လါအ့ဖြ့ၣ် ၈သီႇ၂၀၁၉နံၣ်ႇ စီၤမၠၣ်အူသၣ်
၀့ၢ်ဖၣ်အၣ်ႇ ဒူယီၢ်ဟီၣ်က၀ီၤအပူၤ သီခါလၢအဖျိးစိလၢတၢ်မၤလိအပူၤဒီး ၦၤကၠိဖိလၢအဖျိးစိ လၢတၢ်သိၣ်လိအပူၤတဖၣ်ခဲလၢာ်(၃၃)ဂၤသ့ၣ်တဖၣ်အံၤ ဒူယီၢ် တၢ်တိစၢၤမၤစၢၤ တၢ်ကူၣ်ဘၣ်ကူၣ်သ့ကရူၢ် ဟ့ၣ်လၤဟ့ၣ် ကပီၤက့ၤအ၀ဲသ့ၣ်ဖဲ (၆)ဘျီတဘျီ တၢ်ဟ့ၣ်လၤဟ့ၣ်ကပီၤ ၦၤဖျိးစိလံာ်အမူး ဖဲအ့ဖြ့ၣ် ၇သီ ဟါလီၤကတီၢ်လၢ ကီးနဲၣ်ထိၣ် သ၀ီဖျၢၣ်ထူပျီအပူၤန့ၣ်လီၤ.
ဒူယီၢ်ဟီၣ်က၀ီၤအပူၤ သီခါ (၄)ပါလၢအဖျိထီၣ် တီၤဖုၣ်ႇ တီၤခၢၣ်သးႇ တီၤထီတဖၣ်ဒီး ၦၤကၠိဖိလၢအဖျိထီၣ် အတီၤ (၁၀)ပဒိၣ်တၢ်ဒိးစဲးလၢ လံာ်ဖျိးစိ (၂၉)ဂၤသ့ၣ်တဖၣ်အံၤ ဘၣ်တၢ်ဟ့ၣ်လၤဟ့ၣ်ကပီၤဒီး ခိၣ်ဖးသ့ၣ်တဖၣ်န့ၣ်လီၤႉ တၢ်ရဲၣ်တၢ်ကျဲၤအံၤ မ့ၢ်၀ဲ သးစၢ်လၢအဖျိးစိတဖၣ် ကအိၣ်အါထီၣ်အဂီၢ်တၢ်ရဲၣ်တၢ်ကျဲၤတခါလီၤအဂ့ၢ်န့ၣ် ဒူယီၢ်တၢ်တိစၢၤမၤစၢၤတၢ်ကူၣ်ဘၣ်ကူၣ်သ့ကရူၢ် ၦၤတီခိၣ်ရိၣ်မဲတၢ် ကီၢ်ကလွ့ၤႇ စ့ၣ်တဲၣ်သူၣ်ခး သီခါဖးဒိၣ် အရှ့ၣ်ပညၣ်သၣ်မံၣ် စံး၀ဲန့ၣ်လီၤႉ
“ပတနီၤဖးတၢ်ဘူၣ်တၢ်ဘါဘၣ်ဒီးပဟ့ၣ်လၤဟ့ၣ်ကပီၤ၀ဲဖိသၣ်လၢအဖျိးစိတဖၣ်န့ၣ်လီၤႉ ဒ်သိးသးစၢ်သ့ၣ်တဖၣ် တၢ်ကူၣ်ဘၣ်ကူၣ်သ့ ကလဲၤထီၣ်လဲၤထီအဂီၢ် ပဟ့ၣ်လၤဟ့ၣ်ကပီၤ၀ဲဖိသၣ်လၢအဖျိးစိတဖၣ်လီၤ”အဂ့ၢ် ကီၤကလွ့ၤသ၀ီႇ စ့ၣ်သူၣ်ခးသီခါဖးဒိၣ် အရှ့ၣ်ပညၣ် သၣ်မံၣ် စံး၀ဲန့ၣ်လီၤႉ
တၢ်ဟ့ၣ်လၤဟ့ၣ်ကပီၤ ၦၤဖျိးစိမူးဘျီ၀ဲန့ၣ် ကၠိဖိလၢအဖျိထီၣ်အတီၤတဆံဃုာ်ဒီးလံာ်ဖျိးစိတဘ့ၣ်န့ၣ် တၢ်ဟ့ၣ်လီၤ၀ဲ လၢစ့ပယီၤ တကလီၢ်ကၠး ဒီး မ့မ့ၢ် တပွဲဒီးနဲၣ်လၢအဖျိးစိလၢ တိၤဖုၣ်အပတီၢ် တကလီၢ်ကၠးႇ တီၤခၢၣ်သးပတီၢ် ၂ ကလီၢ်ကၠးဒီး တီၤဒိၣ်အပတီၢ်န့ၣ် ၃ကလီၢ် ဃုာ်ဒီးလံာ်အုၣ်သးသ့ၣ်တဖၣ်န့ၣ်လီၤႉ
နါသဒၣ်ကၠံၣ်ရှ့ၣ်လၢအဒိးန့ၢ်တၢ်လၤကပီၤလၢလံာ်ဖျိးစိ(၃)ဘ့ၣ်အံၤ စံး၀ဲ“ဒ်ယဂုာ်ကျဲးစၢးအသိး ဒိးန့ၢ်ဘၣ်တၢ်ဟ့ၣ်လၤ ဟ့ၣ်ကပီၤဒ်အံၤအဖီခိၣ် သးခုဒိၣ်မးလီၤႉ ကဂုာ်ကျဲးစၢးလၢတၢ်ကူၣ်ဘၣ်ကူၣ်သ့တကပၤအါန့ၢ်ဒ်အံၤလီၤႉခါ ဆူညါကမၤလိတၢ်ကဂီၢ်တၢ်ကီတၢ်ခဲအိၣ်အဖီခိၣ် တၢ်မၤစၢၤအိၣ်ဒ်အံၤ ဂ့ၤဒိၣ်မးလီၤႉ ခီဖျိဒိးန့ၢ်ဘၣ်ခိၣ်ဖးဒ်အံၤ ယကက့ၤ သူကဒါက့ၤလၢတၢ်သိၣ်လိအဂီၢ် လံာ်လဲၢ်လၢလိၣ်တဖၣ်န့ၣ်လီၤႉ တနီၤန့ၣ် ကက့ၤကဟ့ၣ်လီၤယမိလီၤႉ”အဂ့ၢ် တဲဘၣ်ခ့ၣ် အဲးစံၣ်န့ၣ်လီၤ.
ဒူယီၢ်တၢ်တိစၢၤမၤစၢၤတၢ်ကူၣ်ဘၣ်ကူၣ်သ့ကရူၢ်အံၤ ဒူယီၢ်ဟီၣ်က၀ီၤအပူၤ သီခါတဖၣ် ဒုးအိၣ်ထီၣ်၀ဲ ဖဲ ၂၀၁၀နံၣ်ဒီး တၢ်ဒုးအိၣ်ထီၣ် ကရူၢ်အံၤ ၦဲၤထီၣ် ၃နံၣ်န့ၣ် တၢ်စးထီၣ် ဟ့ၣ်လၤဟ့ၣ်ကပီၤ၀ဲ တပွဲဖိႇ နဲၣ်ဒီး ဖံ၀ါသ့ၣ်တဖၣ်လၢအဖျိးစိလၢတၢ်မၤလိအပူၤလၢအဆိကတၢၢ်တဘျီန့ၣ်လီၤႉ ဒီး ဖဲကရူၢ်အံၤ ၦဲၤထီၣ် ၅နံၣ်န့ၣ် ဟ့ၣ်လၤဟ့ၣ်ကပီၤဃုာ်၀ဲကၠိဖိလၢအဖျိးစိလၢတၢ်မၤလိအပူၤတဖၣ်အဂ့ၢ် သ့ၣ်ညါဘၣ်လီၤ.
ဒူယီၢ်တၢ်တိစၢၤမၤစၢၤ တၢ်ကူၣ်ဘၣ်ကူၣ်သ့ကရူၢ် အစ့ပာ်ကီၤတခီန့ၣ် ဒိးန့ၢ်ဘၣ်၀ဲလၢ ဒူယီၢ်ဟီၣ်က၀ီၤပူၤ သ၀ီကရူၢ်(၇)ကရူၢ်အံၤ သီခါဖၠၣ်(၄၈)ဖျၢၣ် သီခါတဖၣ် ဒီး တကၣ်မုၣ်တကၣ်ခွါတဖၣ် အတၢ်မၤဘူၣ်လီၤအဖီခိၣ်န့ၣ်လီၤႉ တၢ်ဟ့ၣ်လၤဟ့ၣ်ကပီၤ ၀ဲၦၤဖျိးစိလၢတၢ်မၤလိအပူၤသ့ၣ်တဖၣ်အံၤ ကိးနံၣ်ဒဲးလၢသ၀ီတဖျၢၣ်ဘၣ်တဖျၢၣ်စုာ်စုာ်ဒီးလၢတနံၣ် အံၤလီၤဘၣ်လၢ လဲၣ်ကပၣ်သ၀ီကရူၢ်အဂ့ၢ်န့ၣ်လီၤ.
ဒူယီၢ်တၢ်တိစၢၤမၤစၢၤတၢ်ကူၣ်ဘၣ်ကူၣ်သ့ တၢ်ဟ့ၣ်လၤဟ့ၣ်ကပီၤ ၦၤဖျိးစိလံာ်တဖၣ် (၆)ဘျီတဘျီတၢ်ရဲၣ်တၢ်ကျဲၤအံၤ ဖၣ်အၣ်ကီၢ်ဆၣ် သီခါဖးဒိၣ်တဖၣ်ႇ ဒူယီၢ်ကရူၢ် ၦၤပၢဆှၢတၢ်ခိၣ်တဖၣ်ႇသုးခိးကီၢ်ဆၢနီၢ်ဂံၢ်(၁၀၁၆)ဒီး ကမျၢၢ်လၢသ၀ီအါဖျၢၣ်ခဲလၢာ်ဟဲထီၣ်အိၣ် ၦၤနီၢ်ဂံၢ် တကထိဘျဲၣ်အဂ့ၢ်န့ၣ်လီၤ.
