လါမ့ၤ ၃၀ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၅)ဟီၣ်က၀ီၤအပူၤ ဖဲလါမ့ၤ ၂၆ သီအနံၤန့ၣ် သုးခိးကီၢ်ဆၢ(BGF)လၢအအိၣ်ခိးကျဲတၢ်ဘံၣ်တၢ်ဘၢတဖၣ်အံၤခီဖျိကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)နုာ်လီၤခးအ၀ဲသ့ၣ်အဃိ BGF သံ (၅)ဂၤဒီး မၤန့ၢ်ဃုာ်၀ဲကျိချံၦာ်သၣ်သ့ၣ်တဖၣ်အဂ့ၢ်န့ၣ် ခ့ၣ်အဲၣ်ယူၣ်မုၢ်တြီၢ်ကီၢ်ရ့ၣ် ထုးထီၣ်ပာ်ဖျါ၀ဲဖဲလါမ့ၤ ၂၈ သီအနံၤန့ၣ်လီၤႉ
သုးခိးကီၢ်ဆၢ(BGF) သုးရ့ၣ်(၁၀၁၃)လၢအဟံကျဲတၢ်ဘံၣ်တၢ်ဘၢဖဲခ့ၣ်အဲၣ်ယူၣ်(သုးက့ ၅)ဟီၣ်က၀ီၤ မုၢ်တြီၢ်ကီၢ်ရ့ၣ် ၀ါဒူဒီးလၢၢ်ကွဲလာ်သ၀ီဘၢၣ်စၢၤ သိကျးတၢ်လီၢ်တတီၤအံၤသ့ၣ်တဖၣ် KNLA(သုးက့ ၅)၀ဲၤလီၢ်ခိၣ်သ့ၣ်အၦၤဒီး သုးရ့ၣ်(၁၀၂)အၦၤတဖၣ်နုာ်လီၤခးအ၀ဲသ့ၣ်လၢတၢ်တပာ်သူၣ်ပာ်သးပူၤအဂ့ၢ်န့ၣ် ခ့ၣ်အဲၣ်ယူၣ်မုၢ်တြီၢ်ကီၢ်ရ့ၣ် ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ
တၢ်နုာ်လီၤခး(BGF)ဘျီ၀ဲအံၤအပူၤန့ၣ်တၢ်မၤန့ၢ်၀ဲ(M-16 AR)လွံၢ်ခိၣ်ဒီးအချံ(၃၂၀)ဖျၢၣ်ႇ (M-79)ကျိတခိၣ် ဒီးအချံ(၁၇)ဖျၢၣ်ႇ(9-MM)ကျိတခိၣ်ႇ (AR)ဆၣ်ဒၢ(၄)ခါႇ သုးဂီၤကၢ်(၄)စိၢ်ႇ စဲးကတိၤတၢ်တဖျၢၣ်ဒီး ထၢၣ်၀ံချၢ(၆)ဖျၢၣ် အဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါတၢ်ခးလိာ်သးဘျီ၀ဲအံၤအပူၤန့ၣ်(BGF)သံ ၅ ဂၤဘၣ်ဆၣ် မ့မ့ၢ်(KNLA)တကပၤန့ၣ် တၢ်သံတၢ်ဘၣ်ဒိဘၣ်ထံးတအိၣ်၀ဲနီတမံၤဘၣ်အဂ့ၢ်(ခ့ၣ်အဲၣ်ယူၣ်)စံး၀ဲဘၣ်ဆၣ်ဘၣ်ဃးတၢ်သံတၢ်ဘၣ်ဒိဘၣ်ထံးတၢ်အိၣ်သးအံၤန့ၣ်ပခ့ၣ်အဲးစံၣ်–ကညီတၢ်ကစီၣ်ပာ်ဂၢၢ်ပာ်ကျၢၤ၀ဲလီၤလီၤဆီဆီတန့ၢ်ဒံး၀ဲဘၣ်န့ၣ်လီၤႉ
ဒ်န့ၣ်အသိးဖဲအပူၤကွံာ်လါမ့ၤ ၂၄ သီအခါစ့ၢ်ကီး KNLA(သုးက့ ၅)အၦၤလဲၤခးပယီၤသုးကလၢၤ လၢအိၣ်မုၢ်တြီၢ်ကီၢ်ရ့ၣ် လၢၢ်မုၢ်ပျီကီၢ်ဆၣ် ယိၤဒိၣ်ခိၣ်ဒီးယူၤကိၤလီၤဟီၣ်က၀ီၤပူၤအံၤအခါန့ၣ်စ့ၢ်ကီး ပယီၤသုးသံဒံး(၃)ဂၤအဂ့ၢ်န့ၣ် ခ့ၣ်အဲၣ်ယူၣ်မုၢ်တြီၢ်ကီၢ်ရ့ၣ်ထုးထီၣ်ပာ်ဖျါတ့ၢ်ဃာ်၀ဲန့ၣ်လီၤႉ
