Home တၢ်ကစီၣ် ကစၢၢ်လာ်အဃိ ကျီးလီၢ်လၢအဟးကွံာ်တဖၣ် တၢ်ကက့ၤသူၣ်ထီၣ်အဂီၢ်ကီခဲ

ကစၢၢ်လာ်အဃိ ကျီးလီၢ်လၢအဟးကွံာ်တဖၣ် တၢ်ကက့ၤသူၣ်ထီၣ်အဂီၢ်ကီခဲ

813
0

လါစဲးပထ့ဘၢၣ် ၁၀ သီႇ၂၀၁၉နံၣ်ႇစီၤမၠးအူသၣ်ႉ

တလၢၤကီၢ်စဲၣ်ႇယ့ကီၢ်ဆၣ် (ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ၀ီၢ်ရီကီၢ်ဆၣ်) ကျီးခၠဲ (ကၠီၣ်တဲၤ) ကရူၢ်ဒီး လ့ၣ်ပိးကရူၢ်အပူၤ ဖဲလါအီကူးထီၣ်သီကတီၢ် ထံကျိဒိၣ်ထီၣ်ဒီး ကစၢၢ်လာ်အဃိ ကမျၢၢ်တဖၣ် အသဲးကျီးႇ ပနီကျဲကျီးႇ ရီဘၢၣ်ကျီတဖၣ်ဟးဂီၤကွံာ်၀ဲအဃိ လၢတၢ်ကက့ၤသူၣ်က ဒါက့ၤအီၤအဂီၢ် တၢ်ကီတၢ်ခဲအိၣ်အဂ့ၢ် လီၢ်က၀ီၤဖိတဖၣ် တဲဘၣ် ခ့ၣ်အဲးစံၣ်န့ၣ်လီၤႉ

လ့ၣ်ပိးသ၀ီဖိ စီၤကၠီၣ်မိတဲ၀ဲ“ကစၢၢ်လာ်အဃိ သဲးကျီးႇ ပနီကျဲကျီးဒီး နဲးထူၣ်တဖၣ် ဟးဂီၤဖးအါညါႉ ဟံၣ်ဖိဃီဖိတၢ်လုၢ်အီၣ်သးသမူဒီး ဖိသၣ်တၢ်ကူၣ်ဘၣ်ကူၣ်သ့ႇ ဆူၣ်ချ့အဂီၢ် ဘၣ်ဒိးသန့ၤထီၣ်သးလၢ တၢ်ထူၣ်တၢ်ဘိတဖၣ်အံၤအိၣ် ၁၃ နံၣ်လံႉ ဘၣ်ဟ့ၣ်တၢ်ဆၢကတီၢ်သူၣ်အီၤ လၢနံၣ်ယံာ်အဃိ ဟးဂီၤကွံာ်လၢ တၢ်သတူၢ်ကလာ်အပူၤ ပနီကျဲအထူၣ် ၅၀၀ ခဲလၢာ်လီၤႉ သဲးထူၣ် ၃၀၀ နဲးထူၣ် ၇၀၀ ပၣ်ဃုာ်၀ဲလီၤႉ ကအိၣ်မူအဂီၢ် တၢ်ကီတၢ်ခဲအိၣ်ဖးဒိၣ်လီၤ”အဂ့ၢ် စံး၀ဲန့ၣ်လီၤႉ

ယ့ကီၢ်ဆၣ်အပူၤ ကျီးခၠဲ(ကၠီၣ်တဲၤ) သ၀ီႇလ့ၣ်ပိးႇ အဘၠီးႇ မရဲခၠီႇ နဲးကၠံႇကဲတီႇမ့တပၠ့ႇဆီထၣ်ႇနဲၣ်ပၠါႇကမိသ၀ီတဖၣ်အပူၤ လၢအပူၤကွံာ် လါအီကူာ် ၁၁ သီအနံၤ မူခိၣ်စူၤတပတုာ်ဘၣ်ဒီး ထံဒိၣ်ထီၣ်ဒီးကစၢၢ်လာ်အဃိ ကျီးလၢအအိၣ်လၢထံကျိနံၤတဖၣ် ကစၢၢ်လာ်အဃိ သဲးကျီးႇ ပနီကျဲကျီးႇ ရီဘၢၣ်ကျီးဒီး နဲးကျီးတဖၣ် ဟီၣ်ခိၣ်တဖၣ် လုၢ်ဘၢကွံာ်အီၤခဲလၢာ်န့ၣ်လီၤႉ

ယ့ကီၢ်ဆၣ် ဘျီၣ်ဒိၣ်ခၢၣ်စး အူခၠ့းတ့ၣ်တဲ၀ဲ“လၢပကီၢ်ဆၣ်အပူၤ (NLD)တကပၤ လဲၤမၤစၢၤအ၀ဲသ့ၣ် အိၣ်လီၤႉ အ၀ဲသ့ၣ် တၢ်လီၢ်သနာ်က့ တၢ်လဲၤတၢ်က့ၤ တဂ့ၤအါအါဘၣ်ႉ မ့ၢ်တုၤလၢ တၢ်ယီၤခါကတီၢ်မး တလၢၤကီၢ်စဲၣ်ပဒိၣ် ကရဲၣ်ကျဲၤန့ၢ်အ၀ဲသ့ၣ်လီၤႉ မ့မ့ၢ်လၢယၤတကပၤ လၢကလဲၤမၤစၢၤအဂီၢ် တၢ်လဲၤတၢ်က့ၤကီခဲအဃိ တတဲတၢ်နီတမံၤဒံးဘၣ်ႉ ၁၉ သီအနံၤခဲကၢာ် ယကသံကွၢ်လၢ ဘျီၣ်ဒိၣ်အပူၤ တီၣ်ထီၣ်ဃာ်လံာ်၀ံၤလံ”အဂ့ၢ် တဲဘၣ်ခ့ၣ်အဲးစံၣ် ဖဲလါအီကူး ၉ သီအနံၤန့ၣ်လီၤႉ

“ကီၢ်ပဒိၣ်တကပၤ ဟဲမၤစၢၤတအိၣ်နီတမံၤဘၣ်ႉ ၦၤမၤစၢၤတၢ်ကရူၢ်တဖၣ်ဒု ဟဲမၤစၢၤဘုသးတဖၣ်လီၤႉ ဆှၢထီၣ်ဃာ်တၢ်ဟးဂီၤစရီတဖၣ်လၢ ခ့ၣ်အဲၣ်ယူၣ် အအိၣ်လီၤႉ နံၣ်လၢကဟဲ ကျီးဒီးဟီၣ်ခိၣ် ခိသွဲလၢကဘၣ်ဟ့ၣ် ကစှၤလီၤဧါအဂီၢ်ႉ ကျီးတနီၤ တၢ်မုၢ်လၢ်တအိၣ်လၢၤဘၣ်ႉ ကက့ၤသူၣ်တကဲ ထီၣ်နီတမံၤလၢၤဘၣ်ႉ ဟီၣ်ခိၣ်တဖၣ်န့ၣ် ကဲထီၣ်၀ဲကပံာ်လၢာ်လံႉ ကစၢၢ်တနီၤ ဟီၣ်ခိၣ်တဲၤထီၣ်လံ ဘၣ်လဲၤလၢ တၢ်ပလီၢ်အပူၤလီၤ”အဂ့ၢ ကျီးခၠဲသ၀ီၦၤပၢဆှၢရဲၣ်ကျဲၤတၢ် စီၤသီစ့တဲ၀ဲန့ၣ်လီၤႉ

ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ၀ီၢ်ရီကီၢ်ဆၣ် နဲၣ်ရွဲၣ် ပဒိၣ်စီၤအဲၣ်ဒါတဲစ့ၢ်ကီး၀ဲလၢ ပထၢဃာ်ကမျၢၢ်တဖၣ် ကျီးအတၢ်ဘၣ်ဒိဘၣ်ထံး၀ံၤ လၢတၢ်ကက့ၤသူၣ်ထီၣ်က့ၤသးအဂီၢ် ပကတဲသကိးဒီး ၦၤဘၣ်မူဘၣ်ဒါတဖၣ်အဂ့ၢ် တဲဘၣ် ခ့ၣ်အဲးစံၣ်န့ၣ်လီၤႉ

တလၢၤကီၢ်စဲၣ်ဒီး ကညီကီၢ်စဲၣ်အပူၤ ဖဲအပူၤကွံာ် လါအီကူးကတီၢ် မူခိၣ်စူၤတပတုာ်ဘၣ်ထံဒိၣ်ထီၣ်ဒီး ကစၢၢ်လာ်၀ဲအဖီခိၣ် ဟံၣ်တဖၣ်ႇကျဲႇတိၤႇစံာ်ႇကျီး ဒီးတၢ်ဘုၣ်အီၣ်ဘုၣ်အီတၢ်မၤတဖၣ် ဟးဂီၤဘၣ်ဒိၣ်၀ဲဒီး တုၤကတီၢ်အံၤ လၢတၢ်ကက့ၤသူၣ်ထီၣ်က့ၤအဂီၢ် တၢ်ကီတၢ်ခဲအိၣ်၀ဲအဂ့ၢ် လီၢ်က၀ီၤဖိတဖၣ် တဲ၀ဲန့ၣ်လီၤႉ