လ့ပနၢ်ဒ့ၣ်(ကိး)တခိးဘံၣ်ခံသုးကလၢၤလၢအိၣ်(PC)ဟီၣ်က၀ီၤပူၤအံၤ (KNLA)ထီၣ်န့ၢ်၀ဲလံ
လါမ့ၤ ၉ သီ, ၂၀၂၅ နံၣ်, ခ့ၣ်အဲးစံၣ် လ့ပနၢ်ဒ့ၣ်(ကိး)တခိးဘံၣ်ခံပယီၤသုးကလၢၤလၢအိၣ်ဆီလီၤသးဖဲခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဖၣ်အၣ်ကီၢ်ရ့ၣ် (သုးက့ ၇) တၢ်ြကဲၢ်ကီၢ်ဆၣ် ကညီတၢ်မုၥ်တၢ်ခုၣ်ကီၣ်ကးကရၢ(KNU/KNLA-PC)ဟီၣ်က၀ီၤပူၤအံၤ ဖဲတနံၤအံၤဂီၤခီအဆၢကတီၢ်န့ၣ် (KNLA)ထီၣ်မၤန့ၢ်၀ဲလံအဂ့ၢ်န့ၣ် သ့ၣ်ညါဘၣ်န့ၣ်လီၤ. လ့ပနၢ်ဒ့ၣ်(ကိး)တခီးဘံၣ်ခံ ခီၣ်သုးရ့ၣ်(ခလရ-၂၄)သုးရ့ၣ်တၢ်လီၢ်လၢအိၣ်ဆီလီၤသးဘူး၀ဲဒီး ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ထၣ်စီၤယါ မဲၢ်လးသ၀ီ သူမှဲကျိ၀ၢ်ခီအံၤ ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ် စးထီၣ်လဲၤခး၀ဲ ဖဲလါမ့ၤထီၣ် ၇ သီအနံၤန့ၣ်ဒီး ဖဲတနံၤအံၤ ဂီၤခီ ၉ နၣ်ရံၣ်ဘျဲၣ်အဆၢကတီၢ်န့ၣ်တၢ်ထီၣ်န့ၢ်၀ဲဒၣ်အဂ့ၢ်န့ၣ် ဂံၢ်ခီၣ်ထံးသုး ပှၤဟ့ၣ်တၢ်ကစီၣ်ဖိစံး၀ဲန့ၣ်လီၤ. ဘၣ်ဃးတၢ်ထီၣ်န့ၢ်သုးကလၢၤအဂ့ၢ်န့ၣ် (သုးက့ ၇)သုးက့ခိၣ် သုးခိၣ်ကျၢၢ်ဖိ စီၤဒံၣ်ကွဲၤ စံး၀ဲလၢ “လ့ပနၢ်ဒ့ၣ်သုးကလၢၤပှၤထီၣ်န့ၢ် လံန့ၣ်အမ့ၢ်လီၤ.သုးကလၢၤတဖျၢၣ်အံၤမ့မ့ၢ်လၢပယီၤသုးတကပၤန့ၣ်ကိး၀ဲတခိးဘံၣ်ခံသုးကလၢၤမီၤနီၤ.ဖဲမုကၢၤကအိၣ်၀ဲ(၄၀)မံးနံး,တနၣ်ရံၣ်ဃၣ်ဃၣ်န့ၣ်ပှၤထီၣ်န့ၢ်၀ဲမီၤနီၤ.ဖဲန့ၣ်မ့ၢ်၀ဲဒၣ်(ခလရ-၂၄) သုးဒ့-၁ အိၣ်၀ဲဖဲန့ၣ်. ခီဖျိလၢပသူနၢၤ၀ဲတၢ်ချံတၢ်သၣ် အဃိ အ၀ဲသ့ၣ်တူၢ်၀ဲတန့ၢ်လၢၤဘၣ်ဘျီထွးထီၣ်ဃ့ၢ်၀ဲလီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ် ကစီၣ်န့ၣ်လီၤ. လၢန့ၣ်အမဲၥ်ညါတၢ်ထီၣ်န့ၢ်သုးကလၢၤဘျီ၀ဲအံၤအပူၤတၢ်မၤန့ၢ်ကျိချံပှၥ်သၣ်အိၣ်၀ဲဒီးဘၣ်ဆၣ်မ့မ့ၢ်ပယီၤသုးတကပၤန့ၣ် သံဘၣ်ဒိဘၣ်ထံးတအိၣ်နီတဂၤဘၣ်,ဃ့ၢ်ဖျဲးထီၣ်အသးခဲလၢၥ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ. တခိးဘံၣ်ခံသုးလၢၤလၢတၢ်ထီၣ်န့ၢ်၀ဲခဲအံၤန့ၣ် ဟဲအိၣ်ဆီလီၤသးဖဲဟီၣ်က၀ီၤပူၤ၀ဲန့ၣ်ကအိၣ်၀ဲအနံၣ်(၃၀)ဘျဲၣ်ဃၣ်ဃၣ်လံအသိး သုးကလၢၤအံၤအပူၤသုးနီၣ်ဂံၢ်ကအိၣ်၀ဲအဂၤ(၂၀)ဘျဲၣ်အဂ့ၢ်န့ၣ် သုးပှၤဘၣ်မူဘၣ်ဒါတဖၣ်စံး၀ဲအသိးသ့ၣ်ညါဘၣ်န့ၣ်လီၤ. တကးဒံးဘၣ်ဒူသ၀ီလၢအိၣ်သုးကလၢၤ၀ဲအံၤအခိၣ်အဃၢၤတဖၣ်န့ၣ်အါဒၣ်တက့ၢ်မ့ၢ်၀ဲပှၤကညီဖိသ့ၣ်တဖၣ်လီၤ,ပယီၤသ၀ီ တအိၣ်နီတဖျၢၣ်ဘၣ်အသိး သုးကလၢၤအံၤမ့ဆဲးအိၣ်ဒံးန့ၣ်ဟ့ၣ်၀ဲတၢ်ကီတၢ်ခဲတၢ်နိးတၢ်ဘျးလၢကမျၢၢ်တဖၣ်သ့၀ဲအဂ့ၢ်န့ၣ် သုးက့ခိၣ် စံးအါထီၣ်၀ဲန့ၣ်လီၤ. “ဒူသ၀ီကမျၢၢ်လၢအိၣ်ဖဲဟီၣ်က၀ီၤ၀ဲန့ၣ်အပူၤန့ၣ်မ့ၢ်ဒၣ်ပှၤကညီဖိကလုၥ်ကိးဂၤဒဲးလီၤ.အဃိ၀ဲဒၣ်န့ၣ်ပတၢ်ပၥ်သးအိၣ်လၢပှၤကညီဟီၣ်က၀ီၤန့ၣ်အိၣ်ဒၣ်ပှၤကညီကဘၣ်ပၢ၀ဲဒၣ်လီၤ.ဒီးတၢ်လီၢ်၀ဲန့ၣ်ပယီၤဒူသ၀ီတအိၣ်စ့ၢ်ကီးနီတဖျၢၣ်ဘၣ်.ကမျၢၢ်ဖဲအံၤတဖၣ်န့ၣ် လုၢ်အီၣ်အသးသမူလၢတၢ်ထူစံၥ်ဖဲးခုး,မၤအီၣ်သူဘုခ့ကျီး,ဘီးက့ၣ်ကျီးတဖၣ်လီၤ.အဃိလၢကမျၢၢ်အဂီၢ်န့ၣ်ကဲထီၣ်တၢ်ကီတၢ်ခဲ,တၢ်နိးတၢ်ဘျးလၢတၢ်လုၢ်အီၣ်သးသမူ,တၢ်လဲၤထီၣ်က့ၤအဂီၢ်န့ၣ်ပတဲသ့လီၤ”အဂ့ၢ်န့ၣ် စံး၀ဲန့ၣ်လီၤ. ဒ်န့ၣ်အသိးတညၣ်ကၠိပယီၤသုးကလၢၤလၢအိၣ်ဆီလီၤသးဖဲ(သုးက့ ၇)ဟီၣ်က၀ီၤ တၢ်လီၢ်အံၤစ့ၢ်ကီး ဖဲလါမ့ၤ...
သုးက့(၃)ဆီထံးကီၢ်ဆၣ်အပူၤတၢ်ထီၣ်မၤန့ၢ်ပယီၤသုး(ခမရ-၅၉၈)သုးကလၢၤ
လါမ့ၤ ၉ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢ,ချၢၣ်လွံၢ်ထူၣ်ကီၢ်ရ့ၣ်(သုးက့-၃),ဆီထံးကီၢ်ဆၣ်ဟီၣ်ကဝီၤအပူၤဖဲမဟါလါမ့ၤ(၈)သီအ နံၤန့ၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ထီၣ်မၤန့ၢ်ကွံၥ်ဝဲပယီၤသုးကီၣ်ကးခီၣ်ချ့သုးရ့ၣ်(ခမရ-၅၉၈)သုးက လၢၤအံၤအဂ့ၢ်န့ၣ်ကီၢ်ရ့ၣ်အပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ. ပယီၤသုးခီၣ်ချ့သုးရ့ၣ်(ခမရ-၅၉၈)သုးကလၢၤအံၤမ့ၢ်သုးကလၢၤတဖျၢၣ်လၢအိၣ်သူၣ်လီၤသးဖဲဆီထံးကီၢ်ဆၣ်KNLA (သုးရ့ၣ်-၇)တၢ်ပၢဟီၣ်ကဝီၤဖဲပရဲလိၥ်ကျိကၢၢ်နံၤဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA),တၢ်ပၢၢ်ဆၢသုးပၥ်ဖှိၣ် သ့ၣ်တဖၣ်ထီၣ်မၤန့ၢ်ကွံၥ်ဝဲလံအဂ့ၢ်န့ၣ်ကီၢ်ရ့ၣ်အပှၤဘၣ်မူဘၣ်ဒါစံးခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ. "ပယီၤသုး(ခမရ-၅၉၈)အသုးရ့ၣ်ဝဲၤလီၢ်လၢအမ့ၢ်(စလိၣ်ကၠံ)တၢ်လီၢ်အံၤပပှၤထီၣ်မၤန့ၢ်ဒုးဖျိးကွံၥ်ဝဲလံန့ၣ်လီၤ. ဒီးပပှၤ ထီၣ်ၡဲလဲဝဲလံမီၤနီၤ. လၢတၢ်ထီၣ်မၤန့ၢ်သုးကလၢၤတဘျီအံၤန့ၣ်တၢ်ဘၣ်ဒိဘၣ်ထံး,တၢ်သံတၢ်ပှၢ်ဒီးတၢ်မၤန့ၢ်တၢ်စုက ဝဲၤစရီလီၤတံၢ်လီၤဆဲးခီန့ၣ်တၢ်တမၤန့ၢ်အီၤဒံးဘၣ်န့ၣ်လီၤ. " အဂ့ၢ်န့ၣ်စံးဝဲဒၣ်န့ၣ်လီၤ. ဘၣ်ထွဲဒီးတၢ်ထီၣ်ဒုးဖျိးကွံၥ်ဝဲပယီၤသုးကလၢၤတဘျီညါအံၤန့ၣ်တၢ်သံတၢ်ပှၢ်မ့ၢ်ဂ့ၤ,တၢ်ဘၣ်ဒိဘၣ်ထံးမ့ၢ်ဂ့ၤဒီးတၢ်မၤန့ၢ်ဝဲပယီၤသုးတၢ်စုကဝဲၤပီးလီသ့ၣ်တဖၣ်န့ၣ်တၢ်မၤလီၤတံၢ်အီၤတန့ၢ်ဒံးဘၣ်အဂ့ၢ်ကီၢ်ရ့ၣ်အပှၤဘၣ်မူဘၣ်ဒါစံးအါထီၣ်ဝဲဒၣ်န့ၣ်လီၤ. ဒ်န့ၣ်အသိးဒ်တၢ်ကစီၣ်တနီၤပၥ်ဖျါထီၣ်ဝဲဒၣ်အသိးန့ၣ်ဖဲတၢ်ထီၣ်ဒုးပယီၤသုးကလၢၤအံၤအဆၢကတီၢ်ပယီၤအပှၤသ့ၣ်တဖၣ်ဃ့ၢ်ပူၤဖျဲးထီၣ်ဝဲဒၣ်ဆူပရဲလိၥ်ကျိထံကျိဝၢ်ဘးခီဒီးချံအဆၢကတီၢ်တၢ်ပၢၢ်ဆၢသုးပၥ်ဖှိၣ်တကပၤလဲၤတ့ၢ်လီၤဝဲဒၣ်ဒြိမ့ၣ်ပိၢ်အဃိပယီၤသုးသံဘၣ်ဒိဘၣ်ထံးအိၣ်ဖျါဝဲဒၣ်အဂ့ၢ်သ့ၣ်ညါဘၣ်န့ၣ်လီၤ. လၢန့ၣ်အမဲၥ်ညါဖဲမဟါအနံၤတဟါဃီဃီန့ၣ်သုးကီၣ်ကးတကပၤအကလံၤကျါကဘီယူၤဟဲတ့ၢ်လီၤမ့ၣ်ပိၢ်ထီၣ်ဘးအိၣ်ဝဲလၢအဘျီ(၅၀)ဘျဲၣ်တကးဒံးဘၣ်တုၤတကီၢ်ခါခဲအံၤန့ၣ်ပယီၤသုးမၤဝဲကလံၤကျါတၢ်ဒုးတပယူၥ်ဃီအဂ့ၢ်သ့ၣ်ညါဘၣ်န့ၣ်လီၤ. ချၢၣ်လွံၢ်ထူၣ်ကီၢ်ရ့ၣ်(သုးက့-၃),ဆီထံးကီၣ်ဆၣ်ဟီၣ်ကဝီၤအံၤအပူၤဖဲလါအ့ဖြ့ၣ်(၂၃)သီအနံၤန့ၣ်ကညီဒီကလုၥ်တၢ် ထူၣ်ဖျဲးသုးမုၢ်ဒိၣ်(KNLA)ထီၣ်မၤန့ၢ်ကွံၥ်ဝဲပယီၤသုး(ကိဆ့ၣ်)သုးကလၢၤလၢအအိၣ်ဆီလီၤအသးဖဲဆီထံးကီၢ်ဆၣ်သုးရ့ၣ်(၇)တၢ်ပၢဟီၣ်ကဝီၤပူၤစ့ၢ်ကီးအဂ့ၢ်ဆီထံးကီၢ်ဆၣ်အပှၤဘၣ်မူဘၣ်ဒါပၥ်ဂၢၢ်ပၥ်ကျၢၤစံးဘၣ်ဝဲခ့ၣ်အဲးစံၣ်-ကညီတၢ် ကစီၣ်န့ၣ်လီၤ.
ကြုၢ်တုတၢ်ဒုးအပူၤ ပယီၤသုးသံ(၃၀)ဂၤအကျါပၣ်ဃုၥ် သုးရ့ခိၣ်-၂
လါမ့ၤ ၈ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆)ကြုၢ်တုကီၢ်ဆၣ်အပူၤ လါအ့ဖြ့ၣ် ၃၀ သီအခါ တၢ်ဒုးအပူၤ ပယီၤသုးသံ(၃၀)ဂၤ အကျါပၣ်ဃုၥ်၀ဲ(ခမရ-၄၃၂) အသုးရ့ၣ်ခိၣ်-၂ အဂ့ၢ်န့ၣ် Mon Liberation Army ထုးထီၣ်ပၥ်ဖျါ၀ဲဖဲလါမ့ၤ ၈ သီ တနံၤအံၤန့ၣ်လီၤ. ဖဲအပူၤကွံၥ်လါအ့ဖြ့ၣ် ၃၀ သီ ဂီၤခီ ၇း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ် ပယီၤသုးကျိၤ လၢအပၣ်ဃုၥ်၀ဲတနီသရံၣ်ကီၢ်ခီ သုး၀ဲၤလီၢ်ခိၣ်သ့ၣ်စုတီၤဖီလၥ်အပှၤ,သုးတြိၤ(၂၂),သုးတြိၤ(၄၄)စုတီၤဖီလၥ် ကၠဲၣ်မယီ ခီၣ်ချ့သုးရ့ၣ်(ခမရ-၂၀၈),မိၣ်တမၣ် ခီၣ်ချ့သုးရ့ၣ်(ခမရ-၁၀၂),ဘိၣ်ပၠ့ ခီၣ်ချ့သုးရ့ၣ်(ခမရ-၄၃၂)သုးရ့ၣ်လၢအနီၣ်ဂံၢ်ကအိၣ်၀ဲ အဂၤ(၅၀)ခိၣ်ဃၢၤဟဲထီၣ်၀ဲဒၣ်ဆူ ကြုၢ်တုတကပၤအဂ့ၢ်န့ၣ် (Mon Liberation Army)စံး၀ဲန့ၣ်လီၤ. ဖဲအ၀ဲသ့ၣ်ဟဲတုၤ၀ဲဖဲနွါခၠၤကိသ၀ီဃၢၤန့ၣ် တၢ်ဒုးကဲထီၣ်၀ဲဒၣ်ဒိၣ်ဒိၣ်မုၢ်မုၢ်ဒီး ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) သုးပၥ်ဖှိၣ်,မိၣ်တၢ်ထူၣ်ဖျဲးသုးမုၢ်ဒိၣ်(MLA),မိၣ်ကီၢ်သီပၣ်တံၣ်ထုးဖးသး(NMSP-AD),ပၠၤလွါသုးကျိၤ,(Lion Battalion) သုးကျိၤ သ့ၣ်တဖၣ်အံၤ လၢနွါခၠၤကိသ၀ီဃၢၤ တၢ်ဆၢကတီၢ်ယံၤလၢအနၣ်(၁၀)ဃၣ်ဃၣ်ညါအဂ့ၢ်န့ၣ် လံၥ်တၢ်ပၥ်ဖျါအပူၤ စံး၀ဲန့ၣ်လီၤ. လၢတၢ်န့ၣ်အဃိတၢ်ဒုးကဲထီၣ်လၢခံခီခံကပၤအဘၢၣ်စၢၤဘျီ၀ဲအံၤ ခီၣ်ချ့သုးရ့ၣ်(ခမရ-၄၃၂) အသုးရ့ၣ်ခိၣ်-၂ သုးခိၣ်ဒိၣ်ဖိ စိမ့ထဲၣ်, သုးစကီၤပတီၢ်ဃုၥ်ဒီးသုးဖိသံပၥ်ဖှိၣ်ခဲလၢၥ်အိၣ်၀ဲ(၃၀)ဂၤဃၣ်ဃၣ်ဒီး တကးဒံးဘၣ်ခီဖျိအ၀ဲသ့ၣ်သံအါအါဂီၢ်ဂီၢ်အဃိ ဂုၤကဒါ လီၢ်က့ၤလီၢ်ခံန့ၣ်လီၤ. ဒ်န့ၣ်အသိးတုၤလၢခဲအံၤဒုးယၤတၢ်ဖ့ၣ်စၢဆဲးကဲထီၣ်ဒံး၀ဲအဃိ...
(သုးက့ ၇)တၢ်ပၢဟီၣ်က၀ီၤသူမှဲကျိကၢၢ်နံၤ တၢ်ဒုးကဲထီၣ်တဘျီဃီလၢတၢ်လီၢ်ခံတီၤ
လါမ့ၤ ၇ သီ, ၂၀၂၅ နံၣ်, ခ့ၣ်အဲးစံၣ် ဖဲတနံၤအံၤလါမ့ၤ ၇ သီဂီၤခီအဆၢကတီၢ်န့ၣ် လၢကီၢ်ကၠီၣ်တဲၣ်-ကီၢ်ပယီၤကီၢ်ဆၢ ခ့ၣ်အဲၣ်ယူၣ်(သုးက့ ၇)တၢ်ပၢသူမှဲကျိကၢၢ်နံၤ မဲၢ်တီၢ်၀့ၢ်၀ၢ်ခီ မီၤဖိက့ၣ် တညၣ်ကၠိပယီၤသုးကလၢၤဒီး မဲၢ်လး၀ၢ်ခီ လ့ပနၢ်ဒ့ၣ်သုးကလၢၤ(၂)ဖျၢၣ်အံၤ တၢ်လဲၤထီၣ်ခး၀ဲတဘျီ ဃီ အဃိ တၢ်ဒုးကဲထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ. တညၣ်ကၠိဒီးလ့ပနၢ်ဒ့ၣ်ပယီၤသုးကလၢၤ(၂)ဖျၢၣ်လၢအိၣ်ဆီလီၤသးဖဲ(သုးက့ ၇)တၢ်ပၢ သူမှဲကျိကပၤအံၤ ဖဲတနံၤအံၤဂီၤခီ ၇ နၣ်ရံၣ်ဃၣ်ဃၣ်အဆၢကတီၢ်န့ၣ် ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ် လဲၤထီၣ်ခး၀ဲတဘျီဃီ အဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤ စံး၀ဲန့ၣ်လီၤ. ခီဖျိတၢ်လဲၤထီၣ်ခးပယီၤသုးကလၢၤတၢ်လီၢ်ခံတီၤအံၤအဃိ ပယီၤသုးတကပၤက့ၤခးလီၤကဒါကျိဖးဒိၣ်အိၣ်အဖီခိၣ် ဒူသ၀ီကမျၢၢ် လၢအိၣ်ဘူးတၢ်ကဲထီၣ်သးအခိၣ်အဃၢၤပှၤနီၣ်ဂံၢ်လၢအကယၤဃ့ၢ်ထီၣ်၀ဲလၢယိၤကီၢ်တကပၤအဂ့ၢ်န့ၣ် (KNLA)ပှၤဘၣ်မူဘၣ်ဒါ လၢတအဲၣ်ဒိးပၥ်ဖျါအမံၤတဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတဟါအံၤဒ်အံၤန့ၣ်လီၤ. အ၀ဲစံး၀ဲလၢ“တၢ်ဒုးကဲထီၣ်လၢတညၣ်ကၠိဒီးလ့ပနၢ်ဒ့ၣ်သုးကလၢၤတၢ်လီၢ်ခံတီၤ.ပလဲၤထီၣ်ခးအီၤစးထီၣ်လၢတဂီၤအံၤ ၇ နၣ်ရံၣ် အခါန့ၣ်. သုးကလၢၤအ၀ဲတဖျၢၣ်န့ၣ်အိၣ်လၢမီၤဖိက့ၣ်,အ၀ဲတဖျၢၣ်န့ၣ်အိၣ်လၢမဲၢ်လးတကပၤန့ၣ်. ပယီၤသုးန့ၣ်ခးလီၤကဒါကျိ ဖးဒိၣ်အဃိကမျၢၢ်လၢအိၣ်လ့ပနၢ်ဒ့ၣ်တကပၤန့ၣ်ဃ့ၢ်ထီၣ်အိၣ်လၢယိၤကီၢ်မဲၢ်လးတကပၤန့ၣ်.မ့မ့ၢ်လၢတညၣ်ကၠိတကပၤခီဃ့ၢ်ထီၣ်၀ဲလၢမဲၢ်တီၢ်တကပၤန့ၣ်.ကမျၢၢ်န့ၣ်ပျံၤ၀ဲလၢကဘီယူၤကဟဲခးလီၤတၢ်မီၤ”အဂ့ၢ်န့ၣ် စံး၀ဲန့ၣ်လီၤ. ဒ်လီၢ်က၀ီၤပှၤဘၣ်မူဘၣ်ဒါစံး၀ဲအသိးန့ၣ် သုးကလၢၤခံဖျၢၣ်အံၤအဘၢၣ်စၢၤတဖျၢၣ်ဒီးတဖျၢၣ်န့ၣ်တၢ်တယးကွၢ်၀ဲတၢ်ဒ့ၣ်စၢၤ ကအိၣ်၀ဲလၢ အကံလိ(၂၀)ဘျဲၣ်,၃၀ ညါအဂ့ၢ်န့ၣ် သ့ၣ်ညါဘၣ်န့ၣ်လီၤ. တညၣ်ကၠိသုးကလၢၤဒီးလ့ပနၢ်ဒ့ၣ်သုးကလၢၤတၢ်လီၢ်လၢ(KNLA)သုးပၥ်ဖှိၣ်ထီၣ်ခး၀ဲဖဲခဲအံၤန့ၣ်အိၣ်ဆီလီၤသးလၢ သုးက့(၇)တၢ်ပၢဟီၣ်က၀ီၤပူၤအသိးမ့ၢ်စ့ၢ်ကီး၀ဲလၢကညီတၢ်မုၥ်တၢ်ခုၣ်ကီၣ်ကးကရၢ(KNU/KNLA-PC)တၢ်ပၢဟီၣ်က၀ီၤအဂ့ၢ်န့ၣ် သ့ၣ်ညါဘၣ်န့ၣ်လီၤ. တကီၢ်ခါခဲအံၤခီဖျိတၢ်ဒုးကဲထီၣ်အဃိ တၢ်လီၢ်ခံတီၤလၢၥ်လၢတၢ်ဒုးကဲထီၣ်အလီၢ်ထံ၀ၢ်ခီယိၤကီၢ်တကပၤန့ၣ် ကၠီၣ်တဲၣ်အသုး,ပှၤဘၣ်မူဘၣ်ဒါဆီလီၤပၥ်လီၤ၀ဲကမျၢၢ်လၢအဃ့ၢ်ထီၣ်သ့ၣ်တဖၣ်အံၤအလီၢ်အကျဲဒီး တကးဒံးဘၣ် ကၠီၣ်တဲၣ်အသုးတဖၣ်အိၣ်ခိး၀ဲကီၢ်ဆၢတၢ်ဘံၣ်တၢ်ဘၢခိးကွၢ်၀ဲတၢ်အိၣ်သးတုၤလၢခဲအံၤအဂ့ၢ်န့ၣ် သ့ၣ်ညါဘၣ် န့ၣ်လီၤ.
သၢ၀ီတ၀ီသုးကီၣ်ကးမၤအါထီၣ်ကဒီးတၢ်ပတုၥ်တၢ်ခးတုၤလၢလါမ့ၤလၢၥ်
လါမ့ၤ ၇ သီ, ၂၀၂၅ နံၣ်, ခ့ၣ်အဲးစံၣ် ကီၢ်ပယီၤပူၤလၢတၢ်ကဆဲးတိစၢၤမၤစၢၤဟီၣ်ခိၣ်ဟူးပှၤဘၣ်ကီဘၣ်ခဲဖိတဖၣ်အဂီၢ် ဖဲမဟါလါမ့ၤ ၆ သီအနံၤန့ၣ် သုးကီၣ်ကး ဘိးဘၣ်ရၤလီၤလၢကမၤအါထီၣ်ကဒီးတၢ်ပတုၥ်တၢ်ခးမုၢ်နံၤမုၢ်သီတၢ်ဆၢကတီၢ်တုၤလၢလါမ့ၤလၢၥ် ၃၁ သီအံၤ န့ၣ်လီၤ. တၢ်ပတုၥ်တၢ်ခးလၢသုးကီၣ်ကးမၤအါထီၣ်၀ဲဘျီ၀ဲအံၤန့ၣ် စးထီၣ်ဖဲမဟါလါမ့ၤ ၆ သီ တုၤလၢ ၃၁ သီ လၢ(၂၆)သီ အတီၢ်ပူၤန့ၣ် လီၤ. အဃိဆၢကတီၢ်ဖဲတၢ်ပတုၥ်တၢ်ခးအတီၢ်ပူၤ တၢ်ပၢၢ်ဆၢသုးကရူၢ်တဖၣ်တဘၣ်မၤ၀ဲတၢ်ထီၣ်ဒုးဘၣ်အမဲၥ်ညါတဘၣ်အိၣ် ကတီၤထုးဖှိၣ် မၤအါထီၣ်သုးဂံၢ်ဘါဒီးတၢ်မ့တလူၤပိၥ်မၤထွဲ၀ဲဘၣ်န့ၣ်ကက့ၤခီၣ်ဆၢကဒါ၀ဲအဂ့ၢ်န့ၣ် သုးကီၣ်ကးစံး၀ဲန့ၣ်လီၤ. သုးကီၣ်ကးအံၤလၢတၢ်ကတိစၢၤမၤစၢၤပှၤဟီၣ်ခိၣ်ဟူးပှၤဘၣ်ကီဘၣ်ခဲဖိအံၤအဂီၢ် အဆိကတၢၢ် စးထီၣ်ဖဲအပူၤကွံၥ်လါအ့ဖြ့ၣ် ၂ သီတုၤ ၂၂ သီ တဘျီ, ၂၃ သီတုၤလါလၢၥ် ၃၀ သီ တဘျီ ဒီးမၤကဒီးဖဲမဟါလါမ့ၤ ၆ သီတုၤလါလၢၥ်အံၤ မၤအါထီၣ်တၢ်ပတုၥ် တၢ်ခး မုၢ်နံၤအိၣ်၀ဲ(၃)ဘျီလံန့ၣ်လီၤ. ဘၣ်ဆၣ်သုးကီၣ်ကးအံၤစးထီၣ်လၢလါအ့ဖြ့ၣ် ၂ သီ တၢ်ပတုၥ်တၢ်ခးခံဘျီလၢၥ်ဒီတကတီၢ်အပူၤန့ၣ် မၤ၀ဲဒုးယၤတၢ်ဟူးတၢ်ဂဲၤ လၢပျီပူၤ,ခးလီၤ၀ဲကျိဖးဒိၣ်,သူ၀ဲဒြိဒီးကဘီယူၤဟးတ့ၢ်လီၤ၀ဲမ့ၣ်ပိၢ်လၢကလုၥ်ဒူၣ်ဖီၣ်စုက၀ဲၤကရူၢ်ကရၢတၢ်ပၢဟီၣ်က၀ီၤပူၤ, ကမျၢၢ်အိၣ်ဆိးလီၢ်ကျဲဒူသ၀ီပူၤအိၣ်၀ဲကိးမုၢ်နံၤဒဲးဃၣ်ဃၣ်န့ၣ်လီၤ. လၢတၢ်န့ၣ်အဖီခိၣ်ခီဖျိကျိဖးဒိၣ်ဒီးဒြိ,ကဘီယူၤအံၤအဃိ တၢ်ပၢၢ်ဆၢသုးကရူၢ်ကရၢအပှၤဃုၥ်ဒီးကမျၢၢ်ထံဖိကီၢ်ဖိသံဘၣ်ဒိဘၣ်ထံး အိၣ်၀ဲအါမးအသိး ကၠိ,သီခါဖၠၣ်,တၢ်ဘါယွၤသရိၥ်,ကမျၢၢ်ဟံၣ်တၢ်သူၣ်ထီၣ်တဖၣ်လီၤပှီၢ်ဟးဂီၤ၀ဲဒၣ်အါမးဒီး ကမျၢၢ်စ့ၢ်ကီး ဘၣ်ဃ့ၢ်မှံဟးဖျိးအိၣ်၀ဲအါအါဂီၢ်ဂီၢ်အဂ့ၢ်န့ၣ် သ့ၣ်ညါဘၣ် န့ၣ်လီၤ....
လါအ့ဖြ့ၣ်အတီၢ်ပူၤသုးကီၣ်ကးအတၢ်မၤကမၣ်ပှၤဂ့ၢ်၀ီခွဲးယၥ်အဃိ ပိၥ်မုၣ်သံ(၇၁)ဂၤ,ဘၣ်ဒိ(၅၀)ဂၤအဂ့ၢ် BWU ထုးထီၣ်ပၥ်ဖျါ
လါမ့ၤ ၇ သီ, ၂၀၂၅ နံၣ်, ခ့ၣ်အဲးစံၣ် သုးကီၣ်ကးအတၢ်ဘိးဘၣ်ရၤလီၤတၢ်ပတုၥ်တၢ်ခးအကတီၢ် ခီဖျိကျိဖးဒိၣ်,ကဘီယူၤ,ဟီၣ်လၥ်မ့ၣ်ပိၢ်ဒီးတၢ်မၤသံမၤ၀ဲအံၤအဃိ လါအ့ဖြ့ၣ်တလါအတီၢ်ပူၤ ပိၥ်မုၣ်သံ၀ဲ(၇၁)ဂၤဒီးဘၣ်ဒိ၀ဲ(၅၀)ဂၤအဂ့ၢ်န့ၣ် BWU-Burmese Women's Union ကီၢ်ပယီၤ ပိၥ်မုၣ်စၢဖှိၣ်ကရၢထုးထီၣ်ပၥ်ဖျါ၀ဲဖဲလါမ့ၤ ၇ သီတနံၤအံၤ န့ၣ်လီၤ. စးထီၣ်လါအ့ဖြ့ၣ် ၁ သီတုၤ ၃၀ သီလၢတလါအတီၢ်ပူၤ ခီဖျိကဘီယူၤအံၤအဃိ ပိၥ်မုၣ်သံ(၅၉)ဂၤ,ဘၣ်ဒိ(၄၀)ဂၤ, ကျိဖးဒိၣ်အဃိ သံ(၇)ဂၤ,ဘၣ်ဒိ(၅)ဂၤ,တကးဒံးဘၣ်လၢတၢ်မၤသံမၤ၀ီအံၤအဃိသံ၀ဲ(၅)ဂၤဒီးဘၣ်ဒိ၀ဲလၢဟီၣ်လၥ်မ့ၣ်ပိၢ်အံၤအဃိ(၅)ဂၤ အဖီခိၣ် ပိၥ်မုၣ်သံဘၣ်ဒိဘၣ်ထံးခဲလၢၥ်အိၣ်၀ဲ(၁၂၁)ဂၤန့ၣ်လီၤ. လၢန့ၣ်အမဲၥ်ညါပှၤပိၥ်မုၣ်လၢအသံ(၇၁)ဂၤအံၤအကျါ(၁၃)ဂၤန့ၣ်အါဒၣ်တက့ၢ်မ့ၢ်၀ဲပှၤဖိဒံဖိသၣ်သ့ၣ်တဖၣ် လၢအိၣ်(၁၈)နံၣ် ဆူဖီလၥ်အဂ့ၢ်န့ၣ် စံး၀ဲန့ၣ်လီၤ. ဒ်(BWU)လံၥ်တၢ်ပၥ်ဖျါပူၤပၥ်ဖျါ၀ဲအသိးန့ၣ် ပိၥ်မုၣ်ပိၥ်မၢၤလၢအသံတဖၣ်န့ၣ်မ့ၢ်၀ဲ စကဲကီၢ်ခီဒိၣ်ပူၤ(၃၀)ဂၤ, မါတလ့ကီၢ်ခီဒိၣ် (၁၄)ဂၤ, ပကိကီၢ်ခီဒိၣ်(၅)ဂၤ,ခၠီကီၢ်စဲၣ်(၄)ဂၤ,မကွ့ကီၢ်ခီဒိၣ်(၄)ဂၤ,ကညီကီၢ်စဲၣ်(၄)ဂၤ, ရခၢၣ်ကီၢ်စဲၣ်(၄)ဂၤ, ကရ့ၣ်နံၣ်ကီၢ်စဲၣ် (၃)ဂၤ, တလၢၤကီၢ်ကီၢ်စဲၣ်(၂)ဂၤဒီး ယိၤဒိၣ်ကီၢ်စဲၣ်(၁)ဂၤန့ၣ်လီၤ. ဒ်န့ၣ်အသိးမ့ဘၣ်ကွၢ်တၢ်ဆၢကတီၢ်လၢပိၥ်မုၣ်ပိၥ်မၢၤလၢအသံအဘၣ်ဒိဘၣ်ထံးသ့ၣ်တဖၣ်အံၤန့ၣ် ကဲထီၣ်၀ဲဒၣ်ဖဲသုးကီၣ်ကး ဘိးဘၣ်ရၤလီၤမၤ၀ဲတၢ်ပတုၥ်တၢ်ခးအတီၢ်ပူၤန့ၣ်လီၤ. ဘၣ်ဃးတၢ်သံတၢ်ဘၣ်ဒိဘၣ်ထံးအနီၣ်ဂံၢ်နီၣ်ဒွးလၢတၢ်ပၥ်ဖျါထီၣ်၀ဲခဲအံၤတဖၣ်ဘၣ်တၢ်ထၢဖှိၣ်မၤနီၣ်မၤဃါအီၤလၢတၢ်ကစီၣ်သန့အတၢ်ပၥ်ဖျါတၢ်ဂ့ၢ်တၢ်ကျိၤတဖၣ်အပူၤလီၤဒီး လၢကလဲၤလီၤမၤနီၣ်မၤဃါတၢ်ကဲထီၣ်အဂ့ၢ်အကျိၤတၢ်အိၣ်သး လီၤတံၢ်လီၤဆဲး အဂီၢ်တၢ်ကီတၢ်ခဲအိၣ်အဃိ ဘၣ်သ့ၣ်သ့ၣ်တၢ်သံတၢ်ဘၣ်ဒိထံးအနီၣ်ဂံၢ်ကအိၣ်အါန့ၢ်အ၀ဲအံၤသ့၀ဲအဂ့ၢ်န့ၣ် BWU စံး၀ဲန့ၣ်လီၤ. ကီၢ်ပယီၤပူၤဟီၣ်ခိၣ်ဟူးအဖီခိၣ်ကမျၢၢ်ထံဖိကီၢ်ဖိဘၣ်ကွၢ်ဆၢၣ်မဲၥ်၀ဲတၢ်ကိၢ်တၢ်ဂီၤတၢ်ဃံးတၢ်စ့ၤဒိၣ်ဒိၣ်မုၢ်မုၢ်အကတီၢ်အံၤ သုးကီၣ်ကးဘိးဘၣ်ရၤလီၤလၢပတုၥ်စိဃၥ်တၢ်ဒုးတစိၢ်တလီၢ်အိၣ်ဘၣ်ဆၣ် ခးလီၤကျိဖးဒိၣ်,သူကဘီယူၤဟးတ့ၢ်လီၤမ့ၣ်ပိၢ် ဟဲအထီၣ်အါန့ၢ်အပူၤကွံၥ်အဃိ ပိၥ်မုၣ်ပိၥ်မၢၤဃုၥ်ဒီးဖိသၣ်ဆံးတဖၣ်သံဘၣ်ဒိဘၣ်ထံးကဲထီၣ်အိၣ်၀ဲကိးမုၢ်နံၤဒဲးဃၣ်ဃၣ်အဂ့ၢ်န့ၣ် (BWU)လံၥ်တၢ်ပၥ်ဖျါအပူၤ ပၥ်ဖျါ၀ဲန့ၣ်လီၤ.
ကျဲပံးအဃိတၢ်ဘၣ်ယိၣ်အိၣ်လၢတၢ်ဆါက့ၤကြုၢ်တုဟီၣ်ကဝီၤတၢ်သူတၢ်သၣ်လၢဟးထီၣ်တဖၣ်တန့ၢ်
လါမ့ၤ ၇သီ, ၂၀၂၅နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢဒူပျၥ်ယၥ်ကီၢ်ရ့ၣ်ကြုၢ်တုကီၢ်ဆၣ်ဟီၣ်ကဝီၤအပူၤတၢ်ဒုးတၢ်ယၤဆူၣ်ထီၣ်ဒီးတၢ်ပံးကွံၥ်ဝဲကျဲအဃိတၢ်ဘၣ်ယိၣ်အိၣ်ဝဲလၢတၢ်ဆါက့ၤတၢ်သူတၢ်သၣ်လၢအဟးထီၣ်လၢဟီၣ်ကဝီၤအပူၤတဖၣ်တန့ၢ်လၢၤဘၣ်အိၣ်ဝဲအဂ့ၢ်,လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ. ကြုၢ်တု-ကီးတရံးကီၢ်ဆၣ်ကျဲအပူၤတၢ်ဒုးဆူၣ်ထီၣ်ဝဲလၢတၢ်ပၢၢ်ဆၢသုးပၥ်ဖှိၣ်ဒီးသုးကီၣ်ကးအဘၢၣ်စၢၤအဖီခိၣ်တၢ်ပံးကွံၥ်ဝဲကျဲအဃိ,တၢ်ဘၣ်ယိၣ်အိၣ်ဝဲလၢတၢ်ဆါအီၣ်က့ၤဝဲတၢ်သူတၢ်သးလၢအဟးထီၣ်လၢလီၢ်ကဝီၤအပူၤတဖၣ်တန့ၢ်လၢၤဘၣ်အဂ့ၢ်,လီၢ်ကဝီၤကမျၢၢ်လၢအမၤအီၣ်ကျီးတဂၤစံးဝဲဒ်အံၤန့ၣ်လီၤ. “အခဲအံၤပတၢ်သူတၢ်သၣ်ဟးထီၣ်တနီၤလံကျဲပံးအဃိပကဘၣ်ဆှၢဖဲလဲၣ်ဖဲလီၣ်ပတၢ်ကီတၢ်ခဲအိၣ်ဝဲလီၤ.ကိတဲၤလဲၤတန့ၢ်ကြုၢ်တုလဲၤတန့ၢ်,ကမလဲဒီးပလဲၤတန့ၢ်,ပကလဲၤဆူဖၣ်အၣ်တကပၤနါက့တန့ၢ်တဖျိအဃိတၢ်ကီတၢ်ခဲအိၣ်လီၤ.ခဲအံၤတၢ်လုၢ်ထီၣ်ပှ့ၤထီၣ်ခဲလၢၥ်အဃိပတဆါဘၣ်ပတၢ်သူတၢ်သၣ်ညီညီပစ့ဟဲနုၥ်တအိၣ်လၢပကပှ့ၤအီၣ်ကဒါက့ၤတၢ်ဘၣ်.”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,တၢ်ဒုးတၢ်ယၤအဃိပနံၥ်တၢ်ဖိတၢ်လံၤတဖၣ်အပှ့ၤဒိၣ်ထီၣ်ဝဲဒီး,ဟီၣ်ကဝီၤအပူၤတၢ်သူတၢ်သၣ်လၢဟးထီၣ်တဖၣ်အံၤတၢ်ဘၣ်ယိၣ်အိၣ်လၢတၢ်ဆါအီၤအပှ့ၤန့ၢ်တဂ့ၤဘၣ်အဂ့ၢ်,လီၢ်ကဝီၤပိၥ်မုၣ်လၢအမၤအီၣ်ကျီးနီၢ်မူးသဲၣ်စံးဝဲဒ်အံၤစ့ၢ်ကီးန့ၣ်လီၤ. “ပအိၣ်ဖဲအံၤဘၣ်အခါပကွးရီဘၢၣ်,ဘၣ်အခါပမၤဆါအီၣ်တၢ်သူတၢ်သၣ်လီၤ.ပှၤမၤစံၥ်မၤပှဲၤတအိၣ်ဘၣ်.ပမၤဆါတၢ်သူတၢ်သၣ်ပန့ၢ်စ့ပအီၣ်ဒီးပဖိပဒံၣ်လဲၤတရံးအသးဒံးအံၤလီၤ.အပူၤကွံၥ်ပှၤလ့ၢ်လိၤအါပဆါဘၣ်တၢ်သူတၢ်သၣ်ဂ့ၤမးအခါအံၤကျဲတဖျိပှၤတဟးလ့ၢ်လိၤအဃိ,ပဘၣ်ယိၣ်တၢ်လၢပတၢ်သူတၢ်သၣ်အပှ့ၤတအိၣ်အါအါဘၣ်လီၤ”အဂ့ၢ်စံးဝဲဒၣ်န့ၣ်လီၤ. တၢ်ပံးကွံၥ်ကျဲအဃိ,တၢ်သူတၢ်သၣ်လၢဟးထီၣ်လၢဟီၣ်ကဝီၤအပူၤတဖၣ်အမဲၥ်ညါပှၤလၢအမၤဆါမၤကၤဝဲသွဲးလး,သွၣ်ဒီးပၥ်ကီၤပၥ်ဝဲသ့ၣ်တဖၣ်အံၤတကီၢ်ခါခဲအံၤခီဖျိပှၤပှ့ၤဆါသွဲးလး(သွၣ်)အခိၣ်တဖၣ်တဟဲပှ့ၤဝဲဘၣ်အဃိ,ဘၣ်ဆဲးပၥ်ကီၤဝဲဒီးသဂၢၢ်ဘၣ်ဝဲတၢ်ကီတၢ်ခဲအဂ့ၢ်သ့ၣ်ညါဘၣ်န့ၣ်လီၤ. ဒ်န့ၣ်အသိး,သုးကီၣ်ကးအံၤခးလီၤဝဲကျိဖးဒိၣ်ဆူကမျၢၢ်အိၣ်ဆိးတၢ်လီၢ်တကးဘၣ်သူကဘီယူၤခးလီၤစ့ၢ်ကီးဝဲတၢ်အိၣ်ဝဲအဃိ,လီၢ်ကဝီၤအပူၤကမျၢၢ်လီၢ်ကဝီၤဖိတဖၣ်ဘၣ်ဃ့ၢ်ထီၣ်ကွံၥ်ဝဲဒီတသဝီအိၣ်ဝဲဒၣ်န့ၣ်လီၤ.ဒီးဒူသဝီတနီၤတဘၣ်ဃ့ၢ်ထီၣ်ဝဲဒၣ်ဘၣ်ဆၣ်,မုၢ်နၤခီအဆၢကတီၢ်မံလၢဟံၣ်တဘူၣ်ဒီးဘၣ်ဃ့ၢ်မံဝဲလၢတၢ်လီၢ်လၢအဂၤအိၣ်ဝဲအဂ့ၢ်သ့ၣ်ညါဘၣ်န့ၣ်လီၤ.
ထံခံ ပယီၤသုးကလၢၤ သုးရ့ၣ်ခိၣ်(၂)ဒီးအပှၤ(၆၀)ဃၣ်ဃၣ် ဃ့ၢ်ဖျိးဆူ ကီၢ်ကၠီၣ်တဲၣ်
လါမ့ၤ ၇သီ, ၂၀၂၅ နံၣ်, ခ့ၣ်အဲးစံၣ် ကီၢ်သူလ့ၤတၢ်ပၢ ဘျံးဒဝဲၢ်ကီၢ်ရ့ၣ်,သုးက့(၄),ထံမိၢ်ပှၢ်ဟီၣ်ကဝီၤလီၤဆီဒီးကီၢ်ကၠီၣ်တဲၣ်ကီၢ်ဆၢ ထံခံပယီၤသုးကလၢၤ အသုးရ့ၣ်ခိၣ်(၂)ဒီးအပှၤ(၆၀)ဃၣ်ဃၣ် ဃ့ၢ်ဖျိးဆူ ကီၢ်ကၠီၣ်တဲၣ်တကပၤအဂ့ၢ် သ့ၣ်ညါဘၣ်လၢသုးက့(၄)အပှၤဘၣ်မူဘၣ်ဒါအအိၣ်န့ၣ်လီၤ. ပယီၤသုးသ့ၣ်တဖၣ်အံၤန့ၣ်လၢ ၂၀၁၉နံၣ် ခိဝံၣ်တၢ်ဆါအဆၢကတီၢ်အခါလံၤလံၤတက့ၤလီၤဘၣ်ဝဲနီတဘျီဘၣ်ဒီးအခဲအံၤတၢ်ထီၣ်ဒုးအဝဲသ့ၣ်ဒ်အံၤအဖီခိၣ် ခီဖျိတအဲၣ်ဒိးအိၣ်ဝဲလၢၤဘၣ်အဃိ ဃ့ၢ်ဖျိးကွံၥ်ဝဲဆူကီၢ်ကၠီၣ်တဲၣ်တကပၤလီၤအဂ့ၢ် သုးက့(၄)အသုးက့ခိၣ် သုးခိၣ်ကျၢၢ်ဖိ စီၤဖိလ့စံးဘၣ်ဝဲ ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲလၢ“ထံခံပယီၤသုးသ့ၣ်တဖၣ်အံၤလၢခိဝံၣ်အခါလံၤလံၤတက့ၤလီၤဘၣ်ဝဲနီတဘျီဘၣ်.အခဲအံၤတၢ်ထီၣ်ဒုးအီၤဒီးအိၣ်ဝဲဘျဲအဃိဃ့ၢ်ဖျိးဝဲဒၣ်န့ၣ်လီၤ.အပူၤကွံၥ်သၢသီလွံၢ်သီအခါန့ၣ် ပၢၤကီၢ်စးထီၣ်ဃ့ၢ်ဖျိးဝဲအဂၤ(၁၀),ဝံၤဒီးသုးန့ၣ်အဂၤ(၃၀)ဘျဲၣ်,အဝဲတနံၤန့ၣ်(၈)ဂၤ,မဟါတနံၤန့ၣ်(၉)ဂၤဒီးဖဲတဂီၤအံၤန့ၣ်ဃ့ၢ်ထီၣ်ကဒီး(၈)ဂၤမ့ၢ်ပၥ်ဖှိၣ်ခဲလၢၥ်တၢ်သၢသီလွံၢ်သီတီၢ်ပူၤအံၤထံခံပယီၤသုးဃ့ၢ်ဖျိးကအိၣ်လၢအဂၤ(၆၀)ဃၣ်ဃၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ ပယီၤသုးလၢအဃ့ၢ်ဖျိးဆူကီၢ်ကၠီၣ်တဲၣ်ခဲအံၤသ့ၣ်တဖၣ်န့ၣ်မ့ၢ်ဝဲ သုးလီၢ်လံၤဖဲထံခံသုးကလၢၤလၢအမ့ၢ် (ခလရ-၂၅)ဃုၥ်ဒီးအသုးရ့ၣ်ခိၣ်ခံသ့ၣ်တဖၣ်ဒီးစိၥ်ဃုၥ်ဝဲဒီးတၢ်စုကဝဲအဒိၣ်အဆံးခဲလၢၥ်(၁၉)ခိၣ်ဒီးအခဲအံၤအိၣ်ဝဲဒၣ်လၢကီၢ်ကၠီၣ်တဲၣ်အစုပူၤအဂ့ၢ် သ့ၣ်ညါဘၣ်လၢ သုးက့(၄)အပှၤဘၣ်မူဘၣ်ဒါအအိၣ်န့ၣ်လီၤ. လၢန့ၣ်အမဲၥ်ညါ တကီၢ်ခါခဲအံၤ ထံခံပယီၤသုးကလၢၤန့ၣ် အိၣ်တ့ၢ်က့ၤထဲ ပှၤသီလၢအပူၤကွံၥ် လါအ့ဖြ့ၣ် ၁၇သီတုၤ၂၁သီအနံၤ ပှၤလၢဘၣ်တၢ်ဟဲပၥ်လီၤအီၤဒီးကဘီယူၤသ့ၣ်တဖၣ်လၢအမ့ၢ်(ခလရ-၂၆၇)ဒီးပှၤနီၣ်ဂံၢ်ကအိၣ်တ့ၢ်ဒံးအဂၤ (၆၀)ဘျဲၣ်ဒံးအဂ့ၢ် သုးခိၣ်ကျၢၢ်ဖိစီၤဖိလ့တဲအါထီၣ်ဝဲဒၣ်စ့ၢ်ကီးန့ၣ်လီၤ. ထံခံပယီၤသုးကလၢၤဝဲအံၤန့ၣ် မ့ၢ်ဝဲသုးကလၢၤတဖျၢၣ်လၢအအိၣ်ဆီလီၤသးလၢ ကီၢ်သူလ့ၤဒီးကီၢ်ကၠီၣ်တဲၣ်ကီၢ်ဆၢထံးတီတီအမဲၥ်ညါန့ၢ်ဃုၥ်ဝဲဒီးကီၢ်ကၠီၣ်တဲၣ်တဝၥ်ဒီးဖဲတၢ်ထီၣ်ဒုးန့ၢ်ထံထၣ်ဒုးယၤသုးကလၢၤဝံၤအလီၢ်ခံဖဲ လါအ့ဖြ့ၣ် အသီ(၂၀)အနံၤန့ၣ် ထံခံပယီၤသုးကလၢၤအပှၤဘၣ်မူဘၣ်ဒါဒီးကီၢ်ကၠီၣ်တဲၣ်ပှၤဘၣ်မူဘၣ်ဒါမၤဒံးဝဲတၢ်ထံၣ်လိၥ်အိၣ်သကိးလၢကီၢ်ကၠီၣ်တဲၣ်ပူၤhgတၢ်လီၢ်တတီၤအဂ့ၢ်သ့ၣ်ညါဘၣ်စ့ၢ်ကီးန့ၣ်လီၤ. တကီၢ်ခါခဲအံၤန့ၣ် ထံခံပယီၤသုးကလၢၤအံၤတၢ်ဒုးကဲထီၣ်ဒံးဝဲအဖၢမုၢ်ဒီး သုးကီၣ်ကးအကဘီယူၤဟဲဆှၣ်တၢ်အိၣ်ဝဲခဲအံၤခဲအံၤအသိးဟဲခးလီၤတၢ်ဒီးကဘီယူၤစ့ၢ်ကီးအိၣ်ဝဲဒၣ်တပယူၥ်ဃီအဂ့ၢ် သ့ၣ်ညါဘၣ်ဒ်ကီၢ်ရ့ၣ်ပှၤဘၣ်မူဘၣ်ဒါစံးဝဲဒၣ်အသိးန့ၣ်လီၤ.
ဟီၣ်ခိၣ်ဒီးဘ့ၣ်ကညီကရၢအဖု(၂၀)ဃ့ထီၣ်ဝဲလၢ တၢ်ကမၤအါထီၣ်တၢ်မၤစၢၤလၢ ပှၤဘၣ်ကီဘၣ်ခဲဖိအဂီၢ်
လါမ့ၤ ၇သီ, ၂၀၂၅ နံၣ်, ခ့ၣ်အဲးစံၣ်. တကီၢ်ခါခဲအံၤ ခီဖျိတၢ်မၤစှၤလီၤဝဲဒၣ်တၢ်ဆီၣ်ထွဲမၤစၢၤအဃိ ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ကညီဘၣ်ကီဘၣ်ခဲဒဲကဝီၤဒီး ကရ့ၣ်နံၣ်ဘၣ်ကီဘၣ်ခဲဒဲကဝီၤအပူၤ ပှၤနီၣ်ဂံၢ် (၁၀၈၀၀၀)ဘျဲၣ်သ့ၣ်တဖၣ် တယံၤလၢၤဘၣ်န့ၣ်သဂၢၢ်ဘၣ်ဝဲဒၣ်ဒီးတၢ်ဆီၣ်ထွဲမၤစၢၤတၢ်ဃံးတၢ်စ့ၤသ့ဝဲဒၣ်အဖီခိၣ် တၢ်မၤဘူၣ်ကစၢ်သ့ၣ်တဖၣ်ကမၤအါထီၣ်ဘၣ်တၢ်ဆီၣ်ထွဲမၤစၢၤအဂ့ၢ် ဟီၣ်ခိၣ်ဒီဘ့ၣ်ကညီတၢ်ကရၢကရိ အဖု(၂၀)ထုးထီၣ်ဝဲဒၣ်အလံၥ်တဘ့ၣ်ဒီးဃ့ထီၣ်ဝဲဒၣ်န့ၣ်လီၤ. လၢလံၥ်ပၥ်ဖျါဝဲန့ၣ်အဖီခိၣ်န့ၣ် တၢ်မၤစၢၤဆီၣ်ထွဲကညီတၢ်မုၥ်တၢ်ခုၣ်ပှၥ်ဘျးစဲ အပှၤကတိၤတၢ်ပၢ သရၣ်မုၣ်နီၢ်ဝါခုၣ်ရှံစံးဝဲဒၣ်လၢ“ခီဖျိလၢ TBCဘိးဘၣ်ရၤလီၤလၢ တၢ်မၤလီၤစှၤကွံၥ်အဝဲသ့ၣ် တၢ်ဆီၣ်ထွဲမၤစၢၤအဖီခိၣ် တမ့ၢ်ထဲလၢတၢ်မၤလီၤစှၤထဲတၢ်အီၣ်ဘၣ်,လၢတၢ်အိၣ်ဆူၣ်အိၣ်ချ့တကပၤစ့ၢ်ကီး USပၥ်ပတုၥ်ကွံၥ်တၢ်ဆီၣ်ထွဲမၤစၢၤဝံၤအလီၢ်ခံ တၢ်အိၣ်ဆူၣ်အိၣ်ချ့မ့ၢ်ဂ့ၤ,တၢ်အီၣ်တၢ်အီမ့ၢ်ဂ့ၤ ကဲထီၣ်ဝဲတၢ်ဂ့ၢ်ကီဖးဒိၣ်လၢဒဲကဝီၤပူၤန့ၣ်လီၤ.အဃိန့ၣ်ပကညီကရူၢ်ကရၢလၢဟီၣ်ခိၣ်ဒီဖျၢၣ်တကပၤပထံၣ်လၢ ပကဘၣ်ပၥ်ဖှိၣ်ထီၣ်သးကိးသထြီထီၣ်ဝဲဒၣ်လၢ ပှၤလၢအကလုၢ်တသီၣ်ဘၣ်,လီၤဆီဒၣ်တၢ် ပှၤလၢဘၣ်ကီဘၣ်ခဲသ့ၣ်တဖၣ်အဂီၢ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ. လၢကညီကရူၢ်ကရၢ အဖု(၂၀)အလံၥ်ပၥ်ဖျါအပူၤန့ၣ် ဃ့ထီၣ်ဝဲ ကီၢ်အမဲရကၤပဒိၣ်လၢ ကဆဲးမၤစၢၤဒံးပှၤဒဲကဝီၤဖိ,ထံဂုၤကီၢ်ဂၤတၢ်မၤဘူၣ်ကစၢ်တဖၣ်ကမၤအါထီၣ်တၢ်ဆီၣ်ထွဲမၤစၢၤလၢပှၤဒဲကဝီၤဖိအဂီၢ်,ကီၢ်ကၠီၣ်တဲၣ်ကမၤန့ၢ်လံၥ်အုၣ်သးလၢဖိသဲစးဒ်သိးဒဲကဝီၤဖိကဟးထီၣ်မၤဘၣ်တၢ်မၤလၢတၢ်ချၢအဂီၢ်,ဒီးကပျဲဝဲဒၣ်ခီကီၢ်ဆၢတၢ်ဆီၣ်ထွဲမၤစၢၤသ့ၣ်တဖၣ်န့ၣ်ကလဲၤခီဖျိလၢ ခ့ၣ်အဲၣ်ယူၣ် ကညီဒီကလုၥ်စၢဖှိၣ်ကရၢဒီးကရ့ၣ်နံၣ် ကတီၢ်ဘၢၣ်စၢၤပၢြပးကမံးတံၥ်အအိၣ်လိၤလိၤဒီးသုတမ့ၢ်လၢသုးကီၣ်ကးအအိၣ်တဂ့ၤအဂ့ၢ်ဃ့ထီၣ်ဝဲဒၣ်န့ၣ်လီၤ. ခီဖျိတၢ်မၤလီၤစှၤတၢ်ဆီၣ်ထွဲမၤစၢၤလၢသတူၢ်ကလၥ်ဒ်အံၤအဖီခိၣ်တၢ်ဆၢကတီၢ်မ့ၢ်ယံၤထီၣ်န့ၣ်ဒဲကဝီၤပူၤပှၤလၢနးနးကျံၥ်ကျံၥ်သ့ၣ်တဖၣ်တၢ်ဘၣ်ယိၣ်အိၣ်လၢကသဂၢၢ်ဘၣ်ဒီးတၢ်သၣ်ဝံၤလီၤဒိအဂ့ၢ်သရၣ်မုၣ်နီၢ်ဝါခုၣ်ရှံတဲအါထီၣ်ဝဲဒၣ်စ့ၢ်ကီးန့ၣ်လီၤ. ဒ်ကညီကရူၢ်ကရၢ အဖု(၂၀)ပၥ်ဖျါဝဲဒၣ်အသိးန့ၣ် ဒဲကဝီၤပူၤဖိသၣ်(၅)နံၣ် ဆူဖီလၥ်တဂၤ,တလါအဂီၢ်ဒိးန့ၢ်ဘၣ်ဝဲ စ့ဒီလၣ်(၁.၅၀)ဒီး လၢဒီလါအတီၢ်ပူၤတနံၤန့ၣ် ဒိးန့ၢ်ဘၣ်ဝဲထဲ ဒီလၣ် ၅ စဲၣ်အသိး ပှၤသးနံၣ်(၅)နံၣ်ဆူဖီခိၣ်န့ၣ်တလါအဂီၢ်ဒိးန့ၢ်ဘၣ်ဝဲ(၂.၄၀)ဒီလၣ်ဒီး ဒီလါအတီၢ်ပူၤ တနံၤန့ၣ်ဒိးန့ၢ်ဘၣ်ဝဲထဲ ဒီလၣ် ၈စဲၣ်အဂ့ၢ်ပၥ်ဖျါဝဲဒၣ်န့ၣ်လီၤ. ဒဲကဝီၤပူၤ တၢ်နီၤဖးလီၤဝဲ ပှၤဒဲကဝီၤဖိ ၄ကလုၥ် ဒ်အမ့ၢ် ပတီၢ်မုၢ်ဟံၣ်ဖိဃီဖိလၢကိးဝဲလၢ(Standard),ပှၤလိၣ်ဘၣ်တၢ်မၤစၢၤလၢကိးဝဲလၢ(V),ပှၤလိၣ်ဘၣ်တၢ်မၤစၢၤလီၤဆီဒိၣ်(MV)ဒီး နီၢ်ကစၢ်မၤစၢၤလီၤသးသ့(SR)သ့ၣ်တဖၣ်ဒီး ဖဲတၢ်ထုးလီၤစှၤတၢ်ဆီၣ်ထွဲမၤစၢၤအဆၢကတီၢ် ပှၤ ပတီၢ်မုၢ်ဟံၣ်ဖိဃိဖိသ့ၣ်တဖၣ် သဂၢၢ်ဘၣ်ဝဲဒီးတၢ်တၤတၢ်အဒိၣ်ကတၢၢ်ခီဖျိတၢ်ထုးလီၤစှၤအဝဲသ့ၣ်တၢ်မၤစၢၤဘူးထီၣ်(၇၀)ဘျးကယၤဃၣ်ဃၣ်အဂ့ၢ်သ့ၣ်ညါဘၣ်န့ၣ်လီၤ.
အမဲရကၤဖီၣ်ဃံး BGF သုးခိၣ်စီၤခၠ့ၣ်သူၤဒီးအဖိခွါ ၂ ဂၤလၢ အီၤလါ(online)တၢ်လံၣ်တၢ်လီကွီၢ်မ့ၣ်
လါမ့ၤ ၆ သီ, ၂၀၂၅ နံၣ်, ခ့ၣ်အဲးစံၣ် သုးခိးကီၢ်ဆၢ(BGF)အခိၣ် သုးခိၣ်ဒိၣ်စိ စီၤခၠ့ၣ်သူၤဃုၥ်ဒီးအဖိခွါစီၤထူအဲၣ်မူဒီးစီၤခၠ့ၣ်ခၠ့ၣ်သ့ၣ်တဖၣ်အံၤ တၢ်ကဖီၣ်ဃံးဟံအရ့ဒ် (အီၤလါ)တၢ်လံၣ်တၢ်လီကွီၢ်မ့ၣ်အသိးအဂ့ၢ်န့ၣ် အမဲရကၤထုးထီၣ်ပၥ်ဖျါ၀ဲဖဲမဟါလါမ့ၤ ၅ သီအနံၤန့ၣ်လီၤ. သုးခိၣ်စီၤခၠ့ၣ်သူၤဒီးအဖိခွါခံဂၤအံၤ မ့ၢ်ပှၤသ့ၣ်တဖၣ်လၢအမၤဘၣ်ဒိဘၣ်ထံး၀ဲအမဲရကၤထံကီၢ်ဖိလၢအမ့ၢ် တၢ်ခီထံဆၢကီၢ်ဆၢ ကွီၢ်မ့ၣ်, တၢ်မၤကၤပှၤဟီၣ်ခိၣ်ဖိကွီၢ်မ့ၣ်သ့ၣ်တဖၣ်အံၤအဂ့ၢ်န့ၣ် အမဲရကၤကျိၣ်စ့၀ဲၤကျိၤ(OFAC)ထုးထီၣ်ပၥ်ဖျါ၀ဲလၢအ (website)ပူၤ န့ၣ်လီၤ. (အီၤလါ)တၢ်လံၣ်တၢ်လီတၢ်ဖံးမၤလၢအိၣ်ဆီလီၤသးအိၣ်ဖှိၣ်၀ဲဒၣ်ဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢ စွ့ၤကိၣ်ကိၤဟီၣ်က၀ီၤအပူၤ အံၤမ့ၢ်၀ဲ(BGF)အတၢ်လီၢ်ဒီး ဒ်န့ၣ်အသိးကျိၣ်စ့လၢအဟဲ၀ဲဖဲ(အီၤလါ)တၢ်လံၣ်တၢ်လီတၢ်ဖံးတၢ်မၤအပူၤအံၤသ့ၣ်တဖၣ် (BGF)ဒိးန့ၢ်ဘၣ်၀ဲတၢ်ဘၣ်ဘျုးအိၣ်၀ဲအါမးအဂ့ၢ်န့ၣ် အမဲရကၤစံး၀ဲန့ၣ်လီၤ. ဒ်အမဲရကၤကျိၣ်စ့၀ဲၤကျိၤ နဲၣ်ရွဲၣ်(Michael Faulkender)စံးလီၤ၀ဲလၢလံၥ်တၢ်ပၥ်ဖျါပူၤအိၣ်၀ဲအသိးန့ၣ် ”ပှၤလၢအဖံးအမၤ တၢ်လၢအီၤလါတၢ်လံၣ်တၢ်လီတၢ်ဖံးတၢ်မၤအပူၤသ့ၣ်တဖၣ်အံၤသဂၢၢ်ဘၣ်၀ဲတၢ်ဘံၣ်တၢ်ဘၢတၢ်မၤပျံၤမၤဖုးတကးဒံဘၣ်ကျိၣ်စ့လၢ အ၀ဲသ့ၣ်ဘၣ်ဂုၥ်ကျဲးစၢးဃု၀ဲသ့ၣ်တဖၣ်အံၤတဒိးန့ၢ်ဘၣ်၀ဲဘၣ် ဘၣ်ဆၣ်မ့မ့ၢ်ပှၤအခိၣ်သ့ၣ်လၢအဖီၣ်ပျံၤဘၣ်ဃးတၢ်ဖံးတၢ်မၤ သ့ၣ်တဖၣ်ခီန့ၣ် ဒိးန့ၢ်ဘၣ်၀ဲကျိၣ်စ့တၢ်ဟဲနုၥ်လီၤအိၣ်လၢ(ဘံၣ်လံၣ်ယၢၣ်)ညါန့ၣ်လီၤ.အဃိပှၥ်ဘျးစဲသန့လၢ အ၀ဲသ့ၣ်သူ၀ဲတဖၣ် အံၤ တၢ်ကဘၣ်မၤတံၥ်တၥ်အီၤဒီး ဒ်သိးအ၀ဲသ့ၣ်တၢ်သ့ဟံမူဒါကအိၣ်ထီၣ်အဂီၢ်န့ၣ်တၢ်ကဘၣ်ဂုၥ်ကျဲးစၢးဒ်တၢ်သ့အိၣ်အသိး လီၤ” အဂ့ၢ်န့ၣ် စံး၀ဲန့ၣ်လီၤ. လၢန့ၣ်အမဲၥ်ညါကီၢ်ပယီၤပူၤ(အီၤလါ)တၢ်လံၣ်အီၣ်လီအီၣ်ကွီၢ်မ့ၣ်လၢအဟဲအိၣ်ထီၣ်တဖၣ်အံၤဃုၥ်ဒီးကွီၢ်မ့ၣ်လၢအလီၤဂၥ်ဒီး ကွီၢ်မ့ၣ်အံၤတဖၣ် လၢ(၃)နံၣ်အတီၢ်ပူၤအမဲရကၤစ့ဒီၣ်လၣ်ဆှူ၀ဲဒၣ်အိၣ်လၢ(ဘံၣ်လံၣ်ယၢၣ်)ညါအဂ့ၢ်န့ၣ် OFAC လံၥ်တၢ်ပၥ်ဖျါ အပူၤ ပၥ်ဖျါ၀ဲန့ၣ်လီၤ. တချုးအမဲရကၤဖီၣ်ဃံးသုးခိၣ်စီၤခၠ့ၣ်သူၤဃုၥ်ဒီးအဖိခွါခံဂၤအံၤကဲထီၣ်ဒံးဘၣ်အခါဖဲအပူၤကွံၥ်(၂၀၂၄)လါအီးကထိဘၢၣ်အခါန့ၣ်စ့ၢ်ကီး သုးခိၣ်စီၤခၠ့ၣ်သူၤဃုၥ်ဒီးသုးခိၣ်စီၤတ့ၤ၀့,သုးခိၣ်စီၤမိၣ်သိၤ ၃ ဂၤအံၤ (EU)ဖီၣ်ဃံးအ၀ဲသ့ၣ်ဘၣ်ဃးလၢ(အီၤလါ)တၢ်လံၣ်အီၣ် လီအီၣ်,တၢ်မၤကၤပှၤဟီၣ်ခိၣ်ဖိ,တၢ်ခီကီၢ်ဆၢကွီၢ်မ့ၣ်လၢအိၣ်ဆီလီၤသးဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢဒီတကျိၤအံၤ ကဲထီၣ်ဒံး ၀ဲဒၣ်န့ၣ်လီၤ. ဖဲန့ၣ်အခါဘၣ်ဃး(EU)ဖီၣ်ဃံးဒီၣ်တဲၥ်၀ဲဒၣ်တၢ်အံၤတမ့ၢ်တၢ်ဂ့ၢ်ဒိၣ်ဒိၣ်မုၢ်မုၢ်ဘၣ်အဂ့ၢ်န့ၣ် (BGF)သုးဟီၣ်က၀ီၤ-၂ အခိၣ် သုးခိၣ်ကျၢၢ်ဖိ စီၤတ့ၤ၀့ စံးဘၣ်တ့ၢ်ဃၥ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ. အ၀ဲစံး၀ဲလၢ“ကၣ်စံၣ်နိၣ်,(အီၤလါ)တၢ်တၤကျိၣ်တၤစ့န့ၣ်လၢထံဒိၣ်ကီၢ်လဲၢ်န့ၣ်အိၣ်ဒီဒူၣ်.နတဲမးတလၢၤလၢၥ်ဘၣ်.တၢ်သ့ၣ်တဖၣ်...