လါယူၤ ၄ သီ, ၂၀၂၅ နံၣ်, ခ့ၣ်အဲးစံၣ်
သ့ၣ်ဘီဘိဒုးယၤသုးကလၢၤလၢအိၣ်ဆီလီၤသးဖဲခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ် ကီၢ်ကၠီၣ်တဲၣ်-ကီၢ်ပယီၤကီၢ်ဆၢအံၤ ဖဲမဟါလါယူၤ ၃ သီ ဟါခီ ၆း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ် ဟီၣ်က၀ီၤ(KNLA)သုးပၥ်ဖှိၣ်ထီၣ်မၤန့ၢ်၀ဲ ခဲလၢၥ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
သုးကလၢၤအံၤဖဲမဟါဂီၤခီအဆၢကတီၢ်န့ၣ်တၢ်စးထီၣ်နုၥ်လီၤခး၀ဲ တၢ်ဒုးကဲထီၣ်ဒိၣ်ဒိၣ်မုၢ်မုၢ်လၢခံခီခံကပၤအဘၢၣ်စၢၤဒီး တၢ်ဒုးဘျီ၀ဲအံၤအပူၤပယီၤသုးသံ(၃၀)ဘျဲၣ်ဒီးဃ့ၢ်ထီၣ်၀ဲဆူသ့ၣ်ဘီဘိထံ၀ၢ်ခိ မီၤလံၤခၠါ ယိၤကီၢ် တကပၤအပူၤအဂၤ(၇၀)ဘျဲၣ် အသိးတၢ်ဒုးအံၤအပူၤတၢ်မၤန့ၢ်၀ဲကျိချံပှၥ်သၣ်အါမးအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါ လၢတအဲၣ်ဒိးပၥ်ဖျါ အမံၤတဂၤ စံး၀ဲန့ၣ် လီၤ.
ဘၣ်ဃးတၢ်ဂ့ၢ်အံၤသ့ၣ်ဘီဘိပှၤဘၣ်မူဘၣ်ဒါတဂၤစံး၀ဲလၢ“သ့ၣ်ဘီဘိသုးကလၢၤဒုပှၤထီၣ်၀ံၤလၢၤလံ.ပှၤမၤန့ၢ်ကျိချံပှၥ်သၣ်ဒီဒူၣ်. အသံတနီၤကအိၣ်အဂၤ(၃၀)ဘျဲၣ်,မ့၀ံၤအလဲၤစံၣ်ထီၣ်လၢယိၤကီၢ်တကပၤန့ၣ်ကအိၣ်လၢအဂၤ(၇၀)ဘျဲၣ်ညါ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတဂီၤအံၤန့ၣ်လီၤ.
တကးဒံးဘၣ်ဒ်လီၢ်က၀ီၤပှၤဘၣ်မူဘၣ်ဒါစံး၀ဲအသိးန့ၣ် ပယီၤသုးအဂၤ(၇၀)ဘျဲၣ်လၢအဃ့ၢ်ထီၣ်ဆူယိၤကီၢ်ပူၤသ့ၣ်တဖၣ်အံၤ အကျါန့ၣ် ပၣ်ဃုၥ်၀ဲဒုးယၤခိၣ်ဒီး ပှၤသ့ၣ်တဖၣ်အံၤကတုၤလၢကၠီၣ်တဲၣ်ယိၤသုးပှၤဘၣ်မူဘၣ်ဒါအစုပူၤလံအဂ့ၢ်န့ၣ် စံး၀ဲန့ၣ်လီၤ.
ဒ်န့ၣ်အသိးဖဲမဟါတၢ်ဒုးကဲထီၣ်အကတီၢ်သုးကလၢၤအံၤသုတလီၤတဂ့ၤအဂီၢ် ကျိဖးဒိၣ်အမဲၥ်ညါကဘီယူၤလဲၤတ့ၢ်လီၤစၢၤ ၀ဲမ့ၣ်ပိၢ်(၂)ဘျီ အဃိကမျၢၢ်ဟံၣ်ဟးဂီၤလီၤပှီၢ်(၁)ဖျၢၣ်ဒီးကျိဖးဒိၣ်အက့အခီဖျိးဘၣ်၀ဲဟံၣ်ခိၣ်ဟံၣ်ကပၤ အိၣ်၀ဲအါမးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤပှၤဘၣ်မူဘၣ်ဒါအအိၣ်န့ၣ်လီၤ.
လၢန့ၣ်အမဲၥ်ညါခီဖျိလၢကဘီယူၤတ့ၢ်လီၤမ့ၣ်ပိၢ်,မ့ၣ်ပိၢ်ပိၢ်ဖးထီၣ်အကလုၢ်သီဖးဒိၣ်သီၣ်သထြုးအဃိ သ့ၣ်ဘီဘိထံ၀ၢ်ခီ မီၤလံၤခၠါ သ၀ီဖိပိၥ်မုၣ် တဂၤသးပ့ၤနီၣ်သးသံကွံၥ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲ န့ၣ်လီၤ.
“ကျိဖးဒိၣ်န့ၣ်လီၤတဲၥ်သီၣ်ဖးဒိၣ်မီၤနီၤ.အဃိအဖုးဘၣ်အသးဘျီအသွံၣ်ထီၣ်ခိၣ်ဒ်န့ၣ်ဧါသၢၣ်. ပှၤလဲၤဆှၢအီၤလၢဖိဖြးတၢ်ဆါဟံၣ် တန့ၢ်ဘၣ်ဘျီပှၤလဲၤဆှၢကဒီးလၢမဲၢ်ဆီးတၢ်ဟံၣ်ဘျီအသံလီၤ”အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲန့ၣ် လီၤ.
ဒ်န့ၣ်အသိးခံခီခံကပၤတၢ်ဒုးကဲထီၣ်ဖဲမဟါနံၤအခါစ့ၢ်ကီးကျိချံလီၤတဲၥ်၀ဲဆူယိၤကီၢ်(မီၤလံၤခၠါ)သ၀ီပူၤအဃိ ကျိအက့အခီဘၣ်၀ဲ ကမျၢၢ်ပိၥ်ခွါတဂၤအခီၣ်ကံၣ်ဒုၣ်ကဲထီၣ်ဒံး၀ဲန့ၣ်လီၤ.
ဖဲတနံၤအံၤလါယူၤ ၄ သီ ဂီၤခီ ၉ နၣ်ရံၣ်ဃၣ်ဃၣ်အဆၢကတီၢ်စ့ၢ်ကီး လၢသ့ၣ်ဘီဘိသ၀ီအပူၤကဘီယူၤလဲၤတ့ၢ်လီၤ ကဒီးမ့ၣ်ပိၢ် (၃)ဖျၢၣ်လၢသုးကလၢၤအကပိၤကပၤဒီး တကီၢ်ခါခဲအံၤသုးကလၢၤလီၤလံဘၣ်ဆၣ်ခီဖျိကဘီယူၤတၢ်လီၤဘၣ်ယိၣ်အိၣ်ဒံးအဃိ ကမျၢၢ်တဖၣ်က့ၤဆူဟံၣ်တဘူၣ်ဒံးဘၣ်အဂ့ၢ်န့ၣ် ပှၤဘၣ်မူဘၣ်ဒါစံး၀ဲန့ၣ်လီၤ.
သ့ၣ်ဘီဘိသုးကလၢၤလၢသုးနီၣ်ဂံၢ်ကအိၣ်၀ဲအဂၤ(၁၀၀)ဘျဲၣ်ခိၣ်ဃၢၤအံၤ ဖဲအပူၤကွံၥ်လါမ့ၤ ၂၂ သီအနံၤန့ၣ် တၢ်စးထီၣ်လဲၤ ခးစိ၀ဲဒီးဒြိသ့ၣ်တဖၣ်ဒီး သုးကလၢၤသုတလီၤတဂ့ၤအဂီၢ်လါမ့ၤ ၂၈ သီအနံၤ ဂီၤလ့ၤပယီၤသုးဟဲထီၣ်ဘၣ်ဆၣ် ခီဖျိတၢ်ခိးခး၀ဲလၢ စိၣ်စံမၠဲၣ် နံၣ်ထီၣ်သီပျီအဃိ သုးကျိၤအံၤဟးဂီၤ၀ဲဒီတဘိဒီးတၢ်ဖီၣ်န့ၢ်၀ဲတစှၤ(၁၅)ဂၤကဲထီၣ်ဒံး၀ဲန့ၣ်လီၤ.
