လါအီးကထိဘၢၣ် ၁၃ သီႇ ၂၀၂၀ နံၣ်ႇ စးအဲၣ်ဆူ

KNU- ကညီဒီကလုာ်စၢဖှိၣ်ကရၢ သုးက့(၆)ႇ သုးရ့ၣ်(၁၆)ၦၤဘၣ်မူဘၣ်ဒါတဖၣ် ထံၣ်၀ဲဒၣ်ကသံၣ်မူၤဘှီးတဖၣ် လၢလီၢ်က၀ီၤသ၀ီဖိ(၃)ဂၤအအိၣ်ဒီး ဖီၣ်က့ၤကိး၀ဲဒၣ်အဖီခိၣ် ကညီကီၢ်စဲၣ် ပဒိၣ်အံၤ ဖဲလါအီးက ထိဘၢၣ်(၈)သီအနံၤန့ၣ် ဆှၢထီၣ်လံာ်ထီဒါဆူ တၢ်အိၣ််ခိးကွၢ်စူၣ်ကယာ်တၢ်ပတုာ်တၢ်ခးသဃဲၤကမံးတံာ်(JMC-S)အအိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲအပူၤကွံာ် လါအီးကထိဘၢၣ်(၅)သီအနံၤ သၤဖၠူၤစယၣ်ကီၢ်ဆၣ်ႇ အတွ့စခါကၠံသ၀ီပူၤ KNU သုးက့(၆)ႇ သုးရ့ၣ်(၁၆) သုးဒ့(၃) သုးခိၣ်(၂) ဖိထိဃုာ်ဒီးအၦၤခံဂၤလၢအတကူသုးကူသုးကၤစိာ်၀ဲဒၣ်ဒီးကျိဖိအံၤ ထံၣ်၀ဲဒၣ် ကသံၣ်မူၤဘှီး ၁၄၀ ဖျၢၣ် လၢၦၤသ၀ီဖိ ၃ဂၤ အအိၣ်၀ံၤ ဖီၣ်က့ၤကိး၀ဲဒၣ်လီၤအဂ့ၢ် လၢလံာ်ထီဒါအပူၤ ပာ်ဖျါ၀ဲန့ၣ်လိၤႉ

ဘၣ်ထွဲဒီးတၢ်ဖီၣ်က့ၤကိး၀ဲဒၣ်တၢ်ဂ့ၢ်အံၤ KNU တကပၤ ဒ် NCA တၢ်သးလီၤပလိာ်လံာ်ဃံးဃာ်အိၣ်ပာ်အသိး ကလူၤပိာ်မၤထဲွ၀ဲအဂ့ၢ်ႇ ပၢပြးတၢ်ဖံးတၢ်မၤတဖၣ်န့ၣ် တၢ်တဘၣ်နုာ်လီၤမၤတံာ်၀ဲဘၣ်ဒီးႇ ၦၤလၢတၢ်ဖီၣ်၀ဲတဖၣ် ဒ်တၢ်ဘျၢသဲစးအိၣ်အသိး ဟံးထီၣ်ဖီၣ်ထီၣ်၀ဲကန့ၢ်အဂီၢ် ကဟ့ၣ်လီၤက့ၤဆူကီၢ်ပဒိၣ်ပၢၤကီၢ်အစုပူၤအဂ့ၢ်န့ၣ် ကီၢ်စဲၣ်ပဒိၣ် စံး၀ဲန့ၣ်လီၤႉ

ဘၣ်ဆၣ်မ့မ့ၢ် KNU တကပၤ စံး၀ဲလၢ တၢ်ဖီၣ်၀ဲဒၣ်ၦၤသ၀ီဖိတၢ်ဂ့ၢ်အပူၤ လီၢ်က၀ီၤဖိတဖၣ်အံၤ လၢကျဲပူၤတၢ်ကွၢ်အ၀ဲသ့ၣ်လီၤဆီအဃိ ဖဲတၢ်ကိးသမံသမိးအီၤအဆၢကတီၢ် တၢ်ထံၣ်န့ၣ်၀ဲဒၣ်ကသံၣ်မူၤဘှီးလၢအ၀ဲသ့ၣ်အအိၣ်အဃိ တၢ်ဖီၣ်၀ဲဒၣ်အ၀ဲသ့ၣ်ဒီး လၢအဘၣ်ထွဲ KNU ကသံၣ်မူၤဘှီးတၢ်သိၣ်တၢ်ဘျၢအသိး တၢ်ဟံအရ့ဟံးထီၣ်ဖီၣ်ထီၣ်ကန့ၢ်အဂီၢ် တၢ်ဖီၣ်ဃာ်၀ဲဒၣ်လီၤအဂ့ၢ်န့ၣ်စံး၀ဲန့ၣ်လီၤႉ

လီၢ်က၀ီၤဖဲန့ၣ်သ့ၣ်တဖၣ်န့ၣ် အပူၤကွံာ်မ့ၢ်၀ဲဒၣ် KNU ဟူးဂဲၤဟီၣ်က၀ီၤဒီး တၢ်မၤ၀ဲဒၣ်တၢ်ဖီၣ်တၢ်သမံသမိးဒ်ခဲအံၤအသိးဒီး ပဒိၣ်အတၢ်ထီဒါဒုးသ့ၣ်ညါ၀ဲအဖီခိၣ်စ့ၢ်ကီး ကက့ၤခီၣ်ဆၢကဒါ၀ဲအသိး ၦၤလၢတၢ်ဖီၣ်ဃာ်၀ဲတဖၣ်အံၤစ့ၢ်ကီး ကဘၣ်ဟ့ၣ်လီၤကဒါက့ၤအီၤအဂီၢ် တၢ်ရဲၣ်တၢ်ကျဲၤတအိၣ်ဘၣ်အဂ့ၢ် KNU ဒူပျာ်ယာ်ကီၢ်ရ့ၣ် နဲၣ်ရွဲၣ် ပဒိၣ်စီၤလ့ၣ်စတၣ် စံး၀ဲန့ၣ်လီၤႉ

“မ့ၢ်ဘၣ်တဲတၢ်လီၢ်အ၀ဲအံၤန့ၣ် ပၣ်၀ဲဒၣ်လၢ သုးက့(၆) ကီၢ်ဆၣ် ၄ ခါ အကျါ ၀ီၢ်ရီကီၢ်ဆၣ်အပူၤန့ၣ်လီၤႉ တၢ်လီၢ်အ၀ဲအံၤ အပူၤကွံာ်လၢညါန့ၣ် မ့ၢ်လီၢ်က၀ီၤလၢပၦၤတဖၣ်ဟူးဂဲၤ၀ဲအဃိ တၢ်လူၤဖီၣ်၀ဲဒၣ် တၢ်မူၤတၢ်ဘှီးတဖၣ်အိၣ်၀ဲလီၤႉ အပူၤကွံာ်လၢညါလံၤလံၤန့ၣ် တၢ်တၢၣ်ပီၣ်တၢ်မုာ်တၢ်ခုၣ်အပူၤ ခီဖျိလၢတၢ်ပာ်ပနီၣ်၀ဲဒၣ်ဟီၣ်က၀ီၤတန့ၢ်၀ဲဘၣ်အဃိ အ၀ဲဟူးဂဲၤတၢ်လီၢ်ႇ ပ၀ဲဟူးဂဲၤတၢ်လီၢ်အပူၤ အိၣ်ဟူးဂဲၤ ဒ်အလီၢ်လီၢ်အဃိ တၢ်အံၤလၢကဘၣ်နုာ်လီၤမၤတံာ်တာ်တၢ်အလီၢ်တအိၣ်ဘၣ်ႉ ပ၀ဲဒၣ်စ့ၢ်ကီး တနုာ်လီၤမၤတံာ်တာ်တၢ်ဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

ၦၤလၢဘၣ်တၢ်ဖီၣ်၀ဲဒၣ်တဖၣ်အံၤ ဘၣ်တၢ်ပၢၤဃာ်အ၀ဲသ့ၣ်လၢ KNU ၀ီၢ်ရီကီၢ်ဆၣ်၀ဲၤဒၢးဒီး ကညီဒီကလုာ်ပၢၤကီၢ်သုး(KNPF)အံၤ ကဟံးအရ့ဟံးထီၣ်ဖီၣ်ထီၣ်၀ဲလီၤအဂ့ၢ်န့ၣ် ပဒိၣ်စီၤလ့ၣ်စတၣ် ဆဲးစံး၀ဲန့ၣ်လီၤႉ

KNU ဒီး ပဒိၣ်ႇသုးမုၢ်ဒိၣ် အဘၢၣ်စၢၤ မၤ၀ဲဒၣ်တၢ်တၢၣ်ပီၣ်သကိးတၢ်မုာ်တၢ်ခုၣ်လၢ ၉ နံၣ်ဃၣ်ဃၣ်ဒီး ဆဲးလီၤ၀ဲဒၣ်တၢ်ပတုာ်တၢ်ခးအလံာ်ဃံးဃာ်(NCA)န့ၢ်၀ဲဘၣ်ဆၣ် တုၤလၢခဲအံၤတစု ဘၣ်ထွဲတၢ်ဘံၣ်တၢ်ဘၢဒီး ဘၣ်ထွဲသုးဂ့ၢ်၀ီသ့ၣ်တဖၣ်ႇ ဟီၣ်က၀ီၤတၢ်ပာ်ပနီၣ်တၢ်ဂ့ၢ်သ့ၣ်တဖၣ် တၢၣ်ပီၣ်သကိး၀ဲတန့ၢ်ဒံးဘၣ်အဃိ ဟီၣ်က၀ီၤတၢ်ဂ့ၢ်လိာ်ဘှီလိာ်တၢ်ဂ့ၢ်ကီဒ်ခဲအံၤတဖၣ်ႇ ဘၣ်ထွဲခံခီခံကပၤ ပြၢပြးတၢ်ဂ့ၢ်တဖၣ် တပၤဒီးတပၤ တၢ်ထီဒါတဖၣ် အိၣ်ထီၣ်၀ဲဒၣ်တလီၢ်လီၢ်န့ၣ်လီၤႉ