လါမးရှး ၂၆ သီ, ၂၀၂၆ နံၣ်, ခ့ၣ်အဲးစံၣ်
လၢကလဲၤမၤပှဲၤအါထီၣ်အဂံၢ်ဘါလၢခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤ ကတၢတံၥ်ဒီးဖၣ်ပူၣ်သုးကလၢၤအံၤ အဂီၢ် ပယီၤသုးပၥ်ဖှိၣ်သ့ၣ်တဖၣ်အံၤဟဲထီၣ်ဝဲအဘျီတဖၣ်အဘျီဘၣ်ဆၣ်တုၤလၢခဲအံၤထီၣ်ဝဲဆူညါတန့ၢ်ဒံးဘၣ်အဂ့ၢ်န့ၣ် သ့ၣ်ညါဘၣ် န့ၣ်လီၤ.
ဖၣ်ပူၣ်သုးကလၢၤဒီးကတၢတံၥ်သုးကလၢၤ(၂)ဖျၢၣ်လၢပယီၤသုးဂုၥ်ကျဲးစၢးဆှၢထီၣ်(စစ်ကူ)လၢတၢ်ဆၢကတီၢ်န့ၢ်ဝဲ(၂)နံၣ်ဃၣ်ဃၣ် အံၤန့ၣ် လၢကမၤမိၢ်ဝ့ၢ်အံၤတဆီတဘျီလၢ်လၢ်ဖဲပယီၤသုးပၥ်ဖှိၣ်ကတီၤသးလၢကလဲၤထီၣ်အခါန့ၣ်ခီဖျိဘၣ်တၢ်ခိးခးအဝဲသ့ၣ်လၢ (သုးက့ ၅)အပှၤအဃိ တုၤလၢခဲအံၤဆဲးလဲၤဆူညါတန့ၢ်အိၣ်ဒံးဝဲဖဲဝါဒူတၢ်လီၢ်အံၤန့ၣ်လီၤ.
ဒ်န့ၣ်အသိးဖဲမဟါလါမးရှး ၂၅ သီအနံၤ လၢကလဲၤထီၣ်ဆူသုးကလၢၤသ့ၣ်တဖၣ်အံၤအဂီၢ် ပယီၤသုးဒီးသုးခိးကီၢ်ဆၢ(BGF), ဘူးဒးစၢၤကညီသုးမုၢ်ဒိၣ်(DKBA)သုးပၥ်ဖှိၣ်လၢအနီၣ်ဂံၢ်ကအိၣ်(၂၀၀)ဘျဲၣ်အံၤဟဲထီၣ်တုၤကဒီးဝဲလၢဝါဒူအဂ့ၢ်န့ၣ် (သုးက့ ၅) ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါဒ်အံၤန့ၣ်လီၤ.
“တနံၤညါအံၤလၢဖၣ်ပူၣ်လၥ်ခီကမၤမိၢ်တကပၤန့ၣ် ဒုၣ်ဒါဆှၢအါထီၣ်အနီၣ်ဂံၢ်လၢခီၣ်သုးတကပၤလၢအပၣ်ဃုၥ်ဒီး(BGF)ဒီး (DKBA)ဟဲပၥ်ဖှိၣ်ထီၣ်အသးဖဲဝါဒူန့ၣ်အနီၣ်ဂံၢ်ကအိၣ်လၢ(၂၅၀)ဃၣ်ဃၣ်ညါ.အတၢ်ပညိၣ်ခီန့ၣ်လၢကမၤပှဲၤထီၣ်ဝဲကတၢတံၥ် မ့ဝံၤန့ၣ် ကဆိကမိၣ်ဝဲလၢဆူညါတပတီၢ်ဒုကမ့ၢ်ဒၣ်ဖၣ်ပူၣ်လီၤမီၤနီၤ.ခဲအံၤအဝဲသ့ၣ်အိၣ်ဒံးဒၣ်ဖဲကမၤမိၢ်ဆၢခိၣ်ဝါဒူန့ၣ်လီၤ” အဂ့ၢ် န့ၣ် စံးဝဲန့ၣ်လီၤ.
လၢတၢ်န့ၣ်အဃိ ပယီၤသုးဒီး(BGF),(DKBA)လၢအဟဲထီၣ်ခဲအံၤတဖၣ်ဒီး အိၣ်တ့ၢ်ဃၥ်လၢအပူၤကွံၥ်တဖၣ် မ့ပၥ်ဖှိၣ် သုးဂံၢ်ဘါကအိၣ်ဝဲ (၃၀၀)ဘျဲၣ်အဂ့ၢ်န့ၣ် လီၢ်ကဝီၤ(KNLA)ပှၤဘၣ်မူဘၣ်ဒါစံးဝဲန့ၣ်လီၤ.
ဒ်န့ၣ်အသိးတကီၢ်ခါခဲအံၤကတၢတံၥ်ဒီးဝါဒူကျဲမုၢ်ဒီတကျိၤန့ၣ်ဟီၣ်ကဝီၤ(KNLA)အပှၤဒိၣ်စိဝဲအဃိ ပယီၤသုးပၥ်ဖှိၣ်လၢအဟဲထီၣ် ကဒီးခဲအံၤတဖၣ် မ့ဆဲးဟဲထီၣ်ဆူညါန့ၣ်ဒ်ညီနုၢ်အသိးတၢ်ခးလိၥ်သးကကဲထီၣ်ဝဲ အဂ့ၢ်န့ၣ် ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးအါထီၣ်ဝဲန့ၣ်လီၤ.
ကတၢတံၥ်သုးကလၢၤလၢအိၣ်ဆီလီၤသးဖဲဖၣ်ပူၣ်-ကမၣ်မိၢ်ဝ့ၢ်ဘၢၣ်စၢၤလၢပယီၤသုးကလဲၤမၤအါထီၣ်အသုးဂံၢ်ဘါအံၤ တၢ်တယး ကွၢ်ဝဲလၢသုးကလၢၤအပူၤသုးဂံၢ်ဘါကအိၣ်ဝဲလၢ(၃၀၀)ခိၣ်ဃၢၤညါ အဂ့ၢ်န့ၣ် KNLA လီၢ်ကဝီၤပှၤဘၣ်မူဘၣ်ဒါစံးဝဲအသိး သ့ၣ်ညါ ဘၣ်န့ၣ်လီၤ.
စးထီၣ်ဖဲ(၂၀၂၁)လီၢ်ခံန့ၣ် ပယီၤသုးကလၢၤလၢအိၣ်ဆီလီၤသးဖဲသုးက့(၅)ဟီၣ်ကဝီၤပူၤတဖၣ် တၢ်ပၢၢ်ဆၢသုးပၥ်ဖှိၣ် ထီၣ်မၤန့ၢ်ဝဲ အါမးဒီး ဒ်န့ၣ်အသိးသုးကလၢၤလၢအိၣ်တ့ၢ်သ့ၣ်တဖၣ်ခီဖျိတၢ်လဲၤကဝီၤခးဝဲအဃိ သုးမီၤစိရိၤအံၤဒ်သိးသတဘၣ်ဟ့ၣ်ဆှူ ကဒီးအ ကလၢၤတဂ့ၤ အဂီၢ် ဖဲဟဲထီၣ်အခါဃ့ဝဲတၢ်မၤစၢၤလၢဟီၣ်ကဝီၤ(BGF)အံၤအသိးစးထီၣ်ဖဲ(၂၀၂၅)အံၤစ့ၢ်ကီးအါထီၣ်ကဒီး လၢ(DKBA)ကရူၢ်လၢအဘၣ်တၢ်တီခိၣ်ရိၣ်မဲအီၤလၢသုးခိၣ်ဘိၤဘံၣ်အံၤန့ၣ်လီၤ.
ဒ်န့ၣ်အသိးဖဲပယီၤသုးပၥ်ဖှိၣ်ဂုၥ်ကျဲးစၢးဟဲထီၣ်မၤအါအဂံၢ်အဘါအကတီၢ်အံၤ အဘူးကတၢၢ်ဖဲအပူၤကွံၥ်နွံအခါန့ၣ် သုးက့(၅)ဟီၣ်ကဝီၤ လူၤသီကီၢ်ဆၣ်အပူၤ ဟီၣ်ကဝီၤ(KNLA)သုးပၥ်ဖှိၣ်ထီၣ်မၤန့ၢ်ဒံးဝဲသုးကလၢၤ(၂)ဖျၢၣ်န့ၣ်လီၤ.
