၣ်တဂ့ၤအဂ့ၢ်ဒဲကဝီၤပှၤဘၣ်မူဘၣ်ဒါသ့ၣ်တဖၣ်ဟ့ၣ်ပလီၢ်ဝဲစ့ၢ်ကီးန့ၣ်လီၤ. ဒ်န့ၣ်အသိးမဲၢ်လးဒဲကဝီၤအပူၤအံၤဘၣ်ထွဲဒီးတၢ်ကဲထီၣ်အသးဒိၣ်ဒိၣ်မုၢ်မုၢ်ဒ်သိးအံၤန့ၣ်တအိၣ်ဘၣ်ဒီးဘၣ်ဆၣ်ဖဲအပူၤကွံၥ်မဟါတနွံန့ၣ်တၢ်ကဲထီၣ်ဝဲအသးအိၣ်ဘၣ်ဆၣ်လၢကဘၣ်ထီၣ်တုၤလၢတၢ်ဆါဟံၣ်ပတီၢ်တခီတအိၣ်ဘၣ်အဂ့ၢ်သ့ၣ်ညါဘၣ်လၢမဲၢ်လးဒဲကဝီၤအပှၤဘၣ်မူဘၣ်ဒါအိၣ်န့ၣ်လီၤ.
သုးမီၤစိရိၤအပှၤဟဲက့ၤပၥ်လီၤကဒီးစုက၀ဲၤ ၃ ဂၤလၢ(သုးက့ ၁)အအိၣ်
လါယူၤ ၆ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤအပူၤ ဖဲအပူၤကွံၥ်စှၤသီအခါ သုးမီၤစိရိၤ (သုးကီၣ်ကး)အပှၤဟဲက့ၤပၥ်လီၤကဒီးစုက၀ဲၤလၢ(၃)ဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤပှၤဘၣ်မူဘၣ်ဒါ အအိၣ်န့ၣ်လီၤ. ဖဲလါယူၤ ၂ သီအနံၤ သုးကီၣ်ကး(ခမရ-၅၉၈)သုးရ့ၣ်အလၢအိၣ်ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဆီထံးကီၢ်ဆၣ် အပူၤအံၤအပှၤတဂၤ ဟဲက့ၤပၥ်လီၤစုက၀ဲၤလၢကၠဲးထိၣ်ကီၢ်ဆၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၃)အအိၣ် န့ၣ်လီၤ. ဒ်(KNLA)ပှၤဘၣ်မူဘၣ်ဒါစံး၀ဲအသိးန့ၣ် ပယီၤသုးဖိလၢအဟဲက့ၤပၥ်လီၤစုက၀ဲၤတဂၤအံၤဟဲက့ၤစိၥ်ဃုၥ်၀ဲ(MA-1)ကျိတခိၣ်, အဆၣ်ဒၢတခါ, အချံ(၅၀)ဘျဲၣ်ဒီး ပှၤခံဂၤအံၤလီၢ်က၀ီၤပှၤဘၣ်မူဘၣ်ဒါဟ့ၣ်လီၤဆီၣ်ထွဲမၤစၢၤအီၤစ့ပယီၤ အကလီၢ်ခံဆံ (၂,၀၀၀,၀၀၀)အဂ့ၢ်န့ၣ် သ့ၣ်ညါဘၣ်န့ၣ်လီၤ. ဒ်န့ၣ်အသိးမုၢ်ဆ့ၣ်ထီၣ်ဖဲလါယူၤ ၃ သီအနံၤန့ၣ်စ့ၢ်ကီး လၢဘံလ့ကီၢ်ဆၣ်ပူၤ ပယီၤသုးဖိအသီ(၂)ဂၤလၢအိၣ်နးကၠံသုးကလၢၤအံၤ ဟဲက့ၤပၥ်လီၤ၀ဲ စုက၀ဲၤလၢကညီဒီကလုၥ်ဂၢၤသုးကရၢ(KNDO) သုးရ့ၣ်-၂ အအိၣ် စိၥ်ဃုၥ်၀ဲကျိတဂၤတခိၣ်စုၥ်စုၥ်အဂ့ၢ်န့ၣ် သ့ၣ်ညါဘၣ်လၢ လီၢ်က၀ီၤပှၤဘၣ်မူဘၣ်ဒါအအိၣ်န့ၣ်လီၤ. ပှၤခံဂၤအံၤမ့ၢ်၀ဲ ဖၠိကွၠဲၤသ့(၃၂)နံၣ်, ၀့ၤလူၣ်ကၠီၤ(၃၃)နံၣ် ဒီးအ၀ဲသ့ၣ်အံၤအသုးထံးမ့ၢ်၀ဲ (ခလရ-၂၈)လၢအိၣ်ဖၣ်အၣ်ကီၢ်ရ့ၣ် (သုးက့ ၇) လူၢ်ပျဲၢ်၀့ၢ် အဂ့ၢ်န့ၣ် သ့ၣ်ညါဘၣ်န့ၣ်လီၤ. တကးဒံဘၣ်အ၀ဲသ့ၣ်အံၤဘၣ်တၢ်ဖီၣ်န့ၢ်ဆူၣ်အီၤလၢသုးကျါနုၥ်လီၤသုးတနံၣ်မးတအိၣ်ဒံးဘၣ်ဒီး တချုးတၢ်ဖီၣ်အ၀ဲသ့ၣ် ဒံးဘၣ်အပူၤကွံၥ်မ့ၢ်ပှၤသ့ၣ်တဖၣ်လၢ အလဲၤဖံးမၤတၢ်လၢကီၢ်ကၠီၣ်တဲၣ်ပူၤအဂ့ၢ်န့ၣ် (KNDO) သုးရ့ၣ်-၂ သုးဂ့ၢ်၀ီခိၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ. အ၀ဲစံး၀ဲလၢ“အ၀ဲသ့ၣ်ခံဂၤအံၤမ့ၢ်၀ဲပှၤဖီၣ်န့ၢ်ဆူၣ်အီၤ(စစ်မှုထမ်း)မီၤနီၤ.အကဲသုးန့ၢ်(၁၁)တလါတဂၤဒီး(၆)လါတဂၤ.ပသံကွၢ်အီၤန့ၣ်တဲ၀ဲလၢပယီၤသုးဖီၣ်န့ၢ်ဆူၣ်အီၤ.ဖဲအလဲၤမၤတၢ်လၢဘီကီးဟဲက့ၤလီၤဘျီပှၤဖီၣ်အီၤလၢကျဲပူၤဘျီပှၤမၢအကဲသုး.ပှၤခံဂၤအံၤအိၣ်ဟဲက့ၤလၢဘီကီးခံဂၤလၢၤလီၤ.အ၀ဲသ့ၣ်ဟဲလီၤအိၣ်ဖဲနးကၠံသုးကလၢၤပူၤန့ၣ်ကအိၣ်တလါဘျဲၣ်ဒံးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. တကီၢ်ခါခဲအံၤပယီၤသုးအပှၤလၢအဟဲက့ၤဟ့ၣ်လီၤသးသ့ၣ်တဖၣ်အံၤလီၢ်က၀ီၤပှၤဘၣ်မူဘၣ်ဒါအံးထွဲကွၢ်ထွဲပၥ်အ၀ဲသ့ၣ်လၢတၢ်ဘံၣ်တၢ်ဘၢအလီၢ်အဂ့ၢ်န့ၣ်...
ဘံလ့ကီၢ်ဆၣ်ပူၤ ပယီၤသုးဟဲထီၣ်တုၤကဒီးအသီတဒူၣ်လၢတးပီသုးကလၢၤ
လါယူၤ ၆ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ်အပူၤ လ့က့ၣ်သုးကလၢၤအမဲၥ်ညါဖဲမဟါဟါခီအဆၢကတီၢ်န့ၣ် ပယီၤသုးဟဲထီၣ်တုၤကဒီးအသီတဒူၣ်လၢတးပီသုးကလၢၤပူၤအဂ့ၢ်န့ၣ် လီၢ်က၀ီၤ(KNDO)ပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ် န့ၣ်လီၤ. ပယီၤသုးအံၤလၢကဆီတလဲသုးအဂီၢ် ဖဲလါယူၤ ၄ သီဟါခီအဆၢကတီၢ်န့ၣ် ပယီၤသုးဂံၢ်ဘါ(၈၀)ဃၣ်ဃၣ်ဟဲတုၤ၀ဲလၢ လ့က့ၣ်သုး ကလၢၤ၀ံၤလီၢ်ခံမုၢ်ဆ့ၣ်ထီၣ်ဖဲမဟါ ၅ သီ ဟါခီအဆၢကတီၢ် ပယီၤသုးလၢအဂၤတဒူၣ်လၢအသုးဂံၢ်ဘါကအိၣ် (၇၀),(၈၀)ခိၣ်ဃၢၤ အံၤဟဲထီၣ်တုၤကဒီး၀ဲလၢတးပီသုးကလၢၤဒ်အခဲအံၤအသိးအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါ စံး၀ဲ န့ၣ်လီၤ. လ့ၣ်က့ၣ်သုးကလၢၤပူၤသုးသီဟဲဆီတလဲသး၀ံၤမုၢ်ဆ့ၣ်ထီၣ်ဖဲတနံၤအံၤလါယူၤ ၆ သီ ဂီၤခီ ၄း၀၀ နၣ်ရံၣ်ဘျဲၣ်အဆၢကတီၢ်န့ၣ် သုးလီၢ်လံၤလၢအိၣ်သုးကလၢၤပူၤအံၤတဖၣ်ဟးထီၣ်ကွံၥ်၀ဲအဂ့ၢ်န့ၣ် ကညီဒီကလုၥ်ဂၢၤသးကရၢ(KNDO)သုးရ့ၣ်ခိၣ် စီၤမ့ထဲၣ် စံး၀ဲန့ၣ်လီၤ. “ဖဲမဟါန့ၣ်နုၥ်လီၤလၢလ့ၣ်က့ၣ်တဒူၣ်,အသုးဂံၢ်ဘါကအိၣ်လၢ(၇၀),(၈၀).ခဲအံၤနုၥ်လီၤကဒီးတဒူၣ်လၢတးပီသုးကလၢၤ,အပှၤ နီၣ်ဂံၢ်စ့ၢ်ကီးအိၣ်ထဲန့ၣ်လီၤ.ခဲအံၤပှၤဟဲဆီတလဲအ၀ဲသ့ၣ်လံအဃိဖဲတဂီၤညါအံၤန့ၣ်လ့ၣ်က့ၣ်ပယီၤသုးဖိလီၢ်လံၤတဖၣ်န့ၣ်ဟးထီၣ်က့ၤလူၤလီၤသးလၢတးပီတကပၤ.ခဲအံၤဒုတတုၤဒံးဘၣ်.မ့ၢ်ကလဲၤ၀ၣ်နုၥ်လီၤလၢတးပီသုးကလၢၤဒံးဧါဒုတသ့ၣ်ညါဘၣ်.မ့တနုၥ်လီၤဘၣ်ဒုအိၣ်ဒၣ်ကက့ၤတဘျီဃီဆူ၀့ၢ်ပူၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ပယီၤသုး(၂)ဒူၣ်လၢအဟဲထီၣ်တုၤဖဲလ့က့ၣ်ဒီးတးပီသုးကလၢၤခဲအံၤသ့ၣ်တဖၣ်ဖဲလါမ့ၤ ၂၈ သီအနံၤန့ၣ်လၢပနွဲၢ်ကျါသုးကလၢၤ လါခိသ၀ီကျဲကစၢၢ်အံၤတဆီ ဟဲထီၣ်၀ဲတပူၤဃီလၢခီၣ်အံၤဒီး ဒ်န့ၣ်အသိးလၢကတုၤဆူသုးကလၢၤခံဖျၢၣ်အံၤပူၤအဂီၢ် တၢ်ဆၢကတီၢ်ယံၤ၀ဲလၢအသီ(၁၀)ဘျဲၣ်ဃၣ်ဃၣ်ညါန့ၣ်လီၤ. တကတီၢ်ဃီဖဲလါမ့ၤ ၃၀ သီအနံၤ ပယီၤသုးတဖၣ်အံၤဖဲအ၀ဲသ့ၣ်ဟဲထီၣ်တုၤလၢလါခိသ၀ီဒီးနိၣ်သလးအီသ၀ီ ကစၢၢ်ကျါပှၢ်ပူၤ အခါန့ၣ် ဖီၣ်၀ဲကးဒီးနံၤသ၀ီဖိ စီၤလါထု(၅၂)နံၣ်၀ံၤ မၤသံကွံၥ်၀ဲလၢကျဲတီၤလိၤဒီးတၢ်က့ၤထံၣ်က့ၤအစိၣ်ဖဲလါယူၤ ၃ သီအနံၤ ကဲထီၣ်ဒံးန့ၣ်လီၤ. လ့က့ၣ်ဒီးတးပီသုးကလၢၤခံဖျၢၣ်လၢပယီၤသုးဟဲထီၣ်ဆီတလဲအပှၤခဲအံၤန့ၣ်အိၣ်စီၤစုၤလိၥ်အသးတယံၤ၀ဲဘၣ်...
ကၠီၣ်တဲၣ်ဖၠၣ်စိမိၤ(၃)ဖျၢၣ်ဟ့ၣ်လီၤဝဲ(BMWEC)အစုတီၤဖီလၥ်ကၠိသရၣ်,သရၣ်မုၣ်လံၥ်အုၣ်သး
လါယူၤ ၆သီ, ၂၀၂၅နံၣ်, ခ့ၣ်အဲးစံၣ်, ကီၢ်ကၠီၣ်တဲၣ်-ကညီကီၢ်စဲၣ်ကီၢ်ဆၢ ဝ့ၢ်မဲၢ်ဆီး,ထၣ်စီၤယါဒီးဖိးဖရၣ်ဝ့ၢ်ဟီၣ်ကဝီၤ(BMWEC)အစုတီၤဖီလၥ်ကၠိတဖၣ်အပူၤခီကီၢ်ကၠိသရၣ်သရၣ်မုၣ်တဖၣ်အံၤ,တလါအံၤလါမ့ၤ(၅)သီတုၤလၢ(၇)သီအပူၤကၠီၣ်တဲၣ်ဖၠၣ်စိမိၤ(၃)ဖျၢၣ်မၤဝဲတၢ်ဟ့ၣ်လီၤလံၥ်အုၣ်ကီၤသးတဖၣ်အိၣ်ဝဲအဂ့ၢ်,(BMWEC)ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. ကၠီၣ်တဲၣ်ဖၠၣ်စိမိၤလံၥ်အုၣ်သးလၢဟ့ၣ်လီၤခီကီၢ်ကၠိသရၣ်မုၣ်သ့ၣ်တဖၣ်အံၤဘၣ်ထွဲဘၣ်ဃးဝဲဒီးတၢ်ကဲကၠိသရၣ်အတၢ်သိၣ်လိကျိၤကွၥ်ဒီးလံၥ်အုၣ်သးအံၤမ့ၢ်တၢ်ပၥ်ပနီၣ်ဝဲခီကီၢ်ကၠိသရၣ်မုၣ်တဖၣ်အဃိတၢ်ဟ့ၣ်လီၤဝဲအဂ့ၢ်,ကီၢ်ပယီၤခီကီၢ်ကူၣ်သ့ပှၤမၤတၢ်ဖိကမံးတံၥ်(BMWEC)ပှၤဟ့ၣ်ကူၣ်ဟ့ၣ်ဖးတၢ်သရၣ်မုၣ်နီၢ်ဖီရ့ၣ်စံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ. “လံၥ်အုၣ်သးအံၤမ့ၢ်ဒၣ်တၢ်ဟ့ၣ်လီၤက့ၤဝဲ(BMWEC)အဖီလၥ်ခီကီၢ်ကၠိသရၣ်သရၣ်မုၣ်တဖၣ်န့ၣ်လီၤ.ပခီကီၢ်ကၠိသရၣ်သရၣ်မုၣ်သ့ၣ်တဖၣ်အံၤအါဒၣ်တက့ၢ်တၢ်တပၥ်ပနီၣ်ပှၤဘၣ်.ဖဲကၠီၣ်တဲၣ်ပှၤဘၣ်မူဘၣ်ဒါတဖၣ်ဟဲသမံသမိးပှၤအခါန့ၣ်,သံကွၢ်ပှၤလၢပဖျိထီၣ်ကၠိသရၣ်တၢ်မၤလိလံၥ်အုၣ်သးအိၣ်ဧါတအိၣ်ဧါဒီးခီဖျိပတၢ်တအိၣ်ကိးဂၤဒဲးဘၣ်အဃိန့ၣ်ပဃုကျဲဆဲးကျိးက့ၤကၠီၣ်တဲၣ်ဖၠၣ်စိမိၤဒ်အမ့ၢ်(ခၠူလၣ်လီၤကိ)(လါပၣ်ရၣ်ခၠၣ်ဖၣ်)ဒီး(ကံၢ်မဲရၣ်ခၠၣ်ဖၣ်)ဖၠၣ်စိမိၤသ့ၣ်တဖၣ်ဒီးရဲၣ်ကျဲၤက့ၤလၢပသရၣ်မုၣ်တဖၣ်ကဒိးန့ၢ်ဝဲလံၥ်အုၣ်သးလၢတၢ်ပၥ်ပနီၣ်အီၤလီၤ”အဂ့ၢ်စံးဝဲဒၣ်န့ၣ်လီၤ. ကဒိးန့ၢ်ဘၣ်ကၠီၣ်တဲၣ်လံၥ်အုၣ်ကီၤသးဒီးတၢ်ပၥ်ပနီၣ်အဂီၢ်ခီကီၢ်ကၠိသရၣ်သရၣ်မုၣ်တဖၣ်အံၤဘၣ်ထီၣ်ဝဲကၠိသရၣ်တၢ်မၤလိလၢ(Online)ဃုၥ်ဒီးတၢ်ချၢလၢဖၠၣ်စိမိၤကၠိတဖၣ်ပၥ်ပနီၣ်ဝဲဖဲအနၣ်ရံၣ်တဖၣ်အိၣ်ဝဲအဂ့ၢ်,(BMWEC)ကူၣ်သ့ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. ထီၣ်တၢ်မၤလိလၢကၠီၣ်တဲၣ်ဖၠၣ်စိမိၤတဖၣ်ဟ့ၣ်ဝဲဝံၤအလီၢ်ခံဒိးန့ၢ်ဘၣ်ဝဲလံၥ်အုၣ်သးလၢတၢ်ပၥ်ပနီၣ်အီၤဒ်အံၤအဖီခိၣ်မ့ၢ်တၢ်လၢအဂ့ၤဒီးကဲဘျူးဝဲအဂ့ၢ်,(ဘှဲကျါကၠိ)သရၣ်စီၤသီထူစံးဝဲဒ်အံၤန့ၣ်လီၤ. “တၢ်သိၣ်လိသ့ၣ်တဖၣ်အံၤအပူၤကွံၥ်ပထီၣ်ဘၣ်လံသနၥ်က့ခီဖျိပမ့ၢ်ခီကီၢ်အဃိပှၤတပၥ်ပနီၣ်ဘၣ်.ယဲယဖျိထီၣ်လၢကီၢ်ပယီၤဒီးယဖီၣ်ကီၢ်ပယီၤဖၠၣ်စိမိၤလံၥ်အုၣ်သးလီၤနါက့ဖဲအံၤပှၤတပၥ်ပနီၣ်ဘၣ်.အဃိန့ၣ်လံၥ်အုၣ်သးအံၤမ့ၢ်တၢ်အရ့ဒိၣ်လီၤ,ဖၠၣ်စိမိၤလၢဟ့ၣ်လီၤပှၤလံၥ်အုၣ်သးသ့ၣ်တဖၣ်အံၤဂ့ၤဒိၣ်မး,ကၠီၣ်တဲၣ်အပူၤမ့ၢ်ကၠိသ့ၣ်တဖၣ်လၢအမံၤအိၣ်လီၤ.အဃိန့ၣ်မ့ၢ်တၢ်ပၥ်ပနီၣ်ပှၤလံၥ်အုၣ်သးလီၤ.အနၣ်ရံၣ်(၃၀)တီၢ်ပူၤပဒိးန့ၢ်ဘၣ်အါထီၣ်တၢ်သိၣ်လိကျိၤကွၥ်တဖၣ်စ့ၢ်ကီးလီၤ.”အဂ့ၢ်စံးဝဲဒၣ်န့ၣ်လီၤ. ခီကီၢ်ကၠိသရၣ်သရၣ်မုၣ်တဖၣ်ကဒိးန့ၢ်ဘၣ်ကၠီၣ်တဲၣ်တၢ်ပၥ်ပနီၣ်လံၥ်အုၣ်ကီၤသးအဂီၢ်,တၢ်ပညိၣ်အိၣ်ဝဲအဖီခိၣ်ဘၣ်ဃးဒီးတၢ်ထီၣ်ကၠိသရၣ်တၢ်မၤလိလၢကၠီၣ်တဲၣ်ဖၠၣ်စိမိၤတဖၣ်ဟ့ၣ်ခီဟ့ၣ်နီၤဝဲအံၤပၥ်ပနီၣ်ဝဲဒၣ်လၢနၣ်ရံၣ်(၃၀)(diploma)နၣ်ရံၣ်(၆၀)(bachelor),နၣ်ရံၣ်(၉၀)(Master)ဒီးအနၣ်ရံၣ်(၁၂၀)(PH.D)လီၢ်လၤအပတီၢ်သ့ၣ်တဖၣ်အဂ့ၢ်,(BMWEC)ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ ဒ်န့ၣ်အသိး,တၢ်ဟ့ၣ်လီၤဝဲလံၥ်အုၣ်ကီၤသးတၢ်ရဲၣ်တၢ်ကျဲၤအဆိကတၢၢ်တဘျီအံၤမ့ၢ်ဝဲအနၣ်ရံၣ်(၃၀)(Diploma)တၢ်အုၣ်ကီၤသးလံၥ်လဲၢ်တၢ်ပၥ်ပနီၣ်သ့ၣ်တဖၣ်ဒီး(၃)သီအတီၢ်ပူၤဒီး(BMWEC)အဖီလၥ်ကၠိတဖၣ်အကျါသရၣ်သရၣ်မုၣ်အဂၤ(၃၀၀)ဘျဲၣ်ဒိးန့ၢ်ဘၣ်ဝဲအသိး,ခါဆူညါကဆဲးမၤဝဲတုၤ(၁၂၀)ပှဲၤထီၣ်အဂ့ၢ်,ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
လၢၢ်ဒိၣ်ကီၢ်ဆၣ်သၢလါအတီၢ်ပူၤသုးကီၣ်ကးမၤထီဒါပှၤဟီၣ်ခိၣ်ဖိခွဲးယၥ်အဃိကမျၢၢ်သံ(၁၀)ဘျဲၣ်,ဘၣ်ဒိ(၄၅)ဂၤ
လါယူၤ ၆ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ချၢၣ်လွံၢ်ထူၣ်ကီၢ်ရ့ၣ်, လၢၢ်ဒိၣ်ကီၢ်ဆၣ်ဟီၣ်ကဝီၤအပူၤစးထီၣ်ဖဲလါမးၡးဒီးတုၤလီၤလါမ့ၤလၢသၢလါအတီၢ်ပူၤအံၤ ခီဖျိသုးကီၣ်ကးဟူးဂဲၤမၤထီဒါပှၤဟီၣ်ခိၣ်ဖိခွဲးယၤအဃိကမျၢၢ်ပှၤလီၢ်ကဝီၤဖိဘၣ်သံ(၁၅)ဂၤ,ဒီးဘၣ်ဒိဝဲ(၄၅)ဂၤအဂ့ၢ်လၢၢ်ဒိၣ်ကီၢ်ဆၣ်ကညီဂ့ၢ်ဝီအူတၢ်တိစၢၤမၤစၢၤကမံးတံၥ်ထုးထီၣ်ပၥ်ဖျါဝဲဒၣ်ဖဲမဟါအနံၤလါမ့ၤ(၅)သီအနံၤန့ၣ်လီၤ. ပယီၤသုးကီၣ်ကးအံၤလၢသၢလါအတီၢ်ပူၤဟူးဂဲၤမၤထီဒါဝဲပှၤဟီၣ်ခိၣ်ဖိခွဲးယၥ်သ့ၣ်တဖၣ်ဒ်အမ့ၢ်မၤဝဲတၢ်ခးလီၤကျိဖးဒိၣ်ဆူကမျၢၢ်တၢ်အိၣ်တၢ်ဆိးလီၢ်အမဲၥ်ညါသူဝဲကလံၤကျါဒြိဒီးကဘီယူၤသ့ၣ်တဖၣ်ဟဲတ့ၢ်လီၤမ့ၣ်ပိၢ်လၢကမျၢၢ်ဒူသဝီတၢ်လီၢ်တၢ်ကျဲပူၤဒီးဖီၣ်ဝဲစ့ၢ်ကီးကမျၢၢ်ဒူဖိသဝီဖိသ့ၣ်တဖၣ်ဒ်အံၤအဖီခိၣ်အဃိကမျၢၢ်ဘၣ်သံ(၁၅)ဂၤ,ဘၣ်ဒိဝဲ(၄၅)ဂၤဒ်အံၤလီၤအဂ့ၢ်တၢ်ပၥ်ဖျါပူၤပၥ်ဖျါဝဲန့ၣ်လီၤ. ဘၣ်ထွဲပယီၤသုးကီၣ်ကးအတၢ်မၤသ့ၣ်တဖၣ်အံၤန့ၣ်လၢၢ်ဒိၣ်ကီၢ်ဆၣ်မ့ၢ်ဂ့ၤ,မူကီၢ်ဆၣ်ဒီးဆီထံးကီၢ်ဆၣ်မ့ၢ်ဂ့ၤဘၣ်ကွၢ်ဆၢၣ်မဲၥ်ဝဲတၢ်အိၣ်သးမ့ၢ်တၢ်တမံၤဃီလီၤဒီးခါဆူမဲၥ်ညါစ့ၢ်ကီးန့ၣ်သုးကီၣ်ကးအံၤဒ်အဒုးယၤရဲၣ်ကျဲၤအိၣ်ဝဲအသိးကဆဲးမၤဝဲဒၣ်လီၤအဂ့ၢ်ချၢၣ်လွံၢ်ထူၣ်ကီၢ်ရ့ၣ်နဲၣ်ရွဲၣ်သဃဲၤပဒိၣ်စီၤနဲထူပၠဲစံးဝဲဒ်အံၤန့ၣ်လီၤ. "ဘၣ်ထွဲဒီးဒုၣ်ဒါတၢ်ဖံးတၢ်မၤတခီန့ၣ်အိၣ်ဒၣ်ကမၤဟးဂီၤ,မၤအၢတၢ်န့ၣ်လီၤ. ဘၣ်မနုၤအဃိလဲၣ်န့ၣ်ဒူသဝီတၢ်လီၢ်ကိးတီၤဒဲးဃုၥ်ဒီး ကၠိမ့ၢ်ဂ့ၤ,တၢ်ဘူၣ်တၢ်ဘါလီၢ်မ့ၢ်ဂ့ၤ,ဒူသဝီပူၤတၢ်တ့တၢ်ဖျီးမူးကတီၢ်ဒၣ်လဲၥ်န့ၣ်ဟဲတ့ၢ်လီၤမ့ၣ်ပိၢ်ဒီးကဘီယူၤ,ခးလီၤကျိဖးဒိၣ်,ဟဲတ့ၢ်လီၤမ့ၣ်ပိၢ်ဒီးဒြိလၢတၢ်လီၢ်သကုၤလီၤ. အဃိဘၣ်ထွဲဒီးဒုၣ်ဒါတၢ်ရဲၣ်တၢ်ကျဲၤလၢဒုးယၤတကပၤန့ၣ်ဆူမဲၥ်ညါကဆဲးမၤဝဲဒၣ်လီၤ. ဒီး လၢပကီၢ်ဆၣ်(မူမ့ၢ်ဂ့ၤ,ဆီထံးမ့ၢ်ဂ့ၤ,လၢၢ်ဒိၣ်မ့ၢ်ဂ့ၤ)ဘၣ်ကွၢ်ဆၢၣ်မဲၥ်ဝဲတၢ်တမံၤဃီလီၤ"" အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်က စီၣ်န့ၣ်လီၤ. လၢၢ်ဒိၣ်ကီၢ်ဆၣ်ဟီၣ်ကဝီၤအပူၤလၢသၢလါအတီၢ်ပူၤမ့ၢ်ဘၣ်ကွၢ်က့ၤဝဲပယီၤသုးကီၣ်ကးအံၤခးလီၤဝဲကျိဖးဒိၣ်ခဲလၢၥ်(၁၁၂)ဖျၢၣ်, သူဝဲကလံၤကျါက ဘီယူၤတၢ်ဟဲတ့ၢ်လီၤမ့ၣ်ပိၢ်(၈)ဖျၢၣ်, ခးလီၤဝဲ(အီၤလံၣ်ကၢၣ်)ကျိအဘျီ(၁၀)ဒီးသူဝဲဒြိဟဲတ့ၢ်လီၤမ့ၣ်ပိၢ်ခဲလၢၥ် (၂၀၅)ဖျၢၣ်သ့ၣ်တဖၣ်န့ၣ်လီၤ. ဘၣ်ထွဲဒီးသုးကီၣ်ကးဟဲခးလီၤတၢ်လၢကမျၢၢ်ဒူသဝီသ့ၣ်တဖၣ်အပူၤန့ၣ်ကမျၢၢ်လီၢ်ကဝီၤဖိသံဘၣ်ဒိတကးဒံးဘၣ်ကမျၢၢ်ဟံၣ်ဃီ(၄၁)ဖျၢၣ်, သီခါဖၠၣ်(၄)ဖျၢၣ်, ဃိၣ်(၁)ဖျၢၣ်, ကျးဆါတၢ်(၃)ဖျၢၣ်, သိလ့ၣ်(၁)ခိၣ်, စဲးကဲး(၃)ခိၣ်, စဲးထဲၣ်တၢ်(၅)ခိၣ်, ဒီးစဲးဂံၥ်ဘု(၁)ခိၣ် သ့ၣ်တဖၣ်အံၤဘၣ်ဟးဂီၤကွံၥ်ဝဲအဂ့ၢ်လၢၢ်ဒိၣ်ကီၢ်ဆၣ်ဂ့ၢ်ဝီအူတၢ်တိစၢၤမၤစၢၤကမံးတံၥ်ပၥ်ဖျါဝဲအသိးသ့ၣ်ညါဘၣ်န့ၣ်လီၤ. တကတီၢ်ဃီခီဖျိပယီၤသုးကီၣ်ကးမၤအၢမၤသီ,သူဝဲတၢ်စုဆူၣ်ခီၣ်တကးလၢကမျၢၢ်လီၢ်ကဝီၤဖိအဖီခိၣ်အံၤကမျၢၢ်လီၢ်ကဝီၤဖိဘၣ်ကွၢ်ဆၢၣ်မဲၥ်ဘၣ်ဝဲတၢ်သံ,တၢ်ဘၣ်ဒိ,ဒီးဘၣ်အိၣ်လၢသးသမူတၢ်ဘၣ်ယိၣ်,တၢ်ပျံၤပူၤအဃိလၢၢ်ဒိၣ်ကီၢ်ဆၣ်ကညီဂ့ၢ်ဝီအူတၢ်တိစၢၤမၤစၢၤကမံးတံၥ်ထီဒါဝဲသုးကီၣ်ကးအတၢ်ဖံးတၢ်မၤသ့ၣ်တဖၣ်အံၤတဲၥ်တဲၥ်ဖျုဖျုအဂ့ၢ်န့ၣ်လံၥ်တၢ်ပၥ်ဖျါအပူၤစံးဝဲန့ၣ်လီၤ. လၢန့ၣ်အမဲၥ်ညါဒ်သိးသုးကီၣ်ကးအတၢ်မၤသ့ၣ်တဖၣ်ကပတုၥ်ကွံၥ်ဝဲအဂီၢ်ထံဂုၤကီၢ်ဂၤပဒိၣ်ပပှၢ်,ပှၤဂ့ၢ်ဝီခွဲးယၥ်ကရူၢ်ကရၢဘၣ်ထွဲတဖၣ်ကဟံးထီၣ်ဖီၣ်ထီၣ်ဝဲဂ့ၢ်ဝီတုၤလီၤတီၤလီၤအဂီၢ်ဒီးဒ်န့ၣ်အသိးကမျၢၢ်လၢဘၣ်ဃ့ၢ်မှံဟးဖျိးသ့ၣ်တဖၣ်ကဒိးန့ၢ်ဘၣ်ဝဲပှၤဟီၣ်ခိၣ်ဖိတၢ်ဒိသူၣ်ဒိသးတၢ်ဆီၣ်ထွဲမၤစၢၤအဂီၢ်လၢၢ်ဒိၣ်ကီၢ်ဆၣ်ကညီဂ့ၢ်ဝီအူတၢ်တိစၢၤမၤစၢၤကမံးတံၥ်ဃ့ထီၣ်စ့ၢ်ကီးဆူထံဂုၤကီၢ်ဂၤအိၣ်န့ၣ်လီၤ.
လၢကဆီတလဲသုးအဂီၢ်ပယီၤသုးဂံၢ်ဘါ(၈၀)ဃၣ်ဃၣ်ဟဲတုၤလၢလ့က့ၣ်သုးကလၢၤ
လါယူၤ ၅ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ် တးပီဒီးလ့က့ၣ်ပယီၤသုးကလၢၤအံၤလၢကဆီတလဲသုးအဂီၢ် ဖဲမဟါဟါခီ အဆၢကတီၢ်န့ၣ် သုးဂံၢ်ဘါအဂၤ(၈၀)ဃၣ်ဃၣ်ဟဲတုၤ၀ဲလၢလ့ၣ်က့ၣ်သုးကလၢၤပူၤလံအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါ စံး၀ဲအသိးသ့ၣ်ညါဘၣ်န့ၣ်လီၤ. လၢကဟဲထီၣ်မၤပှဲၤသုးဂံၢ်ဘါဒီးကဆီတလဲသုးအဂီၢ် ဖဲအပူၤကွံၥ်လါမ့ၤသၢနွံတနွံအခါန့ၣ် ပယီၤသုးဂံၢ်ဘါအဂၤ(၁၅၀)ဃၣ်ဃၣ် အိၣ်ဟဲထီၣ်၀ဲလၢဖၣ်အၣ်ကီၢ်ဆၣ်(DKBA)သုးခိၣ်ဘိၤဘံၣ်အတၢ်လီၢ်၀ံၤဖဲ ၂၈ သီအနံၤန့ၣ်ဟဲတုၤ၀ဲလၢသထူၣ်ကီၢ်ဆၣ် ပနွဲၢ်ကျါသုးကလၢၤဒီး ဖဲမဟါလါယူၤ ၄ သီ ဟါခီ ၅း၀၀ နၣ်ရံၣ်အဆၢကတီၢ်န့ၣ် ဟဲတုၤ၀ဲဒၣ်လၢလ့က့ၣ်သုးကလၢၤဒ် အံၤန့ၣ်လီၤ. ဘၣ်ဃးတၢ်ဂ့ၢ်အံၤန့ၣ် သုးက့ ၁ သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံး၀ဲလၢ“ပယီၤသုးအံၤဟဲထီၣ်တုၤလၢလ့က့ၣ်သုးကလၢၤ ဖဲမဟါဟါခီ ၅း၀၀ နၣ်ရံၣ်န့ၣ်လီၤ. အဟဲထီၣ်အခါန့ၣ်တတိနိၣ်ဒီးပပှၤဘၣ်,အ၀ဲသ့ၣ်န့ၣ်ဟဲထီၣ်လၢလ့က့ၣ်လ့ကစၢၢ်တကပၤ. ဟဲထီၣ်ကျဲန့ၣ်လၢပှၤတပၥ်သူၣ်ပၥ်သးကျဲဘၣ်.အ၀ဲသ့ၣ်အဂံၢ်ဘါကအိၣ်အဂၤ(၈၀)”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ. ပယီၤသုးလၢအဟဲတုၤဖဲလ့က့ၣ်သုးကလၢၤခဲအံၤတဖၣ်အကျါတနီၤန့ၣ်တၢ်ရဲၣ်တၢ်ကျဲၤအိၣ်လၢကလဲၤဆီ တလဲအသုး လၢတးပီသုးကလၢၤဒီး ဘၣ်ဆၣ်ခဲအံၤတလဲၤဘၣ်၀ဲဒံးဘၣ်အိၣ်ဒံးလၢလ့က့ၣ်သုးကလၢၤပူၤအဂ့ၢ်န့ၣ် သုးက့ခိၣ် စံးအါထီၣ် ၀ဲန့ၣ်လီၤ. တကးဒံးဘၣ်ပယီၤသုးအပှၤလီၢ်လံၤလၢအိၣ်ဃၥ်သုးကလၢၤပူၤတဖၣ်အံၤစ့ၢ်ကီးပှၤဒိးန့ၢ်တၢ်ကစီၣ်လၢတၢ်ကဆှၢအ၀ဲသ့ၣ်ဆူ ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ဟီၣ်က၀ီၤပူၤလၢတၢ်ဒုးဆူၣ်ထီၣ်ခဲအံၤအသိး ပှၤသ့ၣ်တဖၣ်အံၤအသုး၀ဲၤလီၢ်ခိၣ်သ့ၣ် အိၣ်၀ဲလၢဘျံးဒ၀ဲၢ်ကီၢ်ရ့ၣ်(သုးက့ ၄)တကပၤ အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါ စံး၀ဲအသိး သ့ၣ်ညါဘၣ်န့ၣ်လီၤ. ဟီၣ်က၀ီၤဖဲန့ၣ်အပူၤစးထီၣ်လၢတၢ်ဒိးန့ၢ်တၢ်ကစီၣ်လၢပယီၤသုးဟဲထီၣ်လံန့ၣ်(KNLA)အပှၤအိၣ်ခိး၀ဲလၢကျဲတၢ်ဘၢၣ်စၢၤအိၣ်၀ဲဘၣ်ဆၣ် ပယီၤသုးအံၤဟဲထီၣ်ကျဲလိၤလိၤတမ့ၢ်ဘၣ်မ့မ့ၢ်တခီဟဲ၀ဲလၢကစၢၢ်ကျဲပှၢ်မုၢ်သီထိပူၤအဃိ...
ဖၣ်အၣ်ကီၢ်ဆၣ်ပူၤ ဟီၣ်လၥ်မ့ၣ်ပိၢ်(တိုက်မိုင်း)အဃိ ဖါပီၢ်သ၀ီဖိပိၥ်မုၣ်ဘၣ်ဒိတဂၤ
လါယူၤ ၅ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ် မဲၢ်ကနးကရူၢ်အပူၤ ဖဲမဟါဂီၤခီအဆၢကတီၢ် န့ၣ် သ၀ီဖိပိၥ်မုၣ်တဂၤယီၢ်ဘၣ်၀ဲ(တိုက်မိုင်း)မ့ၣ်ပိၢ်အဃိ အစုဘၣ်ဒိ၀ဲတကပၤအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤ. ဖဲမဟါလါယူၤ ၄ သီ ဂီၤခီ ၆း၁၀ မံးနံးအဆၢကတီၢ်န့ၣ် ဖါပီၢ်သ၀ီဖိပိၥ်မုၣ် နီၢ်အဲၣ်(၃၀)နံၣ်တဂၤအံၤ ဖဲအ၀ဲလဲၤဃုထၢအီၣ် ကုၤတလးအီဒံၣ် လၢမဲၢ်ကနးခံသ၀ီပှၢ်ပူၤအခါ ထွဲဘၣ်၀ဲဟီၣ်လၥ်မ့ၣ်ပိၢ်(တိုက်မိုင်း) လၢဟီၣ်က၀ီၤ(KNLA) ဒိးလီၤ၀ဲအံၤအဃိ အစုဘိဖိတဖၣ်တဲၥ်ကွဲၥ်၀ဲဒီးအခီၣ်ကံၣ်ဒုၣ်ညၣ်တဖၣ်ဘၣ်ဒိ၀ဲဘၣ်ထံးကဲထီၣ်သး ဒ်အံၤလီၤအဂ့ၢ်န့ၣ် ကမျၢၢ်တဖၣ် စံး၀ဲန့ၣ်လီၤ. ဟီၣ်က၀ီၤတၢ်လီၢ်လၢတၢ်ကဲထီၣ်သးခဲအံၤန့ၣ် မ့ၢ်၀ဲကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၁)ဟီၣ်က၀ီၤအသိး တၢ်လီၢ်ဖဲန့ၣ်ပယီၤသုးဟဲထီၣ်တဘျီလၢ်လၢ်အခါသူ၀ဲကျဲအံၤအဃိဘၣ်တၢ်ဒိးလီၤဃၥ်၀ဲမ့ၣ်ပိၢ်ဒီး တၢ်လီၢ်၀ဲန့ၣ်တၢ်ပံးဃၥ်၀ဲ လၢကမျၢၢ်တဘၣ်လဲၤဘၣ်အိၣ်၀ဲအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါတဂၤ စံး၀ဲန့ၣ်လီၤ. အ၀ဲစံး၀ဲလၢ “ပှၤသ၀ီဖိတဲ၀ဲလၢဘၣ်လၢအလဲၤဃုအီၣ်ကုၤတလးအီဒံၣ်မီၤနီၤ. ပှၤတဲအီၤလၢမ့ၣ်ပိၢ်အိၣ်လဲၤတဂ့ၤ. လၢမဟိတနံၣ် နါက့ပှၤသ၀ီဖိန့ၣ်ပှၤတဲအီၤလၢမ့ၣ်ပိၢ်အိၣ်,လဲၤတဂ့ၤန့ၣ်အ၀ဲသ့ၣ်တကနၣ်၀ဲဘၣ်လဲၤ၀ဲလီၤ.ပအဲၣ်ဒိးတဲပှၤကမျၢၢ်တဖၣ်လၢဟီၣ်က၀ီၤပှၤဘၣ်မူဘၣ်ဒါမ့တဲန့ၣ်ကနၣ်အကလုၢ်,တဘၣ်လဲၤဖဲသးက့ၤဖဲသးတဂ့ၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. တကီၢ်ခါခဲအံၤကမျၢၢ်လၢအဘၣ်ဒီးဟီၣ်လၥ်မ့ၣ်ပိၢ်(တိုက်မိုင်း)တဂၤအံၤ တၢ်လဲၤဆှၢကူစါယါဘျါအီၤဆူဖၣ်အၣ်တၢ်ဆါဟံၣ် သးသမူတၢ်ဘၣ်ယိၣ်တအိၣ်၀ဲဘၣ်အဂ့ၢ်န့ၣ် သ့ၣ်ညါဘၣ်လၢကမျၢၢ်အအိၣ်န့ၣ်လီၤ. တၢ်လီၢ်လၢတၢ်ကဲထီၣ်သးခဲအံၤန့ၣ်အပူၤကွံၥ်ခီဖျိကမျၢၢ်တဖၣ်တလူၤပိၥ်မၤထွဲ၀ဲတၢ်ကလုၢ်ဘၣ်အဃိ ပှၤကမျၢၢ် ဘၣ်ဒိတ့ၢ် ဃၥ်အိၣ်၀ဲအသိးလၢကမျၢၢ်ကလ့ၢ်ထီၣ်လ့ၢ်လိၤအဂီၢ်တၢ်အိးထီၣ်ဃၥ်ကျဲအိၣ်၀ဲအဂ့ၢ်န့ၣ် သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စ့ၢ်ကီးစံး၀ဲ န့ၣ်လီၤ....
သ့ၣ်ဘီဘိလီၢ်ကဝီၤကမျၢၢ်မၤလၤကပီၤသိၣ်ဒူလၢထီၣ်န့ၢ်ပယီၤသုးကလၢၤ
လါယူၤ ၅သီ, ၂၀၂၅နံၣ်, ခ့ၣ်အဲးစံၣ်. တီနီၢ်မုၢ်ထီၣ်ဟီၣ်ကဝီၤ, သ့ၣ်ဘီဘိလီၢ်ကဝီၤကမျၢၢ်တဖၣ် မၤလၤကပီၤဝဲ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်ဒီးသုးပၥ်ဖှိၣ်သ့ၣ်တဖၣ်လၢအထီၣ်မၤန့ၢ် သ့ၣ်ဘီဘိသုးကလၢၤဖဲတနံၤလါယူၤ(၅)သီ,ဂီၤခီ(၉)နၣ်ရံၣ်အဆၢကတီၢ်အဂ့ၢ် သ့ၣ်ညါဘၣ်လၢပှၤလီၢ်ကဝီၤဖိအအိၣ်န့ၣ်လီၤ. တၢ်ရဲၣ်တၢ်ကျဲၤဘျီဝဲအံၤန့ၣ် ကမျၢၢ်တဖၣ်သးခုလၢသုးမုၢ်ဒိၣ်ထီၣ်မၤန့ၢ်ပယီၤသုးကလၢၤဒီးဒ်သိးခါဆူညါသုးမုၢ်ဒိၣ်တၢ်ဖံးတၢ်မၤလၢတၢ်မၤလီၤပှီၢ်သုးမီၤစိရိၤကန့ၢ်အဂီၢ်မ့ၢ်ဝဲဒၣ်တၢ်ဟ့ၣ်ဂံၢ်ဟ့ၣ်ဘါတခါအဂ့ၢ် သ့ၣ်ဘီဘိလီၢ်ကဝီၤဖိတဂၤစံးဘၣ်ဝဲခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲလၢ“ခီဖျိလၢသ့ၣ်ဘီဘိသုးကလၢၤသ့ၣ်တဖၣ်တအိၣ်လၢၤဘၣ်အဃိန့ၣ်ပှၤကမျၢၢ်လၢအိၣ်သ့ၣ်ဘီဘိသ့ၣ်တဖၣ်အဝဲသ့ၣ်သူၣ်ခုသးခုဝဲဒၣ်န့ၣ်လီၤ.အဝဲသ့ၣ်အဲၣ်ပှၤဝဲပှၤသုးဖိသ့ၣ်တဖၣ်အံၤအဃိန့ၣ် အဝဲသ့ၣ်မၤဝဲတၢ်မၤလၤကပီၤဒ်အံၤန့ၣ်လီၤ.ဒ်ပှၤသုးဖိမၤနၢၤသုးမီၤစိရိၤခဲအံၤအသိးခါဆူမဲၥ်ညါဒ်သိးပှၤသုးဖိသ့ၣ်တဖၣ် အသးသဟီၣ်ကဆူၣ်ထီၣ်လၢတၢ်မၤလီၤပှီၢ်သုးမီၤစိရိၤသ့ၣ်တဖၣ်အံၤကန့ၢ်အဂီၢ် ပဝဲဒၣ်ကညီဖိသ့ၣ်တဖၣ်မ့ၢ်ပဟ့ၣ်ဂံၢ်ဟ့ၣ်ဘါအဝဲသ့ၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါလၢတၢ်မၤလၤကပီၤသိၣ်ဒူတၢ်ရဲၣ်တၢ်ကျဲၤဘျီဝဲအံၤန့ၣ် သ့ၣ်ဘီဘိလီၢ်ကဝီၤ သးစၢ်မုၣ်,ခွါ ဒူဖိသဝီဖိသ့ၣ်တဖၣ်တီခိၣ်ရိၣ်မဲမၤဝဲဒီး KNLAတီခိၣ်ရိၣ်မဲသုးပၥ်ဖှိၣ်လၢအထီၣ်န့ၢ်သ့ၣ်ဘီဘိပယီၤသုးကလၢၤသ့ၣ်တဖၣ် ဒိးန့ၢ်ဘၣ်ဝဲတၢ်လၤကပီၤလၢကမျၢၢ်အိၣ်အဂ့ၢ် အဝဲတဲအါထီၣ်ဝဲဒၣ်စ့ၢ်ကီးန့ၣ်လီၤ. သ့ၣ်ဘီဘိပယီၤသုးကလၢၤလၢပှၤနီၣ်ဂံၢ်အိၣ်(၁၀၀)ဘျဲၣ်ဃၣ်ဃၣ်အံၤ ဖဲအပူၤကွံၥ်လါယူၤ (၃)သီအနံၤန့ၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် KNLA တီခိၣ်ရိၣ်မဲသုးပၥ်ဖှိၣ်သ့ၣ်တဖၣ်ထီၣ်ဒုးန့ၢ်ကွံၥ်ဝဲဒီးဖဲတၢ်ဒုးဘျီဝဲန့ၣ် သုးကီၣ်ကးအပှၤသံ(၃၀)ဘျဲၣ်ဒီးယူၥ်ထီၣ်နီၣ်တယၢ်ဝါပၥ်လီၤတၢ်စုကဝဲၤလၢ KNLAသုးပၥ်ဖှိၣ်အအိၣ် အိၣ်ဝဲ(၇၀)ဘျဲၣ်အဂ့ၢ်သ့ၣ်ညါဘၣ်န့ၣ်လီၤ. ဒ်န့ၣ်အသိးလီၤ ခီဖျိလၢသ့ၣ်ဘီဘိပယီၤသုးကလၢၤတၢ်ထီၣ်န့ၢ်ကွံၥ်အီၤလံအဃိ ဖဲတနံၤဂီၤခီအဆၢကတီၢ်န့ၣ် တၢ်ဒုးကဲထီၣ်အခါကမျၢၢ်လၢဘၣ်ဃ့ၢ်အိၣ်လၢကီၢ်ကၠီၣ်တဲၣ်သ့ၣ်တဖၣ် တၢ်က့ၤဆှၢက့ၤအဝဲသ့ၣ်လံအဂ့ၢ်သ့ၣ်ညါဘၣ်စ့ၢ်ကီးလၢသ့ၣ်ဘီဘိပှၤလီၢ်ကဝီၤဖိအအိၣ်န့ၣ်လီၤ
မဲၥ်ကျူၢ်ဒီးလိးရှါကျဲပူၤကျိချံပိၢ်ထီၣ်အဃိ,ဘၣ်သံကမျၢၢ်ဘှီကျဲ(၄)ဂၤ,ဘၣ်ဒိဝဲ(၉)ဂၤ
လါမ့ၤ ၄သီ, ၂၀၂၅နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢသုးက့(၆)ဒူပျၥ်ယၥ်ကီၢ်ရ့ၣ်,ဝီၢ်ရ့ၣ်ကီၢ်ဆၣ်မဲၥ်ကျူၢ်ဒီးလိးရှါသဝီဟီၣ်ကဝီၤကျဲ,ဖဲအပူၤကွံၥ်မဟါလါမ့ၤ(၃)သီ,ဂီၤခီအဆၢကတီၢ်န့ၣ်ကျိချံပိၢ်ဖးထီၣ်ဝဲအဃိ,ဘၣ်သံဝဲကမျၢၢ်လၢဘှီကျဲ(၄)ဂၤဒီးဘၣ်ဒိဘၣ်ထံးဝဲ(၉)ဂၤအဂ့ၢ်,ကမျၢၢ်လီၢ်ကဝီၤဖိတဖၣ်စံးဝဲဒၣ်န့ၣ်လီၤ. ကမျၢၢ်လီၢ်ကဝီၤဖိတဖၣ်အံၤတ့ထီၣ်ဘှီထီၣ်ဝဲကျဲအဆၢကတီၢ်,ထံၣ်ဝဲကျိချံလၢတပိၢ်ဖးထီၣ်ဒံးဘၣ်တဖျၢၣ်ဒီးစိၥ်ထီၣ်သုးကွံၥ်ဝဲအလီၢ်ဝံၤအလီၢ်ခံဒိတကျိၤကွၢ်ဝဲအဃိ,ကျိဖးဒိၣ်ချံအံၤပိၢ်ဖးထီၣ်ဝဲဒၣ်ဒီးတၢ်ဘၣ်ဒိဘၣ်ထံးဒီးတၢ်သံကဲထီၣ်ဝဲအသးအဂ့ၢ်,သ့ၣ်ညါဘၣ်န့ၣ်လီၤ. ဘၣ်ဃးဒီးတၢ်ကဲထီၣ်သးအံၤအဖီခိၣ်,ကမျၢၢ်လီၢ်ကဝီၤဖိလၢအိၣ်ဘူးဒီးတၢ်ကဲထီၣ်သးအလီၢ်တဂၤစံးဝဲဒ်အံၤန့ၣ်လီၤ. “ယသံကွၢ်စိပှၤန့ၣ်ပှၤတဲယၤလၢခဲအံၤတၢ်စူၤလီၤဆၢကတီၢ်မူခိၣ်စူၤထံဒိၣ်အဃိ,တသဝီဒီးတသဝီဟးထီၣ်ဟးလီၤကညီအဂီၢ်ဖဲမဲၥ်ကျၢၢ်လိးရှါဘၢၣ်စၢၤန့ၣ်ပှၤလဲၤတ့ကျဲမီၤ.တ့ကျဲအဆၢကတီၢ်အသုထံၣ်ဝဲကျိဖးဒိၣ်ချံတဖျၢၣ်,တပိၢ်ထီၣ်ဒံးဘၣ်.အဃိဖဲန့ၣ်အိၣ်အါဂၤနၤကွၢ်ယၤကွၢ်လီၤ.ဝံၤအဝဲတဂၤဒိတကျီးကွၢ်ဝဲဘျီပိၢ်ထီၣ်ဒီးဘၣ်ဒိဘၣ်ထံးဘၣ်သံကဲထီၣ်ဝဲသးလီၤ”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,ကျိခံလၢပိၢ်ဖးထီၣ်တဖျၢၣ်အံၤတၢ်ပဲၥ်ထံနီၤဖးဝဲလၢအမ့ၢ်(၁၂၀)မးမးကျိဖးဒိၣ်အချံအဂ့ၢ်,အဝဲစံးအါထီၣ်ဝဲဒၣ်န့ၣ်လီၤ. ဝီၢ်ရ့ၣ်ကီၢ်ဆၣ်ဟီၣ်ကဝီၤအပူၤမဲၥ်ကျူၢ်ဒီးလိးရှါဒူသဝီအံၤဘူးဝဲဒီး(ဝဲကလံၣ်)(မီၢ်ကန့ၤ)(ယပၣ်တီၤ)ပယီၤအမျိၥ်သုးကလၢၤတၢ်လီၢ်သ့ၣ်တဖၣ်အသိး,ဘူးစ့ၢ်ကီးဝဲသုးကီၣ်ကးလိးရှါအမျိၥ်သုးကလၢၤလၢတၢ်ထီၣ်မၤန့ၢ်ကွံၥ်ဝဲဖဲအပူၤကွံၥ်(၂၀၂၄)(လါစဲးပထ့ဘၢၣ်အပူၤတဖျၢၣ်အံၤအဂ့ၢ်သ့ၣ်ညါဘၣ်န့ၣ်လီၤ. ဒီးပယီၤသုးသ့ၣ်တဖၣ်အံၤအပူၤကွံၥ်စှၤလါအတီၢ်ပူၤခးလီၤဝဲကျိဖးဒိၣ်ဆူကမျၢၢ်အိၣ်ဆိးတၢ်လီၢ်တၢ်ကျဲတဖၣ်အပူၤခဲအံၤခဲအံၤအိၣ်ဝဲဘၣ်ဆၣ်,စးထီၣ်ဖဲလါမ့ၤဒီးလါယူၤအပူၤခးလီၤတၢ်တအိၣ်ဝဲဘၣ်အဃိ,ကျိချံအံၤမ့ၢ်လီၤတဲၥ်ဝဲအခါဖဲလဲၣ်ဒီးအိၣ်ဟဲလီၤတဲၥ်ဝဲလၢပယီၤသုးကလၢၤဖဲလဲၣ်တဖျၢၣ်လဲၣ်အဂ့ၢ်န့ၣ်,တၢ်တသ့ၣ်ညါဝဲဒၣ်ဘၣ်အဂ့ၢ်လီၢ်ကဝီၤကမျၢၢ်တဖၣ်စံးစ့ၢ်ကီးဝဲဒၣ်န့ၣ်လီၤ.
သ့ၣ်ဘီဘိသုးကလၢၤတၢ်ဒုးအပူၤပယီၤသုးသံ(၃၀)ဘျဲၣ်ဒီးဃ့ၢ်ဖျဲးထီၣ်အဂၤ(၇၀)ဘျဲၣ်
လါယူၤ ၄ သီ, ၂၀၂၅ နံၣ်, ခ့ၣ်အဲးစံၣ် သ့ၣ်ဘီဘိဒုးယၤသုးကလၢၤလၢအိၣ်ဆီလီၤသးဖဲခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ် ကီၢ်ကၠီၣ်တဲၣ်-ကီၢ်ပယီၤကီၢ်ဆၢအံၤ ဖဲမဟါလါယူၤ ၃ သီ ဟါခီ ၆း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ် ဟီၣ်က၀ီၤ(KNLA)သုးပၥ်ဖှိၣ်ထီၣ်မၤန့ၢ်၀ဲ ခဲလၢၥ်အဂ့ၢ်န့ၣ် သ့ၣ်ညါဘၣ်န့ၣ်လီၤ. သုးကလၢၤအံၤဖဲမဟါဂီၤခီအဆၢကတီၢ်န့ၣ်တၢ်စးထီၣ်နုၥ်လီၤခး၀ဲ တၢ်ဒုးကဲထီၣ်ဒိၣ်ဒိၣ်မုၢ်မုၢ်လၢခံခီခံကပၤအဘၢၣ်စၢၤဒီး တၢ်ဒုးဘျီ၀ဲအံၤအပူၤပယီၤသုးသံ(၃၀)ဘျဲၣ်ဒီးဃ့ၢ်ထီၣ်၀ဲဆူသ့ၣ်ဘီဘိထံ၀ၢ်ခိ မီၤလံၤခၠါ ယိၤကီၢ် တကပၤအပူၤအဂၤ(၇၀)ဘျဲၣ် အသိးတၢ်ဒုးအံၤအပူၤတၢ်မၤန့ၢ်၀ဲကျိချံပှၥ်သၣ်အါမးအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါ လၢတအဲၣ်ဒိးပၥ်ဖျါ အမံၤတဂၤ စံး၀ဲန့ၣ် လီၤ. ဘၣ်ဃးတၢ်ဂ့ၢ်အံၤသ့ၣ်ဘီဘိပှၤဘၣ်မူဘၣ်ဒါတဂၤစံး၀ဲလၢ“သ့ၣ်ဘီဘိသုးကလၢၤဒုပှၤထီၣ်၀ံၤလၢၤလံ.ပှၤမၤန့ၢ်ကျိချံပှၥ်သၣ်ဒီဒူၣ်. အသံတနီၤကအိၣ်အဂၤ(၃၀)ဘျဲၣ်,မ့၀ံၤအလဲၤစံၣ်ထီၣ်လၢယိၤကီၢ်တကပၤန့ၣ်ကအိၣ်လၢအဂၤ(၇၀)ဘျဲၣ်ညါ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတဂီၤအံၤန့ၣ်လီၤ. တကးဒံးဘၣ်ဒ်လီၢ်က၀ီၤပှၤဘၣ်မူဘၣ်ဒါစံး၀ဲအသိးန့ၣ် ပယီၤသုးအဂၤ(၇၀)ဘျဲၣ်လၢအဃ့ၢ်ထီၣ်ဆူယိၤကီၢ်ပူၤသ့ၣ်တဖၣ်အံၤ အကျါန့ၣ် ပၣ်ဃုၥ်၀ဲဒုးယၤခိၣ်ဒီး ပှၤသ့ၣ်တဖၣ်အံၤကတုၤလၢကၠီၣ်တဲၣ်ယိၤသုးပှၤဘၣ်မူဘၣ်ဒါအစုပူၤလံအဂ့ၢ်န့ၣ် စံး၀ဲန့ၣ်လီၤ. ဒ်န့ၣ်အသိးဖဲမဟါတၢ်ဒုးကဲထီၣ်အကတီၢ်သုးကလၢၤအံၤသုတလီၤတဂ့ၤအဂီၢ် ကျိဖးဒိၣ်အမဲၥ်ညါကဘီယူၤလဲၤတ့ၢ်လီၤစၢၤ ၀ဲမ့ၣ်ပိၢ်(၂)ဘျီ အဃိကမျၢၢ်ဟံၣ်ဟးဂီၤလီၤပှီၢ်(၁)ဖျၢၣ်ဒီးကျိဖးဒိၣ်အက့အခီဖျိးဘၣ်၀ဲဟံၣ်ခိၣ်ဟံၣ်ကပၤ အိၣ်၀ဲအါမးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤပှၤဘၣ်မူဘၣ်ဒါအအိၣ်န့ၣ်လီၤ. လၢန့ၣ်အမဲၥ်ညါခီဖျိလၢကဘီယူၤတ့ၢ်လီၤမ့ၣ်ပိၢ်,မ့ၣ်ပိၢ်ပိၢ်ဖးထီၣ်အကလုၢ်သီဖးဒိၣ်သီၣ်သထြုးအဃိ သ့ၣ်ဘီဘိထံ၀ၢ်ခီ မီၤလံၤခၠါ သ၀ီဖိပိၥ်မုၣ် တဂၤသးပ့ၤနီၣ်သးသံကွံၥ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲ န့ၣ်လီၤ. “ကျိဖးဒိၣ်န့ၣ်လီၤတဲၥ်သီၣ်ဖးဒိၣ်မီၤနီၤ.အဃိအဖုးဘၣ်အသးဘျီအသွံၣ်ထီၣ်ခိၣ်ဒ်န့ၣ်ဧါသၢၣ်. ပှၤလဲၤဆှၢအီၤလၢဖိဖြးတၢ်ဆါဟံၣ် တန့ၢ်ဘၣ်ဘျီပှၤလဲၤဆှၢကဒီးလၢမဲၢ်ဆီးတၢ်ဟံၣ်ဘျီအသံလီၤ”အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲန့ၣ် လီၤ. ဒ်န့ၣ်အသိးခံခီခံကပၤတၢ်ဒုးကဲထီၣ်ဖဲမဟါနံၤအခါစ့ၢ်ကီးကျိချံလီၤတဲၥ်၀ဲဆူယိၤကီၢ်(မီၤလံၤခၠါ)သ၀ီပူၤအဃိ ကျိအက့အခီဘၣ်၀ဲ ကမျၢၢ်ပိၥ်ခွါတဂၤအခီၣ်ကံၣ်ဒုၣ်ကဲထီၣ်ဒံး၀ဲန့ၣ်လီၤ. ဖဲတနံၤအံၤလါယူၤ ၄ သီ ဂီၤခီ ၉ နၣ်ရံၣ်ဃၣ်ဃၣ်အဆၢကတီၢ်စ့ၢ်ကီး...