တၢ်ကစီၣ်လၢ သုးက့(၄)ပူၤ BGF နုၥ်လီၤဟူးဂဲၤန့ၣ်မ့ၢ်ဒၣ်တၢ်မၤလီၤဖးသွံၣ် အဂ့ၢ် တၢ်မဲၥ်ညါKNLA စံးဝဲ
လါနိၣ်ဝ့ဘၢၣ် ၂၁သီ, ၂၀၂၄နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၄), ဘျံးဒဝဲၢ်ကီၢ်ရ့ၣ်, ဟီၣ်ကဝီၤပူၤ ဖဲလါနိၣ်ဝ့ဘၢၣ်ထီၣ်သီအဆၢကတီၢ် သုးခိးကီၣ်ဆၢ (BGF) သ့ၣ်တဖၣ်နုၥ်လီၤဟူးဂဲၤဝဲဒၣ်အဂ့ၢ် လီၢ်ကဝီၤတၢ်ကစီၣ်တနီၤပၥ်ဖျါဝဲဒၣ်န့ၣ်လီၤ. လၢတၢ်ဂ့ၢ်ဝဲအံၤအဖီခိၣ်န့ၣ် တၢ်ကစီၣ်တဖၣ်န့ၣ်မ့ၢ်ဒ်သိး ထံဖိကီၢ်ဖိကထံၣ်ကမၣ်ပကညီဖိဒီးလၢပကဒဲကဒဲကအ့ၣ်လိၥ်သးအဂီၢ် မ့ၢ်ဝဲတၢ်မၤလီၤဖးသွံၣ်တၢ်ရဲၣ်တၢ်ကျဲၤအဂ့ၢ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) သုးရ့ၣ်(၁၂), သုးဒ့(၂)ကစၢၢ်ဒိၣ်ဘီသိၣ်သုးဒ့အသုးဒ့ခိၣ် သုးခိၣ် ဘၣ်အူသ့ၣ် စံးဘၣ်ဝဲ ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲလၢ“တၢ်ဝဲန့ၣ်တမ့ၢ်ဘၣ်. တၢ်ကစီၣ်ကမၣ်လီၤ.ကဲထီၣ်ဒ်သိးဒီးပှၤဒုးအ့ၣ်လိၥ်တၢ်လီၤ.တမ့ၢ်တၢ်ကစီၣ်အမ့ၢ်အတီဘၣ်.တၢ်ကစီၣ်ဝဲအံၤပှၤဟဲသံကွၢ်ယၤဖးအါလံ.ပအိၣ်လၢတၢ်မဲၥ်ညါလီၤ.မ့မ့ၢ်န့ၣ်ပကဘၣ်သ့ၣ်ညါလီၤ. တၢ်န့ၣ်မ့ၢ်ဝဲတၢ်ကူၣ်သရံးမၤလီၤဖးသွံၣ်ဒုးယၤတခါလီၤ.မ့ၢ်ဝံၤဒ်သိးဒီးထံဖိကီၢ်ဖိကထံၣ်ကမၣ်ပကညီဖိအဂီၢ်မ့ၢ်ဝဲဒုးယၤတမံၤလီၤ.အဃိန့ၣ်ကဘၣ်ပလီၢ်သးလၢတၢ်ဂ့ၢ်ဝဲအံၤ န့ၣ်လီၤ.တမ့ၢ်တၢ်အမ့ၢ်အတီဘၣ်.”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ ကဘၣ်မ့ၢ်လၢ ဒဝဲၢ်ပၠံၣ်သူၣ်စ့ၣ်သ့ၣ်တဖၣ် ခီဖျိ ပၠံၣ်သူၣ်စ့ၣ်ဖံဘၣ်ခိၣ်တၢ်ပနီၣ်ဒီး (BGF) ဖံဘၣ်ခိၣ်တၢ်ပနီၣ်န့ၣ်လီၤပလိၥ် လိၥ်သးအမဲၥ်ညါ သုးကီၣ်ကးအသုးကျိၤလၢဟူးဂဲၤဖဲသုးက့(၄)ဟီၣ်ကဝီၤပူၤတဖၣ်အံၤသူဝဲဒၣ် ပၠံၣ်သူစ့ၣ်ဂံၢ်ဘါအါအါဂီၢ်ဂီၢ် အဂ့ၢ် သုးခိၣ် ဘၣ်အူသ့ၣ် တဲအါထီၣ်ဝဲဒၣ်စ့ၢ်ကီးန့ၣ်လီၤ. တကီၢ်ခါခဲအံၤန့ၣ် ကီၣ်သီ ဆူ ဒဝဲၢ် နီၢ်ဂံၢ်(၈)ကီၢ်စၢဖှိၣ်ကျဲမုၢ်အံၤ ဒ်သိး သုးကီၣ်ကးဒိၣ်စိဝဲကန့ၢ်အဂီၢ် ဖဲ(KNLA) သုးရ့ၣ်(၁၂)ဟီၣ်ကဝီၤပူၤန့ၣ် ဟဲထီၣ်ဝဲသုးကျိၤ(၃)ဘိ, ပှၤကညီနီၣ်ဂံၢ်(၂၀၀)ဃၣ်ဃၣ်, လၢကညီဒီကလုၥ်ဂၢၤသးကရၢ သုးရ့ၣ်(၇)ဟီၣ်ကဝီၤန့ၣ်သုးကျိၤ(၃)ဘိပှၤကညီနီၣ်ဂံၢ် (၃၀၀)ဃၣ်ဃၣ် ဟူးဂဲၤဝဲဒၣ်အိၣ်အဂ့ၢ်သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
မုၢ်တြီၢ်ကီၢ်ရ့ၣ်(၁၅)သီတီၢ်ပူၤတၢ်ဒုးသုးကီၣ်ကးအပှၤသံ(၇၇)ဂၤအကျါပၣ်ဃုၥ်သုးရ့ၣ်ခိၣ်(၁)ဂၤ
လါနိၣ်ဝ့ဘၢၣ် ၂၀သီ, ၂၀၂၄နံၣ်, ခ့ၣ်အဲးစံၣ် ခ့ၣ်အဲယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ သုးက့(၅),မုၢ်တြီၢ်ကီၢ်ရ့ၣ် စးထီၣ်လါနိၣ်ဝ့ဘၢၣ်(၁)သီ တုၤ (၁၅)သီအနံၤန့ၣ် တၢ်ဒုးကဲထီၣ်ဝဲလၢကညီဒီကလုၥ်တၢ်ထူၣ်ဖျဲးသုးမုၣ်ဒိၣ် သုးက့(၅)ဒီးသုးကီၣ်ကးအဘၢၣ်စၢၤအိၣ်ဝဲ(၁၃)ဘျီအဂ့ၢ် မ့ၣ်အဲၣ်ယူၣ်-မုၢ်တြီၢ်တၢ်ကစီၣ်ပၥ်ဖျါဝဲ လါနိၣ်ဝ့ဘၢၣ် ၁၉သီအနံၤန့ၣ်လီၤ. လၢခံခီခံကပၤတၢ်ဒုးကဲထီၣ်(၁၃)ဘျီဒ်အံၤအဖီခိၣ် သုးကီၣ်ကးအပှၤတကပၤသံ (၇၇),ဒီးလၢအကျါန့ၣ်ပၣ်ဃုၥ်ဝဲ သုးရ့ၣ်ခိၣ်(၁)ဂၤဒီး သုးရ့ၣ်ခိၣ်(၂)တဂၤအဂ့ၢ် ခ့ၣ်အဲၣ်ယူၣ်-မုၢ်တြီၢ်တၢ်ကစီၣ်ပၥ်ဖျါဝဲဒၣ်အသိးလၢသုးက့(၅)တကပၤစ့ၢ်ကီးဘၣ်ဒိအိၣ်ဝဲ(၈)ဂၤအဂ့ၢ် ခ့ၣ်အဲၣ်ယူၣ်မုၢ်တြီၢ်ကီၢ်ရ့ၣ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ ကူးစ့ၣ်ပယီၤသုးလၢအထုးလီၤကွံၥ်သးလၢအသုးကလၢၤဒီးဂုၤက့ၤခံ က့ၤပၥ်ဖှိၣ်ဖဲမးထီ ပယီၤသုးကလၢၤစ့ၢ်ကီးတၢ်ဒုးကဲထီၣ်ဝဲခဲအံၤခဲအံၤအဂ့ၢ်သ့ၣ်ညါဘၣ်လၢ လီၢ်ကဝီၤပှၤဟ့ၣ်တၢ်ကစီၣ်ဖိအအိၣ်န့ၣ်လီၤ. ဒ်န့ၣ်အသိး ဖဲအပူၤကွံၥ်လါအီးကထိဘၢၣ်ဒီတလါအတီၢ်ပူၤန့ၣ် တၢ်ခးလိၥ်သးကဲထီၣ်ဝဲလၢကညီဒီကလုၥ်တၢ်ထူၣ်ဖျဲးသုးမုၢ် ဒိၣ်သုးက့(၅)ဒီးသုးကးအပှၤဘၢၣ်စၢၤအိၣ်ဝဲ (၁၃၆)ဘျီ,ပယီၤသုးသံဝဲ(၂၉)ဂၤဘၣ်ဒိ အဂၤ(၃၀)အိၣ်ဝဲဒၣ်အဂ့ၢ် ခ့ၣ်အဲယူၣ်မုၢ်တြီၢ်တၢ်ကစီၣ်ပၥ်ဖျါတ့ၢ်ဝဲဖဲလါနိၣ်ဝ့ဘၢၣ်(၄)သီအနံၤအိၣ်ဝဲဒၣ်စ့ၢ်ကီးန့ၣ်လီၤ.
ဃိၣ်သၢဖျၢၣ်ဝ့ၢ် တၢ်မၤသံဟံၣ်ဖိဃီဖိ(၃)ဂၤအကျါပၣ်ဃုၥ်ဖိသၣ်(၇)နံၣ်တဂၤ
လါနိၣ်ဝ့ဘၢၣ် ၂၀သီ, ၂၀၂၄နံၣ်, ခ့ၣ်အဲးစံၣ် ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ, ဒူပျၥ်ယၥ်ကီၢ်ရ့ၣ်,ဝီၢ်ရ့ၣ်ကီၢ်ဆၣ်, ဃိၣ်သၢဖျၢၣ်ဝ့ၢ် အပူၤ, ဖဲတနံၤအံၤမုၢ်ထူၣ်ထီၣ်အဆၢကတီၢ်န့ၣ် တၢ်ကဲထီၣ်သးလၢတၢ်မၤသံဝဲပှၤဟံၣ်ဖိဃီဖိ(၃)ဒီးအကျါန့ၣ်ပၣ်ဃုၥ်ဒီးဖိသၣ်(၇)နံၣ်တဂၤအဂ့ၢ်သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ. ကမျၢၢ်(၃)ဂၤလၢဘၣ်တၢ်မၤသံအီၤန့ၣ်အိၣ်ဝဲဖဲဃိၣ်သၢဖျၢၣ်ဝ့ၢ် ကဝီၤဒ့(၂)ဒီးတၢ်ကဲထီၣ်သးအဂ့ၢ်အကျိၤဒီး ဘၣ်တၢ်မၤသံအီၤလၢမတၤတဂၤလဲၣ်န့ၣ်တၢ်လူၤဃုသ့ၣ်ညါဝဲအဖၢမုၢ်အဂ့ၢ် ဒံၣ်မိၣ်ကရ့ၣ်စံၣ်တၢ်ဘၣ်ဘျုးကညီသုးမုၢ်ဒိၣ်(DKBA) တီနီၢ်မုၢ်နုၤဒုးယၤဟီၣ်ကဝီၤနီၣ်ဂံၢ်(၂)အဒုးယၤခိၣ်သုးခိၣ်ဒိၣ်စိစီၤ A One စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲလၢ“အဝဲသ့ၣ်န့ၣ်အိၣ်လၢ ဃိၣ်သၢဖျၢၣ်ဝ့ၢ်, ကဝီၤဒ့(၂)န့ၣ်လီၤ.တၢ်ကဲထီၣ်သးအဂ့ၢ်အကျိၤန့ၣ်တၢ်ဃုသ့ၣ်ညါအီၤအဖၢမုၢ်န့ၣ်လီၤ. မ့ၢ်ဝံၤမးကဒုးသ့ၣ်ညါက့ၤ.”အဂ့ၢ်စံးဝဲဒၣ်န့ၣ်လီၤ. ဟံၣ်ဖိဃီဖိလၢဘၣ်တၢ်မၤသံအီၤ(၃)ဂၤန့ၣ်မ့ၢ်ဝဲ အူယခဲၣ် သးနံၣ်(၆၂)မၤတၢ်လၢ ပဒိၣ်လီမ့ၣ်အူကရူၢ်အိၣ်ဘှံး, အူယခဲၣ်ဖိမုၣ် ဒီၣ်သ့ၣ်သ့ၣ်သူၤ ၃၂နံၣ် Non CDM ကၠိသရၣ်မုၣ်ဒီး အဖိခွါ မီၣ်စဲဝနၣ်ထိ ကၠိဖိ သ့ၣ်တဖၣ်အဂ့ၢ်သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ. တၢ်ကဲထီၣ်သးအဂ့ၢ်အကျိၤမ့ၢ်ဂ့ၤလၢတၢ်ကဟံးထီၣ်ဖီၣ်ထီၣ်ဂ့ၢ်ဝီအဂီၢ်မ့ၢ်ဂ့ၤတၢ်အိၣ်သးတကပၤန့ၣ်ကညီကွဲၤလ့လိၤဆဲးကျိးပၥ်ဒီးလီၢ်ကဝီၤပှၤဘၣ်မူဘၣ်ဒါအဖၢမုၢ်န့ၣ်လီၤ.
တၢ်ပၥ်ဖှိၣ်မၤသကိးဒုးယၤတၢ်ဟူးတၢ်ဂဲၤဒီး သုးကီၣ်ကးတအိၣ်ဘၣ်အဂ့ၢ် BGF ခိၣ်နၢ်စံးဝဲ
လါနိၣ်ဝ့ဘၢၣ် ၂၀သီ, ၂၀၂၄နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကြုၢ်တုကီၢ်ဆၣ်, မိၣ်ကလုၥ်ဒူၣ်သဝီဟီၣ်ကဝီၤသ့ၣ်တဖၣ်န့ၣ်အဝဲသ့ၣ်တၢ်ပၥ်ဖှိၣ်မၤသကိးဒုးယၤတၢ်ဟူးတၢ်ဂဲၤဒီး သုးကီၣ်ကးအပှၤတအိၣ်ဘၣ်အဂ့ၢ် ကညီကီၢ်စဲၣ် သုးခိးကီၢ်ဆၢ (BGF) အပှၤဘၣ်မူဘၣ်ဒါစံးဝဲဒၣ်န့ၣ်လီၤ. မိၣ်ကလုၥ်ဒူၣ်ဖီၣ်စုကဝဲၤကရူၢ်လၢပတုၥ်တၢ်ခး မိၣ်ကီၢ်သီပၣ်တံၣ်, မိၣ်ကလုၥ်ဒူၣ်သဝီပၠံၣ်သူၣ်စ့ၣ်,ဒီးသုးကီၣ်ကးအသုးကျိၤပၥ်ဖှိၣ်ဒိၣ်စိဝဲ ကြုၢ်တုဝ့ၢ်ဟီၣ်ကဝီၤ မိၣ်ကလုၥ်ဒူၣ်သဝီသ့ၣ်တဖၣ်န့ၣ် ဖဲအပူၤကွံၥ်စှၤသီအတီၢ်ပူၤ သုးခိးကီၢ်ဆၢ (BGF) နုၥ်လီၤဟံးန့ၢ်ဝဲတၢ်လီၢ်တၢ်ကျဲအိၣ်အဂ့ၢ် တၢ်ကစီၣ်ဟးထီၣ်အဖီခိၣ် ခ့ၣ်အဲးစံၣ် ဆဲးကျိးသံကွၢ်ဒီး (BGF)သုးဟီၣ်ကဝီၤနီၣ်ဂံၢ်(၂)အဒုးယၤခိၣ် သုးခိၣ်ဒိၣ်စိစီၤတ့ၤဝ့ဒီးစံးဝဲဒ်အံၤန့ၣ်လီၤ. အဝဲစံးဝဲလၢ“ပပှၤန့ၣ်စးထီၣ်လၢ (၇)တၢၣ်,(၉)တၢၣ်,ကြုၢ်တုဒီးတုၤလၢ (ကၠဲ-ဂျိုင်း)တိၤန့ၣ် ပပှၤဆီလီၤသးအိၣ်ကျဲဒီတဘိလီၤ.အိၣ်တယံၤတဘူးဒီးကီၢ်သူလ့ၤအသိးဖီၣ်လိၥ်သးစုန့ၢ်လီၤ.တအိၣ်တပူၤဃီဒီးပယီၤဘၣ်. အိၣ်တဂၤတတီၤ,တဂၤတတီၤန့ၣ်လီၤ.ပယီၤအိၣ်လၢပကျါဘူၣ်ဝဲလဲၣ်.အဝဲသ့ၣ်သနၥ်က့တမ့ၢ်အနၥ်အီၣ်ပှၤစ့ၢ်ကီးဘၣ်. ပှၤကွဲးတၢ်ဒ်အံၤအိၣ်ထီဘိလီၤ.အပူၤကွံၥ်တဲဝဲလၢ (BGF)ဒီးပယီၤ လဲၤထီၣ်ဆှၢတၢ်အီၣ်လၢ ဖၣ်ပူကျဲဧါ,ကတၢတံးကျဲဧါအိၣ်ထီဘိလီၤ. ဝဲပတသ့ၣ်ညါတၢ်နီတမံၤဘၣ်.”အဂ့ၢ်စံးဝဲဒၣ်န့ၣ်လီၤ. ကညီကီၣ်စဲၣ်,သုးခိးကီၢ်ဆၢ (BGF)သ့ၣ်တဖၣ်အံၤ ဖဲအပူၤကွံၥ် လါနိၣ်ဝ့ဘၢၣ် အသီ ၁၀တုၤ ၁၅သီအနံၤန့ၣ် နုၥ်လီၤဝဲဒၣ်လၢ ကြုၢ်တု ကါနံၤ မိၣ်ကလုၥ်ဒူၣ်အိၣ်သဝီသ့ၣ်တဖၣ်ဒ်အမ့ၢ် ခရ့ၣ်,ကီၣ်ကိ,ကီၣ်ဘ့,ကီၣ်ပီၣ်, မ့သဝီသ့ၣ်တဖၣ်တနံၤန့ၣ် အပှၤအဂၤ ၃၀အိၣ်,၅၀အိၣ်ဒီးအခဲအံၤပှၤနီၣ်ဂံၢ် ကအိၣ်အဂၤ ၃၀၀ ဃၣ်ဃၣ်လံအဂ့ၢ် ကြုၢ်တုလီၢ်ကဝီၤပှၤဟ့ၣ်တၢ်ကစီၣ်တဂၤစံးဝဲဒၣ်န့ၣ်လီၤ. တကီၢ်ခါခဲအံၤန့ၣ် ကီၢ်သူလ့ၤဟီၣ်ကဝီၤ ကီတရံး-ရၤမတံ အ့ရှၢၣ်ကျဲမုၢ်သီဟီၣ်ကဝီၤန့ၣ် သုးကီၣ်ကးအအီၣ်စ့ၣ်ယၣ်သုးကျိၤဟဲသဖှိထီၣ်တၢ်အဖၢမုၢ်အဃိတၢ်ခးလိၥ်သးကဲထီၣ်ဒီးကညီဒီကလုၥ်တၢ်ထူဖျဲးသုးမုၢ်ဒိၣ်သုးပၥ်ဖှိၣ်ကိးနံၤဒဲးဃၣ်ဃၣ်အသိး လၢဖၣ်ပူၣ်, ဝီၢ်ရ့ၣ်, တီအူးဒီးချၢၣ်လွံၢ်ထူၣ်ဟီၣ်ကဝီၤသ့ၣ်တဖၣ်စ့ၢ်ကီး တၢ်ခးလိၥ်သးအိၣ်ဝဲအဖၢမုၢ်အဂ့ၢ်...
ပယီၤသုးဒြိအဃိလၢၢ်ဒိၣ်ကီၢ်ဆၣ်ကၠိသရၣ်မုၣ်ဒီးကၠိဖိမုၣ်ဘၣ်ဒိ(၃)ဂၤဒီးကၠိအဂၤတစှၤန့ၢ်(၅)ဖျၢၣ်ဘၣ်ပတုၥ်ဃၥ်သး
လါနိၣ်ဝ့ဘၢၣ် ၂၀ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢချၢၣ်လွံၢ်ထူၣ်ကီၢ်ရ့ၣ်သုးက့(၃)ဟီၣ်ကဝီၤ,လၢၢ်ဒိၣ်ကီၢ်ဆၣ်အပူၤဖဲမဟါလါနိၣ်ဝ့ဘၢၣ်(၁၉)သီအနံၤ ဂီၤခီအနၣ်ရံၣ်(၁၀)ဃၣ်ဃၣ်အဆၢကတီၢ်န့ၣ်ပယီၤသုးကီၣ်ကးအဒြိဟဲတ့ၢ်လီၤဝဲမ့ၣ်ပိၢ်ဖဲ(တီကၠီၤပီၣ်)သဝီပှၤကၠိဖိဖံးလိမၤလိတၢ်လီၢ် ပူၤအဃိဘၣ်ဒိဝဲကၠိသရၣ်မုၣ်(၁)ဂၤ,ဖိသၣ်ကၠိဖိပိၥ်မုၣ်(၂)ဂၤဒီးကၠိလၢအဂၤတစှၤန့ၢ်(၅)ဖျၢၣ်ဘၣ်ပတုၥ်ဃၥ်သးအဂ့ၢ်န့ၣ်လၢၢ်ဒိၣ်ပှၤဘၣ်မူဘၣ်ဒါစံးဘၣ်ဝဲခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤ(၂၀)သီအနံၤန့ၣ်လီၤ. ပယီၤသုးကီၣ်ကးလၢအမ့ၢ်(စွ့ၤဝၣ်)သုးအံၤမ့ၢ်လၢဟဲတ့ၢ်လီၤဒြိမ့ၣ်ပိၢ်ဖဲ(တီကၠီၤပီၣ်)သဝီအပူၤဖဲပှၤကၠိဖိသ့ၣ်တဖၣ်မၤလိတၢ်အဆၢကတီၢ်အဃိဘၣ်ဒိဝဲကၠိသရၣ်မုၣ်ဒီးကၠိဖိသ့ၣ်တဖၣ်အမဲၥ်ညါတုၤကတီၢ်ခဲအံၤန့ၣ်ပယီၤသုးအံၤဟူးဂဲၤခးလီၤကျိဖးဒိၣ်,ကျိဖိဟဲအါထီၣ်ဝဲအဃိ(တီကၠီၤပီၣ်)သဝီတၢ်မၤလိကၠိဃုၥ်ဒီးဒူသဝီအဂၤကၠိသ့ၣ်တဖၣ်တၢ်ဘၣ်ပတုၥ်ဃၥ်ဝဲတၢ်မၤလိမၤဒိအဂ့ၢ်န့ၣ်လၢၢ်ဒိၣ်ကီၢ်ဆၣ်အပှၤကတိၤတၢ်ပၢၤပဒိၣ်စီၤဝါမုၢ်စံးဝဲဒ်အံၤန့ၣ်လီၤ. "ဖဲမဟါတၢ်ခးလီၤအဖီခိၣ်န့ၣ်ဟဲခးလီၤဝဲဒၣ်ဒီးဒြိမီၤနီၤ. အဝဲသ့ၣ်တၢ်ပညိၣ်အိၣ်ဒ်လဲၣ်န့ၣ်တဲလီၤတံၢ်တဘၣ်ဘၣ်. ဘၣ်ဖဲဖိသၣ်သ့ၣ် တဖၣ်မၤလိတၢ်အကတီၢ်လီၤ. ပှၤလၢအဘၣ်ဒိသ့ၣ်တဖၣ်န့ၣ်ကၠိဖိဃုၥ်ဒီးကၠိသရၣ်မုၣ်တဂၤမီၤနီၤ. ဒီးကတီၢ်အခဲအံၤန့ၣ်ကၠိဒုဘၣ် တၢ်ပတုၥ်ဃၥ်အီၤလီၤ. ဘၣ်မနုၤအဃိလဲၣ်န့ၣ်ဘၣ်ဖဲကၠိဖိသ့ၣ်တဖၣ်မၤလိတၢ်အဆၢကတီၢ်ဒီးကျိဖးဒိၣ်လီၤတဲၥ်န့ၣ်လီၤ. တုၤမုၢ်မ ဆါအံၤန့ၣ်ဒုၣ်ဒါခးလီၤကျိဖးဒိၣ်ဒီးကျိဖိအါထီၣ်အဖီခိၣ်န့ၣ်ဒူသဝီတနီၤတၢ်ဘၣ်ယိၣ်အိၣ်အဃိကၠိတနီၤန့ၣ်ဘၣ်တၢ်ပတုၥ်ဃၥ်အီၤလီၤ."အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ကၠိသရၣ်မုၣ်ဒီးပှၤကၠိဖိလၢအဘၣ်ဒိဒီးပယီၤသုးအဒြိသ့ၣ်တဖၣ်န့ၣ်မ့ၢ်ဝဲကၠိသရၣ်မုၣ်(နီၢ်ဆှံလါမူ)သးနံၣ်-၁၉နံၣ်,ကၠိဖိမုၣ်(မၣ်စွ့ၤစ့ၤအူ )သးနံၣ်-၆နံၣ်ဒီး(သူမူအ့ၤ)သးနံၣ်-၉နံၣ်သ့ၣ်တဖၣ်အံၤအသိးဘၣ်ဟးဂီၤကွံၥ်စ့ၢ်ကီးဝဲဒၣ်ဒီးတၢ်ဘါယွၤသရိၥ်တဖျၢၣ်လၢအမ့ၢ်ပှၤကၠိ ဖိသ့ၣ်တဖၣ်မၤလိမၤဒိးတၢ်ဖဲန့ၣ်အဂ့ၢ်န့ၣ်သ့ၣ်ညါဘၣ်လၢကီၢ်ဆၣ်ပှၤဘၣ်မူဘၣ်ဒါအအိၣ်န့ၣ်လီၤ. (တီကၠီၤပီၣ်)သဝီတၢ်မၤလိကၠိအံၤပှၤကၠိဖိခဲလၢၥ်အိၣ်ဝဲအဂၤ(၉၀)ဘျဲၣ်ဒီးအပူၤကွံၥ်သုးကီၣ်ကးတကပၤခးလီၤကျိဖးဒိၣ်အဃိကၠိတၢ်သူၣ်ထီၣ်ဘၣ်ဟးဂီၤကွံၥ်ဝဲဒၣ်အဂ့ၢ်န့ၣ်သ့ၣ်ညါဘၣ်အသိးအခဲအံၤတဘျီပယီၤသုးဒြိဟဲတ့ၢ်လီၤမ့ၣ်ပိၢ်ဘၣ်ဘၣ်ဟးဂီၤကွံၥ်ဝဲတၢ်ဘါယွၤသရိၥ်အံၤန့ၣ်မ့ၢ်ဝဲတၢ်သူၣ်ထီၣ်လၢကၠိဖိသ့ၣ်တဖၣ်ဖံးလိမၤလိဝဲတၢ်ဖဲန့ၣ်အဂ့ၢ်သ့ၣ်ညါဘၣ်စ့ၢ်ကီးန့ၣ်လီၤ. လၢန့ၣ်အမဲၥ်ညါ(စွ့ၤဝၣ်)ပယီၤသုးအံၤစးထီၣ်လၢလါနိၣ်ဝ့ဘၢၣ်(၁၈)သီ,(၁၉)သီလၢခံသီအတီၢ်ပူၤန့ၣ်ခးလီၤဝဲဒၣ်ကျိဖးဒိၣ်ဒီးကျိဖိသ့ၣ်တဖၣ်အိၣ်ဝဲအဘျီလၢအကယၤဘျဲၣ်ဃၣ်ဃၣ်အသိးမ့ၢ်လၢခးလီၤကျိဖးဒိၣ်,တ့ၢ်လီၤဒြိမ့ၣ်ပိၢ်သ့ၣ်တဖၣ်ဟဲအါထီၣ်ဝဲအဃိတကီၢ်ခါတၢ်အိၣ်သးကိၢ်ကိၢ်လၢၤလၢၤအခဲအံၤန့ၣ်(တီကၠီၤပီၣ်သဝီဃုၥ်ဒီးနိၣ်ညၣ်သုး,ပိလိနိၣ်ဖိ,ချၢၣ်တူၥ်ရဲ,မၣ်တီကူ,အ့နဲၣ်,သူကဘံ)သဝီကၠိသ့ၣ်တဖၣ်ဘၣ်ပတုၥ်ဃၥ်ဝဲကၠိအဂ့ၢ်န့ၣ်ပဒိၣ်စီၤဝါမုၢ်စံးအါထီၣ်ဝဲဒၣ်န့ၣ်လီၤ. လၢၢ်ဒိၣ်ကီၢ်ဆၣ်ဟီၣ်ကဝီၤအပူၤမ့ၢ်ဘၣ်ကွၢ်က့ၤလၢတၢ်မၤလိမၤဒိးတၢ်,တၢ်အိၣ်သးတခီန့ၣ်ကၠိဖိသ့ၣ်တဖၣ်သၢသီလွံၢ်သီတဘျီဘၣ်သုးလီၢ်သုးကျဲမၤလိတၢ်အိၣ်ဝဲဒ်န့ၣ်ဒီးခီဖျိပယီၤသုးအံၤမ့ၢ်လၢပၥ်ပနီၣ်ဝဲကၠိတၢ်သူၣ်ထီၣ်ဒ်တၢ်ခးပနီၣ်အဃိပှၤကၠိဖိသ့ၣ်တဖၣ်မၤလိတၢ်လၢကၠိတၢ်သူၣ်ထီၣ်အပူၤတဘူၣ်ဘၣ်အဖီခိၣ်ဘၣ်မၤလိက့ၤတၢ်လၢဟံၣ်တၢ်သူၣ်ထီၣ်အဂၤဒ်န့ၣ်လီၤအဂ့ၢ်န့ၣ်သ့ၣ်ညါဘၣ်န့ၣ်လီၤ. ဒ်န့ၣ်အသိးလၢၢ်ဒိၣ်ကီၢ်ဆၣ်ဟီၣ်ကဝီၤအပူၤတနံၣ်အံၤ(၂၀၂၄)နံၣ်တၢ်မၤလိနံၣ်အတီၢ်ပူၤအံၤတၢ်မၤလိကၠိလၢအဘၣ်ဟးဂီၤကွံၥ်ဝဲဒၣ်ဒီးပယီၤသုးကီၣ်ကးကဘီယူၤ,ကျိဖးဒိၣ်ဒီးဒြိသ့ၣ်တဖၣ်န့ၣ်မ့ၢ်ဝဲ(ထံပူၤလူၢ်သဝီတၢ်မၤလိကၠိ,မိခိၤတၢ်မၤလိကၠိ,လ့ၣ်ပ့ၤဝဲတၢ်မၤလိကၠိ,သမ့ၤအ့ကိတၢ်မၤလိကၠိ,တီကၠီၤပီၣ်တၢ်မၤလိကၠိ)သ့ၣ်တဖၣ်အဂ့ၢ်န့ၣ်သ့ၣ်ညါဘၣ်ဒ်ကီၢ်ဆၣ်အပှၤဘၣ်မူဘၣ်ဒါတၢ်ပၥ်ဖျါပူၤအသိးန့ၣ်လီၤ.
ကၠီၣ်တဲၣ်သုးစံး (BGF),မၤသံအီၣ်ကိၣ်ကိၣ်, (BGF)တပၤဂ့ၢ်လိၥ်
လါနိၣ်ဝ့ဘၢၣ် ၂၀သီ, ၂၀၂၄နံၣ်, ခ့ၣ်အဲးစံၣ် ကီၢ်ကၠီၣ်တဲၣ်, တး(ခ်)ကီၢ်ရ့ၣ်,မဲၢ်ဆီးဟီၣ်ကဝီၤ, ထၣ်စဲၤလူၣ်ဝၢၣ်,၇၀ (ရဲၣ်)တၢ်လီၢ်န့ၣ် တၢ်ကဲထီၣ်သးလၢ ပှၤကီၢ်ပယီၤဖိလၢအမ့ၢ် အီၣ်ကိၣ်ကိၣ် တဂၤဘၣ်တၢ်မၤသံအီၤဒီး ပှၤဖီၣ်မၤသံတၢ်န့ၣ်မ့ၢ်ဝဲ (BGF) သုးဖိသ့ၣ်တဖၣ်အဂ့ၢ် ကၠီၣ်တဲၣ်သုးစံးဘၣ်ဝဲ ကၠီၣ်တဲၣ်တၢ်ကစီၣ်သန့ Manager Online ဖဲ လါနိၣ်ဝ့ဘၢၣ် ၁၅သီအနံၤန့ၣ်လီၤ. ဒ်ကၠီၣ်တဲၣ်တၢ်ကစီၣ်သန့ Manager Onlineပၥ်ဖျါဝဲဒၣ်အသိးန့ၣ် ကၠီၣ်တဲၣ်သုး ခၠဖီၣ်ကံး ရၣ်ခၠါမနူ 431,ဖီၣ်ဒီးသမံသမိးဝဲ အီၣ်ကိၣ်ကိၣ်အံၤဝံၤဒီးပျၢ်လီၤက့ၤဝဲဒၣ်အဂ့ၢ်, ပျၢ်လီၤက့ၤဝဲဝံၤအလီၢ်ခံ (BGF)လၢအအိၣ်ဆီလီၤသးဖဲ တၢ်လီၢ်(၇၀ ရဲၣ်) (၁၅)ဂၤဖီၣ်အီၤဒီး စံးဝဲလၢအီၣ်ကိၣ်ကိၣ်အံၤမ့ၢ်ဝဲ ကၠီၣ်တဲသုးတၢ်မဲၥ်ချံအဃိမၤသံကွံၥ်ဝဲဝံၤဟဲကွံၥ်လီၤဝဲဆူကီၢ်ကၠီၣ်တဲၣ်တပၤအဂ့ၢ် ကၠီၣ်တဲၣ်သုးတကပၤပၥ်ဖျါဝဲဒၣ်န့ၣ်လီၤ. လၢတၢ်ဂ့ၢ်ဝဲအံၤအဖီခိၣ်န့ၣ် တၢ်လီၢ်ဝဲန့ၣ်လၢပယီၤကီၢ်တကပၤန့ၣ်မ့ၢ်ဝဲ Myawaddy complex,မဲးပူၣ်(သဲပုံ)Heng Sheng Cacino တၢ်လီၢ်ဒီးဖဲန့ၣ်သုးခိၣ်မီၣ်သိးအပှၤလၢအိၣ်ခိး ခၣ်စံၣ်နိၣ်အိၣ်ဘၣ်ဆၣ် လၢသူမွဲကျိဝၢ်ဘးခီတပၤန့ၣ်တလဲၤခီဝဲဒၣ်ဘၣ်အဂ့ၢ် (BGF)ဒုးယၤဟီၣ်ကဝီၤနီၣ်ဂံၢ်(၂)အဒုးယၤခိၣ် သုးခိၣ်ဒိၣ်စိစီၤတ့ၤဝ့ စံးဘၣ်ဝဲဒၣ် ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲလၢ“မ့ၢ်အိၣ်ဘူးဒီးခၣ်စံၣ်နိၣ်န့ၣ် ကမ့ၢ်ဝဲ မဲးပူၣ်(သဲပုံ)ဟ့ရှ့ Heng Sheng cacinoန့ၣ်လီၤ.မ့မ့ၢ်တၢ်လီၢ်ဖဲန့ၣ် န့ၣ်သုးခိၣ်မီၣ်သိးအပှၤအိၣ်ခိးခၣ်စံၣ်နိၣ်အိၣ်လီၤ.နၥ်က့လၢထံဝၢ်ဘးခီတပၤန့ၣ်တအိၣ်ဘၣ်.အအိၣ်ခိးတၢ်လၢခၣ်စံၣ်နိၣ်လီၤ.လၢန့ၣ်ပၤန့ၣ်တအိၣ်ဘၣ်.လၢအပူၤကွံၥ်ကီၢ်ဆၢဟီၣ်ကဝီၤတၢ်မ့ၢ်ကဲထီၣ်သးဒ်သိးပှၤဟုၣ်သိလ့ၣ်ဟဲဆူကီၢ်ပယီၤန့ၣ်ကၠီၣ်တဲၣ်သုးဆဲးကျိးပှၤပလူၤဃုစၢၤအဝဲသ့ၣ်ဒီးပမ့ၢ်ထံၣ်န့ၣ်အဝဲသ့ၣ်ဟဲဟံးန့ၢ်က့ၤဝဲအိၣ်န့ၣ်လီၤ.ဘၣ်ဆၣ်တၢ်ဂ့ၢ်တခါအံၤတဟဲဆဲးကျိးပှၤဘၣ်.တၢ်တခါအံၤတဲတဘၣ် ဘၣ်. ”အဂ့ၢ်စံးဝဲဒၣ်န့ၣ်လီၤ. ဒ်ကၠီၣ်တဲသုးပၥ်ဖျါဝဲဒၣ်အသိးန့ၣ် (BGF)လၢအမၤသံ အီၣ်ကိၣ်ကိၣ်န့ၣ်မ့ၢ်ဝဲဒၣ် (BGF)သုးရ့ၣ်(၁၀၂၂)ဒီးဟဲအိၣ်ဆီလီၤသးဖဲတၢ်လီၢ်ဝဲန့ၣ်ပှၤကညီ(၁၅)အဂ့ၢ်ပၥ်ဖျါဝဲဒၣ်န့ၣ်လီၤ.(BGF)...
(KORD)ဟ့ၣ်မၤစၢၤဝဲချၢၣ်လွံၢ်ထူၣ်ကီၢ်ရ့ၣ်ကမျၢၢ်ဘၣ်ကီဘၣ်ခဲ(၁၅၀၀)ဂၤဃၣ်ဃၣ်စ့တၢ်မၤစၢၤ
လါနိၣ်ဝ့ဘၢၣ် ၁၉သီ, ၂၀၂၄နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၃)ချၢၣ်လွံၢ်ထူၣ်ကီၢ်ရ့ၣ်မူကီၢ်ဆၣ်,ကီၢ်သူလ့ၤတၢ်ပၢဟီၣ်ကဝီၤအပူၤ,ကညီဂ့ၢ်ဝီၢ်အူတၢ်တိစၢၤမၤစၢၤဒီးတၢ်ဂုၤထီၣ်ပသီထီၣ်ကရၢ(KORD)လဲၤလီၤဟ့ၣ်မၤစၢၤဝဲကမျၢၢ်(၁၅၀၀)ဂၤဃၣ်ဃၣ်စ့တၢ်မၤစၢၤဖဲအပူၤကွံၥ်လါနိၣ်ဝဲဘၢၣ်(၁၂)သီအနံၤအဂ့ၢ်,ခ့ၣ်အဲၣ်ယူၣ်လီၢ်ခၢၣ်သးတၢ်ဘိးဘၣ်ရၤလီၤပၥ်ဖျါဝဲဒၣ်ဖဲတနံၤအံၤလါနိၣ်ဝ့ဘၢၣ်(၁၉)သီအနံၤန့ၣ်လီၤ. ချၢၣ်လွံၢ်ထူၣ်ကီၢ်ရ့ၣ်ကညီဂ့ၢ်ဂီၢ်အူတၢ်တိစၢၤမၤစၢၤဒီးတၢ်ဂုၤထီၣ်ပသီထီၣ်ကရၢပှၤဘၣ်မူဘၣ်ဒါတဖၣ်အံၤတီခိၣ်ရိၢ်မဲလဲၤဟ့ၣ်လီၤမၤစၢၤဝဲမူကီၢ်ဆၣ်ဒူသဝီ(၂)ဖျၢၣ်အပူၤ,ဟံၣ်ဒူၣ်(၂၇၈)ဖျၢၣ်,လီၢ်ကဝီၤဖိ(၁၄၈၄)ဂၤလၢစ့ပယီၤ(၁၄၀,၉၈၀,၀၀၀)ကၠးအိၣ်ဝဲဒီး,ကမျၢၢ်ဒူသဝီ(၂)ဖျၢၣ်အံၤမ့ၢ်ဝဲ(မ့ၣ်သလ့ၤ)ဒီး(ဆ့ပလဲ)သဝီတဖၣ်အဂ့ၢ်,ခ့ၣ်အဲၣ်ယူၣ်အတၢ်ပၥ်ဖျါအပူၤပၥ်ဖျါဝဲန့ၣ်လီၤ. လၢန့ၣ်အမဲၥ်ညါ,ဒူသဝီ(၂)ဖျၢၣ်လၢပှၤဘၣ်မူဘၣ်ဒါတဖၣ်လဲၤဟ့ၣ်လီၤဝဲတၢ်တိစၢၤမၤစၢၤအံၤ,သဝီလီၢ်ကဝီၤဖိသ့ၣ်တဖၣ်မ့ၢ်ဝဲပှၤလၢအတူၢ်ဘၣ်ဝဲသုးကီၣ်ကးအတၢ်သူဒြိခးလီၤတၢ်,ခးလီၤဝဲကျိဖးဒိၣ်သ့ၣ်တဖၣ်အဂ့ၢ်,ခ့ၣ်အဲၣ်ယူၣ်ပၥ်ဖျါစ့ၢ်ကီးဝဲန့ၣ်လီၤ. တကတီၢ်ဃီ,ချၢၣ်လွံၢ်ထူၣ်ကီၢ်ရ့ၣ်မူကီၢ်ဆၣ်အပူၤလီၢ်ကဝီၤဖိတဖၣ်အံၤ,အပူၤကွံၥ်လါအီးကထိဘၢၣ်အပူၤတၢ်စူၤထံဒိၣ်အဃိ,ဟံၣ်ဃီတၢ်သူၣ်ထီၣ်ဘှီထီၣ်တဖၣ်လီၤထွံလီၤဘှၢကွံၥ်ဝဲဒီး,ဆၣ်ဖိကီၢ်ဖိတဖၣ်ဘၣ်သံဝဲအါအါဂီၢ်ဂီၢ်အမဲၥ်ညါ,ကမျၢၢ်တၢ်သူၣ်အီၣ်ဖျးအီၣ်ဒီးစံၥ်လီၢ်ကျီးလီၢ်တဖၣ်ဘၣ်ဟးဂီၤကွံၥ်ဝဲအိၣ်ဝဲအဃိလီၢ်ကဝီၤဖိတဖၣ်သဂၢၢ်ဘၣ်ဝဲတၢ်ဃံးတၢ်စ့ၤအဂ့ၢ်,ခ့ၣ်အဲၣ်ယူၣ်ပၥ်ဖျါဝဲဒၣ်စ့ၢ်ကီးန့ၣ်လီၤ. တကတီၢ်ဃီ,သုးဟံန့ၢ်တၢ်စိကမီၤအလီၢ်ခံသုးက့(၃)ချၢၣ်လွံၢ်ထူၣ်ကီၢ်ရ့ၣ်လၢၢ်ဒိၣ်ကီၢ်ဆၣ်,မူကီၢ်ဆၣ်ဒီးဆီထံးကီၢ်ဆၣ်အပူၤကမျၢၢ်တဖၣ်အံၤတူၢ်ဘၣ်ဝဲသုးကီၣ်ကးအတၢ်မၤထီဒါပှၤဟီၣ်ခိၣ်ဖိခွဲးယၥ်အါကတၢၢ်အသိး,ခ့ၣ်အဲၣ်ယူၣ်ကီၢ်ရ့ၣ်သုးက့(၇)ဘ့ၣ်အကျါသုးက့(၃)ချၢၣ်လွံၢ်ထူၣ်ကီၢ်ရ့ၣ်အံၤမ့ၢ်ဝဲသုးက့တဘ့ၣ်လၢကမျၢၢ်လီၢ်ကဝီၤဖိတဖၣ်ဘၣ်ဃ့ၢ်မှံဟးဖျိးအါကတၢၢ်အဂ့ၢ်,သ့ၣ်ညါဘၣ်ဒ်ခ့ၣ်အဲၣ်ယူၣ်အတၢ်ပၥ်ဖျါအိၣ်ဝဲအသိးန့ၣ်လီၤ. ဒီးခီဖျိသုးကီၣ်ကးအတၢ်မၤထီဒါပှၤဟီၣ်ခိၣ်ဖိခွဲးယၥ်ဒီးကမျၢၢ်တဖၣ်ဘၣ်ဃ့ၢ်မှံဟးဖျိးဝဲအဃိ,(၂၀၂၁)နံၣ်လါဖ့ၤဘြူၤအါရံၤ(၁)သီတုၤလၢ(၂၀၂၄)နံၣ်လါယူၤအပူၤကီၢ်ဆၣ်(၃)ဘ့ၣ်အပူၤကမျၢၢ်ပှၤဃ့ၢ်မှံဟးဖျိးအိၣ်ဝဲတုၤလၢ(၄၃၀,၀၀၀)အဂ့ၢ်,သ့ၣ်ညါဘၣ်န့ၣ်လီၤ. ဒ်န့ၣ်အသိး,သုးဟံန့ၢ်တၢ်စိၤကမီၤအတီၢ်ပူၤ,ခီဖျိသုးကီၣ်ကးအတၢ်ခးတပျူၤတပျီၤကျိဖးဒိၣ်,ပညိၣ်ခးလီၤတၢ်,ဖီၣ်ကမျၢၢ်,မၤသံမၤဝီကမျၢၢ်,ပၥ်ကမျၢၢ်ဒ်သုးတၢ်ဒီသဒၢ,ဒွဲၣ်အူအီၣ်ကမျၢၢ်ဟံၣ်ဃီတၢ်လီၢ်တၢ်ကျဲဒီးမၤထီဒါဝဲပှၤဟီၣ်ခိၣ်ဖိခွဲးယၥ်လၢလီၢ်ကဝီၤဖိတဖၣ်အဖီခိၣ်အဃိ,ကမျၢၢ်လီၤကဝီၤဖိတဖၣ်ဘၣ်ဒိဘၣ်ထံး,ဘၣ်သံဝဲလၢတၢ်ဂ့ၢ်ကလုၥ်ကလုၥ်အိၣ်ဝဲခဲအံၤခဲအံၤအိၣ်ဝဲအဖီခိၣ်,ဟီၣ်ကဝီၤအပူၤကီၢ်ဆၣ်သၢဘ့ၣ်ဂ့ၢ်ဂီၢ်အူကညီတၢ်တိစၢၤမၤစၢၤကမံၥ်တံၥ်ပှၤဘၣ်မူဘၣ်ဒါတဖၣ်,ထီဒါဝဲသုးကီၣ်ကးအတၢ်မၤအံၤဒီးဃ့ထီၣ်ဝဲထံဂုၤကီၢ်ဂၤကရူၢ်ကရၢပှၤဘၣ်မူဘၣ်ဒါတဖၣ်လၢကဟံထီၣ်ဖီၣ်ထီၣ်သုးကီၣ်ကးတဖၣ်အရ့တုၤလီၤတီၤလီၤအဂီၢ်အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
(ဘီလီၤ)ပှၤသဝီဖိဘၣ်ဃ့ၢ်ပဒ့ၣ်အသးခီဖျိပယီၤသုးဟဲက့ၤအိၣ်ဆီလီၤအသးဘူးဒီးသဝီ
လါနိၣ်ဝ့ဘၢၣ် ၁၈ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဘျံးဒဝဲၢ်ကီၢ်ရ့ၣ်,တနီသရံၣ်ကီၣ်ဆၣ်ဟီၣ်ကဝီၤအပူၤဖဲတလါအံၤလါနိၣ်ဝ့ဘၢၣ်ထီၣ်အတီၢ်ပူၤအံၤမ့ၢ် လၢပယီၤသုးအသုးကျိၤလၢဟဲထီၣ်သ့ၣ်တဖၣ်က့ၤဂုၤလီၤအခံ,က့ၤအိၣ်ဆီလီၤအသးဘူးဒီး(ဘီလီၤ)သဝီအဃိ(ဘီလီၤ)ပှၤသဝီၤဖိသ့ၣ်တဖၣ်ဘၣ်ဃ့ၢ်ပဒ့ၣ်အသးအဂ့ၢ်န့ၣ်ကီၢ်ဆၣ်အပှၤဘၣ်မူဘၣ်ဒါစံးဝဲဒၣ်န့ၣ်လီၤ. ပယီၤသုးကီၣ်ကးအသုးကျိၤလၢအဂုၤလီၤက့ၤအခံတဖၣ်အံၤန့ၣ်မ့ၢ်ဝဲပယီၤသုးခီၣ်သုးရ့ၣ်(ခလရ-၄၃၈)ဒီး(ခလရ-၂၈၀)လၢအပူၤ ကွံၥ်လါစဲးပထ့ဘၢၣ်(၂)သီအနံၤဟဲထီၣ်ဟူးဂဲၤဝဲဒုးယၤတၢ်ဒုးတၢ်ဟူးတၢ်ဂဲၤဖဲ(တကဲး)ဟီၣ်ကဝီဒူသဝီတဖၣ်အပူၤန့ၣ်လီၤ.ပယီၤသုးအံၤမ့ၢ်လၢကညီဒီကလုၥ်သုးမုၢ်ဒိၣ်ဒီးတၢ်ပၢၢ်ဆၢသုးပၥ်ဖှိၣ်ခိးခးဝဲဒီးသံဘၣ်ဒိဘၣ်ထံးအါဝဲအဃိဘၣ်ဂုၤက့ၤဝဲအခံဒ်အံၤလီၤအဂ့ၢ်န့ၣ်လီၢ်ကဝီၤပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ. ပယီၤသုးကျိၤသ့ၣ်တဖၣ်အံၤဖဲအဝဲသ့ၣ်ဂုၤလီၤက့ၤအသးဒီးဟဲက့ၤအိၣ်ဆီလီၤအသးဖဲ(ကၠီၣ်ပိၤတီၤ)တၢ်လီၢ်,လၢအအိၣ်စီစုၥ်ဒီး(ဘီလီၤ)သဝီထဲ(၁)တၢၣ်အဃိပှၤသဝီဖိလၢအိၣ်(ဘီလီၤ)သဝီအပူၤ,ပှၤသၢပူခံပူန့ၣ်ဃ့ၢ်ပဒ့ၣ်အသးလၢခူပူၤဝ့ၢ်ပူၤဒီးအဘူးတံၢ်သ့ၣ်တဖၣ်အအိၣ်အဂ့ၢ်န့ၣ်တနီသရံၣ်ကီၢ်ဆၣ်ပှၤဘၣ်မူဘၣ်ဒါပဒိၣ်စီၤထံဝါစံးဝဲဒၣ်ဒ်အံၤန့ၣ်လီၤ. "ပယီၤသုးလၢအဟဲထီၣ်ဖဲ-(၅)တၢၣ်,(၆)တၢၣ်,ဘီလီ,ဘၣ်လဲၤ,တမံးလၥ်,ဆဲၣ်ခီ,ကွၠဲထ့ကိ)သဝီန့ၣ်အခဲအံၤပၥ်ဖှိၣ်အသးဒီးက့ၤ လီၤအိၣ်ဝဲလၢ(ဘီလီၤ)သဝီအဖီလၥ်မီၤနီၤ. အခဲအံၤပှၤသဝီဖိဖဲန့ၣ်တဖၣ်န့ၣ်အိၣ်တ့ၢ်က့ၤဝဲထဲသၢပူန့ၣ်တပူန့ၣ်လီၤ. ပှၤသဝီဖိတနီၤ နီၤန့ၣ်ဃ့ၢ်ပဒ့ၣ်အသးလၢတၢ်လီၢ်အဂၤအိၣ်ဝဲဒီးလၢဘျံးဝ့ၢ်,လၢတနီသရံၣ်ဝ့ၢ်တကပၤဒီးလၢအဘူးအတံၢ်အိၣ်သဝီအဂၤသ့ၣ်တဖၣ်အိၣ်ဝဲမီၤနီၤ." အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ပယီၤသုးလၢဟဲက့ၤအိၣ်ဆီလီၤအသးသ့ၣ်တဖၣ်အံၤအကျါပၣ်ဃုၥ်စ့ၢ်ကီးဝဲ(သၣ်ဖိမ့ၣ်သုးကလၢၤ, ဝၣ်ကွၠါသုးကလၢၤ, လၢၢ်ကၢၢ် သုးကလၢၤဃုၥ်ဒီးသ့ၣ်ဒီသုးကလၢၤ)အပှၤသ့ၣ်တဖၣ်ဒီးဒ်န့ၣ်အသိးပယီၤသုးလၢအိၣ်ဆီလီၤအသးသ့ၣ်တဖၣ်အံၤန့ၣ်အပှၤနီၣ်ဂံၢ်ခဲလၢၥ်အိၣ်ဝဲအဂၤ(၃၀)ဘျဲၣ်,(၄၀)ဃၣ်ဃၣ်,အိၣ်ဆီလီၤအသးဖဲကျဲမုၢ်ခိၣ်ယၢ်ခီယၢ်ပၤအဂ့ၢ်န့ၣ်ပဒိၣ်စီၤထံဝါစံးအါထီၣ်ဝဲဒၣ်န့ၣ်လီၤ. လၢန့ၣ်အမဲၥ်ညါသဝီ(ဘၣ်လီ,ဘၣ်လဲၤ,တကဲး,ညီၤပ့ၤကွ့)သဝီသ့ၣ်တဖၣ်အံၤန့ၣ်ပယီၤသုးကီၣ်ကးတကပၤပံးကွံၥ်ဝဲကျဲတၢ်လဲၤတၢ်က့ၤဆူတနီသရံၣ်ဝ့ၢ်ပူၤတကပၤအသိးပယီၤသုးအံၤဘၣ်ယိၣ်ဝဲလၢတၢ်ကနုၥ်လီၤခးဝဲတနီသရံၣ်ဝ့ၢ်အဃိဟဲက့ၤဂုၥ်က့ၤဝဲအလီၢ်ခံဒ်သိးဒီးကဟဲက့ၤဟံးန့ၢ်ဝဲတၢ်ဘံၣ်တၢ်ဘၢဒီးတၢ်ဒီသဒၢဝဲဝ့ၢ်အဂီၢ်အဂ့ၢ်န့ၣ်ပဒိၣ်စီၤထံဝါစံးအါထီၣ်စ့ၢ်ကီးဝဲဒၣ်န့ၣ်လီၤ. ဒ်န့ၣ်အသိးတနီသရံၣ်ကီၢ်ဆၣ်ဟီၣ်ကဝီၤအပူၤဖဲလါစဲးပထ့ဘၢၣ်အကတၢၢ်တနွံအတီၢ်ပူၤန့ၣ်ခီဖျိလၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးတၢ်ပၢၢ်ဆၢသုးပၥ်ဖှိၣ်ကရူၢ်တဖၣ်ဒီၣ်တဲၥ်ကွံၥ်ဝဲသုးကီၣ်ကးသ့ၣ်တဖၣ်တၢ်အီၣ်တၢ်အီဒီးတၢ်လဲၤတၢ်က့ၤကျဲအဃိပယီၤသုး(သ့ၣ်ဒီသုးကလၢၤဃုၥ်ဒီးသၣ်ဖိမ့ၣ်,လၢၢ်ကၢၢ်)သ့ၣ်တဖၣ်အံၤဘၣ်ဂုၤအခံပၥ်တ့ၢ်ကွံၥ်ဝဲအသုးကလၢၤအဂ့ၢ်န့ၣ်သ့ၣ်ညါဘၣ်န့ၣ်လီၤ.
(၁၃)သီအတီၢ်ပူၤတၢ်တက့ၤထံၣ်ဖိသၣ်ခံနံၣ်လီၤမၢ်ဒံးဘၣ်အဖီခိၣ်,မိၢ်ပၢ်လၢအဂၤဘၣ်ယိၣ်တၢ်လၢဖိလံၤဂီၢ်
လါနိၣ်ဝ့ဘၢၣ် ၁၈သီ, ၂၀၂၄နံၣ်, ခ့ၣ်အဲးစံၣ်, ခ့ၣ်အဲးယူၣ်ကညီဒီကလုၥ်စၢဖှိၣ်ကရၢ,သုးက့(၇)ဖၣ်အၣ်ကီၢ်ရ့ၣ်တန့ခၠါကီၢ်ဆၣ်ထံဖိစီသဝီအပူၤ(၁၃)သီအတီၢ်ပူၤတၢ်တက့ၤထံၣ်ဒံးဝဲလီၢ်အိၣ်ကဒုဖိသၣ်ခံနံၣ်လၢအလီၤမၢ်တဂၤအံၤဒံးဘၣ်အဖီခိၣ်,အမိၢ်အပၢ်ဖံဖုတဖၣ်အိၣ်ဝဲဒီးတၢ်သူၣ်ကိၢ်သးဂီၤဒီးသဝီပူၤမိၢ်ပၢ်လၢအဂၤတဖၣ်အိၣ်ဝဲဒီးတၢ်ဘၣ်ယိၣ်လၢအဖိအလံၤအဂီၢ်အဂ့ၢ်,လီၢ်ကဝီၤဖိတဖၣ်စံးဝဲန့ၣ်လီၤ. အပူၤကွံၥ်လါနိၣ်ဝ့ဘၢၣ်(၆)သီအနံၤအပူၤထံဖိစီသဝီအပူၤလီၢ်အိၣ်ကဒုဖိသၣ်(၂)နံၣ်(စွဲထဲၣ်)ကိး(ဖိခၠိၣ်)တဂၤအံၤ,လီၤမၢ်ကွံၥ်ဝဲသတူၢ်ကလၥ်ဒီးတၢ်လူၤဃုက့ၤဝဲယံၥ်လၢ(၁၃)သီလံဘၣ်ဆၣ်တၢ်တက့ၤထံၣ်ကဒါက့ၤဝဲဒံးဘၣ်အဃိအဘူးအတံၢ်တဖၣ်အိၣ်ဝဲဒီးတၢ်ဘၣ်ယိၣ်ဘၣ်ဘှီအဂ့ၢ်,ပှၤလၢကွၢ်ထွဲအီၤအဖံအဖုတဖၣ်စံးဝဲန့ၣ်လီၤ. ဒီးခီဖျိဖိသၣ်(၂)နံၣ်အံၤလီၤမၢ်ဝဲသတူၢ်ကလၥ်ဒီးတၢ်တထံၣ်က့ၤဒံးဘၣ်အဃိ,တကီၢ်ခါခဲအံၤသဝီပူၤမိၢ်ပၢ်လၢအဂၤလၢအအိၣ်ဒီးဖိဆံးဒံၣ်ဆံးတဖၣ်စ့ၢ်ကီးပျံၤတၢ်ဖုးတၢ်,ဘၣ်ယိၣ်ဘၣ်ဘှီဝဲတၢ်လၢအဖိတဖၣ်အဂီၢ်ဒီးဘၣ်အိၣ်ဝဲလၢတၢ်ပလီၢ်ပဒီသးထီဘိအပူၤအဂ့ၢ်,ထံဖိစီလီၢ်ကဝီၤပိၥ်မုၣ်တဂၤစံးဝဲဒ်အံၤန့ၣ်လီၤ. အဝဲစံးဝဲလၢ“ပဖိဆံးအိၣ်အဃိပအိၣ်ဒီးတၢ်ဘၣ်ယိၣ်ဘၣ်ဘှီလီၤ.ပလဲၤတၢ်မၤပပၥ်တ့ၢ်မးတဘူၣ်လၢၤဘၣ်.ခဲအံၤပှၤဟ့ၣ်ဟးကြီပှၤဖိတအိၣ်လၢၤဘၣ်.ပှၤပျံၤတၢ်န့ၣ်လီၤ.ခဲအံၤပှၤဟံၣ်အိၣ်ဘူးဘူးတံၢ်တံၢ်အဃိန့ၣ်,ပပၥ်တ့ၢ်ပသးတနၢၤနါက့ကိညၢ်ဒံး,တၢ်လီၤဆီအိၣ်တမံၤမံၤဒုပပၥ်တ့ၢ်တဘူၣ်ဘၣ်.စးထီၣ်ဖဲဖိသၣ်လီၤမၢ်ဝံၤအလီၢ်ခံပှၤအိၣ်ပလီၢ်က့ၤပှၤသးကိးဂၤလီၤ.ခဲအံၤပအိၣ်လၢပဒူသဝီပဘၣ်ပျံၤတၢ်ကိးမံၤလီၤ.ကျိဖးဒိၣ်ဒီးပဘၣ်ပျံၤ,တၢ်ဖိတၢ်လံၤလီၤမူၤလီၤမၢ်,ဖိဒံဖိသၣ်လီၤမၢ်ဒီးပဘၣ်ပျံၤန့ၣ်လီၤ.ပသဝီပူၤပှၤတၢ်ချၢလ့ၢ်ထီၣ်လ့ၢ်လိၤကိးနံၤဒဲးဒီဒူၣ်ဒီထၢန့ၣ်လီၤ.”အဂ့ၢ်စံးဝဲန့ၣ်လီၤ. လၢန့ၣ်အမဲၥ်ညါ,ထံဖိစီသဝီအပူၤအံၤသိလ့ၣ်ပှၤဟးထီၣ်က့ၤလီၤဖိတဖၣ်အါဝဲဒီး,ပှၤတၢ်ချၢလၢအဟးပှ့ၤဟးဆါတၢ်တဖၣ်နုၥ်လီၤဟးထီၣ်ဝဲအိၣ်အါဝဲတုၤလၢခဲအံၤအဖီခိၣ်,လီၢ်ကအိၣ်ကဒုဖိသၣ်(၂)နံၣ်လီၤမၢ်ကွံၥ်အလီၢ်ခံ,ဖိဒံဖိသၣ်ဒိၣ်ဆံးပြံသွါလၢအိၣ်ဆိးဝဲဖဲသဝီအပူၤဒီးသဝီခိၣ်ဃၢၤဟီၣ်ကဝီၤအပူၤတဖၣ်ပျံၤတၢ်ဖုးတၢ်,ဃ့ၢ်ဟီၣ်ကိးပသူဝဲဒၣ်ဖဲအထံၣ်ပှၤတၢ်ချၢတဂၤလၢ်လၢ်လၢနုၥ်လီၤလၢသဝီပူၤအခါအိၣ်ဝဲအဂ့ၢ်,ဖိသၣ်လၢအလီၤမၢ်တဂၤအံၤအဖံစံးဝဲဒ်အံၤန့ၣ်လီၤ. အဝဲစံးဝဲလၢ“ယလံၤလီၤမၢ်ယဃုက့ၤတုၤလၢခဲအံၤယတထံၣ်ဒံးဘၣ်.သိလ့ၣ်,ဆဲးကဲးတဖၣ်န့ၣ်လ့ၢ်ထီၣ်လ့ၢ်လိၤကျဲပူၤအါအဃိ,ဖဲဟီၣ်ကဝီၤဝဲအံၤအပူၤဖိသၣ်တဖၣ်ခဲအံၤပျံၤတၢ်ဒိၣ်မးန့ၣ်လီၤ.ပလဲၤဃုက့ၤယလံၤအခါ,ဖိသၣ်လၢအိၣ်ဘူးဖဲသဝီအံၤတဖၣ်ထံၣ်ပှၤဆိကမိၣ်ဝဲလၢပယီၤပှၤဟးဖီၣ်ဖိသၣ်အဃိ,စံၣ်ဟီၣ်ဝဲဒၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ. (စွဲၣ်ထဲၣ်)လီၢ်အိၣ်ကဒုဖိသၣ်(၂)နံၣ်လၢအလီၤမၢ်တဂၤအံၤအပူၤကွံၥ်အိၣ်ဝဲဒၣ်ဒီးအဖံအဖုလၢကီးတရံးဝ့ၢ်တကပၤဘၣ်ဆၣ်,ခီဖျိတၢ်ဒုးတၢ်ယၤဆူၣ်အဃိဟဲအိၣ်ကဒုဝဲအသးဖဲထံဖိစီသဝီဒီးအိၣ်ဆိးဝဲဒီးအဖံအဖုဖဲထံဖိစီသဝီသီခါဖၠၣ်အမဲၥ်ညါ,ကျဲမုၢ်ကပၤဟံၣ်လၢတၢ်ဒုးအိၣ်ဆိးကလီဆိဝဲအဝဲသ့ၣ်တဖျၢၣ်ဒီးအိၣ်ကဒုဆိဝဲအသးယံၤထီၣ်လၢတနံၣ်ဘျဲၣ်လံအဖီခိၣ်လၢတၢ်လုၢ်အီၣ်နီၢ်ခိသးသမူအဂီၢ်အဖံအဖုဆါဝဲကိၣ်ဖိနီဖိတၢ်ဆၢထံတဆံးတက့ၢ်လၢကျဲကပၤအိၣ်ဝဲအဂ့ၢ်,သ့ၣ်ညါဘၣ်ဒ်လီၢ်ကဝီၤဖိတဖၣ်စံးဝဲအသိးန့ၣ်လီၤ. ထံဖိစီသဝီအံၤ(၂)လါဘျဲၣ်အတီၢ်ပူၤတၢ်ကဲထီၣ်သးဒီးလီၢ်ကဝီၤဖိတဖၣ်ဒ်အံၤအိၣ်ဝဲ(၂)ဘျီလံဘၣ်ဆၣ်,ကမျၢၢ်တၢ်ဘံၣ်တၢ်ဘၢအဂီၢ်တၢ်မၤဃံးထီၣ်ဟီၣ်ကဝီၤတၢ်သိၣ်တၢ်သီလီၤလီၤဆီဆီတအိၣ်နီတမံၤဘၣ်အဂ့ၢ်လီၢ်ကဝီၤဖိတဖၣ်စံးဝဲဒၣ်န့ၣ်လီၤ.
ဖၣ်အၣ်ကီၢ်ရ့ၣ်အပူၤ,တၢ်ကပှ့ၤဟီၣ်ကဝီၤအပူၤဘုတဖၣ်အဂီၢ်တၢ်ကီတၢ်ခဲအိၣ်
လါနိၣ်ဝ့ဘၢၣ် ၁၇သီ, ၂၀၂၄နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,ဖၣ်အၣ်ကီၢ်ရ့ၣ်,လူၢ်ပျဲၢ်,တၢ်ြကဲၢ်,တန့ခၠါ,ထံလိၣ်ကီၢ်ဆၣ်(၄)ဘ့ၣ်သဝီတနီၤအပူၤ,တနံၣ်အံၤတၢ်စူၤခါအဆၢကတီၢ်,မူခိၣ်စူၤထံဒိၣ်ခိၣ်ယွၤကဲထီၣ်သးအဃိ,စံၥ်ပူၤဘုတဖၣ်ဟးဂီၤဝဲဒီးဘုဟးထီၣ်စှၤဝဲအဃိ,တၢ်ကပှ့ၤလီၢ်ကဝီၤအပူၤဘုအဂီၢ်တၢ်ကီတၢ်ခဲအိၣ်ဝဲအဂ့ၢ်,လီၢ်ကဝီၤဖိတဖၣ်စံးဝဲန့ၣ်လီၤ. ထံဒိၣ်ခိၣ်ယွၤဒီး,ဘုဖိတဖၣ်ဟး၈ီၤဝဲအဃိဟီၣ်ကဝီၤအပူၤဘုလၢအဟးထီၣ်တဖၣ်တဖၣ်အံၤတၢ်ကပှ့ၤအီၤတၢ်ကီတၢ်ခဲအိၣ်ဝဲအဃိ,တၢ်ဘၣ်ပှ့ၤဝဲဘုသး,ဟုသးလၢတၢ်ချၢအဂ့ၢ်,ဖၣ်အၣ်ကီၢ်ရ့ၣ်လီၢ်ကဝီၤဖိတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“ဘုထူၣ်တဖၣ်သံဝဲဒီဒူၣ်အဃိပှၤမၤစံၥ်ဖိတဖၣ်တဆါဝဲဘၣ်.ပၥ်ဝဲလၢကအီၣ်ဝဲအဂီၢ်လီၤ.ယၤဒုယပှ့ၤအီၣ်လၢဝ့ၢ်ပူၤလီၤ.ဟုသးဟဲလၢဝ့ၢ်ပူၤတဖၣ်ဒုတဂ့ၤအါဘၣ်.တဲၥ်ခံကုၥ်အိၣ်ဝဲန့ၣ်လီၤ.ပဖီညီနုၢ်ဟုသးဖဲအံၤအဃိ,ဘၣ်ဂီၢ်ဘၣ်ဒွါတစဲး.ဝ့ၢ်ပူၤဘုဒုကပုၥ်တစဲးဖိ.မ့ဝံၤပှၤဟဲက့ၤစိၥ်ဆါတၢ်တဖၣ်န့ၣ်တဲဝဲလၢစိၥ်တန့ၢ်အါအါဘၣ်.စိၥ်န့ၢ်ထဲအထၢၣ်(၁၀)အါကတၢၢ်လီၤ”အဂ့ၢ်စံးဝဲန့ၣ်လီၤ. ကီၢ်ဆၣ်တဖၣ်အပူၤဘုလၢဟးဂီၤတဖၣ်အံၤတၢ်ကက့ၤသူၣ်ကဒါက့ၤဝဲတညီလၢၤဘၣ်အဃိ,ဘၣ်ဂ့ၢ်ဘၣ်ဝီထဲဟီၣ်ကဝီၤအပူၤဘုဟးထီၣ်စှၤဝဲဒီးဟံၣ်ဖိဃီဖိတဖၣ်ကအီၣ်ကအီအဂီၢ်လီၤအဖီခိၣ်,တၢ်တဆါလီၤဝဲဘၣ်အဂ့ၢ်,ပှၤမၤအီၣ်စံၥ်ဖိတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“တနံၣ်အံၤထံဒိၣ်ဝံၤက့ၤသူၣ်ကဒါဘုတညီလၢၤဘၣ်.စဲၤခံနါက့ပၥ်စ့ၢ်.မဲးဒီးကပံးတဖၣ်နုၥ်လီၤလၢစံၥ်ပူၤအဃိက့ၤသူၣ်က့ၤတန့ၢ်လၢၤဘၣ်အဃိန့ၣ်ပတက့ၤဆါဘၣ်”အဂ့ၢ်စံးဝဲန့ၣ်လီၤ. လၢန့ၣ်အမဲၥ်ညါ,လူၢ်ပျဲၢ်တၢ်ကြဲၢ်,တန့ခၠါကီၢ်ဆၣ်တဖၣ်အပူၤဘုဖိတဖၣ်အံၤဟးဂီၤအါထီၣ်ဝဲဒီးကၢၢ်နံၤတၢ်လီၢ်တဖၣ်ဟးဂီၤဝဲဒီးကစၢၢ်ခီၣ်ထံးတၢ်ဘုဖိတဖၣ်အပူၤမဲး,လၢၢ်ဒီးကပံးတဖၣ်နုၥ်လီၤဝဲအဃိဘုလီၢ်အ့ကၢၣ်(၂၀၀)ဘျဲၣ်ကက့ၤသူၣ်က့ၤဝဲကီခဲဝဲအဂ့ၢ်,ဖၣ်အၣ်ကီၢ်ရ့ၣ်ခ့ၣ်အဲၣ်ယူၣ်စံၥ်ပှဲၤသူၣ်ဖျးဝဲၤကျိၤ,အဝဲၤကျိၤခိၣ်ခံစံးဝဲဒ်အံၤန့ၣ်လီၤ. အဝဲစံးဝဲလၢ“ဖၣ်အၣ်ကီၢ်ရ့ၣ်အပူၤဘုဟးဂီၤကအိၣ်လၢ(၆၀)မျးကယၤညါ.ဒူယီၢ်ဒီးထံလိၣ်တၢ်လီၢ်တဖၣ်အပူၤဘုဟးဂီၤသံဒုစှၤဝဲတစဲး.ပတယၥ်ဒုကအိၣ်ဝဲဖဲ(၄၀)မျးကယၤလီၤ.ခဲအံၤဟုသးအပှဲၤကထီၣ်အလါအလၤအိၣ်ဝဲ,အပူၤကွံၥ်နံၣ်အပူၤဘုတနၥ်န့ၣ်အပှ့ၤအိၣ်တကလးဃုကထိတနံၣ်အံၤတၢ်မၤတၢ်အိၣ်ဖှိၣ်ဒုဝံၤလံ.တၢ်နဲၣ်လီၤဒုတအိၣ်ဒံးဘၣ်.”အဂ့ၢ်စံးဝဲန့ၣ်လီၤ. ဖၣ်အၣ်ကီၢ်ရ့ၣ်အပူၤဘုတဖၣ်ဟးဂီၤဝဲအိၣ်အါမးဒီးဟုသး,ဘုသးတဖၣ်စှၤလီၤဝဲအဖီခိၣ်,လီၢ်ကဝီၤဖိတဖၣ်သူၣ်ကိၢ်သးဂီၤဝဲလၢဘုသးအပှ့ၤကထီၣ်အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ. ဒ်န့ၣ်အသိး,တကီၢ်ခါခဲအံၤ(၂၀၂၄)နံၣ်တၢ်စူၤခါဘုဒီး(၂၀၂၅)နံၣ်တၢ်ကိၢ်ခါဘုအဂီၢ်,တၢ်တယၥ်ဝဲလၢဘုအနၥ်(၁၀၀)န့ၣ်အပှ့ၤကအိၣ်ဝဲ(၉)ကလီၢ်တခီအိၣ်ဝဲအဂ့ၢ်,အပူၤကွံၥ်လါအီးကထိဘၢၣ်(၂၀)အနံၤအပူၤသုးကီၣ်ကးထုးထီၣ်ပၥ်ဖျါဝဲအိၣ်ဝဲန့ၣ်လီၤ.