သုးက့(၇)ထီၣ်န့ၢ်ကဒီးတညၣ်ကၠိသုးကလၢၤတၢ်လီၢ် ပယီၤသုးသံ(၁၁)ဂၤ,မၤန့ၢ်ဃုၥ်ကျိချံပှၥ်သၣ်အါအါဂီၢ်ဂီၢ်
လါမ့ၤ ၁၄ သီ, ၂၀၂၅ နံၣ်, ခ့ၣ်အဲးစံၣ် တညၣ်ကၠိဒုးယၤပယီၤသုးကလၢၤလၢအိၣ်ဆီလီၤသးဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဖၣ်အၣ်ကီၢ်ရ့ၣ်(သုးက့ ၇) တၢ်ကြဲၢ်ကီၢ်ဆၣ် အပူၤအံၤ ဖဲမဟါလါမ့ၤ ၁၃ သီ ဟါခီအဆၢကတီၢ်န့ၣ် တၢ်ထီၣ်န့ၢ်၀ဲလံဒီး ပယီၤသုးတကပၤသံ(၁၁)ဂၤအမဲၥ်ညါ တၢ်မၤန့ၢ်ဃုၥ်၀ဲ ကျိချံပှၥ်သၣ်အါအါဂီၢ်ဂီၢ်အဂ့ၢ်န့ၣ် ဂံၢ်ခီၣ်ထံးသုးပှၤဘၣ်မူဘၣ်ဒါစံး၀ဲန့ၣ်လီၤ. တညၣ်ကၠိပယီၤသုးကလၢၤအံၤစးထီၣ်ဖဲလါမ့ၤ ၇ သီအနံၤန့ၣ် တၢ်လဲၤခးစဲးပြဲး၀ဲဒီး ဖဲမဟါလါမ့ၤ ၁၃ သီ ဟါခီ ၆း၂၀ မံးနံး အဆၢကတီၢ်န့ၣ် ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးပၥ်ဖှိၣ် ထီၣ်မၤန့ၢ်၀ဲဒ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤ. တၢ်ထီၣ်န့ၢ်ပယီၤသုးကလၢၤဘျီ၀ဲအံၤပယီၤသုးသံ(၁၁)ဂၤတကးဒံးဘၣ်အမဲၥ်ညါပယီၤသုးလၢအိၣ်သုးကလၢၤပူၤတဖၣ်အံၤ ခီဖျိအ၀ဲသ့ၣ်တူၢ်၀ဲတပှဲၤလၢၤဘၣ်အဃိ စံၣ်ဖျိးထီၣ်ကွံၥ်လၢသုးကလၢၤအချၢကအိၣ်လၢအဂၤ(၂၀)ဘျဲၣ်ညါအဂ့ၢ်န့ၣ် ဂံၢ်ခီၣ်ထံးပှၤ ဟ့ၣ်တၢ်ကစီၣ်ဖိစံး၀ဲန့ၣ်လီၤ. တကးဒံးဘၣ်လၢတၢ်ထီၣ်န့ၢ်သုးကလၢၤဘျီ၀ဲအံၤအပူၤတၢ်မၤန့ၢ်၀ဲကျိဖိ,ကျိဖးဒိၣ်,ကျိချံပှၥ်သၣ်စ့ၢ်ကီးအါအါဂီၢ်ဂီၢ်အဂ့ၢ်န့ၣ် (KNLA)ပှၤဘၣ်မူဘၣ်ဒါလၢအပၣ်ဃုၥ်တဂၤစံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. အ၀ဲစံး၀ဲလၢ“ပထီၣ်န့ၢ်သုးကလၢၤတဖျၢၣ်အံၤဖဲမဟါဟါခီ ၆း၂၀ မံးနံးအခါန့ၣ်.ကျိချံပှၥ်သၣ်ဒုပမၤန့ၢ်ဒီဒူၣ်ညါ.(၁၂၀ မမ)အချံန့ၣ် ပမၤန့ၢ်ကအိၣ်လၢ(၇၀)ဘျဲၣ်ညါ. (အ့ၤခ့ၤ)အချံ,(၈၁ မမ)အချံသ့ၣ်တဖၣ်န့ၢ်ဒီဒူၣ်.ကျိမိၢ်ပှၢ်တီတီန့ၣ်ပမၤန့ၢ်ကအိၣ်လၢအခိၣ်(၃၀)လၢ န့ၣ်ညါ,ခဲအံၤပနၥ်လီၤတံၢ်တ၀ံၤဒံးဘၣ်အဃိတဲလီၤတံၢ်တဘၣ်ဒံးဘၣ်”အဂ့ၢ်န့ၣ် စံး၀ဲန့ၣ်လီၤ. တကတီၢ်ဃီပယီၤသုးကလၢၤလၢဆီလီၤသးလၢကညီဟီၣ်က၀ီၤပူၤတဖၣ်အံၤခီဖျိကဲထီၣ်တၢ်နိးတၢ်ဘျးလၢကမျၢၢ်ထံဖိကီၢ်ဖိ အဂီၢ်အဖီခိၣ် တၢ်ရဲၣ်တၢ်ကျဲၤအိၣ်လၢတၢ်ကဆဲးမၤပျီဆှဲကွံၥ်၀ဲအဂ့ၢ်န့ၣ် (KNLA)ပှၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲ န့ၣ်လီၤ. “လၢပကီၢ်စဲၣ်ပူၤ,ပသုးက့ပူၤ,ပဟီၣ်က၀ီၤပူၤဒုဒုၣ်ဒါလၢအအိၣ်တဖၣ်န့ၣ်တသ့ဖဲအသ့ပကဆှဲမၤပျီက့ၤတုၤလၢအလၢၥ်လီၤ. ပတအဲၣ်ဒိးပၥ်လၢပဟီၣ်က၀ီၤပူၤလၢၤဘၣ်,ဘၣ်မနုၤလဲၣ်န့ၣ်အ၀ဲသ့ၣ်န့ၣ်လၢပဂီၢ်န့ၣ်ကဲထီၣ်တၢ်တံၥ်တၥ်,တၢ်လဲၤတၢ်က့ၤစ့ၢ်ကီး တဘျ့တဆှီဘၣ်အဖီခိၣ်န့ၣ်ပတၢ်ပၥ်သးအိၣ်လၢပကမၤပျီက့ၤတုၤအလၢၤလီၤမီၤနီၤ”အဂ့ၢ်န့ၣ် စံး၀ဲန့ၣ်လီၤ. ဒ်လီၢ်က၀ီၤပှၤဘၣ်မူဘၣ်ဒါစံး၀ဲအသိးန့ၣ် တၢ်ထီၣ်ပယီၤသုးကလၢၤဘျီ၀ဲအံၤပယီၤသုးသံအမဲညါမ့မ့ၢ်(KNLA)တကပၤန့ၣ် ဘၣ်ဟ့ၣ်လီၤကွံၥ်အသးသမူလၢထံကီၢ်ဒီးပှၤကလုၥ်အဂီၢ်(၁)ဂၤန့ၣ်လီၤ. တၢ်ထီၣ်န့ၢ်တညၣ်ကၠိပယီၤသုးကလၢၤဖဲမဟါ၀ံၤလီၢ်ခံမုၢ်ဆ့ၣ်ထီၣ်တနံၤအံၤလါမ့ၤ ၁၄ သီ...
ကဘီယူၤဒီးကျိဖးဒိၣ်အဃိ ကၠဲးထိၣ်ကီၢ်ဆၣ်ပူၤ ကရူၢ်(၃)ဘ့ၣ်ကမျၢၢ်ဘၣ်ဃ့ၢ်ထီၣ်
လါမ့ၤ ၁၃ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ခီဖျိကဘီယူၤဒီးကျိဖးဒိၣ်အဃိ ကရူၢ်(၃)ဘ့ၣ်ပူၤကမျၢၢ်တဖၣ်အါဒၣ်တက့ၢ်ဘၣ်ဃ့ၢ်ထီၣ်ဟးပလဲၥ်သးလၢတၢ်ဘံၣ်တၢ်ဘၢလီၢ်အဂ့ၢ်န့ၣ် ကီၢ်ရ့ၣ်ခိၣ် ပဒိၣ်စီၤစိမၠ့ၣ် စံး၀ဲန့ၣ်လီၤ. ၀ီၢ်က့ကရူၢ်,ခရၢၢ်ကရူၢ်ဒီးအလူကရူၢ် ကရူၢ်(၃)ဘ့ၣ်အံၤ စးထီၣ်ဖဲလါအ့ဖြ့ၣ်ဘူးကလၢၤတုၤလၢတလါအံၤလါမ့ၤ ၁၂ သီအနံၤန့ၣ် ခီဖျိပယီၤသုးခးလီၤကျိ ဖးဒိၣ်,ကဘီယူၤစ့ၢ်ကီး လဲၤတ့ၢ်လီၤမ့ၣ်ပိၢ်တလီၢ်လီၢ်အဃိ ကမျၢၢ်သံဘၣ်ဒိဘၣ်ထံးအမဲၥ်ညါ ဟံၣ်အူအီၣ် ဟးဂီၤကဲထီၣ်၀ဲ အဂ့ၢ်န့ၣ် သ့ၣ်ညါဘၣ်န့ၣ်လီၤ. လၢတၢ်န့ၣ်အဃိကရူၢ်(၃)ဘ့ၣ်အံၤအပူၤကမျၢၢ်တဖၣ်ပျံၤတၢ်အိၣ်လၢသ၀ီပူၤတဘူၣ်လၢၤဘၣ်ဃ့ၢ်ထီၣ်လဲၤဟးအိၣ်၀ဲလၢ ၀့ၢ်ပူၤတနီၤဒီးတနီၤန့ၣ်လဲၤစံၣ်အိၣ်၀ဲလၢမံၤခိၣ်ပှၢ်ကျါအဂ့ၢ်န့ၣ် ဒူသထူၣ်ကီၢ်ရ့ၣ်ခိၣ် ပဒိၣ်စီၤစိမၠ့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ. “ပှၤဃ့ၢ်ထီၣ်န့ၣ်မ့ၢ်၀ဲဒၣ်အလူကရူၢ်,ခရၢၢ်ကရူၢ်,၀ီၢ်က့ကရူၢ်တဖၣ်လီၤ.မ့မ့ၢ်လၢခရၢၢ်ကရူၢ်ဒီး၀ီၢ်က့ကရူၢ်န့ၣ်အိၣ်ဘူး၀ဲဒီး(သုးက့ ၃) အဆၢ (၅၉၈)သုးကလၢၤအဃိပယီၤသုးခးလီၤကျိဖးဒိၣ်,ကဘီယူၤဟဲတ့ၢ်လီၤမ့ၣ်ပိၢ်မၢ်မၢ်လီၤ.မ့မ့ၢ်လၢကရူၢ်ခံဘ့ၣ်အံၤဒု ပှၤကမျၢၢ်ဃ့ၢ်ခဲလၢၥ်လီၤ.တနီၤလၢအဘူးဒီးခူ၀့ၢ်ညါစံၣ်လီၤလၢခူ၀့ၢ်,တနီၤခီစံၣ်အိၣ်လၢမံၤခိၣ်ပှၢ်လၢ်ကျါ,လၢတီၤလၢဒဲဒ်န့ၣ်လီၤ” အဂ့ၢ်န့ၣ် စံး၀ဲန့ၣ်လီၤ. တကတီၢ်ဃီကမျၢၢ်လၢအဃ့ၢ်ထီၣ်တဖၣ်အကျါလီၤဆီဒၣ်တၢ်မ့မ့ၢ်လၢ၀ီၢ်က့ကရူၢ်ဒီးခရၢၢ်ကရူၢ်အံၤအိၣ်ဘူး၀ဲဒီး ချၢၣ်လွံၢ်ထူၣ် ကီၢ်ရ့ၣ်(သုးက့ ၃) ခီၣ်ချ့သုးရ့ၣ်(ခမရ-၅၉၈)ပယီၤသုးကလၢၤလၢအပူၤကွံၥ်လါမ့ၤ ၈ သီလၢတၢ်ပၢၢ်ဆၢထီၣ်န့ၢ် ပယီၤသုးက့ၤဆ့ၣ် နီၤကဒါ၀ဲခဲအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ. ဒူသထူၣ်ကီၢ်ရ့ၣ်လီၤဆီဒၣ်တၢ်ကၠဲးထိၣ်ကီၢ်ဆၣ်အပူၤအံၤ တၢ်ဒုးကဲထီၣ်တအိၣ်၀ဲဘၣ်ဆၣ်စးထီးဖဲလါအ့ဖြ့ၣ်ဘူးကလၢၤ တုၤလၢခဲအံၤန့ၣ် ထံၣ်ဘၣ်လၢပယီၤသုးသူ၀ဲကျိဖးဒိၣ်,ကဘီယူၤဟးတ့ၢ်လီၤတၢ်လၢဒူသ၀ီကမျၢၢ်အိၣ်ဆိးလီၢ်လိၤလိၤဟဲအါထီၣ် ၀ဲဒၣ်ဖျိဖျိဖျါဖျါန့ၣ်လီၤ. သုးကီၣ်ကးအံၤလၢကဆီၣ်ထွဲမၤစၢၤဟီၣ်ခိၣ်ဟူးပှၤဘၣ်ကီဘၣ်ခဲဖိအဂီၢ်သၢဘျီတဘျီဖဲလါမ့ၤ ၆ သီအနံၤန့ၣ် ဘိးဘၣ်ရၤလီၤကဒီး ၀ဲလၢကပတုၥ်တၢ်ခးတုၤလၢလါလၢၥ်အိၣ်၀ဲဘၣ်ဆၣ် တုၤလၢခဲအံၤခးလီၤကျိဖးဒိၣ်, ခးလီၤတၢ်ဒီးကဘီယူၤ အိၣ်၀ဲတပယူၥ်ဃီလၢ အအိၣ်ဒီးတၢ်ပညိၣ်လိၤလိၤအဂ့ၢ်န့ၣ် ကီၢ်ရ့ၣ်ခိၣ်...
မူကီၢ်ဆၣ်ပယီၤသုး(ခမရ-၄၃၉)သုးရ့ၣ် အပှၤသုးဖိတဂၤဟဲက့ၤဟ့ၣ်လီၤသးဃုၥ်ဒီးတၢ်စုကဝဲၤ
လါမၤ ၁၃ သီ, ၂၀၂၅ နံၣ်, ခ့ၣ်အဲးစံၣ် ချၢၣ်လွံၢ်ထူၣ်ကီၢ်ရ့ၣ်,မူကီၢ်ဆၣ်ဟီၣ်ကဝီၤအပူၤ ဖဲအပူၤကွံၥ်လါမ့ၤ(၅)သီအနံၤန့ၣ် ပယီၤသုးလၢအမ့ၢ်ခီၣ်ချ့သုးရ့ၣ် (ခမရ-၄၃၉)သုးရ့ၣ်အပှၤသုးဖိတဂၤဟဲက့ၤဟ့ၣ်လီၤအသးဖဲကညီဒီကလုၥ်တၢ်ထူၣ်ဖျဲးသုးမုၢ်ဒိၣ်( KNLA )သုးရ့ၣ်နီၣ်ဂံၢ်(၈)အစုပူၤဒီးဟဲက့ၤ ဟ့ၣ်လီၤအသးဃုၥ်ဒီးတၢ်စုကဝဲၤအဂ့ၢ်ခ့ၣ်အဲၣ်ယူၣ်ထုးထီၣ်ပၥ်ဖျါဝဲဖဲမဟါအံၤန့ၣ်လီၤ. ပယီၤသုးဖိလၢအဟဲက့ၤဟ့ၣ်လီၤအသးတဂၤအံၤမ့ၢ်ဝဲ(ကိၤသဲးအီၣ်)ကိး(ကိၤသဲး),လၢအဟဲလီၤဘၣ် မူဒါဖဲပယီၤသုးခီၣ်ချ့သုးရ့ၣ်(ခမရ-၄၃၉)သုးရ့ၣ်လၢအအိၣ်ဖဲ(ပၠၣ်ဒါ)သုးကလၢၤအပူၤအံၤန့ၣ်လီၤ. အ၀ဲဟဲက့ၤဟ့ၣ်လီၤဝဲအသးဃုၥ်ဒီးတၢ်စုက ဝဲၤ MA-11 ကျိ ၁ ခိၣ်, ကျိဆၣ်ဒၢ ၃ ဘ့ၣ်, ဒီး ကျိချံ အဖျၢၣ် ၁၀၀ အဂ့ၢ်ဒ်တၢ်လံၥ်တၢ်ပၥ်ဖျါအပူၤအသိးသ့ၣ်ညါဘၣ်န့ၣ်လီၤ. သုးဖိ(ကိၤသဲး)အံၤတချုးဒံးလၢတၢ်ဆှၢအီၤဖဲ(ခမရ-၄၃၉)သုးရ့ၣ်အပူၤဒံးဘၣ်အခါန့ၣ်အဝဲမ့ၢ်ဝဲပှၤနီ(YBS)သိလ့ၣ်ဖိတဂၤဒီး ပယီၤသုးကီၣ်ကးဖီၣ်န့ၢ်ဆူၣ်,မၢန့ၢ်ဆူၣ်ဝဲအီၤလၢတၢ်ဘၣ်ကဲသုးအံၤလၢအနီၢ်ကစၢ်သးတဆူၣ်ကဲသုးဘၣ်န့ၣ်လီၤ. အဝဲတၢ်ဟဲက့ၤဟ့ၣ်လီၤသးဖဲ( -- )သုးရ့ၣ်(၈)အစုပူၤအံၤန့ၣ် မူကီၢ်ဆၣ်သုးရ့ၣ်(၈)ဟ့ၣ်လၤကပီၤဝဲစ့ပယီၤအကလီၢ်(၁၀)ကၠးအဂ့ၢ်ပၥ်ဖျါဝဲဒၣ်စ့ၢ်ကီးန့ၣ်လီၤ. ခ့ၣ်အဲၣ်ယူၣ်-ကီၢ်သူလ့ၤတၢ်ပၢဟီၣ်ကဝီၤအပူၤပယီၤသုးဖိလၢဟဲက့ၤဟ့ၣ်လီၤအသးလၢ(KNLA)သုးရ့အအိၣ်မ့ၢ်ဂ့ၤ,(KNDO)သုး ရ့ၣ်အအိၣ်သ့ၣ်တဖၣ်အါဒၣ်တက့ၢ်န့ၣ်မ့ၢ်ဝဲပယီၤသုးကီၣ်ကးဖီၣ်ဆူၣ်,မၢဆူၣ်ကဲသုးလၢအတဖိးသဲစးန့ၣ်လီၤ. လၢတၢ်န့ၣ်အဃိကညီတၢ်ပၢၢ်ဆၢသုးကရူၢ်အိၣ်မ့ၢ်ဂ့ၤ,လၢကမျၢၢ်တၢ်ဒီသဒၢသုးကရူၢ်(PDF)အိၣ်တကပၤမ့ၢ်ဂ့ၤ တၢ်အိးထီၣ်န့ၢ်ဝဲကျဲလၢကဟဲက့ၤဟ့ၣ်လီၤသးအဂီၢ်အဂ့ၢ် ပၥ်ဖျါဝဲန့ၣ်လီၤ. ဒ်န့ၣ်အသိးချၢၣ်လွံၢ်ထူၣ်ကီၢ်ရ့ၣ်ဟီၣ်ကဝီၤအပူၤစးထီၣ်လၢ(၂၀၂၅)နံၣ်ထီၣ်ဒီးတုၤလီၤလၢတကီၢ်ခါအခဲအံၤန့ၣ်ပယီၤသုးဟဲက့ၤဟ့ၣ်လီၤသးဖဲ(KNLA)သုးရ့ၣ်(၈)ဒီးသုးရ့ၣ်(၉)အစုပူၤအံၤခဲလၢၥ်အိၣ်ဝဲ(၁၀)ဂၤလံန့ၣ်လီၤ. ပှၤလၢအဟဲဟ့ၣ်လီၤသးသ့ၣ်တဖၣ်အံၤအါဒၣ်တက့ၢ်န့ၣ်သုးကီၣ်ကးဖီၣ်န့ၢ်ဆူၣ်အဝဲသ့ၣ်ဆှၢထီၣ်ဝဲဆူတၢ်မဲၥ်ညါဝံၤဃ့ၢ်ပူၤဖျဲးထီၣ်သးဟဲက့ၤဟ့ၣ်လီၤအသးလၢတၢ်ပၢၢ်ဆၢသုးကရူၢ်အအိၣ်ဒ်အံၤလီၤအဂ့ၢ် လီၢ်ကဝီၤအပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
ကၠိဖိဒီးကၠိသရၣ်ဘၣ်သံအဂၤ(၂၀)ဘျဲၣ်တၢ်ကဲထီၣ်သးအံၤ ပှၤလၢပၣ်ဃုၥ်တဖၣ်တၢ်ဘၣ်ဟံးအရ့တုၤလီၤတီၤလီၤအဂ့ၢ်(NUG)စံးဝဲ
လါမ့ၤ ၁၃ သီ, ၂၀၂၅ နံၣ်, ခ့ၣ်အဲးစံၣ် ဖဲမဟါလါမ့ၤ(၁၂)သီအနံၤ, ဂီၤခီ(၁၀)နၣ်ရံၣ်ဃၣ်ဃၣ်အဆၢကတီၢ် လၢစကဲကီၢ်ခီ, ဒံၤပဲယ့ၤကီၢ်ဆၣ်, ဖဲ(အိတ့ၤတွ့)သဝီတၢ်မၤလိ ကၠိအပူၤန့ၣ်မ့ၢ်လၢပယီၤသုးကီၣ်ကးအဘီယူၤဟဲကွံၥ်လီၤဝဲမ့ၣ်ပိၢ်အဃိ ကၠိသရၣ်မုၣ်(၂)ဂၤဒီးပှၤကၠိဖိဖိသၣ်အဂၤ(၂၀)ဘၣ်သံကွံၥ် ဝဲတဘျီဃီဖဲတၢ်ကဲထီၣ်သးအလီၢ်ဒီးပှၤအဂၤ(၄၀)ဘျဲၣ်ဘၣ်ဒိဝဲဒၣ်န့ၣ်လီၤ. လၢတၢ်န့ၣ်အဃိ သုးကီၣ်ကးအကဘီယူၤတၢ်ဟဲကွံၥ်လီၤမ့ၣ်ပိၢ်တဘျီအံၤအပူၤ ပှၤလၢဟ့ၣ်လီၤတၢ်ကလုၢ်တဆီမ့ၢ်ဂ့ၤ, ပှၤလၢဟဲ မၤကမၣ်တၢ်လၢအစုမ့ၢ်ဂ့ၤဒီးပှၤလၢပၣ်ဃုၥ်ပၣ်ဂီၢ်ခဲလၢၥ်သ့ၣ်တဖၣ် တၢ်ဘၣ်ဟံးန့ၢ်အဝဲသ့ၣ်အရ့ဒီးဟ့ၣ်အဝဲသ့ၣ်တၢ်ကမၣ်တုၤလီၤ တီၤလီၤအဂ့ၢ် ဒီကလုၥ်တၢ်ဃူတၢ်ဖိးအပဒိၣ်(NUG)အတၢ်ကူၣ်ဘၣ်ကူၣ်သ့ကိတိၥ်ဝဲၤကျိၤထုးထီၣ်ပၥ်ဖျါဝဲဖဲတနံၤအံၤလါမ့ၤ(၁၃)သီ အနံၤန့ၣ်လီၤ. ဒ်န့ၣ်အသိးပှၤလၢပၣ်ဃုၥ်မၤကမၣ်တၢ်သ့ၣ်တဖၣ်အံၤလၢတၢ်ဂ့ၢ်တမံၤဂ့ၤတမံၤဂ့ၤအဃိတၢ်ပျဲပူၤတၢ်ကမၣ်အိၣ်တသ့ဘၣ်အမဲၥ်ညါဒ်သိးတၢ်ကဟ့ၣ်တၢ်ကမၣ်လၢအတုၤလီၤတီၤလီၤကန့ၢ်အဂီၢ်တၢ်မၤဝဲတၢ်ဃိထံၣ်ဃုသ့ၣ်ညါတၢ်တပယူၥ်ဃီအဂ့ၢ်သ့ၣ်ညါဘၣ်ဒ်တၢ်ပၥ်ဖျါပူၤအသိးန့ၣ်လီၤ. ဘၣ်ဆၣ်မ့မ့ၢ်လၢသုးကီၣ်ကးတကပၤဘၣ်ထွဲဒီးကလံၤကျါကဘီယူၤဟဲကွံၥ်လီၤမ့ၣ်ပိၢ်ဒီးဘၣ်သံဝဲကၠိဖိ,ကၠိသရၣ်မုၣ်တၢ်ကဲထီၣ်အသးအံၤန့ၣ်သုးကီၣ်ကးတၢ်ကစီၣ်သန့တကပၤပၥ်ဖျါဝဲလၢတၢ်အံၤမ့ၢ်ဝဲဒၣ်တၢ်ကစီၣ်သန့သ့ၣ်တဖၣ်ကွဲးဘိးဘၣ်ရၤလီၤဝဲတၢ်ကစီၣ်လၢအကမၣ်, အတမ့ၢ်အတတီအဂ့ၢ်န့ၣ်လီၤ. လၢန့ၣ်အမဲၥ်ညါ(NUG)ဃ့ထီၣ်ဝဲထံဂုၤကီၢ်ဂၤသ့ၣ်တဖၣ်စ့ၢ်ကီးလၢကတြီတံၥ်ဟံးန့ၢ်အရ့ဒီးကဆီၣ်သနံးဘၣ်ဝဲသုးကီၣ်ကးအံၤအသိး ဒီးကဆီၣ်ထွဲဒုးအိၣ်ထီၣ်န့ၢ်ဘၣ်ဝဲတၢ်ဘံၣ်တၢ်ဘၢလၢကၠိဖိကမၤလိဘၣ်တၢ်ကူၣ်ဘၣ်ကူၣ်သ့အဂီၢ်ဒီးတၢ်မၤလိကၠိတၢ်သူၣ်ထီၣ် သ့ၣ်တဖၣ်အဂီၢ်အဂ့ၢ်(NUG)အလံၥ်ထုးထီၣ်ဘိးဘၣ်ရၤလီၤအပူၤပၥ်ဖျါစ့ၢ်ကီးဝဲန့ၣ်လီၤ. ဘၣ်ထွဲစ့ၢ်ကီးဒီး(အိတ့ၤတွ့)သဝီတၢ်မၤလိကၠိတၢ်ကဲထီၣ်အသးအံၤန့ၣ်တၢ်သ့ၣ်ညါဘၣ်လၢတၢ်ဒုးတၢ်ယၤကဲထီၣ်အသးတအိၣ်ဘၣ်ဒီး ဘၣ်ဖဲပှၤကၠိဖိသ့ၣ်တဖၣ်အိၣ်ကတီၤအသးလၢကနုၥ်လီၤတၢ်ဒိးစဲးအဆၢကတီၢ်န့ၣ်လီၤ. ခီဖျိပယီၤသုးကီၣ်ကး(Jet Fighter) ကဘီယူၤ တဘ့ၣ်ဟဲကွံၥ်လီၤဝဲမ့ၣ်ပိၢ်အဃိကၠိသရၣ်မုၣ်သ့ၣ်တဖၣ်ဃုၥ်ဒီးပှၤကၠိဖိလၢ(Grade-2)တုၤလီၤလၢ(Grade-11)ဘၣ်သံ ကွံၥ်ဝဲခဲလၢၥ်(၂၂)ဂၤအဂ့ၢ်ဒ်ပှၤဂ့ၢ်ဝီခွဲးယၥ်ကိတိၥ်ဝဲၤကျိၤအလံၥ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ.
ကီၢ်ဆၣ်ခံဘ့ၣ်တလါအတီၢ်ပူၤ ပယီၤသုးခးလီၤတၢ်ဒီးကျိဖးဒိၣ်,ကဘီယူၤ(၁၄)ဘျီ ကမျၢၢ်သံ(၃)ဂၤ,ဘၣ်ဒိ(၁၁)ဂၤ
လါမ့ၤ ၁၂ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကီၢ်ဆၣ်ခံဘ့ၣ် လါအ့ဖြ့ၣ်တလါအတီၢ်ပူၤ ပယီၤသုးခးလီၤကျိ ဖးဒိၣ်ဒီးကဘီယူၤလဲၤတ့ၢ်လီၤမ့ၣ်ပိၢ်ခဲလၢၥ်(၁၄)ဘျီအဃိ လီၢ်က၀ီၤကမျၢၢ်သံ(၃)ဂၤ,ဘၣ်ဒိ(၁၁)ဂၤအဂ့ၢ်န့ၣ် သ့ၣ်ညါဘၣ်လၢ ကီၢ်ရ့ၣ် တၢ်မၤနီၣ်စရီအပူၤန့ၣ်လီၤ. ကၠဲးထိၣ်ဒီးဘံလ့ကီၢ်ဆၣ်အပူၤ လါအ့ဖြ့ၣ် ၁ သီတုၤ ၃၀ သီ လၢတလါအတီၢ်ပူၤ ပယီၤသုးခးလီၤကျိဖးဒိၣ်(၁၁)ဘျီ,ကဘီယူၤလဲၤ တ့ၢ်လီၤမ့ၣ်ပိၢ်(၃)ဘျီ ခဲလၢၥ်(၁၄)ဘျီအဃိ ကမျၢၢ်ဘၣ်ဒိ(၁၄)ဂၤအံၤအကျါပၣ်ဃုၥ်၀ဲတပွဲဖိ(၁)ပါဒီး ဘၣ်ဒိ(၁၁)ဂၤအကျါစ့ၢ်ကီးပၣ် ဃုၥ်၀ဲသီခါ(၃)ပါအဂ့ၢ်န့ၣ် တလါတဘျီလံၥ်တၢ်မၤနီၣ်ပူၤပၥ်ဖျါ၀ဲန့ၣ်လီၤ. တကးဒံးဘၣ်ခီဖျိလၢကဘီယူၤဒီးကျိဖးဒိၣ်အံၤအဃိ လီၢ်က၀ီၤကမျၢၢ်အဟံၣ်,သီခါဖၠၣ်တၢ်သူၣ်ထီၣ်,အရီဘၢၣ်ထူၣ်ဃုၥ်ဒီးတၢ်ထူၣ် တၢ်ဘိလၢအဂၤစ့ၢ်ကီးဟးဂီၤဘၣ်ဒိဘၣ်ထံး၀ဲဒၣ်အါမးန့ၣ်လီၤ. ဒ်န့ၣ်အသိးလၢတလါအတီၢ်ပူၤ ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးပၥ်ဖှိၣ်ဒီးပယီၤသုးအဘၢၣ်စၢၤ ဒုးယၤတၢ်ဖ့ၣ်စၢကဲထီၣ်၀ဲ(၁၃)ဘျီအဃိ ပယီၤသုးတကပၤသံ၀ဲ(၁၃)ဂၤဒီးဘၣ်ဒိ(၈)ဂၤအသိး မ့မ့ၢ်လၢတၢ်ပၢၢ်ဆၢသုးပၥ်ဖှိၣ်ကရူၢ် တကပၤခီန့ၣ် ဘၣ်ဟ့ၣ်လီၤကွံၥ်အသးသမူ(၁)ဂၤ,ဘၣ်ဒိစ့ၢ်ကီး(၁)ဂၤအဂ့ၢ်န့ၣ် တၢ်မၤနီၣ်စရီပူၤအသိး သ့ၣ်ညါဘၣ်န့ၣ်လီၤ. ပယီၤသုးအံၤ စးထီၣ်ဖဲလါအ့ဖြ့ၣ် ၂၃ သီအနံၤန့ၣ် တၢ်ဒုးကဲထီၣ်တအိၣ်ပညိၣ်ခးလီၤ၀ဲကျိဖးဒိၣ်န့ၣ်အမဲၥ်ညါ ကဘီယူၤစ့ၢ်ကီး လဲၤတ့ၢ်လီၤ၀ဲမ့ၣ်ပိၢ်လၢကၠဲးထိၣ်ကီၢ်ဆၣ် ဒူသ၀ီတဖၣ်အပူၤတပယူၥ်ဃီ အဖီခိၣ်ကမျၢၢ်တဖၣ်ဘၣ်အိၣ်လၢ တၢ်ဘၣ်ယိၣ်လဲၤ က့ၤဖံးမၤတၢ်တသ့လၢၤဘၣ်သဂၢၢ်ဘၣ်၀ဲတၢ်လုၢ်အီၣ်နီၢ်ခိသးသမူတၢ်ဂ့ၢ်ကီ အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ. လၢန့ၣ်အမဲၥ်ညါဖဲလါမ့ၤ ၁၀ သီအနံၤစ့ၢ်ကီး တၢ်ဒုကဲထီၣ်တအိၣ်ပယီၤသုးခးလီၤကျိဖးဒိၣ်ဒီးကဘီယူၤစ့ၢ်ကီးလဲၤတ့ၢ်လီၤ မ့ၣ်ပိၢ်အဃိ ကရၣ်၀့ဆ့ၣ်သ၀ီဖိသံ(၁)ဂၤဒီး ၀ီၢ်က့သ၀ီဖိဘၣ်ဒိ(၂)ဂၤ,ဟံၣ်အူအီၣ်(၄)ဖျၢၣ်အသိး...
(ကတၢတံး)ပယီၤသုးလၢဂုၤလီၤအခံဖဲ(BGF ၁၀၁၃)သုးရ့ၣ်တၢ်လီၢ်တဖၣ်အပှၤဟဲတ့ၢ်လီၤန့ၢ်ဝဲတၢ်အီၣ်ဒီးကျိချံပှၥ်သၣ်
လါမ့ၤ ၁၂ သီ, ၂၀၂၅ နံၣ်, ခ့ၣ်အဲးစံၣ် မုၢ်ြတီၢ်ကီၢ်ရ့ၣ်,ဒွဲၣ်လိကီၢ်ဆၣ်ဟီၣ်ကဝီၤအပူၤ ပယီၤသုးလၢအိၣ်(ကတၢတံး)ဒီးဂုၤလီၤက့ၤအခံဖဲ သုးခိးကီၢ်ဆၢ(BGF ၁၀၁၃)သုး ရ့ၣ်တၢ်လီၢ်သ့ၣ်တဖၣ်န့ၣ် အခဲအံၤတၢ်ဘၣ်ဟဲဆှၢန့ၢ်အဝဲသ့ၣ်တၢ်အီၣ်ဒီး ကျိချံပှၥ်သၣ် လၢကလံၤကျါကဘီယူၤတဆီအဂ့ၢ်ကီၢ်ရ့ၣ် အ ပှၤဘၣ်မူဘၣ်ဒါစံးဝဲန့ၣ်လီၤ. (ကတၢတံး)ပယီၤသုးအံၤစးထီၣ်ဖဲဂုၤလီၤက့ၤအခံဖဲ(BGF ၁၀၁၃)တၢ်လီၢ်ဝံၤအလီၢ်ခံဘၣ်တၢ်ကဝီၤဃၥ်ဒီးတၢ်ဒီၣ်တဲၥ်ကွံၥ်ဝဲအဝဲ သ့ၣ်တၢ်လဲၤတၢ်က့ၤကျဲလၢထးခီတကပၤမ့ၢ်ဂ့ၤ,လၢလၥ်ခီတကပၤမ့ၢ်ဂ့ၤအဃိ ပယီၤသုးသ့ၣ်တဖၣ်အံၤ တၢ်ဘၣ်ဟဲတ့ၢ်လီၤန့ၢ်က့ၤ အဝဲသ့ၣ်တၢ်အီၣ်တၢ်အီ, ကသံၣ်ကသီ ဒီးကျိချံပှၥ်သၣ်သ့ၣ်တဖၣ်လၢကလံၤကျါကဘီယူၤတကပၤအဂ့ၢ် မုၢ်ြတီၢ်ကီၢ်ရ့ၣ်အပှၤက တိၤတၢ်ပၢသုးခိၣ်ဒိၣ်ဂီၢ်ဂ့ၢ်စီၤကျၢၢ်ဒိၣ်စံးဝဲန့ၣ်လီၤ. "ဖဲလၢ(ကတၢတံး)ပယီၤသုးဂုၤက့ၤအခံဖဲ(BGF ၁၀၁၃)တၢ်လီၢ်န့ၣ်အိၣ်ဂၢၢ်ဖဲန့ၣ်လီၤ. အဝဲသ့ၣ်တသုးလီၢ်သုးကျဲနီတပူၤဒံးဘၣ်. နါက့န့ၣ်ပှၤပံး ဃၥ်တံၢ်အကျဲလၢလၥ်ခီဒီးထးခီခံကပၤလၢၤအဃိအပှၤခီၣ်သုးဟဲထီၣ်လူၤဝဲတန့ၢ်ဘၣ်ဒီးဟဲဆှၢထီၣ်ဝဲတၢ်တန့ၢ်ဘၣ်. အခိၣ်အနၢ် လၢတၢ်ဖီခိၣ်ဟဲတ့ၢ်လီၤန့ၢ်ဝဲဒီးကဘီၤယူၤခဲလၢၥ်လီၤ. ဘၣ်ဃးတၢ်အီၣ်,ကသံၣ်ကသီ,ကျိချံပှၥ်သၣ်ဟဲတ့ၢ်လီၤဝဲလၢ ကဘီယူၤခဲ လၢၥ်လီၤ. " အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါဖဲပူၤကွံၥ်စှၤသီအတီၢ်ပူၤန့ၣ် ပယီၤသုးကီၣ်ကးအပှၤလၢအိၣ်(ကမးမိၣ်)သ့ၣ်တဖၣ်စ့ၢ်ကီးလၢကဟဲထီၣ်မၤပှဲၤအ သုးဂံၢ်ဘါဆူ(ကတၢတံး)ပယီၤသုးလၢအအိၣ်ဖဲ(BGF ၁၀၁၃)သ့ၣ်တဖၣ်အအိၣ်အဂီၢ်ဟဲထီၣ်ဝဲတဖျိးဘၣ်န့ၣ်လီၤ. မ့ၢ်လၢကညီဒီက လုၥ်တၢ်ထူၣ်ဖျဲးသုးမုၢ်ဒိၣ်သ့ၣ်တဖၣ်အိၣ်ခိးခးဝဲပယီၤသုးအံၤလၢတၢ်ဘၢၣ်စၢၤအဃိပယီၤသုးအိၣ်ဂၢၢ်ကွံၥ်ဝဲဒၣ်ဖဲ(လၢၢ်ကွဲလၥ်)တၢ် လီၢ်ပူၤအဂ့ၢ်ကီၢ်ရ့ၣ်အပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ. ဒ်န့ၣ်အသိး(ကတၢတံး)ပယီၤသုးကလၢၤအံၤဖဲအပူၤကွံၥ်လါယနူၤအါရံၤ(၂၃)သီအနံၤန့ၣ်(KNLA)ဃုၥ်ဒီးတၢ်ပၢၢ်ဆၢသုးကရူၢ်ထီၣ်န့ၢ်၀ဲလံဘၣ်ဆၣ်သုးကလၢၤအပူၤပယီၤသုးသ့ၣ်တဖၣ်အံၤက့ၤထုးဖှိၣ်လီၤအသးဒီးသုးခိးကီၢ်ဆၢ(၁၀၁၃)သုးရ့ၣ်တၢ်လီၢ်အံၤအဂ့ၢ်သ့ၣ်ညါဘၣ်န့ၣ်လီၤ.
ခမရ-၅၉၈ သုးရ့ၣ်သုးကလၢၤ လၢတၢ်ပၢၢ်ဆၢသုးထီၣ်မၤန့ၢ်အံၤ ပယီၤသုးဟဲက့ၤဆ့ၣ်နီၤက့ၤ
လါမ့ၤ ၁၂ သီ, ၂၀၂၅ နံၣ်, ခ့ၣ်အဲးစံၣ် ချၢၣ်လွံၢ်ထူၣ်ကီၢ်ရ့ၣ်/သုးက့-၃, ဆီထံးကီၢ်ဆၣ်ဟီၣ်ကဝီၤအပူၤ ပယီၤသုးခီၣ်ချ့သုးရ့ၣ်(ခမရ ၅၉၈)သုးကလၢၤလၢကညီဒီကလုၥ် တၢ်ထူၣ်ဖျဲးသုးမုၢ်ဒိၣ် KNLA ဒီး တၢ်ပၢၢ်ဆၢသုးထီၣ်မၤန့ၢ်ကွံၥ်ဝဲအံၤဖဲမဟါလါမ့ၤ(၁၁)သီအနံၤန့ၣ်ပယီၤသုးဟဲက့ ဆ့ၣ်နီၤအိၣ်က့ၤ ဝဲလံအဂ့ၢ်န့ၣ်လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ. ဖဲအပူၤကွံၥ်လါမ့ၤ(၈)သီအနံၤတၢ်ထီၣ်မၤန့ၢ်ကွံၥ်ဝဲပယီၤသုး(ခမရ-၅၉၈)ကလၢၤအံၤဝံၤအလီၢ်ခံပယီၤသုးအံၤလၢကဟဲထီၣ်မၤန့ၢ် က့ၤဝဲသုးကလၢၤအံၤအဂီၢ်သူနၢၤဝဲလၢကျိဖးဒိၣ်,မၤဝဲကလံၤကျါကဘီယူၤတၢ်ခးလီၤတၢ်တပယူၥ်ဃီအဃိတၢ်ပၢၢ်ဆၢသုးတကပၤဘၣ်ဂုၤက့ၤအခံအဂ့ၢ်ဆီထံးကီၢ်ဆၣ်အပှၤဘၣ်မူဘၣ်ဒါစံးဝဲဒ်အံၤန့ၣ်လီၤ. "ပယီၤသုးအံၤခးနၢၤဝဲဒၣ်လၢကျိဖးဒိၣ်ဒီးတကးဒံးဘၣ်လၢကဘီယူၤအဃိတၢ်လဲၤထီၣ်မၤန့ၢ်နါက့နဆ့ၣ်နီၤတချုးဘၣ်. နဆ့ၣ်နီၤမ့ၢ် ချုးနါက့နကဲထီၣ်လၢကျိဖးဒိၣ်ဆၣ်ဒီးကဘီယူၤဆၣ်လီၤ. သုးကလၢၤန့ၣ်တၢ်ထီၣ်အီၤန့ၢ်ဘၣ်ဆၣ်ပယီၤသုးဟဲက့ၤမၤနၢၤလၢကျိဖး ဒိၣ်ဒီးကဘီယၤအဃိတၢ်ဂုၤက့ၤန့ၢ်အီၤမီၤနီၤ. အခဲအံၤအဝဲသ့ၣ်ဟဲက့ၤဆ့ၣ်နီၤကဒါက့ၤဝဲလီၤ. " အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီ တၢ်ကစီၣ်န့ၣ်လီၤ. ပယီၤသုးလၢဟဲထီၣ်ဆ့ၣ်နီၤက့ၤဝဲဖဲ(ခမရ-၅၉၈)သုးရ့ၣ်သုးကလၢၤအပူၤသ့ၣ်တဖၣ်အံၤအိၣ်ဟဲန့ၢ်ဝဲဒၣ်လၢ(မၠ့ၣ်ကၠိ, ဝီ, ဆ့ၤယွၤ) ဟီၣ်ကဝီၤအပူၤဒီးအသုးဂံၢ်ဘါပှၤနီၣ်ဂံၢ်ခဲလၢၥ်ပၣ်ဃုၥ်ဝဲအဂၤ(၃၀၀)ဃၣ်ဃၣ်အဂ့ၢ်လီၢ်ကဝီၤအပှၤဘၣ်မူဘၣ်ဒါစံးဝဲန့ၣ်လီၤ. လၢန့ၣ်အမဲၥ်ညါပယီၤသုးကျိၤလၢအဟဲထီၣ်သ့ၣ်တဖၣ်အံၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်,တၢ်ပၢၢ်ဆၢသုးပၥ်ဖှိၣ်သ့ၣ်တဖၣ်တြီတံၥ်ပံးဃၥ်အဝဲသ့ၣ်ကျဲအိၣ်ဝဲအသိးလၢခံခီခံကပၤအဘၢၣ်စၢၤတၢ်ဒုးတၢ်ယၤကဲထီၣ်စ့ၢ်ကီးဒံးဝဲန့ၣ်လီၤ. ဒ်န့ၣ်အသိးဖဲတနံၤညါ အံၤအတီၢ်ပူၤန့ၣ်ပယီၤသုးကီၣ်ကးကဘီယူၤဟဲခးလီၤဒံးဝဲတၢ်အဂ့ၢ်ကီၢ်ဆၣ်အပှၤဘၣ်မူဘၣ်ဒါစံးန့ၣ်လီၤ. ဖဲတၢ်ထီၣ်မၤန့ၢ်ပယီၤသုးခီၣ်ချ့သုးရ့ၣ်(ခမရ-၅၉၈)သုးကလၢၤအံၤဆၢကတီၢ်တၢ်မၤန့ၢ်ဝဲ ၇၅ မမ, ၈၁ မမ, ၆၀ မမ ကျိဖးဒိၣ်ဃုၥ်ဒီး ကျိဖိကျိဖးဒိၣ်ခဲလၢၥ်အခိၣ်(၈၀)ဘျဲၣ်, ကၠါမၣ်စဲး ၃ ဖျၢၣ် ဒီးကျိချံပှၥ်သ့ၣ်တဖၣ်အမဲၥ်ညါပယီၤသုးသံအဂၤ(၃၀) အကျါပၣ်ဃုၥ်သုး ရ့ၣ်ခိၣ်,သးခိၣ်သုးနၢ်သ့ၣ်တဖၣ်ဒီးတၢ်ဖီၣ်န့ၢ်စ့ၢ်ကီးဝဲပယီၤသုး(၆)ဂၤ,ပယီၤသုးအဒူၣ်ဖိထၢဖိ(၇)ဂၤအဂ့ၢ်သ့ၣ်ညါဘၣ်လၢတၢ်ပၥ်ဖျါတဖၣ်အသိးန့ၣ်လီၤ.
ပယီၤသုး(Jet Fighter)ခံဘ့ၣ်ဟဲတ့ၢ်လီၤကဒီးမ့ၣ်ပိၢ်ဖးဒိၣ်(၂)ဖျၢၣ်ဖဲဝီၢ်က့သဝီပူၤအဃိကမျၢၢ်ဟံၣ်ဟးဂီၤ(၁၄)ဖျၢၣ်
လါမ့ၤ ၁၁ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဒူသထူၣ်ကီၢ်ရ့ၣ်,ကၠဲးထိၣ်ကီၢ်ဆၣ်ဟီၣ်ကဝီၤအပူၤဖဲတနံၤအံၤလါမ့ၤ(၁၁)သီ,ဖဲဂီၤခီ(၁၀း၄၀)မံးနံးအ ဆၢကတီၢ်မ့ၢ်လၢပယီၤသုးကဘီယူၤ(Jet Fighter)ခံဘ့ၣ်ဟဲတ့ၢ်လီၤကဒီးဝဲပီၣ်မ့ၣ်ပိၢ်ဖးဒိၣ်(၂)ဖျၢၣ်အဃိဘၣ်ဟးဂီၤကွံၥ်ဝဲကမျၢၢ် ဟံၣ်ဃီ(၁၄)ဖျၢၣ်အဂ့ၢ်လီၢ်ကဝီၤပှၤဘၣ်မူဘၣ်ဒါစံးဝဲဒၣ်န့ၣ်လီၤ. ဖဲတဂီၤအံၤအနၣ်ရံၣ်(၁၀)ဘျဲၣ်အဆၢကတီၢ်န့ၣ်ပယီသုးကီၣ်ကး(Jet Fighter)ကဘီယူၤခံဘ့ၣ်ဟဲတ့ၢ်လီၤကဒီးဝဲပီၣ်(၅၀၀)မ့ၣ်ပိၢ် တ ဖျၢၣ်ဒီးပီၣ်(၂၀၀)မ့ၣ်ပိၢ်တဖျၢၣ်, ခဲလၢၥ်(၂)ဖျၢၣ်, ဖဲကၠဲးထိၣ်ကီၢ်ဆၣ်ဖဲဝီၢ်က့သဝီပူၤအဃိဘၣ်ဟးဂီၤကွံၥ်ဝဲဝီၢ်က့သဝီဖိအဟံၣ် (၁၄) ဖျၢၣ်အမဲၥ်ညါဘၣ်ဒိစ့ၢ်ကီးဝဲပှၤသဝီဖိ(၂)ဂၤအဂ့ၢ်န့ၣ်ကီၢ်ရ့ၣ်ပှၤဘၣ်မူဘၣ်ဒါစံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢတၢ်န့ၣ်အဃိမ့ၢ်ဘၣ်ကွၢ်က့ၤကၠဲးထိၣ်ကီၢ်ဆၣ်,ဝီၢ်က့သဝီအပူၤအံၤပယီၤသုးကီၣ်ကးတကပၤမၤဝဲကလံၤကျါတၢ်ဒုးဒီးခးလီၤကျိဖးဒိၣ်ဟဲအါထီၣ်ဝဲရုၢ်ရုၢ်အသိးကမျၢၢ်ဘၣ်ကွၢ်ဆၢၣ်မဲၥ်ဘၣ်ဝဲတၢ်သံတၢ်ပှၢ်,တၢ်ဘၣ်ဒိဘၣ်ထံးစ့ၢ်ကီးဟဲအါထီၣ်ဝဲရုၢ်ရုၢ်အဃိကမျၢၢ်ဒူဖိသဝီဖိသ့ၣ်တဖၣ်ဘၣ်ဃ့ၢ်ထီၣ်ကဒီးဝဲဆူခူပူၤဝ့ၢ်ပူၤဒီးပှၢ်ပူၤဟဲအါထီၣ်ဝဲအဂ့ၢ် (သုးက့-၁) အသုးက့ခိၣ်သုးခိၣ်ကျၢၢ် ဖိစီၤစိမၠ့ၣ်ထွ့ စံးဝဲဒ်အံၤ န့ၣ်လီၤ. "ဖဲဒူသဝီအပူၤန့ၣ်ပှၤဃ့ၢ်ပၥ်သးဖးယံၥ်လံ. ပှၤမ့ၢ်တဃ့ၢ်ပၥ်သးန့ၣ်ပှၤကသံဒီဒူၣ်လီၤ. အခဲအံၤတဘျီဒီးပှၤဘၣ်ဃ့ၢ်ကဒီးလီၤအဃိပှၤဘၣ် ဃ့ၢ်ဒံးယံၥ်ဒံးအါထီၣ်ဝဲန့ၣ်လီၤ. တၢ်အံၤကဘၣ်ဃ့ၢ်တုၤလၢကီၢ်ဆၣ်ဒီဘ့ၣ်ညါလီၤ. ခဲအံၤကမျၢၢ်ပှၤသဝီဖိသ့ၣ်တဖၣ်ဒုပျံၤတၢ်ဖုးတၢ်လီၤ. ပှၤကမျၢၢ်ဒုဃ့ၢ်ပြံဃ့ၢ်ပြါအသးလီၤလၢဝ့ၢ်ပူၤတနီၤ, ထီၣ်ဆူပှၢ်ကျါတနီၤအခဲအံၤန့ၣ်မီၤနီၤ." အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ် လီၤ. လၢန့ၣ်အမဲၥ်ညါသုးကီၣ်ကးကဘီယူၤဟဲတ့ၢ်လီၤမ့ၣ်ပိၢ်ဖးဒိၣ်အဃိဝီၢ်က့ပှၤသဝီဖိလၢအဘၣ်ဒိ(၂)ဂၤအကျါတဂၤန့ၣ်မ့ၢ်ဝဲဖိသၣ်(၁၃)နံၣ် အမံၤမ့ၢ်ဝဲ မီၤမၠ့ၣ်မၠဲၣ်ထွ့ ဘၣ်ဒိဝဲဖဲအချၢဃံအထွဲတကပၤအသိးမ့မ့ၢ်လၢအဝဲတဂၤန့ၣ် အူမီၤနဲၣ် (၅၃)နံၣ် ဘၣ်ဒိဝဲဖဲအ စုဒ့ ကီၤအထွဲတကပၤဒီးပှၤခံဂၤလၢၤအံၤတၢ်သ့ၣ်ညါဘၣ်လၢတၢ်ဘၣ်ယိၣ်တအိၣ်ဘၣ်အဂ့ၢ်သ့ၣ်ညါဘၣ်န့ၣ်လီၤ. ပှၤသဝီဖိလၢအဟံၣ်ဘၣ်ဟးဂီၤကွံၥ်ဝဲသ့ၣ်တဖၣ်န့ၣ်မ့ၢ်ဝဲ အူစ့ၤမၠဲၣ်ခိ, အူစီၤမၠၣ်ထူ, အူမီၤနဲၤ, ဒီၢ်စၢ, ဒီၢ်ခ့ၤခၠိၤ, ကိၤကၠံသါ, ကိၤကီၤအူ, ကၠီၤဆါအူ, ကိၤကၠံၤဝ့, ကိၤစၢလွ့ၤ, အူလၣ်သ့, အူသ့တၤ, ဒီးအူခ့ၤမီၤအ့ သ့ၣ်တဖၣ်အံၤအဟံၣ်ဘၣ်ဟးဂီၤကွံၥ် ဝဲဒိၣ်ဒိၣ်မုၢ်မုၢ်အဂ့ၢ်ကီၢ်ရ့ၣ်အပှၤဘၣ်မူ ဘၣ်ဒါစံးဝဲအသိးသ့ၣ်ညါဘၣ်စ့ၢ်ကီးန့ၣ်လီၤ. လၢန့ၣ်အမဲၥ်ညါဖဲဟီၣ်ကဝီၤတၢ်လီၢ်ဝဲန့ၣ်န့ၣ်ပှၤဒိးန့ၢ်ဘၣ်တၢ်ကစီၣ်လၢပယီၤသုးကျိၤကဟဲထီၣ်ဝဲဒၣ်အဃိဘၣ်ထွဲဒီးပယီၤသုးအံၤဟူးဂဲၤခးလီၤကျိဖးဒိၣ်, ဟူးဂဲၤဟဲတ့ၢ်လီၤမ့ၣ်ပိၢ်ဒီးကဘီယူၤအံၤန့ၣ်ကမ့ၢ်လၢတၢ်ဂ့ၢ်ဝဲအံၤဧါ, ဘၣ်ဆၣ်ဒ်လီၢ်ကဝီၤပှၤဘၣ်မူဘၣ်ဒါစံး...
ကၠဲးထိၣ်ကီၢ်ဆၣ်ပယီၤသုးကဘီယူၤဒီးကျိဖးဒိၣ်အဃိကမျၢၢ်ဘၣ်သံ(၁)ဂၤ,ဘၣ်ဒိ(၂)ဂၤဒီးဟံၣ်အူအီၣ်(၄)ဖျၢၣ်
လါမ့ၤ ၁၀ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဒူသထူၣ်ကီၢ်ရ့ၣ်,ကၠဲးထိၣ်ကီၢ်ဆၣ်ဟီၣ်ကဝီၤအပူၤဖဲတနံၤအံၤလါမ့ၤအသီ(၁၀)ဟါလီၤခီ(၄)နၣ်ရံၣ် ဘျဲၣ်အဆၢကတီၢ်ခီဖျိပယီၤသုးခးလီၤစိကျိဖးဒိၣ်ဒီးကဘီယူၤစ့ၢ်ကီးဟဲတ့ၢ်လီၤမ့ၣ်ပိၢ်အဃိဘၣ်သံဝဲကမျၢၢ်ပှၤသဝီဖိ(၁)ဂၤ,ဘၣ်ဒိ(၂)ဂၤဒီးသဝီဖိအဟံၣ်(၄)ဖျၢၣ်မ့ၣ်အူအီၣ်ဟးဂီၤကွံၥ်ဝဲဒၣ်အဂ့ၢ်လီၢ်ကဝီၤပှၤဘၣ်မူဘၣ်ဒါစံးဒၣ်န့ၣ်လီၤ. ဖဲတဟါအံၤ(၄)နၣ်ရံၣ်ဃၣ်ဃၣ်အဆၢကတီၢ်န့ၣ်ပယီသုးကီၣ်ကီၣ်ကး(Y-12)ကဘီယူၤတဘ့ၣ်ဟဲတ့ၢ်လီၤဝဲမ့ၣ်အူအီၣ်တၢ်မ့ၣ်ပိၢ် (၅)ဖျၢၣ်ဖဲကၠဲးထိၣ်ကီၢ်ဆၣ်ဖဲဝီၢ်က့သဝီပူၤအဃိဘၣ်ဒိဝဲဝီၢ်က့သဝီဖိ(၂)ဂၤဒီးသဝီဖိအဟံၣ်(၅)ဖျၢၣ်မ့ၣ်အူအီၣ်ဟးဂီၤကွံၥ်ဝဲဒၣ်အဂ့ၢ် န့ၣ်ကီၢ်ရ့ၣ်ပှၤဘၣ်မူဘၣ်ဒါစံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. တကးဒံးဘၣ်ဖဲ(၄း၁၈)မံးနံးအဆၢကတီၢ်ကဒီးန့ၣ်ပယီသုးတြိၤ(၄၄)လၢအအိၣ်ဖဲကၠဲးထိၣ်ကီၢ်ဆၣ်အပူၤအံၤမ့ၢ်လၢခးလီၤ(၁၂၀)မးမးကျိဖးဒိၣ်ဆူအံလူၢ်ကရူၢ်,ကရၣ်ဝ့ဆ့ၣ်သဝီဃၢၤအဃိကျိဖးဒိၣ်လီၤချံလီၤတၥ်ပိၢ်ဖးထီၣ်ဘၣ်သံဝဲ(ဒီၣ်ခ့ၤအ့)သးနံၣ်(၆၆)နံၣ်တဂၤ အံၤအဂ့ၢ်လီၢ်ကဝီၤပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်စ့ၢ်ကီးန့ၣ်လီၤ. ဘၣ်ထွဲဒီးပယီၤသုးကီၣ်ကးကဘီယူၤဟဲတ့ၢ်လီၤမ့ၣ်ပိၢ်တၢ်ကဲထီၣ်အသးဖဲဝီၢ်က့သဝီအပူၤအံၤန့ၣ်တၢ်သ့ၣ်ညါဘၣ်လၢတၢ်ဒုးတၢ်ယၤကဲထီၣ်အသးလၢဒူသဝီအပူၤမ့ၢ်ဂ့ၤ,ဒူသဝီအကပိၥ်ကပၤမ့ၢ်ဂ့ၤတအိၣ်နီၤတမံၤဘၣ်အသိးကညီတၢ်ပၢၢ်ဆၢသုးစ့ၢ်ကီးတအိၣ်ဖဲန့ၣ်ဘၣ်အဂ့ၢ်လီၢ်ကဝီၤအပှၤဘၣ်မူဘၣ်ဒါစံးဘၣ်ကညီတၢ်ကစီၣ်ဖဲတနံၤအံၤဟါလီၤခီအဆၢကတီၢ်န့ၣ်လီၤ. "တၢ်ဒုးတၢ်ယၤတအိၣ်နီတမံၤဘၣ်. ပှၤသဝီဖိလဲလဲလီၤလၢဒူသဝီအပူၤန့ၣ်မီၤနီၤ. ပှၤသုးဖိသ့ၣ်တဖၣ်န့ၣ်အိၣ်လၢတၢ်မဲၥ်ညါ, အိၣ် လၢပှၢ်ကျါလီၤ. တအိၣ်လၢသဝီအပူၤဘၣ်. အိၣ်လၢတဂၤလၢတၢ်လီၢ်တၢ်လီၢ်န့ၣ်လီၤ." အဂ့ၢ်န့ၣ်စံးဝဲဒၣ်န့ၣ်လီၤ. မ့ၢ်လၢသုးကီၣ်ကးကဘီယူၤဟဲတ့ၢ်လီၤမ့ၣ်ပိၢ်ဒ်အံၤအဖီခိၣ်အဃိဝီၢ်က့ပှၤသဝီဖိအဘၣ်ဒိဘၣ်ထံးသ့ၣ်တဖၣ်န့ၣ်မ့ၢ်ဝဲ စီၤဖိလ့လ့ သးနံၣ် (၃၁)နံၣ်ဘၣ်ဒိဝဲဖဲအမဲၥ်တူၢ်ခိၣ်, ကံၣ်ဒုၣ် ဒီးစုဒုၣ်အသိး မ့မ့ၢ်လၢအတဂၤခီန့ၣ်မ့ၢ်ဝဲ စီၤန့ၤတိ သးနံၣ် (၁၈)နံၣ်ဘၣ်ဒိဝဲဖဲ အနၢ်ပၤထ့း အဆ့ၣ်တကပၤအသိးပှၤခံဂၤလၢၤအံၤတၢ်သ့ၣ်ညါဘၣ်လၢတၢ်ဘၣ်ယိၣ်တအိၣ်ဘၣ်အဂ့ၢ်သ့ၣ်ညါဘၣ်န့ၣ်လီၤ. မ့မ့ၢ်ပှၤသဝီဖိလၢအဟံၣ်ဘၣ်အူအီၣ်ကွံၥ်ဝဲသ့ၣ်တဖၣ်န့ၣ်မ့ၢ်ဝဲ အူမီၤအိၣ်ကၠံၤ, အူနဲၤလ့အူ, အူပိၤယိ, ဖၠူဝ့ အဟံၣ်သ့ၣ်တဖၣ် အံၤဒီးဒ်န့ၣ်အသိးကျိဖး ဒိၣ်အက့အခီဖျိးဘၣ်ဟးဂီၤစ့ၢ်ကီးဝဲ ဖါထးခိၣ် ဒီး အူခ့ၤမီၤထ့ အဟံၣ်သ့ၣ်တဖၣ်အဂ့ၢ်ကီၢ်ရ့ၣ်အပှၤဘၣ်မူ ဘၣ်ဒါစံးဝဲအသိးသ့ၣ်ညါဘၣ်စ့ၢ်ကီးန့ၣ်လီၤ. လၢန့ၣ်အမဲၥ်ညါဖဲဟီၣ်ကဝီၤတၢ်လီၢ်ဝဲန့ၣ်န့ၣ်ပှၤဒိးန့ၢ်ဘၣ်တၢ်ကစီၣ်လၢပယီၤသုးကျိၤကဟဲထီၣ်ဝဲဒၣ်အဃိဘၣ်ထွဲဒီးပယီၤသုးအံၤဟူးဂဲၤခးလီၤကျိဖးဒိၣ်, ဟူးဂဲၤဟဲတ့ၢ်လီၤမ့ၣ်ပိၢ်ဒီးကဘီယူၤအံၤန့ၣ်ကမ့ၢ်လၢတၢ်ဂ့ၢ်ဝဲအံၤဧါ, ဘၣ်ဆၣ်ဒ်လီၢ်ကဝီၤပှၤဘၣ်မူဘၣ်ဒါစံး ဝဲအသိးန့ၣ်တကီၢ်ခါခဲအံၤပယီၤသုးဟဲထီၣ်ဝဲတန့ၢ်ဘၣ်အဂ့ၢ်သ့ၣ်ညါဘၣ်န့ၣ်လီၤ. ကၠဲးထိၣ်ကီၢ်ဆၣ်အပူၤမ့ၢ်ကွၢ်က့ၤဖဲအပူၤကွံၥ်လါမ့ၤ(၆)သီအနံၤဂီၤခီအဆၢကတီၢ်န့ၣ်ပယီၤသုးက ဘီယူၤလဲၤတ့ၢ်လီၤဝဲမ့ၣ်ပိၢ်လၢဒူ သဝီသၢဖျၢၣ်ပူၤလၢအမ့ၢ်ဝဲ ကရၣ်ဝ့ဆ့ၣ်သဝီအပူၤတဖျၢၣ်, (ပဒီၣ်တီၤ)သဝီတတကပၤန့ၣ်တဖျၢၣ် ဒီးဖဲဝီက့သဝီဖဲကၠိၤမကူခၠီထံကျိ တိၥ်အဖီခိၣ်တဖျၢၣ်ဒီးတိၥ်အကပၤတဖျၢၣ်န့ၣ်လီၤ. ဘၣ်ဆၣ်မ့မ့ၢ်ကမျၢၢ်တခီန့ၣ်တၢ်ဘၣ်ဒိဘၣ်ထံး တအိၣ်၀ဲဘၣ်အဂ့ၢ်န့ၣ်လီၢ်က ၀ီၤပှၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤ.
ကမျၢၢ်လၢအိၣ်ကီၢ်ကၠီၣ်တဲၣ်ဒီးကီၢ်ပူၤတၢ်ဘံၣ်တၢ်ဘၢအဂီၢ်ဘၣ်တၢ်ထီၣ်ဒုးမၤန့ၢ်ကွံၥ်ပယီၤသုး(ထံခံ)ကီၢ်ဆၢသုးကလၢၤအံၤအဂ့ၢ်ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်ထုးထီၣ်ပၥ်ဖျါ
လါမ့ၤ ၁၀ သီ, ၂၀၂၅ နံၣ်, ခ့ၣ်အဲးစံၣ် ကမျၢၢ်လၢအိၣ်ထံခံကီၢ်ဆၢဟီၣ်ကဝီၤလၢကီၢ်ကၠီၣ်တဲၣ်တကပၤမ့ၢ်ဂ့ၤဒီးလၢကီၢ်သူလ့ၤတကပၤမ့ၢ်ဂ့ၤဒ်သိးကအိၣ်ဒီးတၢ်ဘံၣ်တၢ်ဘၢအဂီၢ်(ထံခံ)ကီၢ်ဆၢပယီၤသုးကလၢၤအံၤအလီၢ်အိၣ်ဝဲလၢတၢ်ကဘၣ်ထီၣ်ဟံးန့ၢ်ကွံၥ်ဝဲအဃိဘၣ်တၢ်ထီၣ်ဟံးန့ၢ်ကွံၥ်ဝဲဒၣ်ဒ်အံၤလီၤအဂ့ၢ်ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်ထုးထီၣ်လံၥ်တၢ်ပၥ်ဖျါတဘ့ၣ်ဖဲလါမ့ၤ(၉)သီအနံၤ န့ၣ်လီၤ. လၢတၢ်ထီၣ်မၤန့ၢ်(ထံခံ)ပယီၤသုးကလၢၤလၢအဟဲအိၣ်သူၣ်လီၤအသးလၢ(၂၈)နံၣ်အတီၢ်ပူၤအံၤန့ၣ်ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ် တကပၤစးထီၣ်ဟူးဂဲၤထီၣ်ဒုးမၤဝဲလၢလါမ့ၤ(၂)သီအနံၤလံၤလံၤလံဒီးဘၣ်ထွဲဒီးထံခံဒုးယၤတၢ်အိၣ်သးအံၤန့ၣ်မ့ၢ်စ့ၢ်ကီးခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်ထုးထီၣ်ဒုးသ့ၣ်ညါဘၣ်ဝဲကီၢ်ကၠီၣ်တဲၣ်ကမျၢၢ်ထံဖိကီၢ်ဖိသ့ၣ်တဖၣ်အအိၣ်န့ၣ်လီၤ. တၢ်ဖ့ၣ်ဆၢလၢအိၣ်ထီၣ်ဝဲလၢခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်ဒီးပယီၤသုးကီၣ်ကးအဘၢၣ်စၢၤအံၤအဃိတၢ်လၢကဟဲဘၣ်ဒိဘၣ်ထံး တၢ်ဒီးတၢ်လၢကဟဲပိၥ်ထွဲအသးသ့ၣ်တဖၣ်အသုတအိၣ်ထီၣ်တဂ့ၤအဂီၢ်တၢ်ဂုၥ်ကျဲးစၢးရဲၣ်ကျဲၤတ့ၢ်ဝဲအဂ့ၤကတၢၢ်အဂ့ၢ်ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်ပၥ်ဖျါဒုးသ့ၣ်ညါဘၣ်ဝဲန့ၣ်လီၤ. ဒ်လံၥ်တၢ်ပၥ်ဖျါပူၤအသိးန့ၣ်ခ့ခါလၢအပူၤကွံၥ်အဆၢကတီၢ်ဒီးတုၤတၢ်ဆၢကတီၢ်အခဲအံၤန့ၣ်ပအိၣ်မူအိၣ်ဂဲၤတ့ၢ်ဝဲဒီးကၠီၣ်တဲၣ်ကမျၢၢ်သ့ၣ်တဖၣ်လၢတၢ်သးလီၤပလိၥ်လိၥ်သးအပူၤအသိးခါဆူညါစ့ၢ်ကီးပကတီၤလံပသးလၢတၢ်ရ့လိၥ်ဘၣ်ထွဲလိၥ်သးဘူးဘူးတံၢ်တံၢ်အဂ့ၢ်ဒ်လံၥ်တၢ်ပၥ်ဖျါအပူၤအၢၣ်လီၤစံးဝဲဒၣ်န့ၣ်လီၤ. လၢန့ၣ်အမဲၥ်ညါခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်အိၣ်ဒီးတၢ်ဘၣ်ယိၣ်စ့ၢ်ကီးလၢထံလီၢ်ကီၢ်ပူၤကမျၢၢ်ဒီးကီၢ်ကၠီၣ်တဲၣ်ကမျၢၢ်သ့ၣ်တဖၣ် အဖီခိၣ်ခီဖျိကီၢ်ပယီၤသုးမီၤစိရိၤအံၤလၢရၢၡါတၢ်သ့တၢ်ဘၣ်အိၣ်တဆီအိၣ်ဒီးတၢ်တိၥ်ကျဲၤလၢကသူၣ်ထီၣ်ဝဲ(၁၁၀)မံးကၢၣ်ဝၢၣ်တၢ်ဟ့ၣ်(နူကျံယါ)လီဂံၢ်စဲးဖီကဟၣ်တၢ်မၤလီၢ်ဖဲတနီသရံၣ်ကီၢ်ခီဒိၣ်ဖဲဒဝဲၢ်မုၢ်ကျိၤဝဲၤကွၥ်လီၤဆီဟီၣ်ကဝီၤအပူၤဒီးပကိတၢ်လီၢ်အခၢၣ်သးအဃိလီၤအဂ့ၢ်သ့ၣ်ညါဘၣ်န့ၣ်လီၤ. လၢတၢ်န့ၣ်အဃိကမျၢၢ်ထံဖိကီဖိသ့ၣ်တဖၣ်ဒ်သိးကစံၣ်ညီၣ်တီနံဘၣ်ဝဲအဘူၣ်အတီၢ်အဂီၢ်ဒီးကပူၤဖျဲးထီၣ်ဘၣ်ဝဲလၢပယီၤသုးမီၤစိရိၤတၢ်မၤအၢမၤသီအဖီလၥ်အဂီၢ်ဒ်သုးဂ့ၢ်ဝီအိၣ်အသိးအလီၢ်အိၣ်ဝဲလၢတၢ်ဘၣ်ဟံးန့ၢ်ဝဲသုးကီၣ်ကးအံၤအရ့အဂ့ၢ်ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်စံးစ့ၢ်ကီးဝဲန့ၣ်လီၤ. ဒ်န့ၣ်အသိးလၢတၢ်ထီၣ်ဒုးမၤန့ၢ်ဝဲ(ထံခံ)ပယီၤသုးကလၢၤတဘျီအံၤအပူၤသိၣ်မှံၤတၢ်ပၢၢ်ဆၢသုးပၥ်ဖှိၣ်ကရူၢ်ကရၢလၢဒုးသကိးတၢ်ဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးက့နီၣ်ဂံၢ်(၄)သ့ၣ်တဖၣ်ဃုၥ်ဒီးကမျၢၢ်ထံဖိကီၢ်ဖိလၢပၣ်ဃုၥ်မၤသကိးတၢ်လၢတၢ်ဆီၣ်ထွဲမၤစၢၤလၢတၢ်သ့တၢ်ဘၣ်အကျဲတကပၤမ့ၢ်ဂ့ၤ, ကျိၣ်စ့တကပၤမ့ၢ်ဂ့ၤ, လၢတၢ်စူၥ်တၢ်နၥ်တၢ်ဟ့ၣ်ဂံၢ်ဟ့ၣ်ဘါတကပၤမ့ၢ်ဂ့ၤဒီးလၢ တၢ်အကပၤကပၤမ့ၢ်ဂ့ၤသ့ၣ်တဖၣ်တၢ်ပၥ်လၤပၥ်ကပီၤဒီးစံးဘျုးစံးဖှိၣ်ဘၣ်ဝဲအဂ့ၢ်ဘျံးဒဝဲၢ်ကီၢ်ရ့ၣ်ထုးထီၣ်ပၥ်ဖျါစ့ၢ်ကီးဝဲဒၣ်န့ၣ်လီၤ. မ့ၢ်ဘၣ်ကွၢ်ကဒါက့ၤဖဲအပူၤကွံၥ်လါအ့ဖြ့ၣ်(၁၉)သီအနံၤဖဲကီၢ်ဆၢဟီၣ်ကဝီၤတၢ်လီၢ်ဝဲန့ၣ်န့ၣ်တၢ်ထီၣ်မၤန့ၢ်စ့ၢ်ကီးဒံးဝဲထံထၣ်ပယီၤဒုးယၤသုးကလၢၤအံၤဒီးဖဲန့ၣ်ဝံၤအလီၢ်ခံပယီၤသုးကီၣ်ကးတကပၤဟဲမၤဝဲကလံၤကျါတၢ်ဒုးတပယူၥ်ဃီဖဲထံခံကီၢ်ဆၢတၢ်လီၢ်အဃိကမျၢၢ်လီၢ်ကဝီၤဖိသ့ၣ်တဖၣ်ဘၣ်ဃ့ၢ်ထီၣ်ဝဲဆူကီၢ်ကၠီၣ်တဲၣ်ကီၢ်ဆၢတကပၤအဂ့ၢ်သ့ၣ်ညါဘၣ်စ့ၢ်ကီးန့ၣ်လီၤ.