Home တၢ်ကစီၣ် ဃိၣ်သၢဖျၢၣ်၀့ၢ်ပူၤ တၢ်ခးသံကွံ၁်၀ဲ သုးကီၣ်ကး က၀ီၤဒ့သးၦၢ်တဂၤ

ဃိၣ်သၢဖျၢၣ်၀့ၢ်ပူၤ တၢ်ခးသံကွံ၁်၀ဲ သုးကီၣ်ကး က၀ီၤဒ့သးၦၢ်တဂၤ

737
0

လါမ့ၤ ၁၉ သီႇ ၂၀၂၁ နံၣ်ႇ ခ့ၣ်အဲးစံၣ်

ကညီကီၢ်စဲၣ်ႇဃိၣ်သၢဖျၢၣ်၀့ၢ်ပူၤ ဖဲတနံၤအံၤလါမ့ၤ ၁၉ သီအနံၤ တၢ်ခးသံ၀ဲက၀ီၤဒ့သးၦၢ်တဂၤလၢသုးကီၣ်ကးပာ်ထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဃိၣ်သၢဖျၢၣ်၀့ၢ်ပူၤ နီၣ်ဂံၢ်(၄)က၀ီၤဒ့ သးၦၢ်တဂၤလၢအမ့ၢ် အူကၠီၤစ့ၤမ့ လၢအအိၣ်ဖဲဒီနၣ်ကျဲ(၁)အံၤ ဖဲတနံၤညါအံၤဂီၤခီ ၉ နၣ်ရံၣ်ဘျဲၣ်အဆၢကတီၢ် ၦၤတဒူၣ်လၢတၢ်တသ့ၣ်ညါအမံၤတဒူၣ် ဟဲခးသံ၀ဲအီၤဒီးကျိဖဲတၢ်သ့ဃၢၤဆဲးကဲးသိလ့ၣ်ကျးပူၤအဂ့ၢ်န့ၣ် သ့ၣ်ညါဘၣ်လၢၦၤအိၣ်၀့ၢ်ပူၤတဖၣ်အအိၣ်န့ၣ်လီၤႉ

ကမျၢၢ်လၢအိၣ်၀့ၢ်ပူၤလၢတအဲၣ်ဒိးပာ်ဖျါအမံၤတဂၤစံး၀ဲ“ကဲထီၣ်၀ဲဖဲဂီၤခီ ၉ နၣ်ရံၣ် ၁၅ မံးနံးန့ၣ်လီၤႉ သုးကီၣ်ကးပာ်ထီၣ်အီၤလၢသးၦၢ်မီၤနီၤႇ ခီဖျိလၢသးၦၢ်အံၤအဃိ တၢ်ဖီၣ်၀ဲဃိၣ်သၢဖျၢၣ်သးစၢ်တဖၣ်အါမးလီၤႉ မ့ၢ်မတဂၤမၤ၀ဲလဲၣ်ဒုတသ့ၣ်ညါဘၣ်ႉ တၢ်လဲၤခး၀ဲလၢအကျးတၢ်သ့ဃၢၤဆဲးကဲးလီၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်=ကညီတၢ်ကစီၣ်၀ဲၤလီၢ်ခိၣ်သ့ၣ်န့ၣ်လီၤႉ

သုးကီၣ်ကး က၀ီၤဒ့သးၦၢ်အူကၠီၤစ့ၤမ့အံၤ မ့ၢ်ၦၤလၢအအိၣ်ဘှံး၀ဲဒၣ်လၢသုးပူၤလၢ သုးရ့ၣ်ခိၣ်(၂)အပတီၢ်တဂၤအသိးမ့ၢ်၀ဲဒၣ်ကီၢ်စၢဖှိၣ်သွံၣ်ဃူဖိးဒီးတၢ်ဂုၤထီၣ်ပသီထီၣ်ပၣ်တံၣ်ဖိတဂၤစ့ၢ်ကီးန့ၣ်လီၤႉ တကီၢ်ခါလၢတၢ်ကဲထီၣ်သးအလီၢ်န့ၣ် တၢ်ကးတံၢ်ဃာ်၀ဲတၢ်လဲၤထီၣ်က့ၤလီၤခဲလၢာ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ