လါအီကူာ် ၁၅ သီႇ၂၀၁၉နံၣ်ႇ န့ၣ်နီၣ်
ကညီလါခူးကံၢ်စု တၢ်ရဲၣ်တၢ်ကျဲၤအံၤ ဘၣ်တၢ်မၤအီၤလၢ ကညီကီၢ်စဲၣ် ရၤမတံ၀့ၢ် က၀ီၤဒ့ ၅ႇ နီၢ်ဂံၢ် ၂ တိၤ ကျဲမုၢ်ကပၤ ထၣ်၀ရၣ် ကညီနံၣ်ထီၣ်သီပျီပူၤဖဲ လါအီကူာ် ၁၅ အနံၤႇ ဂီၤခီ ၉ နၣ်ရံၣ်ကတီၢ် ၦၤနီၢ်ဂံၢ်ခဲလၢာ်ဟဲထီၣ် ၅၀၀ ဘျဲၣ် ဟဲထီၣ်မၤလၤကပီၤသကိး၀ဲန့ၣ်လီၤ.
တၢ်ရဲၣ်တၢ်ကျဲၤ၀ဲန့ၣ်အပူၤ ခ့ၣ်အဲၣ်ယူၣ် ကညီဒီကလုာ်စၢဖှိၣ်ကရၢ အကရၢခိၣ် သုးခိၣ်ကျၢၢ်စိ စီၤမူးတူစ့ဖိႇ ခ့ၣ်အဲၣ်ယူၣ် ထီဘိကမံးတံာ် ပဒိၣ်မါည့မီၣ်ႇ ကညီတၢ်ထူၣ်ဖျဲးသုးမုၢ်ဒိၣ်(KNLA) သုးက့ ၇ ဒုးယၤခိၣ် သုးခိၣ်ဒိၣ်စိ စီၤဖီဒိၣ်ႇရၤမတံ ၦၤပၢဆှၢရဲၣ်ကျဲၤတၢ် အူတ့စၣ်အီၣ်ႇ ပယီၤသုးၦၤဘၣ်မူဘၣ်ဒါ တနီၤဒီး ကီၢ်ပဒိၣ်၀ဲၤကျိၤ ဘၣ်မူဘၣ်ဒါတဖၣ် ဟဲထီၣ်မၤလၤကပီၤ၀ဲန့ၣ်လီၤ.
တၢ်ရဲၣ်တၢ်ကျဲၤ ၦၤပၢၤလီၢ်ဆ့ၣ်နီၤ (KNLA)သုးက့ ၇ႇ ဒုးယၤခိၣ် သုးခိၣ်ဒိၣ်စိ စီၤဖီဒိၣ် တဲလီၤ၀ဲလၢ တၢ်အအိး ထီၣ်တၢ်ရဲၣ်တၢ်ကျဲၤမူးအပူၤလၢ တၢ်မၤ၀ဲကညီလါခူးကံၢ်စုအံၤ တဘၣ်ဃးဒီး တၢ်ဘူၣ်တၢ်ဘါဘၣ်ႇ မ့ၢ်ဒၣ်လၢ ကညီဖိတဖၣ် ကအိၣ်ဃူအိၣ်ဖိးအဂီၢ် တၢ်မၤအီၤအဂ့ၢ်န့ၣ်လီၤ.
ရၤမတံ ကညီလါခူးကံၢ်စု တၢ်ဒုးလိၣ်ထီၣ်ဖးထီၣ်ကမံးတံာ် နါမၠးစ့ၣ်တဲ၀ဲ“ကညီလါခူးကံၢ်စုအံၤ သူၣ်ဘီၣ်သးစၢ်တဖၣ် ကဟံးထီၣ်ဖီၣ်ထီၣ် မူဒါတဆီဘၣ်တဆီအဂီၢ် လၢကပၢၤဃာ်က့ၤအဂီၢ်သနာ်က့ ပ၀ဲပမူဒါအိၣ်န့ၣ်လီၤႉ မ့ၢ်ဒၣ်တၢ်ဒုးနဲၣ်ကျဲ အ၀ဲသ့ၣ်ဒ််ခိၣ်နၢ်တဂၤအသိးန့ၣ်လီၤ”အဂ့ၢ် တဲ၀ဲန့ၣ်လီၤႉ
တၢ်ရဲၣ်တၢ်ကျဲၤအပူၤ ခ့ၣ်အဲၣ်ယူၣ် ကရၢခိၣ် သုးခိၣ်ကျၢၢ်စိ စီၤမူးတူစ့ဖိ ဃုာ်ဒီးၦၤဘၣ်မူဘၣ်ဒါတဖၣ် ကတိၤလီၤတၢ်ႇ တၢ်ဖးဖျါထီၣ်၀ဲ ကညီလါခူးကံၢ်စုဟဲကဲထီၣ်အသးႇ ၦၤမၤစၢၤတၢ်လၢ လါခူးကံၢ်စုအဂီၢ် တၢ်ဟ့ၣ်လီၤက့ၤ တၢ်လၤကပီၤတဖၣ်ႇ၂၀၁၈,၁၉ တၢ်သိၣ်လိနံၣ်အပူၤ ကညီကၠိဖိမုၣ်ခွါလၢ အဖျိထီၣ် ဖၠၣ်စိမိၤကၠိပတြီာ်တဖၣ် တၢ်ဟ့ၣ်လၤကပီၤအ၀ဲသ့ၣ်ႇ ဖံဖုတဖၣ် ထုကဖၣ်သၣ်ကမဲၤလၢ တၢ်ကံၢ်စုအဂီၢ်၀ံၤ ကမျၢၢ်လၢဟဲထီၣ်တဖၣ် ကံၢ်စုအခါ လၢတၢ်သူၣ်ဖှံသးညီအဂီၢ် ကညီၦၤသး၀ံၣ်တၢ်ဖိတဖၣ် သူၣ်၀ံၣ်သးဆၢတၢ်န့ၣ်လီၤ.
တၢ်လၢကညီလါခူးကံၢ်စုအမူးအံၤ ဒ်သိး၀ံကလၤတဖၣ် သုတဟးဖျိးဟးမှံၤတဂ့ၤအဂီၢ်ႇ ဒ်သိးကပူၤဖျဲးလၢၦှၤဂၤ အတၢ်လံၣ်တၢ်လီအဂီၢ်ႇ ကလၢၦဲၤဒီးတၢ်အိၣ်ဆူၣ်အိၣ်ချ့ဒီး ကမၤန့ၢ်အီၣ်ကဲႇ ဒ်သိးဘူးတံၢ်တဖၣ် ကက့ၤထံၣ်လိာ်အသးအဂီၢ် တၢ်ပညိၣ်အီၤဒီး ဘၣ်တၢ်မၤလၤကပီၤက့ၤ တနံၣ်တဘျီန့ၣ်လီၤႉ
ဖဲလၢတၢ်ကံၢ်စုတၢ်ရဲၣ်တၢ်ကျဲၤအကတီၢ် တၢ်စူးကါ၀ဲ တၢ်ဖိတၢ်လံၤ ၇ ခါလၢအမ့ၢ် တကွံသၣ်ႇပအံႇမ့ၤတီၤဒုၣ်ႇဖီဂံၢ်ႇလုၣ်၀ါႇထံဒီး ကထံပိၤတဖၣ်ဒီး တၢ်နာ်အီၤလၢ ကလၤလၢအဟးတဖၣ် လၢတၢ်ကိးက့ၤအီၤအဂီၢ်ကံၢ်န့ၢ်၀ဲလုၣ်၀ါလၢအစုဒ့ကိာ်န့ၣ်လီၤ.
ဒ်ဖံဖုလၢညါတဖၣ်တၢ်နာ်အသိးလၢတၢ်နာ်ထွဲဒီးပာ်ကဲပၢၤဃာ်အဂီၢ် တၢ်မၤ၀ဲ လါခူးကံၢ်စုအံၤ စးထီၣ်လၢ လါခူးထီၣ် ၁ သီတုၤ လါခူးလၢာ်ဒီတလါ တၢ်မၤအီၤလၢ ဟံၣ်ဖိဃီဖိတဒူၣ်အိၣ်မ့ၢ်ဂ့ၤႇ ဘူးတံၢ်တဒူၣ်တထၢမ့ၢ်ဂ့ၤႇ ဒူသ၀ီအသိးမ့ၢ်ဂ့ၤ ကညီဖိလၢ အအိၣ်လၢ တၢ်လီၢ်ကိးတီၤဒဲးမၤလၤကပီၤ၀ဲ ဒ်တၢ်စူၣ်တၢ်နာ်အိၣ်တ့ၢ်၀ဲအသိးန့ၣ်လီၤ.
